Gèɖèpɔ́ɔ̀-wùɖùɔ̀ kpa-kpa kè nyɔ ɓě kɛ́ɖɛ́ì gbo dyà-dyà

Tɛ̀mɛ̀ìn-ɖɛ̀ nìà kɛ tɛ̀mɛ̀ìn à Báɓòɔ̀ jǎà-ɖɛ̀ ɓě ɓɛ́ wa taɓa Gèɖèpɔ́ɔ̀-wùɖùɔ̀ kpa-kpa ɓá ɓo ɖeín nyɛɛ dyí. Ké ɔ dè kà nyɔ ké Gèɖèpɔ́ɔ̀-wùɖù kpaa nyuɛɛ mɛ, ké ɔ tò tɛ̀mɛ̀ìn-ɖɛ̀ ɓě m̀ ké kũ̀à mú nyùìn ɓɛ́ m̀ ké jǎà-po-nyɔ̀ ɖìè ɓě níɔ poɛɛ jìì.

Tɛ̀mɛ̀ìn-ɖɛ̀ɔ̀ Mɛ-dè-dè

Tɛ̀mɛ̀ìn-ɖɛ̀ nìà kɛ mɔ̀ kũ̀à-mú-nyùìn-ɖɛ̀ ɓɛ́ ɔ ké cɔ́cìɔ̀ gbo kpá ɓɛ́ ɔ ké xwíníín kɔ̃̀ jè ɔ dèà dyiɛɛ dyúa kpa. Tɛ̀mɛ̀ìn-ɖɛ̀ɔ̀ tò cɔ́cìɔ̀ ɖɛ-kpa-kpa jìì, ké ɔ tɛ̀mɛ̀ìn-nyɔǔn dyí kà ɓɛ́ cɔ́cìɔ̀ dè dyi ɓó bɔ̃̌ nɔ̀mɔ̀ dyíinɔ̀ jè, ɔ jèɛɛ, bɔ̃̌ nɔ̀mɔ̀ dyíinɔ̀ mɛ po cɔ́cìɔ̀ páún wɛ̃. Tɛ̀mɛ̀ìn-ɖɛ̀ nìà kɛ sɛ́ɖɛ́ìn ɖɛ-xwa-bĩ-bĩ ɓě ɓɛ́ nyɔǔn ɓě nyu ɓó zɛ̃̌ɛ̀, ké wa se nàmàǔn gbo sɔ̀ɔ̀ ɓɛ́ìn ɓɛ́ wa ké Kɛ́ɖɛ́ì-ɖeín-nà-fɛ̀ɛ̀ cĩ́ɛɛ dyí dyììn ɖé ɖɛ kpa ɖɛ ɓě ɓá bɔ̃̌ nɔ̀mɔ̀ dyíinɔ̀ dyíɛɛ kɔ̃in-zaìn-zaìn mú. Ɔ jèɛɛ, ɖɛ-cɛ̃́-nyɔ̀ɔ̀ mu ɖɛ hwɛ̀ìn ɓɛ́ ɔ ké ɔ cɔ́cìɔ̀ mú zaìn.

Cɛ̃́ɛ́-ɖɛ̀ ɓě nìà ɖé Tɛ̀mɛ̀ìn-ɖɛ̀ɔ̀ múɛɛ, m̀ ɓɛ́ìn wa pàɖǎ kɔ̃in-wùɖùìn-ɖɛ̀ gàná ɓě mú nyuɛ ɓɛ́ m̀ ké wa kpoo-dù kò-kò ɓě tɛ̀mɛ̀ìn. Ɔ hwɔìn kà m̀ ɓɛ́ìn cɛ̃́ɛ́-ɖɛ̀ɔ̀ ɖò tɛ̀mɛ̀ìn ɓɛ́ ɔ ké bɔ̃̌ nɔ̀mɔ̀ dyíinɔ̀ da zà.

Ɖé tɛ̀mɛ̀ìn-ɖɛ̀ nìà kɛ múɛɛ, ɖɛ-cɛ̃́-nyɔ̀ ɓěɔ̀ muɛ cɛ̃́ìn kà wa ké ɖeín-nà-nyɔ̀ dyi mɔ́ɔ nyuɛ. Shepherds Global Classroom ɖǎ ɖeín-nà-nyɔ̀ jǔ-jǔɛ̀ cɛ́è-ɖɛ̀ ɖò nyu, jɛ́ɛ́ kɛɛ ɓó jǎà-po-nyɔ̀ ɖìè ɓě bìì. Ɖeín-nà-nyɔ̀ jǔ-jǔɛ̀ tɛ̀mɛ̀ìn-ɖɛ̀-cèè-ɖɛ̀ɔ̀ nyɛ́nɛ́ mɔ̀ Ɖeín-nà-nyɔ̀ jǔ jè Ɓá-ɓo-ɖeín-taɓa-cèè-ɖɛ̀, ké m̀ ɓɛ́ìn tɛ̀mɛ̀ìn-ɖɛ̀ nìà kɛ Íntɔ̀nɛ́ɛ̀ kɔ̃ zàà ɖé dà nìà kɛ: shepherdsglobal.org. Cɛ̃́ɛ́-ɖɛ̀ kpáɖá-nyɔ sè mɛ̀nɛ̌ìn-ɖò ɓě nìà ɖé Ɖeín-nà-nyɔ̀ jǔ jè Ɓá-ɓo-ɖeín-taɓa-cèè-ɖɛ̀ɔ̀ múɛɛ ɓéɖé ɖɛ-tɛ̀mɛ̀ìn-nyɔ̀ nììn hwìè-xwíníín-po-ɖìfèɖè, ké ɔ ɓéɖé ɖɛ-cɛ̃́-nyɔ̀ nììn ɖífèɖè ɖekè.

Cɛ̃́ɛ́-ɖɛ̀ɔ̀ Hwòɖǒ-kpàìn-ɖɛ̀ ɓě

(1) Ɓɛ́ m̀ ké ɖɛ bɔ̃̌ nɔ̀mɔ̀ dyíinɔ̀ nyuɛɛ kɔ̃in zaìn ɓɛ́ìn ɓó ɖɛ ɓɛ́ cɔ́cìɔ̀ jǔɛ kè kà ɔ nyu nìɛ̀ kɛɛ jè

(2) Ɓɛ́ m̀ ké bɔ̃̌ nɔ̀mɔ̀ dyíinɔ̀ tɛ̀mɛ̀ìn-ɖɛ̀ ɓěɔ̀ jè múin gmɔìn ɓɛ́ìn

(3) Ɓɛ́ m̀ kéɛ jǎà-po-nyɔ̀ ɓě tɛ̀mɛ̀ìn kà wa ké bɔ̃̌ nɔ̀mɔ̀ dyíin kpaa nyu dyììn ɖéɛ xwai-nyu-nyu múɛ

(4) Ɓɛ́ wa ké ɖɛ cɔ́cìɔ̀ ɓéɖé ɓɛ́ ɔ ké nyu ɖé ɖeín-nà-nyɔ̀ dyi-mɔ́-mɔ́ múɛɛ múin wɔ̃́

(5) Ɓɛ́ wa ké kũ̀à mɔ̀à ɖeín-nà-nyɔ̀ dyi-mɔ́-mɔ́ kɛɛ xwíníín dyuò kè ɓɛ́ wa kéɛ mɛ dè

(6) Ɓɛ́ wa ké kpoo-dyù ɖò ɓá ɖeín-nà-nyɔ̀ dyi mɔ́ jè dyíɛɛ nàìn dyuò

(7) Ɓɛ́ wa ké tɛ̀mɛ̀ìn-ɖɛ̀ ɓě wa ɓɛ́ìn dyí ɖúɛ ɓɛ́ wa ké jǎà-po-nyɔ̀ ɖìè ɓě ɖeín-nà-nyɔ̀ mú nyuɛɛ páún poɛ ɓɛ́ìn

Ɖɛ ɓě Ɖɛ-cɛ̃́-cɛ̃́ɔ̀ nàìn-nyɔ̀ɔ̀ ɓěɔ̀ ké nyuɛ kè hwìè ɓě ɔ ké kpaa

Ɖɛ ɓě ɓɛ́ ɖɛ-cɛ̃́-cɛ̃́-nàìn-nyɔ̀ ɓěɔ̀ ké nyuɛɛ hwɔ dyi ɖé tɛ̀mɛ̀ìn-ɖɛ̀ɔ̀ dà séín, ké jìì-kɔ̃-nɛ́ìn-ɖɛ̀ jɛ́ɛ́ ɓě nì ɖé cɛ̃́ɛ́-ɖɛ̀ ɓěɔ̀ dà ɖíɛ́ ɓě. Wa nì céè-dèɖè gbìàìn dyi nì kàà mú.

Dyi-diè-ɖɛ̀ ɓě wa ké dɔ́ɔ́ kɔ̃in dèìn nyɛ kè xwai-nyu-ɖɛ̀ ɓé nì ɖé ɖɛín-cɛ̃́ìn-ɓì-dyùɔ̀ múɛɛ ɓéɖé bɛ̃̌ nì kàà ►. Ɓá dyi-diè-ɖɛ̀ ɓě wa kéà dɔ́ɔ́ kɔ̃in dèìn nyɛɛ jè dyíɛɛ, ɖɛ-cɛ̃́-cɛ̃́ɔ̀ nàìn-nyɔ̀ɔ̀ mɛ diè ɖɛɔ̀ dyi, ɓɛ́ ɖɛ-cɛ̃́-nyɔ̀ ɓěɔ̀ kéɛ gɔ̃̌ jǔ. Wa se ɓéɖé ɓɛ́ wa ké dyi diè-ɖɛ̀ɔ̀ gɔ̃̌ jǔ nìɛ̌-nìɛ̌ ɖé dɔ́ɔ́-dè-dèɔ̀ mú wɛ̃́ɛ́. Cɛ̃́ɛ́-ɖɛ̀ɔ̀ mu ɔ mìɔùn nììn dyi-diè-ɖɛ̀ɔ̀ gɔ̃̌ jǔùn. Ɔ jǔ ké ɖɛ-cɛ̃́-nyɔ̀ ɓěɔ̀ dyúáɖò dyi dyi-diè-ɖɛ̀ ɓěɔ̀ gɔ̃̌-jǔ-nyɔ̀ jǔ kĩ́ín ní, mɔɔ ɔ jǔ ké ɖɛ-cɛ̃́-nyɔ̀ ɓěɔ̀ ɖíɛ́ ɓě ní wùɖù fɔɔ ní, nìí, nàìn-nyɔ̀ɔ̀ mɛ tò dyi-diè-ɖɛ̀ɔ̀ nyɔ ɖò dyí. Ɔ hwɔìn kà: “Àzédyà, xwɛ̌ m̀ ɓɛ́ìn dyi-diè-ɖɛ̀ nìà kɛ gɔ̃̌ jǔɛ nyuɛ kɛ́?”

Cɛ̃́ɛ́-ɖɛ̀ ɓěɔ̀ séín jɛ̀ɖɛ̀ìn taún-kũ̀à dúí. Wa mɛ hwɔ waà taún-kũ̀à ɓěɔ̀ nyuɛ, ɓɛ́ wa ké wa tò hwɛ̀ ɓɛ́ ɖɛ-cɛ̃́-tìɔ̀ nyɔ mu ɓó dyí kɔùn wɛ̃ɛ ké nyini. Ɔ jǔ ké ɖɛ-cɛ̃́-nyɔ̀ ɖò se ɔ nììn taún-kũ̀àɔ̀ hwɔ ní, nìí, ɔ ɓɛ́ìn nyuɛ ke. Kɛɛ wɛ̃́ɛ́ kɛɛ, nàìn-nyɔ̀ɔ̀ mɛ kùìn ɖɛ-cɛ̃́-nyɔ̀ ɓěɔ̀ hwòɖǒǔn ɓɛ́ wa ké ɖɛ ti kɔ̃ nyùìn, nìí ɓɛ́ wa ké ɖɛ pàɖǎ cɛ̃́.

Ɖɛ-cɛ̃́-nyɔ̀ ɓěɔ̀ mu taún-kũ̀à kúɖúú kò-kò ɓě céèìn. Ɖɛ-cɛ̃́-cɛ̃́ɔ̀ nàìn-nyɔ̀ɔ̀ mɛ kpɔ̃ taún-kũ̀à ɓě ɓɛ́ wa mu céèìn kɛɛ wa xwai ɓó ɖɛ-cɛ̃́-cɛ̃́ɔ̀ gbɔ-dè-tìǐn. (Taún-kũ̀à ɓěɔ̀ sɔ̃́, ɔ hwɔìn kà: (Cɛ̃́ɛ́-ɖɛ̀ 6, Taún-kũ̀à 1, kè Cɛ̃́ɛ́-ɖɛ̀ 14, Taún-kũ̀à 1), wa se ɓéɖé ɓɛ́ wa kéɛ tò, kɛɛ wa mɛ cɛ̃ ɖɛ ɓě wa ɖǎà céè ɓá taún-kũ̀à ɓěɔ̀ jè dyíɛɛ pū)

Ké ɖeɛɛ, ɖɛ-cɛ̃́-nyɔ̀ ɓěɔ̀ mu bɔ̃̌ nɔ̀mɔ̀ dyíinɔ̀ jè nyɔ ɓáún-ɓáún gbo cɛ̃ìn, kà wa nyuà cɛ̃́ɛ ɖé ɖɛ-cɛ̃́-naínɔ̀ kɛ. Ɔ jǔ ké wa ɖǎ bɔ̃̌ nɔ̀mɔ̀ dyíinɔ̀ jè nyɔ ɓěɔ̀ gbo cɛ̃ɛ hwɔ ní, nìí, wa mu ɖɛ ɓě wa mùìn ɖé múɛɛ jè ɓíɖíi céèìn, ɓɛ́ wa kéɛ cɛ̃ ɖé ɖɛ-cɛ̃́-naínɔ̀. Wa mu Gèɖèpɔ́ɔ̀-wùɖù ɖò ɓá bɔ̃̌ nɔ̀mɔ̀ dyíin kpa jè dyíɛɛ páún poùn ɓó nyɔ vɛ̀nɛ̀ ɓě bìì, ké wa mu cɛ̃́ɛ́-ɖɛ̀ ɖò páún poùn ɓó dyú-gbɔ́ɔ́ ɓě bìì ɖekè. Tɛ̀mɛ̀ìn-ɖɛ̀ nìà kɛ ɓéɖé sɔ̃-kɔ̃ún-dyi-po-po kĩà dyí sɔ̃́, ké wa nì cɛ̃́ɛ́-ɖɛ̀ 5 kè 10 mú. Ɖé sɔ̃-kɔ̃ún-dyi-po-po ɓě nìà kɛ múɛɛ, ɖɛ-cɛ̃́-nyɔ̀ ɓěɔ̀ mɛ zà waà gɔ̃̌-jǔ-wùɖù ɓěɔ̀ hwòɖǒ-bũ̌, ké wa mɛ ɓɔ́ céè-ɖɛ̀ ɖò kɔ̃ gmɔ̀ɔ̀, mɔɔ ké nyɔ ɖò ní ɖá ɔ ké ɔ mǔè ɖò gbo wùɖù. Ɖɛ-cɛ̃́-cɛ̃́ɔ̀ nàìn-nyɔ̀ɔ̀ se sɔ̃-kɔ̃ún-dyi-po-poɔ̀ gɔ̃̌-jǔ-ɖìfèɖè ɖò ɓéɖéɛ mu, sepóɛɖé gɔ̃̌-jǔ-wùɖù ɓěɔ̀ séín nì ɖé sɔ̃-kɔ̃ún-dyi-po-poɔ̀ mú.

Ɖé cɛ̃́ɛ́-ɖɛ̀ 13 múɛɛ, wa zàìn ɖé nyɔ hwìè da kà nyɔ ké céè-ɖɛ̀-gmùnù ɓě ɓá bɔ̃̌ nɔ̀mɔ̀ dyíinɔ̀ dyíɛɛ geɛ̀n nyuɛ. Ɖɛ-cɛ̃́-nyɔ̀ ɓěɔ̀ mu dɛ̀ wa ké céè-ɖɛ̀-gbùnù ɓě zà ɓɛ́ wa ké wa geìn nyɛɛ dyuòùn. Ɔ dyi xwa fɛ̃́ìn ní, m̀ mɛ dyà céè-ɖɛ̀-gmùnù ɖíɛ́ ɓě ɖé ɖɛ-cɛ̃́-cɛ̃́ nìà ɓóɛɛ mú.

Ɔ jǔ ké ɖɛ-cɛ̃́-nyɔ̀ ɖò dyi mɔ́ ɓɛ́ ɔ ké hwɛ̀-ɖìfèɖè dyé ɖé Shepherds Global Classroom gbo ní, ɔ mɛ mu ɖɛ-cɛ̃́-cɛ̃́ɔ̀ gbo ti séín, ɓɛ́ ɔ ké ɔ taún-kũ̀à séín ɓěɔ̀ nyuɛ hwɔ. Ɖífèɖè ɖò nì ɖé tɛ̀mɛ̀ìn-ɖɛ̀ɔ̀ dúí-jɛ̀ɖɛ̀ìn-naín ɓó taún-kũ̀à ɓě ɓɛ́ m̀ hwɔ nyuɛ kɛɛ céè jè.