Энэ хичээлийн төгсгөлд суралцагч дараах ойлголт, чадварт суралцсан байна:

(1) Библид өгүүлдэг ‘ертөнц’ гэдэг нь ямар утга учиртай болохыг ойлгох.

(2) Хүний амьдралд нөлөөлдөг ‘ертөнцийн’ үнэт зүйлсийг таньж ялгах.

(3) Итгэгч хүний бодол нь үл итгэгч хүнийхээс яагаад, мөн хэрхэн өөр байх ёстойг тодорхойлох.

(4) Итгэгч хүн үнэнч байдлаар амьдрах нь юу гэсэн утгатайг тайлбарлах.

(5) Амьдралын нарийн ширийн бүх хэсэгт христитгэлийн үнэн хэрэгжих ёстойг олж харах.

Иохан Хрисостом (НТ 370-аад он)[1] нь бурханлаг пастор байсан бөгөөд хүчирхэг номлол, илтгэх чадвараараа “алтан амт” хэмээн олны дунд алдаршжээ. Тэрээр эгэл ардын дунд хайрлагдсан, Зүүн Ромын Эзэнт гүрний хамгийн алдартай номлогч байв. 398 онд тэр нийслэл хот Константинопольд (одоогийн Истанбул, Турк) ирснээр 100’000 гаруй гишүүн чуулгантай үндэсний чуулганы удирдагч пастораар үйлчлэх болжээ.

Иохан бусдыг ялгаварладаггүй зан байдлаараа танигдсан нэгэн байлаа. Тэр ажлын өрөөгөө хотын нийт хүн амын төлөө үйлчилдэг газар болгосон юм. Тэр зөвхөн чинээлэг иргэдийн төлөө биш, ядуусыг хооллох, эмнэлэг байгуулах, бэлэвсэн эмэгтэйчүүдийг тэтгэх зэргээр үйлчилсэн. Тэр мөн авилгад автсан Бага Азийн пастор харгалзагчидтай нүүр тулж, тэдний ёс суртахуунгүй байдал, мөнгө санхүүг буруу захиран зарцуулж буй байдлын эсрэг тууштай номлож байв. Иохан Константинополь хотын язгууртнууд театрт ихээр очих болсныг сүйрэл хэмээн сэрэмжлүүлсэн. Театрт очих нь үхлийн вирусыг дэгдээх мэт хэмээн тэр харьцуулсан байдаг. Иохан хэлэхдээ,

Хэрэв чи театрт толгойгоо задгайлж, алтаар чимэглэсэн хувцас өмсөж, уян зөөлөн байдлаа гайхуулсан ичгүүргүй эмэгтэй тайзан дээр зоримог алхлан гарч ирээд, ёс суртахуунгүй дуу дуулахыг, хөлөө шидлэн гунхан бүжиж, ичгүүр сонжуургүй зүйлийг яривал… хүнд тохиолддог л зүйлээс өөр юу ч тэнд болоогүй гэж хэлэх үү?… Театрын хөшиг хаагдаж, хүмүүс гэртээ харьсны дараа тэдгээр дүр төрх чиний сэтгэлд амилж, тэдний алхаа, үг яриа, харц, байр байдал, эрээ цээргүй хөдөлгөөн нь харагдсаар байх болно... чи тэндээс мянга мянган шархыг тээгээд гэртээ харина. Гэхдээ чи ганцаараа харихгүй. Янхан ил биш, үл үзэгдэх байдлаар чамтай хамт явна… ингэхдээ тэр чиний зүр сэтгэлд, мөс чанарт, чиний дотор Вавилоны зуухыг асаадаг… тэнд чиний гэр бүлийн амар амгалан, зүрх сэтгэлийн цэвэр ариун байдал, гэрлэлтийн аз жаргал чинь шатах болно!

Баян чинээлэг хотын иргэдэд Иохан сэрэмжлүүлж хэлэхдээ,

Та нарын шүүгээ дүүрэн хувцастай ч, Бурханы дүр төрхөөр бүтээгдсэн бидэнтэй адил хүмүүс гудманд нүцгэн зогсож, хүйтэнд дагжин чичирч зогсохыг зөвшөөрч байгаа нь мунхаглал, олон нийтийн солиорол юм… Чи тарган цатгалан, үдэш бүр сархад зооглон, дулаан хөнжил, зөөлөн орон дээр унтдаг. Та нар Бурханы бэлгүүдийг буруугаар ашигласныхаа хариуг хүртэнэ гэдгээ бодох болоогүй юу… Учир нь бид цуглуулсан байж болох ч, бидний мөнгө Эзэнийх юм. Тийм ч учраас танд ихийг байлгахыг Эзэн зөвшөөрчээ. Гэхдээ энэ бүхнийг та үрэхийн тулд биш, харин хэрэгцээтэй хүмүүст тараан өгөхийн тулд байгаа биш үү.

Иохан Хрисостом эцэстээ Хар тэнгисийн зүүн эрэг рүү хөөгдөж, улмаар замдаа насан эцэслэжээ (НТ 407). Амьсгал хураахын өмнөх түүний сүүлчийн үг нь “Бүх зүйлийн төлөө Бурханд алдар нь байх болтугай, Aмен” гэжээ.

Иохан 17-р бүлэг нь цовдлогдохынхоо өмнөхөн залбирсан Есүсийн залбирал юм. Энэ залбирал нь Түүний дагалдагчиддаа санаа тавьсан, агуу хайрынх нь илэрхийлэл байлаа. Тэрээр мөн элч нарын мэдээ сургаалыг хүлээн авах итгэгчдийн төлөө ч залбирсан (20-р эшлэл) бөгөөд үүнд өнөөгийн итгэгчид ч хамаатай.

► Нэг суралцагч Иохан 17:14-18 эшлэлийг бүлэгт уншина.

Есүс өөрийгөө энэ ертөнцийнх биш гэж хэлсэн нь ямар утга учиртай вэ? Тэр Бурханы Хүү байсан бөгөөд тэнгэрээс газарт ирснийг, анхнаасаа энэ дэлхийнх биш байсныг бид мэддэг. Гэсэн хэдий ч, Тэр өөрийгөө энэ ертөнцийнх биш гэж хэлэхдээ энэ дэлхийн гадна хаа нэгтээгээс ирсэн тухай хэлээгүй. Дагалдагч нарыг ч мөн адил энэ ертөнцийнх биш гэж хэлсэн юм. Харин Тэр газар дэлхий дээр, хүмүүн эцэг эхээс төрж, улс орныхоо иргэн болон өсөж хүмүүжсэн эрчүүдэд хандан үүнийг хэлж байна.

Тэгвэл дагалдагчид нь энэ ертөнцийнх биш гэж хэлсэн нь Есүсийн хувьд ямар утга учиртай вэ? Ертөнцийн талаар Библи юу өгүүлдгийг бид ойлгох хэрэгтэй.

► Нэг суралцагч Ефес 2:1-3 эшлэлийг бүлэгт уншина.

Эдгээр эшлэл ертөнцийнх шиг амьдрах нь Сатаны удирдамжийг даган амьдрахтай адил гэдгийг бидэнд харуулдаг. Түүнчлэн ертөнцийн хүмүүс нүгэлт хүслээ дагадаг бөгөөд Бурханы уур хилэнг хүртэнэ гэдгийг бид мэддэг. Итгэгч хүмүүс шинэ амьдралыг хүлээн авдаг бөгөөд цаашид ертөнцийнхөн шиг амьдрахгүй.

► Нэг суралцагч 1 Иохан 2:15-17 эшлэлийг бүлэгт уншина.

1 Иохан захидалд ертөнцийг бузар тогтолцоо гэж хэлсэн. Түүнийг болон түүнд байгаа зүйлсийг хайрлаж болохгүй гэж хэлсэн байна. Буруу хүсэл болон сэдлүүд нь ертөнцийн хувьд ердийн зүйл юм. Нүгэлт хүслийг ертөнцийн хүсэл тачаал гэж энд хэлсэн.

Сатаныг ертөнцийн захирагч (Иохан 16:11) гэж нэрлэдэг. Энэ нь яг үнэндээ ертөнц түүний мэдлийнх гэсэн үг биш юм. Тэр Бурханд тэрслэгчдийн удирдагч бөгөөд ертөнцийн хүмүүс түүнийг дагадаг. Тэр аль хэдийн яллагдсан бөгөөд түүнийг тууштай дагадаг хүмүүс ч мөн яллагдах болно.

Ертөнцийн найз байснаар Бурханы дайсан болдог (Иаков 4:4).

Ертөнц нь Бурханаас тусгаарлагдан унасан, нийтлэг зүйлээрээ нэгдсэн, сая сая хүмүүсээс бүрддэг. Нэгд, тэдэнд буруу хүсэл сэдэл байдаг. Тэд орчлон ертөнцийг Бүтээгчээс илүүтэй ертөнцийн зүйлсийг хайрладаг. 1 Иохан 2:15-16 эшлэлд “Ертөнц... бүү дурла… Учир нь ертөнцөд байгаа бүхэн тухайлбал, махбодын хүсэл тачаал, нүдний хүсэл тачаал, амьдралын бардамнал нь Эцэгээс бус, харин энэ ертөнцөөс ирдэг юм” гэжээ.

Хоёрд, тэдний буруу хүсэл сэдэл нь буруу үйлдэлд хөтөлдөг. Энэхүү амьдралын хэв маяг нь шударга ёс, өршөөл энэрлийг гаргуунд гаргаж, өөрийгөө сэтгэл хангалуун байлгахад төвлөрдөг (Амос 5:11-15; 21-24). Тэд хүсдэг зүйлээ шаардан, өөрсдийнхөөрөө зөв бурууг тодорхойлж, өөрсдийн замаар явдаг. Хэдийгээр тэдний шашин олон хэлбэртэй ч, ертөнцийн бүх хүн өөрсдийгөө шүтэж (хүний оюуны чадавхи, хүний мэргэн ухаан, хүний хүсэл сонирхол, хүний сайн сайхан, хүний хүч чадал) мөргөлийн төв болгодог (Ром 1:25). Тэд Бурханы эрх мэдэлд дургүйцэж, өөрсдийн хийхээр шийдсэн зүйлээ зөвтгөхийн тулд амьдралын гүн ухаанд итгэдэг. Тэд юу зөв болохыг мэдэж, үүнийг хийхийг эрэлхийлдэггүй. Харин тэд хүссэн зүйлээ хийснийхээ дараа үүнийгээ зөвтгөх арга замыг хайдаг.

Үл итгэгч сэтгэл зүйч, зөвлөгчид гэмшил, Бурханы уучлалгүйгээр хүмүүсийн гэм буруугийн асуудлыг шийдвэрлэх гэж хичээдэг. Ертөнцийн гүн ухаантнууд Бурхангүйгээр амьдралын зорилгыг тодорхойлох гэж оролддог. Ертөнцийн шинжлэх ухаанч хүмүүс Бүтээгчииг үгүйсгээд, бүх зүйлийн үүслийг тайлбарлахаар оролддог. Энэ ертөнцийн улс төрчид, нийгмийн ажилтнууд нүгэл нь бодит асуудал гэдгийг үгүйсгэдэг хэрнээ нүглийн төрөлхийн, сөрөг үр дагавраас урьдчилан сэргийлэх гэж оролддог. Ертөнцийн загвар зохион бүтээгчид мэдрэмжийг шүтэж, анхаарал татахуйц хувцас бүтээхийг л зорьдог. Ертөнцийн зугаацуулагч хүмүүс нүгэл, ёс суртахуун, шашныг онигоо болгон ярьдаг. Ертөнцийн пасторууд нүгэлд хүлцэнгүй ханддаг бурханд итгэх бөгөөд өөрсдийнхөө баян чинээлэг байдал, аз жаргал, өөртөө итгэх байдалд л хамгийн их анхаардаг.

Колоссай 2:8 эшлэл бидэнд энэ ертөнцийн гүн ухаан, мэхлэлд автаж дээрэмдүүлэхгүй байхыг сэрэмжлүүлсэн. Луйварчин худал хуурмаг үзэл санааг зарж, бусдыг дээрэмддэг. Ертөнц хүмүүсийг буруу үзэл санаанд итгүүлснээр, тэдний Бурхантай харилцах харилцаа, сүнслэг ашиг тус, тэнгэрийн улсыг ч дээрэмддэг.

Энэ ертөнцийн гүн ухаан, хянаж жолооддог сэдлүүд нь ертөнцийн хүмүүсийн амьдралын хэв маягаар нь илэрч байдаг. Тэдний үг яриа, хандлага, хувцаслалт, зугаацдаг зүйлс болон үйлдэл нь бүгд зүрхэн дэх нүгэлт байдлыг нь илэрхийлдэг.

Христийг дагадаг хүмүүс нийгмийнхээ ёс суртахууныг дагаж болохгүй. Христийг дагадаг хүмүүс нийгмээсээ өөр байх болно.

Ахуй соёлууд нь ертөнц гэж Библид нэрлэгддэг тогтолцооноос бүрддэг. Хүмүүс олон үеэрээ нэг газар суурьшихдаа соёлыг бүтээдэг. Тэд аюулгүй байдал, эд баялаг, тогтвортой гэр бүл зэрэг сайн зүйлсийг хүсдэг ч, тэдгээрийг Бурханы Үгэнд захирагдах байдлаар биш, харин ертөнцийн гүн ухаанаас хайж, олохыг илүүд үздэг. Тэгэхээр үүнээс харвал, Христийг дагагч хүмүүс өөрийн ахуй соёлыг бүрэн хэмжээнд дагах боломжгүй гэсэн үг юм. Зарим соёлд Библийн зарчмуудын нөлөө их тусгагдсан байдаг ч, аль ч үндэстний соёл бүхэлдээ христитгэлийнх байдаггүй.

► Энэ хүртэл суралцаж байгаа зүйлсэд үндэслэн хэлбэл, Есүсийн дагалдагчид нь ‘ертөнцийнх биш’ гэдэг нь юу гэсэн утгатай вэ?

Итгэгчид нүгэлт хүслүүдээ болон хувийн ашиг сонирхлыг (амбиц) дагадаггүй. Тэд юуны түрүүнд Бурханыг баярлуулахыг хүсдэг. Тэдний хайрлаж, татагддаг зүйлс хэдийн өөрчлөгдсөн бөгөөд үргэлжлүүлэн өөрчлөгдсөөр байна (Филиппой 1:9-11). Бурханы хууль тэдний зүрх сэтгэлд бичигдсэн юм (Иеремиа 31:33). Бурханы тушаалууд нь итгэгчдэд дарамт биш, харин баяр баясгалан байдаг (1 Иохан 5:1-3, Дуулал 19:7-11). Итгэгчдэд мөнхөд байх эрхэмлэх зүйлс бий (Матай 6:33). Тэд зан байдлаараа уруу таталтыг эсэргүүцэж, нүглийг ялах хүсэлтэй гэдгээ харуулдаг.

Өөртэй нь адил зүйлсийг сонирхдоггүй учраас ертөнцийн хүмүүс итгэгчдийг хачин жигтэй гэж боддог (1 Петр 4:4). Сүнслэг байдлаараа өөр хүнийг ертөнц үзэн ядах болно гэж Есүс хэлсэн байдаг (Иохан 17:14). Ертөнц өөрт нь харьяат биш хүмүүст дайсагнадаг. Тэд ойлгодоггүй, зөвт байдалд дургүйцдэг бөгөөд нүгэл нь тэднийг буруутгадаг. Тийм учраас Есүс “Ертөнцөд та нар зовлонтой байна” гэж хэлсэн (Иохан 16:33). Элч Паул “Христ Есүс дотор итгэл сүсгээр амьдрахыг хүсэгч бүх хүн хавчигдах болно” (2 Тимот 3:12) гэж хэлсэн байдаг.

► Нэг суралцагч 2 Коринт 6:14-18 эшлэлийг бүлэгт уншина.

Итгэгч хүн ертөнцөөс ялгаатай, тусгаар байхыг Библи зааж сургадаг. Энэхүү ялгаатай байдал нь хүний хандлагаас эхэлдэг бөгөөд Есүс энэ талаар уулан дээрх сургаалдаа заасан. Тэр итгэгч хүний хандлагыг даруу, нүгэлд харуусдаг, дөлгөөн, зөв шударга, энэрдэг, зүрх сэтгэлийн цэвэр ариун байдал, амар тайван, мөн хавчлага зовлонг тэсвэрлэх хэмээн тодорхойлсон байдаг. Ялгаатай хандлагаас ялгаатай үйлдэл бий болдог. Жишээлбэл, итгэгч хүн буруу зүйл хийхийг шаарддаг түншлэл, хамтын ажиллагаанд оролцож болохгүй. Бурхан ертөнцөөс тусгаар байдаг нэгний Эцэг нь байх болно гэж амласан. Ертөнцийн найз байснаар Бурханы дайсан болдог гэсэн эшлэлийг бид харж байснаа санаж байна уу (Иаков 4:4).

► Нэг суралцагч Матай 5:13-16 эшлэлийг бүлэгт уншина.

Ертөнцөөс тусгаар байна гэдэг нь итгэгч хүн нийгмээс тусгаарлагдаж, өөрийн хамт олныг байгуулах ёстой гэсэн үг биш юм. Есүс өөрийн дагалдагчдыг ертөнцөөс гаргаж авахын төлөө залбираагүй гэдгээ хэлсэн байдаг (Иохан 17:15). Түүнчлэн Тэр өөрийн дагалдагчдыг ертөнцийн гэрэл ба давс гэж хэлсэн юм. Үүгээрээ дагалдагчид нь нийгэм дунд ил, бодитоор байх ёстой гэдгийг Тэр хэлжээ. Итгэгч хүмүүс засаг захиргаа, орон нутгийнхаа ажил хэрэгт оролцох ёстой. Гэхдээ тэдгээр нь буруу зүйл хийхэд хүргэх оролцоо байвал мэдээж оролцох ёсгүй.

Жералд Ситцер эртний христитгэлд энэ нь ямар байдлаар илэрч байсныг тайлбарлахдаа:

2-р зууны үед амьдарч байсан Афины философич Аристидес Христэд итгэгчид бусдаас ялгагдаж байсан олон шинж чанарыг дурдсан байдаг. Итгэгчид үлгэр жишээ (амлалтандаа итгэмжтэй), үнэн зөв, сэтгэл хангалуун, эцэг эхээ хүндэлдэг, хөршөө хайрладаг, цэвэр ариун, хавчлага зовлонг тэсвэрлэдэг, танихгүй хүмүүст энэрэнгүй хандах зэрэг зан чанараараа ялгарч байсныг тэрээр тэмдэглэжээ. Тэд бэлэвсэн эмэгтэйчүүд, өнчин хүүхдүүдийг асран халамжилж, боолууддаа ч ер бусын энэрэнгүй ханддаг байжээ. “Тэдний хайраас болж Христэд итгэхээр ятгагдсан эрэгтэй, эмэгтэй боолууд… Хэрэв тэд итгэгч болвол, тэднийг ямар ч ялгаварлалгүйгээр ахан дүүс гэж үздэг байжээ.”[1]

Жинхэнэ христитгэл нь хүний амьдралаар илэрдэг болохыг Иаков захидал онцолдог. Иаков Бурханы Үгийг сонсоод түүнийг хэрэгжүүлдэггүй хүн өөрийгөө хуурч байна гэж хэлсэн байдаг (Иаков 1:22). Зарим хүн христитгэлийн үнэнийг илүү мэддэг учраас өөрийгөө бусдаас илүү дээр гэж боддог. Тэд үүнийг дуулгавартай дагадаггүй учраас энэ нь үнэн биш юм.

Зарим хүн маш шашинлаг байдаг ч, тэдний шашин нь ямар ч үнэ цэнгүй, хоосон гэж Иаков хэлсэн байдаг. Харин бусдын хэрэгцээнд тусалж, өөрсдийгөө ертөнцөөр бохирдуулахгүй, цэвэр ариун байлгадаг хүмүүс Бурханыг баярлуулдаг (Иаков 1:27).

► Нэг суралцагч Иаков 2:14-26 эшлэлийг бүлэгт уншина.

Зарим хүн аврал нь үйлсээр бус, итгэлээр ирдэг учраас бидний биеэ авч явах байдал хамаагүй гэж боддог. Тэд хандлага, амьдралын хэв маяг нь үл итгэгч хүнийхтэй адил байсан ч хүн авралын итгэлтэй байх боломжтой гэж үздэг. Иаков захидлын эдгээр эшлэл нь яг ийм хүмүүст хандан хэлэгдсэн юм.

Итгэл нь дангаараа хангалтгүй гэж Иаков хэлжээ. Учир нь чөтгөрүүдэд хүртэл зөв итгэл байдаг ч, тэд Бурхантай зөв харилцаанд байдаггүй (эш.19). Бурханд итгэдэг хэрнээ Түүнд захирагддаггүй нэгэн бол сайнмэдээг сонссон ч гэмшдэггүй хүн юм.

21 болон 24-р эшлэлийг зөв тайлбарлах нь чухал. Эдгээр эшлэл Абрахам үйлсээрээ зөтгөгдсөн бөгөөд хүн итгэл ба үйлсийн хамт зөвтгөгддөг гэж хэлдэг. Энэ нь аврал нь зөвхөн нигүүлслээр, үйлсээр бус гэдгийг онцолдог бусад Бичвэртэй зөрчилдсөн мэт санагдаж болох юм (Ефес 2:8-9, Галат 2:16, Ром 3:28). Гэвч Иаков зөвтгөгдөх гэдэг үгээр хүн итгэл ба үйлсээр аврагдсан гэсэн утгаар хэлээгүй, харин хүний авралын итгэлийг үйлс ба итгэл нь харуулдаг гэдгийг хэлсэн. Хүн үйлсээр аврагддаггүй, гэхдээ тэр хүн бурханлаг амьдралаар амьдардаггүй бол түүнд авралын итгэл байхгүй гэсэн санаа. Хүний амьдрал итгэлтэйгээ нийцэхгүй байгаа бол түүний итгэл үхмэл гэж Иаков хэлдэг (эш.26).

Түүнчлэн Иаков нэг модонд хоёр өөр жимс ургадаггүй, нэг булгаас хоёр өөр төрлийн ус гардаггүйтэй адил хүний амнаас нэгэн зэрэг ерөөл, хараал гарах ёсгүй гэж хэлсэн байдаг (Иаков 3:9-12). Хүний биеэ авч явах байдал нь түүний христитгэлтэй тогтмол нийцэж байх учиртай.

Ром 2:21-24 эшлэлд Паул, Бичвэрийг эзэмшсэн атлаа түүнийг дуулгавартай дагадаггүй иудей хүмүүст хандан ярьсан бөгөөд тэд өөрсдийгөө харь хүмүүсээс дээгүүр гэж боддог байжээ. Паул тэднээс “Бүү хулгайл гэж номлоод та хулгайлдаг уу?” гэж асуусан. Түүнчлэн тэрээр “Хуулиар сайрхагч та өөрөө хуулийг зөрчсөнөөрөө Бурханыг гутааж байгаа юм биш үү?” гэжээ. Тэд өөрсдийгөө шашинлаг хүмүүс гэж өргөмжилдөг ч, сайн зан чанаргүй байсан нь харь үндэстнүүд Бурханыг болон Бичвэрийг гутаан доромжлох үг хэлэхэд хүргэжээ.

Хэрэв хүн үнэнч байгаа бол түүний биеэ авч явах байдал нь итгэл үнэмшилтэй нь нийцдэг. Жишээлбэл, шударга хүн шударга байдлыг өөрийн бүх үг яриа, үйлдэлдээ хамтад нь шингээсэн байдаг. Харин өөрийгөө шударга гэж хэлчихээд шударга бус зүйлийг хийдэг хүн үнэнч хүн биш юм.

Үнэнч байдал гэдэг ойлголтыг хүний зан чанарт хамааруулж хэрэглэдэг. Зарим орны хэлэнд энэ нэр томьёог барилгын бүтэц зэрэг бусад зүйлсийг тодорхойлоход ч ашигладаг.

► Барилгын бүтцэд үнэнч байдал гэдэг үгийг ашиглах нь юу гэсэн утгатай вэ?

Барилга бат зогсож байх нь л маш чухал юм. Тэр өөрийн жин болон дотор нь явагдах үйл ажиллагааны ачааллыг даадаг байх ёстой. Хэрэв барилга нурах аваас хүмүүс, эд хөрөнгө хохирч, тухайн барилгын үнэ цэн алдагдана. Барилгын хувьд үнэнч байдал гэдэг нь байгууламжийн бүхий л бүтцэд бат бэх барилгын зарчмууд жигд хэрэгжсэн байхыг хэлдэг.

Түүнчлэн барилга удаан хугацаанд оршин тогтнох нь сайн. Байшин барьсан хүн өөрийнх нь амьдралын туршид энэ нь бат бэх байгаасай гэж хүсдэг. Харин томоохон бизнесийн байгууллага болон засаг захиргааны барилгууд маш их хэмжээний хөрөнгө оруулалтаар баригддаг учраас хэд хэдэн үе дамжин оршин тогтнохыг хүсэж хүлээдэг.

Хэрэв барилгад хазайлт үүсэж, нурах эрсдэл учирвал түүнд үнэнч чанар дутсаныг илтгэнэ. Зарим тохиолдолд газар хөдөлсний дараа барилга босоогоороо үлдсэн ч аюултай байх боломжтой. Тийм барилгын хувьд мөн л үнэнч байдал алдагдсан байдаг.

Чухал барилга барихын өмнө заавал зураг төсөл, нарийвчилсан төлөвлөгөө гаргадаг. Хамгийн чухал нарийн ширийн хэсгүүд нь тухайн барилга хэрхэн бат бэх зогсоход нөлөөлдөг. Барилгын бүх хэсэг хоорондоо холбогдож, нэг нэгнээ дэмжих ёстой.

Барилгачин барих явцдаа төлөвлөгөөг ягштал дагах нь маш чухал байдаг. Хэрэв тэр зардлаа хэмнэхийн тулд бүтцэд зайлшгүй шаардлагатай хэсгийг орхигдуулбал барилга маш аюултай байдалд орно.

► Үнэнч хүн байна гэдэг нь ямар хүнийг хэлэх вэ?

Есүс байшингийн бат бэх чанарын талаар жишээ ашигласан байдаг. Тэрээр Бурханыг сонсоод дуулгавартай дагадаг хүнийг хадан дээр байшингаа барьсан хүнтэй зүйрлэсэн. Салхи шуурга дэгдэхэд ч тэрхүү байшин бат бэх үлддэг. Харин Бурханыг дуулгавартай дагадаггүй хүнийг элсэн дээр байшингаа барьсан хүнтэй зүйрлэжээ (Матай 7:24-27). Зөвхөн үнэнийг сонсож, мэдэх нь хангалтгүй.

► Нэг суралцагч Иаков 1:22-25 эшлэлийг бүлэгт уншина.

Бурханы Үгийг сонсоод хийдэггүй хүмүүс өөрсдийгөө мэхэлж байна гэж Иаков хэлсэн. Тэрээр үүнийг Библийн үнэнийг мэддэг ч, түүгээр тогтмол амьдардаггүй хэрнээ өөрийгөө сайн хүн гэж боддог хүмүүст хандан хэлж байна. Ийм хүмүүст үнэнч чанар байдаггүй.

Бурханы Үгийг уншихдаа толинд өөрийгөө харсан ч, харж байгаа зүйлээсээ болоод өөрчлөгддөггүй хүнтэй адил байж болохгүй гэдгийг Иаков мөн хэлсэн. Бурханы үнэн хувьсган өөрчилдөг. Бурханы Үг рүү ширтэн харахдаа бид өөрсдийн алдаа дутагдлыг олж хардаг бөгөөд Бурханы Сүнс бидний зан чанар, биеэ авч явах байдлыг Түүний үнэнд нийцүүлж өөрчлөхийг Түүнд зөвшөөрөх учиртай.

Үнэнч байдал нь амьдралын хэв маягаар илэрдэг. Итгэгч хүн өөрийнх нь хандлага, үйлдэл нь Бурханы үнэнд нийцэхгүй байгааг ухамсарласан бол өөртөө хэзээ ч сэтгэл ханахгүй.

Үр жимсний шалгуур

Есүс олон хуурамч эш үзүүлэгчид гарч ирнэ гэж хэлсэн. Ийм хүмүүс шашны удирдагчийн байр суурь хүсдэг эсвэл үйлчлэлийг бизнес болгохыг зорьдог ч, тэдэнд Христийн зан чанар байдаггүй. Есүс тийм хүмүүсийг үр жимсээр нь танина гэж хэлсэн (Матай 7:15-18). Үр жимс гэдгээр амжилтыг хэлээгүй. Харин үр жимс нь тухайн модны шинж байдлын төрөлх илрэл юм. Хүний үр жимс гэдгээр түүний дотоод зан чанар илэрч байгаа амьдралыг хэлдэг. Хэрэв хүн Сүнсний үр жимс гаргахгүй (Галат 5:22-23, 1 Коринт 13), эсвэл нүгэлт амьдралаар амьдарч байгаа бол тэр нүгэлт зан чанартай хүн бөгөөд сүнслэг удирдагч биш юм (1 Коринт 6:9-10, 2 Коринт 11:13-15).

Элч Петр итгэгч хүмүүс урьдын хүсэл тачаалдаа захирагдалгүй, харин хийж байгаа бүх зүйлдээ ариун байх ёстой гэж хэлсэн юм (1 Петр 1:14-15).

Сайн үр жимс гаргана гэдэг нь хүн христитгэлийн бүх зарчмуудыг өөрийн зан байдалдаа төгс хэрэгжүүлэх тухай ойлголт биш юм. Бид бүгдээрээ Бурханы үнэнд суралцах үйл явц дунд байсаар байна. Ногооны талбайд ажиллаж буй хүүхэд андуураад өөр ургамлыг сугалж болох юм. Бурхан бидний чин сэтгэлийн алдааг шүүдэггүй. Гэсэн хэдий ч, нигүүлсэл нь хүн нүглээ гэмших боломжийг олгосоор байдаг. Элч Иохан бидэнд хүн үнэний дагуу амьдарч, гэрэл дотор алхаж байхдаа цэвэрлэгддэг хэмээн хэлжээ (1 Иохан 1:7).

Удирдлага дахь үнэнч байдал

Удирдагчид бусад хүний хийх шаардлагагүй тийм шийдвэрүүдийг гаргадаг. Удирдагч хүний хариуцлага ба боломжууд нь соригдох олон боломжуудыг бий болгодог. Удирдагчийн шийдвэр олон хүний амьдралд нөлөөлдөг учраас чухал онцгой байдаг.

Үйлчлэлийн удирдагч хүн Есүсийн үлгэр дуурайлыг дагаж, Бурхан болон хүмүүст үйлчлэхээр дуудагдсанаа санах хэрэгтэй. Түүний зорилго нь бусдаас сайшаал хүртэж, бусдаар үйлчлүүлдэг олны танил хүн болох биш юм.

Хэрэв чуулганд Бурханыг чин сэтгэлээсээ мөргөн хүндэлдэггүй хүмүүс олонх байвал тэд чуулганы хүндэтгэлийн цуглааныг үзүүлбэр төвтэй байлгахыг оролддог. Ийм хүмүүс сүнслэг төвлөрлөөс илүүтэй авьяас чадварыг дээдэлдэг. Тэд жинхэнэ сүнслэг удирдагчдын оронд уран бүтээлчдээр чуулганы хүндэтгэлийн цуглаанаа удирдуулахыг хүсдэг. Тэд мэдрэхүйн үзүүлбэрээс цэнгэл таашаал авдаг. Тэд диско клубт ч тоглоход бэлэн, мөргөл хүндэтгэлийн шалгуур хангахгүй, дахин төрөөгүй хөгжимчдийг ажиллуулахад бэлэн байдаг. Пастор хүн чуулганы мөргөл хүндэтгэлийг хамгаалах үед жинхэнэ мөргөгчид татагдаж, үйлчилж эхэлдэг.[1]

► Хэрэв хэн нэгэн хүн Ням гарагт чуулганд очихдоо, Баасан гарагийн орой нь диско клубт харсан хөгжимчдийг дахин харвал тэр чуулганы талаар юу гэж бодох бол?

Удирдагч хүн өөрийгөө ёс суртахууны нийтлэг дүрэм өөрт нь үйлчлэхгүй гэж бодох уруу таталтад орж болох юм. Зарим пасторууд өөрсдийн ахуй соёлд байдаг ертөнцийн удирдагчидтай адил чуулганыхаа эрэгтэй, эмэгтэй хүмүүстэй буруу харилцаанд ордог. Зарим чуулган пасторуудынхаа байр сууриас болж, тэдний ёс суртахуунгүй үйлдлийг буруугаар хүлцэн тэвчдэг.

Түүнчлэн пастор хүн чуулганыг өөрийн өмч гэж үзэх уруу таталтад орж ч болох юм. Хэрэв тэр ингэж боддог бол ажлаа сайн хийдэг хүмүүсийг бус, зөвхөн өөрийг нь тойрон хүрээлж, өөрт нь үнэнч хүмүүсийг л албан тушаалд томилох болно. Ийм пастор төрөл саднаа илүүд үзэж, өөрийнх нь дараа хэнд чуулганыг өвлүүлэхийг сонгодог. Тэр чуулган дахь өөрийн дэмжигчдийн нүгэл, алдааг халхалж, чуулганы мөнгө санхүү, эд хөрөнгийг өөрийнх мэт захиран зарцуулдаг.

Чуулганы гэрчлэл

Чуулган үнэнч байдлыг шаардахаа болих үедээ завхарч эхэлдэг. Чуулганы гишүүд ертөнцийн хүсэл шуналыг хуваалцахдаа, тэд ертөнцийнхтэй адил удирдагчдыг хүлээн зөвшөөрч байдаг. Тэд шашны удирдагчдынхаа нүгэлд хүлцэнгүй ханддаг. Тэр ч бүү хэл, чин сүсэг бишрэлтэй итгэгчид ч үнэнч байдал болон сайн үр жимсний зайлшгүй шаардлагыг ойлгодоггүй учраас нүгэлт удирдагчдыг дагах боломжтой. Ийм зүйл тохиолдох үед ертөнцийн хүмүүс чуулганд хяналтыг тогтоож, чуулган өөрийн гэрчлэлээ алддаг.

Хуурамч сүнслэг удирдагчид чуулганыг бизнес болгодог хэмээн элч Петр сэрэмжлүүлсэн байдаг (2 Петр 2:3). Чуулган өөрийн нийгэмдээ танигдаж, алдартай болох үед ертөнцийн хүмүүс чуулганд байр суурь олж авахыг сонирхдог. Тэд мөргөл хүндэтгэлийн хэлбэр, шашны удирдлагын арга барилд суралцсан ч, нүглээ гэмшиж, Христийн авралыг хүлээн аваагүй хүмүүс юм. Сайн онол сургаалгүй чуулган ийм хуурамч удирдагчдыг таньж чаддаггүй.[2]

Чуулган өөрийн ялгаатай байдлыг алдах үедээ юу болдгийг Есүс тайлбарлахдаа давсны талаарх жишээг ашиглажээ (Матай 5:13). Давс амтаа алдвал элс, хайрганаас дээрдэх зүйлгүй болдог.

Чуулган нийгэмтэйгээ адил болчихвол нийгмээ өөрчилж чадахгүй.

Чуулган Библийн үнэнийг дагахын оронд ертөнцийн хэв маягт уусвал, ертөнц чуулганыг шоолж тохуурхах болно.

Теологи гэдэг нь Бурхан, хүн төрөлхтөн, нүгэл, Христ, авралын талаарх онол сургаалуудыг багтаасан бидний христитгэлийн тогтолцоо юм. Бурханы талаарх бидний итгэл үнэмшил бусад бүх итгэл үнэмшлийн үндэс суурь болдог.

Бурхан өөрийгөө бидэнд илчилсэн анхны зорилго нь Тэр ямар Бурхан болохоо бидэнд харуулах байв. Бурхан өөрийгөө хамгийн түрүүнд ариун хэмээн тодорхойлсон. Ариун байдал буюу кадош гэсэн еврей үг Хуучин гэрээнд 600 гаруй удаа гардаг. Жишээлбэл, Исаиа Бурханыг дахин давтан “Израилын Ариун Нэгэн...” гэж дуудсан. Бурханы ариун байдал нь мөргөл хүндэтгэлийн гол сэдэв байсан (Дуулал 99:3, 5) бөгөөд Бурханы ард түмэн зөвхөн хүч чадлынх нь төлөө биш, харин ариун байдлынх нь улмаас Түүнийг мөргөн хүндэтгэсэн юм.

Түүнчлэн Бурхан өөрийгөө хайр гэж илчилсэн. Хуучин гэрээнд Бурхан өөрийнхөө талаар Мосе болон Израилд илчилж байгаа олон багц хэсгийн нэг нь Гэтлэл 34:6-7 юм. Энэ хэсэгт Бурхан өөрийнхөө талаар “... өрөвч, нигүүлсэнгүй Бурхан, уурлахдаа удаан, энэрэл хайр ба үнэнээр бялхам билээ. Тэрээр энэрэл хайрыг мянга түмэнд хадгалж, хилэнц, гэмт үйлдэл болон нүглийг уучилдаг. Гэсэн ч Тэр шийтгэлгүй орхихгүй…” хэмээн тодорхойлсон байдаг. Бурханы ариун байдал ба хайрыг хамтад нь сахих нь маш чухал юм. Бурханы мөн чанарыг тодорхойлоход түгээмэл ашиглагддаг нэг нэр томьёо бол “ариун хайр” юм. Бурхан ариун учраас Тэр биднээс ариун байдлыг шаарддаг. Бурхан хайр учраас Тэр биднийг өөр шигээ ариун болгох арга замаар хангаж өгсөн юм.

Хүмүүс эхлээд нигүүлслээр хувьсан өөрчлөгдөхөөс нааш Бурханыг мөргөн хүндэтгэх болон Түүнд үйлчлэх нь зохистой биш гэдгийг Бурханы ариун байдал харуулдаг. Эш үзүүлэгч Исаиа номлож байсан нүгэлтнүүдийнхээ адил нэг зүйлийг өөрөөсөө олж харсан бөгөөд тэр нь түүний цэвэр бус зүрх сэтгэл байв (Исаиа 6:5). “Бузар уруул” гэдгээр цэвэр бус зүрх сэтгэлээс гардаг үг, үйлдлүүдийг илэрхийлдэг. Энэхүү цэвэр бус байдал нь Исаиаг Бурханы оршихуйд байх зохисгүй болгожээ. Исаиа өөрийнхөө нөхцөл байдлыг зөвтгөхийг оролдоогүй бөгөөд Бурхан ч түүнийг зөвтгөсөнгүй. Харин эш үзүүлэгчийнхээ гэмшилд Бурхан нигүүлслээр хариулсан. Энэ нь нүглийг хүлцэн тэвчдэг бус, харин ариусгаж, хувьсган өөрчилдөг нигүүлсэл юм (Исаиа 6:6-7).

Израилын Бурхан хуурамч бурхдаас өөр ялгаатай байсан бөгөөд Тэр өөртөө онцлог ялгаатай мөргөл хүндэтгэлийг шаарддаг байв. Дуулал 24-д ямар хүн Эзэний оршихуйд орох нь зөвшөөрөгдөх талаар Давид дүрсэлсэн байдаг. Бурхан хэнийг мөргөн хүндлэгч хэмээн хүлээн авдаг вэ? “Цэвэр гартай, ариун зүрхтэй…” (Дуулал 24:4) нэгнийг. Хүн бүрийг мөргөн хүндлэгч гэж Бурхан хүлээн зөвшөөрдөггүй. Мөргөн хүндлэгч гэдэг нь зүгээр л гараа өргөж, сэтгэл хөдлөлөө мэдэрдэг хүн биш юм. Нүгэлт хүн энэ шалгуурт тэнцэхгүй.[1]

Бурхан өөрийнхөө ариун байдлыг өөрт нь мөргөн хүндлэгчдээс шаардах ариун байдлын үндэс шалгуур гэж хэлсэн “Та нарын Бурхан ЭЗЭН Би ариун учраас та нар ариун байгтун” (Леви 19:2, Леви 11:44-45, Леви 20:26, Леви 21:8). Бурхан эртний Дорнын бурхад, эсвэл хожуу үеийн Грек, Ромын домогт гардаг бурхадтай адилгүй. Эдгээр домогт тэдний бурхдыг завхарсан, залилж мэхэлдэг, харгис хэрцгий хэмээн тодорхойлсон байдаг. Эдгээр бурхад нь хүний мөн чанарын бүх сул талыг агуулдаг. Хананд буусан сүүдэр шиг тэд хүний дүр төрхийн хэтрүүлж гажуудуулсан тусгал юм. Ийм бурхад ёс суртахууны хэм хэмжээ, зан чанарын шалгуурыг шаардахгүй бөгөөд тэдэнд мөргөгчид нь бузар муу, харгис хэрцгий хүмүүс байдаг.

Харин Израилын Бурхан бол хүний дүр төрхийн тусгал биш юм. Тэр зохиомол биш, харин өөрийгөө хүмүүст илчилсэн Бурхан байв. Тэр өөр бөгөөд тийм ч учраас Түүнд мөргөн хүндлэгчид өөр байх учиртай.

Бурханы хэм хэмжээ Шинэ гэрээнд ахин давтан хэлэгдсэн: “Та нарыг дуудсан Ариун Нэгэний адил өөрсдийн бүх л зан байдалдаа бас ариун байгтун. Яагаад гэвэл “Би ариун учраас та нар ариун байгтун” гэж бичигдсэн юм” (1 Петр 1:15-16). Зан байдал гэдэг үг нь бидний хандлага, үйлдэл, амьдралын бүхий л хэсгийг илэрхийлдэг. Бурхан өөрт нь мөргөн хүндлэгчдийг зөвхөн ёслол төдий ариун байхыг, эсвэл яг үнэн байдал нь тийм биш хэрнээ ариун гэж дуудуулахыг хүсдэггүй. Тэр өөрт нь мөргөн хүндлэгчдийг жинхэнэ ариун амьдралаар амьдрахыг хүсэн хүлээдэг.

Бурханыг бид хэрхэн ойлгодог, мөн Түүнтэй ямар харилцаанд байгааг бидний хандлага, үйлдэл маань харуулдаг. Иудейчүүд Бурханы хууль биднийх хэмээн бардамнахад элч Паул тэдэнд хуулийг зөрчсөнөөрөө Бурханыг гутаан үл хүндэтгэж байна гэж хэлээд, тэдний биеэ авч явах байдлаас болж, хүмүүс тэдний талаар ч, мөн тэдний Бурханы талаар ч муу зүйлийг ярьдаг болсон (Ром 2:23-24) хэмээжээ.

Та ямар Бурханыг төлөөлдөг вэ? Хүмүүс таны Бурханыг ямархуу гэж боддог бол? Хэрэв та Бурхан ариун бөгөөд уучлагч, нигүүлсэнгүй гэдгийг хүмүүс мэдээсэй гэж хүсдэг бол таныг ингэж амьдарч байгааг хүмүүс харах хэрэгтэй юм.

Онол сургаалыг бүрэн хэмжээнд, тогтвортой заадаг пасторууд чуулганд хэрэгтэй байна. Пастор хүн үндсэн онол сургаалыг үл тоомсорлож болохгүй. Үе үеийн бүх хүн, шинээр итгэлд ирж буй хүмүүс тэдгээрийг сонсох шаардлагатай. Үүгээр зогсохгүй, төлөвшсөн итгэгчдэд ч сануулах хэрэгтэй. Пасторын номлол нь зөвхөн сэтгэл хөдөлгөсөн, уур амьсгал бүрдүүлэх зорилготой эрч хүчтэй үзүүлбэр төдий байх ёсгүй. Харин тэр Бурхан хэн болохыг, итгэгч хүний амьдрал Бурханы талаарх Библийн ойлголт, тэдгээрийн бүхий л нарийн ширийн зүйлстэй хэрхэн нийцэх учиртайг зааж, тайлбарлах ёстой юм.

Чуулган нийгэм, ахуй соёлоо хувьсган өөрчлөх учиртай. Харин энэ нь Бурханы талаарх Библийн ойлголт бидний амьдралын бүхий л нарийн ширийн хэсэгт хэрэгжих үед л биеллээ олдог.

► Энэхүү хичээлийн ямар ойлголт таны хувьд шинэ байсан бэ? Итгэлийн амьдралдаа өөрчлөлт авчрах ямар төлөвлөгөө танд байна вэ?

► Танай ахуй соёлд чуулганууд ихэвчлэн тоолгүй өнгөрөөдөг ямар Библийн ойлголт байна вэ? Энэхүү ойлголтыг таньдаг хүндээ та хэрхэн тайлбарлах вэ?

Тэнгэрлэг Эцэг минь,

Таны зан чанартай нийцэх амьдралаар Таныг дээдлэн хүндлэхийг би хүсэж байна. Танд үл захирагдах энэ ертөнцөд би Таныг төлөөлөхийг хүсэж байна.

Миний амьдралыг Таны үнэний дагуу байлгаж соёрхооч. Итгэгч хүний амьдралын хэсэг байх зохисгүй зүйлсийг өөрчлөхөд надад туслаач.

Таны хүчирхэгжүүлэгч Сүнс болон хувьсган өөрчилдөг нигүүлсэлд баярлалаа.

Aмен

(1) Саяхныг хүртэл таны бодол, үйлдэлд нөлөөлж байсан ертөнцийн үнэт зүйлийн талаар нэг догол мөрөнд багтааж бич. Амьдралын энэ хэсэгт хандсан Бичвэрийн 2 эшлэлийг олж, тэмдэглээрэй. Эдгээр Бичвэрийн дагуу хэрхэн амьдарч эхлэх талаараа нэг догол мөрөнд багтаан бич.

(2) Тит 2:11-14 эшлэлийг судал. Энэ багц хэсэгт үндэслэн христитгэлийн үнэнч байдлын талаар товч толилуулга бэлтгэ. Амьдралын бүхий л нарийн ширийн хэсэгт Библийн үнэн яагаад хэрэгжих ёстойг тайлбарлахдаа энэ багц хэсгийг ашигла. Дараагийн хичээл эхлэх үед толилуулгаа хуваалцаарай.