(1) Mwanafunzi atakuwa na uwezo wa kuelezea:

• Ngazi za umuhimu katika mada kuhusiana na matukio ya mwisho.

• Kurudi kwa Yesu na maana yake kwa Maisha ya Wakristo.

• Ufufuo wa watu wote na thamani ya mwili.

• Hukumu ya mwisho ya viumbe vyote.

• Ufalme wa milele wa Mungu.

• Tamko la Imani ya Kikristo kuhusiana na matukio ya mwisho.

(2) Mwanafunzi atafahamu umuhimu wa kuona Maisha ya duniani katika mtazamo wa umilele.

► Soma Danieli 7:9-14 kwa pamoja. Kifungu hiki kinatueleza nini kuhusu wakati ujao?

Masomo katika unabii wa Kiblia unajumuisha: alama ya mnyama, baragumu, dhiki kuu, mpinga Kristo, miaka saba, miaka 1000, kiti kikubwa cheupe, mji ushukao toka mbinguni, ziwa la moto.

► Ni masuala gani ambayo unayafikiria katika unabii wa Kibblia?

Majadiliano ya unabii mara nyingi hujikita katika maswali madogo madogo badala ya kweli kuu. Si mada zote katika unabii zina umuhimu unaolingana. Hatutajaribu kusoma kila kitu kuhusiana na unabii katika kozi hii.

Wakati mwingine watu hushangaa alama la mpinga kristo itafananaje, mpinga kristo atatokea katika nchi gani, na mashahidi wawili watakuwa ni akina nani. Haya ni maswali ambayo Biblia haijtoa majibu ya wazi, na kuhojiana kuhusiana na hayo hakuta kuwa na thamani.

Kuna mada nyingine ambazo Biblia inazielezea zaidi. Baadhi ya mifano ni ama Yesu atarudi tena mwanzoni, kati kati, au mwishoni mwa dhiki kuu; na ama utawala wa miaka 1000 utakuwa ni miaka halisi au la. Hata hivyo, mafundisho haya si muhimu sana kwa injili. Haupaswi kuvunja ushirika na mtu kwa sababu haukubaliani na mawazo yake juu ya mojawapo ya maswali haya.

Kuna baadhi ya kweli muhimu na za msingi za Kibiblia kuhusiana na unabii. Kweli hizi ziko wazi kiasi kwamba kila mwamini ambaye anaamini Biblia anazikubali. Mafundisho haya huathiri Maisha na mfumo wote wa mafundisho ya Kikristo. Hebu tuangalie kwei nne za msingi na za muhimu zilizofunuliwa katika unabii wa Kibiblia kuhusiana na matukio ya mwisho.

Yesu atarudi duniani kwa kuonekana. Ingawaje Yesu yupo Kiroho pamoja na waamini hapa duniani wakati huu, atarudi tena na mwili wake wa utukufu aliofufuka nao na ataonekana kwa dunia yote. (Soma Ufunuo 1:7.)

► Ni mambo gani ambayo yatatokea wakati Yesu atakaporudi?

Ujio wa Yesu utakuwa ndio kilele cha historia. Falme za dunia zitakuwa Falme za Kristo. Wale ambao wamekuwa waaminifu kwake watapewa thawabu na kuheshimiwa. Wale ambao wamekuwa waasi dhidi Yake watashushwa chini, na atakuwa na nguvu ambazo zitashinda upinzani wote. (Soma Mathayo 26:64.) Kila goti litapigwa, na kila ulimi utakiri kwamba Yesu ni Bwana (Wafilipi 2:10-11).

Wakristo ambao wamekufa watafufuliwa ili kutawala pamoja na Kristo (2 Timotheo 2:12). Wao Pamoja na waamini walio hai watanyakuliwa ili kumlaki Bwana atakapoonekana (1 Wathesalonike 4:16-17).

[1]Ujio wa Yesu ni tumaini lenye baraka kwa Wakristo wote. (Soma Tito 2:13.) Fikiri kuhusiana na ujio wake na maana yake kwetu: mwisho wa mateso, mateso, na huzuni; kuungana tena na watakifu na wapendwa wa Wakristo; uthibitisho kwamba Imani yetu haikuwa bure; kumuona Yesu mwenyewe; na kuingia mbinguni na katika utimilifu wa Maisha ya milele pamoja na Mungu. Hakuna chochote kati ya hivi kinachotegemea wakati wa kurudi kwake, bali kinategemea ule ukweli kwamba atarudi tena kama alivyoahidi.

Yesu alisema kwamba angerudi tena kwa nguvu na utukufu (Mathayo 24:30). Aliahidi kuja tena kuwachukua watu wake ili kuishi pamoja naye (Yohana 14:3). Malaika walisema kwamba angerudi vile vile kama alivyokwenda mbinguni (Matendo ya Mitume 1:11). Mitume walihubiri toba wakati wanasubiri ujio wa Kristo kurudi ili kusimamisha mpango wake kamilifu kwa ajili ya ulimwengu. (Soma Matendo ya Mitume 3:19-21.) Kwamba Yesu atarudi tena duniani kwa nguvu na utukufu imefundishwa mara kwa mara katika Agano Jipya.[2]

Ingawaje kuna ishara zinatangualia ujio wa pili wa Yesu, hatuwezi kufahamu kwa usahihi ni lini atakuja. Ni njema au vizuri kwa waamini kila wakati kutarajia ujio wa Yesu na kuishi inavyotakiwa. (Soma Marko 13:33-37.)

► Kwa nini Yesu anarudi tena?

Tunaishi katika ulimwengu ambao watu wengi wanaishi katika uasi dhidi ya Mungu. Uumbaji wote unahangaika kutokana na laana ya dhambi. Ulimwengu hautafanywa kamilifu na hatua za kisiasa, mageuzi ya kijamii, elimu iliyoboreshwa, au mafanikio ya kiuchumi. Yesu ataingia katika uumbaji wake kwa ghafla kama mfalme anayerudi kufanya mambo yawe sawa.

Watu wote ni wenye dhambi, lakini kama wako tayari kujiunga na ufalme sasa, wanaweza kuepuka hukumu inayokuja. Ufalme wa Mungu tayari unafanya kazi katikati ya wale wanaotubu na kuamini (Marko 1:14-15, Marko 9:1). Ufalme huo utakuja katika ukamilifu wake na kwa wazi wakati wa ujio wa Yesu.

► Ni kwa namna gani tuishi kwa sababu tunafahamu kwamba Yesu anarudi tena?

Tunapaswa kukumbuka vipaumbele vya Wakristo wa kwanza. Tunaagizwa kutunza Imani (1 Wakorintho 16:13) na kuvumilia hadi mwisho (Mathayo 24:13). Tunaonywa kutoacha tamaa na mambo ya dunia kutufanya sisi kusahau kuhusiana na kuja kwa Kristo (Luka 21:34-36). Tunaishi kulingana na maadili ya milele kwa sababu mambo ya ulimwengu huu yatapita (2 Petro 3:11-13). Tunaambiwa kukesha, si kutazama angani au mawinguni kwa ajili ya ujio wake, bali kwa kuwa katika lindo au zamu yetu Kiroho ili kwamba kuja kwake kusitukute hatujajiandaa (Marko 13:33-37). Tunaomba kwa ajili ya utakatifu na kuishi maisha safi kwa sababu tunataka kuwa kama Yeye (1 Yohana 3:3).

Wale wanaoishi leo kana kwamba Yesu hatakuja hawatakuwa tayari kwa ajili ya ujio wake. Kuja kwa Yesu kutakuwa kama radi (Mathayo 24:27; 1 Wakorintho 15:52), kwa ghafla sana kiasi kwamba hakuna mtu anayeweza kuwa na muda wa kubadilisha chochote baada ya kuonekana kwake. 1 Wathesalonike 5:1-6 inaonesha kwamba wale ambao wako katika giza, wale wanaoishi kutokana na ulimwengu huu, watashtushwa na ujio wa Bwana. Kwao, ujio wake utakuwa kama uvamizi wa mwizi. Kwa wanaoamini, ujio wake hautakuwa wa kutisha, bali itakuwa ni furaha kuu, kama ujio wa bwana harusi kwa ajili ya mkewe (Yohana 14:2-3).

Tunangoja ujio wa Yesu kwa

1. Kutunza au kushika vipaumbele vya milele

2. Kuishi katika utakatifu

3. Kujilinda wenyewe Kiroho kwa maombi

Tunafahamu kwamba mwili una thamani ya milele kwa sababu Biblia inafundisha ufufuo wa mwili wa watu wote. Fundisho la ufufuo ni la muhimu sana. Tunafahamu hili kwa sababu Mtume Paulo alitumia 1 Wakorintho 15 yote kutetea fundisho hili. Alielezea kwamba kukana ufufuo ni kukana injili. Kama hakuna ufufuo, basi Yesu asingeweza kufufuliwa kutoka kwa wafu (1 Wakorintho 15:13). Kama Yesu hakufufuliwa kutoka kwa wafu, injili haiwezi kuwa kweli, na hakuna hata mtu mmoja aliyeokolewa kiukweli (1 Wakorintho 15:17).

[1]Kila mtu atafufuliwa, lakini si watu wote kwa wakati mmoja. Wakati wa kuja kwa Yesu, atawachukua Wakristo wote, akiwafufua wale waliokuwa wamekufa (1 Wathesalonike 4:16-17; Ufunuo 20:6). Wale waliokufa katika dhambi zao hawatakubaliwa katika ufufuo wa kwanza. Watafufuliwa baadae wakati wa hukumu (Ufunuo 20:13).

Wakristo watafufuliwa na kutukuzwa kama Yesu (1 Yohana 3:2). Wenye dhamboi ambao hawajatubu watafufuliwa katika namna nyingine kwa ajili ya hukumu ya milele (Yohana 5:28-29).

► Kama haukuwa umeamini kwamba mwili utafufuliwa, hiyo italeta tofauti gani kwako?

Imani kwamba siku moja tutafufuliwa huathiri mtindo wetu wa maisha. Tunaweza kuona matokeo ya kivitendo ya mafundisho kwa kuangalia mifano ya watu ambao wanakana hilo. Baadhi ya watu katika kusanyiko la Korintho walikana kwamba mwili wa mwanadamu utafufuliwa. Wale walioamini kosa hili waligawanyika katika sehemu mbili.

Wengine walisema, “Kwa sababu mwili hautafufuliwa, roho ndio yenye umuhimu. Hilo linamaanisha kwamba dhambi ambazo tunazitenda katika mwili sio tatizo kubwa. Tunaweza kutenda uzinzi na uasherati kwa sababu mwili utakatiliwa mbali.”

Baadhi ya Wakorintho inaonekana walikuwa na kauli mbiu, “Vyakula ni kwa tumbo, na tumbo ni kwa vyakula,” ikimaanisha kwamba mwili hauna thamani yeyote ispokuwa kutimiza tamaa zake. Paulo aliwaambia kwamba watu watahukumiwa kwa kuitumia miili yao vibaya (1 Wakorintho 6:13). Alisema kwamba mwili ni wa Bwana, na kwamba Mungu ataifufua miili yetu kama alivyoufufua mwili wa Yesu (1 Wakorintho 6:14).

Wengine walisema, “Kwa sababu mwili hautafufuliwa, ni lazima hauna thamani na ni mwovu. Tunapaswa kuzitiisha na kuzishinda tamaa zote za mwili, hatupaswi kula kila kitu chenye ladha nzuri au kufurahia ndoa.”

Makosa yote haya mwili yalitokana na kukana ufufuo. Kukana ufufuo kunaufanya mwili kukosa thamani. Lakini fundisho la Kikristo la ufufuo linaupa mwili thamani.

► Soma 1 Wakorintho 6:14, 15, 19-20.

Mistari hii inaonesha kwamba miili ya Wakristo ni ya thamani kwa sababu wote

• Wanakombolewa

• Ni hekalu la Roho Mtakatifu

• Ni washiriki kwa Kristo

• Watafufuliwa na kutukuzwa

Fundisho la ufufuo ni la muhimu kwa sababu inamaanisha kwamba

• Yesu alifufuka kutoka kwa wafu.

• Watu wote watafufuliwa.

• Mwili una thamani ya milele.

• Injili ni kweli.

Siku ya hukumu kweli ni mwisho wa wale ambao majina yao hayapo katika kitabu cha uzima. Si mwisho wa kuishi kwao, bali ni mwisho wa fursa yao ya kufanya uchaguzi. Katika umilele unaofuata, watu wanapata uzoefu usiokoma wa matokeo ya maamuzi yao, ambayo hayawezi kubatilishwa au kugeuzwa.

Hukumu huyapa maamuzi yetu umuhimu ulio zaidi ya matokeo yake ya karibu. Baadhi ya watu hufikiri kwamba ili mradi wana uwezo wa kudhibiti matokeo ya matendo yao, hawana cha kuhofia. Wanataka kuamini kwamba dhambi yao si uovu endapo tu haina madhara yeyote. Kwa uhalisia, dhambi zote zina madhara. Lakini hata kama haikuleta madhara katika maisha yake ya sasa, dhambi ni suala au tatizo lenye uzito mkubwa kwa sababu ya hukumu. Neno la Mungu linasema kwamba watu watahukumiwa kwa kadiri ya matendo yao. (Soma 2 Wakorintho 5:10; Warumi 2:6-11.)

Wakati wa hukumu, baadhi watapelekwa katika hukumu ya milele na wengine katika thawabu ya milele. Maandiko yanaelezea tukio moja la hukumu kwa ajili wa wenye dhambi ambao hawajaokoka ambao wamefufuliwa ili kukabiri hukumu kwa ajili ya dhambi zao (Ona Ufunuo 20:11-15.) Kuna hukumu nyingine kwa ajili ya Wakristo, wakati ambapo watapewa thawabu kwa ajili ya kazi ambazo zilizostahili, na zina matokeo ya milele. (Soma 1 Wakorintho 3:14-15.)

Hukumu inamaanisha kwamba siku moja dhambi haitakuwepo tena. Ni ngumu kufikiri kuhusiana na ulimwengu pasipo dhambi, lakini kuna wakati uasi wote dhidi ya Mungu utamalizwa.

Mungu hakusudii sisi kuishi katika hofu kila wakati, au hofu kuwa ndio nguvu inayotuhamasisha ili kuishi maisha yaliyo sawa. Hata hivyo, dhamira ya hukumu mbele yetu hutupa sisi hali ya uwajibikaji ambayo inaongoza maisha yetu.

Tunapaswa kufahamu kuhusiana na hukumu ili kuelewa

1. Umuhimu wa dhambi

2. Uwajibikaji wetu kwa Mungu

3. Umuhimu wa uchaguzi wetu

4. Mwisho wa dhambi

Kulingana na baadhi ya filosofia na dini, muda mara zote hutembea katika mzunguko, ukiwa hauna mwanzo wala mwisho, na hakuna matukio yatakayo badilisha mambo milele. Lakini kulingana na Biblia, muda una mwanzo na mfululizo wa matukio unasonga kuelekea kwenye hitimisho. Biblia inaelezea uumbaji, kisha janga la anguko la mwanadamu, kisha mpango wa Mungu wa wokovu ambao unatenda kazi katika karne za historia ya mwanadamu.

Katika Mwanzo 3 tunapata kuona Mwanzo wa dhambi. Katika Ufunuo dhambi inaondolewa kutoka katika mji wa Mungu wa milele (Ufunuo 21:27). Katika Mwanzo tunaona kupotea kwa mti wa uzima na hukumu ya kifo (Mwanzo 3:22-24). Katika Ufunuo tunaona urejesho wa mti wa uzima, majina katika kitabu cha uzima, na wito wa kuuendea mto wa maji ya uzima (Ufunuo 22:1-2, 19).

Ujio wa ufalme wa Mungu ulio mkamilifu na wa milele utakamilisha mpango wa Mungu. Mungu ameendelea kuwa mfalme wa ulimwengu huu, lakini tangu anguko la mwanadamu, wanadamu wengi wamekuwa wakiishi katika uasi dhidi ya ufalme wa Mungu. Uasi huo utafikia mwisho wa ghafla, na Mungu atatawala milele pasipo kuwa na mpinzani. Ulimwengu utakuwa kamilifu kama Mungu anavyotaka uwe, kama vile mbinguni kulivyo.

Kuna mwenendo au kawaida ya wanadamu kuishi kana kwamba maisha ya hapa duniani yatadumu milele. Tunajaribu kuboresha hali zetu, kutatua matatizo yetu, na kutengeneza mazingira ambayo yanatusaidia kuridhika. Tunahitaji kuwa kama Ibrahimu ambaye alitarajia makao ya mbinguni alipokuwa anaishi katika mahema na kuhama hama kila wakati (Waebrania 11:8-10, 14-16). Tunahitaji kukumbuka kwamba mambo tunayoyajenga, mambo tuliyonayo, na hali tunazitengeneza zote ni za muda tu. Tunapaswa kufanyia kazi mambo ambayo yana thamani ya milele.

► Someni Tamko la Imani kwa pamoja angalau mara mbili.

Yesu atarudi tena kama alivyoahidi, atawafufua waamini wa kipindi cha nyuma, na atawachukua watakatifu wote ili kutawala katika ufalme wake. Kila mtu atafufuliwa kutoka wafu ili kukabiliana na hukumu kwa ajili ya matendo yake. Atapewa ama uzima wa milele au kuhukumiwa kwenda katika hukumu ya milele. Ufalme wa Mungu utakuja kikamilifu, na Mungu atatawala milele.

(1) Zoezi la Kifungu: Kila mwanafunzi atapewa mojawapo ya vifungu vilivyoorodheshwa hapa chini. Kabla ya kipindi kinachofuata cha darasa, unapaswa kusoma kifungu na kuandika aya kuhusiana na somo la somo hili.

• Danieli 2:31-45

• Mathayo 25:31-46

• 1 Wakorintho 15:51-58

• 2 Petro 3:1-14

• Ufunuo 20:11-15

(2) Jaribio: Utaanza kipindi kijacho cha darasa kwa jaribio juu la Somo 14. Jifunze kwa umakini maswali wakati wa maandalizi.

(3) Zoezi la Kufundisha: Kumbuka kupanga na kuripoti muda wako wa kufundisha nje ya darasa.

(1) Ni kweli gani nne muhimu kuhusiana na matukio ya mwisho yanatolewa katika unabii wa Biblia?

(2) Ni nini kitatokea kwa Wakristo Yesu atakaporudi?

(3) Ni kwa namna gani tunapaswa kusubiri ujio wa Yesu?

(4) Ni kwa nini fundisho la ufufuo ni muhimu?

(5) Tunapaswa kufahamu kuhusiana na hukumu ili kuelewa mambo gani manne?