(1) ਵਿਦਿਆਰਥੀ ਹੇਠਾਂ ਦੱਸੀਆਂ ਗੱਲਾਂ ਦੀ ਵਿਆਖਿਆ ਕਰ ਪਾਉਣਗੇ:

• ਪਾਪ ਦਾ ਅਰੰਭ।

• ਪਾਪ ਦੇ ਲਈ ਬਾਈਬਲ ਦੇ ਸ਼ਬਦ।

• ਵਿਰਾਸਤ ਵਿੱਚ ਮਿਲੇ ਪਾਪ ਦੀ ਪਰਿਭਾਸ਼ਾ ਅਤੇ ਵਰਣਨ।

• ਜਾਣਬੁੱਝ ਕੇ ਕੀਤੇ ਜਾਣ ਵਾਲੇ ਪਾਪ ਦੀ ਬਾਈਬਲ ਆਧਾਰਿਤ ਧਾਰਨਾ।

• ਪਾਪ ਦੇ ਬਾਰੇ ਮਸੀਹੀ ਵਿਸ਼ਵਾਸਾਂ ਦਾ ਇੱਕ ਬਿਆਨ।

(2) ਵਿਦਿਆਰਥੀ ਜਾਣਬੁੱਝ ਕੇ ਕੀਤੇ ਜਾਣ ਵਾਲੇ ਪਾਪ ਦੀ ਸਪੱਸ਼ਟ ਪਰਿਭਾਸ਼ਾ ਦੇ ਨਾਲ ਇਸ ਮੁਕਤੀ ਨੂੰ ਬਿਹਤਰ ਤਰੀਕੇ ਨਾਲ ਸਮਝ ਸਕਣਗੇ।

► ਉਤਪਤ 3 ਨੂੰ ਮਿਲ ਕੇ ਪੜ੍ਹੋ। ਇਹ ਵਚਨ ਦਾ ਭਾਗ ਸਾਨੂੰ ਪਾਪ ਦੇ ਬਾਰੇ ਕੀ ਦੱਸਦਾ ਹੈ?

► ਸਾਨੂੰ ਪਾਪ ਨੂੰ ਸਮਝਣ ਦੀ ਕੀ ਜਰੂਰਤ ਹੈ?

ਸਾਨੂੰ ਹੇਠਾਂ ਦਿੱਤੇ ਕਾਰਨਾਂ ਕਰਕੇ ਪਾਪ ਨੂੰ ਸਮਝਣਾ ਚਾਹੀਦਾ ਹੈ:

1. ਸੰਸਾਰ ਦੀ ਸਥਿਤੀ ਨੂੰ ਸਮਝਣ ਦੇ ਲਈ। ਬਾਈਬਲ ਸਾਨੂੰ ਦੱਸਦੀ ਹੈ ਕਿ ਪਾਪ ਮਨੁੱਖੀ ਦੁੱਖਾਂ ਦਾ ਕਾਰਨ ਹੈ। ਪਾਪ ਦੇ ਦੁਆਰਾ ਹੀ ਮੌਤ ਸੰਸਾਰ ਦੇ ਵਿੱਚ ਆਈ (ਪੜ੍ਹੋ ਰੋਮੀਆਂ ਨੂੰ 5:12।) ਪਾਪ ਦੇ ਸ਼ਰਾਪ ਦੇ ਕਾਰਨ ਹੀ ਬਿਮਾਰੀ, ਬੁਢਾਪਾ ਅਤੇ ਦਰਦ ਹੈ। ਪਾਪ ਦੇ ਕੰਮ ਜਿਵੇਂ ਕਿ ਝੂਠ ਬੋਲਣਾ, ਚੋਰੀ ਕਰਨਾ, ਖੂਨ ਕਰਨਾ, ਵਿਭਚਾਰ, ਸ਼ਰਾਬ ਪੀਣਾ ਅਤੇ ਕਿਸੇ ਨੂੰ ਦਬਾਉਣਾ ਨੇ ਸੰਸਾਰ ਨੂੰ ਦੁੱਖਾਂ ਦੇ ਨਾਲ ਭਰ ਦਿੱਤਾ ਹੈ। ਪਾਪ ਦੇ ਕੰਮ ਦਿਲ ਵਿੱਚਲੇ ਪਾਪ ਤੋਂ ਨਿੱਕਲਦੇ ਹਨ, ਜਿਵੇਂ ਕਿ ਨਫ਼ਰਤ, ਵਾਸਨਾ, ਲਾਲਚ, ਘਮੰਡ ਅਤੇ ਸੁਆਰਥ।

2. ਕ੍ਰਿਪਾ ਅਤੇ ਮੁਕਤੀ ਨੂੰ ਸਮਝਣ ਦੇ ਲਈ। ਪਰਮੇਸ਼ੁਰ ਸਾਨੂੰ ਪਾਪ ਤੋਂ ਬਚਣ ਲਈ ਕ੍ਰਿਪਾ ਪ੍ਰਦਾਨ ਕਰਦਾ ਹੈ (ਮੱਤੀ 1:21; ਰੋਮੀਆਂ ਨੂੰ 5:20-21)।

3. ਪਵਿੱਤਰਤਾਈ ਨੂੰ ਸਮਝਣ ਦੇ ਲਈ। ਪਾਪ ਕਰਨਾ ਪਵਿੱਤਰਤਾਈ ਦੇ ਵਿਰੁੱਧ ਹੈ। ਇਹ ਪਰਮੇਸ਼ੁਰ ਦੀ ਭਗਤੀ ਦੇ ਵਿਰੁੱਧ ਹੈ। ਕਿਸੇ ਵਿਅਕਤੀ ਦੁਆਰਾ ਪਰਮੇਸ਼ੁਰ ਦੀ ਇੱਛਾ ਦੇ ਅਨੁਸਾਰ ਪਵਿੱਤਰ ਬਣਨ ਦੇ ਲਈ (ਪਤਰਸ ਦੀ ਪਹਿਲੀ ਪੱਤ੍ਰੀ 1:15-16), ਉਸਨੂੰ ਪਾਪ ਤੋਂ ਅਲੱਗ ਹੋਣਾ ਜਰੂਰੀ ਹੈ।

ਪਰਮੇਸ਼ੁਰ ਦੀ ਰਚਨਾ ਸੰਪੂਰਨ ਸੀ, ਅਤੇ ਜੋ ਕੁਝ ਉਸਨੇ ਬਣਾਇਆ ਉਸਦੇ ਵਿੱਚ ਕੋਈ ਵੀ ਨੁਕਸ ਨਹੀਂ ਸੀ। ਜਦੋਂ ਪਰਮੇਸ਼ੁਰ ਨੇ ਰਚਨਾ ਨੂੰ ਪੂਰਿਆਂ ਕੀਤਾ, ਤਾਂ ਉਸਨੇ ਵੇਖਿਆ ਕਿ ਸਭ ਕੁਝ ਚੰਗਾ ਹੈ (ਉਤਪਤ 1:31)। ਇਸ ਲਈ, ਅਸੀਂ ਜਾਣਦੇ ਹਾਂ ਕਿ ਪਾਪ ਪਰਮੇਸ਼ੁਰ ਦੀ ਗ਼ਲਤੀ ਨਹੀਂ ਸੀ।

ਆਦਮ ਅਤੇ ਹਵਾ ਪਰਮੇਸ਼ੁਰ ਦੇ ਨਾਲ ਸੰਬੰਧ ਦੇ ਵਿੱਚ ਸਨ। ਉਨ੍ਹਾਂ ਦੇ ਵਿੱਚ ਪਰਮੇਸ਼ੁਰ ਨੂੰ ਪ੍ਰਸੰਨ ਕਰਨ ਦੀ ਇੱਛਾ ਸੀ ਅਤੇ ਉਨ੍ਹਾਂ ਦੇ ਕੋਲ ਸਭ ਕੁਝ ਸਹੀ ਕਰਨ ਦੀ ਯੋਗਤਾ ਸੀ। ਸ਼ੈਤਾਨ ਹਵਾ ਦਾ ਪਰਤਾਵਾ ਲੈਣ ਦੇ ਲਈ ਆਇਆ ਤਾਂ ਕਿ ਉਹ ਪਰਮੇਸ਼ੁਰ ਦੀ ਅਣ-ਆਗਿਆਕਾਰੀ ਕਰੇ। ਇਸ ਤੋਂ ਅਸੀਂ ਜਾਣਦੇ ਹਾਂ ਕਿ ਪਾਪ ਪਹਿਲਾਂ ਤੋਂ ਹੀ ਬ੍ਰਹਿਮੰਡ ਦੇ ਵਿੱਚ ਹੋਂਦ ਦੇ ਵਿੱਚ ਸੀ। ਸ਼ੈਤਾਨ ਪਹਿਲਾਂ ਤੋਂ ਹੀ ਪਾਪ ਦੇ ਵਿੱਚ ਡਿੱਗ ਚੁੱਕਾ ਸੀ। ਪਰ ਪਾਪ ਅਜੇ ਤੱਕ ਮਨੁੱਖਤਾ ਦੇ ਵਿੱਚ ਜਾਂ ਰਚਨਾ ਦੇ ਉਸ ਹਿੱਸੇ ਵਿੱਚ ਦਾਖਿਲ ਨਹੀਂ ਹੋਏ ਸਨ ਜੋ ਮਨੁੱਖੀ ਅਧਿਕਾਰ ਦੇ ਅਧੀਨ ਸੀ।

ਆਦਮ ਅਤੇ ਹਵਾ ਦੇ ਕੋਲ ਆਜਾਦ ਇੱਛਾ ਸੀ। ਪਾਪ ਸੰਭਵ ਸੀ ਕਿਉਂਕਿ ਉਹ ਅਸਲ ਚੋਣ ਕਰਨ ਦੇ ਯੋਗ ਸਨ। ਉਨ੍ਹਾਂ ਨੇ ਪਰਮੇਸ਼ੁਰ ਦੇ ਕਾਨੂੰਨ ਨੂੰ ਤੋੜਣ ਦੀ ਚੋਣ ਕੀਤੀ, ਅਤੇ ਇਹ ਮਨੁੱਖੀ ਪਾਪ ਦਾ ਅਰੰਭ ਸੀ।

ਪਾਪ ਦੇ ਪਹਿਲੇ ਕੰਮ ਨੇ ਮਨੁੱਖਤਾ ਨੂੰ ਪਰਮੇਸ਼ੁਰ ਨਾਲੋਂ ਅਲੱਗ ਕਰ ਦਿੱਤਾ। ਪਾਪ ਨੇ ਮਨੁੱਖਤਾ ਦੇ ਸੁਭਾਅ ਨੂੰ ਵੀ ਭ੍ਰਿਸ਼ਟ ਕਰ ਦਿੱਤਾ। (ਪੜ੍ਹੋ ਜ਼ਬੂਰਾਂ ਦੀ ਪੋਥੀ 51:5)। ਇਸ ਤੋਂ ਬਾਅਦ ਪੈਦਾ ਹੋਏ ਸਾਰੇ ਬੱਚਿਆਂ ਦੇ ਵਿੱਚ ਭ੍ਰਿਸ਼ਟ ਸੁਭਾਅ ਸੀ ਅਤੇ ਉਨ੍ਹਾਂ ਨੇ ਪਾਪ ਦੇ ਕੰਮ ਕੀਤੇ (ਪੜ੍ਹੋ ਰੋਮੀਆਂ ਨੂੰ 5:12, 14, 18-19)।

ਪਾਪ ਨੇ ਸਾਰੀ ਰਚਨਾ ਤੇ ਸ਼ਰਾਪ ਨੂੰ ਲਿਆਂਦਾ (ਉਤਪਤ 3:16-19)। ਪਾਪ ਦੇ ਕਾਰਨ ਜੀਵਨ ਬਦਲ ਗਿਆ। ਦਰਦ, ਬੁਢਾਪਾ ਅਤੇ ਮੌਤ ਦੀ ਸ਼ੁਰੂਆਤ ਹੋਈ। (ਪੜ੍ਹੋ 1 ਕੁਰਿੰਥੀਆਂ ਨੂੰ 15:22)। ਕੰਮ ਕਰਨਾ ਅਤੇ ਬਚੇ ਰਹਿਣਾ ਕਠਿਨ ਹੋ ਗਿਆ। ਮਨੁੱਖੀ ਸੰਬੰਧ ਝਗੜਿਆਂ ਦੇ ਨਾਲ ਭਰ ਗਏ। ਜਿਵੇਂ ਜਿਵੇਂ ਸਾਲ ਬੀਤੇ ਲੋਕ ਵੱਧਦੇ ਗਏ ਅਤੇ ਪਾਪ ਦੇ ਨਤੀਜੇ ਇੰਨੇ ਵੱਧ ਗਏ ਜਿਸਦੀ ਆਦਮ ਅਤੇ ਹਵਾ ਨੇ ਕਦੇ ਕਲਪਨਾ ਵੀ ਨਹੀਂ ਕੀਤੀ ਹੋਵੇਗੀ।

ਬਹੁਤ ਸਾਰੀਆਂ ਭਾਸ਼ਾਵਾਂ ਦੇ ਵਿੱਚ ਪਾਪ ਦੇ ਲਈ ਵੱਖ-ਵੱਖ ਸ਼ਬਦ ਹਨ। ਇਬਰਾਨੀ ਅਤੇ ਯੂਨਾਨੀ, ਜੋ ਪਵਿੱਤਰ ਸ਼ਾਸਤਰ ਦੀਆਂ ਮੂਲ ਭਾਸ਼ਾਵਾਂ ਹਨ, ਇੰਨਾਂ ਦੇ ਵਿੱਚ ਵੀ ਪਾਪ ਦਾ ਵਰਣਨ ਜਾਂ ਇਸਨੂੰ ਪਰਿਭਾਸ਼ਿਤ ਕਰਨ ਦੇ ਲਈ ਬਹੁਤ ਸਾਰੇ ਸ਼ਬਦ ਹਨ, ਜਿੰਨਾਂ ਦੀ ਵਿਆਖਿਆ ਹੇਠਾਂ ਕੀਤੀ ਹੋਈ ਹੈ। ਜਦੋਂ ਇੰਨਾਂ ਨੂੰ ਮਿਲਾ ਕੇ ਵੇਖਿਆ ਜਾਂਦਾ ਹੈ, ਇਹ ਸ਼ਬਦ ਪਾਪ ਦੇ ਬਾਰੇ ਇੱਕ ਵਿਆਪਕ ਤਸਵੀਰ ਪੇਸ਼ ਕਰਦੇ ਹਨ।

• [1]ਅਧਿਕਾਰ ਨੂੰ ਨਕਾਰਨ ਦੇ ਵੱਜੋਂ ਪਾਪ- ਵਿਰੋਧ ਅਤੇ ਬਗ਼ਾਵਤ (ਜ਼ਬੂਰਾਂ ਦੀ ਪੋਥੀ 51:1)। ਜਦੋਂ ਯਾਕੂਬ ਨੇ ਲਾਬਾਨ ਦੇ ਕੋਲੋਂ ਗੁੱਸੇ ਨਾਲ ਮੰਗ ਕੀਤੀ ਕਿ ਉਹ ਉਸਨੂੰ ਦੱਸੇ ਕਿ ਉਸਨੇ ਉਸਦੇ ਵਿਰੁੱਧ ਕੀ ਅਪਰਾਧ ਕੀਤਾ ਹੈ ਤਾਂ ਉਸ ਸਮੇਂ ਯਾਕੂਬ ਨੇ ਇਸ ਇਬਰਾਨੀ ਸ਼ਬਦ ਦਾ ਉਪਯੋਗ ਕੀਤਾ। (ਉਤਪਤ 31:36)। ਇਹ ਸ਼ਬਦ ਯਹੋਰਾਮ ਰਾਜੇ ਦੇ ਵਿਰੁੱਧ ਮੋਆਬ ਦੇ ਰਾਜੇ ਦੀ ਗਤੀਵਿਧੀ ਨੂੰ ਵੀ ਦਰਸਾਉਂਦੇ ਹਨ (1 ਰਾਜਿਆਂ ਦੀ ਦੂਜੀ ਪੋਥੀ 3:7)।

• ਦੋਸ਼ ਜਾਂ ਵਿਗਾੜ ਵੱਜੋਂ ਪਾਪ- ਉਹ ਜਿਸਨੂੰ ਝੁਕਾਇਆ ਜਾਂ ਤੋੜਿਆ-ਮਰੋੜਿਆ ਹੋਵੇ (ਜ਼ਬੂਰਾਂ ਦੀ ਪੋਥੀ 51:2a)। ਸ਼ੈਤਾਨ ਕਿਸੇ ਵੀ ਚੀਜ਼ ਦੀ ਰਚਨਾ ਨਹੀਂ ਕਰ ਸਕਦਾ, ਇਸ ਲਈ ਪਾਪ ਇਹੀ ਹੈ ਕਿ ਉਹ ਪਰਮੇਸ਼ੁਰ ਦੁਆਰਾ ਕੀਤੀ ਚੰਗੀ ਰਚਨਾ ਨੂੰ ਵਿਗਾੜਦਾ ਹੈ।

• ਨਿਸ਼ਾਨੇ ਤੋਂ ਖੁੰਝਣ ਜਾਂ ਟੀਚੇ ਤੋਂ ਭਟਕ ਜਾਣ ਵੱਜੋਂ ਪਾਪ। ਜ਼ਬੂਰਾਂ ਦੀ ਪੋਥੀ 51:2b ਦੇ ਵਿੱਚ ਪਾਪ ਦੇ ਲਈ ਵਰਤੇ ਗਏ ਇਬਰਾਨੀ ਸ਼ਬਦ ਦਾ ਇਹ ਅਰਥ ਹੈ। ਨਿਆਈਆਂ ਦੀ ਪੋਥੀ 20:16 ਦੇ ਵਿੱਚ ਇਸੇ ਸ਼ਬਦ ਨੂੰ ਕਿਸੇ ਨਿਰਪੱਖ ਕਿਰਿਆ ਦੇ ਵੱਜੋਂ ਵਰਤਿਆ ਗਿਆ ਹੈ, ਜਿਸਦੇ ਵਿੱਚ ਖੱਬੇ ਹੱਥ ਵਾਲੇ 700 ਯੋਧਿਆਂ ਦਾ ਜ਼ਿਕਰ ਹੈ ਜੋ ਵਾਲ ਤੇ ਪੱਥਰ ਮਾਰਣ ਤਾਂ ਵੀ ਉਹ ਨਿਸ਼ਾਨੇ ਤੋਂ ਨਹੀਂ ਖੁੰਝਦੇ। ਪਾਪ ਤੋਂ ਭਾਵ ਹੈ ਪਰਮੇਸ਼ੁਰ ਦੀ ਸਚਿਆਈ, ਪਵਿੱਤਰਤਾਈ ਅਤੇ ਧਾਰਮਿਕਤਾ ਤੋਂ ਖੁੰਝ ਜਾਣਾ।

ਨਵੇਂ ਨੇਮ ਦੇ ਵਿੱਚ ਇੱਕ ਯੂਨਾਨੀ ਸ਼ਬਦ ਦਾ ਇਸਦੇ ਸਮਾਨ ਹੀ ਅਰਥ ਹੈ। ਇਹ ਸ਼ਬਦ ਸਾਰੇ ਸੰਸਾਰ ਦੇ ਪਾਪਾਂ ਲਈ ਉਪਯੋਗ ਕੀਤਾ ਜਾ ਸਕਦਾ (ਮੱਤੀ 1:21) ਜਾਂ ਕਿਸੇ ਇੱਕ ਵਿਅਕਤੀ ਵਿਸ਼ੇਸ਼ ਦੇ ਪਾਪਾਂ ਲਈ ਉਪਯੋਗ ਕੀਤਾ ਜਾ ਸਕਦਾ ਹੈ ਜਿਵੇਂ ਕਿ ਉਹ ਇਸਤਰੀ ਜਿਸਨੇ ਯਿਸੂ ਦੇ ਪੈਰ ਧੋਤੇ ਸਨ (ਲੂਕਾ 7:48-50) ਜਾਂ ਇੱਕ ਪਾਪ ਜਿਵੇਂ ਕਿ ਇਸਤੀਫ਼ਾਨ ਦਾ ਖੂਨ ਕਰਨ ਦਾ ਪਾਪ (ਰਸੂਲਾਂ ਦੇ ਕਰਤੱਬ 7:60)। ਪਾਪ ਪਰਮੇਸ਼ੁਰ ਦੀ ਇੱਛਾ ਤੋਂ ਭਟਕਾ ਦਿੰਦਾ ਹੈ।

• ਪਾਪ ਬੁਰਾਈ, ਭਲਿਆਈ ਦੇ ਵਿਰੋਧੀ ਵੱਜੋਂ (ਜ਼ਬੂਰਾਂ ਦੀ ਪੋਥੀ 51:4)। ਇਹੀ ਇਬਰਾਨੀ ਸ਼ਬਦ ਦਾ ਉਪਯੋਗ ਫ਼ਿਰਊਨ ਦੇ ਸੁਫ਼ਨੇ ਵਾਲੀਆਂ ਸੱਤ ਮਾੜੀਆਂ ਗਾਈਆਂ ਦੇ ਲਈ ਕੀਤਾ ਗਿਆ ਹੈ (ਉਤਪਤ 41:19) ਅਤੇ ਯਿਰਮਿਯਾਹ 24:2 ਦੇ ਵਿੱਚ ਅੰਜ਼ੀਰਾਂ ਦੇ ਲਈ ਜਿੰਨਾਂ ਨੂੰ ਖਾਧਾ ਨਹੀਂ ਜਾ ਸਕਦਾ ਸੀ ।

• ਪਾਪ ਅਸਫਲਤਾ ਜਾਂ ਸੁਣਨ ਦੀ ਇੱਛਾ ਨਾ ਹੋਣ ਵੱਜੋਂ, ਜਿਸਦਾ ਨਤੀਜਾ ਕਿਰਿਆਸ਼ੀਲ ਅਣ-ਆਗਿਆਕਾਰੀ ਹੁੰਦਾ ਹੈ (ਰੋਮੀਆਂ ਨੂੰ 5:19)। ਇਸ ਵਿਵਹਾਰ ਦੀ ਇੱਕ ਉਦਾਹਰਨ ਰਸੂਲਾਂ ਦੇ ਕਰਤੱਬ 7:57 ਦੇ ਵਿੱਚ ਦਿੱਤੀ ਗਈ ਹੈ, ਜਿੱਥੇ ਇਸਤੀਫ਼ਾਨ ਨੂੰ ਪੱਥਰ ਮਾਰਨ ਵਾਲਿਆਂ ਨੇ ਆਪਣੇ ਕੰਨ ਬੰਦ ਕਰ ਲਏ ਸਨ। ਇਸ ਯੂਨਾਨੀ ਸ਼ਬਦ ਦਾ ਬਿਹਤਰ ਸੰਖੇਪ ਅਣ-ਆਗਿਆਕਾਰੀ ਹੈ।

• ਪਾਪ ਕਿਸੇ ਖਾਸ ਬਿਵਸਥਾ ਨੂੰ ਤੋੜਣ ਵੱਜੋਂ- ਪਰਮੇਸ਼ੁਰ ਦੀ ਮੰਗ ਦੇ ਉਲਟ ਕੰਮ ਕਰਨਾ (ਯੂਹੰਨਾ ਦੀ ਪਹਿਲੀ ਪੱਤ੍ਰੀ 3:4)। ਇਹ ਯੂਨਾਨੀ ਸ਼ਬਦ ਦੋ ਸ਼ਬਦਾਂ ਤੋਂ ਮਿਲ ਕੇ ਬਣਦਾ ਹੈ “ਬਿਵਸਥਾ ਦਾ ਨਾ ਹੋਣਾ” ਜਾਂ “ਸ਼ਰਾ ਦਾ ਉਲਟ”।

• ਪਾਪ ਜਾਣਬੁੱਝ ਕੇ ਭਟਕਣ ਵੱਜੋਂ ਜਾਂ ਪਰਮੇਸ਼ੁਰ ਦੁਆਰਾ ਜਾਣੇ ਜਾਂਦੇ ਅਤੇ ਮੰਗ ਕੀਤੇ ਜਾਂਦੇ ਤੋਂ ਪਰੇ ਜਾਣ ਵੱਜੋਂ (ਕੂਚ 32:7-8)। ਵਚਨ ਦੇ ਇਸ ਹਿੱਸੇ ਵਿੱਚ, ਜਦੋਂ ਮੂਸਾ ਸੀਨਈ ਪਰਬਤ ਤੇ ਸੀ ਤਾਂ ਲੋਕਾਂ ਨੇ ਪਰਮੇਸ਼ੁਰ ਤੋਂ ਦੂਰ ਜਾਣਾ ਸ਼ੁਰੂ ਕਰ ਦਿੱਤਾ।

• ਅਨਜਾਣੇ ਵਿੱਚ ਹੋਣ ਵਾਲੇ ਪਾਪ (ਲੇਵੀਆਂ ਦੀ ਪੋਥੀ 4:2)। ਇਸ ਪ੍ਰਕਾਰ ਦੇ ਪਾਪ ਦੀ ਚਰਚਾ ਨਵੇਂ ਅਤੇ ਪੁਰਾਣੇ ਦੋਨਾਂ ਨੇਮਾਂ ਦੇ ਵਿੱਚ ਕੀਤੀ ਜਾਂਦੀ ਹੈ। ਇਬਰਾਨੀਆਂ ਨੂੰ 9:7 ਦੇ ਵਿੱਚ ਵਰਤਿਆ ਗਿਆ ਸ਼ਬਦ ਇੱਕ ਕਿਰਿਆ ਤੋਂ ਆਉਂਦਾ ਹੈ ਜਿਸਦਾ ਅਰਥ ਹੈ “ਅਨਜਾਣ ਹੋਣਾ” ਜਾਂ “ਸਮਝ ਨਾ ਰੱਖਣਾ” ਅਤੇ ਇਸ ਲਈ ਇਸਦਾ ਅਰਥ ਹੈ “ਅਨਜਾਣਪੁਣੇ ਵਿੱਚ ਕੀਤਾ ਪਾਪ।” ਇਹ ਵਚਨ ਉਸ ਪ੍ਰਾਸਚਿੱਤ ਨੂੰ ਦਰਸਾਉਂਦਾ ਹੈ ਜੋ ਪਰਧਾਨ ਜਾਜਕ ਪਰਜਾ ਦੀਆਂ ਭੁੱਲਾਂ ਦੇ ਲਈ ਕਰਦਾ ਸੀ।

ਇੰਨਾਂ ਸ਼ਬਦਾਂ ਤੋਂ ਅਸੀਂ ਵੇਖਦੇ ਹਾਂ ਕਿ ਪਾਪ ਬਹੁਤ ਤੱਥਾਂ ਤੋਂ ਇੱਕ ਸਮੱਸਿਆ ਹੈ। ਕਈ ਸ਼ਬਦ ਪਾਪ ਦਾ ਵਰਣਨ ਇਸ ਦੇ ਬਹੁਤ ਆਮ ਅਰਥ ਦੇ ਵਿੱਚ ਕਰਦੇ ਹਨ। ਦੂਸਰੇ ਸ਼ਬਦ ਪਾਪ ਨੂੰ ਪਰਮੇਸ਼ੁਰ ਦੇ ਵਚਨ ਸੁਣਨ ਵਿੱਚ ਅਸਫਲਤਾ ਦੇ ਨਤੀਜੇ; ਇੱਕ ਤੈਅ ਪੱਧਰ ਦੇ ਅਨੁਸਾਰ ਜਿਉਣ ਵਿੱਚ ਅਸਫਲਤਾ, ਜਾਣਬੁੱਝ ਕੇ ਕੀਤੇ ਜਾਣ ਵਾਲੇ ਪਾਪਾਂ ਜਾਂ ਇੱਥੋਂ ਤੱਕ ਕਿ ਅਚਨਚੇਤ ਹੋਏ ਪਾਪਾਂ ਵੱਜੋਂ ਦਰਸਾਉਂਦੇ ਹਨ। ਇਹ ਚਾਹੇ ਕਿਸੇ ਵੀ ਤਰ੍ਹਾਂ ਹੋਵੇ, ਇਸ ਵਿਚਾਰ ਨੂੰ ਯਾਦ ਕਰਨਾ ਮੁਬਾਰਕ ਹੈ ਕਿ ਯਿਸੂ ਨੇ ਲੋਕਾਂ ਨੂੰ ਉਨ੍ਹਾਂ ਦੇ ਪਾਪਾਂ ਤੋਂ ਬਚਾਉਣ ਦੇ ਲਈ ਸਲੀਬ ਤੇ ਆਪਣੀ ਜਾਨ ਦਿੱਤੀ (ਮੱਤੀ 1:21)।

► ਜਾਣਬੁੱਝ ਕੇ ਕੀਤੇ ਜਾਣ ਵਾਲਾ ਪਾਪ ਕੀ ਹੈ?

ਜਾਣਬੁੱਝ ਕੇ ਕੀਤੇ ਜਾਣ ਵਾਲਾ ਪਰਮੇਸ਼ੁਰ ਦੀ ਜਾਣੀ ਹੋਈ ਇੱਛਾ ਦੀ ਉਦੇਸ਼ਪੂਰਨ ਅਣ-ਆਗਿਆਕਾਰੀ ਹੈ। (ਪੜ੍ਹੋ ਯੂਹੰਨਾ ਦੀ ਪਹਿਲੀ ਪੱਤ੍ਰੀ 3:4; ਯਾਕੂਬ 4:17।) ਇਹ ਉਸ ਸਮੇਂ ਹੁੰਦਾ ਹੈ ਜਦੋਂ ਕੋਈ ਵਿਅਕਤੀ ਜਾਣਬੁੱਝ ਕੇ ਕਿਸੇ ਅਜਿਹੇ ਕੰਮ ਨੂੰ ਕਰਨ ਦੀ ਚੋਣ ਕਰਦਾ ਹੈ ਜਾਂ ਉਸਨੂੰ ਲਗਾਤਾਰ ਕਰਦਾ ਹੈ ਜਿਸ ਬਾਰੇ ਉਹ ਜਾਣਦਾ ਹੈ ਕਿ ਇਹ ਸਹੀ ਨਹੀਂ ਹੈ। ਇਹ ਜਾਣਬੁੱਝ ਕੀਤੇ ਜਾਣ ਵਾਲੀਆਂ ਗ਼ਲਤੀਆਂ ਹਨ।

ਯੂਹੰਨਾ ਦੀ ਪਹਿਲੀ ਪੱਤ੍ਰੀ 3:5-6 ਦੇ ਵਿੱਚ ਯੂਹੰਨਾ ਰਸੂਲ ਲਿਖਦਾ ਹੈ,

ਤੁਸੀਂ ਜਾਣਦੇ ਹੋ ਜੋ ਉਹ [ਯਿਸੂ] ਇਸ ਲਈ ਪਰਗਟ ਹੋਇਆ ਭਈ ਪਾਪਾਂ ਨੂੰ ਚੁੱਕ ਲੈ ਜਾਵੇ, ਅਤੇ ਉਹ ਦੇ ਵਿੱਚ ਪਾਪ ਨਹੀਂ ਹੈ ਹਰ ਕੋਈ ਜੋ ਉਸ ਵਿੱਚ ਕਾਇਮ ਰਹਿੰਦਾ ਹੈ ਪਾਪ ਨਹੀਂ ਕਰਦਾ । ਹਰ ਕੋਈ ਜਿਹੜਾ ਪਾਪ ਕਰਦਾ ਹੈ ਓਸ ਨੇ ਉਹ ਨੂੰ ਨਹੀਂ ਵੇਖਿਆ, ਨਾ ਉਹ ਨੂੰ ਜਾਣਿਆ ਹੈ ।

ਜਿਸ ਪਾਪ ਦੀ ਇੱਥੇ ਗੱਲ ਕੀਤੀ ਗਈ ਹੈ ਉਹ ਜਾਣਬੁੱਝ ਕੇ ਲਗਾਤਾਰ ਕੀਤੇ ਜਾਣ ਵਾਲਾ ਪਾਪ ਹੈ। ਇਸਦਾ ਇੱਕ ਵਿਆਪਕ ਅਨੁਵਾਦ ਇਸ ਪ੍ਰਕਾਰ ਹੋ ਸਕਦਾ ਹੈ: ਕੋਈ ਵੀ ਅਜਿਹਾ ਵਿਅਕਤੀ ਜੋ ਲਗਾਤਾਰ ਯਿਸੂ ਦੇ ਵਿੱਚ ਬਣਿਆ ਹੋਇਆ ਹੈ ਉਹ ਲਗਾਤਾਰ ਜਾਂ ਆਦੀ ਹੋ ਕੇ ਪਾਪ ਨਹੀਂ ਕਰ ਸਕਦਾ, ਅਤੇ ਕੋਈ ਵੀ ਅਜਿਹਾ ਵਿਅਕਤੀ ਜੋ ਲਗਾਤਾਰ ਜਾਂ ਆਦੀ ਹੋ ਕੇ ਪਾਪ ਕਰ ਰਿਹਾ ਹੈ ਉਸਨੇ ਨਾ ਉਸਨੂੰ ਵੇਖਿਆ ਹੈ ਅਤੇ ਨਾ ਉਹ ਉਸਨੂੰ ਜਾਣਦਾ ਹੈ।

ਜੇਕਰ ਕੋਈ ਵਿਅਕਤੀ ਪਾਪ ਦਾ ਇਸਦੀ ਬਹੁਤ ਆਮ ਧਾਰਨਾ ਵਿੱਚ ਲੈਂਦਾ ਹੈ (ਜਿਸਦੇ ਵਿੱਚ ਅਨਜਾਣਪੁਣੇ ਦੇ ਪਾਪ ਜਾਂ ਬਿਨਾਂ ਇਰਾਦੇ ਦੇ ਪਾਪ ਸ਼ਾਮਿਲ ਹਨ), ਤਾਂ ਇਸ ਬਿਆਨ ਦਾ ਕੋਈ ਮਤਲਬ ਨਹੀਂ ਬਣਦਾ। ਮਸੀਹੀਆਂ ਦੇ ਵਿੱਚ ਹੁਣ ਵੀ ਅਜਿਹੀਆਂ ਗ਼ਲਤੀਆਂ ਹੁੰਦੀਆਂ ਹਨ ਜੋ ਜਾਣਬੁੱਝ ਕੇ ਨਹੀਂ ਕੀਤੀਆਂ ਜਾਂਦੀਆਂ। ਪਰ ਜੇਕਰ, ਕੋਈ ਵਿਅਕਤੀ ਪਾਪ ਨੂੰ (ਇਸ ਵਚਨ ਦੇ ਵਿੱਚ) “ਜਾਣਬੁੱਝ ਕੇ ਕੀਤੀ ਜਾਣ ਪਰਮੇਸ਼ੁਰ ਦੀ ਬਿਵਸਥਾ ਦੀ ਉਲੰਘਣਾ” ਵੱਜੋਂ ਵੇਖੇ ਤਾਂ ਵਚਨ ਦਾ ਇਹ ਹਿੱਸਾ ਬਹੁਤ ਹੀ ਅਰਥਪੂਰਨ ਬਣ ਜਾਂਦਾ ਹੈ।

► ਤੁਸੀਂ ਉਸ ਪਾਪੀ ਸੁਭਾਅ ਦਾ ਵਰਣਨ ਕਿਵੇਂ ਕਰੋਗੇ ਜੋ ਜਨਮ ਤੋਂ ਹੀ ਲੋਕਾਂ ਦੇ ਵਿੱਚ ਹੁੰਦਾ ਹੈ?

ਵਿਰਾਸਤ ਦੇ ਵਿੱਚ ਮਿਲਿਆ ਪਾਪ ਮਨੁੱਖ ਦੇ ਨੈਤਿਕ ਸੁਭਾਅ ਦਾ ਭ੍ਰਿਸ਼ਟਾਚਾਰ ਹੈ ਜੋ ਜਨਮ ਤੋਂ ਹੀ ਉਸਨੂੰ ਪਾਪ ਦੇ ਵੱਲ ਝੁਕਾਉਂਦਾ ਹੈ। ਕਈ ਵਾਰ ਇਸਨੂੰ ਮੂਲ ਪਾਪ ਵੀ ਕਿਹਾ ਜਾਂਦਾ ਹੈ। ਅਸੀਂ ਆਦਮ ਦੇ ਪਾਪ ਦੇ ਕਾਰਨ ਪਾਪੀ ਸੁਭਾਅ ਦੇ ਨਾਲ ਪੈਦਾ ਹੁੰਦੇ ਹਾਂ।

ਸਾਰੇ ਲੋਕਾਂ ਦੇ ਵਿੱਚ ਜਨਮ ਤੋਂ ਹੀ ਦੁਸ਼ਟਤਾ ਦੇ ਵੱਲ ਝੁਕਾਅ ਹੁੰਦਾ ਹੈ। (ਪੜ੍ਹੋ ਜ਼ਬੂਰਾਂ ਦੀ ਪੋਥੀ 58:3।) ਕਿਸੇ ਵਿਅਕਤੀ ਦੇ ਜਨਮ ਦੇ ਸਮੇਂ ਤੋਂ ਹੀ ਪਾਪ ਕਰਨ ਦੇ ਝੁਕਾਅ ਦੇ ਨਾਲ ਪਹਿਲਾਂ ਤੋਂ ਵਿਗੜਿਆ ਹੁੰਦਾ ਹੈ। ਜਿਵੇਂ ਹੀ ਕੋਈ ਵਿਅਕਤੀ ਚੋਣਾਂ ਕਰਨੀਆਂ ਸ਼ੁਰੂ ਕਰ ਦਿੰਦਾ ਹੈ ਤਾਂ ਇਸਦੇ ਨਾਲ ਹੀ ਉਹ ਪਾਪ ਕਰਨਾ ਸ਼ੁਰੂ ਕਰ ਦਿੰਦਾ ਹੈ। ਉਹ ਪਾਪ ਕਰਨ ਦੀ ਇੱਛਾ ਨੂੰ ਆਪਣੇ ਮਾਹੌਲ ਤੋਂ ਨਹੀਂ ਸਿੱਖਦਾ ਹੈ।

ਦਾਊਦ ਨੇ ਕਿਹਾ ਕਿ ਉਸਦਾ ਜਨਮ ਬੁਰਾਈ ਦੇ ਵਿੱਚ ਹੀ ਹੋਇਆ ਅਤੇ ਪਾਪ ਦੇ ਵਿੱਚ ਹੀ ਉਹ ਆਪਣੀ ਮਾਂ ਦੀ ਕੁੱਖ ਦੇ ਵਿੱਚ ਆਇਆ। (ਪੜ੍ਹੋ ਜ਼ਬੂਰਾਂ ਦੀ ਪੋਥੀ 51:5।) ਉਸਦਾ ਇਹ ਅਰਥ ਨਹੀਂ ਸੀ ਕਿ ਉਸਦੀ ਮਾਂ ਨੇ ਕੁਝ ਗ਼ਲਤ ਕੀਤਾ ਹੈ। ਉਸਦਾ ਮਤਲਬ ਸੀ ਕਿ ਜਦੋਂ ਇੱਕ ਬੱਚਾ ਕੁੱਖ ਦੇ ਵਿੱਚ ਬਣ ਰਿਹਾ ਹੁੰਦਾ ਹੈ, ਤਾਂ ਉਸਦਾ ਸੁਭਾਅ ਪਹਿਲਾਂ ਤੋਂ ਹੀ ਪਾਪ ਦੇ ਦੁਆਰਾ ਭ੍ਰਿਸ਼ਟ ਹੁੰਦਾ ਹੈ।

ਭ੍ਰਿਸ਼ਟ ਸੁਭਾਅ ਦੇ ਕਾਰਨ, ਲੋਕਾਂ ਦੇ ਵਿੱਚ ਪਰਮੇਸ਼ੁਰ ਦਾ ਸਰੂਪ ਵਿਗੜ ਗਿਆ ਹੈ। ਹਰੇਕ ਵਿਅਕਤੀ ਸੁਆਰਥੀ ਅਤੇ ਪਾਪ ਕਰਨ ਵਾਲੀ ਇੱਛਾ ਦੇ ਨਾਲ ਪੈਦਾ ਹੁੰਦਾ ਹੈ। (ਰੋਮੀਆਂ ਨੂੰ 3:10-12)। ਜਦੋਂ ਤੱਕ ਪਰਮੇਸ਼ੁਰ ਸਾਨੂੰ ਅਜਿਹਾ ਕਰਨ ਦੀ ਇੱਛਾ ਅਤੇ ਸ਼ਕਤੀ ਨਾ ਦੇਵੇ ਉਦੋਂ ਤੱਕ ਸਾਡੀ ਇੱਛਾ ਸਹੀ ਗੱਲ ਦੀ ਚੋਣ ਕਰਨ ਲਈ ਆਜਾਦ ਨਹੀਂ ਹੈ।(ਪੜ੍ਹੋ ਰੋਮੀਆਂ ਨੂੰ 6:16-17।)

ਵਿਰਾਸਤ ਵਿੱਚ ਮਿਲਿਆ ਹੋਇਆ ਪਾਪ ਸਾਨੂੰ ਅੰਦਰੂਨੀ ਪਾਪ ਕਰਨ ਲਈ ਪ੍ਰੇਰਿਤ ਕਰਦਾ ਹੈ ਜਿਵੇਂ ਕਿ ਘਮੰਡ, ਈਰਖਾ, ਨਫ਼ਰਤ ਅਤੇ ਮਾਫ਼ੀ ਨਾ ਦੇਣਾ। ਇਹ ਪਾਪ ਦੇ ਕੰਮਾਂ ਨੂੰ ਵੀ ਪ੍ਰੇਰਿਤ ਕਰਦਾ ਹੈ।

ਲੋਕਾਂ ਦੇ ਅੰਦਰ ਸੁਭਾਵਿਕ ਤੌਰ ਤੇ ਪਰਮੇਸ਼ੁਰ ਦੇ ਅਧਿਕਾਰ ਦੇ ਵਿਰੁੱਧ ਬਗ਼ਾਵਤ ਕਰਨ ਅਤੇ ਉਸਦੀ ਬਿਵਸਥਾ ਤੇ ਕ੍ਰੋਧਿਤ ਹੋਣ ਦਾ ਰਵੱਈਆ ਹੁੰਦਾ ਹੈ। ਪਾਪੀਆਂ ਦਾ ਨਿਆਂ ਸਿਰਫ਼ ਉਨ੍ਹਾਂ ਦੇ ਪਾਪ ਦੇ ਕੰਮਾਂ ਅਨੁਸਾਰ ਹੀ ਨਹੀਂ ਪਰ ਪਰਮੇਸ਼ੁਰ ਦੇ ਵਿਰੁੱਧ ਬਗ਼ਾਵਤ ਦੇ ਰਵੱਈਏ ਦੇ ਆਧਾਰ ਤੇ ਵੀ ਹੋਵੇਗਾ। (ਪੜ੍ਹੋ ਯਹੂਦਾਹ 1:15।)

ਪਾਪੀ ਸੁਭਾਅ ਵਾਲਾ ਵਿਅਕਤੀ ਕੁਦਰਤੀ ਤੌਰ ਤੇ ਸੁਆਰਥੀ ਹੁੰਦਾ ਹੈ। ਉਹ ਪਰਮੇਸ਼ੁਰ ਅਤੇ ਦੂਸਰਿਆਂ ਦੀ ਅਧੀਨਗੀ ਦੇ ਵਿੱਚ ਆਉਣ ਦੀ ਬਜਾਏ ਆਪਣੀ ਹੀ ਇੱਛਾ ਨੂੰ ਪੂਰਿਆਂ ਕਰਨਾ ਚਾਹੁੰਦਾ ਹੈ। ਉਹ ਪਰਮੇਸ਼ੁਰ ਨੂੰ ਪ੍ਰਸੰਨ ਕਰਨ ਦੀ ਬਜਾਏ ਆਪਣੀ ਹੀ ਇੱਛਾ ਦੀ ਸੰਤੁਸ਼ਟੀ ਕਰਨੀ ਚਾਹੁੰਦਾ ਹੈ। ਉਸਨੇ ਆਪਣੇ ਆਪ ਤੇ ਭਰੋਸਾ ਹੁੰਦਾ ਹੈ ਅਤੇ ਉਹ ਪਰਮੇਸ਼ੁਰ ਤੇ ਨਿਰਭਰ ਨਹੀਂ ਹੋਣਾ ਚਾਹੁੰਦਾ। ਉਸਦੇ ਲਈ ਪਰਮੇਸ਼ੁਰ ਦੀ ਮਹਿਮਾ ਨਾਲੋਂ ਉਸਦੀ ਆਪਣੀ ਸਫਲਤਾ ਜਿਆਦਾ ਮਹੱਤਵਪੂਰਨ ਹੈ।

ਲੋਕ ਸਹੀ ਅਤੇ ਗ਼ਲਤ ਦੀ ਸੱਚੀ ਪਰਖ ਨਹੀਂ ਕਰਦੇ, ਉਨ੍ਹਾਂ ਉਨ੍ਹਾਂ ਦੇ ਮਨਾਂ ਦੇ ਵਿੱਚ ਅੰਧਕਾਰ ਭਰਿਆ ਹੋਇਆ ਹੈ। (ਪੜ੍ਹੋ ਅਫ਼ਸੀਆਂ ਨੂੰ 4:17-18।) ਸੁਭਾਅ ਤੋਂ ਹੀ, ਉਹ ਬਾਗ਼ੀ ਸੰਸਾਰ ਦੀ ਦਿਸ਼ਾ, ਸ਼ੈਤਾਨ ਦੇ ਕਾਬੂ, ਅਤੇ ਆਪਣੀ ਪਾਪ ਭਰੀ ਇੱਛਾ ਦੇ ਵਿੱਚ ਚੱਲਣਾ ਚਾਹੁੰਦੇ ਹਨ; ਅਤੇ ਉਹ ਆਪਣੇ ਆਪ ਨੂੰ ਪਰਮੇਸ਼ੁਰ ਦੇ ਕ੍ਰੋਧ ਦੇ ਅਧੀਨ ਲਿਆਉਂਦੇ ਹਨ। (ਪੜ੍ਹੋ ਅਫ਼ਸੀਆਂ ਨੂੰ 2:2-3)। ਉਨ੍ਹਾਂ ਦਾ ਕੁਰਦਤੀ ਝੁਕਾਅ ਪਾਪ ਦੀ ਹਰੇਕ ਗਤੀਵਿਧੀ ਦੇ ਵੱਲ ਹੁੰਦਾ ਹੈ (ਉਤਪਤ 6:5।)

ਪਰਮੇਸ਼ੁਰ ਦੀ ਕ੍ਰਿਪਾ ਦੁਆਰਾ ਆਉਣ ਵਾਲੇ ਅੰਤਰ ਤੋਂ ਬਿਨਾਂ, ਲੋਕ ਕੁਝ ਵੀ ਭਲਾ ਕਰਨ ਦੇ ਯੋਗ ਨਹੀਂ ਹੋਣਗੇ; ਨਾ ਹੀ ਉਨ੍ਹਾਂ ਦੇ ਅੰਦਰ ਕੁਝ ਭਲਾ ਕਰਨ ਦੀ ਇੱਛਾ ਹੋਵੇਗੀ। ਉਹ ਤੌਬਾ ਕਰਨ ਅਤੇ ਪਰਮੇਸ਼ੁਰ ਦੀ ਭਾਲ ਕਰਨ ਦੇ ਬਿਲਕੁਲ ਵੀ ਯੋਗ ਨਹੀਂ ਹੋਣਗੇ। (ਪੜ੍ਹੋ ਯੂਹੰਨਾ 6:44।) ਉਹ ਪਾਪਾਂ ਅਤੇ ਅਪਰਾਧਾਂ ਦੇ ਵਿੱਚ ਮਰੇ ਹੋਏ ਹਨ (ਅਫ਼ਸੀਆਂ ਨੂੰ 2:1)। ਧਰਮ ਸ਼ਾਸਤਰੀ ਇਸ ਸਥਿਤੀ ਨੂੰ “ਸੰਪੂਰਨ ਵਿਗਾੜ” ਦੇ ਤੌਰ ਦੱਸਦੇ ਹਨ।

ਇਹ ਜਾਣਨਾ ਮਹੱਤਵਪੂਰਨ ਹੈ ਕਿ ਪਰਮੇਸ਼ੁਰ ਦੀ ਕ੍ਰਿਪਾ ਵਿਰਾਸਤ ਵਿੱਚ ਮਿਲੇ ਹੋਏ ਪਾਪ ਦੇ ਪ੍ਰਤੀ ਕਿਵੇਂ ਪ੍ਰਤੀਕਿਰਿਆ ਕਰਦੀ ਹੈ। ਸਭ ਤੋਂ ਪਹਿਲਾਂ ਸ਼ੁਭਸਮਾਚਾਰ ਦੇ ਸੰਦੇਸ਼ ਦੇ ਨਾਲ ਪਰਮੇਸ਼ੁਰ ਦੀ ਸ਼ਕਤੀ ਆਉਂਦੀ ਹੈ, ਜੋ ਕਿਸੇ ਗੁਆਚੇ ਹੋਏ ਵਿਅਕਤੀ ਨੂੰ ਸ਼ੁਭਸਮਾਚਾਰ ਦੇ ਵੱਲ ਪ੍ਰਤੀਕਿਰਿਆ ਕਰਨ ਦੀ ਇੱਛਾ ਅਤੇ ਯੋਗਤਾ ਪ੍ਰਦਾਨ ਕਰਦੀ ਹੈ। (ਪੜ੍ਹੋ ਰੋਮੀਆਂ ਨੂੰ 1:16।) ਫਿਰ ਜਦੋਂ ਇੱਕ ਵਿਅਕਤੀ ਬਚਾਇਆ ਜਾਂਦਾ ਹੈ, ਤਾਂ ਉਸਨੂੰ ਪਾਪ ਦੇ ਕਾਬੂ ਤੋਂ ਛੁਟਕਾਰਾ ਮਿਲ ਜਾਂਦਾ ਹੈ (ਰੋਮੀਆਂ ਨੂੰ 6:11-14)। ਪਰ, ਵਿਰਾਸਤ ਵਿੱਚ ਮਿਲੇ ਪਾਪ ਦਾ ਪ੍ਰਭਾਵ ਇੱਕ ਨਵੇਂ ਮਸੀਹੀ ਦੇ ਵਿੱਚ ਬਣਿਆ ਰਹਿੰਦਾ ਹੈ।

ਵਿਰਾਸਤ ਵਿੱਚ ਮਿਲਿਆ ਹੋਇਆ ਪਾਪ ਇੱਕ ਮਸੀਹੀ ਦੇ ਅੰਦਰ ਕਈ ਤਰੀਕਿਆਂ ਨਾਲ ਨਜ਼ਰ ਆਉਂਦਾ ਹੈ।

1. ਕਈ ਵਾਰ ਇੱਕ ਨਵਾਂ ਮਸੀਹੀ ਪਰਤਾਵੇ ਦੇ ਦੌਰਾਨ ਆਪਣੀ ਹੀ ਇੱਛਾ ਦੇ ਨਾਲ ਸੰਘਰਸ਼ ਕਰਦਾ ਹੈ।

2. ਨਵਾਂ ਮਸੀਹੀ ਗ਼ਲਤ ਇਰਾਦਿਆਂ ਨੂੰ ਮਹਿਸੂਸ ਕਰਦਾ ਹੈ ਜਿਸਦਾ ਉਸਨੂੰ ਸਾਹਮਣਾ ਕਰਨਾ ਚਾਹੀਦਾ ਹੈ।

3. ਨਵੇਂ ਮਸੀਹੀ ਦੇ ਅੰਦਰ ਗ਼ਲਤ ਪ੍ਰਤੀਕਿਰਿਆ ਅਤੇ ਰਵੱਈਏ ਹੋਣਗੇ ਜੋ ਉਨ੍ਹਾਂ ਨੂੰ ਸਮਝਣ ਤੋਂ ਪਹਿਲਾਂ ਵਾਪਰ ਜਾਂਦੇ ਹਨ।

ਨਵੇਂ ਮਸੀਹੀ ਨੂੰ ਉਤਸ਼ਾਹਿਤ ਕੀਤਾ ਜਾਣਾ ਚਾਹੀਦਾ ਹੈ ਤਾਂ ਕਿ ਉਹ ਅਜਿਹਾ ਮਹਿਸੂਸ ਕਰਨ ਕਰਕੇ ਆਪਣੇ ਵਿਸ਼ਵਾਸ ਨੂੰ ਤਿਆਗ ਨਾ ਦੇਵੇ ਕਿ ਉਸਦਾ ਝੁਕਾਅ ਹੁਣ ਵੀ ਪਾਪ ਕਰਨ ਦੇ ਵੱਲ ਹੈ। ਉਸਨੂੰ ਲਗਾਤਾਰ ਉਸ ਸ਼ਕਤੀ ਅਤੇ ਰੂਪਾਂਤਰਨ ਦੀ ਭਾਲ ਕਰਨੀ ਚਾਹੀਦੀ ਹੈ ਜੋ ਪਰਮੇਸ਼ੁਰ ਦੇ ਆਤਮਾ ਦੇ ਦੁਆਰਾ ਮਿਲਦੀ ਹੈ।

ਇੱਕ ਪਾਸਟਰ ਨੂੰ ਨਵੇਂ ਵਿਸ਼ਵਾਸੀਆਂ ਦੇ ਪ੍ਰਤੀ ਧੀਰਜਵਾਨ ਹੋਣਾ ਚਾਹੀਦਾ ਹੈ। ਉਸਨੂੰ ਇਹ ਸਮਝਣਾ ਚਾਹੀਦਾ ਹੈ ਉਹ ਆਪਣੇ ਸਾਰੇ ਵਚਨਾਂ ਅਤੇ ਕੰਮਾਂ ਦੇ ਵਿੱਚ ਲਗਾਤਾਰ ਇਕਸਾਰ ਬਣੇ ਨਹੀਂ ਰਹਿ ਸਕਦੇ। ਉਹ ਇੱਕਦਮ ਆਪਣੀ ਸਮੱਸਿਆ ਨਹੀਂ ਵੇਖ ਸਕਦੇ ਹਨ।

[1]ਕਈ ਵਾਰ ਕੋਈ ਵਿਅਕਤੀ ਅਨਜਾਣੇ ਦੇ ਵਿੱਚ ਅਚਨਚੇਤ ਜਾਂ ਅਨਜਾਣਪੁਣੇ ਦੇ ਕਾਰਨ ਪਰਮੇਸ਼ੁਰ ਦੇ ਵਚਨ ਦੇ ਵਿਰੁੱਧ ਗ਼ਲਤੀ ਕਰ ਦਿੰਦਾ ਹੈ। ਲੇਵੀਆਂ ਦੀ ਪੋਥੀ 4:2-3 ਦੇ ਵਿੱਚ, ਅਸੀਂ ਵੇਖਦੇ ਹਾਂ ਕਿ ਅਜਿਹੀ ਸਥਿਤੀ ਦੇ ਵਿੱਚ ਇੱਕ ਵਿਅਕਤੀ ਨੂੰ ਇਸਦਾ ਪਤਾ ਲੱਗਦਿਆਂ ਹੀ ਇੱਕ ਬਲੀਦਾਨ ਚੜ੍ਹਾਉਣ ਦੀ ਆਗਿਆ ਸੀ ਕਿ ਉਸਨੇ ਕੁਝ ਗ਼ਲਤ ਕਰ ਦਿੱਤਾ ਹੈ। ਕਿਉਂਕਿ ਮਸੀਹ ਦੀ ਮੌਤ ਪੁਰਾਣੇ ਨੇਮ ਦੇ ਸਾਰੇ ਬਲੀਦਾਨਾਂ ਦੇ ਸਥਾਨ ਤੇ ਹੋਈ ਹੈ, ਇਸ ਲਈ ਅਸੀਂ ਜਾਣਦੇ ਹਾਂ ਕਿ ਮਸੀਹੀ ਅਨਜਾਣੇ ਵਿੱਚ ਹੋਣ ਵਾਲੀਆਂ ਗ਼ਲਤੀਆਂ ਤੋਂ ਛੁਟਕਾਰਾ ਪਾਏ ਹੋਏ ਹਨ।

ਜਦੋਂ ਤੱਕ ਸਾਡੀ ਸਮਝ ਸੀਮਿਤ ਹੈ ਉਦੋਂ ਤੱਕ ਅਨਜਾਣੇ ਦੇ ਵਿੱਚ ਹੋਣ ਵਾਲੀਆਂ ਗ਼ਲਤੀਆਂ ਅਟੱਲ ਹਨ। ਇਹ ਪਰਮੇਸ਼ੁਰ ਦੇ ਨਾਲ ਸਾਡੇ ਸੰਬੰਧ ਨੂੰ ਨਹੀਂ ਤੋੜਦੀਆਂ ਹਨ ਕਿਉਂਕਿ ਇਹ ਪਰਮੇਸ਼ੁਰ ਦੇ ਪ੍ਰਤੀ ਸਾਡੇ ਪਿਆਰ ਨੂੰ ਪ੍ਰਭਾਵਿਤ ਨਹੀਂ ਕਰਦੀਆਂ ਹਨ। ਪਰਮੇਸ਼ੁਰ ਨੇ ਕਿਹਾ ਕਿ ਉਸਦੇ ਪ੍ਰਤੀ ਸੰਪੂਰਨ ਪਿਆਰ ਉਸਦੀਆਂ ਸਾਰੀਆਂ ਮੰਗਾਂ ਨੂੰ ਪੂਰਿਆਂ ਕਰ ਦਿੰਦਾ ਹੈ। (ਪੜ੍ਹੋ ਮੱਤੀ 22:37-40; ਰੋਮੀਆਂ ਨੂੰ 13:8-10।) ਅਸੀਂ ਉਸਦੇ ਪ੍ਰਤੀ ਜੁਆਬਦੇਹ ਨਹੀਂ ਹਾਂ ਜਿਸਦੀ ਸਾਨੂੰ ਜਾਣਕਾਰੀ ਨਹੀਂ ਹੈ। (ਪੜ੍ਹੋ ਯਾਕੂਬ 4:17।)

ਜਦੋਂ ਅਸੀਂ ਚਾਣਨ ਦੇ ਵਿੱਚ ਚੱਲਦੇ ਹਾਂ (ਉਸ ਸਚਿਆਈ ਦੇ ਅਨੁਸਾਰ ਜਿਉਂਦੇ ਹਾਂ ਜਿਸਨੂੰ ਅਸੀਂ ਜਾਣਦੇ ਹਾਂ), ਤਾਂ ਅਸੀਂ ਸਾਰੇ ਪਾਪ ਤੋਂ ਸ਼ੁੱਧ ਕੀਤੇ ਜਾਂਦੇ ਹਾਂ। (ਪੜ੍ਹੋ ਯੂਹੰਨਾ ਦੀ ਪਹਿਲੀ ਪੱਤ੍ਰੀ 1:7।) ਸਾਨੂੰ ਇਸ ਗੱਲ ਤੋਂ ਡਰਨ ਦੀ ਜਰੂਰਤ ਨਹੀਂ ਹੈ ਕਿ ਕੋਈ ਅਨਜਾਣੇ ਦੇ ਵਿੱਚ ਕੀਤੀ ਗ਼ਲਤੀ ਪਰਮੇਸ਼ੁਰ ਦੇ ਨਾਲ ਸਾਡੇ ਸੰਬੰਧ ਨੂੰ ਤੋੜ ਦੇਵੇਗੀ, ਕਿਉਂਕਿ ਅਸੀਂ ਮਸੀਹ ਦੇ ਪ੍ਰਾਸਚਿੱਤ ਦੇ ਕੰਮ ਤੇ ਭਰੋਸਾ ਰੱਖਦੇ ਹਾਂ।

ਲੇਵੀਆਂ ਦੀ ਪੋਥੀ ਵਿਖਾਉਂਦੀ ਹੈ ਕਿ ਜਦੋਂ ਅਸੀਂ ਜਾਣ ਲੈਂਦੇ ਹਾਂ ਕਿ ਅਸੀਂ ਅਨਜਾਣਪੁਣੇ ਦੇ ਵਿੱਚ ਕੁਝ ਗ਼ਲਤੀ ਕਰ ਲਈ ਹੈ ਤਾਂ ਸਾਨੂੰ ਤੌਬਾ ਕਰਨੀ ਚਾਹੀਦੀ, ਅਤੇ ਪਰਮੇਸ਼ੁਰ ਤੋਂ ਮਾਫ਼ੀ ਮੰਗਣੀ ਚਾਹੀਦੀ ਹੈ ਅਤੇ ਸਾਨੂੰ ਪਰਮੇਸ਼ੁਰ ਦੀ ਇੱਛਾ ਦੇ ਅਨੁਸਾਰ ਆਪਣੇ ਜੀਵਨ ਨੂੰ ਸਹੀ ਕਰਨਾ ਚਾਹੀਦਾ ਹੈ।

ਜਿਵੇਂ-ਜਿਵੇਂ ਅਸੀਂ ਪਰਮੇਸ਼ੁਰ ਦੇ ਵਚਨ ਦੇ ਅਧਿਐਨ ਕਰਦੇ ਹਾਂ, ਪਵਿੱਤਰ ਆਤਮਾ ਦੇ ਪਿੱਛੇ ਚੱਲਦੇ ਹਾਂ, ਦੂਸਰੇ ਵਿਸ਼ਵਾਸੀਆਂ ਦੇ ਨਾਲ਼ ਸੰਗਤੀ ਕਰਦੇ ਹਾਂ, ਅਤੇ ਪਰਿਪੱਕਤਾ ਦੇ ਵਿੱਚ ਵੱਧਦੇ ਹਾਂ, ਤਾਂ ਸਾਨੂੰ ਅਜਿਹੇ ਵਿਵਹਾਰ ਨੂੰ ਬਦਲਣਾ ਚਾਹੀਦਾ ਹੈ ਜੋ ਬਿਨਾਂ ਇਰਾਦੇ ਦੇ ਪਰਮੇਸ਼ੁਰ ਦੀ ਇੱਛਾ ਦੀ ਉਲੰਘਣਾ ਕਰਦਾ ਹੈ।

► ਸਾਨੂੰ ਪਰਮੇਸ਼ੁਰ ਦੀ ਇੱਛਾ ਨੂੰ ਬਿਹਤਰ ਜਾਣਨ ਅਤੇ ਇਸਨੂੰ ਕਰਨ ਦੀ ਕੀ ਜਰੂਰਤ ਹੈ?

ਪਰਮੇਸ਼ੁਰ ਦੀ ਇੱਛਾ ਨੂੰ ਬਿਹਤਰ ਜਾਣਨ ਅਤੇ ਪੂਰੀ ਤਰ੍ਹਾਂ ਇਸ ਤੇ ਚੱਲ ਦੇ ਪਿੱਛੇ ਦੇ ਕਾਰਨ:

1. ਅਸੀਂ ਕੁਝ ਵੀ ਅਜਿਹਾ ਨਹੀਂ ਕਰਨਾ ਚਾਹੁੰਦੇ ਜੋ ਪਰਮੇਸ਼ੁਰ ਨੂੰ ਨਾਰਾਜ਼ ਕਰੇ।

2. ਗ਼ਲਤ ਕੰਮ ਕਰਨ ਦੇ ਬੁਰੇ ਨਤੀਜੇ ਹੁੰਦੇ ਹਨ, ਭਾਵੇਂ ਕਿ ਇਹ ਬਿਨਾਂ ਇਰਾਦੇ ਦੇ ਹੀ ਹੋਣ।

3. ਸਾਨੂੰ ਮਸੀਹੀਆਂ ਦੇ ਤੌਰ ਤੇ ਚੰਗੇ ਨਮੂਨੇ ਬਣਨਾ ਚਾਹੀਦਾ ਹੈ।

4. ਜੇਕਰ ਅਸੀਂ ਪਰਮੇਸ਼ੁਰ ਦੀ ਇੱਛਾ ਨੂੰ ਨਜ਼ਰਅੰਦਾਜ ਕਰਨ ਦੀ ਕੋਸ਼ਿਸ਼ ਕਰੀਏ ਤਾਂ ਅਸੀਂ ਜਾਣਬੁੱਝ ਕੇ ਕੀਤੇ ਪਾਪ ਦੇ ਦੋਸ਼ੀ ਹੋਵਾਂਗੇ।

ਜਿਵੇਂ-ਜਿਵੇਂ ਅਸੀਂ ਪਰਮੇਸ਼ੁਰ ਦੀ ਇੱਛਾ ਦੀ ਸਮਝ ਦੇ ਵਿੱਚ ਵੱਧਦੇ ਹਾਂ, ਤਾਂ ਅਸੀਂ ਕਦੇ-ਕਦੇ ਹੀ ਆਪਣੇ ਜੀਵਨਾਂ ਦੇ ਵਿੱਚ ਗ਼ਲਤੀਆਂ ਨੂੰ ਵੇਖਦੇ ਹਾਂ। ਜੇਕਰ ਅਸੀਂ ਪਹਿਚਾਣਦੇ ਹਾਂ ਕਿ ਅਸੀਂ ਕੁਝ ਅਜਿਹਾ ਕਰ ਰਹੇ ਹਾਂ ਜੋ ਗ਼ਲਤ ਹੈ, ਪਰ ਫਿਰ ਵੀ ਇਸਨੂੰ ਕਰਨ ਦੀ ਚੋਣ ਕਰਦੇ ਹਾਂ, ਤਾਂ ਫਿਰ ਇਹ ਸਿਰਫ਼ ਅਨਜਾਣਪੁਣੇ ਤੋਂ ਨਿਕੱਲਣ ਵਾਲੀ ਗ਼ਲਤੀ ਨਹੀਂ ਹੈ। ਜੇਕਰ ਅਸੀਂ ਬਦਲਣ ਦਾ ਇਨਕਾਰ ਕਰ ਦਿੰਦੇ ਹਾਂ, ਤਾਂ ਫਿਰ ਉਹ ਗ਼ਲਤੀ ਜਾਣਬੁੱਝ ਕੇ ਕੀਤੇ ਜਾਣ ਵਾਲਾ ਪਾਪ ਬਣ ਜਾਂਦਾ ਹੈ।

ਕਈ ਵਾਰ ਧਰਮ ਸ਼ਾਸਤਰੀ ਪਾਪ ਦੀਆਂ ਸ਼੍ਰੇਣੀਆਂ ਦੇ ਵਿੱਚਕਾਰ ਕੋਈ ਅੰਤਰ ਨਹੀਂ ਕਰਦੇ ਹਨ। ਉਹ ਕਹਿੰਦੇ ਹਨ ਕਿ ਜੋ ਕੁਝ ਵੀ ਸੰਪੂਰਨਤਾਈ ਤੋਂ ਘੱਟ ਹੈ ਉਹ ਪਾਪ ਹੈ, ਜਾਂ ਉਹ ਸ਼ਾਇਦ ਇਹ ਕਹਿ ਸਕਦੇ ਹਨ ਕਿ ਸਿਰਫ਼ ਜਾਣਬੁੱਝ ਕੇ ਕੀਤਾ ਗਿਆ ਕੰਮ ਹੀ ਪਾਪ ਹੁੰਦਾ ਹੈ। ਜੇਕਰ ਅਸੀਂ ਪਾਪ ਦੀਆਂ ਸ਼੍ਰੇਣੀਆਂ ਨੂੰ ਸਮਝ ਲੈਂਦੇ ਹਾਂ, ਤਾਂ ਅਸੀਂ ਫਿਰ ਅਸੀਂ ਇਸ ਗੱਲ ਨੂੰ ਬਿਹਤਰ ਸਮਝ ਸਕਦੇ ਹਾਂ ਕਿ ਪਰਮੇਸ਼ੁਰ ਆਪਣੀ ਕ੍ਰਿਪਾ ਦੇ ਦੁਆਰਾ ਸਾਡੇ ਲਈ ਕੀ ਕਰਨਾ ਚਾਹੁੰਦਾ ਹੈ।

• ਜਦੋਂ ਕੋਈ ਵਿਅਕਤੀ ਨਵਾਂ ਜਨਮ ਪਾ ਲੈਂਦਾ ਹੈ ਤਾਂ ਫਿਰ ਉਸਨੂੰ ਜਾਣਬੁੱਝ ਕੇ ਕੀਤੇ ਜਾਣ ਵਾਲੇ ਪਾਪ ਤੇ ਜਿੱਤ ਪ੍ਰਾਪਤ ਕਰਨੀ ਚਾਹੀਦੀ ਹੈ। ਯੂਹੰਨਾ ਇਸ ਗੱਲ ਦੀ ਘੋਸ਼ਣਾ ਕਰਦਾ ਹੈ ਕਿ ਨਵਾਂ ਜਨਮ ਪਾਇਆ ਹੋਇਆ ਵਿਅਕਤੀ ਪਾਪ ਦਾ ਆਦੀ ਨਹੀਂ ਹੁੰਦਾ ਹੈ (ਯੂਹੰਨਾ ਦੀ ਪਹਿਲੀ ਪੱਤ੍ਰੀ 3:4-9)। ਮਸੀਹ ਦੇ ਵਿਸ਼ਵਾਸ ਵਿੱਚ ਜਾਣਬੁੱਝ ਕੇ ਕੀਤੇ ਜਾਣ ਵਾਲਾ ਪਾਪ ਲਗਾਤਾਰ ਨਹੀਂ ਕੀਤਾ ਜਾਂਦਾ। ਜਾਣਬੁੱਝ ਕੇ ਕੀਤੀ ਜਾਣ ਵਾਲੀ ਬਗ਼ਾਵਤ ਇੱਕ ਸਾਧਾਰਨ ਵਿਸ਼ਵਾਸੀ ਦੀ ਆਦਤ ਦਾ ਹਿੱਸਾ ਨਹੀਂ ਹੁੰਦੀ।

• ਸ਼ੁੱਧੀਕਰਨ ਪਰਮੇਸ਼ੁਰ ਦੁਆਰਾ ਮਨੁੱਖੀ ਸੁਭਾਅ ਦੇ ਪਾਪਾਂ ਨਾਲ ਨਜਿੱਠਣ ਦਾ ਤਰੀਕਾ ਹੈ, ਤਾਂ ਕਿ ਵਿਸ਼ਵਾਸੀ ਸੰਪੂਰਨ ਤੌਰ ਤੇ ਪਵਿੱਤਰ ਬਣਾਏ ਜਾਣ (1 ਥੱਸਲੁਨੀਕੀਆਂ ਨੂੰ 5:23)। ਉਨ੍ਹਾਂ ਦੀਆਂ ਸੰਪੂਰਨ ਆਤਮਾਵਾਂ, ਪ੍ਰਾਣ ਅਤੇ ਸ਼ਰੀਰ ਦੋਸ਼ ਰਹਿਤ ਬਣ ਜਾਂਦੇ ਹਨ। ਸ਼ੁੱਧੀਕਰਨ ਮਨੁੱਖੀ ਸੁਭਾਅ ਦੇ ਪਾਪਾਂ ਤੇ ਜਿੱਤ ਪ੍ਰਾਪਤ ਕਰਦਾ ਹੈ।

• ਅਨਜਾਣਪੁਣੇ ਵਿੱਚ ਕੀਤੇ ਪਾਪ ਉਦੇਸ਼ਪੂਰਨ ਅਣ-ਆਗਿਆਕਾਰੀ ਨਹੀਂ ਹੈ, ਅਤੇ ਇਹ ਪਾਪੀ ਸੁਭਾਅ ਦੇ ਵਿੱਚੋਂ ਨਹੀਂ ਨਿੱਕਲਦੇ, ਪਰ ਇਹ ਪਾਪ ਦੇ ਵਿੱਚ ਡਿੱਗੇ ਹੋਏ ਸ਼ਰੀਰ ਅਤੇ ਮਨ ਵਿੱਚੋਂ ਨਿੱਕਲਦੇ ਹਨ। ਧਰਤੀ ਦੇ ਜੀਵਨ ਵਿੱਚ ਇਸ ਪ੍ਰਕਾਰ ਦੇ ਪਾਪ ਤੋਂ ਪੂਰਾ ਤਰ੍ਹਾਂ ਦੇ ਨਾਲ ਛੁਟਕਾਰਾ ਪ੍ਰਾਪਤ ਕਰਨ ਦੀ ਕੋਈ ਸੰਭਾਵਨਾ ਨਹੀਂ ਹੈ। ਮੁਰਦਿਆਂ ਵਿੱਚੋਂ ਜੀ ਉੱਠਣ ਦੇ ਸਮੇਂ, ਮਹਿਮਾਮਈ ਸੰਤ ਪੂਰੇ ਤੌਰ ਤੇ ਸਦਾ ਦੇ ਲਈ ਹਰ ਪ੍ਰਕਾਰ ਦੇ ਪਾਪ ਤੋਂ ਆਜਾਦ ਹੋ ਜਾਣਗੇ।

► ਵਿਸ਼ਵਾਸ ਕਥਨਾਂ ਨੂੰ ਘੱਟੋ-ਘੱਟ ਦੋ ਵਾਰ ਮਿਲ ਕੇ ਪੜ੍ਹੋ।

ਮਨੁੱਖੀ ਪਾਪ ਦਾ ਅਰੰਭ ਸਭ ਤੋਂ ਪਹਿਲਾਂ ਰਚੇ ਗਏ ਲੋਕਾਂ ਦੁਆਰਾ ਪਰਮੇਸ਼ੁਰ ਦੀ ਅਣ-ਆਗਿਆਕਾਰੀ ਕਰਨ ਦੇ ਆਜਾਦ ਫੈਸਲੇ ਦੇ ਨਾਲ ਹੋਇਆ। ਯਿਸੂ ਤੋਂ ਬਿਨਾਂ ਬਾਕੀ ਸਾਰੇ ਲੋਕਾਂ ਨੇ ਆਦਮ ਤੋਂ ਪਾਪ ਨੂੰ ਵਿਰਾਸਤ ਵਿੱਚ ਪ੍ਰਾਪਤ ਕੀਤਾ ਹੈ ਅਤੇ ਉਹ ਪਾਪ ਦੇ ਕੰਮਾਂ ਦੇ ਵੀ ਦੋਸ਼ੀ ਹਨ। ਮਨੁੱਖੀ ਗ਼ਲਤੀਆਂ ਪਰਮੇਸ਼ੁਰ ਦੀ ਸ਼ਰਾ ਦੀ ਉਲੰਘਣਾ ਕਰ ਸਕਦੇ ਹਨ ਪਰ ਉਹ ਪਰਮੇਸ਼ੁਰ ਦੇ ਨਾਲ ਸਾਡੇ ਸੰਬੰਧ ਨੂੰ ਨਹੀਂ ਤੋੜਦੇ। ਹਰੇਕ ਪਾਪੀ ਜੋ ਅੰਤਿਮ ਨਿਆਂ ਤੋਂ ਪਹਿਲਾਂ ਪਰਮੇਸ਼ੁਰ ਦੀ ਮਾਫ਼ੀ ਨੂੰ ਪ੍ਰਾਪਤ ਨਹੀਂ ਕਰਦਾ ਉਹ ਸਦੀਪਕ ਸਜ਼ਾ ਦੇ ਵਿੱਚ ਸੁੱਟਿਆ ਜਾਵੇਗਾ।

(1) ਵਚਨਾਂ ਦੇ ਅਸਾਇਨਮੈਂਟ: ਹਰੇਕ ਵਿਦਿਆਰਥੀ ਨੂੰ ਹੇਠਾਂ ਦਿੱਤੇ ਵਚਨਾਂ ਦੀ ਸੂਚੀ ਵਿੱਚੋਂ ਇੱਕ ਸੌਂਪਿਆ ਜਾਵੇਗਾ। ਅੱਗਲੀ ਕਲਾਸ ਦੇ ਸ਼ੈਸ਼ਨ ਤੋਂ ਪਹਿਲਾਂ, ਤੁਹਾਨੂੰ ਵਚਨ ਨੂੰ ਪੜਣਾ ਚਾਹੀਦਾ ਹੈ ਅਤੇ ਇੱਕ ਪੈਰਾਗ੍ਰਾਫ ਦੇ ਵਿੱਚ ਲਿਖਣਾ ਹੋਵੇਗਾ ਕਿ ਇਹ ਪਾਠ ਦੇ ਵਿਸ਼ੇ ਬਾਰੇ ਕੀ ਕਹਿੰਦਾ ਹੈ।

• ਰੋਮੀਆਂ ਨੂੰ 1:21-32

• ਰੋਮੀਆਂ ਨੂੰ 3:10-20

• ਗਲਾਤੀਆਂ ਨੂੰ 5:16-21

• ਅਫ਼ਸੀਆਂ ਨੂੰ 5:1-8

• ਤੀਤੁਸ ਨੂੰ 1:10-16

• ਯਾਕੂਬ 4:1-4

• ਪਤਰਸ ਦੀ ਦੂਜੀ ਪੱਤ੍ਰੀ 2:9-17

(2) ਪ੍ਰੀਖਿਆ: ਤੁਸੀਂ ਅੱਗਲੀ ਕਲਾਸ ਦੀ ਸ਼ੁਰੂਆਤ ਪਾਠ 5 ਦੀ ਪ੍ਰੀਖਿਆ ਦੇ ਨਾਲ ਕਰੋਗੇ। ਤਿਆਰੀ ਦੇ ਲਈ ਪ੍ਰੀਖਿਆ ਦੇ ਪ੍ਰਸ਼ਨਾਂ ਦਾ ਧਿਆਨਪੂਰਵਕ ਅਧਿਐਨ ਕਰੋ।

(3) ਸਿਖਾਉਣ ਦਾ ਅਸਾਇਨਮੈਂਟ: ਆਪਣੀ ਕਲਾਸ ਤੋਂ ਬਾਹਰ ਸਿਖਾਉਣ ਦੀ ਸਮੇਂ ਸਾਰਨੀ ਨੂੰ ਬਣਾਉਣ ਅਤੇ ਇਸਦੇ ਬਾਰੇ ਰਿਪੋਰਟ ਦੇਣ ਨੂੰ ਯਾਦ ਰੱਖੋ।

(1) ਪਾਪ ਨੂੰ ਸਮਝਣਾ ਸਾਡੇ ਲਈ ਕਿਉਂ ਜਰੂਰੀ ਹੈ? ਤਿੰਨ ਕਾਰਨ ਲਿਖੋ।

(2) ਅਸੀਂ ਕਿਵੇਂ ਜਾਣਦੇ ਹਾਂ ਕਿ ਪਾਪ ਪਰਮੇਸ਼ੁਰ ਦੀ ਗ਼ਲਤੀ ਨਹੀਂ ਸੀ?

(3) ਹੇਠਾਂ ਦਿੱਤਿਆਂ ਦੀ ਇੱਕ-ਵਾਕੀ ਪਰਿਭਾਸ਼ਾ ਦਿਓ: ਜਾਣਬੁੱਝ ਕੇ ਕੀਤੇ ਜਾਣ ਵਾਲਾ ਪਾਪ, ਵਿਰਾਸਤ ਵਿੱਚ ਮਿਲਿਆ ਹੋਇਆ ਪਾਪ, ਅਤੇ ਅਨਜਾਣੇ ਵਿੱਚ ਕੀਤੀਆਂ ਜਾਣ ਵਾਲੀਆਂ ਗ਼ਲਤੀਆਂ।

(4) ਸਾਨੂੰ ਪਰਮੇਸ਼ੁਰ ਦੀ ਇੱਛਾ ਨੂੰ ਬਿਹਤਰ ਜਾਣਨ ਅਤੇ ਇਸਨੂੰ ਕਰਨ ਦੀ ਕਿਉਂ ਜਰੂਰਤ ਹੈ?