(1) ਵਿਦਿਆਰਥੀ ਹੇਠਾਂ ਦੱਸੀਆਂ ਗੱਲਾਂ ਦੀ ਵਿਆਖਿਆ ਕਰ ਪਾਉਣਗੇ:

• ਸਵਰਗ ਦੀਆਂ ਮੁੱਢਲੀਆਂ ਕਿਰਿਆਵਾਂ ਹਨ।

• ਪਵਿੱਤਰ ਵਚਨਾਂ ਦੇ ਵਿੱਚ ਦਿੱਤੀ ਸਵਰਗ ਦੀਆਂ ਵਿਸ਼ੇਸ਼ਤਾਵਾਂ।

• ਪਵਿੱਤਰ ਵਚਨਾਂ ਦੇ ਵਿੱਚ ਦੱਸੀ ਸਦੀਪਕ ਸਜ਼ਾ ਦੀਆਂ ਵਿਸ਼ੇਸ਼ਤਾਵਾਂ।

• ਕੁਝ ਅਜਿਹੇ ਧਰਮਾਂ ਦੀਆਂ ਉਦਾਹਰਨਾਂ ਜੋ ਸਦੀਪਕ ਸਜ਼ਾ ਦੀ ਸਚਿਆਈ ਦਾ ਇਨਕਾਰ ਕਰਦੇ ਹਨ।

• ਸਦੀਪਕ ਸਜ਼ਾ ਦਾ ਨਿਆਂ।

• ਸਦੀਪਕ ਮੰਜ਼ਿਲ ਦੇ ਬਾਰੇ ਮਸੀਹੀ ਵਿਸ਼ਵਾਸਾਂ ਦਾ ਇੱਕ ਬਿਆਨ।

(2) ਵਿਦਿਆਰਥੀ ਯਾਦ ਰੱਖਣਗੇ ਕਿ ਕੁਝ ਕੰਮਾਂ ਦੇ ਸਦੀਪਕ ਨਤੀਜੇ ਹਨ ਜਿੰਨ੍ਹਾਂ ਨੂੰ ਕਦੇ ਬਦਲਿਆ ਨਹੀਂ ਜਾ ਸਕਦਾ।

► ਪਰਕਾਸ਼ ਦੀ ਪੋਥੀ 21 ਨੂੰ ਮਿਲ ਕੇ ਪੜ੍ਹੋ। ਵਚਨ ਦਾ ਇਹ ਭਾਗ ਵਿਸ਼ਵਾਸੀਆਂ ਦੇ ਭਵਿੱਖ ਬਾਰੇ ਕੀ ਕਹਿੰਦਾ ਹੈ?

ਸਾਰੀ ਰਚਨਾ ਦੀ ਹੋਂਦ ਪਰਮੇਸ਼ੁਰ ਦੀ ਮਹਿਮਾ ਦੇ ਲਈ ਹੈ, ਪਰ ਸਵਰਗ ਬ੍ਰਹਿਮੰਡ ਦਾ ਕੇਂਦਰਿਤ ਦ੍ਰਿਸ਼ ਹੈ, ਜਿੱਥੇ ਪਰਮੇਸ਼ੁਰ ਦੁਆਰਾ ਰਚੇ ਪ੍ਰਾਣੀ ਸਭ ਤੋਂ ਉੱਚੇ ਪੱਧਰ ਤੇ ਉਸਦੀ ਅਰਾਧਨਾ ਕਰਦੇ ਹਨ (ਪੜ੍ਹੋ ਪਰਕਾਸ਼ ਦੀ ਪੋਥੀ 5:11-14)। ਸਵਰਗ ਦੇ ਵਿੱਚ ਪਰਮੇਸ਼ੁਰ ਦੀ ਮਹਿਮਾ ਇਸ ਪ੍ਰਕਾਰ ਪ੍ਰਗਟ ਹੋਵੇਗੀ ਕਿ ਇਹ ਨਗਰੀ ਦਾ ਚਾਨਣ ਹੋਵੇਗੀ (ਪਰਕਾਸ਼ ਦੀ ਪੋਥੀ 21:23)। ਇਹ ਅਜਿਹਾ ਸਥਾਨ ਹੈ ਜਿੱਥੇ ਅਸੀਂ ਪਰਮੇਸ਼ੁਰ ਨੂੰ ਇਸ ਤਰੀਕੇ ਨਾਲ ਜਾਣਾਂਗੇ ਕਿ ਅਸੀਂ ਉਸਦਾ ਚਿਹਰਾ ਵੇਖ ਸਕਾਂਗੇ (ਪਰਕਾਸ਼ ਦੀ ਪੋਥੀ 22:4)।

ਸਵਰਗ ਦੇ ਵਿੱਚ, ਵਿਸ਼ਵਾਸੀ ਪਰਮੇਸ਼ੁਰ ਦੀ ਅਰਾਧਨਾ ਕਰਦੇ ਹੋਏ ਸੰਪੂਰਨ ਸੰਤੁਸ਼ਟੀ ਅਤੇ ਅਨੰਦ ਪ੍ਰਾਪਤ ਕਰਦੇ ਹਨ। ਜ਼ਬੂਰਾਂ ਦੀ ਪੋਥੀ 16:11 ਦੱਸਦੀ ਹੈ, “ਤੇਰੇ ਹਜ਼ੂਰ ਅਨੰਦ ਦੀ ਭਰਪੂਰੀ ਹੈ, ਤੇਰੇ ਸੱਜੇ ਹੱਥ ਸਦਾ ਖੁਸ਼ੀਆਂ ਹੁੰਦੀਆਂ ਹਨ”। ਇਹ ਢੁੱਕਵੀਂ ਗੱਲ ਹੈ ਕਿ ਅਰਾਧਨਾ ਅਤੇ ਅਨੰਦ ਆਪਸ ਦੇ ਵਿੱਚ ਜੁੜੇ ਹੋਏ ਹਨ। ਪਰਮੇਸ਼ੁਰ ਨੇ ਸਾਨੂੰ ਆਪਣੇ ਸਰੂਪ ਤੇ ਰਚਿਆ, ਤਾਂ ਕਿ ਅਸੀਂ ਉਸਦੇ ਸੁਭਾਅ ਨੂੰ ਸਮਝਦੇ ਹੋਏ ਉਸਦੀ ਅਰਾਧਨਾ ਉਸ ਪ੍ਰਕਾਰ ਕਰ ਸਕੀਏ ਜਿਸ ਪ੍ਰਕਾਰ ਦਾ ਉਹ ਹੈ। ਸਾਡੀਆਂ ਭਾਵਨਾਵਾਂ, ਪਿਆਰ ਕਰਨ ਦੀ ਯੋਗਤਾ ਅਤੇ ਸਮਝ ਇਸ ਲਈ ਦਿੱਤੇ ਗਏ ਹਨ ਤਾਂ ਕਿ ਅਸੀਂ ਪਰਮੇਸ਼ੁਰ ਦੀ ਅਰਾਧਨਾ ਕਰ ਸਕੀਏ।

ਯਿਸੂ ਨੇ ਚੇਲ੍ਹਿਆਂ ਨੂੰ ਹੇਠਾਂ ਦੱਸੀ ਗੱਲ ਕਹੀ:

ਤੁਹਾਡਾ ਦਿਲ ਨਾ ਘਬਰਾਵੇ। ਪਰਮੇਸ਼ੁਰ ਉੱਤੇ ਨਿਹਚਾ ਕਰੋ ਅਰ ਮੇਰੇ ਉੱਤੇ ਵੀ ਨਿਹਚਾ ਕਰੋ ਮੇਰੇ ਪਿਤਾ ਦੇ ਘਰ ਵਿੱਚ ਬਹੁਤ ਸਾਰੇ ਨਿਵਾਸ ਹਨ ਨਹੀਂ ਤਾਂ ਮੈਂ ਤੁਹਾਨੂੰ ਕਹਿੰਦਾ ਕਿਉਂ ਜੋ ਮੈਂ ਤੁਹਾਡੇ ਲਈ ਜਗ੍ਹਾ ਤਿਆਰ ਕਰਨ ਜਾਂਦਾ ਹਾਂ 3ਅਰ ਜੇ ਮੈਂ ਜਾ ਕੇ ਤੁਹਾਡੇ ਲਈ ਜਗ੍ਹਾ ਤਿਆਰ ਕਰਾਂ ਤਾਂ ਫੇਰ ਆਣ ਕੇ ਤੁਹਾਨੂੰ ਆਪਣੇ ਕੋਲ ਲੈ ਲਵਾਂਗਾ ਭਈ ਜਿੱਥੇ ਮੈਂ ਹਾਂ ਤੁਸੀਂ ਭੀ ਹੋਵੋ (ਯੂਹੰਨਾ 14:1-3)।

ਯਿਸੂ ਦੇ ਸ਼ਬਦ ਸਾਨੂੰ ਸਵਰਗ ਦੇ ਬਾਰੇ ਕੁਝ ਗੱਲਾਂ ਦੱਸਦੇ ਹਨ। ਸਭ ਤੋਂ ਮਹੱਤਵਪੂਰਨ ਗੱਲ ਇਹ ਹੈ ਕਿ ਇਹ ਪਰਮੇਸ਼ੁਰ ਦਾ ਘਰ ਹੈ। ਯਿਸੂ ਨੇ ਇਸਨੂੰ ਆਪਣੇ ਪਿਤਾ ਦਾ ਘਰ ਕਿਹਾ। ਇੱਕ ਹੋਰ ਮਹੱਤਰਪੂਰਨ ਸਚਿਆਈ ਇਹ ਹੈ ਕਿ ਅਸੀਂ ਇੱਕ ਦਿਨ ਉੱਥੇ ਪਰਮੇਸ਼ੁਰ ਦੇ ਨਾਲ ਰਹਿ ਸਕਦੇ ਹਾਂ।

ਸਵਰਗ ਦਾ ਵਾਇਦਾ ਧਰਤੀ ਤੇ ਸਾਡੇ ਜੀਵਨ ਦਾ ਮਾਰਗ ਦਰਸ਼ਕ ਹੋਣਾ ਚਾਹੀਦਾ ਹੈ। ਜੋ ਵਿਅਕਤੀ ਸਦੀਪਕ ਕਦਰਾਂ ਕੀਮਤਾਂ ਦੇ ਨਾਲ ਜਿਉਂਦਾ ਹੈ ਉਹ ਧਰਤੀ ਤੇ ਸਭ ਤੋਂ ਵੱਧ ਭਲਿਆਈ ਕਰੇਗਾ। ਜੋ ਵਿਅਕਤੀ ਸਵਰਗ ਦੇ ਪ੍ਰਤੀਫ਼ਲ ਦੀ ਉਮੀਦ ਰੱਖਦਾ ਹੈ ਉਹ ਪਰਮੇਸ਼ੁਰ ਦੀ ਇੱਛਾ ਨੂੰ ਪੂਰਾ ਕਰਨ ਦੇ ਲਈ ਯਤਨ ਕਰਦਾ ਹੈ ਅਤੇ ਮੁਸ਼ਕਿਲਾਂ ਸਹਿ ਸਕਦਾ ਹੈ। ਯਿਸੂ ਨੇ ਸਤਾਏ ਜਾਣ ਵਾਲੇ ਵਿਅਕਤੀ ਦੇ ਲਈ ਕਿਹਾ, “ਅਨੰਦ ਹੋਵੋ ਅਤੇ ਖੁਸ਼ੀ ਕਰੋ ਕਿਉਂ ਜੋ ਤੁਹਾਡਾ ਫਲ ਸੁਰਗ ਵਿੱਚ ਬਹੁਤ ਹੈ” (ਮੱਤੀ 5:12)।

ਸਵਰਗ ਦੀਆਂ ਵਿਸ਼ੇਸ਼ਤਾਵਾਂ

► ਸਵਰਗ ਦੇ ਬਾਰੇ ਕੁਝ ਅਜਿਹੇ ਵੇਰਵੇ ਕਿਹੜੇ ਹਨ ਜਿੰਨ੍ਹਾਂ ਨੂੰ ਅਸੀਂ ਜਾਣਦੇ ਹਾਂ?

[1]ਕਈ ਵਾਰ ਲੋਕ ਧਰਤੀ ਤੇ ਆਪਣੇ ਲਈ ਅਜਿਹੇ ਘਰ ਨੂੰ ਨਹੀਂ ਖ਼ਰੀਦ ਸਕਦੇ ਜੋ ਉਹ ਚਾਹੁੰਦੇ ਹਨ, ਜਾਂ ਸ਼ਾਇਦ ਉਹ ਆਪਣੇ ਘਰ ਨੂੰ ਅਜਿਹਾ ਨਾ ਬਣਾ ਸਕਣ ਜਿਵੇਂ ਦਾ ਉਹ ਬਣਾਉਣਾ ਚਾਹੁੰਦੇ ਹਨ। ਪਰ ਪਰਮੇਸ਼ੁਰ ਕੋਲ ਬੇਅੰਤ ਸ਼ਕਤੀ ਅਤੇ ਸਾਧਨ ਹਨ, ਇਸ ਲਈ ਅਸੀਂ ਜਾਣਦੇ ਹਾਂ ਕਿ ਉਸਦਾ ਘਰ ਬਿਲਕੁਲ ਉਹੀ ਹੈ ਜੋ ਉਹ ਚਾਹੁੰਦਾ ਹੈ। ਇਸ ਕਾਰਨ, ਸਵਰਗ ਪੂਰੀ ਤਰ੍ਹਾਂ ਦੇ ਨਾਲ ਪਰਮੇਸ਼ੁਰ ਦੇ ਸੁਭਾਅ ਨਾਲ ਮੇਲ ਖਾਂਦਾ ਹੈ।

ਸਵਰਗ ਦੇ ਵਿੱਚ ਕੋਈ ਪਾਪ ਨਹੀਂ ਹੈ। ਸਵਰਗ ਦੇ ਵਿੱਚ ਸਭ ਕੁਝ ਪਵਿੱਤਰ ਹੈ ਚਾਹੇ ਉਹ ਸਵਰਗਦੂਤ ਹੋਣ ਜਾਂ ਮਨੁੱਖ ਜਾਂ ਹੋਰ ਪ੍ਰਾਣੀ (ਪੜ੍ਹੋ ਪਰਕਾਸ਼ ਦੀ ਪੋਥੀ 21:8, 27।)

ਸਵਰਗ ਪਾਪ ਦੇ ਨਤੀਜਿਆਂ ਤੋਂ ਪੂਰੀ ਤਰ੍ਹਾਂ ਦੇ ਨਾਲ ਆਜਾਦ ਹੈ, ਜਿਸਦੇ ਵਿੱਚ ਦਰਦ, ਦੁੱਖ, ਕਲੇਸ਼ ਜਾਂ ਖ਼ਤਰਾ ਸ਼ਾਮਿਲ ਹੈ (ਪੜ੍ਹੋ ਪਰਕਾਸ਼ ਦੀ ਪੋਥੀ 21:4)। ਅੱਗੇ ਤੋਂ ਰਚਨਾ ਦੇ ਉੱਤੇ ਸ਼ਰਾਪ ਨਹੀਂ ਹੋਵੇਗਾ ਜਿਸਦੇ ਵਿੱਚ ਬਿਮਾਰੀ, ਉਮਰ ਦਾ ਵੱਧਣਾ ਅਤੇ ਮੌਤ ਸ਼ਾਮਿਲ ਹੈ। (ਪੜ੍ਹੋ ਪਰਕਾਸ਼ ਦੀ ਪੋਥੀ 22:3।)

ਸਵਰਗ ਦੀ ਸੁੰਦਰਤਾ ਵਰਣਨ ਤੋਂ ਪਰੇ ਹੈ। ਸਾਨੂੰ ਦਿੱਤੇ ਗਏ ਵੇਰਵਿਆਂ ਵਿੱਚ ਯਸ਼ਬ ਦੀਆਂ ਕੰਧਾਂ, ਮੋਤੀਆਂ ਦੇ ਦਰਵਾਜ਼ੇ, ਦੁਰਲੱਭ ਰਤਨ ਦੀਆਂ ਨੀਂਹਾਂ, ਅਤੇ ਸੋਨੇ ਦੀਆਂ ਗਲੀਆਂ ਸ਼ਾਮਲ ਹਨ (ਪੜ੍ਹੋ ਪਰਕਾਸ਼ ਦੀ ਪੋਥੀ 21:18-21।)

ਕੌਣ ਅਤੇ ਕਦੋਂ?

ਸਵਰਗ ਉਨ੍ਹਾਂ ਦੇ ਲਈ ਤਿਆਰ ਕੀਤਾ ਗਿਆ ਹੈ ਜੋ ਆਪਣੇ ਪਾਪ ਤੋਂ ਤੌਬਾ ਕਰਦੇ ਹਨ ਅਤੇ ਯਿਸੂ ਮਸੀਹ ਤੇ ਮੁਕਤੀਦਾਤੇ ਵੱਜੋਂ ਵਿਸ਼ਵਾਸ ਕਰਦੇ ਹਨ (ਯੂਹੰਨਾ 3:16)। ਬਾਈਬਲ ਸਾਨੂੰ ਦੱਸਦੀ ਹੈ ਕਿ ਜੇਕਰ ਅਸੀਂ ਸਦੀਪਕ ਕਦਰਾਂ ਕੀਮਤਾਂ ਦੇ ਨਾਲ ਜਿਉਂਦੇ ਹਾਂ ਤਾਂ ਅਸੀਂ ਸਵਰਗ ਦੇ ਸਦੀਪਕ ਅਤੇ ਸੁਰੱਖਿਅਤ ਖ਼ਜਾਨੇ ਦੇ ਵਿੱਚ ਨਿਵੇਸ਼ ਕਰ ਸਕਦੇ ਹਾਂ (ਪੜ੍ਹੋ ਮੱਤੀ 6:20)। ਸਵਰਗ ਬਚਾਏ ਹੋਏ ਲੱਖਾਂ ਲੋਕਾਂ ਅਤੇ ਸਵਰਗਦੂਤਾਂ ਦੇ ਨਾਲ ਭਰਿਆ ਹੋਵੇਗਾ (ਪਰਕਾਸ਼ ਦੀ ਪੋਥੀ 5:8-11)।

ਕੋਈ ਵਿਅਕਤੀ ਸਵਰਗ ਦੇ ਵਿੱਚ ਕਦੋਂ ਜਾਂਦਾ ਹੈ? ਯਿਸੂ ਨੇ ਆਪਣੇ ਨਾਲ ਸਲੀਬ ਤੇ ਮਰਨ ਵਾਲੇ ਚੋਰ ਨੂੰ ਕਿਹਾ ਕਿ ਤੂੰ ਅੱਜ ਹੀ ਮੇਰੇ ਨਾਲ ਫਿਰਦੌਸ ਦੇ ਵਿੱਚ ਹੋਵੇਂਗਾ (ਲੂਕਾ 23:43)। ਪੌਲੁਸ ਨੇ ਕਿਹਾ ਕਿ ਸਰੀਰ ਨਾਲੋਂ ਅਲੱਗ ਹੋਣ ਦਾ ਭਾਵ ਹੈ ਪ੍ਰਭੂ ਦੇ ਨਾਲ ਹੋਣਾ (2 ਕੁਰਿੰਥੀਆਂ ਨੂੰ 5:8)। ਇਸ ਲਈ, ਅਸੀਂ ਜਾਣਦੇ ਹਾਂ ਕਿ ਇੱਕ ਵਿਸ਼ਵਾਸੀ ਮੌਤ ਦੇ ਸਮੇਂ ਹੀ ਸਵਰਗ ਦੇ ਵਿੱਚ ਚਲਾ ਜਾਂਦਾ ਹੈ। ਜੋ ਵਿਸ਼ਵਾਸੀ ਯਿਸੂ ਦੀ ਆਮਦ ਦੇ ਸਮੇਂ ਜਿਉਂਦੇ ਹੋਣਗੇ ਉਹ ਮੌਤ ਦਾ ਸਵਾਦ ਚੱਖੇ ਬਿਨਾਂ ਸਵਰਗ ਤੇ ਚਲੇ ਜਾਣਗੇ। (ਪੜ੍ਹੋ 1 ਕੁਰਿੰਥੀਆਂ ਨੂੰ 15:51-52; 1 ਥੱਸਲੁਨੀਕੀਆਂ ਨੂੰ 4:13-18)।

ਧਰਤੀ ਤੇ ਮਿਲਣ ਵਾਲੀ ਸਜ਼ਾ ਕਿਸੇ ਨਾ ਕਿਸੇ ਸਮੇਂ ਦੇ ਵਿੱਚ ਖ਼ਤਮ ਹੋ ਜਾਂਦੀ ਹੈ, ਭਾਵੇਂ ਕਿਸੇ ਨੂੰ ਮੌਤ ਦੀ ਸਜ਼ਾ ਹੀ ਮਿਲੀ ਹੋਵੇ। ਪਰ ਯਿਸੂ ਨੇ ਇੱਕ ਅਜਿਹੀ ਸਜ਼ਾ ਦੇ ਬਾਰੇ ਦੱਸਿਆ ਜੋ ਸਦੀਪਕ ਹੈ। ਉਸਨੇ ਕਿਹਾ,

ਹੇ ਸਰਾਪੇ ਹੋਇਓ, ਮੇਰੇ ਕੋਲੋਂ ਉਸ ਸਦੀਪਕ ਅੱਗ ਵਿੱਚ ਚੱਲੇ ਜਾਓ ਜਿਹੜੀ ਸ਼ਤਾਨ ਅਤੇ ਉਹ ਦੇ ਦੂਤਾਂ ਲਈ ਤਿਆਰ ਕੀਤੀ ਹੋਈ ਹੈ।… ਅਤੇ ਏਹ ਸਦੀਪਕ ਸਜ਼ਾ ਵਿੱਚ ਜਾਣਗੇ ਪਰ ਧਰਮੀ ਸਦੀਪਕ ਜੀਉਣ ਵਿੱਚ (ਮੱਤੀ 25:41, 46)।

ਯਿਸੂ ਅਤੇ ਚੇਲ੍ਹਿਆਂ ਨੇ ਇਸ ਗੱਲ ਦੀ ਪੁਸ਼ਟੀ ਕੀਤੀ ਕਿ ਨਰਕ, ਅੱਗ ਦੀ ਝੀਲ ਅਤੇ ਸਦੀਪਕ ਸਜ਼ਾ ਅਸਲ ਦੇ ਵਿੱਚ ਹਨ। ਯਿਸੂ ਨੇ ਸਾਨੂੰ ਇਸ ਭਿਆਨਕ ਸਥਾਨ ਤੋਂ ਬਚਣ ਦੀ ਚੇਤਾਵਨੀ ਦਿੱਤੀ। ਹੇਠਾਂ ਯਿਸੂ ਅਤੇ ਰਸੂਲਾਂ ਦੇ ਕੁਝ ਬਿਆਨ ਹਨ।

ਸੋ ਜੁਗ ਦੇ ਅੰਤ ਦੇ ਸਮੇ ਅਜਿਹਾ ਹੀ ਹੋਵੇਗਾ। ਦੂਤ ਨਿੱਕਲ ਆਉਣਗੇ ਅਤੇ ਧਰਮੀਆਂ ਵਿੱਚੋਂ ਦੁਸ਼ਟਾਂ ਨੂੰ ਅੱਡ ਕਰਨਗੇ ਅਰ ਇਨ੍ਹਾਂ ਨੂੰ ਭਖਦੇ ਭੱਠੇ ਵਿੱਚ ਸੁੱਟ ਦੇਣਗੇ। ਉੱਥੇ ਰੋਣਾ ਅਰ ਕਚੀਚੀਆਂ ਵੱਟਣਾ ਹੋਵੇਗਾ (ਮੱਤੀ 13:49-50)।

ਫ਼ਰੀਸੀਆਂ ਦੇ ਨਾਲ ਗੱਲ ਕਰਦੇ ਹੋਏ ਯਿਸੂ ਨੇ ਕਿਹਾ, “ਹੇ ਸੱਪੋ, ਹੇ ਨਾਗਾਂ ਦੇ ਬੱਚਿਓ! ਤੁਸੀਂ ਨਰਕ ਦੇ ਡੰਨੋਂ ਕਿਸ ਬਿਧ ਭੱਜੋਗੇ?” (ਮੱਤੀ 23:33)।

ਇੱਕ ਹੋਰ ਸਮੇਂ ਜਦੋਂ ਯਿਸੂ ਫ਼ਰੀਸੀਆਂ ਦੇ ਨਾਲ ਗੱਲ ਕਰ ਰਿਹਾ ਸੀ, ਉਸਨੇ ਇੱਕ ਅਜਿਹੇ ਵਿਅਕਤੀ ਦੇ ਕਸ਼ਟਾਂ ਦਾ ਵਰਣਨ ਕੀਤਾ ਜੋ ਪਤਾਲ ਦੇ ਵਿੱਚ ਚਲਾ ਗਿਆ ਸੀ:

ਅਰ ਪਤਾਲ ਵਿੱਚ ਦੁਖੀ ਹੋ ਕੇ ਉਸ ਨੇ ਆਪਣੀਆਂ ਅੱਖੀਆਂ ਚੁੱਕੀਆਂ ਅਤੇ ਦੂਰੋਂ ਅਬਰਾਹਾਮ ਨੂੰ ਅਰ ਉਹ ਦੀ ਗੋਦ ਵਿੱਚ ਲਾਜ਼ਰ ਨੂੰ ਡਿੱਠਾ ਤਾਂ ਉਸ ਨੇ ਅਵਾਜ਼ ਮਾਰ ਕੇ ਕਿਹਾ, ਹੇ ਪਿਤਾ ਅਬਰਾਹਾਮ ਮੇਰੇ ਉੱਤੇ ਦਯਾ ਕਰ ਅਤੇ ਲਾਜ਼ਰ ਨੂੰ ਘੱਲ ਜੋ ਆਪਣੀ ਉਂਗਲ ਦਾ ਪੋਟਾ ਪਾਣੀ ਵਿੱਚ ਡੁੱਬੋ ਕੇ ਮੇਰੀ ਜੀਭ ਠੰਢੀ ਕਰੇ ਕਿਉਂ ਜੋ ਮੈਂ ਇਸ ਲੰਬ ਵਿੱਚ ਕਲਪਦਾ ਹਾਂ! (ਲੂਕਾ 16:23-24)।

ਪੌਲੁਸ ਰਸੂਲ ਲਿਖਦਾ ਹੈ ਕਿ

…ਪ੍ਰਭੁ ਯਿਸੂ ਆਪਣੇ ਬਲਵੰਤ ਦੂਤਾਂ ਸਣੇ ਭੜਕਦੀ ਅੱਗ ਵਿੱਚ ਅਕਾਸ਼ੋਂ ਪਰਗਟ ਹੋਵੇਗਾ ਅਤੇ ਜਿਹੜੇ ਪਰਮੇਸ਼ੁਰ ਨੂੰ ਨਹੀਂ ਜਾਣਦੇ ਅਤੇ ਸਾਡੇ ਪ੍ਰਭੁ ਯਿਸੂ ਦੀ ਇੰਜੀਲ ਨੂੰ ਨਹੀਂ ਮੰਨਦੇ ਓਹਨਾਂ ਨੂੰ ਬਦਲਾ ਦੇਵੇਗਾ ਓਹ ਸਜ਼ਾ ਭੋਗਣਗੇ ਅਰਥਾਤ ਪ੍ਰਭੁ ਦੇ ਹਜ਼ੂਰੋਂ ਅਤੇ ਉਹ ਦੀ ਸਮਰੱਥਾ ਦੇ ਤੇਜ ਤੋਂ ਸਦਾ ਦਾ ਵਿਨਾਸ (ਥੱਸਲੁਨੀਕੀਆਂ ਨੂੰ ਦੂਜੀ ਪੱਤ੍ਰੀ 1:7-9)।

ਪਤਰਸ ਲਿਖਦਾ ਹੈ

…ਪਰਮੇਸ਼ੁਰ ਨੇ ਦੂਤਾਂ ਨੂੰ ਜਿਸ ਵੇਲੇ ਉਨ੍ਹਾਂ ਪਾਪ ਕੀਤਾ ਨਾ ਛੱਡਿਆ ਸਗੋਂ ਓਹਨਾਂ ਨੂੰ ਨਰਕ ਵਿੱਚ ਸੁੱਟ ਕੇ ਅੰਧਕੂਪਾਂ ਵਿੱਚ ਪਾ ਦਿੱਤਾ ਭਈ ਨਿਆਉਂ ਦੇ ਲਈ ਕਾਬੂ ਰਹਿਣ (ਪਤਰਸ ਦੀ ਦੂਜੀ ਪੱਤ੍ਰੀ 2:4)।

ਯੂਹੰਨਾ ਲਿਖਦਾ ਹੈ

ਅਤੇ ਸ਼ਤਾਨ ਜਿਹ ਨੇ ਓਹਨਾਂ ਨੂੰ ਭਰਮਾਇਆ ਸੀ ਅੱਗ ਅਤੇ ਗੰਧਕ ਦੀ ਝੀਲ ਵਿੱਚ ਸੁੱਟਿਆ ਗਿਆ ਜਿੱਥੇ ਉਹ ਦਰਿੰਦਾ ਅਤੇ ਝੂਠਾ ਨਬੀ ਹੈ ਅਤੇ ਰਾਤ ਦਿਨ ਓਹ ਜੁੱਗੋ ਜੁਗ ਕਸ਼ਟ ਭੋਗਣਗੇ… ਅਤੇ ਜੇ ਕੋਈ ਜੀਵਨ ਦੀ ਪੋਥੀ ਵਿੱਚ ਲਿਖਿਆ ਹੋਇਆ ਨਾ ਲੱਭਾ ਤਾਂ ਉਹ ਅੱਗ ਦੀ ਝੀਲ ਵਿੱਚ ਸੁੱਟਿਆ ਗਿਆ (ਪਰਕਾਸ਼ ਦੀ ਪੋਥੀ 20:10, 15)।

ਇਸ ਸਥਾਨ ਦਾ ਵਰਣਨ ਕਰਨ ਦੇ ਲਈ ਵਰਤੇ ਗਏ ਸ਼ਬਦਾਂ ਤੇ ਧਿਆਨ ਦਿਓ: ਅੱਗ, ਕਸ਼ਟ, ਬਦਲਾ, ਸਜ਼ਾ, ਭੱਠਾ, ਵਿਨਾਸ, ਨਿਆਂ, ਰੋਣਾ, ਕਚੀਚੀਆਂ ਵੱਟਣਾ।

ਯਿਸੂ ਨੇ ਕਿਹਾ

ਅਰ ਜੇ ਤੇਰੀ ਸੱਜੀ ਅੱਖ ਤੈਨੂੰ ਠੋਕਰ ਖੁਆਵੇ ਤਾਂ ਉਹ ਨੂੰ ਕੱਢ ਕੇ ਆਪਣੇ ਕੋਲੋਂ ਸੁੱਟ ਦਿਹ ਕਿਉਂ ਜੋ ਤੇਰੇ ਲਈ ਇਹੋ ਭਲਾ ਹੈ ਕਿ ਤੇਰੇ ਅੰਗਾਂ ਵਿੱਚੋਂ ਇੱਕ ਦਾ ਨਾਸ ਹੋਵੇ ਪਰ ਤੇਰਾ ਸਾਰਾ ਸਰੀਰ ਨਰਕ ਵਿੱਚ ਸੁੱਟਿਆ ਨਾ ਜਾਵੇ ਅਤੇ ਜੇ ਤੇਰਾ ਸੱਜਾ ਹੱਥ ਤੈਨੂੰ ਠੋਕਰ ਖੁਆਵੇ ਤਾਂ ਉਹ ਨੂੰ ਵੱਢ ਕੇ ਆਪਣੇ ਕੋਲੋਂ ਸੁੱਟ ਦਿਹ ਕਿਉਂ ਜੋ ਤੇਰੇ ਲਈ ਇਹੋ ਭਲਾ ਹੈ ਕਿ ਤੇਰੇ ਅੰਗਾਂ ਵਿੱਚੋਂ ਇੱਕ ਦਾ ਨਾਸ ਹੋਵੇ ਪਰ ਤੇਰਾ ਸਾਰਾ ਸਰੀਰ ਨਰਕ ਵਿੱਚ ਨਾ ਜਾਵੇ (ਮੱਤੀ 5:29-30)।

ਯਿਸੂ ਨੇ ਕਿਹਾ ਕਿ ਦੋਨੇਂ ਅੱਖਾਂ ਅਤੇ ਹੱਥਾਂ ਦੇ ਹੁੰਦੇ ਹੋਏ ਨਰਕ ਦੀ ਅੱਗ ਦੇ ਵਿੱਚ ਸੁੱਟੇ ਜਾਣ ਨਾਲੋਂ ਸੱਜੀ ਅੱਖ ਨੂੰ ਕੱਢ ਸੁੱਟਣਾ ਅਤੇ ਅਤੇ ਸੱਜੇ ਹੱਥ ਨੂੰ ਵੱਢ ਸੁੱਟਣਾ ਬਿਹਤਰ ਹੈ। ਇੱਥੇ ਯਿਸੂ ਸਰੀਰ ਨੂੰ ਕਸ਼ਟ ਦੇਣ ਦੀ ਗੱਲ ਨਹੀਂ ਕਰ ਰਿਹਾ, ਪਰ ਉਹ ਅਜਿਹੇ ਕਿਸੇ ਵੀ ਪਾਪ ਦਾ ਤਿਆਗ ਕਰਨ ਦੇ ਲਈ ਕਹਿ ਰਿਹਾ ਹੈ ਜੋ ਪਾਪ ਅਤੇ ਨਰਕ ਦੇ ਵਿੱਚ ਲੈ ਜਾਂਦਾ ਹੈ, ਚਾਹੇ ਇਹ ਧਰਤੀ ਤੇ ਕਿੰਨਾ ਵੀ ਕੀਮਤੀ ਪ੍ਰਤੀਤ ਕਿਉਂ ਨਾ ਹੋਵੇ।

► ਕੁਝ ਅਜਿਹੇ ਧਰਮ ਕਿਹੜੇ ਹਨ ਜੋ ਨਰਕ ਦੇ ਬਾਰੇ ਗ਼ਲਤ ਸਿਧਾਂਤ ਰੱਖਦੇ ਹਨ?

ਬਾਈਬਲ ਸਾਨੂੰ ਦੱਸਦੀ ਹੈ ਕਿ ਮੌਤ ਦੇ ਨਾਲ ਮਨੁੱਖ ਦੇ ਤੌਬਾ ਕਰਨ ਦਾ ਮੌਕਾ ਖ਼ਤਮ ਹੋ ਜਾਂਦਾ ਹੈ, ਅਤੇ ਇਹ ਕਿ ਨਰਕ (1) ਸਦੀਪਕ ਹੈ, (2) ਇੱਥੋਂ ਬਾਹਰ ਨਹੀਂ ਆ ਸਕਦੇ ਅਤੇ (3) ਇਸਦੇ ਵਿੱਚ ਬਹੁਤ ਕਸ਼ਟ ਹੈ। ਬਾਈਬਲ ਦੀ ਇਸ ਸਚਿਆਈ ਦਾ ਨਾਸਤਿਕ ਲੋਕ ਇਨਕਾਰ ਕਰਦੇ ਹੋਏ ਕਹਿੰਦੇ ਹਨ ਕਿ ਮੌਤ ਤੋਂ ਬਾਅਦ ਕੁਝ ਵੀ ਨਹੀਂ ਹੈ, ਯਹੋਵਾਹ ਵਿਟਨੈਸ, ਮੋਰਮੋਨਜ਼ ਅਤੇ ਬ੍ਰਹਿਮੰਡੀਏ ਵੀ ਇਹੀ ਮੰਨਦੇ ਹਨ ਕਿ ਕੋਈ ਨਰਕ ਨਹੀਂ ਹੈ। ਰੋਮਨ ਕੈਥੋਲਿਕ ਇਸ ਤੱਥ ਨੂੰ ਨਕਾਰ ਦਿੰਦੇ ਹਨ ਕਿ ਮੌਤ ਦੇ ਨਾਲ ਤੌਬਾ ਕਰਨ ਦਾ ਮੌਕਾ ਖ਼ਤਮ ਹੋ ਜਾਂਦਾ ਹੈ ਅਤੇ ਉਹ ਮੰਨਦੇ ਹਨ ਕਿ ਮੌਤ ਤੋਂ ਬਾਅਦ ਵੀ ਕਿਸੇ ਵਿਅਕਤੀ ਦੀ ਸਥਿਤੀ ਵਿੱਚ ਸੁਧਾਰ ਕੀਤਾ ਜਾ ਸਕਦਾ ਹੈ।

ਕੁਝ ਅਜਿਹੇ ਲੋਕ ਵੀ ਹਨ ਜੋ ਨਰਕ ਦੀ ਹੋਂਦ ਦਾ ਇਨਕਾਰ ਇਸ ਲਈ ਕਰਦੇ ਹਨ ਕਿਉਂਕਿ ਉਹ ਇਸ ਨੂੰ ਅਨਿਆਂ ਮੰਨਦੇ ਹਨ। ਉਹ ਕਹਿੰਦੇ ਹਨ ਕਿ ਜੇਕਰ ਪਾਪ ਇੱਕ ਮਰਨਹਾਰ (ਅਸਥਾਈ) ਸਮੇਂ ਦੇ ਵਿੱਚ ਕੀਤਾ ਗਿਆ ਹੈ, ਤਾਂ ਫਿਰ ਇਸਦੀ ਸਜ਼ਾ ਸਦੀਪਕ ਨਹੀਂ ਹੋਣੀ ਚਾਹੀਦੀ। ਸੰਤ ਅਗਸਟਿਨ ਨੇ ਇਸ ਇਤਰਾਜ਼ ਦਾ ਜੁਆਬ ਅਪਰਾਧਿਕ ਕਨੂੰਨ ਦੇ ਨਾਲ ਦਿੱਤਾ। ਜੇਕਰ ਕੋਈ ਵਿਅਕਤੀ ਕੁਝ ਹੀ ਮਿੰਟਾਂ ਦੇ ਵਿੱਚ ਚੋਰੀ ਕਰਦਾ ਹੈ ਤਾਂ ਕਿ ਉਸਨੂੰ ਕੁਝ ਹੀ ਮਿੰਟਾਂ ਦੀ ਸਜ਼ਾ ਮਿਲਣੀ ਚਾਹੀਦੀ ਹੈ? ਇੱਕ ਕਤਲ ਕੁਝ ਹੀ ਸਮੇਂ ਦੇ ਵਿੱਚ ਕਰ ਦਿੱਤਾ ਜਾਂਦਾ ਹੈ ਪਰ ਇਹ ਨਾ ਪੂਰੇ ਹੋਣ ਵਾਲੇ ਨੁਕਸਾਨ ਦਾ ਕਾਰਨ ਬਣਦਾ ਹੈ। ਪਵਿੱਤਰ ਚਵਨਾਂ ਦੇ ਵਿੱਚ ਅਸੀਂ ਵੇਖਦੇ ਹਾਂ ਸਦੀਪਕ ਪਰਮੇਸ਼ੁਰ ਦੇ ਵਿਰੁੱਧ ਕੀਤਾ ਹੋਇਆ ਪਾਪ ਸਦੀਪਕ ਸਜ਼ਾ ਦਾ ਕਾਰਨ ਬਣਦਾ ਹੈ, ਭਾਵੇਂਕਿ ਕਿ ਇਹ ਮਰਨਹਾਰ ਜੀਵਨਕਾਲ ਦੇ ਵਿੱਚ ਕੀਤਾ ਗਿਆ।

► ਨਰਕ ਸਦੀਪਕ ਕਿਉਂ ਹੈ?

ਨਰਕ ਸਦੀਪਕ ਹੈ ਕਿਉਂਕਿ

1. ਪਾਪ ਇੱਕ ਸਦੀਪਕ ਪਰਮੇਸ਼ੁਰ ਦੇ ਵਿਰੁੱਧ ਕੀਤੇ ਜਾਣ ਵਾਲਾ ਅਪਰਾਧ ਹੈ।

2. ਤੌਬਾ ਨਾ ਕਰਨ ਵਾਲੇ ਪਾਪੀ ਪਰਮੇਸ਼ੁਰ ਦੇ ਅੱਗੇ ਅਜਿਹੀਆਂ ਸੇਵਾਵਾਂ ਨਿਭਾਉਣ ਤੋਂ ਇਨਕਾਰ ਕਰਦੇ ਜਿਸ ਲਈ ਉਹ ਉਸਦੇ ਕਰਜ਼ਦਾਰ ਹਨ।

3. ਅਸੀਂ ਸਦੀਪਕ ਪ੍ਰਾਣੀ ਹਾਂ ਅਤੇ ਜੇਕਰ ਅਸੀਂ ਪਰਮੇਸ਼ੁਰ ਤੋਂ ਅਲੱਗ ਹੋ ਜਾਈਏ ਤਾਂ ਸਾਡੇ ਕੋਲ ਕਿਤੇ ਵੀ ਹੋਰ ਜਾਣ ਦਾ ਸਥਾਨ ਨਹੀਂ ਹੋਵੇਗਾ।

ਧਰਤੀ ਤੇ ਅਸੀਂ ਚਾਹੁੰਦੇ ਹਾਂ ਕਿ ਸਾਡੇ ਕੋਲ ਸਾਡੇ ਫੈਸਲਿਆਂ ਨੂੰ ਬਦਲਣ ਦੀ ਯੋਗਤਾ ਹੋਵੇ। ਸਾਨੂੰ ਇਹ ਬਹੁਤ ਕਠੋਰ ਜਾਪਦਾ ਹੈ ਕਿ ਕਿਸੇ ਚੋਣ ਦੇ ਸਦੀਪਕ ਨਤੀਜੇ ਹੋ ਸਕਦੇ ਹਨ। ਅਸੀਂ ਅਜਿਹਾ ਸੋਚਣਾ ਪਸੰਦ ਕਰਦੇ ਹਾਂ ਕਿ ਭਵਿੱਖ ਦੇ ਵਿੱਚ ਦੂਸਰਾ ਮੌਕਾ ਜਰੂਰ ਹੋਵੇਗਾ, ਭਾਵੇਂ ਅਸੀਂ ਹੁਣ ਕਿਸੇ ਚੋਣ ਨੂੰ ਜਾਣਬੁੱਝ ਕੇ ਕਰੀਏ। ਪਰ ਇਹ ਬੇਤੁਕਾ ਨਹੀਂ ਹੈ ਕਿ ਪਰਮੇਸ਼ੁਰ ਸਾਡੀ ਪਰਖ ਦੀ ਮਿਆਦ ਨੂੰ ਜੀਵਨਕਾਲ ਦੇ ਲਈ ਸੀਮਿਤ ਕਰ ਦਿੰਦਾ ਹੈ।

[1]ਕੁਝ ਲੋਕ ਨਰਕ ਤੇ ਵਿਸ਼ਵਾਸ ਕਰਨ ਦਾ ਇਨਕਾਰ ਇਸ ਲਈ ਕਰਦੇ ਹਨ ਕਿਉਂਕਿ ਉਹ ਸਮਝ ਨਹੀਂ ਪਾਉਂਦੇ ਕਿ ਇੱਕ ਪਿਆਰ ਕਰਨ ਵਾਲਾ ਪਰਮੇਸ਼ੁਰ ਕਿਸੇ ਨੂੰ ਅਜਿਹੇ ਭਿਆਨਕ ਸਥਾਨ ਤੇ ਕਿਵੇਂ ਘੱਲ ਸਕਦਾ ਹੈ ਜਿਵੇਂ ਇੰਨਾਂ ਵਚਨਾਂ ਦੇ ਵਿੱਚ ਲਿਖਿਆ ਹੋਇਆ ਹੈ। ਸਾਨੂੰ ਇਹ ਗੱਲ ਮਨ ਦੇ ਵਿੱਚ ਰੱਖਣੀ ਚਾਹੀਦੀ ਹੈ ਕਿ ਪਰਮੇਸ਼ੁਰ ਨਹੀਂ ਚਾਹੁੰਦਾ ਕਿ ਕੋਈ ਵੀ ਗੁਆਚ ਜਾਵੇ ਸਗੋਂ ਉਸਦੀ ਇੱਛਾ ਇਹ ਹੈ ਕਿ ਹਰ ਕੋਈ ਤੌਬਾ ਅਤੇ ਮੁਕਤੀ ਦੇ ਕੋਲ ਆਵੇ। ਬਾਈਬਲ ਇਸਨੂੰ ਕਈ ਸਥਾਨਾਂ ਤੇ ਦੱਸਦੀ ਹੈ। (ਪੜ੍ਹੋ ਪਤਰਸ ਦੀ ਦੂਜੀ ਪੱਤ੍ਰੀ 3:9; ਤਿਮੋਥਿਉਸ ਨੂੰ ਪਹਿਲੀ ਪੱਤ੍ਰੀ 2:4; ਰਸੂਲਾਂ ਦੇ ਕਰਤੱਬ 17:30।)। ਨਰਕ ਵਿੱਚ ਜਾਣ ਵਾਲੇ ਲੋਕ ਉਨ੍ਹਾਂ ਦੁਆਰਾ ਕੀਤੀਆਂ ਚੋਣਾਂ ਦੇ ਕਾਰਨ ਹੀ ਉੱਥੇ ਜਾਂਦੇ ਹਨ। ਕੋਈ ਵੀ ਅਚਾਨਕ ਨਰਕ ਦੇ ਵਿੱਚ ਨਹੀਂ ਡਿੱਗ ਪੈਂਦਾ। ਜੋ ਉੱਥੇ ਜਾਂਦੇ ਹਨ ਉਹ ਪਰਮੇਸ਼ੁਰ, ਧਾਰਮਿਕਤਾ ਅਤੇ ਮੁਕਤੀ ਦਾ ਇਨਕਾਰ ਕਰਕੇ ਉਸ ਸਥਾਨ ਨੂੰ ਚੁਣਦੇ ਹਨ।

ਕਿਉਂਕਿ ਹਰੇਕ ਚੰਗੀ ਵਸਤ ਪਰਮੇਸ਼ੁਰ ਤੋਂ ਆਉਂਦੀ ਹੈ, ਇਸ ਕਾਰਨ ਪਰਮੇਸ਼ੁਰ ਦਾ ਇਨਕਾਰ ਕਰਨਾ ਸਭ ਚੰਗੀਆਂ ਵਸਤਾਂ ਦਾ ਇਨਕਾਰ ਕਰਨਾ ਹੈ। ਸ਼ਾਂਤ, ਡਰ ਅਤੇ ਦਰਦ ਤੋਂ ਸੁਰੱਖਿਆ, ਅਤੇ ਇੱਕ ਆਰਾਮਦਾਇਕ ਸਥਾਨ ਉਹ ਚੰਗੀਆਂ ਵਸਤਾਂ ਹਨ ਜੋ ਸਿਰਫ਼ ਪਰਮੇਸ਼ੁਰ ਹੀ ਪ੍ਰਦਾਨ ਕਰ ਸਕਦਾ ਹੈ। ਪਰਮੇਸ਼ੁਰ ਤੋਂ ਪੂਰੀ ਤਰ੍ਹਾਂ ਅਲੱਗ ਹੋਣ ਤੋਂ ਭਾਵ ਉਸ ਹਰੇਕ ਵਸਤ ਤੋਂ ਅਲੱਗ ਹੋਣਾ ਹੈ ਜੋ ਚੰਗੀ ਹੈ, ਅਜਿਹਾ ਸਥਾਨ ਨਰਕ ਹੈ।

ਪਰਮੇਸ਼ੁਰ ਦਾ ਧੰਨਵਾਦ ਹੈ ਕਿ ਯਿਸੂ ਮਸੀਹ ਦੇ ਪ੍ਰਾਸਚਿੱਤ ਕਰਨ ਵਾਲੇ ਕੰਮ ਦੇ ਦੁਆਰਾ, ਉਸਦੇ ਪਿਆਰ ਨੇ ਸਾਡੇ ਲਈ ਆਉਣ ਵਾਲੇ ਕ੍ਰੋਧ ਤੋਂ ਬਚ ਜਾਣ ਨੂੰ ਸੰਭਵ ਬਣਾਇਆ ਹੈ (1 ਥੱਸਲੁਨੀਕੀਆਂ ਨੂੰ 1:10)। ਨਰਕ ਦੇ ਵਿੱਚ ਕਸ਼ਟ ਝੱਲਣ ਦੀ ਬਜਾਏ, ਅਸੀਂ ਸਵਰਗ ਦੇ ਅਨੰਦ ਅਤੇ ਉੱਥੋਂ ਦੀਆਂ ਅਦਭੁੱਤ ਚੀਜਾਂ ਵਿੱਚ ਸਾਂਝੀ ਹੋਵਾਂਗੇ। ਜਦੋਂ ਅਸੀਂ ਪਰਮੇਸ਼ੁਰ ਦੇ ਅੱਗੇ ਤੌਬਾ ਅਤੇ ਯਿਸੂ ਮਸੀਹ ਦੇ ਵਿੱਚ ਵਿਸ਼ਵਾਸ ਨੂੰ ਚੁਣਿਆ ਤਾਂ ਅਸੀਂ ਆਪਣੀ ਮੰਜ਼ਿਲ ਦੇ ਤੌਰ ਤੇ ਸਵਰਗ ਦੀ ਚੋਣ ਕੀਤੀ (ਫ਼ਿਲਿੱਪੀਆਂ ਨੂੰ 3:20, ਰਸੂਲਾਂ ਦੇ ਕਰਤੱਬ 20:21)।

ਧਰਤੀ ਦੇ ਜੀਵਨ ਤੇ, ਬਹੁਤ ਸਾਰੇ ਫੈਸਲੇ ਅੰਤਿਮ ਪ੍ਰਤੀਤ ਨਹੀਂ ਹੁੰਦੇ। ਸਮੇਂ ਦੇ ਅਨੁਸਾਰ, ਬਹੁਤ ਸਾਰੀਆਂ ਗ਼ਲਤੀਆਂ ਨੂੰ ਠੀਕ ਕੀਤਾ ਜਾ ਸਕਦਾ ਹੈ। ਸਾਨੂੰ ਇਹ ਯਾਦ ਰੱਖਣਾ ਚਾਹੀਦਾ ਹੈ ਕਿ ਬਹੁਤ ਸਾਰੇ ਫੈਸਲਿਆਂ ਦੇ ਨਤੀਜੇ ਸਦੀਪਕ ਹੁੰਦੇ ਹਨ। ਅਸੀਂ ਨਹੀਂ ਜਾਣਦੇ ਕਿ ਅਸੀਂ ਕਦੋਂ ਮਰ ਜਾਵਾਂਗੇ, ਅਤੇ ਸਾਡੇ ਤੌਬਾ ਕਰਨ ਦਾ ਮੌਕਾ ਖ਼ਤਮ ਹੋ ਜਾਵੇਗਾ। ਮੌਤ ਤੋਂ ਬਾਅਦ ਅਸੀਂ ਉਨ੍ਹਾਂ ਕੰਮਾਂ ਨੂੰ ਬਦਲ ਨਹੀਂ ਸਕਦੇ ਜਿੰਨਾਂ ਨੇ ਸਾਡੀ ਮੰਜ਼ਿਲ ਨੂੰ ਪ੍ਰਭਾਵਿਤ ਕੀਤਾ ਸੀ, ਨਾ ਹੀ ਉਨ੍ਹਾਂ ਕੰਮਾਂ ਨੂੰ ਜਿੰਨਾਂ ਨੇ ਦੂਸਰਿਆਂ ਨੂੰ ਉਨ੍ਹਾਂ ਦੇ ਫੈਸਲਿਆਂ ਲਈ ਪ੍ਰਭਾਵਿਤ ਕੀਤਾ।

► ਵਿਸ਼ਵਾਸ ਕਥਨਾਂ ਨੂੰ ਘੱਟੋ-ਘੱਟ ਦੋ ਵਾਰ ਮਿਲ ਕੇ ਪੜ੍ਹੋ।

ਹਰੇਕ ਵਿਅਕਤੀ ਸਦਾ ਦੇ ਲਈ ਹੋਂਦ ਵਿੱਚ ਰਹੇਗਾ ਜਾਂ ਤਾਂ ਸਵਰਗ ਦੇ ਵਿੱਚ ਜਾਂ ਨਰਕ ਵਿੱਚ। ਸਵਰਗ ਪਰਮੇਸ਼ੁਰ ਦਾ ਘਰ ਹੈ ਜਿੱਥੇ ਵਿਸ਼ਵਾਸੀ ਅਨੰਦ ਦੇ ਨਾਲ ਉਸਦੀ ਅਰਾਧਨਾ ਕਰਦੇ ਹੋਏ ਉਸਦੇ ਨਾਲ ਰਹਿਣਗੇ। ਸਵਰਗ ਦੇ ਵਿੱਚ ਕੋਈ ਪਾਪ ਨਹੀਂ ਹੈ, ਨਾਂ ਹੀ ਇਸਦੇ ਨਤੀਜੇ ਵੱਜੋਂ ਉੱਥੇ ਕੋਈ ਪੀੜਾ ਹੈ। ਨਰਕ ਸਦੀਪਕ ਹੈ, ਇਸਨੂੰ ਬਦਲਿਆ ਨਹੀਂ ਜਾ ਸਕਦਾ ਅਤੇ ਇਹ ਉਨ੍ਹਾਂ ਸਭਨਾਂ ਦੇ ਲਈ ਕਸ਼ਟਾਂ ਨਾਲ ਭਰਿਆ ਸਥਾਨ ਹੈ ਜੋ ਮਸੀਹ ਦੇ ਦੁਆਰਾ ਆਪਣੇ ਪਾਪਾਂ ਤੋਂ ਨਹੀਂ ਬਚਾਏ ਗਏ ਹਨ। ਨਰਕ ਇੱਕ ਸਦੀਪਕ ਪਰਮੇਸ਼ੁਰ ਦੇ ਵਿਰੁੱਧ ਜਾਣਬੁੱਝ ਕੇ ਕੀਤੇ ਗਏ ਪਾਪਾਂ ਦੀ ਨਿਆਂਇਕ ਸਜ਼ਾ ਹੈ।

(1) ਵਚਨਾਂ ਦੇ ਅਸਾਇਨਮੈਂਟ: ਹਰੇਕ ਵਿਦਿਆਰਥੀ ਨੂੰ ਹੇਠਾਂ ਦਿੱਤੇ ਵਚਨਾਂ ਦੀ ਸੂਚੀ ਵਿੱਚੋਂ ਇੱਕ ਸੌਂਪਿਆ ਜਾਵੇਗਾ। ਅੱਗਲੀ ਕਲਾਸ ਦੇ ਸ਼ੈਸ਼ਨ ਤੋਂ ਪਹਿਲਾਂ, ਤੁਹਾਨੂੰ ਵਚਨ ਨੂੰ ਪੜਣਾ ਚਾਹੀਦਾ ਹੈ ਅਤੇ ਇੱਕ ਪੈਰਾਗ੍ਰਾਫ ਦੇ ਵਿੱਚ ਲਿਖਣਾ ਹੋਵੇਗਾ ਕਿ ਇਹ ਪਾਠ ਦੇ ਵਿਸ਼ੇ ਬਾਰੇ ਕੀ ਕਹਿੰਦਾ ਹੈ।

• ਯਸਾਯਾਹ 5:11-16

• ਮੱਤੀ 5:27-30

• ਲੂਕਾ 16:19-31

• ਪਰਕਾਸ਼ ਦੀ ਪੋਥੀ 22:1-5

• ਪਰਕਾਸ਼ ਦੀ ਪੋਥੀ 22:10-17

(2) ਪ੍ਰੀਖਿਆ: ਤੁਸੀਂ ਅੱਗਲੀ ਕਲਾਸ ਦੀ ਸ਼ੁਰੂਆਤ ਪਾਠ 13 ਦੀ ਪ੍ਰੀਖਿਆ ਦੇ ਨਾਲ ਕਰੋਗੇ। ਤਿਆਰੀ ਦੇ ਲਈ ਪ੍ਰੀਖਿਆ ਦੇ ਪ੍ਰਸ਼ਨਾਂ ਦਾ ਧਿਆਨਪੂਰਵਕ ਅਧਿਐਨ ਕਰੋ।

(3) ਸਿਖਾਉਣ ਦਾ ਅਸਾਇਨਮੈਂਟ: ਆਪਣੀ ਕਲਾਸ ਤੋਂ ਬਾਹਰ ਸਿਖਾਉਣ ਦੀ ਸਮੇਂ ਸਾਰਨੀ ਨੂੰ ਬਣਾਉਣ ਅਤੇ ਇਸਦੇ ਬਾਰੇ ਰਿਪੋਰਟ ਦੇਣ ਨੂੰ ਯਾਦ ਰੱਖੋ।

(1) ਸਵਰਗ ਦੀ ਮੁੱਖ ਕਿਰਿਆ ਕੀ ਹੈ?

(2) ਸਵਰਗ ਦੇ ਵਿੱਚ ਨਾ ਹੋਣ ਵਾਲੀਆਂ ਚਾਰ ਗੱਲਾਂ ਲਿਖੋ।

(3) ਕੌਣ ਸਵਰਗ ਦੇ ਵਿੱਚ ਜਾਵੇਗਾ?

(4) ਵਿਸ਼ਵਾਸੀ ਕਦੋਂ ਸਵਰਗ ਦੇ ਵਿੱਚ ਜਾਂਦੇ ਹਨ?

(5) ਯਿਸੂ ਦਾ ਕੀ ਅਰਥ ਸੀ ਜਦੋਂ ਉਸਨੇ ਕਿਹਾ ਕਿ ਵਿਅਕਤੀ ਆਪਣਾ ਹੱਥ ਵੱਢ ਸੁੱਟੇ?

(6) ਬਾਈਬਲ ਸਾਨੂੰ ਨਰਕ ਦੇ ਬਾਰੇ ਤਿੰਨ ਗੱਲਾਂ ਕੀ ਦੱਸਦੀ ਹੈ?

(7) ਨਰਕ ਸਦੀਪਕ ਕਿਉਂ ਹੈ? ਤਿੰਨ ਕਾਰਨ ਲਿਖੋ।