(1) ਵਿਦਿਆਰਥੀ ਹੇਠਾਂ ਦੱਸੀਆਂ ਗੱਲਾਂ ਦੀ ਵਿਆਖਿਆ ਕਰ ਪਾਉਣਗੇ:

• ਉਹ ਵਿਸ਼ੇਸ਼ਤਾਵਾਂ ਜੋ ਵਿਖਾਉਂਦੀਆਂ ਹਨ ਕਿ ਪਵਿੱਤਰ ਆਤਮਾ ਇੱਕ ਵਿਅਕਤੀਤਵ ਹੈ।

• ਪਵਿੱਤਰ ਆਤਮਾ ਦੇ ਵਿਅਕਤੀਤਵ ਅਤੇ ਈਸ਼ਵਰਤਾਈ ਦੇ ਬਾਰੇ ਬਾਈਬਲ ਦੇ ਸਬੂਤ।

• ਪਵਿੱਤਰ ਆਤਮਾ ਦਾ ਇਤਿਹਾਸਿਕ ਅਤੇ ਮੌਜੂਦਾ ਕੰਮ।

• ਪਵਿੱਤਰ ਆਤਮਾ ਦੇ ਨਾਲ ਇੱਕ ਵਿਸ਼ਵਾਸੀ ਦੇ ਸੰਬੰਧ ਦੇ ਅਭਿਆਸਿਕ ਤੱਥ।

• ਪਵਿੱਤਰ ਆਤਮਾ ਦੇ ਬਾਰੇ ਮਸੀਹੀ ਵਿਸ਼ਵਾਸਾਂ ਦਾ ਇੱਕ ਬਿਆਨ।

(2) ਵਿਦਿਆਰਥੀ ਪਵਿੱਤਰ ਆਤਮਾ ਦੇ ਵਰਦਾਨਾਂ ਦੇ ਕੁਝ ਸਿਧਾਂਤ ਲਾਗੂ ਕਰਨਗੇ।

► ਜ਼ਬੂਰਾਂ ਦੀ ਪੋਥੀ 139 ਨੂੰ ਮਿਲ ਕੇ ਪੜ੍ਹੋ। ਵਚਨ ਦਾ ਇਹ ਭਾਗ ਪਰਮੇਸ਼ੁਰ ਦੇ ਆਤਮਾ ਬਾਰੇ ਕੀ ਕਹਿੰਦਾ ਹੈ?

ਕੁਝ ਲੋਕ ਸੋਚਦੇ ਹਨ ਕਿ ਪਵਿੱਤਰ ਆਤਮਾ ਸਿਰਫ਼ ਉਨ੍ਹਾਂ ਦੀਆਂ ਭਾਵਨਾਵਾਂ ਨੂੰ ਉਸਕਾਉਂਦਾ ਹੈ, ਇਹ ਕੋਈ ਅਜਿਹੀ ਸ਼ਕਤੀ ਹੈ ਜਿਸਨੂੰ ਉਪਯੋਗ ਕਰਨ ਦਾ ਉਹ ਯਤਨ ਕਰਦੇ ਹਨ, ਇੱਕ ਗ਼ੈਰ-ਵਿਅਕਤੀਤਵ ਵਾਲੀ ਸ਼ਕਤੀ ਜਾਂ ਸਾਧਾਰਨ ਤੌਰ ਤੇ ਇੱਕ ਮੌਜੂਦਗੀ। ਉਦਾਹਰਨ ਦੇ ਲਈ ਯਹੋਵਾਹ ਵਿਟਨੈਸ ਵਾਲਾ ਕੋਈ ਵਿਅਕਤੀ ਕਹੇਗਾ: ”ਪਵਿੱਤਰ ਆਤਮਾ ਕੋਈ ਵਿਅਕਤੀਤਵ ਨਹੀਂ ਹੈ, ਅਤੇ ਇਹ ਤ੍ਰਿਏਕਤਾ ਦਾ ਹਿੱਸਾ ਨਹੀਂ ਹੈ। ਪਵਿੱਤਰ ਆਤਮਾ ਪਰਮੇਸ਼ੁਰ ਦੀ ਕਿਰਿਆਸ਼ੀਲ ਸ਼ਕਤੀ ਹੈ ਜਿਸਦੇ ਉਪਯੋਗ ਦੁਆਰਾ ਉਹ ਆਪਣੀ ਇੱਛਾ ਨੂੰ ਪੂਰਿਆਂ ਕਰਦਾ ਹੈ...।ਇੱਕ ਹੱਦ ਤੱਕ ਇਸਨੂੰ ਬਿਜ਼ਲੀ ਦੀ ਤਰ੍ਹਾਂ ਵੇਖਿਆ ਜਾ ਸਕਦਾ ਹੈ।”[1]

► ਪਵਿੱਤਰ ਆਤਮਾ ਦੇ ਬਾਰੇ ਯਹੋਵਾਹ ਵਿਟਨੈਸ ਦੀ ਧਾਰਨਾ ਦੇ ਵਿੱਚ ਕੀ ਗ਼ਲਤ ਹੈ?

ਯਹੋਵਾਹ ਵਿਟਨੈਸ ਦੇ ਮੈਂਬਰ ਪਵਿੱਤਰ ਆਤਮਾ ਨੂੰ ਇੱਕ ਗ਼ੈਰ-ਵਿਅਕਤੀਤਵ ਵਾਲੀ ਸ਼ਕਤੀ ਦੇ ਵੱਜੋਂ ਵੇਖਦੇ ਹਨ। ਕਿਉਂਕਿ ਉਨ੍ਹਾਂ ਦੇ ਕੋਲ ਪਰਮੇਸ਼ੁਰ ਦੇ ਬਾਰੇ ਇੱਕ ਬਾਈਬਲ ਆਧਾਰਿਤ ਧਾਰਨਾ ਨਹੀਂ ਹੈ, ਉਹ ਪਰਮੇਸ਼ੁਰ ਦੇ ਨਾਲ ਸਹੀ ਸੰਬੰਧ ਨਹੀਂ ਰੱਖ ਸਕਦੇ।

[2]ਸਾਨੂੰ ਇਹ ਉਮੀਦ ਨਹੀਂ ਰੱਖਣੀ ਚਾਹੀਦੀ ਕਿ ਅਸੀਂ ਪਵਿੱਤਰ ਆਤਮਾ ਦੇ ਬਾਰੇ ਸਭ ਕੁਝ ਸਮਝ ਸਕਦੇ ਹਾਂ। ਯਿਸੂ ਨੇ ਕਿਹਾ ਕਿ ਪਵਿੱਤਰ ਆਤਮਾ ਦਾ ਕੰਮ ਹਵਾ ਦੀ ਤਰ੍ਹਾਂ ਹੈ; ਤੁਸੀਂ ਇਸਨੂੰ ਸੁਣਦੇ ਹੋ, ਪਰ ਤੁਹਾਨੂੰ ਨਹੀਂ ਪਤਾ ਕਿ ਇਹ ਕਿਥੋਂ ਆਉਂਦੀ ਹੈ ਅਤੇ ਕਿੱਧਰ ਨੂੰ ਜਾਂਦੀ ਹੈ (ਯੂਹੰਨਾ 3:8)। ਪਰ ਪਵਿੱਤਰ ਆਤਮਾ ਦੇ ਬਾਰੇ ਕੁਝ ਅਜਿਹੀਆਂ ਗੱਲਾਂ ਹਨ ਜਿੰਨ੍ਹਾਂ ਨੂੰ ਅਸੀਂ ਜਾਣ ਸਕਦੇ ਹਾਂ, ਅਤੇ ਉਹ ਪਰਮੇਸ਼ੁਰ ਦੇ ਨਾਲ ਸਾਡੇ ਸੰਬੰਧ ਦੇ ਲਈ ਮਹੱਤਵਪੂਰਨ ਹਨ।

[3]ਪਵਿੱਤਰ ਵਚਨਾਂ ਦਾ ਉਹ ਭਾਗ ਜੋ ਪਵਿੱਤਰ ਆਤਮਾ ਅਤੇ ਕਲੀਸਿਆ ਦੇ ਵਿੱਚਕਾਰ ਸੰਬੰਧ ਦੇ ਬਾਰੇ ਜਿਆਦਾਤਰ ਜਾਣਕਾਰੀ ਦਿੰਦਾ ਹੈ ਉਹ ਰਸੂਲਾਂ ਦੇ ਕਰਤੱਬ ਦੀ ਕਿਤਾਬ ਹੈ। ਉੱਥੇ ਅਸੀਂ ਇੱਕ ਨਮੂਨਾ ਵੇਖਦੇ ਹਾਂ ਕਿ ਕਿਵੇਂ ਕਲੀਸਿਆ ਨੇ ਸ਼ੁਰੂਆਤ ਦੇ ਵਿੱਚ ਪਵਿੱਤਰ ਆਤਮਾ ਦੇ ਪ੍ਰਤੀ ਪ੍ਰਤੀਕਿਰਿਆ ਕੀਤੀ।

1. ਉਨ੍ਹਾਂ ਨੇ ਪਵਿੱਤਰ ਆਤਮਾ ਦਾ ਪਰਮੇਸ਼ੁਰ ਦੇ ਤੌਰ ਤੇ ਆਦਰ ਕੀਤਾ। (ਪੜ੍ਹੋ ਰਸੂਲਾਂ ਦੇ ਕਰਤੱਬ 5:3-4)।

2. ਉਹ ਪਵਿੱਤਰ ਆਤਮਾ ਦੀ ਮੌਜੂਦਗੀ, ਅਗਵਾਈ ਅਤੇ ਕੰਮ ਦੇ ਪ੍ਰਤੀ ਸੁਚੇਤ ਸਨ। (ਪੜ੍ਹੋ ਰਸੂਲਾਂ ਦੇ ਕਰਤੱਬ 15:28)।

3. ਉਨ੍ਹਾਂ ਨੇ ਪਵਿੱਤਰ ਆਤਮਾ ਤੇ ਆਪਣੀ ਨਿਰਭਰਤਾ ਅਤੇ ਉਸਦੇ ਪ੍ਰਤੀ ਪ੍ਰਤੀਕਿਰਿਆ ਕਰਨ ਦੀ ਆਪਣੀ ਜਿੰਮੇਵਾਰੀ ਨੂੰ ਪਹਿਚਾਣਿਆ। (ਪੜ੍ਹੋ ਰਸੂਲਾਂ ਦੇ ਕਰਤੱਬ 4:24, 31)।

ਪਵਿੱਤਰ ਆਤਮਾ ਦੇ ਨਾਲ ਇਸ ਪ੍ਰਕਾਰ ਦਾ ਸੰਬੰਧ ਰੱਖਣ ਦੇ ਲਈ ਸਾਨੂੰ ਸਮਝਣਾ ਚਾਹੀਦਾ ਹੈ ਕਿ ਉਹ ਇੱਕ ਵਿਅਕਤੀਤਵ ਹੈ ਅਤੇ ਉਹ ਪਰਮੇਸ਼ੁਰ ਹੈ।

ਪਵਿੱਤਰ ਆਤਮਾ ਦੇ ਕੋਲ ਯਿਸੂ ਦੀ ਤਰ੍ਹਾਂ ਇੱਕ ਭੋਤਿਕ ਸਰੀਰ ਨਹੀਂ ਹੈ, ਪਰ ਉਹ ਇੱਕ ਵਿਅਕਤੀਤਵ ਹੈ । ਇੱਕ ਅਸਲ ਵਿਅਕਤੀਤਵ ਦੇ ਵਿੱਚ ਖਾਸ ਗੁਣ ਹੁੰਦੇ ਹਨ ਜਿਸਦੇ ਵਿੱਚ ਮਨ, ਇੱਛਾ, ਅਤੇ ਭਾਵਨਾਵਾਂ ਹੁੰਦੀਆਂ ਹਨ। ਕੀ ਪਵਿੱਤਰ ਆਤਮਾ ਦੇ ਕੋਲ ਇੱਛਾ ਹੈ? ਉਹ ਆਪਣੇ ਇੱਛਾ ਦੇ ਨਾਲ ਮਸੀਹੀਆਂ ਨੂੰ ਆਤਮਿਕ ਵਰਦਾਨ ਦਿੰਦਾ ਹੈ (1 ਕੁਰਿੰਥੀਆਂ ਨੂੰ 12:11)। ਕੀ ਪਵਿੱਤਰ ਆਤਮਾ ਦੇ ਕੋਲ ਇੱਕ ਮਨ ਹੈ? ਉਹ ਸਾਰੀਆਂ ਵਸਤਾਂ ਦੀ ਸਗੋਂ ਪਰਮੇਸ਼ੁਰ ਦੀਆਂ ਡੂੰਘੀਆਂ ਵਸਤਾਂ ਦੀ ਜਾਚ ਕਰ ਅਤੇ ਉਨ੍ਹਾਂ ਨੂੰ ਜਾਣਦਾ ਹੈ (1 ਕੁਰਿੰਥੀਆਂ ਨੂੰ 2:10)। ਕੀ ਪਵਿੱਤਰ ਆਤਮਾ ਦੇ ਕੋਲ ਭਾਵਨਾਵਾਂ ਹਨ? ਸਾਨੂੰ ਕਿਹਾ ਗਿਆ ਹੈ ਕਿ ਪਵਿੱਤਰ ਆਤਮਾ ਨੂੰ ਉਦਾਸ ਨਾ ਕਰੋ (ਅਫ਼ਸੀਆਂ ਨੂੰ 4:30)। ਜੇਕਰ ਪਵਿੱਤਰ ਆਤਮਾ ਉਦਾਸ ਹੋ ਸਕਦਾ ਹੈ, ਤਾਂ ਫਿਰ ਉਸਦੇ ਕੋਲ ਭਾਵਨਾਵਾਂ ਹਨ। ਕਿਉਂਕਿ ਪਵਿੱਤਰ ਆਤਮਾ ਦੇ ਕੋਲ ਮਨ, ਇੱਛਾ ਅਤੇ ਭਾਵਨਾਵਾਂ ਹਨ, ਇਸ ਕਾਰਨ ਅਸੀਂ ਜਾਣਦੇ ਹਾਂ ਕਿ ਉਹ ਇੱਕ ਵਿਅਕਤੀਤਵ ਹੈ।

► ਸਾਡੇ ਲਈ ਇਹ ਜਾਨਣਾ ਮਹੱਤਵਪੂਰਨ ਕਿਉਂ ਹੈ ਕਿ ਪਵਿੱਤਰ ਆਤਮਾ ਇੱਕ ਵਿਅਕਤੀਤਵ ਹੈ?

ਇੱਕ ਵਿਅਕਤੀਤਵ ਦੇ ਕੋਲ ਦੂਸਰਿਆਂ ਦੇ ਨਾਲ ਸੰਬੰਧ ਰੱਖਣ ਦੀ ਯੋਗਤਾ ਹੁੰਦੀ ਹੈ। ਜੇਕਰ ਪਵਿੱਤਰ ਆਤਮਾ ਇੱਕ ਗ਼ੈਰ-ਵਿਅਕਤੀਤਵ ਵਾਲੀ ਸ਼ਕਤੀ ਹੈ, ਤਾਂ ਫਿਰ ਅਸੀਂ ਉਸਦੇ ਨਾਲ ਕੋਈ ਸੰਬੰਧ ਨਹੀਂ ਜੋੜ ਸਕਦੇ। ਪਰ ਫ਼ਿਲਿੱਪੀਆਂ ਨੂੰ 2:1 ਅਤੇ 2 ਕੁਰਿੰਥੀਆਂ ਨੂੰ 13:14 ਦੇ ਅਨੁਸਾਰ ਪਵਿੱਤਰ ਆਤਮਾ ਸਾਡੇ ਨਾਲ ਸੰਗਤੀ ਕਰ ਸਕਦਾ ਹੈ, ਇਸ ਲਈ ਉਹ ਜਰੂਰ ਇੱਕ ਵਿਅਕਤੀਤਵ ਹੈ।

ਕਲਾਸ ਦੇ ਆਗੂ ਲਈ ਸੂਚਨਾ: ਪਵਿੱਤਰ ਆਤਮਾ ਦੇ ਵਿਅਕਤੀਤਵ ਦੇ ਸਬੂਤ ਦੇ ਲਈ, ਇਸ ਪਾਠ ਦੇ ਅੰਤ ਵਿੱਚ ਦਿੱਤੇ ਭਾਗ ਨੂੰ ਵੇਖੋ ਜਿਸਦਾ ਮੁੱਖ ਵਿਸ਼ਾ ਇਸ ਪ੍ਰਕਾਰ ਹੈ “ਪਵਿੱਤਰ ਆਤਮਾ ਦੇ ਵਿਅਕਤੀਤਵ ਦੇ ਬਾਰੇ ਬਾਈਬਲ ਦੇ ਸਬੂਤ।”

ਪਵਿੱਤਰ ਆਤਮਾ ਜਾਣੀ-ਜਾਣ ਹੈ, ਸਭ ਵੇਖਦਾ ਹੈ, ਹਰੇਕ ਸਥਾਨ ਤੇ ਮੌਜੂਦ ਹੈ। ਹਨਾਨਿਯਾ ਅਤੇ ਸਫ਼ੀਰਾ ਦੀ ਕਹਾਣੀ ਯਾਦ ਹੈ? ਹਨਾਨਿਯਾ ਦੇ ਮਾਰੇ ਜਾਣ ਤੋਂ ਪਹਿਲਾਂ, ਪਤਰਸ ਨੇ ਉਸਨੂੰ ਕਿਹਾ, “ਸ਼ਤਾਨ ਤੇਰੇ ਮਨ ਵਿੱਚ ਕਿਉਂ ਸਮਾਇਆ ਜੋ ਤੂੰ ਪਵਿੱਤ੍ਰ ਆਤਮਾ ਨਾਲ ਝੂਠ ਬੋਲੇਂ?... ਤੂੰ ਮਨੁੱਖਾਂ ਨਾਲ ਨਹੀਂ ਸਗੋਂ ਪਰਮੇਸ਼ੁਰ ਨਾਲ ਝੂਠ ਬੋਲਿਆ ਹੈਂ” (ਰਸੂਲਾਂ ਦੇ ਕਰਤੱਬ 5:3-4)। ਇੱਥੇ ਅਸੀਂ ਵੇਖਦੇ ਹਾਂ ਕਿ ਪਵਿੱਤਰ ਆਤਮਾ ਦੇ ਨਾਲ ਝੂਠ ਬੋਲਣਾ ਪਰਮੇਸ਼ੁਰ ਦੇ ਨਾਲ ਝੂਠ ਬੋਲਣ ਦੇ ਸਮਾਨ ਹੈ; ਇਸ ਲਈ, ਪਵਿੱਤਰ ਆਤਮਾ ਪਰਮੇਸ਼ੁਰ ਹੈ।

ਪਵਿੱਤਰ ਆਤਮਾ ਸਭਨਾਂ ਗੱਲਾਂ ਨੂੰ ਜਾਣਦਾ ਹੈ। ਅਸੀਂ 1 ਕੁਰਿੰਥੀਆਂ ਨੂੰ 2:10-11 ਦੇ ਵਿੱਚ ਵੇਖਦੇ ਹਾਂ ਕਿ ਉਹ ਪਰਮੇਸ਼ੁਰ ਦੀਆਂ ਸਭਨਾਂ ਗੱਲਾਂ ਨੂੰ ਜਾਣਦਾ ਹੈ। ਇਸਦੇ ਲਈ ਬੇਅੰਤ (ਅਸੀਮਿਤ ਬੁੱਧ ਵਾਲੇ) ਮਨ ਦੀ ਲੋੜ ਹੁੰਦੀ ਹੈ। ਉਸਨੇ ਪੁਰਾਣੇ ਨੇਮ ਦੀਆਂ ਲਿਖਤਾਂ ਨੂੰ ਪ੍ਰੇਰਿਤ ਕੀਤਾ, ਜਿਸਦੇ ਵਿੱਚ ਭਵਿੱਖਬਾਣੀ ਵੀ ਸ਼ਾਮਿਲ ਹੈ, ਇਸ ਦੇ ਲਈ ਸਾਰਾ ਗਿਆਨ ਹੋਣਾ ਜਰੂਰੀ ਹੈ। (ਪੜ੍ਹੋ ਪਤਰਸ ਦੀ ਦੂਜੀ ਪੱਤ੍ਰੀ 1:21)। ਸਾਨੂੰ ਵਚਨਾਂ ਦੇ ਵਿੱਚ ਦੱਸਿਆ ਗਿਆ ਹੈ ਕਿ ਪਵਿੱਤਰ ਸ਼ਾਸਤਰ ਪਰਮੇਸ਼ੁਰ ਦੇ ਸਾਹ ਵਿੱਚੋਂ ਨਿੱਕਲਿਆ ਹੈ (ਤਿਮੋਥਿਉਸ ਨੂੰ ਦੂਜੀ ਪੱਤ੍ਰੀ 3:16), ਇਸ ਕਾਰਨ ਪਵਿੱਤਰ ਆਤਮਾ ਪਰਮੇਸ਼ੁਰ ਹੈ।

ਪਵਿੱਤਰ ਆਤਮਾ ਹਰੇਕ ਸਥਾਨ ਤੇ ਮੌਜੂਦ ਹੈ। ਜ਼ਬੂਰਾਂ ਦੀ ਪੋਥੀ 139:7-10 ਸਾਨੂੰ ਦੱਸਦਾ ਹੈ ਕਿ ਕੋਈ ਵਿਅਕਤੀ ਪਰਮੇਸ਼ੁਰ ਦੇ ਆਤਮਾ ਦੀ ਮੌਜੂਦਗੀ ਤੋਂ ਬਚ ਕੇ ਕਿਤੇ ਵੀ ਨਹੀਂ ਜਾ ਸਕਦਾ। ਉਹ ਹਰੇਕ ਵਿਸ਼ਵਾਸੀ ਦੇ ਨਾਲ ਮੌਜੂਦ ਹੈ, ਕਿਉਂਕਿ ਬਾਈਬਲ ਦੱਸਦੀ ਹੈ ਕਿ ਜੇਕਰ ਕਿਸੇ ਵਿਅਕਤੀ ਦੇ ਕੋਲ ਮਸੀਹ ਦਾ ਆਤਮਾ ਨਹੀਂ ਹੈ, ਤਾਂ ਉਹ ਮਸੀਹ ਦਾ ਨਹੀਂ ਹੈ (ਰੋਮੀਆਂ ਨੂੰ 8:9)। ਪ੍ਰਸੰਗ ਵਿਖਾਉਂਦਾ ਹੈ ਕਿ ਮਸੀਹ ਦਾ ਆਤਮਾ ਪਵਿੱਤਰ ਆਤਮਾ ਹੈ।

ਪਵਿੱਤਰ ਆਤਮਾ ਦੇ ਕੋਲ ਸਾਰੀ ਸਮਰੱਥਾ ਹੈ। ਉਹ ਅਜਿਹੇ ਕੰਮ ਕਰਦਾ ਹੈ ਜੋ ਸਿਰਫ਼ ਪਰਮੇਸ਼ੁਰ ਹੀ ਕਰ ਸਕਦਾ ਹੈ। ਉਹ ਸੰਸਾਰ ਨੂੰ ਪਾਪ, ਧਰਮ ਅਰ ਨਿਆਉਂ ਦੇ ਵਿਖੇ ਕਾਇਲ ਕਰਦਾ ਹੈ (ਯੂਹੰਨਾ 16:8)। ਅਜਿਹਾ ਕਰਨ ਦੇ ਲਈ ਉਸਨੂੰ ਹਰੇਕ ਵਿਅਕਤੀ ਦੇ ਵਿਵੇਕ ਨੂੰ ਪ੍ਰਭਾਵਿਤ ਕਰਨਾ ਪਵੇਗਾ ਤਾਂ ਕਿ ਉਹ ਉਨ੍ਹਾਂ ਦੇ ਮਨਾਂ ਨੂੰ ਕੁਝ ਸਚਿਆਈਆਂ ਦੇ ਵਿਖੇ ਕਾਇਲ ਕਰ ਸਕੇ। ਉਹ ਹਰੇਕ ਵਿਸ਼ਵਾਸੀ ਨੂੰ ਅੰਦਰੂਨੀ ਸਮਰੱਥਾ ਦੇਣ ਦੇ ਯੋਗ ਹੈ। (ਪੜ੍ਹੋ ਅਫ਼ਸੀਆਂ ਨੂੰ 3:16।) ਆਤਮਾ ਸੰਸਾਰ ਦੇ ਹਰੇਕ ਭਾਗ ਵਿੱਚ ਹਰੇਕ ਵਿਸ਼ਵਾਸੀ ਦੇ ਜੀਵਨ ਵਿੱਚ ਆਤਮਿਕ ਫ਼ਲ ਉਤਪੰਨ ਕਰਦਾ ਹੈ (ਪੜ੍ਹੋ ਗਲਾਤੀਆਂ ਨੂੰ 5:22-23।) ਈਸ਼ਵਰੀ ਸਮਰੱਥਾ ਤੋਂ ਇਲਾਵਾ ਹੋਰ ਕੋਈ ਇਸ ਕੰਮ ਨੂੰ ਨਹੀਂ ਕਰ ਸਕਦਾ।

ਸਾਨੂੰ ਲੂਕਾ 12:10 ਦੇ ਵਿੱਚ ਕਿਹਾ ਗਿਆ ਹੈ ਕਿ ਪਵਿੱਤਰ ਆਤਮਾ ਦੇ ਵਿਰੁੱਧ ਈਸ਼ਵਰ ਨਿੰਦਾ ਕੀ ਜਾ ਸਕਦੀ ਹੈ। ਈਸ਼ਵਰ ਨਿੰਦਾ ਸਿਰਫ਼ ਪਰਮੇਸ਼ੁਰ ਦੇ ਵਿਰੁੱਧ ਕੀਤੀ ਜਾ ਸਕਦੀ ਹੈ, ਇਸ ਲਈ, ਪਵਿੱਤਰ ਆਤਮਾ ਜਰੂਰ ਹੀ ਪਰਮੇਸ਼ੁਰ ਹੈ।

ਪਵਿੱਤਰ ਆਤਮਾ ਸਦੀਪਕ ਹੈ (ਇਬਰਾਨੀਆਂ ਨੂੰ 9:14)।

ਸਾਡੇ ਸਰੀਰਾਂ ਨੂੰ ਪਰਮੇਸ਼ੁਰ ਦੀ ਹੈਕਲ ਕਿਹਾ ਗਿਆ ਹੈ ਕਿਉਂਕਿ ਪਵਿੱਤਰ ਆਤਮਾ ਇਸਦੇ ਵਿੱਚ ਵੱਸਦਾ ਹੈ (1 ਕੁਰਿੰਥੀਆਂ ਨੂੰ 3:16)।

ਬਾਈਬਲ ਦੇ ਸਬੂਤਾਂ ਤੋਂ ਅਸੀਂ ਜਾਣਦੇ ਹਾਂ ਕਿ ਪਵਿੱਤਰ ਆਤਮਾ ਆਪ ਪਰਮੇਸ਼ੁਰ ਹੈ, ਜੋ ਤ੍ਰਿਏਕਤਾ ਦਾ ਤੀਸਰਾ ਈਸ਼ਵਰੀ ਵਿਅਕਤੀਤਵ ਹੈ।

► ਸਾਡੇ ਲਈ ਪਵਿੱਤਰ ਆਤਮਾ ਨੂੰ ਪਰਮੇਸ਼ੁਰ ਦੇ ਰੂਪ ਵਿੱਚ ਮੰਨਣਾ ਮਹੱਤਵਪੂਰਨ ਕਿਉਂ ਹੈ?

ਪਵਿੱਤਰ ਆਤਮਾ ਦੀ ਈਸ਼ਵਰਤਾਈ ਤੇ ਵਿਸ਼ਵਾਸ ਕਰਨਾ ਮਹੱਤਵਪੂਰਨ ਹੈ ਤਾਂ ਕਿ ਤੁਸੀਂ ਉਸਨੂੰ ਆਦਰ ਅਤੇ ਇੱਜ਼ਤ ਦੇ ਸਕੋ ਜਿਸਦੀ ਉਹ ਯੋਗਤਾ ਰੱਖਦਾ ਹੈ। ਪਵਿੱਤਰ ਆਤਮਾ ਦੀ ਅਰਾਧਨਾ ਕਰਨ ਦੇ ਵਿੱਚ ਅਸਫਲ ਹੋਣਾ ਇੱਕ ਗੰਭੀਰ ਗੱਲ ਹੈ।

ਜਦੋਂ ਇਹ ਕਿਹਾ ਜਾਂਦਾ ਹੈ ਕਿ ਪਵਿੱਤਰ ਆਤਮਾ ਪਿਤਾ ਅਤੇ ਪੁੱਤਰ ਨਾਲੋਂ ਵੱਖਰਾ ਹੈ ਤਾਂ ਇਸਦਾ ਇਹ ਮਤਲਬ ਨਹੀਂ ਹੈ ਕਿ ਉਹ ਮਨੁੱਖਾਂ ਦੀ ਤਰ੍ਹਾਂ ਅਲੱਗ ਵਿਅਕਤੀਤਵ ਹਨ। ਤ੍ਰਿਏਕਤਾ ਦੇ ਮੈਂਬਰ ਇੱਕ ਦੂਸਰੇ ਦੇ ਵਿੱਚ ਵਾਸ ਕਰਦੇ ਹਨ ਅਤੇ ਉਹ ਸਭ ਇੱਕ ਹੀ ਪਰਮੇਸ਼ੁਰ ਹਨ, ਪਰ ਉਹ ਇੰਨੇ ਵੱਖਰੇ ਹਨ ਕਿ ਉਹ ਇੱਕ ਦੂਸਰੇ ਦੇ ਨਾਲ ਗੱਲਬਾਤ ਕਰ ਸਕਦੇ ਹਨ, ਇੱਕ ਦੂਸਰੇ ਨੂੰ ਪਿਆਰ ਕਰ ਸਕਦੇ ਹਨ, ਅਤੇ ਇੱਕ ਦੂਸਰੇ ਦੇ ਨਾਲ ਅਤੇ ਸਾਡੇ ਨਾਲ ਨਿੱਜੀ ਸੰਬੰਧ ਰੱਖ ਸਕਦੇ ਹਨ।

ਪਵਿੱਤਰ ਵਚਨ ਤ੍ਰਿਏਕਤਾ ਦੇ ਵਿਅਕਤੀਤਵਾਂ ਦੇ ਵਿਚਾਲੇ ਪਾਏ ਜਾਣ ਵਾਲੀ ਅਲੱਗਤਾਈ ਨੂੰ ਸਿਖਾਉਂਦਾ ਹੈ। ਉਦਾਹਰਨ ਦੇ ਲਈ T ਯੂਹੰਨਾ 14-16 ਦੇ ਵਿੱਚ ਯਿਸੂ ਨੇ ਬਾਰ-ਬਾਰ ਇੱਕ ਸਹਾਇਕ ਦਾ ਜ਼ਿਕਰ ਕੀਤਾ ਜਿਸਨੂੰ ਉਹ ਉਦੋਂ ਘੱਲੇਗਾ ਜਦੋਂ ਉਹ ਪਿਤਾ ਦੇ ਕੋਲ ਵਾਪਿਸ ਚਲਾ ਜਾਵੇਗਾ (ਪੜ੍ਹੋ ਯੂਹੰਨਾ 14:16-17, 26; ਯੂਹੰਨਾ 15:26; ਯੂਹੰਨਾ 16:7, 13-15।) ਇਹ ਸਹਾਇਕ ਚੇਲ੍ਹਿਆਂ ਦੀ ਅਗਵਾਈ ਕਰੇਗਾ ਅਤੇ ਉਨ੍ਹਾਂ ਨੂੰ ਸਿਖਾਏਗਾ। ਜੇਕਰ ਯਿਸੂ ਅਤੇ ਪਵਿੱਤਰ ਆਤਮਾ ਇੱਕ ਹੀ ਵਿਅਕਤੀਤਵ ਹਨ, ਤਾਂ ਯਿਸੂ ਦੁਆਰਾ ਪਵਿੱਤਰ ਆਤਮਾ ਨੂੰ ਦੂਸਰੇ ਸਹਾਇਕ ਦੇ ਵੱਜੋਂ ਸੰਬੋਧਿਤ ਕਰਨ ਦਾ ਕੋਈ ਮਤਲਬ ਨਹੀਂ ਹੋਵੇਗਾ। ਯਿਸੂ ਜਰੂਰ ਹੀ ਕਿਸੇ ਦੂਸਰੇ ਵਿਅਕਤੀਤਵ ਦਾ ਹਵਾਲਾ ਦੇ ਰਿਹਾ ਹੋਵੇਗਾ ਜੋ ਉਸ ਨਾਲੋਂ ਅਲੱਗ ਹੈ।

ਯਿਸੂ ਨੇ ਕਿਹਾ ਕਿ ਪਵਿੱਤਰ ਆਤਮਾ ਆਪਣੇ ਅਧਿਕਾਰ ਦੇ ਨਾਲ ਨਹੀਂ ਬੋਲੇਗਾ ਪਰ ਉਹ ਮਸੀਹ ਦੀਆਂ ਗੱਲਾਂ ਨੂੰ ਪ੍ਰਗਟ ਕਰੇਗਾ, ਜਿੰਨਾਂ ਨੂੰ ਮਸੀਹ ਨੇ ਪਿਤਾ ਦੇ ਕੋਲੋਂ ਪ੍ਰਾਪਤ ਕੀਤਾ (ਯੂਹੰਨਾ 16:13-15)। ਜੇਕਰ ਯਿਸੂ ਅਤੇ ਪਿਤਾ ਪਵਿੱਤਰ ਆਤਮਾ ਦੇ ਇੱਕ ਹੀ ਵਿਅਕਤੀਤਵ ਹਨ, ਤਾਂ ਇਸ ਬਿਆਨ ਦਾ ਕੋਈ ਅਰਥ ਨਹੀਂ ਹੋਵੇਗਾ।

ਜਦੋਂ ਯਿਸੂ ਨੇ ਬਪਤਿਸਮਾ ਲਿਆ, ਤਾਂ ਇੱਕ ਸਵਰਗੀ ਬਾਣੀ ਆਈ, “ਜੋ ਤੂੰ ਮੇਰਾ ਪਿਆਰਾ ਪੁੱਤ੍ਰ ਹੈਂ,” ਅਤੇ ਪਵਿੱਤਰ ਆਤਮਾ ਕਬੂਤਰ ਦੇ ਸਮਾਨ ਯਿਸੂ ਤੇ ਉੱਤਰਿਆ (ਮਰਕੁਸ 1:10-11)। ਤ੍ਰਿਏਕਤਾ ਦੇ ਤਿੰਨੋਂ ਮੈਂਬਰ ਇੱਥੇ ਇੱਕ ਹੀ ਸਮੇਂ ਤੇ ਸ਼ਾਮਿਲ ਹਨ, ਜੋ ਇੱਕ ਦੂਸਰੇ ਨਾਲੋਂ ਅਲੱਗ ਹਨ।

ਇੱਕ ਵੱਖਰੇ ਵਿਅਕਤੀਤਵ ਦੇ ਵੱਜੋਂ, ਪਵਿੱਤਰ ਆਤਮਾ ਸਦੀਪਕਤਾ ਤੋਂ ਪਿਤਾ ਅਤੇ ਪੁੱਤਰ ਦੇ ਨਾਲ ਇੱਕ ਪਿਆਰ ਦੇ ਸੰਬੰਧ ਵਿੱਚ ਰਿਹਾ ਹੈ। ਪਰਮੇਸ਼ੁਰ ਨੇ ਸਾਨੂੰ ਉਸ ਸੰਬੰਧ ਦੇ ਵਿੱਚ ਸ਼ਾਮਿਲ ਹੋਣ ਦੇ ਲਈ ਰਚਿਆ। ਪਰਮੇਸ਼ੁਰ ਚਾਹੁੰਦਾ ਹੈ ਕਿ ਅਸੀਂ ਉਸਦੇ ਨਾਲ ਸੰਗਤੀ ਦਾ ਅਨੰਦ ਮਾਣੀਏ (ਯੂਹੰਨਾ ਦੀ ਪਹਿਲੀ ਪੱਤ੍ਰੀ 1:3-4), ਜਿਵੇਂ ਤ੍ਰਿਏਕਤਾ ਦੇ ਹਰੇਕ ਮੈਂਬਰ ਨੇ ਸਮੇਂ ਦੇ ਅਰੰਭ ਤੋਂ ਪਹਿਲਾਂ ਇੱਕ ਦੂਸਰੇ ਦੀ ਸੰਗਤੀ ਦਾ ਅਨੰਦ ਮਾਣਿਆ ਹੈ। (ਪੜ੍ਹੋ ਯੂਹੰਨਾ 17:22-23) ।

ਰਚਨਾ ਦੇ ਸਮੇਂ ਤੋਂ ਹੀ ਪਵਿੱਤਰ ਆਤਮਾ ਸੰਸਾਰ ਦੇ ਵਿੱਚ ਕਿਰਿਆਸ਼ੀਲ ਹੈ। ਜਦੋਂ ਧਰਤੀ ਦੀ ਰਚਨਾ ਕੀਤੀ ਗਈ ਤਾਂ ਉਹ ਉੱਥੇ ਮੌਜੂਦ ਸੀ ਅਤੇ ਇਸਦੇ ਵਿੱਚ ਸ਼ਾਮਿਲ ਸੀ (ਉਤਪਤ 1:2, 26)। ਉਸਨੇ ਖਾਸ ਕੰਮ ਦੇ ਲਈ ਬੁਲਾਏ ਗਏ ਲੋਕਾਂ ਨੂੰ ਖਾਸ ਯੋਗਤਾਵਾਂ ਪ੍ਰਦਾਨ ਕੀਤੀਆਂ। (ਕੂਚ 35:30-31; ਨਿਆਈਆਂ ਦੀ ਪੋਥੀ 3:9-10; ਨਿਆਈਆਂ ਦੀ ਪੋਥੀ 15:14-15)। ਉਸਨੇ ਨਬੀਆਂ ਨੂੰ ਸੰਦੇਸ਼ ਦਿੱਤੇ (ਯਸਾਯਾਹ 61:1)। ਉਸਨੇ ਪਵਿੱਤਰ ਸ਼ਾਸਤਰ ਦੇ ਲਈ ਪ੍ਰੇਰਨਾ ਦਿੱਤੀ (ਪਤਰਸ ਦੀ ਦੂਜੀ ਪੱਤ੍ਰੀ 1:21)। ਉਸਨੇ ਹਮੇਸ਼ਾਂ ਲੋਕਾਂ ਨੂੰ ਪਰਮੇਸ਼ੁਰ ਦੇ ਵੱਲ ਮੋੜਣ ਦੇ ਲਈ ਉਨ੍ਹਾਂ ਦੇ ਦਿਲਾਂ ਵਿੱਚ ਕੰਮ ਕੀਤਾ ਹੈ (ਰਸੂਲਾਂ ਦੇ ਕਰਤੱਬ 7:51)।

ਉਸਨੂੰ ਜੀਵਨ ਦਾ ਆਤਮਾ ਕਿਹਾ ਗਿਆ ਹੈ। (ਪੜ੍ਹੋ ਰੋਮੀਆਂ ਨੂੰ 8:2)। ਉਹ ਉਹੀ ਆਤਮਾ ਹੈ ਜਿਸਨੇ ਸਾਡੀ ਰਚਨਾ ਕੀਤੀ ਅਤੇ ਸਾਨੂੰ ਜੀਵਨ ਦਿੱਤਾ। ਜੇਕਰ ਉਹ ਸੰਸਾਰ ਨੂੰ ਤਿਆਗ ਦੇਵੇ, ਤਾਂ ਸਾਰਾ ਜੀਵਨ ਖ਼ਤਮ ਹੋ ਜਾਵੇਗਾ, ਅਤੇ ਮਨੁੱਖ ਮਿੱਟੀ ਦੇ ਵਿੱਚ ਚਲਾ ਜਾਵੇਗਾ। (ਅੱਯੂਬ 33:4, ਅੱਯੂਬ 34:14-15।)

ਨਵਾਂ ਨੇਮ ਪਵਿੱਤਰ ਆਤਮਾ ਦੇ ਕੰਮ ਦੇ ਬਾਰੇ ਇੱਕ ਨਵੇਂ ਤੱਥ ਦੀ ਜਾਣ-ਪਛਾਣ ਕਰਾਉਂਦਾ ਹੈ। ਯੂਹੰਨਾ ਬਪਤਿਸਮਾ ਦੇਣ ਵਾਲੇ ਨੇ ਕਿਹਾ ਕਿ ਯਿਸੂ ਲੋਕਾਂ ਨੂੰ ਪਵਿੱਤਰ ਆਤਮਾ ਦੇ ਨਾਲ ਬਪਤਿਸਮਾ ਦੇਵੇਗਾ (ਮੱਤੀ 3:11)। ਯਿਸੂ ਨੇ ਆਪਣੇ ਚੇਲ੍ਹਿਆਂ ਨੂੰ ਕਿਹਾ ਕਿ ਉਹ ਪਿਤਾ ਦੇ ਵਾਇਦੇ ਦੀ ਉਮੀਦ ਰੱਖਣ, ਜੋ ਪਵਿੱਤਰ ਆਤਮਾ ਦਾ ਬਪਤਿਸਮਾ ਹੈ ਅਤੇ ਇਹ ਪੰਤੇਕੁਸਤ ਦੇ ਸਮੇਂ ਪੂਰਾ ਹੋਇਆ (ਰਸੂਲਾਂ ਦੇ ਕਰਤੱਬ 1:4-5, 8)।

ਯਿਸੂ ਨੇ ਚੇਲ੍ਹਿਆਂ ਦੇ ਨਾਲ ਵਾਇਦਾ ਕੀਤਾ ਕਿ ਪਵਿੱਤਰ ਆਤਮਾ ਉਨ੍ਹਾਂ ਦੇ ਨਾਲ ਹੋਵੇਗਾ, ਜੋ ਉਨ੍ਹਾਂ ਨੂੰ ਉਨ੍ਹਾਂ ਗੱਲਾਂ ਨੂੰ ਚੇਤੇ ਕਰਵਾਏਗਾ ਜੋ ਯਿਸੂ ਨੇ ਸਿਖਾਈਆਂ ਅਤੇ ਸਚਿਆਈ ਦੇ ਵਿੱਚ ਉਨ੍ਹਾਂ ਦੀ ਅਗਵਾਈ ਕਰੇਗਾ (ਯੂਹੰਨਾ 14:26, ਯੂਹੰਨਾ 16:13)। ਯਿਸੂ ਨੇ ਕਿਹਾ ਕਿ ਪਵਿੱਤਰ ਆਤਮਾ ਦੂਸਰਾ ਸਹਾਇਕ ਹੋਵੇਗਾ (ਯੂਹੰਨਾ 14:16, 26; ਯੂਹੰਨਾ 15:26; ਯੂਹੰਨਾ 16:7)। ਜਿਸ ਯੂਨਾਨੀ ਦੇ ਸ਼ਬਦ ਦਾ ਯਿਸੂ ਨੇ ਉਪਯੋਗ ਕੀਤਾ ਉਹ ਉਸਦੇ ਬਾਰੇ ਹੈ ਜੋ ਸਾਡੇ ਨਾਲ ਹੈ, ਜੋ ਸਾਨੂੰ ਉਤਸ਼ਾਹਿਤ ਕਰਦਾ ਹੈ ਅਤੇ ਸਹਾਇਤਾ ਕਰਦਾ ਹੈ। ਇਹ ਕਿਸੇ ਪ੍ਰਤੀਨਿਧੀ ਨੂੰ ਦਰਸਾ ਸਕਦਾ ਹੈ। ਪਵਿੱਤਰ ਆਤਮਾ ਯਿਸੂ ਦੀ ਪ੍ਰਤੀਨਿਧਤਾ ਕਰਦਾ ਹੈ ਅਤੇ ਸਾਨੂੰ ਉਸਦੇ ਸ਼ਬਦ ਯਾਦ ਦਿਵਾਉਂਦਾ ਹੈ।[1]

► ਪਵਿੱਤਰ ਆਤਮਾ ਦੁਆਰਾ ਕੀਤੇ ਜਾਣ ਵਾਲੇ ਕੁਝ ਕੰਮ ਕਿਹੜੇ ਹਨ?

ਸੰਸਾਰ ਦੇ ਵਿੱਚ ਪਵਿੱਤਰ ਆਤਮਾ ਦੇ ਕੰਮ ਦੀ ਪੂਰੀ ਤਰ੍ਹਾਂ ਦੇ ਨਾਲ ਵਿਆਖਿਆ ਨਹੀਂ ਕੀਤੀ ਜਾ ਸਕਦੀ, ਪਰ ਹੇਠਾਂ ਉਸਦੇ ਕੁਝ ਕੰਮਾਂ ਦੀ ਸੂਚੀ ਹੈ।

1. ਉਹ ਪਾਪ ਦੇ ਵਿਖੇ ਕਾਇਲ ਕਰਦਾ ਹੈ (ਯੂਹੰਨਾ 16:8; 1 ਕੁਰਿੰਥੀਆਂ ਨੂੰ 2:4; 1 ਥੱਸਲੁਨੀਕੀਆਂ ਨੂੰ 1:5)। ਨਹੀਂ ਤਾਂ ਕਿਸੇ ਵਿਅਕਤੀ ਦੇ ਲਈ ਇਹ ਅਸੰਭਵ ਹੋਵੇਗਾ ਕਿ ਉਸਨੂੰ ਤੌਬਾ ਕਰਨ ਅਤੇ ਮਾਫ਼ ਕੀਤੇ ਜਾਣ ਦੀ ਜਰੂਰਤ ਹੈ।

2. ਉਹ ਨਵਾਂ ਜਨਮ ਦਿੰਦਾ ਹੈ, ਕਿਸੇ ਅਜਿਹੇ ਵਿਅਕਤੀ ਨੂੰ ਜੀਵਨ ਦਿੰਦਾ ਹੈ ਜੋ ਇੱਕ ਸਮੇਂ ਪਾਪ ਦੇ ਵਿੱਚ ਮੁਰਦਾ ਸੀ। (ਤੀਤੁਸ ਨੂੰ 3:5; ਅਫ਼ਸੀਆਂ ਨੂੰ 2:1; ਯੂਹੰਨਾ 3:5)।

3. ਉਹ ਇੱਕ ਵਿਸ਼ਵਾਸੀ ਨੂੰ ਨਿੱਜੀ ਭਰੋਸਾ ਦਿੰਦਾ ਹੈ ਕਿ ਉਹ ਬਚਾਇਆ ਹੋਇਆ ਹੈ (ਰੋਮੀਆਂ ਨੂੰ 8:16)।

4. ਉਹ ਹਰੇਕ ਵਿਸ਼ਵਾਸੀ ਦੇ ਵਿੱਚ ਵਾਸ ਕਰਦਾ ਹੈ (ਹਰੇਕ ਬਚਾਏ ਹੋਏ ਵਿਅਕਤੀ ਦੇ ਕੋਲ ਪਵਿੱਤਰ ਆਤਮਾ ਹੈ) (ਰੋਮੀਆਂ ਨੂੰ 8:9; 1 ਕੁਰਿੰਥੀਆਂ ਨੂੰ 6:19)।

5. ਉਹ ਪਰਮੇਸ਼ੁਰ ਦੇ ਵਚਨ ਦੀ ਸਚਿਆਈ ਦੀ ਸਮਝ ਪ੍ਰਦਾਨ ਕਰਦਾ ਹੈ (1 ਕੁਰਿੰਥੀਆਂ ਨੂੰ 2:9-10, 13-14; 2 ਕੁਰਿੰਥੀਆਂ ਨੂੰ 3:14-17; ਅਫ਼ਸੀਆਂ ਨੂੰ 6:17)।

6. ਉਹ ਲੋਕਾਂ ਨੂੰ ਖਾਸ ਸੇਵਕਾਈ ਦੇ ਲਈ ਬੁਲਾਉਂਦਾ ਹੈ ਅਤੇ ਸੇਵਕਾਈ ਦੇ ਫੈਸਲੇ ਵਿੱਚ ਉਨ੍ਹਾਂ ਦੀ ਅਗਵਾਈ ਕਰਦਾ ਹੈ (ਰਸੂਲਾਂ ਦੇ ਕਰਤੱਬ 13:2-4, ਰਸੂਲਾਂ ਦੇ ਕਰਤੱਬ 15:28, ਰਸੂਲਾਂ ਦੇ ਕਰਤੱਬ 16:6-10)।

7. ਉਹ ਵਿਸ਼ਵਾਸੀ ਦਾ ਸ਼ੁੱਧੀਕਰਨ ਕਰਦਾ ਹੈ, ਉਸਨੂੰ ਪਵਿੱਤਰ ਬਣਾਉਣ ਦੇ ਲਈ ਉਸਦੇ ਦਿਲ ਨੂੰ ਸ਼ੁੱਧ ਕਰਦਾ ਹੈ (ਰਸੂਲਾਂ ਦੇ ਕਰਤੱਬ 15:8-9; ਪਤਰਸ ਦੀ ਪਹਿਲੀ ਪੱਤ੍ਰੀ 1:2)।

8. ਉਹ ਪਾਪ ਤੇ ਜਿੱਤ ਪਾ ਕੇ ਜਿਉਣ ਦੀ ਸ਼ਕਤੀ ਪ੍ਰਦਾਨ ਕਰਦਾ ਹੈ (ਰੋਮੀਆਂ ਨੂੰ 8:1, 5, 13; ਗਲਾਤੀਆਂ ਨੂੰ 5:16)।

9. ਉਹ ਵਿਸ਼ਵਾਸੀ ਦੇ ਜੀਵਨ ਵਿੱਚ ਆਤਮਿਕ ਫ਼ਲ ਉਤਪੰਨ ਕਰਦਾ ਹੈ (ਗਲਾਤੀਆਂ ਨੂੰ 5:22-23)।

10. ਉਹ ਸੇਵਕਾਈ ਦੇ ਲਈ ਵਰਦਾਨ ਦਿੰਦਾ ਹੈ (1 ਕੁਰਿੰਥੀਆਂ ਨੂੰ 12:4-10, 28-30; ਰੋਮੀਆਂ ਨੂੰ 12:6-8; ਪਤਰਸ ਦੀ ਪਹਿਲੀ ਪੱਤ੍ਰੀ 4:10-11)।

11. ਉਹ ਸੇਵਕਾਈ ਦੇ ਬਲ ਲਈ ਖਾਸ ਮਸਹ ਦਿੰਦਾ ਹੈ (ਰਸੂਲਾਂ ਦੇ ਕਰਤੱਬ 1:8, ਰਸੂਲਾਂ ਦੇ ਕਰਤੱਬ 13:9; ਗਲਾਤੀਆਂ ਨੂੰ 3:5; ਪਤਰਸ ਦੀ ਪਹਿਲੀ ਪੱਤ੍ਰੀ 1:12)।

12. ਉਹ ਇੱਕ ਵਿਸ਼ਵਾਸੀ ਦੀ ਪਰਮੇਸ਼ੁਰ ਦੀ ਇੱਛਾ ਦੇ ਅਨੁਸਾਰ ਪ੍ਰਾਥਨਾ ਕਰਨ ਦੇ ਵਿੱਚ ਸਹਾਇਤਾ ਕਰਦਾ ਹੈ (ਰੋਮੀਆਂ ਨੂੰ 8:26-27; ਅਫ਼ਸੀਆਂ ਨੂੰ 6:18)।

13. ਉਹ ਕਲੀਸਿਆ ਦੇ ਵਿੱਚ ਏਕਤਾ ਅਤੇ ਸੰਗਤੀ ਬਣਾਉਂਦਾ ਹੈ (ਅਫ਼ਸੀਆਂ ਨੂੰ 4:3; ਫ਼ਿਲਿੱਪੀਆਂ ਨੂੰ 2:1)।

ਕਲਾਸ ਦੇ ਆਗੂ ਲਈ ਸੂਚਨਾ: ਕਲਾਸ ਦਾ ਇੱਕ ਮੈਂਬਰ ਇਸ ਭਾਗ ਵਿਆਖਿਆ ਕਰ ਸਕਦਾ ਹੈ।

1. ਆਤਮਾ ਅਲੱਗ-ਅਲੱਗ ਵਰਦਾਨਾਂ, ਕੰਮਾਂ ਅਤੇ ਸੰਚਾਲਨ ਦੇ ਦੁਆਰਾ ਕੰਮ ਕਰਦਾ ਹੈ (1 ਕੁਰਿੰਥੀਆਂ ਨੂੰ 12:4-6)।

2. ਆਤਮਿਕ ਵਰਦਾਨ ਆਤਮਿਕਤਾ ਦੇ ਅਨੁਸਾਰ ਨਹੀਂ ਸਗੋਂ ਪਰਮੇਸ਼ੁਰ ਦੀ ਇੱਛਾ ਦੇ ਅਨੁਸਾਰ ਵੰਡੇ ਜਾਂਦੇ ਹਨ (1 ਕੁਰਿੰਥੀਆਂ ਨੂੰ 12:11, 1 ਕੁਰਿੰਥੀਆਂ ਨੂੰ 4:7)।

3. ਹਰੇਕ ਵਿਸ਼ਵਾਸੀ ਦੇ ਕੋਲ ਆਤਮਾ ਦੀ ਦਿੱਤੀ ਕੁਝ ਯੋਗਤਾ ਜਰੂਰ ਹੁੰਦੀ ਹੈ (1 ਕੁਰਿੰਥੀਆਂ ਨੂੰ 12:7)।

4. ਹਰੇਕ ਵਿਸ਼ਵਾਸੀ ਦੇ ਕੋਲੋਂ ਇੱਕ ਹੀ ਤਰ੍ਹਾਂ ਦੇ ਆਤਮਿਕ ਵਰਦਾਨ ਦੀ ਉਮੀਦ ਨਹੀਂ ਕੀਤੀ ਜਾ ਸਕਦੀ (1 ਕੁਰਿੰਥੀਆਂ ਨੂੰ 12:8-11, 14-30)।

5. ਆਤਮਿਕ ਵਰਦਾਨਾਂ ਦੀ ਵਰਤੋਂ ਹਮੇਸ਼ਾਂ ਦੂਸਰਿਆਂ ਦੀ ਸੇਵਾ ਅਤੇ ਪਰਮੇਸ਼ੁਰ ਦੀ ਵਡਿਆਈ ਦੇ ਲਈ ਕੀਤੀ ਜਾਣੀ ਚਾਹੀਦੀ ਹੈ (1 ਕੁਰਿੰਥੀਆਂ ਨੂੰ 12:21-22, 25; ਪਤਰਸ ਦੀ ਪਹਿਲੀ ਪੱਤ੍ਰੀ 4:10-11)।

ਸਾਰੇ ਮਸੀਹੀ ਪਰਾਈ ਭਾਸ਼ਾ ਦੇ ਆਤਮਿਕ ਵਰਦਾਨ ਦੇ ਅਭਿਆਸ ਦੇ ਪ੍ਰਤੀ ਸਹਿਮਤ ਨਹੀਂ ਹੁੰਦੇ। ਕੁਝ ਵਿਸ਼ਵਾਸੀ ਮੰਨਦੇ ਹਨ ਕਿ ਜਦੋਂ ਪਵਿੱਤਰ ਆਤਮਾ ਪ੍ਰਾਪਤ ਹੁੰਦਾ ਹੈ ਤਾਂ ਹਰੇਕ ਵਿਸ਼ਵਾਸੀ ਪਰਾਈ ਭਾਸ਼ਾ ਦੇ ਵਿੱਚ ਬੋਲਣਾ ਚਾਹੀਦਾ ਹੈ।

ਕੁਝ ਮਸੀਹੀ ਮੰਨਦੇ ਹਨ ਕਿ ਪਰਾਈ ਭਾਸ਼ਾ ਦਾ ਵਰਦਾਨ ਕੁਝ ਹੀ ਵਿਸ਼ਵਾਸੀਆਂ ਨੂੰ ਦਿੱਤਾ ਜਾਂਦਾ ਹੈ ਤਾਂ ਕਿ ਉਹ ਅਜਿਹੇ ਲੋਕਾਂ ਦੇ ਨਾਲ ਵਾਰਤਾਲਾਪ ਕਰ ਸਕਣ ਜੋ ਦੂਸਰੀ ਭਾਸ਼ਾ ਬੋਲਦੇ ਹਨ। ਉਹ ਅਜਿਹਾ ਇਸ ਕਾਰਨ ਮੰਨਦੇ ਹਨ ਕਿਉਂਕਿ ਪੰਤੇਕੁਸਤ ਦੇ ਸਮੇਂ ਬੋਲਣ ਵਾਲਿਆਂ ਨੂੰ ਬਹੁਤ ਸਾਰੀਆਂ ਵੱਖ-ਵੱਖ ਭਾਸ਼ਾਵਾਂ ਵਾਲੇ ਲੋਕ ਸਮਝ ਸਕੇ (ਰਸੂਲਾਂ ਦੇ ਕਰਤੱਬ 2:6)। ਉਹ ਵਿਸ਼ਵਾਸ ਕਰਦੇ ਹਨ ਕਿ ਪਰਮੇਸ਼ੁਰ ਇਸ ਵਰਦਾਨ ਨੂੰ ਅਤੇ ਦੂਸਰੇ ਵਰਦਾਨਾਂ ਨੂੰ ਆਪਣੀ ਇੱਛਾ ਦੇ ਅਨੁਸਾਰ ਦਿੰਦਾ ਹੈ (1 ਕੁਰਿੰਥੀਆਂ ਨੂੰ 12:4-11)। ਉਹ ਵਿਸ਼ਵਾਸ ਕਰਦੇ ਹਨ ਕਿ ਹਰੇਕ ਵਿਸ਼ਵਾਸੀ ਦੇ ਕੋਲ ਇੱਕ ਸਮਾਨ ਆਤਮਿਕ ਵਰਦਾਨ ਨਹੀਂ ਹੁੰਦੇ ਹਨ (1 ਕੁਰਿੰਥੀਆਂ ਨੂੰ 12:29-30), ਇਸ ਲਈ ਆਤਮਿਕ ਵਰਦਾਨ ਕਿਸੇ ਵਿਸ਼ਵਾਸੀ ਦੇ ਪ੍ਰਤੀ ਕੁਝ ਸਾਬਿਤ ਨਹੀਂ ਕਰਦਾ (1 ਕੁਰਿੰਥੀਆਂ ਨੂੰ 14:22), ਭਾਵੇਂਕਿ ਹਰੇਕ ਵਿਸ਼ਵਾਸੀ ਦੇ ਕੋਲ ਪਵਿੱਤਰ ਆਤਮਾ ਹੁੰਦਾ ਹੈ (ਰੋਮੀਆਂ ਨੂੰ 8:9)।

ਪਰਾਈ ਭਾਸ਼ਾ ਦੇ ਬਾਰੇ ਵੱਖ-ਵੱਖ ਧਾਰਨਾਵਾਂ ਵਿਸ਼ਵਾਸੀਆਂ ਨੂੰ ਕੁਝ ਪ੍ਰਕਾਰ ਦੀ ਸੇਵਕਾਈ ਦੇ ਵਿੱਚ ਮਿਲ ਕੇ ਕੰਮ ਕਰਨ ਤੋਂ ਰੋਕ ਸਕਦੀਆਂ ਹਨ, ਪਰ ਵਿਸ਼ਵਾਸੀਆਂ ਨੂੰ ਇਸ ਮੁੱਦੇ ਦੇ ਬਾਰੇ ਆਪਣੀਆਂ ਵੱਖਰੀਆਂ ਧਾਰਨਾਵਾਂ ਦੇ ਕਾਰਨ ਇੱਕ ਦੂਸਰੇ ਦਾ ਨਿਆਂ ਨਹੀਂ ਕਰਨਾ ਚਾਹੀਦਾ।

ਜੇਕਰ ਤੁਸੀਂ ਪਰਮੇਸ਼ੁਰ ਦੇ ਨਾਲ ਸੰਬੰਧ ਵਿੱਚ ਹੋ, ਤਾਂ ਤੁਸੀਂ ਪਵਿੱਤਰ ਆਤਮਾ ਦੇ ਨਾਲ ਸੰਬੰਧ ਵਿੱਚ ਹੋ। ਇਹ ਸੰਭਵ ਨਹੀਂ ਹੈ ਕਿ ਤੁਸੀਂ ਤ੍ਰਿਏਕਤਾ ਦੇ ਦੂਸਰੇ ਵਿਅਕਤੀਤਵਾਂ ਨੂੰ ਛੱਡ ਕੇ ਤੁਸੀਂ ਇੱਕ ਵਿਅਕਤੀਤਵ ਨੂੰ ਜਾਣੋ। (ਪੜ੍ਹੋ ਅਫ਼ਸੀਆਂ ਨੂੰ 2:18; ਯੂਹੰਨਾ 6:44।)

ਕਿਸੇ ਵਿਅਕਤੀ ਨੂੰ ਬਚਾਏ ਜਾਣ ਤੋਂ ਪਹਿਲਾਂ ਇਹ ਜਰੂਰੀ ਨਹੀਂ ਹੈ ਕਿ ਉਹ ਪਵਿੱਤਰ ਆਤਮਾ ਦੀ ਧਰਮ ਸਿੱਖਿਆ ਨੂੰ ਜਾਣੇ। ਚੇਲ੍ਹੇ ਆਤਮਾ ਦੇ ਬਾਰੇ ਜਿਆਦਾ ਨਹੀਂ ਜਾਣਦੇ ਸਨ, ਪਰ ਯਿਸੂ ਨੇ ਉਨ੍ਹਾਂ ਨੂੰ ਕਿਹਾ ਕਿ ਉਹ ਪਵਿੱਤਰ ਆਤਮਾ ਨੂੰ ਜਾਣਦੇ ਸਨ ਅਤੇ ਉਹ ਪਹਿਲਾਂ ਤੋਂ ਹੀ ਉਨ੍ਹਾਂ ਦੇ ਨਾਲ ਸੀ (ਪੜ੍ਹੋ ਯੂਹੰਨਾ 14:17)।

ਪਵਿੱਤਰ ਆਤਮਾ ਦੀ ਸਹੀ ਸਿੱਖਿਆ ਨੂੰ ਜਾਨਣ ਦੁਆਰਾ ਅਸੀਂ ਉਸਦੇ ਨਾਲ ਸਹੀ ਸੰਬੰਧ ਤਰੀਕੇ ਦੇ ਨਾਲ ਸੰਬੰਧ ਦੇ ਵਿੱਚ ਰਹਿ ਸਕਦੇ ਹਾਂ ਤਾਂ ਕਿ ਉਹ ਸਾਡੇ ਜੀਵਨਾਂ ਵਿੱਚ ਜਿਆਦਾ ਕੰਮ ਕਰ ਸਕੇ। ਉਸਨੂੰ ਇੱਕ ਵਿਅਕਤੀਤਵ ਦੇ ਰੂਪ ਵਿੱਚ ਜਾਨਣ ਦੁਆਰਾ ਅਸੀਂ ਇਹ ਜਾਣ ਸਕਦੇ ਹਾਂ ਕਿ ਅਸੀਂ ਉਸਦੇ ਨਾਲ ਸੰਬੰਧ ਰੱਖ ਸਕਦੇ ਹਾਂ। ਅਸੀਂ ਉਸਦੇ ਨਾਲ ਗੱਲਬਾਤ ਕਰ ਸਕਦੇ ਹਾਂ, ਅਤੇ ਉਹ ਸਾਡੇ ਨਾਲ ਗੱਲਬਾਤ ਕਰੇਗਾ। ਉਹ ਆਮ ਤੌਰ ਤੇ ਸਾਡੇ ਨਾਲ ਸੁਣੀ ਜਾ ਸਕਣ ਵਾਲੀ ਆਵਾਜ ਦੇ ਵਿੱਚ ਗੱਲ ਨਹੀਂ ਕਰਦਾ, ਪਰ ਉਹ ਸਾਡੀ ਪਰਮੇਸ਼ੁਰ ਦੀ ਇੱਛਾ ਅਤੇ ਉਸਦੇ ਪਿਆਰ ਨੂੰ ਸਮਝਣ ਦੇ ਵਿੱਚ ਸਹਾਇਤਾ ਕਰਦਾ ਹੈ। ਜੇਕਰ ਅਸੀਂ ਸੱਚਮੁੱਚ ਪਰਮੇਸ਼ੁਰ ਦੀ ਮਰਜ਼ੀ ਨੂੰ ਪੂਰਿਆਂ ਕਰਨਾ ਚਾਹੁੰਦੇ ਹਾਂ, ਤਾਂ ਪਵਿੱਤਰ ਆਤਮਾ ਸਾਡੀ ਅਗਵਾਈ ਕਰੇਗਾ ਭਾਵੇਂਕਿ ਅਸੀਂ ਹਮੇਸ਼ਾਂ ਇਸਨੂੰ ਮਹਿਸੂਸ ਨਹੀਂ ਕਰ ਸਕਦੇ।

ਇਹ ਜਾਣਨ ਦਾ ਅਰਥ ਕਿ ਉਹ ਇੱਕ ਵਿਅਕਤੀਤਵ ਹੈ ਇਸਦੇ ਨਾਲ ਅਸੀਂ ਅਜਿਹੀ ਪ੍ਰਤੀਕਿਰਿਆ ਨਹੀਂ ਕਰਦੇ ਜਿਵੇਂ ਕਿ ਉਹ ਸਿਰਫ਼ ਇੱਕ ਸ਼ਕਤੀ ਜਾਂ ਭਾਵਨਾ ਹੋਵੇ। ਜਦੋਂ ਅਸੀਂ ਪਰਮੇਸ਼ੁਰ ਦੀ ਅਰਾਧਨਾ ਕਰਦੇ ਹਾਂ, ਤਾਂ ਅਸੀਂ ਇਸ ਬਾਰੇ ਸੋਚਦੇ ਹਾਂ ਕਿ ਉਹ ਕੌਣ ਹੈ ਅਤੇ ਉਹ ਕਿਹੋ ਜਿਹਾ ਹੈ, ਨਾ ਕਿ ਅਸੀਂ ਕੇਵਲ ਇੱਕ ਬੇਸਮਝ ਭਾਵਨਾ ਦਾ ਆਨੰਦ ਮਾਣਦੇ ਹਾਂ। ਜਦੋਂ ਅਸੀਂ ਪ੍ਰਾਰਥਨਾ ਕਰਦੇ ਹਾਂ, ਤਾਂ ਅਸੀਂ ਸਮਝਦਾਰੀ ਨਾਲ ਬੋਲਦੇ ਹਾਂ ਅਤੇ ਇਹ ਸਮਝਣ ਦੀ ਕੋਸ਼ਿਸ਼ ਕਰਦੇ ਹਾਂ ਕਿ ਉਹ ਸਾਨੂੰ ਕੀ ਵਿਖਾ ਸਕਦਾ ਹੈ, ਨਾ ਕਿ ਦੂਜੇ ਵਿਸ਼ਵਾਸਾਂ ਦੇ ਲੋਕਾਂ ਵਾਂਗ, ਅਵਿਅਕਤੀਗਤ, ਜਾਦੂਈ ਤਰੀਕੇ ਨਾਲ ਸ਼ਬਦਾਂ ਦੀ ਵਰਤੋਂ ਕਰਦੇ ਹਾਂ।

ਜਦੋਂ ਅਸੀਂ ਜਾਣ ਲੈਂਦੇ ਹਾਂ ਕਿ ਪਵਿੱਤਰ ਆਤਮਾ ਪਰਮੇਸ਼ੁਰ ਹੈ ਤਾਂ ਇਸਦੇ ਨਾਲ ਸਾਨੂੰ ਅਰਾਧਨਾ ਦੇ ਵਿੱਚ ਇੱਕ ਆਦਰਯੋਗ ਰਵੱਈਆ ਮਿਲਦਾ ਹੈ। ਜਦੋਂ ਅਸੀਂ ਪ੍ਰਾਰਥਨਾ ਕਰਦੇ ਹਾਂ ਅਤੇ ਉਸਦੀ ਅਗਵਾਈ ਨੂੰ ਮਹਿਸੂਸ ਕਰਦੇ ਹਾਂ, ਤਾਂ ਸਾਨੂੰ ਇਹ ਯਾਦ ਰੱਖਣ ਦੀ ਜਰੂਰਤ ਹੈ ਕਿ ਉਹ ਅਜਿਹਾ ਪਰਮੇਸ਼ੁਰ ਹੈ ਜੋ ਸਾਡੇ ਨਾਲ ਪਿਆਰ ਕਰਦਾ ਹੈ, ਸਾਨੂੰ ਪੂਰੀ ਤਰ੍ਹਾਂ ਦੇ ਨਾਲ ਜਾਣਦਾ ਹੈ, ਅਤੇ ਸਾਡੇ ਭਵਿੱਖ ਨੂੰ ਜਾਣਦਾ ਹੈ। ਉਹ ਸਰਬਉੱਚ ਅਧਿਕਾਰ ਹੈ, ਜਿਸਦੀ ਸਾਨੂੰ ਆਗਿਆਕਾਰੀ ਕਰਨੀ ਚਾਹੀਦੀ ਹੈ।

ਉਹ ਸਦਾ ਸਾਡੇ ਨਾਲ ਰਹਿੰਦਾ ਹੈ। ਪਵਿੱਤਰ ਵਚਨ ਦੱਸਦਾ ਹੈ ਕਿ ਸਾਨੂੰ ਆਤਮਾ ਦੇ ਵਿੱਚ ਰਹਿਣਾ ਅਤੇ ਉਸਦੇ ਵਿੱਚ ਚੱਲਣਾ ਚਾਹੀਦਾ ਹੈ (ਗਲਾਤੀਆਂ ਨੂੰ 5:25)। ਸਾਨੂੰ ਇਸ ਪ੍ਰਕਾਰ ਜਿਉਣਾ ਚਾਹੀਦਾ ਹੈ ਜਿਵੇਂ ਅਸੀਂ ਉਸਦੀ ਹਜ਼ੂਰੀ ਦੇ ਵਿੱਚ ਹਾਂ, ਅਤੇ ਅਜਿਹਾ ਨਹੀਂ ਸੋਚਣਾ ਚਾਹੀਦਾ ਕਿ ਅਸੀਂ ਉਸਦੀ ਹਜ਼ੂਰੀ ਦੇ ਵਿੱਚ ਉਦੋਂ ਹੀ ਆਉਂਦੇ ਹਾਂ ਜਦੋਂ ਕਲੀਸਿਆ ਦੇ ਵਿੱਚ ਹੁੰਦੇ ਹਾਂ। ਉਹ ਸਿਰਫ਼ ਸਾਡੇ ਨਾਲ ਹੀ ਨਹੀਂ ਹੈ, ਪਰ ਉਹ ਸਾਡੇ ਅੰਦਰ ਵਾਸ ਕਰਦਾ ਹੈ। ਇਹੀ ਕਾਰਨ ਹੈ ਕਿ ਸਾਨੂੰ ਅਜਿਹਾ ਜੀਵਨ ਜਿਉਣਾ ਚਾਹੀਦਾ ਹੈ ਜੋ ਸ਼ੁੱਧ ਅਤੇ ਪਵਿੱਤਰ ਹੋਵੇ (ਪੜ੍ਹੋ 1 ਕੁਰਿੰਥੀਆਂ ਨੂੰ 6:19।)।

ਸਾਨੂੰ ਇਹ ਯਾਦ ਰੱਖਣਾ ਚਾਹੀਦਾ ਹੈ ਕਿ ਆਤਮਾ ਦੀ ਵੱਡੀ ਪ੍ਰਾਥਮਿਕਤਾ ਸਾਨੂੰ ਪਾਪ ਦੇ ਜੀਵਨ ਤੇ ਜਿੱਤ ਦੇਣਾ ਅਤੇ ਸਾਡੇ ਦਿਲਾਂ ਨੂੰ ਸ਼ੁੱਧ ਕਰਨਾ ਹੈ (ਰੋਮੀਆਂ ਨੂੰ 8:13; ਗਲਾਤੀਆਂ ਨੂੰ 5:16; ਰਸੂਲਾਂ ਦੇ ਕਰਤੱਬ 15:8-9)। ਜੇਕਰ ਅਸੀਂ ਉਸਨੂੰ ਉਸਦੀਆਂ ਪ੍ਰਮੁੱਖ ਪ੍ਰਾਥਮਿਕਤਾਵਾਂ ਨੂੰ ਪੂਰਿਆਂ ਨਹੀਂ ਕਰਨ ਦੇ ਰਹੇ ਤਾਂ ਫਿਰ ਸਾਨੂੰ ਹੋਰ ਗੱਲਾਂ ਦੇ ਲਈ ਪ੍ਰਾਥਨਾ ਨਹੀਂ ਕਰਨੀ ਚਾਹੀਦੀ। ਸਾਨੂੰ ਵਿਸ਼ਵਾਸ ਦੇ ਨਾਲ ਪ੍ਰਾਰਥਨਾ ਕਰਨੀ ਚਾਹੀਦੀ ਹੈ, ਇਹ ਮੰਨਦੇ ਹੋਏ ਕਿ ਉਹ ਸਾਨੂੰ ਪੂਰਨ ਤੌਰ ਤੇ ਪਵਿੱਤਰ ਬਣਾ ਸਕਦਾ ਹੈ। (ਪੜ੍ਹੋ 1 ਥੱਸਲੁਨੀਕੀਆਂ ਨੂੰ 5:23।)

ਜੀਵਨ ਦੇ ਸੰਘਰਸ਼ਾਂ ਦੇ ਵਿੱਚ ਉਹ ਸਾਨੂੰ ਅੰਦਰੂਨੀ ਬਲ ਪ੍ਰਦਾਨ ਕਰਦਾ ਹੈ (ਅਫ਼ਸੀਆਂ ਨੂੰ 3:16)। ਉਹ ਸਾਨੂੰ ਸਮਝਦਾ ਹੈ, ਉਹ ਸਾਡੇ ਹਲਾਤਾਂ ਨੂੰ ਸਮਝਦਾ ਹੈ, ਅਤੇ ਉਹ ਸਾਨੂੰ ਬਿਲਕੁਲ ਉਹ ਦੇ ਸਕਦਾ ਹੈ ਜਿਸਦੀ ਸਾਨੂੰ ਜਰੂਰਤ ਹੈ।

ਸੇਵਕਾਈ ਦੇ ਵਿੱਚ, ਸਾਨੂੰ ਅਗਵਾਈ ਦੇ ਲਈ ਉਸ ਤੇ ਨਿਰਭਰ ਹੋਣਾ ਚਾਹੀਦਾ ਹੈ, ਕਿ ਉਹ ਸਾਨੂੰ ਉਸਦੇ ਵਚਨਾਂ ਨੂੰ ਸਮਝਣ ਦੇ ਲਈ ਬਲ ਦੇਵੇ, ਅਤੇ ਅਸੀਂ ਦੂਸਰਿਆਂ ਦੇ ਦਿਲਾਂ ਵਿੱਚ ਆਤਮਿਕ ਨਤੀਜੇ ਲਿਆ ਸਕੀਏ। ਇਸਨੂੰ ਅਸੀਂ ਰਸੂਲਾਂ ਦੇ ਕਰਤੱਬ ਦੀ ਕਿਤਾਬ ਦੇ ਵਿੱਚ ਵੇਖਦੇ ਹਾਂ। ਕੋਈ ਵੀ ਮਨੁੱਖੀ ਯੋਗਤਾ ਆਤਮਾ ਦੇ ਕੰਮ ਦਾ ਸਥਾਨ ਨਹੀਂ ਲੈ ਸਕਦੀ।

ਭਾਵੇਂ ਤੁਸੀਂ ਪਹਿਲਾਂ ਤੋਂ ਹੀ ਆਤਮਾ ਨਾਲ ਭਰਪੂਰ ਹੋ, ਤਦ ਵੀ ਤੁਹਾਨੂੰ ਉਸਦੇ ਨਾਲ ਸੰਬੰਧ ਰੱਖਣਾ ਭੁੱਲਣਾ ਨਹੀਂ ਚਾਹੀਦਾ। ਆਤਮਾ ਨਾਲ ਭਰਪੂਰ ਹੋ ਜਾਓ ਦੀ ਆਗਿਆ ਲਗਾਤਾਰ ਭਰਦੇ ਰਹਿਣ ਦੀ ਆਗਿਆ ਹੈ (ਪੜ੍ਹੋ ਅਫ਼ਸੀਆਂ ਨੂੰ 5:18)। ਸਾਨੂੰ ਉਸਦੇ ਨਾਲ ਆਪਣੇ ਸੰਬੰਧ ਦੇ ਦੁਆਰਾ ਲਗਾਤਾਰ ਭਰਪੂਰ ਹੋਣ ਦੀ ਜਰੂਰਤ ਹੈ।

► ਵਿਸ਼ਵਾਸ ਕਥਨਾਂ ਨੂੰ ਘੱਟੋ-ਘੱਟ ਦੋ ਵਾਰ ਮਿਲ ਕੇ ਪੜ੍ਹੋ।

ਪਵਿੱਤਰ ਆਤਮਾ ਤ੍ਰਿਏਕਤਾ ਦਾ ਤੀਸਰਾ ਵਿਅਕਤੀਤਵ ਹੈ, ਜੋ ਪਿਤਾ ਅਤੇ ਪੁੱਤਰ ਦੇ ਨਾਲ ਪੂਰਨ ਪਰਮੇਸ਼ੁਰ ਹੈ। ਉਹ ਪਾਪ ਦੇ ਵਿਖੇ ਕਾਇਲ ਕਰਦਾ ਹੈ, ਨਵਾਂ ਜਨਮ ਦਿੰਦਾ ਹੈ ਅਤੇ ਹਰੇਕ ਵਿਸ਼ਵਾਸੀ ਦੇ ਅੰਦਰ ਵਾਸ ਕਰਦਾ ਹੈ, ਪਾਪ ਦੇ ਉੱਤੇ ਜਿੱਤ ਦਿੰਦਾ ਹੈ ਅਤੇ ਦਿਲਾਂ ਨੂੰ ਸ਼ੁੱਧ ਕਰਦਾ ਹੈ। ਉਹ ਕਲੀਸਿਆ ਦੇ ਜੀਵਨ ਵਿੱਚ ਏਕਤਾ ਲਿਆਉਂਦਾ ਹੈ, ਜਿਸਨੂੰ ਉਹ ਆਤਮਾ ਦੇ ਫ਼ਲਾਂ ਅਤੇ ਆਤਮਿਕ ਵਰਦਾਨਾਂ ਦੀ ਬਰਕਤ ਦਿੰਦਾ ਹੈ।

ਕਲਾਸ ਦੇ ਆਗੂ ਲਈ ਸੂਚਨਾ: ਇਹ ਭਾਗ ਇੱਕ ਵਿਕਲਪ ਦੇ ਰੂਪ ਵਿੱਚ ਹੈ ਅਤੇ ਜੇਕਰ ਕਲਾਸ ਇਸ ਬਿੰਦੂ ਦੇ ਲਈ ਜਿਆਦਾ ਬਾਈਬਲ ਆਧਾਰਿਤ ਸਬੂਤਾਂ ਦੀ ਜਰੂਰਤ ਮਹਿਸੂਸ ਕਰਦੀ ਹੈ ਤਾਂ ਇਸਦਾ ਅਧਿਐਨ ਕੀਤਾ ਜਾ ਸਕਦਾ ਹੈ।

ਕੁਝ ਲੋਕ ਆਤਮਾ ਦੇ ਵਿਅਕਤੀਤਵ ਦਾ ਇਨਕਾਰ ਕਰਦੇ ਹਨ ਅਤੇ ਕਹਿੰਦੇ ਹਨ ਕਿ ਉਹ ਇੱਕ ਗ਼ੈਰ-ਵਿਅਕਤੀਤਵ ਵਾਲੀ ਸ਼ਕਤੀ ਹੈ ਜੋ ਬਿਜ਼ਲੀ ਜਾਂ ਗੁਰਤਾਆਕਰਸ਼ਣ ਦੇ ਸਮਾਨ ਹੈ। ਪਰ ਜਿਵੇਂ ਬਾਈਬਲ ਪਵਿੱਤਰ ਆਤਮਾ ਨੂੰ ਦਰਸਾਉਂਦੀ ਹੈ ਉਸ ਪ੍ਰਕਾਰ ਇਸਨੂੰ ਗ਼ੈਰ-ਵਿਅਕਤੀਤਵ ਵਾਲੀ ਸ਼ਕਤੀ ਕਹਿਣਾ ਅਸੰਭਵ ਹੈ। ਬਿਜ਼ਲੀ ਗੱਲਬਾਤ ਅਤੇ ਤਰਕ ਨਹੀਂ ਕਰ ਸਕਦੀ; ਗੁਰਤਾਆਕਸਣ ਦੇ ਨਾਲ ਝੂਠ ਨਹੀਂ ਬੋਲਿਆ ਜਾ ਸਕਦਾ। ਇੱਕ ਮਨ-ਰਹਿਤ ਸ਼ਕਤੀ ਪਰਮੇਸ਼ੁਰ ਦੀ ਇੱਛਾ ਨੂੰ ਪੂਰਾ ਨਹੀਂ ਕਰ ਸਕਦੀ।

ਕੁਝ ਲੋਕ ਕਹਿੰਦੇ ਹਨ ਕਿ ਇਹ ਵਚਨ ਵਿਅਕਤੀਤਵ ਦੇਣ ਦਾ ਯਤਨ ਕਰਦੇ ਹਨ, ਇਹ ਇੱਕ ਗ਼ੈਰ-ਵਿਅਕਤੀਤਵ ਨੂੰ ਇਸ ਪ੍ਰਕਾਰ ਦੱਸਦੇ ਹਨ ਜਿਵੇਂ ਉਹ ਕੋਈ ਵਿਅਕਤੀਤਵ ਹੋਵੇ ਅਸਲ ਵਿੱਚ ਉਨ੍ਹਾਂ ਦਾ ਇਹ ਮਤਲਬ ਨਹੀਂ ਹੈ। ਪਰ ਵਚਨਾਂ ਦੇ ਵਿੱਚ ਆਤਮਾ ਨੂੰ ਇੱਕ ਵਿਅਕਤੀਤਵ ਦੇ ਰੂਪ ਵਿੱਚ ਦੱਸਿਆ ਗਿਆ ਹੈ, ਅਤੇ ਲੋਕਾਂ ਨੇ ਉਸਦੇ ਪ੍ਰਤੀ ਇੱਕ ਵਿਅਕਤੀਤਵ ਦੇ ਵੱਜੋਂ ਪ੍ਰਤੀਕਿਰਿਆ ਕੀਤੀ। ਕੁਝ ਸਥਾਨਾਂ ਤੇ ਆਤਮਾ ਨੂੰ ਤਸਵੀਰੀ ਭਾਸ਼ਾ ਦੇ ਵਿੱਚ ਅਜਿਹਾ ਦਰਸਾਇਆ ਗਿਆ ਹੈ ਜਿਵੇਂ ਉਹ ਕੋਈ ਪਦਾਰਥ ਹੋਵੇ, ਜਿਵੇਂ ਬਾਈਬਲ ਕਹਿੰਦੀ ਹੈ ਕਿ ਆਤਮਾ ਵਹਾਇਆ ਜਾਵੇਗਾ (ਰਸੂਲਾਂ ਦੇ ਕਰਤੱਬ 2:17)। ਇਸਨੂੰ ਤਸਵੀਰੀ ਭਾਸ਼ਾ ਮੰਨਿਆ ਜਾਣਾ ਚਾਹੀਦਾ ਹੈ ਕਿਉਂਕਿ ਬਾਈਬਲ ਆਤਮਾ ਦੇ ਬਾਰੇ ਸਾਧਾਰਨ ਤੌਰ ਤੇ ਇੱਕ ਵਿਅਕਤੀਤਵ ਦੇ ਵੱਜੋਂ ਗੱਲ ਕਰਦੀ ਹੈ।

ਪਵਿੱਤਰ ਆਤਮਾ ਦੇ ਵਿਅਕਤੀਤਵ ਦੇ ਬਾਰੇ ਬਾਈਬਲ ਦੇ ਸਬੂਤ:

• ਮੱਤੀ 28:19 ਦੇ ਵਿੱਚ ਸਾਨੂੰ ਕਿਹਾ ਗਿਆ ਹੈ ਕਿ ਅਸੀਂ ਪਿਤਾ, ਪੁੱਤਰ, ਅਤੇ ਪਵਿੱਤਰ ਆਤਮਾ ਦੇ ਨਾਮ ਤੇ ਬਪਤਿਸਮਾ ਦੇਣ ਲਈ ਕਿਹਾ ਗਿਆ ਹੈ, ਜਿਸਦਾ ਮਤਲਬ ਹੈ ਕਿ ਤਿੰਨ੍ਹਾਂ ਦੇ ਕੋਲ ਹੀ ਅਧਿਕਾਰ ਹੈ।

• 2 ਕੁਰਿੰਥੀਆਂ ਨੂੰ 13:14 ਦੇ ਵਿੱਚ ਪਵਿੱਤਰ ਆਤਮਾ ਦੇ ਨਾਲ ਸੰਗਤੀ ਕਰਨ ਦਾ ਜ਼ਿਕਰ ਕੀਤਾ ਗਿਆ ਹੈ, ਜੋ ਇੱਕ ਬੁੱਧੀਮਾਨ ਵਾਰਤਾਲਾਪ ਨੂੰ ਦਰਸਾਉਂਦਾ ਹੈ।

• ਮਰਕੁਸ 13:11 ਦੇ ਵਿੱਚ ਵਿਸ਼ਵਾਸੀਆਂ ਦੇ ਨਾਲ ਵਾਇਦਾ ਕੀਤਾ ਗਿਆ ਕਿ ਸਤਾਅ ਦੇ ਸਮੇਂ ਪਵਿੱਤਰ ਆਤਮਾ ਉਨ੍ਹਾਂ ਦੇ ਦੁਆਰਾ ਬੋਲੇਗਾ।

• ਯੂਹੰਨਾ 14:17, 26 ਦੇ ਵਿੱਚ ਪਵਿੱਤਰ ਆਤਮਾ ਨੂੰ ਸਚਿਆਈ ਦਾ ਆਤਮਾ ਕਿਹਾ ਗਿਆ ਹੈ ਜੋ ਸਾਨੂੰ ਸਿਖਾਏਗਾ ਅਤੇ ਯਾਦ ਕਰਵਾਏਗਾ।

• ਯੂਹੰਨਾ 16:7-11 ਦੇ ਵਿੱਚ, ਯਿਸੂ ਨੇ ਵਾਇਦਾ ਕੀਤਾ ਕਿ ਪਵਿੱਤਰ ਆਤਮਾ ਸੰਸਾਰ ਨੂੰ ਪਾਪ, ਧਾਰਮਿਕਤਾ ਅਤੇ ਨਿਆਂ ਦੇ ਵਿਖੇ ਕਾਇਲ ਕਰੇਗਾ, ਜਿਸਦੇ ਵਿੱਚ ਬੁੱਧੀਮਾਨੀ ਦੇ ਵਾਰਤਾਲਾਪ ਦੀ ਜਰੂਰਤ ਹੁੰਦੀ ਹੈ।

• ਯੂਹੰਨਾ 16:13-15 ਦੱਸਦਾ ਹੈ ਕਿ ਪਵਿੱਤਰ ਆਤਮਾ ਆਪਣੇ ਅਧਿਕਾਰ ਦੇ ਨਾਲ ਨਹੀਂ ਬੋਲੇਗਾ, ਪਰ ਉਹ ਮਸੀਹ ਦੀਆਂ ਗੱਲਾਂ ਦੀ ਘੋਸ਼ਣਾ ਕਰੇਗਾ।

• 1 ਕੁਰਿੰਥੀਆਂ ਨੂੰ 12:11 ਦੇ ਅਨੁਸਾਰ ਪਵਿੱਤਰ ਆਤਮਾ ਇਸ ਗੱਲ ਦੀ ਚੋਣ ਕਰਦਾ ਹੈ ਕਿ ਆਤਮਿਕ ਵਰਦਾਨ ਕਿਵੇਂ ਦਿੱਤੇ ਜਾਣਗੇ।

• ਉਹ ਸਾਡੇ ਆਤਮਾ ਨੂੰ ਸਾਖੀ ਦਿੰਦਾ ਹੈ ਕਿ ਅਸੀਂ ਪਰਮੇਸ਼ੁਰ ਦੇ ਬਾਲਕ ਹਾਂ (ਰੋਮੀਆਂ ਨੂੰ 8:16)।

• ਉਹ ਸਾਡੇ ਲਈ ਪਿਤਾ ਦੇ ਅੱਗੇ ਵਿਚੋਲਗੀ ਕਰਦਾ ਹੈ ਅਤੇ ਉਸਦੇ ਕੋਲ ਅਜਿਹਾ ਮਨ ਹੈ ਜੋ ਪਰਮੇਸ਼ੁਰ ਦੀ ਇੱਛਾ ਨੂੰ ਸਮਝ ਸਕਦਾ ਹੈ (ਰੋਮੀਆਂ ਨੂੰ 8:26-27)।

• ਅਫ਼ਸੀਆਂ ਨੂੰ 4:30 ਦੇ ਅਨੁਸਾਰ, ਉਹ ਉਦਾਸ ਹੋ ਸਕਦਾ ਹੈ, ਇਸਦਾ ਅਰਥ ਹੈ ਕਿ ਉਹ ਸਾਡੀਆਂ ਪ੍ਰਤੀਕਿਰਿਆਵਾਂ ਨੂੰ ਸਮਝਦਾ ਹੈ ਅਤੇ ਉਸਦੇ ਵਿੱਚ ਭਾਵਨਾਵਾਂ ਹਨ।

• ਉਸਦੇ ਨਾਲ ਝੂਠ ਬੋਲਿਆ ਜਾ ਸਕਦਾ ਹੈ, ਜਿਸਦਾ ਅਰਥ ਉਹ ਸਾਡੇ ਵਾਰਤਾਲਾਪ ਨੂੰ ਸਮਝਦਾ ਹੈ (ਰਸੂਲਾਂ ਦੇ ਕਰਤੱਬ 5:3)।

• ਉਹ ਗੱਲਬਾਤ ਕਰਦਾ ਹੈ, ਦਿਸ਼ਾ-ਨਿਰਦੇਸ਼ ਦਿੰਦਾ ਹੈ ਅਤੇ ਉਸਦੀ ਇੱਛਾ ਹੈ ਜਿਸਦੇ ਪਿੱਛੇ ਸਾਨੂੰ ਚੱਲਣਾ ਚਾਹੀਦਾ ਹੈ (ਰਸੂਲਾਂ ਦੇ ਕਰਤੱਬ 13:2-4)।

• ਉਸਨੇ ਮਿਸ਼ਨਰੀ ਯਾਤਰਾ ਦੇ ਵਿੱਚ ਰਸੂਲਾਂ ਦਾ ਦਿਸ਼ਾ-ਨਿਰਦੇਸ਼ ਕੀਤਾ ਅਤੇ ਕਈ ਵਾਰ ਉਨ੍ਹਾਂ ਨੂੰ ਕਿਸੇ ਸਥਾਨ ਤੇ ਜਾਣ ਤੋਂ ਮਨ੍ਹਾ ਕੀਤਾ (ਰਸੂਲਾਂ ਦੇ ਕਰਤੱਬ 16:6)।

(1) ਵਚਨਾਂ ਦੇ ਅਸਾਇਨਮੈਂਟ: ਹਰੇਕ ਵਿਦਿਆਰਥੀ ਨੂੰ ਹੇਠਾਂ ਦਿੱਤੇ ਵਚਨਾਂ ਦੀ ਸੂਚੀ ਵਿੱਚੋਂ ਇੱਕ ਸੌਂਪਿਆ ਜਾਵੇਗਾ। ਅੱਗਲੀ ਕਲਾਸ ਦੇ ਸ਼ੈਸ਼ਨ ਤੋਂ ਪਹਿਲਾਂ, ਤੁਹਾਨੂੰ ਵਚਨ ਨੂੰ ਪੜਣਾ ਚਾਹੀਦਾ ਹੈ ਅਤੇ ਇੱਕ ਪੈਰਾਗ੍ਰਾਫ ਦੇ ਵਿੱਚ ਲਿਖਣਾ ਹੋਵੇਗਾ ਕਿ ਇਹ ਪਾਠ ਦੇ ਵਿਸ਼ੇ ਬਾਰੇ ਕੀ ਕਹਿੰਦਾ ਹੈ।

• ਰਸੂਲਾਂ ਦੇ ਕਰਤੱਬ 1:4-8

• ਰੋਮੀਆਂ ਨੂੰ 8:1-14

• 1 ਕੁਰਿੰਥੀਆਂ ਨੂੰ 2:9-16

• 1 ਕੁਰਿੰਥੀਆਂ ਨੂੰ 12:1-13

• ਗਲਾਤੀਆਂ ਨੂੰ 5:22-26

(2) ਪ੍ਰੀਖਿਆ: ਤੁਸੀਂ ਅੱਗਲੀ ਕਲਾਸ ਦੀ ਸ਼ੁਰੂਆਤ ਪਾਠ 10 ਦੀ ਪ੍ਰੀਖਿਆ ਦੇ ਨਾਲ ਕਰੋਗੇ। ਤਿਆਰੀ ਦੇ ਲਈ ਪ੍ਰੀਖਿਆ ਦੇ ਪ੍ਰਸ਼ਨਾਂ ਦਾ ਧਿਆਨਪੂਰਵਕ ਅਧਿਐਨ ਕਰੋ।

(3) ਸਿਖਾਉਣ ਦਾ ਅਸਾਇਨਮੈਂਟ: ਆਪਣੀ ਕਲਾਸ ਤੋਂ ਬਾਹਰ ਸਿਖਾਉਣ ਦੀ ਸਮੇਂ ਸਾਰਨੀ ਨੂੰ ਬਣਾਉਣ ਅਤੇ ਇਸਦੇ ਬਾਰੇ ਰਿਪੋਰਟ ਦੇਣ ਨੂੰ ਯਾਦ ਰੱਖੋ।

(1) ਪ੍ਰਾਰੰਭਿਕ ਕਲੀਸਿਆ ਦੀ ਪਵਿੱਤਰ ਆਤਮਾ ਪ੍ਰਤੀ ਪ੍ਰਤੀਕਿਰਿਆ ਦੀਆਂ ਤਿੰਨ ਵਿਸ਼ੇਸ਼ਤਾਵਾਂ ਲਿਖੋ।

(2) ਅਸੀਂ ਕਿਵੇਂ ਜਾਣਦੇ ਹਾਂ ਕਿ ਪਵਿੱਤਰ ਆਤਮਾ ਇੱਕ ਵਿਅਕਤੀਤਵ ਹੈ?

(3) ਪੰਜ ਤਰੀਕੇ ਲਿਖੋ ਜਿਨ੍ਹਾਂ ਨਾਲ ਅਸੀਂ ਜਾਣਦੇ ਹਾਂ ਕਿ ਪਵਿੱਤਰ ਆਤਮਾ ਪਰਮੇਸ਼ੁਰ ਹੈ।

(4) ਪਵਿੱਤਰ ਆਤਮਾ ਦੇ ਕੰਮਾਂ ਵਿੱਚੋਂ ਨੌਂ ਲਿਖੋ।

(5) ਸਾਡੇ ਜੀਵਨਾਂ ਵਿੱਚ ਪਵਿੱਤਰ ਆਤਮਾ ਦੇ ਕੰਮ ਦੀ ਸਭ ਤੋਂ ਵੱਡੀ ਪ੍ਰਾਥਮਿਕਤਾ ਕੀ ਹੈ?