Maaari mong hilingan ang dalawa o tatlong mag-aaral upang ibahagi kung ano ang kanilang isinulat para sa takdang –aralin sa Leksiyon 3.

Sa leksiyong ito, maraming reperensiya sa Banal na Kasulatan ang ibinigay sa footnotes kung sakaling nais nila ng mga karagdagang pag-aaral. Dapat hanapin ng klase ang mga reperensiya na may Makapal na sulat sa leksiyon.

Ang mga talakayan tungkol sa propesiya ay madalas na nakatuon sa mga minor na katanungan sa halip na sa mga pangunahing katotohanan. Hindi lahat ng mga paksa ng propesiya ay magkakapantay ang kahalagahan.

May mga kinakailangang katotohanan sa Biblikal na propesiya. Nakakaapekto ang mga doktrinang ito sa pamumuhay Kristiyano at sa buong sistema ng doktrinang Kristiyano.

Ang mga sinaunang credo ng Kristiyano ay hindi sumubok na isama ang lahat ng doktrinang Kristiyano, kundi para lamang ipahayag ang mga doktrinang kinakailangan sa pananampalatayang Kristiyano. Hindi marami ang sinasabi ng mga ito tungkol sa mga huling araw, subali’t mahalaga ang kanilang mga pangungusap.

Ang Credo ng mga Apostol ay isinulat sa simula ng ikalawang siglo upang ipahayag ang mga kinakailangang doktrina ng mga apostol. Kasama sa credo ang pangungusap na ito tungkol kay Hesus: “Nakaupo [Siya] sa kanang kamay ng Diyos Amang Makapangyarihan; mula roon ay darating siya upang hatulan ang mga nabubuhay at ang mga patay.”

Itinatag ang Nicene Creed sa isang konseho ng mga iglesya noong A.D.325. Nilalayon ng konseho na ipahayag kung ano ang pinaniniwalaan ng lahat ng Kristiyano. Sinasabi ng credo tungkol kay Hesus, “[Siya] ay muling darating, nang may kaluwalhatian, upang hukuman kapwa ang nabubuhay at ang mga patay: ang kanyang kaharian ay walang hanggan.” Dagdag pa rito, “Tinatanaw ko ang muling pagkabuhay ng mga patay at ang buhay ng darating na daigdig.”

Sa leksiyong ito pag-aaralan natin ang maraming talata sa Banal na Kasulatan at maraming detalye ng eschatology, subali’t sa leksiyong ito bibigyang diin natin ang apat na mahahalagang katotohanan.

Ang mga katotohanang ito ay pundasyon ng eschatology.

• Ang Pisikal na Pagbalik ni Hesus

• Ang Muling Pagkabuhay ng Katawan ng Lahat ng Tao

• Ang Paghuhukom

• Ang Walang hanggang Kaharian ng Diyos

Babalik si Hesus nang nakikita sa mundong ito. Bagaman siya ay narito sa espiritu kasama ng mga mananampalataya sa mundo sa kasalukuyan, siya ay babalik sa kanyang niluwalhati, muling binuhay na anyo nang nakikita ng lahat sa daigdig (Pahayag 1:7).

► Ano ang ilan sa mga bagay na mangyayari sa pagbabalik ni Hesus?

Ang pagbabalik ni Kristo ang magiging kasukdulan ng kasaysayan ng daigdig. Ang mga kaharian sa mundo ay magiging mga kaharian ni Kristo. Ang mga naging matapat sa kanya ay gagantimpalaan at pararangalan. Ang mga nagrerebelde laban sa kanya ay ibabagsak, at magkakaroon siya ng kapangyarihang lulupig sa lahat ng pagsalungat (Mateo 26:64). Ang bawat tuhod ay yuyukod, at bawat dila ay magsasabi na si Hesus ang Panginoon.[1]

Ang mga Kristiyanong namatay na ay muling bubuhayin upang magharing kasama ni Kristo.[2] Sila at ang mga nabubuhay na mananampalataya ay aakyat upang salubungin ang Panginoon kapag siya ay lumitaw.[3]

Ang kanyang pagbabalik ang pinagpalang pag-asa ng lahat ng Kristiyano (Tito 2:13). Isipin ang lahat ng kahulugan ng kanyang pagbalik sa atin: ang katapusan ng pag-uusig, paghihirap at kalungkutan; muling pagtitipon kasama ng mga pinabanal at minamahal na Kristiyano; patunay na ang ating pananampalataya ay hindi nawalan ng kabuluhan; ang makita mismo si Hesus; at ang pagpasok sa langit at ang kalubusan ng buhay na walang hanggan kasama ng Diyos. Walang alinman sa mga bagay na ito ang nakadepende sa oras ng kaniyang pagbabalik, kundi doon lamang sa katotohanan na siya ay babalik tulad ng kanyang ipinangako.

Sinabi ni Hesus na siya’y babalik na may kapangyarihan at kaluwalhatian.[4] Ipinangako niyang siya’y darating at kukunin ang kanyang bayan upang manirahanng kasama niya.[5] Sinabi ng mga anghel na siya’y babalik sa parehong paraan nang siya’y umakyat sa langit.[6] Ipinangaral ng mga apostol ang pagsisisi habang hinihintay na bumalik si Kristo upang itatag ang ultimong plano ng Diyos para sa mundong ito (Mga Gawa 3:19-21). Isa sa pinakamadalas na iturong katotohanan sa Bagong Tipan: Si Hesus ay babalik sa mundong ito nang may kapangyarihan at kaluwalhatian.[7]

Bagaman may mga tanda na mauuna sa ikalawang pagparito, hindi natin malalaman nang eksakto kung kailan siya babalik. Mabuti para sa mga mananampalataya na laging asahan ang pagdating ni Hesus at mamuhay ayon dito. (Marcos 13:33-37).

► Bakit babalik si Hesus?

[8]Namumuhay tayo sa isang mundo kung saan karamihan sa mga tao ay nagrerebelde laban sa Diyos. Ang buong sanlibutan ay nagdurusa dahil sa sumpa ng kasalanan. Ang mundo ay hindi kailanman mapabubuti ng pagkilos na pampulitika, pagbabago sa lipunan, pinabubuting edukasyon o maunlad na ekonomiya. Ang pagbuti ng sannilikha ay hindi rin makikita ng unti-unti. Biglang darating si Hesus sa kanyang nilikha bilang ang nagbabalik na hari upang ituwid ito.

Ang lahat ng tao ay makasalanan, subali’t kung kusang-loob silang sasama sa kaharian ng Diyos ngayon, makaliligtas sila sa darating na paghatol. Kumikilos na ngayon ang kaharian ng Diyos sa mga nagsisi at nanampalataya.[9] Ang kahariang iyon ay lubusan at lantarang darating sa pagbabalik ni Hesus.

► Paano tayo dapat mamuhay dahil alam natin na babalik si Hesus?

Dapat nating tandaan ang mga prayoridad ng mga unang Kristiyano. Tinawag tayo upang panatilihin ang ating pananampalataya at “magtiis hanggang sa dulo.” Binigyan tayo ng babala na huwag nating hayaan na ang mga kasiyahan at mga bagay sa mundo ang maging dahilan upang malimutan natin ang pagdating.[10] Namumuhay tayo sang-ayon sa pangwalang-hanggang pinahahalagahan dahil ang mga bagay sa mundong ito ay lilipas. Sinabihan tayo na “magbantay,” hindi nakatanaw sa kalangitan sa kanyang paglitaw, kundi ang manatiling nakabantay sa espirituwal upang sa kanyang pagdating ay hindi niya tayo datnan na hindi handa.[11] Nananalangin tayo para sa kadalisayan at namumuhay ng malinis na pamumuhay dahil nais nating maging katulad niya.[12]

Ang mga nabubuhay sa kasalukuyan na tila ba hindi siya darating ay hindi magiging handa para sa kanyang pagbabalik.[13] Ang pagdating ni Hesus ay magiging katulad ng kidlat,[14] sobrang biglaan kaya’t walang sinumang magkakaroon ng pagkakataon na baguhin ang anuman pagkatapos ng kanyang pagpapakita.

Hinihintay natin ang kanyang pagdating (1) sa pamamagitan ng pagpapanatili ng prayoridad na pangwalang-hanggan, (2) pamumuhay nang may kadalisayan, at (3) espirituwal na pagbabantay sa ating sarili sa pamamagitan ng pananalangin.

Ang lahat ng tao ay pisikal na muling bubuhayin mula sa mga patay.

Alam natin na ang katawan ay may walang hanggang halaga dahil itinuturo ng Biblia ang mulig pagkabuhay ng lahat ng tao.

Kinakailangan ang doktrina ng muling pagkabuhay.[1] Ipinaliwanag ni apostol Pablo sa 1 Corinto 15 na kung itatanggi natin ang muling pagkabuhay itinatanggi rin natin ang ebanghelyo. Kung walang muling pagkabuhay, sagayun hindi rin muling nabuhay si Hesus.[2] Kung si Hesus ay hindi nabuhay mula sa mga patay, hindi totoo ang ebanghelyo, at walang sinuman ang tunay na naligtas.[3]

► Tingnan nang sama-sama ang 1 Corinto 15:19. Ano ang ibig sabihin ni Pablo nang sabihin niya na kung walang muling pagkabuhay ang mga mananampalataya ang pinakakahabag-habag na tao?

Ang lahat ng tao ay muling bubuhayin, subali’t hindi lahat ng tao nang sabay-sabay. Sa pagbabalik ni Hesus, kukunin niya sa alapaap ang lahat ng Kristiyano, bubuhaying muli ang mga nangamatay na.[4]

Ang mga namatay sa kanilang kasalanan ay hindi tatanggapin sa unang muling pagkabuhay. Sila ay bubuhayin sa mga susunod na panahon para sa paghuhukom.[5]

Ang mga Kristiyano ay bubuhayin na may niluwalhating katawan na katulad ni Hesus.[6] Ang mga makasalanan ay muling bubuhayin sa ibang anyo para sa walang-hanggang kaparusahan.[7]

► Kung hindi mo pinaniniwalaan na ang katawan ay muling bubuhayin, ano ang pagkakaibang magagawa nito sa iyo?

[8]Ang paniniwala na tayo ay muling bubuhayin sa darating na panahon ay nakakaapekto sa ating paraan ng pamumuhay. Makikita natin ang praktikal na epekto ng doktrina sa pamamagitan ng pagtingin sa mga halimbawa ng mga taong itinanggi ito. May ilang tao sa iglesya ng Corinto na tumatanggi na ang katawang lupa ay muling bubuhayin. Ang mga naniwala sa kamaliang ito ay nahati sa dalawang magkasalungat na posisyon. May nagsasabi, “Dahil ang katawan ay hindi muling bubuhayin, tanging ang espiritu ang mahalaga. Nangangahulugan ito na ang mga kasalanang nagawa natin sa katawan ay hindi seryoso. Maari nating gawin kahit ang pakikiapid, dahil ang katawan ay itatapon naman.”[9]

Ang iba naman ay ganito ang sinasabi, “Dahil ang katawan ay hindi naman muling bubuhayin, sagayun ito ay walang halaga at masama. Dapat nating supilin ang lahat ng pagnanasa ng katawan, hindi tayo kakain ng anumang masarap sa panlasa o masiyahan sa pag-aasawa.”

Ang dalawang pagkakamaling ito ay kapwa nagmula sa pagtanggi sa muling pagkabuhay. Ang doktrinang Kristiyano ng muling pagkabuhay ay naglalagay ng halaga sa katawan. Ang halaga ay ipinapakita dahil ang katawan ng Kristiyano ay tinubos, ito ang templo ng Banal na Espiritu, mga bahagi ni Kristo, at muling bubuhayin at luluwalhatiin (1 Corinto 6:14, 15, 19, 20).

Kinakailangan ang doktrina ng muling pagkabuhay dahil nangangahulugan ito na (1) si Hesus ay muling nabuhay mula sa mga patay,(2) ang lahat ng tao ay muling bubuhayin, (3) ang katawan ay may walang hanggang halaga, at (4) totoo ang ebanghelyo.

Ang bawat tao ay huhukuman ni Hesus.

► Sama-samang tingnan ang 2 Corinto 5:10-11. Ano ang sinasabi sa atin ng mga talata na ito tungkol sa hinaharap? Paano natin dapat gamitin sa pag-eebanghelyo ang katotohanan ng paghuhukom?

Ang paghuhukom ang tunay na wakas ng mga tao na ang pangalan ay hindi nakasulat sa Aklat ng Buhay. Hindi ito ang wakas ng kanilang pag-iral, subali’t ito ang wakas ng kanilang pagpili. Ang walang-hanggan na kasunod nito ay ang walang wakas na bunga ng mga pagpapasiya na hindi na kailanman maaaring baligtarin.

Ang paghuhukom ang nagbibigay ng kahalagahan sa ating mga pagpili nang lampas sa kanilang mga pangunahing resulta. May mga taong nag-iisip na hanggang kaya nilang kontrolin ang resulta ng kanilang mga kilos, wala silang dapat alalahanin pa. Gusto nilang paniwalaan na ang kanilang kasalanan ay hindi masama kung hindi ito nagdudulot ng kapahamakan. Sa katotohanan, nagdudulot ng kapahamakan ang lahat ng kasalanan; subali’t kahit hindi man ito makasama, ito ay seryoso dahil sa paghuhukom. Sinasabi ng Salita ng Diyos na ang mga tao ay hahatulan ayon sa kanilang mga ginawa. (2 Corinto 5:10, Roma 2:6-11).

Sa araw ng paghuhukom ang ilan ay ipapadala sa walang hanggang kaparusahan at ang iba ay sa walang hanggang gantimpala. Inilalarawan ng Kasulatan ang isang tagpo sa paghuhukom sa mga makasalanan na muling binuhay upang harapin ang paghatol sa kanilang makasalanang mga gawa.[1] May isa pang paghuhukom para sa mga Kristiyano, kung saan sila ay bibigyang gantimpala para sa mga gawang may pangmatagalang kabuluhan (1 Corinto 3:14-15).

Ang katotohanan na ang paghuhukom ay mangyayari ay nagsasabi sa atin na darating ang araw na magwawakas ang kasalanan. Mahirap isipin ang isang mundo na walang kasalanan, subali’t darating ang araw na magwawakas ang lahat ng pagrerebelde laban sa Diyos.

Hindi ninais ng Diyos na tayo ay mamuhay sa patuloy na pagkatakot at takot ang ating maging dahilan sa pamumuhay nang matuwid. Gayunman, ang pagsasaisip ng darating na paghatol ang magbibigay sa atin ng pakiramdam ng pananagutan na siyang gumagabay sa ating mga buhay.

Dapat nating malaman ang tungkol sa paghatol upang maunawaan (1) ang kaseryosohan ng kasalanan, (2) ang ating pananagutan sa Diyos, (3) ang kahalagahan ng ating mga pagpili, at (4) ang katapusan ng lahat ng kasalanan.

Pagkakamali na Dapat Iwasan: Nakatuon sa mga Bagay sa Sanlibutan

Mayroong tendensiya ang tao na mabuhay na tila ang buhay sa mundo ay magpapatuloy sa habang panahon. Sinisikap nating pabutihin ang ating mga kundisyon, at lutasin ang ating mga suliranin, at lumikha ng isang kapaligiran na magpapasaya sa atin. Kailangan nating maging katulad ni Abraham na umaasa sa isang walang hanggang tahanan habang naninirahan siya sa mga tolda at madalas na lumilipat. (Hebreo 11:8-10, 14-16). Kailangan nating alalahanin na lahat ng mga bagay na ating itinatayo, ang mga bagay na taglay natin, ang mga kundisyon na ating nilikha ay pansamantala lamang. Dapat tayong magtrabaho para sa mga bagay na may pangwalang-hanggang kahalagahan.

Ang paghahari ng Diyos sa sanlibutan ay walang hanggan at sa darating na panahon ay mawawala na ang pagtutol dito.

► Dapat sama-samang tingnan ng grupo ang Filipos 2:10-11.

Ayon sa mga talata na ito, darating ang isang panahon na ang lahat ng pagtutol sa Diyos at pagtanggi kay Kristo ay magwawakas.

Ayon sa ilang pilosopiya at mga relihiyon, ang panahon ay nagpapatuloy sa habang panahon, paikot-ikot lamang, na walang simula o wakas, at walang pangyayari na gumagawa ng permanenteng pagbabago.

Subali’t ayon sa Biblia, ang panahon ay may simula at isang serye ng mga pangyayari na nagpapatuloy patungo sa isang konklusyon. Inilalarawan ng Biblia ang sannilikha, pagkatapos ay ang trahedyang pagkahulog ng tao sa kasalanan, pagkatapos ay ang plano ng kaligtasan na ginawa ng Diyos sa buong siglo ng kasaysayan ng sangkatauhan.

Sa Genesis matatagpuan natin ang simula ng kasalanan. Sa Pahayag ang kasalanan ay lubusang inialis mula sa walang hanggang lunsod ng Diyos.[1] Sa Genesis nakikita natin ang pagkawala ng puno ng buhay at ang paghatol ng kamatayan. Sa Pahayag nakikita natin ang pagpapanumbalik ng puno ng buhay, mga pangalan sa Aklat ng Buhay, at paanyaya sa isang ilog ng tubig ng buhay.[2]

Nalalaman natin na mayroong isang pangyayari na darating sa dulo ng mga kaganapan na ipinahayag ng Diyos sa atin. Ang pangyayaring ito ang magsisimula sa sanlibutan patungo sa magpawalang-hanggan na nasa plano ng Diyos. Ito ang pagdating ng kompleto at walang hanggang kaharian ng Diyos.[3]

Mula pa sa simula ang Diyos ang nananatiling naghahari sa kanyang sanlibutan,[4] subali’t mula sa pagkahulog ng tao sa kasalanan, karamihan sa sangkatauhan ay nagrerebelde na laban sa kaharian ng Diyos. Iyon ay biglang magwawakas, at ang Diyos ay maghahari magpasawalanghanggan nang walang kaagaw. Ang mundo ay magiging perpekto ayon sa nais ng Diyos, katulad ng kalagayan ng langit.

► Dapat sama-samang tingnan ng grupo ang Filipos 3:7-16.

Sinabi ng apostol na siya ay nagpapatuloy nang may iisang motibo, at tinatawag niya ang iba na mayroon ding ganitong “perpektong” motibo na ganito rin ang gawin. Posible para sa isang tao na maging perpekto sa kahulugan na siya ay lubusang nakatalaga ang sarili sa Diyos at tumatangging hayaan ang anumang bagay upang makaimpluwensiya sa kanya upang hindi malugod ang Diyos. Sinabi niya na hindi pa niya nakakamit ang pagiging perpekto na darating sa muling pagkabuhay. Gayunman, siya ay nahihikayat na gawin ang kanyang pinakamabuti sa ngayon upang maranasan niya ang pagiging perpekto ng muling pagkabuhay sa hinaharap. Kaya nga, mayroong pagiging perpekto na dapat taglayin ng mga mananampalataya sa ngayon, at isa pang pagiging perpekto na ating dapat asahan sa muling pagkabuhay.

► Dapat sama-samang tingnan ng grupo ang mga talata Filipos 3:17-21.

Sinusunod ng mga tao sa mundo ang kanilang sariling mga pagnanais, nakatuon sa mga bagay sa sanlibutan. Ang isang taong umaasa sa langit ay namumuhay sa pamamagitan ng lubusang naiibang prayoridad at sumusunod sa ibang mga naisin. Tayo ay ginagabayan ng ating pag-asa sa pagbabalik ni Hesus at ng pagbabagong-anyo ng ating mga katawan.

(1) Takdang-Aralin na Isusulat: Sumulat ng isang pangungusap para sa bawat isa sa apat na dakilang katotohanan na ipinaliwanag sa leksiyong ito, na binabanggit ang bawat isa. Pagkatapos sumulat ng isang parapo para sa bawat katotohanan, na ipinapaliwanag kung paano ito nakagagawa ng pagbabago sa iyong pilosopiya sa buhay. Upang makaipon ng mga ideya para sa takdang-araling ito, maaari kang makipag-usap sa ilang tao at tanungin sila kung ano ang pagkakaibang nagagawa ng mga katotohanang ito para sa kanila.

(2) Takdang-aralin na Babasahin: Bago ang susunod na sesyon sa klase, maingat na basahin ang Mateo 24, Marcos 13, at Lucas 21.