Lesson 12: Islam

Si Danny ay isang kampeon sa heavy-weight na boksing. Sa isang pagbisita niya sa Turkey, narinig niya ang Islam na pagtawag upang manalangin, at lubha siyang naging interesado dito. Sinimulan niyang pag-aralan ang Islam at pakiramdam niya ito ang tamang relihiyon para sa kanya. Sinabi na niya noon na siya ay Kristiyano, nguni’t ngayon ay nakumbinsi siya na mayroong mga mali sa Biblia.

Sama-samang basahin ng malakas ang 1 Juan 1. Pasulatin ang bawat mag-aaral ng isang parapo na nagbubuod sa talata na ito ng kasulatan. Ano ang sinasabi ng talata na ito tungkol sa relasyon ng isang mananampalataya sa Dios? Pasulatin ang bawat mag-aaral ng isang listahan ng mga pahayag. Bilang isang grupo, talakayin kung ano ang inyong isinulat.

Pinagmulan ng Islam

Ang Islam ang ikalawang pinakamalaking relihiyon sa mundo, na may 1.5 bilyon na tagasunod. Buong mga bansa ang pinaghaharian ng mga prinsipyo ng Islam. Ang salitang Islam ay nangangahulugang “pagpapasakop,” na tumutukoy sa pagpapasakop kay Allah. Ang isang tagasunod ng Islam ay tinatawag na Muslim. Ang salitang Muslim ay nangangahulugang “ang taong nagpapasakop.” Tinatawag ng mga Muslim ang kanilang sarili na “mananampalataya,” at tinatawag nila ang mga taong hindi Muslim na “hindi naniniwala sa relihiyon” (hindi mananampalataya).

Si Muhammad ang nagtatag ng relihiyon ng Islam. Nabuhay siya noong A.D. 570-632.

Inangkin ni Muhammad na tumanggap siya ng mga rebelasyon. Maraming tao ang sumulat tungkol sa kanyang mga rebelasyon, at ang mga ito ay inipon upang mabuo ang Koran matagal na panahon matapos na siya ay mamatay. Ang Koran ay hinati-hati sa mga seksiyon na tinatawag na Sura.

► Paano naiba ang pinagmulan ng Koran sa pinagmulan ng Biblia?

Ang relihiyon ni Muhammad ay nabubukod sa karamihan sa mga relihiyon sa kanyang paligid dahil ito ay monotheistic o ang paniniwala sa iisang dios at lumalaban sa pagsamba sa dios-diosan. Nalalaman niya ang tungkol sa Judaismo at Kristiyanismo, nguni’t tinanggihan ang mga ito.

[1]Nagmula si Muhammad sa isang mahirap na pamilya, ngunit nag-asawa ng isang mayamang biyuda. Nang ang asawang babae ay mamatay, nagkaroon pa siya ng labin-dalawang ibang asawa, kabilang ang asawa ng kanyang ampon na lalaki, matapos utusan ang kanyang anak na magdiborsiyo. Ayon sa Koran, ang mga lalaki ay limitado sa apat na asawa.

[2]Nang magkaroon ng sapat na tagasunod si Muhammad, kinontrol niya ang lungsod ng Medina, ngayon ay nasa modernong bansa ng Saudi Arabia. Pagkatapos ng ilang digmaan, nakontrol niya ang Mecca, at lumipat doon. Inatake at sinakop niya at ng kanyang mga tagasunod ang mga lugar sa kanilang paligid. Sa paglipas ng panahon nasakop nila ang ilang mga bansa at pinilit ang mga tao doon na maging Muslim.

Karamihan sa mga Muslim sa ngayon ay hindi marahas. Sinisikap nilang mamuhay nang mapayapa kasama ng kanilang hindi-Muslim na mga kababayan. Gayunman, may mga utos upang maging marahas sa Koran. Inuutusan ng Koran ang mga Muslim na atakihin at patayin ang mga sumasamba sa dios-diosan.[3] Sinasabi ng Koran na ang mga taong lumalaban sa Islam ay dapat patayin o kaya’y putulin ang kanilang mga kamay at paa.[4] Winasak ni Muhammad ang mga pamayanang Judio, pinatay ang mga lalaki at ibinenta ang kanilang mga pamilya sa pagkaalipin.

► Paano naiba ang paglaganap ng Islam sa paglaganap ng Kristiyanismo?

Mga Paniniwala ng Islam

Ang pinakainuulit na paniniwala ng Islam, na tinatawag na shahadah ay: “Walang Dios kundi si Allah, at si Muhammad ang kanyang propeta.”

Naniniwala ang mga Muslim na si Allah ang nag-iisang Dios, ang Manlilikha ng mundo. Naniniwala sila na siya ang nagbigay ng rebelasyon sa mga tauhan sa Biblia katulad nina Noa, Abraham, at Moises.

Hindi naniniwala ang mga Muslims sa Trinidad o ang anumang posibilidad ng pagkakatawang-tao ng Dios.

► Paano naiiba ang pananaw ng mga Muslim kay Muhammad sa pananaw ng mga Kristiyano kay Kristo?

Naniniwala ang mga Muslim na si Hesus ay isang propeta mula sa Dios na gumawa ng mga himala, siya ang Mesiyas, at wala siyang kasalanan. Hindi sila naniniwala na siya ay namatay sa krus, kundi siya ay kinuha ni Allah nang subukin siyang patayin ng mga Judio.[5] Hindi sila naniniwala na siya ang Anak ng Dios o ang pagkakatawang-tao ng Dios.[6] Hindi sila naniniwala na siya ang Tagapagligtas ng mundo.

Naniniwala ang mga Muslim na ang Biblia ay mula sa Dios, ngunit naniniwala sila na kung mayroong mga pagsasalungatan dito at sa Koran, ang Koran ang panghuling awtoridad dahil ito ang huling rebelasyon. Naniniwala sila na ang mas huling rebelasyon ay maaaring sumalungat sa anumang nauna rito.[7]

Naniniwala ang mga Muslim na ang kaligtasan ay makakamit sa pamamagitan ng pagtupad sa mga obligasyong tinatawag na Limang Haligi ng Islam. Ang Limang Haligi ng Islam ay:

(1) Shahadah: matapat na pagbigkas sa pagpapahayag ng pananampalataya ng Muslim.

(2) Salat: pagsasagawa ng ritwal na pananalangin limang beses sa isang araw.

(3) Zakat: pagbibigay ng limos sa mahihirap.

(4) Sawn: pag-aayuno sa buwan ng Ramadan.

(5) Hajj: paglalakbay sa Mecca kahit minsan sa buong buhay niya.

Mahihirap na mga Doktrina ng Islam[8]

Upang makita kung anong klase ng pamumuhay ang pinaniniwalaan ng mga Muslim, maaari nating tingnan ang mga bansang kontrolado ng Batas ng Islam. Ang batas ng Islam ay tinatawag ng Sharia Law. Maraming bansang Arabo ang sumusunod sa batas ng Sharia sa ilang bahagi nito. Hindi pinahihintulutan ng batas ng Islam ang kalayaan sa pagsasalita, kalayaan ng relihiyon, kalayaan na magtipon-tipon, o kalayaan sa paglalathala.

Sa isang bansang Islam ang isang tao ay maaaring patayin sa paglipat sa Kristiyanismo o kung magtatangka itong mag-ebanghelyo sa ibang tao.

[9]Ayon sa Batas ng Sharia, maaaring diborsiyuhin ng isang lalaki agad-agad ang kanyang asawang babae sa anumang dahilan. Hindi maaaring diborsiyuhin ng babae ang kanyang asawang lalaki kung wala itong pagsang-ayon. Pinahihintulutan ang mga lalaki na saktan ang kanilang mga asawang babae, ayon sa Koran.[10] Ang isang lalaki ay maaaring ikasal sa apat na asawang babae.[11] Ang isang babae ay maaaring patayin ng kanyang mga kamag-anak kung hindi siya susunod sa mga hinihingi ng Islam. Sa ilang mga bansa, ang mga babae ay hindi pinapahihintulutan na magmaneho ng sasakyan, pumasok sa paaralan, o magpakita sa publiko nang walang takip ang kanilang mga mukha. [12] Ang isang babae ay maaaring bugbugin sa publiko kapag siya ay lumabag sa mga tuntunin.

Naniniwala ang mga Muslim na ang tama at mali ay nagmumula lamang sa kalooban ni Allah. Maaaring baguhin ni Allah kung alin ang tama kung nanaisin niya, dahil ang kanyang kalooban ang mahalaga sa halip na ang isang hindi nagbabagong karakter.[13]

Hindi sinasabi ng Koran na ang mga tao ay nilikha sa wangis ni Allah. Sinasabi na si Allah ay nakahihigit sa lahat at hindi maaaring makilala at lubusang naiiba.[14]

Hindi inaasahan ng mga Muslim na magkaroon ng personal na relasyon kay Allah. Si Allah ay tinatawag na “lubos na mapagmahal,” nguni’t sa ibang paraan hindi kailanman binanggit sa Koran na minamahal niya ang mga tao. Madalas sinasabi ng Koran na si Allah ay mapagpatawad at maawain sa mga taong nagiging mananampalataya sa Islam. Kailangang magsisi ang mga tao, at hilingin na patawarin sa paghuhukom dahil umaasa na si Allah ay maawain, ngunit walang karanasan ng kaligtasan o katiyakan ng kapatawaran.[15]

► Paano naiiba ang relasyon ng Kristiyano sa Dios sa relasyon ng Muslim kay Allah?

Ang mga benepisyo ng Islam ay iniaalok karamihan sa kalalakihan at ang Koran ay tumutugon sa bawat usapin ayon sa pananaw ng tao. Ang mga babae ay pag-aari lamang ng mga lalaki. Ang paraiso ayon sa Islam pagkatapos mamatay ay para sa kalalakihan, at isinasama doon ang mga kababaihan para sa kanilang kasiyahan.[16]

Ngayon bumalik at basahin ang mga footnotes para sa buong seksiyon ng Islam. Dapat hanapin ng bawat mag-aaral ang mga Kasulatang reperensiya at magsalit-salit sa pagbasa ng mga ito sa grupo.

Hindi sapat na patunayan lamang ang mga doktrinang Kristiyano mula sa Biblia, dahil naniniwala ang mga Muslim na pumapalit ang Koran sa Biblia bilang ang pinakamataas na awtoridad.

Maaari tayong sumang-ayon sa ilang mahahalagang paniniwalang Islam. Ang mga Kristiyano ay sumasang-ayon na mayroon lamang iisang Dios na lumikha sa sanlibutan. Sumasang-ayon ang mga Kristiyano na mayroong huling paghuhukom, at ang bawat tao ay ipapadala alin sa dalawa, sa langit o sa impiyerno.

Ang ibang mahahalagang katotohanan ay dapat ipakita sa Biblia. Naniniwala ang mga Muslim na ang Biblia ay mula sa Dios subalit ito ay nahihigitan ng Koran. Gayunman, maaari mong ibigay ang punto na may mga katotohanan na napakahalagang batayan na hindi nila maaaring baguhin. Gayundin, hindi maaaring baguhin ang mga katotohanan ng kasaysayan.

Nilikha ng Dios ang mga tao sa kanyang wangis (Genesis 1:27). Minamahal niya sila at nais niyang magkaroon ng relasyon sa kanila.

Sumasang-ayon ang mga Kristiyano sa Islam na si Hesus ang Mesiyas at wala siyang kasalanan. Ipakita na ipinangako niya na magbibigay ng walang hanggang buhay sa mga sumasampalataya sa kanya (Juan 10:28), ipinangako niya na bubuhayin ang mga patay sa pamamagitan ng kanyang tinig (Juan 5:28-29), at sinabi na walang sinumang makararating sa Ama kundi sa pamamagitan niya. (Juan 14:6).

Ipakita mula sa Kasulatan na siya ay higit pa sa isa lamang taong walang kasalanan; Tingnan ang Handbook ng Doktrina para sa

(5) Si Hesus ay Dios.

Hindi siya maaaring maging isang mabuting tao at isang propeta ng Dios malibang ang kanyang mga inaangkin para sa kanyang sarili ay tama. Itinuturo ng Islam na si Hesus ay isang propeta ng Dios, ngunit kailangan niyang maging kung sino ayon sa inaangkin niya at magkaroon ng kakayahang makapagbigay ng walang hanggang buhay, o siya ay isang masama o isang nalinlang-ang-sarili na nagdulot sa mga tao na maglagay ng kanilang pananampalataya sa kanya.

Dumating si Hesus upang ipakita ang pag-ibig ng Dios. Ipinakita niya na minamahal ng Dios ang bawat tao, kabilang ang mga babae at mga taong mababa ang uri. Hindi nahihiwalay ang tao mula sa Dios dahil sa kanilang kasarian o kalagayang panlipunan. Nahiwalay ang tao mula sa Dios dahil sa kanilang kasalanan, at nag-aalok ang Dios ng kapatawaran. Inaanyayahan ng Dios ang makasalanan upang patawarin at magkaroon ng personal na relasyon sa kanya.

Nakatira si Jalal sa Saudi Arabia. Bilang isang bata siya ay matapat sa relihiyong Islam. Nagsaulo siya ng malalaking bahagi ng Koran at tumulong sa mosque. Nang siya ay labing-anim na taong gulang na, nais niyang lumahok sa isang banal na digmaan at lumaban para sa Islam, ngunit sinabi ng kanyang mga magulang na siya ay masyado pang bata. Pagkalipas ng panahon, nakakita siya ng trabaho at naging abala at nagsimulang makaligtaan ang relihiyon. Nagkaroon siya ng suliranin at nais niyang manalangin para sa tulong, ngunit siya ay natatakot na galit si Allah sa kanya dahil sa kanyang pagpapabaya sa relihiyon. Nanalangin siya kay Hesus para tulungan siya, at ang suliranin ay nalutas pagkalipas ng dalawang araw. Nagkaroon din siya ng isang panaginip at nakita niya si Hesus na ipinapakita sa mga tao ang daan papunta sa langit. Inilagay niya ang kanyang pananampalataya kay Kristo para sa kanyang kaligtasan. Sinasabi ni Jalal, “Naramdaman ko ang pag-ibig sa aking puso, at ako ay labis na masaya na makilala si Hesus. Noong ako ay isang Muslim, hindi ko maisip na ang mga Kristiyano ay tama. Pagkatapos noon, natuklasan ko kung gaano ako minamahal ng Dios, at ako ay naging isang Kristiyano. Oo, minamahal niya ako, minamahal ka niya, at minamahal niya ang buong mundo. Minahal ka ni KristoHesus, at minamahal ka pa rin niya. At huwag mong kalimutan na sa huling araw walang ibang makapagliligtas sa atin, tanging si KristoHesus lamang.”

Ngayon basahin uli ang 1 Juan 1. Ang bawat mag-aaral ay dapat sumulat ng isang parapo na nagpapaliwanag sa mensahe ng talata na ito para sa isang tagasunod ng Islam. Hayaan ang ilang mag-aaral na ibahagi ang kanilang isinulat.

Tandaan na humanap ng pagkakataon na ipahayag ang ebanghelyo sa siang tao na mula sa grupong pangrelihiyon na ito. Maghanda na ibahagi sa iyong mga kamag-aral ang tungkol sa iyong pakikipag-usap. Isulat ang iyong 2-pahinang ulat at ipasa iyon sa tagapanguna sa iyong klase.