Lesson 1: ਇੱਕ ਪਰਮੇਸ਼ੁਰ ਅਤੇ ਇੱਕ ਕਲੀਸਿਆ

ਯੂਨਾਨੀ ਦਾ ਸ਼ਬਦ ਐਕਲੀਸਿਆ (ekklesia G1677)[1] ਦਾ ਅਨੁਵਾਦ ਨਵੇਂ ਨੇਮ ਦੇ ਵਿੱਚ ਆਮ ਤੌਰ ਤੇ ਕਲੀਸਿਆ ਦੇ ਵੱਜੋਂ ਕੀਤਾ ਜਾਂਦਾ ਹੈ। ਪਹਿਲੀ ਸਦੀ ਦੇ ਵਿੱਚ ਇਹ ਯੂਨਾਨੀ ਸ਼ਬਦ ਆਮ ਤੌਰ ਤੇ ਵਰਤਿਆ ਜਾਂਦਾ ਸੀ। ਜਦੋਂ ਕਿਸੇ ਸ਼ਹਿਰ ਦੇ ਨਾਗਰਿਕਾਂ ਨੂੰ ਇੱਕ ਸਭਾ ਦੇ ਲਈ ਬੁਲਾਇਆ ਜਾਂਦਾ ਸੀ, ਤਾਂ ਇਸ ਸਭਾ ਨੂੰ ਐਕਲੀਸੀਆ ਕਿਹਾ ਜਾਂਦਾ ਸੀ।

ਇਹ ਸ਼ਬਦ ਨਵੇਂ ਨੇਮ ਦੇ ਵਿੱਚ 117 ਵਾਰ ਇਸਤੇਮਾਲ ਕੀਤਾ ਗਿਆ ਹੈ, ਪਰ ਇਸਦਾ ਹਰੇਕ ਇਸਤੇਮਾਲ ਕਲੀਸਿਆ ਨੂੰ ਨਹੀਂ ਦਰਸਾਉਂਦਾ ਹੈ। ਕੁਝ ਕਿਸੇ ਹੋਰ ਕਿਸਮ ਦੀਆਂ ਸਭਾਵਾਂ ਨੂੰ ਦਰਸਾਉਂਦੇ ਹਨ (ਰਸੂਲਾਂ ਦੇ ਕਰਤੱਬ 19:32, 39, ਅਤੇ 41).

ਸ਼ੁਭਸਮਾਚਾਰ ਦਾ ਪ੍ਰਸਤਾਵ ਹਰੇਕ ਨਸਲ, ਸਮਾਜਿਕ ਸ਼੍ਰੇਣੀ, ਸਥਾਨ ਅਤੇ ਧੰਦੇ ਦੇ ਲੋਕਾਂ ਲਈ ਦਿੱਤਾ ਗਿਆ ਹੈ। ਜਿਵੇਂ ਸ਼ਹਿਰ ਦਾ ਹਰੇਕ ਵਿਅਕਤੀ ਸਭਾ ਦੀ ਘੋਸ਼ਣਾ ਨੂੰ ਸੁਣ ਸਕਦਾ ਸੀ, ਇਸੇ ਪ੍ਰਕਾਰ ਲੋਕਾਂ ਦੀ ਕਿਸੇ ਵੀ ਸ਼੍ਰੇਣੀ ਨੂੰ ਸ਼ੁਭਸਮਾਚਾਰ ਦੇ ਪ੍ਰਸਤਾਵ ਨੂੰ ਪ੍ਰਾਪਤ ਕਰਨ ਤੋਂ ਵਾਂਝਾ ਨਹੀਂ ਰੱਖਿਆ ਗਿਆ ਹੈ।

ਕਲੀਸਿਆ ਅਜਿਹੇ ਲੋਕਾਂ ਦਾ ਸਮੂਹ ਹੈ ਜੋ ਸ਼ੁਭਸਮਾਚਾਰ ਦੀ ਬੁਲਾਹਟ ਦੇ ਪ੍ਰਤੀ ਪ੍ਰਤੀਕਿਰਿਆ ਕਰਦੇ ਹਨ। ਇਹ ਲੋਕ ਲੋਕਾਂ ਦੀ ਹਰੇਕ ਸ਼੍ਰੇਣੀ ਤੋਂ ਆਉਂਦੇ ਹਨ ਜੋ ਕਿ ਇੱਕ ਖਾਸ, ਵਿਭਿੰਨ ਕਿਸਮ ਦੇ ਲੋਕਾਂ ਦੇ ਅਜਿਹੇ ਸਮੂਹ ਨੂੰ ਬਣਾਉਂਦੇ ਹਨ ਜੋ ਮਸੀਹ ਅਤੇ ਉਸਦੀ ਕਲੀਸਿਆ ਦੇ ਲਈ ਸਮਰਪਿਤ ਹਨ।

ਤ੍ਰਿਏਕਤਾ ਦੇ ਵਿਅਕਤੀਤਵ-ਪਿਤਾ, ਪੁੱਤਰ ਅਤੇ ਪਵਿੱਤਰ ਆਤਮਾ-ਕਲੀਸਿਆ ਦੇ ਵਿੱਚ ਵਿਸ਼ਵਾਸੀਆਂ ਦੇ ਨਾਲ ਖਾਸ ਤਰੀਕਿਆਂ ਦੇ ਨਾਲ ਸੰਬੰਧਿਤ ਹੁੰਦੇ ਹਨ।

ਜਿੰਨ੍ਹਾਂ ਕੰਮਾਂ ਨੂੰ ਪਰਮੇਸ਼ੁਰ ਕਲੀਸਿਆ ਦੇ ਵਿੱਚ ਕਰਦਾ ਹੈ ਇਸਦੇ ਲਈ ਉਸ ਨੂੰ ਸਦੀਪਕਤਾ ਦੇ ਲਈ ਮਹਿਮਾ ਮਿਲੇਗੀ।

ਕਲੀਸਿਯਾ ਵਿੱਚ ਅਤੇ ਮਸੀਹ ਯਿਸੂ ਵਿੱਚ ਸਾਰੀਆਂ ਪੀੜ੍ਹੀਆਂ ਤੁੀਕੁਰ ਜੁੱਗੋ ਜੁੱਗ ਉਸ ਦੀ ਵਡਿਆਈ ਹੋਵੇ।। ਆਮੀਨ (ਅਫ਼ਸੀਆਂ ਨੂੰ 3:21)।

ਕਿਉਂਕਿ ਕਲੀਸਿਆ ਦੀ ਹੋਂਦ ਪਰਮੇਸ਼ੁਰ ਦੀ ਮਹਿਮਾ ਦੇ ਲਈ ਹੈ, ਇਸ ਲਈ ਕਲੀਸਿਆ ਦੇ ਦੁਆਰਾ ਅਜਿਹਾ ਕੁਝ ਵੀ ਨਹੀਂ ਕੀਤਾ ਜਾਣਾ ਚਾਹੀਦਾ ਜਿਸਦੇ ਨਾਲ ਪਰਮੇਸ਼ੁਰ ਦਾ ਨਿਰਾਦਰ ਹੋਵੇ। ਕਲੀਸਿਆ ਨੂੰ ਅਜਿਹਾ ਕੁਝ ਵੀ ਨਹੀਂ ਕਰਨਾ ਚਾਹੀਦਾ ਜਿਸਦੇ ਨਾਲ ਲੋਕਾਂ ਨੂੰ ਪਰਮੇਸ਼ੁਰ ਦੀ ਹੋਂਦ ਦੇ ਬਾਰੇ ਕੋਈ ਗ਼ਲਤਫਹਿਮੀ ਹੋਵੇ ਜਾਂ ਜਿਸਦੇ ਨਾਲ ਪਰਮੇਸ਼ੁਰ ਦੀ ਜਗ੍ਹਾ ਧਿਆਨ ਕਿਸੇ ਇਨਸਾਨ ਤੇ ਲੱਗ ਜਾਵੇ।

ਕਲੀਸਿਆ ਪਰਮੇਸ਼ੁਰ ਦਾ ਪਰਿਵਾਰ ਹੈ।

ਸੋ ਹੁਣ ਤੋਂ ਤੁਸੀਂ ਓਪਰੇ ਅਤੇ ਪਰਦੇਸੀ ਨਹੀਂ ਸਗੋਂ ਸੰਤਾ ਦੇ ਵਤਨੀ ਅਤੇ ਪਰਮੇਸ਼ੁਰ ਦੇ ਘਰਾਣੇ ਦੇ ਹੋ (ਅਫ਼ਸੀਆਂ ਨੂੰ 2:19)।

ਸੋ ਤੁਸੀਂ ਇਸ ਬਿਧ ਨਾਲ ਪ੍ਰਾਰਥਨਾ ਕਰੋ, -ਹੇ ਸਾਡੇ ਪਿਤਾ, ਜਿਹੜਾ ਸੁਰਗ ਵਿੱਚ ਹੈਂ, ਤੇਰਾ ਨਾਮ ਪਾਕ ਮੰਨਿਆ ਜਾਵੇ (ਮੱਤੀ 6:9)।

ਕਿਉਂਕਿ ਕਲੀਸਿਆ ਪਰਮੇਸ਼ੁਰ ਦਾ ਪਰਿਵਾਰ, ਇਸ ਲਈ ਜਦੋਂ ਤੱਕ ਕੋਈ ਵਿਅਕਤੀ ਪਰਮੇਸ਼ੁਰ ਤੇ ਵਿਸ਼ਵਾਸ ਨਾ ਕਰੇ ਅਤੇ ਉਸਦੇ ਨਾਲ ਸੰਬੰਧ ਦੇ ਵਿੱਚ ਨਾ ਹੋਵੇ ਉਦੋਂ ਤੱਕ ਉਹ ਅਸਲ ਦੇ ਵਿੱਚ ਕਲੀਸਿਆ ਦਾ ਹਿੱਸਾ ਨਹੀਂ ਬਣ ਸਕਦਾ। ਕੋਈ ਵਿਅਕਤੀ ਸਿਰਫ਼ ਕਲੀਸਿਆ ਦੇ ਲੋਕਾਂ ਨੂੰ ਜਾਣ ਕੇ ਹੀ ਕਲੀਸਿਆ ਦੇ ਵਿੱਚ ਦਾਖਲ ਨਹੀਂ ਹੋ ਸਕਦਾ। ਉਹ ਪਰਮੇਸ਼ੁਰ ਦੇ ਨਾਲ ਸੰਬੰਧ ਦੇ ਵਿੱਚ ਆ ਕੇ ਕਲੀਸਿਆ ਦੇ ਵਿੱਚ ਦਾਖਲ ਹੁੰਦਾ ਹੈ, ਅਤੇ ਫਿਰ ਉਹ ਪਰਮੇਸ਼ੁਰ ਦੇ ਲੋਕਾਂ ਦੇ ਨਾਲ ਸੰਬੰਧ ਦੇ ਪ੍ਰਤੀ ਸਮਰਪਿਤ ਹੁੰਦਾ ਹੈ।

► ਪਰਮੇਸ਼ੁਰ ਨੂੰ ਆਪਣੇ ਪਿਤਾ ਬਣਾਉਣ ਦਾ ਕੀ ਅਰਥ ਹੈ?

[1]ਕਲੀਸਿਆ ਨੂੰ ਯਿਸੂ ਨੇ ਹੀ ਬਣਾਇਆ ਹੈ। ਯਿਸੂ ਕਲੀਸਿਆ ਦੀ ਅੰਤਿਮ ਸਫਲਤਾ ਦਾ ਵਾਅਦਾ ਕਰਦਾ ਹੈ।

ਅਤੇ ਮੈਂ ਵੀ ਤੈਨੂੰ ਆਖਦਾ ਹਾਂ ਜੋ ਤੂੰ ਪਤਰਸ ਹੈਂ ਅਤੇ ਮੈਂ ਇਸ ਪੱਥਰ ਉੱਤੇ ਆਪਣੀ ਕਲੀਸਿਯਾ ਬਣਾਵਾਂਗਾ ਅਤੇ ਪਤਾਲ ਦੇ ਫਾਟਕਾਂ ਦਾ ਉਹ ਦੇ ਉੱਤੇ ਕੁਝ ਵੱਸ ਨਾ ਚੱਲੇਗਾ (ਮੱਤੀ 16:18)।

ਯਿਸੂ ਨੇ ਕਲੀਸਿਆ ਦੇ ਨਾਲ ਹੋਣ ਦਾ ਵਾਅਦਾ ਕੀਤਾ।

... ਮੈਂ ਜੁਗ ਦੇ ਅੰਤ ਤੀਕਰ ਹਰ ਵੇਲੇ ਤੁਹਾਡੇ ਨਾਲ ਹਾਂ (ਮੱਤੀ 28:20)।

ਕਿਉਂਕਿ ਜਿੱਥੇ ਦੋ ਯਾ ਤਿੰਨ ਮੇਰੇ ਨਾਮ ਉੱਤੇ ਇੱਕਠੇ ਹੋਣ ਉੱਥੇ ਮੈਂ ਉਨ੍ਹਾਂ ਦੇ ਵਿਚਕਾਰ ਹਾਂ (ਮੱਤੀ 18:20)।

ਮਸੀਹ ਕਲੀਸਿਆ ਦਾ ਸਿਰ ਹੈ। ਕਲੀਸਿਆ ਇਸ ਸੰਸਾਰ ਦੇ ਵਿੱਚ ਉਸਦੀ ਦੇਹ ਹੈ। ਮਸੀਹ ਦਾ ਕਲੀਸਿਆ ਦੇ ਨਾਲ ਅਜਿਹਾ ਡੂੰਘਾ ਨਿੱਜੀ ਸੰਬੰਧ ਹੈ ਜਿਸਨੂੰ ਅਸੀਂ ਸਮਝ ਨਹੀਂ ਸਕਦੇ।

ਅਤੇ ਸੱਭੋ ਕੁਝ ਉਸ ਦੇ ਪੈਰਾਂ ਹੇਠ ਕਰ ਦਿੱਤਾ ਅਤੇ ਸਭਨਾਂ ਵਸਤਾਂ ਉੱਤੇ ਸਿਰ ਬਣਨ ਲਈ ਉਸ ਨੂੰ ਕਲੀਸਿਯਾ ਲਈ ਦੇ ਦਿੱਤਾ ਇਹ ਉਸ ਦੀ ਦੇਹ ਹੈ ਅਰਥਾਤ ਉਸ ਦੀ ਭਰਪੂਰੀ ਜਿਹੜਾ ਸਭਨਾਂ ਵਿੱਚ ਸੱਭੋ ਕੁਝ ਭਰਦਾ ਹੈ (ਅਫ਼ਸੀਆਂ ਨੂੰ 1:22-23)।

ਕਿਉਂ ਜੋ ਅਸੀਂ ਉਹ ਦੀ ਦੇਹੀ ਦੇ ਅੰਗ ਹਾਂ (ਅਫ਼ਸੀਆਂ ਨੂੰ 5:30)।

ਕਿਉਂਕਿ ਕਲੀਸਿਆ ਦਾ ਮੈਂਬਰ ਮਸੀਹ ਦੀ ਦੇਹ ਦਾ ਹਿੱਸਾ ਹੈ, ਇਸ ਲਈ ਜਦੋਂ ਤੱਕ ਕੋਈ ਵਿਅਕਤੀ ਨਿੱਜੀ ਤੌਰ ਤੇ ਯਿਸੂ ਤੇ ਇੱਕ ਮੁਕਤੀਦਾਤੇ ਵੱਜੋਂ ਵਿਸ਼ਵਾਸ ਕਰਕੇ ਪ੍ਰਭੂ ਦੇ ਤੌਰ ਤੇ ਉਸਦੇ ਅਧਿਕਾਰ ਨੂੰ ਨਹੀਂ ਮੰਨਦਾ ਤਦ ਤੱਕ ਉਸ ਵਿਅਕਤੀ ਦੇ ਲਈ ਕਲੀਸਿਆ ਦਾ ਹਿੱਸਾ ਬਣਨਾ ਸੰਭਵ ਨਹੀਂ ਹੈ।

► ਕਿਸ ਪ੍ਰਕਾਰ ਦੇ ਵਿਅਕਤੀ ਨੂੰ ਮਸੀਹ ਦੀ ਦੇਹ ਦਾ ਮੈਂਬਰ ਕਿਹਾ ਜਾ ਸਕਦਾ ਹੈ?

ਰਸੂਲਾਂ ਦੇ ਕਰਤੱਬ ਦੀ ਪੁਸਤਕ ਦਰਸਾਉਂਦੀ ਹੈ ਕਿ ਮੁੱਢਲੀ ਕਲੀਸਿਆ ਪਵਿੱਤਰ ਆਤਮਾ ਦੀ ਹਜ਼ੂਰੀ ਅਤੇ ਸ਼ਕਤੀ ਦੇ ਬਾਰੇ ਜਾਣੂ ਸਨ। ਪਵਿੱਤਰ ਆਤਮਾ ਨੇ ਪ੍ਰਚਾਰ ਦੇ ਲਈ ਸ਼ਕਤੀ ਅਤੇ ਪ੍ਰੇਰਨਾ ਦਿੱਤੀ (ਰਸੂਲਾਂ ਦੇ ਕਰਤੱਬ 2:11)। ਉਸਨੇ ਲੋਕਾਂ ਨੂੰ ਖਾਸ ਸੇਵਕਾਈ ਦੇ ਲਈ ਸੱਦਿਆ (ਰਸੂਲਾਂ ਦੇ ਕਰਤੱਬ 13:2)। ਉਸਨੇ ਉਨ੍ਹਾਂ ਦੀ ਸੇਵਕਾਈ ਦੇ ਸਹੀ ਸਥਾਨਾਂ ਵਿੱਚ ਜਾਣ ਦੇ ਲਈ ਅਗਵਾਈ ਕੀਤੀ (ਰਸੂਲਾਂ ਦੇ ਕਰਤੱਬ 16:6-10)। ਉਸਨੇ ਧਰਮ ਸਿਧਾਂਤਾਂ ਦੇ ਮੁੱਦਿਆਂ ਨੂੰ ਹੱਲ ਕੀਤਾ (ਰਸੂਲਾਂ ਦੇ ਕਰਤੱਬ 15:28)।

ਪਵਿੱਤਰ ਆਤਮਾ ਕਲੀਸਿਆ ਦੇ ਵਿਸ਼ਵ ਪੱਧਰੀ ਮਿਸ਼ਨ ਨੂੰ ਪੂਰਾ ਕਰਨ ਦੇ ਵਿੱਚ ਮਹਾਨ ਆਗੂ ਹੈ।

ਕੋਈ ਵੀ ਇੱਕ ਮਨੁੱਖੀ ਸੰਸਥਾ ਸਾਰੇ ਕੰਮ ਨੂੰ ਪੂਰਿਆਂ ਕਰਨ ਦੀ ਉਮੀਦ ਨਹੀਂ ਕਰ ਸਕਦੀ। ਪਰਮੇਸ਼ੁਰ ਮਿਸ਼ਨਰੀਆਂ ਨੂੰ ਬੁਲਾਉਂਦਾ ਅਤੇ ਘੱਲਦਾ ਹੈ, ਅਤੇ ਉਹ ਹਰੇਕ ਭੂਗੋਲਿਕ ਖੇਤਰ ਦੀ ਜਰੂਰਤ ਨੂੰ ਜਾਣਦਾ ਹੈ।

ਇੱਕ ਵਿਅਕਤੀ ਪਵਿੱਤਰ ਆਤਮਾ ਦੇ ਦੁਆਰਾ ਨਵੇਂ ਜਨਮ ਦੇ ਅਨੁਭਵ ਦੇ ਚਮਤਕਾਰ ਦੁਆਰਾ ਕਲੀਸਿਆ ਦੇ ਵਿੱਚ ਦਾਖਲ ਹੁੰਦਾ ਹੈ। ਕਿਉਂਕਿ ਨਵਾਂ ਜਨਮ ਇੱਕ ਅਲੌਕਿਕ ਅਨੁਭਵ ਹੈ, ਇਸ ਕਾਰਨ ਸ਼ੁਭਸਮਾਚਾਰ ਨੂੰ ਪਵਿੱਤਰ ਆਤਮਾ ਦੇ ਦੁਆਰਾ ਅਲੌਕਿਕ ਅਗਵਾਈ ਦਿੱਤੀ ਜਾਂਦੀ ਹੈ। ਸ਼ੁਭਸਮਾਚਾਰ ਦੇ ਨਤੀਜਿਆਂ ਦੀ ਵਿਆਖਿਆ ਕੁਦਰਤੀ ਤਰੀਕਿਆਂ ਦੁਆਰਾ ਨਹੀਂ ਕੀਤੀ ਜਾ ਸਕਦੀ।

ਕਲੀਸਿਆ ਦਾ ਜੀਵਨ ਆਤਮਾ ਦੇ ਵਿੱਚ ਜੀਵਨ ਹੈ।

ਪਵਿੱਤਰ ਆਤਮਾ ਮੁੱਢਲੀ ਕਲੀਸਿਆ ਦੇ ਵਿੱਚ ਅਰਾਧਨਾ ਦੀ ਅਗਵਾਈ ਕਰਦਾ ਸੀ। ਉਸਨੇ ਅਲੱਗ-ਅਲੱਗ ਮੈਂਬਰਾਂ ਦੇ ਦੁਆਰਾ ਗੱਲਬਾਤ ਕੀਤੀ (ਰਸੂਲਾਂ ਦੇ ਕਰਤੱਬ 4:30-31)। ਅਰਾਧਨਾ ਦਾ ਯੋਜਨਾਬੱਧ ਪ੍ਰੋਗਰਾਮ ਪਵਿੱਤਰ ਆਤਮਾ ਦੇ ਦੁਆਰਾ ਕਦੇ ਵੀ ਬਦਲਿਆ ਜਾ ਸਕਦਾ ਹੈ।

ਕਲੀਸਿਆ ਹਰੇਕ ਮਨੁੱਖੀ ਸੰਸਥਾ ਦੇ ਨਾਲੋਂ ਅਲੱਗ ਹੈ। ਕਲੀਸਿਆ ਦੇ ਮੈਂਬਰ ਇੱਕ ਦੂਸਰੇ ਦੇ ਨਾਲ ਸੰਗਤੀ ਦੇ ਵਿੱਚ ਹੁੰਦੇ ਹਨ ਕਿਉਂਕਿ ਉਹ ਪਰਮੇਸ਼ੁਰ ਦੇ ਨਾਲ ਸੰਬੰਧ ਦੇ ਵਿੱਚ ਹਨ ਅਤੇ ਉਨ੍ਹਾਂ ਦੇ ਕੋਲ ਆਤਮਿਕ ਜੀਵਨ ਹੈ। ਜੋ ਵਿਅਕਤੀ ਅਸਲ ਦੇ ਵਿੱਚ ਬਦਲਿਆ ਨਹੀਂ ਹੈ ਉਹ ਅਸਲ ਦੇ ਵਿੱਚ ਉਸ ਸੰਗਤੀ ਦੇ ਵਿੱਚ ਨਹੀਂ ਹੈ ਭਾਵੇਂ ਉਹ ਕਲੀਸਿਆ ਨੂੰ ਪਸੰਦ ਕਰਦਾ ਹੋਵੇ ਅਤੇ ਕਲੀਸਿਆ ਦੇ ਲੋਕਾਂ ਦਾ ਦੋਸਤ ਹੋਵੇ।

ਪਵਿੱਤਰ ਆਤਮਾ ਆਤਮਿਕ ਵਰਦਾਨ ਦਿੰਦਾ ਹੈ ਜੋ ਮੈਂਬਰ ਇੱਕ ਦੂਸਰੇ ਦੀ ਸੇਵਾ ਦੇ ਵਿੱਚ ਉਪਯੋਗ ਕਰ ਸਕਦੇ ਹਨ (੧ ਕੁਰਿੰਥੀਆਂ ਨੂੰ 12:4-7)। ਯਰੂਸ਼ਲਮ ਦੇ ਵਿੱਚ ਕਲੀਸਿਆ ਦੇ ਸ਼ੁਰੂਆਤੀ ਦਿਨਾਂ ਦੇ ਵਿੱਚ, ਮੈਂਬਰਾਂ ਦਾ ਸਮਰਪਨ ਅਤੇ ਏਕਤਾ ਇੰਨੀ ਮਜ਼ਬੂਤ ਸੀ ਕਿ ਆਧੁਨਿਕ ਕਲੀਸਿਆ ਦੇ ਲਈ ਇਸਦੀ ਕਲਪਨਾ ਕਰਨੀ ਵੀ ਬਹੁਤ ਕਠਿਨ ਹੈ। ਲੋਕਾਂ ਨੇ ਆਪਣੀ ਸੰਪਤੀ ਵੇਚ ਕੇ ਪੈਸੇ ਦਿੱਤੇ ਤਾਂ ਕਿ ਕਲੀਸਿਆ ਦੇ ਕੋਲ ਜੀਵਨ ਨੂੰ ਸਾਂਝਾ ਕਰ ਸਕਦੇ। ਜਦੋਂ ਹਨਾਨਿਯਾ ਅਤੇ ਸਫੀਰਾ ਨੇ ਝੂਠ ਬੋਲਿਆ, ਤਾਂ ਉਹ ਮਾਰੇ ਗਏ ਕਿਉਂਕਿ ਉਨ੍ਹਾਂ ਦੇ ਪਾਪ ਨੇ ਪਵਿੱਤਰ ਆਤਮਾ ਦੇ ਉਸ ਅਦਭੁੱਤ ਕੰਮ ਦਾ ਨਿਰਾਦਰ ਕੀਤਾ ਜੋ ਉਹ ਕਲੀਸਿਆ ਦੇ ਵਿੱਚ ਕਰ ਰਿਹਾ ਸੀ (ਰਸੂਲਾਂ ਦੇ ਕਰਤੱਬ 4:32-35, ਰਸੂਲਾਂ ਦੇ ਕਰਤੱਬ 5:1-4)।

[1]ਕਲੀਸਿਆ ਦੀ ਏਕਤਾ ਆਤਮਾ ਦੇ ਜੀਵਨ ਵਿੱਚ ਪੂਰੀ ਹੁੰਦੀ ਹੈ।

ਕਲੀਸਿਆ ਨੂੰ (ਇਮਾਰਤ ਨਹੀਂ, ਪਰ ਵਿਸ਼ਵਾਸੀਆਂ ਦਾ ਜੀਵਨ) “ਪਰਮੇਸ਼ੁਰ ਦੀ ਹੈਕਲ” ਕਿਹਾ ਗਿਆ ਹੈ ਕਿਉਂਕਿ ਆਤਮਾ ਇੱਕ ਖਾਸ ਢੰਗ ਦੇ ਨਾਲ ਕਲੀਸਿਆ ਦੇ ਵਿੱਚ ਰਹਿੰਦਾ ਹੈ (੨ ਕੁਰਿੰਥੀਆਂ ਨੂੰ 6:16)। ਅਜਿਹੇ ਵਿਅਕਤੀ ਦੇ ਬਾਰੇ ਗੰਭੀਰ ਸਜ਼ਾ ਘੋਸ਼ਨਾ ਕੀਤੀ ਗਈ ਹੈ ਜੋ ਉਸ ਹੈਕਲ ਦਾ ਨਾਸ਼ ਕਰਦਾ ਹੈ ਜਿੱਥੇ ਮਸੀਹੀ ਏਕਤਾ ਦਾ ਵਾਸ ਹੁੰਦਾ ਹੈ (੧ ਕੁਰਿੰਥੀਆਂ ਨੂੰ 3:16-17)।

► ਤੁਸੀਂ ਇੱਕ ਅਜਿਹੇ ਵਿਅਕਤੀ ਦੇ ਬਾਰੇ ਕੀ ਕਹੋਗੇ ਜੋ ਪਵਿੱਤਰ ਆਤਮਾ ਦੀ ਸ਼ਕਤੀ ਦੇ ਨਾਲ ਭਰੇ ਹੋਣ ਦਾ ਦਾਅਵਾ ਕਰਦਾ ਹੈ ਪਰ ਕਲੀਸਿਆ ਤੇ ਹਮਲੇ ਕਰਦਾ ਹੈ ਅਤੇ ਇਸਦੇ ਵਿੱਚ ਫੁੱਟ ਪਾਉਂਦਾ ਹੈ?

ਕਲੀਸਿਆ ਲੋਕਾਂ ਦੀ ਪਰਮੇਸ਼ੁਰ ਨੂੰ ਯਾਦ ਕਰਨ, ਪਰਮੇਸ਼ੁਰ ਦੇ ਧਿਆਨ ਲਗਾਉਣ ਅਤੇ ਪਰਮੇਸ਼ੁਰ ਦੇ ਦੁਆਰਾ ਪਰਿਵਰਤਨ ਦਾ ਅਨੁਭਵ ਕਰਨ ਦੇ ਵਿੱਚ ਸਹਾਇਤਾ ਕਰਦੀ ਹੈ।

ਕਲੀਸਿਆ ਦਾ ਢਾਂਚਾ ਪਰਮੇਸ਼ੁਰ ਬਣਾਇਆ ਗਿਆ ਹੈ ਅਤੇ ਉਸੇ ਨੇ ਇਸਨੂੰ ਰਚਿਆ ਹੈ। ਧਰਤੀ ਤੇ ਕਿਸੇ ਵੀ ਹੋਰ ਸਥਾਨ ਨਾਲੋਂ ਜਿਆਦਾ ਕਲੀਸਿਆ ਇੱਕ ਅਜਿਹਾ ਸਥਾਨ ਹੈ ਜਿੱਥੇ ਪਰਮੇਸ਼ੁਰ ਦੀ ਇੱਛਾ ਉਦੇਸ਼ਪੂਰਨ ਢੰਗ ਨਾਲ ਉਨ੍ਹਾਂ ਲੋਕਾਂ ਦੁਆਰਾ ਪੂਰੀ ਕੀਤੀ ਜਾਂਦੀ ਹੈ ਜੋ ਪਰਮੇਸ਼ੁਰ ਨੂੰ ਪਿਆਰ ਕਰਦੇ ਹਨ। ਇਸ ਤਰ੍ਹਾਂ, ਕਲੀਸਿਆ ਸੰਸਾਰ ਨੂੰ ਵਿਖਾਉਂਦੀ ਹੈ ਕਿ ਪਰਮੇਸ਼ੁਰ ਕਿਸ ਪ੍ਰਕਾਰ ਦਾ ਹੈ।

► ਅਜਿਹੀਆਂ ਕੁਝ ਗੱਲਾਂ ਕਿਹੜੀਆਂ ਹਨ ਜੋ ਕਲੀਸਿਆ ਨੂੰ ਵੇਖਣ ਨਾਲ ਲੋਕਾਂ ਨੂੰ ਪਰਮੇਸ਼ੁਰ ਦੇ ਬਾਰੇ ਨਜ਼ਰ ਆਉਣੀਆਂ ਚਾਹੀਦੀਆਂ ਹਨ?

ਕਲੀਸਿਆ ਨੂੰ ਵੇਖਣ ਦੁਆਰਾ, ਲੋਕਾਂ ਨੂੰ ਨਜ਼ਰ ਆਉਣਾ ਚਾਹੀਦਾ ਹੈ ਕਿ ਪਰਮੇਸ਼ੁਰ ਪਿਆਰ ਕਰਨ ਵਾਲਾ ਅਤੇ ਦਿਆਲੂ ਹੈ, ਉਹ ਸਭਨਾਂ ਦੀ ਫਿਕਰ ਕਰਦਾ ਹੈ, ਮਾਫ਼ ਕਰਦਾ ਹੈ, ਸਚਿਆਈ ਦਾ ਸਮਰਥਨ ਕਰਦਾ ਹੈ, ਸਮਰਪਣ ਬਣਾਈ ਰੱਖਦਾ ਹੈ ਅਤੇ ਪਾਪ ਨੂੰ ਨਫ਼ਰਤ ਕਰਦਾ ਹੈ ਜਦਕਿ ਪਾਪੀਆਂ ਦੇ ਨਾਲ ਪਿਆਰ ਕਰਦਾ ਹੈ।

► ਲੋਕਾਂ ਨੂੰ ਇਹ ਯਾਦ ਰੱਖਦੇ ਹੋਏ ਕਿਹੜੀਆਂ ਗ਼ਲਤੀਆਂ ਤੋਂ ਦੂਰ ਰਹਿਣਾ ਚਾਹੀਦਾ ਹੈ ਕਿ ਕਲੀਸਿਆ ਪਰਮੇਸ਼ੁਰ ਦੇ ਬਾਰੇ ਹੈ।

ਕਿਉਂਕਿ ਕਲੀਸਿਆ ਦੀ ਹੋਂਦ ਪਰਮੇਸ਼ੁਰ ਦੇ ਲਈ ਹੈ, ਇਸ ਕਾਰਨ ਕਲੀਸਿਆ ਦੀ ਅਰਾਧਨਾ ਦਾ ਕੇਂਦਰ ਪਰਮੇਸ਼ੁਰ ਹੋਣਾ ਚਾਹੀਦਾ ਹੈ। ਜਦੋਂ ਅਰਾਧਨਾ ਦਾ ਕੇਂਦਰ ਮਨੁੱਖੀ ਆਗੂ ਜਾਂ ਵਿਖਾਵਾ ਬਣ ਜਾਂਦਾ ਹੈ, ਤਾਂ ਇਹ ਮਨੁੱਖ-ਕੇਂਦਰਿਤ ਬਣ ਜਾਂਦੀ ਹੈ, ਜੋ ਕਿ ਮੂਰਤੀਪੂਜਾ ਦੇ ਸਮਾਨ ਹੈ। ਗ਼ਲਤ ਅਰਾਧਨਾ ਸਰੀਰਕ ਹੁੰਦੀ ਹੈ, ਜੋ ਕੁਝ ਲੋਕਾਂ ਦੀ ਸ਼ਲਾਘਾ ਕਰਦੀ ਹੈ ਅਤੇ ਕੁਦਰਤੀ ਇੱਛਾਵਾਂ ਸੰਤੁਸ਼ਟੀ ਦੇ ਲਈ ਹੁੰਦੀ ਹੈ। ਇੱਥੋਂ ਤੱਕ ਕਿ ਗ਼ਲਤ ਅਰਾਧਨਾ ਸ਼ੈਤਾਨੀ ਬਣ ਸਕਦੀ ਹੈ ਕਿਉਂਕਿ ਅਰਾਧਕ ਆਪਣੇ ਆਪ ਨੂੰ ਅਜਿਹੀਆਂ ਭਾਵਨਾਵਾਂ ਅਤੇ ਆਤਮਾਵਾਂ ਦੇ ਨਾਲ ਜੋੜ ਲੈਂਦੇ ਹਨ ਜੋ ਪਰਮੇਸ਼ੁਰ ਦੀ ਵੱਲੋਂ ਨਹੀਂ ਹਨ।

► ਇੱਕ ਵਿਦਿਆਰਥੀ ਨੂੰ ਸਮੂਹ ਦੇ ਲਈ ਅਫ਼ਸੀਆਂ ਨੂੰ 4:1-6 ਪੜਣਾ ਚਾਹੀਦਾ ਹੈ। ਵਚਨ ਦਾ ਇਹ ਭਾਗ ਕਲੀਸਿਆ ਦੇ ਬਾਰੇ ਕਿਹੜੀ ਮੁੱਖ ਗੱਲ ਨੂੰ ਦੱਸਦਾ ਹੈ?

ਪੌਲੁਸ ਨੇ ਵਿਸ਼ਵਾਸੀਆਂ ਨੂੰ ਏਕਤਾ ਦੇ ਵਿੱਚ ਰਹਿਣ ਦਾ ਸੱਦਾ ਦਿੱਤਾ। ਏਕਤਾ ਦਾ ਕਾਰਨ ਇਹ ਹੈ ਕਿ ਕਲੀਸਿਆ ਸਿਰਫ਼ ਇੱਕ ਹੀ ਹੈ, ਜਿਵੇਂ ਇੱਕ ਹੀ ਪਰਮੇਸ਼ੁਰ ਅਤੇ ਇੱਕ ਹੀ ਸ਼ੁਭਸਮਾਚਾਰ ਹੈ। ਸਾਰੇ ਸੱਚੇ ਮਸੀਹੀ ਇੱਕ ਹੀ ਦੇਹ ਦੇ ਵਿੱਚ ਹਨ। ਇੱਕ ਹੀ ਮਸੀਹਤ ਅਤੇ ਇੱਕ ਹੀ ਕਲੀਸਿਆ ਹੈ ਕਿਉਂਕਿ ਪਰਮੇਸ਼ੁਰ ਇੱਕ ਹੈ।

ਇੱਕ ਵਿਸ਼ਵ-ਵਿਆਪੀ ਕਲੀਸਿਆ ਦੇ ਤੱਥ ਤੇ ੧ ਕੁਰਿੰਥੀਆਂ ਨੂੰ 12:13 ਦੇ ਵਿੱਚ ਜ਼ੋਰ ਦਿੱਤਾ ਗਿਆ ਹੈ, ਜਿੱਥੇ ਪੌਲੁਸ ਨੇ ਕਿਹਾ ਪਰਾਈਆਂ ਕੌਮਾਂ ਤੋਂ ਵਿਸ਼ਵਾਸ ਵਿੱਚ ਆਉਣ ਵਾਲੇ ਸਭ ਲੋਕ ਇੱਕ ਹੀ ਦੇਹ ਦੇ ਵਿੱਚ ਆਉਂਦੇ ਹਨ।

ਇੱਕ ਵਿਸ਼ਵਾਸ ਕਥਨ ਮਸੀਹੀ ਧਾਰਨਾਵਾਂ ਦਾ ਮੁੱਢਲਾ ਬਿਆਨ ਹੁੰਦਾ ਹੈ। ਇੱਕ ਸ਼ੁਰੂਆਤੀ ਮਸੀਹੀ ਵਿਸ਼ਵਾਸ ਕਥਨ “ਰਸੂਲਾਂ ਦੇ ਵਿਸ਼ਵਾਸ ਕਥਨ” ਵਿੱਚ ਇੱਕ ਬਿਆਨ ਹੈ “ਮੈਂ ਕੈਥੋਲਿਕ ਕਲੀਸਿਆ ਦੇ ਵਿੱਚ ਵਿਸ਼ਵਾਸ ਰੱਖਦਾ ਹਾਂ।” ਵਿਸ਼ਵਾਸ ਕਥਨ ਦੇ ਵਿੱਚ ਕੈਥੋਲਿਕ ਸ਼ਬਦ ਰੋਮਨ ਕੈਥੋਲਿਕ ਚਰਚ ਨੂੰ ਨਹੀਂ ਦਰਸਾਉਂਦਾ ਹੈ। ਇਸਦਾ ਅਰਥ “ਵਿਸ਼ਵ-ਵਿਆਪੀ” ਜਾਂ “ਸੰਪੂਰਨ” ਹੈ। ਵਿਸ਼ਵਾਸ ਕਥਨ ਕਹਿ ਰਿਹਾ ਸੀ ਕਿ ਕਲੀਸਿਆ ਇੱਕ ਹੀ ਹੈ ਜੋ ਹਰੇਕ ਸਥਾਨ ਦੇ ਸਾਰੇ ਮਸੀਹੀਆਂ ਦੀ ਪ੍ਰਤੀਨਿਧਤਾ ਕਰਦੀ ਹੈ।

► ਇੱਕ ਵਿਦਿਆਰਥੀ ਨੂੰ ਸਮੂਹ ਦੇ ਲਈ ਅਫ਼ਸੀਆਂ ਨੂੰ 2:20 ਪੜਣਾ ਚਾਹੀਦਾ ਹੈ।

ਕਲੀਸਿਆ ਇੱਕ ਹੀ ਨੀਂਹ ਤੇ ਬਣੀ ਹੈ: ਨਬੀਆਂ ਅਤੇ ਰਸੂਲਾਂ ਦੁਆਰਾ ਪ੍ਰਗਟ ਕੀਤੀ ਸਚਿਆਈ ਅਤੇ ਸੇਵਕਾਈ; ਅਤੇ ਸੇਵਕਾਈ ਸੰਦੇਸ਼, ਪ੍ਰਾਸਚਿੱਤ ਅਤੇ ਯਿਸੂ ਮਸੀਹ ਦੇ ਵਿੱਚ ਲਗਾਤਾਰ ਜੀਵਨ ਦੇ ਦੁਆਰਾ। ਇਹ ਇੱਕ ਹੀ ਨੀਂਹ ਅਤੇ ਇੱਕ ਹੀ ਕਲੀਸਿਆ ਹੈ।

ਚੀਨ ਦੇ ਵਿੱਚ ਇੱਕ ਧਰਮ ਹੈ ਜਿਸਨੂੰ ਈਸਟਰਨ ਲਾਈਟਨਿੰਗ ਕਿਹਾ ਜਾਂਦਾ ਹੈ। ਉਹ ਵਿਸ਼ਵਾਸ ਕਰਦੇ ਹਨ ਕਿ ਯਿਸੂ ਦਾ ਕੰਮ ਪੂਰਾ ਹੋ ਚੁੱਕਾ ਹੈ, ਅਤੇ ਪਰਮੇਸ਼ੁਰ ਨੇ ਆਧੁਨਿਕ ਸਮੇਂ ਦੇ ਲਈ ਨਵਾਂ ਮਸੀਹਾ ਘੱਲਿਆ ਹੈ। ਇਹ ਨਵਾਂ ਮਸੀਹਾ ਇੱਕ ਚੀਨੀ ਇਸਤਰੀ ਹੈ ਜੋ ਨਵੇਂ ਧਰਮ ਸਿਧਾਂਤ ਸਿਖਾਉਂਦੀ ਹੈ।

►ਤੁਸੀਂ ਈਸਟਰਨ ਲਾਈਟਨਿੰਗ ਨੂੰ ਮੰਨਣ ਵਾਲੇ ਕਿਸੇ ਵਿਅਕਤੀ ਨੂੰ ਕੀ ਉੱਤਰ ਦੇਵੋਗੇ?

ਵਿਸ਼ਵ-ਵਿਆਪੀ ਕਲੀਸਿਆ ਦਾ ਇਹ ਅਰਥ ਨਹੀਂ ਹੈ ਕਿ ਇੱਕ ਹੀ ਸੰਸਥਾ ਸਾਰੀ ਕਲੀਸਿਆ ਹੈ। ਕੋਈ ਵੀ ਇੱਕ ਸੰਸਥਾ ਸੰਸਾਰ ਦੇ ਵਿੱਚ ਹਰੇਕ ਸਥਾਨ ਤੇ ਪਰਮੇਸ਼ੁਰ ਦੇ ਉਦੇਸ਼ ਨੂੰ ਕਰ ਪਾਉਣ ਦੇ ਨੇੜੇ ਨਹੀਂ ਆਉਂਦੀ ਹੈ। ਯਿਸੂ ਨੇ ਆਪਣੇ ਰਸੂਲਾਂ ਨੂੰ ਕਿਹਾ ਕਿ ਉਹ ਸਾਰੇ ਮਸੀਹੀਆਂ ਦੇ ਇੱਕ ਹੀ ਸੰਸਥਾ ਦੇ ਵਿੱਚ ਹੋਣ ਦੀ ਉਮੀਦ ਨਾ ਰੱਖਣ (ਮਰਕੁਸ 9:38-39)।

ਰੋਮਨ ਕੈਥੋਲਿਕ ਚਰਚ ਪਰਮੇਸ਼ੁਰ ਦੀ ਸੰਪੂਰਨ ਕਲੀਸਿਆ ਹੋਣ ਦਾ ਦਾਅਵਾ ਕਰਦਾ ਹੈ। ਮੋਰਮੋਨਜ਼ ਅਤੇ ਯਹੋਵਾਹ ਵਿੱਟਨੈਸ ਵੀ ਇਹੀ ਦਾਅਵਾ ਕਰਦੇ ਹਨ।

► ਤੁਸੀਂ ਇੱਕ ਅਜਿਹੇ ਵਿਅਕਤੀ ਨੂੰ ਕੀ ਕਹੋਗੇ ਜੋ ਦਾਅਵਾ ਕਰਦਾ ਹੈ ਕਿ ਉਸਦੀ ਸੰਸਥਾ ਧਰਤੀ ਤੇ ਪਰਮੇਸ਼ੁਰ ਦੀ ਸੰਪੂਰਨ ਕਲੀਸਿਆ ਹੈ?

ਕਿਸੇ ਵੀ ਸਥਾਨਕ ਕਲੀਸਿਆ ਨੂੰ ਆਪਣੇ ਧਰਮ ਸਿਧਾਂਤ ਵਿਕਸਿਤ ਕਰਨ ਦੇ ਲਈ ਆਜਾਦ ਮਹਿਸੂਸ ਨਹੀਂ ਕਰਨਾ ਚਾਹੀਦਾ। ਇੱਕ ਸਥਾਨ ਤੇ ਪੌਲੁਸ ਨੇ ਨਿਰਦੇਸ਼ ਦਿੱਤੇ, ਅਤੇ ਫਿਰ ਉਸਨੇ ਕਿਹਾ ਕਿ ਪਰਮੇਸ਼ੁਰ ਦੀਆਂ ਕਲੀਸਿਆਵਾਂ ਦੇ ਵਿੱਚ ਇਹੀ ਦਸਤੂਰ ਹੈ (੧ ਕੁਰਿੰਥੀਆਂ ਨੂੰ 11:16)। ਉਸਨੇ ਕਲੀਸਿਆ ਨੂੰ ਕਿਹਾ ਕਿ ਉਨ੍ਹਾਂ ਨੂੰ ਕੁਝ ਸੇਵਕਾਂ ਨੂੰ ਸਵੀਕਾਰ ਕਰਨਾ ਚਾਹੀਦਾ ਹੈ ਜੋ ਦੂਸਰੀਆਂ ਕਲੀਸਿਆਵਾਂ ਦੇ ਪ੍ਰਤੀਨਿਧੀ ਹੈ (੨ ਕੁਰਿੰਥੀਆਂ ਨੂੰ 8:23-24)। ਉਹ ਸਪੱਸ਼ਟ ਤੌਰ ਤੇ ਇਹ ਦੱਸ ਰਿਹਾ ਸੀ ਕਿ ਕਿਸੇ ਇੱਕ ਕਲੀਸਿਆ ਦਾ ਬਾਕੀ ਸਾਰੀਆਂ ਕਲੀਸਿਆਵਾਂ ਨਾਲੋਂ ਅਲੱਗ ਧਰਮ ਸਿਧਾਂਤ ਰੱਖਣਾ ਗ਼ਲਤ ਹੈ।

ਕੁਰਿੰਥੁਸ ਦੀ ਕਲੀਸਿਆ ਨੇ ਆਤਮਿਕ ਵਰਦਾਨਾਂ ਦੀ ਬਰਕਤ ਪਾਈ ਹੋਈ ਸੀ। ਉਨ੍ਹਾਂ ਨੇ ਆਪਣੇ ਆਪ ਨੂੰ ਆਜਾਦ ਮੰਨਣਾ ਸ਼ੁਰੂ ਕਰ ਦਿੱਤਾ, ਅਤੇ ਕਿਸੇ ਹੋਰ ਦੀ ਗੱਲ ਸੁਣਨ ਦੀ ਲੋੜ ਮਹਿਸੂਸ ਨਹੀਂ ਕੀਤੀ। ਪੌਲੁਸ ਨੇ ਉਨ੍ਹਾਂ ਦੇ ਅਭਿਆਸਾਂ ਅਤੇ ਸੋਚ ਨੂੰ ਸੁਧਾਰਿਆ ਅਤੇ ਉਨ੍ਹਾਂ ਨੂੰ ਯਾਦ ਦਿਵਾਇਆ ਕਿ ਉਹ ਪਰਮੇਸ਼ੁਰ ਦੇ ਵਚਨ ਦਾ ਮੂਲ ਨਹੀਂ ਸਨ; ਇਹ ਉਨ੍ਹਾਂ ਦੇ ਕੋਲ ਹੋਰਾਂ ਦੁਆਰਾ ਆਇਆ ਅਤੇ ਇਹ ਸਿਰਫ਼ ਉਨ੍ਹਾਂ ਦੇ ਕੋਲ ਹੀ ਨਹੀਂ ਆਇਆ (੧ ਕੁਰਿੰਥੀਆਂ ਨੂੰ 14:36)। ਉਸਨੇ ਅੱਗੇ ਕਿਹਾ ਕਿ ਉਨ੍ਹਾਂ ਦੀ ਕਲੀਸਿਆ ਦੇ ਵਿੱਚ ਜਿਹੜੇ ਲੋਕ ਆਤਮਿਕ ਤੌਰ ਸਿਆਣੇ ਸਨ, ਉਹ ਪੌਲੁਸ ਦੇ ਨਿਰਦੇਸ਼ਾਂ ਨੂੰ ਪਰਮੇਸ਼ੁਰ ਦੁਆਰਾ ਪ੍ਰੇਰਿਤ ਸਮਝਣਗੇ।

ਸਥਾਨਕ ਕਲੀਸਿਆ ਸਵੈ-ਸੰਚਾਲਕ ਅਤੇ ਸਵੈ-ਸਮਰਥਕ ਹੋਣੀ ਚਾਹੀਦੀ ਹੈ; ਪਰ ਧਰਮ ਸਿਧਾਂਤ ਦੀ ਸਥਿਰਤਾ, ਸਿਖਲਾਈ ਦੇ ਸ੍ਰੋਤਾਂ ਅਤੇ ਸੰਸਾਰ ਭਰ ਦੀ ਮਿਸ਼ਨ ਦੇ ਨਜ਼ਰੀਏ ਲਈ ਇਸਦਾ ਵਿਸ਼ਵ-ਵਿਆਪੀ ਕਲੀਸਿਆ ਦੇ ਨਾਲ ਸੰਬੰਧ ਹੋਣਾ ਚਾਹੀਦਾ ਹੈ।

ਅੱਜ ਦੇ ਸਮੇਂ ਵਿੱਚ ਬਹੁਤ ਸਾਰੀਆਂ ਕਲੀਸਿਆਵਾਂ ਅਤੇ ਅਲੱਗ-ਅਲੱਗ ਪ੍ਰਕਾਰ ਦੇ ਧਰਮ ਸਿਧਾਂਤ ਹਨ, ਭਾਵੇਂ ਕਿ ਉਹ ਬਾਈਬਲ ਨੂੰ ਮੰਨਣ ਦਾ ਦਾਅਵਾ ਕਰਦੇ ਹਨ। ਇੱਕ ਕਲੀਸਿਆ ਦਾ ਵਿਸ਼ਵਵਿਆਪੀ ਕਲੀਸਿਆ ਦੇ ਪ੍ਰਤੀ ਜਵਾਬਦੇਹ ਹੋਣ ਦਾ ਇਹ ਮਤਲਬ ਨਹੀਂ ਹੈ ਕਿ ਉਸਨੂੰ ਆਪਣੇ ਆਲੇ ਦੁਆਲੇ ਦੀਆਂ ਸਾਰੀਆਂ ਕਲੀਸਿਆਵਾਂ ਦੇ ਵਾਂਗ ਬਣਨ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ। ਇਸਦੇ ਕੋਲ ਮਸੀਹਤ ਦੇ ਉਹ ਧਰਮ ਸਿਧਾਂਤ ਹੋਣੇ ਚਾਹੀਦੇ ਹਨ ਜੋ ਨਵੇਂ ਨੇਮ ਦੀ ਕਲੀਸਿਆ ਦੀ ਸ਼ੁਰੂਆਤ ਦੇ ਸਮੇਂ ਜਰੂਰੀ ਸਨ। ਇਸਨੂੰ ਕਲੀਸਿਆਵਾਂ ਦੀ ਇੱਕ ਅਜਿਹੀ ਐਸੋਸੀਏਸ਼ਨ ਦਾ ਹਿੱਸਾ ਹੋਣਾ ਚਾਹੀਦਾ ਹੈ ਜੋ ਇੱਕ ਦੂਸਰੇ ਦੇ ਪ੍ਰਤੀ ਜੁਆਬਦੇਹ ਹਨ।

ਧਰਮ ਸਿਧਾਂਤਾਂ ਦੀ ਸਥਿਰਤਾ ਦੇ ਲਈ, ਇੱਕ ਸਥਾਨਕ ਕਲੀਸਿਆ ਦੇ ਕੋਲ ਤਿੰਨ ਚੀਜਾਂ ਹੋਣੀਆਂ ਚਾਹੀਦੀਆਂ ਹਨ:

1. ਇੱਕ ਪੱਕਾ ਵਿਸ਼ਵਾਸ ਕਿ ਬਾਈਬਲ ਹੀ ਸਰਬ-ਉੱਚ ਅਧਿਕਾਰ ਹੈ

2. ਇਤਿਹਾਸਿਕ ਮਸੀਹਤ ਦੇ ਜਰੂਰੀ ਧਰਮ ਸਿਧਾਂਤ

3. ਚੰਗੀ ਧਰਮ ਸਿੱਖਿਆ ਵਾਲੀਆਂ ਕਲੀਸਿਆਵਾਂ ਦੀ ਐਸੋਸੀਏਸ਼ਨ ਦੇ ਨਾਲ ਸੰਗਤੀ

ਇਸ ਪਾਠ ਦੇ ਵਿੱਚ ਅਸੀਂ ਇਸ ਸੂਚੀ ਵਿੱਚ ਦੱਸੀ ਦੂਸਰੀ ਗੱਲ ਦਾ ਅਧਿਐਨ ਕਰ ਰਹੇ ਹਾਂ। ਅਸੀਂ ਕਲੀਸਿਆ ਦੀਆਂ ਐਸੋਸੀਏਸ਼ਨਾਂ ਦੇ ਬਾਰੇ ਹੋਰ ਪਾਠ ਦੇ ਵਿੱਚ ਗੱਲ ਕਰਾਂਗੇ।

ਇੱਕ ਸਥਾਨਕ ਕਲੀਸਿਆ ਨੂੰ ਅਜਿਹੇ ਧਰਮ ਸਿਧਾਂਤ ਸਵੀਕਾਰ ਕਰਨ ਦੇ ਲਈ ਕਦੇ ਆਜਾਦ ਮਹਿਸੂਸ ਨਹੀਂ ਕਰਨਾ ਚਾਹੀਦਾ ਜੋ ਮੁੱਢਲੀ ਕਲੀਸਿਆ ਦੇ ਜਰੂਰੀ ਧਰਮ ਸਿਧਾਂਤਾਂ ਦੇ ਵਿਰੁੱਧ ਹੋਣ। ਇੰਨ੍ਹਾਂ ਧਰਮ ਸਿਧਾਂਤਾਂ ਨੂੰ ਕੁਝ ਸ਼ੁਰੂਆਤੀ ਵਿਸ਼ਵਾਸ ਕਥਨਾਂ ਦੇ ਵਿੱਚ ਦੱਸਿਆ ਗਿਆ ਹੈ। ਰਸੂਲਾਂ ਦੇ ਵਿਸ਼ਵਾਸ ਕਥਨ, ਨਾਈਸੀਨ ਵਿਸ਼ਵਾਸ ਕਥਨ ਅਤੇ ਚੈਲਸੀਡੋਨੀਅਨ ਵਿਸ਼ਵਾਸ ਕਥਨ ਅਜਿਹੇ ਧਰਮ ਸਿਧਾਂਤਾਂ ਬਾਰੇ ਜਾਣਕਾਰੀ ਦਿੰਦਾ ਹੈ ਜੋ ਸ਼ੁਰੂਆਤ ਤੋਂ ਹੀ ਮਸੀਹਤ ਦੇ ਲਈ ਜਰੂਰੀ ਸਨ। ਇੰਨ੍ਹਾਂ ਦੇ ਵਿੱਚ ਤ੍ਰਿਏਕਤਾ ਅਤੇ ਮਸੀਹ ਦੀ ਈਸ਼ਵਰਤਾਈ ਅਤੇ ਪਵਿੱਤਰ ਆਤਮਾ ਦੇ ਧਰਮ ਸਿਧਾਂਤ ਸ਼ਾਮਿਲ ਹਨ। ਜੇਕਰ ਕੋਈ ਕਲੀਸਿਆ ਇੰਨ੍ਹਾਂ ਵਿਸ਼ਵਾਸ ਕਥਨਾਂ ਦੇ ਧਰਮ ਸਿਧਾਂਤਾਂ ਦਾ ਇਨਕਾਰ ਕਰ ਦਿੰਦੀ ਹੈ, ਤਾਂ ਇਸਨੂੰ ਆਪਣੇ ਆਪ ਨੂੰ ਮਸੀਹੀ ਨਹੀਂ ਕਹਿਣਾ ਚਾਹੀਦਾ, ਕਿਉਂਕਿ ਉਹ ਕੋਈ ਦੂਸਰਾ ਧਰਮ ਹਨ।

ਮੈਂ ਇੱਕ ਪਰਮੇਸ਼ੁਰ ਤੇ ਵਿਸ਼ਵਾਸ ਕਰਦਾ ਹਾਂ, ਸਰਬ ਸ਼ਕਤੀਮਾਨ ਪਿਤਾ, ਜੋ ਆਕਾਸ਼ ਅਤੇ ਧਰਤੀ, ਅਤੇ ਸਭ ਵਿਖਣ ਵਾਲੀਆਂ ਅਤੇ ਨਾ ਵਿਖਣ ਵਾਲੀਆਂ ਵਸਤਾਂ ਦਾ ਰਚਨਹਾਰਾ ਹੈ।

ਅਤੇ ਯਿਸੂ ਮਸੀਹ ਦੇ ਵਿੱਚ, ਜੋ ਪਰਮੇਸ਼ੁਰ ਦਾ ਇੱਕਲੌਤਾ ਪੁੱਤਰ ਹੈ; ਉਹ ਸਾਰੇ ਸੰਸਾਰਾਂ ਨਾਲੋਂ ਪਹਿਲਾਂ ਪਿਤਾ ਦੇ ਸੰਗ ਸੀ, ਪਰਮੇਸ਼ੁਰ ਦਾ ਪਰਮੇਸ਼ੁਰ, ਚਾਨਣ ਦਾ ਚਾਨਣ, ਪੂਰੀ ਤਰ੍ਹਾਂ ਈਸ਼ਵਰ, ਇੱਕਲੌਤਾ, ਨਾ ਕਿ ਰਚਿਆ ਹੋਇਆ; ਜੋ ਪਿਤਾ ਦੇ ਨਾਲ ਇੱਕ ਹੈ; ਜਿਸਦੇ ਦੁਆਰਾ ਸਭ ਕੁਝ ਰਚਿਆ ਗਿਆ; ਜੋ ਸਾਡੇ ਮਨੁੱਖਾਂ ਦੇ ਲਈ ਅਤੇ ਸਾਡੀ ਮੁਕਤੀ ਦੇ ਲਈ ਸਵਰਗ ਤੋਂ ਹੇਠਾਂ ਆਇਆ, ਅਤੇ ਕੁਆਰੀ ਮਰੀਅਮ ਦੀ ਕੁੱਖ ਵਿੱਚ ਪਵਿੱਤਰ ਆਤਮਾ ਦੇ ਦੁਆਰਾ ਦੇਹਧਾਰੀ ਹੋਇਆ, ਅਤੇ ਉਹ ਮਨੁੱਖ ਬਣਿਆ, ਅਤੇ ਪੰਤੀਓਸ ਪਿਲਾਤੁਸ ਦੇ ਅਧੀਨ ਸਾਡੇ ਲਈ ਸਲੀਬ ਦਿੱਤਾ ਗਿਆ; ਉਸਨੇ ਦੁੱਖ ਝੱਲਿਆ ਅਤੇ ਉਹ ਦਫਨਾਇਆ ਗਿਆ; ਅਤੇ ਤੀਸਰੇ ਦਿਨ ਉਹ ਧਰਮ ਸ਼ਾਸਤਰਾਂ ਦੇ ਅਨੁਸਾਰ ਜੀ ਉੱਠਿਆ; ਅਤੇ ਸਵਰਗ ਤੇ ਉਠਾ ਲਿਆ ਗਿਆ; ਅਤੇ ਪਿਤਾ ਦੇ ਸੱਜੇ ਹੱਥ ਬਿਰਾਜਮਾਨ ਹੈ; ਅਤੇ ਉਹ ਮਹਿਮਾ ਦੇ ਨਾਲ ਦੁਬਾਰਾ ਵਾਪਿਸ ਆਵੇਗਾ, ਜਿਉਂਦਿਆਂ ਅਤੇ ਮੁਰਦਿਆਂ ਦਾ ਨਿਆਂ ਕਰਨ ਦੇ ਲਈ; ਉਸਦੇ ਰਾਜ ਦਾ ਕੋਈ ਅੰਤ ਨਾ ਹੋਵੇਗਾ।

ਅਤੇ ਮੈਂ ਪਵਿੱਤਰ ਆਤਮਾ ਤੇ ਵਿਸ਼ਵਾਸ ਕਰਦਾ ਹਾਂ, ਜੋ ਪ੍ਰਭੂ ਅਤੇ ਜੀਵਨਦਾਤਾ ਹੈ, ਜੋ ਪਿਤਾ ਅਤੇ ਪੁੱਤਰ ਤੋਂ ਆਉਂਦਾ ਹੈ; ਜਿਸਦੀ ਪਿਤਾ ਅਤੇ ਪੁੱਤਰ ਦੇ ਨਾਲ ਅਰਾਧਨਾ ਕੀਤੀ ਜਾਂਦੀ ਹੈ ਅਤੇ ਉਹ ਮਹਿਮਾ ਪਾਉਂਦਾ ਹੈ; ਜਿਸਨੇ ਨਬੀਆਂ ਦੇ ਨਾਲ ਗੱਲਬਾਤ ਕੀਤੀ; ਅਤੇ ਮੈਂ ਇੱਕ ਵਿਸ਼ਵਵਿਆਪੀ ਅਤੇ ਰਸੂਲੀ ਕਲੀਸਿਆ ਤੇ ਵਿਸ਼ਵਾਸ ਕਰਦਾ ਹਾਂ; ਮੈਂ ਪਾਪਾਂ ਦੀ ਮਾਫੀ ਦੇ ਲਈ ਇੱਕ ਬਪਤਿਸਮੇ ਨੂੰ ਮੰਨਦਾ ਹਾਂ; ਅਤੇ ਮੈਂ ਮੁਰਦਿਆਂ ਦੇ ਜੀ ਉੱਠਣ; ਅਤੇ ਆਉਣ ਵਾਲੇ ਸੰਸਾਰ ਦੇ ਜੀਵਨ ਦੀ ਉਡੀਕ ਵਿੱਚ ਹਾਂ। ਆਮੀਨ।

ਕੀ ਹੋਵੇਗਾ ਜੇਕਰ ਕੋਈ ਵਿਅਕਤੀ ਇਹ ਫੈਸਲਾ ਕਰਦਾ ਹੈ ਕਿ ਉਹ ਨਾਈਸੀਨ ਵਿਸ਼ਵਾਸ ਕਥਨ ਦੇ ਕਿਸੇ ਇੱਕ ਕਥਨ ਨਾਲ ਸਹਿਮਤ ਨਹੀਂ ਹੈ? ਕਿਉਂਕਿ ਇਹ ਧਰਮ ਸਿਧਾਂਤ ਸ਼ੁਰੂ ਤੋਂ ਹੀ ਕਲੀਸਿਆ ਦੁਆਰਾ ਮੰਨੇ ਜਾਂਦੇ ਰਹੇ ਹਨ, ਜੇਕਰ ਉਹ ਇੱਕ ਤੋਂ ਇਨਕਾਰ ਕਰਦਾ ਹੈ, ਤਾਂ ਉਹ ਅਜਿਹੀ ਸਚਿਆਈ ਦੀ ਸਮਝ ਹੋਣ ਦਾ ਦਾਅਵਾ ਕਰ ਰਿਹਾ ਹੈ ਜੋ ਕਲੀਸਿਆ ਦੇ ਕੋਲ 2,000 ਸਾਲਾਂ ਤੋਂ ਨਹੀਂ ਸੀ। ਜੇਕਰ ਕੋਈ ਕਲੀਸਿਆ ਜਾਂ ਵਿਅਕਤੀ ਰਸੂਲਾਂ ਦੇ ਵਿਸ਼ਵਾਸ ਕਥਨਾਂ, ਨਾਈਸੀਨ ਵਿਸ਼ਵਾਸ ਕਥਨਾਂ ਅਤੇ ਚੈਲਸੀਡੋਨੀਅਨ ਦੇ ਵਿਸ਼ਵਾਸ ਕਥਨਾਂ ਨੂੰ ਨਹੀਂ ਮੰਨਦਾ, ਤਾਂ ਉਸਦੇ ਧਰਮ ਸਿਧਾਂਤ 'ਤੇ ਭਰੋਸਾ ਨਹੀਂ ਕੀਤਾ ਜਾਣਾ ਚਾਹੀਦਾ। ਵਿਸ਼ਵਾਸ ਕਥਨਾਂ ਦੇ ਧਰਮ ਸਿਧਾਂਤ ਸ਼ੁਭਸਮਾਚਾਰ ਦਾ ਸਮਰਥਨ ਕਰਦੇ ਹਨ। ਜੇਕਰ ਕੋਈ ਵਿਅਕਤੀ ਧਰਮ ਦੇ ਸਿਧਾਂਤ ਤੋਂ ਇਨਕਾਰ ਕਰਦਾ ਹੈ, ਤਾਂ ਉਹ ਸ਼ੁਭਸਮਾਚਾਰ ਦਾ ਵਿਰੋਧ ਕਰ ਰਿਹਾ ਹੈ।

► ਤੁਸੀਂ ਕਿਸੇ ਅਜਿਹੇ ਵਿਅਕਤੀ ਨੂੰ ਕੀ ਕਹੋਗੇ ਜੋ ਕਹਿੰਦਾ ਹੈ ਕਿ ਉਹ ਮਸੀਹੀ ਹੈ ਪਰ ਉਹ ਨਾਈਸੀਨ ਵਿਸ਼ਵਾਸ ਕਥਨ ਦੇ ਬਿਆਨ ਨਾਲ ਸਹਿਮਤ ਨਹੀਂ ਹੈ?

1. ਇੱਕ ਸਥਾਨਕ ਕਲੀਸਿਆ ਵਿਸ਼ਵਾਸੀਆਂ ਦਾ ਅਜਿਹਾ ਸਮੂਹ ਹੈ ਜੋ ਮਿਲ ਕੇ ਕਿਸੇ ਖਾਸ ਸਥਾਨ ਤੇ ਕਲੀਸਿਆ ਹੋਣ ਦਾ ਸਮਰਪਣ ਕਰਦੇ ਹਨ।

2. ਕਲੀਸਿਆ ਸੰਸਾਰ ਨੂੰ ਪਰਮੇਸ਼ੁਰ ਦਾ ਸੁਭਾਅ ਵਿਖਾਉਂਦੀ ਹੈ।

3. ਆਤਮਾ ਦਾ ਜੀਵਨ ਕਲੀਸਿਆ ਦਾ ਜੀਵਨ ਅਤੇ ਏਕਤਾ ਹੈ।

4. ਕਲੀਸਿਆ ਦੀ ਮੈਂਬਰਸ਼ਿਪ ਪਰਮੇਸ਼ੁਰ ਦੇ ਨਾਲ ਸੰਬੰਧ ਅਤੇ ਵਿਸ਼ਵਾਸੀਆਂ ਦੇ ਸਮੂਹ ਦੇ ਪ੍ਰਤੀ ਸਮਰਪਣ ਤੇ ਆਧਾਰਿਤ ਹੈ।

5. ਇੱਕ ਹੀ ਵਿਸ਼ਵਵਿਆਪੀ ਕਲੀਸਿਆ ਹੈ ਜੋ ਇੱਕ ਮਸੀਹਤ ਨੂੰ ਮੰਨਦੀ ਹੈ ਕਿਉਂਕਿ ਕਲੀਸਿਆ ਇੱਕ ਪਰਮੇਸ਼ੁਰ ਦੇ ਬਾਰੇ ਹੈ।

6. ਕੋਈ ਵੀ ਮਨੁੱਖੀ ਸੰਸਥਾ ਧਰਤੀ ਤੇ ਪਰਮੇਸ਼ੁਰ ਦੀ ਸੰਪੂਰਨ (ਇੱਕ ਮਾਤਰ) ਕਲੀਸਿਆ ਨਹੀਂ ਹੈ।

7. ਇੱਕ ਸਥਾਨਕ ਕਲੀਸਿਆ ਨੂੰ ਵਿਸ਼ਵਵਿਆਪੀ ਕਲੀਸਿਆ ਦੇ ਜਰੂਰੀ ਸਿਧਾਂਤਾਂ ਅਤੇ ਇਤਿਹਾਸਿਕ ਧਰਮ ਸਿਧਾਂਤਾਂ ਨੂੰ ਸਾਂਭ ਕੇ ਰੱਖਣਾ ਚਾਹੀਦਾ ਹੈ।

1. ਪਾਠ 1 ਲਈ ਸੱਤ ਸੰਖੇਪ ਬਿਆਨ ਯਾਦ ਰੱਖੋ। ਸੱਤ ਸੰਖੇਪ ਬਿਆਨਾਂ (ਸੱਤ ਪੈਰੇ) ਵਿੱਚੋਂ ਹਰੇਕ ਦੇ ਅਰਥ ਅਤੇ ਮਹੱਤਤਾ ਕਿਸੇ ਅਜਿਹੇ ਵਿਅਕਤੀ ਨੂੰ ਸਮਝਾਉਂਦੇ ਹੋਏ ਇੱਕ ਪੈਰਾ ਲਿਖੋ ਜੋ ਇਸ ਕਲਾਸ ਵਿੱਚ ਨਹੀਂ ਹੈ। ਅੱਗਲੀ ਕਲਾਸ ਤੋਂ ਪਹਿਲਾਂ ਇਸਨੂੰ ਕਲਾਸ ਦੇ ਆਗੂ ਨੂੰ ਸੌਂਪ ਦਿਓ। ਜੇਕਰ ਕਲਾਸ ਦਾ ਆਗੂ ਤੁਹਾਨੂੰ ਚਰਚਾ ਸਮੇਂ ਦੌਰਾਨ ਪੁੱਛਦਾ ਹੈ ਤਾਂ ਸਮੂਹ ਨਾਲ ਇੱਕ ਪੈਰਾ ਸਾਂਝਾ ਕਰਨ ਲਈ ਤਿਆਰ ਰਹੋ। ਅੱਗਲੇ ਕਲਾਸ ਸੈਸ਼ਨ ਦੇ ਸ਼ੁਰੂ ਵਿੱਚ ਆਪਣੀ ਯਾਦਦਾਸ਼ਤ ਤੋਂ ਬਿਆਨ ਲਿਖੋ।

2. ਇਸ ਕੋਰਸ ਦੇ ਦੌਰਾਨ ਤੁਹਾਨੂੰ ਇੱਕ ਪਾਠ ਜਾਂ ਪਾਠ ਦੇ ਇੱਕ ਹਿੱਸੇ ਨੂੰ ਕਿਸੇ ਅਜਿਹੇ ਵਿਅਕਤੀ ਜਾਂ ਸਮੂਹ ਨੂੰ ਸਿਖਾਉਣ ਦੀ ਜਰੂਰਤ ਹੋਵੇਗੀ ਜੋ ਇਸ ਕਲਾਸ ਦਾ ਹਿੱਸਾ ਨਹੀਂ ਹੈ। ਤੁਸੀਂ ਸਿਖਾਉਣ ਦੇ ਲਈ ਸਮੱਗਰੀ ਦੀ ਚੋਣ ਕਰ ਸਕਦੇ ਹੋ। ਤੁਹਾਨੂੰ ਇਸਨੂੰ ਅਲੱਗ-ਅਲੱਗ ਸਮੱਗਰੀ ਦੇ ਨਾਲ ਤਿੰਨ ਵਾਰ ਕਰਨਾ ਪਵੇਗਾ। ਆਪਣੇ ਸਿਖਾਉਣ ਦੇ ਮੌਕਿਆਂ ਲਈ ਸਮਾਂ ਨਿਰਧਾਰਿਤ ਕਰੋ ਅਤੇ ਜੋ ਤੁਸੀਂ ਸਿਖਾਇਆ ਹੈ ਉਸਦੇ ਬਾਰੇ ਕਲਾਸ ਦੇ ਆਗੂ ਨੂੰ ਰਿਪੋਰਟ ਦਿਓ।