[1]Si Theo ay isang Katolikong Romano at minsan nang naging isang pari, nguni’t umalis sa pagkapari. Isang araw nagsimula siya ng isang bagong trabaho. Habang ipinapakita sa kanya ng isang lalaki kung paano gagawin ang trabaho, nalaman ni Theo na ito ay isang miyembro ng Iglesya ni Cristo. Sinabi ni Theo, “Kay Hesus lamang ako nananampalataya; Siya ang aking Dios.” Sinabi ng lalaki sa kanya na si Hesus ay hindi Dios, at mapapatunayan iyon ng kanyang pastor gamit ang Biblia na si Hesus ay isang tagapamagitan lamang. Ipinakita nila kay Theo ang maraming talata sa Kasulatan, at siya ay nalito, ngunit nakumbinsi nila siya na si Hesus ay hindi Dios.

Sama-samang basahin ng malakas ang Pahayag 1. Pasulatin ang bawat mag-aaral ng isang parapo na nagbubuod sa talata na ito sa Kasulatan. Ano ang sinasabi sa atin ng talata tungkol kay Kristo? Pasulatin ang bawat mag-aaral ng listahan ng mga pangungusap. Bilang isang grupo, talakayin ang inyong isinulat.

Pinagmulan at Impluwensiya

Ang pangalan ng organisasyong ito ay isinalin na Church of Christ. May iba pang mga organisasyon na gumagamit ng parehong mga salita sa kanilang pangalan.

Ang Iglesia ni Cristo ay sinimulan sa Pilipinas noong 1914 ni Felix Manalo,[1] isang dating miyembro ng Seventh-Day Adventist/Sabadista. Nang siya ay mamatay, naging tagapanguna ang kanyang anak na lalaki, pagkatapos ay ang isang apong lalaki.

Ang Iglesia ay mayroong mahigit sa 5,000 kongregasyon sa 112 mga bansa.[2] Karamihan sa mga ito ay nasa Pilipinas. Sila ang pinakamalaking organisasyon na nagsasabing Kristiyano sa Pilipinas maliban sa Simbahan ng Katolikong Romano. Ang kanilang pagsang-ayon ay hinahanap ng mga tagapangunang pampulitika. Nagmamay-ari sila ng mga istasyon ng radyo. Nagtatrabaho sila para sa pagpapaunlad ng komunidad. Itinayo nila ang pinakamalaking indoor domed auditorium sa buong mundo.

Ang kulto ay tunay na nakikisangkot sa pulitika at sinasabi sa kanilang mga miyembro kung sino ang iboboto sa eleksiyon. Sinuportahan nila ang rehimeng Marcos sa Pilipinas.

Ang Iglesia ay isang mayamang organisasyon. Binibigyang-diin nila ang mga madetalyeng gusaling sambahan.[3] Bagaman marami sa kanilang mga miyembro ang mahihirap, marami sa kanilang mga tagapanguna ay mga propesyonal katulad ng mga doktor at abogado.

[4]  

Naglathala sila ng dalawang babasahin, ang Pasugo at ang God’s Message. Ang mga magasin ay paulit-ulit na umaatake sa mga Katolikong Romano at mga iglesyang ebangheliko.

Marami sa kanilang mga naging miyembro ay mga dating Katolikong Romano na naniniwala na ang Biblia ay totoo ngunit hindi nagtataglay ng mabuting kaalaman sa Biblia. Pinapakitaan sila ng mga miyembro ng Iglesia ng mga talata sa Biblia na nagiging daan upang bitiwan nila ang mga doktrinang itinuro sa kanila.

Ang Iglesia ay may mga kongregasyon sa mga pangunahing lunsod sa buong mundo. Karamihan sa kanilang mga miyembro sa labas ng Pilipinas ay mga Filipino na nangibang bansa at nanirahan na sa mga bansang iyon.

► Bakit ang karamihan sa mga naging miyembro ng Iglesia ay nagmula sa Simbahan ng Katolikong Romano?

Doktrina ng Iglesya at ang Pagbabayad-Sala

Ang pinakamahalagang paniniwala ng Iglesia ay sila daw ang tunay na iglesya, na pinapanumbalik ni Felix Manalo. Ang doktrinang ito ay sobrang binigyang-diin kaya’t ang kanilang ebanghelyo ay tila binubuo ng doktrina ng kanilang iglesya at ng pinagmulan nito.

Naniniwala ang mga Iglesia na si Felix Manalo ang huling espesyal na mensahero ng Dios. Naniniwala sila na si Manalo ay binanggit nang tiyakan sa ilang pagkakataon sa propesiyang Biblikal, tulad ng Isaias 41:9-10, 43:5-7; 46:11, at Pahayag 7:2-3.

Ang Isaias 41:9-10 ay tungkol sa espesyal na piniling lingkod ng Dios. Naniniwala ang mga Kristiyano na ito ay tumutukoy kay Hesus, ang Mesiyas ngunit ang mga Iglesia ay nagsasabi na ito ay tumutukoy kay Felix Manalo. Sinasabi nila na ang mga salitang “dulo ng daigdig” ay nangangahulugan ng mga huling araw ng mundo. Naniniwala sila na tinupad ni Manalo ang propesiyang iyon dahil inirehistro niya ang kanyang sambahan sa parehong araw na ang Unang Pandaigdigang Digmaan (WW1) ay nagsimula, na tinatawag nilang ang simula ng mga huling araw ng mundo. Ang totoo, ang salitang dulo ng daigdig sa Biblia ay nangangahulugan ng isang lugar na malayo ang distansiya ayon sa geography.

Sa Isaias 46:11, sinabi ng Dios na tatawag siya ng isang ibong mandaragit mula sa malayong bayan sa Silangan na siyang tutupad sa kanyang layunin. Ang mga Kristiyanong iskolar ay karaniwang nauunawaan ang talata na ito na tumutukoy sa paggamit ng Dios ng banyagang kapangyarihan upang parusahan ang Israel, na sumasang-ayon/consistent sa simbolo ng isang ibong mandaragit. Naniniwala ang mga Iglesia na ang ministeryo ni Felix Manalo ay inihula ng talatang iyon.

Naniniwala ang mga miyembro ng Iglesia ni Cristo na ang iglesyang Kristiyano ay tumalikod sa Dios pagkatapos na mamatay ang mga apostol. Naniniwala sila na ang lahat ng mga iglesya ay tumalikod sa Dios maliban sa kanilang iglesya, at pinapanumbalik ni Manalo ang katotohanan na nawala matapos na mamatay ang mga apostol.

► Paano mo tutugunin ang inaangkin ng Iglesia na tinupad ni Manalo ang ilang tiyak na propesiya sa Biblia? Tingnan ang mga talata na kanilang ginagamit at isaalang-alang ang konteksto ng mga ito.

Ang Iglesia ay may natatanging doktrina ng pagbabayad-sala. Ito ay nakabatay sa kautusan sa Lumang Tipan na ang isang tao ay hindi dapat parusahan dahil sa krimen ng iba. Sinasabi nila na hindi maaaring mamatay si Hesus para sa kasalanan ng iba dahil lalabagin nito ang batas ng Dios. Ngunit, dahil sinasabi ng Biblia na ang iglesya ang katawan ni Kristo, kung ang isang tao ay aanib sa iglesya hindi na siya ibang tao, kundi bahagi ni Kristo. Samakatuwid, si Hesus ay hindi namatay para sa kanino pa man nang siya ay mamatay para doon sa mga nasa iglesya. Ang doktrinang ito ng pagbabayad-sala ay ginagawang lubusang kinakailangan ang kanilang iglesya para sa kaligtasan, dahil sila lamang ang tanging tunay na iglesya. Hindi sila naniniwala na ang isang tao ay naliligtas sa pamamagitan ng paglalagay ng kanyang tiwala kay Kristo matapos marinig ang ebanghelyong ipinangaral o nabasa sa Biblia. Ayon sa kanilang doktrina, ang isang tao ay hindi maliligtas kung hindi magiging miyembro ng kanilang iglesya.

►Ipaliwanag kung paano inaangkin ng Iglesia ni Cristo na namatay si Hesus para lamang sa mga miyembro ng kanilang iglesya.

Marami sa kanilang mga himno ay tungkol sa iglesya. Narito ang halimbawa ng isang himno na may pamagat na “Ang Tunay na Iglesya ni Cristo”:

Ang maluwalhati at makadios na katotohanan
Tanging sa iglesia ni Cristo
Yakapin sa ating mga puso ang ebanghelyo
Mga Salita ng Dios na napakamakapangyarihan

Tayo ang mga miyembro ng tunay na iglesya
O ang iglesia ng Dios na inihula
Maging matatag, matibay na nananahan
Sa katuruang aming tinanggap.

Mga kapatid na minamahal huwag iwan
Ang tunay na iglesyang minahal ng Panginoon
Ialis na ang lahat ng pagdududa sa ating isipan
At maging matapat magpakailanman.

Iba pang mga Paniniwala at mga Gawain

Ang Iglesia ay napakasigasig sa panghihikayat sa mga tao sa kanilang relihiyon. Hinihimok nila ang kanilang mga miyembro na magtrabaho sa pagpapalaganap ng mensahe ng iglesya.

Ang mga lalaki at babae ay magkabukod na nakaupo sa magkabilang panig ng santuwaryo sa panahon ng pagsamba. Isinususi ang pinto sa pagsisimula ng gawain.

Ang mga paksang binibigyang-diin sa kanilang mga himno ay ang iglesya, pagtitiis sa mga kahirapan sa buhay, at pananalangin para sa kapatawaran. Ipinapanalangin nila na tulungan sila ng Dios na sundin ang mga kautusan at maging karapat-dapat sa pagtanggap ng kapatawaran.

[5]Inaangkin ng Iglesia na ang Biblia ang pinagkukuhanan ng kanilang mga paniniwala. Ang kanilang karaniwang istilo ng pagtuturo ay ang paggamit ng maraming talata sa kabuuan ng Biblia na tila hindi magkakaugnay. Gumagamit sila ng iba’t-ibang bersiyon ng Biblia at maaaring bumanggit mula sa anim na iba’t-ibang bersiyon sa isang sermon. Sinisikap nilang sagutin ang alinmang tanong gamit ang Kasulatan. Marami sa kanilang mga miyembro ang nag-aangkin na sila ay nahikayat na sumapi dahil sa paggamit ng kulto ng Kasulatan.

Ang Iglesia ay hindi naniniwala sa Trinidad o sa pagiging Dios ni Kristo o ng Banal na Espiritu.

Patuloy na inaatake ng Iglesia ang doktrina ng pagiging Dios ni Kristo sa kanilang mga inilalathala. Sinasabi nila na kung ang isang tao ay nag-iisip na si Kristo ay Dios, hindi niya tunay na kilala si Kristo at sagayun ay hindi siya ligtas.

Naniniwala sila na sa kamatayan ang kaluluwa ay namamatay at hindi na magpapatuloy sa pag-iral malibang muling buhayin at likhain ng Dios ang taong iyon. Hindi sila naniniwala sa impiyerno.

Hindi naniniwala ang Iglesia na tanging ang pananampalataya ang kundisyon para sa kaligtasan. Kinakailangang mabaustimuhan ang isang tao sa kanilang sambahan at sundin ang kanilang mga kagustuhan. Gayunman, hindi nila sinisiguro na ang isang tao ay maliligtas sa pamamagitan ng pag-anib sa iglesia. Naniniwala sila na ang kaligtasan ay isang proseso. Naniniwala sila na dapat tuparin ng isang tao ang mga hinihingi ng Dios bago maging karapat-dapat sa kapatawaran. Naniniwala sila na mawawala ang kaligtasan ng isang tao kapag hindi siya namuhay nang matuwid. Dahil sa mga doktrinang ito, marami sa kanilang mga miyembro ang natatakot na sila ay hindi ligtas.

► Bakit hindi nag-aalok ang Iglesia ni Cristo ng agarang katiyakan ng kaligtasan?

Inaangkin ng Iglesia ni Cristo na sila ang tunay na Kristiyano. Inaangkin nila na ang lahat ng ibang iglesya ay mali. Ngunit kung nauunawaan at pinaniniwalaan ng isang tao ang lahat ng kanilang mga doktrina, hindi niya pinaniniwalaan ang ebanghelyo ayon sa Kasulatan at sagayun ay hindi isang Kristiyano.

Dahil inaangkin ng Iglesia ni Cristo na naniniwala sila sa Biblia, maaaring gamitin ang Biblia upang tumugon sa kanilang mga doktrina. Gamitin ang sumusunod na seksiyon sa doktrina mula sa Handbook ng mga Doktrina upang tumugon sa kultong ito.

(5) Si Hesus ay Dios.

(7) Ang Banal na Espiritu ay Dios.

(8) Ang Dios ay Trinidad.

(9) Ang kaligtasan ay tanging sa pamamagitan lamang ng pagbabayad-sala ni Kristo.

(11) Tinatanggap natin ang kaligtasan sa pamamagitan ng pananampalataya.

(12) Maaari tayong magkaroon ng personal na katiyakan ng kaligtasan.

(13) Ang hindi ligtas ay magdurusa ng walang hanggang kaparusahan.

Maaaring napansin mo na ang mga doktrina ng Iglesia ni Cristo ay may malaking pagkakatulad sa mga doktrina ng Saksi ni Jehovah. Ang kanilang mga miyembro ay nabubuhay sa takot na sila ay maaaring hindi pa ligtas.

Mahalaga na bigyang-diin ang pangunahing katotohanan ng ebanghelyo. Tandaan na ikaw ay nakikipag-usap sa mga tao na umaasa sa doktrina na sila ay maliligtas sa pamamagitan ng pag-anib sa tamang iglesya. Bigyang diin ang Kasulatan na nagtuturo ng personal na katiyakan ng kaligtasan. Ipakita sa kanila na malibang ilagak nila ang kanilang pagtitiwala kay Cristo para sa kaligtasan, hindi nila kailanman matitiyak na sila ay ligtas.

Si Miguel ay isang ministro sa Iglesia ni Cristo. Habang nakikilala niya ang maraming ibang mga ministro sa iglesya, siya ay nadismaya na matuklasan na ang mga ito ay hindi namumuhay sa pamantayan ng banal na pamumuhay na kanilang ipinapangaral. Ipinapangaral nila sa kanilang mga miyembro na dapat silang mamuhay nang dalisay at matuwid. Nakita niya na mas masama ang pamumuhay ng isang tagapangaral, mas matindi ang kanyang pangangaral tungkol sa matuwid na pamumuhay. Sinabi ni Miguel na maraming ministro ang nagnanais na umalis sa kulto, ngunit hindi nalalaman kung paano iyon gagawin. Natatakot sila sa pag-uusig. Nagpasya si Miguel na umalis sa iglesya at panghawakan ang ebanghelikong doktrina.

Ngayon muling basahin ang Pahayag 1. Ang bawat mag-aaral ay dapat sumulat ng isang parapo na nagpapaliwanag sa mensahe ng talata na ito para sa isang tagasunod ng Iglesia ni Cristo. Hayaan ang ilan sa mga mag-aaral na ibahagi ang kanilang isinulat.

Tandaan na humanap ng pagkakataon na maipahayag ang ebanghelyo sa isang nagmula sa grupong pangrelihiyong ito. Paghandaan na ibahagi sa iyong mga kamag-aral ang tungkol sa pakikipag-usap mo. Isulat ang iyong 2 pahinang ulat at ipasa iyon sa tagapanguna sa inyong klase.