Энэ хичээлийн төгсгөлд суралцагч дараах ойлголт, чадварт суралцсан байна:

(1) Бие махбодын асуудлууд сэтгэл зүй ба сүнслэг эрүүл мэндэд хэрхэн нөлөөлдгийг ойлгоно.

(2) Бие махбодоо Бурханд зориулж, Эзэнийг хүндэтгэх шинэ дадалд суралцана.

Бурханд үйлчлэхэд өөрийгөө бүрэн зориулах хамгийн сайн арга бол санваартан болох явдал хэмээн Мартин Лютер боджээ. Тухайн үед санваартан болсон хүн хоол хүнсээ хязгаарлаж, мацаг барих, даруу хувцаслах, хөрөнгө мөнгөгүй байх, гэрлэхгүй байх зэрэг дэг журмыг дагадаг байв. Биеэ Бурханд зориулах гэсэн халуун хүслээсээ болоод Мартин өөрийгөө ташуурдан шийтгэж байсан ч удаатай. Гэхдээ бие махбодоо зовоолоо гээд Бурханы нигүүлслийг хүртэж чадахгүй гэдгийг ухаарчээ. Харин итгэл, нигүүлслээр авралыг хүртдэг гэдгийг ойлгосон юм. Ингээд санваартны тангарагаа Бичвэрийн үндэслэлгүй зүйл хэмээн няцааж, урьд нь гэлэнмаа байсан Катерин хэмээх бүсгүйтэй гэрлэн, зургаан хүүхэдтэй болсон билээ.

Христийн дагалдагчид биеэр амилна гэдэгт Коринт чуулганы зарим хүн итгэдэггүй байв. Тиймээс хүн үхэхэд бие нь устаж, зөвхөн сүнс нь л тэнгэрт очно гэж үздэг байжээ.

Зарим нь “Нэгэнт махбод үхээд дуусах юм чинь, одоо бие махбодоо яаж ч ашиглаж болно. Бие махбод үнэ цэнтэй зүйл биш учраас нүгэлд ашиглахад ч болохгүй зүйлгүй” гэж хэлдэг байжээ.

Харин амиллыг үгүйсгэдэг зарим нь “Махбодын хүсэл тачаалууд муу зүйл. Тиймээс бие махбод эцэстээ хаягдана. Тэнгэрт очих үед бидэнд ямар ч махбодын хүсэл байхгүй болно. Махбодын хүслүүд муу учраас бид хүслээ хязгаарлах ёстой. Бид сайхан хоол идэх ёсгүй, тухтай хувцас өмсөж болохгүй, гэрлэлээ гэхэд бэлгийн харилцаанд орж болохгүй. Махбодоо орхих хүртлээ бид боломжтой бүх аргаар махбодын хүслээ дарж байх ёстой” гэж хэлдэг байжээ.

Үнэндээ энэ хоёр үзэл хоёулаа буруу байсан. Аль аль нь алдаан дээр суурилсан үзэл бодол учраас буруу юм. Тиймээс 1 Коринт 15-р бүлэгт элч Паул амиллын тухай сургаал яагаад чухал болохыг тайлбарласан байдаг.

Хэдийгээр махбодын асуудлаас сүнслэг асуудал илүү чухал боловч, бие махбод нь сүнслэг амьдралд нөлөө үзүүлдэг учраас энэ талаар бид ярих л ёстой. Бурхан биднийг дан сүнс болгож бүтээгээгүй шүү дээ. Бидэнд бие махбод байгаа. Бид бол зүгээр нэг махбодын амьтан биш, бас махбод дотор түр л оршин суух сүнс төдий бодгаль биш ээ.

► Нэг суралцагч 1 Коринт 6:19-20 эшлэлийг бүлэгт уншина.

Бурхан биднийг зольж авсан учраас бидний бие махбод Бурханд харьяалагддаг гэдгийг эдгээр эшлэлд хэлж байна. Бидний бие бол Ариун Сүнсний сүм юм. Тиймээс бид биеэ нүгэлд ашиглах ёсгүй.

Хүн бие махбодоо бүхэлд нь Бурханд зориулах ёстой гэж Библид заадаг.

► Нэг суралцагч Ром 12:1 эшлэлийг бүлэгт уншина.

Энэ эшлэлд бид биеэ ариун байлгаж, Бурханд зориулах ёстой гэжээ. Бурхан биднийг бүрэн дуулгавартай байгаасай гэж хүсдэг бөгөөд энэ бол Бурханы хүсдэг мөргөл хүндэтгэл юм.

Хэрэв бид махбодынхоо хүслээр удирдуулж явдаг бол Бурханд тасралтгүй үйлчилж чадахгүй. Зуршил болсон аливаа нүгэл бол донтолттой адил зүйл.

Хоёр эзэнтэй нэг амьтан байна гэж төсөөлье. Нэг эзэн нь тушаал өгсөн боловч, нөгөө эзэн нь гинжээр хүлчихсэн учраас өнөөх амьтан яаж ч чадахгүй байв. Гинжилсэн эзэн нь өнөө амьтнаа хүссэн газар луугаа чирэн авч явдаг гэнэ. Харин өнөөх амьтан нөгөө эзнээ илүү хайрладаг боловч, дагаж явж чаддаггүй ажээ. Донтолт гэж ямар байдгийг үүнээс харж болно. Хүн Бурханд үйлчлэхийг хүсэж болох ч, донтолтод автсан бол эсэргүүцэж чадахгүй гинжинд орсонтой адил.

Донтолт болон нүглийн аливаа хэлбэр нь хүний бие махбод, оюун санааг гэмтээдэг. Бидний бие махбод Бурханы өмч бөгөөд Бурханд үйлчлэхэд зориулагдсан учраас бид биеэ гэмтээж болохгүй. Дээр уншсан Ром 12:1-д биднийг биеэ Бурханд тааламжит тахил болгон өгөх ёстой гэж хэлж байна. Гэхдээ бид биеэ удирдаж чадахгүй бол үүнийг хийж чадахгүй.

► Нэг суралцагч 1 Коринт 9:24-27 эшлэлийг бүлэгт уншина.

Таны бие махбод бол таны үйлчлэгч. Тиймээс та биеэ хянаж байх ёстой. Бие тань таны үйлчлэгч бол сайн хэрэг. Харин та биеэ хянаж чадахгүй бол бие чинь таны эзэн болно. Гэхдээ маш муу эзэн шүү. Элч Паул махбодын аливаа хүсэлдээ захирагдахыг өөртөө огт зөвшөөрөхгүй гэж хэлсэн байдаг (1 Коринт 6:12).

► Нэг суралцагч Ром 6:13 эшлэлийг бүлэгт уншина.

Махбод бол таны эзэмшилд байгаа иж бүрэн багаж хэрэгсэлтэй адил. Тэр багаж хэрэгсэл таны хяналтад байна. Тиймээс та энэ багаж хэрэгслээ нүгэлд биш, Бурханд үйлчлэхэд ашиглах ёстой юм.

Хүмүүс бидэнд төрөлхийн дур хүслүүд байдаг учраас нүглээс зугтаж чадахгүй гэж зарим хүн үздэг. Мэдээж биднийг нүгэлд өдөөдөг төрөлхийн мөн чанар бидэнд байгаа. Тэрхүү мөн чанарт бие махбодын болон оюун санааны дур хүсэл, мөн нүгэлд татагддаг дотоод хүслүүд цөм багтдаг. Бурханы Ариун Сүнсээр шинэчлэгдээгүй хүн зарим нүглийг тэвчиж чаддаг боловч, нүгэл үйлдэхээ бүрмөсөн больж чаддаггүй. Тиймээс хүн нүглийг үргэлж ялж амьдарч болно гэдэгт үл итгэгчид итгэж чадахгүй байх нь аргагүй.

Ер нь төрөлхийн хүсэл гэдэг ерөөсөө асуудал биш. Бурхан үүнийг бүтээсэн. Адамд төрөлхийн дур хүслүүд байсан. Тэрээр Бурханд дуулгаваргүй байхыг сонгох хүртлээ нүгэлгүй байсан юм. Төрөлхийн дур хүсэл бол Бурханы бүтээлийн нэг хэсэг учраас нүгэл биш. Гэхдээ төрөлхийн хүслүүдээс болоод уруу таталтад орох боломжтой.

► Төрөлх хүслийн хэдэн жишээ хэлнэ үү?

Дараах хүснэгтэд төрөлх дур хүслийн бүх жишээг багтааж чадаагүй боловч, заримыг нь дурдаж, тэдгээр хүслүүд хэвийн байдлаар илрэх зам болон уруу таталтад нөлөөлж болох зарим нөхцлийг орууллаа.

Төрөлх дур хүсэл гэхээр заавал махбодын хүсэл байх албагүй. Эдгээр нь хүний мөн чанараас үүдэлтэй боловч, бүгд махбодын хүсэл биш.

► Үргэлж дагаад байдаг ямар төрөлх хүсэл танд байдаг вэ?

Та ямар ч төрөлх хүсэлд захирагдаж болохгүй. Таны хувьд юу зөв болохыг дур хүсэл ялгаж мэдэхгүй учраас аюулгүйгээр дагаж болох төрөлх хүсэл гэж байхгүй. Жишээлбэл, таны өлсөх мэдрэмж ба идэх хүсэл чинь өөрийн хоол, өрөөлийн хоол, эсвэл төлж чадахгүй хоол зэргийг ялгаж мэдэхгүй шүү дээ.

Зарим үед зөв замаар илэрч байгаа төрөлх хүслийг ч дарах шаардлага гарна. Хүн өлслөө гээд бусдын хоолыг авч болохгүй. Амрахыг хүсэж байвч, ажиллах хэрэгтэй үе гэж байна. Аюулаас сэрэмжлэх нь хүний төрөлх хүсэл боловч, хэн нэгнийг хамгаалх ёстой учраас аюулаас зугтах төрөлхийн хүслээ эсэргүүцэж ч болно.

Төрөлх дур хүсэл гажууд болох, мөн дур хүслээ буруугаар хангасаар байх юм бол, хүн өөрийнхөө мөн чанарыг алддаг. Иймээс зарим хүн туйлын гажууд, эсвэл харгис үйлдлүүд хийдэг байна. Буруу заавар сургаал, муу бодол санааны хэвшилтэй болох, нүгэлтэй орчин эсвэл бусдын нүгэлтэй үйлдлээс болж хүний төрөлх дур хүсэл гажих юмуу, буруу чиглүүлэгддэг.

Итгэгч хүн бүр төрөлх дур хүслээс үүдэлтэй уруу таталттай тулгарна. Бурханы нигүүлсэл хүний төрөлх дур хүслийг арилгахгүй ч, үйл хөдлөлөө хянах, дур хүслээ зөв чиглүүлэх хүчийг өгдөг.

Сүнслэг ялалт байгуулахын тулд төрөлх хүслүүдийг дэг журамд оруулах хэрэгтэй. Нигүүлсэл байлаа гээд хүн Библийн заавар сургаалыг мөрдөх, мөргөл хүндэтгэлд оролцох, махбодоо захирах, залбирах, Библи судлах зэргээс чөлөөлөгдөхгүй. Сүнслэг ялалтаа хадгалахыг хүсэж буй итгэгч хүн өөрийнхөө сул талуудыг мэдэж, хязгаарлалт тавих ёстой.

Уруу таталт үнэхээр сэтгэл татагдмаар байдаг боловч, Бурханы хүслийг зүрх сэтгэлдээ бат суулгасан бол, хүн уруу таталтыг ялж чадна (1 Иохан 5:3). Өөрийг нь жаргалтай болгох зүйлээс татгалзаж байна гэж огт бодохгүй. Бурханы хориглосон зүйлсийн хор хөнөөлийг итгэгч хүн шууд харж чадахгүй боловч, итгэлээрээ тэдгээрийн хор хөнөөлийг ойлгож, биеэ барьдаг (Дэд хууль 6:24). Харин хор хөнөөлгүй зүйлсэд Бурхан хориг тавихгүй. Тиймээс Бурханы хориглосон зүйлс хүнийг жаргалтай болгохгүй гэдгийг итгэгч хүн итгэлээрээ мэддэг. Яагаад гэвэл түүний сэтгэл Бурханаар ханадаг (Дуулал 16:2, Дуулал 84:11).

► Библид хоол хүнсний талаар юу хэлсэн байдаг вэ?

Библид хоол хүнсний талаар ямар нэг хориг байхгүй. Хуучин гэрээний итгэгчдийн дагадаг хоол хүнстэй холбоотой журмыг Шинэ гэрээний итгэгчид дагахгүй байж болно (1 Тимот 4:4, Марк 7:19). Гэхдээ Бурханд бус шүтээнд өргөсөн тахилын хоолноос идэх талаар асуудал гарч байсан. Асуудал тэр хоолонд байгаагүй, харин тэр хоолыг шүтээний мөргөлд хэрэглэсэн учраас хориглосон юм (1 Коринт 8).

Эрүүл, хүчтэй байхын тулд зөв хоолны дэглэмтэй байх чухал. Бид Бурханы үйлчлэгчид учраас бие махбод маань эрүүл байх учиртай. Тиймээс биеэ гэмтээх, эрүүл мэндийг муутгах хоол хүнснээс зайлсхийх ёстой. Санхүүгийн боломж, худалдан авах чадвартаа тааруулж хоол хүнсээ авахаас өөр аргагүй болдог, олон төрлийн хүнс идэх боломжгүй хүн олон байдаг. Хэрэв та тийм хүмүүсийн нэг бол боломждоо тааруулаад хамгийн зөв сонголтыг хийх ёстой. Түүнчлэн үр хүүхдэдээ зөв хоол хүнсийг сонгож сургах хэрэгтэй.

Гэтэл хүнсэнд зарцуулах хангалттай мөнгөтэй атлаа эрүүл шим тэжээлтэй хоолыг бус, харин өөрт таалагддаг амттай хоолоо сонгож, хэтрүүлэн иддэг хүмүүс байдаг. Түүнээс гадна хүмүүс эрүүл бус хоолонд илүү их мөнгө зарцуулах уруу таталттай байнга тулгардаг. Зарим хүн үйлчлэлийн сургалтын ном худалдан авч чадахгүй, боломжгүй гэдэг мөртлөө чихэр, коланд тэр байтугай мөнгийг зарцуулж орхисон байдаг.

Эрүүл байхыг хүсвэл заавал дасгал хөдөлгөөн хийж байх учиртай. Дасгал хийдэггүй хүмүүс хүч чадал муутай, эсвэл хэт таргалсан байдаг. Бид Бурханд үйлчлэх боломжоо биеийн байдлаасаа болж алдах ёсгүй. Хэрэв биеийн хүчний ажил хийдэг бол нэмэлт дасгал хөдөлгөөн хэрэггүй байж болно. Эс бөгөөс бие махбодоо эрүүл чийрэг байлгахын тулд сахилга баттай байх хэрэгтэй.

Бие махбод маань Бурханд харьяалагддаг учраас итгэгч бид хоол хүнс, дасгал хөдөлгөөнөө анхаарч байх ёстой. Гэхдээ Библид хоол хүнс, дасгал хөдөлгөөнтэй холбоотой заавар байхгүй. Тиймээс хүмүүс өөрсдийнхөө нөхцөл байдалд тааруулан, биеэ Бурханд зориулах зарчмыг амьдралдаа хэрэгжүүлэх нь зүйтэй. Мэдээж бид бусдыг буруутган шүүмжлэх ёсгүй. Гэхдээ зарим бүлэг, хамт олон тодорхой дэг журмыг дагахаар шийдсэн бол, үүнийгээ сүнслэг амьдралын дүрэм болгох ёсгүй.

► Нэг суралцагч Ром 14:4 эшлэлийг бүлэгт уншина.

Бид Библийн зарчмуудыг тодорхой байдлаар хэрэгжүүлэх ёстой. Гэхдээ Библид өөрөөр заагаагүй л бол, биднийхээс өөр хэлбэрээр Библийн зарчмыг хэрэгжүүлж байгаа хүмүүсийг бид шүүх ёсгүй.

► Нэг суралцагч Ром 8:18-23 эшлэлийг бүлэгт уншина.

Өвчин гэдэг энэ дэлхийд нүгэл анх орж ирсний дараа бүх бүтээл дээр буусан хараалын үр дагавар юм. Гэхдээ эцэстээ бүх бүтээлийг эргүүлэн сэргээж, бүх зовлон шаналлыг дуусгах төлөвлөгөө Бурханд бий. Сэргээлт нэг мөсөн гэнэт тохиолдохгүй гэдгийг эдгээр эшлэлд хэлж байна. Хүн аврал авсан байлаа ч, Бурханы авралын төлөвлөгөө хэрэгжиж дуусах хүртэл газар дэлхийд хөгшрөл, өвчин үргэлжилсээр байх болно.

Хэдий тийм ч, Бурхан гайхамшиг үйлдсээр ирсэн билээ. Библид олон гайхамшигтай эдгэрлийн тухай өгүүлдэг. Чуулганы хүмүүс итгэлээр залбирвал Бурхан эдгэрлийг өгнө гэдгээ амласан байдаг (Иаков 5:14-15). Өвчтэй хүн эдгэрэхийн тулд тэр өөрөө заавал итгэлтэй байх шаардлагагүй, харин түүний төлөө залбирч байгаа чуулганы хүмүүс бат итгэлтэй байх ёстой. Тиймээс өвчтэй хүнийг итгэлгүй гэж буруутгах хэрэггүй юм.[1]

Итгэдэг хүн хэзээ ч өвдөхгүй гэж бодож болохгүй. Иов хэдийгээр Бурханд итгэмжит байсан ч, Бурхан түүнийг хэсэг хугацаанд бие махбодын зовлон амсахыг зөвшөөрсөн байдаг (Иов 2:8).

Бурхан Паулыг даруу байлгаж, Өөрт нь найдсан хэвээр байлгахын тулд “махбодод нь өргөс” өгсөн гэж Паул хэлжээ. Үүнээс чөлөөлөгдөхийн тулд Паул гурван удаа гуйсан боловч Бурхан эдгэрлийг биш, харин тэсвэрлэх хүчийг өгөхийг хүсжээ (2 Коринт 12:7-9). Энд дурдагдаж буй “махбодод минь өргөс өгөгдөж” гэдэг үг нь яг юу байсан нь тодорхой бус. Бие махбодын өвчин байсан байх магадлалтай.

Паул галатчуудын дунд сайнмэдээ тунхаглаж байхдаа бие нь тааруу байжээ (Галат 4:13-15). Галатчууд түүнийг хайрлаад бүр нүдээ ухаад өгөхөд ч бэлэн байсан гэж хэлснийг нь харвал Паул тэр үед нүдний асуудалтай байсан болов уу. Тэр дараа нь эдгэрсэн эсэхийг бид мэдэхгүй. Гэхдээ тухайн үед тэр даруй эдгээгүй. Мэдээж үүгээр Паул итгэгч хүн бүр үргэлж өвчин эмгэггүй байх ёстой гэж заагаагүй нь ойлгомжтой. Нөгөөтэйгүүр, галатчууд Паулын өвчнийг, тунхаглаж буй сайнмэдээтэй нь зөрчилдөж байна гэж бодоогүй.

► Нэг суралцагч Филиппой 2:25-30 эшлэлийг бүлэгт уншина.

Епафродит үхлүүт өвчин тусчээ. Тэрээр Паулд туслахын тулд хэт их ажилласнаас болоод өвдсөн аж. Паул түүнийг Христийн ажлын төлөө үхэх шахан зүтгэсэн хүн учраас хүндлэл хүртэх ёстой гэсэн байна.

Бид Паул, Иов, Епафродитын жишээнээс өвдсөн хүнийг итгэлээр бага гэж буруутгаж болохгүйг харж байна. Түүнчлэн тэднийг нүглийнхээ улмаас шийтгэл хүртэж байна гэж бодож ч болохгүй. Аливаа хүний өвчин зовлонгийн ард сүнслэг учир шалтгаан байгаа эсэхийг зөвхөн Бурхан л мэднэ. Түүхийг харвал, агуу итгэлтэй хүмүүсийн зарим нь удаан хугацаанд ужиг өвчнөөр зовж байсан нь харагддаг.

Итгэгч хүн эм тариа хэрэглэхийг Библид зөвшөөрдөг. Бид эдгэрлийн төлөө залбирдаг ч, байгаа тусламжийг ашиглах нь буруу зүйл биш юм.

Гэхдээ өөрийгөө эдгээгч сүнслэг хүчтэй гэж зарладаг хүмүүс юмуу, элдэв сүнснүүдэд үйлчилдэг хүмүүсээс эдгэрэл гуйх нь буруу. Бид Сатаны үйлчлэгчид биш учраас түүнээс ашиг тус эрэлхийлж болохгүй. Бид Бурхан Эзэнийхээ өгсөн ивээл ерөөлд сэтгэл хангалуун байж, Түүнд үнэнч байх ёстой. Хэрэв Тэр биднийг эдгээхгүй байхаар шийдсэн бол, бид Түүнээс өвчнийг давах нигүүлсэл, хүч чадал, итгэмжит байдлыг гуйх учиртай юм.

Зарим хүн таашаал мэдрэх гэж янз бүрийн хортой бодисуудыг хэрэглэдэг.

Хар тамхины хольцтой эм бодисуудыг зарим тохиолдолд эмчилгээний зорилгоор хэрэглэж болох боловч, таашаал авах гэж хэрэглэх ёсгүй. Мансууруулах бодисууд нь биеийг гэмтээж, оюун санааг солиоруулан, донтолт үүсгэдэг. Тиймээс дэлхийн олон улсад эмчийн жор, хяналтаас гадуур хар тамхины хольцтой эм бодис хэрэглэхийг хуулиар хориглодог.

Архи дарс ч мөн багахан амсахаас цааш хэтэрвэл, хүний сэтгэцэд нөлөөлдөг. Ингээд хүн эрүүл байхдаа хэзээ ч хийхгүй байсан элдэв үйлийг хийдэг. Архи ч мөн донтолт үүсгэнэ. Их хэмжээгээр хэрэглэхэд эрүүл мэндэд хохирол учруулна. Хаана ёс суртахуунгүй, зугаа цэнгэл хөөж байна, тэнд архидалт байдаг. Библид архи дарсыг шууд хориглоогүй. Гэхдээ архи хүний зан авир, зөв шүүн тунгаан бодоход сөрөг нөлөө үзүүлж, донтуулах, ёс бус үйлдэл хийхэд хүргэх үр дагавар авчирдаг учраас чуулганууд архи дарсыг хориглодог. Зарим итгэгчид болгоомжтой жаахан хэрэглэж, биеэ хянаж чадна гэж боддог. Ингэх нь бусад хүмүүст, ялангуяа хүүхэд залууст буруу үлгэр дуурайл үзүүлж байгаа хэрэг юм.

► Нэг суралцагч Сургаалт үгс 20:1 болон Сургаалт үгс 31:4-5 эшлэлийг бүлэгт уншина.

Тамхи байнга татах, эсвэл зажилж хэрэглэх нь донтолт үүсгэж, амь насыг хэдэн жилээр богиносгоно. Тамхи татдаг хүмүүс хорт хавдраар илүү өвчлөх хандлагатай байдаг.

Библид мансууруулах бодис, архи дарс, тамхийг онцгойлон дурдаж хорьсон үг байхгүй. Гэхдээ эдгээрийн хор хөнөөлийг ойлгодог ихэнх хүн Христийн дагалдагчдыг ийм зүйл хэрэглэх ёсгүй гэж үздэг. Дээр үед архи, тамхи, мансууруулах бодис ямар хор хөнөөлтэйг сайн мэддэггүй байсан учраас зарим газар оронд эдгээрийг хориглодоггүй байжээ.

Архи, тамхи, мансууруулах бодисийн хамгийн том аюул бол донтолт юм. Донтолт хүний амьдралыг удирдаж, цаг, мөнгө, хүч энергийг нь шавхаж дуусгадаг. Улмаар хүний сэтгэхүйд нөлөөлж, энэ мэт буруу үйлдлээ зөв гэж тайлбарлахад хүргэнэ. Донтсон хүн гэр бүл, ажил гээд бүхнээ хаядаг. Түүнчлэн донтсон хүн элдэв шашинд орсон хүн шиг мансууруулах зүйлийнхээ араас шургуу, тууштай явдаг. Иймээс донтолт нь Бурханд үнэнч байхтай зөрчилдөнө.

Итгэгч хүн согтуурах ёсгүй, харин Бурханы Сүнсээр дүүрэх байх ёстой гэж Ефес 5:18 эшлэл бидэнд сануулж байна.

Итгэгч хүн цэвэр цэмцгэр байх ёстой бөгөөд ариун цэврийн тал дээр өссөн соёлынхоо тогтсон хэм хэмжээнээс доошоо орж болохгүй. Хүмүүсийн өмнө муухай үнэр, бохир үс, хиртэй эсвэл хуучирч муудсан хувцастай явах ёсгүй. Ядуу хүн гадаад төрхөө арчлаад байх боломж муу байж болох юм. Гэхдээ чадах чинээгээрээ цэвэр цэмцгэр байх ёстой.

Хэрэв найз нөхөд чинь таны гадаад үзэмж, ариун цэврийн талаар шүүмжилбэл хүлээж аваарай. Эцэг эхчүүд хүүхдэдээ багаас нь биеэ цэвэр цэмцгэр авч явахыг заах ёстой.

Итгэгч хүн энэ дэлхийн хэв маягаар хөөцөлдөх, өмсөж зүүснээрээ өөрийгөө бусдаас дээгүүр гэж харуулахыг хичээх ёсгүй. Гэхдээ бохир хувцас өмсөх, гадаад төрхөө анхаарахгүй байх нь уулзаж байгаа хүмүүсээ дорд үзэж байгаа мэт сэтгэгдлийг төрүүлж болно. Жишээлбэл, та уулзалтад очихдоо хааш яаш хувцаслаад очлоо гэж бодъё. Тэгвэл таныг уулзаж байгаа хүмүүсээ үл хүндэтгэж байна гэж тооцох боломжтой. Христэд итгэгч хүн Бурханыг ч, бусдыг хүндэтгэж байгаагаа гадаад төрхөөрөө бас илэрхийлж байх ёстой юм.

Өнө мөнхийг эрэлхийлдэггүй хүмүүс өмссөн зүүсэндээ хэт ач холбогдол өгч, биеэ онцгой болгохыг хичээдэг. Эрчүүд нь булчин шөрмөсөө гайхуулах, эмэгтэйчүүд нь эрчүүдэд таалагдах бие галбиртай болохыг хүсдэг. Харин итгэгч хүн биеэ тоох, хувцас чимэглэлээрээ бусдын анхаарлыг өөртөө татах гэсэн буруу хандлагатай байж болохгүй.

Бурханд өөрийгөө зориулах нь амьдралын хэв маягтаа өөрчлөлт хийхэд хүргэдэг. Суралцагчдыг энэ талаар тунгаан бодохыг уриалаарай.

► Таны дадал, зуршлууд таны бие махбод Бурханд харьяалагддаг гэдгийг харуулж чаддаг уу?

Итгэгчдийн баримтлах хоолны дэглэм юмуу, бусад хориглох дүрэм журмын талаар урт удаан хэлэлцүүлэг, маргаан хийхээс зайлсхийгээрэй.

► Та яагаад зарим бодис хэрэглэдэггүйгээ хүнд яаж тайлбарлах вэ?

Тэнгэрлэг Эцэг минь,

Биднийг эхлээд газар дэлхийд, дараа нь тэнгэрийн улсад амьдрах гайхамшигт боломжийг өгсөнд баярлалаа.

Та намайг бүтээж, нүглээс зольж авсан гэдгийг сайтар ухаарч, өөрийгөө Танд бүрэн зориулж амьдрахад минь туслаач.

Танд үйлчлэх, мөргөн хүндэтгэхэд минь саад болох аливаа зүйлсээс намайг хол байлгаж өгөөч.

Таны Ариун Сүнсний сүм байх эрхэм хувь тавилангийнхаа төлөө Танд маш их талархаж байна. Би Таныг өргөмжилсөн амьдралаар амьдармаар байна.

Aмен

(1) Дараах асуултуудын хариуг хувийн тэмдэглэл дээрээ бичээрэй (Үүнийг ангийн удирдагчдаа хураалгах шаардлагагүй).

• Та өөрийгөө Бурханд бүрэн зориулдаг уу? Бурханд өөрийгөө бүрэн зориулна гэж юу гэсэн үг вэ?

• Өөрийг чинь махбодын дур тачаалд уруу татдаг төрөлхийн ямар хүсэл танд байдаг вэ?

• Эдгээр уруу таталтыг ялж гарахад чинь туслах Библийн цээжилсэн эшлэлээсээ 2 юмуу 3-ыг бичнэ үү!

• Энэ хичээлийг үзэж байх явцад Бурханд танд ямар өөрчлөлт хийх ёстой гэж сануулсан бэ?

(2) 1 Коринт 15-р бүлгийг судал. Эхлээд жижиг сэдэв бүрээр нь хэдэн хэсэгт хуваа. Хэсэг тус бүрийн гол санааг тайлбарлан догол мөрөнд бичээрэй. Энэ хичээлтэй холбоотой амьдралд хэрэгжүүлж болох ямар заавар чиглүүлэг байна вэ?