Lesson 1: Ang Kahalagahan ng Eschatology

Hayaan ang iba’t-ibang mag-aaral na ilarawan kung ano ang kanilang inaasahang matututuhan mula sa kurso ng eschatology. Maaari silang magbigay ng mga halimbawang tanong na inaasahan nilang masasagot. Hindi mo dapat sikaping sagutin ang mga tanong sa oras na ito.

Ang salitang eschatology ay galing sa Griyegong salita na eschatos, isinalin bilang “huli,” at logos, isinalin na “pag-aaral ng.”

Ang Eschatology ay isang seksiyon ng teolohiya, karaniwang nasa hulihan ng isang sistematikong pag-aaral ng teolohiya. Ipinapakita ng eschatology ang katuparan ng kasaysayan ng pagliligtas, dahil ipinapakita nito ang pagpapanibago ng sannilikha mula sa pagkahulog sa kasalanan at ang pagkatupad ng plano ng kaligtasan.

Ang Eschatology ay ang pag-aaral ng mga huling pangyayari sa mundo, ang pangwalang hanggang hantungan ng sannilikha, at ang kalikasan ng walang hanggang kaharian ng Diyos.

Kabilang sa mga paksa ng pag-aaral ang (1) ang mga propetikong bahagi ng Biblia, (2) mga kaugnay na teolohiya, (3) napapanahong pangyayari sa kasaysayan, at (4) pangkasalukuyang pangyayari sa buong mundo.

Tinutulungan tayo ng eschatology upang maunawaan ang paraan ng Diyos sa pagtupad sa kanyang ultimong layunin para sa kanyang sannilikha.

Ang Kristiyanong pag-aaral sa mga huling araw ay kinakailangan at hindi maiiwasan dahil ito ang batayan ng mga pundasyong doktrinang Kristiyano. Naniniwala ang mga Kristiyano na ang Diyos ang may lubusang kapangyarihan at awtoridad sa buong sanlibutan. Naniniwala sila na umiiral ang kasalanan bilang pagrerebelde laban sa Diyos. Naniniwala sila na si Kristo ang nagkaloob ng kaligtasan kaya’t naging posible ang muling pagkakasundo ng mga rebelde at pagpapanumbalik ng nagkasalang sanlibutan. Naniniwala sila na ang katarungan ng Diyos ay hindi magpapahintulot sa kasalanan sa habang panahon. Ang mga ito ay pundasyong doktrina. Samakatuwid, kinakailangan din na ipaliwanag ng Kristiyanismo kung paanong magtatagumpay si Kristo, malulubos ang pagliligtas, at ang awtoridad ng Diyos ay lubusang mapanunumbalik. Kahit wala ng mga hula o prediksiyon sa mga Kasulatan, ang Kristiyanismo ay makabubuo pa rin ng pag-aaral sa mga huling araw. Ibinibigay ng Biblia ang mga pahayag ng Diyos upang makita natin nang tumpak ang mga kinakailangan sa pag-aaral sa mga huling araw. Nananatiling ikinokonekta ng Biblia ang mga doktrina ng eschatology sa mga doktrina tungkol sa kaligtasan at pamumuhay Kristiyano.

► Apat na iba’t-ibang mag-aaral ang dapat bumasa ng mga talata ng kasulatan sa grupo: Judas 14-15, Tito 2:1-13, Juan 14:1-3, at Santiago 5:7-8. Paano ang bawat isa sa mga talatang ito ay gumagawa ng koneksiyon sa pagitan ng eschatology at pamumuhay Kristiyano?

Ang praktikal na pakinabang sa eschatology ay ang pagtuturo nito sa mananampalataya na (1) magkaroon ng nananatiling pananampalataya at (2) ipamuhay ang buhay Kristiyano na tumutugma sa isang pangwalang hanggang pananaw.

[1]► Colosas 3:1-6 para sa grupo.

Sa espirituwal na katayuan natin, tayo ay muli nang binuhay kasama ni Kristo. Kapag nagpakita si Kristo, makakasama niya tayo. Dahil inaasahan natin ang pagbabalik ni Kristo, pinapatay na natin ang mga kasalanan sa ating mga buhay at nabubuhay tayo upang bigyang lugod ang Diyos.

► Ano ang ilang kadahilanan na may mga taong ayaw pag-aralan ang mga propesiya sa Biblia?

(1) Hindi nila ito maunawaan.

Ang Biblikal na propesiya ay gumagamit ng mga hindi pangkaraniwang anyo ng literatura, kabilang dito ang mga pangitain ng mga hayop at mga kakaibang halimaw. Ang mga detalyeng ito ay hindi madaling bigyang-kahulugan.

Ang mga iskolar ay hindi nagkakasundo tungkol sa mga doktrina ng eschatology. Dahil dito, ang mga tao ay nagkakaroon ng pakiramdam na hindi nila maaaring matiyak kung ano ang tama.

Gayunman, ang mga kinakailangang doktrina ng eschatology ay malinaw. Ang ibang detalye ay hindi kasinglinaw, subali’t maaari nating maintindihan ang ilan sa kanila sa pamamagitan ng paggamit ng mabubuting prinsipyo ng pagbibigay-kahulugan sa Biblia.

(2) Natatakot sila dito.

Nagugulumihanan ang maraming tao dahil sa mga paglalarawan ng Biblia sa mga pandaigdigang sakuna at pag-uusig. Nag-aalala sila tungkol sa kaligtasan ng kanilang sarili at ng kanilang mga anak.

Gayunman, kung ang mga bagay na ito ay mangyayari sa hinaharap pa, kailangang malaman ng isang Kristiyano kung paano mapananatili ang kanyang pananampalataya sa mga panahong iyon.

(3) Ayaw nilang ipagsapalaran ang pagkakabaha-bahagi.

Madalas na hindi nagkakasundo ang mga tao tungkol sa pagbibigay-kahulugan sa mga propesiya sa Kasulatan. Ang mga pagtatalo ay maaaring maging dahilan ng pagkasira ng pagsasamahan. May mga Kristiyano na pinipiling huwag na lang talakayin ang propesiya dahil ayaw nilang makipagtalo.

Gayunman, ang mga mahahalagang doktrina ng eschatology ay dapat tanggapin ng lahat ng Kristiyano. Ang pagkakasundo sa mga hindi gaanong mahalagang detalye ay hindi dapat piliting pag-usapan sa pagkikipag-ugnayan sa ibang mananampalataya.

(4) Iniisip nila na wala itong praktikal na kahalagahan.

Posibleng sundin ang paglalarawan ng Biblia sa pamumuhay Kristiyano nang hindi nauunawaan ang maraming bagay tungkol sa propesiya. Samakatuwid, may mga taong nag-iisip na masasayang lang ang oras at pagsisikap na pag-aaralan ang mga ito, lalo na kung hindi naman nila inaasahang mauunawaan ito.

Gayunman, may ilang mahahalagang doktrina na lubusang kailangan para sa pamumuhay Kristiyano, tulad ng doktrina ng huling paghuhukom. Ang mga taong nagwawalang-bahala sa mga doktrina sa Biblia tungkol sa hinaharap ay may tendensiya na maging sobrang nakaayon at nag-uukol ng buhay sa kasalukuyang mundo.

Ang mga Propesiya ng Kasulatan ay nagagamit ng mali kung ang iskolar ay

• Naliligaw mula sa pagbibigay diin sa mga sentrong katotohanan

• Nagiging mapag-alala sa mangyayari tungkol sa maaaring tuparin ng ministeryo

• Hindi ginagamit ang propesiya para sa layuning hinahangad nito.

• Sinisira nito ang pakikipagkaisa sa ibang mga Kristiyano

• Gumagamit ng mga hindi maliwanag na mga pangungusap sa Biblia upang suportahan ang mga kakaibang doktrina.

Pag-Abuso sa maling propesiya

ihinula ng mga saksi ni Jehovah ang katapusan ng daigdig noong 1975. Noong May, 1974, inilathala nila ang ganito:

“may mga ulat na naririnig na nagsasabing ang mga kapatid ay nagbebenta ng kanilang mga tahanan at ari-arian at nagpaplanong ilaan ang natitirang bahagi ng kanilang mga buhay dito sa lumang sistema ng kanilang pasimulang serbisyo. (ANg pag-aanunsyo ng kanilang relihiyon).

tunay na ito ay mabuting paraan upang gugulin ang maikling panahong natitira bago ang wakas ng buktot na mundo”.[1]

(1) Ang lahat ng Kasulatan ay kapaki-pakinabang (2 Timoteo 3:16).

(2) May pagpapalang ipinangako para sa mga mambabasa ng Pahayag (1:3).

(3) Ipinangaral ni Hesus ang mga propesiya (Mateo 24:29-31).

(4) Inaaliw tayo ng propesiya tungkol sa mga mananampalatayang nagdusa at namatay (1 Tesalonica 4:18).

(5) Hinihikayat tayo ng propesiya upang matapat na magtrabaho para sa Diyos. (1 Corinto 15:58).

(6) Hinihimok ng propesiya ang paggiging masigasig sa mga espirituwal na bagay at pagiging maingat (1 Juan 3:2-3, Lucas 21:34).

(7) Layunin ng propesiya na palakasin ang ating pananampalataya para sa hinaharap (Lucas 21:28, 2 Tesalonica 2:2)

Ang mga talakayan tungkol sa propesiya ay karaniwang nakatuon sa mga minor na katanungan sa halip na sa major na katotohanan. Ang mga usapin sa propesiya ay hindi magkakapantay sa kahalagahan. Hindi natin sisikaping matalakay ang lahat ng bagay tungkol sa propesiya sa kursong ito.

Kung minsan nag-iisip ang mga tao kung ano ang magiging hitsura ng marka ng halimaw, saang bansa magmumula ang antichrist, at kung sino ang magiging dalawang saksi. Ito ay mga tanong na hindi malinaw na sinagot ng Biblia. Maaari tayong makakita ng ilang ebidensya sa Biblia para sa mga detalyeng iyon, subali’t ang magtalo-talo tungkol sa mga ito ay hindi kapaki-pakinabang.

May ibang mga paksa na higit na ipinapaliwanag ng Biblia. Ang ilang halimbawa ay kung babalik ba si Hesus sa simula, sa kalagitnaan o sa dulo ng kapighatian, o kung ang millenium ay literal nga na isang libong taon. Maaaring magkaroon ng makatwirang konklusyon, batay sa ebidensya ng Banal na Kasulatan. Gayunman, ang mga doktrinang ito ay hindi kinakailangan sa ebanghelyo. Hindi mo dapat sirain ang iyong pakikipag-ugnayan sa sinuman dahil lamang hindi kayo nagkakasundo sa inyong mga palagay sa isa sa mga tanong na ito.

May mga kinakailangang katotohanan sa propesiyang Biblikal. Ang mga katotohanang ito ay napakalinaw kung kaya’t ang sinumang naniniwala sa Biblia ay tinatanggap ito. Ang mga doktrinang ito ay nakakaapekto sa pamumuhay Kristiyano at sa buong sistema ng doktrinang Kristiyano. Halimbawa ng mga doktrinang ito ay ang pagbabalik ni Kristo, ang huling paghuhukom, ang pisikal na muling pagkabuhay ng lahat ng tao, at ang pangwalang-hanggang paghahari ng Diyos.

Sa kursong ito, gugugol tayo ng panahon sa pag-aaral ng Banal na Kasulatan, upang ang Banal na Kasulatan mismo ang magsalita para sa kanyang sarili. Bibigyang-diin natin ang mga pinakamahalagang katotohanan sa eschatology. Pag-aaralan din natin ang ilan sa mga ebidensya para sa mga hindi gaanong mahalagang doktrina, subali’t pahihintulutan ang mag-aaral na magkaroon ng kanyang sariling konklusyon. Pinakamahalaga na matupad ang layunin ng propesiya sa Banal na Kasulatan, upang ang pagpapakita ng kapangyarihan at karunungan ng Diyos ang siyang humikayat sa atin upang pagtiwalaan at sundin ang Diyos.

Kung minsan ang pag-aaral sa mga huling araw ay labis na nasesentro sa tao. Maraming mga talakayan sa eschatology ay tungkol sa pagkakataon o oras ng pagbalik ng Panginoon na ayon sa relasyon nito sa ibang mga pangyayari, dahil nais nating malaman kung ano ang mangyayari sa atin.

Ang pag-aaral ng eschatology ay maaaring maging nakatuon sa mundo, habang pinag-aaralan natin ang mga prediksyon at sinisikap na hulaan kung ano ang mga pangyayaring magaganap sa mundo.

Kapag pinag-aralan natin ang aklat ni Daniel, dapat nating pansinin na ang binibigyang-diin ay ang katalinuhan at kapangyarihan ng Diyos at ang walang hanggang kaharian. Ang Daniel ay buong aklat ng mga pangyayari sa mga huling araw, at ang mga tema nito ay ang mga tema ng eschatology. Ipinapahayag ng Diyos ang mga mangyayari. Mauunawaan ng matuwid ang mga nangyayari, ngunit hindi ng mga makasalanan. Ang kaharian ng Diyos ay lalaganap sa buong mundo at mananatili magpawalang-hanggan. Nabanggit si Kristo sa aklat ni Daniel at pinagkalooban ng kaharian (Daniel 7:13-14).

Kapag pinag-aralan natin ang aklat ng Pahayag, makikita rin natin ang parehong mga tema, na mas maraming pagbibigay-diin kay Kristo. Ang aklat ay ang Kapahayagan kay Kristo. Siya ang simula at ang wakas—siya ang nagsimula ng lahat ng bagay at siya rin ang magdadala sa konklusyon nito. Siya ang Pinakamakapangyarihan.

Ang pinakamasamang kasalanan ng Antichrist ay ang paghingi niya ng pagsamba. Ang dakilang pagsubok sa mga mananampalataya ay ang pananatiling tapat sa Diyos. Ang lahat ng iba pa ay sumasamba sa Anticristo.

Ang trono ng Diyos ang pinakasentro sa Pahayag. Nangyayari ang mga bagay sa mundo ayon sa iniuutos ng Diyos. Ang buong pagkakasunod-sunod ng mga pangyayari na nagdadala sa kaharian ng Diyos ay sinisimbolo ng mga tatak sa aklat ng Diyos, na binubuksan ni Hesus nang isa-isa.

Sa kabuuan ng aklat ay mga talata ng pagpupuri sa Diyos sa kanyang kapangyarihan, katalinuhan, at katwiran.

► Ano ang pangunahing tema na nakikita mo sa aklat ng Pahayag?

Hindi tayo nakakikita ng malinaw na balangkas ng pagkakasunod sunod ng mga pangyayari sa hinaharap. Hindi tayo nakakikita ng maraming detalye ng mga pangyayari na mauunawaan natin ng may katiyakan. Samakatuwid, kapag ang propesiya ay ginawang isang detalyadong balangkas ng mga pangyayari sa hinaharap, hindi na nito tinutupad ang layunin nito.

Prinsipyo sa Pagbibigay-kahulugan sa Biblia:

Ang pangunahing binibigyang-diin ng isang talata o aklat ang dapat siyang gumabay sa ating paggamit ng Banal na Kasulatan. Pangkaraniwang hindi natin dapat gamitin ang mga talata sa Biblia sa paraang hindi naman nilalayon ng sumulat.

Nakikita natin na ang kaluwalhatian ng Diyos ang pangunahing tungkulin ng eschatology. Sa isang mundo na tila wala nang kontrol, patuloy na naghahari ang Diyos. Bagaman ang matuwid ay tila natatalo sa labanan, ang Diyos ang magbibigay ng ultimong tagumpay. Hindi natin magagawang bigyang kahulugan ang ilang detalye nang mas maaga sa panahon, subali’t malalaman natin ang kanilang katuparan at malalaman natin na alam ng Diyos ang mga ito bago pa man ito mangyari. Paulit-ulit na itinutuon ng eschatology ang ating atensyon sa Diyos.

Kung may taong nagsasabi na lubusan niyang nauunawaan ang lahat ng propesiya sa Banal na Kasulatan, inaangkin niya ang pang-unawa na hindi pa ipinagkakaloob sa iglesya sa pangkalahatan sa loob ng 2,000 taong kasaysayan nito. Hindi dapat pagtiwalaan ang ganitong tao. Maraming tao na ang nag-angkin ng personal na kapahayagan at lubusang pang-unawa, subali’t ang kanilang mga pananaw ay hindi kailanman tinanggap ng iglesya sa pangkalahatan. May ilang tao na naging matagumpay na nakaakit ng grupo ng mga tagasunod na katulad sa isang kulto. May mga taong nakabuo ng mga di-karaniwang doktrina at kung minsan ay nagtuturo ng maling pananampalataya.

Ang mga pangunahing katotohanan ng eschatology, tulad ng pagbalik ni Kristo at ang muling pagkabuhay ng mga patay, ay kinakailangan sa Kristiyanismo. Hindi dapat angkinin ng isang tao na siya ay Kristiyano at naniniwala sa Biblia kung hindi niya pinanghahawakan ang mga pangunahing doktrina. Gayunman, maraming detalye na hindi kasing tiyak, at maraming prediksyon sa Banal na Kasulatan na mahirap maunawaan.

Kahit si propeta Daniel ay nagsabi, “Narinig ko, subali’t hindi ko naunawaan” (Daniel 12:8). Sinabi sa kanya ng anghel na ang mga salita ay sarado hanggang sa panahon ng wakas, subali’t sa panahong iyon ang matalino ay makauunawa (12:9-10). May mga prediksiyon na hindi mauunawaan hanggang sa panahon o oras na ang mga ito ay matutupad.

Sinabi ni John Wesley tungkol sa aklat ng Pahayag,

Ito ang mga mahahalagang bahagi na hindi ko pinag-aralan sa loob ng maraming taon; dahil lubusan akong nawawalan ng pag-asa na maunawaan ang mga ito, pagkatapos subukan ng maraming matatalino at mabubuting tao ngunit wala naman naging bunga …hindi ako kailanman nagkunwari na nauunawaan o sikaping ipaliwanag ang lahat ng nilalaman ng misteryosong aklat na ito.[1]

Tulungan nawa tayo ng Diyos na pag-aralan ang kanyang Salita nang may kababaang-loob at nagpapahintulot sa mga palagay ng iba.

► Dapat basahin ng isang mag-aaral ang 2 Tesalonica 2 para sa grupo. Hindi kailangang ipaliwanag ang lahat ng detalye ng talata. Pag-aaralan uli natin ito sa ibang pagkakataon. Ano ang ipinag-aalala ng mga mananampalataya sa Tesalonica? Tingnan ang verse 2.

Ipinakikita sa atin ng verse 2 kung paano nagagamit nang mali ang eschatology. Dahil sa eschatology na itinuturo ng ilang tao, nag-aalala at nagugulumihanan ang mga mananampalataya.

Prinsipyo para sa Pagbibigay kahulugan sa Biblia: Dapat nating pansinin ang usapin na tinutukoy ng sumulat, lalo na kapag ito’y malinaw na nakasaad.

► Tingnan ang konklusyon ng talata (verses 15-17). Ano ang nais ng apostol na gawin nila dahil sa kanyang paliwanag sa eschatology?

Prinsipyo para sa Pagbibigay Kahulugan sa Biblia: Ang konklusyon ng sumulat ay nagpapakita ng kanyang intensyon para sa talata. Ang isang konklusyon kung minsan ay ipinakikilala ng salitang Samakatuwid.

Nais niya silang magpatuloy sa pamumuhay bilang mga Kristiyano, tulad ng itinuro sa kanila. Nais niya silang maging malakas sa pananampalataya at kaaliwan, sa halip na makontrol ng takot. Nais niyang magpatuloy sila sa pagtupad ng mabubuting mga gawa, sa halip na pag-iisip lamang kung paano mabubuhay.

Ang maayos na paggamit ng eschatology o pag-aaral sa mga huling araw ay tutupad sa parehong mga layunin na taglay ni Apostol Pablo.

(1) Isusulat na Takdang-Aralin: Tingnan ang apat na dahilan kung bakit may mga taong ayaw pag-aralan ang mga propesiya. Isipin na may isang tao na nagsasabi sa iyo ng, “Ayaw kong pag-aralan ang propesiya dahil…” (ibigay ang isa sa apat na dahilan). Sumulat ng ilang pangungusap na nagpapaliwanag sa taong ito kung bakit hindi niya dapat iwasan ang propesiya dahil sa kadahilanang iyon.

(2) Pag-aaral ng Talata: Pag-aralan ang 1 Tesalonica 5:1-11. Dahil inaasahan natin ang pagbalik ng Panginoon at ang pagkawasak ng mundo, namumuhay tayo nang may kabanalan at hindi ginagawang prayoridad ang mga bagay sa mundo. Sumulat ng isang buod ng mensahe ng talatang ito.