Bibisita si Pierre sa isang iglesya nang makita niya ang isang malaking karatula: “Araw ng Paghuhukom, May 21, 2011. Tinitiyak ito ng Biblia!” Nag-isip si Pierre kung ano ang dapat niyang gawin kung totoo ang mensahe. Tila wala nang dahilan para pag-aralin pa ang kanyang mga anak, o tapusin ang kanyang bahay, o bayaran ang mga pagkakautang niya. Inisip niya kung dapat ba niyang ipagkaloob ang lahat ng kanyang pera sa iba upang tumulong sa pagpapalaganap ng mensahe.

Sama-samang basahin nang malakas ang Marcos 13. Pasulatin ang bawat mag-aaral ng isang parapo na nagbubuod sa talata sa Kasulatan. Ano ang mga babala na ibinigay ni Hesus sa talata na ito? Pasulatin ang bawat mag-aaral ng listahan ng mga pahayag. Bilang isang grupo, talakayin kung ano ang naisulat ninyo.

Introduksiyon sa Mga Kulto sa mga Huling araw Ayon sa Pahayag

[1]Daan-daan ang mga kulto sa mga Huling Araw ayon sa Pahayag. Marami silang iba’t-ibang uri at iba’t-ibang pangalan. Madalas ang mga ito ay sinisimulan ng isang taong nagsasabi na mayroon siyang bagong rebelasyon tungkol sa hinaharap. Ang ilan sa kanila ay nananatili lamang sa maikling panahon, may kaunting miyembro, at ang iba naman ay nagiging malaking grupo. Ang ilan sa mga organisasyon na tinalakay sa ibang seksiyon ng kursong ito ay nagtataglay ng mga katangian ng mga kulto sa mga huling araw ayon sa Pahayag. Halimbawa, sa ilang pagkakataon, ang Saksi ni Jehovah ay gumawa ng propesiya upang mahikayat ang kanilang mga miyebro, nguni’t ang mga propesiya ay hindi nagkatotoo.

Bakit Umiiral ang mga Kulto sa mga Huling Araw Ayon sa Pahayag

Maraming tao ang may pakiramdam na ang mundo ay dumarating sa isang panahon ng krisis na siyang babago sa lahat ng bagay na alam natin na siyang normal. Ang krisis ay maaaring ilarawan ayon sa ekonomiya, kapaligiran, digmaan, pampulitika, o pangkultura.

[2]Maraming bagong nobela at sinehan ang naglalarawan sa isang kathang-isip na huling araw na nagaganap sa pamamagitan ng pandaigdigang salot, o digmaang nuklear, o isang higanteng meteor na tatama sa mundo. Sa mga kuwentong ito, karamihan sa mga tao sa mundo ay namatay, at ang mga nakaligtas ay pumapasok sa isang panahon kung saan ang buhay ay lubusang iba sa anumang kanilang nalalaman.

Dahil sa takot na ito at sa inaasahan, ang mga tao ay humahanap ng sagot kung paano haharapin ang hinaharap. Gusto nilang malaman kung ano ang aasahan at kung paano paghahandaan ito.

May mga tao na naghahanap ng mga pangrelihiyong paliwanag. Nagiging interesado sila sa mensahe ng isang kulto ayon sa pahayag. Ang isang kultong sinimulan ng isang tao na nag-aangkin na siya ay isang propeta na sa pamamagitan ng rebelasyon ay makapagpapaliwanag kung ano ang mangyayari sa hinaharap at kung ano ang dapat na ginagawa natin.

Umiral na sa lahat ng panahon ang mga kulto sa mga Huling araw ayon sa pahayag. Ang isang nagpahayag na siya ay propeta na nagngangalang Montanus ang nabuhay sa ikalawang siglo ng iglesya at gumawa ng mga prediksiyon tungkol sa malapit nang dumating na kaharian ng Dios at ang wakas ng sistema ng mundo. Sa buong panahon ng kasaysayan ng iglesya, maraming tao ang nagpahayag na alam nila ang oras nang pagbabalik ni Kristo upang itatag ang kanyang kaharian at hukuman ang masasama. Milyon ang bilang ng mga tao na nalinlang at nabigo.

► Ano ang mga halimbawa ng mga kulto sa mga huling araw ayon sa pahayag ang iyong nakita o narinig?

Ang mga tagapanguna ng mga kulto sa mga huling araw ayon sa pahayag ay hindi tumutugon sa mga krisis ng panahon sa paraang Biblikal, bagaman inaangkin nila na sila ay Kristiyano at gumagamit ng Biblia. Sa ibaba ay ang ilang katangian ng karamihan sa mga kulto sa mga huling araw ayon sa pahayag.

Mga Katangian ng Kulto sa Mga Huling Araw ayon sa Pahayag

(1) Nagtatakda sila ng mga espesipikong petsa para sa mga prediksiyon.

Maaari silang gumawa ng prediksyon tungkol sa ikalawang pagdating ng Panginoon. Maaari silang gumawa ng prediksyon tungkol sa katapusan ng mga pamahalaan sa mundo. Maaari silang gumawa ng prediksyon tungkol sa isang kalamidad na wawasak sa masasamang tao sa mundo. Maaari silang magbigay ng espesipikong petsa kung kailan ito ay inaasahang mangyayari. Kapag ito ay nabigong maganap, sinasabi nila na ang kanilang prediksiyon ay may ibang kahulugan. Maaari silang magtakda uli ng ibang petsa. [3] Karaniwan, gumagawa rin sila ng maraming maliliit na prediksiyon na hindi rin nagkakatotoo. Sinasabi ng Biblia na kung ang prediksiyon ng isang tao ay hindi nagkakatotoo, hindi siya dapat pagkatiwalaan bilang isang propeta (Deuteronomio 18:22).

(2) Mayroon silang bagong interpretasyon ng Kasulatan.

Nagbibigay sila ng kahulugan sa ilang tiyak na talata sa Kasulatan na walang sinumang nakaisip sa nakaraan. Ang kahulugan ay isang bagay na hindi mapatutunayan mula sa Kasulatan mismo. Ang nagpapahayag na propeta ay nagsasabi na ang kahulugan ay inihayag sa kanya sa pamamagitan ng rebelasyon, kaya’t ito’y nagiging isang bagong rebelasyon at hindi pagpapakahulugan. Ito ay maling paggamit ng Biblia dahil sinasabi nila na itinuturo ng Biblia ang kanilang mga ideya, ngunit ang katotohanan sila ay dumidepende sa bagong rebelasyon upang dagdagan ng kahulugan ang Biblia na wala doon. Ang mga taong naniniwala sa mensahe ay ang mga taong nagpasya na pagtiwalaan ang propeta. Hindi nila sinusunod ang awtoridad ng Biblia kundi ang awtoridad ng tagapanguna sa kulto.[4]

(3) Hinihingi nila ang mga gawaing hindi Kristiyano.

Hinihingi nila sa kanilang mga miyembro ang ugaling hindi pa kailanman naging tipikal sa Kristiyanismo.[5] Maaari nilang hingin ang pagbubukod ng sarili mula sa lipunan at normal na pamumuhay. Mayroon silang salungat na saloobin laban sa mga kaaway at maaaring hikayatin din na gumawa ng karahasan. Maaari silang gumamit ng puwersa laban sa kanilang mga miyembro at kanilang mga pamilya. Kapag sila ay napunta sa gulo dahil sa kanilang mga ikinikilos, tinatawag nila itong pag-uusig. Naniniwala silang ang Dios ay mamamagitan sa mahimalang paraan bilang tugon sa kanilang radikal na pananampalataya. Ang ilan sa mga kulto sa mga huling araw ayon sa pahayag ay nagwawakas sa pagpapakamatay.

(4) Ihinihiwalay nila ang kanilang mga miyembro mula sa iba pang pakikipag-ugnayan.

Ang mga kulto sa mga huling araw ayon sa pahayag ay hinihiling sa kanilang mga miyembro na ibigay ang lahat ng kanilang pag-aari sa organisasyon. Ang mga miyembro ay sama-samang naninirahan sa isang compound at hiwalay sa mga kaibigan at mga kamag-anak na hindi kasapi ng kulto. Maaari silang turuan na ituring na lahat ng nasa labas ay kanilang mga kaaway. Ang mga tagasunod sa pangwakas ay nabibigo dahil ang pagsasamahan ay hindi nakabatay sa katotohanan at hindi maaaring maging tunay na pagsasamahang Kristiyano.[6]

► Ang tanong na ito ay nagpapakilala sa susunod na seksiyon: Anong kasamaan ang nagawa ng mga kulto sa mga huling araw ayon sa pahayag?

Mga Epekto ng Mga Kulto sa mga huling araw ayon sa Pahayag

Ang mga kulto sa mga huling araw Ayon sa Pahayag ay mapaminsala sa ilang dahilan.

(1) Inaakit nila ang mga tao mula sa mga iglesyang Kristiyano patungo sa huwad na doktrina.

(2) Binibigo nila ang kanilang mga tagasunod at nagiging dahilan upang sila’y lubusang mawalan ng kanilang pananampalataya.

(3) Inaangkin nilang sila ay mga Kristiyano, ngunit mayroong hindi Kristiyanong mga gawain o pamumuhay na sumisira sa reputasyon ni Kristo.

(4) Nagagawa nilang mag-alinlangan ang mga tao sa kasulatan tungkol sa kaharian ng Dios at ang pagbabalik ni Kristo.

Ang Tugon ng Kristiyano sa Pandaigdigang Krisis

Nagsasalita ang Biblia tungkol sa mga ganitong pagkakataon. Ang mga kasulatan katulad ng aklat ni Daniel at at aklat ng Pahayag ay isinulat sa panahon ng isang walang katiyakang hinaharap, kaguluhan sa lipunan, pandaigdigang digmaan, at pag-uusig. Ang mga iyon ay pagkakataon na sumubok sa pananampalataya ng mga taong naniniwala sa Dios. Tila ang lahat ng bagay ay wala na sa kaayusan at lahat ng mabubuting bagay ay mawawasak.

[7]Ang dakilang tema ng propetikong mga Kasulatan ay: Ang Dios ang kumukontrol at sa wakas ay magtatatag ng kanyang kaharian at magbibigay ng gantimpala sa matuwid.[8] Pinatototohanan ng Biblia na magiging mahirap ang mga panahon at tila maghahari ang kasamaan sa loob ng ilang panahon. Tinatawag ang mga mananampalataya na manangan sa kanilang pananampalataya sa Dios at matapat na mamuhay sa kabila ng mga kundisyon sa mundo. Kung paanong ang mga kasulatan ay inilapat sa mga panahong iyon, mailalapat din ang mga iyon kahit sa ibang panahon kung kailan ang pananampalataya ay katulad na sinusubok.

Ang aklat ng 2 Tesalonica ay isinulat sa mga Kristiyano na umaasa sa pagbabalik ni Hesus at sa malapit na pagdating ng araw ng paghuhukom ng Dios. Naririnig nila sa mga taong nagsasabi na nalalaman nila na ang mga pangyayari ay malapit nang maganap (2 Tesalonica 2:2). Nalilito sila kung ano ang dapat sana nilang ginagawa.

Inilarawan ni Apostol Pablo ang ilang pangyayari na magaganap sa maikling panahon bago ang pagbalik ni Kristo, kabilang dito ang paghahari ng tinatawag na “ang lalaki ng kasalanan” at “ang anak ng kapahamakan ng kaluluwa” (2:3)

Ang espesyal na mahalagang makita natin ay ang pagwawakas na mga direksiyon ni Pablo sa mga mananampalataya sa talatang 15-17. Sinabi niya sa kanila na maging matatag at magpatuloy sa pagsunod sa mga bagay na itinuro sa kanila. Hindi nila dapat iwan ang mga pangunahing prinsipyo ng buhay Kristiyano dahil sa anumang pangyayari na maaaring dumating. Sa talatang 12 ipinanalangin niya na itatag sila ng Dios para sa bawat mabuting salita at gawa.

Kahit na kung malapit na ang katapusan ng mundo, hindi ito isang pagkakataon upang talikuran ang mga prinsipyo ng pamumuhay Kristiyano. Ang mga bagay na mula pa sa simula ay pinakamahalaga na ay siya ring magiging pinakamahalaga hanggang sa katapusan. Dapat tayong mag-ebanghelyo sa mga naliligaw, manangan sa tunay na doktrina, mamuhay nang may kabanalan, makisama sa mga mananampalataya, gumawa ng mabuti sa iba, at magpakita ng pag-ibig sa lahat ng tao.

► Ano ang pinakamahahalagang bagay na dapat tandaan kung tayo ay nabubuhay sa mga huling araw?

Ngayon bumalik kayo at sama-samang basahin ang mga footnotes para sa buong seksiyon tungkol sa mga Kulto sa Mga Huling Araw Ayon sa Pahayag. Dapat hanapin ng lahat ng mag-aaral ang mga reperensiyang talata sa Kasulatan at magsalit-salit sa pagbasa ng mga iyon sa grupo.

Ang unang prayoridad kapag nakikipag-usap sa isang miyembro ng isang kulto sa mga huling araw ayon sa Pahayag ay ang tiyakin na tunay nga niyang nauunawaan ang ebanghelyo. Maaari mong isipin na ang isang miyembro ng kulto ay naniniwala sa mga doktrina ng Kristiyanismo at nagdagdag lamang ng ilang partikular na mga propesiya, ngunit ang kulto ay sa katotohanan ay sumasalungat sa mga pangunahing mga doktrina.

Kasunod nito, mahalagang maipakita sa kulto kung paanong sila ay nahiwalay sa pangkasaysayang Kristiyanismo. Ituro ang mga pagkilos at katuruan na marahil ay hindi tinanggap ng mga taong makaDios sa iglesya sa paglipas ng mga siglo.

Ituro ang katotohanan na itinuturo ng Mateo 24:36 na ang oras ng pagbabalik ni Kristo ay hindi nakahayag.

Ituro na ang kanilang pagbibigay-kahulugan sa mga hula sa Kasulatan ay nakabatay lamang sa kanilang pagtitiwala sa kanilang tagapanguna at hindi sa normal na mga prinsipyo ng pagbibigay-kahulugan.

Ituro na sinasabi sa atin ng Deuteronomio 18:22 na ang isang tao ay hindi dapat pagtiwalaan bilang isang propeta kung kahit man lang isa sa kanyang mga propesiya ay magkamali.

Si Cindy ay lumaki sa isang pamilyang kasapi ng Saksi ni Jehovah. Bilang isang bata, naniwala siya na ang mga katuruan sa kingdom hall ay direktang nagmumula sa Dios. Isang gabi ang mga tagapanguna ay tumawag ng isang espesyal na pagpupulong. Ipinahayag nila na ang Armageddon ay magaganap sa taong 1975. Iyon ay pitong taon pa sa hinaharap. Nang gabing iyon umiyak si Cindy dahil sa takot kung ano ang mangyayari sa kanyang pamilya kapag nangyari ang Armageddon. Sa sumunod na ilang taon ang kanyang pamilya at iba pa ay masikap na nagtrabaho para sa kulto. Naniwala sila na kaunting panahon na lamang ang natitira. Ang mga babasahin ng kulto ay naglathala ng mga larawan ng mga bata, mga may gulang, at matatanda na nawawasak sa Armageddon. Sa huling araw ng 1975, maraming tao ang natulog na umaasa na ang wakas ay darating sa gabing iyon. Nang magising si Cindy nang sumunod na umaga, namangha siya na ang lahat ng bagay ay gayun pa rin. Hindi na muling pinag-usapan ng kanyang mga magulang ang tungkol sa propesiya. Sa paglipas ng panahon, unti-unti nang tumigil si Cindy sa pagdalo sa mga pagtitipon ng kulto, nguni’t hindi niya nalalaman kung saan hahanapin ang katotohanan. Pagkalipas ng maraming taon, nakilala ni Cindy ang isang lalaking nagpaliwanag sa kanya ng kaligtasan, at siya ay naligtas.

Ngayon basahing muli ang Marcos 13. Bawat mag-aaral ay dapat sumulat ng isang parapo na nagpapaliwanag sa mensahe ng talata na ito para sa tagasunod ng kulto ayon sa pahayag. Hayaan ang ilan sa mga mag-aaral na ibahagi kung ano ang kanilang isinulat.

Tandaan na humanap ng pagkakataon upang maipahayag ang ebanghelyo sa isang nagmula sa grupong pangrelihiyon na ito. Maghanda na ibahagi sa iyong mga kamag-aral ang tungkol sa iyong naging pakikipag-usap. Isulat ang iyong 2-pahinang pag-uulat at ibigay iyon sa tagapanguna sa inyong klase.