(1) ਵਿਦਿਆਰਥੀ ਹੇਠਾਂ ਦੱਸੀਆਂ ਗੱਲਾਂ ਦੀ ਵਿਆਖਿਆ ਕਰ ਪਾਉਣਗੇ:

• ਸਵਰਗਦੂਤਾਂ ਦੇ ਸੁਭਾਅ ਬਾਰੇ ਕੁਝ ਵੇਰਵੇ।

• ਇੱਕ ਵਿਸ਼ਵਾਸੀ ਦੇ ਜੀਵਨ ਵਿੱਚ ਸਵਰਗਦੂਤਾਂ ਦੀ ਸ਼ਮੂਲੀਅਤ।

• ਸ਼ੈਤਾਨ ਅਤੇ ਹੋਰ ਦੁਸ਼ਟ ਆਤਮਾਵਾਂ ਦਾ ਆਤਮਿਕ ਡਿੱਗਣ।

• ਆਤਮਿਕ ਸੰਸਾਰ ਦੇ ਵਿੱਚ ਚੱਲਣ ਵਾਲੀ ਆਤਮਿਕ ਲੜਾਈ।

• ਬੁਰੀ ਸ਼ਕਤੀਆਂ ਦੇ ਉੱਤੇ ਪਰਮੇਸ਼ੁਰ ਅਤੇ ਵਿਸ਼ਵਾਸੀਆਂ ਦੀ ਅੰਤਿਮ ਜਿੱਤ।

• ਆਤਮਾਵਾਂ ਦੇ ਬਾਰੇ ਮਸੀਹੀ ਵਿਸ਼ਵਾਸਾਂ ਦਾ ਇੱਕ ਬਿਆਨ।

(2) ਵਿਦਿਆਰਥੀ ਆਤਮਾਵਾਂ ਦੇ ਸੰਸਾਰ ਵਿੱਚ ਗ਼ਲਤ ਤਰੀਕੇ ਦੀ ਦਿਲਚਸਪੀ ਤੋਂ ਦੂਰ ਰਹਿਣਗੇ।

► ਮੱਤੀ 4:1-11 ਨੂੰ ਮਿਲ ਕੇ ਪੜ੍ਹੋ। ਇਹ ਸਾਨੂੰ ਦੁਸ਼ਟ ਆਤਮਾਵਾਂ ਦੇ ਬਾਰੇ ਕੀ ਦੱਸਦਾ ਹੈ?

ਜਦੋਂ ਲੋਕ ਸਵਰਗਦੂਤਾਂ ਦੇ ਬਾਰੇ ਗੱਲ ਕਰਦੇ ਹਾ, ਤਾਂ ਅਕਸਰ ਪਹਿਲਾਂ ਪ੍ਰਸ਼ਨ ਇਹ ਹੁੰਦਾ ਹੈ, “ਸਵਰਗਦੂਤ ਕਿਸ ਪ੍ਰਕਾਰ ਦੇ ਵਿੱਖਦੇ ਹਨ?” ਬਹੁਤ ਸਾਰੇ ਕਲਾਕਾਰਾਂ ਨੇ ਉਨ੍ਹਾਂ ਦਾ ਵਰਣਨ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ।

► ਸਵਰਗਦੂਤ ਕਿਸ ਪ੍ਰਕਾਰ ਦੇ ਵਿੱਖਦੇ ਹਨ?

ਕੀ ਸਵਰਗਦੂਤਾਂ ਦੇ ਖੰਭ ਹੁੰਦੇ ਹਨ? ਜਿੰਨ੍ਹਾਂ ਸਰਾਫ਼ੀਮਾਂ ਨੂੰ ਯਸਾਯਾਹ ਨੇ ਵੇਖਿਆ ਉਨ੍ਹਾਂ ਦੇ ਛੇ ਖੰਭ ਸਨ (ਯਸਾਯਾਹ 6:2)। ਜਿੰਨਾਂ ਕਰੂਬੀਆਂ ਦੀ ਮੂਰਤ ਪਰਮੇਸ਼ੁਰ ਨੇ ਮੂਸਾ ਨੂੰ ਨੇਮ ਦੇ ਸੰਦੂਕ ਤੇ ਰੱਖਣ ਲਈ ਕਿਹਾ ਉਨ੍ਹਾਂ ਦੇ ਖੰਭ ਸਨ (ਕੂਚ 25:20)। ਜਿੰਨ੍ਹਾਂ ਕਰੂਬੀਆਂ ਨੂੰ ਹਿਜ਼ਕੀਏਲ ਨੇ ਵੇਖਿਆ ਉਨ੍ਹਾਂ ਦੇ ਚਾਰ ਖੰਭ ਸਨ (ਹਿਜ਼ਕੀਏਲ 1:6, ਹਿਜ਼ਕੀਏਲ 10:15)।

ਅਸੀਂ ਨਹੀਂ ਜਾਣਦੇ ਕਿ ਆਮ ਤੌਰ ਤੇ ਸਵਰਗਦੂਤਾਂ ਦੇ ਖੰਭ ਹੁੰਦੇ ਹਨ ਜਾਂ ਨਹੀਂ। ਉਨ੍ਹਾਂ ਨੂੰ ਆਮ ਤੌਰ ਤੇ ਯਾਤਰਾ ਕਰਨ ਦੇ ਲਈ ਖੰਭਾਂ ਦੀ ਜਰੂਰਤ ਨਹੀਂ ਹੁੰਦੀ, ਕਿਉਂਕਿ ਉਹ ਆਤਮਾਵਾਂ ਹਨ ਅਤੇ ਉਹ ਖੰਭਾਂ ਨਾਲ ਉੱਡ ਕੇ ਜਾਣ ਨਾਲੋਂ ਕਿਤੇ ਵੱਧ ਤੇਜੀ ਨਾਲ ਯਾਤਰਾ ਕਰ ਸਕਦੇ ਹਨ। ਆਤਮਾਵਾਂ ਦੇ ਤੌਰ ਤੇ ਉਨ੍ਹਾਂ ਦੇ ਕੋਲ ਸ਼ਰੀਰ ਨਹੀਂ ਹਨ। ਸਵਰਗਦੂਤਾਂ ਦੇ ਲਈ, ਅਕਸਰ ਖੰਭ ਗ਼ੈਰ-ਜਰੂਰੀ ਹਨ।

ਬਹੁਤ ਸਾਰੀ ਕਲਾ ਜੋ ਅਸੀਂ ਵੇਖਦੇ ਹਾਂ ਉਸਦੇ ਉਲਟ, ਬਾਈਬਲ ਕਦੇ ਵੀ ਸਵਰਗਦੂਤਾਂ ਦਾ ਵਰਣਨ ਔਰਤਾਂ ਜਾਂ ਬੱਚਿਆਂ ਦੀ ਦਿੱਖ ਦੇ ਵਿੱਚ ਨਹੀਂ ਕਰਦੀ। ਉਹ ਪੁਰਸ਼ ਦੇ ਰੂਪ ਵਿੱਚ ਵਿਖਾਈ ਦਿੱਤੇ ਹਨ, ਪਰ ਉਹ ਮਨੁੱਖਾਂ ਦੀ ਤਰ੍ਹਾਂ ਲਿੰਗ ਆਧਾਰਿਤ ਨਹੀਂ ਹਨ। ਉਨ੍ਹਾਂ ਦੇ ਵਿੱਚ ਕਿਸੇ ਵੀ ਤਰ੍ਹਾਂ ਦੇ ਵਿਆਹ ਸੰਬੰਧ ਜਾਂ ਪਰਿਵਾਰਿਕ ਗਠਬੰਧਨ ਨਹੀਂ ਹਨ। (ਪੜ੍ਹੋ ਮੱਤੀ 22:30।) ਹਰੇਕ ਨੂੰ ਨਿੱਜੀ ਰੂਪ ਦੇ ਵਿੱਚ ਰਚਿਆ ਗਿਆ ਸੀ।

ਸਵਰਗਦੂਤ ਆਮ ਤੌਰ ਤੇ ਲੋਕਾਂ ਨੂੰ ਵਿਖਾਈ ਨਹੀਂ ਦਿੰਦੇ, ਪਰ ਜਦੋਂ ਇਸਦੇ ਪਿੱਛੇ ਕੋਈ ਉਦੇਸ਼ ਹੋਵੇ ਤਾਂ ਉਹ ਵਿੱਖ ਵੀ ਜਾਂਦੇ ਹਨ। ਕਈ ਵਾਰ ਜਦੋਂ ਸਵਰਗਦੂਤ ਵਿਖਾਈ ਦਿੱਤੇ ਤਾਂ ਪਹਿਲਾਂ ਲੋਕਾਂ ਦੇ ਸੋਚਿਆਂ ਕਿ ਉਹ ਆਮ ਇਨਸਾਨ ਹਨ (ਉਤਪਤ 19:1-2)। ਕਈ ਹੋਰ ਸਥਾਨਾਂ ਤੇ ਸਵਰਗਦੂਤ ਅਜਿਹੇ ਚਾਣਨ ਦੇ ਨਾਲ ਵਿਖਾਈ ਦਿੱਤੇ ਕਿ ਲੋਕ ਡਰ ਦੇ ਕਾਰਨ ਜ਼ਮੀਨ ਦੇ ਡਿੱਗ ਪਏ (ਮੱਤੀ 28:2-4)। ਜਦੋਂ ਸਵਰਗਦੂਤ ਕਿਸੇ ਨੂੰ ਵਿਖਾਈ ਦਿੱਤਾ, ਤਾਂ ਉਸਨੇ ਆਮ ਤੌਰ ਤੇ ਵਿਅਕਤੀ ਨੂੰ ਇਹ ਕਹਿ ਕੇ ਸਲਾਮ ਕੀਤਾ ਕਿ “ਨਾ ਡਰ” (ਪੜ੍ਹੋ ਲੂਕਾ 1:13, 30; ਲੂਕਾ 2:10)।

ਸਵਰਗਦੂਤ ਆਤਮਾਵਾਂ ਹਨ (ਇਬਰਾਨੀਆਂ ਨੂੰ 1:14),[1] ਪਰ ਇਸਦੇ ਕਾਰਨ ਸਾਨੂੰ ਉਨ੍ਹਾਂ ਨੂੰ ਘੱਟ ਅਸਲ ਨਹੀਂ ਸਮਝਣਾ ਚਾਹੀਦਾ। ਬਾਈਬਲ ਦਰਸਾਉਂਦੀ ਹੈ ਕਿ ਆਤਮਾਵਾਂ ਸ਼ਰੀਰਾਂ ਨਾਲੋਂ ਵਧੇਰੇ ਸ਼ਕਤੀਸ਼ਾਲੀ ਹੁੰਦੀਆਂ ਹਨ (ਪੜ੍ਹੋ ਯਸਾਯਾਹ 31:1, 3)।

ਸਵਰਗਦੂਤਾਂ ਨੂੰ ਪਰਮੇਸ਼ੁਰ ਦੇ ਪੁੱਤ੍ਰ ਕਿਹਾ ਗਿਆ ਹੈ(ਅੱਯੂਬ 1:6) ਅਤੇ ਉਨ੍ਹਾਂ ਦੇ ਵਿੱਚ ਪਰਮੇਸ਼ੁਰ ਦੇ ਸੁਭਾਅ ਦੇ ਗੁਣ ਹਨ, ਪਰ ਇਹ ਉਸੇ ਪ੍ਰਕਾਰ ਨਹੀਂ ਹਨ ਜਿਵੇਂ ਇਹ ਮਨੁੱਖਾਂ ਦੇ ਵਿੱਚ ਹਨ। ਵਰਤਮਾਨ ਦੇ ਵਿੱਚ ਸਵਰਗਦੂਤਾਂ ਸ਼ਕਤੀ ਅਤੇ ਅਕਲਮੰਦੀ ਵਿੱਚ ਮਨੁੱਖਾਂ ਨਾਲੋਂ ਬਹੁਤ ਜਿਆਦਾ ਉੱਚੇ ਹਨ, ਪਰ ਇੱਕ ਦਿਨ ਮਨੁੱਖ ਸਵਰਗਦੂਤਾਂ ਨਾਲੋਂ ਉੱਪਰ ਹੋਣਗੇ (ਪੜ੍ਹੋ 1 ਕੁਰਿੰਥੀਆਂ ਨੂੰ 6:3)।

ਉਤਪਤੀ ਦੇ ਵਿੱਚ ਸਵਰਗਦੂਤਾਂ ਦੀ ਰਚਨਾ ਦੇ ਬਾਰੇ ਜਾਣਕਾਰੀ ਨਹੀਂ ਦਿੱਤੀ ਗਈ ਹੈ। ਉਹ ਧਰਤੀ ਦੇ ਬਣਾਉਣ ਤੋਂ ਪਹਿਲਾਂ ਬਣਾਏ ਗਏ ਸਨ, ਅਤੇ ਉਨ੍ਹਾਂ ਨੇ ਪਰਮੇਸ਼ੁਰ ਨੂੰ ਰਚਨਾ ਕਰਦੇ ਹੋਏ ਵੇਖ ਕੇ ਅਨੰਦ ਮਨਾਇਆ (ਅੱਯੂਬ 38:4-7)।

ਸਵਰਗਦੂਤ ਕਦੇ ਨਹੀਂ ਮਰਦੇ (ਲੂਕਾ 20:36)। ਇਹ ਸਚਿਆਈ ਕਿ ਉਨ੍ਹਾਂ ਦੀ ਰਚਨਾ ਧਰਤੀ ਤੋਂ ਪਹਿਲਾਂ ਕੀਤੀ ਗਈ ਇਸਦਾ ਅਰਥ ਹੈ ਕਿ ਉਹ ਹਜ਼ਾਰਾਂ ਸਾਲਾਂ ਤੋਂ ਜੀਵਿਤ ਹਨ ਅਤੇ ਉਨ੍ਹਾਂ ਨੇ ਸਾਰੇ ਮਨੁੱਖੀ ਇਤਿਹਾਸ ਨੂੰ ਵੇਖਿਆ ਹੈ।

ਸਵਰਗਦੂਤਾਂ ਦੇ ਕੋਲ ਵਿਅਕਤੀਤਵ ਹੈ। ਉਹ ਬੋਲ ਸਕਦੇ ਹਨ ਅਤੇ ਵਾਰਤਾਲਾਪ ਕਰ ਸਕਦੇ ਹਨ (ਲੂਕਾ 1:18-20)। ਉਹ ਪਰਮੇਸ਼ੁਰ ਦੀ ਅਰਾਧਨਾ ਕਰਦੇ ਹਨ, ਇਸਦਾ ਅਰਥ ਹੈ ਕਿ ਉਹ ਉਸਦੇ ਸੁਭਾਅ ਬਾਰੇ ਕੁਝ ਸਮਝ ਸਕਦੇ ਹਨ ਅਤੇ ਭੈਅ ਦੇ ਨਾਲ ਇਸਦੇ ਬਾਰੇ ਪ੍ਰਤੀਕਿਰਿਆ ਕਰਦੇ ਹਨ (ਇਬਰਾਨੀਆਂ ਨੂੰ 1:6)। ਜਦੋਂ ਕੋਈ ਪਾਪੀ ਤੌਬਾ ਕਰਦਾ ਹੈ ਤਾਂ ਉਹ ਅਨੰਦ ਮਨਾਉਂਦੇ ਹਨ, ਜੋ ਇਹ ਵਿਖਾਉਂਦਾ ਹੈ ਕਿ ਉਨ੍ਹਾਂ ਦੇ ਕੋਲ ਭਾਵਨਾਵਾਂ ਹਨ (ਪੜ੍ਹੋ ਲੂਕਾ 15:10)। ਉਹ ਮੁਕਤੀ ਦੀ ਯੋਜਨਾ ਨੂੰ ਸਮਝਣ ਦੇ ਵਿੱਚ ਬਹੁਤ ਤੀਬਰ ਰੁਚੀ ਰੱਖਦੇ ਹਨ, ਜੋ ਇਸ ਨੂੰ ਦਰਸਾਉਂਦਾ ਹੈ ਕਿ ਉਨ੍ਹਾਂ ਦੇ ਵਿੱਚ ਸੋਚਣ ਸਮਝਣ ਦੀ ਸਮਰੱਥਾ ਹੈ (ਪੜ੍ਹੋ ਪਤਰਸ ਦੀ ਪਹਿਲੀ ਪੱਤ੍ਰੀ 1:12)। ਉਨ੍ਹਾਂ ਨੇ ਯਿਸੂ ਦੇ ਜਨਮ ਦੀ ਘੋਸ਼ਣਾ ਤੇ ਖੁਸ਼ੀ ਮਨਾਈ (ਲੂਕਾ 2:13-14)।

ਸਾਰੇ ਸਵਰਗਦੂਤ ਇੱਕੋ ਜਿਹੇ ਨਹੀਂ ਹਨ, ਕਿਉਂਕਿ ਕਈਆਂ ਨੂੰ ਕਰੂਬੀ ਕਿਹਾ ਜਾਂਦਾ ਹੈ (ਜ਼ਬੂਰਾਂ ਦੀ ਪੋਥੀ 80:1) ਅਤੇ ਕਈਆਂ ਨੂੰ ਸਰਾਫ਼ੀਮ (ਯਸਾਯਾਹ 6:2)। ਸਵਰਗਦੂਤਾਂ ਦੇ ਪੱਧਰ ਵੀ ਹਨ, ਕਿਉਂਕਿ ਬਾਈਬਲ ਸਵਰਗਦੂਤਾਂ ਅਤੇ ਮਹਾਂ-ਸਵਰਗਦੂਤ ਦੇ ਬਾਰੇ ਜ਼ਿਕਰ ਕਰਦੀ ਹੈ ਅਤੇ “ਸ਼ਤਾਨ ਅਤੇ ਉਹ ਦੇ ਦੂਤਾਂ” (ਮੱਤੀ 25:41)। ਉਨ੍ਹਾਂ ਦੇ ਵਿੱਚਕਾਰ ਇੱਕ ਅਧਿਕਾਰ ਆਧਾਰਿਤ ਢਾਂਚਾ ਹੈ, ਜਿੰਨਾਂ ਨੂੰ ਸਿੰਘਾਸਣ, ਹਕੂਮਤਾਂ ਅਤੇ ਇਖਤਿਆਰਾਂ ਦੇ ਤੌਰ ਤੇ ਦੱਸਿਆ ਗਿਆ ਹੈ (ਪੜ੍ਹੋ ਅਫ਼ਸੀਆਂ ਨੂੰ 6:12; ਕੁਲੁੱਸੀਆਂ ਨੂੰ 1:16)।

ਯਹੂਦੀ ਅਤੇ ਮਸੀਹੀ ਦੋਨਾਂ ਹੀ ਰਿਵਾਇਤੀ ਲਿਖਤਾਂ ਦੇ ਵਿੱਚ ਸਵਰਗਦੂਤਾਂ ਦੇ ਬਾਰੇ ਬਹੁਤ ਕੁਝ ਲਿਖਿਆ ਹੋਇਆ ਹੈ, ਜੋ ਕਿ ਵਚਨਾਂ ਦੇ ਦੱਸੀ ਜਾਣਕਾਰੀ ਨਾਲੋਂ ਵੀ ਪਰੇ ਚਲੇ ਜਾਂਦੇ ਹਨ।

ਸਵਰਗਦੂਤਾਂ ਦੇ ਵਿੱਚਕਾਰ ਅੰਤਰ ਦੇ ਬਾਰੇ ਪਵਿੱਤਰ ਸ਼ਾਸਤਰ ਦੇ ਵਿੱਚ ਕੁਝ ਜਿਆਦਾ ਪ੍ਰਗਟਾਵਾ ਨਹੀਂ ਕੀਤਾ ਗਿਆ ਹੈ। ਮਹਾਂ-ਦੂਤ ਸ਼ਬਦ ਦਾ ਇਸਤੇਮਾਲ ਬਾਈਬਲ ਦੇ ਵਿੱਚ ਦੋ ਵਾਰ ਕੀਤਾ ਗਿਆ ਹੈ। ਮੀਕਾਏਲ ਨੂੰ ਮਹਾਂ-ਦੂਤ ਕਿਹਾ ਗਿਆ ਹੈ, ਅਤੇ ਯਿਸੂ ਦੀ ਦੁਬਾਰਾ ਆਮਦ ਦੇ ਸਮੇਂ ਮਹਾਂ-ਦੂਤ ਦੀ ਆਵਾਜ ਸੁਣਾਈ ਦੇਵੇਗੀ (1 ਥੱਸਲੁਨੀਕੀਆਂ ਨੂੰ 4:16; ਯਹੂਦਾਹ 1:9)। ਮਹਾਂ-ਦੂਤ ਸ਼ਬਦ ਦਾ ਸ਼ਾਬਦਿਕ ਅਰਥ ਸਵਰਗਦੂਤ ਹੈ। ਸਾਨੂੰ ਨਹੀਂ ਪਤਾ ਕਿ ਕੁੱਲ ਕਿੰਨੇ ਮਹਾਂ-ਦੂਤ ਹਨ।

ਸਰਾਫ਼ੀਮ ਬਾਈਬਲ ਦੇ ਵਿੱਚ ਯਸਾਯਾਹ 6 ਦੇ ਵਿੱਚ ਦੱਸੇ ਗਏ ਹਨ। ਉਨ੍ਹਾਂ ਦੇ ਛ੍ਹੇ ਖੰਭ ਸਨ। ਖੰਭਾਂ ਤੋਂ ਇਲਾਵਾ ਉਹ ਕੁਝ ਹੱਦ ਤੱਕ ਮਨੁੱਖਾਂ ਜਿਹੇ ਵਿਖਾਈ ਦਿੰਦੇ ਸਨ, ਕਿਉਂਕਿ ਉਨ੍ਹਾਂ ਦੇ ਹੱਥ, ਪੈਰ ਅਤੇ ਚਿਹਰੇ ਸਨ।

ਆਦਮ ਅਤੇ ਹਵਾ ਦੇ ਬਾਗ਼ ਦੇ ਵਿੱਚੋਂ ਬਾਹਰ ਕੱਢ ਦਿੱਤੇ ਜਾਣ ਤੋਂ ਬਾਅਦ ਕਰੂਬੀ ਅਤੇ ਖੰਡੇ ਦੀ ਲਸ਼ਕ ਬਾਗ਼ ਦੇ ਬਾਹਰ ਰੱਖੇ ਗਏ (ਉਤਪਤ 3:24)। ਇਹ ਇਸ ਲਈ ਸਨ ਕਿ ਕੋਈ ਬਾਗ਼ ਦੇ ਵਿੱਚ ਦਾਖਲ ਨਾ ਹੋ ਸਕੇ। ਹਿਜ਼ਕੀਏਲ ਦੁਆਰਾ ਵੇਖੇ ਕਰੂਬੀਆਂ ਦਾ ਵਰਣਨ ਅਜਿਹੇ ਕਿਸੇ ਵੀ ਪ੍ਰਾਣੀ ਨਾਲੋਂ ਬਹੁਤ ਵੱਖਰਾ ਹੈ ਜਿਸਦੇ ਬਾਰੇ ਅਸੀਂ ਜਾਣਦੇ ਹਾਂ। ਉਨ੍ਹਾਂ ਦੇ ਚਾਰ ਖੰਭ ਸਨ, ਚਾਰ ਚਿਹਰੇ ਜੋ ਸਾਰੇ ਹੀ ਅਲੱਗ-ਅਲੱਗ ਸਨ, ਬਹੁਤ ਸਾਰੇ ਹੱਥ, ਅੱਗ ਜਿਹੀ ਚਮਕ, ਬਿਜ਼ਲੀ ਦੀਆਂ ਲਿਸ਼ਕਾਂ ਅਤੇ ਰੋਸ਼ਨੀ ਵਰਗੀ ਤੇਜੀ ਸੀ (ਹਿਜ਼ਕੀਏਲ 1:5-14, ਹਿਜ਼ਕੀਏਲ 10:15)।

ਦੋ ਕਰੂਬੀਆਂ ਦੀ ਮੂਰਤ ਨੇਮ ਦੇ ਸਦੂਕ ਤੇ ਰੱਖੀ ਗਈ ਸੀ ਜਿੰਨ੍ਹਾਂ ਦੇ ਵਿੱਚਕਾਰ ਦਯਾ ਸਿੰਘਾਸਣ ਸੀ।[2] ਪਰਮੇਸ਼ੁਰ ਨੂੰ ਬਾਰ-ਬਾਰ ਕਰੂਬੀਆਂ ਦੇ ਉੱਤੇ ਵਿਰਾਜਣ ਵਾਲੇ ਵੱਜੋਂ ਪੁਕਾਰਿਆ ਗਿਆ ਹੈ। [3] ਇਸਦੇ ਨਾਲ ਉਸਨੂੰ ਇਸਰਾਏਲ ਦੇ ਪਰਮੇਸ਼ੁਰ ਵੱਜੋਂ ਪਹਿਚਾਣਿਆ ਗਿਆ ਜਿਸਦੀ ਹੈਕਲ ਦੇ ਵਿੱਚ ਅਰਾਧਨਾ ਕੀਤੀ ਜਾਂਦੀ ਸੀ ਅਤੇ ਇਹ ਇਸ ਗੱਲ ਨੂੰ ਵੀ ਦਰਸਾਉਂਦਾ ਹੈ ਕਿ ਉਸਦੇ ਕੋਲ ਉਸਦੇ ਦੱਸੇ ਰਾਂਹਾਂ ਤੋਂ ਬਿਨਾਂ ਪਹੁੰਚਿਆ ਨਹੀਂ ਜਾ ਸਕਦਾ।

ਪਰਮੇਸ਼ੁਰ ਦੀ ਸਕਤੀ ਅਤੇ ਸ਼ਾਨ ਉਸਦੇ ਸੇਵਕਾਂ ਦੀ ਕਿਸਮ ਤੋਂ ਵੇਖੀ ਜਾ ਸਕਦੀ ਹੈ। ਕਰੂਬੀ ਅਜਿਹੇ ਪ੍ਰਾਣੀ ਹਨ ਕਿ ਜੋ ਵਿਅਕਤੀ ਉਨ੍ਹਾਂ ਨੂੰ ਵੇਖਦਾ ਹੈ ਸੋਚਦਾ ਹੈ ਕਿ ਉਹ ਪਰਮੇਸ਼ੁਰ ਨੂੰ ਵੇਖ ਰਿਹਾ ਹੈ, ਅਤੇ ਉਸਦਾ ਝੁਕਾਅ ਉਸਦੀ ਅਰਾਧਨਾ ਕਰਨ ਦੇ ਵੱਲ ਹੁੰਦਾ ਹੈ, ਅਤੇ ਇਹ ਸਿਰਫ਼ ਪਰਮੇਸ਼ੁਰ ਦਾ ਇੱਕ ਸੇਵਕ ਹੀ ਹੈ।

ਇਹ ਤੱਥ ਪਰਮੇਸ਼ੁਰ ਦੀ ਸ਼ਾਨ ਨੂੰ ਵਿਖਾਉਂਦਾ ਹੈ ਕਿ ਬਹੁਤ ਸਾਰੇ ਸਵਰਗਦੂਤ ਉਸਦੀ ਸੇਵਾ ਕਰਦੇ ਹਨ। ਯੂਹੰਨਾ ਰਸੂਲ ਨੇ ਪਰਮੇਸ਼ੁਰ ਦੇ ਸਿੰਘਾਸਣ ਦੇ ਦੁਆਲੇ ਸਵਰਗਦੂਤਾਂ ਦੀ ਇੱਕ ਭੀੜ ਵੇਖੀ ਜਿਸਨੂੰ ਉਸਨੇ “ਲੱਖਾਂ ਅਤੇ ਕਰੋੜਾਂ” ਕਿਹਾ(ਪਰਕਾਸ਼ ਦੀ ਪੋਥੀ 5:11)।

ਇੱਕ ਸਵਰਗਦੂਤ ਦੀ ਸ਼ਕਤੀ ਅਸੀਮਿਤ ਨਹੀਂ ਹੈ, ਕਿਉਂਕਿ ਅਸੀਂ ਜਾਣਦੇ ਹਾਂ ਕਿ ਦਾਨੀਏਲ ਦੇ ਕੋਲ ਸੰਦੇਸ਼ ਲਿਆਉਣ ਵਾਲੇ ਇੱਕ ਦੂਤ ਨੂੰ ਰੋਕ ਲਿਆ ਗਿਆ ਸੀ (ਪੜ੍ਹੋ ਦਾਨੀਏਲ 10:12-13), ਫਿਰ ਵੀ ਪਰਮੇਸ਼ੁਰ ਉਨ੍ਹਾਂ ਨੂੰ ਸੌਂਪੇ ਗਏ ਕੰਮਾਂ ਨੂੰ ਕਰਨ ਦੀ ਭਰਪੂਰ ਸ਼ਕਤੀ ਦਿੰਦਾ ਹੈ, ਜਿਵੇਂ ਕਿ ਇੱਕ ਸਵਰਗਦੂਤ ਨੇ ਇੱਕ ਸਮੇਂ ਤੇ 185,000 ਸਿਪਾਹੀਆਂ ਨੂੰ ਮਾਰ ਦਿੱਤਾ ਸੀ (1 ਰਾਜਿਆਂ ਦੀ ਦੂਜੀ ਪੋਥੀ 19:35)।

ਸਵਰਗਦੂਤਾਂ ਨੂੰ ਸਪੱਸ਼ਟ ਤੌਰ ਤੇ ਜਿੰਮੇਦਾਰੀਆਂ ਦਿੱਤੀਆਂ ਗਈਆਂ ਹਨ। ਬਾਈਬਲ ਸਾਨੂੰ ਦੱਸਦੀ ਹੈ ਕਿ ਉਹ ਮੁਕਤੀ ਪਾਉਣ ਵਾਲਿਆਂ ਦੀ ਸੇਵਾ ਦੇ ਲਈ ਘੱਲੇ ਜਾਂਦੇ ਹਨ (ਪੜ੍ਹੋ ਇਬਰਾਨੀਆਂ ਨੂੰ 1:14।) ਸਵਰਗਦੂਤ ਪਰਮੇਸ਼ੁਰ ਦੀ ਸੇਵਾ ਕਰਨ ਵਾਲਿਆਂ ਦੇ ਦੁਆਲੇ ਰਹਿੰਦੇ ਹਨ ਅਤੇ ਉਨ੍ਹਾਂ ਦੀ ਸੁਰੱਖਿਆ ਕਰਦੇ ਹਨ (ਜ਼ਬੂਰਾਂ ਦੀ ਪੋਥੀ 34:7)। ਅਸੀਂ ਇਹ ਮੰਨ ਸਕਦੇ ਹਾਂ ਕਿ ਸਾਡੇ ਨਾਲ ਹਮੇਸ਼ਾਂ ਬਹੁਤ ਸਾਰੇ ਸਵਰਗਦੂਤ ਰਹਿੰਦੇ ਹਨ। ਯਿਸੂ ਨੇ ਕਿਹਾ ਕਿ ਬੱਚਿਆਂ ਦੇ ਲਈ ਸਵਰਗਦੂਤਾਂ ਨੂੰ ਜਿੰਮੇਦਾਰੀ ਦਿੱਤੀ ਜਾਂਦੀ ਹੈ (ਪੜ੍ਹੋ ਮੱਤੀ 18:10।) ਮਹਾਂ-ਦੂਤ ਮੀਕਾਏਲ ਨੂੰ ਉਹ ਵੱਡਾ ਸਰਦਾਰ ਕਿਹਾ ਗਿਆ ਹੈ ਜੋ ਇਸਰਾਏਲ ਕੌਮ ਦੀ ਰਾਖੀ ਕਰਦਾ ਹੈ (ਦਾਨੀਏਲ 12:1)।

ਬਾਈਬਲ ਅਜਿਹਾ ਕਦੇ ਨਹੀਂ ਕਹਿੰਦੀ ਕਿ ਸਾਨੂੰ ਸਵਰਗਦੂਤਾਂ ਦੇ ਅੱਗੇ ਪ੍ਰਾਰਥਨਾ ਕਰਨੀ ਚਾਹੀਦੀ ਹੈ। ਵਚਨ ਇਹ ਗੱਲ ਵੀ ਨਹੀਂ ਕਹਿੰਦਾ ਕਿ ਸਾਨੂੰ ਉਨ੍ਹਾਂ ਦੇ ਨਾਲ ਵਾਰਤਾਲਾਪ ਕਰਨ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ। ਉਹ ਸਾਡੇ ਅਤੇ ਪਰਮੇਸ਼ੁਰ ਦੇ ਵਿੱਚਕਾਰ ਵਿਚੋਲੇ ਨਹੀਂ ਹਨ। ਬਾਈਬਲ ਦੇ ਵਿੱਚ ਅਜਿਹੇ ਲੋਕਾਂ ਨੂੰ ਚੇਤਾਵਨੀ ਦਿੱਤੀ ਗਈ ਹੈ ਜੋ ਸਵਰਗਦੂਤਾਂ ਦੀ ਅਰਾਧਨਾ ਕਰਦੇ ਹਨ ਅਤੇ ਆਤਮਾਵਾਂ ਦੇ ਸੰਸਾਰ ਦੀਆਂ ਅਜਿਹੀਆਂ ਗੱਲਾਂ ਦੇ ਵਿੱਚ ਸ਼ਾਮਿਲ ਹੁੰਦੇ ਹਨ ਜਿੰਨਾਂ ਨੂੰ ਉਹ ਨਹੀਂ ਸਮਝਦੇ (ਪੜ੍ਹੋ ਕੁਲੁੱਸੀਆਂ ਨੂੰ 2:18)। ਜੇਕਰ ਅਸੀਂ ਅਜਿਹੇ ਤਰੀਕੇ ਦੇ ਨਾਲ ਸਵਰਗਦੂਤਾਂ ਦੇ ਵਿੱਚ ਸ਼ਾਮਿਲ ਹੋਣ ਦਾ ਯਤਨ ਕਰਦੇ ਹਾਂ ਜਿਸਨੂੰ ਪਰਮੇਸ਼ੁਰ ਨਹੀਂ ਚਾਹੁੰਦਾ, ਤਾਂ ਪਰਮੇਸ਼ੁਰ ਦੇ ਸਵਰਗਦੂਤਾਂ ਦੀ ਬਜਾਏ ਦੁਸ਼ਟ ਆਤਮਾਵਾਂ ਸਾਡੇ ਕੋਲ ਆ ਜਾਂਦੀਆਂ ਹਨ।

► ਦੁਸ਼ਟ ਆਤਮਾਵਾਂ ਦਾ ਅਰੰਭ ਕਦੋਂ ਹੋਇਆ?

ਦੁਸ਼ਟ ਆਤਮਾਵਾਂ ਉਹ ਦੂਤ ਹਨ ਜਿੰਨ੍ਹਾਂ ਨੇ ਪਰਮੇਸ਼ੁਰ ਦੇ ਵਿਰੁੱਧ ਬਗ਼ਾਵਤ ਕੀਤੀ। ਇਹ ਮਨੁੱਖਤਾ ਦੇ ਰਚੇ ਜਾਣ ਤੋਂ ਪਹਿਲਾਂ ਹੋਇਆ, ਅਤੇ ਬਾਈਬਲ ਇਸਦੇ ਬਾਰੇ ਵਧੇਰੇ ਪ੍ਰਗਟੀਕਰਨ ਨਹੀਂ ਕਰਦੀ। ਸ਼ੈਤਾਨ ਬਗ਼ਾਵਤ ਦਾ ਆਗੂ ਸੀ, ਅਤੇ ਇੱਕ ਤਿਹਾਈ ਦੂਤ ਉਸਦੇ ਪਿੱਛੇ ਲੱਗ ਗਏ (ਪਰਕਾਸ਼ ਦੀ ਪੋਥੀ 12:4)। ਯਹੂਦਾਹ ਉਨ੍ਹਾਂ ਦੂਤਾਂ ਦੀ ਗੱਲ ਕਰਦਾ ਹੈ ਜੋ ਆਪਣੀ ਪਦਵੀ ਵਿੱਚ ਨਾ ਰਹੇ (ਯਹੂਦਾਹ 1:6)। ਉਨ੍ਹਾਂ ਨੂੰ ਪਹਿਲਾਂ ਤੋਂ ਹੀ ਪਰਮੇਸ਼ੁਰ ਦੇ ਨਿਆਂ ਦੁਆਰਾ ਸਜ਼ਾ ਸੁਣਾ ਦਿੱਤੀ ਗਈ ਹੈ (ਪੜ੍ਹੋ ਯੂਹੰਨਾ 16:11; ਪਤਰਸ ਦੀ ਦੂਜੀ ਪੱਤ੍ਰੀ 2:4)।

ਨਬੀਆਂ ਦੀਆਂ ਪੁਸਤਕਾਂ ਦੇ ਵਿੱਚ ਅਜਿਹੇ ਦੋ ਹਵਾਲੇ ਹਨ ਜੋ ਸ਼ਾਇਦ ਸ਼ੈਤਾਨ ਦੇ ਡਿੱਗਣ ਬਾਰੇ ਗੱਲ ਕਰਦੇ ਹਨ (ਯਸਾਯਾਹ 14:12-17 ਅਤੇ ਹਿਜ਼ਕੀਏਲ 28:12-19)। ਹਰੇਕ ਹਵਾਲਾ ਇੱਕ ਮਨੁੱਖ, ਧਰਤੀ ਦੇ ਰਾਜੇ ਦੀ ਗੱਲ ਕਰਦਾ ਹੈ, ਪਰ ਉਹ ਸ਼ਾਇਦ ਰਾਜਿਆਂ ਦੇ ਡਿੱਗਣ ਦੀ ਤੁਲਨਾ ਸ਼ੈਤਾਨ ਦੇ ਡਿੱਗਣ ਦੇ ਨਾਲ ਕਰਦੇ ਹਨ।

ਅਜਿਹਾ ਪ੍ਰਤੀਤ ਹੁੰਦਾ ਹੈ ਕਿ ਸ਼ੈਤਾਨ ਘਮੰਡ ਦੇ ਵਿੱਚ ਆ ਗਿਆ ਅਤੇ ਉਹ ਪਰਮੇਸ਼ੁਰ ਤੋਂ ਆਜ਼ਾਦ ਹੋਣਾ ਚਾਹੁੰਦਾ ਸੀ। ਪੌਲੁਸ ਰਸੂਲ ਨੇ ਚੇਤਾਵਨੀ ਦਿੱਤੀ ਕਿ ਕੋਈ ਵਿਅਕਤੀ ਘਮੰਡ ਦੇ ਕਾਰਨ ਸ਼ੈਤਾਨ ਦੇ ਸਮਾਨ ਸਜ਼ਾ ਦੇ ਵਿੱਚ ਜਾ ਸਕਦਾ ਹੈ (ਪੜ੍ਹੋ ਤਿਮੋਥਿਉਸ ਨੂੰ ਪਹਿਲੀ ਪੱਤ੍ਰੀ 3:6)। ਇਹ ਉਹੀ ਪਰਤਾਵਾ ਹੈ ਜਿਸਦਾ ਪ੍ਰਸਤਾਵ ਨੇ ਆਦਮ ਅਤੇ ਹਵਾ ਨੂੰ ਦਿੱਤਾ ਜਦੋਂ ਉਸਨੇ ਕਿਹਾਸ਼ੈਤਾਨ, “ਤੁਸੀਂ ਪਰਮੇਸ਼ੁਰ ਵਾਂਙੁ ਭਲੇ ਬੁਰੇ ਦੀ ਸਿਆਣ ਵਾਲੇ ਹੋ ਜਾਓਗੇ।” ਇਹ ਅਜਿਹਾ ਪਰਤਾਵਾ ਹੈ ਜੋ ਪਰਮੇਸ਼ੁਰ ਦੇ ਅਧਿਕਾਰ ਦਾ ਇਨਕਾਰ ਕਰਦਾ ਹੈ ਅਤੇ ਤੁਸੀਂ ਆਪਣੇ ਪਰਮੇਸ਼ੁਰ ਖੁਦ ਬਣ ਜਾਂਦੇ ਹੋ।

► ਸ਼ੈਤਾਨ ਬਾਰੇ ਅਜਿਹੀਆਂ ਕੁਝ ਗੱਲਾਂ ਕਿਹੜੀਆਂ ਹਨ ਜਿੰਨਾਂ ਬਾਰੇ ਅਸੀਂ ਜਾਣਦੇ ਹਾਂ?

ਸ਼ੈਤਾਨ ਹੁਣ ਵੀ ਪਰਮੇਸ਼ੁਰ ਦੇ ਵਿਰੁੱਧ ਬਗ਼ਾਵਤ ਦੀ ਅਗਵਾਈ ਕਰਦਾ ਹੈ। ਉਸਨੂੰ ਇਖ਼ਤਿਆਰ ਦੇ ਸਰਦਾਰ ਕਿਹਾ ਗਿਆ ਹੈ (ਅਫ਼ਸੀਆਂ ਨੂੰ 2:2)। ਸ਼ੈਤਾਨ ਨੂੰ ਇਸ ਇਸ ਜਗਤ ਦਾ ਸਰਦਾਰ ਕਿਹਾ ਗਿਆ ਹੈ ਕਿਉਂਕਿ ਇਸ ਸੰਸਾਰ ਦੇ ਲੋਕ ਜਿਆਦਾਤਰ [1]ਪਰਮੇਸ਼ੁਰ ਦੇ ਵਿਰੁੱਧ ਬਗ਼ਾਵਤ ਵਿੱਚ ਲੱਗੇ ਹੋਏ ਹਨ (ਯੂਹੰਨਾ 12:31)। ਉਹ ਸੰਸਾਰ ਦੇ ਰਾਜਾਂ ਦੀ ਮਾਲਕੀ ਦਾ, ਅਤੇ ਅਸਥਾਈ ਤੌਰ ਤੇ ਆਪਣੀ ਇੱਛਾ ਅਨੁਸਾਰ ਇਸਨੂੰ ਦੇਣ ਦਾ ਦਾਅਵਾ ਕਰਦਾ ਹੈ (ਲੂਕਾ 4:4-6)। ਉਹ ਪਾਪੀਆਂ ਦੇ ਮਨਾਂ ਨੂੰ ਬੰਨ੍ਹਦਾ ਹੈ ਤਾਂ ਕਿ ਉਹ ਸ਼ੁਭਸਮਾਚਾਰ ਨੂੰ ਸਵੀਕਾਰ ਨਾ ਕਰ ਸਕਣ। (ਪੜ੍ਹੋ 2 ਕੁਰਿੰਥੀਆਂ ਨੂੰ 4:4)। ਜਿੰਨ੍ਹਾਂ ਪਾਪੀਆਂ ਨੇ ਤੌਬਾ ਨਹੀਂ ਕੀਤੀ ਉਹ ਅਸਲ ਦੇ ਵਿੱਚ ਸ਼ੈਤਾਨ ਦੇ ਕੈਦੀ ਹਨ (ਤਿਮੋਥਿਉਸ ਨੂੰ ਦੂਜੀ ਪੱਤ੍ਰੀ 2:26)। ਉਹ ਲੋਕਾਂ ਦੇ ਮਨਾਂ ਵਿੱਚੋਂ ਪਰਮੇਸ਼ੁਰ ਦੇ ਵਚਨ ਨੂੰ ਬਾਹਰ ਕੱਢ ਦਿੰਦਾ ਹੈ ਤਾਂ ਕਿ ਉਨ੍ਹਾਂ ਤੇ ਵਚਨ ਦਾ ਕੋਈ ਪ੍ਰਭਾਵ ਨਾ ਹੋਵੇ (ਪੜ੍ਹੋ ਮਰਕੁਸ 4:15)। ਉਸਨੇ ਹਨਾਨਿਯਾ ਅਤੇ ਸਫ਼ੀਰਾ ਦੇ ਦਿਲਾਂ ਵਿੱਚ ਕਲੀਸਿਆ ਅਤੇ ਪਵਿੱਤਰ ਆਤਮਾ ਦੇ ਅੱਗੇ ਝੂਠ ਬੋਲਣ ਦੀ ਯੋਜ਼ਨਾ ਪਾਈ (ਰਸੂਲਾਂ ਦੇ ਕਰਤੱਬ 5:3), ਅਤੇ ਉਹ ਯਹੂਦਾ ਦੇ ਅੰਦਰ ਯਿਸੂ ਨੂੰ ਧੋਖਾ ਦੇਣ ਦੀ ਇੱਛਾ ਦੇ ਨਾਲ ਸਮਾਇਆ (ਲੂਕਾ 22:3)। ਉਹ ਗ਼ਲਤ ਧਾਰਮਿਕ ਸਿੱਖਿਆਵਾਂ ਨੂੰ ਬਣਾਉਂਦਾ ਹੈ ਅਤੇ ਲੋਕਾਂ ਨੂੰ ਉਨ੍ਹਾਂ ਨੂੰ ਸਿਖਾਉਣ ਦੇ ਲਈ ਉਤਸ਼ਾਹਿਤ ਕਰਦਾ ਹੈ (ਪੜ੍ਹੋ ਤਿਮੋਥਿਉਸ ਨੂੰ ਪਹਿਲੀ ਪੱਤ੍ਰੀ 4:1।)

ਸ਼ੈਤਾਨ ਪਰਮੇਸ਼ੁਰ ਦੇ ਨਾਲ ਨਫ਼ਰਤ ਕਰਦਾ ਹੈ ਅਤੇ ਇਸੇ ਕਾਰਨ ਉਹ ਲੋਕਾਂ ਦੇ ਨਾਲ ਵੀ ਨਫ਼ਰਤ ਕਰਦਾ ਹੈ ਕਿਉਂਕਿ ਲੋਕ ਪਰਮੇਸ਼ੁਰ ਦੇ ਸਰੂਪ ਤੇ ਬਣਾਏ ਗਏ ਹਨ ਅਤੇ ਉਹ ਪਰਮੇਸ਼ੁਰ ਦੀ ਕ੍ਰਿਪਾ ਨੂੰ ਪ੍ਰਾਪਤ ਕਰਦੇ ਹਨ। ਜੋ ਸਜ਼ਾ ਉਸਨੇ ਪਰਮੇਸ਼ੁਰ ਦੇ ਵਿਰੁੱਧ ਬਗ਼ਾਵਤ ਕਰਨ ਕਰਕੇ ਪ੍ਰਾਪਤ ਕੀਤੀ ਹੈ ਉਹ ਜਿਆਦਾ ਤੋਂ ਜਿਆਦਾ ਲੋਕਾਂ ਨੂੰ ਉਸੇ ਸਜ਼ਾ ਦੇ ਅਧੀਨ ਲਿਆਉਣਾ ਚਾਹੁੰਦਾ ਹੈ।

ਜੋ ਲੋਕ ਜਾਣਬੁੱਝ ਕੇ ਸ਼ੈਤਾਨ ਦੀ ਸੇਵਾ ਕਰਦੇ ਹਨ ਉਹ ਸੰਸਾਰ ਦੇ ਵਿੱਚ ਸਭ ਤੋਂ ਜਿਆਦਾ ਧੋਖੇ ਦੇ ਵਿੱਚ ਹਨ, ਕਿਉਂਕਿ ਉਹ ਅਜਿਹੀ ਬਗ਼ਾਵਤ ਦਾ ਹਿੱਸਾ ਹਨ ਜੋ ਸਫਲ ਨਹੀਂ ਹੋ ਸਕਦੀ, ਅਤੇ ਉਹ ਅਜਿਹੇ ਸੁਆਮੀ ਦੀ ਸੇਵਾ ਕਰਦੇ ਹਨ ਜੋ ਉਨ੍ਹਾਂ ਨੂੰ ਨਫ਼ਰਤ ਕਰਦਾ ਹੈ ਅਤੇ ਸਿਰਫ਼ ਉਨ੍ਹਾਂ ਦੇ ਨਾਸ਼ ਵਿੱਚ ਰੁਚੀ ਰੱਖਦਾ ਹੈ (ਪਤਰਸ ਦੀ ਪਹਿਲੀ ਪੱਤ੍ਰੀ 5:8)। ਉਹ ਅਜਿਹੇ ਵਾਅਦੇ ਕਰਦਾ ਹੈ ਜਿੰਨਾਂ ਨੂੰ ਉਹ ਵੀ ਜਾਣਦਾ ਹੈ ਕਿ ਉਹ ਪੂਰੇ ਨਹੀਂ ਕਰ ਸਕਦਾ (ਯੂਹੰਨਾ 8:44)।

ਬਾਕੀ ਦੇ ਲੋਕ ਬਿਨਾ ਜਾਣੇ ਸ਼ੈਤਾਨ ਦੇ ਪਿੱਛੇ ਚੱਲਦੇ ਹਨ ਜਦੋਂ ਉਹ ਪਾਪ ਦੇ ਵਿੱਚ ਜਿਉਣ ਦੀ ਚੋਣ ਕਰਦੇ ਹਨ (ਅਫ਼ਸੀਆਂ ਨੂੰ 2:2-3)। ਇਸੇ ਕਾਰਨ ਉਹ ਪਰਤਾਵੇ ਅਤੇ ਧੋਖੇ ਲਿਆਉਣ ਦੇ ਵਿੱਚ ਬਹੁਤ ਸਾਰਾ ਸਮਾਂ ਅਤੇ ਊਰਜਾ ਲਗਾਉਂਦਾ ਹੈ (2 ਕੁਰਿੰਥੀਆਂ ਨੂੰ 4:4, 2 ਕੁਰਿੰਥੀਆਂ ਨੂੰ 11:3, 14)। ਉਹ ਯਤਨ ਕਰਦਾ ਹੈ ਕਿ ਲੋਕ ਪਰਮੇਸ਼ੁਰ ਤੇ ਵਿਸ਼ਵਾਸ ਦਾ ਇਨਕਾਰ ਕਰ ਦੇਣ, ਉਹ ਪਰਮੇਸ਼ੁਰ ਦੀ ਬਜਾਏ ਰਚੀਆਂ ਹੋਈਆਂ ਵਸਤਾਂ ਦੀਆਂ ਮੂਰਤੀਆਂ ਬਣਾ ਕੇ ਉਨ੍ਹਾਂ ਦੀ ਅਰਾਧਨਾ ਕਰਨ (ਰੋਮੀਆਂ ਨੂੰ 1:25)। ਉਸਦੇ ਪਰਤਾਵੇ ਧੋਖਾ ਹਨ, ਕਿਉਂਕਿ ਅਸਲ ਦੇ ਵਿੱਚ ਉਸਦੇ ਕੋਲ ਦੇਣ ਦੇ ਲਈ ਕੁਝ ਵੀ ਨਹੀਂ ਹੈ ਪਰ ਸਿਰਫ਼ ਉਨ੍ਹਾਂ ਵਸਤਾਂ ਦਾ ਵਿਗੜਿਆ ਰੂਪ ਜੋ ਪਰਮੇਸ਼ੁਰ ਨੇ ਰਚੇ ਹਨ। ਸ਼ੈਤਾਨ ਨੇ ਕਿਸੇ ਅਨੰਦ ਜਾਂ ਸੁੱਖ ਦੀ ਰਚਨਾ ਨਹੀਂ ਕੀਤੀ ਹੈ; ਇਹ ਸਭ ਪਰਮੇਸ਼ੁਰ ਨੇ ਰਚਿਆ ਹੈ। ਸ਼ੈਤਾਨ ਸਿਰਫ਼ ਵਿਗੜੇ ਹੋਏ ਰੂਪ ਦੇ ਵਿੱਚ ਸੁੱਖਾਂ ਦਾ ਪ੍ਰਸਤਾਵ ਦੇ ਸਕਦਾ ਹੈ ਜੋ ਪਰਮੇਸ਼ੁਰ ਦੀ ਇੱਛਾ ਤੋਂ ਬਾਹਰ ਹਨ। ਅਸਲ ਦੇ ਵਿੱਚ, ਸ਼ੈਤਾਨ ਕਿਸੇ ਵੀ ਚੀਜ਼ ਦੀ ਰਚਨਾ ਨਹੀਂ ਕਰ ਸਕਦਾ; ਉਹ ਸਿਰਫ਼ ਪਰਮੇਸ਼ੁਰ ਦੁਆਰਾ ਬਣਾਈਆਂ ਹੋਈਆਂ ਵਸਤਾਂ ਨੂੰ ਵਿਗਾੜ ਸਕਦਾ ਹੈ।

ਕੁਝ ਦੁਸ਼ਟ ਆਤਮਾਵਾਂ ਪ੍ਰਤੱਖ ਤੌਰ ਤੇ ਕੁਝ ਖਾਸ ਇਲਾਕਿਆਂ ਜਾਂ ਲੋਕਾਂ ਦੇ ਸਮੂਹਾਂ ਦੇ ਧਿਆਨ ਲਗਾਉਂਦੀਆਂ ਹਨ। ਜਿਵੇਂ ਮੀਕਾਏਲ ਸਵਰਗਦੂਤ ਨੂੰ ਉਹ ਪ੍ਰਧਾਨ ਕਿਹਾ ਗਿਆ ਹੈ ਜੋ ਇਸਰਾਏਲ ਦੇ ਲੋਕਾਂ ਦੀ ਸੁਰੱਖਿਆ ਕਰਦਾ ਹੈ, ਕੁਝ ਅਜਿਹੀਆਂ ਦੁਸ਼ਟ ਆਤਮਾਵਾਂ ਹਨ ਜਿੰਨ੍ਹਾਂ ਨੂੰ ਫ਼ਾਰਸ ਅਤੇ ਯੂਨਾਨ ਦੇ ਪ੍ਰਧਾਨ ਕਿਹਾ ਗਿਆ ਹੈ (ਦਾਨੀਏਲ 10:13, 20)। ਕੁਝ ਆਤਮਾਵਾਂ ਰਾਸ਼ਟਰਾਂ ਦੇ ਦੇਵਤੇ ਬਣ ਜਾਂਦੇ ਹਨ।

ਸ਼ੈਤਾਨ ਅਰਾਧਨਾ ਪ੍ਰਾਪਤ ਕਰਨ ਦੀ ਇੱਛਾ ਰੱਖਦਾ ਹੈ। (ਪੜ੍ਹੋ ਮੱਤੀ 4:9)। ਦੁਸ਼ਟ ਆਤਮਾਵਾਂ ਝੂਠੇ ਧਰਮਾਂ ਦੇ ਦੁਆਰਾ ਕੰਮ ਕਰਦੀਆਂ ਹਨ। ਬਾਈਬਲ ਸਾਨੂੰ ਦੱਸਦੀ ਹੈ ਕਿ ਜਦੋਂ ਲੋਕ ਮੂਰਤੀਆਂ ਦੀ ਪੂਜਾ ਕਰਦੇ ਹਨ ਤਾਂ ਉਹ ਦੁਸ਼ਟ ਆਤਮਾਵਾਂ ਦੀ ਪੂਜਾ ਕਰ ਰਹੇ ਹੁੰਦੇ ਹਨ। (ਪੜ੍ਹੋ ਬਿਵਸਥਾਸਾਰ 32:17; 1 ਕੁਰਿੰਥੀਆਂ ਨੂੰ 10:20-21)। ਦੁਸ਼ਟ ਆਤਮਾਵਾਂ ਅਜਿਹੇ ਲੋਕਾਂ ਦੀ ਅਰਾਧਨਾ ਦੇ ਪ੍ਰਤੀ ਪ੍ਰਤੀਕਿਰਿਆ ਕਰਦੇ ਹਨ ਜਿੰਨ੍ਹਾਂ ਇਹ ਪਤਾ ਨਹੀਂ ਹੁੰਦਾ ਕਿ ਉਹ ਕਿਸਦੀ ਅਰਾਧਨਾ ਕਰ ਰਹੇ ਹਨ। ਜਿਵੇਂ ਪਰਮੇਸ਼ੁਰ ਦੀ ਅਰਾਧਨਾ ਕਰਨ ਵਾਲੇ ਪਰਮੇਸ਼ੁਰ ਜਿਹੇ ਬਣ ਜਾਂਦੇ ਹਨ ਅਤੇ ਪਵਿੱਤਰਤਾਈ ਦੇ ਵਿੱਚ ਖੁਸ਼ ਹੁੰਦੇ ਹਨ, ਇਸੇ ਪ੍ਰਕਾਰ ਦੁਸ਼ਟ ਆਤਮਾਵਾਂ ਦੀ ਅਰਾਧਨਾ ਕਰਨ ਵਾਲੇ ਹੋਰ ਜਿਆਦਾ ਦੁਸ਼ਟ ਬਣ ਜਾਂਦੇ ਹਨ ਅਤੇ ਦੁਸ਼ਟਤਾ ਦੇ ਵਿੱਚ ਪ੍ਰਸੰਨ ਹੁੰਦੇ ਹਨ। ਸ਼ਾਇਦ ਹੁਣ ਤੱਕ ਹੋਈ ਸਭ ਤੋਂ ਪੂਰੀ ਅਰਾਧਨਾ ਉਹ ਸੀ ਜਿਸ ਵਿੱਚ ਲੋਕ ਭੂਤਾਂ ਦੇ ਅੱਗੇ ਆਪਣੇ ਬੱਚਿਆਂ ਦੀ ਬਲੀ ਦਿੰਦੇ ਹਨ। (ਪੜ੍ਹੋ ਜ਼ਬੂਰਾਂ ਦੀ ਪੋਥੀ 106:37-38)।

ਸ਼ੈਤਾਨ ਅਤੇ ਹੋਰ ਭੂਤ ਲੋਕਾਂ ਦੇ ਮਨਾਂ ਅਤੇ ਵਿਵਹਾਰ ਨੂੰ ਪੂਰੀ ਤਰ੍ਹਾਂ ਕਾਬੂ ਵਿੱਚ ਲਿਆਉਣ ਦਾ ਯਤਨ ਕਰਦੇ ਹਨ। ਇਸ ਨੂੰ “ਦੁਸ਼ਟ ਆਤਮਾ ਦੁਆਰਾ ਜਕੜੇ ਜਾਣਾ” ਕਿਹਾ ਜਾਂਦਾ ਹੈ। ਕੁਝ ਲੋਕ ਖੁਦ ਆਪਣੇ ਆਪ ਨੂੰ ਇਸਦੇ ਵਿੱਚ ਫਸਾ ਲੈਂਦੇ ਹਨ; ਅਤੇ ਸ਼ਾਇਦ ਕੁਝ ਲੋਕਾਂ ਨੇ ਇਸਦੀ ਪਹਿਚਾਣ ਕੀਤੇ ਬਿਨਾਂ ਇਸਨੂੰ ਆਪਣੇ ਜੀਵਨਾਂ ਵਿੱਚ ਪ੍ਰਵਾਨਗੀ ਦੇ ਦਿੰਦੇ ਹਨ। ਕੁਝ ਲੋਕ ਹੌਲੀ ਹੌਲੀ ਇਸਦੇ ਵਿੱਚ ਗਏ ਹਨ, ਇਹ ਸੋਚਦੇ ਹੋਏ ਕਿ ਉਹ ਆਪਣੇ ਮਕਸਦਾਂ ਨੂੰ ਪੂਰਿਆਂ ਕਰਨ ਦੇ ਲਈ ਸ਼ਕਤੀ ਪ੍ਰਾਪਤ ਕਰ ਰਹੇ ਸਨ। ਦੁਸ਼ਟ ਆਤਮਾ ਨਾਲ ਜਕੜਿਆ ਹੋਇਆ ਵਿਅਕਤੀ ਆਤਮਾਵਾਂ ਦਾ ਗ਼ੁਲਾਮ ਬਣ ਜਾਂਦਾ ਹੈ, ਉਹ ਸਵੈ-ਨਾਸ਼ ਵੱਲ ਵੱਧਦਾ ਹੈ ਅਤੇ ਉਹ ਆਪਣੇ ਮਨ ਅਤੇ ਭਾਵਨਾਵਾਂ ਦੇ ਵਿੱਚ ਭਿਆਨਕ ਪੀੜ ਝੱਲਦਾ ਹੈ (ਪੜ੍ਹੋ ਮਰਕੁਸ 5:2-5)। ਸਿਰਫ਼ ਯਿਸੂ ਹੀ ਕਿਸੇ ਵਿਅਕਤੀ ਨੂੰ ਅਜਿਹੇ ਬੰਧਨ ਤੋਂ ਛੁਟਕਾਰਾ ਦੇ ਸਕਦਾ ਹੈ।

ਜਿੰਨ੍ਹਾਂ ਦੇਸ਼ਾਂ ਦੇ ਵਿੱਚ ਸ਼ੁਭਸਮਾਚਾਰ ਵੱਡੇ ਪੱਧਰ ਤੇ ਫੈਲਿਆ ਹੈ, ਉੱਥੇ ਦੁਸ਼ਟ ਆਤਮਾਵਾਂ ਦਾ ਕੰਮ ਅਕਸਰ ਲੁਕਿਆ ਹੋਇਆ ਹੁੰਦਾ ਹੈ। ਇਹ ਹਾਸੋਹੀਣਾ ਹੈ ਕਿ ਇੰਨ੍ਹਾਂ “ਸੱਭਿਅਤ” ਦੇਸ਼ਾਂ ਦੇ ਵਿੱਚ ਹੀ ਲੋਕ ਜਿਆਦਾਤਰ ਲੋਕ ਧਰਮ ਨਿਰਪੱਖ ਜਾਂ ਨਾਸਤਿਕ ਹਨ, ਜੋ ਕਿਸੇ ਵੀ ਆਤਮਿਕ ਸ਼ਕਤੀ ਜਾਂ ਆਤਮਾਵਾਂ ਦੇ ਹੋਣ ਦਾ ਇਨਕਾਰ ਕਰਦੇ ਹਨ। ਅਜਿਹੇ ਹਾਲਾਤਾਂ ਦੇ ਵਿੱਚ, ਦੁਸ਼ਟ ਆਤਮਾਵਾਂ ਖੁੱਲ੍ਹ ਕੇ ਕੰਮ ਨਹੀਂ ਕਰਦੀਆਂ, ਕਿਉਂਕਿ ਜੇਕਰ ਉਹ ਉਨ੍ਹਾਂ ਲੋਕਾਂ ਨੂੰ ਡਰਾ ਦੇਣ ਜਿੰਨ੍ਹਾਂ ਨੇ ਸ਼ੁਭਸਮਾਚਾਰ ਨੂੰ ਸੁਣਿਆ ਹੋਇਆ ਹੈ ਤਾਂ ਛੁਟਕਾਰੇ ਅਤੇ ਸੁਰੱਖਿਆ ਦੇ ਲਈ ਪਰਮੇਸ਼ੁਰ ਦੇ ਵੱਲ ਮੁੜ ਆਉਣਗੇ।

ਜਿੰਨ੍ਹਾਂ ਦੇਸ਼ਾਂ ਦੇ ਵਿੱਚ ਸ਼ੁਭਸਮਾਚਾਰ ਦੀ ਘੱਟ ਜਾਣਕਾਰੀ ਹੈ, ਉੱਥੇ ਦੁਸ਼ਟ ਆਤਮਾਵਾਮ ਖੁੱਲ੍ਹ ਕੇ ਕੰਮ ਕਰਦੀਆਂ ਹਨ। ਉੱਥੋਂ ਦੇ ਲੋਕ ਇਹ ਨਹੀਂ ਜਾਣਦੇ ਕਿ ਉਹ ਛੁਟਕਾਰੇ ਦੇ ਲਈ ਯਿਸੂ ਦੇ ਕੋਲ ਜਾ ਸਕਦੇ ਹਨ, ਇਸ ਲਈ ਸ਼ੈਤਾਨੀ ਸ਼ਕਤੀਆਂ ਉਨ੍ਹਾਂ ਨੂੰ ਡਰਾਉਂਦੀਆਂ ਹਨ ਅਤੇ ਆਪਣੇ ਅਧੀਨ ਕਰ ਲੈਂਦੀਆਂ ਹਨ। ਲੋਕ ਅਨੰਦ ਅਤੇ ਇੱਛਾ ਦੇ ਨਾਲ ਨਹੀਂ ਸਗੋਂ ਡਰ ਦੇ ਨਾਲ ਆਤਮਾਵਾਂ ਦੀ ਸੇਵਾ ਕਰਦੇ ਹਨ। ਸ਼ੁਭਸਮਾਚਾਰ ਉਨ੍ਹਾਂ ਦੇ ਲਈ ਛੁਟਕਾਰੇ ਅਤੇ ਆਜਾਦੀ ਦੇ ਅਦਭੁੱਤ ਸੰਦੇਸ਼ ਦੇ ਰੂਪ ਵਿੱਚ ਆਉਂਦਾ ਹੈ।

[1]ਸ਼ੈਤਾਨ ਦੇ ਲਗਾਤਾਰ ਹਮਲੇ ਦੇ ਕਾਰਨ, ਅਤੇ ਇੱਕ ਆਤਮਿਕ ਯੁੱਧ ਦੇ ਵਿੱਚ ਹਾਂ। ਸਾਨੂੰ ਇਹ ਯਾਦ ਰੱਖਣ ਦੀ ਚੇਤਾਵਨੀ ਦਿੱਤੀ ਗਈ ਹੈ ਕਿ ਸਾਡੀ ਲੜਾਈ ਆਤਮਿਕ ਸੰਸਾਰ ਦੇ ਵਿੱਚ ਹੈ ਅਤੇ ਕਿਸੇ ਸਰੀਰਕ ਦੁਸ਼ਮਣ ਦੇ ਵਿਰੁੱਧ ਨਹੀਂ ਹੈ। (ਪੜ੍ਹੋ ਅਫ਼ਸੀਆਂ ਨੂੰ 6:12।) ਸਾਨੂੰ ਆਤਮਿਕ ਸ਼ਸਤਰ ਬਸਤਰ ਪਹਿਣਨ ਦੇ ਲਈ ਕਿਹਾ ਗਿਆ ਹੈ, ਤਾਂ ਕਿ ਅਸੀਂ ਆਪਣੀ ਸੁਰੱਖਿਆ ਕਰ ਸਕੀਏ (ਅਫ਼ਸੀਆਂ ਨੂੰ 6:13)। ਅਸੀਂ ਜਿੱਤ ਦਾ ਭਰੋਸਾ ਰੱਖ ਸਕਦੇ ਹਾਂ ਕਿਉਂਕਿ ਸ਼ੈਤਾਨ ਪਰਮੇਸ਼ੁਰ ਦੀ ਉਸ ਸ਼ਕਤੀ ਦਾ ਸਾਹਮਣਾ ਨਹੀਂ ਕਰ ਸਕਦਾ ਜੋ ਸਾਡੇ ਅੰਦਰ ਹੈ, ਜਦੋਂ ਅਸੀਂ ਸ਼ੈਤਾਨ ਦਾ ਸਾਹਮਣਾ ਕਰਾਂਗੇ, ਉਹ ਸਾਡੇ ਕੋਲੋਂ ਨੱਸ ਜਾਏਗਾ (ਯਾਕੂਬ 4:7)।

► ਕੀ ਸ਼ੈਤਾਨ ਪਰਮੇਸ਼ੁਰ ਦੇ ਮੁਕਾਬਲੇ ਦਾ ਵਿਰੋਧੀ ਹੈ?

ਸ਼ੈਤਾਨ ਦੇ ਕੋਲ ਮਨੁੱਖਾਂ ਨਾਲੋਂ ਉਨ੍ਹਾਂ ਦੀ ਵਰਤਮਾਨ ਮਰਨਹਾਰ ਸਥਿਤੀ ਨਾਲੋਂ ਕਿਤੇ ਵਧੇਰੇ ਸ਼ਕਤੀ ਹੈ। ਪਰ ਇਹ ਸ਼ਕਤੀ ਪਰਮੇਸ਼ੁਰ ਦੇ ਅੱਗੇ ਕੁਝ ਵੀ ਨਹੀਂ ਹੈ। ਉਸਨੂੰ ਪਰਮੇਸ਼ੁਰ ਦੇ ਮੁਕਾਬਲੇ ਦੇ ਵਿਰੋਧੀ ਵੱਜੋਂ ਨਹੀਂ ਵੇਖਿਆ ਜਾਣਾ ਚਾਹੀਦਾ। ਕੁਝ ਤੱਤ ਗਿਆਨੀ ਸੋਚਦੇ ਹਨ ਸੰਸਾਰ ਦੇ ਵਿੱਚ ਭਲੇ ਅਤੇ ਬੁਰੇ ਦੀ ਸ਼ਕਤੀ ਇੱਕ ਸਮਾਨ ਹੈ। ਇਹ ਸਚਿਆਈ ਤੋਂ ਬਹੁਤ ਦੂਰ ਹੈ। ਸ਼ੈਤਾਨ ਹਰ ਸਥਾਨ ਤੇ ਮੌਜੂਦ ਨਹੀਂ ਹੈ, ਉਹ ਸਭ ਕੁਝ ਨਹੀਂ ਜਾਣਦਾ ਅਤੇ ਗਲ਼ਤੀਆਂ ਕਰਦਾ ਹੈ। ਪਰਮੇਸ਼ੁਰ ਸਾਰੀਆਂ ਆਤਮਾਵਾਂ ਦਾ ਰਚਨਹਾਰਾ ਹੈ, ਉਹ ਉਸਨੂੰ ਹਰਾ ਨਹੀਂ ਸਕਦੀਆਂ। ਜਦੋਂ ਦਿੱਤਾ ਸਮਾਂ ਪੂਰਾ ਹੋ ਗਿਆ,ਸਾਰੀਆਂ ਆਤਮਾਵਾਂ ਦਾ ਪਾਪੀ ਮਨੁੱਖਾਂ ਸਮੇਤ ਨਿਆਂ ਹੋਵੇਗਾ, ਬੰਨ੍ਹੀਆਂ ਜਾਣਗੀਆਂ ਅਤੇ ਸਜ਼ਾ ਦਿੱਤੀ ਜਾਵੇਗੀ।

ਸ਼ੈਤਾਨ ਦੀ ਹਾਰ ਦਾ ਵਾਇਦਾ ਕਾਫੀ ਦੇਰ ਪਹਿਲਾਂ ਕੀਤਾ ਗਿਆ ਸੀ। ਪਰਮੇਸ਼ੁਰ ਨੇ ਅਜਿਹਾ ਮੁਕਤੀਦਾਤਾ ਭੇਜਣ ਦਾ ਵਾਇਦਾ ਕੀਤਾ ਜੋ ਸੱਪ ਦੇ ਸਿਰ ਨੂੰ ਮਿੱਦ ਸੁੱਟੇਗਾ (ਉਤਪਤ 3:15)। ਯਿਸੂ ਸ਼ੈਤਾਨ ਦੇ ਕੰਮ ਦਾ ਨਾਸ਼ ਕਰਨ ਆਤੇ ਸਾਨੂੰ ਪਾਪ ਤੇ ਜਿੱਤ ਦੇਣ ਦੇ ਲਈ ਆਇਆ (ਪੜ੍ਹੋ ਯੂਹੰਨਾ ਦੀ ਪਹਿਲੀ ਪੱਤ੍ਰੀ 3:8)। ਯਿਸੂ ਆਪਣੀ ਮੌਤ ਅਤੇ ਮੁਰਦਿਆਂ ਵਿੱਚੋਂ ਜੀ ਉੱਠਣ ਦੇ ਦੁਆਰਾ ਸ਼ੈਤਾਨ ਨੂੰ ਮੌਤ ਤੇ ਅਧਿਕਾਰ ਰੱਖਣ ਦੀ ਪ੍ਰਵਾਨਗੀ ਨਹੀਂ ਦਿੰਦਾ (ਇਬਰਾਨੀਆਂ ਨੂੰ 2:14; ਪਰਕਾਸ਼ ਦੀ ਪੋਥੀ 1:18)। ਸ਼ੈਤਾਨ ਅਤੇ ਉਸਦੀਆਂ ਦੁਸ਼ਤ ਆਤਮਾਵਾਂ ਦੀ ਅੰਤਿਮ ਮੰਜ਼ਿਲ ਅੱਗ ਦੀ ਝੀਲ ਹੈ। (ਪੜ੍ਹੋ ਮੱਤੀ 25:41)।

ਪਰਮੇਸ਼ੁਰ ਨੇ ਪਹਿਲਾਂ ਤੋਂ ਹੀ ਸ਼ੈਤਾਨ ਦੇ ਕੰਮ ਨੂੰ ਸੀਮਿਤ ਕੀਤਾ ਹੋਇਆ ਹੈ (ਅੱਯੂਬ 1:12, ਅੱਯੂਬ 2:6)। ਇਸਦਾ ਅਰਥ ਹੈ ਕਿ ਸਾਨੂੰ ਇਸ ਡਰ ਦੇ ਵਿੱਚ ਜਿਉਣ ਦੀ ਜਰੂਰਤ ਨਹੀਂ ਹੈ ਕਿ ਸ਼ੈਤਾਨ ਸਾਡੇ ਨਾਲ ਕੀ ਕਰ ਸਕਦਾ ਹੈ। ਜਦੋਂ ਤੱਕ ਪਰਮੇਸ਼ੁਰ ਪ੍ਰਵਾਨਗੀ ਨਾ ਦੇਵੇ ਉਦੋਂ ਤੱਕ ਕੁਝ ਵੀ ਨਹੀਂ ਹੋ ਸਕਦਾ, ਅਤੇ ਪਰਮੇਸ਼ੁਰ ਜਾਣਦਾ ਹੈ ਕਿ ਅਸੀਂ ਕਿੰਨਾ ਝੱਲ ਸਕਦੇ ਹਾਂ (1 ਕੁਰਿੰਥੀਆਂ ਨੂੰ 10:13)।

ਸਾਨੂੰ ਸਿਰਫ਼ ਸ਼ੈਤਾਨ ਦੇ ਹਮਲਿਆਂ ਦੇ ਵਿਰੁੱਧ ਸੁਰੱਖਿਆ ਹੀ ਨਹੀਂ ਦਿੱਤੀ ਗਈ ਹੈ, ਪਰ ਸਾਡੇ ਕੋਲ ਇਹ ਸ਼ਕਤੀ ਵੀ ਹੈ ਕਿ ਅਸੀਂ ਸ਼ੈਤਾਨ ਦੇ ਵਿਰੁੱਧ ਜਾ ਕੇ ਪਰਮੇਸ਼ੁਰ ਦੇ ਰਾਜ ਨੂੰ ਵਧਾ ਸਕਦੇ ਹਾਂ। ਯਿਸੂ ਨੇ ਸਿਰਫ਼ ਰਸੂਲਾਂ ਨੂੰ ਹੀ ਨਹੀਂ ਸਗੋਂ ਆਪਣੇ ਹੋਰਾਂ ਚੇਲਿਆਂ ਨੂੰ ਸ਼ਕਤੀ ਦਿੱਤੀ, ਕਿ ਉਹ ਦੁਸ਼ਟ ਆਤਮਾਵਾਂ ਨੂੰ ਕੱਢ ਸਕਣ (ਪੜ੍ਹੋ ਲੂਕਾ 10:17)। ਜਦੋਂ ਅਸੀਂ ਸ਼ੁਭਸਮਾਚਾਰ ਦਾ ਪ੍ਰਚਾਰ ਕਰਦੇ ਹਾਂ, ਪਰਮੇਸ਼ੁਰ ਆਪਣੀ ਸਚਿਆਈ ਨੂੰ ਸ਼ਕਤੀ ਦਿੰਦਾ ਹੈ ਅਤੇ ਉਹ ਸ਼ੁਭਸਮਾਚਾਰ ਤੇ ਵਿਸ਼ਵਾਸ ਕਰਨ ਵਾਲਿਆਂ ਨੂੰ ਛੁਟਕਾਰਾ ਦਿੰਦਾ ਹੈ।

ਕਲਾਸ ਦੇ ਆਗੂ ਲਈ ਸੂਚਨਾ: ਕਲਾਸ ਦਾ ਇੱਕ ਮੈਂਬਰ ਇਸ ਭਾਗ ਦੀ ਵਿਆਖਿਆ ਕਰ ਸਕਦਾ ਹੈ।

ਕੁਝ ਲੋਕ ਆਤਮਿਕ ਸੰਸਾਰ ਵੱਲ ਬਹੁਤ ਜਿਆਦਾ ਆਕਰਸ਼ਤ ਹੁੰਦੇ ਹਨ। ਉਹ ਦੂਤਾਂ ਦਾ ਅਧਿਐਨ ਕਰਦੇ ਹਨ ਅਤੇ ਉਹ ਉਨ੍ਹਾਂ ਦੇ ਨਾਲ ਸੰਪਰਕ ਕਰਨ ਦਾ ਯਤਨ ਵੀ ਕਰ ਸਕਦੇ ਹਨ। ਬਾਈਬਲ ਸਾਨੂੰ ਕਦੇ ਵੀ ਕਿਸੇ ਦੂਤ ਦੇ ਅੱਗੇ ਪ੍ਰਾਰਥਨਾ ਕਰਨ ਜਾਂ ਉਨ੍ਹਾਂ ਦੇ ਨਾਲ ਸੰਬੰਧ ਰੱਖਣ ਦਾ ਯਤਨ ਕਰਨ ਦੇ ਲਈ ਨਹੀਂ ਕਹਿੰਦੀ। ਬਾਈਬਲ ਸਾਨੂੰ ਉਨ੍ਹਾਂ ਦੀ ਅਰਾਧਨਾ ਨਾ ਕਰਨ ਦੀ ਅਤੇ ਲੋੜ ਤੋਂ ਵੱਧ ਉਨ੍ਹਾਂ ਬਾਰੇ ਜਾਣਕਾਰੀ ਲੈਣ ਦਾ ਯਤਨ ਕਰਨ ਦੇ ਵਿਰੁੱਧ ਚੇਤਾਵਨੀ ਦਿੰਦੀ ਹੈ (ਕੁਲੁੱਸੀਆਂ ਨੂੰ 2:18)।

ਜੇਕਰ ਕੋਈ ਵਿਅਕਤੀ ਦੁਸ਼ਟ ਆਤਮਾਵਾਂ ਦੇ ਵਿੱਚ ਬਹੁਤ ਜਿਆਦਾ ਰੁਚੀ ਰੱਖਣ ਲੱਗ ਜਾਏ ਤਾਂ ਫਿਰ ਇਹ ਹੋਰ ਵੀ ਜਿਆਦਾ ਖ਼ਤਰਨਾਕ ਹੋ ਜਾਂਦਾ ਹੈ। ਕੁਝ ਲੋਕ ਉਨ੍ਹਾਂ ਦੀ ਸ਼ਕਤੀ ਅਤੇ ਕੰਮਾਂ ਕਰਕੇ ਉਨ੍ਹਾਂ ਦੇ ਵੱਲ ਆਕਰਸ਼ਤ ਹੋ ਜਾਂਦੇ ਹਨ। ਕੁਝ ਅਜਿਹੀਆਂ ਖੇਡਾਂ ਹਨ ਜਿੰਨ੍ਹਾਂ ਦੁਆਰਾ ਆਤਮਾਵਾਂ ਦੇ ਨਾਲ ਸੰਪਰਕ ਸਾਧਿਆ ਜਾਂਦਾ ਹੈ। ਅਜਿਹੀਆਂ ਵਿਧੀਆਂ ਹਨ ਜਿੰਨ੍ਹਾਂ ਦੁਆਰਾ ਲੋਕ ਆਤਮਾਵਾਂ ਤੋਂ ਜਾਣਕਾਰੀ ਪ੍ਰਾਪਤ ਕਰਦੇ ਹਨ। ਸਾਨੂੰ ਪਰਮੇਸ਼ੁਰ ਦੀ ਸ਼ਕਤੀ ਦੁਆਰਾ ਦੁਸ਼ਟ ਆਤਮਾਵਾਂ ਦਾ ਸਾਹਮਣਾ ਕਰਨ ਤੋਂ ਇਲਾਵਾ ਉਨ੍ਹਾਂ ਦੇ ਨਾਲ ਕਿਸੇ ਹੋਰ ਕੰਮ ਵਿੱਚ ਸ਼ਾਮਿਲ ਨਹੀਂ ਹੋਣਾ ਚਾਹੀਦਾ (ਯਾਕੂਬ 4:7, ਪਤਰਸ ਦੀ ਪਹਿਲੀ ਪੱਤ੍ਰੀ 5:8-9)।

ਕੁਝ ਲੋਕਾਂ ਨੇ ਆਤਮਾਵਾਂ ਦੇ ਸੰਸਾਰ ਅਤੇ ਉਨ੍ਹਾਂ ਦੇ ਕੰਮਾਂ ਬਾਰੇ ਬਹੁਤ ਵਿਖਿਆਤਮਕ ਅਤੇ ਗੁੰਝਲਦਾਰ ਵਿਆਖਿਆਵਾਂ ਵਿਕਸਿਤ ਕੀਤੀਆਂ ਹਨ। ਪਰ, ਪਰਮੇਸ਼ੁਰ ਨੇ ਬਾਈਬਲ ਦੇ ਵਿੱਚ ਆਤਮਾਵਾਂ ਦੇ ਸੰਸਾਰ ਬਾਰੇ ਉਨੀ ਹੀ ਜਾਣਕਾਰੀ ਦਿੱਤੀ ਜਿੰਨ੍ਹੀ ਸਾਨੂੰ ਜਾਣਨ ਦੀ ਜਰੂਰਤ ਹੈ।

► ਵਿਸ਼ਵਾਸ ਕਥਨਾਂ ਨੂੰ ਘੱਟੋ-ਘੱਟ ਦੋ ਵਾਰ ਮਿਲ ਕੇ ਪੜ੍ਹੋ।

ਪਰਮੇਸ਼ੁਰ ਨੇ ਸਾਰੀਆਂ ਆਤਮਾਵਾਂ ਨੂੰ ਰਚਿਆ ਹੈ। ਪਵਿੱਤਰ ਸਵਰਗਦੂਤ ਪਰਮੇਸ਼ੁਰ ਦੀ ਅਰਾਧਨਾ ਕਰਦੇ ਹਨ ਅਤੇ ਵਿਸ਼ਵਾਸੀਆਂ ਦੀ ਸੁਰੱਖਿਆ ਕਰਦੇ ਹਨ। ਉਨ੍ਹਾਂ ਨੇ ਨੈਤਿਕ ਚੋਣਾਂ ਕੀਤੀਆਂ ਹਨ। ਸਵਰਗਦੂਤ ਅਮਰ ਹਨ, ਉਹ ਵਿਅਕਤੀਗਤ ਪ੍ਰਾਣੀ ਹਨ ਜੋ ਬੋਲ ਸਕਦੇ ਹਨ, ਅਰਾਧਨਾ ਅਤੇ ਤਰਕ ਕਰ ਸਕਦੇ ਹਨ। ਸ਼ੈਤਾਨ ਅਤੇ ਉਸਦੇ ਨਾਲ ਕੁਝ ਦੂਤ ਪਾਪ ਦੇ ਵਿੱਚ ਡਿੱਗ ਪਏ ਅਤੇ ਉਹ ਪਰਮੇਸ਼ੁਰ ਅਤੇ ਮਨੁੱਖਤਾ ਦੇ ਦੁਸ਼ਮਣ ਹਨ। ਪਰਮੇਸ਼ੁਰ ਸ਼ੈਤਾਨ ਦੀ ਸ਼ਕਤੀ ਨੂੰ ਸੀਮਿਤ ਰੱਖਦਾ ਹੈ ਅਤੇ ਉਸਨੇ ਉਸਨੂੰ ਸਦੀਪਕ ਸਜ਼ਾ ਸੁਣਾਈ ਹੋਈ ਹੈ।

(1) ਵਚਨਾਂ ਦੇ ਅਸਾਇਨਮੈਂਟ: ਹਰੇਕ ਵਿਦਿਆਰਥੀ ਨੂੰ ਹੇਠਾਂ ਦਿੱਤੇ ਵਚਨਾਂ ਦੀ ਸੂਚੀ ਵਿੱਚੋਂ ਇੱਕ ਸੌਂਪਿਆ ਜਾਵੇਗਾ। ਅੱਗਲੀ ਕਲਾਸ ਦੇ ਸ਼ੈਸ਼ਨ ਤੋਂ ਪਹਿਲਾਂ, ਤੁਹਾਨੂੰ ਵਚਨ ਨੂੰ ਪੜਣਾ ਚਾਹੀਦਾ ਹੈ ਅਤੇ ਇੱਕ ਪੈਰਾਗ੍ਰਾਫ ਦੇ ਵਿੱਚ ਲਿਖਣਾ ਹੋਵੇਗਾ ਕਿ ਇਹ ਪਾਠ ਦੇ ਵਿਸ਼ੇ ਬਾਰੇ ਕੀ ਕਹਿੰਦਾ ਹੈ।

• ਮੱਤੀ 12:43-45

• ਲੂਕਾ 8:27-35

• ਰਸੂਲਾਂ ਦੇ ਕਰਤੱਬ 12:7-11

• 2 ਕੁਰਿੰਥੀਆਂ ਨੂੰ 11:13-15

• ਪਤਰਸ ਦੀ ਪਹਿਲੀ ਪੱਤ੍ਰੀ 5:8-9

(2) ਪ੍ਰੀਖਿਆ: ਤੁਸੀਂ ਅੱਗਲੀ ਕਲਾਸ ਦੀ ਸ਼ੁਰੂਆਤ ਪਾਠ 6 ਦੀ ਪ੍ਰੀਖਿਆ ਦੇ ਨਾਲ ਕਰੋਗੇ। ਤਿਆਰੀ ਦੇ ਲਈ ਪ੍ਰੀਖਿਆ ਦੇ ਪ੍ਰਸ਼ਨਾਂ ਦਾ ਧਿਆਨਪੂਰਵਕ ਅਧਿਐਨ ਕਰੋ।

(3) ਸਿਖਾਉਣ ਦਾ ਅਸਾਇਨਮੈਂਟ: ਆਪਣੀ ਕਲਾਸ ਤੋਂ ਬਾਹਰ ਸਿਖਾਉਣ ਦੀ ਸਮੇਂ ਸਾਰਨੀ ਨੂੰ ਬਣਾਉਣ ਅਤੇ ਇਸਦੇ ਬਾਰੇ ਰਿਪੋਰਟ ਦੇਣ ਨੂੰ ਯਾਦ ਰੱਖੋ।

(1) ਅਸੀਂ ਕਿਵੇਂ ਜਾਣਦੇ ਹਾਂ ਕਿ ਸਵਰਗਦੂਤ ਆਮ ਤੌਰ ਤੇ ਸ਼ਰੀਰਕ ਦੇਹ ਨਹੀਂ ਰੱਖਦੇ?

(2) ਸਵਰਗਦੂਤ ਕਦੋਂ ਰਚੇ ਗਏ ਸਨ?

(3) ਕੀ ਸਵਰਗਦੂਤ ਮਰਦੇ ਹਨ?

(4) ਚਾਰ ਤਰੀਕੇ ਲਿਖੋ ਜਿਨ੍ਹਾਂ ਨਾਲ ਅਸੀਂ ਜਾਣਦੇ ਹਾਂ ਕਿ ਸਵਰਗਦੂਤਾਂ ਦੇ ਕੋਲ ਵਿਅਕਤੀਤਵ ਹੈ।

(5) ਬਾਈਬਲ ਵਿੱਚ ਸਵਰਗਦੂਤਾਂ ਲਈ ਵਰਤੇ ਗਏ ਚਾਰ ਸ਼ਬਦ ਲਿਖੋ।

(6) ਸਵਰਗਦੂਤ ਪਰਮੇਸ਼ੁਰ ਦੀ ਸੇਵਾ ਕਰਨ ਵਾਲਿਆਂ ਲਈ ਕੀ ਕਰਦੇ ਹਨ?

(7) ਦੁਸ਼ਟ ਆਤਮਾਵਾਂ ਦਾ ਅਰੰਭ ਕੀ ਹੈ?

(8) ਮੂਰਤੀ ਪੂਜਕ ਅਸਲ ਵਿੱਚ ਕਿਸਦੀ ਅਰਾਧਨਾ ਕਰ ਰਿਹਾ ਹੁੰਦਾ ਹੈ?

(9) ਸ਼ੈਤਾਨ ਅਤੇ ਹੋਰ ਦੁਸ਼ਟ ਆਤਮਾਵਾਂ ਦੀ ਅੰਤਿਮ ਮੰਜ਼ਿਲ ਕੀ ਹੈ?

(10) ਵਿਸ਼ਵਾਸੀਆਂ ਨੂੰ ਆਤਮਿਕ ਹਮਲਿਆਂ ਤੋਂ ਆਪਣੀ ਰੱਖਿਆ ਕਰਨ ਲਈ ਕੀ ਕਰਨਾ ਚਾਹੀਦਾ ਹੈ?