(1) ተማሪው የሚከተሉትን ማስረዳት ይችላል

• አማኙ በኃጥያት ላይ ያለው ድል አስፈላጊነት እና መብት

• እግዚአብሔር ጸጋ የድልን ሕይወት እንደሚሰጠን

• ከክርስቶስ ጋር ባለን ግንኙነት የሚገኝ መንፈሳዊ ሕይወት

• ከጸጋ የመጉደል መጽሐፍ ቅዱሳዉ ማስጠንቀቂያ

• ስለ ድነት ጉዳዮች ክርስቲያናዊ የእምነት መግለጫ

(2) ተማሪው በድል አድራጊነት ከኃጢአት ተላቅቆ ለመኖር ይጠብቅበታል።

► ሮሜ 6 አብራችሁ አንብቡ። ይህ ክፍል ስለ ድነት ውስጥ ያሉ ውጤቶች ምን ይነግረናል?

የ1 ዮሐንስ ደብዳቤ ዋና ሃሳቦች መካከል የግል ድነት እርግጠኝነት አንዱ ነው። ዩሐንስ ይህንን ደብዳቤውን የጻፈበትን አላማ እንዲህ በማለት ያስቀምጣል “በእግዚአብሔር ልጅ ስም የምታምኑ እናንተ፣ የዘላለም ሕይወት እንዳላችሁ ታውቁ ዘንድ ይህን እጽፍላችኋለሁ” (1 ዮሐንስ 5፥13)።

► ሰው ስለድነቱ ምንም አይነት ጥርጣሬ ቢኖርበት ምን ማድረግ አለበት?

ሐዋርያው አማንያን ስለድነታቸው ማረጋገጫ የሚፈልጉበት ግዜ እንዳለ ያውቅ ነበር፤ ለዚህም አንድ አማኝ ትክክለኛ ማድረግ ያለበት ነገር ስለድነቱ ማስረገጫ መሰረት የሚሆንለትን ማስረጃዎች መፈለግ እንደሆነ ያሳያል። በመልዕክቱም ውስጥ ከማስረጃዎች መካከል አንዳንድ ምሳሌዎችን “በዚህ እናውቃለን”[1] በማለት አስቀምጦልናል። ይህንንም ማስረጃ በመጠቀም አማንያን ልባቸውን ማሳረፍ እንደሚችሉ ይናገራል (1 ዮሐንስ 3፥19)።

በኃጥያት ላይ ያለን ድል 1 ዮሐንስ ላይ ከአማንያን ማንነት መካከል አጽንኦት የተሰጠው ነው፥ ሐዋርያው ዩሐንስም እንዲህ ብሎ ጽፏል “ልጆቼ ሆይ፤ ይህን የምጽፍላችሁ ኀጢአት እንዳትሠሩ ነው” (1 ዮሐንስ 2፥1)። በዚህ አርፍተ ነገር ውስጥ ሐዋርያው አማንያን በፈቃድ የሚደረግ ኃጥያት ነጻ የሆነ ሕይወት መኖር እንዳለብ ያስተምረናል[2]። ይህንን የሚጽፈው በድል የመኖርን አስፈላጊነት ሊያሳያቸው ነው።

ነገር ግን ማንም ኀጢአት ቢሠራ፣ በአብ ዘንድ ጠበቃ አለን፤ እርሱም ጻድቁ እየሱስ ክርስቶስ ነው። እርሱም የኀጢአታችን ማስተስረያ ነው፤ ይኸውም ለዓለም ሁሉ ኀጢአት እንጂ ለእኛ ብቻ አይደለም (1 ዮሐንስ 2፥1-2)።

በዚህ ክፍል ላይ ዩሐንስ ኃጥያት ሊከሰት እንደሚችል ነገር ግን መሆን አለበት ማለት እንዳልሆነ ይመለከታል። አንድ አማኝ በኃጥያት ከወደቀ የክርስቶስ መስዋትነት ለኃጥያቱ ማስተሰረያነት በቂ እንደሆነ ያስረግጥልናል። ነገር ግን ይህ ማለት አማኝ ወደ ኃጥያት ገብቶ ወድያው ያለንስሓ ምህረትን ያገኛል ማለት አይደለም። ይህ ቁጥር የሚያሳየን መስዕዋትነቱ አሁንም ለሑሉም ሰው እና ኃጥያት በቂ በሆነ መንገድ እንዳለን የሚያሳይ ነው። መላው አለም እንዲሁ ድነትን የሚያገኝ እንዳልሆነ እናውቃለን፥ አንድ አማኝ ግን ኃጥያትን ቢሰራ ከእግዚአብሔር ጋር ያለውን ግንኙነት በማስተዋል ንሰሓን መግባት አለበት።

1 ዮሐንስ ውስጥ ያሉት የሚከተሉነት ቁጥሮች የአማንያን ታላቁ መለያቸው ኃጥያትን ለማድረግ በሚገፋፋቸው ፈቃዳቸው ላይ ያላቸው ድል ነው። በቅንፍ ውስጥ ያሉት ሀረጎች የተጨመሩ አስተያየቶች ናቸው

ትእዛዞቹን ብንፈጽም እርሱን ማወቃችንን በዚህ ርግጠኞች እንሆናለን [እግዚአብሔርን የማይታዘዝ ሰው ይህንን ምስክርነት የለውም] “እርሱን ዐውቃለሁ” እያለ ትእዛዞቹንም የማይፈጽም ግን ሐሰተኛ ነው፤ እውነቱም በርሱ ውስጥ የለም። (1 ዮሐንስ 2፥3-4)።

ኀጢአት የሚያደርግ ሁሉ ዐመፅን ያደርጋል፤ ኀጢአትም ዐመፅ ነው። እርሱ ኀጢአትን ሊያስወግድ እንደ ተገለጠ ታውቃላችሁ፤ በርሱም ኀጢአት የለም። በርሱም የሚኖር ኀጢአትን አያደርግም፤ ኀጢአት የሚያደርግ ግን እርሱን አላየውም ወይም አላወቀውም (1 ዮሐንስ 3፥4-6)።

ልጆች ሆይ፤ ማንም እንዳያስታችሁ ተጠንቀቁ፤ እርሱ ጻድቅ እንደ ሆነ፣ ጽድቅን የሚያደርግ ጻድቅ ነው [ኃጥያትን ማድረግ በመቀጠሉ እንደ ጻድቅ የማይቆጠር ሰው]። ኀጢአትን የሚያደርግ ከዲያብሎስ ነው፤ ምክንያቱም ዲያብሎስ ከመጀመሪያ አንሥቶ ኀጢአትን የሚያደርግ ነው። የእግዚአብሔር ልጅ የተገለጠውም የዲያብሎስን ሥራ ያፈርስ ዘንድ ነው (1 ዮሐንስ 3፥7-8)።

ከእግዚአብሔር የተወለደ ሁሉ ኀጢአትን በመለማመድ አይቀጥልም፤ የርሱ ዘር በውስጡ ይኖራልና፤ ከእግዚአብሔር ስለ ተወለደም ኀጢአትን ሊያደርግ አይችልም (1 ዮሐንስ 3፥9)።

ትእዛዞቹንም የሚጠብቁ ሁሉ በርሱ ይኖራሉ፤ እርሱም በእነርሱ ይኖራል። በእኛ መኖሩን በዚህ፣ ይኸውም እርሱ በሰጠን መንፈስ እናውቃለን (1 ዮሐንስ 3፥24)። [በክርስቶስ ነኝ የሚል ሰው የእግዚአብሔርን ህግ ደጋግሞ ከሚጥስ ሕይወት ሊኖረው አይችልም። ]

እግዚአብሔርን ስንወድድና ትእዛዞቹን ስንፈጽም የእግዚአብሔርን ልጆች እንደምንወድድ በዚህ እናውቃለን፤ እግዚአብሔርን መውደድ ትእዛዞቹን መፈጸም ነውና (1 ዮሐንስ 5፥2-3)። [መታዘዝ በእውነተኛ ፍቅር ውስጥ የሚነሳሳ ሲሆን፤ አለመታዘዝ በሕይወታችን ፍቅር እንደሌለ ማሳያ ነው። ]

ምክንያቱም ከእግዚአብሔር የተወለደ ሁሉ ዓለምን ያሸንፋል [ፈተናው እና መንፈሱ] ዓለምን የሚያሸንፈውም እምነታችን ነው (1 ዮሐንስ 5፥4)።

ከእግዚአብሔር የተወለደ ሁሉ ኀጢአት እንደማያደርግ፣ ነገር ግን የእግዚአብሔር ልጅ እንደሚጠብቀው [ጠባቂዎች]፣ ክፉውም እንደማይነካው እናውቃለን (1 ዮሐንስ 5፥18)።

► በእነዚህ ጥቅሶች ውስጥ ግልጽ የሆነው የአንድ አማኝ መለያ ባሕርይ የትኛው ነው?

ከእነዚህ ጥቅሶች የአማኙ መለያ ባሕርይ ለእግዚአብሔር በመታዘዝ የሚኖር መሆኑ ግልጽ ሆኖ ተቀምጧል። የአማኝ ትልቁ ስልጣን/ privilege የፍቃድ ኃጢያትን ማሸነፍ/ ድል መንሳት ነው።

አንዳንድ ጊዜ አማኝ የፍቃድ ኃጢያትን በማሸነፍ መኖር እንደሚችል የሚክዱ ሰዎች 1 ዮሐንስ 1፥8 “ኀጢአት የለብንም ብንል፣ ራሳችንን እናስታለን፤ እውነቱም በእኛ ውስጥ የለም” የሚለውን ይጠቅሳሉ። ነገር ግን ኃጢያት አለብን ማለት ምን ማለት ነው? ይህ ማለት አማኞች እንኳን ኃጢያት መሥራታቸውን ቀጥለዋል ማለት ነው? ይህ ደግሞ ከላይ ከተጠቀሱት የ1 ዮሐንስ 3 መግለጫዎች ጋር የሚስማማ አይሆንም። ዮሐንስ ቀደም ሲል “እያንዳንዱ ሰው፣ አማኝን ጨምሮ ኃጢያት መሥራቱን ቀጥሏል” ብሎ ከተናገረ፣ በምዕራፍ 3 ላይ እነዚህን ቃላት ሊናገር የሚችለው እንዴት ነው? ይህ ትርጉም አይሰጥም።

የተጻፈበት አውድ ትርጉሙን ይገልጻል። በ 1 ዮሐንስ 1፥7 መሰረት ከኃጢያት መንጻት ቃል ተገብቶልናል። ይህ መንጻት የተሰጠው በብርሃን ለሚመላለሱ ነው፤ ይህ ማለት ደግሞ ለእውነት የሚኖሩና ለእግዚአብሔር ለሚታዘዙ ነው። እግዚአብሔርን እየታዘዙ እየኖሩ ያሉ በክርስቶስ ደም ካለፈ ኃጢያታቸው ነጽተዋል።

ነገር ግን ሃጥያት እንደሰሩና መንጻት እንደሚያስፈልጋቸው የሚክዱ አንዳንድ ሰዎች ሊኖሩ ይችላሉ። እነዚያ ሰዎች ሃጥያት የለብንም ብለው ራሳቸውን የሚያስቱ ናቸው። በፍጹም ኃጢያት እንዳልሰሩ ወይም የኃጢአት ችግራቸውን ያለ ክርስቶስ እንደፈቱ ይናገራሉ።

በድጋሚ በ1 ዮሐንስ 1፥9 ይቅር መባል እና ከኃጢያት መንጻት ቃል ተገብቷል። በ1 ዮሐንስ 1፥10 ኃጢያት አልሰራንም የሚሉ ከእግዚአብሔር ከራሱ ጋር እንደሚቃረኑ ጸሃፊው በድጋሚ ይገልጻል።

ዮሐንስ በክርስቶስ የቀረበውን መንጻት እና ይቅር መባል እንደሚያስፈልጋቸው ያላሰቡትን፤ መዳንም አያስፈልገንም ለሚሉ ስህተታቸውን ለማስተካከል የጻፈው ነበር። አማኞች እንኳን ኃጢአት መሥራታቸውን ቀጥለዋል እያለ አልነበረም፤ ምክንያቱም በዚህ ደብዳቤ ላይ ካለው ዋና አጽንዖት እና ቀጥተኛ መግለጫዎች ጋር ይቃረናል።

የተወረሰ ውድቀት እና በሰው ልጅ ድክመት ምክንያት ድል የሚነሳ ህይወት መኖር ሁልጊዜ ቀላል አይደለም። በዚህ ምክንያት ብዙ ሰዎች የፍቃድ ኃጢአት ሳይሠሩ መኖር የማይቻል እንደሆነ ያምናሉ። ግን የእግዚአብሔር ጸጋ ለሁለቱም ችግሮች መልስ አለው።

► የተወረሰ ውድቀት ምንድን ነው?

የተወረሰ ውድቀት የሰው ልጅ ከተወለደ ጀምሮ ወደ ኃጢአት እንዲያዘነበል የሚያደርግ የተፈጥሮ ሞራል መበላሸት ነው። አማኝ ከዳነ በኋላ ከዚህ የኃጢአት ዝንባሌ ጋር ይታገላል። ነገር ግን እግዚአብሔር ጸጋን የሚያቀርበው ለዕለት ተዕለት ድል ብቻ ሳይሆን ከውርስ ሃጥያት ለማጽዳትም ነው (ሐዋርያት ሥራ 15፥9፤ 1 ተሰሎንቄ 5፥23፤ 1 ዮሐንስ 1፥7)።

የኃጢአተኛ ተፈጥሮ ለምድራዊ ሕይወታችን በሙሉ መገዛት ያለብን ቅድመ ሁኔታ አይደለም። አንድ አማኝ በድል ለመኖር ያለ ምንም ገደብ ልቡን ለእግዚአብሔር አሳልፎ የሚሰጥበት ደረጃ ላይ መድረስ አለበት (ሮሜ 12፥1)። አማኙ በመንፈስ ቅዱስ ሲሞላ እግዚአብሔርን ሙሉ በሙሉ እንዲወድ ያስችለዋል።

► የሰው ድክመት ምንድን ነው?

የሰው ድክመቶች አካላዊ ወይም አዕምሯዊ ውስንነቶች ወይም ጕድለቶች ናቸው። አዳም በኃጢአት በመውደቁ እና የሰው ልጅ ቀጣይነት ባለው ኃጢአት በመውደቁ ምክንያት፣ እግዚአብሔር እንድንሆን ካደረገን በአእምሮ፣ በአካል እና በስሜት ደካሞች ነን።

ድክመቶች ስሕተት እንድንሠራ ያደርጉናል። በአንድ ሁኔታ ውስጥ ማድረግ ያለብንን ትክክለኛ ነገር አናውቅ ይሆናል። ስለ አንዳንድ ሰዎች ወይም ብሄረሰቦች የተሳሳቱ አመለካከቶች ሊኖሩን ይችላሉ። አንድ ሰው ሲድን የተሳሳቱ አመለካከቶቹ ወድያውኑ አይስተካከሉም። የተሳሳቱ ሃሳቦች የተሳሳቱ ድርጊቶችን ያስከትላሉ፤ ምክንያቱም አንድ ሰው ምን ማድረግ እንዳለበት ከተሳሳተ፤ የተሳሳተ ነገር ያደርጋል።

[1]አንድ ሰው ድክመቶቹ በተለያዩ ምክንያቶች ሊያስቸግሩት ይችላሉ። ምናልባት መጽሃፍ ቅዱሳዊ መርሆችን እንዴት ተግባራዊ ማድረግ እንዳለበት አልተማረ ይሆናል። ምናልባትም ስሜቶቹን ለመቆጣጠር የሚረዳውን ስርአት አላዳበረም ይሆናል። ምናልባትም ጠንካራ ሆኖ እንዲቀጥል የሚረዱት የዕለት ተዕለት ልምምዶች የሉት ይሆናል። ምናልባትም በመንፈስ የመመላለስን አስፈላጊነት አልተረዳ ይሆናል።

ሌሎች በፈቃድ/ አውቀው/ ኃጢአት እየሰሩ እንደሆነ ሁልጊዜ ማወቅ ስለማንችል በሌሎች ላይ ለመፍረድ መቸኮል የለብንም። ብዙውን ጊዜ ሰዎች የሚሳሳቱት እውቀትና መንፈሳዊ ብስለት ስለሌላቸው ነው።

ሌላ ማንም ሰው መቼም ሊያጋጥመው አይችልም ብለው ያሰቡት ፈተና አጋጥሞዎት ያውቃል? በኃጢያት ላይ ሙሉ በሙሉ በድል መኖር በእርግጥ ይቻል ይሆን ብለው ጠይቀው ያውቃሉ? አምላክ በፈተናዎች ውስጥ ድክመታችንን እንድንቋቋም የሚያስችል የበለጠ ጸጋን እንደሚሰጠን ቃል ገብቶልናል።

በሰዎች ሁሉ ላይ ከደረሰው የተለየ ፈተና አልደረሰባችሁም፤ እግዚአብሔር ታማኝ ነው፤ ስለዚህ ከምትችሉት በላይ እንድትፈተኑ አይተዋችሁም፤ ነገር ግን በምትፈተኑበት ጊዜ ፈተናውን መታገሥ እንድትችሉ፣ መውጫ መንገዱን ያዘጋጅላችኋል (1 ቆሮንቶስ 10፥13)።

► ከዚህ ጥቅስ የምናውቃቸው አንዳንድ ነገሮች ምንድናቸው?

ይህ ጥቅስ ብዙ አስፈላጊ ነገሮችን ይነግረናል።

1. ፈተና የሚመጣው በሰውነታችን ምክንያት ነው። ይህ ማለት የሚያጋጥምህ ትግሎች ለአንተ ልዩ አይደሉም ማለት ነው።

2. እግዚአብሔር ገደባችንን ያውቃል። ምን ያህል መቋቋም እንደምንችል ይረዳል። እኛ ምን ያህል መቋቋም እንደምንችል አናውቅም፤ እሱ ግን ያውቃል።

3. እግዚአብሔር ወደ እኛ የሚመጡትን ፈተናዎች ገደብ ያበጃል። በድል እንድንኖር ይፈልጋል። በዚህ ጥቅስ መሰረት ሁል ጊዜ ድል ማድረግ ይቻላል።

4. እግዚአብሔር በድል እንዲንኖር የሚያስፈልገንን ይሰጣል። ማምለጫ መንገዱን ያዘጋጃል፤ የእግዚአብሔር ሃሳብ በድል የተሞላ ህይወት እንድንኖር ነው። ለድል ህይወት ጸጋን ይሰጣል።

► ሮሜ 8 አውጡና በዚህ ክፍል ውስጥ የተጠቀሱትን ጥቅሶች ተመልከቱ።

[1]ሮሜ 8 መንፈስ በአማኙ ሕይወት ውስጥ ስለሚሰራው አስደናቂ ሥራ መግለጫ ይሰጣል። ሮሜ 8፥26 መጸለይ እንደሚገባን እንዴት መጸለይ እንዳለብን እንኳን እንደማናውቅ ይነግረናል፤ ግን መንፈስ ቅዱስ በእኛ በኩል ይጸልያል።

ይህ ምዕራፍ የድል ሕይወት እንዴት መኖር እንደሚቻል ይነግረናል። ከሥጋ ይልቅ መንፈስን የምንከተል ከሆነ አንኮነንንም (ሮሜ 8፥1፣ 4)። የመንፈስ ኃይል በእኛ ውስጥ ስለሚሠራ እግዚአብሔር ከእኛ የሚጠብቀውን ጽድቅ ማሟላት እንችላለን (ሮሜ 8፥4)።

አንድ ሰው በኃጢአተኛ ተፈጥሮው ቊጥጥር ሥር ከሆነ እግዚአብሔርን ማስደሰት አይችልም (ሮሜ 8፥8)፤ይኮነናል (ሮሜ 8፥1) እንዲሁም በእግዚአብሔር ይፈረድበታል (ሮሜ 8፥13 ላይ “ሞት”)። ነገር ግን በመንፈስ ቅዱስ ኃይል እና ምሪት የኃጢአትን ስራ ማስወገድ እንችላለን (ሮሜ 8፥13-14)።

በዮሐንስ 15፥1-10 ላይ ስለ ወይኑና ቅርንጫፎቹ የሚገልጸው ታዋቂ ምሳሌ ይገኛል፤ ለአንዳንድ አስፈላጊ ጥያቄዎች መልስ ይሰጣል።

በክርስቶስ የምንኖረው እንዴት ነው? “ትእዛዜን ብትጠብቁ በፍቅሬ ትኖራላችሁ” (ዮሐንስ 15፥10)። በክርስቶስ መኖር ማቆም ማለት አንድ ሰው እርሱን መታዘዙን አቁሟል ማለት ነው። ቀጣይ ምን ይከሰታል?

“በእኔ የማይኖር ተጥሎ እንደሚደርቅ ቅርንጫፍ ነው፤ እንዲህ ያሉት ቅርንጫፎች ተለቅመው ወደ እሳት ይጣላሉ፤ ይቃጠላሉም” (ዮሐንስ 15፥6)። አንድ ሰው መታዘዙን ካቆመና በዚህም በክርስቶስ መኖሩን ካቆመ ይጣላል። ። የተቃጠሉ ቅርንጫፎች ምሳሌ ሙሉ በሙሉ መጣላቸውን ያሳያል።

“በእኔ ኑሩ፤ እኔም በእናንተ እኖራለሁ። ቅርንጫፍ በወይኑ ግንድ ካልሆነ በቀር ብቻውን ፍሬ ሊያፈራ አይችልም፤ እናንተም በእኔ ካልኖራችሁ ፍሬ ልታፈሩ አትችሉም” (ዮሐንስ 15፥4)። “በእኔ ያለውን፣ የማያፈራውን ቅርንጫፍ ሁሉ ቈርጦ ይጥለዋል” (ዮሐንስ 15፥2)። በክርስቶስ በመታዘዝ ካልኖርን ፍሬ ማፍራት አንችልም። ፍሬ ማፍራት ማለት የተለወጠ፣ የተባረከ እና በእግዚአብሔር ጸጋ የሚመራ ሕይወት መኖር ማለት ነው። እግዚአብሔርን የማይታዘዝ ሰው እርሱ ከሚያቀርበው የሕይወት ፍሰት ራሱን ይለያል፤ እንዲሁም ከእንግዲህ የእግዚአብሔርን ጸጋ መጠቀም አይችልም። ፍሬ የማያፈራ ሁሉ ይጣላል።

ክርስቶስ እንደ ወይን ግንድ ሕይወትን የሚሰጠን ነው (ዮሐንስ 15፥6)። መዳን የሚጠበቀው በግንኙነት ነው። ከክርስቶስ መለያየት ከድነት መለየት ነው። እግዚአብሔርን በመታመንና በመታዘዝ ከክርስቶስ ጋር ያለንን የድነት ትስስር እንጠብቃለን (ዮሐንስ 15፥10)።

የመብራት አምፖሎች እና ኤሌክትሪክ ተመሳሳይ ጽንሰ-ሀሳብ ያለው ዘመናዊ ምሳሌ ናቸው። አንድ አምፖል የኤሌክትሪክ ኃይል ወደ ውስጥ ሲፈስ ብርሃን ይኖረዋል። አምፖሉ ከኃይል ምንጩ ከተለየ ብርሃኑን ማቈየት አይችልም። በተመሳሳይም ከክርስቶስ ጋር ባለን ግንኙነት የዘላለም ሕይወት አለን (ዮሐንስ 17፥3)። የእርሱ ሕይወት በእኛ ውስጥ ይፈስሳል። ይህን ህይወት ራሳችንን ከእርሱ ከለየን መጠበቅ አንችልም።

አንዳንዶች አንድ ስም በሕይወት መጽሐፍ ውስጥ ከተፃፈ በኋላ ሊሰረዝ የሚችልበት ምንም መንገድ እንደሌለ ይናገራሉ። ይሁን እንጂ አንድ ስም ሊሰረዝ የሚችልበት ቢያንስ አንድ መንገድ አለ:-

ማንም በዚህ የትንቢት መጽሐፍ ከተጻፈው ቃል አንዳች ቢያጐድል፣ እግዚአብሔር በዚህ መጽሐፍ ከተጻፉት ከሕይወት ዛፍና ከቅድስቲቱ ከተማ ዕድሉን ያጐድልበታል (ራእይ 22፥19)።

ከራእይ መጽሐፍ ክፍል በመሰረዝ ጥፋተኛ የሆኑ በጣም ጥቂት ሰዎች አሉ። ይሁን እንጂ አንድ ሰው ስሙ ከሕይወት መጽሐፍ ውስጥ ሊሰረዝ እንደሚችል ተገልጿል።

እየሱስ እንዲህ ሲል ተስፋና ማስጠንቀቂያ ሰጥቷል:- “ድል የሚነሣም እንደ እነርሱ ነጭ ልብስ ይለብሳል፤….ስሙንም ከሕይወት መጽሐፍ አልደመስስም” (ራእይ 3፥5)።

ጳውሎስ የተሰሎንቄ ክርስቲያኖች እምነታቸውን ሊተዉ እንደሚችሉ በማሰብ ተጨንቆ ነበር። እንዲህ ቢሆን ኖሮ ለእነሱ ያከናወነው የወንጌል ድካም ከንቱ ይሆን እንደነበር ተናግሯል (1 ተሰሎንቄ 3፥5)። ይህ የሚያሳየው አንድ አማኝ እምነቱን ሙሉ በሙሉ ጥሎ የቀድሞ ድነቱን ዋጋ ቢስ ሊያደርገው ይችላል።

በ2 ጴጥሮስ 2፥18-21 ውስጥ ጌታችንና መድኃኒታችን እየሱስ ክርስቶስን በማወቃቸው የዓለምን ርኵሰት ያመለጡ አንዳንድ አማኞችን የሚያስቱ የሐሰት አስተማሪዎች እናገኛለን። እነዚህ የቀድሞ አማኞች የጽድቅን መንገድ አውቀው የተዉ ናቸው። ይህ ክፍል ኃጢአተኛ ወደሆነ የአኗኗር ዘይቤ ከመመለስ ይልቅ መንገዱን ፈጽሞ ባያውቁ ይሻላቸው እንደነበር ይናገራል። ይህ ጥቅስ አንድ ሰው ወደ ኃጢአት በመመለስ ድነቱን ሊያጣ እንደሚችል ያሳያል። አንድ ሰው ድነቱን ሊያጣ ባይችል ኖሮ አንድ ሰው ከመዳኑ በፊት ከነበረው የከፋ ሁኔታ ውስጥ ሊገባ አይችልም ነበር።

ልጅነት ሊለወጥ ይችላል። በአንድ ወቅት የዲያብሎስ ልጅ (ዮሐንስ 8፥44) እና የቍጣ ልጆች (ኤፌሶን 2፥3) ነበርን። ነገር ግን ያ ልጅነት በእግዚአብሔር ልጅነት ተቀየረ (ሮሜ 8፥15)። አባካኙ ልጅ ከአባቱ ተለይቶ በነበረበት ወቅት የልጅነት መብቱን ሁሉ አጣ። በተመለሰ ጊዜ ግን አባቱ እንደ ሞተ ቆጥሮት እንደነበር ተናግሯል (ሉቃስ 15፥32)።

እግዚአብሔር አማኞች ደኅንነት እንዲሰማቸው ይፈልጋል፤ ግን ስሜታቸውን በሐሰተኛ ማረጋገጫ ላይ በመመስረት እራሳቸውን አደጋ ላይ እንዲጥሉ አያደርጋቸውም። እግዚአብሔር ቃል ያልገባውን ነገር ለአማኞች ቃል መግባት የለብንም። ማንኛውንም ነገር ብናደርግ ድነታችንን እንደማናጣ ዋስትና አይሰጠንም። ነገር ግን ኃጢአትን ድል በማድረግ እንድንኖር እንደሚመራንና እንደሚያስችለን ቃል ገብቷል። ይህም ከፍርሃት ነጻ እንድንሆን በቂ ማረጋገጫ ነው።

አንዳንድ ጊዜ አማኞች ስለመዳናቸው ጥርጣሬ ይኖራቸዋል። በአንድ ወቅት እንደዳኑ እርግጠኛ ሊሆኑ ይችላሉ፤ ሆኖም አሁንም ከእግዚአብሔር ጋር የሚያድን ግንኙነት እንዳላቸው ይጠራጠራሉ። መጽሐፍ ቅዱስ በዚህ አስፈላጊ ጥያቄ ላይ ጥርጣሬ ውስጥ አይተወንም። የእግዚአብሔር ፈቃድ አማኙ በመዳኑ እርግጠኛ ሆኖ ለመጨረሻ ሑነቶች ድፍረት እንዲኖረው (1 ዮሐንስ 4፥17) እንጂ የእግዚአብሔርን ምርመራ ማለፍ/ አለማለፍ ላይ እንዲጠራጠር አይደለም።

አንድ አማኝ ጥርጣሬ ሲኖረው በአንድ ወቅት እንደዳነ እርግጠኛ ስለሆነ በቀላሉ ችላ ሊላቸው አይገባም። በእምነት መሆናችሁን ለማወቅ ራሳችሁን መርምሩ (2 ቆሮንቶስ 13፥5)። የሚለው ተገቢ ነው። አንድ ሰው ለመዳን የሚያስፈልጉትን መጽሃፍ ቅዱሳዊ እርምጃዎች በመከተል እንደዳነ የሚያውቅ ከሆነና በታዛዥነት በመመላለስ በክርስቶስ ውስጥ እንደሚኖር የሚያውቅ ከሆነ መንፈሳዊ ሕይወት እንዳለው እርግጠኛ መሆን ይችላል።

ለክፍሉ መሪ ማስታወሻ- ሁለት የክፍሉ አባላትን ይህንን እና የሚቀጥለውን ክፍል ያስረዱ።

ለሰዎች ኃጢአትን ማሸነፍ በሁለት ነገሮች ምክንያት የማይቻል ይመስላል፤ በሰው ድክመት እና የተወረሰ ውድቀት። እግዚአብሔር በሰው ልጅ ውሱንነት እንደማይፈርድብን ማስታወስ አለብን። ፈቃዱን እንፈጽም ዘንድ እግዚአብሔር በመንፈሱ ኃይል ይሰጠናል። ድካም መኖሩ ኃጢአት አይደለም፤ እንዲሁም ማንም ሰው በድካም ምክንያት ኃጢአት ሊሠራ አይገባም።

የተወረሰ ውድቀት ተጽዕኖ ከድነት በኋላም ይቀጥላል፤ ነገር ግን እግዚአብሔር ለመንጻት የሚሆን ጸጋን ይሰጣል። ከተወረሰ ውድቀት ጋር በመወለዳችን አይፈረድብንም፤ ነገር ግን በተፅዕኖው ስር ከቀጠልን ጥፋቱ የእኛ ነው። ስለዚህ የሰው ድካምም ሆነ የተወረሰ ውድቀት በድል የመኖር ተስፋችንን እንድናጣ ሊያደርገን አይገባም።

በክርስቶስ በማመን ከእርሱ ጋር አንድ ሆነናል። በሞቱና በትንሣኤው ከእርሱ ጋር ተባብረናል፤ ይህ ማለት ለእኛ ለኃጢአት መሞት እና ለአዲሱ ሕይወት ትንሣኤ ማለት ነው (ሮሜ 6፥3-11)። እርሱ በእኛ ውስጥ ነው፤ እኛም በእርሱ ውስጥ ነን። የክርስትና ሕይወት የተቻለንን ሁሉ ማድረግ የእርሱን ምሳሌ ለመከተል መሞከር ብቻ አይደለም። የክርስትና ሕይወት ክርስቶስ በእኛ ውስጥ የሚኖረው ነው። እርሱ በምድር ላይ በነበረበት ጊዜ በኃጢአት ላይ ድል ነስቷል፤ አሁንም በእኛ ውስጥ በድል ይኖራል።

በታላቋ ከተማ ጐዳና አንድ ጥግ ላይ አንዲት ድሀ ሴት ቡትቶ ለብሳ ተቀምጣለች። ፀጉሯ በቆሻሻ ተጨማልቆ እስርስር ያለ ነው። ቆዳዋ ቆሻሻና ሚከረፋ ነው። በተስፋ መቍረጥ ውስጥ ተቀምጣለች። ድንገት ታላቅ ሁከት ሆነ፤ በአንዱ ጥግ የመንግሥቱ ታላቁ ልዑል ከባለሥልጣኖቹ ጋር ይጓዛል። ልዑሉ ቈንጆ፣ ጠንካራ እና ደግ ነው! ሰረገላው ቆሽሽ ብላ በተቀመጠችበት ሴት በኩል ሲያልፍ ልዑሉ ለአሽከርካሪው “አቁም!” ብሎ ጮኧ። ሰረገላው ሲቆም ልኡሉ ለአገልጋዮቹ " በመንገድ ዳር የተቀመጠችው ሴት ማግባት የምፈልጋት ሴት ናት!” አላቸው።

አሁን ቦታው ትቀይሯል፤ በቤተ መንግሥቱ የሠርግ ቀን ላይ። ምን እናያለን? በቡትቱ ልብሷና ከነቆሻሻ ጸጉሯ የተቀመጠች ቁሽሽ ያለች ሴት ነበረች። የግል አገልጋዮቿ የሰርግ ልብስ፣ ሳሙናና ሽቶ ይዘው በዙሪያዋ ናቸው፤ ሙሽራዋ ግን ለሠርጓ ቀን ራሷን ለማዘጋጀት ፍላጐት የላትም። አንደኛው አገልጋይ "እመቤቴ ለሠርጉ መዘጋጀት አትፈልጊም?" ብላ ጠየቀቻት። ሙሽራይቱም "እሱ ሲያየኝና ሊያገባኝ ሲፈልግ እንዲህ ነበርኩ፤ ስለዚህ አሁንም ምንም ብመስል ለውጥ አያመጣም ብዬ እገምታለሁ" ብላ መለሰችላት።

እኛም በእንደዚህ ዓይነት አቋም እንደነግጥ ነበር። ልኡሉ ስለሚወዳት በነበረችበት ሁኔታ እንድትቆይ አይፈልግም። ልዑሉ የምትማርክ ባልነበረችበት ጊዜ ስለወደዳት ፤ እሷም ለእሱ ምርጥ ሆኖ ለመታየት መፈለግ ይኖርባታል።

እግዚአብሔር ኃጢአተኞች ሆነን ሳለን ይወደናል፤ ይህ ማለት ግን ኃጢአት ምንም ለውጥ አያመጣም ማለት አይደለም። እርሱ ስለሚወደን ሁኔታችንን ለመለወጥ ይፈልጋል። እርሱ ስለሚወደን እርሱን የሚያስደስት መልክና ባህሪ ለመልበስ መፈለግ አለብን።

በዓለም ዙሪያ የክርስትና እውነት ከአጉል እምነት ጋር እየተቀላቀለ ነው። አንዳንዶች በተደጋጋሚ ጸሎት፣ በስሜት ተኮር ልምምዶች፣ ክፉ መናፍስትን (የተወሰኑ ኃጢአቶች መንስኤ ናቸው ተብለው በሚታሰቡ) በመገሰፅ፣ ራስን በመጉዳት በሚደርስ ሥቃይ፣ የተወሰኑ ክታብ በማድረግ፣ በቤት ውስጥ መንፈሳዊ ምልክቶችን በማስቀመጥ ወይም ሰውነትን በልዩ ዘይት በመቀባት ኃጢአትን ማሸነፍ እንደሚቻል ያስተምራሉ። በመንፈሳዊ ተአምራት አማካኝነት ድል እናገኛለን ብሎ መጠበቅ ስሕተት ነው።

አንዳንዶች ደግሞ ኃጢአትን ድል ማድረግ አቅልለው ያስተምራሉ። የድነት ልምዶች እና በመንፈስ መሞላት የኃጢአትን ኃይል በቋሚነት ያስወግዳል ይላሉ። የመንፈሳዊ እድገት፣ ስነ ስርአት እና የማያቋርጥ ንቃት አስፈላጊነት ላይ አጽንዖት አይሰጡም።

በዓለምና በኃጢአት ላይ የማያቋርጥ ድል ማግኘት ያልቻሉ ራሳቸውን በቅንነት የሚከተሉትን ጥያቄዎች መጠየቃቸው ተገቢ ነው፦

1. በእውነት ዳግመኛ ተወልጄአለሁን? ለቀድሞ ሕይወቴ ሞቼአለሁን? ንስሐ ገብቼ ትቼዋለሁን? በክርስቶስ አዲስ ሕይወት አለኝን:- አዲስ አመለካከት፣ አዲስ ምኞት፣ ለእግዚአብሔር ነገሮች አዲስ ፍላጐት አለኝን (2 ቆሮንቶስ 5፥17)?ክርስቶስ በልቤ ውስጥ ለመኖር የመጣው በመንፈስ ቅዱስ በኩል ነውን? ኃጢአትን ለማሸነፍ በሰው ፈቃድ ኃይል እየሞከርኩ ነው ወይስ በውስጤ በሚኖረው በእግዚአብሔር ኃይል ነው የምደገፈው (ገላትያ 2፥20)?

2. የአምላክን ቃል በልቤ ውስጥ እያኖርኩ ነው? መዝሙረኛው “አንተን እንዳልበድል፣ ቃልህን በልቤ ሰወርሁ” (መዝሙር 119፥11) ብሎ መስክሯል። ልክ አዲስ የተወለደ ሕፃን የእናቱን ወተት በጉጉት እንደሚመገብ የእግዚአብሔርን ቃል መመገብ አለብን (1 ጴጥሮስ 2፥2)።

3. ለኃጢአት የሞተ እንደሆንኩና ለእግዚአብሔር ሕያው እንደሆንኩ አድርጌ እቈጥራለሁ? “እንደዚሁም ለኀጢአት እንደ ሞታችሁ፣ ነገር ግን በክርስቶስ እየሱስ ለእግዚአብሔር ሕያዋን እንደ ሆናችሁ ራሳችሁን ቍጠሩ” (ሮሜ 6፥11)። ፈተና በእኔ ላይ ሥልጣን እንደሌለው በመተማመን ፈተናውን እቃወማለሁ?

4. ለማሸነፍ በእግዚአብሔር ላይ እደገፋለሁ? ወደ እግዚአብሔር ቤተሰብ የተወለደ ሁሉ ዓለምን እንደሚያሸንፍ ሐዋርያው ዮሐንስ ገልጿል። “ዓለምን የሚያሸንፈውም እምነታችን ነው” (1 ዮሐንስ 5፥4)። ሐዋርያው ጳውሎስ ከእየሱስ መስቀል በቀር በምንም ነገር ላይ እምነት እንደሌለው ተናግሯል፤ ምክንያቱም ዓለማዊ ነገሮች እኛን ለመሳብና ለመቈጣጠር ያላቸውን ኃይል የሚያጡት በመስቀሉ አማካኝነት ነው (ገላትያ 6፥14)። የጽድቅ ሁሉ ምንጭ የሆነውን እየሱስን የምንረሳ ከሆነ የፀና የድል ሕይወት መኖር አንችልም።

5. ሁልጊዜ ጌታ እየሱስን በእምነት እየለበስኩ ኃጢአትን እድል ፈንታ እያሳጣሁ ነው? በክርስቲያና ጉዞአችን የትም ብንሆን ድል ወድያው የሚመጣ አይደለም። ኃጢአትን በተመለከተ የእየሱስን አመለካከት በንቃት ማዳበርና ምሳሌውን መከተል ይኖርብኛል። (ሮሜ 13፥14፣ ኤፌሶን 4፥24)

6. የእግዚአብሔርን መንፈሳዊ የጦር እቃ እየተለብስኩ ነው? በሕይወት ውጊያ ሜዳ ላይ ብዙ አማኞች መንፈሳዊ መከላከያዎቻቸው ላይ ጥንቃቄ ባለማድረጋቸው ብቻ በሰይጣን የእሳት ፍላጻዎች ተጎድተዋል (ኤፌሶን 6፥11)።

7. ራስን የመግዛት ባሕርይ እያዳበርኩ ነውን? በእምነታችን የቱንም ያህል ብስለት ቢኖረን ራስን የመግዛት ባሕርይ ማዳበር ያስፈልገናል። ሰውነቴን እያሠለጠንኩ በስርአት ውስጥ እያስገባሁት ነው? ተፈጥሯዊና ከእግዚአብሔር የተሰጡ ፍላጐቶቼን (እንደ ምግብ፣ እንቅልፍ ወይም ፆታዊ ግንኙነት)፤ አዲስ የተወለደው ነብሴን አላማ ያገለግሉ ዘንድ አስገዛለሁ። ሰውነቴ በኃጢአት ስለተበላሸ ስለሆነ ምኞቶቹ ሚዛናዊ አይደሉም። ሰውነት እንዲገዛ ሊፈቀድለት አይገባም፤ መንፈስን ማገልገል አለበት። ጳውሎስ መንፈሳዊ መስሎ የተጣለ ሰው እንዳይሆን ሰውነቱን እንደሚጉስምና እንዲገዛለት እንደሚያደርግ ተናግሯል (1 ቆሮንቶስ 9፥25-27)። ይህ ተግሣጽ ለእያንዳንዱ ክርስቲያን አስፈላጊ ነው።

8. ታዛዥ በመሆን እየኖርኩ ነው? “በብርሃን ብንመላለስ” የሐዋርያው ዮሐንስ ምክር ነው (1 ዮሐንስ 1፥7)። ወደ መንግስተ ሰማይ በሚወስደው መንገድ ላይ ብዙ ወጥመዶች፣ መሰናክሎች እና አደገኛ ቦታዎች ስላሉ ሁል ጊዜ በእግዚአብሔር ቃል ብርሃን (መዝሙር 119፥105) እና በመንፈስ ቅዱስ መገኘት (ዮሐንስ 14፥26)ውስጥ መመላለስ አለብን። ወደ ብርሃን መንገድ ለመመለስ ፈቃደኛ ያልሆኑ ሰዎች በጨለማ ውስጥ መመላለሳቸው እንዲሰናከሉ፣ እንዲወድቁና በመጨረሻም እንዲሞቱ ያደርጋል።

► የእምነት መግለጫውን ቢያንስ ሁለት ግዜ አብራችሁ አንብቡ።

እያንዳንዱ አማኝ ድል አድራጊ የሆነ ክርስቲያናዊ ሕይወት የመኖር መብት እና ግዴታ አለው። አማኙ ከክርስቶስ ጋር ባለው ግንኙነት ሕይወት አለው። እምነት ከእግዚአብሔር ጋር የሚያገናኘን ነው፤ የእግዚአብሔርን ፈቃድ የማይቀበል እና ወደ ኃጢአት የሚመለስ አማኝ ይህን እምነት ሊያዳክምና ጨርሶ ሊያጠፋውም ይችላል። አማኝ እያንዳንዱን ፈተና ማሸነፍ እንዲችል እግዚአብሔር የሚያበረታ ጸጋን ይሰጣል።

(1) የመጽሐፍ ቅዱስ ክፍል የቤት ስራ፦ ከታች ከተዘረዘሩት ዘርፎች መካከል እያንዳንዱን ተማሪ አንድ ይመደብ። ከሚቀጥለው ክፍለ ግዜ በፊት ክፍሉን አንብባችሁ በትምህርቱ ውስጥ ካለው ሃሳብ ላይ ምን እንደሚናገር በአንድ አንቀፅ ፃፉ።

• ማቴዎስ 13፥18-23

• ዕብራውያን 10፥23-39

• ያዕቆብ 1፥21-27

• 2 ጴጥሮስ 1፥1-11

• ራእይ 3፥14-22

(2) ፈተና፦ የሚቀጥለው ክፍለ ግዜ የምትጀምሩት በትምህርት 9 ፈተና ነው። ለፈተና ዝግጅት እንዲሆን የፈተና ጥያቄዎችን አጥኑ።

(3) የማስተማር የቤት ስራ፦ ከክፍል ውጪ የማስተማርያ ግዜን ቀጠሮ መያዝ እና ማስተማራችሁን ሪፖርት ማድረግ አስታውሱ።

(1) የ1ኛ ዩሐንስ ዋና መልዕክት ምንድን ነው?

(2) 1ኛ ዩሐንስ በአንድ አማኝ ሕይወት ውስጥ ይበልጥ አጽንኦት የሰጠው ባህሪ የቱ ነው?

(3) ከ1 ቆሮንቶስ 10፥13 ላይ የምናገኛቸው አራት ነገሮች ምንድን ናቸው?

(4) አማንያን በክርስቶስ መሆን/ ከክርስቶስ ጋር መጣበቅ የሚቀጥሉት እንዴት ነው?

(5) በክርስቶስ ያልንን የድነት ግንኙነት በምን መጠበቅ እንችላለን?