Lesson 12: კარებების გაღება

► უნდა ვილოცოთ ცოდვილებისთვის? ბიბლიაში სად არის ნათქვამი, რომ ჩვენ ცოდვილებისთვის უნდა ვილოცოთ?

რთულია ბიბლიაში იპოვო მუხლი, რომელიც პირდაპირ ამბობს, რომ უნდა ვილოცოთ ცოდვილთა მოქცევისთვის. მაგრამ ჩვენ იქ ვიპოვით მრავალ მუხლს, რომელიც გვეუბნება, რომ უნდა ვილოცოთ სახარების ეფექტური გავრცელებისთვის (2 თესალონიკელთა 3:1, ეფესელთა 6:19, კოლასელთა 4:4, საქმეების 4:29).

ჩვენ ვიცით, რომ უნდა ვილოცოთ ცოდვილთა მოქცევისთვის, სახარების წარმატებისთვისთვის ლოცვასთან ერთად. ჩვენ გვეთქვა, რომ უნდა ვილოცოთ ყველასთვის, რაც მოიცავს ცოდვილების მოქცევაზე ლოცვასაც (1 ტიმოთეს 2:1). ჩვენ გვეუწყა, რომ შევეცადოთ ადამიანების მონანიებამდე მიყვანას (2 ტიმოთეს 2:25). და მიზანშეწონილი იქნება ამ საკითხში ღვთის დახმარებისთვის ვილოცოთ.

როდესაც ეკლესია თავის საუკეთესო მდგომარეობაშია, მახარებლობა თითქოს სპონტანურად და ბუნებრივად ხდება. საქმეების წიგნშია აღწერილი ეკლესიის პირველ თაობაში, რომ ყველა სიხარულით ავრცელებდა სახარებას.

► სტუდენტმა ჯგუფს უნდა წაუკითხოს საქმეების 2:46-47.

როგორც ჩანს, ეკლესიის თანამოზიარეობა იმდენად ძლიერი და ცოცხალი იყო, რომ ბუნებრივად იზიდავდა სხვებს. ეს გვეუბნება, რომ თუ ეკლესია არ იზიდავს ახალ ხალხს, მისი თანამოზიარეობა არ არის ისეთი ძლიერი, როგორც უნდა იყოს.

► სტუდენტმა ჯგუფს უნდა წაუკითხოს საქმეების 5:42.

მოციქულები და სხვებიც, ყველგან და ყოველთვის პოულობდნენ სახარების გაზიარების შესაძლებლობებს. ზოგიერთი ეკლესია არ მახარებლობს და არ იციან ეს საიდან და როგორ დაიწყონ. მათ არ იციან როგორ იპოვონ შესაძლებლობები სახარების გავრცელებისთვის.

► სტუდენტმა ჯგუფს უნდა წაუკითხოს საქმეების 8:1-4.

დევნის გამო ბევრმა ქრისტიანმა დატოვა იერუსალიმი და საცხოვრებლად სხვა ადგილებში გადაიხვეწა. ისინი უზიარებდნენ სახარებას ყველას იმ ადგილებში, სადაც წავიდნენ. მათთვის სახარების გაზიარება ქრისტიანული ცხოვრების ნაწილი იყო.

თქვენ უნდა მოერიდოთ კამათს სხვა ეკლესიებზე, დაუხსნელი ადამიანების თანდასწრებით. ეცადეთ, არ გააკრიტიკოთ სხვა ეკლესიები, როდესაც სახარებას უზიარებთ. დაუხსნელ ადამიანებს არ აქვთ სათანადო სულიერი გამჭრიახობა, რომ რელიგიურ დავებში სწორი დასკვნები გამოიტანონ. ქვეყნიერებაზე ბევრი ადამიანი ამბობს, რომ ეკლესიებს შორის კონფლიქტი არის მიზეზი, რის გამოც მათ არ სწამთ ქრისტიანობის.

თუ ვინმე დაჟინებით კითხულობს მოძღვრებისეულ განსხვავებებს, გაეცით პასუხები წმიდა წერილებიდან, მაგრამ ეცადეთ დაანახოთ მას სახარების უპირატესობა. თქვენ შეგიძლიათ თქვათ: „ასეთი კითხვები მნიშვნელოვანია, მაგრამ ყველაზე მნიშვნელოვანი ის არის, რომ გადარჩე და ღმერთთან გქონდეს ურთიერთობა.” თუ ისინი გეტყვიან ქრისტიანზე, რომელსაც იცნობენ, შესაძლოა ნათესავზე ან პასტორზე, შეეცადეთ არ გააკრიტიკოთ ამ ადამიანის სწავლება.

თუ თქვენ უნდა ახსნათ, თუ რატომ განსხვავდება თქვენი ეკლესია სხვებისგან, შეგიძლიათ თქვათ: „ადამიანისთვის მნიშვნელოვანია, მოინანიოს ცოდვა, იყოს ნაპატიები და იცხოვროს ღმერთის მორჩილებაში. ჩვენი ეკლესია ხაზს უსვამს ამ პრიორიტეტს, ამიტომ ჩვენ განვსხვავდებით ეკლესიებისგან, რომლის პრიორიტეტები სხვა რამეში მდგომარეობს.”

ზოგიერთ ქრისტიანს ეშინია სახარების გაზიარების, რადგან ეშინია რთული კითხვების. კარგია სწავლის გაგრძელება, მაგრამ ფაქტია, რომ ქრისტიანთა უმეტესობამ არ იცის როგორ უპასუხოს ყველა რთულ კითხვას. თქვენ არ გჭირდებათ ყველა პასუხის ცოდნა.

თუ ვინმე სვამს კითხვას, რომელსაც ვერ უპასუხებთ, შეგიძლიათ თქვათ მსგავსი რამ: „მე არ ვიცი ამ კითხვაზე ზუსტი პასუხი. ვინმე ჩვენს ეკლესიაში შეიძლება დაგვეხმაროს ამაში. მაგრამ მე მჯერა ბიბლიის და მჯერა, რომ ყველაზე მნიშვნელოვანი ღმერთის შეცნობა და გადარჩენაა. მე ვიცი, როგორ შეიძლება მიიღოთ გადარჩენა.”

თუ ადამიანი ამბობს: „მე არ მჯერა ბიბლიის“ ან „მე არ მჯერა ღმერთის“, ამ საუბრის ორი განსხვავებული მიმართულება შეიძლება გქონდეთ. თქვენ შეგიძლიათ ჰკითხოთ მას, მისი ამ მოსაზრების მიზეზების შესახებ და სცადოთ მას რაიმე მტკიცებულება მისცეთ. მეორე მიმართულება არის, რომ უთხრათ „თქვენ ალბათ გიფიქრიათ ამაზე და ცდილობდით ლოგიკურ დასკვნამდე მისულიყავით. მაგრამ მაშინაც კი, თუ თქვენ არ გჯერათ ბიბლიის, როგორც გონივრულ ადამიანს, გსურთ იცოდეთ ბიბლიის ძირითადი გზავნილი. შემიძლია გაჩვენოთ რას წარმოადგენს ის?” ამით თქვენ შეგიძლიათ გააზიაროთ სახარება კამათის გარეშე. ღმერთს შეუძლია გამოიყენოს გზავნილი მასზე შემდგომში ზემოქმედებისთვის.

როდესაც სახარებას აზიარებთ, შეიძლება შეხვდეთ ადამიანს, რომელსაც უბრალოდ კამათი სურს. თქვენ უნდა მოერიდოთ მასთან დიდი დროის დაკარგვას. მაშინაც კი, თუ ყველაფერს სწორად ამბობ, ის ალბათ სიმართლეს მაინც არ მიიღებს. შეეცადეთ გაუზიაროთ სახარების საფუძვლები, შემდეგ სხვასთან საუბრით გააგრძელეთ.

► წაიკითხეთ ტიტეს 1:9-11. რა მოსაზრებაა მოცემული ამ მონაკვეთში იმის თაობაზე, რომ ჩვენ უნდა დავიცვათ სახარება?

ერთ-ერთი უნარი, რომელიც უნდა განავითაროს პასტორმა, არის ქრისტიანული ჭეშმარიტების დაცვის უნარი ამქვეყნიური ფილოსოფიებისგან. აქ საუბარია არა სხვადასხვა ეკლესიებს შორის მოძღვრების შესახებ კამათზე, არამედ ქვეყნიერების მიერ სახარების მიმართ წინააღმდეგობაზე.

მიზეზი, რის გამოც ჭეშმარიტება უნდა დავიცვათ, არის არა მხოლოდ იმის მცდელობა, რომ მოექცეს ის ადამიანი, რომელიც კამათობს, არამედ დავეხმაროთ მათ, ვინც მისი ზეგავლენის ქვეშაა. ბევრს ჯერ არ გადაუწყვეტია რისი სჯეროდეს. მათ უნდა მოისმინონ ქრისტიანული ჭეშმარიტების დაცვა.

ქრისტიანთა უმეტესობა ბოლომდე არ არის მზად ამ ტიპის კამათისთვის. ყველა ქრისტიანმა უნდა ისწავლოს რაც შეიძლება მეტი, მაგრამ ზოგი განსაკუთრებით ნიჭიერი და მომზადებულია ამ საქმისთვის.

კამათის დროს მნიშვნელოვანია აჩვენოთ თქვენი მიზანი. თქვენ შეჯიბრის მოგებას არ ცდილობთ. თქვენ არ ებრძვით ადამიანს, როგორც პირად მტერს. უნდა აჩვენოთ, რომ სიმართლე მნიშვნელოვანია თქვენთვის, რადგან ზრუნავთ ადამიანებზე. თუ მას არ სწამს სახარების, მისი სული დაიღუპება. ამიტომაც გსურთ მისი აზროვნების შეცვლა. შეგიძლიათ თქვათ ამის მსგავსი რამ: „მინდა, რომ შეიცნო ღმერთი და გადარჩე და მეშინია, რომ გჯერა რაღაცის, რაც ღმერთთან არ მიგაახლოვებს.”

ჩვენ გვაქვს რამდენიმე ჩანაწერი ბიბლიაში იმ პერიოდების შესახებ, როდესაც მახარებელმა იპოვა სახარების გაზიარების განსაკუთრებული შესაძლებლობა.

► სტუდენტმა ჯგუფს უნდა წაუკითხოს საქმეების 8:26-39. მეორე სტუდენტს სთხოვეთ შეაჯამოს მოთხრობილი ისტორია. როგორ მოქმედებდა ღვთის სული ამ მოვლენებისას? როგორ მიხვდა ფილიპე, რომ სახარების გაზიარების შესაძლებლობა ჰქონდა?

მახარებლის კიდევ ერთი მაგალითი, რომელიც ხვდებოდა სახარების გაზიარებისთვის ხელსაყრელ შესაძლებლობებს, იყო თავად იესო.

► სტუდენტმა ჯგუფს უნდა წაუკითხოს იოანეს 4:7-14. მეორე სტუდენტს სთხოვეთ შეაჯამოს მოთხრობილი ისტორია.

იესოსა და სამარიელ ქალს შორის შემდგარი საუბარი შეეხებოდა ეთნიკური კონფლიქტების, რელიგიური კამათის და ყოველდღიური ცხოვრებისეული პასუხისმგებლობის თემებს. იესოს დიდი დრო არ დაუთმია ამ თემებისთვის, არამედ წარმართა საუბარი ქალის სულიერი მოთხოვნილებების თემისკენ.

როდესაც ისწავლით, როგორ უნდა წარადგინოთ სახარება, თქვენ მოძებნით შესაძლებლობებს, რომ გაუზიაროთ ის ხალხს. ზოგჯერ შეიძლება ვინმემ თავად ითხოვოს სახარების მოსმენა, მაგრამ შესაძლებლობები, როგორც წესი, არც ისე აშკარაა.

ზოგიერთი ქრისტიანი ფიქრობს, რომ ძნელია სახარების გაზიარება, რადგან ფიქრობს, რომ ხალხს არ აინტერესებს მისი მოსმენა. მათი აზრით, რთულია რელიგიაზე საუბრის დაწყება.

სახარება ეხება ბევრ საზრუნავს, რაც ადამიანებს აქვთ. აქედან გამომდინარე, სახარების საუბარში ჩართვა არ არის რთული.

ამ გაკვეთილზე შემდგომში ჩვენ ვისაუბრებთ იმ მიზეზებზე, თუ რატომ არიან ადამიანები სახარებით დაინტერესებულნი.

ადამიანებს ხსნის შეთავაზებაზე რეაგირების სხვადასხვა მოტივი აქვთ. ზოგჯერ არის არასწორი მოტივები, მაგრამ არის ბევრი სწორი მოტივიც.

► რა იყო სახარების მიღების მიზეზი თქვენთვის? მიეცით საშუალება რამდენიმე სტუდენტს დაამოწმონ და აღწერონ მოქცევის საკუთარი მიზეზები.

აქ არის სხვადასხვა მოტივები, რომლებიც ადამიანებს გადარჩენის სურვილს უჩენს.

• სამოთხეში წასვლა და არა ჯოჯოხეთში (ან განკითხვის შიში)

• რომ ჰქონდეთ კმაყოფილება და ცხოვრებისეული მიზნები

• რომ ჰქონდეთ უსაფრთხოება, სიმშვიდე, შიშისგან თავისუფლება

• რომ ჰქონდეთ პატიება, დანაშაულისგან თავისუფლება (სუფთა სინდისი)

• რომ იყვნენ სულიერად მთლიანი და სუფთა

• რომ ჰქონდეთ ღმერთთან თანაზიარება (შეიცნონ ღმერთი)

• რომ ჰქონდეთ ქრისტიანებთან ურთიერთობა

• რომ ჰქონდეთ სულიერი სურვილების დაკმაყოფილება (ნამდვილი ბედნიერება)

• რომ იყვნენ ცოდვისგან განთავისუფლებულები

• რომ იცოდნენ ჭეშმარიტება

ეს არის ღმერთთან შერიგების პირდაპირი უპირატესობები. ეს არ არის ამქვეყნიური საზრუნავი, რომელიც ეწინააღმდეგება მარადიულ ღირებულებებს. ეს ყველაფერი აკლია ადამიანს, თუ ის განშორებულია ღმერთს.

► გადახედეთ ამ სიას და დაფიქრდით, რომელია თქვენთვის მნიშვნელოვანი. რომელი მათქანი გიზიდავდათ, სანამ მოექცეოდით? რომელი გახდა თქვენთვის მნიშვნელოვანი მობრუნების შემდეგ?

დაუხსნელმა ადამიანმა შეიძლება წარმოაჩინოს თავის საუბარში, რომ გრძნობს ხსნის ერთ-ერთი ამ უპირატესობის საჭიროებას. მახარებელს შეუძლია მოარგოს თავისი მიდგომა სახარების გაზიარებისადმი ამ საჭიროების დასაკმაყოფილებლად. თქვას: „მიზეზი, რის გამოც ადამიანებს არ აქვთ ხსნა არის ის, რომ ისინი განშორებულნი არიან ღმერთს. ბიბლია გვეუბნება, როგორ დავუბრუნდეთ ღმერთთან ურთიერთობას.”

მნიშვნელოვანია დავრწმუნდეთ, რომ არ ვპირდებით მიწიერ ბედნიერებას არც ერთ ადამიანს, რომელიც ქრისტიანი გახდება. ადამიანი, რომელიც ამ მიზეზით გადაწყვეტს გახდეს ქრისტიანი, დიდი ალბათობით, სინამდვილეში არ ინანიებს ცოდვას და შესაბამისად, ვერ მიიღებს ხსნისგან სარგებელს. კიდევ ერთი მიზეზი, რის გამოც არ უნდა დავპირდეთ მიწიერ ბედნიერებას, არის ის, რომ ბიბლია ქრისტიანს არ პირდება კარგ სიტუაციებს; პირიქით, ის პროგნოზირებს დევნას (2 ტიმოთეს 3:12).

ყველაზე მნიშვნელოვანი მიზეზი იმისა, რომ ადამიანი გახდეს ქრისტიანი, არის ის, რომ მან გააცნობიეროს თავისი დანაშაული და მომავალი განკითხვა. ზემოთ ჩამოთვლილი სხვა მიზეზები შეიძლება გამოყენებულ იქნას, რათა დაეხმაროს ადამიანს გააცნობიეროს, რომ ის დაშორებულია ღმერთს.

► რა საშუალებები გამოიყენეთ სახარების გაზიარების შესაძლებლობის მისაღებად?

► რომელიმე თქვენგანს ხომ არ მოეჩვენა, რომ რთულია სახარების გაზიარების შესაძლებლობის პოვნა? როგორ ფიქრობთ, რა არის ამის მიზეზი?

ზოგჯერ შესაძლებლობა იოლად მოდის. ასეთ შემთხვევებში შეგიძლიათ უბრალოდ დაიწყოთ სახარების განმარტება. თუ გსურთ აჩვენოთ მათ წმიდა წერილების მუხლები, შეგიძლიათ ჰკითხოთ: „თუ შეიძლება თქვენი დროის რამდენიმე წუთს გამოვიყენებ, რომ გაჩვენოთ, რას ამბობს ბიბლია, თუ როგორ უნდა გახდეთ ქრისტიანი?” თუ გსურთ აჩვენოთ ხიდის ნახატი, შეგიძლიათ ჰკითხოთ: „თუ შეიძლება თქვენი დროის ორ წუთს გამოვიყენებ, რომ გაჩვენოთ ნახატი, რომელიც ასახავს იმას, რასაც ბიბლია ამბობს, რომ ეს არის საშუალება, დანამდვილებით იცოდეთ, რომ დახსნილი ხართ?"

შესაძლებლობების ფანჯარა ჩნდება სხვადასხვა თემებზე საუბრებში. აქ აღწერილი ნებისმიერი, საუბარში გახსნილი შესაძლებლობის ფანჯარა შეიძლება გამოყენებულ იქნას ხიდის ნახატის ან სახარების წმიდა წერილებიდან წარდგენისთვის, როგორიცაა რომაული გზა.

► რამდენს გაუგია ადამიანების ჩივილი მათი ცხოვრების მძიმე პირობებზე?

ზოგჯერ ადამიანები ჩივიან ცხოვრების მძიმე პირობების გამო. ჰკითხეთ: „რატომ არის ცხოვრება ასე რთული?” მას შემდეგ, რაც ისინი გიპასუხებენ, უთხარით: „შემიძლია გაჩვენოთ ნახატი, რომელიც ასახავს, რატომ არის ცხოვრება ასე რთული?” დაიწყეთ იმით, რომ ღმერთს სურდა, რომ მასთან ურთიერთობაში გვეცხოვრა და არ სურდა ცხოვრება ისეთი ყოფილიყო, როგორიც არის. ცოდვამ სამყარო დააზიანა. გადადით ნახატის პრეზენტაციაზე.

იმისათვის, რომ წარდგენა გააკეთოთ უშუალოდ წმიდა წერილებიდან, როგორიცაა რომაული გზა, შეგიძლიათ თქვათ: „ბიბლია განმარტავს, რომ ცხოვრება რთულია, რადგან ყველამ შესცოდა. ცოდვამ სამყაროში წყევლა მოიტანა“. გააგრძელეთ რომაული გზის გავლით.

თუ ადამიანი რელიგიურია, შეგიძლიათ ჰკითხოთ, რაში მდგომარეობს მისი ყველაზე მნიშვნელოვანი რწმენა. ან შეგიძლიათ ჰკითხოთ: „რას ფიქრობთ, როგორ შეუძლია ადამიანს გაიგოს, ის სამოთხეში მოხვდება თუ არა?” მისი პასუხის მოსმენის შემდეგ, უთხარით: „თუ შეიძლება თქვენი დროის ორ წუთს გამოვიყენებ, რომ გაჩვენოთ ნახატი, რომელიც ასახავს რას ამბობს ბიბლია იმის შესახებ, თუ როგორ შეუძლია ადამიანს სამოთხეში მოხვედრა?"

► გსმენიათ ხალხის საუბარი მსოფლიოს ცუდ მდგომარეობაზე ან ქვეყნის შიდა პრობლემებზე? როგორ გამოიყენებდი ამას სახარების გასაზიარებლად?

თუ ადამიანი საუბრობს ქვეყნის პრობლემებზე, მსოფლიოში შიმშილზე ან სიღარიბეზე ან ომის საშიშროებაზე, ჰკითხეთ: „შემიძლია გაჩვენოთ წმიდა წერილში რამდენიმე ადგილი, რომელიც განმარტავს, თუ რატომ არის სამყარო ასეთი?”

აჩვენეთ, რომ სამყაროს მდგომარეობა იმიტომ არის ასეთი, რადგან ცოდვილები განშორებულნი არიან ღმერს. ნუ იგულისხმებთ, რომ ხსნა მყისიერად გადაწყვეტს ყველა პრობლემას, არამედ აჩვენეთ, რომ ინდივიდუალური ხსნა არის ღმერთის მიერ ყველაფრის მოწესრიგების დასაწყისი. ოდესმე იქნება ახალი ცა და დედამიწა და ეს პრობლემები აღარ იარსებებს მათთვის, ვინც ახლა შეურიგდა ღმერთს.

კითხვები შეიძლება გამოყენებულ იქნას საუბრის დასაწყებად, შემდეგ კი საუბარში გაჩნდება შესაძლებლობა სახარების გაზიარებისთვის.

უმარტივესი კითხვაა უბრალოდ იკითხო: „ქრისტიანი ხარ?” ადამიანების უმეტესობა არ განაწყენდება კითხვაზე. თუ ადამიანი ამბობს: „არა“, შეგიძლიათ ჰკითხოთ: „შემიძლია გითხრათ, რას ამბობს ბიბლია იმის შესახებ, თუ როგორ ხდება ადამიანი ქრისტიანი?”

თუ ადამიანი ამბობს: „დიახ, მე ქრისტიანი ვარ“, შეგიძლიათ თქვათ: „ეს მშვენიერია. როგორ გახდი ქრისტიანი?” თუ პასუხი არასწორია ან ადამიანი დაბნეულია, შეგიძლიათ შესთავაზოთ ახსნა, რას ამბობს ბიბლია იმის შესახებ, თუ როგორ ხდება ადამიანი ქრისტიანი.

ზემოთ მოცემულ განყოფილებაში მოცემული კითხვები შეიძლება გამოყენებულ იქნას როგორც სხვა საწყისი კითხვები საუბრის დროს. ქვემოთ მოცემულია კიდევ რამდენიმე კითხვა.

„როგორ ფიქრობთ, რა არის ცხოვრების მიზანი?” მიეცით საშუალება ადამიანს თავისი აზრი გამოთქვას. დაეთანხმე მას, მის კარგ განცხადებებში. შემდეგ უთხარით: „ჩვენი ცხოვრებისეული მიზნის ყველაზე მნიშვნელოვანი ნაწილი ღმერთის შეცნობაა. მან შეგვქმნა, რომ მასთან ურთიერთობაში გვეცხოვრა. შემიძლია გაჩვენოთ რას ამბობს ბიბლია ღმერთთან ურთიერთობის შესახებ?”

„როგორ ფიქრობთ, რა არის ბედნიერების გასაღები?” რა მოსაზრებაც არ უნდა წარმოადგინონ, შეგიძლიათ უთხრათ: „ბევრი ადამიანი, ვისაც ეს აქვს, დიდი ხნის განმავლობაში არ არის ბედნიერი. ბიბლია გვეუბნება, რომ სიხარული ღვთისგან მოდის (ფსლმუნის 15:11). შემიძლია გაჩვენოთ ნახატი, რომელიც ასახავს, თუ როგორ შეუძლია ადამიანს ღმერთთან ურთიერთობა?”

„გჯერათ სიკვდილის შემდეგ სიცოცხლის? როგორ ფიქრობთ, როგორია ის?” შემდეგ, „ბიბლია ამბობს, რომ თითოეული ადამიანი წავა სამოთხეში ან ჯოჯოხეთში. შემიძლია გაჩვენოთ, რას ამბობს ბიბლია, როგორ არის შესაძლებელი სამოთხეში მოხვედრა?”

„როგორ ფიქრობთ, რა არის ბიბლიის ძირითადი გზავნილი?” ეს გაძლევთ საშუალებას აჩვენოთ ნახატი მე-9 გაკვეთილიდან.

► ვინმემ უკვე გამოიყენა მსგავსი მიდგომა? როგორ იმუშავა ამან?

ყველა სტუდენტისთვის არ იქნება კომფორტული ამ გაკვეთილში აღწერილი ყველა მეთოდის გამოყენება. შესაძლებელია, რომ მეთოდი არ იყოს შესაფერისი ყველა კულტურისთვის.

გაკვეთილის მიზანია დაეხმაროს სტუდენტს საკუთარი მიდგომის განვითარების გზის პოვნაში.

შემდეგი გაკვეთილი მოიცავს მითითებებს სახარების ბროშურების გავრცელებისთვის. სტუდენტებმა უნდა იცოდნენ, სად მიიღონ ბროშურები გასავრცელებლად. თუ შესაძლებელია, მიიტანეთ მარაგი მომდევნო მეცადინეობაზე.

როდესაც ამ კვირაში გექნებათ სახარების გაზიარების საშუალება, სცადეთ ამ შესავალი კითხვებიდან რამდენიმეს გამოყენება ან განავითარეთ საკუთარი. დააკვირდით როგორ იმუშავებენ ისინი და დაწერეთ მათი აღწერის აბზაცი. იყავით მზად, რომ გაუზიაროთ თქვენი გამოცდილების შესახებ მომდევნო მეცადინეობაზე.