Lesson 2: ለመሪዎች መፅሐፍ ቅዱሳዊ መመዘኛዎች

አንዳንድ ሰዎች ሁላችንም እኩል በእግዚአብሔር ዘንድ አስፈላጊ ስለሆንን ማንም በቤተክርስቲያን ውስጥ በሌሎች ላይ ስልጣን ሊኖረው እንደማይገባ ያምናሉ። ሌሎች ሰዎች በአመራር እንደሚያምኑ ይናገራሉ ነገር ግን ከማንኛውም መንፈሳዊ ሥልጣን ነፃ እንደሆኑ አድርገው ይንቀሳቀሳሉ።

► መጽሐፍ ቅዱስ በቤተክርስቲያን ውስጥ ሥልጣን መኖር እንዳለበት ያስተምራልን? ምሳሌዎችን አስቀምጥ።

መጽሐፍ ቅዱስ የቤተክርስቲያን አመራርን በብዙ ቦታዎች ይጠቅሳል።[1] (አንዳንዶቹ ምሳሌዎች እኚህ ናቸው ዕብራውያን 13፥7-17፣ ቲቶ 1፥5፣ ሮሜ 12፥8፣ 1ኛ ቆሮንቶስ 14፥40፣ እና 1ኛ ጢሞቴዎስ 5፥17።)

መሪነትን እንደ ተፅዕኖ መግለፃችን በቤተክርስቲያን ውስጥ ያለውን የመሪነት ሚና ለማየት ይረዳናል። አንዳንድ ልዩ ሚናዎች በእግዚአብሔር የተነደፉት መሪዎች ቤተክርስቲያንን ዓላማዋን እንድትፈፅም እንዲረዷት ነው።

► አንድ ተማሪ ለብድኑ ኤፌሶን 4፥11-12 ያንብብ።

[2]ሁሉም የአገልግሎት ሚናዎች በዚህ ዝርዝር ውስጥ በተወሰኑ ጥሪዎች ሊታወቁ አይችሉም። ለምሳሌ፤ ሙዚቀኛ ወይም የአምልኮ መሪ ከነዚህ ውስጥ አንዱ ላይሆን ይችላል። ሆኖም እያንዳንዱ የአገልግሎት አመራር ሚና ቤተክርስቲያን ዓላማዋን እንድትፈጽም በመርዳት ላይ ማተኮር አለበት።

የመሪነት ሚናዎች በመስበክ፣ በማስተማር እና በስብከተ ወንጌል ብቻ የተገደቡ አይደሉም። የቤተክርስቲያን ሀላፊነት ከዚህም በላይ የሰፋ ነው። የቤተክርስቲያን ሰዎችም ተግባራዊ ፍላጎቶችን ለማሟላት በጋራ ይሠራሉ። የጓሮ አትክልትን ለማልማት የሚውሉ መሳሪያዎችን በጋራ እንዲጠቀሙ ሰዎችን የሚመራ ሰው ቤተክርስቲያን አባሎቿን የመንከባከብ አላማዋን እንድታሟላ እየረዳት ነው። የቤተክርስቲያን ኃላፊነቶች በቤተክርስቲያኑ ሕንፃ ውስጥ ከሚፈጠረው በላይ አስፈላጊ የሆኑ ብዙ የአመራር ሚናዎችን ያደርጋሉ።

በዚህ ትምህርት የምናጠናው የመፅሐፍ ቅዱስ ክፍል በተለይ ለፓስተሮች እና ዲያቆናት ይሠራል። ሆኖም አብዛኛዎቹ መመዘኛዎች ስለ ባህሪ እንጂ ስለ ችሎታዎች አይደሉም። ሁሉም ክርስቲያኖች እዚህ የተገለፀው ባህሪ ሊኖራቸው ይገባል። መሪዎች ይህ ባህሪ ካላቸው የበለጠ ውጤታማ ይሆናሉ። የእያንዳንዱን ባህሪ ጥራት ስትመለከት የሰው ተፅዕኖ ላይ ያለውን ጫና አስብ።

ሐዋርያው ጳውሎስ የተለወጡ ቡድኖች ባሉበት ቦታ ሁሉ ለአዳዲስ ቤተክርስቲያናት መሪዎችን ሾመ (ሐዋርያት ሥራ 14፥23)። ብዙዎቹ እነዚህ አዳዲስ ፓስተሮች የተቀየሩት ለአጭር ጊዜ ብቻ ነበር። እነዚህን ሁሉ መመዘኛዎች ሙሉ በሙሉ እንዳላሟሉ የታወቀ ነው ነገር ግን ጳውሎስ የነበሩትን የተሻሉ መሪዎች ሾመ። የማደግ አቅም ያላቸው ሰዎች ነበሩ። እግዚአብሔር ለክርስቶስ እና ለአገልግሎቱ የተሰጠን ሰው ሊጠቀም ይችላል። ምንም እንኳን ሁሉም ባህሪያት ሙሉ በሙሉ ባይዳብሩም።

ስለ መጋቢዎች እና ዲያቆናት መመዘኛዎች ሁለት ምንባቦች አሉን። በሐዋርያው ጳውሎስ ለጢሞቴዎስ እና ለቲቶ የተፃፉት ናቸው። ጢሞቴዎስ በኤፌሶን ቤተክርስቲያናት ላይ ነበረ ቲቶ ደግሞ በቀርጤስ ቤተክርስቲያናት ላይ ነበር። ለእያንዳንዱ የሀገር ውስጥ ጉባኤ ፓስተሮችን የመሾም ስራ ነበራቸው።

► አንድ ተማሪ ለብድኑ 1ኛ ጢሞቴዎስ 3፥1-7 ያንብብ።

(1) ነቀፋ የሌለበት

ፖስተሩ በክፉ ስራ ጥፋተኛ መሆን የለበትም። ፓስተሩ ትክክል የሆነን ነገር እያደረገ ካልሆነ ሌሎች መልካም እንዲያደርጉ መምራት አይችልም። ፓስተሩ ወጥ የሆነ የክርስትና ሕይወትን በተወሰነ ጊዜ ውስጥ ያሳየ ሰው መሆን አለበት። ይህ አስፈላጊ የሆነው በማኅበረሰቡ ውስጥ ጥሩ ምስክርነት እንዳለው ቤተክርስቲያን እንድታምንበት ነው።

ቤተክርስቲያን ለረጅም ጊዜ ባልተቋቋመበት ቦታ ፓስተሩ ለረጅም ጊዜ ክርስቲያን ላይሆን ይችላል። እሱ ሁሉም የብስለት ባህሪያት ላይኖሩት ይችላል ነገር ግን ለእግዚአብሔር የተሰጠን ሕይወት ማሳየት አለበት። ስህተቶቹን አምኖ የራሱን ባህሪ ለማስተካከል ፈቃደኛ መሆን አለበት።

ለብዙ አመታት በእስያ ውስጥ ያለ አንድ ፖስተር በአንድ መንደር ውስጥ ጌታ በሀይል ይጠቀምበት ነበር። ስኬቱ ለትዕቢት እና መንፈሳዊ ግዴለሽነት ዳረገው። አንድ ምሽት ላይ አንዲት ወጣት ሴት በሞተር ሳይክሉ አብራው እንድትሄድ ጠየቀች። ፈተና እንደሚፈጥርበትና በማኅበረሰቡ ዘንድ ያለውን ስም ሊያጠፋ እንደሚችል ቢያውቅም በሞኝነት ተስማማ። አባላቱ ስለ ድርጊቱ ሲያውቁ በቅንነቱ ላይ ያላቸውን መተማመን አጥተዋል። በመጨረሻም አገልግሎቱን መልቀቅ ነበረበት። በእግዚአብሔር ፀጋ ይህ ፓስተር በእግዚአብሔር ፊት እና እርሱ በጎዳቸው ሰዎች ፊት ራሱን አዋረደ። የመንፈሳዊ የበላይ ተመልካቹን ተግሣጽ ተቀበለ። ቀስ በቀስ ተአማኒነቱ እንደገና ተመለሰ እና የአገልግሎቱ ውጤታማነት ጨመረ።

► መሪ የማይታመን ከሆነ ምን ይፈጠራል?

(2) የአንድ ሚስት ባል የሆነ

በብዙ የዓለም ክፍሎች ከአንድ በላይ ማግባት የተለመደ ልማድ ነው። የእግዚአብሔር ንድፍ ለአንድ ሰው አንዲት ሚስት እንዲኖረው ነው። ፖስተሮች ምሳሌ መሆን አለባቸው። ይህ መስፈርት ፓስተሩ ጥሩ ባል ለመሆን የተቻለውን ሁሉ ማድረግ እንዳለበት ያመለክታል። ለሚስቱ ታማኝ እና አፍቃሪ መሆን አበት።

[1](3) ቁም ነገረኛ

ፖስተሩ ስለ አገልግሎቱ ቁምነገረኛ መሆን አለበት። ውሳኔዎችን በፍጥነት ወይም በስሜት የሚወስን ስሜታዊ ሰው መሆን የለበትም። አስፈላጊ በሆኑ ጉዳዮች ላይ በረጋ መንፈስ ማሰብ መቻል አለበት። በግል ጉዳዮች፣ በመዝናኛዎች ወይም ፈተናዎች አእምሮው ከአገልግሎቱ እንዲዘናጋ መፍቀድ የለበትም።

(4) ጥሩ ባህሪ ያለው

ፓስተሩ ስርዓት ያለው ባህሪ ሊኖረው ያስፈልጋል። አላስፈላጊ በሆነ መንገድ ባህሪ ሊኖረው አይገባም። ባህሪው ከሚያስተምራቸው የእግዚአብሔርን መምሰል ሥርዓቶች ጋር የሚስማማ መሆን አለበት።

አንድ ፖስተር ለሚያገለግልበት ቦታ ልማዶች አክብሮት ማሳየትን መማር ይኖርበታል። አንድን ሰው ያስቀየመ ስህተት እንደሰራ ከተገነዘበ ትሁት ሊሆንና ይቅርታ ሊጠይቅ ይገባል።

(5) እንግዳ ተቀባይ

እንግዳ ተቀባይ መሆን ማለት የተጓዥ ሰውን ምግብ፣ ማረፊያ እና የሚያስፈልገው ፍላጎቶች ማሟላት ማለት ነው። ፓስተሩ ለሌሎች ሰዎች ፍላጎቶች ምላሽ የሚሰጥ ሰው መሆን አለበት። ለማካፈል ፈቃደኛ መሆን አለበት። እርሱ ለመጀመሪያ ጊዜ ለሚያገኛቸው ሰዎች እንኳን ሳይቀር ተግባቢ እና አጋዥ መሆን አለበት።

► ይህ ብቃት ለመሪ ለምን አስፈላጊ ይሆናል?

(6) ማስተማር የሚችል

ፖስተሩ ሰዎች መረዳት ይችሉ ዘንድ እውነትን መግለፅ መቻል አለበት። እራሱን የማስተማር እና የማንበብ ሃላፊነት መውሰድ አለበት።

(7) የማይሰክር

ፖስተሩ በወይን ጠጅ ተፅዕኖ ስር ለመሆን መፍቀድ የለበትም። ባህሪው በአልኮል የተጠቃ ሰውን መምሰል የለበትም። ይህ መርህ ተመሳሳይ ተፅዕኖዎችን ለሚያሳድሩ ሌሎች ንጥረነገሮችንም ይመለከታል።

(8) ፀበኛ ያልሆነ

ፓስተሩ በኃይል ዛቻ ነገሮችን ለማግኘት መሞከር የለበትም። ቅር ያሰኘውን ሰው ለመጉዳት ዝግጁ መሆን የለበትም። (2ኛ ጢሞቴዎስ 2፥24-25 ተመልከቱ።)

► ለፖስተር ትክክለኛውን ቁጣ ለማሳየት ምን አይነት መንገዶች ይኖራሉ?

(9) ስግብግብ ያልሆነ

ጠበቆች፣ ሻጮች፣ ፖለቲከኞችና ሌሎች ተመሳሳይ ሥራ ያላቸው ሰዎች ሰዎችን ለማስደሰት ሲሉ እውነትን ወደ ጎን ለመተው ይፈተናሉ። ፖስተርም በተመሳሳይ ይፈተናል ምክንያቱም የእግዚአብሔር ቃል እውነት ሁሉንም ሰው አያስደስትም። ፓስተር በገንዘብ ቢጠቅመውም ባይጠቅመውም ለእውነት ታማኝ መሆን አለበት።

አንድ ፓስተር የቤተክርስቲያን አገልግሎት በገንዘብ ሲደገፍ ለማየት መፈለግ አለበት። ሁልጊዜ ምን ሊሰጡት እንደሚገባ ከማሰብ ይልቅ፤ አንድ ቤተሰብ አባላቱን እርስ በእርስ እንደሚንከባከብ ቤተክርስቲያኗን እንዲሁ መምራት አለበት።

(10) ቤቱን በደንብ የሚያስተዳድር

የፖስተሩ የመሪነት ችሎታ በቤት ውስጥ መታየት አለበት። ልጆቹን መቆጣጠር አለበት። የራሱን ቤት መምራት ካልቻለ ቤተክርስቲያንን መምራት አይችልም። ልጆቹ ፍፁም ባህሪ ሊኖራቸው ይገባል ማለት ሳይሆን ፓስተሩ በታማኝነት እየመራቸው እና እያስተካከላቸው ነው ማለት ነው። ይህ አዋቂ የሆኑና እና ከስልጣኑ የራቁ ልጆችን አያካትትም ምክንያቱም እርሱ አሁንም ለእነርሱ ተጠያቂ አይደለም።

(11) አዲስ አማኝ ያልሆነ

አንድ ሰው በፍጥነት በስልጣን ላይ ከተቀመጠ በትዕቢት ይፈተናል። ሰይጣን እንዲወድቅ ያደረገው ሀጥያት ትዕቢት ነው። ዕድገት ከልምድ ጋር ቀስ በቀስ መምጣት አለበት።

► አንድ ሰው በስልጣን ላይ በፍጥነት ከተቀመጠ ምን ጉዳት ያመጣል?

(12) መልካም ስም ያለው

አንድ ሰው ፓስተር ሆኖ ከመሾሙ በፊት ከቤተክርስቲያን ውጭ ባሉ ሰዎች ዘንድ መልካም ስም ሊኖረው ይገባል። እሱ በሚያደርገው ሁሉ ታማኝ መሆኑን ማወቅ አለባቸው። ከመቀየሩ በፊት መጥፎ ስም ነበረው ከተባለ ፓስተር ከመሆኑ በፊት የተሻለ ስም ለመመስረት ጊዜ ያስፈልገዋል።

በአፍሪካ ያለ አንድ ፓስተር የእሁድ ጠዋት ስብከቱን ከሰበከ በኋላ ወደ ቤት ለመሄድ በአውቶብስ ተሳፈረ። ታሪፉን ከከፈሉ በኋላ ተቆጣጣሪው በጣም ብዙ ገንዘብ እንደመለሰ አስተዋለ። ታማኝ ሰው ስለነበር ተጨማሪውን ለውጥ “ይቅርታ ጌታዬ ባጋጣሚ ብዙ ገንዘብ ሰጥተኸኛል” በማለት ገንዘብን መልሶ ሰጠው። ተቆጣጣሪው እንዲህ ሲል መለሰ፦ “አይ በአጋጣሚ አላደረግኩትም። ከቤተክርስቲያንህ ውጭ ቆሜ ነበር እና ስለ ታማኝነት ስብከትህን ሰማሁ። እንደምትኖረውም ለማረጋገጥ ወስኜ ይህን አደረኩ” አለ። መጽሐፍ ቅዱስ መልካም ስም የአንድ ሰው ትልቁ ሀብት እንደሆነ ይናገራል (ምሳሌ 22፥1)። ስምህ ሲነሳ በሌሎች አእምሮ ውስጥ ምን ይመጣል?

► አንድ ተማሪ ለብድኑ ቲቶ 1፥5-11 ያንብብ።

በቲቶ ውስጥ የተዘረዘሩት አብዛኛዎቹ የፖስተርነት መመዘኛዎች በ1ኛ ጢሞቴዎስ ባለው ምንባብ ውስጥም ተዘርዝረዋል።

► በቲቶ ውስጥ ባለው ምንባብ ውስጥ ምን ተጨማሪ የፓስተር ባህሪያት አሉ?

(13) ንቁ

ምንባቡ የአንድ ፓስተር ለሐሰት ትምህርት ምላሽ የመስጠት ችሎታን ያጎላል። ፓስተር በጎቹን ከሚጠብቅ እረኛ ጋር ሊመሳሰል ይችላል። እርሱ የጉባኤው ጠባቂ ነው። ከሐሰት አስተምህሮዎች እና ከተሳሳቱ ተጽዕኖዎች መጠንቀቅ አለበት። ፖስተሩ ህዝብን በትምህርታቸው የተጠበቁ እንዲሆኑ ማስተማር አለበት። ስለ መንፈሳዊ አደጋ ግለሰቦችን ለማስጠንቀቅ ዝግጁ መሆን አለበት። በቤተክርስቲያን ውስጥ ጎጂ የሆኑ ትምህርቶች እንዲሰጡ መፍቀድ የለበትም።

ፓስተሩ በእውነተኛ ትምህርት በደንብ የሰለጠነ እና አሳማኝ በሆነ መንገድ ማስረዳት የሚችል መሆን አለበት። ዓላማው በሐሰት ትምህርት ውስጥ ያሉትን ለማረም ነው ነገር ግን ከሁሉም በላይ ጉባኤው ወደ ስህተት እንዳይመራ መጠበቅ ነው። ፓስተሩ ያለማቋረጥ በእውቀቱ ላይ በጥናት መጨመር አለበት።

► አንድ ተማሪ ለብድኑ ሐዋርያት ሥራ 6፥1-6 ያንብብ። በዚህ ምንባብ ውስጥ ምን ችግር ተገልፆዋል?

የመጀመሪያዎቹ ዲያቆናት የተሾሙት ከበዓለ ሃምሳ በኋላ ነበር። ሐዋርያት በፀሎትና በስብከት ላይ ማተኮር ነበረባቸው። የቤተክርስቲያኒቱን አስተዳደር ዝርዝር ጉዳዮች ለመርዳት ሰባት ሰዎች ተሾሙ።

ዲያቆን ፓስተሩን በአገልግሎት ዝርዝር ጉዳይ ይረዳል። ዲያቆን ሰባኪ ሊሆን ይችላል ነገር ግን መስበክ የግድ የዲያቆን ሥራ አካል አይደለም።

► የመጀመሪያዎቹ ዲያቆናት ብቃቶች ምን ነበሩ?

ሰዎቹ መልካም ስም እንዲኖራቸው እና በመንፈስ ቅዱስ እና በጥበብ የተሞሉ እንዲሆኑ ይጠበቅባቸው ነበር። የቤተክርስቲያን ገንዘብን ያስተዳድራሉ ስለዚህ በታማኝነት መልካም ስም እንዲኖራቸው ያስፈልግ ነበር። ሥራቸው በቤተክርስቲያን ውስጥ መንፈሳዊ ተጽእኖ ይኖረዋል። ስለዚህም የእርሱን አመራር፣ ቅባትና ንጽሕናን ለማግኘት በመንፈስ ቅዱስ መሞላት አስፈላጊ ነበር። ብዙ አስቸጋሪ ሁኔታዎችን ይቋቋሙ ነበር ስለዚህ ጥበብ አስፈላጊ ነበር።

ሐዋርያው ጳውሎስ ለዲያቆናት አንዳንድ ተጨማሪ የተብራሩ ብቃቶችን አስቀምጧል።

► አንድ ተማሪ ለብድኑ 1ኛ ጢሞቴዎስ 3፥8-13 ያንብብ።

(1) የተከበረ

ዲያቆኑ ከቤተሰብ፣ ከጓደኞች እና ከማህበረሰቡ ጋር ባለው ግንኙነት የተከበረ ሰው መሆን አለበት።

(2) ቅን

የዲያቆኑ እምነት እና ድርጊቶች ከሚናገረው ጋር ተመሳሳይ መሆን አለባቸው። ዲያቆኑ በሚናገረው ሁሉ የሚታመን ሰው መሆን አለበት። ታማኝ ሰው መሆን አለበት።

(3) የማይሰክር

ዲያቆኑ በአልኮል የተጠቃ ሰው መሆን የለበትም። ባህሪው የተከበረ እና ወጥነት ያለው መሆን አለበት።

(4) ስግብግብ ያልሆነ

ዲያቆን ለቤተክርስቲያን ገንዘብን የማስተዳደር እና በቤተክርስቲያን ውስጥ ያሉ ሰዎችን ፍላጎቶች የመንከባከብ ሀላፊነት አለበት። ከአገልግሎቱ ራሱን ለመጥቀም የሚጥር ሰው መሆን የለበትም።

(5) በበጎ ኅሊና መልካም ትምህርትን የያዘ

አንድ ሰው በኃጢአት ውስጥ ሲወድቅ ብዙውን ጊዜ የተሳሳተ ትምህርት ማመን ይጀምራል። አንድ ሰው በመንፈሳዊ ድል ውስጥ የሚኖር ከሆነ እውነተኛውን ትምህርት ለመያዝ የበለጠ እድል ይኖረዋል።

(6) ልምድ ያለው

ለአንድ ሰው የድቁና ቦታ ከመሰጠቱ በፊት በአገልግሎት ጥበበኛ እና እምነት የሚጣልበት መሆኑን ለማሳየት እድሉ ሊኖረው ይገባል። አስተዋይ መሪዎች ለሰዎች የሥልጣን ቦታዎችን ከመስጠታቸው በፊት እንዲያገለግሉ እድሎችን ይሰጣሉ።

► አንድ ሰው የሥልጣን ቦታ ሳይኖረው በፊት የቤተክርስቲያንን አገልግሎት ሊረዳ የሚችልባቸው መንገድ አንዳንድ ምሳሌዎች ምን ምን ናቸው?

(7) ከታማኝ ሚስት ያለ

ሚስቱ በንግግሯ፣ በአመለካከቷ እና በባህሪዋ የክርስቲያን ጥሩ ምሳሌ ካልሆነች የዲያቆኑ አገልግሎት ይጎዳል።

(8) ቤቱን በደንብ የሚያስተዳድር

እንደ ፓስተር ዲያቆንም ቤቱን በደንብ የሚያስተዳድር መሆን አለበት።

► “ይህ ባሕርይ ለምን አስፈላጊ ነው?” በሚለው ጥያቄ በመጀመር የእያንዳንዱን ነጥብ አስፈላጊነት ተወያዩበት።

1. ታማኝነቱ ከሌሎች ድርጅቶች ጋር አልተከፋፈለም።

2. የአገልግሎት ቡድን ለመገንባት እና የሌሎች ሰዎችን ችሎታ ለመጠቀም ፈቃደኛ ነው።

3. ለሁሉም ፍላጎቶች የሚያስብ መንፈሳዊ ቤተሰብ በመሆን ሕይወትን እንዲካፈሉ ጉባኤውን ይመራል።

4. ቤተክርስቲያኑን የሚያገለግለው ለግል ጥቅም ሳይሆን ለእግዚአብሔርና ለሕዝብ ካለው ፍቅር ነው።

5. እንደ አምልኮ፣ ስብከተ ወንጌል እና መንፈሳዊ ዕድገት ያሉ መንፈሳዊ ቅድሚያዎች የእርሱ አገልግሎት ትኩረት ናቸው።

6. የህዝቡ አመኔታ አለው።

7. ቤተክርስቲያንን ከእርሱ ባለቤትነት ውጭ እንደ ቋሚ ተቋም ለመገንባት ፈቃደኛ ነው።

8. ቤተክርስቲያንን ወደ ብስለት ይመራታል፤ ፍላጎቶችን የሚያሟላ ስለ አስራት እና ህብረት ያስተምራል።

9. ገንዘብን መጠቀምን ጨምሮ በሁሉም ነገር ሐቀኛ ነው።

10. ገንዘብን እና ሰራተኞችን በደንብ የማስተዳደር ችሎታን ያሳያል።

ለቤተክርስቲያን አንድን ፕሮጀክት ወይም ቢዝነስ ለመምራት የተመረጠ ሰው እነዚህ ባህሪያት ሊኖሩት ይገባል። የቤተክርስቲያኗ መሪዎች የቤተክርስቲያንን ኃላፊነት በሚረዱና እና ወደ አመራር ቡድን ሊጨመሩ በሚችሉ አባላት ውስጥ እነዚህን ባህሪያት ለማዳበር መስራት አለባቸው።

► “ይህ ባሕርይ ለምን አስፈላጊ ነው?” በሚለው ጥያቄ በመጀመር የእያንዳንዱን ነጥብ አስፈላጊነት ተወያዩበት።

1. እርሱ ለአንዲት የሀገር ውስጥ ቤተክርስቲያን ታማኝ ነው። በመገኘት፣ በአስራት እና በመሳተፍ እናም የተከበረ የክርስቲያን ምስክርነት አለው።

2. ጥረቱን እና ፍላጎቱን በሀገር ውስጥ ቤተክርስቲያን ውስጥ በተግባር በማዋል ላይ ይገኛል።

3. እርሱ የተሟላ ታማኝነት እና ከፍተኛ የስነምግባር ስሜት አለው።

4. እርሱ አስቀድሞ የተቻለውን ለማድረግ ተነሳሽነት እና መነሳሳትን ያሳያል።

5. እርሱ በግል ስነምግባር ያለው እና በራሱ ተነሳሽነት በየጊዜው እራሱን የሚያሻሽል ነው።

6. ሌላ ሰው ሲመራው የመስራት ችሎታ ብቻ ሳይሆን ሌሎችን የማደራጀት እና የመምራት ችሎታን ያሳያል።

7. በፕሮጀክቱ ውስጥ ለሚጫወተው ሚና የሚያስፈልገው ብቃት አለው።

► በዚህ ትምህርት ምክንያት ግቦችዎን ወይም ድርጊቶችዎን እንዴት እንደሚቀይሩ ይጠብቃሉ?

1. እግዚአብሔር ቤተክርስቲያንን የነደፈው በመንፈሳዊ አመራር ስር እንድትሰራ ነው።

2. ለቤተክርስቲያን ኃላፊነት ብዙ የመሪነት ሚናዎች ያስፈልጋሉ።

3. አብዛኛዎቹ የአመራር መመዘኛዎች ከመልካም ባህሪ ጋር የተያያዙ ናቸው።

4. ፓስተር ወይም ሌላ የአገልግሎት መሪ ያለማቋረጥ መልካም ባህሪያትን ማዳበር አለበት።

5. የአገልግሎት መሪ አስተማማኝ፣ ተነሳሽ እና ታማኝ መሆን አለበት።

1. ከዚህ ትምህርት የህይወት ለውጥ የሚያመጣ ጽንሰ ሀሳብን የሚያጠቃልል አንቀፅ ይፃፉ። ለምን አስፈለጊ እንደሆነ ያብራሩ። ምን ጥሩ ነገር ሊያደርግ ይችላል? ባለማወቃችንስ ምን ጉዳት ሊያስከትል ይችላል?

2. የዚህን ትምህርት መርሆች እንዴት በራስህ ህይወት ላይ እንደምትተገብር አብራራ። ይህ ትምህርት ግቦችዎን እንዴት ይለውጣል? ድርጊቶችዎንስ እንዴት ለመለወጥ አስበዋል?

3. ለትምህርት 2 አምስቱን የማጠቃለያ መግለጫዎች ያስብ። በሚቀጥለው ክፍለ ጊዜ መጀመሪያ ላይ እነሱን በማስታወስ ለመጻፍ ይዘጋጁ።

4. ከቀጣዩ ክፍለ ጊዜ በፊት 1ኛ ሳሙኤል 2፥12-36 ያንብቡ። ስለ ዔሊ አመራር አንዳንድ አስተያየቶችን ይጻፉ።