Энэ хичээлийн төгсгөлд суралцагч дараах ойлголт, чадварт суралцсан байна:

(1) Мөнгө, нөөц боломжоо Бурханы зарчмуудын дагуу зөв зохистой хэрэглэх шийдвэр гаргаж, даган мөрдөх.

(2) Мөнгөтэй холбоотой буруу үзэл бодол, мөнгөний буруу хэрэглээнээс үүддэг сүнслэг аюулуудыг ойлгож, хэрхэн зайлсхийх талаар суралцана.

Жон Весли 1703-1791 онд Англид амьдарч байсан хүн юм. Чуулганууд хүлээж авдаггүй ядуу хүмүүст тэр гадаа, гудамжинд сайнмэдээ тунхагладаг байлаа. Мөнгөө зарцуулахаас эхлээд амьдралынхаа бүх асуудал дээр Бурханыг хүндэтгэхийг эрмэлзэн, нямбай амьдарч байв. Тиймээс итгэгч хүн мөнгө олж л байгаа бол, аль болох хадгалж, чадах чинээгээрээ бусдад өгч байх ёстой гэж заадаг байлаа. Тэрээр яаж санхүүгийн сахилга баттай байх талаар үлгэр дуурайл үзүүлж байв. Тиймээс өргөлийн мөнгөө нэмэгдүүлэхийн тулд жилийнхээ зарлагыг багасгадаг байжээ. Улмаар орлого нь өссөн ч зардлаа нэмэгдүүлдэггүй бөгөөд илүү гарсан бүхнээ өргөдөг байсан юм. Жон Весли насан туршдаа өндөр орлоготой байсан ч, нас барах үедээ хэдхэн зоос л үлдээжээ. Мөнгийг удирдах үүрэг хариуцлагыг Бурхан хүмүүст даатгадаг гэдгийг тэрээр мэддэг байсан төдийгүй, итгэгч хүн мөнгөтэй харьцахдаа Бурханы зарчмуудыг дагах ёстой хэмээн заадаг байжээ.

Шинэ гэрээнд мөнгөний тухай бусад сэдвээс илүү олон удаа дурдсан байдаг. Бурханд мөнгө чухал биш боловч мөнгөтэй холбоотой асуудал хүмүүсийн дунд их байдаг учраас ийнхүү олонтаа дурдагджээ.

Бүтээгчийн хувьд бүх хүн, бүх эд хөрөнгө Бурханых юм. Итгэгч биднийг Бурхан зольж авсан учраас бид Түүнд онцгой байдлаар харьяалагддаг. Бид Бурханы алдрын төлөө ашиглагдах ёстой хөрөнгө мөнгийг захиран зарцуулах нярав хэмээн өөрсдийгөө тооцох ёстой.

Сайхан эд юмсыг хэрэглэх нь буруу зүйл биш. Хэрэв бид бүх юмыг талархал, даруу байдлаар хүлээн авбал, Бурхан биднийг дуртайяа ивээдэг юм.

Гэхдээ мөнгөнөөс болж олон хүн сүнслэг аюулд ордог.

► Баян хүн гэж хэнийг хэлэх вэ?

Хүнийг баян гэж тооцох янз бүрийн шалтгаан байдаг.

Хэрэв та үндсэн хэрэгцээнээсээ илүү зүйл худалдан авах мөнгөтэй бол, та энэ дэлхийн хүмүүсийн тал хувиас илүү баян байна. Хоногийн хоолныхоо төлөө өдөр бүр ажиллах ёстой болдог маш олон хүн бий. Хэрэв тэд ямар нэг шалтгаанаар ажлаа хийж чадахгүй болбол идэх хоолгүй болно.

Харин хүмүүс амьдарч буй нийгмийнхээ ихэнх хүнээс илүү мөнгө хөрөнгөтэй хүнийг л баян гэдэг. Тийм хүмүүс хэрэгцээндээ бусдаас илүү их мөнгө зарцуулах хэв маягтай. Бусад хүмүүс ч тэднийг нийгмийн дээд давхаргынхан гэж үзнэ. Тэд ихэнх хүний худалдан авч дийлэхээргүй тансаг хэрэглээтэй бөгөөд эрх мэдэлтэй хүмүүст нөлөөлж чаддаг. Тэдний эд хөрөнгө, боломж нөөцөөс болоод хүмүүс тэдэнд үйлчлэхэд бэлэн байдаг.

Харин Библид баян хүмүүст хандсан тусгай заавар, анхааруулгууд бий.

Есүс “Баян хүн тэнгэрийн улсад орох маш хэцүү” хэмээсэн нь маш ноцтой сэрэмжлүүлэг юм (Матай 19:24).

Баячуудад элч Паулын хэлсэн үгээс хөрөнгө мөнгөтэй холбоотой аюул эрсдэл их байдгийг бид ойлгож авах боломжтой.

► Нэг суралцагч 1 Тимот 6:17-19 эшлэлийг бүлэгт уншина.

Паул баян хүмүүст өөрсдийгөө бусдаас дээгүүр зиндаанд тооцохгүй байхыг анхааруулж байна. Ер нь баячууд өөрсдийгөө бусдаас илүү гэж бодох сорилттой тулгарч байдаг. Иаков ч бас чуулганы гишүүдэд хүмүүсийг хөрөнгө мөнгө, нийгмийн зэрэг зиндаанаас нь болж ялгаварлан харилцах алдааг гаргаж болохгүй хэмээн анхааруулсан байна (Иаков 2:1-4).

Баян хүн эд хөрөнгөндөө найдаж тайвшралгүй, харин Бурханд түшиглэх ёстой. Баячууд санхүүгийн хувьд боломжтой амьдардаг учраас Бурханы хангамжид найдах хэрэгцээг мэдэрч чадахгүй, сүнслэг тал дээр хайнга болох нь бий (Дэд хууль 8:6-18).

Баян хүн өгөөмөр байж, мөнгө хөрөнгөөрөө сайн зүйлсийг хийх ёстой.

Бусад хүмүүс зовж байхад энэ дэлхийн баячууд зугаа цэнгэлээр амьдарч, тансаглаж байгаа явдлыг Иаков 5:5-д буруушаасан байдаг. Ухаалгаар өгснөөр олон сайн зүйл хийж болно. Мөнгөөр аз жаргалыг худалдаж авч болохгүй ч, зовлон зүдүүрийг нимгэлж болно. Тиймээс хүн тансаг амьдарч байгаа бол бусдын зовлонг үл тоож болохгүй.

Бурхан эш үзүүлэгч Амосоор дамжуулан шударга ёсны төлөөх зүрх сэтгэлээ (ядуу, дарлагдсан хүмүүст өршөөнгүй, өрөвч сэтгэлээр хандах) “Шударга ёс ус мэт зөвт байдал мөнхийн урсгал мэт урсаг” (Амос 5:24) хэмээн илэрхийлсэн байдаг. Хүмүүс хөгжиж дэвжээд, тайван назгай, өөрийгөө эрхэмлэж, ядуусын зовлонг үл хайхрах үед Бурхан шүүлтийг авчирдаг (Амос 6:1, 3-6; Амос 8:4-7, 11-12).

Итгэгч хүн бүр ядуус, зовж зүдэрсэн хүмүүст туслахын тулд өргөлөө өргөх ёстой. Аравны нэгээрээ нутгийн чуулганаа дэмжсэнээр сайнмэдээг түгээх ажлуудад оролцож буй хэрэг. Жон Весли тухайн үеийнхээ чуулганыг хүмүүст нөлөө үзүүлэхдээ тааруу байсныг гурван шалтгаанаас үүдэлтэй гэжээ. Үүнд:

1. Зөв эрүүл сургаалаар дутмаг,

2. Сахилга баттай байдал дутмаг,

3. Өргөл зориулалт дутмаг гэх шалтгаанууд байжээ.

► Нэг суралцагч 1 Тимот 6:8-10 эшлэлийг бүлэгт уншина.

Библид мөнгөний тухай сэрэмжлүүлгийг зөвхөн баян хүмүүст хандан хэлсэн юм биш. Маш олон хүн ядуугаасаа болоод аз жаргалтай байж чаддаггүй. Харин Библи хүмүүст хандаж, мөнгийг хайрлах хайр бол бүхий л бузар муугийн үндэс юм гэж хэлсэн бөгөөд энэ сэрэмжлүүлэг бүх хүнд хамаатай.

Мөнгийг хайрлах хайр хэзээ ч ханахгүй. Мөнгөнд дуртай хүнд ханах хэмжээ гэж байхгүй (Номлогчийн үгс 5:10). Тиймээс Библи бидэнд мөнгөнд дурлахаас зайлсхийж, үндсэн хэрэгцээтэй зүйлсдээ сэтгэл хангалуун байх ёстой гэж зааж байна (Еврей 13:5).

Баяжихыг хүсдэг хүн олон сорилт, уруу таталттай тулгардаг бөгөөд янз бүрийн авир ааш гаргахад хүрдэг. Баяжих гэж явсан хүн итгэлээ орхиж, баяр хөөр биш харин гуниг зовлонгоор дүүрч ч болно.

Зарим шашны удирдагчид хүмүүсийг татахын тулд шашинд нь элсвэл баян болгоно гэж амладаг. Ядуу буурай орны олон хүн хүнд амьдралаасаа болоод иймэрхүү амлалтад уруу татагддаг. Ийм удирдагчид байнга мөнгөний тухай ярьж, номлодог төдийгүй, санхүүгийн амжилтаа гайхуулдаг энэ ертөнцийн хүмүүс шиг байж чадна гэж бардамнадаг.

Харин итгэл сүсэгтэй, сэтгэл хангалуун байх нь хамгийн агуу ашиг гэж Библид хэлсэн юм (1 Тимот 6:6). Шашны аргаар баяжих гэж хөөцөлдөх нь энэ дэлхийн элдэв арга замаар баяжих гэж явдаг хүнтэй адилхан аюулд унадаг. Баян болгоно гэж амладаг чуулганууд жинхэнээсээ итгээгүй хүмүүсийг иймэрхүү хүслээр нь урхиддаг. Гэхдээ ийм чуулгануудад явсан хүн хэзээ ч хүссэндээ хүрдэггүй бөгөөд тэнд горьдлого тээсэн баахан хүн л байдаг. Эд баялгийн сайнмэдээг номлодог чуулганд баяжиж чаддаг хүмүүс нь итгэгчдээсээ өргөл хурааж авдаг тухайн чуулганы номлогч нар л байдаг.

► Нэг суралцагч Филиппой 4:10-13 эшлэлийг бүлэгт уншина.

Филиппой чуулганы итгэгчдийн явуулсан дэмжлэгт Паул ихэд талархаж байлаа. Тэрээр ямар ч нөхцөлд, өлсгөлөн дунд ч сэтгэл хангалуун байхыг сурсан гэж хэлжээ. Энэ үгээс Паулд мөнгөгүй үе гарч байсан гэдэг нь харагдаж байна. Гэсэн ч тэрээр Бурханы тусламжтайгаар бүгдийг хийж чадна гэсэн юм. Хам сэдвээс нь харвал энэ үг ямар ч үед сэтгэл хангалуун, Бурханд итгэсээр байна гэсэн санааг илэрхийлж байна.

► Нэг суралцагч Сургаалт үгс 11:1 эшлэлийг бүлэгт уншина.

Энэ эшлэлд жимс, ногоо, мах мэтийн жижиглэнгийн барааг хэмжих жин хэмжүүрийн тухай хэлж байна. Зарим хүн илүү мөнгө авахын тулд хуурамч жинлүүр хэрэглэдэг. Ийм зүйлийг Бурхан үзэн яддаг гэжээ.

Олон хүн мөнгөний төлөө шударга бус зүйлсийг хийдэг. Энэ курсын дараагийн хичээлээр бид шударга байдлын талаар үзэх болно.

Элч Паул филиппойчуудад бичсэн захидалдаа Бурхан тэдний хэрэгцээг хангана хэмээн бичжээ. Энэ бол гайхалтай амлалт. Гэхдээ энэ амлалт тэднийг ямар нөхцөл байдалд байхад өгөгдсөнийг харцгаая.

► Нэг суралцагч Филиппой 4:15-19 эшлэлийг бүлэгт уншина.

Тэр чуулганыхан Паулд мөнгөн тусламж илгээхэд тэрээр үүнийг Бурханд өргөсөн тахил байна гэж хэлжээ. Улмаар Бурхан тэдний хэрэгцээг хангана гэж Паул амлахдаа мөнгийг нь өсгөж өгнө гэж хэлээгүйг анхаараарай.

Энэ бол хариуцлагагүй эсвэл үрэлгэн хүмүүст биш, харин мөнгөө сүнслэг зарчмуудын дагуу зохицуулдаг хүмүүст зориулагдсан амлалт юм.

► Нэг суралцагч Матай 6:25-33 эшлэлийг бүлэгт уншина.

Бурхан шувуудыг тэжээж, цэцэгсийн үзэсгэлэнгээр гоёдог шигээ хүмүүс бидний хэрэгцээг ч бас хангах учраас бид яаж амьдрах талаар санаа зовох хэрэггүй гэж Есүс хэлж байна. Энэ эшлэлд хэрэв бид Бурханы хаанчлалыг эн тэргүүнд тавивал бүх хэрэгцээ маань хангагдана хэмээн амлаж байна.

Хүмүүс ихэвчлэн өнөөдрийнхөө төлөө биш, харин ирээдүйнхээ төлөө санаа зовдог. Бурхан бүх зүйлийг урьдаас бэлтгэж өгнө гэж амлаагүй. Хуучин гэрээний үед израилчууд дээр өдөр бүр тэнгэрээс манна бууж ирдэг байсан түүхийг санаарай (Гэтлэл 16). Яг үүн шиг өдөр бүрийн хэрэгцээнийхээ төлөө Бурханд залбирах ёстой хэмээн Есүс хэлж байна (Матай 6:11). Бурхан биднийг өдөр бүр Өөрт нь найдаасай гэж хүсдэг.

Бурхан ядуусыг итгэлдээ баян байлгахаар сонгосон гэж Иаков хэлжээ (Иаков 2:5). Санхүүгийн хувьд өөрсдийгөө аюулгүй гэж боддог хүмүүсээс илүү ядуу хүмүүст Бурханд түшиглэх боломж их байдаг.

Бурханд найдна гэдэг хариуцлагагүй байна гэсэн үг биш. Бурхан ерөнхийдөө ажил хөдөлмөрөөр маань дамжуулан бидний хэрэгцээг хангадаг (Ефес 4:28). Хэрэв хүн ажил хийх дургүй бол Бурханы хангамжийг хүлээх хэрэггүй бөгөөд бусад нь ч тийм хүнд өгөөд байх албагүй (2 Тесалоник 3:10).

Түүнчлэн Бурханы хангамж биднийг баян болгох ёстой гэж бодож болохгүй. Бурхан зарим хүнийг их баялгаар ерөөж өгдөг боловч, баян болох нь хүн бүрд зориулагдсан Бурханы төлөвлөгөө биш. Хөрөнгө мөнгийг хэт хүсэмжилдэг хүн сүнслэг тал дээр асуудалд ордог.

Орлого олоход тусалдаг аливаа хэрэгслийг орлогын эх үүсвэр гэж хэлж болно. Жишээлбэл, газар, янз бүрийн багаж хэрэгсэл, эсвэл компьютер гэх мэт. Хүн орлогын эх үүсвэрээ ашиглан ашиг мөнгө олж болох ч, үүнийгээ арчилж тордохгүй байх юмуу зарж үрвэл үр шимийг нь хүртэж чадахаа болино. Орлогын эх үүсвэрийн тухай Сургаалт үгс 14:4-т “Шар байхгүй газар тэжээлийн тэвш хоосон, шарын хүч байх аваас орлого арвин” хэмээн хэлсэн байдаг.

Орлогын эх үүсвэрийн талаар ихэвчлэн ядуу хүмүүс сайн ойлгодоггүй. Жишээ нь, найз нь үнэтэй багаж хэрэгсэл, компьютер, машинтай бол тэр найзыгаа их мөнгөтэй л гэж бодно. Тэгээд хэрэг гарахаараа тэр найзаасаа юмуу хамаатан саднаасаа мөнгө гуйж, өөрт нь өгөх ёстой гэж боддог. Гэвч ийм эд зүйлс бол хөрөнгө мөнгө биш, харин орлогын эх үүсвэр, зарж болшгүй хэрэгсэл юм. Зарчихвал бүх орлогоо алдана гэсэн үг.

► Таны эргэн тойронд зарж болшгүй орлогын эх үүсвэр байна уу?

Хэрэв хүн бусад хүмүүсийн орлогын эх үүсвэрээ хэрхэн ашиглаж байгааг нь ойлгодоггүй бол өөртөө байгаа эх үүсвэрийг ч мөн хэрхэн ашиглахаа мэдэхгүй байх талтай. Тийм хүн магадгүй өөрт нь яг юу хэрэгтэй, ямар тусламж авбал нөхцөл байдал нь өөрчлөгдөж болох талаар тодорхой хэлж мэдэхгүй байдаг. Тиймээс амьдралыг нь үнэхээр өөрчлөх өөрчлөлтийн оронд өдөр тутмынх нь орлогыг түр сайжруулах түр зуурын дэмжлэгийг л тусламж гэж ойлгодог байж мэднэ.

Орлогын эх үүсвэрээр дутмаг байх нь ядуурлын нэг шинж юм. Хүн ядуурлаас гарахын тулд шаардлагатай ур чадварыг эзэмшиж, үүнийгээ хөгжүүлэн, орлогын эх үүсвэрээ арчилж тордохгүй л бол, бусдаас хараат байдлаасаа гарч чадахгүй.

Зарим соёлд хүн мөнгө хураах, орлогын эх үүсвэрээ хөгжүүлэх маш хэцүү байдаг. Тийм нөхцөлд амьдардаг хүнийг эргэн тойрны хүмүүс нь бүх юмаа өөрсөдтэй нь хуваалцах ёстой гэж бодно. Тиймээс хэн нэгэнд нь мөнгө хэрэгтэй байхад тэр яагаад мөнгөө цааш хадгалж байгаа юм гэж боддог. Тэд өөрсдөө хариуцлагагүй амьдарч байгаа хэрнээ, нөгөө хүнийг бүх юмаа хуваалцах ёстой гэж шаарддаг.

Соёлын чанартай ийм үзэл бодлыг Христийн дагалдагч хүн хүндэтгэх ёстой боловч, Библийн зарчмыг амьдралдаа хэрэгжүүлэх ёстой. Бичвэрт хүн өөрөө хийж чадах зүйлээ хийдэггүй бол тийм хүнийг заавал дэмжих хэрэггүй гэдэг (2 Тесалоник 3:10). Хэрэв хүн орлогынхоо эх үүсвэрийг хариуцлагагүй хүнд тусламж болгож өгөөд байвал, эцэстээ хоёулаа ядуу хэвээрээ хоцорно.

Хүмүүс өөрсдийн гэсэн орлогын эх үүсвэртэй байх нь Бурханаас ирсэн хөгжил дэвжил гэж Бичвэрт битүүхэн хэлдэг. Ерөөгдсөн нийгэмд хүн бүр өөрийнхөө усан үзмийн мод, инжрийн модны дор аюулгүй сууна хэмээн эш үзүүлэгч Мика хэлсэн (Мика 4:4). Үүгээр хувийн өмч болон ямар нэг бүтээгдэхүүн хийх арга хэрэгсэлтэй байна гэсэн санааг илэрхийлж байна. Зарим газар тариалан хамгийн тохиромжтой ажил биш байж болно. Гэхдээ нөөц боломжоо ашиглахад шаардагдах хэрэгсэл нь ерөөгдсөн хүмүүст өгөгдсөн байдаг гэх үндсэн зарчим эндээс харагдаж байна.

Ядуу хүмүүс Христийн дагалдагч болсны дараа ихэвчлэн амьдрал нь сайжирч ирдэг. Энэ бол Бурханы шууд ерөөлөөс гадна тэдний амьдралын хэв маяг өөрчлөгдсөнтэй холбоотой. Тэд архи, мөрийтэй тоглоом, янз бүрийн зугаа цэнгэлд мөнгөө үрэхээ больж, илүү сайн ажиллаж, нэр хүнд нь дээшилдэг. Үйлчлэлд өргөсөн өргөлийг нь Бурхан ерөөж өгдөг юм. Гэхдээ итгэгчдийн хоёр дахь үе нь эхний үеийнхээсээ илүү сайхан, тогтвортой амьдралтай болдог.

► Таны эргэн тойронд байгаа хүмүүст ажил хийж, санхүүгийн байдлаа сайжруулан, хуримтлалтай болоход нь тус болох ямар арга зам байна вэ?

Амархан мөнгө олохын тулд мөнгөө эрсдэлд оруулахыг мөрийтэй тоглоом гэнэ. Мөрийтэй тоглоомд хожсон хүн хожигдсон хүний мөнгийг зүгээр авч байгаа юм. Түүнчлэн мөрийтэй тоглоомд маш олон хүн донтож, мөнгөө алдаад зогсохгүй, гэр бүлээ анхаарахаа ч больдог. Бас эргүүлээд хожоод олчихно гэж горьдоод бусдын мөнгийг авч мөрийтэй тоглоомд зарцуулдаг хүн ч олон. Мөрийтэй тоглохын тулд бусдын мөнгийг хулгайлаад шоронд орсон хүн ч цөөнгүй байдаг. Аз таарч их мөнгө хожихоос өөр амьдрал нь өөрчлөгдөх арга найдваргүй болсон ядуу хүмүүс бас мөрийтэй тоглодог.

Мөрийтэй тоглох нь дараах христитгэлийн зарчмуудыг зөрчиж байгаа хэрэг. Үүнд:

1. Ажил хөдөлмөр хийж мөнгө олох зарчим (Ефес 4:28)

2. Байгаа зүйлдээ сэтгэл хангалуун байх зарчим (1 Тимот 6:6)

3. Тарих ба хураах зарчим (Галат 6:7) зэрэг багтана.

Түүнчлэн, Бурхан биднийг хэн нэгнээс азаар мөнгө хожихыг бус, харин өөрсдөө ажил үйлдвэрлэл эрхэлж, хөдөлмөрийнхөө үр шимийг хүртэхийг хүсдэг.

Мөрийтэй тоглох нь Бурханд найдахын эсрэг зүйл юм. Итгэгч хүн өөрөөсөө “Бурхан надад санаа тавина гэдэгт би итгэдэг үү?”, “Хэрэгтэй зүйлсийг минь хангаж өгөхийг би Бурханаас чин сэтгэлээсээ гуйж байна уу?”, “Мөнгөө эрсдэлд оруулан мөрийтэй тоглож, хэн нэгний мөнгийг хожино гэж горьдох нь намайг хангах Бурханы арга зам мөн үү?”, “Бурхан намайг ивээгээд би мөрийтэй тоглоомноос их мөнгө хожино гэж үнэхээр бодож байна уу?” гэх асуултуудыг асуугаад үзээрэй. Мөрийтэй тоглодог хүн санхүүгийн нөхцөл байдал дээрээ Бурханд итгэж чадахгүй байгаа хэрэг. Бид чин сэтгэлээсээ Бурханд найдах үед бидний хэрэгтэй зүйлсийг маань хангаж өгнө гэдэгт найдаж, Түүний тодорхой зааврыг дагадаг.

Хүн мөнгө зээлэхдээ ирээдүйд олох мөнгөөрөө буцаагаад төлнө гэж тооцоолдог. Тэгэхээр, мөнгө зээлэх нь ирээдүйд олох мөнгөө урьдчилаад зарцуулж байна гэсэн үг. Гэтэл ирээдүйд ч бас шинэ хэрэгцээнүүд гарч ирнэ шүү дээ.

Библид зээлдэгч нь зээлдүүлэгчийнхээ боол болно гэсэн байдаг (Сургаалт үгс 22:7). Зээл тавьдаг хүн эрх чөлөөгөө тодорхой хэмжээгээр хязгаарлах үүрэг хүлээж байгаа хэрэг.

Зарим төрлийн зээл бусад зээлээсээ илүү дор байдаг. Хэрэв хүн хоол хүнс гэх мэт үндсэн хэрэгцээндээ мөнгө зээлж байгаа бол нөхцөл байдал нь улам муудна гэсэн үг. Хоолоо идээд дуусна, харин өр шир л үлдэнэ. Ингээд улам л ядуурна.

Ер нь гоёл чимэглэл, хэрэгцээгүй хувцас, зугаа цэнгэл, гэр орноо чимэглэх гэх мэтээр шаардлагагүй зүйл дээр өр тавивал ирээдүйн орлогоо урьдчилан зарцуулж байгаа хэрэг. Нэгэнт мөнгөө зарцуулчихсан учраас ирээдүйд хүссэн зүйлээ авах эрх чөлөөгөө тодорхой хэмжээгээр хязгаарлах ёстой болно.

Маш өндөр хүүтэй зээл өгдөг газрууд байдаг. Тэднээс мөнгө зээлсэн хүмүүс авснаасаа ихийг эргүүлж төлдөг. Зарим дэлгүүрүүд өндөр хүүтэй зээлээр бараа өгдөг. Зээлээр бараа авсан хүмүүс эцэст нь тухайн барааныхаа үнийг нэлээд өндөр үнээр тооцож төлдөг. Тийм хүмүүс тухайн барааны ердийн үнийг төлөөд авах хүртлээ мөнгөө цуглуулах хүсэлгүй, эсвэл тэвчдэггүй аж.

Зарим хүн нийгэм соёлынхоо нөлөөнд автаж тансаг хуримын ёслол хийхээр зээл авдаг. Ингээд гэр бүлийн амьдралаа өр ширтэй эхлүүлнэ. Ийм тохиолдолд чуулганы хүмүүс итгэлийн гэр бүлийнхэн учраас тэдний төлөө чуулган шинэ ёс заншлыг дэлгэрүүлэх юмуу, их мөнгө зарцуулалгүйгээр боломжийн хурим хийх арга олоход нь туслах ёстой.

► Нэг суралцагч Ром 13:7-8 эшлэлийг бүлэгт уншина.

Эдгээр эшлэлд хүн төлөх ёстойгоо төлж байхыг сануулж байна. Бид засаг захиргаагаа хүндэтгэж, дуулгавартай дагах ёстой бөгөөд засгийн газартаа татвар төлж байх үүрэгтэй. Энд 8-р эшлэлийн эхний өгүүлбэр 7-р эшлэлд заасан санаануудыг нэгтгэн дүгнэжээ. Бид хэнд юу өгөх ёстой байна, түүнийгээ татгалзалгүй өгөх л ёстой. Мэдээж мөнгө огт зээлж болохгүй гэсэн үг биш. Гэхдээ мөнгө зээлсэн бол тохирсон ёсоороо буцааж төлөх нь өгөх ёстойгоо унжилгүй өгч байгаа хэрэг юм.

Буцааж төлөх бодолгүйгээр зээл авах, эсвэл зээлж авчихаад дараа нь төлөхгүй байхаар шийдэх аль аль нь буруу (Дуулал 37:21).

ХГ-ний хууль заавар ихэвчлэн Израил үндэстний эртний хөдөө аж ахуйд түшиглэсэн аж амьдралд хандсан байдаг. Учир нь хүмүүс ахуй амьдралдаа хэрэгцээтэй зүйлсийг өөрсдөө үйлдвэрлэж хийдэг байсан юм. Гэр бүлүүд газрыг хэдэн үеэрээ дамжуулан өмчилж байлаа. Тиймээс газар худалдан авах юмуу, ямар нэг бизнес эхлүүлэхийн тулд мөнгө зээлэх нь ховор байжээ. Хэрэв хэн нэг нь мөнгө зээлбэл тухайн хүн маш хүнд нөхцөлд орж, хоол хүнсээ ч залгуулж чадахгүй байдалд орсон гэсэн үг байв. Бурхан израилчуудыг нэг нэгийгээ халамжилдаг итгэлээр холбогдсон гэр бүл шиг байгаасай гэж хүссэн. Тиймээс тусламж хэрэгтэй хүнд хүү авалгүйгээр мөнгө зээлүүлж байхыг тушаасан юм (Гэтлэл 22:25). Хүүгүй зээл өгөх нь зөв шударга хүний шинж чанар хэмээн Дуулал 15-д дурдсан байна (Езекиел 18:5-9 мөн адил).

Түүнчлэн хэн нэгэнд бизнес эхлүүлэх мөнгө зээлүүлж байгаа бол, хөрөнгө оруулж байгаа хүн хүү авах нь буруу зүйл биш гэжээ (Матай 25:27). Энэ тохиолдолд хөрөнгө оруулагч нь тухайн бизнесийг эрхлэх боломжийг олгосны шанд хүү авч байгаа хэрэг.

Харин ядуу хүмүүст зориулан ажил үйлчилгээ явуулдаг бол зөвхөн ашиг олох тухай бодох ёсгүй (Сургаалт үгс 22:16a). Ядуу хүний сонголтгүй байдлыг ашиглан, чанар муутай бүтээгдэхүүн зарах, эсвэл хэт өндөр үнэ тогтоох нь буруу. Хүнд байдалд байгаа учраас зээлэхээс аргагүй болсон хүнд эд бараагаа хэт өндөр үнээр зээлдүүлж, өгч ашиг олох гэж оролдох нь буруу юм. Бизнес эрхлэгч хүн хэрэглэгчдийнхээ нөхцөл байдлыг сайжруулах арга замыг эрэлхийлэх ёстой.

Эш үзүүлэгч Езекиел Содомын нүгэл нь зөвхөн гажууд бэлгийн харилцаа байгаагүй, харин тэндхийн хүмүүс бас тансаглал дунд амьдарч, ядуу, тусламж хэрэгтэй хүмүүст тусалдаггүй байсан гэж хэлжээ (Езекиел 16:49). Бурхан биднийг ядууст зөвхөн өгөөд байх бус, харин тэднийг хүчтэй болгохын тулд ухаалаг, стратегитай аргаар туслаарай гэж уриалж байна.

Эртний Израилд өгсөн Бурханы хууль зааврууд нь Бурхан юуг чухалчилдаг болохыг харуулдаг. Өнөөгийн дэлхийн улс үндэстнүүдийн хууль Израилд өгсөн Бурханы хууль заавруудтай адилгүй боловч, Бурханы санаа зовнидог асуудлууд, Бурханы зарчим хэвээрээ юм. Чуулганууд ядууст туслах арга замыг эрэлхийлэх ёстой боловч, эхлээд итгэлийн гэр бүлийнхнээ анхаарах учиртай. Тэгвэл орон нутаг, нийгэмдээ өөрчлөлт авчирч чадна.

Зарим хүн мөнгөтэй болмогцоо бүгдийг нь тэр дор нь үрж дуусгадаг. Тэгээд дахиад мөнгөтэй болох хүртлээ үргэлж хэрэгцээтэй юмаар дутагдаж явдаг. Ийм хүмүүс бусдын төлөө хариуцлага хүлээх чадваргүй юм.

Төсөвлөх гэдэг бол сарын зарлагаа зохион байгуулалтад оруулж төлөвлөнө гэсэн үг. Ихэнх хүнд урьдчилан мэдэж байдаг тодорхой зарлагууд бий. Тиймээс тэдгээр хэрэгцээнд зориулж мөнгөө хадгалах ёстой. Жишээ нь, байр түрээсэлдэг хүн байж болно. Тэгвэл сард юмуу, жилд нэг удаа түрээсээ төлөх ёстой байх. Ийм учраас тухайн хүн орлогынхоо тодорхой хэсгийг тогтмол хадгалж байвал төлөх хугацаа ирэхэд сандрах зүйлгүй байна. Жилээр нь төлдөг бол мөнгөө удаан хугацаанд хадгалах хэрэгтэй болно. Тэгвэл тэр мөнгийг өөр юманд зарцуулах уруу татлага тулгарч л таарна. Тиймээс тэр мөнгийг тусад нь хадгалж, аль хэдийн зарцуулсан мөнгө гэж тооцох ёстой.

Мэдээж хамгийн эхэнд цааш хийх мөнгө бол аравны нэг юм (Сургаалт үгс 3:9-10). Та орлогынхоо аравны нэгийг үйлчлэлд зориулах ёстой. Мөнгөө зарцуулж дуусаад аравны нэг нь үлдэхийг хүлээж болохгүй. Таны итгэмжит байдлыг Бурхан ерөөдөг.[1]

Үлдсэн орлогоороо үндсэн хэрэгцээндээ зарцуулаад, цаана нь онцгой нөхцөлд зарцуулах мөнгө мөн хадгалах нь зүйтэй. Түүнчлэн амьдралынхаа орчин нөхцлийг сайжруулах зорилгоор байшин худалдаж авах гэх мэт зардалд зориулан мөнгө хураах ёстой. Үүнээс гадна орлогоо өсгөх зорилгоор хөрөнгө оруулалт хийвэл сайн. Жишээ нь нэмэлт ажил хийхийн тулд багаж хэрэгсэл худалдан авч болно.

Машин эсвэл барилга байшин зэрэг орлогын эх үүсвэртэй хүн (үйлдвэрлэл явуулах ямар нэгэн зүйл) тухайн эх үүсвэрээ арчилж сайжруулах төсөв мөн гаргах ёстой. Хэрэв хүн машинаараа мөнгө олдог мөртлөө хуримтлал үүсгэдэггүй бол машины томоохон засвар хийлгэх юмуу шинэ машин худалдаж авах чадваргүй хэвээр үлдэнэ. Эцэстээ ашиг орлого ч олж чадахгүйд хүрнэ.

Мөнгөө төлөвлөдөггүй хүн үүрэг хариуцлагаа биелүүлж чадахгүй. Ийм хүн бусдын тусламжид найддаг тул бусдад туслах боломжгүй юм. Тэр ямар нэг замаар хөрөнгө оруулалт хийдэггүй учраас нөхцөл байдал нь хэзээ ч сайжрахгүй.

Есүс шархадсан хүнд тусалсан сайн самари хүний тухай ярьсан байдаг (Лук 10:25-37). Тэр самари хүнд тодорхой хэмжээний мөнгө, шархадсан хүнийг дүүрч явах илжиг байсан. Хэрэв самари хүн илжгээ зараад, мөнгөө үрчихсэн байсан бол юу болох байсан бол? Туслах сайхан сэтгэл байвч тухайн нөхцөл байдалд туслах боломж нь хязгаарлагдмал байх байсан.

Мөнгөө төлөвлөх нь үндсэн хэрэгцээгээ хангахад бэлэн байх, өөрөөс нь хамааралтай хүмүүсийн өмнө үүрэг хариуцлагаа үүрэх чадамжтай байх, ирээдүйдээ хөрөнгө оруулах, яаралтай үед бусдад тусалж чадах, сайнмэдээний үйлчлэлд дэмжлэг үзүүлэх боломжуудыг олгодог.

Пентэкостоос хойш, анхны чуулган байгуулагдсаны дараа итгэгчид итгэлийн гэр бүлийнхээ гишүүдийн үндсэн хэрэгцээний төлөө зориулалт гаргадаг байлаа. Тэд эд хөрөнгөө дундаа хэрэглэж, хэн ч өөрийнхөө юмыг өмчирхдөггүй байсан. Олон хүн газар, эд хөрөнгөө зарж, мөнгийг нь чуулганд хандивласан юм (Үйлс 2:44-45). Мэдээж бид чуулганы амьдрал яг ийм болно гэж хүлээх хэрэггүй ч, чуулган хамгийн сайнаараа байх үед чуулганы хүмүүсийн дунд өгөөмөр байдал, бусдыгаа халамжилсан зориулалт гардаг.

Тесалоник чуулганы итгэгчид бүх гишүүддээ хоол өгөхийг хичээдэг байжээ. Гэтэл зарим нь ажил хийдэггүй хүмүүс байв. Тэд чуулганы өгөөмөр хангамжид найдаж, юу ч хийлгүй залхууран амьдардаг. Паул чуулганы гишүүдээ хайхрахгүй байж болно гэж огт хэлээгүй, харин ажил хийх дургүй хүмүүст хоол битгий өг гэж хэлсэн юм (2 Тесалоник 3:10). Магадгүй зарим хүний хувьд цалин хөлс авах ажил байхгүй бол, чуулганы хүмүүст хэрэгцээтэй үед нь тусалж болно. Зарим хүн ажилд орж чадахгүй байж болох ч, бараг хүн бүр бусдад тус болох ямар нэг юм хийж чаддаг.

Бэлэвсэн эмэгтэйчүүдэд туслах болон пасторуудыг дэмжих талаар Паул заавар өгсөн байна (1 Тимот 5:3-18, Галат 6:6).

Итгэгчид нутгийн чуулганыхаа нэгэн хэсэг болж, чуулганы гишүүдийнхээ хэрэгцээг хангах, мөн үйлчлэлийн ажлыг дэмжихэд зориулалт гаргах ёстой юм.

► Чуулганы хэрэгцээг хангахын зэрэгцээ хүмүүсийг үүрэг хариуцлагаа үүрдэг болгохын тулд чуулганы гишүүд хэрхэн хамтарч ажиллах вэ?

► Танай чуулганы гишүүд хамтдаа ажиллаж, орлогын эх үүсвэрүүд бий болгож болох ямар боломжууд танай чуулганы эргэн тойронд байна вэ?

Тэнгэрлэг Эцэг минь,

Миний хэрэгцээг хангана хэмээн амласан Танд баярлалаа. Өөрийгөө болон намайг түшиглэн амьдарч буй хүмүүсийн хэрэгцээний төлөө үүрэг хариуцлагаа итгэмжтэй үүрэхэд минь туслаач. Байгаа зүйлээ өгөөмрөөр өгдөг байхад минь туслаач. Бусдын хэрэгцээнд ухаалгаар тусалдаг байхад минь туслаач.

Би санхүүгийн ерөөлийг гуйж байна. Гэхдээ юунаас ч илүүгээр сүнслэг зүйлийг эрхэмлэж, Тантай харилцах харилцаандаа сэтгэл хангалуун байхыг хүсэж байна.

Aмен

(1) Энэ хичээлд өгөгдсөн Библийн зарчмуудын талаар залбирч, бодож тунгаагаарай. Дараах асуултад бичгээр хариул.

• Мөнгө ба нөөц боломжийн тал дээр би ямар уруу таталттай тулгардаг вэ?

• Одоо би мөнгө болон нөөц боломжийг хэрхэн олж авч байна вэ?

• Би мөнгө, нөөц боломжоо хэрхэн ашиглаж байна вэ?

• Мөнгө, орлогынхоо тал дээр Бурханд найдна гэж юу гэсэн үг вэ?

• Надад ямар орлогын эх үүсвэр байна вэ?

• Ирээдүйд бий болгох орлогын үүсвэрүүд надад бий юу? Хэрэв байгаа бол, би үүнийг хэрхэн ажил хэрэг болгох вэ?

• Би мөнгө, нөөц боломжоо яаж буруу ашиглаж байна вэ?

• Би дээр бичсэн мөнгө, нөөц боломжоо буруу ашиглаж байгаа байдлаа хэрхэн засах вэ?

(2) Энэ хичээлийн зарчмуудын талаар 1 хуудас толилуулга бич. Өөрийнхөө орчин нөхцөлд хэрэгжүүлж болох онцгой хэрэгжүүлэлтийг толилуулгадаа тусгаарай. Христэд итгэгчдийн мөнгөний талаарх ойлголтуудаас таны эргэн тойронд амьдардаг хүмүүс юу сурах, юу ойлгох хэрэгтэй вэ?

(3) Сургаалт үгс 3:13-17 эшлэлийг цээжил. Энэ эшлэлийг тунгаан бодож, нэг догол мөрөнд багтаан бич. Дараагийн хичээлийн эхэнд энэ эшлэлийг цээжээр бичиж, мөн бичсэн зүйлээ багшдаа хураалгана.