Lesson 3: Mormonismo

Nakita sila ni Juan sa unang pagkakataon habang siya ay naglalakad sa isang parke habang pauwi siya. Sila ay dalawang kabataang lalaki na nakasuot ng itim na pantalon at puting polo, at may suot na pangalan/ID. Sila ay palakaibigan at nais makipag-usap sa kanya tungkol sa kanilang relihiyon. Nakinig si Juan at hindi siya nagtanong ng marami. Tila galing sila sa isang normal na iglesya at tila sinasabi rin nila ang parehong mga bagay na narinig niya sa kanilang iglesya. Sinabi nila na sila ay galing sa Church of Jesus Christ of Latter-Day Saints, na tinatawag ring Mormon.

Basahin nang malakas nang sama-sama ang Isaias 4. Pasulatin ang bawa’t mag-aaral ng isang parapo na nagbubuod sa talata na ito sa Kasulatan. Ano ang sinasabi ng talata na ito tungkol sa Dios? Pasulatin ang bawa’t mag-aaral ng listahan ng mga pangungusap. Bilang isang grupo, talakayin kung ano ang inyong isinulat.

Pinagmulan at Kasaysayan

Nagsimula ang Mormonismo sa isang taong nagngangalang Joseph Smith. Sinabi ni Joseph na isang araw noong 1820, idinalangin niya sa Dios na ipakita sa kanya kung aling iglesya ang tama. Habang nagdadasal, nakakita siya ng isang pangitain. Nakakita siya ng dalawang lalaki na nadadamitan ng puting roba, sina Hesus at ang Dios Ama. Sinabi sa kanya ng Dios na walang alinman sa mga iglesya ang tumpak at ang kanilang mga paniniwala ay kasuklam-suklam.

► Ano ang ilang bagay na mali sa Biblia tungkol sa pangitaing ito?

Pagkalipas noon inangkin ni Joseph na mayroon siyang pangitain na nagpakita sa kanya kung saan dapat niyang hukayin ang mga ginintuang plato na may sulat. Isinalin niya mga nakasulat sa tulong ng mahiwagang salamin sa mata at inilathala iyon bilang ang Aklat ng Mormon. Walang sinumang ibang nakakita sa mga plato o salamin sa mata dahil muli iyong kinuha ng anghel at ibinalik sa langit upang doon itago.

Si Joseph ay miyembro ng Masonic lodge, at kinopya ang mga sikretong ritwal ng Mormonismo mula sa mga manual ng Masonry, kabilang ang panunumpa sa dugo, mga password at sikretong pagkakamay.[1]

Inorganisa ang iglesya ng Mormon sa New York noong 1830. Noong 1839, una silang lumipat sa Nauvoo, Illinois, pagkatapos ay sa Missouri. Sinabi ni Smith na ang Missouri ang Lupang Pangako para sa mga Mormon, at ang templo ay itatayo sa Independence, Missouri.[2] Hindi kailanman naitayo ang templo, at muling lumipat ang mga Mormon. Naghayag si Smith ng maraming propesiya na hindi kailanman nagkatotoo.[3]

Sinabi ni Smith, “Mayroon akong higit na maaaring ipagmalaki kaysa sinumang tao. Ako ang tanging tao na nakapagpanatiling buo ng isang buong iglesya simula sa mga panahon ni Adan. Ang malaking bahagi ng kabuuan ay nanindigan sa aking tabi. Hindi ito nagawa ni Pablo, ni Pedro, o maging ni Hesus. Ipinagmamalaki ko na walang sinumang tao ang makagagawa ng katulad ng aking nagawa. Ang mga tagasunod ni Hesus ay tumakbo palayo sa kanya; ngunit ang Latter-Day Saints ay hindi pa tumatakbong palayo sa akin.”[4]

Inatake at winasak ni Joseph ang palimbagan ng isang diyaryo na nagparatang sa kanya ng pag-aasawa ng marami.[5] Habang nasa kulungan si Joseph at naghihintay ng paglilitis, isang pangkat ang umatake sa kulungan at pinatay si Joseph at ang kanyang kapatid na si Hiram.

Itinalaga ni Smith ang kanyang anak na lalaki bilang susunod na tagapanguna, nguni’t pagkamatay ni Smith karamihan sa miyembro ay sumunod kay Brigham Young at lumipat sa Salt Lake City, at iniwan ang “lupang pangako.”

Naniniwala ang mga Mormon na ang tunay na Kristiyanismo ay nagwakas nang mamatay ang mga apostol at hindi muling umiral sa mundo hanggang nang simulan ni Smith ang iglesyang Mormon.

► Ano ang ilan sa mga unang pangyayari sa iglesyang Mormon na dapat naging dahilan upang tayo ay magduda na ito ang tunay na Kristiyanismo na pinanumbalik sa mundo?

Impluwensiya sa Kasalukuyan

Maraming iba’t-ibang denominasyon ng Mormon ang humiwalay sa orihinal na kilusan na sinimulan ni Joseph Smith. Ang ilan sa kanila ay napakaliit.

Ang pinakamalaking iglesya ng mga Mormon ay may punong-tanggapan sa Salt Lake City, sa Utah at inaangkin na mayroong pangbuong mundong mga miyembro na may bilang na 14,700,000. Naglalathala sila ng mga babasahin sa 177 wika.

Mayroon silang halos 80,000 full-time na misyonero.[6] Ang mga misyonero ay karaniwang mga young adults/kabataang may sapat na gulang na nagboboluntaryo sa loob ng isa at kalahati hanggang dalawang taon. Maaari silang ipadala kahit saang lugar sa buong mundo na may ministeryo ang mga Mormon nang hindi maaaring pumili. Nagtatrabaho sila nang walang suweldo.

Mga Mahihirap na Doktrinang Mormon

Polygamy/Pag-aasawa ng Higit sa Isa

Sinasabi ni Joseph Smith na ang polygamy/pag-aasawa ng higit sa isa ay iniutos ng Dios bilang paraan upang ang tao ay maging mga dios pagkatapos na mamatay.[7] Ang mga lalaki ay inaasahang maraming asawa para sa walang-hanggan, upang maaari nilang panirahan ang bagong daigdig sa parehong paraan na nilaganapan ng Dios ang mundo.[8]

Nag-asawa si Smith ng 27 babae. Ang pinakabata ay 14 na taong gulang. Ang ilan sa kanila ay kasal na sa ibang lalaki, subalit sinabi ni Smith na ang mga naunang kasal ay walang bisa kung ito ay ginawa sa labas ng Mormonismo.[9] Ang sumunod na tagapamuno pagkatapos ni Smith, si Brigham Young ay nagkaroon ng 57 asawa at 165 na anak.

Sinabi ni Smith na ang polygamy ang pangwalang-hanggang tipan ng Dios, at ito ay itinakda bago pa ang pundasyon ng mundo. Ang mga sumunod na apostol ng iglesyang Mormon ay nagsabi na ang polygamy lamang ang tanging paraan upang maabot ang pagiging dios[10] at hindi ito kailanman mababago.

Nagpatuloy sa pagsasagawa ng polygamy ang mga Mormon hanggang noong 1890, nang ang pamahalaan ng United States ay nagbanta na kukumpiskahin ang lupain ng iglesya dahil nilalabag nila ang batas. Sa panahong iyon, ang propetang Mormon na si Woodruff ay nagsabing nakatanggap siya ng rebelasyon mula sa Dios na tapos na ang polygamy o pag-aasawa ng marami.

► Karamihan sa mga Mormon ay hindi na nagsasagawa ng polygamy sa kasalukuyan. Bakit ang kasaysayan ng kanilang polygamy ay patuloy na suliranin para sa kanilang kredibilidad para sila paniwalaan.

Racism/Pagkapoot sa Lahi

Ayon sa doktrina ng Mormon, ang bawat tao ay isang espiritu sa langit bago ito ipanganak. Mayroong digmaan sa langit, at ang mga hindi lumaban sa kanilang lubos na kakayanan para sa Dios ay isinumpa na may maiitim na balat. Ang lahat ng mga lalaking binanggit sa parapong ito ay mga presidente ng iglesyang Mormon at patuloy silang itinuturing ng mga Mormon na mga propeta ng Dios. Sinabi ni Joseph Smith na kung ang mga taong maiitim ang balat ay maniniwala sa mga doktrina ng Mormon at gawin ang tama, ang kanilang balat ay magiging mas maputi pagkalipas ng ilang henerasyon. Sinabi ni Brigham Young na ang maitim na balat at ilong na pango ay mga sumpa ni Cain. Sinabi niya na ito ay walang hanggang prinsipyo mula sa Dios na ang isang tao na may dugong Africano ay hindi makahahawak sa tungkuling maging pari. Sinabi rin niya na ang pang-aalipin sa mga itim ay isang banal na institusyon. Sinabi ni Joseph Fielding Smith na natatanggap ng mga taong may maitim na balat kung ano ang nararapat sa kanila dito sa mundo dahil sa ginawa ng kanilang espiritu bago pa man sila isilang. Sinabi ni David McKay na ang diskriminasyon ng iglesya laban sa Negro o maiitim ang balat ay hindi nagsimula sa tao kundi sa Dios.[11]

Sa Mormonismo, ang bawat lalaking miyembro ay inaasahang magiging isang pari. Sa malaking bahagi ng kanilang kasaysayan, hindi pinahihintulutan ng mga Mormon ang mga lalaking itim na maging pari, na nangangahulugang hindi sila tunay na mga miyembro. Noong 1978, inihayag ng iglesyang Mormon na nakakuha sila ng bagong rebelasyon na bumago sa lahat ng kanilang sinabi tungkol sa mga itim na lahi mula pa sa simula, at ngayon pinahihintulutan na nila ang mga itim na lalaki upang maging pari.

[12][13]

► Sinasabi ng mga Mormon na tinatanggap na nila nang pantay sa iba pang lahi ang mga itim na lahi. Bakit ang kasaysayan ng kanilang maling pagkapoot sa lahi ay nananatiling suliranin para sa kanilang kredibilidad?

Damit Panloob

Ang lahat ng miyembro ng Mormon ay inaasahang magsuot ng espesyal na damit sa ilalim ng kanilang damit na panlabas. Puti ang espesyal na damit na ito at nakatakip sa halos buong katawan. Ito ay sinasabing nagbibigay sa kanila ng espirituwal na proteksiyon. Ito ay kumakatawan sa kanilang pangako na maging tapat sa iglesya. Inaasahang isusuot nila ito araw at gabi.

Mga Ereheng Doktrina ng Mormon

[14]Ang bawat miyembrong Mormon ay dapat maniwala na si Joseph Smith ay isang propeta ng Dios at ang Aklat ng Mormon ay isa pang Testamento ni Kristo, kapantay ng Biblia sa awtoridad nito. Mayroon din silang isang aklat ng mga rebelasyon na tinatawag na The Doctrine and Covenants/Ang Doktrina at mga Tipan na pinaniniwalaan nilang kinasihan rin katulad ng Biblia. Naniniwala sila na ang Biblia ay hindi sapat upang itatag ang kanilang pinakamahahalagang mga doktrina.

Inaangkin ng mga Mormon na ang kanilang relihiyon ay tunay na Kristiyanismo. Marami sa kanilang mga doktrina ay sumasalungat sa Biblikal at pangkasaysayang mga doktrina na sumusuporta sa ebanghelyo. Mahirap makita ang mga ereheng katuruan kapag nakikipag-usap sa mga miyembro ng Mormon dahil marami sa kanila ay hindi nalalaman kung ano ang itinuro ng kanilang mga propeta.

Ang iglesyang Mormon ay naniniwala na ang Dios ay minsan naging taong katulad natin, ngunit umunlad hanggang siya ay naging Dios na siyang kalagayan niya ngayon.[15] Naniniwala sila na ang Dios Ama ay may pisikal na katawan. Mayroon siyang maraming asawa. Ang kanyang mga anak ay ipinanganak muna bilang mga espiritu, pagkatapos ay isinugo sa mundo upang ipanganak bilang mga tao.

Sinasabi ng mga Mormon na sila ay naniniwala na si Hesus ay isinilang ng isang birhen, ngunit itinuturo ng iglesyang Mormon na si Maria ay nagdalang-tao sa pamamagitan ng Dios Ama sa natural na paraan gamit ang kanyang katawan. At si Hesus ay isinilang sa parehong paraan na ang sinumang tao ay isinilang.[16]

Naniniwala ang mga Mormon na bago isinilang si Hesus sa lupa, siya ay isang espiritu, katulad ng ibang mga anghel. Naniniwala sila na siya ay hindi Dios.[17]

Naniniwala ang mga Mormon na ang Banal na Espiritu at si Hesus ay mga nilalang na hiwalay sa Ama, at sila ay hindi kapantay ng Ama. Hindi sila naniniwala sa Trinidad.

► Sa kaunting salita paano mo ipapaliwanag ang suliranin sa pananaw ng mga Mormon patungkol sa Dios?

[18]Naniniwala ang mga Mormon na ang isang lalaking Mormon ay maaaring lumago at maging katulad ng Dios. Naniniwala sila na marami na ang nakatupad nito, kung kaya’t marami nang dios. Sinabi ni Apostol Lorenzo Snow, “Kung ano ang tao ngayon, gayun dati ang Dios; at kung ano ang Dios ngayon, maaaring maging gayun din ang tao.”

Sinabi ni Joseph Smith, “Narito ngayon ang walang hanggang buhay –ang makilala ang tanging matalino at tunay na Dios; at kailangan mong matutuhan kung paano kayo mismo ay maging Dios, at maging mga hari at mga pari sa Dios nang kapareho ng ginawa ng lahat ng mga dios na nauna sa inyo.”

Naniniwala ang mga Mormon na ilang tao lamang ang mapupunta sa isang walang hanggang impiyerno.[19] Karamihan sa mga tao ay bibigyan ng pagkakataon na tanggapin ang Mormonismo pagkatapos ng kamatayan. Ang matatapat na Mormon ay mapupunta sa pinakamataas na antas ng langit.

Naniniwala ang mga Mormon na ang kaligtasan ay isang gantimpala na ibinibigay para sa isang buhay ng matapat na paglilingkod sa Dios.[20] Hindi inaangkin ng mga Mormon ang pagkakaroon ng personal na katiyakan ng kaligtasan.

Naniniwala ang mga Mormon na ang lahat ng ibang iglesya ay Satanic, at walang kaligtasan maliban sa pamamagitan ng iglesya ng Mormon. Walang tunay na pagkakaisa ang posible sa pagitan ng mga Mormon at mga Kristiyano.

► Bakit imposible na magkaroon ng pagkakaisa sa pagitan ng mga Kristiyano at mga Mormon? Magbigay ng ilang dahilan.

Mga Taktika ng mga Mormon

Hinihiling ng mga Mormon sa mga tao na manalangin sa Dios upang ipakita sa kanila kung ang aklat ng Mormon ay totoo at kung si Joseph Smith ay isang propeta. Maraming tao ang nagsabi na nakaramdam sila ng nag-aapoy sa kanilang puso bilang tugon sa panalanging iyon. Iniisip nila na ang nag-aapoy na pakiramdam na iyon ay nagpapatotoo na ang Mormonismo ay totoo. Hindi pinatototohanan sa kanila ng pakiramdam na sila ay personal na naligtas.[21]

[22]Inaangkin ng mga Mormon na naniniwala sila sa Biblia, ngunit sinasalungat ng Biblia ang kanilang mga doktrina. Sinasabi nila na ang Biblia ay may mga kamalian dahil sa mga pagkakamali sa pagkopya at pagsasalin. Sinasabi nila na kinakailangan ang dagdag na mga rebelasyon dahil sa mga pagkakamali sa Biblia.[23] Para sa isang Mormon, ang pinakamataas na awtoridad ay ang rebelasyon ni Joseph Smith. Dahil sila ay naniniwala na siya ay isang propeta, tinatanggap nila ang lahat ng paniniwala ng Mormonismo na sumasalungat sa Biblia.

Ginagamit ng mga Mormon ang parehong mga salita na ginagamit ng mga Kristiyano, ngunit iba ang kahulugan nila para dito. Sinasabi nila na si Hesus ay ang anak ng Dios, nguni’t hindi nila ibig sabihin na Siya ay Dios. Sinasabi nila na ang Banal na Espiritu ay ang ikatlong miyembro ng Godhead, nguni’t hindi sila naniniwala sa Trinidad.

Sinasabi nila na si Hesus ay isinilang ng isang birhen, nguni’t naniniwala sila na ang Dios Ama ay may pisikal na katawan at ginamit ito upang magdalang-tao si Maria sa natural na paraan.

[24]Sinasabi nila na si Hesus ay nagdusa at namatay bilang kabayaran sa ating mga kasalanan, at tayo ay maaaring manalangin upang patawarin, nguni’t naniniwala sila na ang langit ay isang gantimpala para sa isang matapat na buhay.

Inaangkin ng mga Mormon na ito ay tunay na Kristiyanismo. Sinasabi nila na lahat ng ibang iglesya ay mali. Ngunit kung nauunawaan at pinaniniwalaan ng isang tao ang lahat ng doktrina ng Mormonismo, hindi niya pinaniniwalaan ang ebanghelyo ayon sa Kasulatan at sagayun ay hindi isang Kristiyano.

Ngayon bumalik ka at basahin nang sama-sama ang mga footnotes para sa buong seksiyon tungkol sa Mormonismo. Dapat hanapin ng lahat ng mag-aaral ang mga reperensiyang talata sa Kasulatan at magsalit-salit sa pagbasa sa mga iyon sa grupo.

Ang lahat ng mga doktrina sa sumusunod na lista ay itinatanggi ng mga Mormon. Tingnan ang Handbook ng Doktrina upang makita ang kahalagahan ng bawat doktrina at ang ebidensiya para doon. Tiyakin na nauunawaan ninyo kung paanong ang mga talatang reperensiya ay nagpatunay sa doktrina.

(1) Ang Biblia ay sapat para sa doktrina.

(2) Mayroon lamang isang Dios.

(3) Ang Dios Ama ay hindi isang tao.

(4) Hindi kailanman nagbago ang Dios.

(5) Si Hesus ay Dios.

(7) Ang Banal na Espiritu ay Dios.

(8) Ang Dios ay isang Trinidad.

(9) Ang kaligtasan ay tanging sa pamamagitan ng pagbabayad-sala ni Kristo.

(11) Tinatanggap natin ang kaligtasan sa pamamagitan ng pananampalataya.

(12) Maaari tayong magkaroon ng sariling katiyakan ng kaligtasan.

(13) Ang hindi ligtas ay magdurusa ng walang hanggang kaparusahan.

Maaaring tila imposible na baguhin ang pag-iisip ng isang Mormon, ngunit ang katotohanan ay libo-libong Mormon ang umaalis na sa iglesyang Mormon taon-taon.

Sikaping ipakita sa Mormon na ang kanyang pinakamahalagang paniniwala ay taliwas sa ebanghelyo. Gamitin ang ebidensiya na nasa Handbook ng Doktrina. Ipakita ang ebidensiyang ito sa sinumang tila interesado sa Mormonismo.

Huwag sumang-ayon na ipanalangin na ipakita sa iyo kung tama ang Mormonismo. Hindi mo kailanman dapat hilingin sa Dios na ipakita sa iyo ang isang bagay kung alam mo na kung ano ang katotohanan. Ang pananalangin ng katulad noon ay nagbibigay kay Satanas ng pagkakataon na bigyan ka ng isang karanasan na lilito sa inyo.

Ang mga Mormon ay walang personal na katiyakan ng kaligtasan. Marami sa kanila ang nabubuhay sa takot na ang kanilang buhay ay hindi tatanggapin ng Dios. Tiyakin na ibahagi sa kanila ang ebanghelyo at sabihin sa kanila kung paano sila magkakaroon ng katiyakan ng kaligtasan. Iyon ay mas mahalaga kaysa anumang ibang bagay na masasabi mo sa kanila.

Maaaring hindi mo makita ang mga resulta ng inyong debate. Maaaring hindi sabihin sa iyo ng isang Mormon sa katapusan ng inyong pag-uusap na nagbago na ang kanyang isipan. Gayunman, hindi mo nalalaman ang pangmatagalang epekto ng pag-uusap ninyo. Patuloy na gagamitin ng Banal na Espiritu ang katotohanang iyong ibinigay.

Si Kris ay lumaki sa iglesyang Mormon at nakibahagi siya sa lahat ng kanilang ginagawa. Siya ay itinuturing na isang mabuting halimbawa ng kabataang babaeng Mormon. Nang siya ay umalis upang mag-aral sa Unibersidad ng Idaho, siya ay naanyayahang dumalo sa isang Kristiyanong Pag-aaral ng Biblia. Pumunta siya na umaasang mayroon siyang mahihikayat na lumipat sa Mormonismo. Sa Pag-aaral ng Biblia, marami siyang natutuhan tungkol sa Dios mula sa Biblia na hindi niya kailanman natanto. Nakita rin niya na ang mga Kristiyano doon ay may relasyon sa Dios na hindi niya kailanman naranasan. Umalis siya sa iglesyang Mormon at namuhay para sa Dios kahit na tinanggihan siya ng kanyang pamilya at karamihan sa mga kaibigan niyang Mormon. Binigyan siya ng Dios ng bagong pamilyang Kristiyano at higit na maraming kaibigan kaysa nakaraan. Sinasabi ni Kris, “Para doon sa mga umalis sa iglesyang Mormon at nag-iisip na tuluyan nang sumuko sa Dios, huwag… May layunin pa ang Dios sa inyo.”

Muling Basahin ang Isaias 41. Ang bawat mag-aaral ay dapat sumulat ng parapo na nagpapaliwanag sa mensahe ng talata na ito para sa tagasunod ng Mormonismo. Hayaan ang ilang mag-aaral na ibahagi sa iba kung ano ang kanilang isinulat.

Sa kabuuan ng kursong ito magkakaroon kayo ng pakikipag-usap sa mga tagasunod ng iba’t-ibang relihiyon at kulto na inyong pinag-aaralan. Kakailanganin mong makipag-usap sa mga miyembro ng hindi bababa sa 10 iba’t-ibang grupong pangrelihiyon. Dapat mong ipahayag ang ebanghelyo at ibang katotohanang Kristiyano.

Kung hindi posible para sa iyo na makahanap ng miyembro ng grupong pangrelihiyon na iyong pinag-aaralan sa isang partikular na leksiyon, dapat kang humanap ng ibang tao na magiging interesado na marinig ang materyal.

Pagkatapos ng inyong pag-uusap, magbibigay ka ng dalawang ulat.

(1) Susulat ka ng 2-pahinang pag-uulat at ibibigay ito sa tagapanguna sa klase. Dapat mong ilarawan doon ang pangunahing mga paniniwala ng grupong pangrelihiyon, isang tugon mula sa Biblia para sa mga paniniwala, ang iyong pakikipag-usap sa hindi mananampalataya, at ang kanilang tugon sa iyong mga sinabi.

(2) Sasabihin mo sa iyong mga kaklase ang tungkol sa pakikipag-usap sa susunod na pagkikita ninyo sa klase.

Ang sampung pag-uusap at takdang araling isinulat ang pangunahing takdang-aralin sa kursong ito.