(1) Mwanafunzi atakuwa na uwezo wa kuelezea:

• Inamaanisha nini kuwa Yesu ni Masihi.

• Tamko la Imani kuhusiana na “Bwana Yesu Kristo.”

• Ushahidi na umuhimu wa uanadamu wa Yesu.

• Ushahidi na umuhimu wa uungu wa Yesu.

• Utoshelevu wa kifo cha Kristo kwa ajili ya msamaha wa dhambi.

• Umuhimu wa ufufuo kwa Imani ya Kikisto.

• Tamko la Imani ya Kikristo kuhusiana na Kristo.

(2) Mwanafunzi atajifunza ni nini watu wa baadhi ya dini nyingine wanasema kuhusu Kristo.

► Soma Ufunuo 5:11-14 kwa pamoja. Kifungu hiki kinatueleza nini kuhusu Yesu?

Biblia inatabiri kuwa katika siku za mwisho, kristo wa uongo na manabii wa uongo watawadanganya wengi. Watu wengi wanaweka imani zao kwa kristo wa uongo au wa kufikirika ambaye hawawezi kuwaokoa. Unaweza kukutana na wawili kati ya kristo hawa wa uongo, wanaotambulishwa kwako na Wamormoni na Mashahidi wa Yehova.

Yesu wa Wamormoni

Kama Mmomoni akigonga mlango wako, atamleta Yesu ambaye ni ndugu wa kiroho wa Lusifa. Wamormoni wanafundisha kuwa huyu Yesu ni moja kati ya mabilioni ya roho changa ambazo “Baba yetu wa mbinguni” na “Mama yetu wa mbinguni” walizileta katika ulimwengu. Kwa mujibu wa Wamomoni, Yesu alipoishi duniani, alikuwa na wake wengi, mmoja wao akiwa Maria Magdalena. Baada ya kifo na ufufuo wake, alikwenda Marekani kuhubiria Wamarekani wazawa.

Yesu wa Mashahidi wa Yehova.

Mashahidi wa Yehova watakuambia kuwa Yesu ni Malaika mkuu Mikaeli, kiumbe cha kwanza kuumbwa, ambaye alifanyika mwanadamu, ambaye alikuwa mtu na akafa juu ya mti badala ya msalaba. Alitukuzwa kama kiumbe cha kiroho, na kufanyika tena Mikaeli, Malaika mkuu, wakati mwili wake uliyeyuka katika ya gesi.

Nina uhakika unatambua kuwa watu imani hizi potofu wana Yesu wa tofauti na Yesu wa kwenye Biblia, lakini je, unaweza kumuelezea Yesu wa ukweli, wa kibiblia? Mamilioni ya watu wana dhana ya akili ya yesu wa uongo, ambaye hawezi waokoa.

Ni muhimu uwe na uhakika na Imani yako kuhusu Yesu ili usidanganyike, na pia umtambulishe kwa wengine.

Angalizo kwa kiongozi wa darasa: Kwa taarifa zaidi kuhusu nini dini nyingine zinafundisha kuhusu Kristo, tazama kipengele kilicho mwisho wa somo lisemalo “Wasemayo Dini Nyingine”.

Yesu Masihi

► Ni nini baadhi ya utabiri wa Biblia kuhusu Masihi?

Injili nne zinamuwasilisha Yesu kama Masihi aliyetarajiwa wa Israeli. Mambo mbalimbali kuhusiana na Masihi yalitabiriwa. Angekuwa uzao wa mfalme Daudi na hivyo anastahili kuwa mfalme. Angewaokoa watu wake kutoka katika uonevu na vifungo. Angepakwa mafuta kipekee na Mungu kukamilisha kazi yake. Neno Masihi linamaanisha “Mpakwa Mafuta” ambao ulikuwa ni utambulisho wa wafalme katika Israeli.

Baadhi ya maelezo muhimu kuhusu Masihi katika Agano la Kale hayakuelezewa kwa uwazi hadi lilipoandikwa Agano Jipya. Kipaumbele chake ilikuwa ni kuwaokoa watu kutoka katika dhambi zao. (Soma Mathayo 1:21; Luka 1:74-75.) Ufalme wake haukujikita duniani, bali wa kiroho na wa kimbingu (Soma Yohana 18:36), Ingawa hatimaye ufalme wake utaifunika dunia yote (Wafilipi 2:10-11; Ufunuo 19:11-16; Ufunuo 20:6).

Neno Masihi ni neno la Kiebrania. Maana yake kigiriki ni Kristos, ambapo tunapata neno Kristo. Kutumia neno “Yesu Kristo” ni kutengeneza usemi kuwa Yesu ni Masihi.

Yesu ni Bwana

[1]Kanisa la kwanza walitumia neno Bwana kusema kuwa Yesu ana mamlaka kuu ambayo kwa hiyo mtu lazima watu watii. Waliposema “Yesu ni Bwana,” walikuwa wanasema kuwa ni Bwana wa yote, Muumbaji na Mungu wa ulimwengu. Tamko hili la imani liliwatofautisha Wakristo, kwa sababu Wakristo pekee waliamini kuwa mwanaume Yesu ambaye alitembea duniani alikuwa pia Mungu mmoja wa yote.

Maneno “Bwana Yesu Kristo” yanatengeneza tamko kuu. Wanasema Yesu ni Masihi na pia ni Mungu. Maneno yote matatu yapo katika Wafilipi 2:10-11. Mistari hiyo inatuambia kuwa wakati utakuja ambapo kila mtu katika dunia atatakiwa kukiri kuwa Yesu Kristo ni Bwana.

Siku tatu Maalumu

Imani yetu ya msingi kuhusu Yesu ingeweza kugawanyika katika sehemu tatu, zilizounganishwa na siku tatu za kipekee.

Krismasi inasheherekea kuzaliwa kwa Yesu na mama bikira, kwa kuwa Yesu alitungiwa mimba kwa uwezo wa Roho mtakatifu. (Soma Luka 1:34-35.) Ingawa Yesu alikuwa mwanadamu kwa sababu alizaliwa na mwanamke, alikuwa pia Mungu mwenyewe, muumbaji wa dunia aliyoiingia. Hii inashangaza lakini ni kweli: wakati Yesu alipokuwa mtoto, mama yake Mariamu alimbeba yule ambaye ndiye aliyemuumba.

Neno wana wa Mungu linatumika kwa waamini na malaika (Yohana 1:12; Ayubu 1:6), lakini Yesu ni Mwana wa Mungu katika namna ya kipekee (Yohana 3:16). Yeye ndiye pekee ambaye anashiriki kabisa asili ya Baba. Yeye ni picha kamili kabisa kwamba ni Mungu kama vile Baba alivyo. (Soma Waebrania 1:2-3.)

Asili ya Mungu na asili ya mwanadamu zilikuja pamoja ndani ya mtu Yesu. Hii inaitwa Kufanyika mwili au umwilisho, ambayo inamaanisha Mungu kuchukua mwili wa binadamu, kufanyika mtu. Yesu ndiye pekee ambaye angeweza kuwa mwokozi wetu kwa sababu ndiye mtu peke katika ulimwengu ambaye ni mwanadamu na Mungu vilevile.

Yesu ni Mwanadamu

Si ngumu kumtambua Yesu wa Agano Jipya kama mwanadamu kweli. Alichukuliwa mimba katika tumbo la mama, akakua, akajifunza, na akaendelea kama mwanadamu. (Soma Luka 2:52.) Alichoka, alilala, alijaribiwa, na alifanya karibu kila kitu ambacho wanadamu wanafanya, isipokuwa dhambi (Waebrania 4:14-15). Hata alikufa, Alitambulika kweli katika jamii ya wanadamu kwa kuwa mmoja wetu. (Soma Yohana 1:14.)

► Kwa nini ni muhimu kwamba Yesu ni mwanadamu?

Kwa sababu Yesu ni mwanadamu:

1. Angeteseka na kufa kama dhabihu (Waefeso 5:2, Waebrania 7:26-27). Kama angekuwa Mungu na si mwanadamu, asingeteseka na kufa kimwili.

2. Haki yake inaweza kutufanya wenye haki na kutupa uzima. Adamu wa kwanza aliwakilisha wanadamu wote alipofanya dhambi na kutengwa na Mungu. Hii ilileta kifo kwa watu wote. Yesu aliishi maisha yasiyo ya dhambi na alikamilisha matakwa yote ya Mungu. Anatoa uzima wa milele kwa wote wanaomtambua. Anaitwa Adamu wa mwisho katika Maandiko. (1 Wakorintho 15:22, 45-49; Warumi 5:17-19).

3. Anaweza kuwa kuhani wetu anayetuwakilisha kwa Mungu. Kama mpatanishi wetu, hakuwasiliana tu kwa ajili yetu, anatuwakilisha kiukweli. Ilikuwa ni muhimu kwa yeye kuwa mtu na kufanya upatanisho kati yetu na Mungu. (Soma Waebrania 2:17.) Kazi yake kama kuhani inatupatia wokovu wa milele. (Waebrania 5:9, Waebrania 10:5-7). Uanadamu wa Yesu ni sehemu muhimu ya injili. (Soma 1 Yohana 5:1.)

Angalizo kwa kiongozi wa darasa: Kwa ushahidi zaidi wa kibiblia kuwa Yesu alikuwa mwanadamu, tazama “Ushahidi wa kimaandiko wa ubinadamu wa Yesu” kipengele mwishoni mwa somo hili.

Yesu ni Mungu.

Yesu alidai kuwa Mungu.

[1]Yesu wa kwenye Biblia ni mwanadamu lakini si tu mwanadamu. Pia ni Mungu wa ulimwengu asiye na mwisho (asiyezuilika). Yesu alitoa madai haya Yeye mwenyewe. Alisema, “Mimi na Baba tu umoja” (Yohana 10:30). Aliposema haya, Wayahudi walitaka kumpiga mawe kwa sababu walielewa kuwa alisema kwamba yeye yu sawa na Mungu. Je! Yesu aliwaambia, “Hapana, mmenielewa sivyo. Mimi si Mungu kweli!”? Hapana, Yesu alikubali tafsiri yao juu ya maneno yake. Alifundisha kuwa yeye alikuwa sawa na Mungu Baba.

Yesu aliposema, “Yeye Ibrahimu asijakuwako, mimi niko,” (Yohana 8:58) alikuwa akidai kuwa NIKO wa Kutoka 3:14, Mungu mwenyewe aliyeko, wa ulimwengu. Wayahudi walijaribu kumpiga mawe tena kwa madai haya. (Yohana 8:59).

Yesu alitenda matendo ya kiungu alipokuwa duniani.

Yesu alitenda matendo ya kiungu wakati alipokuwa duniani. Alitoa uzima wa milele. (Soma Yohana 10:28.) Alisamehe dhambi (Marko 2:10). Haya ni mambo ambayo Mungu tu aweza kufanya.

Yesu aliposamehe dhambi za mtu aliyepooza, alimponya mtu yule kuthibitisha kuwa alikuwa na amri duniani ya kusamehe dhambi (Marko 2:5, 10-12). Tendo moja lilikuwa ni ushahidi wa lingine, tuweke sawa kwamba Yesu hakutenda muujiza wa uponyaji kama tu nabii aliyepakwa mafuta na Mungu. Yesu alikuwa na mamlaka ya kiungu na nguvu za kusamehe na kuponya pia.

Yesu pia alimfufua Lazaro baada ya kusema, “Mimi ndimi huo ufufuo, na uzima” (Yohana 11:25). Hili lilikuwa tendo lingine la kiungu lililosindikizwa na madai ya kiungu. Ni Mungu tu ndiye mwenye haki ya kudai kuwa ufufuo kwa sababu yeye pekee ndiye nguvu ya Mungu inayoweza kumfufua mtu yeyote toka katika mauti. Yesu alidai kuwa mpaji wa uhai na akampa Lazaro uhai, akionesha kwamba Yeye alikuwa jinsi alivyodai kuwa. Katika tukio hili, Yesu alijitofautisha wazi na manabii wengine na mitume ambao walifufua wafu kwa nguvu ya Mungu. Hakuna hata mmoja kati ya hawa alidai kuwa na nguvu zao pekee kufanya miujiza hii. Walikuwa tu ni vyombo vya kazi vya Mungu. Katika Yohana 5:21, Yesu alisema kuwa alifufua wafu kama vile ambavyo Baba alifufua.

Yesu alipofanya muujiza, alidhihirisha utukufu wake, (Yohana 2:11) utukufu kama wa mwana pekee wa Baba, amejaa neema na kweli (Yohana 1:14). Miujiza hii ilikuwa ni udhihirisho wa Mungu, utukufu wenye nguvu wa Mwana, ukidhihirisha kuwa alikuwa Mungu.

Yesu ni Muumbaji na Mtunzaji

Kwa mujibu wa Mtume Yohana na Paulo, Yesu aliumba vitu vyote na huvishikilia pamoja, na vitu vyote huwepo kwa ajili yake. (Soma Yohana 1:3; Wakolosai 1:17.) Hakika haya yasingesemwa na yeyote isipokuwa Mungu.

► Kwa nini ni muhimu sisi tujue kuwa Yesu ni Mungu?

Kwa sababu Yesu ni Mungu,

1. Kifo chake cha kidhabihu ni cha thamani isiyo na kipimo. — yatosha kwa msamaha wa dhambi za ulimwengu. (1 Yohana 2:2).

2. Ana nguvu za kutuokoa; ndiye njia, kweli na uzima (Yohana 14:6).

3. Yatupasa kumwabudu kama tunavyomwabudu Baba. (Soma Yohana 5:23).

Kama tutashindwa kumuona Yesu kama Mungu, hatutamuheshimu kama Mungu. Hatuwezi kuokolewa kama hatuwaheshimu Yesu na Baba kama Mungu.

Ukristo umejikita si tu katika mafundisho na matendo ya Yesu, bali katika uanadamu wa pekee wa Yesu. Si tu mwalimu wa ujumbe wa wokovu. Yeye mwenyewe ni mwokozi, na yeye pekee— Mungu-mtu — angekuwa mwokozi.

Angalizo kwa kiongozi wa darasa: Kwa ushahidi zaidi kuwa Yesu ni Mungu, tazama “Ushahidi wa Maandiko wa Uungu wa Yesu” kipengele mwishoni wa somo hili.

Yesu ni mtu mmoja

Ingawa Yesu ana asili yote ya Mungu na asili yote ya ubinadamu, si watu wawili waliounganishwa kwa pamoja. Asili mbili zinatengeneza mtu mmoja ndani yake, katika uwiano kamili. Yesu ndiye Mungu-mtu, na kila tendo la Yesu linapaswa kueleweka kwa mlengo wa ubinadamu kamili na uungu kamili. Kanisa limekuwa likifundisha mara zote kuwa asili hizi mbili katika Yesu haziwezi kutenganishwa moja na nyingine, na bado hazichanganywi katika namna inayoweza kusababisha asili moja kupoteza tabia zake.[2]

Yaweza kuwa ya msaada kulinganisha asili ya Yesu na asili ya Maandiko Matakatifu. Kama Yesu, Biblia imejaa uungu na ubinadamu. Kuwa kitabu cha kibinadamu, kina tabia kama za kitabu chochote cha kibinadamu, isipokuwa kwamba hakina makosa. Kuwa kitabu cha Kiungu, kinaonyesha tabia ambazo hakuna kitabu kingine chaweza onyesha. Katika namna ile ile, Yesu anaonyesha tabia za kibinadamu na za kiungu pia. Ukweli kwamba Biblia inaonyesha tabia za Kiungu haifanyi kitabu hiki kutokuwa cha kibinadamu. Vivyo hivyo, ukweli kuwa Yesu anafanya kazi katika uungu haimfanyi kutokuwa mwanadamu. Na ukweli kuwa Yesu anafanya kazi katika ubinadamu haimfanyi kutokuwa Mungu.

Makosa ya kawaida ya Fundisho

Makosa ya kawaida ya kifundisho ambayo watu hufanya mara nyingi wakimuongelea Kristo ni haya:

• Kukataa kuwa Yesu ni Mungu

• Kukataa kuwa Yesu ni mwanadamu

• Kupunguza aidha uungu wake au ubinadamu kana kwamba si wa muhimu

• Kukataa umoja wa utu wa Yesu

Kosa lolote kati ya haya ni kukataa kufanyika mwili (umwilisho). Kufanyika mwili (Umwilisho) kulikuwa kwa muhimu kwa ajili ya wokovu wetu, hivyo kama mtu akikataa kufanyika mwili ataamini katika injili ya uongo na njia ya uongo ya kupata wokovu.

Angalizo kwa kiongozi wa darasa: Mshiriki wa darasa anaweza kuelezea sehemu hii.

Mashahidi wa Yehova husema kuwa Yesu alikuwa mtu. Wanaamini kuwa alikuwa mtu mkuu aliyewahi kuishi, lakini bado ni mtu tu. Ndiyo maana hawaamini kuwa kifo chake ni dhabihu tosha kwa wokovu wetu. Wana injili ya wokovu kwa matendo. Hudai kuwa Wakristo, lakini wao ni dini tofauti.

Wamormoni huamini kuwa Yesu alikuwa ni roho iliyoumbwa na Mungu, kama ndugu kwa Lusifa. Alitumwa kuzaliwa duniani kama mtu Yesu. Wamormoni hawaamini kuwa Yesu ni Mungu.

Waislamu huamini kuwa Yesu ni nabii aliyetumwa na Mungu. Hawaamini kuwa ni Mungu na kwamba kuna utatu mtakatifu. Hawaamini kuwa alisulubiwa au kwamba alifufuka katika wafu.

Wahindu na Wabudha huamini kuwa Yesu alikuwa mtu mtakatifu aliyefanya miujiza. Si wa muhimu kwa dini zao. Hawaamini katika Mungu aliye Muumbaji na Bwana, hivyo hawaamini kuwa Yesu ni Mungu katika mwili.

Ijumaa kuu ni siku ambayo Yesu alisulubiwa. Katika siku hii ya ajabu na ya kutisha, Yesu alichukua dhambi zetu msalabani. Alikufa kama dhabihu kwa ajili ya dhambi zetu ili tusamehewe.

Dhabihu ilikuwa ni muhimu.

Dhabihu ilitakiwa kutolewa ili Mungu atusamehe na abakie kuwa mwenye haki na mtakatifu. Kanuni hii ilifundishwa katika Agano la Kale kwa dhabihu ambazo Mungu alizitaka. (Waebrania 9:22). Kama Mungu angesamehe tu dhambi pasipo msingi, ingeonyesha kuwa si wa haki na kwamba dhambi si mbaya sana. Lakini hakuna ambaye angeangalia kifo cha Yesu kwa kusulubiwa na akasema kuwa dhambi si mbaya sana. Dhabihu yake ilitoa msingi wa msamaha wetu.

Yesu pekee ndiye angekuwa dhabihu toshelevu

► Kwa nini Yesu pekee ndiye angekuwa dhabihu kwa dhambi zetu?

Haki ya Mungu na uzito wa dhambi vilihitaji dhabihu kuu kuliko kitu chochote kilichoumbwa. (Soma Waebrania 10:4.) Tumetenda dhambi dhidi ya Mungu asiye na mwisho, ambapo inatuletea hatia isiyo na mwisho. Ndiyo maana Yesu pekee ndiye angekuwa dhabibu. Alikidhi kwa sababu yeye ni Mungu na kwa sababu ni mwanadamu. Kwa sababu ya uungu wake, hakuwa na dhambi, na dhabihu yake ilikuwa na thamani isiyo na mwisho. Kwa sababu ya ubinadamu wake, angetuwakilisha na kufa badala yetu.

Damu ya Yesu inawakilisha dhabihu yake ya mauti

Mungu alifundisha watu kuhusu upatanisho kwa kuanzisha mfumo wa dhabihu. Makuhani walichinja wanyama na kutoa damu za wanyama hao kuwakilisha mauti zao. Kitabu cha Waebrania kinasema kuwa pasipo kumwaga damu hakuna ondoleo (Waebrania 9:18-22).

Mungu aliamuru watu wachukulie damu kwa namna ya pekee kwa sababu iliwakilisha uhai wa kiumbe (Mambo ya Walawi 17:11, 14). Kumwaga damu ilimaanisha kuua (Mwanzo 9:5-6). Damu iliyotumika katika hekalu ilimaanisha kuwa mnyama aliuwawa.

Kifo cha Yesu kilikuwa dhabihu ya mwisho iliyofanya wokovu upatikane kwa kila mtu na kwa wakati wote. (Soma Waebrania 10:4, 12.) Alikabidhi damu yake mbinguni akiwakilisha dhabihu yake ya kifo. (Soma Waebrania 9:12, 24.) Damu ya Yesu, inayowakilisha kifo chake, inatupatia wokovu kwa sababu alikufa kama dhabihu ili tuweze kuokolewa

Kwa nini Yesu alikufa msalabani badala ya njia nyingine? Katika nyakati za agano la kale, kwa mtu kuangikwa msalabani ilikuwa ni laana ya Mungu (Kumbukumbu la Torati 21:23). Mtume Paulo anatuambia kuwa Yesu alichukua laana ya Mungu juu yake mwenyewe kwa kuangikwa juu ya msalaba (Wagalatia 3:13).

Yesu aliwaleta pamoja Mungu na Mwanadamu

Yesu alikuja kupatanisha pande mbili zilizokuwa zimetengana-Mungu na mwanadamu. Kama mpatanishi, Yesu ilibidi awakilishe pande zote kwa wakati mmoja. Kama Mungu, alimuwakilisha Mungu kwa mwanadamu. Kama mwanadamu, alimuwakilisha mwanadamu kwa Mungu. Kwa kuwakilisha pande zote kikamilifu, Yesu aliwaleta pamoja Mungu na Mwanadamu. Alifanya kile ambacho kila pande ilipaswa kufanya ili kuleta upatanisho.

Kuna namna nyingi za jadi za kusherehekea Pasaka, lakini watu wengi hawatambui maana ya vitu wanavyovifanya, na wanaweza wasijue ni nini cha muhimu kuhusu ufufuo wa Yesu. Yesu alifufuka toka kaburini asubuhi ya siku ya Pasaka, siku ya tatu baada ya kusulubiwa. Alionyesha kuwa alikuwa na nguvu dhidi ya dhambi, mauti na shetani. Hakuchukua tu mauti yetu, bali aliishinda kwa uzima. Kwa sababu alikuwa mshindi, sisi pia twaweza kuwa washindi.

Yesu alifufuka kimwili

Kuna wakati Yesu aliwaambia Wayahudi, “Livunjeni hekalu hili, nami katika siku tatu nitalisimamisha.” Ingawa Wayahudi walijua alikuwa akimaanisha hekalu ambalo Herode alijenga, injili ya Yohana inaelezea kuwa Yesu kwa kweli alikuwa akimaanisha mwili wake (Yohana 2:19-21). Injili zote zinarekodi ukweli kuwa kaburi la Yesu lilikuwa wazi siku tatu baada ya yeye kuzikwa ndani yake. Yesu alijionyesha mwenyewe kwa wanafunzi baada ya ufufuo, akisema “Nishikenishikeni, mwone; kwa kuwa roho haina mwili na mifupa kama mnavyoniona mimi kuwa nayo” (Luka 24:39). Alikuwa anathibitisha kuwa alifufuka kimwili toka kwa wafu.

►Ni tofauti gani ingeleta kama Yesu angekuwa hajafufuka toka kwa wafu?

1. Ufufuo wa mwili wa Yesu ulidhihirisha ushindi wake kamili dhidi ya dhambi na mauti. Soma Wakolosai 2:12-15; Ufunuo 1:17-18.)

2. Ufufuo wa mwili wa Yesu ulithibitisha kuwa alikuwa yule aliyedai kuwa. (Mathayo 17:22-23, Yohana 2:16-22). Hivyo, iliithibitisha injili pia. Watu ambao wanakataa kuwa Yesu alifufuka toka katika wafu hukataa pia injili. (Soma 1 Wakorintho 15:17.)

3. Ufufuo wa mwili wa Yesu unatuhakikishia kuwa sisi pia tutafufuliwa toka kwa wafu. Yesu aliahidi kuwa atafufua wafu. Ahadi hiyo isingepatikana endapo yeye mwenyewe asingefufuka. (Yohana 5:28-29). Tutafufuliwa na kuwa na miili kama mwili wa utukufu wa Yesu. (Soma 1 Yohana 3:2.)

Yesu bado ni Mwanadamu

Ufufuo unatuonyesha kuwa kufanyika mwili ni kwa kudumu. Yesu mara zote atakuwa mwanadamu na pia Mungu vile vile. Yesu, bado Mungu mtu, sasa anatuombea kwa Baba (Warumi 8:34), na siku moja atarudi kutuchua kwenda mbinguni (1 Wathesalonike 4:16-17).

Kama waamini, tunaishi katika mahusiano ya kila siku pamoja na Kristo. Si tu mtu wa kihistoria, na si tu Mungu aliye mbinguni, lakini yupo pamoja nasi. Aliahidi kuwa na wanafunzi wake siku zote. (Mathayo 28:20).

Anapatikana katika namna ya kipekee katika kanisa. Yeye ni kichwa cha kanisa., na kanisa linaitwa mwili wake (Waefeso 1:22-23). Huliongoza kanisa, hulishikilia pamoja na kulihudumia (Soma Wakolosai 2:19.)

Mtu anayekubali ukweli kuhusu Yesu anatakiwa kuitikia kwa Imani na utii. Unaweza kuwasaidia wengine kuwa waamini kwa ombi kama hili hapa chini.

Baba, ninakushukuru kwa kunipenda upeo na kumtuma mwanao Yesu duniani kwa ajili yangu. Ninaamini kuwa Yesu ni Mungu aliyekuwa mtu asiye na dhambi ambaye alikufa na kufufuka tena ili kwamba nisamehewe dhambi zangu na kurejeshwa katika uhusiano na wewe. Nisamehe sana dhambi zote nilizokwisha kutenda. Ninajua dhambi zangu zilimgongomelea Yesu msalabani. Saa hii, ninageuka toka katika kila kitu ninachojua si sahihi, na ninakupokea Yesu kama Bwana na Mwokozi. Niongoze kuanzia sasa na kuendelea. Ninaenda kuishi kwa ajili yako milele! Asante kwa kunisamehe. Ninakupenda. Amina.

► Someni tamko la Imani kwa pamoja angalau mara mbili.

Yesu ni masihi na Bwana wa yote, mwana wa Mungu aliyezaliwa kwa bikira, akiwa na asili yote ya ubinadamu na asili yote ya uungu ndani ya mtu mmoja. Aliishi maisha yasiyo ya dhambi na akafa kama dhabihu ili kwamba dhambi zetu zisamehewe, alifufuka katika wafu na atawafufua waamini wote atakaporejea. Ufalme wake ni wa milele na usio na mwisho.

Angalizo kwa kiongozi wa darasa: Sehemu zote mbili hii na inayofuata ni za hiari. Darasa laweza kuzimaliza ikiwa wanataka Ushahidi Zaidi wa Kiblia kwa pointi hizi.

Yesu alikuwa ni uzao wa Eva (Mwanzo 3:15), uzao wa Ibrahimu (Mwanzo 22:18 – linganisha na Matendo ya Mitume 3:25), aliyezaliwa toka kwa mwanamke (Wagalatia 4:4), aliyezaliwa toka kwa Mariamu (Mathayo 1:21-25), aliyeitwa mwana wa Adamu (Mathayo 13:37), na aliyepitia mchakato wa kawaida wa kukomaa (Luka 2:40, 52).

Aliporudi kutembelea katika mji wa nyumbani kwake, mwitikio wa watu unaonyesha kuwa utoto wake ulikuwa wa kawaida (Mathayo 13:54-56).

Alikuwa na mwili ili aweze kutii kama mwanadamu anavyopaswa kutii (Waebrania 10:5-9); alifanyika mwili na damu (Waebrania 2:14); alifanywa kuwa kama sisi ili ateseke kama sisi Waebrania 2:10-18); alikamilishwa kupitia mateso (Waebrania 2:9-10); na alikuwa chini ya majaribu ya kibinadamu (Waebrania 4:15).

Alichukua mfano wa mwanadamu (Wafilipi 2:6-8).

Alikuwa ni neno la uzima la Mungu na alifanyika kuwa mwili na aliishi duniani. (Yohana 1:14).

Uanadamu wa Yesu ni taarifa muhimu ya Imani ya Kikristo (Yohana 1:14; 1 Yohana 4:2-3).

Kuna njia tatu ambazo Yesu anashuhudiwa kuwa Mungu:

1. Anaitwa Mungu.

2. Anaonekana kuwa na tabia za Mungu.

3. Anaonekana katika majukumu ya Mungu.

Yesu anaitwa Mungu

• Yohana 1:1, 14, inasema kuwa Neno alikuwa ni Mungu.

• Yohana 12:41 inatuambia kuwa Isaya alimwona Yesu

• Matendo ya Mitume 20:28 inasema kuwa kanisa la Mungu lilinunuliwa kwa damu yake

• Warumi 9:5 ilisema kuwa Kristo alikuja, ambaye ni Mungu, mbarikiwa milele

• Tito 2:13 inamrejea yeye kama Kristo Yesu, Mungu mkuu na Mwokozi wetu

• Mathayo 1:23 (inanukuu Isaya 7:14) inasema kuwa jina lake humaanisha “Mungu pamoja nasi.”

• Isaya 9:6 inasema kuwa jina lake ataitwa Mungu mwenye nguvu.

• 1 Timotheo 3:16 inasema kuwa Mungu alifunuliwa katika mwili, alihubiriwa katika mataifa, na kupokelewa katika utukufu.

• Katika Yohana 10:30, 33, Yesu alisema kuwa yu mmoja pamoja na Baba.

• Katika Yohana 5:17-18, Wayahudi walijua kuwa alisema yu sawa na Baba

• Katika Yohana 14:9 he said, “Aliyeniona mimi amemwona Baba.”

• Katika Yohana 20:28-29, Tomaso aliona vidonda vyake na alisema. “Bwana wangu na Mungu wangu,” na Yesu aliwabariki wale walioamini.

• Katika Yohana 8:58, alijita NIKO, na Wayahudi walijua ilikuwa ni madai ya kuwa Mungu

• Katika Ufunuo 1:17, Ufunuo 2:8, na Ufunuo 22:13, alidai kuwa wa kwanza na wa mwisho, na Isaya 44:6 inaonyesha hili ni neno kwa Mungu.

• Waebrania 1:2-3 inatuambia kuwa ni chapa kamili ya Baba

• Katika Waebrania 1:8, anaelezewa kama Mungu

Yesu ana sifa za Mungu

Yuko kila mahali. Katika Mathayo 18:20, Yesu alisema kuwa alikuwepo popote waamini wawili ama watatu walikuwa pamoja. Katika Mathayo 28:20, aliahidi kuwa pamoja na waamini siku zote

Mwenye nguvu zote. Waebrania 1:3 inasema kuwa anavichukua vitu vyote kwa amri ya uweza wake. Wafilipi 3:21 inasema inasema kuwa anavitiisha vitu vyote viwe chini yake.

Wa milele. Waebrania 13:8 inatuambia kuwa yeye ni yule yule milele. Waebrania 1:12 pia inasema kuwa yeye ni yule yule milele. Aya hii ni nukuu ya Zaburi 102:25-27 inayozungumzia juu ya Mungu

Anajua yote. Yohana 2:24-25 inatuambia kuwa yeye aliwajua wote, na aliyajua yale yaliyomo ndani ya mioyo ya wanadamu. Katika Yohana 10:15, Alidai kumjua Baba kama vile Baba alivyomjua

Yesu ana majukumu ya Mungu

• Yesu ni muumbaji (Wakolosai 1:16; Waebrania 1:10).

• Yesu husamehe dhambi (Luka 5:20-24, Luka 7:48).

• Yesu atakuwa hakimu katika hukumu ya mwisho (Mathayo 25:31-46; 2 Wakorintho 5:10).

• Yesu anaabudiwa kama Baba alivyo (Yohana 5:22-23; Waebrania 1:6; Ufunuo 5:12-13).

(1) Zoezi la Kifungu: Kila mwanafunzi atapewa mojawapo ya vifungu vilivyoorodheshwa hapa chini. Kabla ya kipindi kinachofuata cha darasa, unapaswa kusoma kifungu na kuandika aya kuhusiana na somo la somo hili.

• Marko 1:1-12

• Yohana 5:19-26

• Yohana 6:44-51

• Yohana 8:51-59

• Matendo ya Mitume 2:22-36

• Ufunuo 1:12-18

(2) Jaribio: Utaanza kipindi kijacho cha darasa kwa jaribio juu la Somo 13. Jifunze kwa umakini maswali wakati wa maandalizi.

(3) Zoezi la Kufundisha: Kumbuka kupanga na kuripoti muda wako wa kufundisha nje ya darasa.

(1) Ni nini kilikuwa kipaumbele cha Masihi?

(2) Kanisa la kwanza walimaanisha nini waliposema “Yesu ni Bwana”?

(3) Ni kwa namna gani Yesu ni Mwana wa pekee wa Mungu?

(4) Kufanyika mwili/umwilisho ni nini?

(5) Orodhesha sababu tatu zinaoonesha umuhimu kwamba Yesu ni mwanadamu.

(6) Orodhesha sababu tatu zinazoonesha ni muhimu kwa sisi kufahamu kwamba Yesu ni Mungu.

(7) Ni kwa sababu gani mbili kwamba sadaka ya Yesu ni muhimu na lazima?

(8) Kwa nini Yesu alikufa msalabani badala ya njia nyingine?

(9) Orodhesha sababu tatu za kwa nini Ufufuo wa Yesu ni muhimu sana.