Lesson 11: Gèɖèpɔ́ɔ̀-wùɖù Ɓá Bɔ̃̌-nɔ̀mɔ̀-dyíinɔ̀ Dyíɛɛ Wáɖá-wáɖá

► Ɖɛ-cɛ̃́-nyɔ̀ ɖò mɛ zà 1 Kɔ̀ɖéíntĩ̀ɔ̀ 1:17-25 wuɖuún ɓɛ́ nyɔ tɔ̀ɔ̀ ɓěɔ̀ ké ɔ gbo ɖùǔ tò. Hwìèɔ̀ nyɛ́ kɔ̃̀ mú Gèɖèpɔ́ɔ̀ póìn nyɔ ɓě nìà mú gbɔǔn wɛ̃ɛ kɛ́?

Júù-nyɔ̀ ɓěɔ̀ nì ma kpé dyi mɔ́uń ɓɛ́ wa ké waà ɓóɖóɔ̀ gbǎà. Wa nì ma Gèɖèpɔ́ɔ̀-wùɖù ɓéɖé kpé, ké ɔ ɓéɖé zàse ɓě kɛɛ dyi mɔ́uń, ɓɛ́ ɔ kéɛ nyɔǔn dyí tɛ̀mɛ̀ìn kà ɔ ɓɛ́ìn wa gbǎà kɛ.

Ɓóɖó-dù kà kò ɖò ɓěɛ̀ nyɔ ɓěɔ̀ nì ma fɔ̀nɔ̀-hwòɖǒ dyi mɔ́uń ɓɛ́ wa ké ɓóɖó-kpàà hwòɖǒ-fɔ̀nɔ̀-ɖɛ̀ ɓěɔ̀ kè kà wa ké mú zaìn nyuɛɛ jè múin wɔ̃́. Wa nì ma nyɔ ké ɖɛ wa nì ma kà mɔ́uń wɛ̃ɛ jè wa gbo cɛ̃ɛ dyi mɔ́uń.

Kɔ́ɖɔ́sìɔ̀ tò Gèɖèpɔ́ɔ̀ gbo-dyi-dyi kè sáa-zà-zà jìì. Ɓó Júù-nyɔ̀ ɓě nì ma kà kpé mɔ́uń wɛ̃ɛ bììɛɛ, ɔ nì ma kà kpéɛ̀-dyí-hwɛ̀-hwɛ̀ nìà kɛ ɖé wa gbo. Ɖé Ɓóɖó-dù kà kò ɖò ɓěɛ̀ nyɔ ɓě ɓɛ́ wa nì ma kà ɓóɖó-kpàà nììn kpé ɓěɔ̀ jè vɔ̃uń wɛ̃ɛ gboɛɛ, ɔ nì ma kà ɖɛ cá-cá nìà kɛ ɖé wa gbo. Jɛ́ɛ́ kɛɛ, Gèɖèpɔ́ɔ̀ tɛ̀mɛ̀ìn ma ɔ kpéɔ̀ kè ɔ hwòɖǒ-fɔ̀nɔ̀-fɔ̀nɔ̀ɔ̀ nyɔǔn dyí ɖé Kɛ́ɖɛ́ì mɛ́-mɛ́ɔ̀ mú. Kɔ́ɖɔ́sìɔ̀ nì ma kà kpéɛ̀-dyí-hwɛ̀-ɖɛ̀ kè ɖɛ se ɖɛ kpa nìà kɛ ɖé Gèɖèpɔ́ɔ̀ gbo dyɛo, kɛɛ ɔ jè kpa ma ɖɛ mìɔ ké ɔ zi nyɔǔn-dyù nììn gana dyí.

Nyɔ ɓě kɔ̃̀ hwìɖǐi-poìn-ɖɛ̀ ɓě mɔ̀à ɖɛ gbà saá-saá sɔ̀ìn ɖé wa ɖe xwíníín nyɛɛ, bɔ̃̌ nɔ̀mɔ̀ dyíinɔ̀ mɔ̀ ɖɛ cá-cá ɖé wa gbo. Wa ɓéɖé ɓɛ́ wa ké waà nàmàǔn ɓěɔ̀ dyi táà, ɓɛ́ wa ké Gèɖèpɔ́ɔ̀ ɓo zɔ̃̌ ɓùɖùìn. Ɔ nì kà ɖɛ cá-cá nìà kɛɛ ɖé wa gbo, sepóɛɖé ɖɛ nyɔǔn ɓě mɔ́ wɔ̃́ɔ dyiɛɛ mɔ̀ kà wa ké waà hwòɖǒɛ̀ mɔ́ɔ́-ɖɛ̀ ɓě dyéɛ nyu kɛ.

Gèɖèpɔ́ɔ̀ ɖǎa gbɔ po ɓɛ́ ɔ ké nyɔǔn póìn dyììn ɖé bɔ̃̌ nɔ̀mɔ̀ dyíinɔ̀ mú. Ɔ ɖǎ kũ̀à mɔ̀à bɔ̃̌ nɔ̀mɔ̀ dyíinɔ̀ jè nyɔǔn ɓě gbo-cɛ̃-cɛ̃ kɛɛ jǎà-po-nyɔ̀ ɓěɔ̀ nyí. Wuɖu mɔ̀à Gèɖèpɔ́ɔ̀-wùɖù-wáɖá-wáɖá kɛɛ se ɓɛ́ nyɔ ɖò ké nyɔ kúɖúú ɓě gbo wùɖù ɖòùn wɛ̃, kɛɛ ɔ mɔ̀ bɔ̃̌ nɔ̀mɔ̀ dyíinɔ̀ cɛ̃-cɛ̃ ɖé hwìè kò-kò ɓě mú ɖekè. Ɖɛ ɓɛ́ vɔ́sì ɓěɔ̀ tòà jìɛɛ se ɖɛ ɓɛ́ Gèɖèpɔ́ɔ̀-wùɖù-wáɖá-wáɖá ɖé píé ké hwìè ɖò ɓɛ́ Gèɖèpɔ́ɔ̀ dè dyiɛɛ jǔ kɛ. Ɖɛ ɓɛ́ vɔ́sì ɓěɔ̀ kpàìn hwòɖǒɛɛ mɔ̀ Gèɖèpɔ́ɔ̀ mɔ́ ɓɛ́ nyɔǔn ké bɔ̃̌ nɔ̀mɔ̀ dyíinɔ̀ cɛ̃.

► Ɖɛ́ vɔ́sìɔ̀ kpàìn hwòɖǒ ɓɛ́ ɔ dyi níiń kɔ́ɖɔ́sìɔ̀ jè cɛ̃-cɛ̃ mɔ̀à ɖɛ cá-cá ɓó nyɔ ɓě seà jǎà poɛɛ gbo kɛ́?

À ɓɛ́ìn wuɖu mɔ̀à Gèɖèpɔ́ɔ̀-wùɖù-wáɖá-wáɖá kɛɛ mú sũ̀ɛ̀n ɓɛ́ ɔ ké Gèɖèpɔ́ɔ̀ Wuɖuɔ̀ jè cɛ̃-cɛ̃ ɖé hwìè kò-kò ɓě múɛɛ jìì tò. Kɛɛ wɛ̃́ɛ́ kɛɛ, ɖé cɛ̃́ɛ́-ɖɛ̀ nìà kɛ múɛɛ, à mu wuɖu mɔ̀à Gèɖèpɔ́ɔ̀-wùɖù-wáɖá-wáɖá kɛɛ kũ̀à mú nyùìn ɖé ɔ hwìè jɛ́ɛ́ɔ̀ mú: ɓɛ́ ɔ ké nyɔ ɓɛ́ ɔ nì Gèɖèpɔ́ɔ̀ Wuɖuɔ̀ nyɔ ɓě poìn dà ɖò dyíɛ gbo cɛ̃iń nyɛɛ jìì tò.

Gèɖèpɔ́ɔ̀-wùɖù ɓá bɔ̃̌ nɔ̀mɔ̀ dyíinɔ̀ dyíɛɛ wáɖá-wáɖá mɔ̀ ɔ jǔ ké m̀ dyi bɔ̃̌ nɔ̀mɔ̀ dyíinɔ̀ nyɔ ɓě ɓɛ́ wa poìn dà ɖò dyíɛɛ gbo wáɖá níɛ. Ɔ se ɖɛ ɓɛ́ m̀ ké kɔ̃in-wùɖùìn-ɖɛ̀ séín mɔɔ vɔ́sì séín kpá m̀ wĩín nyɛɛ wa dyúa dyà pūɛ. Ɖɛ m̀ kéà cɛ̃ɛ mɔ̀ bɔ̃̌ nɔ̀mɔ̀ dyíinɔ̀.

Gèɖèpɔ́ɔ̀-wùɖù ɓá bɔ̃̌ nɔ̀mɔ̀ dyíinɔ̀ dyíɛɛ wáɖá-nyɔ̀ɔ̀ mɛ nyuɛɛ mɔ̀, ɔ mɛ vɔ̃ ɓɛ́ nyɔ ɓě nìà ɔ gbo ɖùǔ tòɛ̌n nyɛɛ ké Gèɖèpɔ́ɔ̀-wùɖùɔ̀ dyi kpɔ̃ wàɖà, nìí ɓɛ́ wa ké gbo zĩàìn wàɖà. Ɔ mɛ po Gèɖèpɔ́ɔ̀-wùɖùɔ̀ páún nɔ̀mɔ̀ dyíin ɓɛ́ ɔ ké nyɔ ɓěɔ̀ hwòɖǒ gbo zĩàìn ɓɛ́ìn.

Bɔ̃̌-nɔ̀mɔ̀-dyíin-kpa-nyɔ̀ɔ̀ mɛ ma mú ɓɛ́ ɔ ké cuò-wùɖù nìà ɖé ɔ Gèɖèpɔ́ɔ̀-wùɖùɔ̀ múɛɛ páún po, hwɛ̀ ɓɛ́ ɔ kéɛ wáɖá. Ɔ se Gèɖèpɔ́ɔ̀-wùɖùɔ̀ wáɖáa nì ɓɛ́ ɔ ké nyɔ ɓěɔ̀ ɖɛ tɛ̀mɛ̀ìn gàná cá. Gèɖèpɔ́ɔ̀-wùɖù-wáɖá-nyɔ̀ɔ̀ mɛ vɔ̃ ɓɛ́ ɔ ké Gèɖèpɔ́ɔ̀-wùɖù ɓɛ́ nyɔ ɓěɔ̀ dyi ɖùǔ gbo tò ní, ɔ kéɛ nyu ɓɛ́ wa ké gbo zĩàìn nyɛɛ wa gbo wáɖá. Ɖé ɔ cuò-wùɖùɔ̀ múɛɛ, ɔ mɛ zaìn bɔ̃̌ nɔ̀mɔ̀ dyíinɔ̀ jè kɔ̃in, ké ɔ mɛ zaìn kɔ̃in ɖɛ nyɔ ɓě nìà ɔ gbo ɖùǔ tòɛ̌n nyɛɛ ké nyu ɓɛ́ wa ké bɔ̃̌ɔ̀ dyi kpɔ̃ kɛ ɔ kè ɖɛín-ɖɛ̀ ɓě ɓɛ́ Kɛ́ɖɛ́ì gbo-dyi-dyi mu wa bìì nyuùn wɛ̃.

Nyɔ ɓě ɔ kéà Gèɖèpɔ́ɔ̀-wùɖù gbo wáɖáa mɛ mɔ̀ nyɔ ɓě ɓɛ́ wa nì gìɖìǐ dà ɖò mɔɔ ɖé cɔ́cì-gbò ɖò mú kɛ. Ké ɖeɛɛ, ɔ ɓɛ́ìn nyɔ ɓě ɓɛ́ wa poìn dà kà kò ɖò dyí ɓó xwíníín kà kò ɖò jèɛɛ Gèɖèpɔ́ɔ̀-wùɖù gbo wáɖáa ɖekè. Nyɔ ɓě nì náa mu dyɛ̀ bɔ̃̌ɔ̀ múàǔn dyi kpáìn mɔɔ wa seɛ múàǔn dyi kpáǐn mu.

► Dɛ̌ kè dɛ̌ m̀ ɖǎa dyé ké wa ɖǎ bɔ̃̌ nɔ̀mɔ̀ dyíinɔ̀ cɛ̃ ɖò kɛ́?

Nyɔ ɓě nì ɖé cɔ́cì-gbòɔ̀ múɛɛ Gèɖèpɔ́ɔ̀-wùɖù gbo wáɖá-wáɖá kè nyɔ ɓě poìn dà kà kò ɖò dyí ɓó xwíníín kà kò ɖò jèɛɛ Gèɖèpɔ́ɔ̀-wùɖù gbo-wáɖá-wáɖá ɓéɖé zaìn-gbo ɖíɛ́ ɓě. Kà ɔ nìà náa, nìí, à mu ɓo-bɛ̃̀ ɓě ɓá Gèɖèpɔ́ɔ̀-wùɖù ɓá bɔ̃̌ nɔ̀mɔ̀ dyíinɔ̀ dyíɛɛ wáɖá-wáɖá ɖé cɔ́cì-gbòɔ̀ múɛɛ da zàùn kĩ́ín ɓó bɔ̃̌-nɔ̀mɔ̀-dyíin-kpa-nyɔ̀ɔ̀ bìì. Nìí, ɖé cɛ̃́ɛ́-ɖɛ̀ nìà kɛ dà ɖò ɖeɛɛ, à mu à mú Gèɖèpɔ́ɔ̀-wùɖù ɓɛ́ m̀ ké wáɖá ɖé píéɛɛ jè cɛ̃ìn.

(1) Zaìn Gèɖèpɔ́ɔ̀-wùɖùɔ̀ dà jɛ́ɛ́ ɖò jè kɔ̃in.

Gèɖèpɔ́ɔ̀ Wuɖuɔ̀ ɓéɖé kpé, ɔ jèɛɛ, Gèɖèpɔ́ɔ̀-wùɖù-wáɖá-nyɔ̀ɔ̀ ɓéɖé ɓɛ́ ɔ ké ɔ kũ̀à mú nyùìn. Gèɖèpɔ́ɔ̀-wùɖù-wáɖá-nyɔ̀ɔ̀ se ɓéɖé ɓɛ́ ɔ ké ɖɛ séín ɓá vɔ́sì mɔɔ vɔ́sì ɓě ɔ muà jìì tòùn wɛ̃ɛ jè dyíɛɛ kɔ̃in zaìn séín. Ɔ mɛ nyùìn vɔ́sì jɛ́ɛ́ taɓaà ɔ Gèɖèpɔ́ɔ̀-wùɖùɔ̀ ɓá ɓo ɖeín nyɛɛ kũ̀à mú. Ɖɛ ɔ mɛ gmɔ̀ dya ɖeɛɛ mɔ̀, ɔ wuɖu kpa ɖɛ ɓě ɓɛ́ ɔ muà cɛ̃iń nììn nyɛɛ, vɔ́sì ɓɛ́ ɔ muà wuɖuún zaùn wɛ̃ɛ mɛ taɓa wa ɓá ɓo ɖeín. Ɔ dyi ná nìǐn, nìí, ɔ nì Gèɖèpɔ́ɔ̀ Wuɖuɔ̀ kpéɔ̀ kũ̀à mú nyùɛ̌n. Ɔ ní ɖá ɓɛ́ ɔ ké vɔ́sì ɖòɛ̀ wáká ɖò kɔ̃̀ xwíníín ɓéɖé kòɛ̌n ɓó ɖɛ ɔ nìà tɛ̀mɛ̀ìn nyɛ gboɛɛ kũ̀à mú nyùìn.

(2) M̀ mɛ zà wuɖu ɓě mɔ̀à nàmàǔn-dyi-táà-táà kè hwìɖǐǐ-taɓa-taɓa kɛɛ xwíníín mú.

Nyɔ ɓě nìà m̀ gbo ɖùǔ tòɛ̌n nyɛɛ mu dyɛ̀ fɔ̀nɔ̀-hwòɖǒ kò-kò ɓě ɓéɖéìn ɓá ɖɛ mɔ̀ wuɖu ɓěɛ̀ xwíníín nyɛɛ jè dyí. Wa poɛ̀n hwìɖǐi kà ɔ jǔ ké m̀ ɖǎ nì nàmàǔn ɓěɔ̀ dyi táà ní, nìí, m̀ ɖǎ nì fɛ̀ɛ̀ɔ̀ Gèɖèpɔ́ɔ̀ xwáɖáún zàìn, ké ɔ muá m̀ dyi kpɔ̃ùn wɛ̃. Wa ɓéɖé ɓɛ́ wa kéɛ dyuò kà ɓɛ́ nàmàǔn dyi-táà-táà xwíníín mɔ̀ m̀ kpá wìǐn ɓó nì nàmàǔn ɓěɔ̀ jè gàná cá, ké m̀ ɖǎ ti dyé ɓɛ́ m̀ ké wa xwaún buɛ̀ kɛ.

Nyɔ ɓě nìà ɖùǔ tòɛ̌n nyɛɛ muɛ dyɛ̀ hwìɖǐi poìn kà ɓɛ́ hwìɖǐǐ-taɓa-taɓa xwíníín mɔ̀ ɓɛ́ m̀ ké ɓiè-kpòò ɖò jè jǎà po mɔɔ ɓɛ́ m̀ ké gma ɓě ɓá ɓiè-ɓiè dyíɛɛ dyi kpɔ̃ kɛ. Wa ɓéɖé ɓɛ́ wa kéɛ dyí dyuò kà ɓɛ́ hwìɖǐǐ-taɓa-taɓa póìn kà nyɔɛɛ mɔ̀ ɓɛ́ m̀ kéɛ hwìɖǐǐ taɓa kà ɓɛ́ Kɛ́ɖɛ́ì mɛ́ ma ɓó nì jè, ɓɛ́ dyììn ɖéɛ múɛɛ, m̀ ké pó-pó ɓéɖé kɛ.

(3) Gmɔ̀ ɖɛ nìà kɛ dya tĩ́ín-tĩ́ín. Ɔ jǔ ké nyɔ ɖò dyi Kɛ́ɖɛ́ì-ɖeín-nà-nyɔ̀ jǔ wàɖà cá ti ɓɛ́ ɔ zĩàìn gbo nyɛ̀nɛ̀ɛ̀ kɛ ní ɖé?

Ɔ kpèìn nyɔ ɓáún-ɓáún hwìɖǐi ɖɛ mɔ̀à Kɛ́ɖɛ́ì-ɖeín-nà-nyɔ̀ jǔ-jǔ xwíníín nyɛ, ɔ kè ɖɛ ɓɛ́ìn nyuɛ ɓɛ́ nyɔ ɖò ké Kɛ́ɖɛ́ì-ɖeín-nà-nyɔ̀ jǔ kɛ. Wa poɛ̀n hwìɖǐi kà ɓɛ́ Gèɖèpɔ́ɔ̀-wùɖù-wáɖá-nyɔ̀ɔ̀ nì wa ganaún kpɔ̃̀ǐn ɓɛ́ wa ké Gèɖèpɔ́ɔ̀ ɓiè kɛ kè ɓɛ́ wa ké ɔ cɔ́cìɔ̀ mú kpá kɛ. Wa muɛ dyɛ̀ hwìɖǐi poìn kà ɓɛ́ ɔ mɔ́ ɓɛ́ wa ké gma-xwíɖíi-nì-fɛ̀ɛ̀ cĩ́ɛ dyí ɖú pū kɛ. Ɔ mɛ nì m̀ hwìɖǐi kà ɓɛ́ ɔ jǔ ké nàmàǔn-nyɔ̀ ɖò dyi gbo zĩàìn ní, ɔ ɖǎ ɔ nàmàǔn ɓěɔ̀ dyi táà, ké Gèɖèpɔ́ɔ̀ ɖǎ ɔ kɔ̃in zĩ̀ìn, ké ɔ kè Gèɖèpɔ́ɔ̀ ɖǎ ɓǎto jǔ kɛ.

(4) Dyé ɖɛ gbà ɓě ɓɛ́ nyɔǔn ɓě cɛ̃à kà ɓɛ́ wa mɔ̀ Kɛ́ɖɛ́ì-ɖeín-nà-nyɔ̀ ɓě kɛ.

Ɖé ɓóɖó ɖíɛ́ ɓě kɔ̃ɛɛ, nyɔ ɓáún-ɓáún poɛ̀n hwìɖǐi kà ɓɛ́ wa mɔ̀ Kɛ́ɖɛ́ì-ɖeín-nà-nyɔ̀ ɓě kɛ. Wa poɛ̀n dyɛ̀ hwìɖǐi kà ɓɛ́ wa mɔ̀ Kɛ́ɖɛ́ì-ɖeín-nà-nyɔ̀ ɓě, sepóɛɖé wa ɖǎ cɔ́cì mu ɖò, ké wa ɖǎ nyɔǔn ɓě nɔ̀mɔ̀ dyíin dyí nyu, ké wa po ɖɛ ɖíɛ́ ɓě jè jǎà, mɔɔ ké zùǔn-ɖɛ̀ ɖò ɖǎ wa gbo kpá ɖò jè. Ɓó Kɛ́ɖɛ́ì dyi-kpɔ̃-kpɔ̃ wáún wɛ̃ɛ, dè gbo-kpɔ̃ìn-kpɔ̃ìn nì ɓó nyɔ kè Gèɖèpɔ́ɔ̀ pṹa kɛɛ kè kà nyɔ nyu Gèɖèpɔ́ɔ̀ wuɖu nyuɛ ɔ jǔ ké nyɔ ɖǎ gbo zĩàìn níɛɛ mɛ dɔ̃̌ùn.

(5) Nyuɛ ɓɛ́ nyɔ ɓě ní mu cɔ́cì kɛɛ ké nì wuɖuɔ̀ múin wɔ̃́.

Ɓɔ́ wuɖu ɓě ɓɛ́ cɔ́cì-nyɔ̀ ɓě ɖòùn wɔ̃́ múin nyɛɛ poɛ. Ɓɔ́ Gèɖèpɔ́ɔ̀-wùɖùɔ̀ xwéɖé-dù tɔ̀ɔ̀ ɓě nììn kpeɖe dyí poɛ̀n, ɓɛ́ nyɔ ɓě nìà m̀ ɖùǔ gbo tòɛ̌n nyɛɛ kɔ̃̀ ɖà ké se ɖɛ m̀ nìà cɛ̃iń nyɛɛ múin wɔ̃́.

► Ɖɛ́ mɔ̀ wuɖu ɖíɛ́ ɓě ɓɛ́ ɓě po ɖé ɓěɛ̀ cɔ́cìɔ̀ mú, ɓɛ́ nyɔ ɓě nì ɖé nì gbɛ̌ɛ̀ɔ̀ múɛɛ se múin wɔ̃́ kɛ́?

(6) Cɛ̃ nyɔ ɓěɔ̀ Gèɖèpɔ́ɔ̀ nyɔ-kɔ̃in-zĩ̀ìn-zĩ̀ìnɔ̀ kè gbo-kpɔ̃ìn-kpɔ̃ìn nì ɓó nyɔ kè Gèɖèpɔ́ɔ̀ pṹa kɛ ɔ kè sè-ná-sèɛ̀ fɛ̀ɛ̀ jè gbo.

Ɔ jǔ ké m̀ ɖǎ wóɖó ɖe ɖie ní, nìí, ɖɛ ɓě nìà kɛ mɔ̀ kpáná zi ɖɛ kpauń ɓě ɓɛ́ m̀ mu dyéìn nyɛ. Tɛ̀mɛ̀ìn nàmàǔn-nyɔ̀ɔ̀ dyí kà ɓɛ́ nàmàǔn cĩ́à ɖé ɔ múɛɛ mɔ̀ ɖɛ vɛ̀nɛ̀ cá kɛ. Cɛ̃ wa zaa-wɔ̃-po-po nìà ɖé dyúa kɛ kè sè-ná-sèɛ̀ nyɔ-gǎ-dyéìn-dyéìn muà nyɔ ɓě se jǎà poɛɛ kɔ̃ dyiìn nyɛɛ jè gbo.

(7) Mɔ̀ǔn ɖá ɓɛ́ m̀ ké wa kpáná ɓě kɔ̃̀ jè se céè-ɖé bɔ̃̌ nɔ̀mɔ̀ dyíinɔ̀ múɛɛ nyɛ́nɛ́ín ɖáìn.

Ti ɖòɛ̀ ɓaɖaín, nyɔ ɓěɔ̀ ɖíɛ́ ɓě muɛ dyɛ̀ hwìɖǐi poìn kà ɓɛ́ ɓó Gèɖèpɔ́ɔ̀ nyɛ́nɛ́ín-ɖáìn-ɖɛ̀ mɔ̀à pó-póɛ wáún wɛ̃ɛ, ɔ ɓéɖé ɓó nyɛ́nɛ́ín-ɖáìn-ɖɛ̀ ɖíɛ́ ɓě ɖeɛ. Ɔ hwɔìn kà kpóɖó-dyùàɔ̀ mɔ́ɔ́-ɖɛ̀ ɓě ɓɛ́ Gèɖèpɔ́ɔ̀ nyí nyɔ kɛ, mɔɔ ɖɛ ɓɛ́ nyɔ dyé sɔ̀ìn ɖé cɔ́cìɔ̀ múɛ, mɔɔ mú-zaìn-zaìn, mɔɔ wɛ́-nyɔ̀ dyi-kánáìn-kánáìn, mɔɔ ɖɛ tɔ̀ɔ̀ séín ɓɛ́ìn nyuɛ ɓɛ́ nyɔ cĩ́-cĩ́ ké dyíin nɔ̀mɔ̀ kɛ. Ɔ jǔ ké wa dyi kà ná hwìɖǐi poìn ní, nìí, wa mu dyɛ̀ kpáná ɓě nìà ɓóɛɛ mɔ́ùn ɖòùn pū, ké wa se gbo zĩàǐn mu gàná cá.

M̀ ɓɛ́ìn wa gbo kɔ̃in zaìn kà ɓɛ́ ɔ jǔ ké Gèɖèpɔ́ɔ̀ dyi nyɔ ɖòɛ̀ fɛ̀ɛ̀ nàǐn nìǐn, nìí, ɔ gmɔ̀ nyɔɔ̀ dyí, ké ɔ po ɔ mana kɔ̃, ké ɔ kpa nyɔɔ̀ gbo ɖé ɔ fũ̀à-fṹá-ɖɛ̀ séín múɛ. Kɛɛ wɛ̃́ɛ́ kɛɛ, à mɛ ɓɔ́ɔ wa gbo cɛ̃ɛ kà ɓɛ́ Gèɖèpɔ́ɔ̀ mu waà fũ̀à-fṹá-ɖɛ̀ séínɔ̀ dyi zĩ̀ìn ɔ jǔ ké wa dyi Kɛ́ɖɛ́ì ɖeín-nà-nyɔ̀ ɓě jǔ níɛ. Cĩ́-cĩ́ mu dyɛ̀ mú kàmàǔn ɓó nyɔ ɖíɛ́ ɓě bìì ɓó gǎ ɓě wa mu wa dyéìn nyɛɛ jè.

(8) M̀ dyi nyɔ ɖò Kɛ́ɖɛ́ì gbo dyàà mɔ́ ní, ɓɔ́ ɖɛ ɓě ɔ ké nyu hwɛ̀ ɓɛ́ ɔ ké cɔ́cì jɛ́ɛ́ ɖòɛ̀ nyɔ jǔɛɛ jè ɔ gbo cɛ̃ɛ.

Nyɔ ɓɛ́ ɔ dyià Kɛ́ɖɛ́ì gbo ɖieɛɛ ɓéɖé ɓɛ́ ɔ ké cɔ́cì ɖò mú nì mɔɔ ɓɛ́ ɔ ké cɔ́cì ɖò mú kpá wàɖà cá. Ɔ ɓéɖé ɓɛ́ ɔ ké cɔ́cìɔ̀ jè m̀ gbo kɔ̃in zaìn. M̀ dyi nyɔ ɖò pɛ́í poɛń nì ɓɛ́ ɔ ké ɔ nàmàǔn ɓěɔ̀ dyi táà ní, nìí, m̀ se ɓéɖé ɓɛ́ m̀ ké ɖɛ ɓě ɔ kɔ̃̀ ɔ ké ɓéɖé hwɛ̀ ɓɛ́ ɔ ké cɔ́cì mú kpáa jè ɔ gbo cɛ̃. Ɖɛ mɛ kpɔ̃ bɔ̃̌-nɔ̀mɔ̀-dyíin-kpa-nyɔ̀ɔ̀ hwòɖǒɛɛ mɔ̀ ɓɛ́ ɔ kéɛ nyu ɓɛ́ nyɔ nìà ɔ gbo ɖùǔ tòɛ̌n nyɛɛ ké Gèɖèpɔ́ɔ̀ dyí dyuò.

► Nyɔ ɖò dyi nì cɔ́cìɔ̀ mú kpáa mɔ́ ní, ɖɛ́ ɓě cɔ́cìɔ̀ mɔ́ ɓɛ́ nyɔɔ̀ ké nyu, ɓɛ́ wa se pó-pó dyí ɓá kɛ́?

(9) Ɓɔ́ ɖɛ kàmàǔn-kàmàǔn ɓě ɓɛ́ nyɔ ɖò ké ɓéɖé, mɔɔ nyɔ ɔ ké jǔ hwɛ̀ ɓɛ́ ɔ ké Kɛ́ɖɛ́ì gbo dyiɛɛ jè cɛ̃ɛ.

Ɖá nàmàǔn-nyɔ̀ɔ̀ ɓɛ́ ɔ ké nàmàǔnɔ̀ nyɔ kɔ̃̀ jè ɔ mɔ̀ùn wɔ̃́ múin nyɛɛ jè cɛ̃. Ɓɔ́ ɔ ɖɛ kàmàǔn-kàmàǔn ɓě ɓá fɛ̀ɛ̀ dyí, ɓɛ́ ɔ ɓɛ́ìn jǎà-po-fɛ̀ɛ̀ɔ̀ mú ti pàɖǎ nyuɛ hwɛ̀ ɓɛ́ ɔ kéɛ múin wɔ̃́ɛɛ jè ɔ gbo cɛ̃ɛ. Ɓɛ́ nyɔ ɖò ké nàmàǔn dyi táà, ɓɛ́ ɔ ké hwìɖǐ-taɓa-taɓa ɓéɖéɛɛ, ɔ mɔ̀ ɖɛ kàmàǔn-kàmàǔn ɖò cá ɓó ɔ bìì. Ɓɔ́ ɖɛ kàmàǔn-kàmàǔn ɓě ɓɛ́ìn nyuɛ ɓɛ́ nyɔɔ̀ ké bɔ̃̌ nɔ̀mɔ̀ dyíinɔ̀ ɓɔ́ kɛɛ jè cɛ̃ɛ.

(10) Zaìn ɖɛ m̀ mɔ́ ɓɛ́ wa ké nyuɛɛ jè kɔ̃in.

Ɓɔ́ɔ hwìɖǐi poɛ̀n kà ɓɛ́ nyɔ nìà m̀ gbo ɖùǔ tòɛ̌n nyɛɛ dyuòɛ̀ kà ɓɛ́ ɔ kɔ̃̀ ɔ ké ɓaà, ɓɛ́ ɔ ké Gèɖèpɔ́ɔ̀ dyi diè ɓó kɔ̃in-zĩ̀ìn-zĩ̀ìn jè kɛ. Ké ɓɔ́ɔ hwìɖǐi poɛ̀n kà ɓɛ́ ɔ dyuò ɓó Gèɖèpɔ́ɔ̀-wùɖù-kɔ̃-wáɖáìn-gbààɔ̀ dyúa dyiɛ ɓɛ́ ɔ ké kɔ́dù hwuɖu taɓa kɛ. Ɔ jǔ ké m̀ dyi nyɔ ɓěɔ̀ dyúa ɖá ɓɛ́ m̀ wa dyi diè ní, nìí, m̀ mɛ zaìn ɖɛ m̀ mɔ́ ɓɛ́ wa kéà nyuɛɛ wa gbo kɔ̃in. Nyuɛ ɓɛ́ nyɔ mɔ̀ dɛ̃-nyɔ̀ ɖé cɔ́cìɔ̀ múɛɛ hwòɖǒ ké kpéí kpá ɓó ɖɛ m̀ muà cɛ̃ìn nyɛɛ nyu jè.

Nyɔǔn ɓě ɓɛ́ìn dyí poɛ̀n ɓɛ́ wa ké ɖɛ kúɖú ɓě jè ɓaà. Ti ɖíɛ́ ɓě ní pásɔ̀ɖɔ̀ ɖò poìn nyɔǔn ɓě dyí ɓɛ́ wa ké hwòɖǒ-kpɔ̃-ɖɛ̀ kò-kò ɓě jè ɓaà. Ɓo-bɛ̃̀ ɓě nìà dɔ̃̀ǐn mú dà ɓíɖíiɛɛ seɛ cɛ̃ kà m̀ ɓéɖé ɓɛ́ m̀ ké ɖɛ séín jè ɓaà wɛ̃́ɛ́ kɛ. Ɓo-bɛ̃̀ ɓě nìà kè tòɛ̀ jìì kà ɓɛ́ bɔ̃̌-nɔ̀mɔ̀-dyíin-kpa-nyɔ̀ɔ̀ mɛ ɓaà nyɔ ɓě ɓɛ́ wa tò ɔ Gèɖèpɔ́ɔ̀-wùɖùɔ̀ gbo ɖùǔ, ké wa kpɔ̃ɔ dyiɛɛ bìì kɛ.

Pásɔ̀ɖɔ̀ɔ̀ mɛ nyuɛ ɓɛ́ wa ké nyɔ ɖíɛ́ ɓě ɖɛ tɛ̀mɛ̀ìn ɖé cɔ́cìɔ̀ mú, ɓɛ́ wa ké nyɔ ɓě nìà pó-pó jè ɓaàǔn wɛ̃ɛ gbo kpáa ɓɛ́ìn. Ɔ mɛ dyéìn nyɔ ɓě nìà kɛ ti ɓɛ́ wa ké nyɔ ɓě ɔ mu ɖáùn ɓɛ́ wa ké bɔ̃̌-nɔ̀mɔ̀-dyíin-kpa-nyɔ̀ ɓě jǔɛɛ gbo kpá.

Ti díɛ́ ɓě ní nyɔ ɓɛ́ ɔ mɔ́à gbo-kpá-kpá tòɛ̀ dyi, ɓɛ́ ɔ kéà nyɔǔn ɓě bìì ɓaà kɛɛ po waà fũ̀à-fṹá-ɖɛ̀ɔ̀ kɔ̃, ké ɔ se wa gbo kpáa ɓɛ́ìn. Pásɔ̀ɖɔ̀ɔ̀ mɛ kpaìn dyéɖéi ɓó dyí-gbǒ-ɖɛ̀ ɓě nì náa jè, ké ɔ mɛ dyé ti ɓɛ́ ɔ ké nyɔ ɓěɔ̀ gbo kpáa ɓɛ́ìn. Ɔ jǔ ké nyɔ ɖò dyi ɓaà-ɓaàɔ̀ hwìǐ zàǐn nì dyììn ɖé kpeɖe gbà ɓě xwai-nyu-nyu mú, mɔɔ ɔ dyi nyɔ ɓěɔ̀ náún-po-wùɖù se dyí sɛ́ɖɛ́ìn ɓě nyíɛ nì ní, nìí, pásɔ̀ɖɔ̀ɔ̀ mɛ vɔ̃ ɓɛ́ ɔ ké ɖɛ seà dyí sɛ́ɖɛ́ìn nyɛɛ dyí sɛ́ɖɛ́ìn.

À poɛ jǎà kà ɓɛ́ nyɔ ɖò ɓɛ́ìn nàmàǔn dyi táà, ké ɔ ɓɛ́ìn jǎà poɛ mɔɔ ké ɔ ɓɛ́ìn gbo zĩàìn wàɖà cá kɛ. Hwìɖǐǐ-taɓa-taɓa nìà ɓóɛ mɔ̀ nyɔ nyuɛ ké à kuà dyi ɖé nyɔ ɓě ɓɛ́ ɖɛ kpɔ̃ hwòɖǒɛɛ bìì ɓaà-ɓaà múɛ̀.

(1) Nyɔ ɓɛ́ ɔ ɖǎ ɖɛ hwɛ̀ ɖé jǎà-po-po múɛɛ mɛ kpá nyɔ ɖò ɓɛ́ ɖɛ kpɔ̃ hwòɖǒɛɛ gbo, ɓɛ́ ɔ ké ɔ bìì ɓaà

Ɓɔ́ wɔ̃́ɔ ɓɛ́ ɖɛ-hwòɖǒ-kpɔ̃-nyɔ̀ ɖò ké ɔ mìɔùn bìì ɓaà ɖòùn pū, ɓɛ́ ɔ ké mu. À mɔ́ ɓɛ́ ɖɛ-hwòɖǒ-kpɔ̃-nyɔ̀ɔ̀ ké to-ɖu-nyɔ̀ jǔ gàná cá.

(2) Diè ɖɛ-hwòɖǒ-kpɔ̃-nyɔ̀ɔ̀ dyi ɓɛ́ m̀ ké ɖɛ kɔ̃̀ jè ɔ nìà ɓaàǔn wɛ̃ɛ dyí dyuò.

M̀ mɛ ɓɔ́ɔ hwìɖǐi poɛ̀n cá kà ɔ nì pó-pó jè ɓaàǔn wɛ̃. Ɔ mɛ nì m̀ hwìɖǐi kà ɔ jǔ ké bɔ̃̌-nɔ̀mɔ̀-dyíin-kpa-nyɔ̀ɔ̀ dyi Gèɖèpɔ́ɔ̀-wùɖùɔ̀ wáɖáa hwɔ nyɛ̀nɛ̀ɛ̀ ní, nìí, nyɔ pàɖǎ mu dyiìn ɓɛ́ wa ké ɖɛ kò-kò kúɖú jè ɓaà kɛ. Ɔ se dyíin nɔ̀mɔ̀ ɓɛ́ m̀ ké ɖɛ-hwòɖǒ-kpɔ̃-nyɔ̀ ɓɛ́ ɔ nì ɓaàǔn wɛ̃ɛ ɓaà-wùɖùɔ̀ mú zà, kɛɛ ti ɖíɛ́ ɓě ní, jǎà-po-nyɔ̀ nìà ɔ gbo kpáuń wɛ̃ɛ mɛ diè ɔ dyi, ɓɛ́ ɔ ké níiń, “Ɖɛ́ m̀ mɔ́ ɓɛ́ Gèɖèpɔ́ɔ̀ ké m̀ bìì nyuɛ́?” Ɔ ɖǎ ná nìǐn, nìí, jǎà-po-nyɔ̀ɔ̀ mɛ ɓaà ɔ bìì ɓó ɖɛ kpɔ̃à ɔ hwòɖǒɛɛ jè.

(3) M̀ mɛ kùìn ɖɛ-hwòɖǒ-kpɔ̃-nyɔ̀ɔ̀ hwòɖǒǔn ɓɛ́ ɔ ké gbo zĩàìn ɖé ɖɛ séín mú.

M̀ mɛ diè ɔ dyi, ɓɛ́ m̀ ké níiń, “M̀ ɖǎ wɔ̃́ ɓɛ́ m̀ ké nàmàǔn dyi táà, ɓɛ́ Gèɖèpɔ́ɔ̀ ké m̀ nàmàǔn xwaun buɛ̀ɛ̀?” Kùìn ɔ hwòɖǒǔn ɓɛ́ ɔ ké nàmàǔn ɓě ɔ nìà dyi táàǔn wɛ̃ɛ jè Gèɖèpɔ́ɔ̀ gbo cɛ̃. Ɔ se dyíin nɔ̀mɔ̀ ɓɛ́ ɔ ké nàmàǔn ɓěɔ̀ mú wɔ̃́ìn ɓó pásɔ̀ɖɔ̀ɔ̀ kè nyɔ tɔ̀ɔ̀ séín ɖò dyúa, ɔ sèìn ké ɔ ɖǎ dyɛ nyɔ ɓěa ɖɛ gbà ɖò bũ̌ nyu hwɛ̀.

(4) Tɛ̀mɛ̀ìn ɖɛ-hwòɖǒ-kpɔ̃-nyɔ̀ɔ̀ dyí kà ɓɛ́ Gèɖèpɔ́ɔ̀ mu ɔ kɔ̃in zĩ̀ìn nyɛ.

Cɛ̃ɛ ɔ gbo ɓɛ́ ɔ ké kɔ̃in-zĩ̀ìn-zĩ̀ìn Gèɖèpɔ́ɔ̀ zɔ̀ìn kè ɓɛ́ ɔ ké Gèɖèpɔ́ɔ̀ nyɛ́nɛ́ín-ɖáìn-ɖɛ̀ mɔ̀à nyɔ-kɔ̃in-zĩ̀ìn-zĩ̀ìn nyɛɛ hwòɖǒ kɔ̃ dè. Kɛɛ ɔ jǔ ké ɔ hwòɖǒ se mɛ́ín, nìí, m̀ mɛ zàìn ɔ nyɛ́nɛ́ín-ɖáìn-ɖɛ̀ kɔ̃̀ jè Báɓòɔ̀ cɛ̃à kɛɛ da (1 Jɔ̃́ɔ́ 1:9, Jɔ̃́ɔ́ 3:16, Wóɖómà 5:8).

Ɔ jǔ ké ɖɛ-hwòɖǒ-kpɔ̃-nyɔ̀ɔ̀ mìɔùn se ɓaà ɓɛ́ìn ní, nìí, nyɔ nìà ɔ gbo kpáuń wɛ̃ɛ mɛ nyu ɓaà-wùɖùɔ̀, ɓɛ́ ɖɛ-hwòɖǒ-kpɔ̃-nyɔ̀ɔ̀ ké ɔ wuɖuɔ̀ kɔ̃ún kpá. Ɓaà-wùɖù ɔ kéà nyuɛɛ ɓɛ́ìn kà nìɛ̀:

“Bounɓo, ḿ dyuòɛ̀ kà ɓɛ́ ḿ mɔ̀ nàmàǔn-nyɔ̀, ké ḿ ɓéɖé ɓɛ́ ḿ ké gǎ dyé ɓó sè-ná-sèɛ̀ tiín nyɛ. Ḿ kpá wìǐn ɓó ní nàmàǔn ɓěɔ̀ jè, ké ḿ ɖǎ ti dyé ɓɛ́ ḿ ké wa kɔ̃ín pòìn. Ḿ nì m̀ dyi dièɛ̌n ɓɛ́ m̀ ké ḿ kɔ̃in zĩ̀ìn. Ḿ se ɖɛ kpa ɓɛ́ m̀ kéɛ náa ḿ bìì nyuɛ, kɛɛ sepóɛɖé Jízɛ̀ mɛ́ ma ɓó ḿ bìì jè. Ḿ po m̀ zùo ɓó pó-pó ɓɛ́ m̀ nyíà nyɔǔn wɛ̃ɛ jè. Sɔ̀ìn zɛ̃̌ɛ̀ gbo ké dyúa muɛɛ, ní muá m̀ bìì cĩ́ìn.”

Ɔ jǔ ké ɔ dyi mú kàmà ɓó ɖɛ-hwòɖǒ-kpɔ̃-nyɔ̀ ɖò bìì ɓɛ́ ɔ ké ɖɛ jɛ́ɛ́ ɖò jè ɓaà to-ɖu-kà ní, nìí, nàmàǔn ɖò nì ɓó ké ɔ seɛ dyi táà mɔ́. Ɔ dyi ná nìǐn, nìí, ɔ se hwìɖǐǐ-taɓa-taɓa dyàà nyɔ-kɔ̃in-zĩ̀ìn-zĩ̀ìn nyɛɛ ɓéɖéɛ ɓɛ́ìn, ɔ sèìn ké ɔ wɔ̃́ìn dyɛ ɔ nàmàǔn séín ɓěɔ̀ mú hwɛ̀.

(5) M̀ mɛ diè nyɔ ɓɛ́ ɔ wɔ̃́ìn ɔ nàmàǔn ɓěɔ̀ múɛɛ dyi ɓó ɔ zàse-bɔ̃̀ jè.

Ɔ jǔ ké m̀ dyiɛ dyé ké ɖɛ-hwòɖǒ-kpɔ̃-nyɔ̀ɔ̀ dyi gbo zĩàìn mɔ́ ní, nìí, nyɔ ɖò mɛ diè ɔ dyi, ɓɛ́ ɔ ké níiń, “Ɖɛ́ Gèɖèpɔ́ɔ̀ ɖǎ m̀ bìì nyu kɛ́?” Kùìn ɔ hwòɖǒǔn ɓɛ́ ɔ ké ɖɛ jɛ́ɛ́ ɖò cɛ̃. Ɔ ɓɛ́ìn wùɖùɛ̀ ɓó nyɔǔn séín dyúa, kɛɛ ɖɛ ɔ muà cɛ̃ìn nyɛɛ, ɔ mɛ cɛ̃ɛ nyɔ ɓě ɓaà ɔ bììɛɛ gbo.

(6) M̀ mɛ nyí ɖɛ ɓá pó-pó dyíɛɛ ɖífèɖè nììn ɔ xwa.

M̀ mɛ zaìn pó-pó jè kɔ̃in ɓó ɖífèɖè ɖò kɔ̃, ɓɛ́ m̀ kéɛ nyɔ ɓɛ́ ɔ táà kà ɔ nàmàǔnɔ̀ dyiɛɛ xwa nyí, ɓɛ́ ɔ kéɛ taún kpa. Ɔ muɛ nyuùn ɓɛ́ ɔ ké ɖɛ kpáà ɔ gboɛɛ múin wɔ̃́, ké ɔ muɛ jè nyɔ tɔ̀ɔ̀ ɓě gbo kɔ̃in zaìn ɓɛ́ìn ɖekè.

(7) Po ɓo-bɛ̃̀ kĩ́ín-kĩ́ín nyɔ ɖò ké dyí ɖú ɖé Kɛ́ɖɛ́ì-ɖeín-nà-nyɔ̀ jǔ-jǔ múɛɛ jè páún.

Ɓo-bɛ̃̀ kĩ́ín-kĩ́ín nyɔ ɖò ké dyí ɖú ɖé Kɛ́ɖɛ́ì-ɖeín-nà-nyɔ̀ jǔ-jǔ múɛɛ mɔ̀, ɔ mɛ mu pásɔ̀ɖɔ̀ ɖò mɔɔ jǎà-po-nyɔ̀ hwɛ̀ ɖɛ ɖò gbo ɓɛ́ nyɔɔ̀ ké ɔ gbo wùɖù. M̀ mɛ nyuɛ ɓɛ́ nyɔ muà ɔ nàmàǔnɔ̀ dyi táàùn wɛ̃ɛ ké ɖɛ kpáà ɔ gboɛɛ múin wɔ̃́. Ɔ ɖǎ ná nìǐn, nìí, ɔ ɓɛ́ìn jǎà-po-kpòò tííwè ɖò mú kpáa mɔɔ ɔ kè nyɔ ɖò ɓɛ́ìn ɓaàǔn nìɛ̀ ti séín.

Ké ɖeɛɛ, nyɔ ɖò mɛ té ɔ gbǒ-xwíníín-nyɔ̀ ɓěɔ̀ gboi, ɓɛ́ ɔ ké waà nyɔ zĩàìn kà gboɛɛ jè wa gbo cɛ̃, ɓɛ́ ɔ kéɛ cɛ̃ kà wa mɛ dyi cɔ́cìɔ̀ mú kɛ. Ɖéɛ̀ wa mu dyɛ̀ kpé ɓɛ́ìn ɓɛ́ wa ké wa bɔ̃̌ nɔ̀mɔ̀ dyíinɔ̀ gbo cɛ̃.

► Ɖɛ́ mɔ̀ nììn cɔ́cìɔ̀ kpeɖe ɓě ɖé nyɔǔn ɓě bìì ɓaà-ɓaà múɛ́? Ɖɛ́ m̀ ɓéɖé m̀ ké nyu ɓɛ́ m̀ ké ɖɛ ɓě céè kà ɖé dyiíɛɛ nì cɔ́cìɔ̀ nììn kpeɖe ɓěɔ̀ kɔ̃in po kɛ́?

Xwíníín kɔ̃̀ jè nyɔ wáɖáà Gèɖèpɔ́ɔ̀-wùɖù ɖé píéɛɛ mɔ̀ ɓɛ́ nyɔ ké nyɔ ɓě ní dyià cɔ́cìɛɛ Gèɖèpɔ́ɔ̀-wùɖùɔ̀ gbo kpa. Ɔ kàmà mú, sepóɛɖé nyɔ ɓě kéà Gèɖèpɔ́ɔ̀-wùɖùɔ̀ wɔ̃́ɛɛ nì ɖé ɓó xwíníín kà kò ɖò ɓě jè, ké wa se dyɛ̀ m̀ gbo ɖùǔ tòɛ̌ mu. Kuɖu-kuɖu ɓě mu dyɛ̀ ɖé nììn, ké ɖɛ ɖò se hwìè xwíníín nìɛ̌ mu. Ɓiè-ɓiè se dyíin nɔ̀mɔ̀ɔ̀ ɓɛ́ìn dà kà kò ɖò, mɔɔ ɖé píé, ɓɛ́ ɔ ké kà ɔ nyuà nìɛ̀ ɖé cɔ́cì-gbòɔ̀ múɛɛ dyí zi.

Ɖɛ ɓɛ́ìn nyuɛ ɓɛ́ Gèɖèpɔ́ɔ̀-wùɖù-wáɖá-wáɖá ɖé píé ké dyíin nɔ̀mɔ̀ɛɛ mɔ̀, nyɔɔ̀ mɛ ɓéɖé wuɖu boɖo-boɖo cá, ɓɛ́ nyɔ ɓěɔ̀ ké ɔ wuɖuɔ̀ múin wɔ̃́ mɔɔ ɔ mɛ wùɖùìn ɖɛ ɖò mú.

Ɖɛ mɔ̀ ɖɛ kpa ɖɛ kĩ́ín-kĩ́ín nì Gèɖèpɔ́ɔ̀-wùɖù-wáɖá-wáɖá ɖé píé múɛɛ mɔ̀ ɓɛ́ nyɔ ɓěɔ̀ ké m̀ gbo ɖùǔ tòɛ. Sepóɛɖé nyɔ ɓě nì ɖé gbɛ̌ɛ̀ɔ̀ múɛɛ muɛ gbɔ poùn wàɖà cá kɛbì wa mɛ tò m̀ gbo ɖùǔ mɔɔ wa mɛ zàìn nì wuɖuɔ̀ ɖùǔ dyi ní. Wa ɖíɛ́ ɓě mu ɖùǔ tòùn ɓó mínítì gbɛ̀ǐ-gbɛ̀ǐ xwíníín. Ké wa ɖíɛ́ ɓě mu wuɖu-kpò dyúáɖò mɔɔ sɔ̃́ gbo ɖùǔ tòùn hwɛ̀ ɓɛ́ wa kéɛ gbɔ po kɛbì wa kpáìn nì jè múàǔn dyi ní.

Wuɖu ɓě ɓɛ́ Gèɖèpɔ́ɔ̀-wùɖù-wáɖá-nyɔ̀ɔ̀ mu cɛ̃ìn nyɛɛ mɛ xwã́ ɓoún, ké ɖɛ ɓě ɔ muà cɛ̃ìn nyɛɛ mɛ mɔ̀ ɖɛ kpa ɖɛ ɓě. Ɔ mɛ nì ɔ hwìɖǐi kà ɓɛ́ wuɖu kĩ́ín-kĩ́ín ɓě ɔ muà cɛ̃ìn nyɛɛ ɖéɛ̀ ɔ ɖùǔ-gbo-tò-nyɔ̀ ɓěɔ̀ ɖíɛ́ ɓě mu kɔ̃in kpɔ̃ùn ɓɛ wa ké ɔ wuɖu tɔ̀ɔ̀ ɓěɔ̀ gbo ɖùǔ tò kɛ. Ɖɛ ɓě ɔ muà cɛ̃ìn ɖé ɔ wuɖu ɓěɔ̀ ɖò-ɖò múɛɛ muɛ nyuùn ɓɛ́ nyɔ ɓěɔ̀ ké ɔ gbo ɖùǔ tò. Ɔ jǔ ké ɔ dyiɛ dyé kà ɓɛ́ nyɔ kúɖúú ɓě nì ɔ gbo ɖùǔ tòɛ̌n nyɛɛ ní, nìí, kpé mu dyɛ̀ ɔ dyí kpáùn ɓɛ́ ɔ ké Gèɖèpɔ́ɔ̀-wùɖùɔ̀ ɖɛ ɖíɛ́ ɓě gboi kpa, ɓɛ́ ɔ ké wuɖu tĩ́ín-tĩ́ín ɓě jè kɔ̃in zaìn nɔ̀mɔ̀ dyíin.

Ɔ dyi xwa fɛ̃́ìn ní, Gèɖèpɔ́ɔ̀-wùɖù-wáɖá-nyɔ̀ɔ̀ mɛ ɓéɖé jǎà-po-nyɔ̀ kúɖúú ɓě ɓó ɔ gbo. Ɔ jǔ ké zii-nyɔ̀ ɓě dyi nyɔ tɔ̀ɔ̀ ɓě ɓó dyé, ké wa dyi ɖùǔ tòɛ̌n nìǐn, nìí, kpé mu dyɛ̀ wa mɔ̀ùn dyí kpáùn ɓɛ́ wa ké ɓó dyi nyànà, ɓɛ́ wa ké ɖùǔ tò ɖekè. Ɔ jǔ ké wɛ́ɖɛ́-nyu-nyɔ̀ ɓě dyi ɓó nì ɓɛ́ wa ké ɓeɖe hwɛ̀ ɓɛ́ Gèɖèpɔ́ɔ̀-wùɖù-wáɖá-wáɖáɔ̀ ké gbɔ dè ní, nìí, ɔ muɛ nyuùn ɓɛ́ nyɔǔn ɓě ké ɓó dyí poìn.

Gèɖèpɔ́ɔ̀-wùɖù-wáɖá-nyɔ̀ɔ̀ mɛ ɖá nyɔ ɓě nìà ɖùǔ tòɛ̌n nyɛɛ ɓó dyúa ɓɛ́ wa ké pó-pó jè ɓaà.

Nyɔ-gbo-kpá-nyɔ̀ ɓě nìà ɓóɛɛ mɛ geìn nyɔ ɓě nì gbɛ̌ɛ̀ɔ̀ múɛɛ ɖífèɖè ɓě ɓɛ́ Gèɖèpɔ́ɔ̀-wùɖùɔ̀ céè kɔ̃ɛɛ múin.

► Dɛ̌ ɓě nì ɖé nì gbɛ̌ɛ̀ɔ̀ mú ɓɛ́ wa ɓɛ́ìn Gèɖèpɔ́ɔ̀-wùɖù wáɖáìn nyɛ́?

Kàǔn wɛ̃ɛ, ɖɛ-cɛ̃́-nyɔ̀ ɖò-ɖò séín mɛ gmɔ̀ Gèɖèpɔ́ɔ̀-wùɖù ɓá bɔ̃̌ nɔ̀mɔ̀ dyíin kpa jè dyí, ɓɛ́ ɔ dyàà kɛɛ dya. Gèɖèpɔ́ɔ̀-wùɖùɔ̀ mɛ cɛ̃ ɓo-bɛ̃̀ ɓaɖa-bùè ɓě ɓáà Gèɖèpɔ́ɔ̀-wùɖù ɓá bɔ̃̌ nɔ̀mɔ̀ dyíinɔ̀ dyíɛɛ jè. Ɔ mɛ poìn ɖɛ ɔ ɓɛ́ìn nyuɛ ɓɛ́ ɔ Gèɖèpɔ́ɔ̀-wùɖùɔ̀ ké dyíin nɔ̀mɔ̀ mìɔ kɛɛ jè hwìɖǐi.

Ɖɛ-cɛ̃́-cɛ̃́ɔ̀ nàìn-nyɔ̀ɔ̀ kè ɖɛ-cɛ̃́-nyɔ̀ ɓěɔ̀ se dyɛ̀ tiɔ̀ ɓéɖéɛ mu ɓɛ́ wa ké ɖɛ-cɛ̃́-nyɔ̀ ɖò-ɖò séínɛ̀ Gèɖèpɔ́ɔ̀-wùɖùɔ̀ dɔ́ɔ́ kɔ̃in dèìn, kɛɛ wa mɛ vɔ̃ cá ɓɛ́ wa ké ɖɛ-cɛ̃́-nyɔ̀ ɓěɔ̀ ɔ hwɔìn-ɖɛ̀ ɓě nyí.

À se ɖɛ tɛ̀mɛ̀ǐn mu ɓó ɖɛ-cɛ̃́-tìɔ̀ nyɔ mu ɓó dyí kɔùn wɛ̃ɛ ɓaɖa. Ɖɛ-cɛ̃́-nyɔ̀ ɓěɔ̀ mu waà Gèɖèpɔ́ɔ̀-wùɖù ɓá bɔ̃̌ nɔ̀mɔ̀ dyíin kpa jè dyíɛɛ wáɖáùn, ɓɛ́ wa ké wa dɔ́ɔ́ kɔ̃in dèìn. Wa se ɓéɖé ɓɛ́ wa ké Gèɖèpɔ́ɔ̀-wùɖù gànáɔ̀ wáɖá, kɛɛ wa ɖò-ɖò mɛ xwã́ìn ɔ Gèɖèpɔ́ɔ̀-wùɖùɔ̀ ɓoún ɓó mínítì hm̀m̌ mɔɔ mínítì mɛ̀nɛ̌ìn-sɔ̃́ xwíníín. Gèɖèpɔ́ɔ̀-wùɖù-wáɖá-tìɔ̀ ɖǎ dyi ziín, ɖɛ-cɛ̃́-tìɔ̀ nyɔ mu ɓó dyí kɔùn wɛ̃ɛ nììn cɛ̃́ɛ́-ɖɛ̀ɔ̀ mɔ̀ Cɛ̃́ɛ́-ɖɛ̀ 12.

Po Gèɖèpɔ́ɔ̀-wùɖù ɖò ɓá bɔ̃̌ nɔ̀mɔ̀ dyíinɔ̀ kpa jè dyí, ɓɛ́ ɔ sí ɓo-bɛ̃̀ ɓě nìà cɛ̃́ɛ́-ɖɛ̀ nìà kɛ múɛ kíɖííɛɛ páún. M̀ se ɓéɖé ɓɛ́ m̀ ké Gèɖèpɔ́ɔ̀-wùɖù gànáɔ̀ céè, kɛɛ m̀ mɛ céè wuɖu jɛ́ɛ́ ɓě ɓáa dyiɛɛ ɓíɖíi. Ɔ ɖǎ ná nìǐn, nìí, m̀ mɛ dyàà ɖɛ-cɛ̃́-tìɔ̀ nyɔ mu ɓó dyí kɔùn wɛ̃ɛ ɓaɖa, ɓɛ́ ɓě kéɛ dɔ́ɔ́ kɔ̃in dèìn.