Lesson 1: U Bopetsoe Kamano

Qetellong ea thuto ena, baithuti ba lokela ba be ba ka:

(1) Elelloa le ho hlompha kamano eo Molimo a batlang hoba le eona le rōna.

(2) Utloisisa le ho hlompha setšoantšo sa Molimo ho motho e mong le e mong.

(3) Elelloa hore re na le boikarabello ho Molimo ka liqeto tseo re li etsang likamanong tsa rōna.

(4) Tseba hore Bibele ke buka ea taitaiso ea rōna bakeng sa likamano tsa bo-Molimo le hore re lokela ho etsisa Molimo likamanong tsa rōna.

Mangolong, re ithuta hore Molimo ke oa motho ka bo-mong, ea nang le likamano hape a buisana le ba bang, (BaHebheru 1:1-2). Lengolo le re bontša hore Molimo Ntate, Molimo Mora le Molimo Moea o Halalelang ba bile le kamano ka ho sa feleng.[1]

Molimo O entse maholimo, lefatše, leoatle le tsohle tse ho tsona (Eksoda 20:11). Dipesaleme 8:3-8 li re bontša hore moloko oohle oa batho ebile pōpō e ntle hape e molemo haholo. Molimo o bopile batho e le libopuoa tse nang le kamano joalo kaha le eena e le motho ea nang le kamano. Mangolong ‘ohle Molimo o memela batho kamanong e nang le bophelo le eena.[2]

Ho hotle hakakaang ho elelloa hore Molimo, ‘Mopi oa leholimo le lefatše o labalabela kamano hotsoa ho nna le uena!

► Moithuti o lokela ho bala Genese 3:8-9 bakeng sa sehlopha.

Nka khefu ha nakoana, u koale mahlo ‘me u nahanisise pono eo u qetang ho e bala. Sebelisa ho nahanisisa hoa hau ho tlisa litemana tsena bophelong. Utloa moea o pholileng sefahlehong sa hau ha u eme serapeng se setle mantsiboeeng a letsatsi. Mamela mehato ea maoto a Molimo ‘me u utloe karabelo e thotseng ea libupuoa tsa hae tse ratoang; Molimo a botsa, “O hokae na?”

Ebe u ka nahana hore na motsotso oo o bile joang, ha Molimo a ne a bitsa kopano ea monna le mosali. Ikhutse hape ho talimisisa pelo ea Molimo. Molimo o labalabela le ho batla kopano le Adama le Eva, le uena, hape lenna!

Leha ele mona re ikarohantse le Molimo ka ho se mo utloe (Isaia 59:2), Molimo o ntse a labalabela kamano le motho e mong le e mong ea phelang. Luka 19:10 e re bontša hore O batlana le moetsalibe e mong le e mong. Molimo O ntse a botsa, “O hokae na?” Hobane Jesu o re shoetse, re ka khutlela likamanong tse nepahetseng le eena, (Baefese 2:13, 19). ‘Na le uena re bopetsoe hoba le likamano le Molimo.

Bohle ba sa lumeleng popong e nang le sepheo ea lerato la Molimo ba sokola ho ipha sebōpeho le sepheo. Ha ho bobebe ho utloisisa botho ka nepo kantle ho kamano le Molimo. Motho ea phelang ka boeletsi bo anang le tlhalefo—bo tletseng tatello ea thabo ea botho—a ke ke a utloisisa bophelo ka botlalo.

Ho utloisisa boleng ba rōna (seo re leng sona) ele ka’nete, sepheo sa rōna (lebaka la ho phela ha rōna), le ka moo re bopiloeng ka teng, re lokela ho tseba sepheo sa ‘Mopi oa rōna se fumanehang ka Bibeleng e halalelang. Molimo o se a ntse a thehile seo re leng sona, ha se ntho eo re iqapelang eona. O re bopile ka sepheo le ka maikemisetso. Ke ha feela re utloisisa moralo oa hae ka bophelo ba rōna le likamano tseo ka tsona re kabang seo re lokelang hoba sona ‘me re phethahatse sepheo sa hae ka boteng ba rōna.

Ho etsoa ka setšoantšo sa Molimo ho bolela hore batho ba bōpiloe ka tsela e ikhethang bakeng sa kamano. Joalo kaha Molimo ele Molimo oa likamano, ka tsela e tšoanang o entse batho ele libopuoa tse joalo. Molimo o bopile motho oa kahare, moea le ‘mele tsa motho e mong le e mong bakeng sa likamano le Molimo hape le batho ba bang.

Buka ea Tataiso ea Rōna Bakeng sa Likamano tsa Batho

Taba ea hore Molimo o bopetse batho likamano e tlisa khopolo ea hore o na le melao le melaoana ka likamano bakeng sa likamano tsa rōna. Mong’a sehlahisoa o ee a ngole bukana ea tataiso e hlalosang sehlahisoa le ka moo se sebelisoang ka teng. Ka mokhoa o tšoanang Molimo o re file Lentsoe la Hae, Bibele, le hlalosang moralo ea rōna le hore na bophelo le likamano tsa rōna li ka sebetsa joang ka nepo.

Bibele e hlalosa ka ho hlaka mesebetsi eo Molimo A e behetseng likamano tsa batho. E bontša ka ho hlaka mesebetsi le likamano tsa banna le basali; bo-ntate, bo-‘m’e le bana; bo-abuti le bo-ausi; baholo ba rōna; metsoalle; lira; baahisane; mebuso le baahi; le bahiri le bahiruoa. Melao ea lentsoe la Molimo e re ruta pōpō ea hae ka rōna ho sa tsotellehe maemo le tikoloho tsa rōna. Bibele e re ruta thato ea Molimo boemong bohle ba bophelo.

Meloko ea batho le litso li bontša moralo ea Molimo leha e se ka ho phethehileng. Setso se hlalosa boitšoaro bo tloaelehileng ba batho bakeng sa maemo oohle a likamano. Setso ka nngoe se na le litsela tsa sona tsa ho holisa bana le ho lokisa kamano ea lenyalo. Litso li bontša phapang e kholo meetlong, litikolohong, libopehong, le liketsahalong tsa bohlokoa empa setso se seng le se seng se na le tsela e tšoanang ea boitšoaro. Mohlala, setso se seng le se seng se na le mofuta oa lenyalo. Leha ho le joalo, boitšoaro bohle bo tlameha ho hlahlojoa ka melao-motheo ea Bibele, eseng ka litloaelo tsa setso. Bibele ke matla a rōna; eseng setso (Baroma 12:2).

Lintlha tsa setso ha se hakaalo hore ha li nke lehlakore, 'me ha rea lokela ho lebella hore li be joalo (Baefese 2:2). Litso li hlahisoa ke batho ba oeleng ba bōpiloeng ke litakatso tse fosahetseng le boithati. Sechaba se ka ’na sa e-ba le tsebo e itseng ea ’nete ea Bibele, leha ho le joalo ha ho sechaba se lumellanang ka linako tsohle le tekanyetso ea Molimo ea se nepahetseng le se fosahetseng. Ha ho letho le lokelang ho lokafatsoa hobane feela e le setso. Bibele feela e re bontša ka ho phethahetseng tekanyetso ea Molimo (Dipesaleme 19:7-11).

Ha u ne u ka etela naha ea Libya ‘me oa lemoha tsela eo batho ba teng ba qhobang makoloi ntle le tsotello ea polokeho, u ka nahana, “Oo ke mokhoa oa bona feela; mokhoa oa bona oa ho khanna oa ba sebeletsa.” ’Nete ke hore ba ithehetse mokhoa oa bona oa ho qhoba. Leha ho le joalo, Libya e na le mafu a mangata haholo a litseleng lefatše ka bophara. Sekhahla seo likotsi li etsahalang ka sona, se mena habeli sekhahla sa naha e tsebahalang e le ea bobeli ka likotsi lefatšeng. Ho hlakile hore tsetso sa bona ha se a thehoa mokhoeng o motle oa ho qhoba.

Molimo o tseba tsela eo bophelo bo lokelang ho tsamaea ka eona ‘me u re file melao. Ha rea lokela ho bo leka fela le ho bo hlahloba. Ha rea lokela ho etsa feela kamoo re batlang. Re se ke ra leka ho fihlella seo re hopolang hore e tlaba bophelo bo monate. Re tlameha ho latela moralo oa Molimo bakeng sa likamano.

Ntho e ntle ke hore kutlo ho litaelo tsa Molimo e molemo bakeng sa rōna. Molimo o re file melao hobane a re rata (Deuteronoma 6:24). Ha re li boloka, re natefeloa ke litholoana ‘me re sireletsoa litlamoraong tse bosula. ‘Mopi oa rōna o tseba se molemo bakeng sa rōna, ‘me ha re latela morero oa hae, re ea hlohonolofala.

Boikabello ho Molimo bakeng sa Likamano

► Boitšoaro ba rōna ha re lebane le batho ba bang bo ama likamano tsa rōna le Molimo joang?

► Baithuti ba lokela ho bala e 'ngoe le e 'ngoe ea litemana tse latelang bakeng sa sehlopha. Buisanang ha khutšoanyane ka litebello tsa Molimo likamanong tsena tsa botho le kamoo kutlo e amang likamano tsa rōna le Molimo. Ho se utloe litaelo tsa Molimo ho ka ama likamano tsa rōna le Eena joang?

Re libopuoa tse nang le boitšoaro, hona ho bolela hore rea utloisisa hore Diketso tse itseng li fosahetse ‘me tse ling li nepahetse, ‘me re na le boikarabello ho Molimo ka liqeto tseo re li nkang. Hona ho re fa bokhoni le boikarabello bo boholo. Liqeto tsa rōna li ama kamano ea rōna le Molimo. Kutlo litaelong tsa Molimo mabapi le likamano ha se feela- feela e tloaelehing ea hore re ka thaba joang ‘me ra fumana tse molemo bophelong. Re na le boikabello ho Molimo bakeng sa liqeto tsa rōna le boitšoaro ba rōna likamanong (Baroma 14:10, 12).

Molimo o re biletsa ho tšoara ba bang ka ho loka le ho ba etsa ka lerato le lereko (Mikea 6:8). Bothata ke hore, ka lebaka la sebe sa Adama, litloholo tsa hae kaofela li tsoaletsoe sebeng sa tlhaho (Baroma 5:12, 19). Ka lebaka lena, re ke ke ra phehella ho etsa ka lerato, lereko le litsela tsa ho loka (Baroma 7:15-24). Empa ha re tsoaloa labobeli mohau oa Molimo oa re fetola. Moea o Halalelang o re nolofalletsa ho phethahatsa se hlokoang ke Molimo (Baroma 8:3-4).

Boleng ba motho e mong le e mong

► Baithuti ba lokela ho bala Isaia 44:24, Dipesaleme 139:13-16, Genese 9:6, le Jakobo 3:9 bakeng sa sehlopha. Mangolo aa; a re bolella eng ka boleng ba bophelo? Keng e fang motho boleng?

E le ho ba le likamano tse ntle le batho, re lokela ho ba hlompha joalo ka ha Molimo a etsa. Motho ka mong o bopiloe ka setšoantšo sa Molimo ‘me o bohlokoa ka lebaka leo fela. Motho e mong le emong ke ‘mopuoa ea ikhethang oa Molimo, e kaba e motona kapa e motšehali, a phetse hantle kapa a kula, a phethahetse, e le seqhoala kapa e le seritsa, ea monyenyane kapa ea holileng, morui kapa mofutsana (Diproverbia 14:31), ea seng a tsoetsoe kapa a ntseng a le ka popelong ea ‘m’ae; ho sa tsotellehe ‘mala oa letlalo la hae, leha ele boemo ba hae ba kelello kapa seo a ka tsebang ho se etsa (Eksoda 4:11).

Ho na le lichaba tseo ho tsona ba tsofetseng ba lebaloang, ba batšehali ba nkoa ba se na molemo ho e’na le ba batona, kapa bana e le khōpiso. Lichabeng tse ling liqhoala li nkoa li rohakeile ‘me lia patoa kapa ha li amohelehe hara sechaba. Khethollo ea merabe e tloaelehile lefatšeng ka bophara: moloko o itseng kapa mofuta oa sechaba se le seng o ipona ba phahametse ba bang ‘me o etsa ketso tse soabisang ho ba bang. Diketso tsena ka bo ‘ngoe li nyenyefatsa batho, bao e leng ‘mopo o bohlokoa ka ho fetisisa oa Molimo. Ho ba le likamano tse ntle li bile li hlompha Molimo, re lokela hore pele re nahane batho bohle ka moo ba leng kateng, e leng setšoantšo sa Molimo.

Tshenolo 4:11 e re bolella hore Molimo o bopile lintho tsohle bakeng sa hae. Hona ka ho hlaka, ho kenyelelitse botho. Re bopetsoe Molimo. Tsohle tseo re li etsang, re lokela ho li etsetsa khanya ea Molimo (1 Bakorinthe 10:31, 1 Petrose 2:12). Hape re bopetsoe ho tsoela batho ba bang molemo.

Re bopetsoe ho sebetsa ‘moho le batho ba bang ho fihlela morero oa Molimo. Lenyalo ke mohlala oa moralo oa Molimo oa hore batho ba sebetse ‘moho. Hang hoba Molimo a bope motho oa pele, Molimo o ile a re, “Ha ho hotle hore motho a be mong; Ke tla mo etsetsa mothusi ea lekanang le eena” (Genese 2:18). Mosali o tšoana le monna ka bohlokoa likarolong tse itseng tsa bohlokoa empa o fapane le eena lirakorolong tse ling tse ntseng li le bohlokoa. ‘Moho ba ka phethahatsa sepheo sa Molimo ka ho phela ha bona. Molimo o ba file—‘moho—mosebetsi oo ba neng ba lokela ho o etsa. (Genese 1:26-28).

Kereke ke o mong mohlala oa moralo oa Molimo oa hore batho ba sebetse ‘moho. Moapostola Pauluse o sebelisitse mohlala oa likarolo tsa ’mele (1 Bakorinthe 12:12-26). Motho h’a lokela ho nahana hore a ka phethahatsa morero oa Molimo a sebetsa a le mong kapa hona hore h’a hloke batho ba bang. Lenyalo le kereke ke tsona li le peli fela ka hara mehlala e mengata ea moralo oa Molimo oa hore batho ba sebetse ‘moho.

Re bopetsoe ho sebeletsa batho ba bang (Bagalata 5:13-14). Re bopetsoe likamano tsa lerato le ba bang, tseo ka tsona re inehelang ho ba molemo ho ba bang.

► Baithuti ba lokela ho bala Diproverbia 17:17, Bagalata 6:2, le BaFilipi 2:4 bakeng sa sehlopha.

Re bopetsoe Molimo le batho ba bang. Sohle seo e leng tlhoko ea Molimo ho rōna ho tsoa lentsoeng la Hae e nyallana le likamano tsa rōna le Molimo, le batho ba bang, kapa ka bobeli. Ha e le hantle, Jesu o itse sohle seo eleng tlhoko ea Molimo ho rōna e ka akaretsoa ka litaelo tsa ho rata Molimo ka pelo tsohle tsa rōna le ho rata batho ba bang joalo ka ha re ithata.

► Moithuti o lokela ho bala Mattheu 22:36-39 bakeng sa sehlopha.

Re bopetsoe Molimo hape re bopetsoe batho ba bang; li’nete tsena li nyalana haholo. Mekhoa ea mantlha eo ka eona re isang khanya ho Molimo le ho bontša setšoantšo sa Hae ke ka ho ba le tšebelisano ‘moho le ba bang. Semelo sa Molimo le Diketso tsa hae li re tlama ho tšoana le eena (1 Petrose 1:16, Mattheu 5:48). Batho bohle ba bopiloe ka setšoantšo sa Molimo, empa re bontša semelo le sebōpeho sa Molimo ha re etsa kamoo a etsang ka teng.

Ha e mong a bontša lereko ho mohloki, kutloelo-bohloko ea hae ke setšoantšo sa kutloelo-bohloko e tšoanang le ea Molimo ‘me ketso ea hae e tletseng lereko ke tšoantšiso sa mosebetsi oa Molimo. Hona ke ‘nete ho sa tsotelehe hore na ea bontšang ketso ea lereko ke molumeli kapa che. Leha ho le joalo, re etsisa Molimo ka bokhabane ha re khutlelane le eena ‘me Moea oa hae o sebetsa ka ho rōna.

► Moithuti o lokela ho bala 2 Petrose 1:2-11 bakeng sa sehlopha.

Serapa sena se hlalosa moralo o motle oa Molimo bakeng sa Molateli e mong le e mong oa Kreste. Ho tsoa serapeng sena re ithutile hore:

1. Ka khanya le ho loka hoa hae, Jesu o re bitsitse le ho re fa litšepiso tse molemo (temana 3-4).

2. Ka litšepiso tsena, rōna ba tsebang Kreste re ka ba le semelo se halalelang sa Molimo (temana 4).

3. Ka hoba likamanong le Molimo Ntate, le Jesu, re na le sohle seo re se hlokang bakeng sa bophelo le khalalelo (temana 3).

4. Ka lebaka la lintho tsena, re ka phela joalo ka ha Jesu a phetse le ka moo Molimo o re bilelitseng hore re phele ka teng (temana 5-8).

► Ho ka ba bobebe joang hore re be le sebōpeho se tšoanang le sebōpeho le semelo sa Molimo likamanong tsa rōna?

► Moithuti o lokela ho bala 2 Bakorinthe 4:4 bakeng sa sehlopha. Ke mang eo eleng setšoantšo se phethehileng sa Molimo?

► Moithuti o lokela ho bala 2 Bakorinthe 3:18 bakeng sa sehlopha.

Moea o Halalelang o fetola balumeli hore ba bonahatse haholo khanya ea Molimo. Ka ho talima Jesu, re fetoha ba tšoanang le eena haholo Diketsong tsa rōna le boitšoarong. Hona ke bokhabane ba evangeli. Ka matla a Molimo Ntate, Jesu le Moea o Halalelang, re ka bonahatsa le ho etsisa semelo sa Molimo.

Likamanong tsa rōna le batho ba bang, Molimo o re biletsa ho mo etsisa (Baefese 5:1). Joalo ka ha ngoana a talima le ho etsisa motsoali oa hae kapa ngoana’bo e moholo, re lokela ho talima mohlala oa Jesu ‘me re ithute litsela tsa hae, tsela eo a talimang lintho ka eona le Diketso tsa hae ha re kopana le batho ba bang (BaFilipi 2:5-7, Baefese 5:2).

► Baithuti ba lokela ho bala serapa ka seng ho tse latelang bakeng sa sehlopha. Ba tšoae (1) semelo sa Molimo kapa mosebetsi le (2) seo Molimo a se lebeletseng ka rōna. (Bakeng sa lirapa tse peli tse qalang, mohlala o se o ngotsoe. Qetellong ea thuto ena, kabelo ea 2 ke ntšetso pele ea thuto ena.)

Ha ho le ea mong oa rōna eo ka tlhaho a ka bonahatsang lerato la Molimo hobane re tsoetsoe le semelo sa bo-nna. Molimo o fana ka mohau ho re busetsa moralong oa hae. Thapelo e nang le boikokobetso ea boinehelo e ka fetisa motho hara phetoho ena.

Bibele e senola hore Molimo, ka lerato, o bopetse batho likamano: kamano le eena le kamano le batho ba bang.

Ka lebaka la hore Molimo ke ‘mopi oa batho le mothehi oa likamano, re tlameha hore:

1. Re be le maikutlo a hae likamong tsa rōna tsa botho.

2. Re lemohe boikarabello ba rōna ho eena ka liqeto tseo re li etsang likamanong.

3. Re amohele le ho latela moralo oa hae bakeng sa likamano tsa rōna.

Boithuto bona bo tla u thusa ho etsa lintho tsena ‘me bo u hlomelle ho ruta ba bang thato ea Molimo ka likamano tsa botho.

► Ke hobaneng moetlo o sa lekana e le tataiso bakeng sa likamano tsa botho?

► Ke mohopolo ofe thutong o bileng mocha ho uena? Hobaneng o le bohlokoa? Ho o utloisisa ho tlo o thusa joang likamanong tsa hau? Ho o utloisisa ho tlo fetola bosebeletsi ba hau joang?

► U hopola hore u tlo hola joang ka lebaka la ho ba le boithuto boo?

Ntate oa Leholimo,

Kea leboha ka ho mpopa ka setšoantšo sa hau le ka sepheo bakeng sa bophelo ba ka.

Kea leboha ha u mpopela ho ba le kamano le uena le ho etsa hoo ho be bobebe ka lefu la Jesu bakeng sa libe tsa ka.

Ke leboha ka letlotlo la lentsoe la hau, le nthutang ho utloana le uena le ho isa khanya ho uena likamanong tsa ka le batho ba bang.

Ka lentsoe la hau le Moea oa hau, nthute ho ananela bophelo boo u ntheretseng bona.

Nthuse ho u bonahatsa ka nepo bathong bohle ba mpotileng, e le hore ba tle ba u tsebe.

Amen

PDF ea sena e fumaneha mona, hape le sehlomathisong ho app ea mehala kapa ho “Additional Files” websaeteng.

(1) Hlalosa ka moo ‘nete ea ho boptjoa ka setšoantšo sa Molimo e fang motho ka mong boleng le ka moo ho latola ‘nete ena ho tlosang boleng ba botho kateng.

(2) Tafoleng e ka tlase, bala serapa ka seng sa mangolo a latelang. Tšoaea semelo sa Molimo kapa mosebetsi (1) le (2) tebello ea Molimo ka rōna.

(3) Ha u talima tafole ho Mosebetsi 2 le e fanoeng qetellong ea thuto, nka motsotsoana ho hlahloba bophelo ba hau:

• Na ha joale u bonahatsa setšantšo sa Molimo ka tsela e hlomphang le ho isa khanya ho Molimo?

• Na ho na le ho hloka kutlo ho lokelang ho boleloa e le hore bophelo ba hau bo botle bo bape ka ho hlaka le ka matla le sepheo sa Molimo bakeng sa bophelo ba hau?

• Ke mohato ofe oo Molimo a batlang u o nke hore u tle u be joalo ka Jesu?

Ngola serapa sa thapelo e le karabo ea boithuto bona. (Ha u oa lebelloa ho arolelana sengoloa sena le moetapele oa hau oa sehlopha, empa u ka tlaleha feela hore u entse mosebetsi.)