Si Steve ay lumaki bilang isang Katolikong Romano at pumupunta sa misa linggo –linggo noong bata pa. Bilang isang tin-edyer, nagsimula siyang lumiban sa mga gawaing pangrelihiyon at nakilahok sa mga bagay na makamundo. Sa paaralan sa secondarya, nakilala niya ang isang babae na nag-anyaya sa kanya sa kanilang iglesya. Kabilang sa istilo ng pagsamba ay malakas na musika, pagsasayaw, pagsasalita sa ibang wika, at pagsigaw na nakamangha sa kanya kung ihahambing niya sa paraan ng pagsamba ng Katoliko. Nagsimula siyang maging interesado sa dynamic na pangangaral at musika.

Sama-samang basahin nang malakas ang Juan 14. Pasulatin ang bawat mag-aaral ng isang parapo na nagbubuod sa talata na ito ng kasulatan. Anong interaksiyon ang nakikita natin sa pagitan ng mga miyembro ng Trinidad? Pasulatin ang bawat mag-aaral ng listahan ng mga pahayag. Bilang isang grupo, talakayin kung ano ang inyong isinulat.

Introduksiyon sa United Pentecostalism

[2]

Ang iglesyang United Pentecostal ay nag-aangkin ng 36,000 iglesya sa 203 bansa, at bilang ng miyembro na 3,000,000 nakatao.[1] Ang organisasyon ay binuo noong 1945 sa pamamagitan ng pagbubuklod ng dalawang Pentecostal na denominasyon. Ang kanilang mga doktrina ay nagmula sa pagbabalik-sigla ng Pentecostal na nagsimula noong 1901.

Ang United Pentecostal Church ay nabubukod sa ibang Pentecostals na naniniwala sa Trinidad o hindi nagsasagawa ng pagbabautismo. Hindi sila nakikisangkot sa “Kilusan ng Pananampalataya” (na tinalakay sa isang leksiyon sa kursong ito).

Pundasyong mga Doktrina/Foundational Doctrines

Ang mga pangunahin at pundasyong doktrina ng organisasyon ay ang pamantayan ng Biblia para sa buong kaligtasan, ang pagsisisi, bautismo sa tubig sa pamamagitan ng paglulubog sa pangalan ng Panginoong Hesu-Kristo para sa kabayaran ng kasalanan, at ang bautismo ng Banal na Espiritu kabilang ang paunang tanda ng pagsasalita ng ibang wika ayon sa salitang ibinibigay ng Espiritu (Mula sa “Mga Artikulo ng Pananampalataya” ng United Pentecostal Church).

[3]

Naniniwala ang mga United Pentecostals sa Biblia bilang ang pangwakas na awtoridad. Binibigyang diin nila ang salitang apostolic dahil naniniwala sila na itinuturo nila ang parehong mga doktrina ayon sa mga apostol. Sinisikap nilang sundan ang halimbawa ng iglesya sa Mga Gawa.

Hindi sila naniniwala sa Trinidad. Naniniwala sila na ang Ama, ang Anak, at ang Espiritu Santo ay tatlong kapahayagan ng Dios. Naniniwala sila na sa panahon ng Lumang Tipan, ang Dios ay espiritu, pagkatapos sa pagkakatawang tao ay naging tao. Hindi sila naniniwala na ang Ama at ang Anak ay dalawang persona. Naniniwala sila na ang Dios bilang Espiritu ay ang ama ni Hesus, ngunit sila ay ang parehong persona.

Ang kanilang pananaw kay Kristo at sa Banal na Espiritu ay naiiba sa karamihan sa mga kulto na tumatanggi sa Trinidad. Dahil naniniwala sila na si Hesus ay ang parehong persona sa Dios Ama, naniniwala sila sa pagiging Dios ni Kristo. Naniniwala sila na kung saan binabanggit ang Banal na Espiritu bilang isang persona sa Biblia, siya ay Dios na kumikilos.

Ipinapahayag nila na sila ay naniniwala sa Ebanghelyo ng kaligtasan sa biyaya sa pamamagitan ng pananampalataya, na ipinagkaloob ng lubusan ng sakripisyo ni Kristo. Ito ay naiiba sa mga kulto na kailangang mag-imbento ng ibang ebanghelyo dahil hindi sila naniniwala sa pagiging Dios ni Kristo.

► Ano ang pagkakaiba sa pagitan ng Saksi ni Jehovah at ng United Pentecostal sa kanilang pagtanggi sa doktrina ng Trinidad?

Naniniwala sila na ang isang tao ay hindi maliligtas hanggang hindi niya nararanasan ang pagpuspos ng Banal na Espiritu. Naniniwala sila na ang ebidensiya ng pagpuspos ng Espiritu ay laging ang kaloob ng pagsasalita sa ibang wika. Kung nagsisi sa kasalanan ang isang tao at inilagak ang kanyang pananampalataya kay Kristo, hindi pa rin siya ligtas hanggang sa mapuspos siya ng Espiritu at magsalita sa ibang wika.

Naniniwala sila na ang mga Kristiyano ay dapat mabautismuhan sa pangalan ni Hesus, at hindi sa pagpapahayag ng Tatlong Persona. Naniniwala sila na ang bautismo sa pangalan ni Hesus ay kinakailangan para sa kaligtasan. Kung ang isang tao ay sasama sa kanila matapos na ito ay mabautismuhan sa pahayag ng Trinidad, dapat muling mabautismuhan ang taong iyon.

► Ayon sa United Pentecostal, anong mga bagay ang dapat mangyari upang ang isang tao ay maligtas?

Mga Paniniwala Tungkol sa Pamumuhay Kristiyano

Naniniwala ang mga United Pentecostal na ang pisikal na kagalingan ay ipinagkaloob sa pagbabayad ng kasalanan, at binibigyang-diin ang pananalangin para sa maysakit, ngunit nauunawaan nila na hindi laging kalooban ng Dios ang paggaling ng bawat kaso.

Naniniwala sila sa konserbatibong pamumuhay. Hindi sila naniniwala sa mga alahas o gamit pampaganda. Lumalaban sila sa hindi dalisay na paglilibangan, at ayaw nila na magkaroon ng telebisyon ang kanilang mga miyembro. Ang kababaihan ay hindi nagsusuot ng pantalon at hindi rin naggugupit ng kanilang buhok.

Naniniwala sila na ang isang Kristiyano ay inaasahang mamumuhay ng matagumpay laban sa kasalanan, at hindi sila naniniwala na ang isang tao ay nagpapatuloy bilang isang Kristiyano kung siya ay bumabalik sa makasalanang buhay. Binibigyang-diin nila ang kapangyarihan ng Banal na Espiritu upang makapamuhay nang matagumpay.

Hindi sila naniniwala sa pagtatanggol sa sarili laban sa karahasan o paglilingkod sa militar sa anumang tungkulin kung saan sila ay kakailanganing lumaban.

Nagsasagawa sila ng seremonyang paghuhugas ng paa dahil iniutos ni Hesus sa mga disipulo na hugasan nila ang paa ng isa’t-isa (Juan 13:14-15).

Hindi natin dapat sabihin na ang isang tao ay hindi ligtas dahil lamang naniniwala siya sa mga doktrina ng United Pentecostalism. Maaaring naniniwala siya sa Ebanghelyo at pinagsisihan na niya ang kanyang mga kasalanan at inilagak ang kanyang pananampalataya kay Kristo.

Ang Handbook ng Doktrina ay nagbibigay ng Biblikal na ebidensya para sa Trinidad sa seksiyon ng

(8) Ang Dios ay Trinidad.

Ang pinakapundasyong pagkakamali ng United Pentecostalism ay ang kanilang pagtanggi sa Trinidad, bagaman hindi nito pinawawalang halaga ang ebanghelyo sa parehong paraan ng mga kulto na itinatanggi ang pagiging Dios ni Kristo.

Ang suliranin sa pakikisama sa United Pentecostal ay ang hindi nila paniniwala na ang ibang tao ay mga Kristiyano kung hindi nagsasalita sa ibang wika at nabautismuhan sa pangalan ni Hesus.

Sinasabi ng Biblia na ang bawat mananampalataya ay nagtataglay ng Espiritu (Roma 8:9). Ang isang tao ay hindi tunay na magsisisi at ilalagak ang kanyang pananampalataya kay Kristo nang wala ang tulong ng Espiritu. Kahit hindi pa nararanasan ng isang tao ang espesyal na kapuspusan ng Banal na Espiritu, taglay niya ang Espiritu.

Umalis si Steve sa Iglesya ng Katoliko at umanib sa Iglesyang United Pentecostal. Nagpatuloy siya sa pag-inom ng alak at paninigarilyo at hindi ipinamumuhay ang buhay Kristiyano. Sa isang pagkakataon nagkaroon siya ng karanasan kung kailan naniniwala siya na tinanggap niya ang Banal na Espiritu, at sinabi sa kanya ng ibang tao na siya ay nagsalita sa ibang wika. Alam niya na hindi pa siya tunay na nagsasalita sa ibang wika, subali’t nais niyang matanggap nila siya kaya’t nagkunwari siya na iyon ay totoo. Nagpatuloy siya sa makasalanang pamumuhay nang walang tunay na pagbabago. Sa paglipas ng panahon, siya ay naligtas at nakaranas ng pagbabago sa buhay ngunit hindi siya nagsalita sa ibang wika. Naging tagapagturo siya at tagapangaral sa kanilang iglesya, ngunit mayroong pagdududa tungkol sa doktrina. Sa katagalan umalis siya sa iglesya at pumunta sa isang samahang naniniwala sa Trinidad at hindi nagsasalita sa ibang wika.

Ngayon basahing muli ang Juan 14. Ang bawat mag-aaral ay dapat sumulat ng isang parapo na nagpapaliwanag sa mensaheng taglay ng talata na ito para sa isang tagasunod ng United Pentecostalism. Hayaang ibahagi ng ilan sa mag-aaral ang kanilang isinulat.

Tandaang humanap ng pagkakataon na maipahayag ang ebanghelyo sa isang nagmula sa grupong pangrelihiyon na ito. Humanda na ibahagi sa iyong mga kamag-aral ang tungkol sa iyong pakikipag-usap. Isulat ang iyong 2-pahinang ulat at isumite iyon sa tagapanguna sa inyong klase.