Энэ хичээлийн төгсгөлд суралцагч дараах ойлголт, чадварт суралцсан байна:

(1) Христитгэлийн хайр ба итгэгчийн хувийн амьдрал хоорондын практик харилцааг олж харах.

(2) Итгэгч хүн өөрийн амьдралаа Бичвэрийн зарчмын дагуу болгох ёстой 10 талбарыг эргэцүүлж тунгаах.

(3) Итгэгч хүн амьдралын хэв маягтай холбоотой асуудалд Бичвэрийн зарчмыг хэрэгжүүлэхдээ яагаад бусдаас өөр байх 2 шалтгааныг тайлбарлах.

(4) Амьдралын хэв маягтай холбоотой шийдвэрийг гаргах 9 зарчмыг (хичээлд өгөгдсөн) тоймлон суралцах.

Нэгэн африк ээж модны сүүдэрт тоглож байгаа хүүгээ шалгахаар гэрээсээ гарчээ. Гэтэл тэр харсан зүйлдээ итгэж чадсангүй. Нэгэн аварга том хорт могой хүүгийнх нь дээрээс мөчирт дүүжлэгдэн хазах гэж байлаа. Хүүдээ хашгирч сэрэмжлүүлбэл хүү нь цочиж дээш хараад хазуулж болзошгүй байсан тул ээж нь түүнд тайвнаар “Миний хүү, яг одоо газарт доошоо хэвтээрэй” гэж хэлэв. Хүү гайхсан хэдий ч, тэрээр дуулгавартай байхад суралцсан учраас ээжийнхээ үгэнд оров. Дараа нь ээж нь түүнд “Хүү минь, хэвтсэн чигээрээ над руу мөлхөөрэй” гэв. Хүү энэ удаа дахин ээждээ дуулгавартай байснаар хорт могойноос холдож, аврагджээ.

Тэр хүү яагаад ээжийнхээ хэлсэн зүйлийн шалтгааныг ойлгоогүй хэрнээ дуулгавартай дагасан бэ? Ээж нь хүүдээ дуулгавартай байхыг хэдийн зааж сургасан бөгөөд хүүг дуулгаваргүй байхад нь засаж залруулдаг байсан учраас хүү ээжийгээ хүндэлдэг байжээ. Түүнчлэн ээж нь түүнд хайртай гэдгийг тэр мэддэг учраас ээждээ итгэж найдсан юм. Бид Бурханд бүрэн дуулгавартай байх ёстой. Зөвхөн Түүний залруулгаас айсны улмаас биш, харин Тэр биднийг хайрладаг гэдгийг бид мэддэг учраас тэр юм.

► Бурханыг ихээр хайрладаг хүний амьдралд ямар үр дүн гарах вэ? “Бурханыг би ихээр хайрлавал, би… ийм байх болно” хэмээн энэхүү асуултад хариулан өгүүлбэрийг төгсгөж бичээрэй.

Бурханыг хайрлахад гардаг нэг үр дүнгийн талаар Филиппой 1:9-11 эшлэлд:

Хайр чинь мэдлэг ба бүхий л хэрсүү ухаанаар улам бүр бялхах болтугай гэж би залбирдаг. Ингэснээр та нар алив сайныг ялган таньж, Христийн өдөр хүртэл цэвэр, гэм зэмгүй байх бөгөөд Бурханы алдар ба магтаалын төлөө Есүс Христээр ирэх зөвт байдлын үр жимсээр дүүрэн байх юм.

Эдгээр эшлэлд итгэгч хүний амьдралд тасралтгүй үргэлжлэх үйл явцын тухай өгүүлж байна. Тэр хүний хайр үргэлжлэн өсөн нэмэгдсээр байх ёстой. Бурханы төлөөх түүний хайр өсөн нэмэгдэхийн хэрээр хамгийн сайн нь юу болохыг ялгах чадвар нь улам хүчтэй болж, өргөжин тэлдэг. Тухайн хүн хамгийн сайн нь юу болохыг ялгаснаар, амьдралаа хамгийн сайн зүйл дээр төвлөрүүлж чаддаг. Итгэгч хүн чин сэтгэлээсээ, гэм зэмгүй байхад энэхүү үйл явц явагдах учиртай аж.

Дөнгөж төрсөн нялх хүүхэд өмнөө байгаа он жилүүдийн турш өсөж суралцах хэрэгтэй байдаг шиг итгэлд ирсэн цаг мөчөөс эхлэн бид суралцаж өсөх хэрэгтэй болдог. Учир нь бидний амьдралыг чиглүүлэх бүх үнэнийг бид хараахан ухаарч ойлгоогүй байдаг. Дээрх эшлэлд Христийг дагаад тодорхой хугацаа өнгөрсөн хүмүүст хандан Паул бичжээ. Хэдий тийм боловч, тэднийг Бурханыг улам ихээр хайрласаар байхыг, тэрхүү хайраар дамжуулан Бурханы хүслийг ухаарч, дуулгавартай байхын төлөө Паул залбирсан юм.

Бид үргэлжлүүлэн Бурханы өгдөг ялгах чадвараар өөрсдийн амьдралыг сайжруулахыг хүсэн тэмүүлэх учиртай. Зөвхөн шашинлаг ёс заншлын хувьд биш, харин амьдралынхаа бүх талбарт Түүнд дуулгавартай байхыг Бурхан биднээс хүсдэг.

Хэрхэн амьдрах талаар мэдэж болох бүхнийг би аль хэдийн мэдсэн гэж бид тааварлах ёсгүй. Түүнчлэн амьдралынхаа бүх талбарыг төвхнүүлж болгосон ч гэж бид үзэх учиргүй.

(1) Болгоомжтой байдал (Сургаалт үгс 22:1, Матай 5:14-16)

Бусад хүмүүсээс битгий хийгээсэй гэж хүсдэг тийм зүйлээ та хийдэг үү? Таны хийдэгтэй адил зүйлийг хийж байгаа пастораа харахдаа урам хугарч байсан уу?

(2) Өөрийгөө хянах (Сургаалт үгс 16:32, Сургаалт үгс 25:28; Галат 5:22-23)

Та хийх ёстой зүйлээ хангалттай хийх хэмжээнд өөрийн дур хүсэл, мэдрэмжээ хянадаг уу? Эсвэл таны мэдрэмж үл итгэгч хүмүүсийн хийдэг шиг тийм зүйлийг үйлдэхэд хөтөлж байна уу?

(3) Эрүүл мэнддээ анхаарах (1 Коринт 6:19, 1 Коринт 10:31)

Таны бие махбод Бурханы төлөө ажиллахад зориулагдсан юугаар ч орлуулшгүй багаж зэмсэг болохын хувьд та биедээ анхаарал тавьдаг уу? Таны бие махбод нэгэнт Бурханд хамаатай учраас үүнийг гэмтээх учиргүй. Та үүнд анхаарал болгоомжгүй хандаж болохгүй.

(4) Зугаацдаг зүйлсийн сонголт (Колоссай 3:17, 1 Коринт 6:12)

Таны зугаацаж хөгжилддөг зүйлс буруу хандлага, буруу бодолд хүргэх уруу татлага болж байна уу? Нүглийг хөгжилтэй, сэтгэл татам байдал болгон харуулах ямар ч зүйлсэд болгоомжтой хандаарай.

(5) Дэг журам (Ром 13:9, Колоссай 3:19, 1 Тимот 2:8, 1 Петр 3:2)

Хүмүүс Бурханы дүр төрхөөр бүтээгдсэн бөгөөд мөнхийн хувь тавилантай учраас бусдад хүндэтгэлтэй хандаарай. Эелдэг байх ёс заншил харилцан адилгүй ч, тухайн хүнд танил байдлаар эелдэг байдлаа илэрхийлэхэд суралцах ёстой. Хэдийгээр зарим хүн ийм хүндлэлийг хүртэх ёсгүй ч, та эелдэг хандах учиртай.

(6) Ёс зүйтэй ажил хөдөлмөр (Сургаалт үгс 20:23)

Та бүх гэрээ хэлцэлдээ бүрэн үнэнч, шударга ханддаг уу? Та аливаа зүйлийг яг байгаагаар нь тодорхойлдог уу эсвэл энэ нь үнэн биш гэж бусдыг бодоход хүргэдэг үү?

(7) Цаг баримтлах (Галат 5:14)

Цаг бол маш үнэ цэнтэй эх сурвалж бөгөөд бид үүнийг Бурханы төлөө ашиглах ёстой. Та өөрийн болон бусдын цагийг үнэлж, ажлын хуваарийг мөрддөг үү?

(8) Хувцаслалт (1 Тимот 2:9, 1 Петр 3:3-4)

Таны хувцаслалт дараах үнэ цэнийг харуулдаг уу?

• Эмх журам – биеийн хэсгийг хангалттай далдлахуйц

• Төлөв даруу – бусдын анхаарлыг татах, өмсөж буй зүйлээрээ бусдыг гайхшруулж бишрүүлэхийг бүү оролд.

• Арвич хямгач – хэрэглээнээсээ давсан өндөр үнэтэй хувцас авахгүй байх

(9) Хэл яриа (Колоссай 4:6, Ефес 4:29)

Таны хэл яриа Бурханд болон бусдад хүндэтгэлтэй, эрүүл байдаг уу? Дэлхийн хүмүүс садар самуун байдалтай холбоотой нэр томьёо, үгсийг ихэнх яриандаа хэрэглэдэг бөгөөд Бурханы талаар ярихдаа ч ийм үгсийг ашигладаг.

(10) Найдвартай байдал (Дуулал 61:8; Сургаалт үгс 20:6, Сургаалт үгс 28:20)

Та амлалт зориулалтаа хэр сахидаг вэ? Таныг ярьдаг шигээ хийдэг хүн гэж хүмүүс хардаг уу? Амлалт тань таныг тав тухгүй болгох үед та амлалтаа мартдаг уу?

Олон хүмүүс өөрсдийн өсөж хөгжих хэрэгцээг нухацтай авч үздэггүй. Тэд Бичвэрийн шууд хэлэгдсэн тушаалуудад л зөвхөн хариуцлагатай байх ёстой гэж үздэг ч, тэдгээр тушаалд олон олон амьдралын хэрэгжүүлэлт байдгийг ухаардаггүй.

Бурханыг хайрлах хайр маань өсөн нэмэгдэхийн хэрээр бид өсөж сайжирдаг гэдгийг мэдэх нь чухал юм. Энэ хичээлийн эхэнд уншсан эшлэлийг бид нухацтайгаар тунгаан бодох хэрэгтэй (Филиппой 1:9-11). Бидний хайр өсөн нэмэгдвэл зөвийг үйлдэх сонголт, ялган таних чадвар маань өсөж сайжрах учиртай.

► Бурхан таны сайн биш хандлага, зуршил, үйлдлийг харуулах үед таны гаргасан шийдвэр болон өөрчлөлтийн талаарх жишээг хуваалцана уу?

► Таны амьдралын хэв маягт өөрчлөлт орох хэрэгтэй ямар нэг зүйл байгаа юу? Та үүнийг хийх үү?

► Бурханыг баярлуулдаг гэдэгт баттай биш ямар нэг зүйлийг та хийсээр байна уу?

► Амьдралдаа гаргах ёстой өөрчлөлтийн талаар таны залбиралд Бурхан харуулахыг та үнэхээр хүсэж байна уу?

Тэгвэл энэ долоо хоногт залбиралд өөрийгөө зориулж, нээлттэй зүрх сэтгэлээр Бурхан танд өөрийн үнэ цэн ба амьдралдаа гаргах ёстой өөрчлөлтийг харуулахын төлөө хүсэн гуйгаарай. Та үүнд өөрийгөө зориулах уу? Та үүнийг хийсэн эсэхийг би дараагийн долоо хоногт танаас асуух болно.

► Итгэгч хүмүүсийн дунд байдаг ялгаатай байдлыг та анзаарч байсан уу? Ялангуяа тэдний хийдэг болон хийдэггүй зүйлтэй холбоотой практик асуултаар энэ нь илүү тодорхой болдог. Яг адилхан Библи хэрэглэдэг хэрнээ тэд хоорондоо яагаад ийм ялгаатай байдаг вэ? Нэгэнт итгэгчдийн дундах ялгаатай байдал нь дэндүү их юм бол бидний хийж байгаа зүйлд энэ нь тийм ч хамаатай гэж үү? Яагаад?

Библийн зарчим болон үнэ цэнээр амьдрах талаар нарийн ширийн зүйлс дээр бүх итгэгчид санал нэгддэггүй. Гэсэн хэдий ч, Христийг дагаж байгаа хүн итгэж байгаа зүйлийнхээ дагуу амьдарч байгаа эсэхдээ нухацтай хандах ёстой.

Биеэ авч явах байдал, зугаацдаг зүйлсийн сонголт, хувцаслалт зэрэг нь бүгд хүний зүрх сэтгэлд ямар нэг зүйл гажуудаж, хазайсныг харуулдаг.

Хамгийн зөв сайн амьдралын хэв маягийг ялган танихын тулд итгэгч хүн бүр санаж байх ёстой зарим зарчмуудыг энд танилцуулья.

Амьдралын хэв маягт нөлөөлөх шийдвэрийг гаргах зарчмууд

(1) Итгэгч хүнд өгөгдсөн Библийн бүх тушаалыг бид дуулгавартай дагах ёстой.

Есүс Матай 5:19-д хэлэхдээ,

Тиймээс эдгээр тушаалын хамгийн өчүүхнийг нь ч болов үл тоомсорлон, бусдад тийн заасан хэн боловч тэнгэрийн хаанчлалд хамгийн өчүүхэн нэгэн гэгдэх болно. Харин эдгээрийг сахиж, ийн заасан хэн боловч тэнгэрийн хаанчлалд агуу нэгэн гэгдэх болно.

Бид зүгээр л өөрсдийнхөө бодлоор энэ хамгийн чухал нь гэж сонгох боломжгүй юм. Чухал биш хэмээн үл тоомсорлох ямар ч Бичвэрийн тушаал гэж үгүй.

(2) Бурханы тушаалууд нь бидний сайн сайхны төлөө юм.

Дэд хууль 10:12-13,

Израил аа! ЭЗЭН Бурхан чинь чамаас юуг шаарддаг вэ? Зөвхөн ЭЗЭН Бурханаасаа айн эмээхийг, Түүний бүх замаар явахыг, Түүнийг хайрлан бүх зүрх, бүх сэтгэлээрээ ЭЗЭН Бурхандаа үйлчлэхийг мөн чиний сайн сайхны төлөө өнөөдөр миний чамд тушааж байгаа ЭЗЭНий тушаал, зарлигуудыг дагаж мөрдөхийг л шаарддаг бус уу?

Дуулал 84:11,

Учир нь ЭЗЭН Бурхан нар бөгөөд бамбай юм. ЭЗЭН нигүүлсэл ба алдрыг өгдөг. Тэрээр шулуун шударгаар явагчдаас ямар ч сайныг нуун дардаггүй.

Бурхан биднээс ямар ч сайн зүйлийг нуудаггүй, мөн Тэр бидэнд хор хөнөөл учруулах ямар ч тушаалыг өгдөггүй. Түүний хязгаарлалтгүйгээр бид сайн сайхан байх боломжгүй юм. Түүний удирдамжаас татгалзах нь бид Түүний хайр болон мэргэн ухаанд нь эргэлзэж буй хэрэг болно. Бид хүний санаа бодлуудыг дагахын оронд Түүний Үгийн заавруудыг дуулгавартай дагахдаа Бурханы мэргэн ухаан болон сайн сайханд нь үнэнхүү итгэж найддаг гэдгээ баталдаг.

(3) Христитгэлийн эрх чөлөө нь Бурханд дуулгавартай байхаас ангид эрх чөлөө биш юм.

Паул 1 Коринт 9:21-д итгэгчдэд хандан бичихдээ:

Хуульгүйчүүдийг олж авахын тулд (хэдийгээр би Бурханы хуулиас ангид бус харин Христийн хуулийн дор байдаг атлаа) хуульгүйчүүдэд [Мосегийн] хуульгүй нэгэн адил.

Бид Мосегийн хууль болон Бурханы ёс суртахууны шаардлагуудыг (зөвтгөлийн арга зам) аль алиныг нь агуулсан хуулиас чөлөөлөгдсөн юм. Учир нь бид Бурханы тушаалыг биелүүлснээр бус, харин нигүүлслээр аврагдсан. Түүнчлэн бидний нүглийг уучилсан учраас бид хуулийн ял, шийтгэлээс ч чөлөөлөгдсөн юм.

Гэсэн хэдий ч, бид Бурханд дуулгавартай байх болон хайрлах шаардлагаас чөлөөлөгдөөгүй. “Үнэндээ ах дүү нар аа, та нар эрх чөлөө өөд дуудагдсан юм. Гэхдээ та нар эрх чөлөөгөө махбодын төлөөх таатай боломж болгож бүү ашигла. Харин бие биедээ хайраар үйлчил” (Галат 5:13). 1 Коринт 9:21 (дээр дурдсан) эшлэлд хэлсэнчлэн бид Бурханы эрх мэдлийн дор байх болсон. Бидний төлөөх Түүний хүсэл нь Библид илчлэгджээ.

Зарим хүмүүс Бурханы хуулийг сахих нь нүглийн уучлалыг хүлээн авах арга зам, эсвэл сүнслэг төлөвшилд хүргэх арга хэрэгсэл хэмээн буруу итгэдэг. Харин жинхэнэ үнэн бол хуулийг сахиснаар биш, нигүүлслээр итгэлээр дамжуулан бид аврагдсан юм (Ефес 2:8-9).

Хэдий бид өөрсдийн хийсэн зүйлийн үр дүнд зөвтгөгдөөгүй ч, бид амьдралынхаа бүх нарийн ширийн зүйлсэд Бурханыг дагаж дуулгавартай байх ёстой. Учир нь бид Түүгээр зөв болгогдсон юм. “нүглээс чөлөөлөгдөн, [та нар] зөвийн боолууд болсон” (Ром 6:18).

Бид Бурханыг хайрлаж, Түүний нигүүлсэлд талархаж явдаг учраас бид баяртайгаар Түүнийг дуулгавартай дагадаг (1 Иохан 5:3). Зөвтгөгдсөн хүмүүсийн дуулгавартай байдал нь Түүний төлөөх хайрын нотолгоо юм (Иохан 14:15).

(4) Хэрэв бид Бурханыг хайрладаг бол Түүний хүслээс татгалзахгүй, харин үүнийг илүү мэдэхийг хүсдэг.

1 Иохан 5:2-3-д хэлэхдээ,

Бид Бурханыг хайрлаж, тушаалуудыг нь сахихдаа үүгээр Бурханы хүүхдүүдийг хайрладгаа мэднэ. Түүний тушаалуудыг сахих нь Бурханыг хайрлах явдал юм. Түүний тушаалууд хүнд дарамт биш.

Иеремиа 31:33-д “Израилын гэртэй Миний байгуулах гэрээ энэ юм… Би хуулиа тэдний дотор хийж, Би тэдгээрийг зүрхэн дээр нь бичнэ” гэжээ.

Бурханыг хайрладаг хүн “Үүнийг хийсний төлөө Бурхан намайг буруутгах болов уу?” гэж асуухгүй, харин “Юу Бурханыг илүү баярлуулах бол?” эсвэл “Хамгийн сайн зүйл нь юу байж болох вэ?” (Филиппой 1:10, Тит 3:8) гэж асуудаг.

(5) Бичвэр нь амьдралдаа тогтоох тодорхой дүрэм журмын үндэслэл болдог.

Библи зөвхөн ерөнхий зарчмуудыг өгдөггүй. 2-р даалгавар дээр христитгэлийн амьдралдаа анхаарал болгоомжтой хандах үндэслэлийг хэлж өгдөг багц эшлэлүүдийг жагсаасан байгаа. Тэдгээрийн зарим нь христэч амьдралын хэв маягийг тодорхойлох удирдамж болдог.

(6) Амьдралын нарийн ширийн зүйлсийн талаарх дүрэм журмууд нь бидний хамгийн чухал итгэл үнэмшил биш юм.

Фарисайчууд ийнхүү жижиг зүйлсийг ихэд онцлон алдаа гаргасан юм. Есүс Матай 23:23-д тэдэнд хандан,

Хоёр нүүрт хуулийн багш нар ба фарисайчууд та нар золгүй еэ! Та нар гаа, гоньд, зирааны аравны нэгийг хүртэл өгдөг атлаа хуулийн чухал нөхцлүүд болох шударга ёс, өршөөл, итгэлийг орхигдуулдаг. Чухамдаа бусдыг нь ч орхилгүй, эдгээрийг үйлдэх ёстой байсан юм.

Энэ эшлэлд ямар нэг үнэнийг өөртөө хамаагүй гэж өнгөрөөх тухай биш, харин зарим зүйлс бусдаасаа илүү чухал хамаатай гэдгийг хэлсэн юм. Бид хамгийн чухал зүйлсийн талаар хамгийн их санаа тавих учиртай.

(7) Дүрэм журмыг сахих нь Бурханыг хайрлаж, Түүнд дуулгавартай байгааг нотлох хангалттай нотолгоо биш юм.

Фарисайчуудтай хэлэлцсэн энэхүү яриандаа Есүс (Матай 23:25),

Хоёр нүүрт хуулийн багш нар ба фарисайчууд та нар золгүй еэ! Та нар аяга тавагныхаа гадна талыг нь цэвэрлэдэг ч дотор нь дээрэм тонуул, хувийн сонирхол дүүрэн аж.

Хүн маш дэг журамтай, чанд амьдралын хэв маягтай байж болох ч, Бурханыг хайрладаггүй, Түүнийг бүрэн дагахгүй амьдарч болно. Эсрэгээр, Бурханыг бүрэн зүрх сэтгэлээр хайрладаг хэрнээ зарим хэм хэмжээ, тэдгээрийн учир шалтгааныг хараахан харахгүй байх боломжтой. Тэгэхээр чанд, журамтай хүн илүү сүнслэг байх албагүй юм.

(8) Бусдын гэрчлэлд итгэх байдал маань тэдний амьдралын жижиг нарийн ширийн зүйлсээс хамаардаггүй.

Ром 14:10-д Паул итгэгчдээс ийн асуужээ.

Тийн атал та юунд ах дүүгээ шүүнэ вэ? Бас та юунд ах дүүгээ басамжилна вэ? Бид бүгдээрээ Бурханы шүүх суудлын өмнө зогсох болно шүү дээ.

Энэхүү эшлэл нь амьдралын практик асуудлуудын талаарх итгэгчдийн өөр өөр үзэл баримтлалыг тусгасан багц хэсгээс гаралтай. Христийг дагадаг хүн хийж болох, болохгүй зүйлсийн талаар санал зөрөлддөг, үндэслэл сайтай мэтгэлцээнүүд цөөнгүй байдаг.

Бичвэрийн тодорхой эшлэлийг хөрвүүлж байгаа бидний тайлбартай өөр нэгэн итгэгч санал нийлэхгүй байж болно. Магадгүй бидний хувьд хор хөнөөлтэй, татгалздаг зүйлсийг өөр хэн нэгэн тэгж харахгүй ч байх боломжтой. Энэ нь магадгүй, түүний амьдралын өөр талбарт Бурхан ажиллаж буйтай, эсвэл Бурхан түүнийг өөр ялгаатай ахуй соёлд байлгаж байгаатай холбоотой байж болох юм. Энэ нь тухайн хүн жинхэнэ итгэгч биш гэсэн үг биш.

► Та дараах өгүүлбэрийг уншаад юу гэж бодох вэ? “Бурхан хүн бүрд хэрхэн амьдрах талаарх үнэнийг харуулдаг учраас бүх итгэгчид адилхан амьдралаар амьдрах ёстой.”

Христийн дагалдагчид амьдралын практик асуудлууд дээр хэзээ ч санал нэгтэй байгаагүй. Бурханыг хайрладаг, бурханлаг амьдралаар амьдардаг хүмүүс ч гэсэн онол сургаалын нарийн ширийн зүйлс болон тэдгээрийн хэрэгжүүлэлт тал дээр бүгд санал нэгтэй байдаггүй. Бид тэднийг Бичвэрийг өөрөөр хөрвүүлж, өөрөөр хэрэгжүүлж байгаа учраас итгэгчид биш гэж хэлэх нь буруу юм. Тэдний бодол ойлголт нь буруу гэж бид бодсон ч гэсэн тэднийг чин сэтгэлээсээ итгэж байгаагаар нь хүлээн авах боломжтой. Ариун Сүнсний ажил бүх итгэгчдийг яг адилхан амьдралын хэв маягтай болгодоггүй.

Бид түүнчлэн бусад итгэгчдийн үзэл бодлоос суралцахдаа нээлттэй байх учиртай. Бардам зангаасаа болоод миний Бичвэрийн хөрвүүлэг болон хэрэгжүүлэлт үргэлж төгс зөв байдаг гэж бид бодоход хүрдэг. Даруу, суралцдаг, бусдыг хүлээн авдаг чанар Христитгэлийн эв нэгдлийг хөгжүүлж, Христийн Биеийг босгон байгуулдаг.

(9) Олон янзын бодол санаанд хүлээцтэй хандах нь өөрийн бодолдоо хайхрамжгүй хандах шалтаг биш юм.

“Хүн бүр өөрийн бодолдоо бат итгэлтэй байг” (Ром 14:5б).

“Харин эргэлзэгч нэг нь идэх аваас яллагдана. Учир нь тэрээр итгэлээр бус байна. Итгэлээр бус алив бүхэн нь нүгэл юм” (Ром 14:23).

Хүн мөс чанарынхаа эсрэг үйлдэж, зөрчих үедээ маш их гарз хохирлыг амсдаг. Хэрэв хүн буруу гэж боддог зүйлээ хийхээр шийдэхэд, тэр нүглийн гэм буруутан болдог. Бурханы өгсөн гэрэлд алхдаг нэгэн ерөөлтэй еэ (1 Иохан 1:7).

Энэ сэдвийн дагуу ярилцлагыг эхлүүлэхэд ямар нэгэн хүндрэл байхгүй. Зарим суралцагчид итгэгч хүн биеэ авч явах талаар чуулган тодорхой дүрэм журамтай байхыг онцолж болно. Харин зарим суралцагчид бие биеийнхээ ялгаатай байдалд хүлээцтэй хандахыг онцолж ч болох юм.

Дээр дурдсан 9 зарчим тус бүрийг тэгш шударгаар авч үзэхийг хичээгээрэй.

► Эдгээр зарчмын алийг нь олон хүмүүс мартдаг вэ?

► Эдгээр зарчмын алийг нь та хамгийн их мартдаг вэ?

Тэнгэрлэг Эцэг минь,

Таныг хайрлах хайр минь үргэлж өсөн нэмэгдэхийг би хүсэж байна. Надад хандсан Таны хүслийг би илүү сайн ойлгохыг хүсэж байна.

Таныг хамгийн ихээр баярлуулдаг зүйлийг ялгаж сурахад надад туслаач. Тэгвэл би цэвэр ариун, гэм зэмгүй амьдралаар амьдарч чадна.

Өөрчлөх хэрэгтэй зуршил, хандлагуудаа олж харахад болон Таныг алдаршуулдаг хандлага, дадал хэвшлийг олж авахад минь туслаач.

Бурханы алдрын төлөө би үр жимс ургуулахыг хүсэж байна.

Aмен

(1) 1 Коринт 13-р бүлгийг судал. Энэхүү бүлэгт хайрладаг хүний талаар болон тийм хүн бусдын төлөө байдгийг тодорхойлжээ. Таны амьдралыг хайрынхаа дагуу байлгаж, таныг хэрхэн өөрчлөхийг хүсэж байгаагаа Бурхан танд харуулах болтугай. Амьдралдаа өөрчлөлт гаргахад Бурхан туслаасай гэсэн зарим өөрчлөлтийг жагсаан бичнэ үү.

(2) Итгэгч хүн хэрхэн биеэ авч явах талаарх Бичвэрийн үндэслэл болох дараах эшлэлүүдийг судлаарай:

• 1 Коринт 6:19-20

• 1 Коринт 10:31

• 1 Коринт 11:14-15

• 1 Тимот 2:9-10

• 1 Петр 3:3-4

• Дуулал 19:14

• Дуулал 101:3

Багц эшлэл бүрийн үндсэн утгыг бич. Эдгээр эшлэлд үндэслэн, таны хэрэгжүүлэхийг хүсэж байгаа амьдралын хэв маягийн талаарх нарийн ширийн зүйлсийг тодорхойлно уу.