Lesson 9: Bɔ̃̌ nɔ̀mɔ̀ dyíinɔ̀ cɛ̃-cɛ̃ nì kà sãà-kpùǔ nìà kɛ

Ɖɛ-cɛ̃́-cɛ̃́ɔ̀ nàìn-nyɔ̀ɔ̀ mɛ dyuò ɖɛ nìà kɛ dyí: Ɖé cɛ̃́ɛ́-ɖɛ̀ nìà kɛ gbɔ-dè-dè múɛɛ, ɖɛ-cɛ̃́-nyɔ̀ ɓěɔ̀ mɛ cɛ̃ ɖɛ wa ɖǎà cɛ̃́ ɓá kà nyɔ ké bɔ̃̌ nɔ̀mɔ̀ dyíinɔ̀ cɛ̃ɛ nyu ɖé cɛ̃́ɛ́-ɖɛ̀ zià dyiɛ múɛɛ jè. Ɔ mɛ nì m̀ hwìɖǐi kà ɓɛ́ ɖɛ-cɛ̃́-nyɔ̀ ɓěɔ̀ ɓéɖé ɓɛ́ wa ké kpéí poìn pòìn nyɛ. Ɖɛ-cɛ̃́-nyɔ̀ ɖò-ɖò séín ɓɛ́ ɔ cɛ̃ bɔ̃̌ nɔ̀mɔ̀ dyíinɔ̀ kɛɛ ɖǎ ɖɛ kpa ɖɛ ɖò nyu, ḿ seé kɔ̃̀ kɛbì nyɔ tòà ɔ gbo ɖùǔɛɛ mɛ se ɖé wuɖu zà nɔ̀mɔ̀ dyíin nyɛ.

Hwɛ̀ ɓɛ́ ɓě ké cɛ̃́ɛ́-ɖɛ̀ nìà kɛ gbɔ dèɛɛ, m̀ mɛ dyà ɖɛ-kɔ̃-céè-ɖɛ̀ vɛ̀nɛ̀ ɖò mɔɔ pépà-mì vɛ̀nɛ̀ ɖò ɓɛ́ m̀ ké ɓó mɛɛ-ɖɛ̀ ɓěɔ̀ mɛ ɓó ɖɛ-cɛ̃́-nyɔ̀ ɓěɔ̀ bìì.

Ɖɛ ɓɛ́ à dyé ma, ké à wɔ̃́ ma kɛɛ, ɖé à cɛ̃à ɓě gbo ɖekèɛ̀, ɓɛ́ à kè ɓě ké gbo-kpɔ̃ìn-kpɔ̃ìn ɓéɖé. Gbo-kpɔ̃ìn-kpɔ̃ìn ɓɛ́ à ɓéɖéà kɛɛ mɔ̀ nyɔ ɓɛ́ à kè Ɓǎɔ̀ kè ɔ Dyú-gàà Jízɛ̀ Kɛ́ɖɛ́ì ɓéɖéà kɛ (1 Jɔ̃́ɔ́ 1:3).

► Xwíníínɔ̀ nyɛ́ kɔ̃̀ jè Jɔ̃́ɔ́ ɖá ɔ cɛ̃ ma kà bɔ̃̌ nɔ̀mɔ̀ dyíinɔ̀ kɛ́?

À ɖǎa cɛ̃́ kà à ké Gèɖèpɔ́ɔ̀ gbo dyiɛ nyu ɓɛ́ à ké à nàmàǔn ɓěɔ̀ dyi táà, ɓɛ́ à kèɔ̀ kè ké gbo-kpɔ̃ìn-kpɔ̃ìn gbɔ dè kɛ. Ké ɖeɛɛ, nìí, à kè nyɔ ɓě kè Gèɖèpɔ́ɔ̀ ɖǎà gbɔ-kpɔ̃ìn-kpɔ̃ìn ɓéɖé nɔ̀ɔ̌ kɛɛ muá gbo kpɔ̃ìn. À dyi bɔ̃̌ nɔ̀mɔ̀ dyíinɔ̀ cɛ̃ín, nìí, à nì nyɔ tɔ̀ɔ̀ ɓě ɖáuń ɓɛ́ wa mɔ̀ùn kè Gèɖèpɔ́ɔ̀ ɔ kè nyɔ ɓě taɓa Gèɖèpɔ́ɔ̀ hwìɖǐǐɛɛ ké gbo kpɔ̃ìn ɖekè.

Bɔ̃̌ nɔ̀mɔ̀ dyíinɔ̀ cɛ̃-cɛ̃ɔ̀ nyɔ nìà kɛ se ɓoún tɔ̀mɔ̀, kɛɛ ɔ mɔ̀ ɖɛ ɓɛ́ m̀ ké hwìɖǐi pɛ̃́ìn nyɛ. À nyùìn mɛɛ-ɖɛ̀ ɓě kũ̀à mú, ɓɛ́ ɔ kéɛ nyu ɓɛ́ ɖɛ à tɛ̀mɛ̀ìn kà kɛɛ ké m̀ hwìɖǐi sè. À ɓɛ́ìn mɛɛ-ɖɛ̀ ɓěɔ̀ jè tɛ̀mɛ̀ìn ɖé mínítì sɔ̃́ mú, mɔɔ à ɓɛ́ìn tiɔ̀ ɓoún tɔ̀mɔ̀ìn ɓɛ́ à ké ɖɛ ɖíɛ́ ɓě dɔ́ɔ́ kɔ̃in dèìn, ɔ jǔ ké nyɔ nìà bɔ̃̌ nɔ̀mɔ̀ dyíinɔ̀ gbo ɖùǔ tòɛ̌n nyɛɛ dyiɛ náa mɔ́ ní.

M̀ se ɓéɖé ɓɛ́ m̀ ké mɛɛ-ɖɛ̀-mɛ-nyɔ̀ vɛ̀nɛ̀ jǔ wɛ̃́ɛ́ hwɛ̀ ɓɛ́ m̀ ké wa mɛ. Mɛɛ-ɖɛ̀ɔ̀ se mɛín kàmà, ké ɔ fɛ̃́ìn xwa mìɔ jèɛɛ, nyɔ nìà ɖùǔ tòɛ̌n nyɛɛ muɛ jè hwìɖǐi pɛ̃́ìn.

Kàǔn wɛ̃ɛ, à muá mɛɛ-ɖɛ̀ ɓěɔ̀ ɖò-ɖò jè cɛ̃ìn, ɓɛ́ à ké wa ɖò-ɖò jè kɔ̃in zaìn.

Ɖɛ-cɛ̃́-cɛ̃́ɔ̀ nàìn-nyɔ̀ɔ̀ mɛ dyuò ɖɛ nìà kɛ dyí: M̀ mɛ zaìn mɛɛ-ɖɛ̀ ɓěɔ̀ jè kɔ̃in, ɓɛ́ ɖɛ-cɛ̃́-nyɔ̀ ɓěɔ̀ ɓó gmɔ̀ǔn nì. Mɔ̀ǔn ɖá ɓɛ́ m̀ ké ɖɛ ɓě se cɛ̃́ɛ́-ɖɛ̀ɔ̀ dyí ɓáa jè kɔ̃in zaìn. Nyuɛ ɓɛ́ ɔ ké ɓoún xwã́ ɓó ɖɛ-cɛ̃́-nyɔ̀ ɓěɔ̀ bìì, ɓɛ́ wa kéɛ cɛ̃́ wàɖà. Ɖɛ-cɛ̃́-nyɔ̀ ɓěɔ̀ mɛ ɓɔ́ mɛɛ-ɖɛ̀ kĩ́ín-kĩ́ínɔ̀ tɛ̀mɛ̀ìn-tɛ̀mɛ̀ìnɔ̀ ɓíɖíi céèɛ̀.

M̀ dyiá mɛɛ-ɖɛ̀ sɔ̃́ nììnɔ̀ jè tɛ̀mɛ̀ǐn nì ɓó ɖɛ-kɔ̃-céè-ɖɛ̀ vɛ̀nɛ̀ ɖò kɔ̃, ɓɛ́ ɖɛ-cɛ̃́-nyɔ̀ ɓěɔ̀ kéɛ dyé nɔ̀mɔ̀ dyíin ní, nìí, wa mɔ̀ùn mɛ mɛ mɛɛ-ɖɛ̀ɔ̀ wáká séín nì muà mɛìn nyɛ. Mɔ̀ǔn ɖá ɓɛ́ m̀ ké ɖɛ ɓě se cɛ̃́ɛ́-ɖɛ̀ɔ̀ dyí ɓáa jè kɔ̃in zaìn. Ɔ jǔ ké m̀ ɖǎ mɛɛ-ɖɛ̀ sɔ̃́ nììnɔ̀ jè tɛ̀mɛ̀ìn hwɔ ní, nìí, ɖɛ-cɛ̃-nyɔ̀ ɓěɔ̀ mɛ muá dyúa ɓɛ́ wa ké kɔ̃in-zaìn-ɖɛ̀ ɓá cɛ̃́ɛ́-ɖɛ̀ɔ̀ nyɔ kɔ ɓó dyíɛ cɛ̃́, ké ɔ ɖǎ ná nìǐn, wa mɛ kɔ́ìn ɖe ɓɛ́ wa ké ɖɛ gànáɔ̀ kɔ̃in kpa.

PDF

Wáká 1

“Gèɖèpɔ́ɔ̀ mɛ à ɖò-ɖò séín ɓɛ́ gbo-kpɔ̃ìn-kpɔ̃ìn ké ɓó à kèɔ̀ kè pṹa nì, ɓɛ́ ɔ ké à cĩ́-cĩ́ɔ̀ mana kɔ̃ po. Ɔ se ma à fɛ̀ɛ̀ ɓɛ́ ɔ dyíìn fũ̀à-fṹá-ɖɛ̀ kè gǎ-dyé-dyé múin nyɛɛ nyí.”

Wáká 2

“Nàmàǔn nyuɛ ké Gèɖèpɔ́ɔ̀ kè nyɔǔn-dyù zaìn gbo. Nyɔ kĩ́ín-kĩ́ín ɓě ɓɛ́ Gèɖèpɔ́ɔ̀ mɛ ma kɛɛ nyu ma nàmàǔn, ké sɔ̀ìn ɓóɛ gboɛɛ, nyɔ séín ɖǎ Gèɖèpɔ́ɔ̀ nàmàǔn bũ̌ nyu.”

Wáká 3

“Gèɖèpɔ́ɔ̀ mɔ̀ zaa-wɔ̃-po-nyɔ̀ dyí-sɛ́ɖɛ́ìn-kà, ké wé ɖò nì dyiɛń ɓɛ́ ɔ ké nyɔ ɓě se jǎà poɛɛ zaa kpɔ̃̀ìn, ɓɛ́ ɔ ké wa hɛ́ɛ̀ po ɓó sè-ná-sèɛ̀ tiín, ɔ jǔ ké Gèɖèpɔ́ɔ̀ se wa wìǐn dyé ɓɛ́ wa ké ɔ gbo ɖe dyi ní.”

[Mɛ ɖí-dùɔ̀, ɓɛ́ m̀ ké wuɖu mɔ̀à “hɛ́ɛ̀” kɛɛ céè.]

Wáká 4

“À se ɖɛ kà kò ɖò nyuɛ ɓɛ́ìn ɓɛ́ ɔ ké à Gèɖèpɔ́ɔ̀ gbo ɖe dyà. Kũ̀à nɔ̀mɔ̀ dyíin ɓě kè cɔ́cì mu-mu kè gma ɓě ɓá jǎà-po-ɖɛ̀ ɓě dyíɛ mɔɔ nyɔ ɓě wíɖí nyí-nyí, wa séín ɖò se à Gèɖèpɔ́ɔ̀ gbo ɖe dyàà ɓɛ́ìn.....”

[Mɛ ɖí-dù ɓě ɓá ɖɛ ɓě m̀ ɖǎà zɛɖɛɛ ɖò-ɖò dyí.]

Wáká 5

“À jè muɔ́ má wìì nììn mìɔ ɔ jǔ ké Gèɖèpɔ́ɔ̀ seɛ ma nyu ɓɛ́ à ké ma ɔ gbo ɖe dyi ní. Jízɛ̀ mɔ̀à Gèɖèpɔ́ɔ̀ Dyú-gààɔ̀ kɛɛ zàìn ma ɔ mìɔùn sáa ɓó kɔ́ɖɔ́sìɔ̀ kɔ̃, ɓɛ́ Gèɖèpɔ́ɔ̀ ké à nàmàǔn ɓěɔ̀ kɔ̃in zĩ̀ìn. Ti wé tã ɖǎ ma ziɛɛ, ɔ sɔ̀ ma gĩɔ.”

[Mɛ kɔ́ɖɔ́sìɔ̀.]

Wáká 6

“Kɛɛ m̀ ɓéɖé ɓɛ́ m̀ ké ɖɛ nìà kɛ dyí dyuò. Nyɔ séín ɓéɖé ɓɛ́ ɔ kéɛ ɔ mìɔùn bìì gã kà ɓɛ́ ɔ mɔ́ póɛ dyi ɓɛ́ ɔ ké Gèɖèpɔ́ɔ̀ gbo ɖe dyiɛ. Nyɔɔ̀ ɓéɖé ɓɛ́ ɔ ké ɔ nàmàǔn ɓěɔ̀ dyi táà. Ɔ xwíníín mɔ̀ ɓɛ́ ɔ ké wìǐn kpá ɓó ɔ nàmàǔn ɓěɔ̀ jè kè ɓɛ́ ɔ ké wɔ̃́ ɓɛ́ ɔ ké wa gbo sɔ̀. Nyɔ ɓɛ́ ɔ táà ɔ nàmàǔn ɓěɔ̀ dyiɛɛ, ɓɛ́ìn kɔ̃in-zĩ̀ìn-zĩ̀ìn ɓéɖéɛ sɔ̀ìn ɖé Gèɖèpɔ́ɔ̀ gbo, ɔ jǔ ké ɔ dyi Gèɖèpɔ́ɔ̀ dyi diè ɖé ɓaà-ɓaà mú ní.”

[Mɛ ɖí-dù ɓěɔ̀ ɓɛ́ m̀ ké wuɖu ɓě mɔ̀à “táà nàmàǔn dyi” kè “ɓéɖéɛ” kɛɛ céè”.]

Wáká 7

“M̀ poɛ̀n hwìɖǐiɛɛ, dɛ̌ mɔ̀ùn ɓɛ̀ɖɛ̀ìn dyí dà mɛɛ-ɖɛ̀ nìà kɛ kɔ̃ kɛ́? M̀ ɖǎ ti dyí ɖú ɖò ɖé nì fɛ̀ɛ̀ mú, ké m̀ ɖǎ nì nàmàǔn ɓěɔ̀ dyi táà, ké Gèɖèpɔ́ɔ̀ ɖǎ m̀ kɔ̃in zĩ̀ìn, ké m̀ ɖǎ Gèɖèpɔ́ɔ̀ bìì cĩ́ɛ dyí ɖúù, mɔɔ m̀ kè Gèɖèpɔ́ɔ̀ zaìn gbo ke ɓó nì nàmàǔnɔ̀ jèè?”

[Fòìn dyi-diè-ɖɛ̀ɔ̀ gɔ̃̌-jǔ-wùɖù. Nyɔ ɓáún-ɓáún muɛ cɛ̃ìn kà ɓɛ́ wa kè Gèɖèpɔ́ɔ̀ zaìn gbo keɛ.]

“M̀ ɖǎ ti dyé ɓɛ́ m̀ ké ɓo-bɛ̃̀ ɖò dyí ɖú, ɓɛ́ m̀ ké nì nàmàǔn ɓěɔ̀ dyi táà, ɓɛ́ Gèɖèpɔ́ɔ̀ ké m̀ kɔ̃in zĩ̀ìn, ɓɛ́ m̀ kéá Gèɖèpɔ́ɔ̀ bìì cĩ́ɛ gbɔ dèè. Ɔ dyi ná nìǐn, nìí, ḿ mɔ́ ɓɛ́ ḿ ké m̀ bìì ɓaà ɓó kàǔn.”

[Nyu ɓaà-wùɖù ɖò kèɛ̀ nyɔ nìà dà ɓíɖíiɛɛ hwɔìn nyɛ.]

“Bounɓo, Ḿ dyuòɛ̀ kà ɓɛ́ ḿ mɔ̀ nàmàǔn-nyɔ̀, ké ḿ ɓéɖé ɓɛ́ ḿ kéɛ gǎ dyí dyé ɓó sè-ná-sèɛ̀ tiín nyɛ. Ḿ kpá wìǐn ɓó ní nàmàǔn ɓěɔ̀ jè, ké ḿ ɖǎ ti dyé ɓɛ́ ḿ ké wa dyi táà. Ḿ nì m̀ dyi dièɛ̌n ɓɛ́ m̀ ké ní nàmàǔn ɓěɔ̀ kɔ̃in zĩ̀ìn. Ɔ se ɓéɖé ɓɛ́ ɔ kéɔ́ ná nì, kɛɛ sepóɛɖé Jízɛ̀ ɖǎ ḿ bìì mɛ́ jè. Ḿ po m̀ zùo ɓó pó-pó ɓɛ́ m̀ nyíà nyɔǔn wɛ̃ɛ jè. Sɔ̀ìn zɛ̃̌ɛ̀ gbo ké dyúa muɛɛ, ní muá m̀ bìì cĩ́ìn.”

Wáká 1

Ɖé kɔ̃in-wùɖùìn-ɖɛ̀ nìà kɛ gbɔ-dè-dè múɛɛ, ɔ ɓɛ́ìn nyɔ nìà ɖùǔ tòɛ̌n nyɛɛ jè dyí ɓáa. Bɔ̃̌-nɔ̀mɔ̀-dyíin-kpa-nyɔ̀ɔ̀ mɛ ɓɔ́ɔ tɛ̀mɛ̀ìn kà ɓɛ́ “cĩ́-cĩ́ mɔ̀ ɖɛ ɓɛ́ ɔ dyíìn fũ̀à-fṹá-ɖɛ̀ kúɖúú kè gǎ-dyé-dyé múin nyɛ,” kɛɛ ɔ ɓɛ́ìn ɖɛ ɖǎ nyɔ nìà ɔ ɖùǔ gbo tòɛ̌n nyɛɛ gbo kpá ɖò kĩ́ín nyɛɛ hwɔìn-ɖɛ̀ ɖò dyàà, ɓɛ́ ɔ kéɛ tɛ̀mɛ̀ìn.

Wáká 2

Ɔ mu dyíin nɔ̀mɔ̀ùn ɓɛ́ nyɔ nìà ɖùǔ tòɛ̌n nyɛɛ kéɛ dyéɖéi hwɔ̀ìn kà ɓɛ́ zaa ɖǎ ɔ kpɔ̃, ké ɔ kè Gèɖèpɔ́ɔ̀ ɖǎ bũ̌ sɔìn nyɛ. Ké nàmàǔnɔ̀ nyɔ nìà ɖé ɔ mú kàǔn wɛ̃ɛ seɛ nyɔ ɓɛ́ ɔ zàà Áɖɔ̀ùn kè Íì gbo kɛ.

Wáká 3

Dà nìà kɛ jè mɔ̀ ɖɛ zi ɖɛ kpauń ɖò mìɔ ɖé nàmàǔn-nyɔ̀ɔ̀ gbo.

Wáká 4

Dà nìà kɛ zàìn nyɔ nìà ɖùǔ tòɛ̌n nyɛɛ da kà ɓɛ́ ɔ mɛ ɓɔ́ ɖɛ se ɔ póɛ̀n ɓɛ́ìn nyɛɛ hwòɖǒ kɔ̃ dèɛ̀ ɓó pó jè kɛ. Dà nìà kɛ ɓɛ́ìn nyɔ nìà ɖùǔ tòɛ̌n nyɛɛ da zàin ɓɛ́ ɔ ké ɖɛ ɓě mɔ̀ ɔ mɔ́ɔ́-ɖɛ̀ kɛɛ dyí dyuò. Bɔ̃̌-nɔ̀mɔ̀-dyíin-kpa-nyɔ̀ɔ̀ mɛ ɖá ɖɛ ɓě ɓɛ́ nyɔ nìà ɖùǔ tòɛ̌n nyɛɛ ɓɛ́ìn hwòɖǒ kɔ̃ dèɛ̀ kɛɛ nyɛ́nɛ́.

Wáká 5

Hwìè fɛ̃́ìn xwa kɔ̃̀ mú m̀ ɓɛ́ìn Jízɛ̀ɛ̀ mɛ́-mɛ́ɔ̀ jè kɔ̃in zaìn nyɛɛ mɔ̀, “Jízɛ̀ zàìn ma ɔ mìɔùn sáa ɓó kɔ́ɖɔ́sìɔ̀ kɔ̃, ɓɛ́ Gèɖèpɔ́ɔ̀ ké à nàmàǔn ɓěɔ̀ kɔ̃in zĩ̀ìn.” Dà nìà kɛ kpá nyɔ nìà ɖùǔ tòɛ̌n nyɛɛ gbo ɓɛ́ ɔ kéɛ dyéɖéi hwɔ̀ìn kà ɓɛ́ ɔ mɛ dè pó-póɔ̀ nyɔ sɔ̀ìn kà ɖé Gèɖèpɔ́ɔ̀ gboɛɛ ɖòùn hwòɖǒ kɔ̃ kɛ.

Wáká 6

Bɔ̃̌-nɔ̀mɔ̀-dyíin-kpa-nyɔ̀ɔ̀ mɛ nyuɛ ɓɛ́ nyɔ nìà ɖùǔ tòɛ̌n nyɛɛ ké ɖɛ ɔ ké gãa dyí dyuò. Nyɔ nìà ɖùǔ tòɛ̌n nyɛɛ mɛ dyuòɛ̀ kà ɔ mìɔùn ɓéɖé ɓɛ́ ɔ ké ɖɛ ɔ mɔ́ɛɛ gã kɛ. Ɔ ɓéɖé ɓɛ́ ɔ ké ɖɛín-ɖɛ̀ mɔ̀à nàmàǔn dyi-táà-táà kɛɛ gã, ké ɔ mɛ dyuòɛ̀ kà ɓɛ́ nàmàǔn dyi-táà-táà kpa ɖɛ mìɔ ké ɔ zi ɓɛ́ m̀ ké wìǐn kpá ɓó ɖɛ ɖò jè pūɛɛ dyí kɛ. Ɔ ɓéɖé ɓɛ́ ɔ kéɛ dyuò kà ɓɛ́ ɔ kɔ̃̀ ɔ ké ɓaà, ɓɛ́ ɔ ké Gèɖèpɔ́ɔ̀ dyi diè ɓɛ́ ɔ ké ɔ nàmàǔn ɓěɔ̀ kɔ̃in zĩ̀ìn nyɛ.

Wáká 7

Dà nìà kɛɛ, bɔ̃̌-nɔ̀mɔ̀-dyíin-kpa-nyɔ̀ɔ̀ mɛ vɔ̃ ɓɛ́ ɔ kéɛ nyu ɓɛ́ nyɔ nìà ɖùǔ tòɛ̌n nyɛɛ kéɛ mú wɔ̃́ìn kà ɓɛ́ ɔ mɔ́ pó-pó kɛ. Ɖɛ ɓɛ́ kɔ̃in-wùɖùìn-ɖɛ̀ nìà kɛ nyuɛɛ mɔ̀, ɔ kpá nàmàǔn-nyɔ̀ɔ̀ gbo ké ɔ dyuòɛ̀ dyí kà ɓɛ́ ɔ se pó kɛ. Dyi-diè-ɖɛ̀ɔ̀ kpa ɖɛ mìɔ. Nyɔ ɖíɛ́ ɓě mɔ́ ɓɛ́ wa ké Gèɖèpɔ́ɔ̀ kɔ̃in-zĩ̀ìn-zĩ̀ìn zɔ̀ǐn nì wé séín, kɛɛ wa cĩ́ ɖé nàmàǔn mú ke kánáá pū. Dyi-diè-ɖɛ̀ɔ̀ tò ti jɛ́ɛ́ ɓɛ́ Gèɖèpɔ́ɔ̀ ké nyɔɔ̀ nàmàǔn kɔ̃in zĩ̀ìn, ɓɛ́ ɔ ké fɛ̀ɛ̀ ɖìè ɖò gbɔ dèɛɛ jìì. Ɔ ɓéɖé ɓɛ́ ɔ kéɛ dyuò kà ɓɛ́ ɔ jǔ ké ɔ séè gbo zĩàìn ke ní, nìí, ɔ kè Gèɖèpɔ́ɔ̀ zaìn gbo ke dyììn ɖé ɔ nàmàǔnɔ̀ mú kɛ. Ɔ ɖǎ ná nìǐn, nìí, bɔ̃̌-nɔ̀mɔ̀-dyíin-kpa-nyɔ̀ɔ̀ mɛ ɓaà ɔ bìì, ɓɛ́ ɔ ké pó.

Ɔ jǔ ké nyɔ nìà ɖùǔ tòɛ̌n nyɛɛ se nàmàǔn dyi táà jèɔ̀ múin wɔ̃́, mɔɔ ɔ hwòɖǒ séè wɔ̃́ ke ɓɛ́ ɔ ké ɔ nàmàǔnɔ̀ dyi táà ní, nìí, bɔ̃̌-nɔ̀mɔ̀-dyíin-kpa-nyɔ̀ɔ̀ mɛ ɓɔ́ ɔ kɔ̃ nɛ́ɛ ɓó ɓaà jè. Ɔ jǔ ké ɔ séè ɔ nàmàǔnɔ̀ dyi táà ke jɛ́ɛ́ cá, ɓɛ́ ɔ kéɛ dyuò kà ɓɛ́ ɔ ɖǎ gbo zĩàìn nyɛ, ké ɔ dyi ɓaà ní, nìí, ɔ muɛ dyɛ̀ hwòɖǒ kɔ̃ dèìn kà ɓɛ́ ɔ se póɛ mu mɔɔ ɔ se gbo zĩàìn ɓɛ́ìn nyɛ. Ké ɔ seɛ dyɛ̀ gbɔ poɛ́ mu ɓɛ́ ɔ ké Gèɖèpɔ́ɔ̀ gbo dyi ɖé dyúa.

M̀ me fṹà mɛɛ-ɖɛ̀ɔ̀ jè tɛ̀mɛ̀ìn-tɛ̀mɛ̀ìnɔ̀ gboi. Ɔ jǔ ké m̀ dyi tiɔ̀ ɓéɖé ɓɛ́ m̀ ké bɔ̃̌ nɔ̀mɔ̀ dyíinɔ̀ tɛ̀mɛ̀ìn ní, nìí, m̀ ɓɛ́ìn nyɔ nìà m̀ ɖùǔ gbo tòɛ̌n nyɛɛ dyi dièɛ̀, ɓɛ́ m̀ ké níiń, “Ḿ ɓɛ́ìn mínítì sɔ̃́ dyí ɖúɛ ɓɛ́ ḿ ké m̀ mɛɛ-ɖɛ̀ ɖò jè gbo cɛ̃ɛ̀? Mɛɛ-ɖɛ̀ nìà kɛ zaìn ɖɛ ɓɛ́ Báɓòɔ̀ ɖáìn hwìè ɖòùn kɔ̃̀ mú m̀ ɓɛ́ìn dyuòɛ̀ kà ɓɛ́ m̀ ɖǎ pó jɛ́ɛ́ kɛɛ jè kɔ̃in.” M̀ ɖǎa náa cɛ̃ ní, nìí, nyɔɔ̀ muɛ dyí dyuòùn kà ɓɛ́ m̀ se ti pàɖǎ dyí ɖúɛ mu kɛ. Kɛɛ ɔ jǔ ké nyɔɔ̀ dyi tɛ̀mɛ̀ìn-ɖɛ̀ɔ̀ jè múàǔn dyi kpáìn, ké ɔ dyi mɔ́ ɓɛ́ m̀ ké dyúa mu ke ní, nìí, m̀ ɓɛ́ìn ti goun dyí ɖúɛ.

Nyɔǔn ɓě kpáìn mɛɛ-ɖɛ̀ nìà kɛ jè múàǔn dyi kánáá pū. Ɔ jǔ ké bɔ̃̌-nɔ̀mɔ̀-dyíin-kpa-nyɔ̀ɔ̀ ɖǎ mɛɛ-ɖɛ̀ɔ̀ jè tɛ̀mɛ̀ìn hwɔ ní, nìí, nyɔ ɖò ɓɛ́ìn mɛɛ-ɖɛ̀ɔ̀ dyí ɖúɛ ɓɛ́ ɔ kéɛ dyi dè.

Ɖú ti gbɛ̀ǐ-gbɛ̀ǐ dyí ɓɛ́ m̀ ké mɛɛ-ɖɛ̀ɔ̀ jè kɔ̃in zaìn ɖe. Ɓɔ́ ɖɛ kúɖúú kɔ̃in zaìn ɖé ɖɛɔ̀ tɛ̀mɛ̀ìn-tɛ̀mɛ̀ìn mú, sepóɛɖé m̀ dyiɛ ɓoún xwã́ìn ní, nìí, ɔ mu xwa fɛ̃́ìn ɓɛ́ ɖɛ-cɛ̃́-nyɔ̀ ɓěɔ̀ kéɛ cɛ̃́. Ɔ jǔ ké m̀ ɖǎ nyɔ ɓěɔ̀ ɖɛ tɛ̀mɛ̀ìn tee ní, nìí, ɖɛ-cɛ̃́-nyɔ̀ ɖíɛ́ ɓě ɓɛ́ìn dyí sɔ̀ɔ̀ ɓɛ́ wa ké ɖɛ m̀ ɖǎà tɛ̀mɛ̀ìn nyɛɛ nyɔ tɔ̀ɔ̀ ɓěɔ̀ gbo kɔ̃in zaìn, ké wa mǔè ɓěɔ̀ mu wa gbo kpáìn ɓɛ́ wa ké wa ɖɛ tĩ́ín-tĩ́ín ɖíɛ́ ɓě hwìɖǐi dyàǔn nì. Sɔ̀ìn ɓóɛ gboɛɛ ní, ɖɛ-cɛ̃́-nyɔ̀ ɓěɔ̀ ɓɛ́ìn wa mìɔùn kpoo ɖò-ɖò mú poɛ, ɓɛ́ wa ké cɛ̃́ɛ́-ɖɛ̀ɔ̀ tɛmɛìn tɛ̀mɛ̀ìn.

(1) Cɛ̃ bɔ̃̌ nɔ̀mɔ̀ dyíin ɓɛ́ ɔ ɓéɖéà hwɔìn-ɖɛ̀ tòà kɔ-kɔ jììɛɛ nyɔ tã mɔɔ nyɔ pàɖǎ gbo. Dè ɖɛ gbɛ̀ǐ-gbɛ̀ǐ wè ɓɛ́ m̀ dyuò dyí ɓá cɛ̃́ɛ́-ɖɛ̀ɔ̀ jè dyíɛɛ mɛ dyììn ɖéɛ céè-céè mú, ké m̀ mɛ dyé ti ɓɛ́ m̀ kéɛ jè cɛ̃ ɖé cɛ̃́ɛ́-ɖɛ̀ɔ̀ nyɔ mu ɓó dyí kɔùn wɛ̃ɛ mú.

(2) Kà ɓɛ́ m̀ nì ti dyéɛń ɓó cɛ̃́ɛ́-ɖɛ̀ɔ̀ nyɔ kɔ ɓó dyíɛ jèɛɛ, zà Wóɖómà 1-3, Wóɖómà 5, kè Wóɖómà 10 wuɖuún, ɓɛ́ m̀ ké vɔ́sì ɓěɔ̀ hwìɖǐi nàìn.