Энэ хичээлийн төгсгөлд суралцагч дараах ойлголт, чадварт суралцсан байна:

(1) Гэрлэлтэд зориулсан Бурханы төлөвлөгөө, зорилгыг ойлгож хүлээн авах.

(2) Бурхан эмэгтэй хүнийг ямар үнэ цэнтэй гэж хардгийг ойлгох.

(3) Бурханы зарчмуудыг гэрлэлтдээ дагахын тулд өөрийгөө зориулах.

Эрнандо Кортесын зан чанар болон хувийн ашиг сонирхол нь бидний суралцах жишээ биш юм. Гэхдээ, зорилгынхоо төлөө бүхнээ зориулсан нэг үйл хэрэг нь жишээ болж чадна. 1519 оны хавар тэрээр одоогийн Мексикийн нутаг дэвсгэрийг эзэмших судалгааны багийг удирдан явжээ. Испанийн засаг захиргаа 11 хөлөг онгоц, 700 орчим хүнээр энэхүү ажиллагааг дэмжсэн байна. Тэнгисээр олон сар аялсны эцэст Кортес болон түүний хүмүүс Мексикийн эрэгт хүрчээ. Тэдний дараагийн сорилт нь хуурай газраар нийслэл хотод хүрэх байв. Газраар явах энэхүү аялал нь хүнд хэцүү, аюултай гэдгийг Кортес мэдэж байлаа. Тэр хүмүүстээ буцах сонголт байхгүй гэдгийг ойлгуулахыг хүсэж, бүх хөлөг онгоцыг шатаав. Ингэснээр Испани руу буцах боломжгүй болсон ч, нөгөөтэйгүүр урагшлах хүчтэй сэдлийг бий болгожээ. Үүнтэй адилхан гэрлэж байгаа хүн бүр үүнд өөрийгөө бүрэн зориулах ёстой. Нэгэнт гэрлэсэн л бол өөр сонголт байхгүй гэдгийг ухаарах хэрэгтэй.

Библийн дагуух гэрлэлт нь үзэсгэлэнтэй сайхан зүйл юм.[1] Харин үүний гоо сайхныг мэдэрч, сайн сайхныг нь амсахын тулд хосууд Библи гэрлэлтийн талаар юу заадгийг нягталж, улмаар сурсан зүйлээ дагахыг зорих учиртай. Сэтгэл тэнүүн гэрлэлтийг бий болгоход хичээл зүтгэл, золиос хэрэгтэй.

► Ямар нэг ашиг тус хүлээж гэрлэсэн ч, үүндээ зориулалт гаргах шаардлагатайг анзаараагүй байсан бол хуваалцана уу?

Гэрлэлтийг ойлгохын тулд бид үүний эхлэл рүү буюу Эхлэл ном руу буцах ёстой. Бүтээлийн түүх гэрлэлтийн талаар бидэнд заадаг.

Библийн дагуух гэрлэлт нөхөрлөлийн төлөө байдаг

“ЭЗЭН Бурхан —Хүн ганцаараа байх нь сайн биш. Би түүнд тохирох туслагчийг буй болгоё гэжээ” (Эхлэл 2:18).

Бурхан Эцэг, Хүү, Ариун Сүнс гурвалаар нөхөрлөлд оршдог шиг Тэр биднийг нийгмийн харилцаанд байхаар бүтээсэн. Бид харилцан ярилцахаар, дотно байдал, нөхөрлөлийн төлөө бүтээгдсэн. Ганцаараа байх нь сайн биш гэж Бурхан хэлсэн!

Эхлэл номын үйл явдлуудыг тодруулсан хэсэг бүрээс гэрлэлтийн эрхэм нандин чанарыг харж болдог. Бурхан эрэгтэй хүний нэгэн хавиргыг авч, үүгээр үзэсгэлэнтэй эмэгтэйг бүтээсэн юм. Тэрхүү эмэгтэй нь өөр нэгэн бодгаль буюу эрэгтэйн адил Бурханы дүр төрхөөр бүтээгдсэн, үнэ цэн нь адил, эр хүнийг бүрэн болгодог бөгөөд харин бүтээгдсэн загвар нь өөр нэгэн юм. Тэрхүү эмэгтэйг ‘Бүтээгчийн хамгийн эцсийн, хамгийн төгс бүтээл болгон эр хүнд хүндэтгэлтэйгээр авчирсан.”[1]

Гэрлэлт нь баяр баясгалантай нэгдэл юм.

Адам “Энэ чинь л яснаас минь авсан яс” (Эхлэл 2:23) гэж хэлэхдээ хүндэтгэл болон баяр хөөрөө илэрхийлсэн. Адам “Эцсийн эцэст нэг боолтой боллоо! Одоо хоол хийлгэж, хувцсаа угаалган, нуруугаа бариулж, гэрийн ажлаа хийлгэх хүнтэй боллоо!” гэж хэлсэн үү. Үгүй. Харин тэрээр “Эцэст нь намайг бүрэн болгох туслагч!” хэмээн хэлсэн.

Гэрлэлт нь ижил тэгш эрхтэй хүмүүсийн нэгдэл юм.

“...түүнд тохирох туслагчийг” (Эхлэл 2:18). Бурхан эмэгтэй хүнийг эрэгтэй хүнд төгс тохируулж, түүнийг бүрэн болгохоор бүтээсэн.

Матью Хенри “Эмэгтэйг Адамын хавирганаас, түүний хажуугаас бүтээсэн бөгөөд толгойноос нь бүтээсэн бол тэр түүнийг захирах байсан. Түүний хөлнөөс бүтээсэн бол тэр түүнийг гишгэх байсан. Харин хажуугаас нь бүтээсэн нь түүнтэй адил тэнцүү байхын тулд, түүний гарын доох нь хэсгээс бүтээсэн учраас хамгаалуулахын тулд, түүний зүрхэнд ойр бүтээгдсэн учраас хайрлуулахын тулд бүтээсэн юм”[2] гэж хэлсэн байдаг. Эмэгтэй хүн эр хүнээс дор ч биш, мөн дээр ч биш, харин түүнтэй адил тэнцүү нэгэн юм.

Гэрлэлт нь гэрээний нэгдэл юм.

“Ийм учраас эр хүн эцэг эхээ орхиод, эхнэртэйгээ нийлж, хоёул нэг махбод болдог” (Эхлэл 2:24). Хүчирхэг гэрлэлт нь романтик харилцаан дээр (романтик мэдрэмж төрдөг, бас үгүй болдог), эсвэл таашаал дээр (хэдий энэ нь эрүүл гэрлэлтэд баяр баясгалан авчирдаг ч), эсвэл хувийн хэрэгцээ ханамж дээр (хэдий энэ нь хүчирхэг гэрлэлтэд үнэхээр дүүрэн байдаг ч) тогтдоггүй. Гэрлэлтийн гайхамшигтай давуу тал ашиг тус нь хүчирхэг гэрлэлтийн шалтгаан биш, харин үр дүн юм. Гэрлэлт нь гэрээний ганхашгүй суурь буюу нэг эрэгтэй, нэг эмэгтэйн хооронд насан туршдаа бие биедээ онцгой зориулалт гаргах амлалт дээр үндэслэгддэг.

Гэрлэлт нь ил тод, итгэж найддаг, бие биеэ хүлээн зөвшөөрдөг харилцаа байх ёстой. “Тэр хүн, бас эхнэр нь хоёулаа нүцгэн байсан бөгөөд тэд ичсэнгүй” (Эхлэл 2:25). Нүгэл анхны хосыг гажуудуулаагүй байсан учраас тэдний гэрлэлтэд шүүлт, ичгүүр, айдас байгаагүй юм. Шинэ гэрээ бидэнд “Гэрлэлтийг бүгд хүндлэгтүн. Ор дэр чинь бүү бузартаг” (Еврей 13:4) гэж сургадаг.

Аюулгүй байдал байхгүй, үл итгэлцэл, хардалт, айдастай, хосууд гэрлэлтдээ зориулах бие биенийхээ шийдвэрт баттай биш бол хүчирхэг гэрлэлт байх боломжгүй юм. Харин хүчтэй гэрлэлт нь хань ижлийн нэг нь нас барснаар дуусгавар болох бат бэх андгай тангаргийг шаарддаг (Ром 7:1-2).

Бурхан гэрлэлтийг нэг эрэгтэй, нэг эмэгтэй хоёрын насан туршийн гэрээ байлгахаар зорьдог (Матай 19:3-6). Үл итгэгч хань ижил нь салж явбал итгэгч хүн боолчлол хүлээсэн дор байхгүй гэж Паул хэлсэн байдаг (1 Коринт 7:15). Харин итгэгч хүн үл итгэгч хань ижлээсээ салахыг эрэлхийлэх ёсгүй (1 Коринт 7:12-14, 16). Паул үүний өмнөхөн Эзэн ч мөн адил зүйлийг хэлдэг гэж бичихдээ, итгэгч хүн хань ижлээ орхих, салах сонголтыг гаргах ёсгүй бөгөөд хэрэв тийм зүйл тохиолдвол өөр хүнтэй гэрлэх ёсгүй гэжээ (1 Коринт 7:10-11, Матай 5:31-32, Матай 19:9).

Гэрээний хайр бол өөрийгөө зориулдаг, хүндэлдэг, хэдий харилцаа хэцүүдэж муудах үед ч үзэсгэлэн гоог бүтээж байдаг хайр юм (1 Коринт 13). Сул амлалт зориулалт нь хичээл зүтгэлгүй, сэтгэл зүйн холбоогүй, хөндий байдал, уруу таталтыг төрүүлдэг.

Эхнэр нь хариу өгөхгүй, хүндэтгэхгүй, өвдөж зовсон үед ч нөхөр нь түүнийг хэзээ ч орхих ёсгүй бөгөөд энэ нь нөхөр хүн гэрээний хайраа харуулах амьдрал юм. Харин нөхөр нь түүнийг хайрлахгүй байсан ч, Христийн улмаас нөхрөө хүндэтгэж, дуулгавартай байхыг сонгох нь эхнэр хүн гэрээний хайраа харуулах амьдрал юм.

Нөхрийн хайр нь эхнэрийн хүндэтгэлийг олдог бол, эхнэрийн хүндэтгэл нь нөхрийн хайрыг олдог. Улмаар тэд үргэлж өсөж хөгждөг!

► Хэрэв хүмүүс гэрлэснийхээ дараа гэрлэлтээ аз жаргалгүй байна гэж дүгнээд шийдвэрээ өөрчлөхийг хүсвэл ямар асуудлууд гарах вэ? Хүн өөрийн гэрлэлтийг насан туршийн гэж итгэхэд бүрэн зориулалт нь ямар ялгааг авчрах вэ?

Библийн дагуух гэрлэлт нь нөхөн үржихүйн буюу бүтээлийн орчин юм.

“Харагтун, үр хүүхэд ЭЗЭНээс ирэх өв, умайн үр жимс нь шагнал юм” (Дуулал 127:3).

Хүүхдүүд нь Бурханы бэлэг хэдий ч, нөгөө талаараа тэд бас эцэг эхийн Бурханд зориулах бэлэг юм. “Гэвч өчүүхэн ч гэсэн Сүнстэй хэн нь ч тэгэхгүй. Бурханлаг үр удмыг Бурхан эрэлхийлж байхад тэр хүн юу хийж байгаа нь тэр вэ? Тиймээс сэтгэлээ анхаар. Хэн ч залуу насныхаа эхнэрээс бүү урваг” (Малахи 2:15). Бурхан итгэгч нөхөр, эхнэрийн нэгдлээс бурханлаг хүүхдүүдийг хүсдэг.

Зарим хүн хүүхэдгүй амьдралын хэв маягийг илүүд үздэг ч, эцэг эхчүүд бурханлаг хүүхэдтэй байхад Бурхан баярладаг.

Зөвхөн хүүхэдтэй болох тухай биш, харин бурханлаг хүүхдүүдтэй байхыг Бурхан хүсдэг гэдгийг энд тэмдэглэх нь чухал. Бурхан эцэг эхчүүдийг хүүхдээ Христийг дагахад сургахаар дуудсан.

Библийн дагуух гэрлэлт нь Христийн төлөө байдаг

Ефес 5:30-32-д Ариун Сүнс Христийг ирэх хүртэл нууцлагдан буй үнэнийг гэрлэлтийн гүн гүнзгий утгаар илчилсэн байдаг. Гэрлэлт бол Есүс Христ ба Түүний чуулган хоорондын харилцааг тусган харуулдаг газар дээрх зураглал юм.

Паул итгэгчдийг Сүнсээр дүүрэн байхад уриалж, энэ хэсгийг эхлүүлсэн (Ефес 5:18). Энэхүү хам сэдвийн хүрээнд тэр дараах зааврыг өгчээ:

Итгэгчид Есүст захирагддагийн адил (Ефес 5:24, 32; түүнчлэн 1 Петр 3:1-г үз), сүнсээр дүүрэн сүйт бүсгүй нь Эзэн дотор өөрийн болзоот залууд (өөрийн “тэргүүнд”) захирагдах болно. Үүгээрээ тэр Есүсийг болон нөхрөө хүндэтгэж байгаагаа харуулдаг.

Эхнэр хүн бүр нөхөртөө захирагдахдаа Эзэнийг санаж байх нь маш чухал юм. Тэр зөвхөн нөхрийнхөө төлөө биш, харин Эзэний төлөө, Түүнд захирагдаж байгаа юм. Түүний харц ямар ч өө сэвгүй Нэгэн болох Есүсийг ширтэн хардаг. Эхнэр хүний нөхөртөө захирагдах байдал нь Есүсийг хүндлэх мөргөлийн үйл юм.

Библийн дагуух захирагдах байдлыг хайрын адил хүчээр тулгах боломжгүй. Библийн дагуух захирагдах байдал нь Христийг эмээн хүндэтгэдэг эхнэр хүний нөхөртөө өгдөг бэлэг юм (Ефес 5:33). Бүх зүйл дээр захирагдах нь Есүсийг хүндлэх мөргөлийн үйл мөн.[3]

Эхнэр хүний нөхөртөө захирагдах байдал нь түүнийг хүндэтгэж буй үйл (33-р эшлэл) бөгөөд Сүнсээр дүүрэн амьдралын нэг хэсэг (Ефес 5:18-21) юм. Намуун зөөлөн сүнснээс гардаг энэхүү хүндэтгэл нь Бурханы мэлмийд маш эрхэм нандин (1 Петр 3:4-5) билээ.

Сүнсээр дүүрэн болзоот залуу нь Есүс өөрийн чуулганыг хайрладаг шиг сүйт бүсгүйгээ хайрлах болно (Ефес 5:25). Тэр эхнэрээ өөрийн бие мэт хайрлах ёстой (Ефес 5:28-29). Есүс чуулганы төлөө өөрийгөө өгсөн шиг, Сүнсээр дүүрэн нөхөр хүн өөрийгөө золиослох хайрыг харуулах ёстой. Энэ нь түүний захирагдаж байгаа үйл юм (Ефес 5:21). Нэгэн Библийн тайлбарлагч энэ талаар:

Тэрээр (Есүс) чуулганыг аврахын тулд загалмай дээр зовсны адил, бид өөрсдийгөө үгүйсгэж, эхнэрийнхээ аз жаргалыг тэтгэхийн төлөө хөлсөө урсгаж, зовлонг үүрэхэд бэлэн байх ёстой юм. Нөхрийн үүрэг бол эхнэрийнхээ амьжиргааг хангахын төлөө чармайн ажиллаж, хэрэгцээг нь хангах, шаардлагатай бол өөрийн тав тух, амралтаас татгалзаж, эхнэрээ өвдөх үед нь асрах, аюулаас халхлах, хэрэв тэр эрсдэлд байвал хамгаалж, цухалдах үед нь тайвшруулж, өөрийг тань түлхэж байхад ч түүнд наалдан ойр байх, сүнслэг зовлон туулах үед нь хамт залбирах, түүнийг аврахын төлөө амиа ч өгөхөд бэлэн байх явдал юм. Яагаад заавал ийм байх ёстой гэж? Хэрэв тэд хөлөг онгоцны сүйрэлд өртөж, аврагдах цорын ганц банз мод тэнд байсан гэж төсөөлвөл, нөхрийн хувьд ямар ч эрсдэлтэй учрах бай хамаагүй эхнэрээ түүн дээр тавьж, түүнийг аврахыг хүсэхгүй гэж үү? Гэхдээ үүнээс ч илүү зүйл нь нөхөр хүний амьдралынх нь хамгийн агуу зорилго бол эхнэрийнхээ авралыг эрэлхийлэх явдал гэдгийг ухамсарлах ёстой. Тэр эхнэрийнхээ сүнс сэтгэлд хэрэгтэй бүхнийг төвхнүүлэх учиртай… Мөн тэрээр үлгэр дуурайлыг харуулж, шаардлагатай бол зөвлөж, эхнэрийнхээ хувьд авралын замыг аль болох амар, дардан байлгах ёстой. Хэрэв нөхөр хүнд Аврагчийн Сүнс хийгээд өөрийгөө үгүйсгэх чанар байгаа бол гэр бүлийнхээ авралын төлөөх ямар ч золиос түүнд хэтэрхий их санагдахгүй. [4]

Христ өөрийн сүйт бүсгүй болох чуулганаа ариусгадаг шиг нөхөр нь эхнэрийнхээ ариун байдлыг эрэлхийлэх ёстой. “Тэр чуулганыг ... цэвэрлэн, ариусгаад … [мөн] түүнийг ямар ч толбо, үрчлээс мэт элдэв юмгүй... ариун гэм зэмгүй байлган Өөрийнхөө өмнө…” (Ефес 5:26-27).

Эрт цагт хаадын сүйт бүсгүйчүүдийг гоо сайхны арчилгаагаар бие махбодыг нь ариусган бэлддэг байжээ. “ Эмэгтэйчүүдэд зориулагдсан арван хоёр сарын гоо сайхны үйлчлэл буюу миррийн тосны зургаан сар, тэгээд үнэртэн болон эмэгтэйчүүдийн оо энгэсгийн зургаан сарыг…” (Естер 2:12-г үз). Ийнхүү онгон бүсгүй нөхөртөө зориулагдахад бэлэн болдог байжээ.

Сүнслэг утгаараа нөхөр нь эхнэрийнхээ хөгжин цэцэглэлтэд хэрэгтэй итгэмжит байдал, болзолгүй хайр, ойлголцол, залбирал, зөвлөгөө, заах болон энэрэл зэрэг бүхнээр хангах ёстой юм.

Нөхөр эхнэрээ ийм хайраар хайрлах үед тэр эхнэрээсээ аз жаргалыг хариуд нь хүлээн авдаг. Паул “Эхнэрээ хайрлагч нь өөрийгөө хайрладаг” (Ефес 5:28) гэж хэлсэн. Өөрийгөө золиослон ийнхүү хайрладаг нөхөр хүн ихэнх тохиолдолд эхнэрээсээ хүндэтгэл, анхаарал халамж, үнэнч байдлыг хүлээн авдаг төдийгүй, Эзэн ч түүнийг шагнах нь гарцаагүй.

► Эхнэртээ сүнслэг дэмжлэг үзүүлэхийн тулд нөхрийн тодорхой хийх ёстой зүйл юу вэ?

(1) Тэд Бурханы анхдагч загвар төлөвлөгөөг баяртайгаар хүлээн авч, гэрлэлт дэх тус тусын өвөрмөц үүрэгт талархалтай хандах.

Нөхөр хүн эхнэрээ Бурханаас ирсэн бэлэг, өөрийг нь бүрэн болгох туслагч гэдгийг санаж байх ёстой. Тэр эхнэрийнхээ аюулгүй байдал, бие, сэтгэл санаа, сүнсний сайн сайхан байдлын төлөө амьдралаа зориулах учиртай. Тэрээр эхнэртээ талархахыг сонгож, эхнэр нь энэ бүхнийг хүртэх ёсгүй санагдсан үед ч түүнийг хайрлах ёстой. Учир нь эхнэрийнх нь дотор болох зүйлийг зөвхөн Бурхан л өөрчилж чадна гэдгийг тэр ухаарах хэрэгтэй юм. Бурхан нөхрийн дуулгавартай байдал болон итгэлийг өргөмжлөх болно.

Эхнэр хүн нөхрийг нь түүний тэргүүн болгосон Бурханы сонголтыг хүндэтгэж, чадах бүхнээрээ, бүх талаараа нөхрөө хүндэлж, түүний удирдлагыг дээдлэх ёстой. Нөхөр нь алдаа гаргах үед, энэ бүхнийг хүртэх ёсгүй санагдсан үед ч эхнэр хүн түүнийг хүндэлж, захирагдахыг сонгох учиртай. Түүнчлэн нөхрийнх нь хувьд өөрчлөгдөх ёстой зүйлийг Бурхан өөрчилж өгөхийг залбирч гуйх хэрэгтэй. Бурхан эхнэрийн дуулгавартай байдал болон итгэлийг өргөмжлөх болно.

(2) Гэрлэсэн хосууд сүнслэг болон бие махбодын дотно байдлаа хөгжүүлж тордох хэрэгтэй.

Тэд айдас, шүүмжлэл, хүчирхийлэл, бусадтай харьцуулах, тачаал, зөвхөн өөртөө таашаал авах, дорд үзэл гэх мэт зүйлгүйгээр бие биенээ таньж мэдэх хэрэгтэй. Тэд Бурханы өмнө болон нэг нэгнийхээ өмнө илэн далангүй, үнэнч байдлаар амьдрах ёстой.

(3) Гэрлэсэн хосууд шалгуурыг давж чадахгүй бүдрэх үедээ Бурханы нигүүлслийн жишээг дагах хэрэгтэй.

Адам, Ева хоёр нүгэлд унаж, ичгүүр харууслыг мэдрэх үед Бурхан тэднийг бүтэлгүйтлээс нь золин аврах хүч чадлаа илчилсэн юм. Бурхан нэгэн амьтныг тахил болгон зольж, арьсаар нь Адам Ева хоёрын нүцгэн биеийг халхлах дээл хийж өгчээ (Эхлэл 3:21). Энэхүү хайрын үйлдэл нь Бурханы нигүүлслийн дүр зураг бөгөөд Христээр золин аврах амлалтыг харуулдаг. Христ биднийг уучлагдаж, сэргээгдэх боломжтой болгодог. Хэдий хосууд гэрлэснийхээ дараа бүтэлгүйтсэн ч, Христээр дамжуулан ичих зүйлгүйгээр дахин ойр дотно байдалдаа эргэн очиж чадна.

1-р зууны үеийн Ромын ертөнц болон иудеизмд эмэгтэйчүүдийг эрчүүдээс дорд үздэг байжээ. Эмэгтэйчүүдийг дорд үзэх явдал дэлхийн олон соёл, гэр бүлүүдэд түгээмэл хэвээр байна. Эмэгтэйчүүдийг үл хүндэтгэх, бэлгийн хэрэгсэл болгон ашиглах зэрэг хүчирхийлэл үйлдэгдсээр байна. Харин Есүс эмэгтэйчүүдийг өндрөөр үнэлдэг байсан нь бидний хувьд үлгэр дуурайл болох ёстой.

Христ эмэгтэйчүүдийн нэр төр, үнэ цэнийг эрчүүдтэй ижил тэгш гэж үздэг байсан. Есүс "Бүтээгч анхнаас нь тэднийг эр эмээр нь бүтээснийг…" (Матай 19:4, Эхлэл 1:27) хэмээн айлджээ. Эмэгтэй хүн эрэгтэйн адил Бурханы дүр төрхөөр бүтээгдсэн. Эрчүүдийн адил өөрийгөө ойлгох, тодорхойлох, эрх чөлөөтэй байх, хийсэн үйлдлийнхээ төлөө хариуцлага хүлээх чадвартай юм. Есүс эмэгтэйчүүдийг эрэгтэй хүний хүслийг хангах хэрэгсэл гэж үзээгүй, харин жинхэнэ хүмүүс гэж үздэг байв. Тэрээр эмэгтэйчүүдийг хүн хэмээн үзэж, тэдний төлөө дэлхийд ирсэн гэдгээ хэлсэн (Лук 8:1-3).

Жеймс Борланд, Жон Пайпер, Вейн Грудем нар Сайнмэдээний дөрвөн номд тэмдэглэгдсэн, Есүс эмэгтэйчүүдийг өндрөөр үнэлж, хүндэтгэсэн тодорхой жишээнүүдийг дараах байдлаар тайлбарлажээ:

(1) Есүс олон нийтийн газар эмэгтэйчүүдтэй шууд байдлаар харилцдаг байсан.

Есүсийн цаг үед эрчүүд эмэгтэй хүнд ийнхүү хандах нь энгийн зүйл байгаагүй (Иохан 4:27). Дагалдагч нар нь Есүсийг Сухар худгийн дэргэд самари эмэгтэйтэй ярилцаж байхыг хараад гайхсан (Иохан 4:7-26). Тэрээр завхайрсан эмэгтэйтэй чөлөөтэй ярилцжээ (Иохан 8:10-11). Есүс Наин хотын бэлэвсэн эмэгтэй (Лук 7:12-13), цус алддаг өвчтэй эмэгтэй (Лук 8:48, Матай 9:22, Марк 5:34) болон цугласан олны дундаас Түүнийг дуудсан эмэгтэйтэй (Лук 11:27-28) олон нийтийн газар ярилцсан талаар Лук тэмдэглэсэн. Есүс 18 жилийн турш өвчтэй байсан эмэгтэйд (Лук 13:12) болон загалмай руу явах замдаа бүлэг эмэгтэйчүүдэд (Лук 23:27-31) хандан өгүүлсэн байдаг.

(2) Есүс эмэгтэйчүүдтэй ярилцаж буй байдлаараа тэднийг хүндэтгэж, өндрөөр үнэлдэг байснаа харуулсан.

Тэрээр ухаалаг, санаа тавьсан байдлаар тэдэнтэй ярилцдаг байв. Матай, Марк, Лук нь Есүс цус алддаг өвчтэй эмэгтэйг "охин" гэж дуудсан, хөгжлийн бэрхшээлтэй эмэгтэйд "Абрахамын охин" (Лук 13:16) хэмээн хандсан талаар дурдсан байдаг. Есүс тэднийг "Абрахамын охид" гэж дуудсанаараа "Абрахамын хөвгүүд"-тэй адил сүнслэг хэмжээнд өргөмжилж буй юм.

(3) Өөрсдийн нүглийн төлөө хувийн хариуцлага хүлээхийг сануулахдаа Есүс тэдний төрөлх үнэ цэнийг харуулсан юм.

Энэ нь худгийн дэргэдэх эмэгтэй (Иохан 4:16-18), завхайрсан эмэгтэй (Иохан 8:10-11) болон Түүний хөлийг тосолсон нүгэлт эмэгтэйтэй (Лук 7:44-50) харилцсан байдлаас харагддаг. Есүс тэдний нүгэлд тоомжиргүй хандаагүй, харин нүүр тулсан юм. Түүний үйлдэл нь эмэгтэй хүн бүр хувийн эрх чөлөөтэй, сонголтынхоо төлөө хариуцлага хүлээдэг, нүгэл, гэмшил, уучлалын асуудлыг өөрөө шийдвэрлэх ёстойг илэрхийлсэн.

Эмэгтэй хүнийг үнэлсэн Есүсийн хандлагыг өнөөгийн чуулган хэрхэн дагах вэ?

Эмэгтэйчүүдийн үйлчлэл болон гэр бүл дэх Библийн дагуух үүрэг хариуцлагын талаар чуулган, урсгал чиглэлүүдийн дунд байнга яригдаж байгаа ч, Бурханы дүр төрхөөр бүтээгдсэн хүмүүсийнх нь хувьд тэдний үнэ цэн, тэгш эрх хэзээ ч эргэлзээтэй байх ёсгүй. Есүс эмэгтэйчүүдийг үнэ цэн, нэр төртэй хүмүүс гэдгийг байнга илэрхийлж байсан. Есүс эмэгтэйчүүдийг амиллынхаа анхны гэрч нар байхаар дуудсан (Иохан 20:17). Тэрбээр тэдний нөхөрлөл, залбирал, итгэлийн үйлчлэл, санхүүгийн дэмжлэг, гэрчлэлийг нь үнэлдэг байсан. Есүс эмэгтэйчүүдийг хүндэлж, тэдэнд зааж, ухаалгаар үйлчилж байв.

Шинэ гэрээнд эмэгтэйчүүдийг хүндэлсэн талаар

Есүс эмэгтэйчүүдийг хүндэлсэн үлгэр дуурайлыг Ариун Сүнсний амьдралаас харж болно. Пентэкостын өдөр Ариун Сүнс хөвгүүд, охид, эрэгтэй, эмэгтэй зарц нар дээр асгарсан (Үйлс 2:17-18). Ариун Сүнс хэнийг ч ялгаварлаагүй.

Ром 16-р бүлэгт Паул Фойбе хэмээх эмэгтэйг чуулганы үйлчлэгчээр (1-р эшлэл), Приска болон Акул хоёрыг Христ Есүсийн хамтран зүтгэгч буюу түүний амь насны төлөө өөрсдийгөө эрсдэлд оруулсан хүмүүс (3-4-р эшлэл), Мариаг шаргуу хөдөлмөрлөсөн (6-р эшлэл), Иуниаг элч нарт сайн танигдсан хүн (7-р эшлэл), мөн бусад эмэгтэйчүүдийг ч сайшаан бичжээ.

1 Тесалоник номд Паул Бурханы бүтээсэн энхрий зөөлөн, эхийн хайрыг "бид та нарын дунд эх хүн хүүхдүүдээ асрах мэт зөөлөн байсан" (1 Тесалоник 2:7) хэмээн бичсэнээр эмэгтэйчүүдийг сайшаажээ. Ефес номд тэрээр нөхрүүдэд хандан эхнэрээ "Христ чуулганыг хайрлаад түүний төлөө Өөрийгөө өгсний адил", мөн өөрийн бие шиг (Ефес 5:25, 28) хайрлахыг тушаасан юм. Петр нөхрүүдэд "эхнэр чинь эмэгтэй хүн тул... эхнэртэйгээ ойлголцож амьдар... түүнийг хүндэтгэ" (1 Петр 3:7) хэмээн уриалсан байдаг.

Эртнээс чуулганд эмэгтэйчүүдийг үнэ цэнтэй гэж үздэг байсан нь тодорхой харагддаг бөгөөд эрчүүдэд эмэгтэйчүүдийг хүндэтгэхийг заадаг байсан. Сүнслэг удирдагчид эдүгээ цагт эмэгтэйчүүдийн төлөө зогсож, тэднийг хүчирхийлэхийн эсрэг зогсох цаг болжээ. Эмэгтэйчүүдийг Бүтээгчийн онцгой дүр төрхөөр бүтээгдсэн хүмүүс гэж үзэх цаг болжээ. Чуулганд болон гэр бүл дэх эрэгтэй, эмэгтэй хүмүүсийн үүргийн ялгааг заахдаа энэхүү байр сууринаас хандах ёстой бөгөөд эс тэгвээс бидний зааж буй сургаал хүчирхийлэлд хөтлөх зам ч болж болно.

Гэрлэлт нь хүний бүтээл биш, Бурханы бүтээл. Тиймээс бид зааврыг энэ дэлхий, ахуй соёлоос биш, харин Бурханаас хүлээн авах ёстой. Бидний гэрлэлтийг хүчтэй, тэсвэртэй, үр нөлөөтэй болгохыг Тэр л мэддэг. Гэсэн хэдий ч Ариун Сүнсгүйгээр бид байх ёстой нөхөр, эхнэр болж чадахгүй!

► Гэрлэлтийг бэхжүүлэхийн тулд чуулган ямар зарчмуудыг заах ёстойг тайлбарла. Таны байгаа газар ямар ойлголт нь илүү дутагдаж байна вэ?

► Таны ахуй соёлд эмэгтэй хүнтэй ялгаатай хандах явдал байдаг уу?

► Танай улсад буй чуулганууд эмэгтэйчүүдэд ялгаатай ханддаг уу? Чуулган болон нийгмийн хандлагын хооронд ялгаа бий юу?

► Есүсийн харуулсан үлгэр дуурайлд үндэслэн, өөрчлөгдөх шаардлагатай ямар нэгэн ёс заншил байна уу?

Тэнгэрлэг Эцэг минь,

Гэрлэлт хэмээх гайхамшигтай бэлгийг бидэнд өгсөн Танд баярлалаа. Бид Таны төлөвлөсөн гэрлэлтээр амьдрахын тулд шаардлагатай зориулалтыг гаргахад туслаач.

Христ чуулганыг хайрласны адил хайрыг харуулахад бидэнд туслаач.

Нэг нэгнээ хүндэтгэх тал дээр нийгэм соёлын таамаглалуудаас ч хальж цаашлахад бидэнд туслаач.

Баяр хөөртэй, бат бэх харилцааг боломжтой болгодог Ариун Сүнс Таны ажилд баярлалаа.

Aмен

(1) Таны амьдарч буй нийгэмд тогтсон эрэгтэй, эмэгтэй хүмүүсийн ялгааг тодорхойлно уу. Эдгээр ялгааг Библийн үнэнд суурилсан мэдлэгээр дамжуулан хэрхэн шинэчилж болох вэ?

(2) Энэ хичээлийн явцад танд шинэлэг санагдсан 2 зарчмыг сонго. Зарчим тус бүрийг өөрийн үгээр тайлбарлан нэг догол мөр бичээрэй.

(3) Дараах сэдвээс нэгийг сонгож, товч толилуулга бэлтгэ (ангийн удирдагч суралцагч бүрд сэдвийг хуваарилж болно). Дараагийн хичээл эхлэхээс өмнө толилуулгаа хуваалцаарай.

• Гэрлэлт дэх нэгдлийг Бурхан төлөвлөсөн нь

• Гэрлэлтийн талаарх Библийн зорилгууд

• Гэрлэлтээ бэхжүүлэх арга замууд

• Эмэгтэйчүүдийн талаарх Библийн үзэл санаа

• Гэрлэлтэд зориулж Бурханы өгсөн үүргүүд болон эдгээрийг биелүүлэхийн тулд Ариун Сүнсээр дүүрэн байхын ач холбогдол