Энэ хичээлийн төгсгөлд суралцагч дараах ойлголт, чадварт суралцсан байна:

(1) Бусадтай харилцахдаа хайр, амар тайван, хүндэтгэлийн зарчмыг хэрэгжүүлэх.

(2) Итгэгч хүн хэл яриагаараа бусдыг ерөөж, Бурханыг алдаршуулахын тулд Бичвэрийн 9 дүрмийг хэрэгжүүлэх.

Робинзон Крузогийн тухай уран зөгнөлт зохиолд нэгэн хүн усан онгоцны сүйрэлд өртөж, сэлсээр нэгэн эзгүй аралд хүрч амьд үлдэж чаддаг. Арал дээр тэр олон сар ганцаараа байж, өөртөө оромж, хувцас хийн, хоол ундтай залгахыг сурчээ. Нэгэн удаа тэр тэнгисийн эргээр алхаж явахдаа хүний мөр олж хараад гайхан цочирдов. Арал дээр өөрөөс нь гадна хүн байж таарав. Тэр хүн найз эсвэл дайсан болохыг Робинзон мэдэхгүй байлаа. Тэр хүн ямар зантай, ямар хэлээр ярьдаг, ямар үндэстэн болохыг, яагаад энд байгааг нь мэдэх боломжгүй байв. Арал дээрх түүний амьдралыг энэ хүн хэрхэн өөрчилж болох талаар ямар ч төсөөлөл түүнд байсангүй. Харилцаа нь хүний амьдралд асар их нөлөө авчирдаг учраас Робинзон хөлийн мөрийг харах үедээ найдвар, бас айдсыг давхар мэдэрчээ.

1-р зууны чуулганд эрэгтэй, эмэгтэй, харь үндэстэн ба иудейчүүд зэрэг олон соёл, анги давхаргын хүмүүс хамрагдаж байсан бөгөөд тэд маш олон зөрчил, асуудал дунд ажилладаг байв. Элч Паул бие биенээ хүлээж аваарай хэмээн тэдэнд хэлсэн байдаг (Ром 15:7).

► Хүн арал дээр ганцаараа амьдарч байна гээд төсөөлж үзье. Тэр хэн нэгнийг тэвчихэд суралцах болов уу? Тэр хэн нэгнийг уучилж чадах уу?

Та бусад хүмүүстэй харилцахгүйгээр христитгэлийн тэвчээртэй чанарыг хөгжүүлж чадахгүй. Та бусадтай харилцахаас нааш уучилж, бас уучлагдах боломжгүй юм.

► Христитгэлийн өөр ямар чанар, үйл ажиллагаа бусадтай харилцахыг шаарддаг вэ?

Эдгээр нь бусадтай харилцах үед л тохиолддог. Бидний чанар чансаа зөвхөн харилцаагаар дамжин хөгжиж, илэрхийлэгдэх боломжтой. Энэ нь бидний харилцаа сүнслэг хөгжилд маань маш их нөлөөтэй гэсэн үг юм.

Библи олон төрлийн харилцааны удирдамж зааврыг өгсөн байдаг. Эхнэр ба нөхөр, эцэг эх ба хүүхдүүд, ажилчин ба ажил олгогч, пастор ба чуулган, ахмад ба залуу хүмүүсийн харилцаанд зориулсан тусгай зааврууд бий.

Хүний аль ч төрлийн харилцаанд хэрэгжүүлж болох, Бичвэрийн хамгийн багадаа 3 зарчим бий: хайр, хүндэтгэл ба амар тайвны зарчим.

“Бүх хүнтэй эвтэй байхыг болон ариуслыг мөшгөгтүн. Үүнгүйгээр хэн ч Эзэнийг үзэхгүй болой.” (Еврей 12:14)

Энэ эшлэлд харилцаа ямар чухал болохыг онцолжээ. Бүх хүнтэй эвтэй байх нь ариун байдалтай маш ойр холбоотой.

► Бусадтай амар тайван байхын тулд ямар зүйлсийг бид эрэлхийлэх хэрэгтэй вэ?

Амар тайвныг эрэлхийлэх нь та өөрөө өртэй хүн болгондоо тохируулж харилцах юм (Ром 13:7). Та хүндэлж, дагаж, талархаж явдаг хүмүүстээ үүнийг өгөх ёстой. Хэрэв ингэхгүй бол та зөрчил үүсгэж буруутан болно. Хэрэв та бусдад төлөх ёстой зүйлээ төлдөггүй, амлалтаа биелүүлэхгүй, хариуцлага хүлээдэггүй бол амар тайвныг эрэлхийлэхгүй байгаа хэрэг. Та бусдад өгөх ёстой зүйлээ өгөөгүйгээ ухаарвал, та уучлал эрж, өөрийн хүлээсэн үүргээ чадахаараа биелүүлэх ёстой.

Түүнчлэн амар тайвныг эрэлхийлэх нь зөвхөн өртэй хүмүүстээ өгөхөөс илүү зүйлийг танаас шаарддаг. Энэ нь өргүй хүмүүсийг ч хайрлаж, сайн хандах тухай юм.

► Нэг суралцагч Тит 3:2-3 эшлэлийг бүлэгт уншина.

Итгэлд ирээгүй хүмүүс буруу хандлага, буруу сэдэлтэй байдгийг бид ойлгож, ууч, тэвчээртэй байдлаар хандах ёстой.

Зөрчил байгаад хэрэв та амар тайвныг хүсэж байвал, эвлэрлийг эрэлхийл. Уучлах хүсэлтэй байгаарай. Амар тайвныг сэргээх боломжгүй гэж яаран бүү тааварлаарай. Та аль болох харилцаагаа тасалж, тэр чигтээ салахгүй байхыг хичээх хэрэгтэй.

Есүс, танд бурууг учруулсан хүн дээр очих ёстой бөгөөд түүнд юуг буруу хийснийг нь тайлбарлаарай хэмээн хэлсэн байдаг (Матай 18:15). Хэрэв та энэ асуудлыг сөргөлдөх хэмжээний биш, жижиг асуудал гэж үзвэл энэ тухай бусдад хэлэхгүй байх, буруутай нэгэнд дургүйцэхгүй байх нь дээр.

Заримдаа хүмүүс бусад итгэгчдийн тэдэнд хийсэн буруу зүйлээс болж уучлах тал дээр тэмцэлддэг. Итгэгч бус хүмүүс бидэнтэй буруу харьцахыг бид ойлгож болох ч, итгэгч хүмүүс бидний эсрэг ямар нэг буруу зүйл хийхийг ойлгох нь хэцүү байдаг.

Есүс, хүмүүс бидэнтэй ахин давтан буруугаар харьцах үед ч уучлах сэтгэлээ хадгалсан хэвээр байх ёстой гэдгийг хэлсэн байдаг (Матай 18:21-22). Хүмүүс чуулганаа орхиж, сүнслэг амьдралдаа буулт хийхэд хүрдэг нийтлэг нэг шалтгаан бол бусад итгэгчдийн буруутай үйлдэлд дургуйцсэн гомдол байдаг. Гомдол нь өөр нэг төрлийн сүнслэг уналтыг дагуулдаг.

Хүн уучлахаас татгалзах үедээ өөрийн амьдралын талбарыг Бурханы эрх мэдлийн эсрэг байлгадаг. Учир нь Бурхан биднийг уучлахыг шаарддаг (Ефес 4:32-г унш). Тэрхүү талбар нь бидний амьдралын бусад талбарт Сатан нөлөөлөх орон зай болдог. Хэрэв хүн уучлахаас татгалзвал, тэрээр яваандаа хамааралгүй мэт санагдах сорилтуудыг ч эсэргүүцэх чадваргүй болдог.

Хүний хувийн гэм буруу нь өөрийн эрхийг дээдлэх байдалд үндэслэгддэг. Учир нь бид тодорхой хандлага, хүндлэлийг авах зохистой гэж итгэдэг. Харин түүнийгээ авч чадахгүй болох үед бид гомддог. Бид авч байгаагаасаа ч илүүг хүртэх ёстой гэж итгэдэг.

Золин авахыг ухаарах нь бусдыг уучлах түлхүүр юм. Золин авах нь буцааж худалдан авах гэсэн утгатай. Нэгэнт Бурхан биднийг золин авч, бид Түүнийх болсон учраас бидний эрх ч Түүнд хамаатай болсон. Бид ухамсартайгаар өөрсдийн эрхийг Бурханд өгөх учиртай. Та залбирахдаа “Эзэн минь, миний бүх эрх Таных болсныг би мэддэг. Тиймээс Та тэдгээрийг хариуцаж, зөвхөн надад юу байх нь сайн гэж харж буй зүйлээ надад өгөөч” гэж хэлж болно. Тийнхүү хүмүүс танд сайн хандвал, танд энэхүү нэр хүндийг зөвшөөрсөн Бурханд та талархаж чадна. Харин хэн нэгэн танд муугаар хандвал, таны эрхийг хариуцаж байгаа Бурханыг та санаарай. Бурхан тэр цаг үед тухайн эрхийг танд байлгалгүйгээр таныг хөгжүүлж чадна гэж харсан гэсэн үг.

Бусдыг уучилснаар, та Бурханд захирагдаж, Тэр хүссэнээрээ таныг хөгжүүлэх боломжийг олгодог. Өөрийн эрхээс татгалзаж, Бурханд буулт хийх энэхүү зарчмыг бүх төрлийн харилцаандаа хүн хэрэгжүүлэх боломжтой (уучлалтай холбоотой бусад эшлэлийг үз, Колоссай 3:13, Матай 6:15 ба Ром 12:19).

Бидэнд өртэй хүнд ч бид хайраар хандах учиртай. Учир нь бид нигүүлслийг хүлээн авсан бөгөөд Бурханд өртэй болсон юм. Бид Түүнд буцааж төлж чадахгүй бөгөөд энэ нь Түүнд ч хэрэггүй юм. Харин бидний хүлээж авсан тэрхүү хүртэх зохисгүй хайрыг бусдад өгөөрэй гэж Тэр бидэнд айлдсан.

“Нэг нэгэндээ хайртай байхаас өөрөөр хэнд ч… өргүй бай” (Ром 13:8).

Хайр нь тэр хүнийг жинхэнэ итгэгч гэдгийг нотолдог.

Хэн нэгэн нь “Би Бурханыг хайрладаг” гэж хэлчхээд, ах дүүгээ үзэн яддаг бол тэр худалч. Учир нь харагдаж байгаа ах дүүгээ хайрладаггүй хүн харагдахгүй байгаа Бурханыг хайрлаж чадахгүй (1 Иохан 4:20).

Христэд итгэгчдийн дунд нэгэн онцгой хайр байх бөгөөд таны бусад итгэгчдэд хэрхэн хандаж, үйлдэж байгаа нь Есүст хувьчлан хийж байгаа үйл юм. Шүүлтийн өдөр Тэр ийнхүү хэлэх болно. “Үнэнээр Би та нарт хэлье. Та нар энэ ах дүүсийн минь дорд нэгэнд ийн үйлдсэн бол Надад хийсэн хэрэг” (Матай 25:40).

Түүнчлэн христитгэлийн хайр нь зөвхөн итгэгч хүмүүсийн төлөө л байдаггүй. Матай 5:44-45-д Есүс хэлэхдээ,

Харин Би та нарт хэлье. Дайснуудаа хайрла, та нарыг хавчигчдын төлөө залбир. Тэгснээрээ та нар тэнгэр дэх Эцэгийнхээ хүүхдүүд болно. Учир нь Тэрээр муу хүн дээр ч, сайн хүн дээр ч нараа мандуулж, зөвт дээр ч, зөвт бус дээр ч бороо оруулдаг юм.

Зарим хүмүүс өөрийг нь гомдоосон хүмүүст сайн хандахад хэцүү байдаг. Гэхдээ бүдүүлэг байх шалтаг хэзээ ч байдаггүй. Тэдний хүртэх ёстойчлон бид ханддаггүй. Тэд үүнийг хүртэх ёстой ч бай, үгүй ч бай бид тэдэнд хайр ба сайхан сэтгэлээр ханддаг (1 Коринт 16:14). Бид үл итгэгч байхдаа Бурханы хайранд тохирохгүй хүмүүс байснаа санах хэрэгтэй. Гэсэн хэдий ч Бурхан биднийг хайрласан юм (Тит 3:2-3).

► Хэрэв би танд бохир, урагдсан 100 доллар үнэгүй өгвөл та авах байсан уу? Бохир, урагдсан учраас та авахаас татгалзах уу?

Үүний нөхцөл нь тааруу байсан ч үнэ цэнтэй хэвээр байгаа учраас та үүнийг авах байх.

Хүн Бурханы дүр төрхөөр бүтээгдсэн учраас хүн бүр хүндэтгэл хүлээх зохистой (Эхлэл 1:27). Бурханы дүр төрх хүнийг төрөлхийн үнэ цэнтэй болгодог.

Зарим хүмүүс оюуны өндөр чадамжгүй байж болно. Зарим нь ур чадвар дутуу, сайн сургагдаагүй, эсвэл энгийн жишгээр амжилттай, ашигтай болгох ямар нэг зүйл байхгүй ч байж болно. Гэсэн хэдий ч, тэд Бурханы дүр төрхөөр бүтээгдсэн учраас үнэ цэнтэй хэвээр юм.

Магадгүй зарим нь өөрийн мунхаг сонголтоор үнэ цэнээ зарим талаар үгүй болгосон ч бай, бүх хүнд энэхүү чухал үнэ цэн бий. Сургуулиа дуусгалгүй дундаас нь орхисон, эрүүл мэндээ хохироосон, эсвэл муу зуршилд автсан аль нь ч бай, Бурханы дүр төрхөөр бүтээгдсэн хүн учраас үнэ цэнтэй юм.

Хүн бүрийн дотор байдаг Бурханы дүр төрх, төрөлх үнэ цэнийн улмаас хүн хоорондын харилцаандаа хүндэтгэлтэй хандах ёстой. Хамгийн багадаа л эелдэг байх хэрэгтэй.

Манипуляц болон хуурч мэхлэх нь буруу зүйл юм. Учир нь хүн бүр мөнхийн үр дагавартай сонголтыг гаргадаг бөгөөд шийдвэр гаргахад бодит хүчин зүйлсийг мэдэх шаардлагатай тулгардаг. Хүн буруу шалтгаанаар ямар нэг зөв зүйтэй зүйлийг хийхэд хүрсэн байлаа ч энэ нь амжилт биш юм. Учир нь тэр хүн зөвийг сонгоогүй учраас тэр юм.

Хэдийгээр хүмүүс биеэ буруу авч явж байгаа ч гэсэн бид аль болох тэдэнд хүндэтгэлтэй хандахыг хичээх ёстой. Хүмүүсийн алдааг засахдаа, гэм бурууг нь шийтгэхдээ (үүнийг үйлдэх зохих эрх мэдэлтэй хүмүүсийн хувьд) бид Бурханы мөн чанарын зарим хэсгийг тээж байгаа мөнх орших нэгэнтэй харилцаж байгаа гэдгээ ухамсарлах хэрэгтэй.

Эдгээр зарчмыг хэрэгжүүлэх олон арван жишээ байх учиртай.

► Хэн нэгэнд амар тайвныг эрэлхийлсэн жишээ байгаа эсэхийг асууж, хуваалцана уу.

► Гомдсон хүмүүсээ уучлах шийдвэрийг гишүүдээсээ хүсэж, хуваалцаарай.

► Хүртэх ёстойгоос нь илүү их хайрыг хэн нэгэнд харуулсан жишээг асууж ярилцах.

► Биеэ буруу авч явж байгаа нэгэнд хүндэтгэлтэй хандах нь юу болохыг ярилцаарай.

► “Илднээс ч хүчтэй үзэг бий” гэсэн эртний үг байдаг. Энэ нь юу гэсэн утгатай вэ?

Санаа бодлоо солилцож, ятгаж, харилцахад хүч оршдог. Хүмүүсийг хүчилж биш, харин өдөөснөөр та ихийг гүйцэлдүүлж чадна. Санаа бодол, үзэл баримтлал тархаж, олон хүнд нөлөөлөх боломжтой.

Үгийн хүч сайн зүйлийг ч, мөн хор хөнөөлийг ч учруулдаг талаар Библид хэлсэн байдаг (Иаков 3). Авралын төлөвлөгөө нь хүмүүн элч нарт даалгагдсан бөгөөд сайнмэдээний хүч чадлаар төгсгөл шатандаа явж байна.

Бид хэрхэн үг яриагаа хор хөнөөлийг биш, харин сайныг гүйцэлдүүлэхэд ашиглаж чадах вэ? Библийн зарим зарчмууд бий.

(1) Хэтэрхий их бүү ярь.

“Мунхаг нэгэн олон үгтэй...” (Номлогчийн үгс 10:14).

“Үг олшроход алдаа зайлшгүй хэрсүү ухаантай нь хэлээ захирна” (Сургаалт үгс 10:19).

“Дуугүй байваас мунхаг ч мэргэнд тооцогдоно амаа хамхиваас тэрээр ухаалаг мэт харагдана” (Сургаалт үгс 17:28).

Иймээс хэтэрхий их бүү ярь. Хэт их ярьдаг хүн өөрийн үгийг ч, өрөөлийн үгийг ч зүй зохистойгоор үнэлдэггүй. Тийм хүн үнэхээр хэлмээр байгаагүй зүйлээ хэлдэг бөгөөд бусад хүмүүс ч бас адилхан ингэж хэлдэг гэж тааварладаг. Тэрээр мэдлэггүйгээр үзэл бодлоо илэрхийлдэг. Та ямар нэгэн мэдэхгүй зүйлийнхээ талаар үзэл бодлоо ярих шаардлагагүй бөгөөд үзэл бодол бүр ижил үнэ цэнтэй байдаггүй.

(2) Бодохоосоо өмнө бүү ярь.

Таныг харамсахад хүргэх үгсийг мэдрэмждээ захирагдан бүү хэл.

“Хайрт ах дүү нар минь, үүнийг мэдэгтүн. Хүн бүр сонсохдоо түргэн, ярихдаа удаан, уур хилэнд алгуур байг” (Иаков 1:19).

“Мунхгийн уур тэсрэмтгий мэргэн нь түүнийг тэвчимтгий” (Сургаалт үгс 29:11).

“Уурлахдаа удаан нь ухаан дүүрэн түргэн зан гаргах нь мунхаглалыг өргөмжлөхтэй адил” (Сургаалт үгс 14:29).

(3) Эхний харцаар нөхцөл байдлыг бүү шүү.

“Сонсохоосоо өмнө хариу хэлэх нь мулгуу агаад ичгүүртэй” (Сургаалт үгс 18:13).

“Өөр нэгэн ирж, түүнийг шалгаахаас нааш өмнө нь ирж хэрэг явдлаа ярьсан хүний зөв мэт байдаг” (Сургаалт үгс 18:17).

Ихэнх зөрчлүүд үл ойлголцлоос болж үүсдэг. Цаг хугацаа, анхаарал хандуулснаар гол төлөв тэдгээрийг шийдвэрлэх боломжтой. Үнэнч шударга байдлаараа танигдсан хүн таны ямар нэг зүйл буруу байгааг хэлвэл, тэр хүнийг яаран бүү шүү.

“Бусдын хэрүүлд хөндлөнгөөс оролцох нь өнгөрч яваа нохойг чихнээс нь зулгаахтай адил” (Сургаалт үгс 26:17).

(4) Хошигнолд болгоомжтой ханд.

Үгс нь нөлөөтэй учраас хяналтгүй хошигнол нь галзуу хүний гарт буй зэвсэгтэй адил юм.

“Галтай мод, үхлийн сумаар тоглогч галзуу мэт хөршийгөө гүтгэн мэхэлчхээд 'Би тоглосон юм' гэх хүн байдаг” (Сургаалт үгс 26:18-19).

Хүмүүс таны тоглоомоор хэлсэн үгэнд итгэж, ноцтой алдаа гаргахад бүү хүргэ. Та жинхэнэ нухацтай хандаагүй зүйлээ жинхэнээсээ мэтээр бүү ярь. Тэгвэл тэд танд дахиад хэзээ ч итгэхгүй. Хүмүүсийн өөрчилж чадахгүй согогийг бүү шоол. Хэн нэгний алдаа уналтыг тоглоом наргиа бүү болго. Нүглийг өчүүхэн зүйл мэт харагдуулдаг тийм хошигнол онигоог бүү ярь.

► Хошигнолын өөр ямар буруу хэрэглээ байдаг вэ?

(5) Буруу хүнд үүнийгээ бүү хэл.

“Илүү үгтэн нууцыг задруулдаг итгэлт хүн хэргийг нууцалдаг” (Сургаалт үгс 11:13).

“Түлээгүй бол гал унтарна хов зөөгчгүй бол хэрүүл маргаан намжина” (Сургаалт үгс 26:20).

Ямар нэг зүйлийг хэлмээр байсан ч, та үүнийг хэлэх зөв хүн нь биш байж болно. Үүнийг хамгийн түрүүнд хэлэх ёстой эрх мэдэл бүхий хүний оронд та ярих ёсгүй юм.

Хүмүүсийн алдааны талаар бүү дэлгэрүүлж түгээ.

Хувийн мэдээллийг нь бусдад хэлдэг хүнд хүмүүс итгэж найдахгүй.

“Өөрийн хэргийг хөрштэйгөө л шийд бусдын нууцыг бүү задруул” (Сургаалт үгс 25:9).

Хулчгар хүн дэг журмын дагуу явахын оронд буруу хүмүүст учир шалтгаанаа ярьдаг. Матай 18:15-17.

(6) Шүүмжлэлд болгоомжтой ханд.

Шүүмжлэх тохиромжтой цаг ба арга зам гэж бий.

“Далдлагдсан хайраас ил зэмлэл дээр. Андын чинь учруулсан шарх итгэмжтэй...” (Сургаалт үгс 27:5-6a).

Таны шүүмжлэл сүйтгэхийн тулд биш, харин босгон байгуулахын тулд байгаа эсэхийг нягтал. Тэдэнд санаа тавьж, туслах хүсэлтэй байгаа гэдгээ та харуулах ёстой. Ихэвчлэн шүүмжлэхээсээ өмнө эрүүл харилцаандаа анхаарах нь чухал байдаг.

(7) Бүү мэхэл.

“Бие биедээ бүү худал ярь. Яагаад гэвэл та нар хуучин хүнээ муу зуршилтай нь тайлж…” (Колоссай 3:9).

Мэхлэл нь итгэлийн амьдралд биш, харин нүгэлт амьдралд зохицдог.

“Худалч уруул ЭЗЭНд жигшүүр хуудуугүй үйлстнүүд Түүнд таалал” (Сургаалт үгс 12:22).

(8) Хэл яриагаа эрүүл цэвэр байлга.

“Садар самуун яриа, мунхаг үгс, шалиг наргиа нь зохимжгүй. Харин оронд нь талархлын үг ярь” (Ефес 5:4).

Нөхцөл байдлыг албан ёсны байдлаар, зөвөөр шийдвэрлэхээс бусад тохиолдолд өнгөрсөн болон одоогийн дуулиан шуугиантай зүйлсийн талаар бүү ярь. Нууцаар ярих ёстой онигоог бүү ярь. Дэлхийн хүмүүс сексийн нэр томьёо, биеийн далд хэсгийг хэт онцолсон зүйлсийг яриандаа түгээмэл ашигладаг бол итгэгч хүмүүсийн хувьд энэ нь зохимжгүй. Түүнчлэн стресс, хямралтай үедээ та чин сэтгэлээсээ Бурханаас тусламж гуйгаагүй л бол, Бурхан болон Есүсийн талаар үг хэллэг ашиглах нь үл хүндэтгэсэн хэрэг юм.

(9) Хүмүүсийг хагаралдуулах зүйлсийг бүү ярь.

“Замаасаа гажигч эвдрэлцлийг тарина хов жив тараагч дотнын нөхдийг салгана” (Сургаалт үгс 16:28).

“Энэ зургаан зүйлийг ЭЗЭН үзэн яддаг энэ долоо дахийг нь ч Тэрээр жигшдэг... [долоо дахь нь] Ах дүүсийн дунд эвдрэлцлийг тараагч нар” (Сургаалт үгс 6:16, 19).

Бусдын хүч хөлсөөр өөрийгөө илүү сайхан болгох гэж бүү оролд. Бусдын дунд зөрчил бүү үүсгэ. Бусдын үр нөлөөтэй үйлчлэлийг хов жив тарааж бүү хорло.

Ярихаасаа өмнө “Энэ нь үнэн үү?” гэдэгт анхаарахаас гадна “Яагаад би үүнийг хэлж байгаа вэ?” гэдэгт ч мөн анхаар.

Дүгнэлт

Итгэгч хүн бусдыг үгээрээ хохироосноо ухаарвал уучлал эрэх хүсэлтэй байх ёстой. Хэлсэн зүйл нь яг үнэн биш байснаа ухаарвал итгэгч хүн үүнийгээ залруулах хэрэгтэй.

Бусдын хэлсэн өвтгөх, гомдоох үгс нь таны хэлэх буруу үгсийг зөвтгөхгүй.

Бага багаар засаж сайжруулах боломжтой үг яриатай холбоотой алдаанууд бий. Үүнийг та ярихаасаа өмнө бодоход суралцсанаар засаж болно. Түүнчлэн хүний зүрхэнд нуугдсан бусдыг хохироох сэдэлтэй алдаанууд ч байдаг. Хэрэв та ийм төрлийн үг яриаг хэлсэн бол Бурханаас уучлалт гуйж, таны зүрх сэтгэлийн энэ хандлагыг цэвэрлэж өгөхийг асуух хэрэгтэй.

Таны зүрх сэтгэлийн талаар үг яриа тань ихийг илчилдэг (Лук 6:45). Христитгэлийн үнэ цэнтэй нийцэхгүй зүйлийг ярьж, итгэлийн гэрчлэлээ битгий үнэгүйдүүлээрэй.

Та үг яриагаараа эргэн тойронд байгаа хүмүүсээ ерөөж чадна. Ихэнх үйлчлэл харилцаанаас бүрддэг. Хэрэв та Библийн зарчмуудыг дагавал таны үг ярианы нөлөө гайхалтай өсөн нэмэгдэх болно.

► Ихэнх хүмүүс өөрийнхийг бус, харин бусдын ярианы алдааг олж хардаг. Ангийн удирдагч эдгээр зарчмуудаас хэрэгжүүлж чадаагүй өөрийн алдаа, сул талын нэгийг жишээ болгон хуваалцах боломжтой.

► Бүлгийн гишүүдээс сайжруулахад Бурханы тусламж хэрэгтэй, сул тал болж байгаа зарчмаас нэгийг сонгоод ярихыг асуугаарай.

Тэнгэрлэг Эцэг минь,

Библийн хайр, хүндэтгэл, амар тайвны зарчмуудыг бүх харилцаандаа дагаж амьдрахад надад туслаач.

Миний эсрэг буруу зүйлийг хийдэг нэгнийг би уучилдаг байхыг хүсэж байна. Надтай зөрчилддөг тэдгээр хүмүүстэй эвлэрлийг эрэлхийлэхэд надад туслаач.

Таны дүр төрхөөр бүтээгдсэн тул бүх хүмүүсийг хүндэлж сурахад туслаач. Хэл яриа минь их нөлөөтэйг санаж, хэлэх үгэндээ хариуцлагатай байхад надад туслаач. Миний үг яриа хохироох биш, харин сайныг гүйцэлдүүлэхийг би хүсэж байна.

Таныг дээдэлсэн гэрчлэлтэй амьдрахыг би хүсэж байна.

Таны үнэнийг ярих завшааныг надад олгодог Танд баярлалаа.

Aмен

(1) Иаков 3-р бүлгийг унш. Энд дүрслэгдсэн харилцааны гайхалтай боломжуудын талаар ажигла. 13-18 эшлэл дэх хүний сүнслэг нөхцөл байдлаас хэл яриа хэрхэн хамаардгийг анзаар. Ефес 4:25-32 эшлэлийг унш. Эдгээр эшлэлд хариулт болгон нэг догол мөр залбирлаа бичээрэй.

(2) Ефес 5:22–6:9 эшлэлийг судал. Олон төрлийн харилцаанд хэрхэн хандаж үйлдэх талаарх тодорхой зааврыг жагсаан, тайлбарла. Эдгээр заавар нь энэ хичээлийн хайр, амар тайван ба хүндэтгэлийн зарчимтай хэрхэн холбоотой болохыг тайлбарлан бич.

(3) Дараах асуултаас 3-ыг сонгоод, тус бүр нэг догол мөр хариулж бич:

• Бурхан биднийг харилцаандаа эвтэй байхад дуудсан гэдэг үнэний практик хэрэгжүүлэлт юу байж болох вэ?

• Өөрийнхөө авралыг хадгалахад бусдыг уучлах нь яагаад зайлшгүй чухал юм бэ?

• Хүн өөрийн эрхийг Бурханд өгнө гэдэг нь юу гэсэн утгатай вэ?

• Хүртэх ёсгүй нэгнийг хайрлах бидний хайрын өдөөлт нь юу вэ?

• Бүх хүн Бурханы дүр төрхөөр бүтээгдсэн гэдэг үнэн бидний бусадтай харилцах харилцаанд хэрхэн нөлөөлөх ёстой вэ?