(1) ተማሪው የሚከተሉትን ማስረዳት ይችላል

• ስለ መላዕከት ማንነት የሆነ ያህል መረጃ ይኖራቸዋል

• መላዕክት በአማንያን ህይወት ውስጥ ያለው ተሳትፎ

• የሰይጣን መውደቅ እና ሌሎች ክፉ መናፍስት

• በመንፈሳዊ አለም ያለው መንፈሳዊ ውጊያ

• የእግዚአብሔር እና አማንያን በክፉ መናፍስት ላይ የሚቀናጁት የመጨረሻ ድል

• ስለ መናፍስት ክርስቲያናዊ የእምነት መግለጫ

(2) ተማሪዎች ስለ መንናፍስት አለም የተሳሳተ አይነት ፍላጎትን ያስወግዳሉ።

► ማቴ 4፥1-11 አብራችሁ አንብቡ። ይህ ክፍል ስለ ስለክፉ መናፍስት ምን ይነግረናል?

ሰዎች ስለመላዕክት ሲናገሩ ብዙ ግዜ ጥያቄው የሚጀምረው “መላዕክት ምን ይመስላሉ?” ከሚለው ነው፤ ብዙም አርቲስቶስ ሊገልጧቸው ሞክረዋል።

► መላዕክት ምን ይመስላሉ?

መላዕክት ክፍ አላቸውን? ኢሳይያስ ሱራፌል ስድስት ክንፎች እንዳሉት ተመልክቷል (ኢሳይያስ 6፥2)። እግዚአብሔር ሙሴን በታቦቱ ላይ እንዲያስቀመጥ ያዘዘው የኪሩቤል ምስል ክንፎች ነበሩት (ዘፀአት 25፥20)። ሕዝቅኤል ያየው ኪሩቤል ደግሞ አራት ክንፎች ነበሩት (ሕዝቅኤል 1፥6፣ ሕዝቅኤል 10፥15)።

መላዕክት በጠቅላላው ክንፍ ይኖራቸው ወይም አይኖራቸው በእርግጥ አናውቅም። ለመንቀሳቀስ ክንፍ አያስፈልጋቸውም፥ መንፈስ ስለሆኑ በክንፍ ከሚበሩበት ፍጥነት በላይ ይጓዛሉ። መንፈስ ስለሆኑ ቁሳዊ የሆነ አካል የላቸውም። ለመላዕክት ክንፎች ብዙውን ግዜ አላስፈላጊ ናቸው።

ብዙ ግዜ የምናያቸው ምስሎች በተቃራኒ፤ መጽሐፍ ቅዱስ መላዕክትን በሴቶች ሆነ ዕጻናት አይመስላቸውም። እንደ ወንድ ቢገለጡም ነገር ግን ሰዎች እንደሆኑት አይነት ፆታ የላቸውም። የትዳር ሆነ ቤተሰባዊ የሆነ ግንኙነት የላቸውም። (ማቴዎስ 22፥30 ይነበብ)። እያንዳንዱ ለየብቻው ነው የተፈጠረው።

መላዕክት ለሰዎች ብዙ ግዜ ለሰዎች አይታዩም፥ ነገር ግን አላማ ሲኖራቸው ሊገለጡ ይችላሉ። አንዳንድ ግዜ መላዕክት ሲገለጥላቸው ሰዎች በመጀመርያ ሰው ያዩ ይመስላቸዋል (ዘፍጥረት 19፥1-2)። በሌላ ግዜ መላዕክት በታላቅ ግርማ ስለሚገለጡ ሰዎች በፍርሓት መሬት ላይ ይወድቃሉ (ማቴዎስ 28፥2-4)። መላዕክት ለሰዎች ብቹ ግዜ ሲገለጡ የሚያቀርቡት ሰላምታ “አትፍራ” የሚል ነው (ሉቃስ 1፥13፣ 30፤ ሉቃስ 2፥10 ይነበብ)።

መላዕክት መናፍስት ናቸው (ዕብራውያን 1፥14)፣[1] በዚህ ምክንያት ግን እውን ከመሆን ያነሱ እንደሆኑ ማሰብ የለብንም። መጽሐፍ ቅዱስ መናፍስት ከየትኛው ቁሳዊ በላይ የበለጡ ሓያላን ናቸው (ኢሳይያስ 31፥1፣ 3 ይነበብ)።

መላዕክት የሆነ ያህል የእግዚአብሔርን ስብዕና እንደ ሰው ባልሆነ መንገድ ይጋራሉ። መላዕክት ከሰዎች በኃይህ እና ጥበብ ይበልጣሉ፤ ነገር ግን ሰዎች ከመላዕክት የሚበልጡበት ግዜ ይመጣል (1 ቆሮንቶስ 6፥3 ይነበብ)።

በዘፍጥረት ውስጥ የመላዕክት አፈጣጠር አልተፃፈም፤ ምድር ከመፈጠሯ በፊት መላዕክት ተፈጥረዋል፤ እግዚአብሔርም ምድርን ሲፈጥር መላዕክት የፈጠረውን አይተው አክብረዋል (ኢዮብ 38፥4-7 ይነበብ)።

መላዕክት አይሞቱም (ሉቃስ 20፥36)። መላዕክት አለም ከመፈጠሩ በፊት ስለተፈጠሩ እጅግ ብዙ ሺ ዓመታት ኖረዋል አንዲሁም የምድርን ታሪክ በሙሉ ተመልክተዋል።

መላዕክት የራሳቸው ስብዕና አላቸው። መናገር እና ከሌሎች ጋር ተግባቦት ማድረግ ይችላሉ (ሉቃስ 1፥18-20)። እግዚአብሔርን ያመልካሉ፥ ይህም ማለት የእርሱን ማንነት እና ለትልቅነቱ ምላሽ መስጠት ይችላሉ (ዕብራውያን 1፥6)። በኃጥያተኛው መመለስ ይደሰታሉ፤ ይህም ስሜት እንዳላቸው አመላካቸው ነው (ሉቃስ 15፥10 ይነበብ)። የመዳን ዕቅድ ምን እንደሆነ ለመረዳት አብዝተው የሚሹ በመሆናቸው የመገንዘብ ችሎታ እንዳላቸው ያመላክታል (1 ጴጥሮስ 1፥12 ይነበብ)። የእየሱስን መወለድ ሲያበስሩ በብዙ ምስጋና ያከበሩ ናቸው (ሉቃስ 2፥13-14)።

መላዕክት ተመሳሳይ አይደሉም፤ ምክንያቱም አንዳንዶች ኪሩቤል ተብለዋል (መዝሙር 80፥1)፤ ሌሎች ሱራፌል (ኢሳይያስ 6፥2)። እንዲሁም መላዕክት የተለያየዑ ደረጃዎች አሏቸው፥ ምክንያቱም መጽሐፍ ቅዱስ ስለ መላዕክትም እንዲሁም ቢያንስ ስለአንድ ሊቀ-መላዕክት እና እንዲሁም “ዲያብሎስና መላእክቱ” (ማቴዎስ 25፥41) ተገልጠዋል። የስልጣን ተዋረድ በመካከላቸው አለ፥ ይህም ዙፋናት፥ አለቆች እና ስልጣናት ተብለው ተገልጠዋል (ኤፌሶን 6፥12፤ ቈላስይስ 1፥16 ይነበብ)።

በአይሁድ ሆነ ክርስቲያን ትውፊት ውስጥ ስለ መላዕክት ምናልባትም ከመጽሐፍ ቅዱስ ውስጥ ከተፃፈው በላይ ብዙ ጽሑፎች አሉ።

በመላዕክት መካከል ስላለ ልዩነት በመጽሐፍ ቅዱስ ውስጥ ብዙ አልተገለጠም። መላእክት አለቃ የሚለው ቃል ሑለት ግዜ ብቻ ተፅፏል። ሚካኤል መላእክት አለቃ፣ ይባላል፤ እንዲሁም የክርስቶስ ዳግም ምፅዓት መላእክት አለቃ ድምፅ አለው (1 ተሰሎንቄ 4፥16፤ ይሁዳ 1፥9)። መላእክት አለቃ የሚለው ሃሳብ ቀጥተኛ ትርጉም ‘የመላዕክት ዋና/ሊቀ መላዕክት’ ነው። ምን ያህል መላእክት አለቆች እንዳሉ በቁጥር አናውቅም።

ሱራፌል የሚለው ቃል በኢሳይያስ 6 ላይ ብቻ ነው የተጠቀሰው። ስድስት ክንፍ አላቸው፤ ከክንፎቻቸው ውጪ መልካቸው ሁሉ የሰውን በሚመስል እጆች፥ እግሮች እና ፊት አላቸው።

ኪሩቤል እና የሚነደው ሰይፍ በኤደን ገነት መግቢያ ላይ አዳም እና ሔዋን መባረርን ተከትሎ የተቀመጠ ነው (ዘፍጥረት 3፥24) አላማውን ወደ ኤደን ገነት መግቢያውን መከልከል ነው። የሕዝቄል ስለ ኪሩቤል ያለውን መግለጫ ከሌላው የተፈጠረ ፍጥረት ሁሉ የተለየ ነው። አራት ክንፍ፥ አራት የተለያዩ ፊቶች፥ ብዙ እጆች ያላቸው፥ እንደ እሳት የቀላ መልክ ያላቸው፥ እንደ መብረቅ የሚያበሩ እና የፈጠኑ ናቸው (ሕዝቅኤል 1፥5-14፣ ሕዝቅኤል 10፥15)።

[2]በታቦት ማዕከል ላይ የምህረት መቀመጫ ኖሮ በጫፎች ላይ ሁለት ኪሩቤሎች ይቀመጣሉ ፤ እግዚአብሔርም በተደጋጋሚ በኪሩቤል ላይ የምትቀመጥ[3] ተብሎ ተጠርቷል። ይህም እግዚአብሔር በቤተ-መቅደስ ውስጥ የሚመለክ ፤ እርሱ ባዘዘው መልኩ ብቻ የሚቀረብ የእስራኤል አምላክ እንደሆነ ያሳያል።

የእግዚአብሔር ኃይል እና ግርማ በሚያገለግሉት ሰራተኞቹ መካከል ይታያል። ኪሩቤሎች የሚመለከታቸው ሰው እግዚአብሔርን ራሱ እንዳየ ያስባል፥ እናም እነርሱን ለማምለክ ሊቃጣው ይችላል ይሁን እንጂ ኪሩቤል የእግዚአብሔር አገልጋይ ብቻ ነው።

ብዙ መላዕክት በእግዚአብሔር ዙርያ መሆናቸው ታላቅ ግርማውን ያመላክታል። ሐዋርያው ዩሐንስ በራዕይ በእግዚአብሔር ዙፋን ዙርያ እልፍ የሆኑ መላዕክት መከበቡን እንዲህ ይገልጠዋል “ሺሕ ጊዜ ሺሕና እልፍ ጊዜ እልፍ” (ራእይ 5፥11)።

የመላዕክት ኃይል ያልተወሰነ አይደለም፤ ዳንኤልን ስናነብ አንድ መላዕክት ለዳንኤል መልዕክት ለማድረስ መንገድ ላይ መቋቋም ገጥሞት ነበር (ዳንኤል 10፥12-13 ይነበብ)። እግዚአብሔር ግን ለሚሰጣቸው የትኛውም ስራ የሚያስፈልጋቸውን ያህል ኃይል ይሰጣቸዋል፤ ለምሳሌ 185፣000 ወታደሮችን እንደገለው መላዕክት (2 ነገሥት 19፥35)።

መላዕክት የሚመደቡበት ስራ አለ። መጽሐፍ ቅዱስ ድነትን የሚቀበሉትን ለማገልገል እንደሚላኩ ይነግረናል (ዕብራውያን 1፥14 ይነበብ)። እግዚአብሔርን የሚያገለግሉ ሰዎችን ይከባሉ እና ይጠብቃሉ (መዝሙር 34፥7)። በሁሉም ግዜ ብዙ መላዕክት ከእኛ ጋር እንዳሉ መገንዘብ እንችላለን። እየሱስም ለልጆችን የሚመደቡ መላዕክት እንዳሏቸው ተናግሯል (ማቴዎስ 18፥10 ይነበብ)። መላእክት አለቃ ሚካኤል የእስራኤል እንደ ሀገር የሚጠብቅ ልኡል እንደሆነ ተፅፏል (ዳንኤል 12፥1)።

መጽሐፍ ቅዱስ ለመላዕክት እንዳንፀልይ ያስተምረናል፤ ከእነሱ ጋር መነጋገር እንድንሞክር እንኳን አይነግረንም። በሰዎች እና እግዚአብሔር መካከለኛም አይደሉም። መላዕክት ለሚያመልኩ እና በሚገባ ባልተረዱት የመናፍስት አለም ውስጥ ለሚሳተፉ ታላቅ ማስጠንቀቂያ አለ (ቈላስይስ 2፥18 ይነበብ)። እግዚአብሔር በማይፈልገው መንገድ ከመላእክት ጋር ግንኙነት ለመፍጠር ከሞከርን፤ ምናልባትም ከእግዚአብሔር መላዕክት ይልቅ ክፉ መናፍስት ምላሽ ይሰጡናል።

► የክፉ መናፍስት ምንጭ/ መገኛ ከየት ነው?

ክፉ መናፍስት እግዚአብሔር ላይ ያመፁ መላዕክት ነው። ይህ የሆነው ሰዎች ከመፈጣቸው በፊት ነው፥ እንዴት እንደሆነም መጽሐፍ ቅዱስ ብዙ አይገልጠውም። ሰይጣንም የአመፁ መሪ ነበር፥ አንድ ሶስተኛ የሆነውን መላዕክት ተከተለው (ራእይ 12፥4)። ይሁዳ ሲናገርም ቦታቸውን ስለተዉ መላዕክት ይናገራል (ይሁዳ 1፥6)። አሁን እግዚአብሔር ፈርዶባቸዋል (ዮሐንስ 16፥11፤ 2 ጴጥሮስ 2፥4 ይነበብ)።

በትንቢት መጽሐፍት ውስጥ ሁለት ቦታዎች ላይ ስለ ሰይጣን መውደቅ ሊናገሩ ይችላሉ (ኢሳይያስ 14፥12-17 እና ሕዝቅኤል 28፥12-19)። እያንዳንዱ ክፍል ስለ ምድራዊ ንጉስ የሆነ ሰው ነው የሚናገረው ነገር ግን ይህ የነገስታቱ መውደቅ ከሰይጣን መውደቅ ጋር እያነጻጸሩ ሊሆን ይችላል።

ሰይጣን በኩራት በመያዝ ከእግዚአብሔር አገዘዝ ነፃ ለመውጣት የሞከረ ይመስላል። ሐዋርያው ጳውሎስ ሰዎች ኩራተኛ በመሆናቸው እንደ ሰይጣን ባለ ቅጣት ውስጥ ሊወድቁ እንደሚችሉ ያስጠነቅቃል (1 ጢሞቴዎስ 3፥6 ይነበብ)። ዲያቢሎስ ለአዳም እና ሔዋን “እንደ እግዚአብሔር እንደምትሆኑ” (ዘፍጥረት 3፥5) በማለት ያቀረበላቸው ፈተና ይህ ነበር። ይህ ፈተና የእግዚአብሔርን ገዥነት በመክዳት ለራሳችን አማልክት እንዲሆን የቀረበ ፈተና ነው።

► ስለሰይጣን የምናውቃቸው አንዳንድ ነገሮች ምንድን ናቸው?

[1]ሰይጣን አሁንም እግዚአብሔር ላይ ያለውን አመፅ የሚመራ ነው። በአየር ላይ ላሉት መንፈሳውያን ኀይላት ገዥ (ኤፌሶን 2፥2) ይባላል። የዚህ ዓለም ገዥ በመባል ይታወቃል ምክንያቱም በዚህ ምድር ላይ ያሉ ብዙዎቹ ሰዎች እግዚአብሔር ላይ በአመፅ ውስጥ ስለሚኖሩ ነው (ዮሐንስ 12፥31)። የዚህ አለም መንግስት ባለቤት እንደሆነ በመውሰድ በግዜያዊነት የፈለገው ይሰጠዋል (ሉቃስ 4፥4-6)። ወንጌልን እንዳይቀበሉም የኃጥያተኞችን እውቀት ያሳውራል (2 ቆሮንቶስ 4፥4 ይነበብ)። ንስሃ ያልገቡ ሀጢአተኞች በእውነት የእርሱ እስረኞች ናቸው (2 ጢሞቴዎስ 2፥26)። የእግዚአብሔርን ቃል ከእውቀትዓቸው በማውጣት ተፅዕኖ እንዳይኖረው ያደርጋል (ማርቆስ 4፥15 ይነበብ)። በሐናንያ እና ሰጲራ ልብ ውስጥ ቤተክርስቲያንን እና መንፈስ ቅዱስን የመዋሸትን ሃሳብ አስቀመጠ (ሐዋርያት ሥራ 5፥3)፥ በይሁዳ ውስጥም እየሱሰን የመካድን ሃሳብ አኖረ (ሉቃስ 22፥3)፥ የስዕተት ሃይማኖታዊ አስተምሮዎችን በመፍጠር ሰዎች እንዲያስተምሯቸው ያበረታታል (1 ጢሞቴዎስ 4፥1 ይነበብ)።

ሰይጣን እግዚአብሔር ይጠላል እንዲሁም ሰዎች በእግዚአብሔር አምሳል ስለተፈጠሩ እና ከእግዚአብሔር ታላቅ ሞገስን ስላገኙ እነሱንም ይጠላቸዋል። ሰዎችን በእግዚአብሔር ላይ እንዲያምፁ በማድረግ እርሱ ወዳለበት ኩነኔ ብዙዎችን ለማምጣት ይፈልጋል።

በራሳቸው ሃሳብ ሰይጣንን ለማገልገል የሚፈልጉ ሰዎች በምድር ላይ በሚገባ የተታለሉ ሰዎች ናቸው ምክንያቱም ድል በሌለበት አመፅ ውስጥ ናቸው። የማይወዳቸው እና መጥፋታቸውን ብቻ የሚፈልግ ጌታን እያገለገሉ ናቸው (1 ጴጥሮስ 5፥8)። መጠበቅ እንደማይችል እያወቀ ቃልኪዳንን ይገባላቸዋል (ዮሐንስ 8፥44)።

ሌሎች በኃጥያት ውስጥ ለመኖር በመወሰን ባለማስተዋል ሰይጣንን ይከተሉታል (ኤፌሶን 2፥2-3)። ለዚህ ነው ብዙ ግዜን እና አቅምን በመፈተን እና በማሳት ላይ የሚያጠፋው (2 ቆሮንቶስ 4፥4፣ 2 ቆሮንቶስ 11፥3፣ 14)። ከተፈጠሩ ነገሮች ውስጥ ጣኦታትን በመስራት፥ ሰዎች እግዚአብሔርን እንዲክዱ ይፈልጋል (ሮሜ 1፥25)። ፈተናዎቹ አሳች ናቸው ምክንያቱን እግዚአብሔር የፈጠረውን ከማበላሸት ውጪ ሌላ መስጠት የሚችለው ነገር የለውም። ሰይጣን ምንም ደስታን ሆነ ሃሴትን መፍጠር አይችልም፤ እግዚአብሔር ነው ሁሉንም የፈጠረው። ሰይጣን ማድረግ የሚችለው ብቸኛ ነገር ከእግዚአብሔር ፈቃድ ውጪ በሆነ መልክ የተበላሸን ደስታን ማቅረብ ብቻ ነው። ሰይጣን ምንም ነገር መፍጠር አይችልም፥ ማድረግ የሚችለው ብቸኛ ነገር እግዚአብሔር የፈጠረውን መልካም ነገር ማበላሸት ብቻ ነው።

አንዳንድ ክፉ መናፍስት የተለየ ቦታ ወይም ሰዎች ጋር ያተኩራሉ። መላዕኩ ሚካኤል እስራኤልን የሚጠብቅ አለቃ ተብሎ ተጠርቷል፤ የፐርሽያ እና የግሪክ ልኡላን ተብለው የተጠሩም ክፉ መናፍስትም አሉ (ዳንኤል 10፥13፣ 20)። አንዳንድ መናፍስትም የሀገራት አማልክት ይሆናሉ።

ሰይጣን አምልኮን ይፈልጋል (ማቴዎስ 4፥9 ይነበብ)። ክፉ መናፍስት በተሳሳቱ ኃይማኖቶች ውስጥ ይሰራሉ። መጽሐፍ ቅዱስ ሰዎች ጣኦትን ሲያመልኩ አጋንንትን እያመለኩ እንደሆነ ይነግረናል (ዘዳግም 32፥17፤ 1 ቆሮንቶስ 10፥20-21 ይነበብ)። የሚያመልኩትን በማያውቁ ሰዎች አምልኮን አጋንንት ይቀበሉታል። እግዚአብሔር የሚያመልኩ ሰዎች እግዚአብሔር እየመሰሉ እና በቅድስናው ሀሴትን እንደሚያደርጉ፥ የክፉ አምላኪዎች እንዲሁ በክፋት እየጨመሩ እና ደስ እየተሰኙ ይሄዳሉ። ምናልባትም በጣም የከፋው አምልኮ ሰዎች ልጆቻውን ለአጋንንት መሰዋትን ያቀረቡበት አምልኮ ነው (መዝሙር 106፥37-38 ይነበብ)።

ሰይጣን እና አንዳንድ አጋንንት የሰዎችን እውቀት እና ባህሪ ሙሉ በሙሉ ለመቆጣጠር ይሞክራሉ። ይህን “በአጋንንት መያዝ” ይባላል። አንዳንድ ሰዎች በፈቃዳቸው ለእንደዚህ አይነት አጋንንታዊ ቁጥጥር ራሳቸውን አሳልፈው ሰጥተዋለ፥ ሌሎች ግን ምናልባትም የሚያደርጉትን ነገር ባለማስተዋል በህይወታቸው ይህ እንዲሆን ፈቅደዋል። አንዳንዶች ለራሳቸው አላማ ኃይልን የሚያገኙ መስሏቸው ወደዚህ ሁኔታ ውስጥ ቀስ በቀስ ገብተዋል። በአጋንንት የተያዘ ሰው ለክፉ መናፍስት ባርያ በመሆን ለራሳቸው ጥፋት ወደሚሆንባቸው እና በእውቀት እና ስሜታቸው የከፋን መከራን ወደሚቀበሉበት ሁኔታ ውስጥ ይገባሉ (ማርቆስ 5፥2-5 ይነበብ)። ከዚህ እስር ማላቀቅ የሚችለው እየሱስ ብቻ ነው።

ወንጌል በሚገባ የተንሰራፋቸው ሀገራት ውስጥ የአጋንንት እንቅስቃሴ በብዛት በተለያየ ሽፋን ውስጥ ነው የሚሰራው። በሚገርም ሁኔታ፥ እነዚህ ‘ዘመኑ’ በሚባሉ ሀገራት ዓለማዊነት ገኖባቸው የትኛውንም ልዕለ-ተፈጥሮዓዊ የሆነ ነገር ላይ የሚቀልዱ እና የመናፍስትን መኖር የሚክዱ ናቸው። በዚህ አይነት ሁኔታዎች ውስጥ ክፉ መናፍስት በግልፅ አይሰሩም ምከንያቱም ወንጌል የሰሙ ሰዎችን ቢያስፈራሩ ከእነዚህ ብዙዎች ነፃ ለመውጣት እና ለጥበቃው ወደ እግዚአብሔር ይመለሳሉ።

[1]ወንጌል በሚገባ ያልተሰማባቸው ሀገራት ውስጥ ግን ክፉ መናፍስት በግልፅ ይሰራሉ። በእነዚህ ሀገራት ያሉ ሰዎች ነፃ ለመውጣት ወደ ክርስቶስ መዞር እንደሚችሉ አያውቁም፥ ስለዚህ የመናፍስት ኃይላት በማስፈራራት ይገዟቸዋል። ሰዎቹ መናፍስቱን በፈቃደኝነት እና በደስታ ሳይሆን በፍርሃት ያገለግሏቸዋል። ወንጌል የነፃ መውጣት እና የአርነት መልካም የምስራች ነው።

ሁልግዜ ካለው የአጋንንት ውጊያ የተነሳ አሁን በመንፈሳዊ ጦርነት ውስጥ ነው ያለውን። መዋጋታችን አካል ከለበሱ ጠላቶች ጋር ሳይሆን ከመናፍስቱ አለም ጋር መሆኑን እንድናስታውስ ማስጠንቀቂያ ተሰጥቶናል (ኤፌሶን 6፥12 ይነበብ)። ራሳችንን በሚገባ ለመከላከል እንድንችል መንፈሳዊ የጦር ዕቃችንን እንድንለብስ ታዘናል (ኤፌሶን 6፥13)። የእግዚአብሔርን ኃይል መቋቋም ስለማይችል እኛም የዲያቢሎስ ስንቋቋም ከእኛ ይሸሻል በዚህም ድል እንደምናደርግ ልበ ሙሉዎች ነን (ያዕቆብ 4፥7)።

► ሰይጣን የእግዚአብሔር ተቃራኒ ነውን?

ዲያቢሎስ ያለው ኃይል አሁን ሰዎች በሚሞት ማንነታቸው ውስጥ ካለው ሁሉ በላይ ነው። ነገር ግን አቅሙ ከእግዚአብሔር ጋር ሲስተካተከል ምንም ነው። ከእግዚአብሔር ጋር በኃይል እኩል አንደ ሆነ ያህል የእግዚአብሔር ተቃራኒ ተደርጎ መታየት የለበትም። አንዳንድ ፈላስፎች የመልካም እና ክፉ ኃይላት እኩል ናቸው ብለው ያስባሉ፥ ይህ ግን ከእውነት የራቀ ነው። ሰይጣት በሑሉም ቦታ አይገኝም፥ ሑሉንም ነገር አያውቅም እንዲሁም ስዕተቶችን ይሰራል። እግዚአብሔር መናፍስትን ሁሉ ፈጥሯል፥ እነሱም ሊያሸንፉት አይችሉም። የሰው ልጅ የተወሰነለት ግዜ ሲያበቃ ሑሉም ክፉ መናፍስት ከኃጥያተኛ ሰዎች ጋር ለፍርድ ይቀርባሉ፥ ይታሰራሉ እንደሁም ይቀጣሉ።

የሰይጣት መሸነፍ ለረጅም ግዜ ጀምሮ ቃል የተገባ ነው። እግዚአብሔር አዳኝ በመላክ የእባቡን አናት እንደሚቀጠቅጠው ቃል ገብቶልናል (ዘፍጥረት 3፥15)። እየሱስ የመጣው የሰይጣንን ስራ ለማደምሰስ እና በኃጥያት ላይ ድልን ሊሰጠን ነው (1 ዮሐንስ 3፥8 ይነበብ)። እየሱስ በሞቱ እና በትንሳኤው ሰይጣን በሞት ላይ ኃይል እንዳይኖረው አድርጎታል (ዕብራውያን 2፥14፤ ራእይ 1፥18)። የሰይጣን እና የሌሎች ክፉ መናፍስት መጨረሻ የእሳት ባህር ነው (ማቴዎስ 25፥41 ይነበብ)።

እግዚአብሔር ሰይጣን ሊያደርገው የሚችለው ላይ ገደብ አበጅቶለታል (ኢዮብ 1፥12፣ ኢዮብ 2፥6)። ይህም ማለት ሰይጣን ምን ያደርገኛል በሚል ፍርሃት መኖር የለብንም፥ እግዚአብሔር ካልፈቀደ ምንም አይሆንም፥ እርሱን ልንሸከመው የምንችለውን ምን ያህል እንደሆነ ያውቃል (1 ቆሮንቶስ 10፥13)።

ከሰይጣት ጥቃቶች የተከለልን ብቻ ሳንሆን ነገር ግን የእግዚአብሔርን መንግስት በሰይጣን ግዛት ውስጥ የማስፋት ኃይል አለን። እየሱስ ለሐዋርያት ብቻ ሳይሆን ለደቀ መዛሙርቱ ሁሉ መናፍስትን የማስወጣት ኃይልን ሰጥቷል (ሉቃስ 10፥17 ይነበብ)። ወንጌልን ስንሰብክ እግዚአብሔር ለእውነቱ ብርታትን ይሰጣል እንዲሁም ለወንጌል ምላሽ የሰጡትን ከሰይጣን እስራት ነፃ ያወጣቸዋል።

ለክፍሉ መሪ ማስታወሻ- የክፍሉ አባል ይህንን ክፍል ማስረዳት ይችላል።

አንዳንድ ሰዎች ስለመንፈሳዊ አለም በብዙ ይደነቃሉ፥ ስለመላዕክት ማጥናት ይጀምራሉ ፤ ከእነሱም ጋር ግንኙነት ለመፍጠር ይሞክራሉ። መጽሐፍ ቅዱስ ለመላዕክት እንድንፀልይ ሆነ ከእነሱ ጋር ግንኙነት እንዲኖረን አያስተምረንም። መላዕክትን እንዳናመልካቸው እና ከሚገባን በላይ ስለ እነሱ ለማወቅ እንዳንጥር መጽሐፍ ቅዱስ ያስተምረናል (ቈላስይስ 2፥18)።

ሰዎች በክፉ መንፈስ ላይ ደግሞ ፍላጎት ሲያሳድሩ የበለጠ አደገኛ ነው። አንዳንድ ሰዎች ባላቸው ኃይል እና በሚያደርጉት ነገር ይደነቃሉ። ከመናፍስት ጋር ለመነጋገር የሚጠቀሙት ጨዋታዎች አሉ፥ እንዲሁም ከመናፍስቱ መረጃን የሚቀበሉበት መንገዶች አሏቸው። እኛ ግን በእግዚአብሔር ኃይል ከመቋቋም ውጪ በምንም መንገድ ከክፉ መናፍስት ጋር ግንኙነት ማድረግ የለብንም (ያዕቆብ 4፥7፣ 1 ጴጥሮስ 5፥8-9)።

አንዳንድ ሰዎች ስለ መናፍስቱ አለም እና እንዴት እንደሚሰራ የተወሳሰብ እና ዝርዝር የሆነ ማብራርያ አላቸው። ነገር ግን እግዚአብሔር ስለ መናፍስቱ አለም ልናውቀው የሚያስፈልገው መገለጥ በሙሉ ሰጥቶናል።

► የእምነት መግለጫውን ቢያንስ ሁለት ግዜ አብራችሁ አንብቡ።

ሑሉንም መናፍስት የፈጠረው እግዚአብሔር ነው። ቅዱስ መላዕክት እግዚአብሔር የሚያመልኩ እና አማኞችን የሚጠብቁ ናቸው። መላዕክት የማይሞቱ፥ መናገር፥ ማምለክ እና አመክንዯን ማድረግ የሚችሉ ግላዊ ፍጡራን ናቸው። ሞራላዊ የሆነ ውሳኔን ማድረግ የሚችሉ ናቸው። ሰይጣን እና ሌሎች መላዕክት በኃጥያት ወደቁ እንዲሁም ከእግዚአብሔር እና የሰው ልጅ ጠላቶች ሆኑ። እግዚአብሔርም የሰይጣንን አቅም ወስኖታል እንዲሁም ለዘላለም ቅጣት ወስኖታል።

(1) የመጽሐፍ ቅዱስ ክፍል የቤት ስራ፦ ከታች ከተዘረዘሩት ዘርፎች መካከል እያንዳንዱን ተማሪ አንድ ይመደብ። ከሚቀጥለው ክፍለ ግዜ በፊት ክፍሉን አንብባችሁ በትምህርቱ ውስጥ ካለው ሃሳብ ላይ ምን እንደሚናገር በአንድ አንቀፅ ፃፉ።

• ማቴዎስ 12፥43-45

• ሉቃስ 8፥27-35

• ሐዋርያት ሥራ 12፥7-11

• 2 ቆሮንቶስ 11፥13-15

• 1 ጴጥሮስ 5፥8-9

(2) ፈተና፦ የሚቀጥለው ክፍለ ግዜ የምትጀምሩት በትምህርት 6 ፈተና ነው። ለፈተና ዝግጅት እንዲሆን የፈተና ጥያቄዎችን አጥኑ።

(3) የማስተማር የቤት ስራ፦ ከክፍል ውጪ የማስተማርያ ግዜን ቀጠሮ መያዝ እና ማስተማራችሁን ሪፖርት ማድረግ አስታውሱ።

(1) መላዕክት በአብዛኛው ግዜ አካላዊ/ቁሳዊ የሆነ አካል እንደሌላቸው በምንድን ነው የምናውቀው?

(2) መላዕክት መች ተፈጠሩ?

(3) መላዕክት ይሞታሉን?

(4) መላዕክት ስብዕና እንዳላቸው የምናውቅበትን አራት መንገዶች ጥቀሱ?

(5) በመጽሐፍ ቅዱስ ውስጥ መላዕከትን ለመግለጥ የተጠቀማቸው አራት ቃላትን ጥቀሱ።

(6) እግዚአብሔር ለሚያገለግሉ ሰዎች መላዕክት የሚያደርጉት ነገር ምንድን ነው?

(7) የክፉ መናፍስት ምንጭ ምንድን ነው?

(8) ጣኦት አምላኪ በእውን የሚያመልከው ምንድን ነው?

(9) የሰይጣን እና የሌሎች ክፉ መናፍስት የመጨረሻ መገኛ የት ነው?

(10) አማኞች ራሳቸውን ከመንፈሳዉ ጥቃት ለመከላክል ምን ማድረግ አለባቸው?