Энэ хичээлийн төгсгөлд суралцагч дараах ойлголт, чадварт суралцсан байна:

(1) Гэрлэлтэд зориулсан Бурханы төлөвлөгөө болон элдэв асуудлаас хамгаалж, ивээл ерөөл авчирдаг гэрлэлтийн зарчмуудыг ойлгоно.

(2) Гэр бүлд зориулсан Бичвэрийн удирдамжийг тайлбарлаж сурна.

Доктор Робертсон Маквилкин 12 жилийн турш Японд сайнмэдээний үйлчлэл хийжээ. Хожим нь Columbia International University-ийн ректор болсон бөгөөд тэрээр алдартай зохиолч, илтгэгч, сурган хүмүүжүүлэгч хүн юм. Түүний эхнэр Мюрэй альцхаймер өвчнөөр өвдөж, байнгын асаргаа шаардлагатай болтлоо хүндэрсэн тул Маквилкин эхнэрээ асрахаар их сургуулийн ректорын албан тушаалаа өгчээ. Тэрээр энэ талаараа гэрлэх үедээ өгсөн ам тангаргаа биелүүлж байна гэж хэлжээ. Түүний хувьд эхнэрээ халамжлах нь их сургуулийн ректорын албан тушаалаас эрхэм чухал байсан юм.

Бурхан анхны эрэгтэй, эмэгтэй хүнийг бүтээснийхээ дараа гэрлэлт хэмээх бүтцийг санаачилжээ.

► Нэг суралцагч Эхлэл 2:21-24 эшлэлийг бүлэгт уншина. Эдгээр эшлэлд гэрлэлтийн талаар юу өгүүлж байна вэ?

Бурхан гэрлэлтийг хүмүүст гарцаагүй хэрэгтэй зүйл болгон бүтээсэн юм. Тиймээс гэрлэлт нь хүний мөн чанарт яг тохирдог. Бурханы бүтээсэн юм бүхэн, шаарддаг бүх зүйлс нь үргэлж бидний сайн сайхны төлөө байдаг (Дэд хууль 6:24). Гэрлэлтэд зориулсан Түүний төлөвлөгөө ч бас бүх хосуудад сэтгэл хөдлөл, харилцаа, сүнслэг сайн сайхан байдлыг авчирна гэдгийг Тэр мэдэж байсан.

Гэрлэлт бол Бурханы зан чанар, харилцааны тусгал байхаар бүтээгдсэн юм. Бурхан Эцэг, Бурхан Хүү, Бурхан Ариун Сүнс үргэлж хоорондоо харилцаатай байсан, харилцаатай ч байх болно. Хэн хэн нь өвөрмөц үүрэг хүлээдэг боловч Гурвалын бодгаль бүр мөнхөд нэгдмэл, нэг мөн чанартай. Гурвалын хоорондын харилцаанаас бид дотно, үнэнч, итгэмжтэй бас тууштай хайрыг олж хардаг. Эхнэр нөхөр бүр цэвэр ариун харилцаатай, насан туршдаа бие биедээ өөрийгөө зориулсан байх нь Бурханы төлөвлөгөө юм.

Бурхан эрэгтэй эмэгтэй хүмүүс эцэг эхээ орхиж, гэрлэлтээр хоорондоо нэгддэг гэсэн. Гэрлэлт нь бүх харилцаанаас хамгийн хүчтэй, хамгийн дотно, нөхөрлөл ба хамтралын харилцааг хоёр хүний дунд үүсгэдэг.

Гэрлэлт бол хоёр хүний жижиг түншлэл биш, харин амьдралаараа нягт холбогдсон, нэг хүн мэт тооцогдох нэгдэл юм. Энэ холбоо нь тэдний хувь хүний шинж чанарыг арилгахгүй. Харин хос хоёрын дунд өвөрмөц нэгдлийг бий болгодог.

Бурхан гэрлэлтийг насан туршийнх байхаар бүтээсэн. Тиймээс хуримлах үедээ хосууд амьд байгаа цагтаа бие биедээ үнэнч байхаа амладаг.

Есүс фарисайчуудтай ярьж байхдаа гэрлэлтийн талаар дурдаж байсныг Библид тэмдэглэсэн байна.

► Нэг суралцагч Матай 19:3-8 эшлэлийг бүлэгт уншина.

Бурхан гэрлэлтийг насан туршийнх байлгахаар бүтээсэн боловч Бурханыг дагадаггүй хүмүүсээс болж салалт бий болсон гэж Есүс хэлсэн юм.

Бурхан үүнийг насан туршийнх байлгахаар бүтээсэн олон шалтгаан байдгийн заримыг нь бид дээр дурдсан. Түүнчлэн гэрлэлт нь хүүхдүүдийн төлөө насан туршийнх байх ёстой. Гэрлэлтэд зориулсан Бурханы төлөвлөгөөг дуулгавартай дагах нь хүүхдүүдийг өсгөх хамгийн сайн орчныг бий болгодог. Эцэг эхчүүд нь Бурханыг хүндэтгэдэг, Бурханы зарчмуудыг дагадаг гэр бүл бурханлаг хүүхдүүдийг өсгөдөг (Малахи 2:15).

Хүүхэд насанд хүрэхэд нэлээд хэдэн жил шаардагдана. Бурхан хүний амьдралыг ингэж бүтээсэн учраас энэ хугацаанд хүүхдүүд эцэг эхээсээ хайр халамж, удирдамж, дэмжлэг авч өсдөг. Амьтад ганц хоёр жилийн дотор өсөж бойждог бол хүний хувьд өсөж төлөвшихөд илүү их хугацаа шаардагдана. Тиймээс Бурхан гэр бүлийг хүүхэд өсгөх газар болгож бүтээсэн юм. Харин гэр бүлүүд үнэнч, хариуцлагатай эцэг эхээр дутагдвал нийгэмд олон асуудал үүсдэг.

Гэрлэлт бол бүхэл амьдралаа бие биедээ зориулах хосын амлалт юм. Улс орон бүрд гэрлэлтийг чухалд тооцож байгаагаа гэрлэх ёслолоор дамжуулан илэрхийлдэг. Гэрлэх ёслол бол хосууд насан туршдаа зориулалт гаргана гэдгээ олны өмнө зарлаж буй хэрэг юм.

Дэлхийн олонх улс оронд гэрлэлтийг бүртгэдэг. Түүнчлэн гэр бүлийн тухай хуульд өмч хөрөнгө, хүүхдүүдээ асран халамжлах, өв хөрөнгөний асуудлыг ч тусгадаг.

Энд олон гэрлэлтэд хэрэглэж байсан хуримын тангарагийн нэгэн жишээг оруулъя:

Энэ өдрөөс эхлэн би Бурханы ариун зарлигийн дагуу сайн, муу, баян, ядуу, өвчтэй, эрүүл ямар ч үед чиний дэргэж байж, үхэл биднийг салгах хүртэл эхнэр/нөхөр чамайгаа хайрлан, эрхэмлэнэ гэдгээ би амлаж байна.

Хүн үргэлж романтик мэдрэмжтэйгээ байгаад байхгүй. Тиймээс гэрлэлт нь хувирч өөрчлөгддөг мэдрэмж дээр суурилах ёсгүй. Гэрлэлтийн тангараг бол эхнэр нөхөр хоёр нөхцөл байдлыг үл харгалзан, ямар ч үед хоёр биедээ үнэнч байхаа амлаж байгаа амлалт юм.

► Нэг суралцагч 2 Коринт 6:14-18 эшлэлийг бүлэгт уншина.

Эдгээр эшлэлд итгэгч хүн итгэдэггүй хүмүүстэй хэт дотно холбоотой болбол Бурханд өгсөн амлалтад нь саад учирдаг гэдгийг сануулж байна. Итгэгч хүн Сатаныг мөргөн хүндэлдэг хүнтэй цуг мөргөл хүндэтгэл өргөж болохгүйтэй адил, үл итгэгчдийн амьдралын хэв маяг, үнэт зүйлсийг дагаж болохгүй юм. Энэ сануулга бизнесийн хамтралаас эхлээд олон янзын харилцаанд хамаатай.

Гэрлэлт бол хүний хамгийн дотно хамтралын харилцаа юм. Итгэгч хүн итгэгч бус хүнтэй гэрлэх тухай бодож ч болохгүй (1 Коринт 7:39, 2 Коринт 6:14-18). Ер нь итгэдэггүй хүнтэй гэрлэсэн итгэгч хүн хүүхэд өсгөх, амьдралын элдэв асуудал дээр шийдвэр гаргахдаа маш их саад бэрхшээлтэй тулгардаг.

Хэрэв эхнэр нөхөр хоёулаа итгэгч боловч, өөр өөр урсгалын чуулганд хамрагддаг бол сүнслэг ойлголтууд дээр санал нэгтэй байгаа эсэхээ шалгах ёстой. Түүнчлэн гэрлэсний дараа нэг чуулганд хамрагдах хэрэгтэй.

► Гэрлэлт яагаад хайраа зарлах үед биш, харин ам тангараг өгөхөд эхэлдэг вэ?

► Нэг суралцагч Еврей 13:4 эшлэлийг бүлэгт уншина.

Эдгээр эшлэлд гэрлэлтийг хүндэтгэх ёстой талаар зааж байна. Бэлгийн харилцааны нүгэл нь гэрлэлтийг үл хүндэтгэж буй хэрэг юм. Бурхан бэлгийн ёс суртахуунгүй явдлыг шүүх болно.

Бэлгийн харилцааны нүгэлд тачаангүй төсөөлөл, садар самуун, завхайрал, ижил хүйстэнтэйгээ явалдах, садар самуун зураг, бичлэг үзэх зэрэг нь багтана. Эхнэр юмуу нөхрөөсөө өөр хүнтэй бэлгийн харилцаанд орж байгаагаар хүсэж төсөөлөх нь тачаангүй төсөөлөл юм. Харин гэрлээгүй хүмүүсийн дундах бэлгийн харилцаа нь садар самуун явдал бол, гэрлэсэн хүмүүсийн дундах бэлгийн харилцаа нь завхайрал юм. Ижил хүйсийн хүмүүс дундах бэлгийн харилцааг гомосексуал харилцаа гэдэг. Нүцгэн шалдан, бэлгийн харилцааг харуулсан зураг, өгүүллэг, бичлэг үзэх нь порнограф юм. Энэ бүхэн гэрлэлтийн харилцааг зөрчсөн нүгэл болно.

Махбодыг маань уруу татдаг хүсэлд автах нь илүү сайн аргаар шийдэж өгөх Бурханы хангамжийг буруугаар ашиглаж байгаа хэрэг юм. Гэрлэлт доторх бэлгийн харилцаа л Бурханы өмнөх цор ганц хууль ёсны бэлгийн харилцаа мөн. Ёс бус бэлгийн харилцаа нь эхэндээ амтлаг боловч, эцэстээ сүнслэг хүслийг бууруулж, сүйрэлд хүргэдэг хор юм. Тиймээс үүнээс болж бидний ариун, зөвт байдал болон Бурханы оршихуйд мэдрэмтгий байх чанар маань мохдог.[1]

Сургаалт үгс номын маш олон эшлэлд бэлгийн харилцааны ёс бус байдал хүний амьдралыг сүйрүүлж, үхэл рүү хөтөлдөг гэдгийг сануулдаг (Жишээлбэл, Сургаалт үгс 2:16-19, мөн Сургаалт үгс 6:24-29, 32-33).

Хүмүүс хүйсээр ялгаатай бүтээгдсэн гол зорилгын тухайд Робертсон Маквилкин ийнхүү бичжээ.

…бодол санаагаараа хийсэн зүйлс бодитоор хийсэн мэт ноцтой нөлөөтэй. Бурхан эрэгтэй эмэгтэй хүмүүсийг зүгээр л бүтээсэн юм биш. Харин тэднийг өөрийнхөө мөн чанарын тусгал болох бие биеийнхээ төлөөх дотно, насан туршийн холбоонд байлгахаар бүтээсэн юм. Энэхүү эрхэм дээд зорилгыг биелүүлэхийн тулд дотно харилцаа нь онцгой, амлалт нь насан туршийнх байх ёстой. Эс бөгөөс үүнийг нэгдмэл байдал гэхгүй. Үнэнч байх нь оюун бодлоос эхэлнэ. Тиймээс онцгой дотно харилцаа, удаан үргэлжлэх амлалт, харилцан итгэл нь эхлээд бодол санаанд зөрчигддөг.[2]

► Суралцагчид 1 Коринт 6:9-11, 15-20 мөн Матай 5:27-30 эшлэлийг бүлэгт уншина.

Ямар ч нийгэмд эрэгтэй эмэгтэй хүмүүсийн харилцааны талаар уламжлалт соёлын чанартай үзэл бодол бий. Гэхдээ эдгээр үзэл бодол нь ямагт Библийн ёс суртахууны хэм хэмжээнээс доогуур байдаг. Ихэнх соёл уламжлалд нийгмийг эмх журамтай байлгахад шаардлагатай дүрэм байдаг боловч бэлгийн харилцааны нүглийн хувьд илэрхий асуудал үүсгэхгүй, эсвэл нийтийн дунд дуулиан гаргахгүй л бол зөвшөөрдөг. Харин Библийн ёс суртахууны хэм хэмжээ нь өөр юм.

Харамсалтай нь зарим чуулган Библийн ёс суртахууны оронд тухайн улсынхаа соёлын үзэл санааг дагадаг. Тэд нүгэл нь илэрхий эсвэл хэнэггүй загнаж байгаа хүмүүсийг шийтгэдэг боловч, нүглээ сайтар нууж чаддаг хүмүүсийг тэвчээд өнгөрдөг.

Тэгвэл эдгээр эшлэлд ийм нүглийг үйлдсээр байгаа хүмүүс жинхэнэ итгэгч биш төдийгүй, тэнгэрийн хаанчлалд орохгүй хүмүүс юм гэжээ. Коринтын зарим итгэгчид урьд нь ийм нүгэл үйлдэж байсан боловч, аврагдсаны дараа үүнийгээ больсон байв.

Өөрийгөө итгэгч гэж хэлдэг атлаа эдгээр нүглийг зөвтгөдөг бол түүний аливаа сургаал нь хуурамч юм. Хэрэв хүн Христийг дагадаг гэж хэллээ ч, бэлгийн харилцааны нүглийг үйлдсээр байгаа бол тэр хүнийг чуулганаас хасаж, итгэгч хэмээн үзэхгүй байхыг Бичвэрт заасан байна (1 Коринт 5:11-13).

Чуулганы удирдагчид биеэ авч явах тал дээр сайн үлгэр дуурайл үзүүлэх ёстой. Хэрэв чуулган магтаалын удирдагч нартаа зохисгүй хувцаслах, чуулган дээр тачаангуй бүжиг хийх мэтийг зөвшөөрдөг бол бэлгийн ёс бус хүслийг хэвийн гэж хэлсэнтэй адил юм. Үүгээрээ бэлгийн харилцааны нүглийг ноцтой зүйл биш гэж үзэж байгаа хэрэг.

Бусдыг татах зорилгоор биеэ ил гаргасан хувцас өмссөн хүнийг сайхан хувцасласан хэмээн үздэг хэв маяг зарим нийгэмд байдаг. Чуулганы гишүүд ч заримдаа онцгой арга хэмжээний үеэр энэ алдааг гаргах нь бий. Тэд нийгмийнхээ загварын хандлагыг дагах нь сайхан хувцаслаж буй хэрэг гэж боддог бололтой. Ийм буруу ойлголтыг чуулган засаж өгөх ёстой. Итгэгч хүн бусдад буруу хүсэл төрүүлэх шалтгаан болж болохгүй. 1 Тимот 2:9-10 эшлэлд итгэгчид сахилга баттай, цэвэр ариун амьдралаар амьдарч байгаа төдийгүй, нүгэл үйлдэх, эсвэл бусдыг нүгэлд уруу татахыг хүсэхгүй гэдгээ илэрхийлсэн хэв маягаар хувцаслаж, биеэ зөв авч явах ёстой. Христэд итгэгчид өөрсдийгөө зохистой хувцаслалт, даруу зан, биеэ хянах чадвараар гоёх учиртай юм.

Нүгэлтэнд үзүүлэх тусламж

Галат 6:1-д нүгэл үйлдсэн гишүүнээ чуулган засаж авах үүрэгтэй гэж хэлжээ. Гэхдээ засаж авч байна гээд тухайн хүнийг үйлчлэлд үлдээх, эсвэл хурдан буцааж томилох ёстой гэсэн үг биш. Шинэчлэн засах гэдэг бол чуулганы нөхөрлөл, сүнслэг халамжид эргүүлэн авахыг хэлж байна. Хэрэв тухайн гишүүн үнэхээр гэмшиж байгаа бол, Бурхан ч, чуулган ч түүнийг уучилна. Улмаар чуулган түүнийг хүчтэй байж, ялалттай амьдрахад нь туслах сүнслэг дэмжлэгийг үзүүлж, хариуцах ёстой.

Хэрэв гэрлээгүй бүсгүй жирэмсэн болбол чуулган сүнслэг сэргээлтийнх нь төлөө алхам хийлгүй, халамж нөхөрлөлөөсөө түлхэж болохгүй. Хэрэв бүсгүй гэмшиж, сүнслэг зааврыг хүлээн авбал уучилна. Эмэгтэйн холбогдсон нүгэл нь эрэгтэйд нь ч бас адил тооцогдоно. Эмэгтэйгийнх нь нүглийн үр дагавар илэрхий байдаг учраас заримдаа хүмүүсээс илүү хатуу ширүүн харилцаа хандлагыг амсдаг.

Зарим нийгэмд эцэг эхчүүд гэрлээгүй охиныхоо жирэмслэлтээс ичиж зовохдоо төрөөгүй хүүхдийг хөнөөж, гэр бүлийнхээ нэр төрийг аврах гэж оролддог. Гэхдээ аллага хийх сайн шалтгаан гэж огтхон ч байдаггүй (Гэтлэл 20:13). Төрсөн, төрөөгүй хүүхэд бүр Бурханы дүр төрхөөр бүтээгдсэн (Эхлэл 9:6, Дуулал 139:13-14). Тиймээс тэр охины хүүхдийг хамгаалж, өсгөх ёстой юм.

Чуулган бол итгэлийн гэр бүл бөгөөд нүглийг буруушаагаад өнгөрөх хангалтгүй. Харин гишүүдээ халамжлах ёстой. Жишээ нь, буруу нүгэлт үйл ажиллагаагаар санхүүгээ хангадаг хүн байвал түүнд санхүүгийн өөр эх сурвалж олоход нь тус дэм үзүүлж болно.

Бодит нөхцөл байдал…

Хэдэн охин олон хүнтэй чуулганд хамрагдаж, найрал дуунд дуулдаг байв. Гэхдээ охидын гэр бүл ядуу байсан тул тэд мөнгө олох гэж эрчүүдтэй ёс бус харилцаанд ордог байжээ. Тийм нөхцөлд чуулган юу хийх ёстой вэ?

► Амьдралын нүгэлт хэв маягаа орхиход нь туслахын тулд танай чуулган хүмүүсийн төлөө юу хийх ёстой вэ?

Порнограф

Бэлгийн дур хүслийг төрүүлэх зорилгоор нүцгэн бие эсвэл бэлгийн харилцааг харуулсан аливаа бичвэр, зураг, видеог порнограф гэнэ.

Интернэт нь порнографийг хаанаас ч амархан олж үзэх, тараах боломжийг олгодог. Технологийн хэрэглээ маш өргөн болсон учраас энэ асуудал дээр хэрхэн хандах талаар христитгэлийн зарчмуудыг сураагүй хүмүүст маш их уруу таталт ирдэг. Төлөвшсөн олон пасторын хувьд залуу байхад нь интернэт байгаагүй учраас ийм уруу таталттай тулгарч байгаагүй байх. Магадгүй залуу үеийнхэн юутай тулгараад байгааг тэд сайн ойлгохгүй байж мэднэ.

Порнограф нь буруу. Яагаад гэвэл порнограф нь хүнийг садар самуун, завхай, гажууд бэлгийн харилцааны хэлбэрийг төсөөлөн таашаал авахад хүргэх зорилготой хийгддэг. Үүгээр хүний нүгэлт хүслийг өдөөдөг бөгөөд Бурханы жигшдэг ёс суртахуунгүй үйлдлээс таашаал авахыг уриалж, үүнийг хийх боломжийг нээж байдаг.

Порнограф нь донтуулдаг. Порнограф үздэг хүмүүс үүндээ маш хүчтэй татагдах мэдрэмжтэй болдог бөгөөд улмаар амьдралаа үүнгүйгээр төсөөлж ч чадахгүй болдог. Улмаар порнографаас олж авдаг элдэв төсөөлөлгүйгээр амьдрал нь хоосон, сонирхолгүй мэт болно. Бусад бүх донтолтын нэгэн адил хүсэл нь хэрэглээ болж, хэрэглэгч нь амьдралынхаа сайн сайхныг ийм юмны төлөө золиосолж эхэлдэг.

Порнограф нь үйл явцтай. Порнограф үздэг хүнд улам л эрээ цээргүй, гажуудсан юм үзэх хэрэгцээ үүсэж байдаг. Ингээд өмнө нь ой гутаж, айж байсан тийм төсөөллөөсөө таашаал авч эхэлдэг.

Порнограф нь гэмтээдэг. Порнограф үздэг хүн энгийн харилцаанаас таашаал авч чадахаа болино. Хүсэл нь гажууд болж, хэзээ ч хангагдаж чадахгүй болтлоо гэмтдэг. Улмаар бусдыг мэдрэмжгүйгээр хүчирхийлэгч болж хувирдаг.

Пасторууд болон эцэг эхчүүд залуучуудад донтолтын аюулын талаар анхааруулах ёстой. Хүүхдүүдэд уруу таталтыг эсэргүүцэх чадвар дутмаг, мөн төлөвшөөгүй байдаг учраас эцэг эхчүүд интернэтийн хэрэглээнд нь хязгаарлалт тавих ёстой. Порнограф үзэх хүсэлтэйгээ тэмцэлдэж буй хүмүүс итгэл даах бурханлаг хүнтэй холбоо тогтоож, өдөр тутмын ялалт, бүтэлгүйтлийнхээ талаар мэдээлж байвал зохино. Төлөвшсөн итгэгч хүнтэй ингэж байнгын уулзалт хийх нь ийм асуудалтай тэмцэж буй хүнд амлалтаа сахих болон ариун байдлаар ялалт байгуулахад нь тус болно.

► Хүмүүсийг порнографын донтолтоос хамгаалахын тулд ямар аргыг санал болгох ёстой вэ? Чуулган тэдэнд хэрхэн тусалж чадах вэ?

Ижил хүйстний харилцаа

Зарим хэсэг бүлэг хүмүүс гэрлэлтийн талаарх Библийн эрх мэдэл, Библийн тодорхойлолтыг үгүйсгэдэг. Тэд ижил хүйстний харилцааг чөлөөтэй сонгож болно гэцгээдэг.

Харин Библид ижил хүйстний харилцааг буруу гэж үздэг.

► Хамтдаа Ром 1:26-27, 1 Тимот 1:10, мөн 1 Коринт 6:9-10-г уншина.

Хамгийн бузар нүглийн жагсаалтыг дурдсан Библийн энэ гурван багц эшлэлд ижил хүйстний харилцааг оруулсан байна. Эдгээр нүглийг үйлддэг хүмүүс Бурханы эрх мэдлийг үгүйсгэж байгаа хэрэг.

Зарим хүн өөрийгөө төрөлхийн ижил хүйстэндээ татагдах шинж чанартай төрсөн гэж боддог. Улмаар ижил хүйстний харилцаанд өөрсдийнхөө хүсэл сонголтоор татагдаагүй, цаанаасаа ингээд байгаа учраас буруу юм байхгүй гэцгээдэг.

Харин Библид хүнийг төрөлхийн нүгэлт хандлагатай гэсэн юм (Исаиа 53:6). Тиймээс Бурхан биднийг санаатай үйлдсэн нүглээсээ гэмшин эргэхийг уриалдаг (Исаиа 55:7). Угаасаа хүн нүгэлт мөн чанартай төрдөг учраас төрөлхийн хүсэл маань биднийг зөв зүгт удирдаж чадахгүй. Хэрэв хүн төрөлхийн садар самуун, хүчирхийлэгч, хулгайч зан авиртай бол үүнийг төрөлхийн юм гээд зөвтгөж болохгүй шүү дээ.

Зарим гэрлээгүй хүмүүс бэлгийн дур хүслээсээ болж гар хангалга хийдэг. Бэлгийн дур хүслээ намжаах зорилгоор бэлэг эрхтнээ оролдож таашаал авахыг гар хангалга гэнэ.

Садар самуун бичлэг үзэх, сексийн төсөөлөлд автах нь нүгэл мөн (Матай 5:27-28, Матай 15:19-20). Библид гар хангалгын талаар яг тодорхой буруушаасан юм байхгүй боловч, гар хангалга нь тачаангуй бодол, садар самуун зүйл үзэх, үйлдэхэд хүргэж болно.

Гар хангалга хүнийг донтуулдаг учраас үүнийг хэдий чинээ их хийнэ, төдий чинээ улам их хийхийг хүснэ.

Биеэ барьж чадахгүй гар хангалга хийдэг хүн сэтгэл хөдлөл, харилцааны доголдолтой, эсвэл өмнө нь бэлгийн хүчирхийлэлд өртөж байсан гэх мэт гүнзгий асуудалтай байдаг.

► Суралцагчид 1 Коринт 6:12-13, 18-20 мөн 1 Тесалоник 4:1-8 эшлэлийг бүлэгт уншина.

Бурхан эхнэр нөхөр хоёрыг сэтгэл хөдлөл болон сүнсээр нэгтгэх зорилгоор гэр бүлийн харилцаан дахь сексийн харилцааг бүтээсэн юм (1 Коринт 6:16-20, Малахи 2:15).

Олон хүн гар хангалга хийх нь гэрлэх хүртлээ бэлгийн харилцаанд орохгүй байхад тусалдаг гэж үздэг. Гэхдээ донтож, гар хангалга хийх зуршилтай болсон бол ирээдүйн гэрлэлт дэх бэлгийн харилцаанд нь муу нөлөө үзүүлдэг.

Гар хангалга хийх нь таашаал өгдөг ч эхнэр нөхөр хоёрыг бие махбодын болон сэтгэл санааны хувьд нэгтгэдэг бэлгийн харилцааны гол зорилгыг алдагдуулдаг. Тиймээс гэрлэлтээр зөвшөөрөгдсөн эрүүл, хэвийн бэлгийн харилцааг үүгээр орлуулж болохгүй.[1]

Гэрлээгүй хүн гар хангалга хийх асуудалтай болсон бол яах ёстой вэ? Тэрээр хэт их бэлгийн дур хүслээ дарахын тулд хийж байсан байлаа ч, үүнээс зайлсхийх нь хамгийн сайн арга юм. Гар хангалгатай холбоотой уруу таталтууд маш их байдгаас гадна, ийм байдлаар бэлгийн харилцааг нөхөх нь Бурханы анхнаасаа бүтээсэн бэлгийн зөв харилцааны зорилготой зөрчилддөг.

• Хэрэв амьдралд нь ямар нэг ёс бус зүйл байгаа бол, итгэгч хүн тэрхүү нүглээ улайж, гэмших ёстой. Түүнчлэн залбирч зөвлөгөө өгөх бурханлаг настай зөвлөгчид ялалт, уналтаа тайлагнаж байх ёстой.

• Сэтгэл хөдлөл юмуу харилцааны асуудал, эсвэл өнгөрсөнд болсон бэлгийн хүчирхийллээс болж гар хангалга үйлддэг болсон бол, зохих христитгэлт зөвлөгчөөс зөвлөгөө авах нь зөв.

Христийн дагалдагчдад дараах байдлаар тусламж ирдэг.

1. Есүс анхаарч санаа тавьдагт итгэлтэй байх (Дуулал 139:1-3, 1 Петр 5:6-10). Тэрээр итгэгчдийн итгэл, махбодын хэрэгцээ, ариун байдалд санаа тавьдаг. Хүн болж ирснээрээ Тэрбээр бидний амсдаг биеийн болон сэтгэлийн бүх уруу таталтыг туулж, ялан дийлсэн юм. Тиймээс ялалтад маань хэрэгтэй нигүүлслийг өгөх чадал Түүнд бий (Еврей 4:14-16).

2. Чөтгөрийн худал үгэнд итгэхгүй байх (Иохан 8:44). Чөтгөр итгэгчдэд хандан, “Есүс та нарыг анхаардаггүй. Хэрэв анхаардаг байсан бол ийм хэцүү байгаа ийм бэлгийн дур хүслийг зайлуулж өгөх байсан” гэх мэтээр хэлж болно (1 Петр 5:7-8). Түүнчлэн бэлгийн дур хүсэлтэй учраас нүгэлтэй гэж буруутгаж ч мэднэ (Илчлэл 12:10).

3. Есүс дээр анхаарлаа төвлөрүүлж, Түүний хэн болохыг магтан алдаршуулах (Дуулал 105:3-4). Чөтгөр ийм уруу таталтаар дамжуулан итгэгч хүний итгэл, Бурхантай харилцах харилцааг устгахыг хүсдэг (Иохан 10:10). Харин Есүс сорилтоор дамжуулан хүний итгэлийг хүчирхэгжүүлж, Өөрийг нь улам алдаршуулах боломжийг өгөхийг зорьдог (1 Петр 1:5-9). Есүсийг мөргөн хүндлэхэд анхаарлаа төвлөрүүлбэл Тэр хамт байж, тусална (Дуулал 46:1).

4. Бурханы Үгийг тунгаан бодох (Дуулал 119:9). Үгийг унших, сонсох, тунгаах нь уруу таталтын үед ялалт байгуулахад тусална. Есүс соригдох үедээ Бичвэрийг ашиглан, ялан дийлсэн юм (Матай 4-р бүлэг). Бид ч бас тэгэх ёстой.

5. Төлөвшсөн, бурханлаг нэг юмуу хэд хэдэн хүнтэй холбоотой байх (Галат 6:2). Илүү удаан хугацаанд итгэлийн замыг туулсан, ижил хүйсний хүнтэй нээлттэй, бүх үнэнээ хэлж ярилцах нь маш их тустай. Тэд хамтдаа залбирч, зөвлөгөө өгч чадна. Өөрийнхөө зовлон бэрхшээл, тэмцлийн талаар итгэмжтэй хүмүүстэй ярилцах нь ариун байдлаа хадгалах болон итгэлээр урамшихад тусална.

6. Бусдад үйлчилж, бусдын хэрэгцээнд санаа тавих (Филиппой 2:3-5). Бусдад үйлчилснээр өөрийнхөө хэрэгцээ хүслийг хэт анхаарахаас зайлсхийж чадна.

7. Бурханы товлосон цаг ирэхэд бурханлаг хүнтэй гэрлэх (Сургаалт үгс 5:15, 18-19).

Залуус гэрлэхээсээ өмнө маш хүчтэй уруу таталттай учирдаг. Ийм үед ирээдүйн амьдралын хань нь үнэнч хүн байх ёстой гэдгийг санах нь чухал.[1] Тиймээс гэрлэх бодолгүйгээр богино хугацааны харилцаа хүсдэг хүнтэй үерхэж болохгүй. Түүнчлэн тууштай итгэдэггүй хүнтэй үерхэх хэрэггүй (1 Коринт 7:39). Зөвхөн гэр бүлдээ үнэнч байж, сайн эцэг эх болж чадах хүнтэй үерхэх ёстой.

Сайн гэр бүлтэй болохыг хүсэж байгаа бол өөрөө итгэмжтэй, амлалтдаа үнэнч дагалдагч байх хэрэгтэй. Тэгвэл зөв хүнийг өөртөө татаж чадна (Сургаалт үгс 3:4-8). Сайн зан чанар, зохистой даруу хувцаслалтаараа хүн өөрийгөө харуулдаг (1 Тимот 2:9-10). Эсрэг хүйстэнтэйгээ болгоомжгүй, хэт дотно маягаар харилцдаг хүмүүс буруу хүслийн үндсэн дээр харилцаанд ороход бэлэн мэт ойлголт төрүүлдэг (1 Тесалоник 4:1-7). Иймэрхүү маягаар хувцаслаж явбал буруу төрлийн хүмүүсийг л өөртөө татах нь мэдээж (Сургаалт үгс 7).

Бурхан залуу хүмүүст биеэ авч явах байдал, хувцаслалт, харилцааны зөв сонголт хийх талаар зааж өгөх эцэг эх, пастор, христэд итгэгч удирдагчдыг өгсөн байдаг. Залуус эдгээр хүмүүстээ захирагдан дагаснаар Бурханд дуулгавартай байж чадах бөгөөд Бурханаас агуу ивээл, хамгаалалтыг авч, хор хөнөөл, уруу таталтаас хамгаалагдана.

► Нэг суралцагч 1 Петр 5:5 болон Еврей 13:17 эшлэлийг бүлэгт уншина.

Эцэг эх, сүнслэг удирдагчдынхаа мэргэн ухаан, удирдамжийг дагах нь хүүхэд залуусын үүрэг. Харин эдгээр удирдагчид уруу таталтыг ялан дийлэхэд нь залууст туслах үүрэгтэй.

► Нэг суралцагч Ром 13:14 мөн 1 Коринт 10:13 эшлэлийг бүлэгт уншина.

Хэрэв хүн өөрөө хүсээгүй л бол, Бурхан түүнийг эсэргүүцэж, зугтаж чадахааргүй тийм бэрх уруу таталттай нөхцөл байдалд оруулдаггүй. Залуу хүн уруу таталтаас өөрөө зайлсхийх үүрэгтэй (2 Тимот 2:22). Түүнчлэн эцэг эхчүүд хүүхдээ аль болох шаардлагагүй уруу таталтаас хамгаалж байх ёстой юм. Энэ тухайд эцэг эхчүүд хамгийн багадаа гурван зүйлийг хийж болно.

(1) Онцгой зааварчилгаа өгөх. Юу хийж болох, юу хийж болохгүй, хэнтэй байх, хаашаа явах талаар зааж өгөх ёстой (Ефес 6:1-4).

Хүүхдүүд өөрсдийгөө уруу таталтаас хангалттай хамгаалж чадах нас, төлөвшилд хүрээгүй байдаг учраас эцэг эхчүүд нь тэднийг тийм байдалд оруулж болох нөхцлөөс хамгаалах ёстой. Жишээ нь, залуу хүү охин хоёр хүнгүй газар хоёулхнаа байвал буруу юм хийх уруу таталтад орж болзошгүй юм.

(2) Залуусын уруу татагдаж болох асуудлуудыг байнга анхаарч, хяналттай байлгах.

(3) Залууст Библийн дагуу зөвлөх.

Эцэг эхчүүд хүүхдүүдээ аливаа зүйлийг Библийн зарчмын дагуу боддог бодол санаатай болгон хүмүүжүүлэх ёстой (Сургаалт үгс 4:1-9, Сургаалт үгс 7:1, 4-5). Тиймээс харагдаж буй аюулын талаар ярилцах нь зүйтэй юм. Ирээдүйд хийх олон сонголтуудаа хэрхэн зөв хийх талаар бодож тунгаахад нь тусалж болно. Уруу таталтаас урьдчилан зайлсхийх, уруу таталттай тулгарсан бол яах ёстой талаар эцэг эхчүүд зааж өгөх ёстой.

Чуулган Библийн ёс суртахууныг хамгаалж, нийгмийнхээ соёлоос ялгарч байх ёстой. Бэлгийн харилцааны нүглийг олон соёлд ноцтой зүйл гэж үздэггүй учраас гэрлээгүй залуусыг гэрлэхээсээ өмнө бэлгийн харилцаанд орохыг хэвийн зүйл гэж үздэг байна. Харин чуулган нүгэлтэй эвлэрч болохгүй. Яагаад гэвэл ёс бус явдалтай хүмүүс Христийн хаанчлалыг өвлөхгүй гэж Бурхан хэлсэн шүү дээ.

► Суралцагчид Ефес 5:3-7 мөн Еврей 13:4 эшлэлийг бүлэгт уншина.

Гэрлэхээс өмнөх үе бол бэлгийн харилцааг эхлүүлэх цаг биш. Харин хосууд сүнслэг болон Библийн зарчмуудын хувьд адил төстэй бодол санаатай байгаа эсэхээ шалгах үе юм. Энэ үедээ тэд бие биеэ илүү сайн таньж, итгэлцлээ хөгжүүлэн насан туршийн амлалт өгөхдөө бэлдэж, хөгжих хугацаа билээ. Хэрэв тэд бие биенийхээ зан чанарт итгэж чадахгүй бол харилцаагаа дуусгаж, гэрлэхээ больсон нь дээр.

Зарим газар хуримыг маш тансаг, өндөр зардалтай ёслол байх ёстой гэж үздэг. Тиймээс хүмүүс хуримаа хойшлуулж, харин хосууд гэрлэхээсээ өмнө хамт амьдарч хүүхэдтэй болсон байдаг. Зарим хосууд бүх мөнгөө хуримлах ёслолдоо зарцуулж, бүр зээл авдаг учраас хуримын зардлаа төлөх гэж олон жил өртэй зовдог. Харин чуулган бол үүнээс өөр хэв маягийг харуулах ёстой итгэлийн хамт олон юм. Христэд итгэгчдийн хурим бол бие биедээ болон Бурханд үнэнч байхаа амлах амлалт учраас өндөр зардлаас болж гэрлэлтээ хойшлуулах, эсвэл хосын ирээдүйд хүндрэл учруулах санхүүгийн дарамтыг бий болгох ёсгүй.

► Нийгэм дэх гэрлэлтийн ёс заншлаас христитгэлийн гэрлэлт юугаараа ялгарах вэ?

Гэрлэлт бол ихэнх хүний хувьд Бурханы төлөвлөгөө юм. Гэхдээ гэрлэхгүй байж болох шалтгааныг элч Паул хэлсэн. Тэрээр 1 Коринт 7:26-д “өнөөгийн зовлон гачаал”-ын учир хэмээн хавчлага гэх мэт амьдралын хүнд нөхцөл байдлын талаар дурдсан байдаг. Хүн тиймэрхүү нөхцөлд байгаа бол гэрлэхгүй байсан нь дээр гэж Паул хэлсэн юм.

Яг тухайн бүлэгт (1 Коринт 7:32-35) гэрлээгүй хүнд давуу тал байгаа талаар мөн өгүүлжээ. Гэрлээгүй хүн ханьдаа санаа зовно гэх зүйлгүйгээр Бурханы үйлчлэлд төвлөрч чадна. Хэрэв Бурхан хэн нэгнийг гэрлэхгүйгээр үйлчлэхийг дуудсан бол тэр хүн үйлчлэлдээ төвлөрөх хэрэгтэй. Тэгвэл гайхалтай үр дүн, ерөөлийг авчирна.

Зарим хүнийг Бурхан гэрлэхгүйгээр үлдээдэг өөр шалтгаанууд ч байж болно (Матай 19:10-12). Үүнийг жам ёсны эсрэг зүйл гэж бодож болохгүй. Түүнчлэн гэрлээгүй хүн бүрийг хэн нэгэнтэй заавал тааруулах ёстой гэж бодох хэрэггүй. Бид аз жаргал, бүрэн дүүрэн байдал зөвхөн гэрлэлтээр ирдэг гэж бодож болохгүй юм (Дуулал 107:9).

Харин гэрлээгүй хүн сэтгэл зүйн болон махбодын хэрэгцээнээс болоод буруу юм хийхээс болгоомжлох ёстой. Бурхан Өөрт нь бүрэн сэтгэлээ зориулсан хүнд баяр хөөр, сэтгэл ханамжийг өгдөг.

► Хамтдаа 1 Петр 3:1-7 мөн Ефес 5:22-33 эшлэлийг уншина. Эдгээр эшлэлийг хэлэлцүүлгийн үеэр дахин харж, судлах учраас нээлттэй байлгаарай.

Христ чуулганыг хайрладаг шиг нөхөр нь эхнэрээ хайрлах ёстой. Есүс өөрийгөө чуулганы төлөө золиосолсон. Түүнчлэн нөхөр нь өөрийнхөө ашиг сонирхол, тав тух, хүсэл эрмэлзлийг эхнэрийнхээ төлөө золиослох ёстой юм. 1 Петр 3:7-д эр хүн эхнэртэйгээ ойлголцож амьдрах ёстой гэсэн байна. Энэ бол эхнэрээ ойлгохын төлөө чадах бүхнээ хийх ёстой гэсэн үг. Харин эхнэрт чинь ямар хэрэгцээ байгааг ойлгохын тулд эхнэрээ сайтар танин мэдэх ёстой.

Энэ эшлэлд эмэгтэй хүнийг “эмзэг сав мэт” гэж хэлжээ. Эхнэр хүнд нөхрийн халамж хэрэгтэй байдаг. Тиймээс нөхөр нь эхнэрээ махбодын болон сэтгэл санааны стрессээс хамгаалах учиртай.

Эхнэр хүн нөхөртөө захирагдаж, нөхрөө хүндэтгэх ёстой. Нөхөр нь итгэгч мөн ч бай, биш ч бай, Христэд итгэгч эхнэр хүн нөхрийнхөө удирдлагыг хүлээн зөвшөөрөх ёстой. Хэрэв эхнэр нь иймэрхүү байдлаар биеэ авч явбал үл итгэгч нөхөр нь итгэгч болох магадлал нэмэгддэг.

Эдгээр эшлэлд байгаа тушаалууд яг юу гэж хэлээд байгааг сайтар анхаарах нь чухал. Нөхөр хүн эхнэртээ эрх мэдлээ хүчээр тулгаж хэрэгжүүл гэж хэлээгүй байна. Эхнэр хүн нөхөртөө захирагдах ёстой гэж хэлэхдээ нөхөр нь эхнэрээ хүчээр дуулгавартай байлга гэж хэлээгүй. Харин нөхөр нь эхнэрээ хайрлаж, эхнэрийнхээ хэрэгцээний төлөө өөрийгөө зориулах ёстой гэж зааж байна. Үүнчлэн эхнэр хүн ч нөхрөөсөө халамж нэхэж шаардах ёстой гэж хэлээгүй, харин нөхрөө хүндэтгэх ёстой хэмээн заасан байна.

Нөхрийн гол анхаарах зүйл бол эрх мэдлээ хангахад биш, харин хайраар халамжлахад оршино. Эхнэрийн эрхэмлэн анхаарах зүйл нь өөртөө халамж анхаарал нэхэхэд бус харин нөхрөө хүндэтгэхэд оршино.

Хэрэв итгэгч хүн эхнэрээ зохих ёсоор халамжлахгүй бол залбиралд нь саад учирна гэж элч Иохан анхааруулжээ. Энэ бол ханьтайгаа хэрхэн харилцаж байгаа нь Бурхантай харилцах харилцаанд нөлөөлнө гэсэн үг.

Элч Иохан бас “хэрэв хүн ахан дүүсээ хайрлахгүй бол Бурханыг ч бас хайрлахгүй” гэж хэлсэн (1 Иохан 4:20). Үүнчлэн Паул, Петрийн захидлуудад ч нөхөр нь эхнэрээ анхаарч халамжилдаггүй бол Бурханыг зохих ёсоор хайрлаж чадахгүй гэсэн байна. Нөхрөө хүндэтгэдэггүй эхнэр ч бас Бурханыг хүндэтгэж чадахгүй гэсэн үг.

► Нэг суралцагч 1 Коринт 7:1-5 эшлэлийг бүлэгт уншина.

Эдгээр эшлэлд гэрлэлтийн бас нэг өөр зорилго нь бэлгийн дур хүслийг хангах явдал гэжээ. Энэ бол нөхөр эхнэр хоёр бие биедээ өөрийгөө зориулж, өөрийн биеийг мэдэх эрх мэдлээ нөгөөдөө тавьж өгнө гэсэн утгатай. Өөрөөр хэлбэл гэрлэсэн хүн зөвхөн өөрийнхөө хүссэн үед бэлгийн харилцаанд орохыг зөвшөөрнө гэсэн үг биш, харин ханийнхаа хүслийг харгалзан үзнэ гэсэн үг. Гэхдээ нэг нь нөгөөдөө хүсэл таашаалаа тулгаж болно гэж хэлээгүй. Харин нэг нь нөгөөгийнхөө хэрэгцээнд анхаарал хандуулах ёстой гэжээ.

Эдгээр эшлэлд гэрлэсэн хүмүүс энэхүү онцгой эрхээ эдлэх гэсэн ханиа хясаж болохгүй гэж байна. Мацаг барих үед түр хугацаагаар бэлгийн харилцаанаас татгалзаж болох боловч, урт хугацаагаар тусдаа байх нь хүслээ хангах гэсэн сорилтод унагаж болзошгүй. Заримдаа хосууд хол газар ажиллах эсвэл сурах зорилгоор олон сараар хол байхаар шийддэг. Иймэрхүү шийдвэр гаргахаасаа өмнө энэ нь Бурханы төлөвлөгөөнд нийцэх эсэхийг эхлээд бодолцох ёстой. Удаан хугацаанд хол байснаас янз бүрийн асуудал үүсэж болох юм.

Нэг нэгэндээ санаа тавьдаг гэр бүлийг бий болгох нь гэрлэлтийн бас нэг зорилго юм.

► Нэг суралцагч 1 Тимот 5:8 эшлэлийг бүлэгт уншина.

Чуулганы гишүүд бие биедээ санаа тавих үүрэг хариуцлагын талаар эдгээр эшлэлд өгүүлсэн. Хүн гэр бүлийнхээ өмнө хамгийн түрүүнд хариуцлага хүлээдэг. Эцэг эх нь хүүхдийнхээ хэрэгцээг хангаж, орон байр, хоол хүнс, боловсролоор хангах ёстой. Эцэг эхчүүд энэ үүргээ нөгөөдөө даатгах бус, харин биелүүлэхийн тулд чадлаараа хичээх учиртай.

Энэ хичээлийн сэдвүүдийг нэлээд удаан хэлэлцэх шаардлага гардаг.

Суралцагчид өөрсдийнхөө нөхцөл байдалд Библийн зарчмуудыг хэрэгжүүлэхийг хичээх ёстой.

► Гэрлэлтийн талаар хүмүүсийн мартаад байдаг үнэн юу вэ?

► Энэ ертөнцийн уруу таталттай тулгарч буй залууст чуулган хэрхэн тусалж чадах вэ?

► Ням гарагийн хүүхдийн цуглаанаас гадна хүүхдүүдийг Христийн дагалдагч болгоход сургах амаргүй ажилд чуулганы хүмүүс хэрхэн хамтран ажиллаж, тусалж болох вэ?

Тэнгэрлэг Эцэг минь,

Гэрлэлт гэдэг гайхалтай харилцааг бүтээсэн Танд баярлалаа. Амьдралынхаа үе шат бүрд Таны өмнө итгэмжит байхад минь туслаач. Итгэгч хүний үнэнч байдлын сайн үлгэр дуурайл болоход минь туслаач. Бусдад ч Таны хүслийг дагахад нь би тусалмаар байна.

Гэр бүлүүд, залуус, хүүхдүүдийг хүчтэй итгэлтэй, дуулгавартай байхад нь туслахын төлөө чуулганыхаа хүмүүстэй хамтран ажиллахад минь туслаач.

Таны ерөөсөн харилцаанд байх боломжтой байгаагийн төлөө Танд талархья.

Амен

(1) Хэрэв та гэрлээгүй бол гэрлэхийн өмнөх харилцаа болон ирээдүйн гэрлэлтийнхээ тал дээр Бурханы зарчмуудыг дагахаа амлаж, хоёр догол мөрөнд багтаан бич. Хэрэв та гэрлэсэн бол гэрлэлтийн талаарх Бурханы зарчмуудыг дагах шийдвэрээ хоёр догол мөрөнд бичнэ үү.

(2) Энэ хичээлийн сэдвүүдээс нэг юмуу хэд хэдэн сэдвийг сонгож аваад, танай нийгэмд хүн Библийн зарчмуудыг хэрхэн хэрэгжүүлж болох талаар нэг хуудас тайлбарлан бичээрэй.

Жишээлбэл:

• Гэрлэхээр бэлтгэж байгаа итгэгч эрэгтэй эмэгтэй хоёрын дунд ямар харилцаа байх ёстой талаар тайлбарлах,

• Танай нийгэмд гэр бүлийн харилцаандаа үнэнч байхыг хүсдэг хүмүүс биеэ хэрхэн авч явдгийг тайлбарлан бичих гэх мэт.