Lesson 3: Introduksiyon sa Kasulatan ng mga Pahayag

Hilingan ang ilan sa mga mag-aaral na ibahagi kung ano ang kanilang isinulat tungkol sa payo na kanilang ibibigay sa isang tao na nasasabik tungkol sa isang bagong iglesya na gumagawa ng maraming propesiya.

Ang Pahayag ay isang anyo ng literatura. Ginamit ito sa ilang bahagi ng Biblia at gayundin sa ilan pang ibang isinulat.

Sinasabi ng sumulat na tumanggap siya ng mensahe sa pamamagitan ng isang pangitain o panaginip. Ito ay napakasimboliko. Madalas itong gumagamit ng mga hayop o mga di-pangkaraniwan, dambuhalang mga nilalang bilang mga simbolo. Sa halip na ilarawan ang mga pangyayari ayon sa pagkakasunod-sunod sa panahon, ang pattern ay maaaring cycles ng paulit-ulit na magkakatulad na pangyayari na nagdaragdag ng ibang detalye.

[1]Ang mga isinulat ay karaniwang tumatalakay sa suliranin ng pagpapanatili ng pananampalataya sa kabila ng mga kasamaan at kawalang katarungan sa kasalukuyang mundo. Inilalarawan nito ang isang unibersal na digmaan na may matinding paglalabanan.

Ang mga isinulat sa Biblia na pahayag sa mga huling araw ay nagpapakita ng ultimong tagumpay ng Diyos, na nagpaparusa sa masama at nagbibigay gantimpala sa mabuti. Ang pokus ay ang makapangyarihang Diyos na siyang sumasaklolo sa kanyang bayan.

Kabilang sa mga Kasulatan ng Pahayag ang Daniel, Zacarias, Joel, Pahayag at mga talata mula sa iba pang aklat ng Biblia.

Prinsipyo para sa Pagbibigay-kahulugan sa Biblia

Ang mga detalye ay dapat unawain nang literal maliban kung malinaw na nilalayon ng sumulat na ang paglalarawan ay figurative. Ang isang halimbawa ay ang mga hayop at dambuhala sa mga pangitain ni Daniel.

► Basahin ang mga mag -aaral ang mga sumusunod na banal na kasulatan.

• Para sa mga halimbawa ng mga simbolong hayop, tingnan ang Daniel 7:3-7, Pahayag 12:3 at 16:13, at Zacarias 6:1-3.

• Para sa halimbawa ng mga talata na naglalarawan sa dakila, panghuling digmaan, tingnan ang Joel 2:9-11 at Pahayag 19:11-21, 20:7-9.

• Para sa mga halimbawa ng mga talata na itinuturo ang pangwakas na tagumpay at walang hanggang kaharian ng Diyos, tingnan ang Daniel 7:14, 27 at Zacarias 14:9.

Ang ibang seksiyon ng Banal na Kasulatan ay maaaring ituring na apocalyptic writing dahil nagsasaad ang mga ito ng biglaang pagkilos ng Diyos, kapag hinahatulan niya ang mga kapangyarihan ng kasamaan at inililigtas ang mga matuwid. Hindi nagtataglay ang mga Kasulatang ito ng lahat ng ibang katangian ng apocalyptic writing, tulad ng mga pangitain o mga simbolong hayop (Halimbawa ay ang Ezekiel 37-39, Isaias 24-27,Mateo 24, Marcos 13, Lucas 21, 2 Tesalonica 2, at 2 Pedro 3.)

► Dapat hanapin ng mga mag-aaral ang mga reperensiyang may salungguhit sa seksiyong ito at basahin ang mga talata.

Ang salita ayon sa Kasulatan na ginamit para sa oras ng panghuling pagkilos ng Diyos ay araw ng Panginoon. Ang ilan sa mga talata sa Lumang Tipan na naglalarawan sa araw ng Panginoon bilang ang oras kung kailan ang mga Hentil na bansa ay parurusahan dahil sa kanilang pagtrato sa Israel.[1] Maraming Judio ang nag-akala na wala silang dapat ikatakot mula sa paghuhukom ng Diyos dahil sila ay mga Judio. Sinikap ng mga propeta na ipakita sa kanila na sila man ay hahatulan din kung sila ay makasalanan (Zephaniah 1:12, Amos 5:5:18-27), at hindi rin sila ililigtas dahil lamang sila ay mga Judio.

Sa aklat ng Roma, tinukoy ni Pablo ang “araw ng pagkapoot” (Roma 2:5), at “ang araw kung kailan maghuhukom ang Diyos” (2:16). Ang mga reperensiyang ito ay sumusunod sa kanyang tema sa 1:16-18 na ang ebanghelyo ang kaligtasan mula sa poot ng Diyos.

Ang “araw ng Panginoon” ay hindi tiyakang nangangahulugan ng literal na isang araw; ang mga pangyayaring inilalarawan ay maaaring maganap ng higit pa sa isang araw. Ang binibigyang diin ay ang “Kanyang Araw”; sinalungat siya ng mga kapangyarihan sa mundo, subali’t ngayon ito ang oras ng Diyos upang siya na ang mamahala.

Ang mga propesiya sa “araw ng Panginoon” ay maaaring hindi tumutukoy sa iisang pagkakataon sa dulo ng panahon. Halimbawa, ihinula ni Joel ang isang dayuhang hukbo na ipinadala ng Diyos upang parusahan ang Israel (Joel 2:1, 11, 20). Kung magsisisi ang mga tao, palalayain sila ng Diyos 2:18-20). Ito ay isang halimbawa ng propesiya na nagkaroon ng katuparan sa kasaysayan, gayunman ay mayroon ding ultimong katuparan sa wakas ng panahon. Binanggit ni apostol Pedro ang propesiya mula sa aklat ni Joel na tila ba ito ay matutupad pa lamang (Mga Gawa 2:16-21).

Kabilang sa mga talatang naglalarawan sa araw ng Panginoon ang Joel 2:10,11, 28-32 (binanggit ni Pedro), 3:14-15, Isaias 13:9-11, 24:19-23, Zephaniah 1:14-18, at 2 Pedro 3:10-13.

Ang ilang mga talata tulad ng Isaias 2:10-19 at Pahayag 6:15-27 ay naglalarawan ng mga makasalanang nagtatago mula sa Diyos at ng mga bayang naghihintay ng paghuhukom.

Ang ilang mga talata na bumanggit sa araw ng Panginoon ay naglalarawan ng mga taong nagkakatipon para sa digmaan sa panahon ng pagdating ng Diyos, tulad ng Zacarias 14:1-2.

Marami pang ibang talata na hindi tiyakang binanggit ang “araw ng Panginoon”, subali’t naglalarawan ng isang pangyayari na nagtataglay ng ilan sa parehong mga detalye. Halimbawa, ang ilan sa mga ito ay naglalarawan ng mga tandang makalangit na mangyayari sa pagdating ng Panginoon na katulad ng mga inilarawan sa mga talatang tumutukoy sa “araw ng Panginoon.” Kabilang sa mga halimbawa ang Mateo 24:29-30, Marcos 13:24-26, at Lucas 21:25-28.

May ilang mga iskolar ng Biblia na naniniwala na karamihan sa mga Kasulatang apocalyptic ay natupad na. Naniniwala sila na ang daigdig ay unti-unting magiging Kristiyano sa pamamagitan ng matagumpay na paglaganap ng ebanghelyo. Gayunman, ang ilan sa mga talata ay naglalarawan ng mga kaharian sa mundo na nasakop na ng Diyos (halimbawa, Daniel 7:14, 27). Sa kasalukuyan maraming bansa sa mundo ang patuloy na nag-uusig sa mga Kristiyano. Maaari nating sabihing ang Diyos ay makapangyarihan sa lahat ng bagay, subali’t ang mga bansang ito ay nagrerebelde pa rin laban sa Diyos, na nangangahulugang ang mga talatang iyon ay hindi pa natutupad.

► Dapat basahin ng isang mag-aaral ang Roma 9:28 para sa grupo. Ano ang ibig sabihin na tutuparin ng Diyos ang isang bagay nang mabilis sa mundo?

Binibigyang diin ng mga Kasulatang apocalyptic na ang mundo ay permanenteng mababago sa pamamagitan ng biglaang pagkilos ng Diyos. Hindi nito inilalarawan ang isang unti-unting pagbabago ng lipunan.

Ang mga Kristiyano ang dapat maging asin at ilaw sa bawat lipunan na kanilang tinitirhan. Dapat silang kumilos upang baguhin ang kanilang kapaligiran upang ito’y maging kalugod-lugod sa Diyos. Nabago na ang mga bansa at nahubog ng progreso ng ebanghelyo. Gayunman, ipinahihiwatig ng Banal na Kasulatan na hanggang sa dumating ang panghuling pagkilos ng Diyos, patuloy na mayroon pa ring masasamang kapangyarihan ng tao na nagpapatuloy sa pagrerebelde laban sa Diyos.

Maraming natutupad ang mga institusyong Kristiyano para sa paglaganap ng ebanghelyo, sa pagtatatag ng mga iglesya, at sa pagpapagaan ng lahat ng uri ng pagdurusa. Nabago na ang mga bansa at nahubog ng mga impluwensiyang Kristiyano. Samakatuwid, dapat magtrabaho ang mga Kristiyano upang magtatag ng mga iglesya at institusyon na may pangmatagalang epekto. Gayunman, tinitingnan natin ang pagbabalik ni Kristo bilang siyang maghahatid ng kalubusan sa kaharian ng Diyos.

Ang mga Mananampalataya ay dapat matiyagang magtiis sa pamamagitan ng pananampalatayang sumusunod sa Diyos sa lahat ng pagkakataon. Nakikita ng pananampalataya na sa katapusan ang pagsunod ay kapaki-pakinabang, bagaman ito’y maaaring magdala ng pagdurusa sa ngayon. Hindi kinakailangan ang lubos, pangkasalukuyang pagkaunawa kung bakit nangyayari ang mga bagay.

1 Corinto 3:12-15

Ang konteksto ng talatang ito ay tungkol sa gawain ng ministeryo. Sa mga mas naunang talata sa kabanata, sinabi ng apostol na ang mga tao sa ministeryo ay may iba’t-ibang tungkulin at gagantimpalaan sila ng Diyos para sa kanilang mga ginawa. Ang iglesya ay katulad ng isang bukid o gusali kung saan tayo ay nagtatrabaho (talatang 9)

Ang lahat ng ministeryo ay dapat magtatag sa iglesya. Si Kristo ang pundasyon, at ang mga nagmiministeryo ay nagtatayo ng isang istruktura sa pundasyon. Ang ilan sa kanila ay nagtatrabaho nang mabuti na may kalidad, at gagantimpalaan ng Diyos ang kanilang gawain. Ang iba ay nagtatrabaho ngunit hindi mahusay ang pagtatatag sa anupaman, at hindi gagantimpalaan ng Diyos ang gayung gawain.

Ang punto ni Pablo: Ang mga nagmiministeryo ay dapat matapat at madiskarteng magtrabaho upang itatag ang iglesya, na tumatanaw sa hinaharap sa gantimpala mula sa Diyos.

Ang mga Kasulatang Apocalyptic ay propesiya, at madalas na humuhula sa mga espesipikong pangyayari. Hindi natin laging nalalaman kung ano ang mga espesipikong pangyayari ang maaasahan natin bilang katuparan sa mga propesiyang ito. Ang ilan ay maaaring natupad na; ang ilan ay sa hinaharap pa matutupad. Hindi natin kinakailangang malaman nang tiyakan kung ano ang inihula. Ang pangunahing layunin ng propesiya ay hindi lamang ang simpleng maisulat natin ang kasaysayan bago pa ito maganap. Ang layunin ng propesiya ay ang ipakita ang pagiging lubusang makapangyarihan at katapatan ng Diyos upang ang makakarinig ay mahikayat na magtiwala at sumunod sa Diyos. Hindi kinakailangan ang lubusang pagkaunawa sa mga detalye.

[1]Karamihan sa propesiya ay orihinal na ipinangaral sa mga taong hindi naman nasaksihan ang katuparan ng mga prediksyon, dahil ang katuparan ay malayong-malayo pa sa hinaharap. Gayunman ang layunin ng pangangaral ay mahikayat ang mga tagapakinig na magtiwala at sumunod sa Diyos. Gayundin naman, sa kasalukuyan, maging ang katuparan ng isang propesiya ay sa nakalipas o sa hinaharap, at bagaman hindi natin mauunawaan ang lahat ng mg detalye, ito ay isang demonstrasyon ng kapangyarihan ng Diyos at katapatan na dapat makahikayat sa atin na magtiwala sa Diyos.

Mayroon tayong praktikal na pamamaraan sa pagbibigay kahulugan sa mga Kasulatan ng propesiya. Maaaring hindi magkasundo ang mga iskolar kung ano ang tiyak na pangyayari ang inihula. Ibig sabihin ba noon na nabigo ang talata ng Kasulatan na iparating ang mensahe ng Diyos? Hindi. Kahit na hindi tayo magkasundo sa mga detalye ng prediksyon, nakikita natin ang pagpapahayag ng kapangyarihan ng Diyos.

► Dapat sama-samang hanapin at tingnan ng grupo ang 2 Tesalonica 1:6-12. (Ang Kabanata 2 ng sulat na ito ay tungkol din sa mga huling araw, subali’t pag-aaralan natin iyon sa ibang leksiyon.)

Inilalarawan ng talatang ito ang pagbabalik ng Panginoon bilang ang panahon kung kailan parurusahan ng pagkawasak ang mga makasalanan at ang mga mananampalataya ay tatanggap ng ginhawa mula sa paghihirap. Ang kaluwalhatian ng Diyos ang pokus – pansinin ang mga reperensiya sa Diyos at kay Kristo sa kabuuan ng talata.

Nagsisimula ang talatang 2 Tesalonica 1:11-12 sa salitang “at sa gayun”, na nagbibigay ng aplikasyon ng talatang ito ng mga huling araw. Dapat tayong manalangin na maluwalhati ang Diyos sa kaniyang pagkilos sa ating mga buhay sa mundong ito. Ang wastong aplikasyon ng mga huling araw ay magiging dahilan upang tayo ay mamuhay bilang mas mabuting Kristiyano, na pinararangalan ang Diyos at pinagpapala ang mga nasa paligid natin.

(1) Takdang-araling Isusulat: Paano nakakaapekto ang Kasulatang apocalyptic sa paraan ng iyong pagtanaw sa iyong ministeryo, sa iyong iglesya, at alinmang ibang institusyong Kristiyano na sinusuportahan mo? Sumulat ng isang pahina tungkol sa mga dapat asahan na matutupad ng mga ito sa mundo bago ang pagbabalik ni Hesus.

(2) Pag-aaral ng Talata: Pag-aralan ang 2 Pedro 3:1-14. Inilalarawan ng apostol ang araw ng pagdating ng Panginoon. Ang kanyang aplikasyon sa pamumuhay Kristiyano ay nagsisimula sa salitang At sa gayun. Sumulat ng isang paliwanag sa mensahe ng talatang ito.