Lesson 11: Ang Dakilang Kapighatian

Sa leksiyong ito pag-aaralan ng mga mag-aaral ang Biblikal na paglalarawan ng panahong tinatawag na “ang kapighatian” sa eschatology. Ang paksa ng kung kailan babalik si Hesus para sa mga mananampalataya ay tatalakayin sa ibang leksiyon. Sikaping iwasan ang pagdedebate tungkol sa tanong na iyon sa leksiyong ito.

Ang salitang tribulation ay pangkalahatang ginagamit upang tukuyin ang paghihirap at hindi laging tumutukoy sa isang espesipikong panahon, kahit pa ang salita ay matatagpuan sa Biblia.

Sa eschatology o pag-aaral sa mga huling araw, ang salita ay ginagamit upang tumukoy sa konsepto ng espesipikong pitong taong inihulang panahon. Kung minsan ang salitang ginagamit ay dakilang kapighatian.

Ang ilang sipi sa kasulatan na gumagamit sa salitang tribulation upang tumukoy sa espesipikong panahong ito ay sa Mateo 24:21, 29, Marcos 13:24, at Pahayag 7:14.

Hindi lahat ng teologo ay nagkakasundo na ang tribulation ay inihula sa Banal na Kasulatan, at ang mga teologo ay hindi nagkakasundo sa pagkakasunod-sunod ng mga pangyayaring propetiko na ayon sa kaugnayan nito sa tribulation.

Ang pitong taong kapighatian ay inilarawan bilang isang panahon ng pangbuong mundong pagdurusa. Magdurusa ang mga tao dahil sa mga kundisyon na gawa ng tao, tulad ng digmaan at taggutom, at gayun din ang mga kundisyong nanggagaling sa paghatol ng Diyos. Magkakaroon ng digmaan sa pagitan ng iba’t-ibang grupo ng mga bansa. Maaapektuhan ng digmaan ang buong mundo. Magiging buktot ang mga pamahalaan ng tao at uusigin nito ang mga taong matapat sa Diyos, at marami ang papatayin. Magkakaisa ang mundo sa ilalim ng isang masamang tagapanguna na tinatawag na Antichrist na hihingi ng pagsamba. Aatakehin ng antichrist ang Israel. Sa panahon ng kapighatian, kikilalanin ng Israel na si Hesus ang kanilang Mesiyas at makatatagpo ng kaligtasan.

Ang seksiyong ito ay naglalarawan ng mga sipi sa Biblia na tumutukoy sa isang panahon ng pitong taon o ng isang panahon ng tatlo at kalahating taon na maaaring kalahati ng isang pitong taong panahon.

Daniel 9:24-27

Ang salitang linggo sa siping ito ay simpleng nangangahulugan na pito. Sinasabi ng verse 24 ang layunin ng pito – upang tapusin ang kasalanan ng Israel at gawin silang isang matuwid na bansa. Ang isang prinsipe sa hinaharap ay gagawa ng pitong taong kasunduan subali’t sisirain ito sa kalagitnaan. Matitigil ang mga paghahandog sa templo. May kasuklam-suklam (ipinahihiwatig ang mga dios-diosan), gagawin niyang nakatiwangwang ang templo hanggang sa “katuparan”. Ang katuparan ay nangangahulugang pagkatupad sa mga layuning inihayag sa verse 24. Ayon sa pagbibigay-kahulugang ito, ang prinsipe ay ang Antichrist.

Mahabang panahon pagkatapos na isulat ang mga propesiya ni Daniel, marami sa mga ito ang tila natupad na sa pamamagitan ng isang tagapanguna na nagngangalang Antiochus Epiphanes. Siya ay isang banyagang mananakop na naglagay ng isang imahen ng kanyang sarili sa templo upang sambahin (168 B.C.). Nagrebelde ang mga Judio at nakipagdigmaan sa loob ng 3 ½ taon. Sa panahong iyon, natigil ang mga paghahandog sa templo. Ang mga pangyayaring ito ay tila tumutupad sa mga propesiya ni Daniel. Gayunman, si Hesus ay nabuhay mahabang panahon pa pagkatapos ng mga pangyayaring iyon at ipinahiwatig na ang mga propesiya ni Daniel ay hindi pa natutupad. Tingnan ang Mateo 24:15.

Ang isa pang alternatibong pagbibigay-kahulugan ay: ang prinsipe ay ang Mesiyas. Pinatotohanan niya ang kasunduan ng kaligtasan sa pamamagitan ng kanyang kamatayan. Siya ay pinutol pagkatapos ng unang kalahating linggo, na siyang kanyang ministeryo ng 3 ½ taon. Ang ikalawang kalahati ng linggo ay ang panahon ng iglesya, na hindi literal na 3 ½ na taon. Ang pagkatiwangwang ng templo ay nangangahulugan na hindi na kinakailangan ang mga paghahandog. Ang kasalukuyang kalagayan ay magpapatuloy hanggang sa lubusang katuparan sa wakas ng panahon ng iglesya. Ang kasuklam-suklam ay ang kanyang pagkamatay sa krus, dahil ito ang pagkaunawa ng mga Judio.

► Ano ang mga problemang nakikita ninyo sa alternatibong pagbibigay-kahulugan?

May ilang suliranin na nakikita sa alternatibong pagbibigay-kahulugan. Ayon sa pagbibigay-kahulugan na ito, ang unang kalahati ng linggo ay isang literal na 3 ½ na taon, subali’t hindi ang ikalawang kalahati, na nagiging magkasalungat. Hindi nagbibigay ang sipi ng anumang dahilan upang isipin natin na ang “kasuklam-suklam” ay totoong isang mabuting bagay na tinatawag ng masasama na kasuklam-suklam. Tingnan din ang Daniel 11:31, na tila nagsasabi na ang kasuklam-suklam ay isang bagay na inilagay sa templo.

Daniel 11:31

Ang banal na lugar ay narumihan, natigil ang mga paghahandog, at ang bagay na inilagay sa templo ay isang kasuklam-suklam na bagay kung kaya’t ito’y iniwanan.

Daniel 12:6-7, 11

Mula sa isang tiyak na simula ng panahon hanggang sa huli ay magiging isang panahon, mga panahon at kalahating panahon. Ito ay tila nangangahulugan ng 3 ½ taon, laluna kung ihahambing sa talata 11.

Mula sa oras na ang mga paghahandog ay natigil at ang kasuklam-suklam ay naitatag hanggang sa wakas ay mga 1290 araw, na tinatayang 3 ½ taon.

Pahayag 11:2

Ang Jerusalem ay aangkinin ng mga Hentil sa loob ng 42 buwan. Dalawang saksi ang nangangaral sa loob ng panahong iyon.

Pahayag 13:4-5

Iniutos ng Antichrist ang pagsamba sa kanya, na magpapatuloy sa loob ng 42 buwan.

Pahayag 12:6, 14

Ang babaeng kumakatawan sa Israel ay pinoproteksyunan at binibigyan ng kailangan sa loob ng 1260 araw, na tinatayang halos 3 ½ taon.

Sinasabi ng talata 14 na binigyan siya ng pangangailangan sa loob ng panahon, sa bawat panahon, at kalahati ng isang panahon na tila nangangahulugan ng 3 ½ taon, lalo na kung ihahambing sa talata 6. Pansinin ang pagkakatulad sa Daniel 12:6-7, 11.

Ang mga sipi mula sa Banal na Kasulatan sa seksiyong ito ay ilan sa mga ebidensiya na ang mga teologo ay nagtuturo na ang Biblia ay nagbibigay ng prediksiyon sa isang pitong taong panahon.

Tatlo sa mga Ebanghelyo ay tinatawag ng “synoptic na Ebanghelyo” dahil ang mga ito ay naglalarawan sa buhay ni Hesus sa magkakatulad na paraan. Itinatala ng mga ito ang marami sa magkakaparehong pangyayari at mga katuruan.

Sinabi ni Hesus sa kanyang mga disipulo na gigibain ang templo. Inakala nila na ito ay mangyayari sa katapusan ng mundo. Tinanong si Hesus ng kanyang mga disipulo tungkol sa oras ng kanyang pagbabalik at ang katapusan ng mundo. Ang kanyang paglalarawan ay matatagpuan sa Mateo 24, Marcos 13 at Lucas 21.

► Basahin ang Mateo 24, Marcos 13, at Lucas 21. Ilista ang mga bagay na mangyayari sa panahong inilarawan sa mga kabanatang ito. Ilista ang mga pangyayari ayon sa pagkakasunod-sunod. Ang sumusunod na paragraph ay naglilista ng ilan sa mga detalye ng mga kabanatang ito.

Inilarawan ni Hesus ang digmaan, taggutom, at pag-uusig. Magkakaroon ng mga bulaang propeta at huwad na mga mesiyas. Ang ebanghelyo ay ipapangaral sa buong mundo. Ang kasuklam-suklam na inihula ni Daniel ay magaganap. Sasakupin ng mga Hentil ang Israel, at ito’y magdurusa ng matindi. Sa puntong iyon magsisimula ang pinakamatinding kapighatian na maaaring maranasan ng mundo. Magkakaroon ng mga tanda sa kalangitan, sa araw, buwan at mga bituin. Pagkatapos, babalik si Hesus, nakikita ng buong mundo, at titipunin ng mga anghel ang mga tao niya mula sa lahat ng lugar sa mundo.

May ilang teologo na nagtuturo na ang mga prediksiyon ng mga siping ito ay naganap na sa pagkawasak ng Jerusalem. Iyon ay isang panahon ng matinding paghihirap, at ang templo ay nawasak. Ang mga teologong ito ay nagtuturo na ang mga disipulo ay nagtatanong kung kailan mawawasak ang templo.

► Dapat ba nating isipin na ang mga prediksiyong ito ay natupad na? Gumamit ng mga sipi upang suportahan ang inyong opinyon.

Note sa tagapanguna sa klase: Pagkatapos magsimula sa pagtatalakayan ang grupo, tulungan silang pansinin ang mga sumusunod na obserbasyon sa sipi.

Makikita natin ang sumusunod sa Mateo 24. Tila sinasagot ni Hesus ang tanong tungkol sa kanyang pagdating at ang katapusan ng mundo. Binanggit ni Hesus ang “katapusan” sa mga talata 6 at 14. Sinabi ni Hesus na nagsasalita siya tungkol sa pinakamatinding kapighatian na mangyayari sa kasaysayan ng mundo (21). Pagkatapos ng mga pangyayaring ito, makikita ng lahat ng bansa ang muling pagbalik ni Hesus (30). Ang serye ng mga pangyayari ay magtatapos sa pagdating ng Panginoon at ang pagtitipon ng mga anghel sa kanyang bayan (27, 30-31).

► Kung nanaisin, maaaring tingnan ng grupo ang Lucas 21 at Marcos 13 upang gumawa ng katulad na obserbasyon.

Sa mga naunang seksiyon ng leksiyong ito pinag-aralan natin ang ilang detalye tungkol sa pitong taong Kapighatian. Ang ilan sa mga detalyeng iyon ay tungkol sa dios-diosan na tinatawag na “kasuklam-suklam na naging dahilan ng pagkatiwangwang”. Sa seksiyong ito pag-aaralan natin ang mga karagdagang reperensiya sa Biblia tungkol sa kasuklam-suklam nang hindi pinag-babalik-aralan ang mga napag-aralan na.

Inilalarawan ng Daniel 11 ang isang serye ng pandaigdigang di-pagkakasundo. Malaking bahagi ng kabanata ang naglalarawan sa mga digmaan ng isang hari na tila ba ang Antichrist. Karamihan sa kabanatang ito ay tinupad ni Antiochus Epiphanes. Gayunman, sinasabi ng Daniel 12:1-2 na sa panahong iyon magkakaroon ng panahon ng kaguluhan na higit pa sa alinmang naunang pangyayari, subali’t ang mga Judio na “nakasulat sa aklat” ay maliligtas. Sinasabi rin nito na magkakaroon ng muling pagkabuhay. Malinaw na ang ultimong katuparan ng siping ito ay mangyayari sa mga huling araw.

Ipinahiwatig ni Hesus na ang kasuklam-suklam na inihula ni Daniel ay sa hinaharap pa (Mateo 24:15-16). Sinabi niya na ito ay isang bagay na “tatayo sa banal na dako”. Ang paglalagay ng bagay na ito ay masusundan ng pagsakop sa Jerusalem. Magsisimula sa panahong iyon ang isang nakakikilabot na panahon ng pagdurusa para sa Israel (Lucas 21:20).

Tinukoy ni apostol Pablo ang isang tao na darating bago ang pagdating ng Panginoon at mag-aangkin na siya ang Diyos at aasahan ang pagsamba sa kanya sa templo (2 Tesalonica 2:1-9). Gagawa siya ng mga himala na lilinlang sa mundo. Wawasakin siya sa pagbabalik ni Kristo.

Kahit na sa simula ay iisipin ng mga Judio na ang Antichrist ang kanilang Mesiyas, hindi sila papayag na sambahin siya, dahil iniutos ng Diyos ang isang mahigpit na pagkakaiba sa pagitan ng hari at ng saserdote; ang kanilang mahigpit na pananaw sa nag-iisang Diyos ay hindi magpapahintulot sa kanila na sambahin maging ang Mesiyas mismo. Ang kanilang pagtanggi na sambahin siya ang magiging dahilan kaya’t sisirain niya ang tipan na ginawa niya sa kanila (Daniel 9:27).

► Sama-samang tingnan ang Pahayag 13:7-8, 13:15-17, at 14:9-11.

Sa Pahayag 13 ang kaharian ng Antichrist ay sinisimbolo ng isang kakila-kilabot na hayop. Pagkatapos tinawag sa sipi ang Antichrist bilang “ang Halimaw”, dahil siya ang naghahari sa kahariang ito. Si Satanas ay tinawag na dragon sa siping ito at sa iba pang lugar sa aklat ng Pahayag. Ang buong mundo, maliban sa mga Kristiyano, ay sumamba sa Antichrist (13:8). Ang mundo ay nalinlang ng mga himala (13:12). Sasambahin ng mundo ang isang imahen ng Antichrist (13:12-15).

Sinasabi ng mga talatang ito na ang Antichrist ay magiging hari sa buong mundo at sasambahin ng lahat maliban sa mga Kristiyano. Ang mga tumatangging sambahin siya ay papatayin. Hindi maaaring magnegosyo ang mga hindi tumanggap ng kanyang marka, na kumakatawan sa pagsamba sa kanya.

Ang katapatan sa Antichrist ay pagrerebelde laban sa Diyos. Ang sinumang tumatanggap sa marka ay hinatulan na sa walang hanggang kaparusahan.

[1]Hindi natin dapat isipin na ang awtoridad ng Antichrist ay lubusan o ang kanyang mga batas ay lubusang ipinatutupad sa lahat ng panig ng mundo. Inilalarawan sa Daniel 11:21-45 ang Antichrist na nasa hindi nagbabagong pandaigdigang di-pagkakasundo. Hindi siya nagtatagumpay sa pagtatatag ng pandaigdigang kapayapaan. Nangangahulugan ito na may ilang bansa na hindi lubusang magpapasailalim ng kanyang lubusang kontrol.

► Dapat basahin ng isang mag-aaral ang Zacarias 14 para sa grupo.

Tila inilalarawan sa Zacarias 14 ang mga huling araw (lalu na ang talatang 9 at 16-17). Ang mga tao mula sa lahat ng bansa ay dumarating taon-taon upang sambahin ang Diyos sa Jerusalem. Subalit ang Pahayag 14: 9-11 ay nagsasabi na ang sinumang tumatanggap sa marka ng halimaw ay hinatulan na sa walang hanggang kaparusahan. Gagawa ang Antichrist ng isang batas na nag-uutos na dapat tumanggap ng marka ang lahat tao at sambahin siya, subali’t malinaw na hindi siya magtatagumpay na ipatupad ang marka sa lahat ng tao sa lahat ng lugar.

► Dapat basahin ng isang mag-aaral ang Pahayag 16:13-16 para sa grupo.

Isang matinding digmaan ang magaganap sa katapusan ng tribulation. Ang lahat ng hukbo ng daigdig ay magtitipon-tipon para sa digmaan. Mangyayari ito sa “araw ng Makapangyarihang Diyos” na tila isang paraan din ng salitang araw ng Panginoon.

Mahirap maunawaan ang intensiyon ng mga tagapanguna na magtitipon-tipon upang labanan ang Diyos. Alam ba nila na nilalabanan nila ang Diyos? May mga iskolar na nagsasabi na marahil nagtitipon-tipon ang mga hukbo upang labanan ang isa’t-isa para sa pagkontrol sa mundo, at pagkatapos ang hukbo ng Diyos ang huling darating. Kung iyon ay tama, sagayun, mangyayari ang isang serye ng mga digmaan, at si Kristo ang magtatagumpay sa huling digmaan.

Maaaring inilalarawan ng Daniel 11:40-45 ang mga pagsasalungatan na mangyayari malapit sa katapusan. Tila ihinuhula ng sipi ang mga pangyayari sa mga huling araw, dahil ang mga pangyayari ay sinusundan ng muling pagkabuhay at walang hanggang gantimpala (12:2-3).

► Dapat basahin ng isang mag-aaral ang Pahayag 19:11-21 para sa grupo.

Inilarawan sa Pahayag 19:11-21 ang pagbabalik ni Hesus kasama ng kanyang hukbo. Sinasabi ng talatang 19 na ang Antichrist at ang mga hukbo ng sanlibutan ay nagsama-sama upang labanan si Kristo, na nagpapahiwatig na ito ang digmaan ng Armageddon.

Ang digmaan ay hindi magiging isang tipikal na di-pagkakasundo sa pagitan ng mga hukbo. Wawasakin ni Kristo ang kanyang mga kaaway sa pamamagitan ng kanyang binibigkas na salita (talatang 21).

Ang digmaan ng Armageddon ay magiging pagpapakita ng kapangyarihan ng Diyos sa buong mundo, higit pa kaysa alinmang demonstrasyon sa kasaysayan. Ang pananampalataya ng mga Kristiyano ay mapatutunayang totoo pagkatapos ng pamumuhay sa loob ng daang taon sa isang mundo na tila kontrolado ng kapangyarihan ng tao na hindi pinapansin ang Diyos. Darating ang panahon na hindi na ipagwawalang-bahala ng sinuman ang Diyos.

Sa isang mas naunang leksiyon, pinag-aralan natin ang 2 Tesalonica 1. Ngayon titingnan natin ang pagpapatuloy ng mensaheng iyon tungkol sa mga huling araw.

Nag-aalala ang mga taga-Tesalonica na ang araw ng Panginoon ay magaganap na sa lalong madaling panahon. May ilang nag-iisip na maaaring ito’y nakalipas na, nakaraan na. Hindi nila nalalaman kung paanong makakaapekto sa kanilang buhay ang pag-asa sa pagdating ng araw na iyon. Ang paksang iyon ay napakanapapanahon sa mga taong umaasa na ang mga huling araw ay talagang malapit nang dumating.

► Dapat sama-samang tingnan ng grupo ang 2 Tesalonica 2:1-17.

Pansinin na ang unang tatlong talata ay bumabanggit tungkol sa maling paggamit ng pag-aaral sa mga huling araw. Mayroong lumilito sa iglesya. Hindi nila tiyak kung ano ang dapat nilang gawin. Sinabi ng apostol na ang maling katuruang ito ang nakakalinlang sa kanila.

Inilalarawan ng mga talata 3-9 ang isang taong tinaguriang “ang makasalanang lalaki” na humihingi ng pagsamba sa templo at wawasakin sa pagdating ni Kristo. Sinabi sa kanila ng apostol na hindi nila dapat asahan ang araw ng Panginoon bago mangyari ang mga bagay na iyon.

Ang pangwakas ay nasa mga talata 15-17, na nagsisimula sa salitang samakatuwid. Sinabi sa kanila ni Pablo na magpatuloy sa buhay Kristiyano na kanilang natutuhan. Dapat silang magpatuloy sa pagsasabi ng mga salita at gawin ang mga gawaing nakalulugod sa Diyos.

(1) Takdang-Araling Isusulat: Nagbibigay ba ng hula ang Biblia tungkol sa isang espesipiko, sa hinaharap, na pitong-taong na tinatawag na tribulation? Patunayan ang iyong sagot mula sa Banal na Kasulatan.

(2) Pag-aaral ng Sipi: Maghanda ng isang leksiyon o sermon sa 2 Tesalonica 2. Maaari kang magdagdag ng materyal patungkol sa mga huling araw mula sa ibang bahagi ng Banal na Kasulatan. Tiyakin na gagawin mo ang parehong pangunahing punto sa dulo na ginawa ng apostol.