Lesson 10: გუნდის მშენებლობა

სთხოვეთ ჯგუფს, განიხილონ ქვემოთ მოცემული მტკიცება. რას ნიშნავს ის? სიმართლეა? რატომ არის ეს მნიშვნელოვანი?

არაფერი მნიშვნელოვანი არ მიღწეულა ადამიანის მიერ, რომელიც მარტო მოქმედებდა.

► რა არის გუნდი?

გუნდი არ არის მხოლოდ მიმდევრების ჯგუფი. გუნდი არის ჯგუფი, რომელიც გაერთიანებულია დიდი მიზნის, საერთო ღირებულებების, თანამშრომლობისა და აღიარებული ლიდერობის ირგვლივ.

დაიწყეთ იმაზე ფიქრი, ვინ არის თქვენი გუნდი. გუნდი არ არის მთელი ეკლესია. გუნდი არ არის მხოლოდ ოფიციალური პოზიციების მქონე პირები.

გუნდებს უფრო მეტი რესურსი, იდეა და ენერგია აქვთ, ვიდრე ინდივიდს. გუნდები მაქსიმალურად ზრდიან ადამიანების ძლიერ მხარეებს და ფარავენ მათ სისუსტეებს. ლიდერი უნდა დარწმუნდეს, რომ ადამიანებს აქვთ სწორი პასუხისმგებლობები და პოზიციები, რათა მათი ძლიერი მხარეები იყოს მაქსიმალურად ეფექტურად გამოყენებული და სისუსტეები გაუვნებელყოფილი.

გუნდები უზრუნველყოფენ რამდენიმე პერსპექტივას, თუ როგორი რეაგირება უნდა იყოს სიტუაციაზე. [1]“ჩვენ უნდა გამოვიყენოთ არა მხოლოდ ჩვენი ტვინი და გონება, არამედ ყველასი, რომლის დასესხებაც შეგვიძლია.” (ვუდრო ვილსონი, შეერთებული შტატების ყოფილი პრეზიდენტი).

თუ თქვენი მიზნების მიღწევა თქვენი ძალებითაა შესაძლებელი, თქვენი მიზნები მცირეა. დიდ მიზნებს კარგი გუნდი და კარგი წინამძღოლობა სჭირდება. რაც უფრო დიდია მიზანი, მით უფრო უკეთესი უნდა იყოს გუნდი.

ჯონ მაქსველი იყენებს მთაზე ასვლის ილუსტრაციას, ძლიერი გუნდის საჭიროების განსამარტად. ის მას მწვერვალი ევერესტის პრინციპს უწოდებს.[2] როდესაც გამოწვევა იზრდება, გუნდური მუშაობის საჭიროებაც უფრო მეტად იზრდება.

დიდებული ოცნების მისაღწევად, დიდებული გუნდი უნდა გყავდეს. "ოცნების გუნდი" არის შემოქმედებითი, ერთიანი, მოქნილი, მოტივირებული, კომპლემენტარული (ურთიერთშემავსებელი), შეუპოვარი და გამოცდილი.

გუნდი უნდა შეესაბამებოდეს ოცნებას. არარეალურია იმის თქმა, რომ გუნდს შეუძლია მიაღწიოს რაღაც დიდებულ წარმატებას, თუ ის დიდებული გუნდი არ არის. თქვენ უნდა განავითაროთ გუნდი და ჩამოაყალიბოთ შესაბამისი ოცნება მისაღწევად. ოცნების განვითარებამდე, უნდა იმუშაოთ გუნდის განვითარებაზე.

გუნდი არ არის ძლიერი მხოლოდ იმიტომ, რომ მას ძლიერი პიროვნებები ჰყავს. ინდივიდუალური ნიჭი გუნდს არ გახდის დიდებულს მანამ, სანამ ეს ნიჭი თანამშრომლობაში არ გამოიყენება. გუნდი არის ჯგუფი, რომელსაც აერთიანებს დიდი მიზანი, საერთო ღირებულებები, თანამშრომლობა და მიღებული და აღიარებული ხელმძღვანელობა.

• თუ წევრებს აქვთ საკუთარი მიზნები, რომლებიც აზიანებს გუნდის მიზანს, გუნდი არ იქნება ძლიერი.

• თუ წევრები ვერ თანხმდებიან იმაზე, რა არის ყველაზე მნიშვნელოვანი, არიან განსხვავებული ღირებულებების მქონე, გუნდი ვერ იქნება ძლიერი გრძელვადიან პერსპექტივაში.

• თუ გუნდის წევრები არ იყენებენ თავიანთ შესაძლებლობებს ინდივიდუალური სისუსტეების გადასაფარად, გუნდი არ არის ძლიერი.

• თუ წევრები კონფლიქტში არიან, იმის გამო, რომ ისინი არ ემორჩილებიან ერთსა და იმავე ძალაუფლებას, გუნდი არ არის ძლიერი.

ლიდერობის ზოგიერთი სტილი ვერ აშენებს გუნდს. თუ ლიდერს უბრალოდ სურს დაიხმაროს სხვები თავის მიზნებისთვის, ისე კარგად და სწრაფად მუშაობს მარტო, რომ სხვისი ძალისხმევა თითქოს საჭიროც არ არის, ან ყოველთვის იმდენად სწრაფად წყვეტს რომელი იდეებია კარგი, რომ დისკუსიის საჭიროებაც აღარ რჩება, ის გუნდს ვერ ააშენებს.

პავლე მოციქულმა, ეკლესიის ერთიანობის აღსაწერად, ილუსტრაციად გამოიყენა ფიზიკური სხეული 1 კორინთელთა 12 თავში. პირადი ინტერესი გუნდურ მუშაობას აფერხებს, როდესაც წევრები თავიანთ ინტერესებს არ უქვემდებარებენ გუნდის მიზნებს. პირადი ინტერესი იწვევს შურს და თანამდებობის ძიებას არასწორი მიზეზებით. პირადი ინტერესი იწვევს არაჯანსაღ პაექრობას წევრებს შორის.

კიდევ ერთი პრობლემაა, როდესაც წევრები გრძნობენ, რომ საკუთარი მიზნების მიღწევა შეუძლიათ მარტო, სხვისი დახმარების გარეშე. ასევე არსებობს პრობლემა, როდესაც წევრებს სურთ იყვნენ სხვა წევრების მსგავსნი, ნაცვლად იმისა, რომ თავიანთი განსაკუთრებული ადგილი დაიკავონ.

ჯაჭვის სიძლიერე მისი ყველაზე სუსტი რგოლის სიძლიერის ტოლია. ანალოგიურად, გუნდის ძალა შემოიფარგლება მისი ყველაზე სუსტი წევრით.

გუნდის თითოეულ წევრს აქვს როლი, რომელიც გავლენას ახდენს ყველა დანარჩენი წევრის მუშაობაზე. თუ წევრი ვერ ასრულებს თავის როლს, ის აქვეითებს ყველა სხვა წევრის ეფექტურობას, რადგან ვერ ასრულებს სამუშაოს, რომელიც მათ ეხმარება.

სწრაფი მუშაკის უნარს ფასი ეკარგება, თუ ის უნდა დაელოდოს ნელა მომუშავე ადამიანის.

გარკვეული სახის სამუშაოს შესრულება შეუძლია ბევრ ადამიანს, რომლებსაც არ აქვთ კონკრეტული როლები. ამ შემთხვევაში, ყველაზე სუსტი რგოლის პრინციპი არ მოქმედებს. მაგალითად, თუ თქვენ ცდილობთ ტალახში ჩარჩენილი სატვირთო მანქანის მიწოლით ამოყვანას, ყველა დამხმარეს შეუძლია ერთად მიაწვეს, და ყველაზე ძლიერი არ იზღუდება ყველაზე სუსტის მიერ.

მსგავსი სიტუაცია იქნება მინდორში მოსავლის აღებისას. ნელი მუშაკები არ აბრკოლებენ სწრაფად მომუშავეებს; და თუ მეტი დახმარება გჭირდებათ, შეგიძლიათ დაამატოთ მეტი ადამიანი.

ყველაზე სუსტი რგოლის პრინციპი ეხება სიტუაციებს, როდესაც ცალკეული პირები ასრულებენ აუცილებელ როლებს. მაგალითად: თუ რამდენიმე კალატოზი ელოდება კაცს როდის შეურევს ბათქაშს, ის ყველას მუშაობას შეაფერხებს, თუ ნელი იქნება.

ორგანიზაციების უმეტესობაში, რამდენიმე ადამიანია უნიკალურ თანამდებობებზე. თითოეული აკეთებს საქმეს, რაც სხვებისთვისაა აუცილებელი. თუ ის თავის საქმეს კარგად არ ასრულებს, ეს ყველაზე მოახდენს გავლენას. პრობლემის გადაჭრა შეუძლებელია უბრალოდ მეტი ადამიანის დამატებით, რადგან ადამიანი იკავებს თანამდებობას და სხვები ვერ შეასრულებენ სამუშაოს მის ნაცვლად.

არსებობს ილუსტრაცია, სახელწოდებით "ბოთლის ყელი" (ანუ -ვიწრო ადგილი; დაბრკოლება, წინააღმდეგობა). როდესაც სითხით სავსე ბოთლი ან დოქი გადაბრუნდება, სითხე მაშინვე არ იღვრება. დინება იზღუდება ყელის ზომით. ანალოგიურად, ბევრ ორგანიზაციაში არსებობს მრავალი საქმიანობა და პროგრამა, რომლებიც შენელებულია, რადგან ისინი იძულებულნი არიან დაელოდონ გარკვეულ პირს, რომ მან თავისი სამუშაო შეასრულოს.

თუ ადამიანი ვერ ასრულებს თავისი პოზიციით განსაზღვრულ პასუხისმგებლობას

• გუნდის სხვა წევრებიც ასევე ვერ ასრულებენ თავიანთ მოვალეობებს.

• გუნდის სხვა წევრები იწყებენ სუსტი რგოლის მიმართ უკმაყოფილების გამოხატვას.

• გუნდი კარგავს ნდობას ლიდერის მიმართ, რადგან ის ვერ აგვარებს პრობლემას.

• გუნდი აქვეითებს თავის მოლოდინს იმის შესახებ, თუ რისი შესრულება შეუძლია.

ადამიანი, რომელიც "სუსტი რგოლია" გუნდში, სხვა პოზიციაზე უნდა გადავიდეს, რათა მან გუნდი არ შეზღუდოს.

► თქვენი აზრით კიდევ რომელი სახის სამუშაოების ილუსტრაცია შეიძლება იყოს "ბოთლის ყელი"?

როდესაც ხილის გაფუჭებულ ნაყოფს სხვა ნაყოფებთან ერთად ჩადებთ კალათში, სხვა ხილიც მალე გაფუჭდება. ეს ფენომენი ასახავს დამოკიდებულების გავლენას. კარგი და ცუდი დამოკიდებულება გავლენას ახდენს სხვებზე, მაგრამ ცუდი დამოკიდებულება მათზე ყველაზე მეტად მოქმედებს.

[1]გუნდის წევრის აყვანისას, მასში უფრო მეტად დამოკიდებულება ეძებეთ და არა უნარები. სწორი დამოკიდებულების მქონე ადამიანს შეიძლება ასწავლოთ და მოტივირებული გახადოთ, ცუდი დამოკიდებულების მქონე ადამიანს კი ვერა. ნუ მიიღებთ ცუდი დამოკიდებულების მქონე ადამიანს და ნუ იფიქრებთ, რომ შეძლებთ შეცვალოთ ის. ცუდი დამოკიდებულების მქონე ადამიანი უნდა მოიხსნას გუნდიდან, თუ ის არ იცვლება.

ჩვეული პრობლემების გამომწვევის ამოცნობა

ისინი ცდილობენ მოიპოვონ პატივისცემა და იგრძნონ თავი მნიშვნელვნად, თავს დაესხან ხელმძღვანელობის წარმომადგენლებს (არა მხოლოდ წამყვან ლიდერებს). მათ შეიძლება აირჩიონ ერთი ადამიანი, რომელსაც მუდმივად თავს დაესხმება. ასეთები დამანგრეველნი არიან პიროვნებებისა და ორგანიზაციებისათვის. ლიდერმა უნდა ისწავლოს მათი ამოცნობა და სხვების დაცვა მათგან. მათ გამო შეიძლება თქვენი საუკეთესო თანაშემწეები წავიდნენ.

მახასიათებლები:

• მას აქვს ჩანაწერი წინა ნგრევების შესახებ.

• მას ამჟამადაც ზიანი მოაქვს.

• ის ანონიმურ მოკავშირეებს ახსენებს, როდესაც წუწუნებს.

• ის აკრიტიკებს წინა ლიდერს და აქებს ახალს.

• ის ახერხებს ახალ ლიდერთან სწრაფად დამეგობრებას.

• თქვენც მეტისმეტად გაქებთ.

• მას უყვარს ადამიანების შეცდომებზე დაჭერა.

• ის დიდხანს ვერ ჩერდება ვერცერთ ეკლესიაში ან დაწესებულებაში.

• ის იტყუება.

• ის აგრესიულია და ასევე შეიძლება იყოს სასტიკიც.

• მას უყვარს ფულის წარმოჩენა.

• იგი საკუთარი ინტერესების გამო ჩაიდენს არაქრისტიანულ საქციელს.

• ის ხელმძღვანელობს საკუთარი გეგმებით და ვერ დაიკისრებს პასუხისმგებლობას.

• მას მოსწონს სხვებში აღშფოთების ან იმედგაცრუების პროვოცირება.

• ის საუბრობს თავის რთულ წარსულზე, რამაც იგი გააძლიერა.

• აღაშფოთებს მისი აზრის წინააღმდეგ ნებისმიერი შეწინააღმდეგება.

სპორტულ გუნდს ბევრად მეტი მოთამაშე ჰყავს, ვიდრე თამაშის დროს. ისინი თამაშის დროს ცვლიან მოთამაშეებს, რათა გამოიყენონ სხვადასხვა შესაძლებლობები და უნარები, ხოლო თავიანთ საუკეთესო მოთამაშეებს დასვენების საშუალება მისცენ. თამაშის დროს სათადარიგოთა სკამზე არიან ის მოთამაშეები, რომლებსაც შეუძლიათ თამაში. ზოგი მათგანი ახალგაზრდა მოთამაშეა, რომლებიც ჯერ კიდევ ვითარდებიან.

ორგანიზაციამ მუდმივად უნდა იმუშაოს გუნდის გასაზრდელად. განვითარებაში უნდა იყვნენ ახალგაზრდა ლიდერები. გუნდში უნდა იყვნენ სპეციალური შესაძლებლობების მქონე ადამიანები.

ორგანიზაციაში "სკამი," სპორტული გუნდის სკამს ჰგავს, რადგან სკამზე ნაკლებად გამოცდილი ხალხია, რომლებიც განვითარების პროცესშია. ორგანიზაციის სკამი განსხვავდება სპორტული სკამისგან იმ გაგებით, რომ გუნდის წევრები სკამზე არ არიან მხოლოდ ხელმისაწვდომი ან ნახევარ განაკვეთზე მომუშავე მოთამაშეები, არამედ დამატებითი დახმარების უნარის და დამატებითი სპეციალიზაციის მქონენი.

ნუ ეცდებით უბრალოდ შეავსოთ გუნდის აუცილებელი პოზიციები. განაგრძეთ ფართო გუნდის მშენებლობა. მოძებნეთ ადამიანები, რომლებიც წაფრმოაჩენენ პოტენციალსა და მიძღვნას. ნება მიეცით დაგეხმარონ. თუ ისინი კარგად ართმევენ თავს, მათ პასუხისმგებლობა დააკისრეთ.

► რა არის ადგილობრივი ეკლესიის გუნდის გაფართოების რამდენიმე საშუალება? აღწერეთ ფუნქცია (როლი) და ადამიანის ტიპი, რომელიც შეიძლება დაემატოს „სათადარიგოთა სკამს.”

კარგი გუნდი მოიზიდავს კარგ წევრებს. გაითვალისწინეთ, რა ტიპის ხალხს იზიდავს თქვენი გუნდი. ვინ გიერთდებათ? ვინ მიდის? ცვლილებები გაჩვენებთ თქვენი გუნდი ძლიერდება თუ სუსტდება.

გუნდის წევრები ეხმარებიან სხვადასხვა მიზეზების გამო - მათ შორის პირადი კავშირი სხვებთან, კეთილი ნება, საქმისადმი გულანთებულობა და რაიმე მნიშვნელოვანის გაკეთების სურვილი.

სამსახურში აყვანის დროს, ადამიანში ეძებეთ ენთუზიაზმი და ნუ ჩათვლით, რომ მის სტიმულირებას მოგვიანებით შეძლებთ წახალისებით.

სხვა გაკვეთილებში ვისწავლეთ ”მე-5 დონის ლიდერის” შესახებ. ეს არის ადამიანი, რომელსაც აქვს ამბიცია, რომ დაწესებულებამ მიაღწიოს დიდ წარმატებას, და არა ეგოისტურად იყოს მოტივირებული. ლიდერს უნდა ჰქონდეს ეს მისწრაფება და უნდა ეძებოს სხვები, ვინც მას იზიარებენ.

ჰკითხეთ მოსაზრებები იმ ადამიანებს, რომლებსაც გუნდის დახმარება შეუძლიათ. მოუსმინეთ, მოიწვიეთ მონაწილეობისთვის, გადაუნაწილეთ პასუხისმგებლობები, შემდეგ კი გააფართოვეთ მათი ფუნქციები.

ყველაფერში, რასაც აკეთებთ, ჰკითხეთ საკუთარ თავს: ”ვის შეუძლია დამეხმაროს?”

განავითარეთ და დამოკიდებული იყავით ადამიანთა მცირე ჯგუფზე, რომლებსაც აქვთ უნარები და განსაკუთრებული ურთიერთობა თქვენთან.

► როგორ აღწერთ საუბარს ხელმძღვანელსა და გუნდის პოტენციურ წევრს შორის? როგორ შეუძლია ლიდერს დააინტერესოს ის?

1. მიიღეთ გადაწყვეტილება გუნდის შექმნის შესახებ - აქ იწყება ინვესტიცია.

2. შეკრიბეთ საუკეთესო გუნდი - ეს ზრდის პოტენციალს.

3. გადაიხადეთ ფასი გუნდის განვითარებისათვის - ეს უზრუნველყოფს ზრდას.

4. ერთად, გუნდურად აკეთეთ საქმე - ეს ქმნის ერთობას.

5. მიანიჭეთ წევრებს პასუხისმგებლობა და უფლებამოსილება - ეს აყალიბებს და ზრდის ლიდერებს.

6. დაუფასეთ თქვენს გუნდს წარმატების მიღწევა - ეს ზრდის ბრძოლისუნარიანობას (მორალს).

7. თვალყური ადევნეთ, თუ ამართლებს ინვესტიცია - ამას ანგარიშვალდებულება მოაქვს.

8. შექმენით ახალი შესაძლებლობები - ეს ზრდის და ანვითარებს გუნდის უნარებს.

9. უზრუნველყავით ის, რაც მათ სჭირდებათ წარმატების მისაღწევად - ეს საუკეთესო შედეგებს მოგაპოვებინებთ.

აბესალომი, მეფე დავითის ვაჟი იყო. ის ლამაზი და პოპულარული იყო ერში. ის დედაქალაქში პრობლემებით მოსულ ხალხს ესაუბრებოდა და ეუბნებოდა: ”მეფე რომ ვიყო, დაგეხმარებოდით.” ხალხ გაუჩნდა შეგრძნება, რომ აბესალომის მეფობის შემთხვევაში, ყველაფერი უკეთესად იქნებოდა (2 მეფეთა (სამუელი) 15:3-4).

აბესალომს შეეძლო გამოეყენებინა თავისი უნარები მეფის დასახმარებლად პრობლემების გადაჭრაში. ამის ნაცვლად მან ორგულობა გამოიწვია. იმის გამო, რომ მეფემ არ შექმნა თავისი ხალხის პრობლემების მოსმენისა და გადაჭრის სისტემა, გაჩნდა შესაძლებლობა, რომ ვიღაცას ორგულობა გამოეწვია. ყველა ლიდერმა უნდა უზრუნველყოს, რომ ხალხს ჰქონდეს კარგი შესაძლებლობა საკუთარი პრობლემების გამოსათქმელად.

აბესალომმა აჯანყების დაწყების დრო შეარჩია. ათასობით კაცი შეუერთდა მას, დავითის ზოგიერთი ახლო მეგობარიც კი აბესალომთან წავიდა. აბესალომი მზად იყო, რომ მრავალი ადამიანი დაღუპულიყო მისი ამბიციების გამო. მისი პრიორიტეტი იყო არა ხალხის სარგებელი, არამედ საკუთარი სტატუსი.

ლიდერმა უნდა გაითვალისწინოს, თუ რა სახის ხელმძღვანელობა და ზედამხედველობა სჭირდება გუნდის თითოეულ წევრს. ჯონ მაქსველი ამბობს:

• ენთუზიასტ დამწყებს სჭირდება მითითება;

• იმედგაცრუებულ ლიდერს სჭირდება მწვრთნელობა;

• ფრთხილ შემსრულებელს მხარდაჭერა;

• ხოლო თვითდაჯერებულ წარმატებულს სჭირდება პასუხისმგებლობა.[1]

თანამდებობაზე შერჩევისას გაითვალისწინეთ, თუ როგორი ადამიანი სჭირდება თანამდებობას. მაქსველმა აღწერა შემდეგი ტიპის ადამიანები:

• წინა პლანზე, თუ კულისებზე მორგებული ადამიანი;

• უნივერსალი, თუ სპეციალისტი;

• მწარმოებელი, თუ შემანარჩუნებელი;

• ხალხთან მომუშავე, თუ ქაღალდებთან მომუშავე;

• ლიდერი, თუ მხარდამჭერი;

• ვეტერანი, თუ ახალბედა;

• შემოქმედებითად მოაზროვნე, თუ აბსტრაქტულად მოაზროვნე;

• რომელსაც სჭირდება მუდმივი ზედამხედველობა, თუ მცირე ზედამხედველობა;

• გუნდურად მოთამაშე, თუ ინდივიდუალისტი;

• მოკლევადიანი მიძღვნით, თუ გრძელვადიანი მიძღვნით.[2]

ლიდერმა ყოველთვის უნდა გაიზიაროს გუნდის მიღწევების დამსახურება. ადამიანები, რომლებიც წარმატებასაც იზიარებენ, მოტივირებულები არიან, რომ მაქსიმუმი გააკეთონ.

გარეშეებთან გუნდის წარდგენისას, ლიდერმა არ უნდა დაადანაშაულოს გუნდის წევრები გუნდის წარუმატებლობებში. ლიდერმა პასუხისმგებლობა უნდა აიღოს საკუთარ თავზე, აღიაროს, რომ მას შეეძლო უფრო ეფექტური ლიდერი ყოფილიყო. თუ ის დაიცავს გუნდის წევრებს, ისინი მისი ერთგულები იქნებიან.

მიეცით საშუალება რამდენიმე სტუდენტს, გაგიზიარონ, თუ როგორ აპირებენ ამ გაკვეთილის შედეგად, მიზნების ან მოქმედების შეცვლას.

1. არაფერი მნიშვნელოვანი არ მიღწეულა ადამიანის მიერ, რომელიც მარტო მოქმედებდა.

2. გუნდი არის ჯგუფი, რომელიც გაერთიანებულია დიდი მიზნის, საერთო ღირებულებების, თანამშრომლობისა და აღიარებული ლიდერობის ირგვლივ.

3. ოცნების განვითარებამდე, უნდა იმუშაოთ გუნდის განვითარებაზე.

4. გუნდის წევრისთვის დამოკიდებულება უფრო მნიშვნელოვანია, ვიდრე უნარები.

5. ორგანიზაციამ მუდმივად უნდა იმუშაოს გუნდის გასაფართოვებლად.

1.    დაწერეთ ამ გაკვეთილში ნასწავლი კონცეფციის შემაჯამებელი აბზაცი, რომელსაც თქვენი ცხოვრების შეცვლა შეუძლია. ახსენით, რატომ არის ის მნიშვნელოვანი. რა სარგებელი მოაქვს ამის ცოდნას? რა ზიანი შეიძლება მოჰყვეს ამის არცოდნას?

2.    განმარტეთ, როგორ გამოიყენებთ ამ გაკვეთილის პრინციპებს თქვენს ცხოვრებაში როგორ ცვლის ეს გაკვეთილი თქვენს მიზნებს? როგორ აპირებთ თქვენი მოქმედებების შეცვლას?

3.    დაწერე გაკვეთილი 10-ის ხუთი შემაჯამებელი დებულება მეხსიერებით.