Lesson 16: Voodoo

Bumisita si Chelsea sa isang voodoo shop upang magtanong. Sinabi ng lalaki na ang voodoo ay hindi sumasalungat sa Katolisismo at ang isang tao ay maaaring maging isang Katoliko at magsagawa ng voodoo. Sinabi niya na tumutulong ang mga espiritu sa mga tao, ngunit dapat bayaran ang mga espiritu sa pamamagitan ng pagpapahintulot sa kanila na lukuban sila nito.

Sama-samang basahin nang malakas ang Awit 145. Pasulatin ang bawat mag-aaral ng isang parapo na nagbubuod sa talata na ito ng kasulatan. Ano ang sinasabi ng talata na ito tungkol sa kapangyarihan at kabutihan ng Dios? Pasulatin ang bawat mag-aaral ng listahan ng mga pahayag. Bilang isang grupo, talakayin ang inyong isinulat.

[1]Introduksiyon sa Voodoo

Nagsimula ang Voodoo sa tribong pangrelihiyon sa Africa, ngunit naihalo na sa mga katangian mula sa ibang pagkukunan. Maraming modernong practitioners o manggagamot ang mas gusto ang salitang Vodun.

Ayon sa Voodoo, mayroong Dios, ngunit hindi siya maabot ng tao upang hingan ng tulong. Sa halip, ang mga tao ay maaaring makipag-ugnayan sa mga espiritu na nakikisangkot sa mundo.[2]

► Anong ibang relihiyon ang ganito rin ang sinasabi?

Maraming sumasamba sa voodoo ang kumikilala na sila ay naglilingkod kay Satanas.

[3]Ang gawaing voodoo ay hindi laging napapansin ng mga tagalabas dahil madalas itong gumagamit ng mga Katoliko Romanong ritwal, imahen, at mga pangalan ng mga santo. Gumagamit sila ng mga krus at iba pang simbolong Kristiyano. Ang stadistika para sa voodoo ay mahirap matagpuan dahil maraming nakikilahok sa Voodoo ay nakikilahok din sa ibang mga relihiyon, kabilang na ang Kristiyanismo.[4]

Kung minsan ang mga taong tinatawag ang kanilang sarili na Kristiyano gayunman ay hindi tunay na nagbalik-loob ay hindi nakikita ang salungatan sa pagitan ng Voodoo at Kristiyanismo. Ang isang taong dumadalo sa iglesya ay maaari ring pumunta sa isang voodoo witch doctor/ mediko/ albularyo/ manghuhula para siya ay tulungan sa ibang suliranin. Ang isang negosyante ay maaaring humiling ng himala upang tulungan siyang mas maraming maibenta. Ang isang magulang ay maaaring pumunta sa albularyo upang magpatulong sa isang anak na maysakit.[5] 

►Bakit imposible para sa isang sumasamba sa voodoo na maging isang tunay na Kristiyano?

Ang mga sumasamba sa Voodoo ay nakikipag-ugnayan sa mga espiritu sa paggamit ng mga altar, mga handog, mga sayaw at mga seremonya. Nagdarasal din sila sa mga ninuno.

Ang mga espiritu (loa) ay hinati-hati sa 5 bansa, at maraming bilang ng mga pamilya ng indibidwal ng may pare-parehong apelyido. May ilang tiyak na espiritu o pamilya ng espiritu ang iniuugnay sa mga tiyak na aspeto ng buhay, katulad ng agrikultura, ng militar o pag-ibig. Ito ay katulad kung paano itinakda ng Katolikong Romano ang mga santo sa iba’t-ibang aspeto ng buhay.

Ang mga pari at propetisa sa relihiyon ay nangunguna sa mga gawaing pagsamba at maaaring upahan upang magsagawa ng pangkukulam o protektahan mula sa pangkukulam. Maaaring mayroon siyang kongregasyon na kanilang pinangungunahan sa regular na pagsamba at binibigyan ng iba pang espirituwal na paglilingkod. Mayroon pang ibang mangkukulam na tinatawag na bokor na maaari o hindi man mga pari, at mas iniuugnay sa masamang pangkukulam. Halimbawa, ang isang bokor ay maaaring bayaran upang maglagay ng sumpa sa isang tao.[6]

Walang sentrong organisasyon o awtoridad. Ang bawat pari o propetisa ay may mas gustong mga gawain. Ang bawat sumasamba sa voodoo ay nasa isang pamilyang voodoo.[7]

Ang mga serbisyong voodoo ay karaniwang sa Biyernes o Sabado nang gabi. Kabilang sa isang serbisyong voodoo ang mga talatang babasahin bilang paggalang sa iba’t-ibang espiritung nakaugnay sa pamilya, maraming awitin at panalangin. Ang mga sumasamba ay gumagamit ng tambol, tambourine, at plauta. Ang isang serbisyo ay maaaring tumagal sa buong magdamag. Sa panahon ng isang serbisyong voodoo, ang mga espiritu ay lumulukob sa iba’t-ibang sumasamba, nagsasalita at kumikilos sa pamamagitan nila. Ang paglukob ng isang espiritu ay isang mahalagang layunin sa pagsambang voodoo. Pinaniniwalaan na dumarating ang espesyal na mga benepisyo sa mga pamilya ng mga nalulukuban sa ganitong paraan. Kung minsan ang mga espiritu ay nagbibigay ng payo o lunas.[8]

► Bakit hindi dapat humanap ng tulong mula sa mga espiritu ang mga Kristiyano?

Sa mga espesyal na seremonya may mga sakripisyo ng manok o baboy at pag-inom at pagwiwisik ng dugo. Maaaring kagatin ng isang propetisa ang ulo ng isang manok. Maaaring sumayaw sa paligid ng apoy o paligid ng puno ang mga sumasamba. Naglalabas sila ng pagkain para sa mga espiritu. Gumuguhit sila ng mga diagram sa sahig na inaasahang makakokontrol sa kapangyarihan ng espiritu. Gumagamit sila ng mga ahas sa mga seremonya. Kung minsan nagsusuot sila ng damit na puti. Kung minsan nagpipinta sila ng kanilang mga mukha, gumagamit ng iba’t-ibang kulay, ngunit espesyal ang puti.

Kung minsan ipinakikita ang supernatural na kapangyarihan. May mga nag-aangkin na sila ay pinagaling ng mga espiritu. Sinisikap nilang itaboy ang espiritu na nagiging dahilan ng karamdaman. Mayroong may kakayahang kumagat ng nag-aapoy na kahoy at humahawak ng baga sa kanilang mga bibig.

Kung minsan isang maliit na manika ang ginagamit upang kumatawan sa tao na susumpain. Ang mga karayom, aspile o kutsilyo ay maaaring itusok sa manika. May mga taong namatay dahil sa mga sumpa, ngunit ang tunay na Kristiyano ay nagpatotoo na hindi makasasama sa kanila ang mga sumpang voodoo.

Sa sariling tahanan ng isang sumasamba, maaaring mayroon siyang altar sa mga espiritu at ninuno. Maaaring sa altar ay mayroong larawan at estatwa ng mga espiritu, at mga bagay na kinalulugdan nila katulad ng mga bulaklak, kandila, pabango o pagkain. Isang simpleng alay ay isang puting kandila at isang basong tubig na inumin.

May mga nagsusuot ng mga bagay na inaasahang mag-iingat sa kanila mula sa masasamang espiritu. Inilalagay rin nila ang mga iyon sa kanilang mga anak at sanggol.

Naniniwala sila na pagkatapos mamatay ang isang kaluluwa ay naninirahan sa ilang aspeto ng kalikasan katulad ng isang puno.

May mga sumasamba sa voodoo na nalulukuban at pinaghaharian ng demonyo sa lahat ng sandali. Ang ilan ay nasisiraan ng ulo, nagiging marahas, at nakasasama sa kanilang sarili.[9]

Ngayon bumalik at basahin nang sama-sama ang footnotes para sa buong seksiyon tungkol sa Voodoo. Dapat hanapin ng lahat ng mag-aaral ang reperensiyang talata sa Kasulatan at magsalit-salit sa pagbasa sa mga iyon sa grupo.

Walang relasyon sa Dios o katiyakan ng kaligtasan ang mga tagasunod ng Voodoo. Nangangahulugan ito na mayroon silang espirituwal na pangangailangan na maaaring matugunan ng Ebanghelyo. Maaaring ibahagi ng isang Kristiyano ang Ebanghelyo at ang kanyang sariling patotoo ng pagbabalik-loob at kung ano ang kahulugan sa kanya ng pamumuhay na may relasyon sa Dios.

Nabubuhay sa takot ang mga sumasamba sa Voodoo. Hindi sila naglilingkod sa isang Dios na nagmamahal sa kanila. Inaasahan nila kapwa ang mabuti at masamang pagkilos mula sa mga espiritu. Kailangan nilang bayaran ang tagapanguna o nagsasagawa ng voodoo para sa bawat relihiyosong gawain para sa kanila. Sa ilang mga bansa ang mga tao ay naaalipin ng mga tagapangunang voodoo.

Ang isang taong pumipili na sambahin ang mga espiritu ay gumagawa nito dahil iniisip niya na kailangan niya ang kanilang tulong at proteksiyon. Pareho ang resulta nito sa paghabol sa alinmang kasalanan; ang mabuti na sinisikap na makuha ng isang tao ay lumilipas, at sinisira ng kasalanan ang lahat ng mabuti sa kanyang buhay, kabilang ang mga relasyon sa pamilya.

Ang isang taong tumatanggi sa Ebanghelyo ay nagnanais na magpatuloy sa kasalanan at magkontrol sa kanyang buhay sa halip na ibigay ang kontrol nito sa Dios. Gayunman, ang isang taong may relasyon sa masamang espiritu ay nawawalan ng kontrol sa kanyang sarili at naaalipin.

Ang Ebanghelyo ay isang mensahe ng kaligtasan mula sa masasamang kapangyarihan. Ito ay isang alok ng kapatawaran. Ito ay isang alok ng relasyon sa Dios na nagmamahal at kumakalinga sa atin.

Si Jacques ay isang vodoo witch doctor sa Haiti. Nakapatay na siya ng maraming tao dahil sa kanyang mga sumpa. Namuhay na siya kasama ng maraming babae. Isang araw sinabi sa kanya ng isang misyonero na darating ang araw na wawasakin siya ng mga espiritung kanyang pinaglilingkuran. Pagkalipas noon ay inanyayahan ni Jacques ang misyonero upang siya’y ipanalangin. Nagsisi si Jacques at winasak ang lahat ng kanyang kagamitan sa voodoo.

Ngayon muling basahin ang Awit 145. Ang bawat mag-aaral ay dapat sumulat ng isang parapo na nagpapaliwanag ng mensahe ng talata na ito para sa isang tagasunod ng Voodoo. Hayaan ang ilang mag-aaral na ibahagi ang kanilang isinulat.

Tandaan na humanap ng pagkakataon upang ipahayag ang ebanghelyo sa isang nagmula sa grupong pangrelihiyon na ito. Maghanda na ibahagi sa iyong mga kamag-aral ang iyong pakikipag-usap. Isulat ang iyong 2-pahinang ulat at ibigay iyon sa tagapanguna sa inyong klase.