Lesson 5: Ang Sermon sa Bundok ng Olibo

Sa panahon ng ministeryo ni Hesus, maraming bagay ang hindi maunawaan ng kanyang mga disipulo. Hindi nila naunawaan ang tungkol sa kanyang darating na kamatayan at muling pagkabuhay. Maging pagkatapos ng muling pagkabuhay ni Hesus, hindi nila naunawaan ang plano ng Diyos para sa Israel o kung paano magiging kumpleto ang kaharian ng Diyos.

[1]Pagkatapos ng muling pagkabuhay, tinanong ng mga disipulo si Hesus kung agad niyang ibabalik ang kaharian ng Israel. Ipinapakita ng tanong na hindi pa nila naiintindihan ang plano ng Diyos para sa iglesya at sa kaharian. Hindi sinikap ni Hesus na ipaliwanag ang lahat sa kanyang mga disipulo, subali’t sinabi niya sa kanila na hindi pa ipinasiya ng Diyos na ipahayag sa kanila ang takdang panahon kung kailan mangyayari ang mga bagay (Mga Gawa 1:7).

► Paano ipinakita ng tanong ng mga disipulo na hindi nila naiintindihan ang plano ng Diyos para sa iglesya at sa kanyang kaharian?

Nagturo si Hesus tungkol sa mga huling araw. Kailangang maunawaan ng mga disipulo ang ilang mga bagay. Katulad nito, sinabi ni apostol Pablo na ang mga mananampalataya ay wala na sa kadiliman at hindi na magugulat sa pagbabalik ng Panginoon (1 Tesalonica 5:4).

Ang Sermon sa Bundok ng Olibo ay nasa tatlong sipi sa mga ebanghelyo: Mateo 24-25, Marcos 13, at Lucas 21. Ito ang pinakamahabang sipi sa mga katuruan ni Hesus tungkol sa mga huling araw. Halos magkakatulad ang mga sipi, subali’t hindi nagtataglay ng lahat ng pare-parehong detalye.

Sa siping ito, inilarawan ni Hesus ang mga pagkakasunod-sunod ng mga pangyayari. Gumamit siya ng mga salitang tulad ng pagkatapos at pagkaraan nito. Ang siping ito ay nagbibigay sa atin ng mas maraming pangyayari sa mga huling araw ayon sa pagkakasunod-sunod nito kaysa alinmang ibang sipi sa Banal na Kasulatan.

Sa Mateo, ang pagkakasunod-sunod ng mga serye ng pangyayari ay nagtatapos sa 24:31. Sa ibang bahagi ng kabanata 24 at 25, nagbigay si Hesus ng ilang kwento kung saan ang bawat isa (1) ay naglalarawan ng isang katotohanan tungkol sa mga huling araw at (2) sinasabi sa atin kung paano tayo dapat mamuhay dahil sa katotohanang iyon. Ang mensaheng ito mula kay Hesus ay nagbibigay sa atin ng perpektong halimbawa ng paglalapat ng eschatology sa praktikal na pamumuhay.

► Para sa bawat isa sa mga seksiyon ng Sermon sa Bundok ng Olibo, dapat basahin ng isang mag-aaral ang talata mula sa isa sa mga ebanghelyo para sa grupo.

Ang Tanong

► Basahin ang isang mag -aaral ang isa sa mga sumusunod para sa klase: Mateo 24:1-3, Marcos 13:1-4, Lucas 21:5-7

Sinabi ni Hesus sa mga disipulo na ang templo ay mawawasak. Ang prediksyong ito ay naging dahilan upang mag-isip sila ng maraming tanong tungkol sa hinaharap. Nagtanong sila tungkol sa oras ng pagwasak sa templo, ang pagbabalik ni Hesus, at ang wakas ng mundo. Bago ito ay inihula na ni Hesus ang pagkawasak ng Jerusalem (Mateo 23:37-38).

Nalalaman ng mga disipulo na ang pagkawasak ng Jerusalem at ng templo ay mangangahulugan ng katapusan ng lahat ng bagay na tila normal para sa kanila. Ito ang magiging katapusan ng isang panahon, at ang simula ng isang naiibang mundo. Marahil inisip nila na ang pagbabalik ni Hesus ay sa parehong oras, at ang kaharian ng Diyos ay matutupad sa sandaling iyon.

Ang Panahon ng Kapighatian o ang Tribulation

► Basahin ang isang mag -aaral ang isa sa mga sumusunod para sa klase: Mateo 24:4-14, Marcos 13:5-13, Lucas 21:8-19

Ang mga katangian ng panahon ng kapighatian ay mga bulaang kristo, digmaan, lahat ng uri ng paghihirap, mga lindol, at pag-uusig. Aabot ang ebanghelyo sa lahat ng parte ng mundo bago dumating ang wakas.

► Ano ang kahalagahan ng pangungusap tungkol sa taong “nagtitiis hanggang sa wakas”?

Sinabi ni Hesus sa kanyang mga disipulo na dapat silang magtiis at manatili sa kanilang pananampalataya. Ang taong hindi nawawalan ng kanyang pananampalataya ay maliligtas.

► Basahin ang isang mag -aaral ang isa sa mga sumusunod para sa klase: Mateo 24:15-22, Marcos 13:14-20, Lucas 21:20-24

Kabilang sa mga aspeto ng pangyayaring ito ay ang paglalagay ng kasuklam-suklam sa templo, ang pagwasak sa Jerusalem ng mga hukbo, at ang simula ng pinakamatinding paghihirap.

Tinukoy ni Hesus ang propesiya ni Daniel (Daniel 9:27, 12:11). Maraming detalye sa propesiya ni Daniel ang natupad ng Griegong hari na si Antiochus, na naglagay ng isang dios-diosan sa templo (168 B.C.) at nagkaroon ng pakikipagdigma sa mga Judio. Nabuhay siya nang matagal pa bago isilang si Hesus, subali’t sinabi ni Hesus na ang katuparan ng propesiyang iyon ay sa hinaharap pa.

May mga iskolar na naniniwala na ang prediksiyon ay natupad sa pagkawasak ng Jerusalem noong A.D.70. Nawasak ang templo at ang mga bricks ay pinaghiwa-hiwalay pa. Libo-libong Judio ang nagdusa at namatay. Pagkatapos ng isang sumunod na digmaan, ang Jerusalem ay nawasak bilang isang lunsod, at hindi na umiral ang Israel bilang isang bansa sa loob ng maraming siglo. May mga iskolar na naniniwala na ito ang simula ng mga “panahon ng mga Gentil.”

Ang anghel na nagsalita kay Propeta Daniel ay nagsabi sa kanya na ang mga propesiya ay may selyo hanggang sa katapusan pa ng panahon (12:4,9). Kabilang sa Kabanata 12 ang mga reperensiya patungkol sa pinakamatinding kaguluhan, at pagliligtas sa mga “nakasulat sa aklat”, muling pagkabuhay ng mga patay, ang matalinong pagniningning tulad ng mga bituin magpasawalang hanggan, at ang kasuklam-suklam na pansamantalang inilagay sa templo. Ang mga reperensiyang ito ay tila tumutukoy sa mga huling araw, hindi mga pangyayaring natupad na sa kasaysayan.

Tila mayroon pang ultimong katuparan ng talatang ito na magaganap pa sa hinaharap dahil ang talata ay nagtatapos sa pagbabalik ni Hesus at sa pagtipon ng mga anghel sa mga mananampalataya. Ang ilang iskolar ay naniniwala na ang ultimong katuparan ng prediksiyon ng kasuklam-suklam ay gagawin ng anticristo sa mga huling araw.

Mga Bulaang kristo

[1]► Basahin ang isang mag -aaral ang isa sa mga sumusunod para sa klase: Mateo 24:23-26, Marcos 13:21-23

Binigyang babala ni Hesus ang kanyang mga disipulo na hindi sila dapat maniwala sa mga sikretong kristo. Aangkinin ng mga tao na dumating na si Kristo at ilan lamang ang nakakaalam. Dapat tandaan ng mga Kristiyano na hindi magiging sikreto ang pagdating ni Kristo, dahil sinabi niyang siya’y darating nang lantaran sa himpapawid kasama ng mga anghel.

Prinsipyo sa Pagbibigay Kahulugan sa Biblia

Dapat tayong maging mapagbantay sa mga puntos na ginagawa sa pamamagitan ng paghahambing at pagkakaiba-iba. Sa talatang ito ay ang pagkakaiba sa pagitan ng huwad na kristo na unti-unting nakikilala at ni Hesus na darating nang lubusang nakikita ng mundo. Dahil sa pagkakaiba, alam natin na ang pagbalik ni Hesus ay hindi makakatulad ng mga tagapanguna ng relihiyon na unti-unti nakakaakit ng mga tagasunod.

► Ano ang layunin ng babala ni Hesus tungkol sa isang sikretong Kristo?

Ang Pagbabalik ni Kristo at ang Pagtitipon ng mga Mananampalataya

► Basahin ang isang mag -aaral ang isa sa mga sumusunod para sa klase: Mateo 24:27-31, Marcos 13:24-27, Lucas 21:25-28

Si Hesus ay darating sa dulo ng kapighatian na inilarawan sa talata na ito. Ang pagbabalik ni Hesus ay makikita ng buong mundo. Ang araw, buwan at mga bituin ay magdidilim, na isang tanda na madalas na iniuugnay ng Biblia sa araw ng Panginoon.[2] Titipunin ng mga anghel ang mga mananampalataya mula sa lahat ng dako sa mundo.

Ang Ilustrasyon ng Puno ng Igos

► Basahin ang isang mag -aaral ang isa sa mga sumusunod para sa klase: Mateo 24:32-35, Marcos 13:28-31, Lucas 21:29-33

Sinabi ni Hesus na kapag nagsimula na ang mga pangyayaring ito, ang haba ng panahon ay hindi magtatagal para maganap ang lahat ng ito. Ang puno ng igos ang naglalarawan sa katotohanang ito, dahil ang mga dahon ay isang tanda na malapit nang dumating ang tag-araw.

May ilang iskolar na naniniwala na ang puno ng igos ay kumakatawan sa Israel (gayundin sa Lucas 13:6-9 at Marcos 11:12-14, 20). Naniniwala sila na ang pagtubo ng puno ng igos ay sumisimbolo sa pagpapanumbalik sa bansang Israel noong 1948. Naniniwala sila na ang mga pangyayari sa Sermon sa Bundok ng Olibo ay matutupad bago mamatay ang lahat ng nabubuhay noong 1948.

Ang isang mas simpleng pagbibigay kahulugan ay kung paanong ang mga dahon ng igos ay nagpapakita na padating na ang tag-araw, ang mga unang pangyayari sa talatang ito ay nagpapakita na ang lahat ng iba pa ay malapit nang maganap. Ang mga salita ni Hesus na, “Kapag nakita ninyo na nagaganap na ang mga bagay na ito,” ay hindi nangangahulugan na siya’y nagsasalita tungkol sa isang espesipikong pangyayari lamang.

Masidhing Paghikayat sa Maingat na Pamumuhay

► Dapat basahin ng mga mag -aaral ang lahat ng tatlong mga talatang ito para sa klase: Mateo 24:36-51, Marcos 13:32-37, Lucas 21:34-36

Ang talatang ito ay ang konklusyon ng mensahe ni Hesus tungkol sa mga huling araw. Sinabi niya sa kanyang mga disipulo kung paano sila dapat mamuhay dahil sa mga prediksiyon sa hinaharap. Ito ay isang modelo para sa pagsasabuhay ng mga huling araw. Hindi tayo dapat mamuhay kailanman nang taliwas sa kanyang mga sinabi.

Sinabi ni Hesus sa kanyang mga alagad na dapat nilang laging alalahanin na siya ay babalik, at ang katotohanang iyon ang dapat gumabay sa kanilang mga buhay. Binigyang babala niya sila na huwag sumunod sa paraan ng pamumuhay ng mga nasa sanlibutan na namumuhay nang tila ba hindi kailanman magkakaroon ng paghatol.

Hindi niya sinabi sa kanila na pagmasdan ang kanyang pagbabalik, kundi magbantay sa aspetong espirituwal upang sila ay maging handa sa kanyang pagbabalik. Hindi niya sinabi na maaari siyang dumating anumang oras, kundi hindi nila maaaring malaman ang oras at siya ay biglang darating.

Marami nang henerasyon ang lumipas mula nang sabihin ni Hesus ang mga salitang iyon. Naging handa ang mga mananampalataya para sa kanyang pagbabalik, subali’t hindi siya bumalik bago sila namatay. Gayunman, ang maingat na pamumuhay ay ang tamang paraan upang mamuhay dahil balang araw, tayong lahat ay tatayo sa harap ng Diyos, at hindi natin nalalaman kung kailan tayo mamamatay.

Dapat tayong mamuhay na tila ba sa araw na ito darating si Hesus. Hindi ito nangangahulugan na hindi tayo dapat gumawa ng mga pangmatagalang plano o gumawa ng mga proyektong nangangailangan ng mahabang panahon upang matapos. Nangangahulugan ito na dapat tayong maging matapat araw-araw upang hindi tayo mapahiya kung siya ay biglang bumalik.

Prinsipyo ng Pagbibigay Kahulugan sa Biblia

Kapag ang isang talata ng Kasulatan ay nagbibigay ng kuwento o prediksiyon, hanapin ang sariling aplikasyon ng sumulat nito bago lumikha ng inyong sarili. Kung minsan ang talata ay hindi gumagawa ng aplikasyon sa konklusyon, subali’t kung mayroon, sinasabi sa atin ng aplikasyong iyon ang layunin ng talata. Madalas ang aplikasyon ay nagsisimula sa salitang samakatuwid, o dahil dito.

► Ano ang ilan sa mga katangian ng isang taong namumuhay na tila kanyang naaalala na si Hesus ay babalik? Anong uri ng ugali ang iiwasan natin kung tayo ay nakahandang biglang harapin si Hesus?

Mateo 25

Sa aklat ni Mateo, tila itinutuloy ng kabanata 25 ang sermon sa bundok ng olibo nang higit sa mga isinama sa iba pang mga ebanghelyo. Ang kabanatang ito ay naglalaman ng mas kaunting detalye ng prediksiyon at nakatuon sa praktikal na mga aplikasyon.

Sa Mateo 25 tatlong kwento ang ipinahayag ni Hesus.

Note sa tagapanguna sa klase: Bilang isang hindi sapilitang gawain sa klase, ang klase ay maaaring hati-hatiin sa tatlong grupo. Isang kwento mula sa Mateo 25 ang maaaring itakda sa bawat grupo para sa talakayan, pagkatapos, isang miyembro mula sa bawat grupo ay maaaring magbigay sa klase ng ilang aplikasyon ng kwento.

Ang kwento ng “Ang Sampung Birhen” (1-13) ay nagbababala sa mga disipulo upang maging handa para sa pagbabalik ni Hesus. Hindi sila dapat maging pabaya dahil ang kanyang pagdating ay hindi agad-agad tulad ng kanilang inaasahan. Sa kwento, ang ilang dalaga ay nagdala ng sobrang langis, nagpaplano upang makatagal sa matagal na paghihintay. Ang iba ay hindi naghanda ng sobrang langis, hindi nakapaghintay, at wala roon upang salubungin ang ikakasal na lalaki nang ito ay dumating. Kaya hindi sila nakasama.

Ang kwento ng “Mga Talento” (14-30) ay nagsasabi sa mga disipulo na gamitin ang mga ipinagkaloob na kakayanan para sa Diyos. Ang mga talento ay mga halaga ng pera. Ang pagkakamali ng lingkod na may isang talento ay ang kanyang pag-iisip na wala siyang maraming matutupad, kung kaya’t wala siyang ginawa.

Ang “Tagpo sa Paghuhukom” (31-46) ay naglalarawan sa mga taong hinahatulan o binibigyan ng gantimpala batay sa kanilang pagtugon sa mga pangangailangan ng iba.

Katuparan sa Nakaraan o sa Hinaharap?

Hindi nagkakasundo ang mga iskolar ng Biblia tungkol sa oras o panahon ng katuparan ng mga propesiya sa Sermon sa Bundok ng Olibo.

May mga iskolar na naniniwala na ang talatang ito ay lubusan nang natupad noong A.D.70 nang mawasak ang Jerusalem. Kung minsan ito’y tinatawag na pananaw na “Pleterist”. Nagtanong ang mga disipulo tungkol sa pagkawasak ng templo, na naganap noong A.D.70. Ang paghihirap at kamatayan ng mga Judio sa panahong iyon ay maaaring ilarawan bilang ang pinakamahirap na kapighatian sa lahat ng panahon, tulad ng sinabi ni Hesus sa verse 21.

Nagbigay ng ilang kadahilanan ang mga iskolar na naniniwala na ang Sermon sa Bundok ng Olibo ay naglalarawan sa mga huling araw:

(1) Nagtanong ang mga disipulo tungkol sa pagdating ni Hesus.

(2) Sinabi ni Hesus na ang ebanghelyo ay ipapangaral sa lahat ng mga bansa bago ang katapusan, na hindi pa nangyayari bago ang A.D.70.

(3) Ipinahayag ni Hesus ang isang kasuklam-suklam na nasa banal na dako (sinasabi ng mga preterist na ito ay tumutukoy sa mga hukbo ng Roma).

(4) Magdidilim ang araw, ang buwan at ang mga bituin. (Sinasabi ng mga preterist na ito ay kumakatawan sa mga tao na may mataas na posisyon).

(5) Ang Anak ng Tao ay lilitaw sa himpapawid taliwas sa mga huwad, sikretong mga kristo (Sinasabi ng mga preterist na ang mapanirang hukbo ng Roma ay kumakatawan kay Hesus).

(6) Ang mga anghel ay isusugo ng isang trumpeta upang tipunin ang mga pinili mula sa lahat ng sulok ng mundo, na tila katulad sa 1 Corinto 15:52.

Ang Mateo 24:30 ay tila tunay na nangungusap tungkol sa pagbabalik ni Hesus dahil ang mga talata 23-27 ay nagbibigay babala sa mga disipulo na huwag maniwala sa isang lihim na pagdating, pagkatapos ang talata 30 ay nagsasabing siya ay darating na lantarang makikita ng mundo.

May mga iskolar na naniniwala na ang mga pangyayari noong A.D.70 ay maaaring isang bahagi, pasimulang katuparan, subali’t mayroon pa sa hinaharap na lubusang katuparan. Ayon sa mga iskolar na ito, ang ultimong katuparan ng Sermon sa Bundok ng Olibo ay sa mga huling araw. Ang mga pangyayari ay magtatapos sa pagbabalik ni Hesus. Ayon sa ilang matatandang historyador, ang mga Kristiyano ay tumakas mula sa lunsod sa Jerusalem dahil naalala nila ang babala ni Hesus at hindi sila naghirap sa teribleng kapighatian na naganap sa panahong iyon. (Lucas 21:20-21). Gayunman, hindi lahat ng prediksyon ay natupad sa panahong iyon.

Note sa tagapanguna sa klase: Hayaang talakayin ng grupo ang iba’t-ibang pananaw na ito bago magpatuloy.

Nagbigay si Hesus ng iba pang mga pahayag tungkol sa mga huling araw bukod sa Sermon sa Bundok ng Olibo. Ang mga ito ay inilalarawan sa ibaba.

Note sa tagapanguna sa klase: Maaari kang pumili ng ilan sa mga talatang ito upang siyasatin at talakayin sa klase. Ang isa pang pagpipilian ay ang itakda ang bawat talata nang mas maaga sa isang mag-aaral upang ipresenta para sa talakayan. Ang pagbibigay-kahulugan sa ilang mga talata ay mahirap, at hindi kinakailangang magkaroon ang klase ng tiyak na konklusyon tungkol sa mga ito.

• Ang mundo ay tulad ng isang bukid kung saan magkasamang tumutubo ang trigo at mga damo na pagbubukurin sa araw ng paghuhukom (Mateo 13, 37-43).

• Ang araw ng paghuhukom ay makakatulad sa isang lambat na may iba’t-ibang klase ng isda na pagbubukod-bukorin (Mateo 13:47-50).

• Sinabi ni Hesus na siya’y darating na may kaluwalhatian kasama ng mga anghel at ang ilan sa kanyang mga tagapakinig ay hindi mamamatay bago siya makitang dumarating sa kanyang kaharian (Mateo 16:27-28, Lucas 9:27).

• Sinabi ni Hesus na ang labindalawang apostol ang maghahari sa Israel (Mateo 19:28-30).

• Sinabi ni Hesus na makikita siya ng punong saserdote sa kanang kamay ng makapangyarihan, at bumabalik sa ulap nang may kaluwalhatian (Mateo 26:64, Marcos 14:62).

• Hahatulan ang mga lunsod dahil sa kanilang pagtanggi kay Kristo (Marcos 6:10-11, Lucas 10:12).

• Ang isang taong ikinakahiya si Kristo sa harap ng mga tao ay tatanggihan ni Kristo sa kanyang pagbabalik (Marcos 8:38, Lucas 9:26, Lucas 12:8-9).

• Sinabi ni Hesus na ang kanyang mga disipulo ay dapat maging matapat tulad ng mga alipin na matapat na naglilingkod sa kanilang amo habang hinihintay ang kanyang pagbabalik sa hindi nila nalalamang panahon (Lucas 12:35-48).

• Balang araw tatanggapin ng Jerusalem si Hesus (Lucas 13:34-35).

• Ang pagdating ni Hesus ay hindi magiging lihim, kundi nakikita sa buong mundo. Ang mundo ay mamumuhay sa walang-ingat na kasalanan katulad ng panahon nina Noah o Lot. May mga taong biglang kukunin at ang iba ay maiiwan (Lucas 17:22-37).

• Ang mga tao ay tatawag sa mga bundok upang bumagsak sa kanila at sila ay itago (Lucas 23:28-31 – ihambing sa Pahayag 6:14-17).

• Muling bubuhayin ni Hesus ang mga patay (Juan 5:25-29, 6:39-40, 44, 54).

• Umalis si Hesus upang maghanda ng isang lugar para sa kanyang mga alagad at siya’y babalik upang kunin sila (Juan 14:1-4).

(1) Takdang-Araling Isusulat: Maghanda ng isang leksiyon o sermon tungkol sa mga huling araw na itinuturo ni Hesus. Para sa leksiyon ito, ang layunin ay hindi ang ipaliwanag at ilarawan ang mga pangyayari sa hinaharap. Ipaliwanag ang binigyang diin ni Hesus na ang mga mananampalataya ay dapat maging laging handa sa espirituwal. Pumili ng mga talata na may mga salita ni Hesus na nagbibigay diin sa punto.

(2) Pag-aaral ng Talata: Tingnan muli ang Sermon sa Bundok ng Olibo at ipaliwanag kung ano ang sinasabi sa bawat isa sa mga ito: ang templo, ang ebanghelyo, ang kasuklam-suklam, ang kapighatian, ang puno ng igos at ang trumpeta.

(3) Takdang-araling Babasahin: Bago ang susunod na sesyon sa klase, maingat na basahin ang Daniel 1-6.