Kumatok sila sa pinto nina Sam at binigyan nila siya ng kopya ng magasin na Awake. Ang mga panauhin ay isang babae at dalawa sa kanyang mga anak. Maayos ang kanilang mga kasuotan at palakaibigan. Ang artikulong pambungad ng magasin ay tungkol sa kung paano tutulungan ang mga bata na maging mas mabuti sa paaralan. Bumasa ang babae ng isang talata sa Kasulatan, nagbigay ng komento tungkol dito at pagkatapos ay tinanong si Sam kung magiging interesado siya na mabisita para sa isang pag-aaral ng Biblia. Sinabi ni Sam na pag-iisipan niya iyon.

Sama-samang basahin nang malakas ang Hebreo 1. Pasulatin ang bawat mag-aaral ng isang parapo na nagbubuod sa talata na ito mula sa Kasulatan. Ano ang sinasabi sa atin ng talata na ito tungkol kay Hesus? Hayaang sumulat ng listahan ng mga pahayag ang bawat mag-aaral. Talakayin bilang isang grupo ang inyong isinulat.

Kasaysayan

Sinimulan ni Charles Russell ang Zion’s Watch Tower Tract Society noong 1881 upang ilathala ang kanyang natatanging mga katuruan. Binago ng organisasyon ang pangalan nito sa Saksi ni Jehovah noong 1931..

Sumulat si Russell ng isang set na may anim na volume ng pag-aaral sa Biblia. Sinabi niya na magiging mas mabuti para sa mga tao na basahin ang kanyang mga aklat nang walang Biblia kaysa basahin ang Biblia nang wala ang kanyang mga aklat. Sinabi niya na kapag tumigil ang isang tao sa pagbabasa ng kanyang mga aklat at ang Biblia lamang ang babasahin, sa loob lamang ng dalawang taon ay malalagay siya sa kadiliman, nguni’t kung babasahin lamang niya ang kanyang mga libro nang wala ang Biblia, siya ay mananatili sa liwanag.[1]

Maraming beses nang binago ang mga doktrina ng mga Saksi ni Jehovah.

Ang mga tagapanguna ng Saksi ni Jehovah ay gumawa na ng maraming propesiya na hindi naman nagkatotoo. Halimbawa, ang ikalawang tagapanguna na si Rutherford ay nagpropesiya na si Abraham, si Isaac at si Jacob ay muling bubuhayin noong 1925 at titira sa isang marangyang bahay na kanyang inihanda para sa kanila. Hindi sila dumating, ngunit siya mismo ang tumira sa naturang bahay.[2]

Naniniwala ang mga Saksi ni Jehovah na ang lahat ng ibang mga iglesya ay kay Satanas, at walang kaligtasan malibang sa pamamagitan ng kanilang samahan.[3]

► Ano ang ilang mga bagay na nakikita mo na nagpapahiwatig na ang mga Saksi ni Jehovah ay hindi Kristiyano ayon sa Kasulatan?

Pangkasalukuyang Impluwensiya

Inaangkin ng mga Saksi ni Jehovah na sila ay nagtatrabaho sa 239 bansa, at naglathala sa 595 wika. Sa huling sampung taon nakapaglimbag na sila ng 20 bilyong piraso ng mga babasahin. Mayroon silang 111 libong kongregasyon at talaan ng mga miyembro na higit sa 7 milyong aktibong mga miyembro.[4]

Ang pangunahing tanggapan ng Saksi ni Jehovah ay nasa Brooklyn, New York.

Mahihirap na mga Doktrina ng Saksi ni Jehovah.

Ang mga Saksi ni Jehovah ay hindi nakikilahok sa eleksiyong pampamahalaan o humahawak ng anumang tungkulin sa opisina ng pamahalaan, dahil naniniwala sila na hiwalay sila mula sa mga kaharian ng mundong ito.[5]

Hindi sila naglilingkod sa militar at hindi sila naniniwala kahit kailan na ang digmaan ay wasto.

Hindi sila nagdiriwang ng anumang opisyal na pista, maging ito man ay pambansang holiday, pagdiriwang ng Kristiyano o kaarawan, dahil naniniwala sila na ang lahat ng pagdiriwang ay sumusunod sa mga kaugaliang pagano.

Hindi sila tumatanggap ng pagsasalin ng dugo, maging upang sagipin ang buhay, dahil sa Kasulatan na nagbabawal sa pagkain ng dugo.

Hindi sila nagkakaloob ng ikapu, at ang kanilang pastor ay hindi tumatanggap ng sweldo.

Ang sinumang miyembro na hindi nagbibigay ng ulat ng pagpapatotoo ay inaalis mula sa listahan ng mga aktibong miyembro at hindi na itinuturing na ligtas.[6]

[7][8]Hindi naniniwala ang mga Saksi ni Jehovah na madaling maliligtas ang isang tao. Dapat siyang sumali sa organisasyon at magsimulang pag-aralan ang kanilang mga doktrina. Ang kaligtasan ay isang proseso, at ang sandali na malalaman ng isang tao na siya ay ligtas na ay hindi matitiyak.

Hindi tinatanggap ng mga Saksi ni Jehovah ang krus bilang isang simbolo ng Kristiyanismo, at naniniwala na si Hesus ay namatay sa isang tulos.

► Bakit dapat tawaging “mahihirap na doktrina” ang mga doktrinang ito?

Ang pinakaseryosong pagkakamali sa doktrina ng mga Saksi ni Jehovah ay ang pagtanggi sa pagiging Dios ni Kristo at ng Banal na Espiritu.

Sinasabi ng mga Saksi ni Jehovah na sila ay tunay na Kristiyano. Inaangkin nila na ang lahat ng ibang iglesya ay mali. Ngunit kung nauunawaan at pinaniniwalaan ng isang tao ang lahat ng mga doktrina ng Saksi ni Jehovah, hindi siya sumasampalataya sa ebanghelyo na ayon sa Banal na Kasulatan at hindi isang Kristiyano.

Mga Taktika ng mga Saksi ni Jehovah

Ang isang tao na interesadong sumanib sa mga Saksi ni Jehovah ay dumaraan sa isang pag-aaral ng Biblia sa loob ng ilang buwan. Kailangan niyang gumawa ng mga pagbabago sa kanyang buhay upang sundan kung ano ang kanyang napag-aaralan. Pagkatapos siya ay babautismuhan at nagiging “isang tagapaglathala,” at inaasahang magpapalaganap ng mga babasahin mula sa organisasyon.

Ang mga Saksi ni Jehovah ay hindi naniniwala na ang isang tao ay nagiging Kristiyano agad matapos na ilagak niya ang kanyang pananampalataya kay Kristo. Naniniwala sila na dapat muna niyang matutuhan ang kanilang mga doktrina at magsimulang isagawa ang mga hinihingi nito.[9]

Ang bawat miyembro ay kinakailangang magsumite ng buwanang ulat ng gawaing pagpapatotoo. Ang isang miyembrong hindi nagsusumite ng ulat ay inaalis sa listahan ng mga aktibong miyembro at hindi itinuturing na ligtas.

► Ayon sa mga Saksi ni Jehovah, paano naliligtas ang isang tao?

Sa pangkaraniwan, ang mga Saksi ay umuubos ng 8,000 oras ng pagpapatotoo upang makahikayat ng isang bagong miyembro.

Ang bawat miyembro ay bumibili ng mga nakaimprentang babasahin mula sa organisasyon upang ipamahagi.

Hindi nila tinutukoy ang kanilang kongregasyon bilang mga iglesya. Naniniwala sila na lahat ng mga iglesya ay kay Satanas. Tinatawag nila ang kanilang mga gusali na “Kingdom Halls.”[10]

Sinasabi nila na ang doktrina ng Trinidad ay dapat tanggihan dahil ito ay hindi lohikal at imposibleng maunawaan, na tila ba dapat walang anumang bagay sa likas ng Dios na hindi natin maaabot ng pang-unawa.

Sinisikap nilang patunayan ang kanilang mga doktrina sa pamamagitan ng Kasulatan sa mga taong nagtitiwala sa Biblia nang walang gaanong nalalaman tungkol dito. Inilathala nila ang kanilang sariling bersiyon ng Biblia, na tinatawag na The New World Translation, na may mga pagbabago na sumusuporta sa kanilang doktrina. Binago nila ang maraming talata na nagpapahiwatig sa pagiging Dios ni Kristo. Ang bersiyong ito ay hindi ginawa ng mga tunay na iskolar sa lengguwahe ng Biblia.

Naniniwala ang mga Saksi ni Jehovah na ang Banal na Espiritu ay isang hindi personang lakas na nagmumula sa Dios at maihahambing sa lakas ng koryente.

Inaangkin nila na naniniwala sila sa muling pagkabuhay ni Hesus, ngunit naniniwala sila na ang kanyang espiritu lamang ang muling nabuhay, hindi ang kanyang katawan.

Sinasabi nila na si Hesus ang Anak ng Dios at Tagapagligtas ng mundo, at ginawa niyang posible ang kaligtasan. Naniniwala sila na siya ay iisang perpektong tao, ngunit hindi sila naniniwala na Siya ay Dios. Naniniwala sila na siya ang unang bagay na nilikha ng Dios.

► Sa Colosas 1:16-17, idinagdag ng New World Translation ang salitang “iba,” upang ang talata ay nagsasabi na nilikha ni Hesus ang lahat ng iba pang mga bagay, nauna siya sa lahat ng ibang bagay, at para sa kanya ang lahat ng ibang bagay ay umiiral. Sa palagay mo, bakit idinagdag ng mga Saksi ni Jehovah ang salitang iyon?

Ngayon bumalik at basahin nang sama-sama ang mga footnotes para sa buong seksiyon tungkol sa Saksi ni Jehovah. Dapat hanapin ng lahat ng mag-aaral ang mga ginamit na reperensiya na mga talatang Biblikal at magsalit-salit sa pagbasa sa grupo.

Ang lahat ng doktrina na nakalista sa ibaba ay itinatanggi ng mga Saksi ni Jehovah. Tingnan ang Handbook ng Doktrina upang makita ang kahalagahan ng bawat doktrina at ang ebidensiya para dito. Tiyakin na nauunawaan mo kung paanong ang mga talatang reperensiya ay nagpapatunay sa doktrina.

(5) Si Hesus ay Dios.

(6) Ang katawan ni Hesus ay muling nabuhay mula sa mga patay.

(7) Ang Banal na Espiritu ay Dios.

(8) Ang Dios ay Trinidad.

(9) Ang kaligtasan ay sa pamamagitan lamang ng pagbabayad-sala ni Kristo.

(11) Tinatanggap natin ang kaligtasan sa pamamagitan ng pananampalataya.

(12) Maaari tayong magkaroon ng personal na katiyakan ng kaligtasan.

(13) Ang hindi ligtas ay magdurusa ng walang hanggang kaparusahan.

Huwag ninyong tratuhin ng magaspang na pag-uugali ang mga Saksi ni Jehovah. Dahil naniniwala sila na sila ay pinag-uusig dahil sa katotohanan, inaasahan nila na ang mga ebanghelikong Kristiyano ay tatratuhin sila nang masama. Sa halip, ipakita sa kanila ang pag-ibig ni Kristo at ang tunay na malasakit sa kanila.

Huwag makikipagtalo tungkol sa maliliit na usapin, katulad ng pagdiriwang ng mga opisyal na pista o paglilingkod sa militar. Higit na mas mahalaga na mag-usap tungkol sa mga pangunahing punto ng ebanghelyo at katiyakan ng kaligtasan.

Ang prayoridad ay ang pagbabahagi ng ebanghelyo. Walang katiyakan ng kaligtasan ang mga Saksi ni Jehovah at walang personal na relasyon sa Dios.

Si Robert ay pinalaki bilang isang Saksi ni Jehovah, at marami sa kanyang mga kamag-anak ay nananatili pa rin sa mga kulto. Bilang isang may hustong gulang na, unti-unti siyang lumayo sa organisasyon, ngunit patuloy na naniniwala na sila ay tama. Naging Kristiyano ang kanyang asawang babae, at nagpasya siyang patunayan sa kanyang asawa na tama ang mga Saksi ni Jehovah. Sa kanyang pag-aaral natuklasan niya na nakagawa na ang mga ito ng maraming maling propesiya. Nagsimula siyang magbasa ng Biblia at napagtanto niya na si Hesus ay Dios, at hindi isang anghel na katulad ng itinuro sa kanya. Binasa niya ang talata kung saan sinabi ni Hesus, “Ako ang daan,ang katotohanan, at ang buhay,” at napagtanto niya na ang kinakailangan niya ay hindi lamang basta paniniwalang pangrelihiyon, kundi isang relasyon kay Hesus.

Ngayon basahin uli ang Hebreo 1. Ang bawat mag-aaral ay dapat sumulat ng isang parapo na nagpapaliwanag sa mensahe ng talata na ito para sa isang Saksi ni Jehovah. Hayaang ibahagi ng ilang mag-aaral ang kanilang isinulat.

Tandaang humanap ng pagkakataon upang ipahayag ang ebanghelyo sa isang miyembro ng grupong pangrelihiyong ito. Maghanda upang ibahagi sa iyong mga kamag-aral ang tungkol sa iyong pakikipag-usap. Isulat ang iyong 2-pahinang pag-uulat at ibigay iyon sa iyong tagapanguna sa klase.