► სტუდენტმა ჯგუფს უნდა წაუკითხოს 1 კორინთელთა 1:17-25. როგორი მეთოდი აქვს ღმერთს დაკარგულის გადასარჩენად?

ებრაელები ეძებდნენ ძალას თავიანთი ერის გადასარჩენად. მათ სურდათ ძალაუფლების გზავნილი თავისი ნიშნებით, რათა დაემტკიცებინათ, რომ ის იმუშავებდა.

წარმართებს სურდათ სიბრძნე ამ ცხოვრების გასაგებად და ქვეყნიერებაზე წარმატებისთვის. მათ უნდოდათ გზავნილი, რომელიც ახსნიდა, თუ როგორ მიეღოთ ის, რაც სურდათ.

ჯვარი გამოხატავდა ღმერთზე მინდობას და მსხვერპლს. ებრაელებმა, რომლებსაც სურდათ ძალა, ეს სისუსტედ მიიჩნიეს. წარმართებმა, რომლებსაც სურდათ ამქვეყნიური სიბრძნე, ეს სისულელედ მიიჩნიეს. სინამდვილეში, ღვთის ძალა და სიბრძნე გამოვლინდა ქრისტეს სიკვდილში. ჯვარი ღვთის სისუსტედ და სისულელედ შეიძლება მიიჩნიო, მაგრამ ის უფრო დიდი იყო, ვიდრე ადამიანთა ყველა ძალისხმევა.

სახარების გზავნილი ეწინააღმდეგება კაცობრიობის ბუნებრივ, ცოდვილ სურვილებს. ის მოწოდებაა მონანიებისა და ღვთის მორჩილებისკენ. ის შესაძლოა მიიჩნიოთ სულელურ გზავნილად, რადგან ადამიანებს უნდათ იმის გაგება, თუ როგორ მიიღონ ის, რაც სურთ.

ღმერთმა აირჩია სახარების გამოყენება ხალხის გადასარჩენად. მან მორწმუნეებს ურთიერთობის დავალება მისცა. სიტყვა ქადაგება არ ეხება მხოლოდ ადამიანებს, რომლებიც ესაუბრებიან ხალხს, არამედ სახარების გადაცემას სხვადასხვა ფორმით. ამ მონაკვეთის აზრი არ მდგომარეობს იმაში, რომ საჯარო ქადაგება არის ღვთის რჩეული მეთოდი. საქმე იმაშია, რომ სახარებაა ღვთის მეთოდი.

► რას ნიშნავს ამ მონაკვეთში ნათქვამი სიტყვები, რომ ჯვრის შესახებ ქადაგება სისულელეა მათთვის, ვისაც არ სწამს?

სიტყვა „ქადაგება“ შეიძლება გამოყენებულ იქნას ფართო გაგებით, ღვთის სიტყვის გადაცემის სხვადასხვა ფორმების გამოსახატად. თუმცა, ამ გაკვეთილზე ჩვენ გამოვიყენებთ სიტყვას „ქადაგება" მისი ჩვეულებრივი გაგებით: იმ ადამიანის განსასაზღვრად, რომელიც ლაპარაკობს ღვთის სიტყვას შეკრებილ ხალხთან.

მახარებლური ქადაგებაა, როდესაც სახარება წარედგინება შეკრებილ ხალხს. ეს არ არის მხოლოდ წმიდა წერილის რომელიმე თემის ან მონაკვეთის წარდგენა. ეს სახარების წარდგენაა.

მახარებელი, როგორც წესი, ცდილობს დაარწმუნოს თავისი მსმენელები, რომ დაუყოვნებლივ მოახდინონ რეაგირება უწყებაზე, იმ მიზნით, რომ ისინი დაუყოვნებლივ მოექცნენ. გზავნილი შექმნილია იმისთვის, რომ მათ ამ გადაწყვეტილებისკენ მოუწოდოს.

სახარებისეული გზავნილის ინფორმაცია საგულდაგულოდ არის შერჩეული. გზავნილის მიზანი, პირველ რიგში, განათლება არ არის. მქადაგებელი ცდილობს მიაწოდოს ის ინფორმაცია, რაც მსმენელს სჭირდება მობრუნების გადაწყვეტილების მისაღებად. ეს ინფორმაცია თავისში მოიცავს ძირითადი სახარების განმარტებას, იმას, თუ რა რეაგირება უნდა მოახდინოს მსმენელმა და ასევე, გადაწყვეტილების მიღების შესაძლო შედეგებს.

ქადაგება შეიძლება ჩატარდეს წყნარ, მოწესრიგებულ გარემოში, მაგალითად, ეკლესიის შეკრებაზე ეკლესიის შენობაში, ან ხალხის წინაშე სხვაგან, რომლებიც შეიკრიბნენ სხვა მიზნით. ხალხი შეიძლება იყოს მეგობრული გზავნილის მიმართ, ან შეიძლება არ იყოს.

► რომელ სხვადასხვა ადგილას გინახავთ სახარების ქადაგება?

იმის გამო, რომ არსებობს განსხვავებები ეკლესიაში ქადაგებასა და სხვა ჯგუფის მიმართ ქადაგებას შორის, ჩვენ პირველ რიგში მივცემთ მითითებებს, რომლებიც ეხება მახარებლურ ქადაგებას ეკლესიაში. ამ გაკვეთილის შემდგომ ნაწილში ჩვენ მივცემთ რამდენიმე სახელმძღვანელო მითითებას, რომლებიც ეხება გარე ქადაგებას.

(1) განმარტეთ წმიდა წერილის მონაკვეთი.

ღვთის სიტყვა ძლიერია, ამიტომ მქადაგებელმა უნდა გამოიყენოს ის. არ არის აუცილებელი, რომ მონაკვეთი იყოს გრძელი ან მქადაგებელმა დიდი დრო დაუთმოს მის დეტალების განმარტებას. მან უნდა გამოიყენოს წმიდა წერილი, რომელიც ეხმარება სახარების უწყებას. ის უნდა დარწმუნდეს, რომ მისი ყველაზე მნიშვნელოვანი განცხადებები ეფუძნება წმიდა წერილს, რათა გამოყენებულ იქნას ღვთის სიტყვის ძალა. მან არ უნდა შეარჩიოს მუხლის ნაწილი, რომ გამოიყენოს სხვა მნიშვნელობით იმისგან განსხვავებით, რაც მას აქვს კონტექსტში.

(2) მან უნდა განსაზღვროს ტერმინები მონანიება და რწმენა.

მსმენელს შეიძლება ჰქონდეს არასწორი წარმოდგენები იმის შესახებ, თუ რას ნიშნავს ეს ტერმინები. მათ შეიძლება იფიქრონ, რომ მონანიება ნიშნავს, გაასწორო შენი ცხოვრება ისე, რომ ღმერთმა მიგიღოს. მათ უნდა იცოდნენ, რომ მონანიება ნიშნავს იმდენად წუხილს შენი ცოდვების გამო, რომ მზად ხარ მათგან განთავისუფლდე.

მსმენელებმა შეიძლება იფიქრონ, რომ რწმენა ნიშნავს რელიგიის რწმენას ან რელიგიური წეს-ჩვეულებების შესრულებას. მათ უნდა იცოდნენ, რომ გადარჩენის რწმენა არის, მთლიანად მიენდო ქრისტეს გამოსყიდვას გადარჩენისთვის.

(3) ხაზგასმა იმაზე, რომ ადამიანი ქრისტიანი ხდება მოქცევის მომენტში.

ბევრ ადამიანს აქვს არასწორი წარმოდგენა იმის შესახებ, თუ რას ნიშნავს იყო ქრისტიანი და როგორ ხდება ადამიანი ქრისტიანი. მათ შეიძლება ჩათვალონ, რომ მქადაგებელს უბრალოდ სურს, რომ ისინი უფრო რელიგიურები, ან მისი ეკლესიის ნაწილი გახდნენ. მათ შეიძლება იფიქრონ, რომ მას უბრალოდ სურს, რომ დაიწყონ უფრო მკაცრი ცხოვრება. ხაზგასმით აღნიშნეთ, რომ მოქცევის დროს ცოდვილი ინანიებს, იღებს პატიებას და იწყებს პირად ურთიერთობას ღმერთთან.

(4) არასწორი მიზეზების უარყოფა, რის გამოც ადამიანები საკუთარ თავს ქრისტიანებს უწოდებენ.

ზოგიერთ საზოგადოებაში ადამიანების უმეტესობა ფიქრობს, რომ ისინი ქრისტიანები არიან. მათ შეიძლება იფიქრონ, რომ ქრისტიანები არიან, რადგან იყვნენ ეკლესიაში, აკეთებდნენ სიკეთეს, სჯეროდათ გარკვეული რაღაცების ან ჰქონდათ რაიმე სულიერი გამოცდილება. მოქცევაზე ხაზგასმის გარდა, აღწერეთ ღმერთთან ურთიერთობაში ცხოვრება და მორჩილება, რომელიც მოჰყვება მონანიებას.

(5) დარწმუნდით, რომ არაეკლესიური ადამიანები გაგიგებენ.

არ გამოიყენოთ ტერმინები, რომლებიც მხოლოდ რელიგიურმა ადამიანებმა იციან. ნუ მიმართავთ რელიგიურ წეს-ჩვეულებებს, რომლებიც მათ არ ესმით.

► რა ტერმინები გამოიყენება თქვენს ეკლესიაში, რომელიც შეიძლება არ ესმოდეს თქვენს გარშემო საზოგადოებას?

(6) შესთავაზეთ პატიება, ღმერთთან ურთიერთობა და მარადიული სიცოცხლე.

ეს არის გადარჩენის ყველაზე მნიშვნელოვანი სარგებელი. აჩვენეთ ცოდვილის მდგომარეობის სერიოზულობა განკითხვისა და მარადიული სასჯელის აღწერით, რომელიც დაატყდებათ ცოდვილებს.

(7) მოერიდეთ ისეთი სარგებლის დაპირებას, რომლის შესახებაც არაფერს ამბობს სახარება.

თუ ადამიანები იფიქრებენ, რომ ხსნის შეთავაზება მოიცავს მატერიალურ სარგებელს ღმერთის ან ეკლესიისგან, კეთილდღეობას, ავადმყოფობისგან განკურნებას ან სხვა სახის ცხოვრებისეული მდგომარეობის გაუმჯობესებას, ისინი შეიძლება შეეცადონ მიიღონ სარგებელი ნამდვილად მონანიების გარეშე.

თქვენ შეგიძლიათ აუხსნათ, რომ როდესაც ადამიანის ცხოვრებას ღმერთი აკონტროლებს, ის უხელმძღვანელებს, აკურთხებს და დაეხმარება მათ პრობლემებში. თუმცა, არ უნდა დავპირდეთ, რომ მათი ყველა პრობლემა მოგვარდება, თუ ისინი გახდებიან ქრისტიანები. ზოგიერთი ადამიანისთვის შესაძლოა ცხოვრება გართულდეს დევნის გამო.

(8) არ დააკავშიროთ მოქცევა ადგილობრივი ეკლესიის წევრობასთან.

ეკლესიის წევრობა ხელმისაწვდომი უნდა იყოს, როგორც კი ადამიანი ჭეშმარიტად გარდაიქმნება, მაგრამ წევრობის პირობები უნდა განიმარტოს მოქცევის შემდეგ. ნუ ისაუბრებთ ეკლესიის წევრობის მოთხოვნებზე, როდესაც ცდილობთ დაარწმუნოთ ადამიანი, მოინანიოს ცოდვები. მახარებელმა ყურადღება უნდა გაამახვილოს იმაზე, რომ მსმენელი ღმერთთან შეხვედრაზე მიიყვანოს.

► რა მოთხოვნებია თქვენი ეკლესიის წევრობისთვის, რომლებიც არ არის აუცილებელი გადარჩენისთვის?

(9) არ დააყენოთ მოთხოვნები მოქცევისთვის, რომლებიც მოყვება გამოცდილებას.

მოუწოდეთ მსმენელს, მოინანიოს ის ცოდვები, რომლებსაც იაზრებს. ნუ ეტყვით მას ცხოვრებისეული დეტალების წესების შესახებ, რომლებსაც ვერ გაიგებს, სანამდე გარკვეული ხნის განმავლობაში ქრისტიანი არ იქნება. მონანიებისა და რწმენისკენ მოწოდება საკმაოდ რთულია. ნუ დაამატებთ სირთულეებს, რამაც შეიძლება აიძულოს ადამიანი უარყოს სახარება.

(10) აუხსენით რა გსურთ მათ რომ გააკეთონ.

ნუ იფიქრებთ, რომ მსმენელმა იცის, რომ უნდა ილოცოს და ღმერთს პატიება სთხოვოს. ნუ იფიქრებთ, რომ მან იცის, როგორ უნდა მივიდეს და მუხლი მოიყაროს. როდესაც მსმენელებს რეაგირებისთვის მოიწვევთ, ზუსტად აუხსენით, რა გსურთ, რომ მათ გააკეთონ. დაფიქრდით, როგორ გაუადვილოთ მორცხვ ადამიანს საეკლესიო გარემოში ადაპტირება.

ხალხმა კათედრასთან სალოცავად მრავალი მიზეზის გამო შეიძლება მოიყაროს თავი. ზოგჯერ პასტორი იწვევს ხალხს ილოცონ სხვადასხვა საჭიროებებზე. აქ ჩამოთვლილი მითითებები სულაც არ ეხება კათედრასთან ლოცვისთვის ყველა შემთხვევას. ეს მითითებები ვრცელდება მათთან ერთად ლოცვისას, ვინც პასუხობს მოწვევას მახარებლური ქადაგების შემდეგ.

პასტორი დარწმუნებული უნდა იყოს, რომ ეკლესიაში არიან მომზადებული ადამიანები, რომლებიც დაეხმარებიან მათ, ვინც ლოცულობენ გადარჩენისთვის. მას უნდა ჰყავდეს ასეთი ხალხი მზად, რათა დაეხმარონ, როდესაც ის მონანიებისკენ მოუწოდებს ხალხს.

ზოგჯერ ადამიანი, რომელსაც სურს დაეხმაროს ხალხს ერთად ლოცვაში, დახმარების ნაცვლად არის დაბრკოლება. პასტორი უნდა აკვირდებოდეს კათედრასთან არსებულ პრობლემებს და მზად იყოს დახმარებისთვის. თუ კათედრასთან ლოცვის დროს ვინმე, უგუნური საქციელით ან არასწორი რჩევით დაბრკოლებას ქმნის, პასტორმა უნდა გააკეთოს ყველაფერი, რაც საჭიროა, პრობლემის გამოსასწორებლად.

ჩვენ გვჯერა, რომ ადამიანს შეუძლია მოინანიოს, ირწმუნოს და მაშინვე განიცადოს მობრუნება. ეს რწმენა ხელმძღვანელობს ჩვენს პოლიტიკას მაძიებლებთან ერთად ლოცვის მიმართ.

(1) მინიმუმ ერთი გამოცდილი მორწმუნე უნდა დაეხმაროს თითოეულ მაძიებელს, რომელიც ლოცულობს.

არ დატოვოთ მაძიებელი ლოცვაში მარტო და არ დატოვოთ კათედრა დახმარების გარეშე. ჩვენ გვინდა, რომ მაძიებელი მივიდეს გარკვეულ გამარჯვებამდე.

(2) გაარკვიეთ, რატომ ლოცულობს მაძიებელი.

ნუ იფიქრებთ, რომ ის გადარჩენისთვის ლოცულობს. მახარებლური ქადაგების შემდეგაც კი, ხალხი კათედრასთან მიდის სხვადასხვა მიზეზის გამო. ნუ შეაწყვეტინებთ ლოცვას მაძიებელს; მაგრამ რაღაც მომენტში, მორწმუნემ, რომელიც მას ეხმარება, უნდა ჰკითხოს: „რა გინდა, რომ ღმერთმა გააკეთოს შენთვის?” შემდეგ მორწმუნეს შეუძლია მასთან ერთად ილოცოს ნებისმიერი საჭიროების შესახებ.

(3) წაახალისეთ მაძიებელი სრული მონანიებისკენ.

ჰკითხეთ: „გსურთ მოინანიოთ ცოდვა და ნება მისცეთ ღმერთს გიხსნათ ცოდვისაგან?” წაახალისეთ ის, მოინანიოს ღვთის წინაშე. არ არის აუცილებელი, რომ მან აღიაროს თავისი ცოდვები პასტორთან ან სხვა პირთან, გარდა იმ შემთხვევისა, როდესაც ამ ადამიანთა მიმართ არის ჩადენილი კონკრეტული დანაშაული.

(4) დაარწმუნეთ მაძიებელი, რომ ღმერთი აპატიებს.

უთხარი მას, რომ სთხოვოს ღმერთს პატიება და ენდოს ღვთის აღთქმას, რომ ის მას აპატიებს. თუ ფიქრობთ, რომ ის ეჭვს ებრძვის, აჩვენეთ ბიბლიური აღთქმები (1 იოანეს 1:9, იოანეს 3:16, რომაელთა 5:8).

თუ მაძიებელს არ შეუძლია საკუთარი სიტყვებით ლოცვა, დამხმარემ შეიძლება შესთავაზოს დახმარება ლოცვაში, რასაც მაძიებელი გაიმეორებს. ეს შეიძლება იყოს მსგავსი ლოცვა:

„უფალო, ვიცი, რომ ცოდვილი ვარ და მარადიულ სასჯელს ვიმსახურებ. მე ვწუხვარ ჩემი ცოდვების გამო და მზად ვარ მივატოვო ისინი. გთხოვ, მაპატიო - არა იმიტომ, რომ მე ამას ვიმსახურებ, არამედ იმიტომ, რომ იესო მოკვდა ჩემთვის. მადლობა გადარჩენისთვის. ამ დროიდან შენთვის ვიცოცხლებ."

როგორც წესი, თუ მაძიებელს უჭირს გარკვეული გამარჯვებისთვის ლოცვა, არის ცოდვა, რომლის დათმობაც არ სურს. მას არ შეუძლია ჰქონდეს პატიების რწმენა, სანამ გულწრფელად არ მოინანიებს.

(5) სთხოვეთ მოქცეულს დაამოწმოს.

თუ მაძიებელი მიიჩნევს, რომ გამარჯვებას მიაღწია, ვინმემ უნდა ჰკითხოს მას: „რა გააკეთა ღმერთმა შენთვის?” წაახალისეთ ის გარკვეული განცხადებების გაკეთებაში. მან შეიძლება დაამოწმოს მრევლის წინაშე, მაგრამ სულ მცირე, მათ მაინც უნდა უთხრას, ვინც მასთან ერთად ლოცულობდა.

(6) მიეცით გადარჩენის დაბეჭდილი გამნარტება.

მოქცეულს უნდა მიეცეს ხსნის შესახებ დაბეჭდილი განმარტება, რომ შეეძლოს მისი თან წაღება. მასში უნდა იყოს გამნარტება ხსნის შესახებ. ეს დაეხმარება მას იმის გაგებაში, თუ რა მოხდა და ასევე დაეხმარება მას, განუმარტოს ამის შესახებ სხვებსაც.

(7) მოწაფეობის პირველი ნაბიჯის ორგანიზება.

მოწაფეობის პირველი ნაბიჯი, როგორც წესი, პასტორთან ან გამოცდილ მორწმუნესთან შეხვედრაა. დარწმუნდით, რომ მოქცეულს ესმის, რა დაემართა მას. ამის შემდეგ ის შეიძლება შეუერთდეს მცირე ჯგუფს ან რეგულარულად შეხვდეს ვინმეს, ვინც მასზე სულიერად იზრუნებს.

ვინმემ ასევე უნდა მოინახულოს მისი ოჯახი, დარწმუნდეს, რომ მათ იცოდნენ მოქცევის შესახებ და მოიწვიონ ისინი ეკლესიაში. იქ შესაძლოა, მათთვის სახარების გაზიარების შესაძლებლობა გაჩნდეს.

► როგორ ხდება თქვენს ეკლესიაში მაძიებლებთან ერთად ლოცვა? რისი გაკეთებაა საჭირო ზემოთ ჩამოთვლილი რაღაცეების დასამატებლად?

ეკლესიის გარეთ ქადაგება მიზნად ისახავს, რომ მივაღწიოთ იმ ხალხამდე, ვინც არ მოდის ეკლესიაში. ამის გაკეთება რთულია, რადგან მსმენელები იქ სხვა მიზნით არიან და შეიძლება ყურადღება არ მოგაქციონ. შეიძლება იყოს ხმაური და არეულობა. იქ არ არის მრევლის მიერ შექმნილი თაყვანისცემის ატმოსფერო, როგორიც იქნებოდა ეკლესიაში.

თვალნათელი მოთხოვნა გარე მქადაგებლისთვის არის ძლიერი ხმის ფლობა, რათა ხალხმა გაიგოს, ან უნდა გამოიყენოს რაიმე სახის ხმის გამაძლიერებელი.

გარეთ ქადაგების პირველი გამოწვევა ყურადღების მიქცევაა. გარშემო მყოფი ხალხი სწრაფად იღებს გადაწყვეტილებას, სურთ მათ მოსმენა, თუ არა. ზოგიერთები რამდენიმე წუთის განმავლობაში მოგისმენენ. ბევრი მოისმენს მხოლოდ ერთ ან ორ წინადადებას, სანამ გადაწყვეტს აინტერესებს მას ეს, თუ არა.

მქადაგებელმა უნდა გამოიყენოს მოკლე წინადადებები და ყოველი წინადადება უნდა შეიცავდეს ღირებულ განცხადებას. მას უნდა ახსოვდეს, რომ თითოეული წინადადება იქნება პირველი წინადადება, რომელსაც ზოგიერთი მსმენელი მოისმენს. თითოეულ წინადადებაში აზრის დაფიქსირება დაგეხმარებათ ყურადღების მიქცევაში. თუ ის მოახერხებს ჯგუფის ყურადღების მიქცევას, რომ მოუსმინონ, მას შეუძლია ილუსტრაციების გამოყენება და საკითხების უფრო დეტალურად ახსნა.

თუ შესაძლებელია, მქადაგებელს თან უნდა ჰყავდეს მორწმუნეთა ჯგუფი. თუ ის ადამიანები, რომლებიც მიმოდიან, დაინახავენ, რომ სხვები უსმენენ, ისინი მეტად შეეცდებიან თვითონაც გაჩერდნენ და მოუსმინონ. თუ იქნებიან მუსიკოსები, რომლებსაც შეუძლიათ ქადაგებამდე მუსიკის დაკვრა, ეს ჩვეულებრივ ხელს უწყობს ხალხის მოზიდვას.

მქადაგებელმა უნდა მოიწვიოს მსმენელები, რომ წინ გამოვიდნენ და ილოცონ გადარჩენისთვის.

დამხმარეებმა უნდა გაავრცელონ დაბეჭდილი საინფორმაციო ბუკლეტები დამსწრე საზოგადოებაში.

► რა პირობები არსებობს თქვენს სამეზობლოში გარე ქადაგებისთვის?

ახლა თითოეულმა სტუდენტმა უნდა შეხედოს მახარებლურ ქადაგებას, რომელიც მან თან მოიტანა. მან უნდა განიხილოს, თუ როგორ ასრულებს ის მახარებლური ქადაგების 10 მითითებას. მან უნდა დაგეგმოს, თუ როგორ უნდა იქნას ის შემოწმებული.

შესაძლოა არ იყოს იმის დრო, რომ კლასმა განიხილოს თითოეული სტუდენტის ქადაგება, მაგრამ მათ უნდა მოამზადონ რამდენიმე მათგანი მაგალითების მოსაყვანად.

შემდეგი მეცადინეობა არ უნდა მოიცავდეს გაკვეთილს. სტუდენტებმა უნდა წარმოადგინონ თავიანთი მახარებლური ქადაგებები და შემდეგ განიხილონ ისინი. არ არის აუცილებელი, რომ მათ ქადაგება მთლიანად იქადაგონ, უბრალოდ შეამცირონ ისინი 5-7 წუთიან პრეზენტაციად. სავარჯიშო მეცადინეობის შემდგომ დაგეგმილ შემდეგ მეცადინეობაზე, უნდა გამოყენებულ იქნას მე-12 გაკვეთილი.

შეიმუშავეთ მახარებლური ქადაგება, რომელიც მიჰყვება ამ გაკვეთილის მითითებებს. არ არის აუცილებელი ქადაგება სრულად იყოს დაწერილი, მაგრამ უნდა იყოს დაწერილი მისი ძირითადი მტკიცებულებები. გადაიტანეთ ის მომდევნო მეცადინეობაზე განსახილველად.