Энэ хичээлийн төгсгөлд суралцагч дараах ойлголт, чадварт суралцсан байна:

(1) Шийдвэр гаргахад маань Бурхан хэрхэн тусалдгийг ойлгох.

(2) Бурханы хүслийг ялган таньж, зөв шийдвэр гаргахад бэлэн байхад суралцах.

(3) Удирдамж хайхдаа гаргадаг алдаанаас зайлсхийх.

2018 оны 9-р сард Индонезийн Палу арлын орчим газар хөдөлж, цунами (асар том давалгаа) Палу хотыг чиглэжээ. Өндөр барилгын орой дээр байсан нэгэн хүн давалгааг хараад доор гудамжинд байгаа хүмүүст сэрэмжлүүлж хашгирсан ч, ихэнх хүмүүс түүнийг үл тоомсорлов. Харамсалтай нь үүний дараа 4,000 хүн нас барж, 10,000 гаруй хүн шархаджээ.

Энэ явдлаас 10 жилийн өмнө (2008 онд) Индонезийн засгийн газар далайд цунами илэрвэл анхааруулах мэдээ илгээх зориулалттай цахилгаан мэдрэгчтэй 22 хөвөгч дохиоллыг байрлуулж байжээ. Гэсэн хэдий ч, ирэх жилүүдэд нь эдгээрийг арчилж засварлаагүйн улмаас бүгд ажиллагаагүй болсон байна. Үүнээс болж 2018 оны цунамигийн талаар ямар ч анхааруулах дохио ирсэнгүй.

► Цэрэг армийн бүх тээврийн хэрэгсэлд байдаг нэг зүйл юу вэ?

Танк, цэргийн машин, онгоц бүрд радио холбоо байрлуулдаг. Энэхүү радио холбоог цэргүүд дуртай хөгжмөө сонсохын тулд биш, харин харилцаа холбооны зориулалтаар ашигладаг.

Дайн тулалдаанд ялалт байгуулахад харилцаа холбоо зайлшгүй шаардлагатай. Фронт дээр тулалдаж буй цэргүүд бүх талбарыг харж чадахгүй. Журмын нөхөд нь хаана явааг, дайсан нь хаана байгааг тэд мэдэхгүй байх боломжтой. Аль зүгт гал нээх, аль зүг рүү давших ёстойг захирагчтай харилцахгүйгээр мэдэж чадахгүй.

Дайны талбарт олон цэргүүд “нөхөрсөг гал”-д буюу өөрсдийн бууны суманд өртөж амь эрсдэх тохиолдол гардаг. Харилцаа холбоо муу байснаас болж, пуужин харвалт болон бөмбөгдөлт байндаа тусалгүй, өөрийн талд хохирол учруулах тохиолдол ч их гардаг байна.

Орчин үеийн тулаанд дайсны харилцаа холбооны гол төвийг устгах нь чухал стратеги юм. Үүнийг амжилттай гүйцэтгэсэн тал ихэнхдээ ялалт байгуулдаг.

Бид ч ялгаагүй сүнслэг тулааны талбарт байна. Чөтгөр биднийг уруу татаж, мэхлэхийг оролддог. Энэ ертөнц биднийг өөрийн үнэт зүйлс, амьдралын хэв маягтаа татдаг. Заримдаа бидний эргэн тойронд буй хүмүүс Бурханы төлөө амьдрахад саад болж, биднийг мохоодог. Бид яг л дайсны газар нутагт цөөн нөхөдтэй, олон дайсантай хамт байгаа цэргүүдтэй адил юм.

Бурхан биднийг энэхүү сүнслэг тулаанд ялаасай гэж хүсдэг. Залбирал нь бидний Захирагчтайгаа харилцах харилцааны хэрэгсэл юм.

Хэрэв тулааны талбарт нэг цэрэг тушаалыг үл тоож, өөрийнхөөрөө явбал юу болох вэ? Тэр сайныг биш, харин хор хөнөөлтэй зүйлийг хийх болно. Түүнд найдаж байсан хүмүүст туслахын оронд эцэст нь олзлогдох, эсвэл алагдах ч боломжтой.

Сүнс дотор цаг үргэлж аливаа залбирал ба гуйлтаа өргө. Үүний тулд хамаг ариун хүмүүсийн төлөө бүхий л цөхрөлтгүй оролдлого, гуйлтаараа сэргэг бай (Ефес 6:18).

Паул итгэгч хүний сүнслэг зэвсгийг тухайн үеийн цэрэг армийн хуяг дуулгатай зүйрлэн тайлбарласан багцлалын төгсгөл хэсэгт энэ эшлэл гардаг. Бидний дайснууд бол бие махбодынх бус, харин сүнслэг дайснууд гэдгийг тэр хэлжээ.

Хэрэв Паулын цаг үед цэргүүд радио холбоо ашигладаг байсан бол тэрээр сүнслэг цэрэг хүний өөр нэг хэрэгсэл болгон ‘залбирал’-ын жишээг татах байсан болов уу. Хуяг дуулгыг тайлбарласны дараа тэрбээр залбирал нь сүнслэг хуяг дуулгатай хамт хэрэглэгдэх ёстой гэдгийг хэлсэн байдаг.

Сүнслэг хорон муугийн эсрэг тулалдахдаа бид залбиралтайгаар, Захирагчтайгаа харилцаатай байх учиртай. Бид тэвчээртэй байж, залбиралд соргог, сэрэмжтэй байхаар дуудагдсан.

Өөрийг нь сонсдог хүмүүсийг удирдан чиглүүлнэ гэдгээ Бурхан амласан.

Бүхий л зүрхээрээ ЭЗЭНд итгэ өөрийнхөө ойлголтод бүү түшиглэ, алхам бүрдээ Түүнийг таньж мэд амьдралын замыг чинь Тэр шулуун болгоно (Сургаалт үгс 3:5-6).

Хүний алхмууд ЭЗЭНээр тогтоогдох агаад замд нь Тэр баярладаг (Дуулал 37:23).

Христийг дагадаг хүн ертөнцийн хүмүүстэй адил шийдвэр гаргадаггүй. Зарим хүн зөвхөн өөрийн ашиг сонирхол, шуналдаа хөтлөгддөг. Ийм хүмүүс “Миний хувьд зөв гэж бодсон зүйлээ л би хийх ёстой” гэж хэлдэг. Энэ нь бусад хүмүүс тэднийг хянахыг зөвшөөрөхгүй, харин өөрийн хүсэл зорилгоо нэгдүгээрт тавих ёстой гэсэн утгатай юм. Тэдний хувьд эрх чөлөө нь өөртөө төвлөрсөн байхыг хэлдэг. Харин Христийг дагагч хүмүүсийн хувьд өөр бөгөөд тэд Бурханыг баярлуулж, амьдралаараа бусдыг ерөөхийг хүсдэг.

Зарим хүн бүх хариултыг өөрийнхөө дотроос хай гэж бидэнд зөвлөдөг. Шийдвэр гаргахад бидний мэдрэмж, инстинкт маань хангалттай удирдамж болно гэж тэд итгэдэг. Түүнчлэн тэд залуу хүмүүсийг уламжлал болон ахмадын зөвлөгөөг хүлээн авалгүй, үл тоомсорлохыг уриалдаг. Шашны ёс суртахууныг ч тэд уландаа гишгэдэг. Ийм төрлийн зөвлөгөө нь орчин цагийн Холливудын зугаа цэнгэлийн соёлд түгээмэл ажиглагддаг. Тэд эрх мэдэл, уламжлалын эсрэг тэрслэн, мөрөөдлөө дагаснаар амжилтанд хүрэх залуу хүний түүхүүдийг онцолдог. Харамсалтай нь ийм шийдвэрүүд гуниг харуусал, сүйрэлд хүргэдэг бодит үнэнийг тэд харуулдаггүй.

Зарим соёлд хувь хүний шийдвэр нь томоохон гэр бүл, овог, төрөл садны хүмүүсээр хязгаарлагддаг. Хувь хүмүүс ажил мэргэжлээ өөрчлөх, өндөр боловсрол эзэмших, гэрлэх болон тухайн бүс нутгийг орхих зэрэг шийдвэрийг бүлгийн зөвшөөрөлгүйгээр гаргах боломжгүй байдаг. Хүн шашнаа солих нь ийм соёлд хамгийн хэцүү сонголт өөрчлөлт байдаг. Энэ соёлд хэрэв хүн Христийн дагалдагч болж, нутгийн хүмүүсийнхээ ойлгохгүй тийм зарчмыг дагаж эхэлбэл, тэр хавчлага зовлон амсах боломжтой. Ийм нөхцөлд байгаа итгэгч хүн мэргэн ухаан болон удирдамжийн төлөө залбирах ёстой.

Бурханы удирдамж бүхий л үед хэрэгтэй бөгөөд бид өөрсдөө үргэлж анзаарч чадахааргүй тийм арга замуудаар Тэр биднийг удирдан чиглүүлдэг. Бид Түүнийг бодохгүй байсан ч, харин Тэр биднийг хэзээ ч мартдаггүй. Гэхдээ заримдаа бидэнд Бурханы удирдамжийг тусгайлан хайх, сонголтоо бодитоор харахад Түүнээс тусламж гуйх хэрэгтэй үе байдаг. Бурхан бидний явах чиглэлийг санамсаргүй байдлаар өөрчлөхийг ч хүсэж болох юм.

► Бурханаас онцгой удирдамж хэрэгтэй болдог ямар үе бидэнд байдаг вэ?

Бид дараах нөхцөлд Бурханаас удирдамж хайх ёстой:

1. Амьдралыг бүхэлд нь өөрчлөх шийдвэр гаргах үедээ: гэрлэлт, ажил мэргэжил, боловсрол, нутгийн чуулганд зориулах шийдвэр.

2. Практик шийдвэр гаргах үедээ: ажиллах боломжууд, хаана амьдрах талаар болон томоохон худалдан авалт хийхдээ.

3. Үйлчлэлээ төлөвлөж, хийх үедээ:[1] хувь хүний дуудлага, хаана хэнтэй хамт үйлчлэх, заах болон номлох сэдвийн талаар.

4. Чуулганы амьдралд оролцох үедээ:[2] хэрхэн мөргөн хүндлэх, юунд суралцах, юуг өргөх, газар дэлхий дээрх Христийн Биеийн нэг хэсэг байх талаар.

(1) Залбирлаар Бурхантай ойр байх (Филиппой 4:6). Хэрэв та амьдралынхаа ихэнх хэсгээс Бурхантай ярих яриаг хасвал, та өөрийн хязгаарлагдмал ойлголт болон хандлагаа л дагаж амьдрах болно.

(2) Бичвэрийн тов тодорхой үнэнээс илүүтэй өөрийн бодол эргэцүүлэлд бүү итгэж найд. Дээрх эшлэлд “Өөрийнхөө ойлголтод бүү түшиглэ” (Сургаалт үгс 3:5) гэж хэлсэн.

(3) Энэ нь Бурханы хүсэл гэж тодорхой мэдэж байгаа зүйлээ үргэлж дуулгавартай дага. Энэ нь таны ойлголтыг сайжруулах болно. Бурханы Үгийг дуулгавартай дагадаггүй хүн Бурханы хүслийг үнэхээр хүсдэггүй. Учир нь Бурхан өөрийн хүслээ Бичвэрээр дамжуулан илэрхийлдэг. Хэрэв та Бурханы хүсэл гэж мэддэг зүйлийнхээ зөвхөн хэсгийг нь дагавал, та улам ихээр будилж эргэлзэхэд хүрнэ. Гэрэл тань харанхуй болж хувирна (Лук 11:35).

Эдгээр нь Бурханы хүсэл гэж бид мэддэг:

• Өдөр бүр загалмайгаа үүрч, Есүсийг дагах (Лук 9:23)

• Зүрх сэтгэлдээ үнэнийг хэлж, зөвийг хийх (Дуулал 15:2)

• Итгэмжит, сүнслэг удирдагчдыг хүндлэх (1 Тесалоник 5:12-13).

• Бүхий л цагт баяр хөөртэй байх (1 Тесалоник 5:16).

• Тасралтгүй залбир (1 Тесалоник 5:17).

• Бүх зүйлд таларх (1 Тесалоник 5:18).

• Сүнсийг бүү бөхөө (1 Тесалоник 5:19).

• Эш үзүүллэгийг бүү басамжил (1 Тесалоник 5:20).

• Бүхнийг шалга (1 Тесалоник 5:21).

• Сайнаас зуур (1 Тесалоник 5:21).

• Ёр муугийн алив хэлбэрийг цээрлэ (1 Тесалоник 5:22).

• Бүрэн ариусгагдсан бай (1 Тесалоник 5:23).

Түүнчлэн олон тушаалуудыг ‘хайр’ гэсэн ганцхан үгэнд багтаан хэлсэн байдаг (Ром 13:8-10). Бурханы хүсэл гэж мэддэг зүйлээ хийж эхлэх үед бидний олон шийдвэр ач холбогдол багатай болох нь тодорхой харагддаг.

(4) Тэвчээртэй бай. Бурхан үүд хаалгыг нээж, таны төлөө нөхцөл байдлыг бэлтгэх хооронд та тэвчих хэрэгтэй байж болох юм. Тэвчээргүйгээсээ болж яаран бүү шийдвэр гарга. “ЭЗЭН дотор дуугүй байж, Түүнийг тэвчээртэйгээр хүлээ” (Дуулал 37:7). Та буруу гэдгийг нь мэдэж байгаа зүйлээ яаралтай санагдсанаас болж хэзээ ч бүү хий.

(5) Сайн зөвлөгөөг сонс. “Дайтваас мэргэн удирдамжийг дага зөвлөхүүд олон аваас ялалт ирнэ” (Сургаалт үгс 24:6). Бурхан таныг амьдралдаа томоохон шийдвэр гаргаасай гэж хүсэхдээ ихэвчлэн таны хувьд чухал хүмүүсээр дамжуулан үүнийг харуулдаг. Хэрэв таныг сайн мэддэг, танд санаа тавьдаг, бурханлаг, ахмад насны хүн таны хийх гэж байгаа зүйлийг алдаа гэж хэлвэл та яаран шийдэж болохгүй.

► Бурханы удирдамжийн дагуу шийдвэр гаргасан нэг жишээг хуваалцана уу. Энэ нь зөв шийдвэр байсан гэдгийг Бурхан танд хэрхэн харуулсан бэ?

► Буруу шийдвэр гаргасан талаарх жишээг ч хуваалцах нь тустай. Бурханы удирдамжийг илүү сайн дагахад туслах 5 зарчмын аль нэгийг нь дагаагүй юу?

Бусдад бас хуваалцах боломж олгоорой.

Чарьлз Столкер гэдэг нэгэн номлогч өөрийн түүхийг хуваалцсан юм. Нэгэн удаа түүнийг өглөө залбирч байхад нь Бурхан “Би чамайг Хятад руу яваасай гэж хүсэж байна” гэж түүнд хэлжээ. Столкерт Хятад руу явах мөнгө, холбоо харилцаа байгаагүй учраас тэр ихэд гайхсан. Гэсэн хэдий ч, тэрхүү сэтгэгдэл маш хүчтэй байсан тул тэр аяллын цүнхээ бэлдээд аяллаа эхлүүлэх буудал руу гарч явжээ. Гэтэл буудалд нэгэн танихгүй хүн түүнд дөхөж ирээд “Та Чарльз Столкер мөн үү?” гэж асуугаад “Таны Хятад руу явах тасалбарыг өгүүлэхээр намайг илгээсэн юм” гэжээ.

► Энэ нь Бурхан бидэнд өөрийн хүслийг харуулдаг ердийн арга зам мөн үү? Хэн нэгэн хүн Бурханы хүслийг үргэлж ийм байдлаар хайх нь асуудалтай юу?

Зарим хүмүүс шийдвэр гаргах бүрдээ ер бусын удирдамж хүсэж хүлээдэг. Тэд ердийн нөхцөл байдал, учир шалтгаанаар тунгааж бодохоос татгалздаг. Учир нь тэд Бурханы хүсэл нь бүх нөхцөл байдал, ухаан бодлын эсрэг байх боломжтой гэж тааварладаг.

Бурхан бидний шийдвэрт ер бусын илчлэл харуулах ёстой гэж шаардах нь буруу юм. Учир нь Тэр өөрийн хүслийг ихэвчлэн ийм байдлаар харуулдаггүй. Хэрэв хүн ухаан бодол болон нөхцөл байдлыг үл тоомсорлоод, өөрийн төсөөлөл, сэтгэл хөдлөлөө дагаж байгаагаа ‘Бурханы удирдамжийг би хүлээн авсан’ гэж бодоход хүрч магадгүй.

Бичвэр бидэнд ямар нэг зүйлийн талаар тушаасан эсвэл хориглосон бол энэ нь Бурханы хүсэл гэж бид мэддэг. Гэсэн хэдий ч, амьдралд тодорхой байдлаар тушаагаагүй, хориглоогүй олон шийдвэрийг бид гаргах хэрэгтэй болдог. Хүн хаана амьдрах, ямар ажил хийх, мөнгө санхүүгээ хэрхэн зарцуулах талаар яаж мэдэх вэ?

► Бичвэрт тодорхой удирдамж өгөөгүй шийдвэр дээр, онцгой илчлэлгүйгээр хүн хэрхэн Бурханы хүслийг мэдэж болох вэ?

Зарим хүмүүс Бурханы хүслийг ухаан бодол, нөхцөл байдлаас ангид байдлаар мэдэх ёстой гэж хүлээдэг учраас Бурхан тэдэнд удирдамжаа ухаан бодол оролцохгүй тийм арга замаар өгнө гэж боддог. Ийм хүмүүсийн хувьд Бурхан өөрийн хүслийг тэдэнд харуулахын тулд ямар нэгэн тэмдэг өгөөсэй гэж асууж магадгүй. Эсвэл Библиэ санамсаргүй байдлаар нээгээд, таарсан дурын нэг эшлэлийг өөрийн нөхцөл байдалд хэрэгжүүлэх ч боломжтой.

Жон Весли Бурханы хүслийг танихад хэрэгтэй практик зааврыг өгсөн байдаг. Тэрээр Библид илчлэгдсэн, Бурханы ерөнхий хүсэл нь бид ариун байж, сайныг үйлдэх хэмээн хэлжээ. Тиймээс бид тодорхой нэг шийдвэр гаргахдаа аль сонголт нь биднийг илүү ариун байхад туслах, мөн аль нь бидний үр нөлөөтэй байдлыг улам их болгох вэ гэдгийг бодолцох ёстой.

Бид туршлагаараа ямар нөхцөл байдал бидний сүнслэг байдалд тустай, ямар нь аюултай гэдгийг сурдаг. Зарим нөхцөл байдал нь хүн бүрийн хувьд аюултай байдаг бол, харин бусад нь зарим хүмүүсийн хувьд аюултай байдаг. Бид аль болох өөрсдийгөө сүнсний хувьд хүчтэй байхад туслах нөхцөл байдалд байлгаж, уруу татах нөхцөл байдлаас зайлсхийх хэрэгтэй (1 Коринт 10:12-13).

Түүнчлэн бид ухаан бодол ба туршлага, мөн бусдын зөвлөгөөгөөр бидний үр нөлөөтэй байдлыг улам их болгох сонголт аль нь болохыг ялган таньж чаддаг.

Бурхан өөрийн хүслийг ердийн үед онцгой илчлэлээр харуулдаггүй. Тэр биднээс нөхцөл байдлыг ажиглаж, анхааралтай бодож цэгнэн, Бичвэрийн зарчмуудыг хэрэгжүүлэхийг хүсдэг. Түүнчлэн биднийг анзаарч мэдээгүй байх үед ч Ариун Сүнс удирдан чиглүүлдэг. Ихэнх шийдвэр дээрээ бид илчлэл хүлээхийн оронд мэргэн ухаан ба ойлголтын төлөө залбирах учиртай.

Бурханаас онцгой удирдамж хүлээн авдаг гэж ярьдаг хүмүүс заримдаа бусдын үгийг сонсохоос татгалздаг (Сургаалт үгс 12:15). Хүмүүс тэдний шийдвэрийн талаар асууж шалгаахад тэд уурлаж магадгүй. Тэд даруу дөлгөөн байдлын оронд бардам, зөрүүд зан гаргадаг.

► Нэг суралцагч 1 Петр 5:5-6 эшлэлийг бүлэгт уншина.

Онцгой тохиолдлоос бусад үед хүн ‘Бурхан надад яг ингэж хийхийг хэлсэн’ гэж хэлэхгүй байсан нь дээр юм. Ингэж хэлсэн хүнд бусад хүн зөвлөх, бодол санал хэлэхэд хэцүү болдог. Харин үүний оронд ‘Бурханы тусламжтайгаар хамгийн сайн шийдвэр гаргахаар хичээж байна’ гэж хэлэх нь илүү дээр.

Веслигийн зарчмуудаас гадна, өөрийн сонголтуудын талаар бодохдоо дараах зүйлсийг анзаараарай:

1. Энэ нь Бичвэрийн тов тодорхой тушаалуудтай нийцэж байна уу? Өөрийнх нь Үгэнд дуулгаваргүй байхыг Бурхан хэзээ ч хүсдэггүй.

2. Энэ нь Бичвэрийн чухалчилдаг зүйлстэй нийцэж байна уу? Бурханы хувьд юу чухал болохыг Библи харуулдаг. Таны шийдвэр чухал зүйлсийг эхэнд тавьж байна уу?

3. Энэ нь нөхцөл байдлыг бодитоор харах байдалтай нийцэж байна уу? Энэхүү шийдвэрийн төлөө Бурхан таныг хэрхэн бэлдэж ирснийг та харж чадах уу?

4. Энэ нь учир шалтгаантай юу? Заримдаа Бурхан ойлгомжгүй мэт санагдах зүйл рүү таныг дагуулж магадгүй. Гэсэн ч энэ тохиолдолд Тэр хүслээ тодорхой болгож өгнө. Бурханы хүслийг ялган таних хэрэгсэл болохын хувьд учир шалтгааныг хэзээ ч битгий үгүйсгэ.

5. Энэ нь бурханлаг үйлдэл мөн үү? Ямар ч нөхцөл байдлыг онцгой тохиолдол болгоод ердийн үед Бурханыг баярлуулахгүй зүйлсийг хийж болно гэж бодож болохгүй.

6. Энэ нь өөрийгөө хайрладаг шиг өрөөлийг хайрлахтай нийцэж байна уу? Аминч сэдэл нь таны ялган таних чадварыг гажуудуулна.

7. Энэ нь сайн нөлөөг авчрах уу? Таны хийж байгаа зүйлийг бусад хүн хийвэл ямар байх вэ? Сайн байх болов уу?

8. Энэ нь бурханлаг зөвлөгчдөөр баталгаажсан уу? Бид өөртэйгээ санал нэгдэх найз нөхдийг олоход амархан. Харин хамгийн ухаалаг, сүнслэг санагддаг хүмүүс таны энэ шийдвэрийн талаар юу хэлэх бол?

Хэрэв Бурханы хүсэл нь маш ер бусын зүйл байвал, таныг эргэлзүүлэхгүйгээр Тэр танд үүнийгээ мэдүүлж чадна. Өнгөрсөн цаг үед зарим хүмүүс тэнгэрэлч, үзэгдэл, шатаж буй бут гэх мэт зүйлсээр тодорхой баталгааг хүлээн авч байсан. Бурхан таныг эргэлзэхэд хүргэхгүй дотоод баталгааг ч өгөх боломжтой. Харин Бурханаас тодорхой үг, мэдээг хүлээн аваагүй тохиолдолд зөв сонголтыг ялган танихын тулд найдвартай зарчмуудыг дагах хэрэгтэй. Шийдвэр бүр дээрээ онцгой илчлэл хүлээх хэрэггүй. Хэрэв та зөв чухал зүйлсийн талаар чин сэтгэлээсээ, залбиралтайгаар эргэцүүлж бодож байгаа бол Бурхан таны шийдвэрийг итгэмжтэйгээр удирдан чиглүүлэх болно.

Ром 12:1-2 эшлэлд Паул бичихдээ,

Иймд ах дүү нар аа, Бурханы өрөвч сэтгэлээр та нараас хичээнгүйлэн гуйя. Өөрсдийн биеийг Бурханд тааламжтай, амьд, ариун тахил болгож өргө. Ингэх нь та нарын сүнслэг мөргөл мөн. Энэ үеийн явдалд нийцэлгүй, харин оюун санаагаа шинэчилж, өөрчлөгдөгтүн! Тэгвэл Бурханы сайн, тааламжит, төгс төгөлдөр хүсэл юу болохыг таних болно.

Эдгээр эшлэлд хүний сүнслэг нөхцөл байдал түүний шийдвэрт хэрхэн нөлөөлдгийг харуулсан. Бурханы хүслийг олохын тулд хүн эхлээд Бурханд бүрэн зориулагдсан байх учиртай. Итгэгч хүний шийдвэрүүд нь ертөнцийн шийдвэрүүдээс өөр юм. Учир нь итгэгч хүн ертөнцтэй нийцдэггүй, харин өөрчлөгдөж, шинэчлэгдсэн оюун санаагаар шийдвэр гаргадаг.

Бурханы удирдамжийг ялган таних хамгийн чухал хүчин зүйл бол сэдэл юм. Хэрэв хүн аливаа зүйлийг хийх үү, үгүй юу гэдгээ шийдэхийн тулд л зөвхөн Бурханы хүслийг хайвал тэр хүн будилж магадгүй. Харин хүн Бичвэрийн дагуу болон учир шалтгаант арга замаар Бурханы хүслийг хайвал, мөн түүнийг хийх тууштай шийдвэртэй байвал Түүний хүслийг алдахгүй.

► Веслигийн зарчмыг хэрэгжүүлэх зарим жишээг ярилц. Жишээлбэл, хамт цагийг өнгөрөөх найз нөхдөө сонгох, ажлаа сонгох, эсвэл болзох талаар (гэрлээгүй хүн бол). Аль нөхцөл байдал нь намайг ариун байхад болон илүү үр нөлөөтэй байхад туслах талаар бод.

► Зарим хүн тодорхой төрлийн хүмүүс дунд, эсвэл тодорхой газарт Христэд итгэгч хүнийхээ мөн чанарыг хадгалж чаддаггүй юм шиг санагддаг. Жишээ авч, ярилцаарай.

► Дараах сэдвүүдийг мөн ярилцах боломжтой:

• Шийдвэр гаргахад сэдэл ямар үүрэгтэй байдаг талаар

• Тэмдэг хүлээдэг алдааны талаар

• Дотоод мэдрэмждээ хэт их найдахын аюул

Тэнгэрлэг Эцэг минь,

Та миний төлөө сайн зүйлсийг төлөвлөсөнд баярлалаа. Миний харж чадахаас ч илүүгээр алхмуудыг минь Та удирдан чиглүүлдгийг би мэднэ.

Залбирлаар Тантай ойр байхад надад туслаач. Надад харуулдаг үнэнд тань анхааралтай хандахад туслаач.

Би ариун байж, Таны алдрын төлөө чадах бүхнээ хийхийг хүсэж байна.

Миний сэдлүүдийг цэвэр болгооч, ингэснээр тэдгээр нь Таны хүслээс намайг холдуулахгүй байг. Миний амьдралд байлгаж байгаа мэргэн зөвлөгчдөөр дамжуулан намайг удирдан чиглүүлээч.

Би шийдвэр гаргах болгондоо Танд итгэж найдахыг хүсэж байна. Би бүх зүрхээрээ Таныг дуулгавартай дагахыг хүсэж байна.

Надад хамгийн сайныг хүсдэг Танд баярлалаа.

Aмен

(1) Сургаалт үгс 3:1-12 эшлэлийг судал. Энд дүрслэгдсэн чухалчлах зүйлс, хандлага болон зан чанарын талаар бич. Та эдгээр шинж чанаруудыг хувьдаа хэрхэн хөгжүүлж болох талаар бичээрэй (Нийт 1-2 хуудас бичнэ).

(2) Иаков 4:13-17 эшлэлийг нягтал. Нөхцөл байдлуудаас дээгүүрх Бурханы хэмжээлшгүй байдлыг анзаар. 16-р эшлэлд дурдсан ёрын муу зүйл буюу “ихэмсэг зан” гэж юу вэ? Энэ багц хэсэг ирээдүйг төлөвлөх талаар юу хэлж байгааг нэг догол мөрөнд бич.

(3) Залбирал ба шийдвэр гаргах хоорондын харилцааны талаар хоёр догол мөрөнд бич. Дараах асуултад хариул:

• Биднийг шийдвэр гаргахад залбирал хэрхэн нөлөөлөх ёстой вэ?

• Залбирал болон шийдвэр гаргахтай холбоотой зайлсхийх ямар алдаанууд байдаг вэ?