Энэ хичээлийн төгсгөлд суралцагч дараах чадварт суралцсан байна:

(1) Жинхэнэ хайрын шинж чанар, зан байдлыг тодорхойлох.

(2) Хэн нэгнийг болзолгүйгээр хайрлана гэдэг нь ямар утгатай болохыг тайлбарлах.

(3) Хайрыг тухайн хүний хайрын үндсэн хэлээр илэрхийлэхийн чухал ач холбогдлыг хэлэлцэх.

(4) Гэр бүлийн гишүүний хувийн зан чанар, хувийн онцлог чанарыг үнэлж хайраа илэрхийлэхдээ урмын үгсийг ашиглах.

Эхнэр нь аз жаргалгүй байгаагаас болж Иосеф бухимдаж байлаа. Тэр эхнэрийнхээ юу хүсээд байгааг ойлгосонгүй. Иосеф шаргуу ажиллаж, эхнэр, хүүхдүүдээ гэр орон, хоол хүнс болон амьдралд шаардлагатай бүх зүйлээр хангадаг байв. Тэрээр эхнэртээ хүссэн бүхнээ худалдаж авахыг зөвшөөрдөг бөгөөд эхнэр нь юунд ч санаа зовох шаардлагагүй байлаа. Эхнэр хүнд өөр хүсэх зүйл байдаг болов уу? Харин эхнэр нь түүний ажлыг үнэлэхгүй байгааг Иосеф мэдэрчээ.

Ханна Иосефыг өөрт нь зориулж онцгой зүйлсийг бодож хийж, хайраа илэрхийлэхийг нь хүсэж байсан учраас үүндээ сэтгэл дундуур байв. Нөхрөөсөө авсан түүний хамгийн дуртай бэлэг нь Иосеф өөрийнхөө мужааны цехэд хийсэн, Ханнагийн нэрийг сийлсэн жижиг модон хавтан байжээ. Нөхөр нь Ханнад хүссэн бүхнээ худалдаж ав гэж хэлэхийн оронд заримдаа өөрт нь цэцэг худалдаж авч өгөөсэй гэж тэр хүсдэг байв.

Иосеф, Ханна хоёр сэтгэл мэдрэмжээ хуваалцаж, бие биенийхээ хэрэгцээг ойлгож эхлэв.

► Хэн нэгнийг жинхэнээсээ хайрлана гэж юу гэсэн үг вэ?

► Нэг суралцагч 1 Коринт 13:4-8 эшлэлийг бүлэгт уншина. Энэ эшлэлээс хайрын шинж чанар, үйлдлүүдийг жагсаан бичээрэй. Хайр нь юу биш, мөн хайр юу хийдэггүйг жагсаана уу.

Хэвлэж болох PDF-ийг эндээс авах боломжтой.

Энэ эшлэлд хайр нь юу вэ гэдгээс илүү энэ нь юу биш вэ гэдгийг тодорхойлсон мэт харагдаж байна. Гэхдээ хайр ямар байдаггүй вэ гэсэн тодорхойлолт нь бидэнд хайр ямар байдаг вэ гэдгийг заадаг. Хэрэв хайр нь бардамнадаггүй бол энэ нь ямар байх вэ? Энэ нь эсрэгээрээ юм. Хайр бол даруу төлөв.

► Одоо 1 Коринт 13:4-8 эшлэлд дурдсан болон дээрх хүснэгтэд бичигдсэн, хайрын эсрэг шинжүүдийг жагсаан бич.

Жинхэнэ хайр:

• Зүгээр нэг мэдрэмж биш (хэдийгээр мэдрэмж ихэвчлэн хайрыг дагалддаг ч)

• Шаардлагаар биш, сонголтоор өгөгддөг.

• [1]Зориулалт юм.

• Золиос шаарддаг.

• Болзолгүй бөгөөд энэ нь нөгөө хүнийхээ үйлдлээс хамаардаггүй.

• Санамсаргүй бус, зорилготой юм.

• Үнэ өртөгтэй.

• Нөгөө хүнийхээ хувьд хамгийн сайн зүйлийг эрэлхийлдэг.

• Өгөх замаар өөрийгөө илэрхийлдэг.

“Бурхан ертөнцийг үнэхээр хайрласан учраас цорын ганц Хүүгээ өгсөн…” (Иохан 3:16). Жинхэнэ хайр өгөх замаар өөрийгөө илэрхийлдэг. Энэ нь үргэлж бодит, материаллаг бэлэг өгнө гэсэн үг биш. Заримдаа бэлэг нь хайрын үгс байж болно. Заримдаа бэлэг нь хэн нэгэнтэй хамт байх, түүнд зориулсан цаг хугацаа байх боломжтой. Заримдаа хайрыг тусламж үзүүлэх эсвэл хайрлаж биеэр хүрэлцэх байдлаар дамжуулан өгдөг. Эцэг Бурхан биднийг маш их хайрласан учраас биднийг өөрийн хүүхдүүд болгохын тулд өөрт байсан хамгийн сайн зүйл буюу өөрийн цорын ганц Хүүгээ өгсөн юм. Бид бусдыг жинхэнээсээ хайрлах үедээ тийнхүү өгч зориулдаг.

Жинхэнэ хайр бол болзолгүй. Энэ нь хайрыг хүлээн авч байгаа хүний зан байдал эсвэл үнэ цэнээс хамаардаггүй. Энэ нь "Хэрэв та үүнийг хийж, намайг ингэж баярлуулвал би таныг хайрлана; харин хэрэв та ингэж хийж, намайг гомдоох юм бол би таныг хайрлахгүй" гэж хэлдэггүй.

Болзолтой хайр нь: "Хэрэв таны зан байдал намайг баярлуулвал, би таны хувьд утга учиртай хайрын илэрхийллээр шагная. Гэхдээ хэрэв та миний хүссэнийг хийхгүй бол би хайрынхаа утга учиртай илэрхийллээс татгалзах болно" гэж хэлдэг.

Жинхэнэ хайр бол болзолгүй. Энэ нь хайрлаж буй нэгэн нь юу хийсэн эсвэл хийгээгүйгээс үл хамааран өөрийгөө илэрхийлдэг. Хүлээн авагч хайраар хариу үйлдэл үзүүлж чадахгүй байсан ч, хариуд нь юу ч өгөхгүй байсан ч өөрийгөө илэрхийлдэг.

Хэн нэгнийг болзолгүйгээр хайрлана гэдэг нь тухайн хүнд хүссэн зүйлийг нь заавал өгнө гэсэн үг биш гэдгийг ойлгох нь чухал. Энэ нь тэр хүний буруу үйлдлийн үр дагаврыг арилгана гэсэн ч үг биш. Энэ нь түүний хувьд үргэлж хамгийн сайн зүйлийг хийхийг хичээнэ гэсэн үг юм. Хайртай хүмүүсээ зовж байгааг харах нь хэцүү ч, хэрэв тэд буруу зүйл хийсэн бол зовлонгийн туршлага нь тэднийг ихэвчлэн хортой зан байдлаас нь холдуулах цорын ганц арга зам байдаг. Заримдаа хайртай хүмүүсийнхээ төлөөх хамгийн сайн зүйл нь тэднийг тэмцэлддэг зүйлд нь үлдээж, үүнтэйгээ нүүр тулах боломжийг олгох явдал юм. Харин бусад үед бид тэднийг тэмцэлддэг зүйлээсээ салахад туслах нь хамгийн сайн байдаг. Эдгээр нөхцөл байдалд юу хийхээ мэдэхийн тулд бидэнд ихэвчлэн бурханлаг зөвлөгөө болон Ариун Сүнсний тусламж хэрэгтэй байдаг.

► Бусдыг болзолгүйгээр хайрлахад юу биднийг өдөөдөг вэ?

► Нэг суралцагч Ром 5:8 эшлэлийг бүлэгт уншина.

Олон хүн Бурханы хайр нь тэдний гүйцэтгэлд суурилдаг гэж боддог. Үүнээс болж тэд бусад хүмүүсийг яагаад болзолгүйгээр хайрлах ёстойгоо ойлгодоггүй. Гэхдээ Ром 5:8 бидэнд Бурхан биднийг өөрийнх нь дайсан байхад ч хайрласан гэдгийг хэлдэг. Тэрээр биднийг нүгэлтэн байхад Аврагчийг өгсөн. Түүний бүх хүмүүсийн төлөөх хайр нь болзолгүй юм. Түүний хайр нь таны зан байдал эсвэл төгс төгөлдөр байдалд суурилдаггүй. Бурхан таныг өөрийнх нь дүр төрхөөр бүтээгдсэн хүн гэдгээр хайрладаг.

Тэр өөрөө биднийг хайрладагтай адил биднийг ч бас тийнхүү бусдыг хайрлахыг хүсдэг (Иохан 15:12, Ефес 5:2, 1 Иохан 4:11). Бид бусдыг болзолгүйгээр хайрлах хамгийн чухал шалтгаан бол Бурхан биднийг ингэж хайрлахаар дуудсан явдал юм (Матай 5:43-48, 1 Петр 4:8).

Бурхан олон төрөл зүйлд дуртай. Тэр хүмүүст бусдаас ялгаатай хувийн онцлог байдлыг өгдөг. Яг ижилхэн боддог, сэтгэл хөдлөлөө илэрхийлдэг хүмүүс гэж байхгүй. Хувийн онцлог байдлаасаа болж, гэр бүлийн гишүүд маань биднээс арай өөр хэрэгцээтэй байдаг. Бидний ялгаатай байдал өдөр тутмын гэр бүлийн харилцаанд маань нөлөөлдөг.

Хувь хүний онцлог байдлын нэг нь тэд хайрыг хэрхэн илэрхийлдэг, мөн юу нь тэднийг бусадтай харилцах харилцаандаа хайрлагдсан, үнэлэгдсэн, аюулгүй гэж мэдэрдэг тэр зүйл юм.

Хайрыг илэрхийлэх болон хүмүүс хайрлагдсан гэдгээ мэдэрдэг олон арга зам бий. Гари Чапмен хайрын илэрхийлэл болох таван ерөнхий ангиллыг дурджээ.[1] Тэрээр эдгээрийг Хайрын таван хэл гэж нэрлэсэн. Хайрыг илэрхийлэх эдгээр аргууд тус бүр нь зөвхөн дан ганц үйлдэл биш, харин зан байдлын бүхэл бүтэн систем юм.

Хүн бүр энэхүү таван аргаар хайрлагдах хэрэгцээтэй байдаг ч, ихэнх хүмүүс эдгээрээс нэг төрлийн илэрхийллээр нь илүү хайрлагдсан мэдрэмжийг авдаг бололтой. Хайрын бусад илэрхийлэл нь тэдний хувьд тийм ч их утга учрыг илэрхийлдэггүй.

Хайрын таван хэл

Хүмүүс хайрыг дараах байдлаар харуулдаг:

1. Урмын үгс

2. Чанартай цаг

3. Бэлэг

4. Тусламж үзүүлэх

5. Биеэр хүрэлцэх

Үүнтэй адилаар хүмүүс хайрыг эдгээр таван аргаар таньж, хүлээн авдаг.

Хайрын үндсэн хэл

Ихэнх хүмүүс хайрыг эдгээр таван аргын аль нэг эсвэл хоёроор нь төрөлх байдлаар таньж, илэрхийлдэг. Хэрэв гэр бүлийн гишүүд хань ижил эсвэл хүүхдийнхээ үндсэн хайрын хэлээр хайраа илэрхийлэхгүй бол тухайн хүн хэдий өөр аргаар хайрлуулсан ч хайрлагдсанаа мэдрэхгүй байх боломжтой.

Зарим эмэгтэйчүүдийн хувьд ихэвчлэн хайраа дотно хүмүүстэйгээ цаг гаргах замаар илэрхийлж болно. Тэр хайртай хүмүүстэйгээ ярилцах, харилцахад бэлэн байхыг хичээдэг. Тэрээр хамтдаа үйл ажиллагаа хийхэд цаг гаргана. Үүний адил энэ нь түүний хайраа илэрхийлэх үндсэн арга учраас бусдын хайрыг өөрт нь хамгийн хялбар таниулах арга ч болдог. Хэн нэгэн түүнд цаг гаргах үед тэр хамгийн ихээр хайрлагдсанаа мэдэрдэг. Энэ эмэгтэйн хувьд нөхөр нь түүнд бэлэг авч өгөх эсвэл түүний төлөө ямар нэгэн зүйл хийх нь эмэгтэйд анхаарал хандуулж цаг гаргахаас илүү утга учиртай байж чаддаггүй.

Зарим эрэгтэйчүүдийн хувьд ихэвчлэн хайраа биеэр хүрэлцэх байдлаар илэрхийлж болно. Тэр эхнэр, хүүхдүүдээ тэвэрч, тэд түүнийг тэвэрч, ойр байхыг хүсэх үед аз жаргалыг мэдэрдэг. Тэрээр найзуудаа тэвэрч эсвэл ядаж л мөрийг нь алгадах, эсвэл тоглоомоор түлхэж, ноцолдох зэргээр хайраа илэрхийлдэг. Эрэгтэйн хувьд эхнэр нь гэр бүлийнхээ төлөө шаргуу хөдөлмөрлөж байгаад талархалтай байж болох ч эхнэрийнх нь ажил эхнэр нь түүнд хайртайг мэдрүүлж чаддаггүй. Харин эхнэр нь хажууд нь сууж, гараа түүнд өгөх, тэврэхэд эсвэл янз бүрийн байдлаар түүнд хүрэх үед тэр хайрлагдсанаа мэдэрдэг.

Машинд түлшний сав байдаг. Сав хоосон үед машин ажиллахгүй. Хүн хайрыг өөрийн танил, хэрэгцээтэй арга замаар хүлээн авах үед энэ нь сэтгэл санааных нь түлш болдог. Хүний сэтгэл санааны сав дүүрэн байх үед тэрээр бэрхшээлийн өмнө өөртөө итгэлтэй, эрч хүчтэй байж чаддаг. Тэр бусадтай хамтран ажиллаж, аливаа зөрчилдөөнийг шийдвэрлэх чадвартай болдог. Тэрээр улам бүр сайжирч, амжилтад хүрэх хүсэл тэмүүлэлтэй болдог.

Хүн өөрийн хэрэгцээтэй арга замаар хайрыг хүлээн авахгүй бол сэтгэл санаа нь түлшгүй болдог. Хүн хайрлуулж байгаагаа мэдрэхгүй бол амжилтад хүрэх эсвэл сайжрах тал дээр хүчин чармайлт гаргах нь ховор болдог.

Хэрэв бид гэр бүлийн гишүүдийнхээ хайрын үндсэн хэлээр нь хайраа байнга илэрхийлэхгүй бол тэд биднийг хэр их хайрладагийг ойлгохгүй байж болно. Энэ нь бид өөрсдөө тэднийг хэр их хайрладаг гэж мэдрэхээс үл хамаарч үнэн байдаг. Бид хайраа тэдний ойлгох аргаар илэрхийлэх ёстой.

Хэрэв бид хэн нэгнийг тэдний хайрын үндсэн хэлээр нь гомдоовол энэ нь бүр ч муу юм. Жишээлбэл, хэрэв урмын үгс хүүхдийн маань хайраа илэрхийлэх хамгийн чухал арга зам байхад бид шүүмжлэн ярьсаар байвал хайрын үндсэн хэл нь өөр байснаас ч илүүгээр гомдоодог.

1-р хичээлээр бид Бурхан бүх хүмүүсийг өөртэйгөө болон бусадтай харилцаатай байхаар бүтээсэн талаар сурсан. Хайрын илэрхийлэл нь харилцаа болгонд чухал хэсэг байдаг. Бидний хань ижил, хүүхдүүд болон бусад гэр бүлийн гишүүд маань хэрхэн хамгийн ихээр хайрлагдсанаа ойлгох нь чухал юм. Энэ мэдлэг нь тэдний хувьд хамгийн утга учиртай арга замаар хувьчлан хайраа илэрхийлэх боломжийг бидэнд олгодог.

Гэрлэлтийнхээ талаарх хүмүүсийн хүлээлт яв цав тохирох нь ховор. Хүмүүс өөрсдийн болон хань ижлийнхээ ялгаатай байдлаас болж ихэвчлэн урам хугардаг. Хайрын илэрхийллийн тухайд, хоёр хүн нэг ижил хайрын үндсэн хэлтэй байх нь хамгийн сайн нөхцөл мэт санагдаж болно. Хэрэв тэд энэ байдлаараа ижил төстэй байсан бол олон үл ойлголцол, бухимдлаас зайлсхийж болох байх. Хэдий тийм боловч, хэрэв хосууд гэрлэлт болон бие биенээ хайрлах хайрандаа тууштай өсч байвал энэ төрлийн ялгаа нь гэрлэлтийг бэхжүүлж чадна.

[1]Бие биенээ ойлгохыг хичээх, бие биедээ дасан зохицох, утга учиртай байдлаар халамж анхаарал тавих үйл явц нь хүн бүрийг хөгжүүлж, жинхэнэ хайрын гайхалтай илэрхийлэл болдог. Бид гэр бүлийн гишүүдийнхээ хайрыг хүлээн авдаг арга замаар хайраа харуулах үедээ бидний зан чанар болон ойлголт маань өсөж төлөвшиж байдаг.

Эхнэр нөхөр болон бусад гэр бүлийнхэндээ хайраа илэрхийлэхдээ бид зөвхөн өөрийнхөө арга замаар хайраа илэрхийлэх, эсвэл зөвхөн хүссэн үедээ л хайраа илэрхийлэх боломжгүй гэдгийг ойлгох нь чухал юм. Хайр бол сонголт, зориулалт бөгөөд харилцааны үнэ цэнээр өдөөгддөг. Зарим тохиолдолд бид хайраа илэрхийлэх шинэ аргуудад суралцах шаардлагатай болдог. Магадгүй бид хайрыг тодорхой арга замаар илэрхийлдэг тийм гэр бүлд өсөөгүй байж болох ч, өнөөдөр гэр бүлийн гишүүн маань тэрхүү арга замаар хайрлагдах хэрэгцээтэй ч байх боломжтой. Ийм нөхцөл байдалд хайрыг танил бус аргаар илэрхийлэх нь эхэндээ хачирхалтай эсвэл таагүй санагдаж болох ч бид үүнд суралцаж чадна! Хайраа илэрхийлэхийг тааламжгүй үүрэг эсвэл тав тухгүй байдал мэтээр хэзээ ч бүү санаарай. Хэрэв бид үүргээ гүйцэтгэж байгаа мэтээр хандвал, бидний хайрын илэрхийлэл жинхэнэ хайрыг дамжуулж чадахгүй.

► Суралцагчид Ром 12:9-10, 16 ба 1 Петр 3:7-8 эшлэлийг бүлэгт уншина. Эдгээр эшлэлийг уншаад гэр бүлийн хүмүүстээ хайрыг мэдрүүлэх хамгийн тохиромжтой арга болон бид үүнд нь яагаад санаа тавих ёстой талаар хэд хэдэн шалтгааныг нэрлэнэ үү.

Хайр бол нөгөө хүнийхээ хувьд хамгийн сайн сайхан байхыг эрэлхийлж, өөрийгөө золиосолдог шийдвэр зориулалт гэдгийг санах нь чухал.

Бид төрөлхийн хувиа хичээсэн хүмүүс. Бусдыг жинхэнээр хайрлах нь бидний хэнд маань ч төрөлхийнх байгаагүй. Жинхэнэ хайр Ариун Сүнсний бидний зүрх сэтгэлд хийж буй ажлаар дамжуулан бий болдог (Ром 5:5). Итгэгчид бид Паулын Филиппой 2-р бүлэгт тайлбарласан Христийн бодол санаанд суралцах ёстой. Ингэх үедээ бид:

• Аминч хувийн ашиг сонирхлоор өдөөгдөхгүй (3-р эшлэл)

• Өөрийнхөө ач холбогдлын талаар хэтрүүлж бодохгүй (3-р эшлэл)

• Бусдыг өөрөөсөө илүү чухал гэж үзнэ (3-р эшлэл)

• Бусдын ашиг сонирхлыг хайна (4-р эшлэл)

Бид гэр бүлийн гишүүдээ хайрлахад зориулалт гаргах учиртай. Бид тэдний хэрэгцээг анзаарч, тэдгээрийг хангах арга замыг хайж сурах ёстой. Бидний зорилго бол тэднийг хамгийн их хайрлагдсанаа мэдэрдэг тийм арга замаар хайраа харуулах юм.

Бид эцэг эхчүүдийн хувьд хүүхдүүддээ ах дүү, эцэг эх, эмээ өвөө нартаа ийм байдлаар анхаарал тавихыг заах ёстой. Хүүхдүүд маань гэр бүлээ хайрлаж, үйлчлэхийг сурах хэрэгтэй. Тэд гэр бүлийнхэндээ хайраа хамгийн утга учиртай аргаар илэрхийлэхийг сурч чадна. Бид үлгэр дуурайлаар заах ёстой. Мөн бид эдгээр ойлголтуудыг тэдэнд тайлбарлахад цаг гарган, тэдгээрийг харилцаандаа хэрэгжүүлэхэд нь чиглүүлэх хэрэгтэй юм.

► Хүүхдүүдээ өөрийн гэр бүлээсээ эхлэн бусдад өөрийгөө зориулах хайрыг сурахад эцэг эхчүүд хэрхэн тусалж чадах вэ?

Урмын үгс нь хайрын үндсэн хэл байдаг хүмүүс бусдаас чин сэтгэлээсээ үнэлэгдэх үгсийг сонсох үедээ хамгийн ихээр хайрлагдсанаа мэдэрдэг. Хэрэв эмэгтэй хүний хайрын үндсэн хэл нь урмын үгс бол нөхөр нь түүнтэй ярихдаа эсвэл түүний тухай ярихдаа хайраа илэрхийлж болно. Нөхөр нь эхнэртээ талархах тодорхой шалтгаануудыг дурдаж, захидал бичиж болох юм. Тэрээр бусад хүмүүстэй эхнэрийнхээ сайн зан чанар эсвэл ажлын тухай ярьж болно. Эхнэр нь нөхрийнхөө үгийг сонсох үедээ үнэлэгдэж, хайрлагдсанаа мэдэрдэг.

Бид найзуудаасаа зөвлөгөө авахдаа тэдний үнэ цэнийг нэмэгдүүлэх байдлаар асуух боломжтой. Жишээлбэл:

• “Чи үргэлж хэрэгтэй санаа хэлдэг учраас би чиний санаа бодлыг сонсмоор байна…”

• “Чи энэ асуудалд туршлагатай, би чиний зөвлөгөөг сонсохыг маш их хүсэж байна.”

• “Чи ____-ын талаар надаас илүү ихийг мэднэ, тиймээс чамд ямар нэгэн санал эсвэл зөвлөмж байвал би дуртайяа сонсоно.”

Бүх урмын үгсийг чин сэтгэлээсээ хэлэх ёстой. Үгүй бол тэдгээр нь хэрэгцээгүй эсвэл бүр хор хөнөөлтэй ч байж мэднэ. Чин сэтгэлийн бус урмын үгс нь харилцааг сулруулдаг. Тэдгээр нь үнэн дээр суурилаагүй тул сонсогч нь хэлж буй хүний сэдэлд үнэмшиж чадахгүй.

Чин сэтгэлийн урмын үгс нь бодит байдалд нийцсэн байдаг. Тэдгээр нь хуурамч эсвэл хэтрүүллэг биш. Чин сэтгэлийн урмын үгс нь зүрх сэтгэлээс илэрхийлэгддэг. Хэлж буй зүйл нь тухайн хүнийг үнэхээр мэдэрч, итгэж буй зүйл байдаг.

Урмын үгс нь сонсогчийг цаашдын өсөлт, ирээдүйн амжилтад өдөөж болох ч, хэзээ ч хуурч ашигласан байх ёсгүй. Бид бусдыг урмын үгсээр хянах гэж оролдож болохгүй.

► Нэг суралцагч Ефес 4:29 эшлэлийг бүлэгт уншина. Энд хэлэх ёсгүй зүйлсийн талаар хэрхэн тодорхойлсон бэ? Бид үгээрээ юуг гүйцэлдүүлдэг вэ? Зарим үгс нэг нөхцөл байдалд тохиромжтой ч, өөр үед тохирохгүй байх уу?

Бусдад хэлэх үгс маань үргэлж зохистой, нигүүлсэнгүй байх ёстой. Хэлж байгаа зүйлс маань бидний ярьж байгаа хүмүүсийн амьдралд Бурхан ажиллах боломжийг олгох учиртай. Бидний хэлэх зүйлс сүйтгэдэг биш, харин бүтээж байгуулдаг байх ёстой. Энэ нь эдгэрэл, эрүүл байдлыг дэмжих ёстой болохоос хор хөнөөл учруулах ёсгүй.

Урмын үгсийн төрлүүд

Урмын үгс нь олон янз байж болно. Бүх урмын үгс ижил үнэ цэнэ эсвэл ач холбогдолтой биш. Илүү өндөр түвшний урмын үгс нь тэдгээрийг хэлж буй хүнээс илүү их бодох, хүчин чармайлт шаарддаг. Заримдаа тэдгээрийг хэлэх нь эвгүй санагдаж болох ч, эдгээр үгс нь хайрыг хамгийн хүчтэй, утга учиртай байдлаар илэрхийлдэг.

Үзэгдэх байдалд чиглэгдсэн

Хэн нэгний гадаад төрхийг магтах нь урам өгөх нэг арга байж болно. Ялангуяа энэ нь тухайн хүний хүчин чармайлт эсвэл хувийн онцлог байдлаа илэрхийлж буй арга барилыг нь онцлон сайшаах тохиолдолд. Гэсэн хэдий ч, хэн нэгний гадаад төрхийг магтах нь (ялангуяа энэ нь тухайн хүний мөн чанартай холбоогүй тохиолдолд) урмын үгсийн гүехэн хэлбэр юм.

Бусдын анхаарлыг татдаг хүмүүс ихэвчлэн магтаал сонсдогоос болж өөрийн гадаад төрх байдалдаа итгэлгүй байх, өөрийнх нь үнэ цэн үүнээс хамаардаг мэтээр мэдэрч, төгс байх ёстой гэж боддог.

Хувийн үнэ цэн нь гадаад төрх байдлаар тодорхойлогдохгүй. Мөн хувь хүмүүсийн бие махбодын гоо үзэмжийг сайжруулах зүйлсэд хязгаар бий. Эдгээрээс шалтгаалан энэ төрлийн урмын үгсийг хэтрүүлэн хэрэглэх ёсгүй.

Амжилт, гүйцэтгэлд чиглэгдсэн

Хэн нэгэнд урам өгөх өөр нэг арга бол түүний амжилт, гүйцэтгэлийг магтах явдал юм. Ярьж буй хүн нөгөө хүнийхээ хийсэн үйлдлийг үл тоомсорлохын оронд түүний хийсэн зүйлийг үнэлэхэд цаг гаргах хэрэгтэй.

Жишээ:

• Эхнэр нь нөхрийгөө зорьж байсан амаргүй зорилгодоо хүрснийх нь төлөө магтаж болно.

• Нөхөр нь өөрийнх нь төслийн ажилд тусалсан эхнэрийнхээ хийсэн зүйлсийг анзаарч, талархлаа илэрхийлж болно.

• Өөрсдөд нь зориулж амттай хоол хийсэн тогоочид гэр бүлээрээ талархаж болно.

Гүйцэтгэл эсвэл амжилтыг нь үнэлэхдээ тухайн хүнийг хайрладаг хайр нь түүний гүйцэтгэлээс хамаардаг гэж бодохоос зайлсхийгээрэй. Жишээлбэл, хүүгээ шалгалтанд сайн оноо авсан учраас бахархаж байна гэж хэлснээр түүнийг оноо бага авбал та бага хайрлах болно гэж мэдрүүлж болох юм. Харин үүний оронд тухайн хүний үнэ цэнийг нэмэгдүүлэх байдлаар "Чи тэр шалгалтанд сайн оноо авсанд би баяртай байна. Суралцах хариуцлагаа үүрч, чадах бүхнээ хийсэнд чинь би бахархаж байна" гэж хэлж болно. Гэхдээ та яаж хийхээс үл хамааран, тухайн хүний хувьд чухал ач холбогдолтой амжилтыг нь үнэлж сайшаахаа битгий мартаарай.

Зан чанар, хүчин чармайлтыг онцлох байдлаар

Зөвхөн сайн гүйцэтгэлд нь урам өгөхийн оронд хүний зан чанар болон түүнийг амжилтад хүргэсэн хүчин чармайлтыг нь онцлох нь хамгийн сайн арга юм. Жишээлбэл, спортоор хичээллэдэг бага насны хүүхдийн хувьд тэмцээнд ялахаас илүү шаргуу хүчин чармайлт, түүний сайн хандлагыг нь магтах ёстой. Цөөн хүмүүс үргэлж гүйцэтгэлээрээ онцгойрч чаддаг бол зарим нь сайн зан чанарыг харуулахыг сонгож чаддаг. Зан чанар бол хамгийн чухал юм.

Хэн нэгнийг байгаагаар нь онцлон сайшаах

Хамгийн сайн урмын үгс нь тухайн хүний хувийн зан чанар, хувийн чанар, онцлог байдалд зориулагдсан байдаг. Энэ төрлийн урмын үгс нь амжилт гүйцэтгэлд өгөх урмын үгсээс илүү хүчтэй байдаг. Энэ нь өөрчлөгддөг нөхцөл байдал дээр биш, харин тухайн хүний өөрийн үнэ цэн дээр суурилдаг учраас тэр юм.

Жишээ:

• “Хүүхдүүд танд их татагддаг юм байна! Та тэдний асуултуудад маш тэвчээртэй хандаж, асуусан зүйлийг нь маш сайн тайлбарлаж өгдөг юм байна.”

• “Би танд ажлаа даатгая. Учир нь та итгэл даах хүн гэдгийг би мэдсэн.”

Энэ төрлийн урмын үгс нь Бурхан хэн нэгний амьдралд хэрхэн ажиллаж, тэднийг тодорхой арга зам болон тодорхой зүйлийг хийх боломжоор хангаж буй зэргийг олж танихтай нягт холбогддог.

Жишээ:

• “Залуу хүмүүсийг халамжлах ажилд Бурхан таныг хэрхэн ашиглаж байгааг би харахдаа баяртай байдаг. Таны амьдралыг харахдаа Есүсийн төлөө амьдрахыг хүсэж байна гэж тэдний нэг нь надад хэлсэн!”

• “Энэ хүнд хэцүү ажлыг дуусгахад Бурхан танд тусална гэдэгт би итгэж байна. Би таны төлөө залбирах болно!”

Хэн нэгэнтэй харилцаатай, хамт байгаадаа баярлаж талархсанаа илэрхийлэх нь урмын үгсийн хамгийн хүчтэй хэлбэрүүдийн нэг юм. Тэдгээр нь тухайн хүний үнэ цэнийг илэрхийлдэг.

Жишээ:

• “Таныг байхад гэр бүлийн цугларалтууд үргэлж илүү онцгой болж байдаг.”

• “Би тантай хамт байх дуртай.”

• “Та надад эрхэм нандин бөгөөд би таныг хайрладаг!”

Бидний хэлдэг үг, урмын үгстэй холбоотой тэмдэглэх чухал зүйлс

1. Хүний бие махбодын онцлогийг хэзээ ч шүүмжлэх эсвэл шоолох ёсгүй. Хүмүүс бие махбодын онцлогоо насан туршдаа тээж явах болно. Хэзээ ч хэн нэгэнд бие махбодын онцлог, ялангуяа дутагдал дээр нь үндэслэсэн нэр хоч бүү өг.

2. Давуу тал, зан чанар, сайн зан байдлыг нь сайшаан үнэлэх нь сонсогчид үүнийгээ үргэлжлүүлэн хөгжүүлэхэд урмыг өгдөг. Дутагдлыг зааж сануулах нь ихэвчлэн тус болдоггүй.

3. Зөвлөгөө нь сонсогч хүнд өөрөө алдаатай байна гэсэн агуулгаар сонсогдож болно. Харин урмын үгс нь хүнд зөвлөгөө авах үедээ илүү аюулгүй мэдрэмжийг авахад нь тусалдаг. Хэрэв та хэн нэгэнд зөвлөгөө өгөх шаардлагатай бол, зөвлөгөөний хамт хүчтэй урмын үгсийг санал болгоорой.

4. Гомдол хэлбэрийн санал нь өдөөлт болж чаддаггүй. Жишээлбэл, ямар нэгэн ажлыг аль хэдийн хийсэн байх ёстой байсан гэж хэлэх, эсвэл хэн нэгэн үүнийг хийж чадаагүйд ичгэвтэр байгаагаа илэрхийлэх нь тус болохгүй. Эдгээр үгс нь тухайн хүнийг аль хэдийн бүтэлгүйтсэн мэтээр мэдрүүлдэг. Хэрэв тэр тухайн ажлыг хожимдуулсан байсан ч хэдийн бүтэлгүйтсэн мэтээр мэдрэх болно.

Гомдоох үгс

Урмын үгс хамгийн их хэрэгтэй байдаг хүн үүний эсрэг утгатай үгсэд хамгийн их эмзэглэдэг. Шүүмжлэл түүнийг ихээр өвтгөх бөгөөд хувь хүнийхээ үнэ цэнд эргэлзэхэд хүргэдэг. Ууртай түргэн үгс нь хүнд хэзээ ч эдгэхгүй сэтгэл санааны шарх учруулдаг. Ялангуяа ийм үг хэлсэн хүн өөрөө өвдөлтийг нь ойлгохгүй, хэзээ ч уучлалт гуйхгүй тохиолдолд энэ нь бүр ч үнэн байдаг.

Хамгийн хүчтэй урмын үгс хүний үнэ цэнтэй холбоотой байдаг шиг, хамгийн өөдгүй, гомдоох үгс хувь хүн рүү нь халдсан байдаг. Жишээлбэл, "Би тантай хэзээ ч уулзаагүй байсан бол.”

Өөр өвтгөх үгс нь тухайн хүний мөн чанарт хандсан үгс байдаг: "Та ____ юм." Зан байдлын талаарх хортой үгс нь "Та үргэлж ____ хийдэг" эсвэл "Та хэзээ ч ____ хийдэггүй" гэж эхэлдэг. Эдгээр үгс нь тухайн хүний дутагдал мөн чанартай нь холбоотой бөгөөд өөрчлөгдөхгүй, сайжрах боломжгүй гэсэн утгыг агуулдаг.

Хэрэв хэн нэгэн шархадсан бол (ялангуяа хайрын үндсэн хэлээр шарх олсон бол) тэрээр дараа дараагийн гэмтлээс зугтаахыг төрөлх байдлаараа хичээх болно. Сөрөг үг хэрэглэдэг хүмүүс ихэвчлэн эерэг үг хэлдэггүй учраас сонсогч нь өөрийн зан байдлаа өөрчлөх илүү дээр аргыг олох найдвар бага байдаг. Тэрээр хайрыг олж авахын тулд зан байдлаа сайжруулах ямар ч өдөөлтгүй болдог.

Заримдаа ууртай хүмүүс бусдыг өвтгөхийг хүссэн учраас гомдоох үг хэлдэг. Заримдаа хүн сайн санаа өвөрлөж хэлсэн ч бусдыг өвтгөх үгийг хэлсэн байдаг. Өөр зарим нь сөрөг үгсийг ашиглан хэн нэгнийг илүү сайн зан байдалд авчрахыг хичээдэг ч энэ нь бараг л дэмий хоосон зүйл болдог.

► Нэг суралцагч Колоссай 3:8 эшлэлийг бүлэгт уншина. Итгэгчид Бурханы эсрэг болон бусдын эсрэг ийм байдлаар үргэлжлүүлэн нүгэл үйлдэх ёсгүй.

► Жинхэнэ хайрыг өөрийн үгээр тодорхойлно уу. Ариун Сүнс бидэнд бусдыг зохих ёсоор хайрлахад яагаад туслах ёстой вэ?

► Хэн нэгнийг болзолгүйгээр хайрлана гэдэг нь юу гэсэн үг болохыг тайлбарла. Бурханаас танд хандсан болзолгүй хайрын ач холбогдол юу вэ?

► Эхнэр эсвэл хүүхдэдээ хайраа тэдний хайрын үндсэн хэлээр илэрхийлэх нь яагаад онцгой чухал вэ?

► Урмын үгсийг хүлээн авах нь танд ямар тустай байсан бэ?

► Энэ долоо хоногт та гэр бүлийнхэндээ урмын үгсээр хайраа хэрхэн илэрхийлэв?

Тэнгэрлэг Эцэг минь,

Жинхэнэ, болзолгүй хайрын талаар надад заасанд талархъя. Үүнийг өөрийн Үгээр тодорхойлж, надад хандсан хайраараа үлгэрлэсэнд баярлалаа.

Христ намайг хайрлаж, үйлчилсэн шиг гэр бүлээ хайрлаж, үйлчилж сурахад надад туслаач. Миний хань, хүүхдүүд, ах дүү, эцэг эхийнхээ сайн сайхан байдалд анхаарлаа төвлөрүүлэх боломжийг олгооч.

Миний хэлэх үгсийн ач холбогдлыг сануулсанд талархъя. Би бусдыг гомдоосон, таныг үл хүндэтгэсэн үгсийг хэлсэндээ уучлалт гуйж байна. Миний үгс урам нэмж, босгон байгуулж, эдгээдэг байх ёстойг санаж байхад надад туслаач.

Амен

(1) Бат бэх гэр бүлтэй хостой ярилцаж, тэдний амьдралаас суралцахын тулд асуултууд тавиарай. Ярилцлага дууссаны дараа тэдний хуваалцсан ойлголтууд болон өөрийн гэрлэлтдээ хэрэгжүүлэхийг хүсэж буй зүйлсийн талаар хоёр догол мөрөнд багтаан бичнэ үү.

Асуух асуултуудын зарим санаа:

• Та хоёрын хувийн онцлог байдлын ялгаа нь та нарын харилцаанд хэрхэн нөлөөлсөн бэ?

• Та хоёр эдгээр ялгаанаас болж хэрхэн өсөж хөгжсөн бэ?

• Та хоёр бие биенээ хүндэлж, үйлчлэхийн тулд хүлээлт, үзэл бодол, зан байдлаа хэрхэн нийцүүлэх шаардлага тулгардаг вэ?

• Та хоёрт бие биедээ хайраа илэрхийлэх ямар практик аргууд байдаг вэ?

• Таны хань юу хийх эсвэл юу хэлэх нь таныг хайрлагдсанаа мэдрэхэд тусалдаг вэ?

• Таны ханьтайгаа харилцах харилцаа таны Бурхантай харилцах харилцаанд хэрхэн нөлөөлсөн бэ?

(2) Сургаалт үгс 31:10-31 эшлэлд бичигчийн эхнэртээ зориулсан олон урмын үгсийг багтаасан байдаг. Эмэгтэйн зан байдал, үгсийг тодорхойлсон байдал нь түүний зан чанарын талаар бидэнд хэлж өгдөг. Тэр эхнэрийнхээ аль талыг сайшаан урамшуулсан бэ? Энэ эшлэлээс дараах зүйлсийг хайж олоорой:

• Түүний гадаад төрх

• Түүний үйлчлэл, ололт амжилт

• Түүний зан чанар, хүчин чармайлт

• Хувь хүнийхээ хувьд тэр хэн байв?

• Итгэгч хүнийхээ хувьд тэр хэн байв?

Энэ эшлэлд онцолсон зүйлсээс бид юу сурч чадах вэ?