Lesson 4: Ɖɛ Kpa Ɖɛ Ɓě Ɓɛ́ Bɔ̃̌ Nɔ̀mɔ̀ Dyíinɔ̀ Tò Jìì Kɛ

Nyɔɛ ɓɛ́ nyɔ ɖò ké vɔ́sì ɓá jìì-tò-ɖɛ̀ ɖò-ɖò ɓěɔ̀ dyíɛɛ wuɖuún zà. Ɔ ɖǎ ná nìǐn, nyɔ ɖò mɔ̀ùn mɛ zaìn jìì-tò-ɖɛ̀ɔ̀ jè kɔ̃in. Ɖɛ-cɛ̃́-nyɔ̀ ɓěɔ̀ mɛ dèìn dyi-diè-ɖɛ̀ ɓá dɔ́ɔ́ kɔ̃in-dèìn-ɖɛ̀ ɓěɔ̀ ɖò-ɖò dyíɛɛ dɔ́ɔ́ kɔ̃in.

Jìì-tò-ɖɛ̀ ɓě kɔ̃̀ jè céèà dà ɓíɖíiɛɛ kpa ɖɛ mìɔ ɓó bɔ̃̌ nɔ̀mɔ̀ dyíinɔ̀ cɛ̃ jè. Ɔ fɛ̃́ìn xwa ɓɛ́ nyɔ ɖò ké gbo zĩàìn, kɛbì ɔ mɛ se wa múin wɔ̃́ nɔ̀mɔ̀ dyíin nyɛ. Kɛɛ wɛ̃́ɛ́ kɛɛ, ɔ jǔ ké m̀ dyi ɖɛ ɓě nìà kɛ ɖò jè mú doìn ní, nìí, ɔ ɓɛ́ìn nyuɛ ɓɛ́ bɔ̃̌ nɔ̀mɔ̀ dyíinɔ̀ ké hwìǐ sɔ̀ìn. Ɔ jǔ ké nyɔ ɖò mɔɔ kpoo ɖò dyi jìì-tò-ɖɛ̀ kpa ɖɛ ɓě nìà kɛ ɖò jè mú doìn ní, nìí, ɔ nì vɔ̃uń ɓɛ́ ɔ ké bɔ̃̌ nɔ̀mɔ̀ dyíin kà kò ɖò dyà, ké ɔ nì pó-pó-hwìɔ̀ nyɔ se jǎà kɛɛ kíɖíí síɛń.

M̀ dyi nyɔ ɖò bɔ̃̌ nɔ̀mɔ̀ dyíinɔ̀ gbo cɛ̃ ní, ɔ wáká ɖíɛ́ ɓě mu dyɛ̀ ɖɛ kpaùn ɖé ɔ gbo, sepóɛɖé ɓó ɖɛ se jǎà ɓě ɓɛ́ ɔ ɖǎà jǎà po nɔ̀ɔ̀ kɛɛ jè. Ɔ hwɔìn kà, ɔ jǔ ké nyɔɔ̀ dyiɛ jǎà po kà ɓɛ́ nyɔ ɓɛ́ìn póɛ dyiìn ɖé kpoo ɖò mú ɖòùn wɛ̃ɛ ní, nìí, ɔ poɛ jǎà kà ɓɛ́ ɔ dyi kpoo mú kpáín, ɔ mu póùn wɛ̃. Kɛɛ ɔ mɛ dyuòɛ̀ kà ɓɛ́ nyɔ ɖò-ɖò séín ɓéɖé ɓɛ́ ɔ ké Gèɖèpɔ́ɔ̀ nyɔ-kɔ̃in-zĩ̀ìn-zĩ̀ìnɔ̀ wáká ɖò jǔ, ɓɛ́ gbo-kpɔ̃ìn-kpɔ̃ìn ké ɓó ɔ kè Gèɖèpɔ́ɔ̀ pṹa nì gàná cá kɛ.

(1) Gèɖèpɔ́ɔ̀ mɛ ma gàa kè màa kà ɔ mìɔùn nìà kɛ, ɓɛ́ gbo-kpɔ̃ìn-kpɔ̃ìn ké ma ɓó ɔ kè wa pṹa nì. (Jɛ́nɛ́sì 1:27, Àpɔ́sò 17:24-28).

Ɖɛ nìà kɛ mɔ̀ jǎà, ké ɔ tò xwíníín kɔ̃̀ jè à cĩ́à kɛ kè ɖɛ à ɓéɖé à ké nyu hwɛ̀ ɓɛ́ à ké póɛɛ jìì. Ɓiè-kpòò ɓě ɓɛ́ wa se Bounɓo mɔ̀ nyɔ nìà ɖɛ séín kɔ̃in nyɛɛ hwìɖǐǐ taɓaa, wa zàìn jǎà-ɖɛ nìà kɛ hwìǐ. Jǎà-ɖɛ̀ nìà kɛ tɛ̀mɛ̀ìn fũ̀à-fṹá-ɖɛ̀ jɛ́ɛ́ nìà ɓóɖó-kpàà kɔ̃ɛɛ nyɔǔn dyí. Fũ̀à-fṹá-ɖɛ̀ɔ̀ mɔ̀, gbo-kpɔ̃ìn-kpɔ̃ìn se ɓó nyɔ ɖíɛ́ ɓě kè Gèɖp̀eɔ́ɔ̀ pṹa nì.

► Ké, ɔ jǔ ké nyɔɔ̀ seɛ ma hwìɖǐi poin kĩ́ín kà ɓɛ́ Gèɖèpɔ́ɔ̀ ɖɛ̀ɓɛ̀ ɔ múɛɛ ní ɖé?

(2) Nyɔ kĩ́ín-kĩ́ín ɓě ɓɛ́ Gèɖèpɔ́ɔ̀ mɛ maa nyu ma nàmàǔn, ké wa kè Gèɖèpɔ́ɔ̀ zaìn ma gbo (Jɛ́nɛ́sì 3:3-6).

Ɖɛ nìà kɛ tɛ̀mɛ̀ìn dɛ̀ ɓɛ́ nàmàǔn dèìn gbɔɛ kè fũ̀à-fṹá-ɖɛ̀ nìà ɓóɖó-kpàà kɔ̃ɛɛ à dyí. Nàmàǔn nyuɛ ké gǎ-dyé-dyé kè wìì-ɖɛ̀ kúɖúú dyíìn ɓóɖó-kpàà kɔ̃in. Kɛɛ múà kè hwòɖǒ-po-naín nì ní ke, sepóɛɖé kǎà Gèɖèpɔ́ɔ̀ nyuɛ ma dyí sɔ́ɔ. Kɛɛ ɓóɖó-kpàà se nì kà Gèɖèpɔ́ɔ̀ nyuɛ ma mɔ́ɔ kɛ.

► Ké, ɔ jǔ ké nyɔ ɖò mɔ̀ùn seɛ ma jǎà po kà ɓɛ́ nàmàǔn mɔ̀ nyɔ nìà ɓóɖó-kpàà dyíin nyìnìɛ̌n nyɛ̀ ní ɖé?

(3) À ɖò-ɖò séín wóɖó, ké à kè Gèɖèpɔ́ɔ̀ zaìn gbo, ké à jaɖa ɔ wuɖu mú (Wóɖómà 3:10, 23).

Zaa ɖǎ nyɔ séín kpɔ̃ ɓó nàmàǔn ɓě ɓɛ́ à nyu Gèɖèpɔ́ɔ̀ bũ̌ gmɔ̀ǐn-gmɔ̀-kà kɛɛ jè. Nyɔ ɖò se nì ɓɛ́ ɔ ké ɖɛ mɔ̀ ɖɛ sɛ́ɖɛ́ìn dyíɛɛ nyu tee.

► Kɛɛ ɔ jǔ ké nyɔ ɖò dyiɛ cɛ̃ kà ɓɛ́ ɖɛ ɓě nyuɛɛ sɛ́ɖɛ́ìn dyí, ké ɔ ɓɛ́ìn ɔ nyuu-ɖɛ̀ ɓěɔ̀ ɓá ɓo ɖeín taɓaa kɛɛ ní ɖé?

(4) Nàmàǔn-nyɔ̀ séín ɓɛ́ ɔ ɓɔ́ Gèɖèpɔ́ɔ̀ wììɔ̀ kɛɛ, zaa mu ɔ kpɔ̃ùn ké ɔ mu gǎ dyéìn ɓó sè-ná-sèɛ̀ tiín (Híìbúɖúù 9:27, Wóɖómà 14:12, Wɛ̀ɖɛ̀ɓèɖésĩ̀ɔ̀ 20:12).

Ɖɛ nìà kɛ xwíníín mɔ̀ nàmàǔn-nyɔ̀ɔ̀ mɛ ku dúún, ɓɛ́ pó-póɔ̀ jè ké ɔ hwòɖǒ kpɔ̃ xwéé.

► Ɔ jǔ ké nyɔɔ̀ seɛ jǎà po kà ɓɛ́ mú-hwɛ̀ Gèɖèpɔ́ɔ̀ ɖò nì ɓó, ké ɔ kpá dyoɖoún ɓó ɔ nàmàǔn ɓěɔ̀ jèɛɛ ní ɖé?

(5) Nyɔ ɖò se ɖɛ ɖò nyuɛ ɓɛ́ìn ɓɛ́ ɔ ké nàmàǔn ɓě ɓɛ́ ɔ ɖǎà Gèɖèpɔ́ɔ̀ bũ̌ nyuɛɛ jè pɛ́ɛ̀ (Wóɖómà 3:20, Ìfísĩ̀ɔ̀ 2:4-9).

Kũ̀à nɔ̀mɔ̀ dyíin ɓě kè nyíí-ɖɛ̀ ɓě se nàmàǔn jè pɛ́ɛ̀ ɓɛ́ìn, sepóɛɖé, Gèɖèpɔ́ɔ̀ ɓɛ́ nyɔǔn seà dyéɛ ɓɛ́ìn, ɓɛ́ ɔ kɔ̃̀à ɖɛ séín wuɖuíɛɛ nyɛ́ nàmàǔn mú.

► Ɔ jǔ ké nyɔ ɖò dyiɛ hwìɖǐi poìn kà ɔ ɓɛ́ìn ɖɛ ɖò nyuɛ ɓɛ́ Gèɖèpɔ́ɔ̀ ké ɔ kɔ̃in zĩ̀ìn nyɛɛ ní ɖé?

(6) Xwíníín ɓě kɔ̃̀ jè Gèɖèpɔ́ɔ̀ ké nyɔ ɖò kɔ̃in zĩ̀ìn nyɛɛ, ɔ mɛ dyéɛ ɖéɛ nyɔɔ̀ mú hwɛ̀, sepóɛɖé nàmàǔn mɔ̀ ɖɛ vɛ̀nɛ̀ cá, ké Gèɖèpɔ́ɔ̀ sɛ́ɖɛ́ìn dyí (Wóɖómà 3:25-26).

Gèɖèpɔ́ɔ̀ hwòɖǒ-kpɔ̃-ɖɛ̀ mɔ̀ ɓɛ́ ɔ ké nyɔǔn-dyù kɔ̃in zĩ̀ìn, kɛɛ ɔ jǔ ké xwíníín ɓě kɔ̃̀ jè ɔ kéà m̀ kɔ̃in zĩ̀ìn nyɛɛ se dyí sɛ́ɖɛ́ìn ní, nìí, nyɔǔn mu nàmàǔn dyéɖé kɔ̃in wã̀ìn, ké ɔ mu nììn pū kà Gèɖèpɔ́ɔ̀ seɔ́ kà dyí sɛ́ɖɛ́ìn-nyɔ̀ kɛ.

► Ɖɛ́ kɔ̃̀ jè Kɛ́ɖɛ́ì mɛ́-mɛ́ɔ̀ kpa ma kà ɖɛ mìɔ kɛ́?

(7) Jízɛ̀ mɔ̀à Gèɖèpɔ́ɔ̀ Dyú-gààɔ̀ kɛɛ cĩ́ ma fɛ̀ɛ̀ ɓɛ́ nàmàǔn ɖò se mú nìɛ, ké ɔ nyu ma ɔ mìɔùn sáa-zàìn-ɖɛ̀ mú, ké ɔ mɛ́ ma, ɓɛ́ Gèɖèpɔ́ɔ̀ ké à nàmàǔn ɓěɔ̀ kɔ̃in zĩ̀ìn (Jɔ̃́ɔ́ 3:16, Wóɖómà 5:8-9).

Sepóɛɖé Jízɛ̀ mɔ̀ Gèɖèpɔ́ɔ̀ Dyú-gààɔ̀ jèɛɛ, ɔ sáa-zà-zàɔ̀ ɓéɖé sè-ná-sèɛ̀ ɖɛ-kpa-kpa, ké ɔ tò xwíníín ɓě kɔ̃̀ jè Gèɖèpɔ́ɔ̀ ké nyɔ séín ɖò kɔ̃in zĩ̀ìn dà ɓóɖó-kpàà kɔ̃ɛɛ jìì. Ɔ jǔ ké ɔ dyi ma nyɔǔn-dyù jǔ ɖòùn ní, nìí, ɔ sáa-zà-zàɔ̀ seɔ́ má ɖɛ kpaá mu mìɔ. Jízɛ̀ɛ̀ nyɔmɔɔ̀ tò ɔ fɛ̀ɛ̀ ɓɛ́ ɔ tòà ɓó à bììɛɛ jìì. Ɔ seɔ́ Jízɛ̀ɛ̀ nyɔmɔɔ̀ jèǐn, nìí, nyɔ ɖò seɔ́ póɛ ɓɛ́ìn (Híìbúɖúù 9:22). Ɔ jǔ ké ɔ seɔ́ má Gèɖèpɔ́ɔ̀ ní, nìí, ɔ seɔ́ má à póɛ̀n ɓɛ́ǐn mu gàná cá, ké à seɔ́ má hwòɖǒ-po-naín ɖò ɓéɖéɛ mu, ké à muɔ́ má hwìè kà kò ɖò kɔ̃̀ mú nyɔ ɓɛ́ìn póɛ̀n nyɛɛ dyi mɔ́uń nììn.

► Ɖɛ́ kɔ̃̀ jè ɓiè-kpòò ɖíɛ́ ɓě poɛ̀n kà hwìɖǐi kà ɓɛ́ kũ̀à ɓɛ́ nyɔ ɖò nyuɛɛ ɓɛ́ìn nyuɛ ɓɛ́ ɔ ké póɛ́?

(8) Jízɛ̀ wóɖó ma gĩɔ ké nyɔ séín dyé ma ɔ, ké ɖɛ nìà kɛ tɛ̀mɛ̀ìn nyɔǔn dyí kà ɔ mɔ̀ Gèɖèpɔ́ɔ̀ Dyú-gààɔ̀ kɛ, ké ɔ tɛ̀mɛ̀ìn ɔ kpéɔ̀ à nììn dyí kà ɔ ɓɛ́ìn nyɔǔn sè-ná-sèɛ̀ fɛ̀ɛ̀ nyíɛ kɛ (Jɔ̃́ɔ́ 20:24-28, Wɛ̀ɖɛ̀ɓèɖésĩ̀ɔ̀ 1:18).

Se-cɔ̀cì ɓě ɓɛ́ wa doìn kà Jízɛ̀ɛ̀ gĩɔ-wóɖó-wóɖóɔ̀ jè múɛɛ poɛ jǎà ɖekè kà ɓɛ́ ɔ se Gèɖèpɔ́ɔ̀ Dyú-gàà kɛ, ké wa poɛ jǎà ɖekè kà ɓɛ́ ɔ sáa-zà-zàɔ̀ se nyɔ ɖò póɛ̀n ɓɛ́ìn nyɛ. Hwɛ̀ ké wa nyu wa mìɔùn bìì hwìè ɖò kɔ̃̀ mú wa ɖá wa ɓɛ́ìn póɛ̀n nyɛ.

► Ɖɛ́ mɔ̀ ɖɛ ɓě à dyuò dyí sepóɛɖé Jízɛ̀ wóɖó ma gĩɔ jèɛ́?

(9) Sáa-zà-zà ɓɛ́ Jízɛ̀ nyu ma kà kɛɛ ɖòùn ɓɛ́ìn nyuɛ ɓɛ́ Gèɖèpɔ́ɔ̀ ké nàmàǔn séín kɔ̃in zĩ̀ìn (1 Jɔ̃́ɔ́ 1:9, 1 Jɔ̃́ɔ́ 2:2).

Ɔ jǔ ké nyɔ ɖò dyi jǎà-ɖɛ̀ nìà kɛ jè mú doìn ní, nìí, ɔ mu nyɔ ɓě cɛ̃à kà ɓɛ́ kũ̀à ɖòùn ɓɛ́ìn nyɔ póɛ̀n nyɛɛ wuɖuɔ̀ jǎà poùn. Nyɔ ɖíɛ́ ɓě cɛ̃ɛ kà ɓɛ́ nyɔ ɖò mìɔùn nììn nyuu-ɖɛ̀ ɖòùn ɓɛ́ìn nyuɛ ɓɛ́ ɔ ké pó kɛ, ké Gèɖèpɔ́ɔ̀-ɓiè-kpòò pàɖǎ taɓa ɖɛ nìà kɛ hwìɖǐǐ. Ɖɛ nìà kɛ nyuɛ ké nyɔǔn ɓě sí ɓiè-kpòò ɓě cɛ̃ wa ɖɛ kĩà dyí ɓě wa ké nyu ɓɛ́ wa ké póɛɛ jè wa gboɛɛ kíɖíí.

► Xwíníínɔ̀ nyɛ́ kɔ̃̀ jè nyɔ ɖíɛ́ ɓě poàìn hwìɖǐi kà ɓɛ́ wa se póɛ ɓɛ́ìn, ɔ sèìn dyììn ɖé wa nììn ɓiè-kpòòɔ̀ kpeɖe nyu-nyu mú ɖòùn wɛ̃́?

(10) Gèɖèpɔ́ɔ̀ zĩ̀ìn nyɔ kã̀ìn séín ɓɛ́ ɔ wɔ̃́ìn mú kà ɓɛ́ ɔ mɔ̀ nàmàǔn nyɔ̀, ké ɔ táà ɔ nàmàǔnɔ̀ dyi, ké ɔ poɛ jǎà kà ɓɛ́ Gèɖèpɔ́ɔ̀ ɓɛ́ìn ɔ kɔ̃in zĩ̀ɛ̀n kɛɛ kɔ̃in (Máà 1:15, 1 Jɔ̃́ɔ́ 1:9).

Kpoo ɓɛ́ nyɔǔn-dyù dè dyiɛɛ se kpé ɓéɖé ɓɛ́ wa ké Gèɖèpɔ́ɔ̀ nyɛ́nɛ́ín-ɖáìn-ɖɛ̀ ɓě ɓá pó-pó dyíɛɛ ɖɛ ɖò kɔ̃in po ɖe, mɔɔ ké wa se kpé ɓéɖé ɓɛ́ wa ké hwìè kà kò ɖò kɔ̃̀ mú nyɔ ɓɛ́ìn póɛ̀n nyɛɛ da zà.

► Nyɛ́ mɔ̀ nyɔ ɓéɖé kpá ɓɛ́ ɔ kéɛ jǎà po kà ɓɛ́ Gèɖèpɔ́ɔ̀ ɖǎ ɔ nàmàǔn ɓěɔ̀ kɔ̃in zĩ̀ìn nyɛɛ́?

(11) Nàmàǔn-mú-wɔ̃́ìn-wɔ̃́ìn xwíníín mɔ̀ nyɔɔ̀ kpá wìǐn mìɔ ɓó ɔ nàmàǔn ɓěɔ̀ jè, ké ɔ dyé ti ɓɛ́ ɔ ké wa dyi táà (Àzédyà 55:7, Ìzíkìò 18:30, Ìzíkìò 33:9-16, Máfíò 3:8).

Nàmàǔn-mú-wɔ̃́ìn-wɔ̃́ìn seɛ xwíníín mɔ̀ ɓɛ́ nyɔɔ̀ ké ɔ mìɔùn mú hwɔ ɓó Gèɖèpɔ́ɔ̀ dyúa hwɛ̀ ɓɛ́ Gèɖèpɔ́ɔ̀ ké ɔ dyi kpɔ̃ kɛ, sepóɛɖé Gèɖèpɔ́ɔ̀ ɖòùn ɓɛ́ìn nàmàǔn-nyɔ̀ɔ̀ buɛ̀ sɔ̀ìn ɖé ɔ nàmàǔn ɓěɔ̀ kpé xwaún. Nàmàǔn-mú-wɔ̃́ìn-wɔ̃́ìn xwíníín mɔ̀ nyɔ̀ɔ̀ kpá wìǐn mìɔ ɓó ɔ nàmàǔn ɓěɔ̀ jè, ké ɔ dyé ti ɓɛ́ ɔ ké ɔ nàmàǔn ɓěɔ̀ dyi táà. Ɔ jǔ ké nyɔ ɖòɛ̀ hwòɖǒ se wɔ̃́ ɓɛ́ ɔ ké ɔ nàmàǔn ɓěɔ̀ dyi táà ní, nìí, Gèɖèpɔ́ɔ̀ se ɔ kɔ̃in zĩ̀ɛ̀n ɓɛ́ìn. Ɔ jǔ ké nyɔ ɖò dyi gmɔ̀ǐn-gmɔ̀-nàmàǔn mú cĩ́ɛń nì ke kánáá ní, nìí, ɔ séè nàmàǔn dyi táà ke.

► Ɖɛ́ kɔ̃̀ jè ɔ nɔ̀mɔ̀à dyíin ɓɛ́ à kéà à nàmàǔn ɓěɔ̀ dyi táà kɛ́?

(12) Ɔ jǔ ké nyɔ ɖò dyi ɔ nàmàǔn ɓěɔ̀ dyi táà, ké ɔ dyi hwìɖǐǐ-taɓa-taɓa ɓéɖéín, nìí, Gèɖèpɔ́ɔ̀ mu ɔ kɔ̃in zĩ̀ìn, ɔ jǔ ké ɔ dyi Gèɖèpɔ́ɔ̀ ɓaà, ké ɔ dyi Gèɖèpɔ́ɔ̀ dyi diè ɓɛ́ ɔ ké ɔ kɔ̃in zĩ̀ìn ní (Wóɖómà 10:13, Acts 2:21).

Jízɛ̀ jè mɔ̀ nyɔ nyuɛ ké Gèɖèpɔ́ɔ̀ ɓéɖé nyɔǔn séín wìì kɔ̃. Kpoo ɖò mɔɔ nyɔǔn-dyùɛ̀ dyi-dè-kpòò ɖò se nyɔ ɖò Gèɖèpɔ́ɔ̀ nyɔ-kɔ̃in-zĩ̀ìn-zĩ̀ìnɔ̀ nyíɛ ɓɛ́ìn. Nyɔ ɓɛ́ Gèɖèpɔ́ɔ̀ zĩ̀ìn kɔ̃in nyɛɛ, ɔ zĩ̀ìn nyɔɔ̀ ɖòùn kɔ̃in, ké ɔ ɖǎ ná nìǐn, gbo-kpɔ̃ìn-kpɔ̃ìn ɖúá ɓó ɔ kè Gèɖèpɔ́ɔ̀ pṹa nì kpàǐ jɛ́ɛ́ cá.

► Xwɛ̌ à ɓéìn dyí dyuòɛ̀ kà nyɔ ɖò ɓɛ́ìn gbo zĩàìn ɓó ti xwã́ún-xwã́ún wè múɛ́?

(1) Céè wuɖu-dɔ̃̀ǐn gbɛ̀ǐ-gbɛ̀ǐ, ɓɛ́ m̀ kéɛ kɔ̃in zaìn kà ɖɛ ɓě nìà dɔ̃̀ǐn mú ɖé dyiíɛɛ dyúáɖò mɔɔ sɔ̃́ nyu ɖɛ kpaa ɖé m̀ gbo ti m̀ kpɔ̃à Kɛ́ɖɛ́ì jè dyi kɛ.

(2) Gã kpoo ɖò mɔɔ ɓiè-kpòò ɖò se Kɛ́ɖɛ́ì dyí ɓáa. Zaìn kɔ̃in ɓó céè-ɖɛ̀-mì sɔ̃́ mɔɔ tã kɔ̃ kà wa nyu ɖɛ kpa ɖɛ ɓě ɓá bɔ̃̌ nɔ̀mɔ̀ dyíinɔ̀ dyíɛɛ ɖíɛ́ ɓě jè mú doɛ̀n nyɛ. Dè bɔ̃̌ nɔ̀mɔ̀ dyíin se jǎà ɓě ɓɛ́ wa cɛ̃à kɛɛ mɛ, ɓɛ́ m̀ kéɛ nyɔǔn dyí tɛ̀mɛ̀ìn kà waà tɛ̀mɛ̀ìn-ɖɛ̀ ɓěɔ̀ nyu se jǔɛ kɛ. Zaìn kɔ̃in kà m̀ ɓɛ́ìn wa jǎà-wùɖù ɓě sɔ̀ìn ɖé Báɓòɔ̀ múɛɛ gbo cɛ̃ɛ ɓɛ́ ɔ ké nì zàse jǔ kɛ.