(1) ተማሪው የሚከተሉትን ማስረዳት ይችላል

• በመንፈስ ቅዱስ የተሞላ ሰው ባህርያት

• ከመጽሐፍ ቅዱስ በመነሳት ስለመንፈስ ቅዱስ መለኮትነት እና ስብዕና ማስረዳት

• የመንፈስ ቅዱስ መለኮትነት እና ስብዕና ለምን መሰረታዊ የክርስትና ትምህርት እንደሆነ መግለጽ

• የመንፈስ ቅዱስ ሚና በታሪክ ውስጥ እና በዚህ ዘመን

• ከመንፈስ ቅዱስ ጋር ህብረት ያለው አማኝ ያለውን ተግባራዊ የህይወት ልምምድ መረዳት

• ስለመንፈስ ቅዱስ ክርስቲያናዊ የእምነት መግለጫ

(2) ተማሪው የመንፈስ ቅዱስ ስጦታዎችን በተመለከተ ያሉ መመሪያዎችን ይተገብራል።

► መዝሙር 139 አብራችሁ አንብቡ። ይህ ክፍል ስለ እግዚአብሔር መንፈስ ምን ይነግረናል?

አንዳንድ ሰዎች መንፈስ ቅዱስን ስሜትን የሚቀሰቅስ፣ ሊጠቀሙበት የሚችሉበት ኃይል፣ ማንነት የሌለው ወይም ዝም ብሎ መገኘት ብቻ እንደሆነ ያስባሉ። ለምሳሌ የይሖዋ ምስክሮች “መንፈስ ቅዱስ በራሱ ስብዕና ያለው የሥላሴ አካል ሳይሆን እግዚአብሔር ፈቃዱን ለመፈፀም የሚጠቀምበት ኃይል ነው፤ በተወሰነ መልኩ ከኤሌክትሪክ ኃይል ይመሳሰላል”[1] ብለው ያምናሉ።

[2]► ይህ የይሖዋ ምስክሮች ግንዛቤ የተሳሳተ የሆነው ለምንድነው?

የይሖዋ ምስክሮች መንፈስ ቅዱስን በራሱ ስብዕና የሌለው ኃይል አድርገው ያዩታል። ትክክለኛ የመጽሐፍ ቅዱስ አረዳድ ስለሌላቸው ከእግዚአብሔር ጋር ትክክለኛ ህብረት ሊኖራቸው አይችልም።

እየሱስ የመንፈስ ቅዱስ ስራን በንፋስ መስሎታል። ፤ ድምፁንም ትሰማለህ፣ ነገር ግን ከየት እንደመጣ፣ ወዴት እንደሚሄድም አታውቅም (ዮሐንስ 3፥8)። ስለመንፈስ ቅዱስ እያንዳንዱን ነገር ልንረዳ እንችላለን ብለን መጠበቅ የለብንም። ነገር ግን ስለእርሱ ልናውቃቸው የምንችላቸው ነገሮች አሉ። እነዚህም ከእግዚአብሔር ጋር ላለን ህብረት በጣም አስፈላጊ ናቸው።

[3]መንፈስ ቅዱስ ከቤተክርስትያን ጋር ስላለው መስተጋብር በጥልቀት የሚነግረን የመጽሐፍ ቅዱስ ክፍል የሐዋርያት ሥራ መጽሐፍ ነው። ይህ መጽሐፍ የመጀመሪያዋ ቤተክርስትያን ለመንፈስ ቅዱስ የነበራትን ምላሽ ያሳየናል። ይህም፦

1. የመጀመሪያዎቹ አማኞች የመንፈስ ቅዱስን መለኮትነት አክብረዋል። (ሐዋርያት ሥራ 5፥3-4ን አንብብ)።

2. ለመንፈስ ቅዱስ መገኘት፣ ምሪት እና እንቅስቃሴ እውቅና ይሰጡ ነበር። (ሐዋርያት ሥራ 15፥28ን አንብብ)።

3. የመጀመሪያዎቹ ክርስቲያኖች በመንፈስ ቅዱስ ላይ የሚደገፉና ለእርሱም ምላሽ የሚሰጡ ነበሩ። (ሐዋርያት ሥራ 4፥24፣31ን አንብብ)።

እኛም ከመንፈስ ቅዱስ ጋር ይህንን የመለ ህብረት እንዲኖረን መለኮትነቱን እና ስብዕና ያለው አካል መሆኑን መረዳት ይኖርብናል።

መንፈስ ቅዱስ ልክ እንደእየሱስ የሚዳሰስ ስጋ ያለው አካል ባይኖረውም ስብዕና ግን አለው። የእውነተኛ አካልነት/መደብ መገለጫዎች እውቀት (ሃሳብ)፣ ፈቃድ እና ስሜት ናቸው። መንፈስ ቅዱስ ፈቃድ አለውን? እንደፈቃዱ መጠን ለቤተክርስቲያን ስጦታዎችን ይሰጣል (1 ቆሮንቶስ 12፥11)። መንፈስ ቅዱስ እውቀት (ሃሳብ) አለውን? "መንፈስም የእግዚአብሔርን ጥልቅ ነገር እንኳ ሳይቀር ሁሉን ይመረምራል" (1 ቆሮንቶስ 2፥10)። መንፈስ ቅዱስ ስሜት አለውን? በኤፌሶን 4፥30 ላይ "ቅዱሱን የእግዚአብሔር መንፈስ አታሳዝኑ" ተብለናል። መንፈስ ቅዱስ የሚያዝን ከሆነ ስሜት አለው ማለት ነው። መንፈስ ቅዱስ እውቀት፣ ፈቃድ እና ስሜት ስላለው ስብዕና እንዳለው እንረዳለን።

► መንፈስ ቅዱስ አካል እንደሆነ መረዳት ለምን ይጠቅመናል?

ስብዕና ያለው አካል ከሌሎች ጋር ህብረት ማድረግ ይችላል። መንፈስ ቅዱስ ስብዕና የሌለው ኃይል ብቻ ቢሆን ኖሮ ከእርሱጋር ህብረት ማድረግ አንችልም ነበር። ነገር ግን በፊልጵስዩስ 2፥1 እና 2 ቆሮንቶስ 13፥14 መሰረት መንፈስ ቅዱስ ከእኛ ጋር ህብረት ያደርጋል፤ ስለዚህም ስብዕና አለው ማለት ነው።

ለክፍሉ መሪ ማስታወሻ- ስለመንፈስ ቅዱስ ስብዕና ተጨማሪ መጽሐፍ ቅዱሳዊ ማስረጃ ለማግኘት ወደመጨረሻ የሚገኘውን "ስለመንፈስ ቅዱስ ስብዕና የመጽሐፍ ቅዱስ ማስረጃዎች" በሚል ርዕስ ስር ያለውን ትምህርት ይመልከቱ።

መንፈስ ቅዱስ ሁሉን አዋቂ፣ ሁሉን የሚያይ እና በሁሉም ስፍራ የሚገኝ አምላክ ነው። የአናንያንና የሰጲራን ታሪክ ታስታውሳላችሁ? በሐዋርያት ሥራ 5፥3-4 አናንያ ከመቀሰፉ በፊት ጴጥሮስ “መንፈስ ቅዱስን ትዋሽና...ሰይጣን ልብህን ለምን ሞላው?…የዋሸኸው እኮ እግዚአብሔርን እንጂ ሰውን አይደለም” ብሎት ነበር። ከዚህም መንፈስ ቅዱስን መዋሸት እግዚአብሔርን መዋሸት መሆኑን እንረዳለን። ይህም መንፈስ ቅዱስ እግዚአብሔር መሆኑን ያሳያል።

መንፈስ ቅዱስ ሁሉን አዋቂ ነው። በ1 ቆሮንቶስ 2፥10-11 መንፈስ ቅዱስ የእግዚአብሔርን ነገር ሁሉ እንደሚያውቅ እናነባለን። ይህ ልዕለ ተፈጥሯዊ ምጡቅ እውቀት ይፈልጋል። መንፈስ ቅዱስ የትንቢት መጽሐፍትን ጨምር ቅዱሳት መጽሐፍት እንዲፃፉ አነሳስቷል፤ ይህም ሁሉን አዋቂነቱን ያስረዳል። (2 ጴጥሮስ 1፥21 ይነበብ)። ቅዱሳት መጽሐፍት ሁሉ የእግዚአብሔር መንፈስ እንዳለባቸው 2 ጢሞቴዎስ 3፥16 ይናገራል። ስለዚህም መንፈስ ቅዱስ እግዚአብሔር ነው።

መንፈስ ቅዱስ በሁሉም ስፍራ ይገኛል። መዝሙር 139፥7-10 ሰው ከእግዚአብሔር መንፈስ የሚያመልጥበት ስፍራ እንደሌለ ይነግረናል። ሮሜ 8፥9 መንፈስ ቅዱስ ከሁሉም አማኝ ጋር እንደሚገኝ ይነግረናል። የክርስቶስ መንፈስ የሌለው የክርስቶስ ወገን አለመሆኑን ያስረዳናል። ከዓውዱ እንደምንረዳው የክርስቶስ መንፈስ የተባለው መንፈስ ቅዱስ ነው።

መንፈስ ቅዱስ ኃያል ነው። መንፈስ ቅዱስ እግዚአብሔር የሚያደርገውን ሁሉ ያደርጋል። ዓለምን ስለ ኀጢአት፣ ስለ ጽድቅና ስለ ፍርድ ይወቅሳል (ዮሐንስ 16፥8)። ይህን ለማድረግ የእያንዳንዱን ሰው ህሊና መድረስና ለእያንዳንዱ እውቀት እውነትን ማስረዳት መቻል አለበት። ለእያንዳንዱ አማኝም የውስጥ ጥንካሬን ይሰጣል (ኤፌሶን 3፥16ን አንብብ)። በዓለም ዙሪያ ባሉ አማኞች ሕይወት ውስጥም ሑሉ የመንፈስ ፍሬ እንዲፈራ የሚያደርገው እርሱ ነው (ገላትያ 5፥22-23ን አንብብ)። ይህንን ከመለኮት በቀር ሌላ ማድረግ የሚችል የለም።

በሉቃስ 12፥10 ላይ መንፈስ ቅዱስ ላይ የስድብን ቃል የሚናገር ሲል ስድብን ለማመልከት የተጠቀመበት ቃል እግዚአብሔርን ማቃለልን ለመግለጽ ብቻ የሚውልን ቃል ነው። ይህም መንፈስ ቅዱስ እግዚአብሔር መሆኑን ያስረዳል።

መንፈስ ቅዱስ ዘላለማዊ ነው (ዕብራውያን 9፥14)።

ሰውነታችን የእግዚአብሔር መቅደስ የተባለው መንፈስ ቅዱስ በዚያ ስለሚያድር ነው (1 ቆሮንቶስ 3፥16)።

ከመጽሐፍ ቅዱሳዊ ማስረጃዎች እንደምንረዳው፣ መንፈስ ቅዱስ ራሱ እግዚአብሔር እንደሆነ ሲሆን፣ እርሱም በመለኮታዊ ሥላሴ ውስጥ ሦስተኛው አካል ነው።

► በመንፈስ ቅዱስ መለኮትነት ማመን የሚገባን ለምንድነው?

የመንፈስ ቅዱስን አምላክነት መረዳት ለእርሱ የሚገባውን ክብር እና አምልኮ እንድንሰጠው ይረዳናል። ስለዚህ ምነፈስ ቅዱስን አለማምለክ ከባድ ነገር ነው።

ይህን ስንል አንድ ሰው ከሌላው እንደሚለየው እንደዚያው መንፈስ ቅዱስ ከአብ እና ከወልድ ይለያል እያልን አይደለም። የሥላሴ አካላት አንዳቸው በሌላቸው ውስጥ ይኖራሉ፤ ሶስቱ አካላት አንድ እግዚአብሔር ነው። ነገር ግን እርስ በእርሳቸው ይነጋገራሉ፣ ይዋደዳሉ እንዲሁም በመካከላቸው ህብረት አለ።

በሥላሴ ውስጥ ስላለው ልዩ ልዩ አካል መጽሐፍ ቅዱስ ያስተምረናል። ለምሳሌ በዮሐንስ 14-16 እየሱስ ወደአብ ሲሄድ ስለሚልከው ረዳት (አጽናኝ) ደጋግሞ ያነሳል። (ዮሐንስ 14፥16-17ና 26፣ ዮሐንስ 15፥26፣ዮሐንስ 16፥7ና 13-15ን አንብብ)። ይህ ረዳት ደቀመዛሙርትን የሚያስተምርና የሚመራ እንደሆነም ይናገራል። እየሱስ ከመንፈስ ቅዱስ ጋር አንድ ቢሆን ኖሮ ስለሌላ ረዳት ማውራት ትርጉም አይኖረውም ነበር። በዚህ ክፍል እየሱስ ስለሌላ አካል እያወራ እንደሆነ መረዳት እንችላለን።

መንፈስ ቅዱስ የሚናገረው ከራሱ እንዳልሆነ፤ ክርስቶስ ከአብ የተቀበለውን የክርስቶስን ነገር እንደሚገልጥ እየሱስ ተናግሯል (ዮሐንስ 16፥13-15)። አብና ወልድ ከመንፈስ ቅዱስ የማይለዩ ቢሆኑ ኖሮ ይህ የእየሱስ አባባል ትርጉም አይሰጥም ነበር።

በእየሱስ ጥምቀትም የምንመለከተው ሶስቱ የሥላሴ አካላት በአንድ ጊዜ ግን በተለያየ ሁኔታ መገኘታቸውን ነው። ማርቆስ 1፥10-11 አብ ከሰማይ “የምወድድህ ልጄ አንተ ነህ፣” ሲል መንፈስ ቅዱስ ደግሞ በእርግብ አምሳል በእየሱስ ላይ አርፏል።

ከዘላለም ጀምሮ መንፈስ ቅዱስ በልዩ የሥላሴ አካልነት ከአብና ከወልድ ጋር ነበረ። እግዚአብሔርም በመካከላቸው ባለው የፍቅር ህብረት ውስጥ እንድንካፈል ፈጥሮናል። ከጥንት ጀምሮ እያንዳንዱ የሥላሴ አካል ከሌሎች ጋር ኅብረት እንዳለው እግዚአብሔር ከእርሱ ጋር ባለን ህብረት እንድንደሰት ይፈልጋል (1 ዮሐንስ 1፥3-4)። (ዮሐንስ 17፥22-23ን አንብብ።)

ከዓለም ፍጥረት አንሰቶ መንፈስ ቅዱስ በስራ ላይ ነው። በዓለም መፈጠር ውስጥ ሲሰራ ነበር (ዘፍጥረት 1፥2ና 26)። ለልዩ ተልዕኮ ለተጠሩ ሰዎች ልዩ ችሎታን ይሰጣል (ዘፀአት 35፥30-31፤ መሳፍንት 3፥9-10፤ መሳፍንት 15፥14-15)። ለነብያት መልዕክትን ይሰጣል (ኢሳይያስ 61፥1)፣ ቅዱሳት መጽሐፍት እንዲፃፉ አነሳስቷል (2 ጴጥሮስ 1፥21)፣ ሁልጊዜ ሰዎች ወደእግዚአብሔር እንዲመለሱ በልባቸው ይሰራል (ሐዋርያት ሥራ 7፥51)።

የህይወት መንፈስ ተብሎ ተጠርቷል (ሮሜ 8፥2ን አንብብ)። እኛን የፈጠረንና እንትንፋስ የሰጠን ይህ መንፈስ ነው። ይህ ቅዱስ መንፈስ ባይኖር ኖሮ ህያው የሆነ አንዳችም ነገር በምድር ላይ አይገኝም ነበር፤ ሰውም ወደአፈር ይመለስ ነበር (ኢዮብ 33፥4፣ ኢዮብ 34፥14-15)።

አዲስ ኪዳን ልዩ የሆነውን የመንፈስ ቅዱስን ስራ ያስተዋውቀናል። መጥምቁ ዮሐንስ እየሱስ ሰዎችን በመንፈስ ቅዱስ እንደሚያጠምቅ ተናግሯል (ማቴዎስ 3፥11)። እየሱስም ለደቀመዛሙርቱ በአብ ቃል የተገባውን የመንፈስ ቅዱስን ጥምቀት እንዲጠባበቁ ነግሯቸው ነበር፤ ይህም በበዓለ ሃምሳ ተፈፅሟል (ሐዋርያት ሥራ 1፥4-5፣ 8)።

መንፈስ ቅዱስ ከደቀመዛሙርቱ ጋር እንደሚኖር እና እየሱስ በምድር ሳለ ያስተማራቸውን እንደሚያስታውሳቸው ወደ እውነትም እንደሚመራቸው እየሱስ ለደቀመዛሙርቱ ነግሯቸው ነበር (ዮሐንስ 14፥26ና ዮሐንስ 16፥13)። እየሱስ መንፈስ ቅዱስ ሌላ አጋዥ መሆኑን ተናግሯል (ዮሐንስ 14፥16ና 26፣ ዮሐንስ 15፥26፣ ዮሐንስ 16፥7)። እየሱስ የተጠቀመው የግሪኩ ቃል “ከእኛ ጋር የሚኖር”፣ “የሚያፅናና” እና “የሚረዳ” የሚለውን ሃሳብ ይይዛል። “ተወካይ” የሚል ትርጓሜም አለው። መንፈስ ቅዱስ እየሱስን በመወከል የእርሱን ቃል ያስታውሰናል። [1]

► መንፈስ ቅዱስ የሚያከናውናቸው ነገሮች ምን ምን ናቸው?

ሁሉንም የመንፈስ ቅዱስ ስራዎች ጠቅሰን ባንጨርስም የተወሰኑትን መዘርዘር እንችላለን።

1. ስለኃጢአት ይወቅሰናል (ዮሐንስ 16፥8፤ 1 ቆሮንቶስ 2፥4፤ 1 ተሰሎንቄ 1፥5)። ይህ ካልሆነ ሰው ኃጢአቱን መረዳትና ንስሃ መግባት አይችልም።

2. በኃጢአት ለሞተው ሰው በዳግም ልደት ህይወትን ይሰጣል (ቲቶ 3፥5፤ ኤፌሶን 2፥1፤ ዮሐንስ 3፥5)።

3. ለአማኝ ስለመዳኑ የውስጥ ማረጋገጫ ይሰጠዋል (ሮሜ 8፥16)።

4. በእያንዳንዱ አማኝ ህይወት ውስጥ ይኖራል (ሮሜ 8፥9፤ 1 ቆሮንቶስ 6፥19)።

5. የእግዚአብሔርን እውነት እንድንረዳ ማስተዋልን ይሰጣል (1 ቆሮንቶስ 2፥9-10፣ 13-14፤ 2 ቆሮንቶስ 3፥14-17፤ ኤፌሶን 6፥17)።

6. ሰዎችን ለልዩ አገልግሎት ይጠራል፤ አገልግሎቱንም ይመራል (ሐዋርያት ሥራ 13፥2-4፣ ሐዋርያት ሥራ 15፥28፣ ሐዋርያት ሥራ 16፥6-10)።

7. ይቀደሱ ዘንድ የአማኞችን ልብ ያጠራል (ሐዋርያት ሥራ 15፥8-9፤ 1 ጴጥሮስ 1፥2)።

8. ከኃጢአት በላይ በድል ለመኖር የሚያስችልን አቅም ይሰጣል (ሮሜ 8፥1፣ 5፣ 13፤ ገላትያ 5፥16)።

9. በአማኝ ህይወት ውስጥ መንፈሳዊ ፍሬ እንዲፈራ ያደርጋል (ገላትያ 5፥22-23)።

10. ለአገልግሎት የሚሆንን መንፈሳዊ ስጦታ ይሰጣል (1 ቆሮንቶስ 12፥4-10፣ 28-30፤ ሮሜ 12፥6-8፤ 1 ጴጥሮስ 4፥10-11)።

11. ለአገልግሎት ልዩ ቅባት ይቀባል (ሐዋርያት ሥራ 1፥8፣ ሐዋርያት ሥራ 13፥9፤ ገላትያ 3፥5፤ 1 ጴጥሮስ 1፥12)።

12. አማኝ እንደእግዚአብሔር ፈቃድ መፀለይ እንዲችል ይረዳል (ሮሜ 8፥26-27፤ ኤፌሶን 6፥18)።

13. አማኝ እንደእግዚአብሄር ፈቃድ መፀለይ እንዲችል ይረዳል (ሮሜ 8፥26-27፤ ኤፌሶን 6፥18)።

14. በቤተክርስቲያን ውስጥ አንድነትን እና ህብረትን ይፈጥራል (ኤፌሶን 4፥3፤ ፊልጵስዩስ 2፥1)።

ለክፍሉ መሪ ማስታወሻ- የክፍሉ አባል ይህንን ክፍል ማስረዳት ይችላል።

1. መንፈስ ቅዱስ በተለያዩ ስጦታዎች፣ አገልግሎቶችና አሰራሮች ይሰራል (1 ቆሮንቶስ 12፥4-6)።

2. መንፈሳዊ የጸጋ ስጦታዎች እንደ እግዚአብሔር ፍቃድ እንጂ እንደ መንፈሳዊ ዕድገት ልክ የሚሰጥ አይደለም (1 ቆሮንቶስ 12፥11፣ 1 ቆሮንቶስ 4፥7)።

3. እያንዳንዱ አማኝ የመንፈስ ቅዱስ ስጦታ ተሰጥቶታል (1 ቆሮንቶስ 12፥7)።

4. ከእያንዳንዱ አማኝ የተወሰነ ስጦታ መጠበቅ አይቻልም (1 ቆሮንቶስ 12፥8-11፣ 14-30)።

5. ስጦታዎች ሁልጊዜ ጥቅም ላይ መዋል ያለባቸው ሌሎችን ለማገልገል ነው፤ በዚህም እግዚአብሔር እንዲከብር ነው (1 ቆሮንቶስ 12፥21-22፣ 25፤ 1 ጴጥሮስ 4፥10-11)።

በልሳን መናገርን አስመልክቶ በሁሉም ክርስቲያኖች ዘንድ ወጥ አቋም የለም። አንዳንድ ክርስቲያኖች ሁሉም አማኝ መንፈስ ቅዱስን ሲቀበል በልሳን መናገር ይችላል ብለው ያምናሉ።

ሌሎች ደግሞ በልሳን የመናገር ስጦታ በሌላ ቋንቋ ለሚናገሩ ሰዎች መልዕክት ለመናገር እንደተሰጠ ያምናሉ። ይህንንም የሚያምኑት በሐዋ ሥራ 2፥6 ላይ በበዓለ ሃምሳ ቀን ከተለያየ ቦታ የመጡ የልዩ ልዩ ቋንቋ ተናጋሪ ሰዎች በልሳን የተናገሩ ሰዎችን መረዳት ስለቻሉ ነበር። እግዚአብሔር በልሳን መናገርን ጨምሮ የተለያዩ ስጦታዎችን እንደወደደ እንደሚሰጥም ያምናሉ (1 ቆሮንቶስ 12፥4-11)። ሁሉም ሰው ሊኖረው የሚገባ አንድ ስጦታ እንዳለ አይቀበሉም (1 ቆሮንቶስ 12፥29-30)፤ በዚህም ምክንያት ሁሉም አማኝ መንፈስ ቅዱስ በውስጡ ቢኖርም (ሮሜ 8፥9) ስጦታው መኖሩ ስለአማኙ መንፈሳዊነት ምንም አይናገርም (1 ቆሮንቶስ 14፥22)።

በአንዳንድ አገልግሎቶች ውስጥ በአማኞች ዘንድ የተለያየ አመለካከት መኖሩ በአንድነት ለማገልገል እንቅፋት ሊሆን ይችላል። ነገር ግን አማኞች አንዳቸው ሌላቸው ላይ በዚህ የአመለካከት ልዩነት ምክንያት ሊፈርዱ አይገባም።

ከእግዚአብሔር ጋር ህብረት ካለን ከመንፈስ ቅዱስ ጋርም ህብረት እያደረግን ነው። ከአንዱ የሥላሴ አካል ጋር ህብረት እያደረጉ ከሌላው ጋር አለማድረግ አይቻልም (ኤፌሶን 2፥18፤ ዮሐንስ 6፥44ን አንብብ)።

አንድ ሰው እንዲድን ትምህርተ-መንፈስ ቅዱስን መረዳት አይጠበቅበትም። ደቀ መዛሙርቱ ስለመንፈስ ቅዱስ ብዙም ሳይረዱ መንፈስ ቅዱስን እንደሚያውቁትና እርሱም ከእነርሱ ጋር እንደሆነ እየሱስ ነግሯቸው ነበር (ዮሐንስ 14፥17ን አንብብ)።

መንፈስ ቅዱስን በትክክለኛው መንገድ መረዳት ከእርሱ ጋር በትክክለኛ መንገድ ህብረት እንድናደርግ እና እርሱም በህይወታችን የበለጠ እንዲሰራ ያደርጋል። እርሱ ስብዕና እንዳለው መረዳታችን ከእርሱ ጋር ህብረት ማድረግ እንድንችል ያደርገናል። እኛ እናወራዋለን፤ እርሱም ይመልስልናል። በጆሮ የምናደምጠው ዓይነት ድምጽ ባያሰማንም የእግዚአብሔርን ፍቃድ እና ፍቅሩን ያስረዳናል። የእግዚአብሔርን ፍቃድ ለማድረግ ከወሰንን እኛ ባናስተውለው እንኳን እእሱ ይመራናል።

ማንነት ያለው አካል መሆኑን ማወቅ ዝም ብሎ ኃይል ብቻ ወይም ደግሞ ስሜት ብቻ አለመሆኑን ያስረዳናል። እግዚአብሔርን ስናመልከው ማንነቱንም እያሰብን ነው እንጂ ያለማስተዋል የሆነ ከንቱ ስሜት ውስጥ እየገባን አይደለም። ስንፀልይም ትርጉም ባላቸው ቃላት ሲሆን ፈቃዱንም ለመረዳት ጥረት እናደርጋለን እንጂ በሌሎች ሃይማኖቶች እንደሚታየው ትርጉም የማይሰጡ ወይም አስማታዊ የሆኑ ቃላትን አንደግምም።

መንፈስ ቅዱስ እግዚአብሔር እንደሆነ ማወቃችን እርሱን በአክብሮት እንድናመልከው ያደርገናል። ስንፀልይ እና በህይወታችን መሪነቱን ስናስተውል፤ የሚወደን አምላክ፣ ሁለንተናችንን የሚያውቅ፣ ነጋችንንም የሚያውቅ እንደሆነ ልናስተውል ይገባል። እርሱ ልንታዘዘው የሚገባ ባለሙሉ ስልጣንም ነው።

እርሱ ሁልጊዜም ከእኛ ጋር ነው። መጽሐፍ ቅዱስ በመንፈስ ቅዱስ ልንሞላ እና በእርሱም ልንመላለስ እንደሚገባ ይነግረናል (ገላትያ 5፥25)። ቤተክርስቲያን ስንመጣ ብቻ ሳይሆን ሁልጊዜም በእርሱ መገኘት ውስጥ እንዳለን እያስተዋልን መኖር አለብን። ከእኛ ጋር ያለ ብቻ ሳይሆን በእኛ ውስጥ የሚኖርም ነው። ስለዚህም ቅዱስ እና ንፁህ የሆነ ኑሮ ልንኖር ይገባል። (1 ቆሮንቶስ 6፥19 ይነበብ)።

የመንፈስ ቅዱስ ቀዳሚ ትኩረት ለምናምን ለእኛ በኃጢአት ላይ ድል መስጠት እና ልባችንን ማጥራት መሆኑን ማስተዋል አለብን (ሮሜ 8፥13፣ ገላትያ 5፥16፣ ሐዋርያት ሥራ 15፥8-9)። ዋና ትኩረቱን ሳናስቀድም ስለሌሎች ነገሮች ልንፀልይ አይገባንም። በፍጹም ሊቀድሰን እንደሚችል አምነን በእምነት እንፀልይ። (1 ተሰሎንቄ 5፥23ን አንብብ)።

በህይወት ውጣ ውረዶች ውስጥ የምናልፍበትን የውስጥ ጥንካሬ ይሰጠናል (ኤፌሶን 3፥16)። እኛን እና ያለንበትን ሁኔታ ይረዳል፤ የሚያስፈልገንንም ይሰጠናል።

በአገልግሎታችን ውስጥ ምሪት ለመቀበል፣ ቃሉን በኃይል ለመናገር እና በሰዎች ልብ ውስጥ መንፈሳዊ ውጤትን ለማምጣት በመንፈስ ቅዱስ ላይ መደገፍ አለብን። በሐዋርያት ሥራ መጽሐፍ ውስጥ ይህንን በሰፊው እናያለን። የትኛውም የሰው ችሎታ መንፈስ ቅዱስን ሊተካው አይችልም።

በመንፈስ የተሞላን እንኳን ብንሆን በየዕለቱ ከእርሱ ጋር ህብረት ማድረግ አለብን። በመንፈስ ተመሉ የሚለው ትዕዛዝ ሁልጊዜ የምናደርገው ነገር ነው። ያለማቋረጥ በመንፈስ ልንሞላ ይገባናል፤ ይህም ከእርሱ ጋር ባለን ህብረት ውስጥ የሚከናወን ነው (ኤፌሶን 5፥18 ይነበብ)።

► የእምነት መግለጫውን ቢያንስ ሁለት ግዜ አብራችሁ አንብቡ።

መንፈስ ቅዱስ ከአብ እና ከወልድ ጋር የሥላሴ አካል ነው። ስለኃጢአት ይወቅሳል፣ በእያንዳንድ አማኝ ውስጥ በመኖር ያድሳል፣ በኃጢአት ላይ ድልን ይሰጣል እንዲሁም ልብን ያነፃል። በመንፈስ ፍሬ እና ለአገልግሎት የሚሆንን መንፈሳዊ ስጦታ ለቤተክርስቲያን የሚሰጥ፣ የቤተክርስቲያንም የአንድነት መሰረት መንፈስ ቅዱስ ነው።

ለክፍሉ መሪ ማስታወሻ- ከዚህ በታች ያለው ክፍል የግድ መጠናት የለበትም። ተማሪዎች ከፈለጉ ግን እንደተጨማሪ ማብራሪያ መጠቀም ይቻላል።

አንዳንድ ሰዎች መንፈስ ቅዱስን ከኤሌክትሪክ ወይም ከመሬት ስበት ኃይል ጋር በማመሳሰል ስብዕናውን አይቀበሉም። ነገር ግን ስብዕና የሌለውን አካል መጽሐፍ ቅዱስ ስለመንፈስ ቅዱስ በሚያወራበት መንገድ መግለጽ ከባድ ነው። ኤሌክትሪክ አያወራም ማመዛዘንም አይችልም፤ የመሬት ስበትንም መዋሸት አይቻልም። እውቀት የሌለው ኃይል የእግዚአብሔርን ፈቃድ ሊረዳ አይችልም።

አንዳንድ ሰዎች እነዚህ የመጽሐፍ ቅዱስ ምንባባት በሰውኛ ዘይቤ ስብዕና ለሌለው አካል የተገለጸ እንጂ ስብዕና ስላለው አካል የተጻፈ አይደለም ይላሉ። ሆኖም ግን መጽሐፍ ቅዱስ ስለመንፈስ ቅዱስ ሲያወራ የራሱ ማንነት እንዳለው አካል ሲሆን ሰዎችም እንደዚያው ሲመልሱለት እናያለን። በአንዳንድ ስፍራዎች መንፈስ ቅዱስ እንደግዑዝ አካል ተጠርቷል፤ ለምሳሌ በሐዋርያት ሥራ 2፥17 ውስጥ መንፈስ ቅዱስ ይፈሳል በማለት ተገልጿል። መጽሐፍ ቅዱስ ብዙውን ጊዜ ስለ መንፈስ ቅዱስ የሚናገረው እንደ አካል በመሆኑ ይህ ምሳሌዓዊ ዘይቤ መሆኑን ማስተዋል ያስፈልጋል።

ስለመንፈስ ቅዱስ ስብዕና መጽሐፍ ቅዱሳዊ ማስረጃዎች:-

• በ ማቴዎስ 28፥19 በአብ፥ በወልድ እና በመንፈስ ቅዱስ ስም እንድናጠምቅ ታዘናል፤ ይህም ሦስቱም ስልጣን እንዳላቸው ያመለክታል።

• 2 ቆሮንቶስ 13፥14 ከመንፈስ ቅዱስ ጋር ህብረት ስለማድረግ ይጠቅሳል፤ ይህም ትርጉም ያለው ትባቦትን የሚጠይቅ ነው።

• በ ማርቆስ 13፥11 በስደት ጊዜ መንፈስ ቅዱስ ለአማኞች መናገር እንደሚገባቸው እንዲናገሩ አቅም እንደሚሰጣቸው ተስፋ ተሰጥቷል።

• በዮሐንስ 14፥17፣ 26 መንፈስ ቅዱስ እውነትን ስለሚያስተምርና ስለሚያስታውስ የእውነት መንፈስ ተብሏል።

• በዮሐንስ 16፥7-11 መንፈስ ቅዱስ ዓለምን ስለኃጢአት፣ ስለጽድቅ እና ስለፍርድ ይወቅሳል፤ ይህ ትርጉም ያለው መግባባትን የሚጠይቅ ነው።

• ዮሐንስ 16፥13-15 እንደሚነግረን መንፈስ ቅዱስ የክርስቶስ የሆነውን እንጂ ከራሱ አይናገርም።

• በ1 ቆሮንቶስ 12፥11 መሰረት መንፈስ ቅዱስ የጸጋ ስጦታዎች እንዴት መሰጠት እንዳለባቸው ይወስናል።

• የእግዚአብሔር ልጆች መሆናችንን ለመንፈሳችን ይመሰክርልናል (ሮሜ 8፥16)።

• ስለእኛ በአብ ፊት ይማልዳል፤ ይህም የእግዚአብሔር አብን ፍቃድ ለመረዳት እንደሚችል ያሳያል (ሮሜ 8፥26-27)።

• በኤፌሶን 4፥30 መሰረት ሊያዝን ይችላል፤ ይህም የሚረዳ እና ስሜት ያለው መሆኑን ይነግረናል።

• ሊዋሽ ይችላል፤ ይህም ማለት ንግግራችንን እና ሃሳባችንን ይረዳል (ሐዋርያት ሥራ 5፥3)።

• ይናገራል፣ አቅጣጫ ያሳያል፤ እንዲሁም ልናከብረው የሚገባ ጽቃድ አለው (ሐዋርያት ሥራ 13፥2-4)።

• ሐዋርያትን በሚሽነሪ ጉዟቸው ውስጥ ይመራቸው ነበር፤ አንዳንድ ጊዜም ለመሄድ ያሰቡበት ቦታ እንዳይሄዱ ይከለክላቸው ነበር (ሐዋርያት ሥራ 16፥6)።

(1) የመጽሐፍ ቅዱስ ክፍል የቤት ስራ፦ ከታች ከተዘረዘሩት ዘርፎች መካከል እያንዳንዱን ተማሪ አንድ ይመደብ። ከሚቀጥለው ክፍለ ግዜ በፊት ክፍሉን አንብባችሁ በትምህርቱ ውስጥ ካለው ሃሳብ ላይ ምን እንደሚናገር በአንድ አንቀፅ ፃፉ።

• ሐዋርያት ሥራ 1፥4-8

• ሮሜ 8፥1-14

• 1 ቆሮንቶስ 2፥9-16

• 1 ቆሮንቶስ 12፥1-13

• ገላትያ 5፥22-26

(2) ፈተና፦ የሚቀጥለው ክፍለ ግዜ የምትጀምሩት በትምህርት 10 ፈተና ነው። ለፈተና ዝግጅት እንዲሆን የፈተና ጥያቄዎችን አጥኑ።

(3) የማስተማር የቤት ስራ፦ ከክፍል ውጪ የማስተማርያ ግዜን ቀጠሮ መያዝ እና ማስተማራችሁን ሪፖርት ማድረግ አስታውሱ።

(1) የመጀመርያዋ ቤተ-ክርስቲያን ለመንፈስ ቅዱስ የነበራት ምላሽ ሦስት ባህሪያት ዘርዝሩ?

(2) መንፈስ ቅዱስ ዕላዌ እንደሆነ በምን እናውቃለን?

(3) መንፈስ ቅዱስ መለኮት እግዚአብሔር እንደሆነ የምናውቅበትን አምስት መንገድ ዘርዝሩ።

(4) ዘጠኝ የመንፈስ ቅዱስ ስራዎችን ዘርዝሩ።

(5) የመንፈስ ቅዱስ በሕይወታችን በዋናነት ቅድሚያ የሚሰጠው ስራው ምንድን ነው?