Lesson 9: კავშირი და ჩართულობა

სპორტული გუნდების მწვრთნელებს ესმით, რომ ნიჭი არ არის საკმარისი. გუნდის წევრები მოტივირებულები უნდა იყვნენ, რომ გააკეთონ ყველაფერი. მწვრთნელის მუშაობის მნიშვნელოვანი ნაწილია გუნდთან საუბარი და შთაგონება, რომ მაქსიმალურად დაიხარჯონ. მაყურებლები გულშემატკივრობენ გუნდს, რადგან მათი აზრით, წახალისება ხელს შეუწყობს მოთამაშეებს უკეთესად თამაშში. თუ გუნდის წევრმა უბრალოდ ისწავლა, შეიძინა უნარ-ჩვევები და აკეთებს თავისი საქმეს გასამრჯელოს მისაღებად, ეს არ იქნება საკმარისი გამარჯვების მისაღწევად.

ეს პრინციპი ეხება არა მხოლოდ სპორტს, არამედ ყველა ორგანიზაციას. ორგანიზაციის წარმატება დამოკიდებულია ჩართული ადამიანების მიძღვნაზე. ჭეშმარიტი მიძღვნა ნიშნავს, რომ ისინი არ ასრულებენ მხოლოდ იმას, რაც საჭიროა, არამედ სრულად უძღვნიან თავიანთ შესაძლებლობებსა და გონებას, რათა ორგანიზაციამ წარმატებას მიაღწიოს.

ამოქმედებული მიძღვნა არის "ჩართულობა". ადამიანი, რომელიც ჩართულია, დაკავშირებულია, მონაწილეა და მიძღვნილია.

ქვემოთ მოცემულია რამდენიმე ამბავი იმის შესახებ, თუ როგორ გააკეთა ადამიანმა იმაზე მეტი, ვიდრე ორგანიზაციისგან ევალებოდა. ყოველი ამბის შემდეგ გვხვდება კითხვა "რატომ?" ჯგუფმა უნდა განიხილოს შესაძლო მიზეზები, რატომ გააკეთა პიროვნებამ ის, რაც გააკეთა.

ჯორჯი მუშაობდა ბიზნესში, რომელიც დიდი ეზოდან ხის მასალებს ყიდდა. მისი საქმე იყო მომხმარებლების დახმარება მასალის მანქანებში ჩატვირთვაში. მან ეზოში ფიცრების გროვა შენიშნა, რომელიც ჩამოცვენილი იყო. მას შემდეგ, რაც მომხმარებელს დაეხმარა, ის წავიდა და ფიცრები ისევ ლამაზად დააწყო, მიუხედავად იმისა, რომ უფროსს არ უთქვამს ამის გაკეთება. რატომ გააკეთა ჯორჯმა ეს?

მაიკლი კალათბურთს თამაშობდა პროფესიონალურ გუნდში. თამაშის დროს მან სცადა ბურთის კალათაში ჩაგდება, მაგრამ მას არ ჰქონდა კარგი პოზიცია ამის გასაკეთებლად. მან სწრაფად ესროლა ბურთი სხვა კალათბურთელს, რომელიც უკეთეს ადგილზე იყო ბურთის ჩასაგდებად. რატომ არ ეცადა მაიკლი თვითონ მოეპოვებინა გუნდისთვის ქულა?

პეტრე მუშაობდა ბენზინგასამართ სადგურზე და მომხმარებლებს საწვავს უსხამდა მანქანებში. როდესაც ბევრი მომხმარებელი ყავდათ, პეტრე სირბილით მიდიოდა შემდეგ მომხმარებელთან, რათა დრო დაეზოგა. რატომ დარბოდა პეტრე?

კვირას ჰაროლდმა შეამჩნია, რომ ეკლესიის სახურავი დაზიანდა ჩამოვარდნილი ხის გამო. ორშაბათს, ჰაროლდმა იყიდა მასალები და მოვიდა თავისი იარაღებით სახურავის შესაკეთებლად. ჰაროლდს არ ეკუთვნოდა ეკლესიის შენობა და არც ანაზღაურება მიუღია ამ საქმის შესასრულებლად. რატომ შეაკეთა ჰაროლდმა სახურავი?

ელეინი სასურსათო მაღაზიაში მუშაობდა მოლარედ. ერთხელ, შუადღით, როდესაც ის შესვენებაზე წასვლას აპირებდა, დაინახა, რომ იატაკზე ცოტაოდენი ზეთი იყო დაღვრილი. შესვენების ნაცვლად, მან ზეთი აწმინდა. რატომ დათმო ელეინმა კუთვნილი შესვენება, დაღვრილი ზეთის ასაწმენდად?

კარლი იყო ეკლესიის დიაკვნი და საკვირაო სკოლის მასწავლებელი. ერთ კვირა დილით ის მივიდა ეკლესიაში ადრე და აღმოაჩინა, რომ ტუალეტი არ იყო დასუფთავებული. მან ტუალეტი დაასუფთავა მანამდე, სანამ ეკლესიის დანარჩენი წევრები მოვიდნენ. რატომ დაალაგა კარლმა ტუალეტი?

თუ მხოლოდ ბიზნესის მფლობელი ზრუნავს მის წარმატებაზე, ბიზნესი კარგად ვერ განვითარდება. თუ მხოლოდ ეკლესიის პასტორს სურს ეკლესიის წარმატების მიღწევა, ეკლესია მარცხდება. თუ მხოლოდ მწვრთნელს სურს გუნდის გამარჯვება, გუნდი წააგებს.

ადამიანის ჩართულობა ნიშნავს, რომ ის ყველაფერს გააკეთებს და არა მხოლოდ იმას, რაც საჭიროა. ის იყენებს თავის შესაძლებლობებსა და იდეებს ორგანიზაციისთვის. ის არა მხოლოდ დაგეგმილ დროს უთმობს სამუშაოს, და ასრულებს კონკრეტულ დავალებას. არა მხოლოდ მისი ხელები, არამედ მისი გონება და გულიც ჩართულია.

► თქვენი აზრით რას ნიშნავს შემდეგი ციტატა?

“როდესაც გული, გონება, ხელები და ჩვევები თნაბრდება, შედეგი არის ერთგულების, ნდობის და პროდუქტიულობის არაჩვეულებრივი დონე.”[1]

ზოგჯერ ლიდერები მიიჩნევენ, რომ ხალხი კარგად იმუშავებს მხოლოდ იმიტომ, რომ ისინი მათ მორჩილებაში მყოფი ქვეშევრდომები არიან, ან იმიტომ, რომ ანაზღაურებას იღებენ. ფაქტია, რომ ადამიანები საუკეთესოდ მაშინ მუშაობენ, როდესაც ორგანიზაციის მიმართ პირად მიძღვნას გრძნობენ.

ორგანიზაციას, რომელიც მოხალისეებზეა დამოკიდებული, ძალიან ცოტა რამ შეუძლია აკეთოს ამ, საქმეში ჩართული, ადამიანების გარეშე. ხალხი არ მიუძღვნის თავის დროსა და რესურსებს, თუ ისინი არ იზიარებენ ორგანიზაციის მიზნებს.

ორგანიზაციაში მომუშავე ყველა ადამიანს, არ აქვთ ერთი და იგივე დონის ჩართულობა. ისინი შეიძლება იყვნენ ჩართულობის სხვადასხვა დონეზე.

ლიდერი აფასებს მგზნებარე, მაღალი ჩართულობის მქონე ადამიანებს და დამოკიდებულია მათზე. ლიდერს შეიძლება არ ესმოდეს, რატომ არის ზოგი ადამიანი ჩართული და სხვები - არა, მაგრამ მისი საქმეა ხალხის ჩართულობის დონის ამაღლება.

ლიდერმა დიდი დრო უნდა დაუთმოს თავისი ხალხის ჩართულობის დონის ამაღლებას. ეს არის ლიდერის ერთ-ერთი ყველაზე მნიშვნელოვანი ამოცანა და მას ისე ვერავინ შეძლებს, როგორც ის. ლიდერი ან აუმჯობესებს მათ ჩართულობას და ურთიერთქმედებას ან ხელს უშლის მას.

ეკლესიებში არიან ფულიანი ხალხი, რომლებიც არ იძლევიან შესაწირს. ორგანიზაციებს ჰყავთ დროის მქონე ადამიანები, მაგრამ ისინი არ არიან ქმედითნი, გამოსადეგნი. ბიზნესს ჰყავს იდეების მქონე თანამშრომლები, რომლებსაც ისინი არ აზიარებენ.

ზოგჯერ პასტორები ეკლესიის გარეთ ეძებენ ვინმეს, ვინც მოვა და დაეხმარება ან ფინანსურ მხარდაჭერას გაუწევს. ამასთან, ეკლესიაში არიან ხალხი, ვისაც შეუძლიათ დაეხმარონ და არ ეხმარებიან, ისევე როგორც ადამიანები, ვისაც შეუძლია შესწირონ, მაგრამ არ წირავენ. პრობლემა არის ჩართულობის ნაკლებობა. ეკლესიის ხალხი ვერ გრძნობს, რომ ეკლესია მათია.

ჩართულობა არის კავშირის დემონსტრირება: ხალხი არ მიიღებს მონაწილეობას, თუ არ იგრძნობენ კავშირს / გაიგივებას ორგანიზაციასთან და ხელმძღვანელთან.

განვიხილოთ ოჯახის მაგალითი. ოჯახის წევრები მრავალმხრივ ეხმარებიან ერთმანეთს ისე, რომ არ მოელიან თავისთვის კონკრეტულ ჯილდოს. რატომ აკეთებენ ამას? რადგან მათ იციან, რომ ისინი ოჯახის ნაწილი არიან; ისინი დაკავშირებულნი არიან.

თუ ორგანიზაციის თანამშრომლები არ აძლევენ და არ აკეთებენ იმას, რაც შეუძლიათ, ისინი თავს არ გრძნობენ დაკავშირებულად. თუ ადამიანი გრძნობს კავშირს, ორგანიზაციის მიზნები, მისი მიზნებია, ორგანიზაციის საჭიროებები, მისი საჭიროებებია და ორგანიზაციის წარმატება, მისი წარმატებაა.

ზოგჯერ ლიდერებს არ ესმით, რომ ჩართულობის ნაკლებობა არის პრობლემა. მათ შეიძლება იფიქრონ, რომ თავიანთ ხალხს სწავლება სჭირდება. სწავლება არ არის ის, რაც საჭიროა მათთვის, ვინც არ აკეთებს იმას, რაც შეუძლიათ. პრობლემა იმაშია, რომ ისინი ვერ გრძნობენ კავშირს.

• ლიდერებს უჭირთ წევრების მოზიდვა პასუხისმგებლობის შემსრულებლებად.

• წევრები გრძნობენ, რომ არ მონაწილეობენ გადაწყვეტილებებში.

• წევრები ადვილად მიდიან, როდესაც პრობლემები წარმოიქმნება.

• წევრები აკრიტიკებენ საკუთარ ორგანიზაციას გარეშეებთან.

• წევრებს არ აწუხებთ ორგანიზაციის წარმატება.

• წევრები არ აიგივებენ საკუთარ თავს, ორგანიზაციასთან.

წევრი, რომელიც ვერ გრძნობს კავშირს, საუბრობს ორგანიზაციაზე ისე, თითქოს ის მისი წევრებისგან განცალკევებული პირია. ის საუბრობს, რა უნდა გააკეთოს ორგანიზაციამ. ის იყენებს ტერმინს ისინი ნაცვლად ტერმინისა ჩვენ.

[1]ორგანიზაციის ლიდერები, რომლებიც არც ისე კარგად არიან დაკავშირებულნი, დისტანციას ქმნიან მათსა და ორგანიზაციის წევრებს შორის. ისინი რთულად მისაღწევი არიან ხალხისთვის, უბრალო ურთიერთობისთვისაც კი. ლიდერები თავიანთ საქმიანობას საიდუმლოდ ინახავენ, რომელსაც ხალხი ვერ გაიგებს. მათ არ სურთ შეთავაზებების, ან პრეტენზიების მოსმენა. როდესაც ორგანიზაცია ასეთია, ლიდერის ნება ერთადერთი აღიარებული რეალობაა; ყველა სხვა ფაქტს უგულებელყოფენ, რადგან ხალხი ლიდერის ადმინისტრირების პირობებში თავის გადარჩენას იმით ცდილობს, რომ მალავენ თავის შეცდომებს. ხალხს ეშინია ინფორმაციისა და სიმართლის, როდესაც ისინი ვერ გრძნობენ თავს ხელმძღვანელობასთან კავშირში.

ორგანიზაციაში შეიძლება შეიქმნას მცირე კლანები და დაჯგუფებები, რომლებსაც ქმნიან ადამიანები, ერთმანეთის დაცვის მიზნით ცვლილებებისა და ლიდერებისგან. როდესაც ადამიანები ორგანიზაციის შიგნით საფრთხეს გრძნობენ, ისინი ორგანიზაციის გამოწვევების ნაცვლად, საკუთარ, პირად პრობლემებზე აკეთებენ კონცენტრირებას. მეტოქეობასთან შეჯახებისას მათ არ შეუძლიათ ყურადღების ფოკუსირება პოზიტიურ, თავდაუზოგავ მიღწევებზე.

ზოგჯერ ორგანიზაციის შეხვედრები წარმოაჩენს, თუ რამდენად კარგად არიან ერთმანეთთან დაკავშირებული წევრები. ადამიანები თავს არიდებენ შეხვედრებს, თუ

• თვლიან, რომ შეხვედრა არ არის მნიშვნელოვანი ფუნქციონირებისათვის,

• არ თვლიან, რომ მათი მონაწილეობა რაიმეს შეცვლის, ან

• ისინი არ იზიარებენ ლიდერების მიზნებს და არ უნდათ იყვნენ ჩართულნი.

ზოგიერთი ორგანიზაცია კარგავს ახალგაზრდებს, რომლებსაც ჰქონდათ ლიდერებად ჩამოყალიბების პოტენციალი, მხოლოდ იმიტომ, რომ მათ დაინახეს, რომ ვერასდროს შეძლებდნენ გამხდარიყვნენ არსებული ადმინისტრაციის ნაწილი. ლიდერები ინარჩუნებენ თავიანთ პოზიციებს გავლენიან ხალხთან კავშირებით და არ აძლევენ შესაძლებლობას ადამიანებს, რომლებიც არ არიან მათთან კავშირში. უნარიან ახალგაზრდებს შეუძლიათ მიმართონ სხვა ორგანიზაციებს, რომლებიც მათ შესაძლებლობებს მისცემენ.

"სხვა ეკლესიები შესაძლოა იშიფრონ თქვენს მეთოდებს და პროგრამებს, მაგრამ ადამიანები ჩვეულებრივ არ ტოვებენ ორგანიზაციას, თუ ისინი დაკავშირებულნი გრძნობენ.

ეს ნიშნავს, რომ თქვენი ერთადერთი რეალური კონკურენტული უპირატესობა თქვენი ურთიერთობა თქვენს ადამიანებთან არის... ერთადერთი რამ, რაც თქვენი კონკურენცია არასდროს წამოართმევს, არის ურთიერთობა, რომელიც გაქვთ თქვენს ადამიანებთან..."[2]

ახალგაზრდა რეხობოყამი გამეფდა. უხუცესებმა მას ურჩიეს ემსახურა ხალხისთვის: ”თუ დღეს მაგ ხალხის მსახური იქნები, მოემსახურები და დააკმაყოფილებ მათ, ლმობიერ სიტყვებს ეტყვი, მაშინ ისინი შენი მსახურნი იქნებიან სამარადჟამოდ.” (3 მეფეთა 12:7). ეს რჩევა ნიშნავს, რომ მან უნდა კავშირი დაამყაროს ხალხთან და აჩვენოს, რომ ზრუნავს მათ საჭიროებებზე. შემდეგ ხალხი დაინახავს, ​​რომ სამეფო მათთვის არის შექმნილი და ისინი მისი ერთგულები იქნებიან. ისინი გაიზიარებენ სამეფოს მიზნებს, პრობლემებს, საჭიროებებსა და საქმეებს, რადგან ის მათ ეკუთვნის.

რეხობოყამს მიაჩნდა, რომ მისი პოზიცია (გამეფება) საკმარისი იყო. მისი აზრით, ძალაუფლება იმას ნიშნავდა, რომ აუცილებელი არ იყო ხალხისთვის ეთხოვა მათი ჩართულობა. პირიქით, უთხრა, რომ მათ მკაცრად მართვას გეგმავდა და არა მათზე ზრუნვას.

ხალხის უმეტესობა გამოეყო რეხობოყამს. მათ თქვეს: ”დავითთან ჩვენ რა გვესაქმება? საერთო რა გვაქვს იესეს ძესთან?! თქვენ თქვენი კარვებისკენ გასწით, ისრაელიანებო! ახლა შენ მიხედე შენს სახლს, დავით!” (მუხლი 16). ორგანიზაციის თანამშრომლები, რომლებიც ვერ გრძნობენ კავშირს, საკუთარ საჭიროებებზე ზრუნავენ და არა ორგანიზაციის მიზნებზე. მაშინაც კი, თუ ისინი არ წავლენ, ისინი მხოლოდ საკუთარი მიზნების მისაღწევად მუშაობენ.

რეხობოყამის პასუხი იყო ძალაუფლების გამოყენება. ის არ შეცვლილა და არც უცდია გაეგო მათი საჭიროებები. მან გაგზავნა ხარკის ამკრეფი. როდესაც ამან არ გაამართლა, მან დაგეგმა ჯარის გაგზავნა; მაგრამ ღმერთმა შეაჩერა ის. სამეფო აღარასოდეს გაერთიანებულა.

იერობოყამი იყო მეამბოხე, რომელიც ცდილობდა ხალხის დაყოლიებას, რომ არ ყოფილიყვნენ სოლომონისადმი ერთგულნი. მან ვერ მიაღწია მიზანს და წავიდა ეგვიპტეში, რომ ჯანყის გამო არ მოეკლათ. სოლომონის სიკვდილის შემდეგ, იერობოყამი დაბრუნდა ისრაელში, რათა ენახა, ხომ არ მიეცემოდა მას ძალაუფლების აღების შესაძლებლობა. ის ტომების წარმომადგენელთა ჯგუფს მიუძღვებოდა, რათა დალაპარაკებოდნენ ახალ მეფეს, რეხობოყამს.

რეხობოყამმა უგუნურად უპასუხა ხალხს, რომ სასტიკად მოექცეოდა მათ, იფიქრა რა, რომ მათ, მისადმი მორჩილების გარდა, სხვა არჩევანი არ ჰქონდათ (3 მეფეთა 12:13-14). ხალხი გაბრაზდა და იერობოყამმა შეძლო ათი ტომის გამოყოფა. სამეფო აღარასოდეს გაერთიანებულა. იერობოყამმა ხალხი კერპთაყვანისმცემლობაში შეიყვანა, რათა ისინი იერუსალიმში არ დაბრუნებულიყვნენ თაყვანის საცემად (3 მეფეთა 12:26-28).

ამ სიტუაციაში ვინ იყო კარგი ლიდერი და ვინ იყო ცუდი? ორივე ცუდი იყო. რეხობოყამის სიბრიყვემ და ხალხის უკმაყოფილებამ გზა გაუხსნა ცუდი ხასიათის მქონე მზაკვარ ლიდერს.

იერობოყამი მზად იყო ყველაფერი გაეკეთებინა საკუთარი ძალაუფლების მოსაპოვებლად, მათ შორის ხალხი ჩამოეშორებინა ღვთის თაყვანისმცემლობისთვის. მსახურების ბევრი ლიდერი კვლავ იყენებს ხალხის უკმაყოფილებას საკუთარი გავლენის მოსაპოვებლად; ისინი ხშირად იყენებენ არაკეთილსინდისიერებას, ხელს უწყობენ ჭორებს და ორგულობას და ასწავლიან ცრუ მოძღვრებას.

კავშირები უკეთესად მყარდება ცალკეულ პიროვნებებთან, ვიდრე ხალხის სიმრავლესთან ანუ ბრბოსთან, ან პროგრამების საშუალებით. ლიდერმა, რომელსაც სურს თავის ხალხთან პირადი კავშირი დაამყაროს, მეგობრული ურთიერთობის მარტივი პრინციპებით უნდა დაიწყოს. მან უნდა შეაქოს მათი თვისებები. ის უნდა ესაუბროს ისეთ საკითხებზე, რომლებიც არ ეხება სამუშაოს. მან უნდა გამოხატოს ინტერესი მათი ოჯახების და პირადი მდგომარეობის მიმართ. ის მათ პატივისცემით უნდა მოეკიდოს და აჩვენოს, რომ აფასებს მათ.

ნურასოდეს მიწერთ ვინმეს რაიმეს, თუნდაც პირადი წერილით, თუ არ გსურთ, რომ ის გამოქვეყნდეს ან იქიდან ციტირება მოხდეს. თქვენ არ იცით ვინ შეიძლება ნახოს ის. გახსოვდეთ, როდესაც ხალხს ელაპარაკებით, თქვენი საუბრის სიტყვები შეიძლება სხვებისთვის იყოს ციტირებული. არ თქვათ ისეთი რამ, რისიც მოგერიდებოდათ, მოგვიანებით, სხვა ადამიანებისთვის განმარტებისას.

კავშირები უკეთესად მყარდება ცალკეულ პიროვნებებთან, ვიდრე ხალხის სიმრავლესთან ანუ ბრბოსთან, ან პროგრამების საშუალებით.

ზოგიერთ ლიდერს სურს შთაბეჭდილება მოახდინოს საკუთარ ხალხზე, რათა ხალხს სურვილი გაუჩნდეს გაყვნენ მათ. მაგრამ კავშირების დასამყარბლად უფრო მნიშვნელოვანია თქვენ იყოთ საკუთარი ხალხის მიერ მოხდენილი შთაბეჭდილების ქვეშ, ვიდრე მათზე თქვენ მიერ შთაბეჭდილების მოხდენა. არსებობს ძველი გამონათქვამი: ”მათ არ აინტერესებთ რამდენი იცით, სანამ არ ეცოდინებათ, თუ რამდენად ზრუნავთ.”

ბევრ ლიდერს მოსმენის უნარი არ გააჩნია, რადგან ფიქრობენ, რომ მათ უკვე ესმით სიტუაცია, იციან რა უნდა გაკეთდეს და მზად არიან სხვებიც დაარწმუნონ. ხალხი არ მონაწილეობს, თუ ფიქრობს, რომ მათი მოსაზრებები არ ფასდება. მოსმენისა და დაფასების უუნარობის გამო, ლიდერი აუფასურებს თავის ხალხს, ამიტომ ისინი არ გააკეთებენ თავის მაქსიმუმს.

ზოგჯერ ორგანიზაციის წევრებს აქვთ ძლიერი განცდები. ისინი სიბრაზით ან იმედგაცრუებით საუბრობენ. ლიდერმა შეიძლება შეცდომა დაუშვას, მცდელობით მისცეს მათ მითითებები, როდესაც ისინი უბრალოდ თავიანთი განცდების გამოხატვას საჭიროებენ.

სტივენ კოვი განმარტავს:

• საერთოდ, სანამ ადამიანი მკვეთრი ემოციებით ურთიერთობს, ის ჯერჯერობით ვერ გრძნობს, რომ მისი ესმით.

• ადამიანი, როგორც წესი, არ გთხოვს რჩევას მანამ, სანამ არ იგრძნობს, რომ მისი გესმით. რჩევის ნაადრევად მიცემა, როგორც წესი, იწვევს მხოლოდ მეტ ემოციას, ან იმას, რომ ეს პიროვნება უბრალოდ უგულებელყოფს თქვენს ნათქვამს.[1]

სხვა დროს, როდესაც მსგავს სიტუაციაში მოხვდებით, სცადეთ შემდეგი: ემოციური ადამიანის აზრის შეცვლის მცდელობის ნაცვლად, მოუსმინეთ მას. აჩვენეთ, რომ გესმით მისი გრძნობების (მაგ.: ”იმედგაცრუებული ხართ, რადგან ...”) მაშინაც კი, თუ არ ეთანხმებით მათ მოსაზრებებს. დაინახავთ, როგორ დაწყნარდებიან და, საბოლოოდ, დაიწყებენ თქვენს მოსმენას, რადგან დარწმუნდებიან, რომ გესმით მათი. სანამ არ ეცოდინებათ, რომ გესმით, ისინი არ ჩათვლიან, რომ თქვენს აზრს მნიშვნელობა აქვს.

უწინამძღვრეთ მრავალი კითხვის დასმით - არა მანიპულირებისთვის, არამედ გასაცნობიერებლად და აზროვნების სტიმულირებისთვის. თუ ადამიანები, რომლებსაც დახმარება შეუძლიათ, არ გეხმარებიან, კითხვები დაეხმარება მათ. თუ ისინი იზიარებენ თქვენს ღირებულებებს, შეგიძლიათ მოიპოვოთ მათი დახმარება, მიზნების მიღწევაში. იკითხეთ:

• "როგორ ფიქრობთ, რისი გაკეთება შეგვიძლია უკეთესად?”

• ”თქვენი აზრით, რის გაკეთებას უნდა ვეცადოთ?”

• ”როგორ შეგვეძლო საქმის უკეთესად შესრულება ______-ში ?”

რადგან ისინი იდეების მოწოდებაში დაგეხმარებიან, მათ ასევე სურვილი ექნებათ საქმეშიც დაგეხმარონ. ხალხს არ სურს დახმარება, თუ მათ იდეებს და აზრებს არ აფასებენ.

თუ ფიქრობთ, რომ ადამიანის იდეა კარგია, ის იფიქრებს, რომ ჭკვიანი ხარ. ლიდერს უნდა შეეძლოს პრეტენზიების და უარყოფითი ინფორმაციის მიღება. ხალხი არ ურთიერთობს, თუ არ თვლის, რომ ეს უსაფრთხოა. თუ ისინი თვლიან, რომ დაისჯებიან უთანხმოების გამო, ისინი არ გამოთქვამენ თავიანთ აზრს.

ჩართულობას ეხმარება „შეხვედრამდე შეხვედრების“ ჩატარების ჩვეულება. ცვლილებების შესათავაზებლად საერთო შეხვედრის ჩატარებამდე, გაესაუბრეთ ცალკეულ პირებსა და მცირე ჯგუფებს, რომ მოისმინოთ მათი მოსაზრებები და აუხსნათ თქვენი გეგმა. ჰკითხეთ, რას ფიქრობენ და ყურადღებით მოუსმინეთ. უპასუხეთ მათ საწინააღმდეგო აზრებს ისე, რომ წინააღმდეგობანი არ წამოიჭრას მთავარ შეხვედრაზე. მთავარ სხდომაზე მონაწილეებს არ უნდა გაუკვირდეთ ლიდერის გადაწყვეტილებები. მათ უნდა იცოდნენ, რას ელოდონ.

როგორც წესი, ლიდერებმა არ უნდა გააკვირვონ ადამიანები თავიანთი გადაწყვეტილებებით. თუ ორგანიზაციის წევრები ხშირად გაკვირვებულები არიან იმით, თუ რას აკეთებენ მათი ლიდერები, ლიდერები კარგად არ უხსნიან თავიანთ ღირებულებებს და როგორ აპირებენ ამ ღირებულებების მხარდაჭერას. ორგანიზაციისადმი ნდობა ძლიერდება, თუკი ადამიანები გრძნობენ, რომ გადაწყვეტილებები არ მიიღება მოულოდნელად, მათი გააზრების გარეშე. ისინი გაიზიარებენ ხედვას, თუ იმონაწილევებენ მის განხილვაში და შეძლებენ მასზე გავლენის მოხდენას, სანამ მისი განხორციელება დაიწყება.

ლიდერმა ხალხს უნდა მიაწოდოს იგივე ინფორმაცია, რაც მას აძლევს მოტივაციას. ისინი ვერ შეძლებენ მისი მიზნების გაზიარებას, თუ იმავე ინფორმაციით არ არიან მოტივირებულნი.

► ყავს ეკლესიას მომხმარებლები? ვრცელდება თუ არა მომხმარებლების მომსახურების ცნება და კონცეფცია მსახურებაზე?

► სტუდენტმა ჯგუფს უნდა წაუკითხოს 1 პეტრეს 5:2-4.

ღმერთი პასტორებს ავალებს ემსახურონ ეკლესიის ხალხს. უნდა გავითვალისწინოთ მათი საჭიროებები და ვიზრუნოთ მათზე ისე, როგორც მწყემსი ზრუნავს თავის ცხვრებზე.

ამ გაკვეთილში ჩვენ შევისწავლით მომხმარებლების მომსახურების რამდენიმე პრინციპს - არა ბიზნესის წარმატების მიღწევის პრიორიტეტიდან, არამედ ადამიანების საჭიროებების დაკმაყოფილების პრიორიტეტიდან გამომდინარე. ჩვენი პრიორიტეტი არის იმ ამოცანის შესრულება, რომელიც ღმერთმა მოგვცა.

ნებისმიერი ორგანიზაცია - იქნება ეს ბიზნესი, მსახურება თუ სხვა სახის - არსებობს ხალხის საჭიროებების დასაკმაყოფილებლად. ამიტომ, ყველა ორგანიზაციას სჭირდება მომსახურების მკაფიო ხედვა. ზოგიერთი პრინციპი ერთნაირად მუშაობს, როგორც ბიზნესის, ასევე მსახურების წარმატებისთვის.

მსახურების ხედვა და ფასეულობები უნდა იყოს მკაფიო, რომ ორგანიზაციაში ყველა კონცენტრირებული იყოს იმაზე, რაც მნიშვნელოვანია და იცოდეს როგორ ქცევას ელოდებიან.

დიდი კომპანიები აცნობიერებენ, რომ მათი ყველაზე მნიშვნელოვანი მომხმარებლები საკუთარი ხალხია: თანამშრომლები და მენეჯერები. თუ ლიდერები იზრუნებენ თავიანთ თანამშრომლებზე და წაახალისებენ, რათა მათ გამოიყენონ თავიანთი გონებრივი შესაძლებლობები, ეს ადამიანები ძალას არ დაიშურებენ მომხმარებლებზე ზრუნვისთვის. მომხმარებელთა ერთგულება არის ის, რასაც მიიღებთ, როდესაც ქმნით სამოტივაციო გარემოს თქვენი ხალხისთვის.[1]

ბევრი ადამიანი იღებს დაბალი ხარისხის მომსახურებას პრეტენზიის გარეშე, რადგან არ ელიან, რომ ის უკეთესი იქნება. ეს არ ნიშნავს, რომ ისინი კმაყოფილები არიან. თუ უკეთესი ვარიანტი გაჩნდება, ისინი სწრაფად გადავლენ მასზე. ამიტომ, ლიდერს არ შეუძლია ჩათვალოს, რომ ყველაფერი კარგადაა მხოლოდ იმიტომ, რომ ხალხი არ წუწუნებს.

თუ ადამიანები ტოვებენ ეკლესიას ან სხვა ორგანიზაციას ტრივიალური მიზეზების გამო, ან თუნდაც უსაფუძვლოდ, ესეიგი ხალხში კმაყოფილების ნაკლებობაა. ლიდერები არ უნდა დაველოდოთ წუწუნის მოსმენას.

თანმიმდევრული სრულყოფა მოითხოვს სასწავლო პროგრამას და მუშაობის სისტემებს, რომლებიც მუდმივად გაუმჯობესდება. თანმიმდევრულობა მნიშვნელოვანია, რადგან თუ მეტ მოლოდინს ქმნით, შემდეგ კი ვერ ასრულებთ, ხალხი იმედგაცრუებულია.

მსახურება ჩვეულებრივი კეთილგანწყობით იწყება. კეთილგანწყობა და მეგობრულობა ვინმეს მიმართ ნიშნავს, მასთან, როგორც პიროვნებასთან მოპყრობას და არა მხოლოდ საქმიან შეხვედრას. როდესაც მათ ესაუბრებით რაიმეზე, რაც არ არის დაკავშირებული გარიგებასთან, ისინი გრძნობენ, რომ მათ კეთილგანწყობილი და მეგობრული ურთიერთობა აქვთ თქვენთან.

კეთილგანწყობისა და მეგობრულობის გარდა ყურადღება მიაქციეთ ხალხის საჭიროებებს. ეცადეთ დაინახოთ საჭიროება და დაეხმაროთ უნიკალური გზით, რუტინული მომსახურებების მიღმა.

ცხადია, ორგანიზაცია ყველას ყველაფერს ვერ უზრუნველყოფს. ის განსაკუთრებული გზით უნდა აკმაყოფილებდეს გარკვეულ საჭიროებებს.

განვიხილოთ:

• რა ტიპის ადამიანების მოზიდვა გსურთ?

• რისი მიღწევა გსურთ?

• რა საჭიროებები უნდა დააკმაყოფილოთ?

ლიდერმა უნდა წარმოიდგინოს, როგორი იქნებოდა იდეალური მსახურება, შემდეგ კი განავითაროს და გამოასწოროს თავისი წარმოდგენა, იმ ადამიანებთან საუბრით, ვისაც ემსახურება.

► განვიხილოთ თქვენი ორგანიზაცია. როგორი ადამიანების მოზიდვა გსურთ? ვისი მოთხოვნილებები უნდა დააკმაყოფილოთ?

► დაფიქრდით იმ ადამიანებზე, რომლებსაც თქვენი ორგანიზაცია ემსახურება. არსებობენ რამდენიმე ტიპის ადამიანები? რას ეძებენ თქვენთან მოსვლისას? რისი შეთავაზება შეგიძლიათ მათი მოლოდინების მიღმა?

მიეცით საშუალება რამდენიმე სტუდენტს, გაგიზიარონ, თუ როგორ აპირებენ ამ გაკვეთილის შედეგად, მიზნების ან მოქმედების შეცვლას.

1. ადამიანები საუკეთესოდ მუშაობენ, როდესაც ორგანიზაციისადმი პირად მიძღვნას გრძნობენ.

2. ლიდერმა დრო უნდა დახარჯოს თავისი ხალხის ჩართულობის დონის ასამაღლებლად.

3. თუ ორგანიზაციის წევრები არ გასცემენ და არ აკეთებენ იმას, რაც შეუძლიათ, ისინი ვერ გრძნობენ საკუთარ კავშირს.

4. ლიდერს უნდა შეეძლოს პრეტენზიების და უარყოფითი ინფორმაციის მიღება.

5. როგორც წესი, ლიდერებმა არ უნდა გააკვირვონ ადამიანები თავიანთი გადაწყვეტილებებით.

1.    დაწერეთ ამ გაკვეთილში ნასწავლი კონცეფციის შემაჯამებელი აბზაცი, რომელსაც თქვენი ცხოვრების შეცვლა შეუძლია. ახსენით, რატომ არის ის მნიშვნელოვანი. რა სარგებელი მოაქვს ამის ცოდნას? რა ზიანი შეიძლება მოჰყვეს ამის არცოდნას?

2.    განმარტეთ, როგორ გამოიყენებთ ამ გაკვეთილის პრინციპებს თქვენს ცხოვრებაში როგორ ცვლის ეს გაკვეთილი თქვენს მიზნებს? როგორ აპირებთ თქვენი მოქმედებების შეცვლას?

3.    დაწერე გაკვეთილი 9-ის ხუთი შემაჯამებელი დებულება მეხსიერებით.

4.     შემდეგი გაკვეთილის დაწყებამდე წაიკითხეთ 1 კორინთელთა 12.