Lesson 12: Gbǒ-wɔ̃̀ ɓě Kaà-kaà

► À ɓéɖé ɓɛ́ à ké nyɔ ɓě se jǎà-po-nyɔ̀ ɓěɛɛ bìì ɓaàe? Báɓòɔ̀ dɛ̌ cɛ̃ɛ kà ɓɛ́ à mɛ ɓaà nyɔ ɓě se jǎà-po-nyɔ̀ ɓěɛɛ bìì kɛ́?

Ɔ se xwa fɛ̃́ìn ɓɛ́ à ké vɔ́sì ɖò dyé ɖé Báɓòɔ̀ mú ɓɛ́ ɔ kéɛ cɛ̃ kà nyɔ ɓě se jǎà-po-nyɔ̀ ɓěɛɛ dyi gbo zĩàìn ní, nìí, à mɛ ɓaà wa bìì kɛ. Vɔ́sì kúɖúú ɓě ɓɛ́ à dyéɛɛ cɛ̃ɛ à gbo kà ɓɛ́ à mɛ ɓaà ɓɛ́ bɔ̃̌ nɔ̀mɔ̀ dyíinɔ̀ ké dyi ɓeìn ɖé kpé mú kɛ (2 Tɛ̀sàɖónìà 3:1, Ìfísĩ̀ɔ̀ 6:19, Kɔ̀ɖɔ́sĩ̀à 4:4, Àpɔ́sò 4:29).

Ɖɛ à dyuò dyíɛɛ mɔ̀, à mɛ ɓaà ɓɛ́ nàmàǔn-nyɔ̀ ɓě ké gbo zĩàìn, ké kà dyúáɖòɔ̀, kǎà à mɛ ɓaà ɓɛ́ bɔ̃̌ nɔ̀mɔ̀ dyíinɔ̀ ké gmɛ̀nɛ̀ɛ̀ kpa. Báɓòɔ̀ cɛ̃ɛ à gbo ɓɛ́ à ké nyɔ séín bìì ɓaà, ké ɔ ɓɛ́ìn dyɛ̀ nyɔ ɓě se jǎà-po-nyɔ̀ ɓěɛɛ mɔ̀ùn jǔɛ ɖekè, ɓɛ́ wa ké gbo zĩàìn. (1 Tímétè 2:1). Báɓòɔ̀ cɛ̃ɛ à gbo ɓɛ́ à ké vɔ̃ ɓɛ́ nyɔǔn ɓě ké waà nàmàǔn-kpèɖèɔ̀ dyi táà (2 Tímétè 2:25), ké ɔ mu dyíin nɔ̀mɔ̀ùn ɓɛ́ à ké ɓaà ɓɛ́ Gèɖèpɔ́ɔ̀ ké à gbo kpá ɖé kũ̀à nìà ɓóɛɛ nyu-nyu mú.

Ɔ jǔ ké cɔ́cì ɖò dyi ɖɛ hwɛ̀ ɖé ɖɛ séín múín, nìí, wa ɓeìn bɔ̃̌ nɔ̀mɔ̀ dyíinɔ̀ dyi ɖé jǎà mú, ké wa ní kpɔ̃ fũ̀à-fṹá ɖò. Ɖé cɔ́cì-nyɔ̀ kĩ́ín-kĩ́ín ɓěɔ̀ nììn cɔ́cì ɓɛ́ Àpɔ́sò-cèè-ɖɛ̀ɔ̀ dèà mɛɛ múɛɛ, à dyéɛ kà ɓɛ́ múà nì ma nyɔ séín mú, ké wa nì ma bɔ̃̌ nɔ̀mɔ̀ dyíinɔ̀ dyi ɓeɛ̌n nyɛ.

► Ɖɛ-cɛ̃́-nyɔ̀ ɖò mɛ zà Àpɔ́sò 2:46-47 wuɖuún ɓɛ́ nyɔ tɔ̀ɔ̀ ɓěɔ̀ ké ɔ ɖùǔ gbo tò.

Jɛ́ɛ́ kɛɛ, cɔ́cì-nyɔ̀ ɓěɔ̀ dyí-poìn-poìnɔ̀ mɔ̀ ɖɛ ɖò ɓɛ́ ɔ ku ma dyi mìɔ, ké ɔ ɓéɖé ma kpé, ké ɔ nyuɛ ké nyɔ tɔ̀ɔ̀ ɓě dyi ma wa gbo ɖé hwòɖǒ wáɖáá mú kɛ. Ɖɛ nìà kɛ tɛ̀mɛ̀ìn à dyí kà ɔ jǔ ké cɔ́cì ɖò se nyɔ ɖìè ɓě ɖé cɔ́cìɔ̀ mú dyàǔn nìǐn, nìí, ɔ se dyi kuɛ ɓɛ́ìn cá kà ɔ ɓéɖé ɔ kéɔ́ dyi kuɛ.

► Ɖɛ-cɛ̃́-nyɔ̀ ɖò mɛ zà Àpɔ́sò 5:42 wuɖuún ɓɛ́ nyɔ tɔ̀ɔ̀ ɓěɔ̀ ké ɔ ɖùǔ gbo tò.

Àpɔ́sò ɓěɔ̀ kè nyɔ tɔ̀ɔ̀ ɓě dyé ma ti ɓɛ́ wa ké bɔ̃̌ nɔ̀mɔ̀ dyíinɔ̀ cɛ̃ ɖé dà séín ɔ kè ti séín. Cɔ́cì ɖíɛ́ ɓě séè bɔ̃̌-nɔ̀mɔ̀-dyíin-kpa-kũ̀à nyu ɖò, ké wa se dyuò kà wa kéɛ gbɔ dèɛ̀ nyu kɛ. Wa se ɖɛ ɓě wa ké nyu ɓɛ́ wa ké bɔ̃̌ nɔ̀mɔ̀ dyíinɔ̀ dyi ɓeìn nyɛɛ dyí dyuò.

► Ɖɛ-cɛ̃́-nyɔ̀ ɖò mɛ zà Àpɔ́sò 8:1-4 wuɖuún, ɓɛ́ nyɔ tɔ̀ɔ̀ ɓěɔ̀ ké ɔ ɖùǔ gbo tò.

Jǎà-po-nyɔ̀ ɓěɔ̀ gǎ-dyéìn-dyéìn nyuɛ ké wa sɔ̀ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké wa ɓeìn ma ɓóɖó-dù kà kò ɖò ɓě kɔ̃in. Kɛɛ wa ɓeìn ma bɔ̃̌ nɔ̀mɔ̀ dyíinɔ̀ dyi ɖé dà séín ɓě ɓɛ́ wa mu ma kà kɛ. Ɖé wa mɔ̀ùn gboɛɛ, bɔ̃̌ nɔ̀mɔ̀ dyíinɔ̀ dyi-ɓeìn-ɓeìn mɔ̀ ma Kɛ́ɖɛ́ì-ɖeín-nà-fɛ̀ɛ̀ɔ̀ wáká ɖò.

Mɔ̀ǔn ɖá ɓɛ́ m̀ ké dòǐn zà ɓá cɔ́cì ɓě jè dyí ɓó nyɔ ɓě se Gèɖèpɔ́ɔ̀ dyí dyuòɛɛ dyúa. Mɔ̀ǔn ɖá ɓɛ́ m̀ ké cɔ́cì tɔ̀ɔ̀ ɓě ɖɛ gbà kɔ̃ún cɛ̃ ti m̀ mu bɔ̃̌ nɔ̀mɔ̀ dyíinɔ̀ dyi ɓeɛ̌n nììn nyɛ. Nyɔ ɓě se Gèɖèpɔ́ɔ̀ dyí dyuòɛɛ se zùǔn-ɖɛ̀ ɓěɛ̀ zaìn gboi dyí dyuò, ké wa se ɖɛ jɛ́ɛ́ ɖò cɛ̃ɛ ɓɛ́ìn ɖé dòǐn-zà-zà ɓá Gèɖèpɔ́ɔ̀ jè dyíɛɛ mú. Nyɔ pàɖǎ nì ɓóɖó-kpàà kɔ̃ɛɛ ɖá xwíníín kɔ̃̀ jè wa seà Kɛ́ɖɛ́ì jè jǎà poɛɛ mɔ̀ sepóɛɖé zàǔn-zàǔn nì ɖé cɔ́cì-nyɔ̀ ɓěɔ̀ hwìɛ̀ jè.

Ɔ jǔ ké m̀ dyi bɔ̃̌ nɔ̀mɔ̀ dyíinɔ̀ cɛ̃iń nì, ké nyɔ ɖò dyi zaìn gbo nì ɓó tɛ̀mɛ̀ìn-ɖɛ̀ kò-kò ɓě pṹa kɛɛ jè dyi dièɛ̌n nì kánáá ní, nìí, m̀ mɛ nyí ɔ gɔ̃̌-jǔ-wùɖù ɓě sɔ̀ìn ɖé Báɓòɔ̀ múɛ, kɛɛ m̀ mɛ vɔ̃ ɓɛ́ m̀ ké ɔ ɖɛ ɓě ɓɛ́ bɔ̃̌ nɔ̀mɔ̀ dyíinɔ̀ nɛ́ìn jìì kɔ̃ɛɛ gbo ɖe dyà. M̀ ɓɛ́ìn cɛ̃ɛ, ɓɛ́ m̀ ké níiń, “Dyi-diè-ɖɛ̀ ɓě nì kà ɓóɛɛ nɔ̀mɔ̀ dyíin, kɛɛ ɖɛ mɔ̀ ɖɛ kpa ɖɛ mìɔ kɛɛ mɔ̀ ɓɛ́ m̀ ké pó, ɓɛ́ gbo-kpɔ̃ìn-kpɔ̃ìn ké ɓó m̀ kè Gèɖèpɔ́ɔ̀ pṹa nì.” Ɔ jǔ ké wa dyi Kɛ́ɖɛ́ì-ɖeín-nà-nyɔ̀ ɖò ɓɛ́ wa dyuò dyíɛ, kɛbì ɔ mɛ mɔ̀ waà gbǒ-xwíníín-nyɔ̀ ɖò mɔɔ pásɔ̀ɖɔ̀ ɖòɛɛ jè m̀ gbo cɛ̃ ní, mɔ̀ǔn ɖá ɓɛ́ m̀ ké ɖɛ gbà ɖò pásɔ̀ɖɔ̀ɔ̀ nììn tɛ̀mɛ̀ìn-ɖɛ̀ɔ̀ kɔ̃ún cɛ̃.

Ɔ jǔ ké m̀ dyi ɓéɖé ɓɛ́ m̀ ké ɖɛ nyuɛ ɓɛ́ nììn cɔ́cìɔ̀ dyià kò ɓó cɔ́cì tɔ̀ɔ̀ ɖò gboɛɛ kɔ̃in zaìn ní, nìí, m̀ mɛ ɖá, “Ɔ mɔ̀ ɖɛ kpa ɖɛ ɓɛ́ nyɔ ɖò ké nàmàǔn dyi táà, ɓɛ́ Gèɖèpɔ́ɔ̀ ké ɔ kɔ̃in zĩ̀ìn, ɓɛ́ ɔ ké cĩ́ ɖé Gèɖèpɔ́ɔ̀ mɔ́ɔ́-ɖɛ̀ nyu-nyu mú. À cɔ́cìɔ̀ nyu ɖɛ ɓě nìà ɓóɛɛ ní. Ɖɛ nyuɛ ɓɛ́ à mɔ̀ùn dyià kò ɓó cɔ́cì ɓě ɓɛ́ wa ní nyu ɖɛ ɓěa kɛ gboɛɛ nìàǒ wɛ̀.”

Jǎà-po-nyɔ̀ ɖíɛ́ ɓě fɛ̃̀ìn ɓɛ́ wa ké bɔ̃̌ nɔ̀mɔ̀ dyíinɔ̀ dyi ɓeìn, sepóɛɖé wa peɖe dyi-diè-ɖɛ̀ kàmàǔn-kàmàǔn ɓě dyi jè. M̀ se ɓéɖé ɓɛ́ m̀ ké dyi diè-ɖɛ̀ séínɛ̀ gɔ̃̌-jǔ-wùɖù dyuò wɛ̃́ɛ́ hwɛ̀ ɓɛ́ m̀ ké bɔ̃̌ nɔ̀mɔ̀ dyíinɔ̀ kpa.

Ɔ jǔ ké nyɔ ɖò dyi ɖɛ ɖò dyi diè, ké m̀ seɛ gɔ̃̌-jǔ-wùɖù dyuò ní, nìí, m̀ ɓɛ́ìn cɛ̃ɛ, ɓɛ́ m̀ ké níiń: “Ḿ se dyi-diè-ɖɛa gɔ̃̌-jǔ-wùɖù ɓɛ́ìn nì hwòɖǒ dyi dèɛ̀ kɛɛ dyí dyuò. Kɛɛ nyɔ ɖò nì ɖé à cɔ́cì mú ké ɔ ɓɛ́ìn m̀ bìì gɔ̃̌ jǔɛ. Kɛɛ ḿ po Báɓòɔ̀ jè jǎà, ké ḿ poɛ jǎà kà ɓɛ́ ɖɛ mɔ̀ ɖɛ kpa ɖɛ mìɔ kɛɛ mɔ̀ ɓɛ́ m̀ ké Gèɖèpɔ́ɔ̀ dyí dyuò, ɓɛ́ m̀ ké pó. Ḿ dyuò ɖɛ ɓɛ́ìn nyuɛ ɓɛ́ m̀ ké póɛɛ dyí.”

Ɔ jǔ ké nyɔ ɖò dyiɛ cɛ̃, ké ɔ dyi níiń, “Ḿ se Báɓòɔ̀ jè jǎà poo,” mɔɔ “Ḿ se Gèɖèpɔ́ɔ̀ jè jǎà poo” ní, nìí, m̀ ɓɛ́ìn hwìè sɔ̃́ dyí ɖúɛ ɖé dɔ́ɔ́ nì kàà mú. Diè ɔ dyi xwíníín kɔ̃̀ jè ɔ ɓéɖéà kpàìn-hwòɖǒ nì ná ɓěa kɛ, ɓɛ́ m̀ ké ɔ náún po. Ɔ sɔ̃́ nììnɔ̀ mɔ̀, m̀ mɛ ɖá, “M̀ ɖǎ dyɛ̀ ɖɛ nìà kɛ hwìɖǐi poìn, ké nì hwòɖǒ ɖǎa dyí sɔ́ gàná cá. Kɛɛ kɛbì m̀ mɛ se Báɓòɔ̀ jè jǎà poɛɛ, m̀ ɓéɖé fɔ̀nɔ̀-hwòɖǒ, ké ḿ poɛ̀n hwìɖǐi kà ɓɛ́ m̀ mɔ́ ɖɛ ɓě ɓɛ́ Báɓòɔ̀ ɖá nyɔ mɛ nyuɛɛ dyí dyuòɛ̀ dyi kɛ. Ḿ ɓɛ́ìn ɖɛ ɔ jǔɛɛ m̀ dyí tɛ̀mɛ̀ìn?” M̀ dyi ɖɛ nìà kɛ nyu ní, nìí, m̀ ɓɛ́ìn bɔ̃̌ nɔ̀mɔ̀ dyíinɔ̀ dyi ɓeɛ̀n, ɓɛ́ m̀ ké se dòǐn zàǎ. Sɔ̀ìn ɓóɛ gboɛɛ ní, Gèɖèpɔ́ɔ̀ ɓɛ́ìn nyɔɔ̀ gbo kpáa ɖé wuɖu ɓě nìà kɛ mú.

M̀ dyi bɔ̃̌ nɔ̀mɔ̀ dyíinɔ̀ dyi ɓeɛ̌n nìǐn, m̀ kè nyɔ ɓɛ́ ɔ mɔ́ dòǐn zàà dyi pūɛɛ mu dyɛ̀ dyí ɓɛɖɛìn. Ɔ dyi ná nìǐn, mɔ̀ǔn ɖá ɓɛ́ m̀ ké ti pàɖǎ mú gbɔɔ̀ ɓó ɔ gbo. Ḿ seé kɔ̃̀ kɛbì m̀ mɛ cɛ̃ dyí-sɛ́ɖɛ́ìn-ɖɛ̀ séín nyɛɛ, ɔ se dyɛ̀ jǎàɔ̀ dyi kpɔ̃ɔ́ mu. Cɛ̃ ɖɛ ɓě mɔ̀ bɔ̃̌ nɔ̀mɔ̀ dyíinɔ̀ hìɖì-kpà kɛɛ séín ɔ gbo, ɓɛ́ m̀ ké ɔ dyi táà, ɓɛ́ m̀ ké nyɔ kà kò ɖò gbo wùɖùɛ̌n mu.

► Ɖɛ-cɛ̃́-nyɔ̀ ɖò mɛ zà Tátɔ̀ 1:9-11 wuɖuún ɓɛ́ nyɔ tɔ̀ɔ̀ ɓěɔ̀ ké ɔ gbo ɖùǔ tò. Xwíníínɔ̀ nyɛ́ kɔ̃̀ jè à mɛ gmɔ̀à bɔ̃̌ nɔ̀mɔ̀ dyíinɔ̀ dyí, ɓɛ́ vɔ́sì ɓěɛ̀ cɛ̃ jè kɛ́?

Hwìè ɓě kɔ̃̀ mú pásɔ̀ɖɔ̀ɔ̀ mɛ ɓɛ́ìn kpéɛɛ ɖò mɔ̀, ɔ mɛ taɓa jǎà nìà ɖé Kɛ́ɖɛ́ì-ɖeín-nà-nà múɛɛ ɓá ɓo ɖeín kóɖó, ɓɛ́ ɓóɖó-kpàà hwòɖǒ-fɔ̀nɔ̀-ɖɛ̀ ɓěɔ̀ ní kɔ̃̀ ɖà ɔ hwìǐ zàìn. À se dòǐn-zà-zà ɓá cɔ́cì tɔ̀ɔ̀ ɓě nììn tɛ̀mɛ̀ìn-ɖɛ̀ ɓě jè dyíɛɛ jè cɛ̃iń nì. Ɖɛ à nìà cɛ̃iń nyɛɛ mɔ̀, à nì ɓóɖó-kpàà mɔ́ɔ́-ɖɛ̀ ɓěɔ̀ gbo vɔ̃uń ɓɛ́ wa ní kɔ̃̀ ɖà dyí-gbǒ-ɖɛ̀ jǔ ɓó bɔ̃̌ nɔ̀mɔ̀ dyíinɔ̀ jè.

Xwíníín kɔ̃̀ jè mɛ taɓaà jǎàɔ̀ ɓá ɓo ɖeín nyɛɛ se ɓɛ́ à ké nyɔ mɔ̀à dòǐn-zà-nyɔ̀ɔ̀ kɛɛ ɖòùn Kɛ́ɖɛ́ì gbo dyà jèɛ, kɛɛ ɓɛ́ à ké nyɔ séín ɓě síà ɔ nììn fɔ̀nɔ̀-hwòɖǒ kíɖííɛɛ mɔ̀ùn Kɛ́ɖɛ́ì gbo dyà ɖekè. Nyɔ ɖíɛ́ ɓě séè ɖɛ wa ké hwìɖǐǐ taɓa kɛɛ jè gbɔ po ke dyɛ mɔ̀ùn. Wa ɓéɖé ɓɛ́ wa ké jǎà-ɖɛ̀ ɓá Kɛ́ɖɛ́ì-ɖeín-nà-nà dyíɛɛ jè wɔ̃́.

Jǎà-po-nyɔ̀ pàɖǎ se dyi ku ɓɛ́ wa ké dòǐn-zà-zà nì kàà hwìɛ̀ kpá. Jǎà-po-nyɔ̀ séín mɛ nì ɖɛ cɛ̃́iń ɖé wa kpé séín mú, kɛɛ Gèɖèpɔ́ɔ̀ kũ̀àɔ̀ mɔ̀ nyíí-ɖɛ̀ ké ɔ ɖǎa wa ɖíɛ́ ɓě nyí, ké wa ɖǎ ti dyé ɓó kũ̀àɔ̀ nyu jè.

Ɖé dòǐn-zà-zà múɛɛ, ɔ mu dyíin nɔ̀mɔ̀ùn ɓɛ́ m̀ ké nììn hwòɖǒ-kpàìn-ɖɛ̀ɔ̀ nyɔɔ̀ dyí tɛ̀mɛ̀ìn. M̀ se vɔ̃uń nì ɓɛ́ m̀ ké ɔ ɖu dyɛo, kɛɛ tɛ̀mɛ̀ìn nììn hwòɖǒ-kpàìn-ɖɛ̀ɔ̀ ɔ dyí pū. M̀ se nyɔɔ̀ gbo vɔ̃ɔ́ nì kà nyɔ vɔ̃à nyɔ mú-nyɛ́-nyɔ̀ gboɛ. Kɛɛ m̀ ɓéɖé ɓɛ́ m̀ kéɛ ɔ dyí tɛ̀mɛ̀ìn kà ɓɛ́ jǎàɔ̀ jè kpa ɖɛ ɖé m̀ gbo, sepóɛɖé m̀ kɔ̃̀ ɖé nyɔǔn-dyù jè gboɛ. Ɔ jǔ ké ɔ se bɔ̃̌ nɔ̀mɔ̀ dyíinɔ̀ jǎà po ní, nìí, ɔ zùùɔ̀ mu mú gbɔɔ̀ùn. Xwíníín kɔ̃̀ jè m̀ mɔ́ ɓɛ́ m̀ kéà ɔ hwìɖǐi-poìn-ɖɛ̀ɔ̀ gbo zĩàìn dyiɛɛ nìà ɓóɛ̀. M̀ mɛ cɛ̃ɛ ɔ gbo, ɓɛ́ m̀ ké níiń, “Ḿ mɔ́ ɓɛ́ m̀ ké Gèɖèpɔ́ɔ̀ dyí dyuò, ɓɛ́ m̀ ké pó, kɛɛ ɔ se ḿ hwìɖǐi dèɛ̌ mu ɓɛ́ m̀ ké ɖɛ ɖò se m̀ Gèɖèpɔ́ɔ̀ gbo dyàà ɓɛ́ìn nyɛɛ hwìɖǐǐ taɓa kɛ.”

À dyéɛ ɖéɛ Báɓòɔ̀ mú ti ɓɛ́ bɔ̃̌-nɔ̀mɔ̀-dyíin-kpa-nyɔ̀ ɖò dyé ma hwìè kɔ̃̀ mú ɔ ké bɔ̃̌ nɔ̀mɔ̀ dyíinɔ̀ dyi ɓeìn nyɛ.

► Ɖɛ-cɛ̃́-nyɔ̀ ɖò mɛ zà Àpɔ́sò 8:26-39 wuɖuún ɓɛ́ nyɔ tɔ̀ɔ̀ ɓěɔ̀ ké ɔ gbo ɖùǔ tò. Ké ɖɛ-cɛ̃́-nyɔ̀ ɓěɔ̀ ɖò mɛ po nɔ́ɔ́ɔ̀ dú, ɓɛ́ ɔ mǔè ɓěɔ̀ ké ɔ gbo ɖùǔ tò. Xwɛ̌ Gèɖèpɔ́ɔ̀ Zùùɔ̀ nyu ma kũ̀à nyuɛ ɖé ɖɛ nìà kɛ mú kɛ́? Xwɛ̌ Féɖò nyuɛ ma dyí dyuòɛ̀ kà ɓɛ́ hwìè ɖò ɖǎ ma ɔ bìì kaà ɓó bɔ̃̌ nɔ̀mɔ̀ dyíinɔ̀ cɛ̃ jè kɛ́?

Kpáá-ɖɛ̀-cɛ̃-nyɔ̀ ɓɛ́ ɔ dyéɛ ma ɖe kà ɓɛ́ hwìè ɖò ɖǎ ma ɔ bìì kaà ɓó bɔ̃̌ nɔ̀mɔ̀ dyíinɔ̀ cɛ̃ jèɛɛ mɔ̀ Jízɛ̀.

► Ɖɛ-cɛ̃́-nyɔ̀ ɖò mɛ zà Jɔ̃́ɔ́ 4:7-14 wuɖuún ɓɛ́ ɔ mǔè ɓěɔ̀ ké ɔ gbo ɖùǔ tò. Ɖɛ-cɛ̃́-nyɔ̀ ɓěɔ̀ ɖò mɛ po nɔ́ɔ́ɔ̀ dú.

Dɔ́ɔ́ ɓɛ́ Jízɛ̀ kè Sɛ̀mɛ́ɖìà-mààɔ̀ dè ma kà kɛɛ ɓá zaìn gbo ɓě nì ma ɓó wa pṹa kɛɛ jè dyí. Ɔ hwɔìn kà, gbo-kpɔ̃ìn-kpɔ̃ìn ɖò se ma xwéɖé-dù sɔ̃́ ɓěɔ̀ pṹa nì, ké wa se ma wuɖuún dyi wɔ̃́ìn ɓá waà ɓiè-ɖɛ̀ ɓěɔ̀ jè dyí, hwɛ̀ ké wa se ma wuɖuún dyi wɔ̃́ìn ɓá waà ɓíɖí-kpèɖè ɓěɔ̀ jè dyí. Jízɛ̀ se ma ti pàɖǎ zĩ̀ìn, ké ɔ cɛ̃ ma ɖɛ ɓě nìà kɛ jè. Ɖɛ ɓě ɓɛ́ ɔ nɛ́ìn ma jìì kɔ̃ ɖé dɔ́ɔ́-wùɖùɔ̀ múɛɛ mɔ̀ ɖɛ ɓě ɓɛ́ màaɔ̀ mɔ́ ɖé zùǔn wɛ̃ɛ jè.

Ɔ jǔ ké m̀ ɖǎa cɛ̃́ kà m̀ ké bɔ̃̌ nɔ̀mɔ̀ dyíinɔ̀ cɛ̃ɛ nyuɛɛ ní, nìí, m̀ mu hwìè ɓě dyi mɔ́ùn kà m̀ kéɛ nyɔǔn ɓě gbo cɛ̃ɛ nyu kɛ. Ti ɖíɛ́ ɓě ní, nyɔ ɖò mɔ̀ùn ɓɛ́ìn dyɛ̀ cɛ̃ɛ kà ɓɛ́ ɔ mɔ́ bɔ̃̌ nɔ̀mɔ̀ dyíinɔ̀ wɔ̃́ɔ dyí kánáá pū kɛ.

Jǎà-po-nyɔ̀ ɖíɛ́ ɓě poɛ̀n hwìɖǐi kà ɓɛ́ bɔ̃̌ nɔ̀mɔ̀ dyíinɔ̀ dyi-ɓeìn-ɓeìn mɔ̀ ɖɛ kàmàǔn-kàmàǔn ɖò, sepóɛɖé nyɔǔn ɓě seɛ dyɛ̀ ɖùǔ gbo tòɛ̀ mɔ́ɔ mu kɛ. Wa poɛ̀n hwìɖǐi kà ɓɛ́ Gèɖèpɔ́ɔ̀ jè cɛ̃-cɛ̃ mɔ̀ ɖɛ kàmàǔn-kàmàǔn ɖò kɛ.

Bɔ̃̌ nɔ̀mɔ̀ dyíinɔ̀ nyuɛ ké nyɔ wɔ̃́ ɖɛ kúɖúú ɓě ɓɛ́ nyɔǔn ɓě poìn jè hwìɖǐiɛɛ múin nɔ̀mɔ̀ dyíin. Ɔ jèɛɛ, ɔ fɛ̃́ìn xwa ɓɛ́ m̀ ké bɔ̃̌ nɔ̀mɔ̀ dyíinɔ̀ jè cɛ̃ ɖé nyɔǔn hwìɛ̀.

Ɖɛ kɔ̃̀ jè à nì cɛ̃iń dyiɛń ɖe ɖé tɛ̀mɛ̀ìn-ɖɛ̀ nìà kɛ múɛɛ mɔ̀ xwíníín kɔ̃̀ jè nyɔ ɖíɛ́ ɓě kpáìn kà bɔ̃̌ nɔ̀mɔ̀ dyíinɔ̀ jè múàǔn dyiɛ.

Nyɔ ɖíɛ́ ɓě ɓéɖé fɔ̀nɔ̀-hwòɖǒ kúɖúú ɓě ɓá Gèɖèpɔ́ɔ̀ nyíí-ɖɛ̀ mɔ̀à pó-pó kɛɛ jè dyí. Fɔ̀nɔ̀-hwòɖǒɔ̀ ɖíɛ́ ɓě mɔ̀ fɔ̀nɔ̀-hwòɖǒ gbà, kɛɛ fɔ̀nɔ̀-hwòɖǒ sɛ́ɖɛ́ìn dyí kúɖúú ɓě nì ní jǎà.

► Xwíníínɔ̀ nyɛ́ kɔ̃̀ jè m̀ kpɔ̃à bɔ̃̌ nɔ̀mɔ̀ dyíinɔ̀ jè dyi kɛ́? Ɖɛ-cɛ̃́-nyɔ̀ ɓěɔ̀ pàɖǎ mɛ dè xwíníín ɓě kɔ̃̀ jè wa táà nàmàǔn dyiɛɛ mɛ.

Xwíníín ɓě kɔ̃̀ jè nyɔǔn ɓě mɔ́á póɛ dyiɛɛ ɖíɛ́ ɓě kɛà kɛ̀.

• Wa mɔ́ dyɔún muɛ dyi, ké wa se hɛ́ɛ̀ muɛ mɔ́ jè (mɔɔ wa fɛ̃̀ìn zaa-wɔ̃-po-poɔ̀ dyi)

• Wa ké fɛ̀ɛ̀ nɔ̀mɔ̀ dyíin, ɓéɖé xwíníín nyɛɛ cĩ́ jè.

• Gèɖèpɔ́ɔ̀ ké wa dyí gmɔ̀, ɓɛ́ wa ké gìɖìǐ ɓéɖé kè ɓɛ́ wa ké se fã̀à peɖe.

• Gèɖèpɔ́ɔ̀ ké wa kɔ̃in zĩ̀ìn, ɓɛ́ wa ké seɛ hwìɖǐ poìn kà ɓɛ́ zaa mu wa kpɔ̃ùn wɛ̃ (wa ké hwòɖǒi zaìn)

• Ɓɛ́ wa ké mú hwɛ̀ ɖé zùǔn kè ɓɛ́ wa ké se kɛɛ ɖò ɓéɖé

• Ɓɛ́ gbo-kpɔ̃ìn-kpɔ̃ìn ké ɓó wa kè Gèɖèpɔ́ɔ̀ pṹa nì (wa ké Gèɖèpɔ́ɔ̀ dyí dyuò)

• Ɓɛ́ gbo-kpɔ̃ìn-kpɔ̃ìn ké ɓó wa kè Kɛ́ɖɛ́ì ɖeín-nà-nyɔ̀ ɓě pṹa nì

• Ɓɛ́ wa ké ɖɛ ɓě mɔ̀ Zùùɔ̀ mɔ́ɔ́-ɖɛ̀ kɛɛ múàǔn dyi kpáìn (múà jɛ́ɛ́)

• Ɓɛ́ wa ké buɛ̀ sɔ̀ìn ɖé nàmàǔn xwaún

• Ɓɛ́ wa ké jǎàɔ̀ dyí dyuò

Ɖɛ ɓě nìà kɛ mɔ̀ kpáná ɓě sɔ̀ìn ɖé Gèɖèpɔ́ɔ̀ mìɔùn gbo ɓó à bìì, ɔ jǔ ké gbo-kpɔ̃ìn-kpɔ̃ìn dyi ɓó à kèɔ̀ kè pṹa nì ɖe níɛ. Wa se ɖɛ ɓě ɓá ɓóɖó-kpàà dyíɛ, kɛɛ wa mɔ̀ Gèɖèpɔ́ɔ̀ mìɔùn nììn nyíí-ɖɛ̀ ɓě. Ɔ jǔ ké nyɔ ɖò kè Gèɖèpɔ́ɔ̀ dyi gbo zaìn ní, nìí, ɔ se kpáná ɓě nìà kɛ ɖò dyéɛ ɓɛ́ìn.

► Gmɔ̀ ɖɛ ɓě nìà ɓó dɔ̃̀ǐn múɛɛ dya ɓɛ́ m̀ ké ɔ nyɔ ɓě kpa ɖɛ ɓó m̀ bììɛɛ dyé. Hwɛ̀ ɓɛ́ m̀ kéà gbo zĩàìn nyɛɛ, ɔ nyɛ́ ɓě kɔ̃̀ jè kpɔ̃ ma m̀ hwòɖǒ mìɔ kɛ́? Ké ti m̀ ɖǎà Kɛ́ɖɛ́ì gbo dyiɛɛ, ɔ nyɛ́ ɓě kɔ̃̀ jè kpa ɖɛ mìɔ ɖé m̀ gbo kɛ́?

Nyɔ ɓɛ́ ɔ se hwìɖǐǐ-taɓa-taɓa ɓéɖéɛɛ ɓɛ́ìn nyɔǔn dyí tɛ̀mɛ̀ìn ɖé ɔ wĩín-wùɖù mú kà ɓɛ́ ɔ mɔ́ kpáná ɓě nìà ɓóɛ, ɓɛ́ wa ɓáà pó-pó dyíɛɛ ɖò kɛ. Bɔ̃̌-nɔ̀mɔ̀-dyíin-kpa-nyɔ̀ɔ̀ ɓɛ́ìn nyɔɔ̀ wuɖuɔ̀ kɔ̃in kpɔ̃ɔ, ɓɛ́ ɔ ké ɔ bɔ̃̌ nɔ̀mɔ̀ dyíinɔ̀ gbo cɛ̃. Ɔ mɛ ɖá, “Xwíníín kɔ̃̀ jè nyɔǔn ɓě seà ______ ɓéɖéɛɛ mɔ̀ sepóɛɖé wa kè Gèɖèpɔ́ɔ̀ zaìn gbo jè.”

Ɔ mu dyíin nɔ̀mɔ̀ùn ɓɛ́ à ké se nyɔ ɓɛ́ ɔ mɔ́ Kɛ́ɖɛ́ì-ɖeín-nà-nyɔ̀ jǔɛ dyiɛɛ ɓóɖó-kpàà nììn ɖɛ ɓě poà nyɔ múàǔn wɛ̃ɛ ɖò nyɛ́nɛ́ín ɖáìn nyɛ. Nyɔ ɓɛ́ ɔ poɛ gbɔ ɓɛ́ ɔ ké Kɛ́ɖɛ́ì ɖeín sí ɓó xwíníín nìà ɓóɛ jèɛɛ, ɔ se nàmàǔn gbo sɔ̀ɔ̌ nì fɔɔ, ké ɔ se kpáná ɓě ɓɛ́ pó-pó ɓéɖéà kɛɛ ɖò dyéɛ mu. Xwíníín ɓě kɔ̃̀ jè à mɛ ɓɔ́à nyɔǔn ɓě ɓóɖó-kpàà nììn múà-ɖɛ̀ ɓěɔ̀ nyɛ́nɛ́ín ɖáìn nyɛɛ ɖò mɔ̀, sepóɛɖé Báɓòɔ̀ se nyɔǔn ti nɔ̀mɔ̀ dyíin ɓě nyɛ́nɛ́ín ɖáìn, kɛɛ gǎ-dyé-dyé ɓě nì ɖé dyúa kɛɛ ɖéɛ̀ ɔ ɖáìn nyɔǔn nyɛ́nɛ́ín (2 Tímétè 3:12).

Xwíníín zi ɖɛ kpauń mìɔ ɖò kɔ̃̀ jè nyɔ ɖò ɓɛ́ìn Kɛ́ɖɛ́ì ɖeín síɛ kɛɛ mɔ̀, ɔ mɛ dyuòɛ̀ kà ɓɛ́ zaa ɖǎ ɔ kpɔ̃, ké zaa-wɔ̃-po-po ɖò nì ɔ bìì dyiɛń nyɛ. Ɖɛ tɔ̀ɔ̀ ɓě nì ɖɛ ɓě nìà dɔ̃̀ǐn mú ɖé dyiíɛ múɛɛ ɓɛ́ìn nyuɛ ɓɛ́ nyɔ ɖò kéɛ dyuò kà ɓɛ́ gbo-kpɔ̃ìn-kpɔ̃ìn se ɓó ɔ kè Gèɖèpɔ́ɔ̀ pṹa nì kɛ.

► Hwìè ɓěɔ̀ nyɛ́ m̀ ɖǎ kaà ɓɛ́ m̀ ké kpé ɓɛ́ìn ɓó bɔ̃̌ nɔ̀mɔ̀ dyíinɔ̀ dyi ɓeìn jè kɛ́?

► Ɔ ɖǎ mú kàmà ɖò ɓó ɓě ɖò bìì, ɓɛ́ nyɔɔ̀ ké kpé ɓɛ́ìn ɓó bɔ̃̌ nɔ̀mɔ̀ dyíinɔ̀ dyi ɓeìn jèɛɛ̀? M̀ poɛ̀n hwìɖǐiɛɛ, xwíníínɔ̀ nyɛ́ kɔ̃̀ jè ɔ nìà ná kɛ́?

Ti ɖíɛ́ ɓě ní ɔ fɛ̃́ìn xwa ɓɛ́ nyɔ ké gbo-kpá-kpá dyéɛ. Ɖé hwìè ɓěa múɛɛ, nìí, m̀ ɓɛ́ìn bɔ̃̌ nɔ̀mɔ̀ dyíinɔ̀ jè kɔ̃in-zaìn-zaìn gbɔ dèɛ̀ wàɖà cá. Ɔ jǔ ké m̀ dyi mɔ́ ɓɛ́ m̀ ké wa vɔ́sì ɓě sɔ̀ ɖé Báɓòɔ̀ múɛɛ dyí tɛ̀mɛ̀ìn ní, nìí, m̀ ɓɛ́ìn wa dyi dièɛ̀, ɓɛ́ m̀ ké níiń, “Ḿ ɓɛ́ìn mínítì gbɛ̀ǐ-gbɛ̀ǐ dyí ɖúɛ ɓɛ́ ḿ ké ɖɛ Báɓòɔ̀ cɛ̃ ɓá kà nyɔ ké Kɛ́ɖɛ́ì-ɖeín-nà-nyɔ̀ jǔɛ nyuɛ jè dyíɛɛ m̀ dyí tɛ̀mɛ̀ìn?” M̀ dyi mɔ́ ɓɛ́ m̀ ké wa mɛɛ-ɖɛ̀ mɔ̀à kɔ-kɔ kɛɛ dyí tɛ̀mɛ̀ìn ní, nìí, m̀ mɛ diè wa dyi, ɓɛ́ m̀ ké níiń, “Ḿ mɛ ɖú mínítì sɔ̃́ dyí ɓɛ́ ḿ ké ɓě mɛɛ-ɖɛ̀ ɖò dyí tɛ̀mɛ̀ìnǹ? Mɛɛ-ɖɛ̀ɔ̀ tɛ̀mɛ̀ìn nyɔǔn dyí ɖɛ ɓɛ́ Báɓòɔ̀ ɖá ɔ mɔ̀ hwìè jɛ́ɛ́ kɔ̃̀ mú m̀ ɓɛ́ìn dyí dyuòɛ̀ kà ɓɛ́ m̀ ɖǎ pó kɛ.”

Nyɔǔn ɓě cɛ̃ wa nììn hwòɖǒ-kpɔ̃-ɖɛ̀ ɓě ɖé dɔ́ɔ́-dè-dè mú. Dɔ́ɔ́-dè-wùɖù ɓě kɔ̃̀ jè à cɛ̃à dà kɛɛ, m̀ ɓɛ́ìn wa kũ̀à mú nyùɛ̀n ɖé mɛɛ-ɖɛ̀ mɔ̀à kɔ-kɔ kɛɛ jè cɛ̃-cɛ̃ mú, mɔɔ ɖé Gèɖèpɔ́ɔ̀-wùɖù ɓá Wóɖóùn-hwìèɔ̀ jè dyíɛɛ cɛ̃-cɛ̃ mú.

► Nyɛ́ kè nyɛ́ ɖǎa wɔ̃́ ké nyɔǔn ɓě ɖǎ gǎ ɓě ɓɛ́ wa ɖǎ dyé ɖé wa fɛ̀ɛ̀ múɛɛ jè cɛ̃ ɖò kɛ́?

Ti ɖíɛ́ ɓě ní nyɔǔn ɓě muɛ cɛ̃ìn kà ɓɛ́ wa nì ti kàmàǔn-kàmàǔn ɓě kpɔ̃uń mìɔ wa fɛ̀ɛ̀ mú kɛ. Diè wa dyi, ɓɛ́ m̀ ké níiń, “Ɖɛ́ kɔ̃̀ jè cĩ́-cĩ́ kàmàà kà ná mú mìɔ kɛ́?” Ɔ jǔ ké wa ɖǎ m̀ gɔ̃̌ jǔ ní, nìí, m̀ mɛ ɖá, “Ḿ ɓɛ́ìn mɛɛ-ɖɛ̀ ɖò ɓɛ́ ɔ tɛ̀mɛ̀ìn nyɔǔn dyí ɖɛ nyuɛ ɓɛ́ cĩ́-cĩ́ dyià mú kàmà mìɔ kɛɛ ɓě dyí tɛ̀mɛ̀ìn?” Ɔ ɖǎ ná nìǐn, dɛ̀ m̀ mɛ dèɛ̀n gbɔ kɛɛ mɔ̀, cɛ̃ɛ wa gbo kà ɓɛ́ Gèɖèpɔ́ɔ̀ hwòɖǒ-kpàìn-ɖɛ̀ mɔ̀ ɓɛ́ gbo-kpɔ̃ìn-kpɔ̃ìn ké ma ɓó à kèɔ̀ kè pṹa nì kánáá pū, ké ɔ se mɔ́ ɓɛ́ à ké ma cĩ́ kà à nyuà cĩ́ɛ ɓó zɛ̃̌ɛ̀ kɛ. Nàmàǔn ɖǎ ɓóɖó-kpàà dyíin nyììn. Nìí, mu dyúa ɓɛ́ m̀ ké wa mɛɛ-ɖɛ̀ɔ̀ dyí tɛ̀mɛ̀ìn.

M̀ dyi wa ɖɛ ɖò gbo cɛ̃ɛ mɔ́ sɔ̀ìn ɖé Báɓòɔ̀ mú, ɔ hwɔìn kà Wóɖóùn-hwìèɔ̀ jèɛɛ ní, nìí, m̀ ɓɛ́ìn cɛ̃ɛ, ɓɛ́ m̀ ké níiń, “Báɓòɔ̀ zaìn kɔ̃in kà ɓɛ́ cĩ́-cĩ́ kàmà mú, sepóɛɖé nyɔ séín ɖǎ nàmàǔn nyu jèɛ. Nàmàǔn dyà gboò-wùɖù ɓóɖó-kpàà kɔ̃.” Nìí, mu dyúa ɓɛ́ m̀ ké ɖɛ kpáà ɖé Wóɖóùn-hwìè kɔ̃ɛɛ jè kɔ̃in zaìn.

Ɔ jǔ ké nyɔ ɖò dyi ɓó nì, ké ɔ dyi ɖɛ nyuɛ́ nì pū kà ɔ mɔ̀ɔ̌ kà Gèɖèpɔ́ɔ̀-nyɔ̀ vɛ̀nɛ̀ ɖòɛɛ ní, nìí, diè ɖɛ mɔ̀ ɔ nììn jǎà-po-ɖɛ̀ tĩ́ín-tĩ́ín nyɛɛ jè ɔ dyi. Mɔɔ m̀ ɓɛ́ìn ɔ dyi dièɛ̀, ɓɛ́ m̀ ké níiń, “M̀ poɛ̀n hwìɖǐɛɛ, hwìèɔ̀ nyɛ́ kɔ̃̀ mú nyɔ ɖò ɓɛ́ìn dyí dyuòɛ̀ kà ɓɛ́ ɔ mu dyɔún muùn wɛ̃ɛ kɛ́?” M̀ ɖǎ ɔ gɔ̃̌-jǔ-wùɖùɔ̀ wɔ̃́ ní, diè ɔ dyi ɖe, ɓɛ́ m̀ ké níiń, “Ḿ ɓɛ́ìn mínítì sɔ̃́ dyí ɖúɛ ɓɛ́ ḿ ké m̀ mɛɛ-ɖɛ ɖò tɛ̀mɛ̀ìn nyɔǔn dyí ɖɛ ɓɛ́ Báɓòɔ̀ cɛ̃ ɓá kà nyɔ ɖò ké dyɔún muɛ nyuɛ jè dyíɛɛ dyí tɛ̀mɛ̀ìn?”

► M̀ ɖǎa wɔ̃́ ké nyɔǔn ɓě ɖǎ ɖɛ gbà ɓě nìà ɓóɖó-kpàà mɔɔ ɓóɖó-dù kò-kò ɓě kɔ̃ kpáuń wɛ̃ɛ jè cɛ̃ ɖòò? Xwɛ̌ ɖɛ nìà kɛ ɓɛ́ìn m̀ gbo kpáa nyuɛ ɓɛ́ m̀ ké bɔ̃̌ nɔ̀mɔ̀ dyíinɔ̀ dyi ɓeìn nyɛ́?

Ɔ jǔ ké nyɔ ɖò dyi ɖɛ gbà ɓě nì ɓóɖó ɓě kɔ̃ɛɛ jè cɛ̃iń nì, ɔ hwɔìn kà mɔ́ kè gǎ mɔɔ nàdǐ ɓě ɓɛ́ to dyà kɛɛ ní, nìí, m̀ mɛ diè ɔ dyi, ɓɛ́ m̀ ké níiń, “Ḿ ɓɛ́ìn m̀ vɔ́sì ɖò ɓɛ́ ɔ cɛ̃ xwíníín kɔ̃̀ jè ɓóɖó-kpàà nìà ɖɛ ɓěɛ̀ mú mùɛ̌n nyɛ jèɛɛ da zàìn?”

Nìí, m̀ mɛ tɛ̀mɛ̀ìn nyɔɔ̀ dyí kà ɖɛ kɔ̃̀ jè ɓóɖó-kpàà nìà kà ɓó zɛ̃̌ɛ̀ kɛɛ mɔ̀, sepóɛɖé nyɔǔn ɓě se Gèɖèpɔ́ɔ̀ dyí dyuò, ké wa kè Gèɖèpɔ́ɔ̀ tɔmɔìn bũ̌in jè. Ɓɔ́ɔ cɛ̃ɛ kà ɓɛ́ nyɔ ɖò ɖǎ pó ní, nìí, ɔ fũ̀à-fṹá-ɖɛ̀ séínɔ̀ ɖǎ ɓɔ́í kpá kɛ, kɛɛ m̀ mɛ cɛ̃ɛ kà ti ɓɛ́ nyɔ ɖò póɛɛ ní, nìí, Gèɖèpɔ́ɔ̀ dè ɔ mana kɔ̃ poɛ gbɔ kɛ. Wé ɖò nì dyiɛń ké dyɔɔ̀ ɖìè ɖò kè ɓóɖó-kpà ɖìè ɖò mu nììn, ké nyɔ ɓě kè Gèɖèpɔ́ɔ̀ xwɛ̃́ìn kà bũ̌in nyɛɛ se fũ̀à-fṹá-ɖɛ̀ ɓěa ɖò dyí dyéɛ mu ɖe fɔɔ.

M̀ ɓɛ́ìn dɔ́ɔ́ ɖò gbɔ dèɛ̀ dyììn ɖé ɖɛ ɓě dyi-diè-diè mú, ké dyi-diè-ɖɛ̀ ɓěɔ̀ mu hwìè ɖò kaàùn ɓó bɔ̃̌ nɔ̀mɔ̀ dyíinɔ̀ cɛ̃ jè.

Dyi-diè-ɖɛ̀ɔ̀ nyɔ zi xwa fɛ̃́ǐn mìɔ kɛɛ mɔ̀, ɓɛ́ m̀ ké nyɔ m̀ kèɔ̀ kè nìà wùɖùɛ̌n nyɛɛ dyi diè, ɓɛ́ m̀ ké níiń, “M̀ mɔ̀ Kɛ́ɖɛ́ì-ɖeín-nà-nyɔ̀ɔ̀?” Dyi-diè-ɖɛ̀ nìà kɛ ní po nyɔ pàɖǎ dyoɖoún. Ɔ jǔ ké nyɔɔ̀ dyi níiń, “Gbào” ní, m̀ ɓɛ́ìn ɔ dyi dièɛ̀, ɓɛ́ m̀ ké níiń, “Ḿ ɓɛ́ìn ɖɛ ɓɛ́ Báɓòɔ̀ cɛ̃ ɓá kà nyɔ ɖò ɓɛ́ìn Kɛ́ɖɛ́ì-ɖeín-nà-nyɔ̀ jǔɛ kɛ jè dyíɛɛ m̀ gbo cɛ̃ɛɛ̀?”

Ɔ jǔ ké nyɔɔ̀ dyi níiń, “Ǹdye, ḿ mɔ̀ Kɛ́ɖɛ́ì-ɖeín-nà-nyɔ̀,” ní, nìí, m̀ mɛ ɖá, “Ɔ mɔ̀ ɖɛ kpa ɖȧ ɖò. Xwɛ̌ m̀ nyu ma Kɛ́ɖɛ́ì-ɖeín-nà-nyɔ̀ jǔɛ kɛ́” Ɔ jǔ ké nyɔɔ̀ gɔ̃̌-jǔ-wùɖùɔ̀ se dyí sɛ́ɖɛ́ìn mɔɔ ké hwòɖǒ dyi ɔ kɔ̃in kpèìn ní, nìí, m̀ ɓɛ́ìn ɖɛ Báɓòɔ̀ cɛ̃ ɓá kà nyɔ ɓɛ́ìn Kɛ́ɖɛ́ì-ɖeín-nà-nyɔ̀ jǔɛ kɛ jè dyíɛɛ ɔ gbo kɔ̃in zaìn.

M̀ ɓɛ́ìn dyi-diè-ɖɛ̀ ɓě céèà ɖé dyiíɛɛ dyí ɖúɛ ɓɛ́ m̀ ké wa dɔ́ɔ́-wùɖù ɓě gbɔ dèìn ɖekè. Dyi-diè-ɖɛ̀ɔ̀ ɖíɛ́ ɓě céè dà ɓíɖíi ɖekè, ɔ hwɔìn kà,

“M̀ poɛ̀n hwìɖǐiɛɛ, xwíníínɔ̀ nyɛ́ kɔ̃̀ jè à ɓéɖéà fɛ̀ɛ̀ kɛ́?” Nyɔɔ̀ mɛ tò ɔ nììn fɔ̀nɔ̀-hwòɖǒ. M̀ mɛ wɔ̃́ìn ɖɛ séín nɔ̀mɔ̀ dyíin ɖé ɔ gɔ̃̌-jǔ-wùɖùɔ̀ múɛɛ gbo. Nìí, m̀ mɛ ɖá, “Ɖɛ mɔ̀ ɖɛ zi ɖɛ kpauń mìɔ kɛɛ mɔ̀ ɓɛ́ à ké Gèɖèpɔ́ɔ̀ dyí dyuò. Gèɖèpɔ́ɔ̀ mɛ ma à nììn ɓɛ́ gbo-kpɔ̃ìn-kpɔ̃ìn ké ma ɓó à kèɔ̀ kè pṹa nì. Ḿ ɓɛ́ìn ɖɛ Báɓòɔ̀ cɛ̃ ɓá kà à kè Gèɖèpɔ́ɔ̀ ké gbo kpɔ̃ìn nyuɛɛ da zàìnǹ.”

“M̀ poɛ̀n hwìɖǐiɛɛ, ɖɛ́ jɛ́ɛ́ ɓɛ́ìn nyuɛ ɓɛ́ à ké múà ɓéɖé kɛ́?” Ɖɛ séín wa mu cɛ̃ìn nyɛɛ, m̀ ɓɛ́ìn níiń, “Nyɔ ɓáún-ɓáún ɓě ɓɛ́ wa ɓéɖé ɖɛ nìà ɓóɛɛ, waà múàɔ̀ ní hwèɖèìn mìɔ cá. Báɓòɔ̀ cɛ̃ɛ à gbo kà ɓɛ́ múà sɔ̀ìn ɖé Gèɖèpɔ́ɔ̀ gbo kɛ. (Wɛ́ɖɛ́ 16:11). Ḿ ɓɛ́ìn m̀ mɛɛ-ɖɛ̀ ɖò ɓɛ́ ɔ tɛ̀mɛ̀ìn nyɔǔn dyí kà nyɔ ɖò kè Gèɖèpɔ́ɔ̀ ké gbo kpɔ̃ìn nyuɛɛ dyí tɛ̀mɛ̀ìnǹ?”

“M̀ poɛ jǎà kà nyɔ ɖò dyi mɛ́ìn, ɔ ɓɛ́ìn gĩɔ wóɖóɛ ɖeɛɛ̀? M̀ poɛ̀n hwìɖǐiɛɛ, ɖɛ́ ɔ kèɔ̀ kè hwɔìn nyɛ́?” “Báɓòɔ̀ ɖá nyɔ séín mu dyɔún mɔɔ hɛ́ɛ̀ muùn. Kà ɔ nìà náa, nìí, ḿ ɓɛ́ìn m̀ ɖɛ Báɓòɔ̀ cɛ̃ ɓá kà nyɔ ké dyɔún muɛ nyuɛ jè dyíɛɛ da zàìn?”

“M̀ poɛ̀n hwìɖǐiɛɛ, ɖɛ́ mɔ̀ Báɓòɔ̀ cuò-wùɖù tĩ́ín-tĩ́ín nyɛ́?” Ɖɛ nìà kɛ mu m̀ kpé nyíìn ɓɛ́ m̀ ké dyi-dyé-ɖɛ̀ nìà ɖé cɛ̃́ɛ́-ɖɛ̀ 9 múɛɛ dya gmɔ̀.

► Nyɔ ɖò ɖǎ ɖɛ ɓɛ́ ɔ kè ɖɛ ɓě nìà kɛ hwɔìn nyɛɛ ɖò nyu ɖòò? Xwɛ̌ ɔ nyu ma nìɛ̀ kɛ́?

Ɖɛ-cɛ̃́-nyɔ̀ ɓěɔ̀ séín se ɓo-bɛ̃̀ ɓě à dèà mɛ ɖé cɛ̃́ɛ́-ɖɛ̀ nìà kɛ múɛɛ múàǔn dyi kpáǐn mu. Sepóɛɖé ti ɖíɛ́ ɓě ní ɓo-bɛ̃̀ ɓěɔ̀ ɖíɛ́ ɓě ní ɓó ké wa se nyɔ ɖíɛ́ ɓě nììn kpeɖe.

Xwíníín kɔ̃̀ jè wa céè kà cɛ̃́ɛ́-ɖɛ̀ɔ̀ kɛɛ mɔ̀ ɓɛ́ ɖɛ-cɛ̃́-nyɔ̀ ɓěɔ̀ ɖò-ɖò séín ké hwìè dyi mɔ́ ɓɛ́ ɔ ké ɖɛ mɔ̀ ɖɛ sɛ́ɖɛ́ìn dyí ɖé ɔ mɔ̀ùn gboɛɛ nyu.

Cɛ̃́ɛ́-ɖɛ̀ɔ̀ nyɔ kɔ ɓó dyíɛɛ zàìn kà nyɔ ké bɔ̃̌-nɔ̀mɔ̀-dyíin-cèè-ɖɛ̀-gmùnù ɓě geɛ̀n nyuɛ nyɔ da. Ɖɛ-cɛ̃́-nyɔ̀ ɓěɔ̀ ɓéɖé ɓɛ́ wa ké dɛ̀ wa ké céè-ɖɛ̀-gmùnù ɓě dyé ɓó geìn jèɛɛ dyuò. Ɔ dyi xwa fɛ̃́ìn ní, wa ɓɛ́ìn céè-ɖɛ̀ɔ̀ ɖíɛ́ ɓě ɖɛ-cɛ̃́-naínɔ̀ dyàà ɓó ɖɛ-cɛ̃́-tìɔ̀ nyɔ mu ɓó dyí kɔùn wɛ̃ɛ ɓaɖa.

Kà nì mu bɔ̃̌ nɔ̀mɔ̀ dyíinɔ̀ dyi-ɓeìn-ɓeìn dyúa kpaùn wíkìɛ̀ xwíníín nyɛɛ, m̀ mɛ diè dyi-diè-ɖɛ̀ ɓěɛ̀ ɖíɛ́ ɓě dyi ɖé nì dɔ́ɔ́-wùɖùɔ̀ gbɔ-dè-dè mú, mɔɔ m̀ ɓɛ́ìn m̀ mìɔùn nììn ɖɛ ɓě dyi-dièɛ̀. M̀ mɛ kpaìn wa dyéɖé gboi kà wa mu wuɖu ɓě céèɛ̌n nììn nyɛ. M̀ mɛ dyé ti ɓɛ́ m̀ ké ɖɛ ɓě mu nyuɛń nììn ɓó ɖɛ-cɛ̃́-tìɔ̀ nyɔ kɔ ɓó dyíɛ ɓaɖaa wa gbo cɛ̃.