Lesson 2: ბიბლიური თვისებები ლიდერებისთვის

ზოგს სჯერა, რომ რადგან ჩვენ ღმერთისთვის ყველა თანაბრად მნიშვნელოვანი ვართ, ეკლესიაში არ უნდა არსებობდეს ისეთი ადამიანი, ვისაც სხვაზე ექნება ძალაუფლება. ბევრი ამბობს, რომ სჯერათ ლიდერობის, მაგრამ იქცევიან ისე, თითქოს თავისუფლები არიან ყოველგვარი სულიერი ძალაუფლებისგან.

► გვასწავლის თუ არა ბიბლია, რომ ეკლესიაში ძალაუფლება უნდა არსებობდეს? მოიყვანეთ მაგალითები.

ბიბლია ბევრგან საუბრობს ეკლესიის ხელმძღვანელობაზე. რამდენიმე მაგალითია ებრაელთა 13: 7, 17; ტიტე 1: 5; რომაელთა 12: 8; 1 კორინთელთა 14:40 და 1 ტიმოთეს 5:17.[1]

ლიდერობის, როგორც გავლენის განსაზღვრა, გვეხმარება დავაკვირდეთ ლიდერობის, ანუ ხელმძღვანელების ფუნქციას ეკლესიაში. ღმერთი განსაზღვრავს გარკვეულ სპეციფიკურ ფუნქციებს, რათა ლიდერები იყვნენ მოწოდებულები და მიეცეთ უფლებამოსილება, მართონ ეკლესია მისი მიზნების მისაღწევად.

[2]► სტუდენტმა მთელს ჯგუფს უნდა წაუკითხოს ეფესელთა 4: 11–12.

მსახურების ყველა ფუნქცია არ შეიძლება მიეკუთვნებოდეს ამ სიაში მოცემულ კონკრეტულ მოწოდებებს. მაგალითად, მუსიკოსი ან თაყვანისცემის მსახურების ლიდერი შეიძლება სულაც არ იყოს მათ შორის. ამასთან, თითოეული მსახურების ხელმძღვანელის ფუნქცია უნდა იყოს ორიენტირებული ეკლესიის დასახული მიზნების მიღწევისკენ.

ეკლესიის პასუხისმგებლობები მიმართულებას იძლევა და განსაზღვრავს მსახურების ლიდერების გადანაწილებას პოზიციებზე. ეს არ ნიშნავს, რომ ლიდერობის ფუნქცია შემოიფარგლება მხოლოდ ქადაგებით, სწავლებით და მახარებლობით. ეკლესიის პასუხისმგებლობა გაცილებით მეტია. ეკლესიაში ადამიანები ერთად მუშაობენ პრაქტიკული საჭიროებების დასაკმაყოფილებლად. ეს ნიშნავს, რომ ადამიანი, რომელიც ეკლესიის წარმომადგენლებს მოუწოდებს ერთმანეთს გაუზიარონ მებაღეობის აღჭურვილობა, ეხმარება ეკლესიას მისი მიზნის განხორციელებაში.

ეკლესიის მოვალეობები შესაძლებელს და აუცილებელს ხდის ლიდერობის მრავალი სახეობის ფუნქციებს, იმის მიღმა, რაც ეკლესიის შენობაში ხდება.

წმინდა წერილის ის ადგილები, რომლებსაც ამ გაკვეთილში ვსწავლობთ, ეხება კონკრეტულად პასტორებს და დიაკვნებს. ამასთან, კვალიფიკაციის და თვისებების უმეტესობა არ არის დაკავშირებული შესაძლებლობებთან, არამედ ხასიათთან და ბუნებასთან. ყველა ქრისტიანს უნდა სურდეს, რომ ჰქონდეს აქ აღწერილი თვისებები. ლიდერები ნებისმიერ ფუნქციებში უფრო ეფექტურები იქნებიან, თუ მათ ასეთი ბუნება ექნებათ. თითოეული თვისების გადახედვისას, წარმოიდგინეთ, როგორ მოქმედებს ეს ცაკლეული პიროვნების გავლენაზე.

მოციქულმა პავლემ ახალი ეკლესიების ხელმძღვანელები დანიშნა ყველგან, სადაც კი ახალმოქცეულთა ჯგუფები იყვნენ (საქმეები 14:23). ამ ახალი პასტორებიდან ბევრნი არც ისე დიდი ხნის მოქცეულები იყვნენ. ისინი რათქმაუნდა არ აკმაყოფილებდნენ ყველა ამ მოთხოვნას, მაგრამ პავლემ არსებულებიდან საუკეთესო ლიდერები დანიშნა. ისინი იყვნენ ადამიანები, რომლებსაც განვითარების პოტენციალი ჰქონდათ. ღმერთს შეუძლია გამოიყენოს ადამიანი, რომელიც მიძღვნილია ქრისტეს და მსახურების მიმართ, მაშინაც კი, თუ მასში ყველა თვისება ჯერ სრულად არ არის განვითარებული.

ჩვენ გვაქვს ორი ადგილი წმიდა წერილიდან პასტორების და დიაკვნების თვისებების შესახებ. ისინი პავლე მოციქულის მიერ ტიმოთეს და ტიტეს მიმართ მიწერილ წერილებშია. ტიმოთე იყო ეფესოს ეკლესიებზე, ხოლო ტიტე - კრეტას ეკლესიებზე პასუხისმგებელი. მათ ჰქონდათ დავალება, დაენიშნათ პასტორები თითოეული ადგილობრივი კრებულისთვის.

► სტუდენტმა უნდა წაუკითხოს ჯგუფს 1 ტიმოთეს 3:1-7.

(1) უმწიკვლო

პასტორი არ უნდა იყოს დამნაშავე არასწორ ქმედებებში და გადაცდომებში. ეს აუცილებელია იმისთვის, რომ ეკლესია მას ენდობოდეს და ეკლესიას საზოგადოების წინაშე კარგი სახელი ჰქონდეს. პასტორს არ შეუძლია წარუძღვეს სხვებს სისწორეში, თუ ის არასწორად იქცევა. პასტორი უნდა იყოს ის, ვინც გარკვეული პერიოდის განმავლობაში ეწეოდა თანმიმდევრულ ქრისტიანულ ცხოვრებას.

იქ, სადაც ეკლესია არც ისე დიდი ხნის დაარსებულია, შესაძლოა პასტორიც არ იყოს დიდი ხნის მორწმუნე-ქრისტიანი. მას შეიძლება არ ჰქონდეს სიმწიფის ყველა მახასიათებელი თვისება, მაგრამ მან უნდა აჩვენოს, ღმერთზე მიძღვნილი სიცოცხლე. მას უნდა შეეძლოს შეცდომების აღიარება და საკუთარი საქციელის გამოსწორება.

რამდენიმე წლის განმავლობაში, ერთ სოფელში, უფალი ძლიერად იყენებდა პასტორს აზიიდან. მისი წარმატება აცდუნებდა მას სიამაყით, დაუმარცხებლობის გრძნობით და სულიერი დაუდევრობით. ერთხელ გვიან საღამოს ახალგაზრდა ქალმა სთხოვა მას მოტოციკლეტით გასეირნება. ის უგუნურად დათანხმდა, თუმცა იცოდა, რომ ეს მას ცდუნებად ექცეოდა და საზოგადოებაში მის რეპუტაციას ავნებდა. როდესაც ეკლესიის წევრებმა შეიტყვეს მისი უგუნური საქციელის შესახებ, მათ დაკარგეს ნდობა მისი პატიოსნებისადმი. საბოლოოდ მას მოუწია მსახურებიდან წასვლა. ღვთის წყალობით, ამ პასტორმა თავი დაიმდაბლა ღმერთისა და მათ წინაშე, ვისაც ზიანი მიაყენა და მიიღო დამოძღვრა თავისი სულიერი ზედამხედველისგან. თანდათანობით ნდობა მის მიმართ აღდგა და მისი მსახურების ეფექტურობა მნიშვნელოვნად გაიზარდა.

► რა მოხდება, თუ ლიდერს არ ენდობიან?

(2) ერთი ცოლის ქმარი

მსოფლიოს მრავალ ნაწილში მრავალცოლიანობის წეს-ჩვეულება ნორმად იქცა. ღვთის გეგმის თანახმად კი, კაცს ერთი ცოლი უნდა ჰყავდეს. ეს მოთხოვნა იმისთვისაა, რომ პასტორებმა მაგალითი მისცენ. ეს მოთხოვნა ასევე გულისხმობს იმას, რომ პასტორმა ყველაფერი უნდა გააკეთოს, რომ იყოს კარგი ქმარი: ის თავისი ცოლის მიმართ ერთგული და მოსიყვარულე უნდა იყოს.

(3) ფრთხილი

პასტორი შეიძლება შევადაროთ მწყემსს, რომელიც თავის ცხვარს იცავს. პასტორი თავისი მრევლის დამცველია. იგი უნდა იდგეს სადარაჯოზე ცრუ მოძღვრებების და ცრუ გავლენების წინააღმდეგ. მან უნდა ასწავლოს თავის ხალხს, რომ ისინი დაცულები იყვნენ თავიანთ დოქტრინებში. ის მზად უნდა იყოს, გააფრთხილოს ადამიანები სულიერი საფრთხის შესახებ. მან არ უნდა დაუშვას ეკლესიაში მავნე დოქტრინების სწავლება.

[1](4) აზრიანი

პასტორი სერიოზულად უნდა მოეკიდოს თავის მსახურებას. ის არ უნდა იყოს იმპულსური ადამიანი, რომელიც ძალიან სწრაფად ან ემოციებს აყოლილი იღებს გადაწყვეტილებებს. მას უნდა შეეძლოს მშვიდად იფიქროს მნიშვნელოვან საკითხებზე. მან არ უნდა დაუშვას, რომ თავისი აზრები მსახურებიდან პირადი წუხილების, გართობისა და ცდუნებისკენ გადართოს.

(5) წესიერი

პასტორს უნდა ჰქონდეს მოწესრიგებული ქცევა. არ უნდა იქცეოდეს შეუფერებლად. მისი ქცევა უნდა შეესაბამებოდეს ღვთისმოსაობის პრინციპებს, რომელსაც ის ასწავლის.

პასტორმა უნდა ისწავლოს როგორ გამოიჩინოს პატივისცემა და მოწიწება იმ ადგილის ადათ-წესების მიმართ, სადაც ის მსახურობს. თუ ის მიხვდება, რომ შეცდომა დაუშვა, რითიც ვინმეს აწყენინა, ის უნდა იყოს თავმდაბალი და ბოდიშის მოხდა შეეძლოს.

(6) სტუმართმოყვარე

სტუმართმოყვარეობა სიტყვასიტყვით ნიშნავს იმ ადამიანის საჭიროებების დაკმაყოფილებას, ვინც მოგზაურობს და საჭმელსა და საცხოვრებელს საჭიროებს. პასტორი უნდა იყოს პიროვნება, რომელიც პასუხობს სხვების საჭიროებებს. ის მზად უნდა იყოს გაზიარებისთვის. ის უნდა იყოს მეგობრული და დასახმარებლად განწყობილი, თუნდაც იმ ადამიანების მიმართ, ვისაც პირველად ხედავს.

► რატომ არის ეს თვისება მნიშვნელოვანი ლიდერისთვის?

(7) განსწავლის უნარიანი

პასტორს უნდა შეეძლოს ჭეშმარიტების იმგვარად განმარტება, რომ ხალხმა შეძლოს მისი გაგება. მან პასუხისმგებლობა უნდა აიღოს კითხვასა და თვითგანათლებაზე.

(8) არა ლოთი

პასტორმა არ უნდა დაუშვას, რომ ღვინომ მასზე გავლენა იქონიოს. მისი ქცევა არასდროს უნდა ჰგავდეს ალკოჰოლის ზემოქმედების ქვეშ მყოფ ადამიანს. ეს პრინციპი ვრცელდება ნებისმიერ სხვა ნივთიერებაზე, რომელსაც ექნება მსგავსი ეფექტი.

(9) არა მოჩხუბარი

პასტორი არ უნდა იყოს ის, ვინც ძალის გამოყენებით და მუქარით ცდილობს თავისას მიაღწიოს. ის არასოდეს უნდა მოიქცეს ისეთი ადამიანის მსგავსად, რომელიც მზადაა სხვას დაარტყას. პასტორი არ უნდა იყოს მზად, რომ ავნოს ადამიანს, ვინც მას გაანაწყენებს. ((იხილეთ აგრეთვე 2 ტიმოთეს 2:24-25.)

► როგორ უნდა გამოავლინოს პასტორმა რისხვა სწორად?

(10) არა ფულის მოყვარული

ქვეყნიერების ხალხი ცვლიან თავის ნათქვამს მოგების და სარგებლის სანაცვლოდ. გარკვეული პროფესიის ადამიანები, როგორებიცაა იურისტები, გამყიდველები ან პოლიტიკოსები, განიცდიან ცდუნებას შეცვალონ სიმართლე ხალხის საამებლად. პასტორსაც აქვს ცდუნება, რადგან ღვთის სიტყვის ჭეშმარიტება ყველას არ მოსწონს და ეამება. პასტორი ჭეშმარიტების ერთგული უნდა იყოს, იმის მიუხედავად მოაქვს მას ფინანსური სარგებელი მისთვის, თუ არა.

პასტორს უნდა ჰქონდეს სურვილი იხილოს ეკლესიის მსახურება ფინანსურად მხარდაჭერილი და არა ის ადამიანი იყოს, ვისაც მხოლოდ მიღება სურს. მან უნდა წარმართოს ეკლესია ისე, რომ ის ფუნქციონირებდეს, როგორც ოჯახი, რომელიც ზრუნავს მის წევრებზე, და არა იმაზე იზრუნოს მუდმივად, თუ რას მიიღებს თვითონ.

(11) თავისი სახლის კარგი მმართველი

პასტორის ლიდერული უნარის დემონსტრირება უნდა მოხდეს სახლში. მას უნდა ჰყავდეს შვილები კონტროლის ქვეშ. თუ მას არ შეუძლია საკუთარი სახლის მართვა, ის ვერ შეძლებს ეკლესიის წარმართვას. ეს არ ნიშნავს, რომ მის შვილებს უნდა ჰქონდეთ სრულყოფილი ხასიათი და ბუნება, არამედ იმას, რომ პასტორი ერთგულად ხელმძღვანელობს და არიგებს მათ. ეს არ ეხება ბავშვებს, რომლებიც ზრდასრულები არიან და მის ძალაუფლების მიღმა იმყოფებიან, რადგან ის უკვე აღარ არის პასუხისმგებელი მათზე.

(12) ნურც ახალმოქცეული იქნება

თუ ადამიანი ძალიან სწრაფად მოხვდება ძალაუფლების პოზიციაში, მას გაუჩნდება სიამაყის ცდუნება. სიამაყე იგივე ცოდვაა, რამაც გამოიწვია ეშმაკის დაცემა. დაწინაურება თანდათან უნდა მოხდეს, გამოცდილებასთან ერთად.

► რა ზიანი დადგება, თუ ადამიანი სწრაფად მოხვდება მაღალ პოზიციაზე და კარგად ვერ გაუმკლავდება?

(13) კარგი რეპუტაციის მქონე

სანამ ადამიანი დაინიშნება პასტორად, მას კარგი მოწმობა უნდა ჰქონდეს გარეშეთაგან. მათ უნდა იცოდნენ, რომ ის არის პატიოსანი და ერთგული ყველაფერში, რასაც აკეთებს. თუ მას ცუდი სახელი ჰქონდა მოქცევამდე, მას დრო სჭირდება უკეთესი რეპუტაციის დასამკვიდრებლად, სანამ პასტორი გახდება.

აფრიკაში პასტორი ქადაგებდა საკვირაო დილის ქადაგებას, შემდეგ ჩაჯდა ავტობუსში, რომ სახლში წასულიყო. მგზავრობის საფასურის გადახდის შემდეგ მან შეამჩნია, რომ კონდუქტორმა ზედმეტი ხურდა დაუბრუნა. რადგან ის წესიერი ადამიანი იყო, მან ზედმეტი ხურდა დაუბრუნა კონდუქტორს შემდეგი სიტყვებით: ”უკაცრავად, ბატონო, თქვენ შემთხვევით ზედმეტი ხურდა დამიბრუნეთ.” კონდუქტორმა უპასუხა: ”არა, ეს შემთხვევით არ გამიკეთებია. ამ დილით თქვენი ეკლესიის გარეთ ვიდექი, მოვისმინე თქვენი სიტყვა პატიოსნების შესახებ და გადავწყვიტე გამეგო, თუ ცხოვრობთ მასში!" ბიბლიაში ნათქვამია, რომ კარგი სახელი, ანუ რეპუტაცია, ყველაზე დიდი სიმდიდრეა (იგავები 22: 1). ამიტომ, ყველაზე ღრმა სიღარიბე, რომელიც შეიძლება განიცადოთ, არის საეჭვო რეპუტაციის სიღარიბე. რა მოსდის თავში სხვებს, როდესაც თქვენი სახელი ახსენდებათ?

► სტუდენტმა ჯგუფს უნდა წაუკითხოს ტიტეს 1: 5-11.

პასტორის თვისებების უმეტესობა, რომელიც ჩამოთვლილია ტიტეს მიმართ წერილში, ასევე გვხვდება I ტიმოთეს წერილში.

► პასტორის რომელი დამატებითი თვისებებია აღწერილი ტიტეს წერილის ამ მონაკვეთში?

ეს მონაკვეთი ხაზს უსვამს პასტორის უნარას, უპასუხოს ცრუ სწავლებას. პასტორი კარგად უნდა იყოს განსწავლული ჭეშმარიტ დოქტრინაში და შეეძლოს მისი დამაჯერებლად განმარტება. მიზანი არის - ცრუ მოძღვრებაში მყოფების მოქცევა, მაგრამ რაც მთავარია, ეკლესიაში ოჯახების დაცვა შეცდომაში შეყვანისგან. პასტორი, რომელსაც არ ჰქონდა განათლების მიღების საშუალება, უნდა ყველაფერი გააკეთოს, რათა მუდმივად შეივსოს თავისი ცოდნა სწავლის მეშვეობით.

► სტუდენტმა ჯგუფს უნდა წაუკითხოს საქმეების 6:1-6. რა პრობლემაა აღწერილი ამ მონაკვეთში?

პირველი დიაკვნები სულთმოფენობის შემდეგ მალევე დაინიშნენ. ისინი საჭირონი გახდნენ ეკლესიის მართვის მრავალი დეტალის გამო. მოციქულებს ყურადღება უნდა დაეთმოთ ლოცვასა და ქადაგებისთვის. შვიდი ადამიანი დაინიშნა. მოგვიანებით ზოგიერთ მათგანს უფრო დიდი მსახურება მიანდეს.

დიაკვანი ეხმარება პასტორს მსახურების დეტალებში. დიაკვანი შეიძლება იყოს მქადაგებელიც, მაგრამ აუცილებელი არაა.

► რა თვისებები ჰქონდათ პირველ დიაკვნებს?

პირველი დიაკვნების თვისებები იყო პატიოსანი სახელი და სულიწმიდით და სიბრძნით აღვსება. ისინი ეკლესიის ფულს მართავდნენ, ამიტომ საჭირო იყო პატიოსანი ხალხის სახელი ჰქონოდათ. მათ ბევრ რთულ სიტუაციასთან გამკლავება უხდებოდათ, ამიტომ სიბრძნე მნიშვნელოვანი იყო. მათ საქმიანობას სულიერი გავლენა ჰქონდა ეკლესიაზე; ამიტომ საჭირო იყო, რომ ისინი სულიწმიდით სავსენი, მისი ხელმძღვანელობის, ცხებულების და სიწმინდის ქვეშ ყოფილიყვნენ.

პავლე მოციქულმა ჩამოთვალა რამდენიმე თვისება დიაკვნებისთვის.

► სტუდენტმა ჯგუფს უნდა წაუკითხოს 1 ტიმოთეს 3:8-13.

(1) პატივცემულნი

დიაკვანი უნდა იყოს ადამიანი, რომელსაც ოჯახთან, მეგობრებთან და საზოგადოებასთან ურთიერთობებში პატივს სცემენ, სანამ ის დიაკვანი გახდება.

(2) გულწრფელნი

დიაკვანი უნდა იყოს პიროვნება, რომელიც სანდოა მის ნათქვამში. ის მოისმენს ეკლესიაში ხალხის კრიტიკას და მოისმენს მრავალ მოსაზრებას ეკლესიაში არსებული პრობლემების შესახებ. ის პატიოსანი უნდა იყოს თავის ნათქვამში.

(3) არა ლოთი

დიაკვანი არ უნდა იყოს ალკოჰოლიკი. მისი ქცევა უნდა იყოს პატივსაცემი და თანმიმდევრული.

(4) არა ანგარნი

დიაკვანს ევალება ეკლესიის ფულის განკარგვა. ის ასევე პასუხისმგებელია ეკლესიის წევრების საჭიროებებზე ზრუნვაზე. ის არ უნდა იყოს ადამიანი, რომელიც ცდილობს სარგებელი მიიღოს თავისი მსახურებიდან.

(5) სწორი სწავლების კეთილსინდისიერად დამცველნი.

როდესაც ადამიანი ცოდვაში ვარდება, მას როგორც წესი არასწორი სწავლების სწამს. თუ ადამიანი სულიერ გამარჯვებაში ცხოვრობს, ის უფრო მეტად დაიცვას ჭეშმარიტ სწავლებას.

(6) გამოცდილნი

სანამ ადამიანს დიაკვნის თანამდებობა მიანიჭებენ, მას უნდა ჰქონდეს შესაძლებლობა, დაეხმაროს მსახურებას და აჩვენოს, რომ ის ბრძენი და ნდობის ღირსია. ბრძენი ლიდერები მათ მანამდე მისცემენ საშუალებას ხალხს დაეხმარონ, სანამ პასუხისმგებლობას დააკისრებენ.

► რა მაგალითებია იმისა, თუ როგორ შეუძლია ადამიანს დაეხმაროს ეკლესიას მსახურებაში, სანამ ძალაუფლებას მიიღებს?

(7) ერთგულნი ცოლებთან ერთად

დიაკვნის მსახურებას ზიანი მიადგება, თუ მისი ცოლი ჭორაობს და არ არის ქრისტიანობის კარგი მაგალითი.

(8) თავისი სახლის კარგი მმართველნი

პასტორის მსგავსად, დიაკვანსაც უნდა შეეძლოს საკუთარი სახლის კარგად მართვა.

► კლასმა უნდა განიხილოს თითოეული პუნქტის მნიშვნელობა, დაწყებული კითხვით: "რატომ არის ეს თვისება მნიშვნელოვანი?"

1. მისი ერთგულება არ უნდა ნაწილდებოდეს სხვა ორგანიზაციებზეც.

2. ის მზადაა შექმნას მსახურთა გუნდი და გამოიყენოს მათი შესაძლებლობები და უნარები.

3. ის უძღვება ეკლესიას, რომ გაზიარებულ იქნას სულიერ ოჯახად ცხოვრება და იზრუნოს ყველა საჭიროებაზე.

4. ის თავის ეკლესიას ემსახურება ღმერთისა და ხალხის სიყვარულით და არა პირადი სარგებლისათვის.

5. სულიერი პრიორიტეტები, როგორიცაა თაყვანისცემა, მახარებლობა და სულიერი ზრდა, მისი მსახურების ყურადღების ცენტრშია.

6. ის სარგებლობს თავისი ხალხის ნდობითა და რწმენით.

7. მას სურს ააშენოს ეკლესია, როგორც მუდმივი დაწესებულება, რომელიც მას არ ეკუთვნის.

8. მას ეკლესია სიმწიფისკენ მიჰყავს სწავლებით მეათედისა და მოზიარეობის შესახებ, რომელიც აკმაყოფილებს საჭიროებებს.

9. ის ყველაფერში სრულიად გულწრფელია, მათ შორის, ფულის გამოყენებაში.

10. ის აჩვენებს ფულისა და პერსონალის კარგად მართვის უნარს.

ადამიანი, რომელიც არჩეულია საეკლესიო საქმიანობის ხელმძღვანელად, უნდა ფლობდეს ამ თვისებებს. ეკლესიის ლიდერები მუდმივად უნდა მუშაობდნენ ამ თვისებების განვითარებაზე იმ წევრებში, რომელთაც შეუძლიათ დაეხმარონ ეკლესიას პასუხისმგებლობებში და დაემატონ ლიდერულ გუნდს.

► კლასმა უნდა განიხილოს თითოეული პუნქტის მნიშვნელობა, დაწყებული კითხვით: ”რატომ არის ეს თვისება მნიშვნელოვანი?”

1. იგი ერთგულია ადგილობრივი ეკლესიის - დასწრებაში, მეათედსა და მონაწილეობაში - და აქვს ქრისტიანული მოწმობა, რომელსაც პატივს სცემენ.

2. ის უკვე დებს ძალასა და ენერგიას ადგილობრივ ეკლესიაში.

3. მას აქვს ქრისტიანობის თვისებები: სრული პატიოსნების და მაღალი ეთიკის გრძნობა.

4. ის უკვე იჩენს ინიციატივას და მოტივაციას, გააკეთოს ყველაფერი, რაც შეუძლია.

5. ის პირადად არის დისციპლინირებული, თვითმოტივირებული და მუდმივად დახვეწის პროცესში.

6. ის ავლენს სხვების ორგანიზების და ხელმძღვანელობის უნარს და არა მხოლოდ სხვისი მითითებით მუშაობის შესაძლებლობას.

7. მას აქვს პროექტში მისი ფუნქციის და ფუნქციის შესრულებთვის საჭირო კომპეტენცია.

მიეცით ზოგიერთ სტუდენტს საშუალება, გაგიზიარონ, თუ როგორ შეუძლიათ შეცვალონ თავიანთი მიზნები და მოქმედებები ამ გაკვეთილის შედეგად.

1. ღმერთმა დაადგინა, რომ ეკლესია მოქმედებს სულიერი ხელმძღვანელობის ქვეშ, ლიდერების მეშვეობით.

2. ეკლესიის პასუხისმგებლობის შესასრულებლად საჭიროებს მრავალი ლიდერის ფუნქციებს.

3. ლიდერის თვისებების უმეტესობა დაკავშირებულია კარგ ბუნებასა და ხასიათთან.

4. პასტორი ან სხვა მსახურების ლიდერი მუდმივად უნდა ავითარებდეს თავისში კარგ თვისებებს.

5. მსახურების ლიდერს სჭირდება საიმედოობა, მოტივაცია და ნდობა.

1. დაწერეთ ამ გაკვეთილში ნასწავლი კონცეფციის შემაჯამებელი აბზაცი, რომელსაც თქვენი ცხოვრების შეცვლა შეუძლია. ახსენით, რატომ არის ის მნიშვნელოვანი. რა სარგებელი მოაქვს ამის ცოდნას? რა ზიანი შეიძლება მოჰყვეს ამის არცოდნას?

2. განმარტეთ, როგორ გამოიყენებთ ამ გაკვეთილის პრინციპებს თქვენს ცხოვრებაში როგორ ცვლის ეს გაკვეთილი თქვენს მიზნებს? როგორ აპირებთ თქვენი მოქმედებების შეცვლას?

3. დაწერე გაკვეთილი 2-ის ხუთი შემაჯამებელი დებულება მეხსიერებით.

4. შემდეგი გაკვეთილის დაწყებამდე წაიკითხეთ 1 მეფეთა (სამუელი) 2:12-36. დაწერეთ რამდენიმე დაკვირვება ელის ლიდერობის შესახებ.