Lesson 15: Mocha e Moholo

Qetellong ea thuto ena, baithuti ba lokela ba be ba ka:

(1) Utloisisa pono ea Molimo mabapi le boikarabelo ba bohlokoa le litaba tsa lilemo tsa bacha ba baholo.

(2) Hlomelloa ho susumetsa bacha ba baholo ho etsa liqeto tse bohlale le ho utloa litaelo tsa Molimo.

Ha Khotso e sa le ngoana, batsoali ba hae ba ile ba mo ruta ho sebetsa hantle. O ne a lula a thabile ha a e-na le monyetla oa ho sebetsa le ho fumana chelete. O ne a lula a itokiselitse ho etsa mosebetsi ofe kapa ofe oo motho a ka mo hirelang oona. Ha e sa le mocha o ne a etsa mosebetsi oa jareteng, a tsamaisa likoranta le ho lokisa libaesekele. Khotso o ne a thahasella ho ba rakhoebo empa o ne a tseba hore Molimo o mo biletsa bo-sebeletsing. Khotso o ile a ithuta setsing sa Bibele. E le ho lefella litefiso tsa sekolo o ne a etsa mosebetsi oa ho hloekisa ofisi, tlung ea thekiso ea lijo, le ho hloekisa jarete. Ha a qeta sekolong, o ile a qala tšebeletso, empa ka linako tse ling o ne a penta matlo kapa a lokisa mehaho hobane tšebeletso ea hae e ne e sa mo tšehetse ka ho feletseng. O ne a lula a leka ho etsa hore boikarabelo ba bosebeletsi le ntšetsopele ea botho e be lintho tse tlang pele bophelong ba hae ho e-na le ho etsa phaello e tlang pele bophelong ba hae, le hoja a ne a e-na le mosali le bana bao a lokelang ho ba hlokomela. Qetellong ho ile ha fihla nako ea hore tšebeletso ea hae e mo tšehetse ka ho feletseng.

► Baithuti ba lokela ho bala 1 Timothea 4:12 le Dillo Tsa Jeremia 3:27 bakeng sa sehlopha.

1 Timothea o ile a ngolloa mocha e moholo ea neng a ikarabella bakeng sa ho okamela likereke tse ’maloa. Ho tloha ho 1 Timothea 4:12 rea bona hore Molimo o lebeletse hore bacha ba lumelang e be mehlala bothong le boitšoarong ba bona. Ba lokela ho etsa hore e be ntho e tlang pele ho thehoa lithutong tsa Bokreste. Ba lokela ho bontša bohloeki le lerato le se nang boithati litšebelisanong tsohle le ba bang. Boitšoaro ba bona le puo ea bona li lokela ho hlompha Molimo le ho mofa khanya.

Bacha ba lumelang ba lokela ho phela bophelo bo hlokolosi, bo nang le sepheo. Ha baa lokela ho sebelisa hampe matla ao Molimo a ba fileng ’ona nakong ena ea bophelo. Ha baa lokela ho senya menyetla ea ho ithuta, ho ntlafatsa tsebo, ho sebeletsa ba bang le ho jara boikarabelo. Lilemo tsa bocha le ho ba motho e moholo ha lia lokela ho sebelisoa litakatsong tsa boithati. Ke lilemo tsa sehlooho tsa kholo le bosebeletsi. Molimo a ka nolofalletsa balumeli ba bacha ho ithuta boitšoaro e le hore ba behe litholoana.[1]

Mekhoa e fapaneng ea ho talima mosebetsi

Merabeng e meng, ho tloaelehile ho bona batho ba lutse ‘me ba sa sebetse haholo, leha ba ka ba bacha ebile ba phetse hantle. Le hoja ba e-na le litlhoko ’me ba ikarabella ho ba bang, ha ba na tšusumetso ea ho sebetsa. Ba re ba ne ba tla sebetsa haeba ba ne ba hiriloe ka meputso e metle. Ha baa ikemisetsa ho sebeletsa meputso e tlaase kapa ho etsa mosebetsi o bonahalang o le boemong bo tlaase. Ha baa ikemisetsa ho sebeletsa ho ntlafatsa tikoloho ea bona haeba ba sa etse phaello e tlang ho bona ka kotloloho.

Ka linako tse ling batho ba hiriloeng ba thabela ho ba le mosebetsi. Mohlomong ba lula naheng eo ho eona karolo e khōlō ea batho e sa khoneng ho fumana mosebetsi o motle. Ba thabela ho apara seaparo sa mosebetsing oa bona 'me ba motlotlo ka boemo ba mosebetsi oa bona. Empa le hoja ba thabetse boemo ba bona ha ba nahane hakalo ka ho sebeletsa mohiri kapa ba tlileng litšebeletsong. Ba motlotlo ka hoba karolo ea kompone, empa ha ba ele hloko hore na ke hobaneng ba hiriloe.

Ho fapana le batho ba hanang ho sebetsa, batho ba bang ba tsepamisitse maikutlo haholo mesebetsing kapa ho fumaneng chelete. Mohlomong ba ile ba fallela sebakeng seo mosebetsi o lefang moputso o phahameng haholo ho feta sebaka sa habo bona. Ba batla ho sebetsa le ho fumana chelete e ngata kamoo ba ka khonang. Ha ba natse likarolo tse ling tsa bohlokoa tsa bophelo, tse kang ho hōlisa likamano tsa bona le Molimo le malapa a bona.

Batho sechabeng ba ka ’na ba etsa lintho tsena, empa balumeli ha baa lokela ho etsa feela se tloaelehileng moetlong oa bona. Ho e-na le hoo, ba tlameha ho fumana seo Molimo a se buang, ‘me ba mo mamele. Bibele e bua haholo ka mosebetsi, mafolo-folo le tlhahiso.[1]

Qaleho ea Mosebetsi

Molimo o na le boqapi (Lipesaleme 104:24). Molimo o hlahisa litholoana (Lipesaleme 104). Molimo o lula a sebetsa, o ameha bophelong ba batho ka bomong le litabeng tsa lefatše tsa nako eohle (Johanne 5:17). Ha Molimo a bōpa batho, o ile a ba etsa ka setšoantšo sa hae, e le se bontšang boena. O ne a batla hore batho e be batsamaisi ba boqapi le ba hlahisang litholoana tsa pōpo ea hae. Molimo o file moloko oa batho borena holim’a liphoofolo tsohle holim’a lefatše, leoatle, le leholimo (Genese 1:26). O entse batho balaoli le balebeli ba lihloliloeng lefatšeng (Genese 1:28-30).

Mosebetsi ke karolo ea moralo oa Molimo bakeng sa bophelo ba motho. Ho tloha qalong, Molimo o file batho boikarabello bo boholo. Bohle ka bo-mong retla ikarabello pela hae hore na ka botšepehi re entse mosebetsi oo a re fileng ona na.

Melaoana e tsoang ho Diproverbia

Buka ea Diproverbia e ne e ngoletsoe bacha haholo-holo, e ba ruta ho nahana le ho itšoara ka bohlale. Diproverbia e bua haholo ka mosebetsi.

► Baithuti ba lokela ho balla sehlopha temana ka 'ngoe ea mangolo.

Diproverbia 6:6-11, Diproverbia 10:5. Bohloa ke mehlala e metle bakeng sa batho.

• Bo sebetsa ka mafolo-folo le ha ho se motho ea bo qobellang ho sebetsa. Ha ho motho ea bo bolellang seo bo lokelang ho se etsa kapa hore na bo se etse joang, le ha ho le joalo bo na le tlhahiso. Ho tsoa ho bohloa, re ithuta hore ha rea lokela ho qobelloa ho sebetsa. Re lokela ho batla ho sebetsa hobane ke kamoo Molimo a fanang ka litlhoko tsa rōna kateng.

• Bo sebetsa ha e le nako ea ho sebetsa. Ho na le linako tsa mosebetsi, 'me ho na le linako tsa mesebetsi e meng le ho phomola. Ho ka ba molemo ho botsa, “Ke lokela ho etsa eng hona joale?”

• Bo sebetsa ha ho sa ntse ho e-na le monyetla oa ho sebetsa. Linako li’a fetoha, le monyetla oa ho ba le lisebelisuoa o ka feta. Menyetla ea rōna le eona e-ea tla e fete. Re tlameha ho sebelisa monyetla oo re nang le oona hona joale, kapa otla senyeha.

• Bo sebeletsa hore bo tle bo be le lijo tseo bo tlang ho li hloka hamorao. Ha rea lokela ho robala kapa ho phomola ha e le nako ea ho sebetsa. Haeba re e-ba botsoa ha re lokela ho phathahana ka ho etsa mosebetsi o motle, litlhoko tsa rōna tsa ka moso ha li na ho fihlelleha. Re lokela ho sebetsa kajeno ho fihlella litlhoko tsa hosane.

Diproverbia 19:15, Diproverbia 20:4, Diproverbia 12:24. Molimo o thehile lefatše ka tsela eo likhetho tsa rōna li nang le litlamorao tsa sebele(Bagalata 6:7).

Haeba re tsoelapele ho ba botsoa ka ‘mele ea rōna, re tla fokola ‘meleng. Haeba re tsoelapele ho ba botsoa mehopolong ea rōna, bokhoni ba rōna ba ho ithuta, ho nahana, le ho bea mabaka bo tla fokotseha.

Haeba re hana ho sebetsa ha bokhoni bo le teng, Molimo o re, re lokela ho hloka lijo. (Bala 2 BaThesalonika 3:6-12).

Haeba re le mafolo-folo, hangata Molimo o tla re putsa ka menyetla e eketsehileng le boikarabelo bo boholoanyane.

Molimo o thehile litlamorao tse akaretsang bakeng sa khetho ea rōna. Ha na monyetla oa khetha litlamorao tsa rōna, empa re na le monyetla oa khetha seo re tlang ho se etsa!

Diproverbia 14:23, Diproverbia 20:6. Batho ba bang ba lekanya hoba ba hlalefile, empa ba hana ho sebetsa. Ba rata ho lora le ho bolela kamoo lintho li lokelang ho etsoa kateng, empa bona ka bo-bona ha ba etse letho. Molimo o batla hore re sebetse, eseng feela ho buoa ka hona. O batla hore re nke boikarabello le ho tšepahalla ho seo re itseng re tla se etsa.

Diproverbia 15:19. Ka nako tse ling batho ba botsoa ka tsela eo ba etsa ntho e ‘ngoe ka eona. Ba khetha tsela e bobebe, esita leha eba e ke ke ea e-ba litlamorao tse ntle. Mohlomong ba etsa ho hong ka theko e tlase, empa seo ba se etsang se ke ke sa tšoarella ha nako e ntse e ea. Mohlomong mokhoa oa bona o hloka boiteko bo fokolang, empa sehlahisoa se felileng e tla ba boleng bo tlase. Mohlomong ba inehela khatellong ea batho ba bang ho e-na le ho ikemisetsa ho sebetsana le mathata le ho etsa se nepahetseng.

► Ke mehlala efe eo o ka nahanang ka eona moo batho ba leng botsoa mokhoeng oa bona oa etsa ntho e ‘ngoe?

Maele ana a re ruta hore ha re le botsoa hore na re etsa seo re se etsang joang, ho tla re bakela mathata le ho batho ba bang hamorao. Empa ha re etsa se nepahetseng, re tla putsoa ka moputso o motle. Re lokela ho ba hlokolosi le ka botlalo hona joale, e le hore re tle re thabele meputso e molemo ka ho fetisisa hamorao.

► Ke mehlala efe eo u ka nahanang ka eona ha botsoa bo bakile mathata le khathatso hamorao? Ke mehlala efe eo u ka e nahanang ha botšepehi le mafolo-folo li bile le litholoana tse ntle?

Diproverbia 12:11, Diproverbia 21:20, Diproverbia 28:19. Bacha ba baholo, Molimo ha aa le fa matla le bophelo bo botle boo le nang le bona e le hore le ka bo senya ka lintho tse se nang thuso. O le tšepetse hore le be baokameli ba molemo ba matla a ’mele le a kelello. O le file menyetla ea ho mo sebeletsa. Ho ba batsamaisi ba tšepahalang ho tla hloka hore le be le boitšoaro. Le ke ke la khona ho phethahatsa takatso e 'ngoe le e 'ngoe ea ho ithabisa. Le tla tlameha ho tsepamisa matla a lona, lisebelisoa, le nako ea lona ho phethahatsa merero ea Molimo.

Molimo o lebeletse hore o itjare bakeng sa litlhoko tsa hau, litlhoko tsa lelapa la hau (1 Timothea 5:8), le litlhoko tsa ba lokeloang ke thuso le ba se nang ea ka ba thusang (1 Timothea 5:3-16, Baefese 4:28, Jakobo 1:27, Jakobo 2:15-16).

I BaThesalonika 4:11-12 e re,

Le ikemisetse ho iketla, le ho iketsetsa mesebetsi ea lona, le ho sebetsa ka matsoho a lona, joalokaha re le laetse; hore le tle le tsamaee ka bokhabane pela ba kantle, le tle le se ke la hloka letho.

Ena ka thato ea Molimo sebakeng sa balumeli.

► Ke mefuta efe ea mosebetsi eo balumeli ba lokelang ho ikemisetsa ho o etsa? Na boemo sechabeng bo lokela ho talingoa? Haeba ho joalo, ka tsela efe kapa ho fihlella hokae?.

Re tlo haha holima sehlooho sa mosebetsi ka ho buisana ka lichelete. Re sa tsoa buisana ka mabaka a bohlokoa ka ho fetisisa ao Molimo a batlang hore re sebetse ka ona, ho kenyeletsa le phethahatso ea litlhoko tsa rōna le litlhoko tsa ba bang. Mosebetsi ke tsela e tloaelehileng ea Molimo ea ho fihlela litlhoko tsa bohlokoa—lijo le liaparo (1 Timothea 6:8). Libakeng tse ngata, batho ba fumana chelete ka ho sebetsa, eo joale ba e sebelisang ho fihlella lintho tse sebelisoang. Libakeng tse ling, batho ba pataloa ka lijo, setša kapa ntlo, kapa ho sebeletsoa bakeng sa chelete. Ka tsela efe feela, Molimo o fihlella litlhoko tsa batho ka ho sebetsa ha bona.

Lirapa tse ngata tsa mangolo li bua ka sehlooho sa chelete. Tsela eo re nahanang ka eona le ho sebetsana le chelete ka eona e ama likamano tsa rōna le Molimo haholo le batho ba bang. Kaha e bohlokoa haholo, Molimo o batla hore re be le kutloisiso e nepahetseng ea chelete le tšebeliso ea eona.[1]

Melao-motheo e tsoang Diproverbia

► Baithuti ba lokela ho bala serapa ka seng sa lengolo bakeng sa sehlopha.

Mohloli oa tšireletso ea rōna ke ofe?

1. Qetellong Molimo ke eena mofani oa ba lokileng (Diproverbia 10:3).

2. Ha rea lokela ho rata le ho tšepa maruo, hobane a na le matla a fokolang le a nakoana e seng kae(Diproverbia 11: 4, 28.

► Ke mehopolo efe, sebōpeho, le Diketso tse bonahatsang tšepo ho Molimo joalo ka mofani le tšireletso ho motho?

Lintho tse ngata li bohlokoa haholo ho feta ho ruoa; mohlala:

1. Ho ba le likamano tse ntle le ba bang (Diproverbia 15:17).

2. Hoba le tsebo le bohlale (Diproverbia 8:10-11).

3. Ho tšaba Molimo le hoba kamanong e nepahetseng le eena (Diproverbia 15:16).

4. Hoba le tlotla ka baka la boitšoaro bo botle (Diproverbia 11:16).

5. Ho tšepahala, ‘nete, le mosa (Diproverbia 19:22).

► Ke efe ho lintho tsee e qholotsang haholo ho uena ka baka la maemo a hau?

Melaoana ea ho alosa chelete hantle:

1. Fumana chelate ka mosebetsi oa ‘nete le botšepehi (Diproverbia 10:4).

2. Ka mamello bokella chelete ka nako (Diproverbia 13:11).

3. Tlotlisa Molimo ka ho mo fa karolo ea pele ea keketseho ea hau (Diproverbia 3:9-10).

4. E ba le lereko ho bafumanehi (Diproverbia 11:24-25, Diproverbia 14:21, Diproverbia 19:17, Diproverbia 21:13).

► Ke efe linthong tsse e u sokolisang haholo?

Litemoso khahlanong le tšebeliso e mpe ea chelete:

1. U se ke oa hana Lentsoe la Molimo ka lebaka la monyetla oa ho ba le chelete (Diproverbia 10:2, Diproverbia 15:27).

2. U se ke oa etsa liqeto tse potlakileng kapa tse bohlasoa (Diproverbia 21:5).

3. U se ke oa tšepisa ho patalla batho melato ea bona (Diproverbia 6:1-5; Diproverbia 17:18).

► Ke efe ea melao-motheo ee ho tsoa ho Diproverbia o sa natsoeng ka ho fetisisa schabeng sa heno?

► Baithuti ba lokela ho bala Diproverbia 13:20 le 1 Bakorinthe 15:33 bakeng sa sehlopha.

Setsoalle se haufi ke e ‘ngoe ea litšusumetso tse bohlokoa haholo bophelong ba mocha ea lilemong. Batho hangata ba fetoha metsoalle e haufi le ba ratang ntho tseo ba li ratang. Empa setsoalle se fetola motho ka mong ka hara setsoalle, ho ntlafala kapa ho senyeha. Ho tsoela pele ho ba metsoalle e haufi le motho ha nako e ntse e ea ho tla u susumetsa. Maikutlo a hau. Tsela ea ho talima lintho, thuteho, lintho tsa mantlha, boitšoaro, khetho, le semelo li tla ameha. Metsoalle ea hau e haufi e tla u susumetsa ka mohlala oa bona, empa hape le ka kananelo ea bona kapa ho se ananele khetho ea hau le ka mantsoe a bona a susumtsang.

► Moithuti ka mong o lokela ho ngola fatše mabitso a batho ba 1-5 ba ikhethang ho araba potso ka ‘ngoe:

• Ke atisa ho sheba mang bakeng sa tumello le tiiso?

• Ke bua le mang ka mathata a bophelo ba ka?

• Ke batla keletso ea mang ha ke e-na le qeto eo ke lokelang ho e etsa?

• Ke boitšoaro ba mang bo susumetsang ba ka?

• Ke arolelana lifilosofi tsa mang?

Nahana ka batho bao mabitso a bona u a ngotseng. Semelo sa bona se joang? Boitšoaro ba bona bo joang? Lipolelo tsa bona li joang? Haeba o latela mehlala ea bona, na o latela Kreste? (1 Bakorinthe 11:1). Na ke batho ba tšoailoeng ke litšobotsi tsee:

• Ba tšaba Molimo (Deuteronoma 10:12, 20, Dipesaleme 112:1).

• Ba boptjoa ke Lentsoe la Molimo (Johanne 17:14-17).

• Ba etsa hore e be ntho e tlang pele bophelong ba bona ho khahlisa le ho mamela Morena nthong e ’ngoe le e ’ngoe (2 Bakorinthe 5:9-10).

Na ba u susumeletsa ho leba motsamaong o haufi, hape u utloa Molimo? Na ba u bolella seo e leng ‘nete (se bapileng le Lentsoe la Molimo), kapa na ba u bolella se leng bonolo ho ka mameloa? Na ba u khothaletsa ho etsa seo u ikutloang u batla ho se etsa, kapa na ba u khothaletsa ho etsa ho leng hotle mahlong a Molimo le ha ho le thata?

Ho kile ha ba le mohlankana ea nang le tšusumetso. Bacha ba bang Ha ba bua ntho e phoqang kapa e sa hloekang, ba ile ba mo sheba, ho bona hore na oa bososela. Ha ba etsa ntho e ’ngoe e tletseng borabele, ba ne ba mo sheba hore na o tla mo panya mahlo, e leng se bontšang hore o oa amohela. Ba ne ba batla ho mo khahlisa. Empa ha ho le ea mong oa bona ea ileng a khaotsa ho nahana ka lipotso tsena: Ke hobaneng ha ke batla tumello ea hae? Na ke motho eo ke lokelang ho leka ho mo khahlisa? Na semelo sa hae le boitšoaro ba hae ke mohlala o motle ho 'na?

Ho nka boikitlaetso ho nahana ka litaba tsena. Balumeli ba lokela ho ba le sepheo s ikhethang mabapi le hore na ba khetha bo-mang ho ba metsoalle ea bona e haufi le basusumetsi ba bona ba ba baholo. Ke ‘nete hore Molimo o batla batho ba hae ho susumetsa ba bang ba e-song ho hole semoeeng kapa bao eseng balumeli, empa batho bao ha ba tšoanelehe ho ba metsoalle ea rōna e haufi-ufi, baeletsi le ba susumetsang. Ha rea lokela ho batla tumello ea bona.

► Moithuti o lokela ho bala Dipesaleme 101 bakeng sa sehlopha.

Tsena Dipesaleme li ngotsoe ke Morena Davida. O ne a tšaba Molimo. O ile a itlama pela Morena hore otla phela bophelo ba botšepehi. O ne a tseba hore batho bao a ba lumelletseng ho mo susumetsa ba ne ba tla mo thusa ho phethahatsa tšepiso eo kapa ba mo thibele ho eona. Ka lebaka lena, o ile a ikemisetsa ho khetha feela batho ba tšepahalang, ba tšabang Molimo hore e be bahlohlelletsi ba hae.

Ha re marena joaloka Davida ’me hangata ha re na matla kapa boikarabelo ba ho bea kotlo ho ba etsang bobe joaloka ha Davida a ne a tšepisitse ho etsa. Leha ho le joalo, re tlameha ho latela mohlala oa Davida ka litsela tse ling. Re tlameha ho itlama ho phela bophelo ba botšepehi. Re tlameha ho etsa qeto ea hore re tla khetha feela batho ba tšabang Molimo hore e be metsoalle ea rōna e haufi-ufi le ba susumetsang ka ho fetisisa.

Ho ba motho e moholo ke nako ea ho etsa liqeto tse ngata, tseo tse ling tsa tsona li tla ba le litholoana tsa bophelo bohle (kapa esita le tse sa feleng).[1] Tse latelang ke tse ling tsa lipotso tseo re lokelang ho li hopola ha re nahana ka khetho ea rōna:

• Na ntho ee e ipapisitse le seo Molimo o batlang hore ke be sona? Batho ba re bolella hore, “eba uena.” “eba le ‘nete ho uena.” “latela pelo ea hau.” Empa re bilelitsoe ho Tsepahala ho Kreste, eseng ho rōna. Ha e le hantle, o re bolella hore re re “chee” litakatsong tsa rōna ha li loantšana le ho mo mamela (Mattheu 16:24-26). Molimo o re bitsa hore re phele ka mokhoa oa hae oa ho loka. O hlalosa batho ba tla hlohonolofala, ba mo tšabang le ho ba le kutlo ho eena linthong tsohle (Dipesaleme 15, Dipesaleme 112, Mattheu 5:3-11). Ha re ntse re mo latela ka botšepehi, re fetoha batho bao Molimo a batlang hore re be bona.

• Ketso ee e tla ama botumo ba ka joang? Ka khetho e 'ngoe le e' ngoe eo re e etsang, re iketsetsa botumo ba rōna (Diproverbia 20:11). Ke ’nete hore re lokela ho tsotella haholo seo Molimo a se nahanang ka rōna. Empa ha re tsejoa re le batho ba tšepahalang, re susumetsa ba bang bakeng sa se nepahetseng ’me re fetoha lipaki tse kholoang tsa Kreste. Diproverbia 22:1 e re bolella hore re lokela ho etelletsa pele ho ba le botumo bo botle ho feta ho ba le leruo la lintho tse bonahalang.

• Ke litlamorao life tse tla latela khetho ee? Diproverbia 22:3 e re bontša hore re lokela ho hlophisetsa bokamoso ka ho etsa likhetho tse ntle kajeno. Ha re ntse re nahana ka likhetho tsa rōna, re tlameha ho nahana ka liphetho tse ka bang teng ka e 'ngoe le e 'ngoe. Khetho ea rōna e tla ama bophelo ba rōna le bophelo ba ba bang joang? Khetho ea rōna etla tšoaetsa bophelo ba rōna le bophelo ba ba bang joang?

Diproverbia 4:23 e re bolella hore khetho ea rōna le boitšoaro ba rōna li tsoa litšusumetsong tsa lipelo tsa rōna. Haeba re batla ho etsa liqeto tse ntle tse khahlisang Molimo, re tlameha ho etsa bo’nete ba hore rea tšepahala ho eena (Deuteronoma 6:2, 5-6, Deuteronoma 13:4).

Bacha ba baholo ba na le boikarabelo ba ho ikhethela, ho akarelletsa le tse amanang le seo ba se jang, ho ikoetlisa ha bona le mekhoa ea ho ikoetlisa le mekhoa ea ho robala. Boitšoaro bo bohlokoa libakeng tsena kaofela (1 Bakorinthe 9:27). Balumeli ba lokela ho hopola hore ’mele ea bona ke litempele tsa Moea o Halalelang ’me ba lopolotsoe ke mali a Kreste. (1 Bakorinthe 6:19-20). Hobane le rōna re bahlanka ba Molimo, re lokela ho hlokomela ‘mele ea rōna le ho ikhalema re tle re etse likhetho tse ntle mosebetsing o mong le o mong, re tle re be ba molemo ho eena.[1]

► Baithuti ba lokela ho bala 1 Bakorinthe 6:12-13, 19-20, bala 1 Bakorinthe 10:31 bakeng sa sehlopha.

Nahana ka khetho ea hau ea lijo le bongata ba tsona bekeng e fetileng. Mohlomong o bile le lijo tse ngata, hape le khetho tse ngata tsa seo o neng o ka se ja. Mohlomong o bile le se fokolang bakeng sa ho ja, ka likhetho tse fokolang. Ka tsela efe kapa efe, ho ja le ho noa ha hau ho lokela ho tlotlisa Molimo. Haeba ho ne ho ka khoneha hore Jesu a memeloe ho lula le ho ja le uena, na u ne u ka khetha lijo le likarolo tse tšoanang tseo u tloaetseng ho li khetha? Sena se ka ’na sa bonahala e le potso e hlokang kelello, empa mohlomong e ka sebeletsa e le khopotso ea ho nahanela, ho leboha le ho itaola ha u ntse u e-ja.

Boroko ke karolo e ‘ngoe eo ka eona balumeli ba lokelang ho bonahatsa boitšoaro. Ha rea lokela ho ba botsoa le ho robala haholo (Diproverbia 6:10-11, Diproverbia 20:13), leha ho le joalo Molimo o bopetse ‘mele ea rōna ho ba le phomolo e tloaelehileng le e lekaneng (Dipesaleme 3:5). Batho ba baholo ba phetseng hantle hangata ba hloka lihora tse 6-8 tsa boroko bosiu ka bong.

Moeklesia 5:12 e re bolella hore boroko ke moputso ho ba sebetsang ka mafolo-folo. Diproverbia 3:24 le Dipesaleme 4:8 li bua ka boroko bo monate, bo nang le khotso boo Molimo a bo fang bana ba hae. Ona ke mofuta oa boroko o tsosolosang 'mele ea rōna. Ka khotso ea Molimo, re lokolloa matšoenyehong le likhatsatsong tsa letsatsi, re ntse re tseba hore Molimo o tšepehang oa re hlokomela. Boroko bo tletseng phomolo bo khatholla ‘mele le kelello, ho re lokisetsa mesebetsi e tlang le tšebeletso.

Diproverbia 3:24 e fumanoa ka hare ho karolo ea buka ea Diproverbia e kenyeletsang litaelo tsa ho phela bophelo bo tlatsitsoeng ka bohlale, kutloisiso, le boinahano. Haeba o batla ho ba le boroko bo monate, o tlameha ho etsa liqeto tse bohlale likarolong tse ling tsa bophelo, ho kenyeletsa le bongata ba nako eo o e qetang o shebeletse seea-le-moea pono kapa lifilimi, ho sesa ka hara marang-rang kapa ho sebelisa mohala o bohlale, le ho qeta nako le metsoalle.

Boroko bo ka angoa ke khetho ea hau ea lijo, palo ea boikoetliso boo u bileng le bona, kamoo u ileng ua sebetsana le boemo bo thata kateng, kapa kamoo u sebelisitseng chelete ea hau kateng. Boroko bo ka ba monate ha likamano tsa rōna le ba bang li tletse litšobotsi tsa litholoana tsa Moea tse thathamisitsoeng ho Bagalata 5:22-23.

► Nka nako ho bala mangolo a qotsitsoeng mokhahlelong o ka holimo. Lekola le ho hlahloba boroko ba hau ka melao-motheo e fumanoang mangolong ana. Na ofa ‘mele oa hau phomolo eo o e hlokang ho sebetsa hantle kamoo Molimo a neng a rerile kateng? Hlokomela moelelo oa litemana tsa Lipesalema: Davida o li ngola maemong a mang a sithabetsang haholo empa leha ho le joalo o paka botšepehi ba Molimo ho thuseng ho tsosolosa ’mele oa hae borokong.

Ka popo ea Molimo, lilemo tse qalang tsa botho bo boholo li tletse ka boikarabello le matsoenyeho a mangata a batlang ho sebetsoa ‘me li baka khatello ea maikutlothe (Dillo Tsa Jeremia 3:27). Motho a ka 'na a leka ho qeta lengolo la thuto, ho qala khoebo, le ho sebetsa mosebetsi kapa mesebetsi e mengataMotho a ka 'na a leka ho qeta lengolo la thuto, ho qala khoebo, le ho sebetsa mosebetsi kapa mesebetsi e mengata. Ho na le likamano tse ngata tse hlokang hore motho e moholo e monyenyane a tsepamise maikutlo ka boomo. Lichelete, litlhoko tsa lipalangoang, le lehae kaofela li hloka tlhokomelo, empa li baka khatello ea maikutlo.

Khatello ea maikutlo e hlalositsoe e le “karabelo ea 'mele le maikutlo liketsahalong tse re sokelang kapa tse re phephetsang.”[1] Nahana ka hore na u talima maemo a hao joang. U sebetsa joang kelellong maemong ao u nang le 'ona?

Ha ntho e ‘ngoe e le bokamosong ba hau, o nahana joang ka eona? Ke maikutlo afe ao u itumellang ho a utloa mapapi le menyetla? Ke litsela life tsa ho talima lintho tse susumetsang hore na o tla sebetsana jang le boemo boo? Boikutlo ba hau bo akaretsang le botho ba hau ke bofe (Diproverbia 15:15)?

Pono ea hao, botho ba hao, le botho ba hao kaofela li ama tsela eo u arabelang ka eona maemong a bophelo’ le hore na u tla ba le khatello ea maikutlo e kae. Le hoja khatello ea kelello e le karolo e tloaelehileng ea bophelo, tsela eo u sebetsanang le khatello ea kelello ka eona ke taba ea botho. Ka linako tse ling ho tšoenyeha ho baka hlooho e opang, ho opeloa ke mesifa, ho kula, khatello e phahameng ea mali, liso, le bokooa bo bong bo bongata ba kelello, maikutlo le ’mele (Diproverbia 12:25). Karabelo e mpe khatellong ea maikutlo e ka sitisa tšebeletso ea hau ho Kreste haholo. Ka lebaka lena, ha se ntho e makatsang hore ebe Lentsoe la Molimo le re bolella hore re se ke ra khathatseha kapa ra tšoenyeha.

► Baithui ba balle sehlopha Mattheu 6:34, 1 Petrose 5:7, le Dipesaleme 105:4.

Ha re tobane le maemo a sithabetsang, re tlameha ho khetha ho tšepa le ho itšetleha ka Molimo, e leng eena feela ea se nang meeli. O phethahetse ka matla, bohlale, le molemo. O tsotella bana ba hae ka ho phethahetseng. O batla hore re hlokomele ho itšetleha ha rōna ho eena, ho mo tlisetsa ntho e ’ngoe le e ’ngoe e re amang, le ho batla matla a hae. Joalo ka ha re etsa, a ka re fa khotso, phomolo, le sohle seo re se hlokang. Ha re sa le bocheng ba rōna, re tlameha ho ithuta ho boloka khutso le ho khutsa ka pela Molimo ’me re emele hore a re etelle pele (Dipesaleme 46:10, Dillo Tsa Jeremia 3:25-27).

► Thathamisa maemo a sithabetsang ao u nang le 'ona hona joale. Karabo ea hau e lokela ho ba efe e thehiloeng Lentsoeng la Molimo?

► Thutong ena, ke efe mehopolo kapa melao-motheo e bileng mecha ho uena? Ke efe e meng ea melaoana ea Bibele eo o naha’neng ka eona e tšoanang likarolong tsee tsa bophelo ba mocha e moholo?

► Bophelo ba hau ba o le motho bo tlo ameha joang ke seo o ithutileng sona thutong ee?

► Kerekeng ea hau, ke efe ea lihlooho tsee e hlokang ho shebjoa haholo hara balumeli ba baholo ba bacha?

► U ka susumetsa mocha oa Mokreste ea holileng joang eo o motsebang ho nahana le ho itšoara ho latela Bibele likarolong tsena tsa bophelo?

Ntate oa Leholimo,

Kea leboha hore ebe Lentsoe la hao le re ruta mokhoa oa ho u phelela mohatong o mong le o mong oa bophelo. Kea leboha ka ho re lokisetsa ho phela bophelo bo behang litholoana le bo behang litholoana lilemong tsa rōna tsa bocha.

Re thuse ho u tlotlisa ka ho ba batsamaisi ba tšepahalang ba matla, lisebelisoa le menyetla eo u re fang eona. Re thuse ho ba le tšusumetso ea bomolimo ho ba bang le ho khetha metsoalle le baeletsi ba tšabang Molimo.

A re etseng liqeto tse bohlale le ho u tlotla ka ’mele ea rōna, likelello le meea ea rōna.

Amen

(1) Ka ho 1 Timothea 4:12, Pauluse o laela Timothea ho ba mohlala likarolobg tse ikhethileng. Ka mongolo, hlalosa karolo ka ‘ngoe ea likarolo tsena. Ebe o hlalosa kamoo e ‘ngoe le e ‘ngoe ea tsona e ka pheloang bophelong ba mocha enoa ea lilemong. Fana ka bonyane mohlala o le mong bakeng sa karolo ka ‘ngoe.

(2) Khetha e le ‘ngoe ea lihlooho ho tsoa thutong ena:

• Kholo le semelo

• Mosebetsi

• Lichelete

• Metsoalle e haufi

• Ho etsa liqeto

• Bophelo bo botle ba ‘mele

• Khatello ea maikutlo

Ngola bonyane lirapa tse tharo ka sehlooho seo u se khethileng:

• Akaretsa melao-motheo ea Bibele e amanang le sehlooho.

• Hlalosa tse ling tsa litlamorao tse ntle tse tsoaloang ke kutlo melaoaneng eo.

• Hlalosa tse ling tsa litlamorao tse seng ntle tse bang teng ha melaoana ena e sa natsoe.

Ha u ngola ka litlamorao tse ntle le tse mpe, etsa bo’nete ba hore u ho nahana ka liphetoho tsa khetho ea motho ho batho ba fapaneng: motho eo, lelapa la bona, motse oa bona, le kereke ea bona.