Lesson 6: Eastern Lightning/Iglesya ng Makapangyarihang Dios

Si Shang Hui ay isang pastor sa China. Nagsimula siyang makarinig ng mga taong umaalis sa iglesya upang umanib sa Church of Almighty God/Iglesya ng Makapangyarihang Dios. Maging ang kanyang mga magulang ay umanib din sa kanila. Nang makilala niya ang mga miyembro ng kulto, sinabi nila, “Ang pangalan ng Dios ay Jehovah, ngunit ng siya ay pumunta dito sa lupa siya ay tinawag na Hesus. Makagagawa uli ang Dios ng bagong bagay, at maging isa pang Kristo sa mundo.” Nalilito si Shang sa kanilang mga katuruan. Nabigo siya sa kanyang ministeryo dahil ang kulto ay mabilis na dumadami.

Sama-samang basahin ng malakas ang 2 Timoteo 3. Pasulatin ang bawat mag-aaral ng isang parapo na nagbubuod sa talata na ito sa Kasulatan. Ano ang sinasabi sa atin ng talata na ito tungkol sa mga huwad na relihiyong Kristiyano? Pasulatin ang bawat mag-aaral ng listahan ng mga pahayag. Bilang isang grupo, talakayin kung ano ang inyong isinulat.

Ang Pinagmulan at Impluwensiya

[1]Ang opisyal na pangalan para sa kulto na tinatawag na Kidlat sa Silangan ay Iglesya ng Makapangyarihang Dios. Nagsimula ang relihiyon noong 1989 sa Tsina. Ang kanilang mga miyembro ay tinatayang mula sa 100,000 hanggang 1,000,000.

Naniniwala sila na ipinahayag na ng Dios ang kanyang sarili sa panahon ng Lumang Tipan bilang si Jehovah, pagkatapos ay dumating sa mundo bilang si Hesus, at ngayon ay dumating sa mundo sa anyo ng isang babae na tinatawag ang kanyang sarili bilang Lightning Deng. Ang kanyang tunay na pangalan ay orihinal na si Yang Xiangbin. Hindi nagpapakita sa publiko si Deng, at hindi rin nalalaman ng publiko kung ano ang kanyang hitsura o kung nasaan siya.[2] Ang nakikitang tagapanguna ng kulto ay si Zhao Weishan na maaaring asawang (lalaki) ni Yang.

Inaangkin nila na ang Biblia ay wala na sa panahon, at kinakailangan na ng bagong rebelasyon.[3] Ang kulto ay naglathala na ng ilang mga aklat, kabilang ang Lightning from the Orient/Kidlat Mula sa Silangan, na sinasabing rebelasyon mula sa Dios para sa babaeng Kristo. Nangungusap ang mga aklat sa mga Kristiyano at binabantaan sila ng mga detalyadong parusa.

Sinasabi nila na ang pangalan ni Hesus ay wala ng kabuluhan at wala nang kapangyarihan, at si Deng na ang Kristo.

Ihinula nila ang wakas ng daigdig noong Disyembre 21, 2012.

►Ano ang ilan sa mga bagay na nakikita mo na nagpapakita na ang organisasyong ito ay hindi Kristiyano?

Mga Gawain at Estratehiya

Espesyal nilang tinatarget ang mga iglesyang Kristiyano, pinipili maging ang pinakamalakas na mga Kristiyano. Hindi sila gaanong interesado sa mga miyembro ng ibang relihiyon o sekta.[4] Nagpapadala sila ng mga miyembro upang magkunwari na umaanib sa mga iglesya.

Gumagamit sila ng prostitusyon upang umakit ng mga posibleng maging mga kaanib. Ang mga taong sumasali sa kanila ay ihinihiwalay sa kanilang mga asawa at inuutusang magkaroon ng mga gawaing seksuwal.[5]

Nag-aalok sila ng malaking halaga ng pera sa mga pastor na Kristiyano upang lumipat at umanib sa kanila.

Gumagamit sila ng pagpapahirap, pagkidnap, at pagpatay.[6] Pisikal nilang inaatake ang mga tagapanguna ng mga organisasyong Kristiyano. Tumatanggi silang umalis sa pagiging miyembro ang sinumang nahikayat nila.

Kapag ang isang tao ay tila interesadong umanib, binibigyan nila siya ng mga regalo, ngunit nagbabanta sila ng karahasan kapag hindi umanib ang tao.[7] Sinisikap nilang magkasalang seksuwal ang mga Kristiyano, pagkatapos ay bina-blackmail nila.

Sinasabi nila na sila ay maling inakusahan ng karahasan, subali’t maraming Kristiyano at misyonero sa China ang nakasaksi sa kanilang mga ginagawa.

Mayroon silang daan-daang kuwento ng mga tao na inaangkin nila na nagkaroon ng karamdamang nakamamatay mula sa Dios dahil sa pagtanggi nila sa kulto.

Kinakailangang ibigay ng mga miyembro ang lahat ng mayroon sila sa kulto. Hinihikayat silang iwan ang kanilang mga pamilya at mamuhay kasama ng kulto at magtrabaho sa pagpapalaganap ng mensahe. Mayroon silang mga kuwento ng maraming tao na nasa ministeryong Kristiyano bago umalis sa iglesya upang umanib sa kanila.

Nagsimula na silang palawakin ang kanilang organisasyon sa ilang ibang bansa. Nagsimula sila sa pagbibigay ng mga nakaimprentang babasahin sa mga tao sa iglesyang Chinese.

[8]► Paano naiiba ang tunay na iglesya sa mga ginagawa ng Eastern Lightning/Kidlat sa Silangan?

Mga Paniniwala

Kinikilala nila na si Kristo ay namatay para sa ating mga kasalanan, ngunit hindi sila naniniwala na ang sinuman ay maililigtas ni Kristo nang wala ang kanilang organisasyon. Itinatanggi nila ang muling pagkabuhay at ang muling pagbabalik ni Kristo.

Naniniwala sila na ang sinumang hindi tumatanggap sa mensahe ni Deng (ang babaeng Kristo) ay hahatulan ng Dios.

Ngayon ang responsibilidad ng tao ay sundin ang babaeng Kristo,at tanging kung iiwan niya ang kanyang pananampalataya kay Kristo Hesus, pupunitin ang kanyang Biblia sa harap ng publiko, tatawagin ang kanyang sarili na “anak ng demonyo,” ay “masasakop” sa pamamagitan ng lubusang pagpapasakop ng kanyang sarili sa pasalitang pangungusap ng babaeng Kristo at sagayun ay nagiging “isang matagumpay,” at makapapasok siya sa Kaharian na itatatag sa mundo ng babaeng Kristo. (Mula sa isang artikulo tungkol sa kulto na isinulat ng “China para kay Hesus”).[9]

► Paano natin nalalaman na si Hesu-Kristo at ang Salita ng Dios ay kinakailangan pa rin para sa Kristiyano?

[10]Ang Iglesya ng Makapangyarihang Dios (Kidlat sa Silangan) ay nag-aangkin ng pagiging tunay na Kristiyanismo. Inaangkin nila na lahat ng ibang iglesya ay huwad. Ngunit kung nauunawaan at pinaniniwalaan ng isang tao ang lahat ng kanilang mga doktrina, hindi nito pinaniniwalaan ang ebanghelyo ayon sa Kasulatan at hindi siya isang Kristiyano.

Ngayon bumalik at basahin nang sama-sama ang mga footnotes para sa buong seksiyon tungkol sa Eastern Lightning/Kidlat sa Silangan. Dapat hanapin ng lahat ng mag-aaral ang mga reperensiyang talata sa Kasulatan at magsalit-salit sa pagbasa ng mga ito sa grupo.

Ang lahat ng mga doktrina sa listahan sa ibaba ay itinatanggi ng Eastern Lightning/Kidlat sa Silangan. Tingnan sa Handbook ng Doktrina upang makita ang kahalagahan ng bawat doktrina at ang patunay para dito. Tiyakin na nauunawaan mo kung paanong ang mga reperensiyang talata ay nagpapatunay sa doktrina.

(5) Si Hesus ay Dios.

(7) Ang Banal na Espiritu ay Dios.

(8) Ang Dios ay Trinidad.

(9) Ang kaligtasan ay sa pamamagitan lamang ng pagbabayad-sala ni Kristo.

(11) Tinatanggap natin ang kaligtasan sa pamamagitan ng pananampalataya.

(12) Maaari tayong magkaroon ng personal na katiyakan ng kaligtasan.

Bagaman ang marahas, imoral at mapanlinlang na mga estratehiya ng kultong ito ay ginagawa itong tila isang teroristang organisasyon, marami sa kanilang mga tagasunod ang hindi nakakaalam ng tungkol sa mga ginagawa ng kanilang mga tagapanguna. Espesyal na sa mga bansang iba kaysa sa China, ang mga taong nahikayat ng kulto ay maaaring hindi pinaniniwalaan ang mga akusasyon laban sa kanila. Samakatuwid, mahalaga para sa isang Kristiyano na makatugon sa kanilang mga doktrina.

Hindi maaaring ang isang taong lubusang nakikibahagi sa kulto at naniniwala sa kanilang mga doktrina ay isang Kristiyano. Samakatuwid, mayroon silang kagutumang espirituwal na hindi natutugunan. Dapat ang maging prayoridad ng isang Kristiyano ay ang ibahagi ang ebanghelyo sa kanila.

Maraming tao ang umanib sa Eastern Lightning/Kidlat sa Silangan dahil sa takot. Dapat nating ipangaral na ang katapatan sa katotohanan ay higit na mahalaga kaysa anumang kundisyon sa mundo. Alam din natin na ang kaharian ng Dios ay magtatagumpay.

Ang Kristiyanismo mula sa sinaunang panahon hanggang sa kasalukuyan ay nagkaroon na ng dakilang iba’t-ibang paniniwala. Gayunman, ang pundasyong mga doktrina tungkol sa kalikasan ng Dios at ang kalikasan ni Kristo ay itinatag at ipinagtanggol ng iglesya sa lahat ng panahon. Ang mga unang konseho na kumakatawan sa lahat ng iglesya ay sumulat ng mga pangungusap ng doktrina ayon sa Biblia, at lahat ng iglesyang nangangaral ng ebanghelyo ay itinuring ang mga doktrinang ito na pinakamahalangang kinakailangan. Ang mga iglesyang biblikal ay talagang mukhang magkakaiba sa isa’t-isa, at hindi nagkakasundo sa maraming bagay, subali’t sila ay nagkakasundo sa ilang tiyak na mahahalagang doktrina.

May mga kulto na nagsasabi na lahat ng ibang iglesya maliban sa kanilang sarili ay mali sa mga pangunahing doktrina at hindi mga tunay na Kristiyano. Hindi sila nagkakasundo hindi lamang sa maliliit na doktrina, kundi sa mga doktrina na kinakailangan para sa ebanghelyo. Itinatanggi nila ang mga bagay na nagbubukod sa mga Kristiyano mula sa ibang mga relihiyon. Ang isang kulto na itinatanggi ang mahahalagang kinakailangan sa Kristiyanismo ay ibang relihiyon at hindi dapat angkinin na sila ay Kristiyano.

Kapag sinasabi ng isang kulto na ito ang tama at ang lahat ng ibang iglesya ay mali, kailangan nating matanto kung ano ang nais nilang ipahiwatig. Sinasabi nila na ang mga sinaunang konseho na kumakatawan sa lahat ng iglesya ay mali. Sinasabi nila ang milyong bilang ng mga Kristiyano na nabuhay sa lahat ng panahon ay mali. Sinasabi nila na ang mga makadios na tao na ating kilala bilang halimbawa ni Kristo ay mali. Sinasabi nila na ang lahat ng lalaki at babae sa buong mundo na nagmahal sa Dios, nanalangin, sumamba, nagpatotoo sa biyaya ng Dios, nagtiis ng pag-uusig, sumunod sa Biblia, at nagbahagi ng ebanghelyo, lahat ay mali. Sinasabi ng kulto na ang lahat ng ito ay mali maging sa pinakapangunahing katotohanan na ginagawang Kristiyano ang isang tao.

Kung tama ang kulto, hindi pinili ng Dios na gabayan ang kanyang iglesya sa pangunahing katotohanan ng ebanghelyo sa nakaraang mga siglo. Kung tama ang kulto, kataka-taka na ang mga sinsero at makadios na mga tao sa lahat ng lugar ay patuloy na tinatanggihan ang kanilang mga doktrina. Totoo na ang mga organisasyong pangrelihiyon ay maaaring maging makasanlibutan, makapangyarihan, at hindi tunay na interesado sa katotohanan, ngunit ang mga makadios at espirituwal na mga tao sa mga iglesya sa lahat ng lugar ay patuloy na pinanghahawakan ang pangunahing katotohanang biblikal.

Umanib si Lia sa kultong EasternLightning/Kidlat sa Silangan dahil iniisip niya na sila ay mga Kristiyano, subalit makalipas ang ilang panahon ay napagtanto niya na hindi nila pinaniniwalaan ang Biblia o si Hesus. Nagpasya siyang umalis, ngunit pinalo nila ang kaniyang mga binti ng isang tubong bakal, kung kaya’t hindi siya makalakad. Sinabi nila na papatayin nila siya kapag siya ay umalis. Makalipas iyon, nagawa niyang makatakas sa tulong ng isang Kristiyano. Nasa isang iglesya siya ngayon at hinahanap ang tulong ng Dios. Lumpo pa rin siya dahil sa mga pinsalang tinamo niya mula sa Eastern Lightning.

Basahing muli ang 2 Timoteo 3. Ang bawat mag-aaral ay dapat sumulat ng isang parapo na nagpapaliwanag ng mensahe ng talata na ito para sa isang tagasunod ng Eastern Lightning. Hayaan ang ilan sa mga mag-aaral na ibahagi ang kanilang isinulat.

Sikaping hanapin ang pagkakataon na ipahayag ang ebanghelyo sa isang nagmula sa ganitong grupong pangrelihiyon. Ang kultong ito ay maaaring hindi umiiral sa bansa kung saan ikaw ay nag-aaral. Kung hindi, ipahayag ang materyal sa ibang tao at kunin ang kanilang tugon. Maghanda na ibahagi sa iyong mga kamag-aral ang tungkol sa pag-uusap na nagkaroon ka. Isulat ang iyong 2-pahinang ulat at ibigay iyon sa inyong tagapanguna sa klase.