(1) Mwanafunzi atakuwa na uwezo wa kuelezea:

• Upendeleo na umuhimu wa ushindi wa mwamini dhidi ya dhambi.

• Neema ya Mungu inayosababisha maisha yenye ushindi.

• Maisha ya Kiroho ambayo huja kutokana na uhusiano na Kristo.

• Maonyo katika maandiko kuhusiana kuanguka toka neema.

• Tamko la Imani ya Kikristo kuhusiana na masuala mahususi ya wokovu.

(2) Mwanafunzi atakuwa na matarajio makubwa ya kuishi maisha ya ushindi dhidi ya dhambi.

► Soma Warumi 6 kwa pamoja. Kifungu hiki kinatueleza nini kuhusu matokeo ya wokovu?

Uthibitisho binafsi wa wokovu ni moja kati ya mada kuu katika waraka wa 1 Yohana. Yohana anatoa sababu zake kwa ajili ya kuandika waraka huu; “Nimewaandikia ninyi mambo hayo, ili mjue ya kuwa mna uzima wa milele, ninyi mnaoliamini Jina la Mwana wa Mungu” (1 Yohana 5:13).

► Mtu anapaswa kufanya nini endapo ana mashaka kama ameokoka au la?

Mtume alijua kwamba kutakuwa na nyakati ambapo mwamini watahitaji uthibitisho kwamba ameoka. Anaonesha kwamba ni sahihi kwa mwamini kutafuta ushahidi ambao utakuwa msingi wa uthibitisho wake. Katika waraka wote, anatoa mifano kadhaa ya ushahidi, anasema “na katika hili twajua”.[1] Anasema kwamba waamini wanaweza kutumia ushahidi huu ili kuihakikishia mioyo yao (1 Yohana 3:19).

Sifa ya mwamini ambayo inasisitizwa katika waraka wa 1 Yohana ni ushindi dhidi ya dhambi. Mtume alisema, “Watoto wangu wadogo, nawaandikia haya ili kwamba msitende dhambi” (1 Yohana 2:1). Kwa tamko hili, mtume anaonesha kwamba anapaswa kuishi maisha ya uhuru kutokana na dhambi ya makusudi.[2] Anaandika kuwaonesha umuhimu wa maisha ya ushindi.

…Na kama mtu akitenda dhambi tunaye Mwombezi kwa Baba, Yesu Kristo mwenye haki, naye ndiye kipatanisho kwa dhambi zetu; wala si kwa dhambi zetu tu, bali na kwa dhambi za ulimwengu wote (1 Yohana 2:1-2).

Hapa Yohana anatambua kwamba dhambi inaweza kutokea, ingawaje si jambo la lazima. Anatuhakikishia kwamba ikiwa mwamini atatenda dhambi, dhabihu ya Kristo inaweza kulipia dhambi hiyo. Hii haimaanishi kwamba mwamini anaweza kurudi katika dhambi na kusamehewa moja kwa moja bila toba. Mstari huo unasema tu kwamba dhabihu inapatikana, kama ilivyo kwa ulimwengu wote na kwa kila dhambi. Tunajua kwamba ulimwengu wote haujaokolewa moja kwa moja. Ikiwa mwamini atatenda dhambi, ni lazima atubu kwa ajili ya uhusiano wake na Mungu.

Mistari fuatayo kutoka katika 1 Yohana inaonesha kwamba utofauti mkubwa ni ushindi wa mwamini dhidi ya dhambi ya makusudi. Vifungu vya maneno katika mabano na maelezo yalioongezwa.

Na katika hili twajua ya kuwa tumemjua yeye, ikiwa tunashika amri zake [Mtu ambaye hamtii Mungu hukosa ushahidi]. Yeye asemaye, Nimemjua, wala hazishiki amri zake, ni mwongo, wala kweli haimo ndani yake (1 Yohana 2:3-4).

Kila atendaye dhambi, afanya uasi; kwa kuwa dhambi ni uasi. Nanyi mnajua ya kuwa yeye alidhihirishwa, ili aziondoe dhambi; na dhambi haimo ndani yake. Kila akaaye ndani yake hatendi dhambi; kila atendaye dhambi hakumwona yeye, wala hakumtambua (1 Yohana 3:4-6).

Watoto wadogo, mtu na asiwadanganye; atendaye haki yuna haki [Mtu hawezi kuitwa mwenye haki wakati bado anaendelea kutenda dhambi], kama yeye alivyo na haki; atendaye dhambi ni wa Ibilisi; kwa kuwa Ibilisi hutenda dhambi tangu mwanzo. Kwa kusudi hili Mwana wa Mungu alidhihirishwa, ili azivunje kazi za Ibilisi (1 Yohana 3:7-8).

Kila mtu aliyezaliwa na Mungu hatendi dhambi, kwa sababu uzao wake wakaa ndani yake; wala hawezi kutenda dhambi kwa sababu amezaliwa kutokana na Mungu (1 Yohana 3:9).

Naye azishikaye amri zake hukaa ndani yake yeye naye ndani yake. Na katika hili tunajua ya kuwa anakaa ndani yetu, kwa huyo Roho aliyetupa (1 Yohana 3:24). [Kubakia ndani ya Kristo hukinzana na mwendelezo wa kuvunja sheria ya amri za Mungu.]

Katika hili twajua kwamba twawapenda watoto wa Mungu, tumpendapo Mungu, na kuzishika amri zake. Kwa maana huku ndiko kumpenda Mungu, kwamba tuzishike amri zake (1 Yohana 5:2-3). [Upendo halisi huhamasisha utii. Kutotii kunaonesha kukosa upendo.]

Kwa maana kila kitu kilichozaliwa na Mungu huushinda ulimwengu [majaribu yake na roho]. na huku ndiko kushinda kuushindako ulimwengu, hiyo imani yetu (1 Yohana 5:4).

Twajua ya kuwa kila mtu aliyezaliwa na Mungu hatendi dhambi; bali yeye aliyezaliwa na Mungu hujilinda [hulinda], wala yule mwovu hamgusi (1 Yohana 5:18).

► Ni sifa zipi za kipekee zinazomtofautisha mwamini ambazo ziko wazi katika mistari hii?

Kutokana na mistari hii, inaonekana wazi kwamba sifa ya kipekee ya mwamini ni kwamba anatakiwa kuishi katika utii kwa Mungu. Ushindi dhidi ya dhambi ya makusudi ni upendeleo wa kipekee kwa mwamini.

Wakati mwingine watu ambao hukana kwamba mwamini anaweza kuishi maisha ya ushindi dhidi ya dhambi ya makusudi hunukuu 1 Yohana 1:8: “Tukisema kwamba hatuna dhambi, twajidanganya wenyewe, wala kweli haimo mwetu.” Lakini inamaanisha nini kuwa na dhambi? Je, inamaanisha kwamba hata mwamini anaweza kuendelea kufanya dhambi ya makusudi? Hilo haliwezi kuwa sawasawa na tamko lake katika 1 Yohana 3 ambalo limenukuliwa hapo juu. Ni kwa namna gani Yohana ametoa matamko hayo katika sura ya 3 endapo hapo mwanzoni alisema, “Kila Mtu, akiwemo kila mwamini, huendelea kutenda dhambi”? Hilo lisingelileta mantiki.

Muktadha unaonyesha maana. Katika 1 Yohana 1:7, utakaso wa dhambi umeahidiwa. Utakaso huu ni kwa wale wanaotembea katika nuru, yaani wanaoishi kulingana na kweli, katika utii kwa Mungu. Wale wanaoishi sasa katika utii kwa Mungu wanatakaswa dhambi zao za zamani kwa damu ya Kristo.

Lakini wanaweza kuwepo watu wanaokataa kwamba wametenda dhambi na wanahitaji kutakaswa. Hao ndio wale wanaosema kwamba hawana dhambi na wanajidanganya wenyewe. Wanadai kwamba hajawawi kutenda dhambi, au kwamba walitatua tatizo lao la dhambi pasipo Kristo.

Tena katika 1 Yohana 1:9, msamaha na utakaso vimeahidiwa. Katika 1 Yohana 1:10 anasema tena kwamba wale wanaosema hawajatenda dhambi wanampinga Mungu mwenyewe.

Yohana alikuwa anaandika ili kusahihisha kosa la wale ambao walidhani hawahitaji utakaso na msamaha unaotolewa na Kristo—wale ambao walidhani hawahitaji kuokolewa. Alikuwa hasemi kwamba hata waamini wanaendelea kutenda dhambi, kwa maana hilo lingepingana na msisitizo wake mkuu na kauli zake za moja kwa moja katika waraka huu.

Maisha katika ushindi hayajawahi kuwa rahisi kwa sababu ya asili ya dhambi inayorithiwa na udhaifu wa kibinadamu. Kwa sababu ya haya, watu wengi wanaamini kwamba kuishi pasipo kufanya dhambi ya makusudi haiwezekani. Lakini neema ya Mungu ina majibu kwa ajili ya matatizo hayo yote.

► Upotovu Unaorithiwa ni nini?

Upotovu Unaorithiwa ni uharibifu wa asili ya maadili ya mwanadamu ambayo tangu kuzaliwa mara zote huelekea dhambi. Baada ya kuokolewa, mwamini huangaika na hali hii ya kuielekea dhambi. Lakini Mungu hutoa neema sio tu kwa ajili ya ushindi wa kila siku, lakini pia kwa ajili ya kutakasa Upotovu Unaorithiwa (Matendo ya Mitume 15:9; 1 Wathesalonike 5:23; 1 Yohana 1:7).

Asili ya dhambi sio hali ambayo tunapaswa kujiweka chini yake Maisha yetu yote. Ili kuishi katika ushindi, mwamini anahitaji kuja katika pointi ambayo anakabidhi moyo wake kwa Mungu pasipo kujibakiza (Warumi 12:1). Roho Mtakatifu anamjaza mwamini, anamsaidia kumpenda Mungu kikamilifu.

► Udhaifu wa Kibinadamu ni nini?

Udhaifu wa Kibinadamu ni mipaka ya kimwili au kiakili au makosa. Kwa sababu ya anguko la Adamu dhambini, na anguko la mwanadamu kupitia dhambi inayoendela, tunakuwa dhaifu kiakili, kimwili, na kihisia kuliko namna ambavyo Mungu alivyotusanifu/alivyotuumba ili tuwe.

[1]Udhaifu wa Kibinadamu hutusababisha sisi kukosea. Tunaweza kushindwa kufahamu jambo sahihi la kufanya katika hali husika. Tunaweza kukosea mawazo kuhusiana na baadhi ya madaraja ya watu au jamii ya watu. Mawazo yaliyokosewa hayawezi kusahihishwa mara moja mtu anapookoka. Makosa ya kimtazamo husababisha matendo yasiyo sahihi kwa sababu kama mtu akikosea kuhusiana na kile anachotakiwa kufanya, atafanya jambo lisilo sahihi.

Udhaifu unaweza kumsababisha mtu kuhangaika kwa sababu mbalimbali. Labda ni kwa sababu hajajifunza kuzitendea kazi kanuni za Kimaandiko. Labda bado hajakuza tabia au nidhamu ambazo zitaweza kumsaidia yeye kuzuia tamaa zake. Labda hana tabia za kila siku ambazo zitamsaidia kumfanya imara. Labda hajaelewa umuhimu wa kutembea katika Roho.

Hatupaswi kufanya haraka kuwahukumu wengine, kwa sababu mara zote hatufahamu ni lini wanatenda dhambi ya makusudi. Mara nyingi watu hufanya makosa kwa sababu ya kukosa ufahamu na ukomavu Kiroho.

Je, umewahi kuwa na jaribu ambalo hukuwahi kufikiri kwamba amewahi kulipitia? Je, umewahi kushangaa endapo inawezekana kuishi katika ushindi kamilifu dhidi ya dhambi? Mungu ameahidi neema ya kutuwezesha ambayo ni zaidi ya fidia kwa ajili ya udhaifu wetu katika majaribu:

Jaribu halikuwapata ninyi, isipokuwa lililo kawaida ya wanadamu; ila Mungu ni mwaminifu; ambaye hatawaacha mjaribiwe kupita mwezavyo; lakini pamoja na lile jaribu atafanya na mlango wa kutokea, ili mweze kustahimili (1 Wakorintho 10:13).

► Ni mambo gani tunayafahamu kutoka katika mstari huu?

Mstari huu unatueleza mambo kadhaa muhimu.

1. Majaribu huja kwa sababu ya uanadamu wetu. Hiyo inamaana kwamba mahangaiko yako sio ya kipekee kwako.

2. Mungu anafahamu mipaka yetu. Huelewa ni kwa kiasi gani tunaweza kuvumulia. Hatufahamu ni kwa kiasi gani tunaweza kuvumilia, lakini Yeye anafahamu.

3. Mungu hudhibiti majaribu yanayokuja kwetu. Hutaka sisi kuishi katika ushindi. Kulingana na mstari huu, wakati wote ushindi unawezekana.

4. Mungu hutoa kile kinachohitajikwa kwa ajili ya ushindi. Hufanya njia kwa ajili ya kutokea. Mungu amekusudia sisi kuishi katika ushindi. Hutoa neema kwa ajili ya maisha ya ushindi.

► Geukia Warumi 8 na uangalie mistari ambayo imetumika katika sehemu hii.

[1]Warumi 8 inatupa maelezo ya ajabu ya kazi za Roho katika maisha ya mwamini. Warumi 8:26 inatuambia sisi kwamba hata hatufahamu namna ya kuomba kama tunavyotakiwa, bali Roho Mtakatifu hutuomba kupitia sisi.

Sura hii inatueleza sisi namna ya kuishi maisha ya ushindi. Hatutahukumiwa endapo tutafuata Roho badala ya mwili (Warumi 8:1, 4). Tunaweza kutimiliza haki ya Mungu ile anayotarajia kutoka kwetu, kwa sababu nguvu ya Roho inatenda kazi ndani yetu (Warumi 8:4).

Endapo mtu anadhibitiwa au anaongozwa na asili ya dhambi, hawezi kumpendeza Mungu (Warumi 8:8), amehukumiwa (Warumi 8:1), na ataadhibiwa na Mungu (“kufa” katika Warumi 8:13). Bali kwa nguvu na uongozi wa Roho Mtakatifu, tunaweza kuyafisha matendo ya dhambi (Warumi 8:13-14).

Katika Yohana 15:1-10 kuna sitiari maarufu sana ya mzabibu na matawi. Inajibu baadhi ya maswali muhimu sana.

Ni kwa namna gani tunakaa au tunabakia ndani ya Kristo? “Mkizishika amri zangu, mtakaa katika pendo langu” (Yohana 15:10). Kuacha kukaa au kubakia ndani ya Kristo kunamaanisha mtu ameacha kumtii Yeye. Kisha nini kinatokea?

“Mtu asipokaa ndani yangu, hutupwa nje kama tawi na kunyauka; watu huyakusanya na kuyatupa motoni yakateketea” (Yohana 15:6). Endapo mtu asipotii, na kisha akaacha kukaa au kubakia ndani ya Kristo, amekataliwa. Kielelezo cha matawi kuchomwa kinaonesha kukataliwa kikamilifu.

“Kaeni ndani yangu, nami ndani yenu. Kama vile tawi lisivyoweza kuzaa peke yake, lisipokaa ndani ya mzabibu; kadhalika nanyi, msipokaa ndani yangu” (Yohana 15:4). “Kila tawi ndani yangu lisilozaa huliondoa” (Yohana 15:2). Tusipokaa ndani ya Kristo kwa njia ya utii, hatuwezi kuzaa matunda. Kuzaa matunda kunamaanisha kuishi maisha yaliyobadilishwa, yaliyobarikiwa, na yanayo ongozwa na neema ya Mungu. Mtu anapomwasi Mungu, hujitenga na mtiririko wa uzima ambao Mungu hutoa, na hawezi tena kuishi katika neema ya Mungu. Yule asiyezaa matunda hukataliwa.

Kristo kama mzabibu hutupa sisi uzima (Yohana 15:6). Wokovu hupatikana kwa njia ya mahusiano. Kutengwa kutoka kwa Kristo ni kutengwa kutoka katika wokovu. Tunatunza mahusiano yetu yanayookoa kwa kuwa na mahusiano na Kristo kwa kumuamini na kumtii Mungu (Yohana 15:10).

Balbu ya taa na umeme ni mfano wa kisasa wa dhana hiyo hiyo. Balbu huwa na mwanga wakati nguvu ya umeme inapopita ndani yake. Balbu haiwezi kuendelea kuwa na mwanga ikiwa itatenganishwa na chanzo chake cha nguvu. Vivyo hivyo, tuna uzima wa milele kupitia uhusiano wetu na Kristo. (Yohana 17:3). Uzima wake unatiririka ndani yetu. Hatuwezi kutunza uzima huo endapo tutayatenga maisha yetu kutoka kwake.

Baadhi ya watu husema kwamba hakuna namna yoyote ambayo jina linaweza kuondolewa kutoka katika kitabu cha uzima baada ya kuandikwa humo. Lakini kuna angalau njia moja ambayo jina linaweza kuondolewa:

Na mtu ye yote akiondoa lo lote katika maneno ya unabii wa kitabu hiki, Mungu atamwondolea sehemu yake katika ule mti wa uzima, na katika ule mji mtakatifu, ambao habari zake zimeandikwa katika kitabu hiki (Ufunuo 22:19).

Kuna watu wachache sana ambao wana hatia ya kuondoa kihalisi sehemu ya kitabu cha Ufunuo. Hata hivyo, hoja inayotolewa ni kwamba inawezekana jina kuondolewa kutoka katika kitabu cha uzima.

Yesu alitoa ahadi na onyo aliposema, “Yeye ashindaye atavikwa hivyo mavazi meupe, wala sitalifuta kamwe jina lake katika kitabu cha uzima” (Ufunuo 3:5).

Wakati mmoja, Paulo walikuwa na wasiwasi kwamba waongofu wapya wa Thesalonika wanaweza kuicha Imani yao. Alisema kwamba endapo hicho ndicho kingetokea, taabu yake ya injili ingekuwa imepotea (1 Wathesalonike 3:5). Hii inaonesha kwamba inawezekana kwa mwamini kupoteza Imani yake kabisa na kwamba kuokoka kwake kwa kwanza kukawa hakuna thamani.

Katika 2 Petro 2:18-21 tunaona kwamba waalimu wa uongo ambao walikuwa wanadanganya baadhi ya waamini ambao walikuwa wameepuka uchafu na unajisi wa ulimwengu huu kupitia ufahamu wa Bwana na Mwokozi Yesu Kristo. Watu hawa waliokuwa waamini waliifahamu njia ya haki lakini waliiacha. Maandiko haya yanasema kwamba ingelikuwa nafuu kama wasingalifahamu njia kuliko kurudia mtindo wao wa maisha ya dhambi. Hii inaonesha kwamba inawezekana mtu kuupoteza wokovu wake kwa kurudi dhambini. Kama isingelikuwa inawezekana kwa mtu kuupoteza wokovu wake, mtu asingelikuwa mbaya zaido kuliko kabla hajaamini.

Hali ya kuwa mwana inaweza kubadilika. Awali tulikuwa wana wa ibilisi (Yohana 8:44) na watoto wa hasira (Waefeso 2:3), lakini hali hiyo ya kuwa mwana imebadilika tulipoasiliwa (tulipofanywa wana) na Mungu (Warumi 8:15). Mwana mpotevu alipoteza faida zote za kuwa mwana alipijitenga na baba yake. Aliporudi, baba yake alimrejelea kama aliyekuwa amekufa (Luka 15:32).

Mungu anataka waumini wajisikie salama, lakini si kwa kuweka msingi katika hisia zao kuhusiana na uhakika wa uongo unaowaweka katika hatari ya halisi. Hatupaswi kuwaahidi waumini jambo ambalo Mungu hajaahidi. Yeye hajaahidi kwamba tutakuwa salama endapo tutapoteza wokovu wetu bila kujali tunachokifanya. Anaahidi kutuongoza na kutuwezesha kuishi katika ushindi dhidi ya dhambi. Uhakika huo unatosha kutuweka huru kutokana na hofu.

Wakati mwingine waamini huwa na mashaka kuhusu wokovu wao. Wanaweza kuwa na uhakika kwamba waliwahi kuokoka, lakini bado wana mashaka kwamba wapo katika uhusiano na Mungu. Biblia haituachi katika mashaka kuhusiana na swali hili muhimu. Ni mapenzi ya Mungu kwamba muumini awe na uhakika mkubwa wa wokovu wake kiasi cha kuwa na ujasiri katika siku ya hukumu (1 Yohana 4:17), bila kujiuliza kama atapita au hataanguka katika mtihani wa Mungu.

Mwamini akiwa na mashaka, hapaswi kupuuzia kwa sababu ana uhakika kwamba aliwahi kuokolewa. Ni suala la muhimu kujijaribu wenyewe kwamba mmekuwa katika imani (2 Wakorintho 13:5). Endapo mtu anajua kwamba aliokolewa kwa kufuata hatua za Kimaandiko za wokovu, na kwamba anakaa ndani ya Kristo kwa kuenenda katika uhusiano wa utii pamoja naye, anaweza kuwa na uhakika kwamba ana uzima wa kiroho.

Angalizo kwa kiongozi wa darasa: Washiriki wawili wa darasa wanaweza kuelezea sehemu hii na sehemu inayofuata.

Ushindi dhidi ya dhambi huonekana kuwa jambo lisilowezekana kwa watu kwa sababu ya mambo mawili: udhaifu wa kibinadamu na Upotovu wa Asili Unaorithiwa. Tunapaswa kukumbuka kwamba Mungu hatuhukumu sisi kwa sababu ya kuwa na mipaka ya kibinadamu. Mungu hutupa nguvu kwa Roho wake ili kwamba tuweze kutimiza mapenzi yake. Sio dhambi kuwa na udhaifu, na hakuna mtu anayelazimika kutenda dhambi kwa sababu ya udhaifu.

Ushawishi wa Upotovu wa Asili Unaorithiwa huendelea hata baada ya kuokoka, lakini Mungu hutoa neema kwa ajili ya utakaso. Hatulaumiwi kwa kuzaliwa Upotovu wa Asili Unaorithiwa, lakini ni kosa letu endapo tunaendelea kushawishiwa nao. Kwa hiyo, sio udhaifu wa kibinadamu wala Upotovu wa Asili Unaorithiwa unaopaswa kutufanya sisi kukata tamaa kuishi maisha ya ushindi

Kupitia imani katika Kristo, tunaunganishwa naye. Tunajitambulisha na Yeye katika kifo chake na ufufuo wake, na kwa upande wetu hilo linamaanisha kuifia dhambi na kufufuka katika maisha mapya (Warumi 6:3-11). Yeye yuko ndani yetu, na sisi tumo ndani yake. Maisha ya Kikristo sio kwamba tunajaribu tu kufuata mfano wake kwa juhudi zetu wenyewe. Tunaishi maisha ya Kikristo na Kristo akiwa ndani yetu. Alikuwa na ushindi dhidi ya dhambi alipokuwa duniani, na bado anaishi kwa ushindi ndani yetu.

Akiwa amekaa katika kingo za barabara pembeni mwa mtaa wa mji mkubwa, ni mwanamke ambaye amevaa mavazi machafu na ya kuchanika. Nywele zake zimejifunga funga na zimechafuliwa na uchafu. Ngozi yake ni chafu na ilivyokunjamana. Ameketi katika hali ya kukata tamaa. Ghafla, kunatokea hamaki kubwa, na kutokea kwenye kona moja ya barabara anakuja mwana mfalme mkuu wa ufalme pamoja na waheshimiwa wake. Mwana mfalme huyo ni mtanashati, mwenye nguvu, na ni wema. Msafara wake unapopita pale alipoketi yule mwanamke mchafu, mwana mfalme anamwambia dereva wake, “Simama!”

Msafara unapokuja na kusimama, mwana mfalme anawaambia watumishi wake, “Huyo mwanamke aliyeketi kwenye kingo za barabaram ni mwanamke ninayetaka kumuoa!”

Sasa mandhari /Mazingira yanabadilika. Tunatazama katika jumba la kifalme siku ya harusi. Tunaona nini? Mwanamke mchafu bado amevaa mavazi yake ya zamani, nywele zake bado zimejaa uchafu. Wasaidizi wake wamesimama karibu naye wakiwa wameshika vazi la harusi, sabuni, na manukato, lakini bibi harusi hana shahuku ya kujiandaa kwa siku yake ya harusi. Mmoja wa wanawake anamwuliza, “Mwanamke, hutaki kujiandaa kwa ajili ya harusi?” Bibi harusi anajibu, “Hivi ndivyo nilivyokuwa nilipoonekana kwake na akataka kunioa, kwa hiyo sidhani kama ni muhimu ninavyoonekana sasa.”

Tungeshtushwa sana na mtazamo huo. Kwa sababu mwana mfalme anampenda, hataki yeye abakie katika hali yake. Kwa sababu mwana mfalme anampenda yeye akiwa havutii, angetamani kuonekana vizuri sana kwa kadiri ya uwezo wake kwa ajili yake (mwana mfalme).

Mungu anatupenda tulipokuwa wenye dhambi, lakini hiyo haimaanishi kwamba dhambi si jambo la kujali. Kwa sababu anatupenda, anataka kubadilisha hali yetu. Kwa sababu anatupenda, tunapaswa kutamani kuwa na sura na tabia inayompendeza.

Duniani kote, ukweli wa Kikristo unachanganywa na ushirikina. Wengine hufundisha ushindi juu ya dhambi kupitia maombi ya kurudia-rudia, uzoefu wa hisia kali za kiroho, kukemea roho mbaya (wanaofikiriwa kuwa ndio chanzo cha dhambi fulani), kujiumiza kwa makusudi, kuvaa hirizi fulani, kuweka alama za kiroho nyumbani, au kujipaka mafuta maalum. Ni kosa kutarajia ushindi kupitia “uchawi wa kiroho”!

Wengine pia hufundisha ushindi juu ya dhambi kwa njia rahisi kupita kiasi. Husema kwamba uzoefu wa wokovu na kujazwa Roho utaondoa kabisa nguvu ya dhambi milele. Hushindwa kusisitiza umuhimu wa kukua kiroho, nidhamu, na kuwa mwangalifu (kukesha) daima.

Wale wanaoshindwa kuwa na ushindi wa kudumu dhidi ya ulimwengu na dhambi kwa uaminifu wanapaswa kujiuliza maswali yafuatayo:

1. Je nimezaliwa mara ya pili kweli? Je, nimeyafia maisha yangu ya zamani; nimetubu na kuyaacha nyuma? Je, nina uzima mpya katika Kristo—mitazamo mipya, matamanio mapya, shauku mpya kwa ajili ya mambo ya Mungu (2 Wakorintho 5:17)? Je, Kristo amekuja kukaa moyoni mwangu kwa Roho Mtakatifu? Je, ninajaribu kushinda dhambi kwa nguvu za kibinadamu, au je, ninategemea nguvu za Mungu akaaye ndani yangu (Wagalatia 2:20)?

2. Je, nilalitunza Neno la Mungu moyoni mwangu? Mzaburi alishihidia “Moyoni mwangu nimeliweka neno lako, Nisije nikakutenda dhambi” (Zaburi 119:11). Tunapaswa kula Neno la Mungu kama mtoto mchanga anayetamani maziwa ya mama yake (1 Petro 2:2).

3. Je, ninajihesabu mimi mwenyewe kuwa nimekufa kiukweli kwa ajili ya dhambi na kuishi kwa ajili ya Mungu? “Vivyo hivyo ninyi nanyi jihesabuni kuwa wafu kwa dhambi na walio hai kwa Mungu katika Kristo Yesu” (Warumi 6:11). Je, ninakataa majaribu kwa ujasiri kwamba hayana nguvu juu yangu?

4. Je, ninamtegemea Mungu kwa ajili ya ushindi? Mtume Yohana alitangaza kwamba mtu aliyezaliwa katika familia ya Mungu ameushinda ulimwengu. “na huku ndiko kushinda kuushindako ulimwengu, hiyo imani yetu.” (1 Yohana 5:4). Mtume Paulo alisema hataweka ujasiri wake katika kitu chochote isipokuwa msalaba wa Yesu, kwa maana kwa huo tu vitu vya ulimwengu hupoteza nguvu ya kutuvutia (kushawishi) na kututawala (Wagalatia 6:14). Haiwezekani kudumu kuishi maisha ya ushindi kama tutasahau chanzo cha haki yote, Yesu.

5. Je, kila siku ninamvaa Bwana Yesu kwa Imani na kutoipa dhambi nafasi yeyote? Haijarishi mahali tulipo katika safari ya Kikristo, ushindi sio jambo ya kutokea tu moja kwa moja. Lazima kwa makusudi kabisa nichukue mtazamo wa Yesu kuhusiana na dhambi na kufuata mfano wake. (Warumi 13:14; Waefeso 4:24)

6. Je, ninazivaa silaha za kiroho za Mungu? Katika uwanja wa vita wa maisha, waamini wengi hujeruhiwa na mishale ya moto ya Shetani kwa urahisi kwa sababu wamekuwa wazembe kuhusiana na ulinzi wao wa Kiroho (Waefeso 6:11).

7. Je, ninatendea kazi nidhamu binafsi? Haijalishi sisi ni wakomavu Kiroho kiasi gani Imani yetu mara zote inahitaji nidhamu binafsi. Je, ninaufundisha mwili wangu na kuuweka chini ya nidhamu? Matamanio ya asili, hamu tulizopewa na Mungu (kama vile hamu ya chakula, usingizi, tendo la ndoa) lazima zidhibitiwe, kwa hiyo zinatumikia kusudi la nafsi yangu iliyozaliwa upya. Kwa sababu mwili wangu umeathiriwa na dhambi, shahuku na matamanio yake hayana uwiamo. Mwili hauruhusiwi kutawala; ni lazima uitumikie roho. Paulo alisema anautawala mwili wake ili asije akatupwa kiroho (1 Wakorintho 9:25-27). Nidhamu hii ni muhimu kwa kila Mkristo.

8. Je, ninaishi katika Utii? “Kuenenda nuruni” ni wosia wa Mtume Yonana (1 Yohana 1:7). Kwa sababu kuna mitego mingi, mawe ya kukwaza, na mahali hatarishi katika njia ya kwenda mbinguni tunapaswa kila wakati kutembea katika nuru ya neno la Mungu (Zaburi 119:105) na katika uwepo wa Roho Mtakatifu (Yohana 14:26). Utii unabeba ahadi kwamba damu ya Yesu itaendelea kutusafisha. Kutembea gizani hupelekea kwenye kujikwaa na kuanguka, na hatimaye mauti kwa wale wanaokataa kurudi katika njia ya nuru.

► Someni Tamko la Imani kwa pamoja angalau mara mbili.

Ni heshima na wajibu wa kila mwamini kuishi maisha ya kikristo yenye ushindi. Mwamini ana uzima kutokana na mahusiano aliyonayo na Kristo. Mwamini ambaye anakataa mapenzi ya Mungu na kwenda tena dhambini hudhoofisha na kimsingi uharibu Imani, ambayo ndio muunganiko wetu na Mungu. Mungu hutoa neema ya kutuwezesha, ili kwamba mwamini aweze kushinda kila jaribu.

(1) Zoezi la Kifungu: Kila mwanafunzi atapewa mojawapo ya vifungu vilivyoorodheshwa hapa chini. Kabla ya kipindi kinachofuata cha darasa, unapaswa kusoma kifungu na kuandika aya kuhusiana na somo la somo hili.

• Mathayo 13:18-23

• Waebrania 10:23-39

• Yakobo 1:21-27

• 2 Petro 1:1-11

• Ufunuo 3:14-22

(2) Jaribio: Utaanza kipindi kijacho cha darasa kwa jaribio juu la Somo 8. Jifunze kwa umakini maswali wakati wa maandalizi.

(3) Zoezi la Kufundisha: Kumbuka kupanga na kuripoti muda wako wa kufundisha nje ya darasa.

(1) Ni nini moja kati ya mada kuu katika waraka wa 1 Yohana?

(2) Ni sifa gani ya mwamini ambayo 1 Yohana inazisisitiza sana?

(3) Ni mambo gani manne ambayo tunayafahamu kutoka katika 1 Wakorontho 10:13?

(4) Ni kwa namna gani mwamini ataendelea kubakia ndani ya Kristo?

(5) Ni kwa namna gani tunaweza kutunza mahusiano yetu yanayookoa na Yesu?