(1) Mwanafunzi atakuwa na uwezo wa kuelezea:

• Msingi wa shughuli za mbinguni.

• Sifa za mbinguni zilizofunuliwa katika Maandiko.

• Sifa za adhabu ya milele zilizofunuliwa katika Maandiko.

• Baadhi ya mifano ya dini ambazo zinakana kweli ya adhabu ya milele.

• Haki ya adhabu ya milele.

• Tamko la Imani ya Kikristo kuhusiana na hatima ya milele.

(2) Mwanafunzi atakumbuka kwamba baadhi ya matendo yana matokeo ya milele ambayo hayawezi kubadilishwa.

► Soma Ufunuo 21 Kwa pamoja. Kifungu hiki kinatueleza nini kuhusu hatma ya waamini?

Uumbaji wote unaishi kwa ajili ya utukufu wa Mungu, lakini mbinguni ni sehemu ya msingi katika ilimwengu. Mahali ambapo Mungu anaabudiwa katika viwango vya juu na viumbe aliowaumba kwa mfano wake. (Soma Ufunuo 5:11-14.) utukufu wa Mungu unafunuliwa mbinguni katika utimilifu wake ambao ndio utakuwa nuru ya mji (Ufunuo 21:23). Ni mahali ambapo tutamfahamu Mungu kiasi cha kuuona uso wake (Ufunuo 22:4).

Mbinguni, waamini watapata utoshelevu na furaha timilifu katika kumwabudu Mungu. Zaburi 16:11 inasema, “Mbele za uso wako ziko furaha tele; Na katika mkono wako wa kuume Mna mema ya milele.” Inatosha kwamba furaha na ibada vimeunganisha. Mungu ametuumba sisi kwa mfano wake, ili kwamba tuelewe asili yake kiasi cha kutosha kumuabudu Yeye kwa jinsi alivyo. Hisia zetu, uwezo wetu wa kupenda, na ufahamu tuliopewa ni kwamba tumwabudu Mungu.

Yesu alitoa matamko haya kwa wanafunzi wake:

Msifadhaike mioyoni mwenu; mnamwamini Mungu, niaminini na mimi. Nyumbani mwa Baba yangu mna makao mengi; kama sivyo, ningaliwaambia; maana naenda kuwaandalia mahali. Basi mimi nikienda na kuwaandalia mahali, nitakuja tena niwakaribishe kwangu; ili nilipo mimi, nanyi mwepo (Yohana 14:1-3).

Maneno ya Yesu yanatuambia sisi baadhi ya mambo kuhusiana na mbinguni. Jambo kubwa muhimu ni kwamba mbinguni ni makao ya Mungu. Yesu alipaita nyumbani mwa Baba yangu. Kweli nyingine muhimu ni kwamba tunaweza kuishi huko baade pamoja na Mungu.

Ahadi ya mbinguni inatakiwa kuongoza namna tunavyoishi duniani. Mtu anayeishi katika viwango vya milele atafanya mambo mazuri sana duniani. Mtu anayetarajia thawabu ya kimbingu ana hamasa ya kuvumilia magumu na kujitahidi kukamilisha mapenzi ya Mungu. Yesu aliwaambia wale wanaoteswa, “Furahini, na kushangilia; kwa kuwa thawabu yenu ni kubwa mbinguni” (Mathayo 5:12).

Sifa za Mbinguni[1]

► Nini ni baadhi ya taarifa ambazo tunazifahamu kuhusu mbinguni?

Wakati mwingine watu hapa duniani hawawezi kununua nyumba wanayoitaka, au hawawezi kutengeneza nyumba na kuifanya kuwa kama vile wanavyotaka iwe. Lakini Mungu ana nguvu isiyo na mipaka na rasilimali, kwa hiyo tunaweza kuwa na uhakika kwamba makao yake yako kama vile anavyotaka yawe. Kwa hivyo, mbinguni panaendana au panalingana kikamilifu na asili ya Mungu.

Hakutakuwa na dhambi mbinguni. Viumbe wote mbinguni, ama ni malaika au wanadamu au viumbe wengine, watakuwa watakatifu kikamilifu. (Soma Ufunuo 21:8, 27.)

Mbinguni kutakuwa huru na matokeo ya dhambi, ikiwemo maumivu, huzuni, migogoro, na hatari. (Soma Ufunuo 21:4.) Hakutakuwa tena na laana juu ya uumbaji, ikiwemo magonjwa, kuzeeka, na kifo. (Soma Ufunuo 22:3.)

Uzuri wa mbinguni ni zaidi ya maelezo. Taarifa inatolewa kwetu inajumuisha kuta za Yaspi, malango ya lulu, misingi ya madini na mawe ya thamani yaliyo adimu sana, na mitaa ya dhahabu. (Soma Ufunuo 21:18-21.)

Nani na Lini?

Mbinguni pameandaliwa kwa ajili ya wale waliotubu dhambi na kumwamini Yesu Kristo kama mwokozi na Bwana (Yohana 3:16). Biblia inatuambia sisi kwamba kama tukiishi kwa viwango vya milele, tutawekeza katika umilele na hazina iliyo salama mbinguni. (Soma Mathayo 6:20.) mbingu imejawa na mamilioni ya watu waliokolewa na malaika (Ufunuo 5:8-11).

Ni lini mtu anakwenda mbinguni? Yesu alimwambia mwizi aliyekuwa anayekufa msalabani kwamba atakuwa pamoja na Yeye paradiso siku hiyo (Luka 23:43). Paulo alisema kwamba kutokuwepo katika mwili huu ni kuwa pamoja na Bwana (2 Wakorintho 5:8). Kwa hivyo, tunajua kwamba mwamini huenda mbinguni wakati wa kufa kwake. Waamini ambao bado watakuwa hai wakati wa kuja Yesu watakwenda mbinguni pasipo kufa. (Soma 1 Wakorintho 15:51-52; 1 Wathesalonike 4:13-18.)

Adhabu za duniani mara zote huisha baada ya muda, hata kama ni katika kifo cha aliyekuwa anaadhibiwa. Lakini Yesu anaelezea adhabu ambayo ni ya milele. Alisema,

Ondokeni kwangu, mliolaaniwa, mwende katika moto wa milele, aliowekewa tayari Ibilisi na malaika zake.… Na hao watakwenda zao kuingia katika adhabu ya milele; bali wenye haki watakwenda katika uzima wa milele (Mathayo 25:41, 46).

Yesu na mitume walithibitisha kwamba Jehanamu, ziwa la moto, na adhabu ya milele ni halisi. Yesu alituonya sisi kuepuka sehemu hii mbaya sana. Hapa ni baadhi ya matamko kutoka kwa Yesu na mitume.

Ndivyo itakavyokuwa katika mwisho wa dunia; malaika watatokea, watawatenga waovu mbali na wenye haki, na kuwatupa katika tanuru ya moto; ndiko kutakuwako kilio na kusaga meno (Mathayo 13:49-50).

Akizungumza na Mafarisayo, Yesu alisema, “Enyi nyoka, wana wa majoka, mtaikimbiaje hukumu ya jehanum?” (Mathayo 23:33).

Wakati mwingine Yesu alipokuwa akiongea na Mafarisayo, alielezea mateso ambayo mtu aliyekuwa amekufa na kwenda kuzimu:

Basi, kule kuzimu aliyainua macho yake, alipokuwa katika mateso, akamwona Ibrahimu kwa mbali, na Lazaro kifuani mwake. Akalia, akasema, Ee baba Ibrahimu, nihurumie, umtume Lazaro achovye ncha ya kidole chake majini, auburudishe ulimi wangu; kwa sababu ninateswa katika moto huu (Luka 16:23-24).

Mtume Paulo aliandika kwamba Yesu atakuja

…wakati wa kufunuliwa kwake Bwana Yesu kutoka mbinguni pamoja na malaika wa uweza wake katika mwali wa moto; huku akiwalipiza kisasi wao wasiomjua Mungu, na wao wasioitii Injili ya Bwana wetu Yesu; watakaoadhibiwa kwa maangamizi ya milele, kutengwa na uso wa Bwana na utukufu wa nguvu zake (2 Wathesalonike 1:7-9).

Petro aliandika

…Mungu hakuwaachilia malaika waliokosa, bali aliwatupa shimoni, akawatia katika vifungo vya giza, walindwe hata ije hukumu (2 Petro 2:4).

Yohana aliandika

yule Ibilisi, mwenye kuwadanganya, akatupwa katika ziwa la moto na kiberiti, alimo yule mnyama na yule nabii wa uongo. Nao watateswa mchana na usiku hata milele na milele… Na iwapo mtu ye yote hakuonekana ameandikwa katika kitabu cha uzima, alitupwa katika lile ziwa la moto (Ufunuo 20:10, 15).

Zingatia aina ya maneno ambayo yanatumika kuelezea sehemu hii: moto, mateso, kisasi, maangamizi, giza, vifungo, hukumu, kilio, na kusaga meno.

Yesu alisema

Jicho lako la kuume likikukosesha, ling’oe ulitupe mbali nawe; kwa maana yakufaa kiungo chako kimoja kipotee wala mwili wako mzima usitupwe katika jehanum. Na mkono wako wa kuume ukikukosesha, ukate uutupe mbali nawe; kwa maana yakufaa kiungo chako kimoja kipotee wala mwili wako mzima usitupwe katika jehanum (Mathayo 5:29-30).

Yesu alisema kwamba ingekuwa ni afadhali kung’oa jicho lako la kuume/kulia na kukata mkono wako wa kuume/kulia kuliko kutupwa katika Jehanamu na macho yote na mikono yako. Yesu hakuwa anatia moyo kuuharibu mwili, bali kusitisha au kuacha shughuli zote ambazo zinaweza kutuongoza sisi kutenda dhambi na kwenda Jehanamu, haijalishi dunia ni nzuri na ya thamani kiasi gani.

► Ni nini baadhi ya dini zisizo sahihi katika mafundisho yao kuhusiana na Jehanamu?

Biblia inatuambia kwamba kifo humaliza muda wa mwanadamu wa matazamio, na kwamba Jehanamu ni (1) ya milele, (2) isiyoweza kutenguliwa/kubatilishwa, na (3) ya mateso makali. Kweli hii ya Biblia hukataliwa na wasioamini Mungu ambao husema kwamba hakuna chochote baada ya kifo, na Mashahidi wa Yehova, Wamomoni, na Universalists ambao wanasema kwamba hakuna Jehanamu. Ukweli kwamba kifo humaliza muda wa mwanadamu wa matazamio unakataliwa na Waromani Katholiki ambao wanaamini kwamba hali ya mwanadamu inaweza kutengezwa baada ya kifo.

Kuna wale wanaokataa dhana ya Jehanamu kwa sababu wanaiona kuwa si ya haki. Wanasema kwamba kama dhambi ilitokea wakati fulani wenye mipaka, haitakuwa ya haki kama hukumu itakuwa ni ya milele. Mt. Agustino alijibu pingamizi hili kwa kutumia mfano wa sheria ya jinai. Kama wizi unatokea ndani ya dakika chache, je, mtu anapaswa awe na dakika chache za adhabu? Uuaji hutokea kipindi au muda mfupi tu na kusababisha uharibifu usioweza kurekebishwa. Katika maandiko, tunaona kwamba dhambi dhidi ya Mungu wa milele asiye na mipaka hupelekea adhabu ya milele, hata kama ilikuwa imetendeka katika wakati fulani wa muda wa maisha.

► Kwa nini jehanamu ni ya milele?

Jehanamu ni ya milele kwa sababu

1. Dhambi ni kosa dhidi ya Mungu wa milele asiye na mipaka.

2. Mwenye dhambi asiye tubu hukataa huduma ya Mungu ya milele ambayo anawadai.

3. Sisi ni viumbe wa milele tulio na sehemu nyingine ya kwenda endapo tutachagua kujitenga na Mungu.

Duniani, tunapenda kuwa na uwezo wa kubadilisha maamuzi yetu. Inaonekana kuwa ni jambo muhimu sana kiasi kwamba uchaguzi huo unaweza kuwa na matokeo ya milele. Tunapenda kufikiri kwamba kunaweza kuwa na nafasi ya pili hapo baadae, hata kama tunafanya uchaguzi wa makusudi sasa hivi. Lakini haiwezi kuwa si ya kimantiki kwamba Mungu ameacha muda wetu wa Maisha ndio kuwa muda wa kesi/kufanya maamuzi.

[1]Baadhi wanakataa kuamini kuhusiana na Jehanamu kwa sababu wanashangaa ni kwa namna gani Mungu mwenye upendo anaweza kumpeleka mtu katika sehemu mbaya kiasi hicho kama ambavyo mistari hii inaelezea. Ni lazima tuweke katika akili yetu kwamba Mungu hataki au hapendi hata mmoja apotee bali anataka kila mtu aifikie toba na wokovu. Biblia inataja hili katika maeneo kadhaa. (Soma 2 Petro 3:9; 1 Timotheo 2:4; Matendo ya Mitume 17:30.) wale wanaokwenda Jehanamu wamefanya uchaguzi ambao umewafanya wao kuwa katika sehemu hii mbaya na ya kutisha. Hakuna mtu ambaye kwa bahati mbaya anaangukia Jehanamu. Wale wanaokwenda wamechagua sehemu hiyo kwa kumkataa Mungu, haki, na wokovu.

Kwa sababu kila kilicho chema hutoka kwa Mungu, kumkataa Mungu hatimaye ni kukataa kila kilicho chema. Utulivu, usalama dhidi ya hofu na maumivu, na mahali pa kustarehesha ni mambo mema ambayo ni Mungu pekee anaweza kuyatoa. Kutengwa kabisa na Mungu kunamaanisha kukosa kila kilicho chema, na hiyo ndiyo jehanamu.

Tunamshukuru Mungu kwamba kupitia kazi ya upatanisho ya Yesu Kristo, upendo wake umewezesha sisi kuiepuka ghadhabu itakayokuja (1 Wathesalonike 1:10). Badala ya mateso jehanamu, tunashiriki furaha wa wokovu na maajabu ya mbinguni. Tunachagua mbinguni kuwa ndio hatma yetu tunapochagua toba kumwelekea Mungu na Imani yetu katika Bwana Yesu Kristo (Wafilipi 3:20, Matendo ya Mitume 20:21).

Katika maisha ya duniani, maamuzi mengi hayaonekani kuwa ya mwisho. Tukiwa na muda wa kutosha, makosa mengi yanaweza kurekebishwa. Ni lazima tukumbuke kwamba maamuzi mengi yana matokeo ya milele. Hatujui ni lini tutakufa, na muda wetu wa majaribio utaisha. Baada ya kifo hatutaweza kubadilisha matendo yaliyoathiri hatima yetu ya milele au matendo yaliyowaathiri wengine katika maamuzi yao.

► Someni Tamko la Imani kwa pamoja angalau mara mbili.

Kila mtu ataishi milele ama mbinguni au jehanamu. Mbinguni ni makao ya Mungu ambako waamini wataishi pamoja na Mungu, wakimwabudu kwa furaha. Mbinguni hakuna dhambi wala mateso yoyote yanayotokana nayo. Jehanamu ni mahali pa adhabu ya milele, isiyoweza kutenguliwa/kubatilishwa, na yenye mateso makali kwa wote ambao hawajaokolewa na Kristo kutoka katika dhambi zao. Jehanamu ni adhabu ya haki kwa dhambi ya makusudi dhidi ya Mungu asiye na mipaka.

(1) Zoezi la Kifungu: Kila mwanafunzi atapewa mojawapo ya vifungu vilivyoorodheshwa hapa chini. Kabla ya kipindi kinachofuata cha darasa, unapaswa kusoma kifungu na kuandika aya kuhusiana na somo la somo hili.

• Isaya 5:11-16

• Mathayo 5:27-30

• Luka 16:19-31

• Ufunuo 22:1-5

• Ufunuo 22:10-17

(2) Jaribio: Utaanza kipindi kijacho cha darasa kwa jaribio juu la Somo 13. Jifunze kwa umakini maswali wakati wa maandalizi.

(3) Zoezi la Kufundisha: Kumbuka kupanga na kuripoti muda wako wa kufundisha nje ya darasa.

(1) Ni shughuli gani ya msingi mbinguni?

(2) Orodhesha mambo manne ambayo hayatakuwepo mbinguni.

(3) Nani atakwenda mbinguni?

(4) Ni wakati gani waamini wanakwenda mbinguni?

(5) Ni mambo gani matatu ambayo Biblia inatuambia kuhusiana na jehanamu?

(6) Yesu alimaanisha nini kwamba mtu anapaswa akate mkono wake? (Mathayo 5:30).

(7) Orodhesha sababu tatuza kwa nini jehanamu ni ya milele.