Lesson 4: Бэлгийн харилцааны асуудлууд

Энэ хичээлийн төгсгөлд суралцагч дараах чадварт суралцсан байна:

(1) Уналт нь хүний мөн чанар болон бэлгийн дур хүсэлд хэрхэн нөлөөлснийг тайлбарлах.

(2) Хувь хүн өөрийгөө тодорхойлох байдал болон энэ нь тухайн хүний ёс зүйтэй хэрхэн холбогддог талаар тайлбарлах.

(3) Бэлгийн харилцаа болон бэлгийн ёс бус байдлын талаарх Библийн үзэл баримтлалыг ойлгох.

(4) Бэлгийн ёс бус байдлын уруу таталтыг ялан дийлж, нүглээс салж, эрх чөлөөг олох.

(5) Тусламж, ялалт хэрэгтэй хүмүүст үйлчлэхэд бэлтгэгдсэн байх.

Кристофер нь АНУ-д Ази-Америк гаралтай гэр бүлд төрж өсчээ. Өсвөр наснаасаа эхлэн тэр эмэгтэйчүүдээс илүү эр хүнд татагддаг байв. Түүний эцэг эх хүүгийнхээ сонирхлыг мэдэж ичиж, цочирдов. Тэрээр өсвөр насандаа хэд хэдэн удаа эрэгтэйчүүдтэй гүнзий харилцаанд орж үзсэн байв. Жинхэнэ хайр, үнэнч байдлыг эрэлхийлж байсан боловч бүх харилцаа нь эцэстээ бүтэлгүйтсэн. Тиймээс ч олон эрэгтэйтэй болгоомжгүй, зүй бус харилцаанд ордог байв. Кристоферийн ээж Христэд итгэгч болсноор тэрээр өмнө нь хэзээ ч мэдэрч байгаагүй хайрыг амсаж, хүлээн зөвшөөрөгдөж, бүх зүйл нь өөрчлөгдөж эхэлсэн. Тэрбээр өөрийнх нь анхдагч мөн чанар нь Бурханы дүр төрхөөр бүтээгдсэн хүн гэдгээ ухаарч эхэлсэн. Тэр гэмшиж, амьдралынхаа бүхий л талбарыг Бурханд даатгасан. Тэр Бурхантай харилцах харилцаагаар дамжуулан бүрэн сэтгэл ханамж, зорилгоо олсон юм.

Бурхан Адам, Ева хоёрыг бүтээхдээ тэднийг бүх талаараа төгс, ямар ч өө сэв, дутах зүйлгүй бүтээсэн (Эхлэл 1:31). Тэдний мөн чанар нь зөвхөн зөв, сайн зүйлийг хүсдэг байв. Тэдний оюун ухаан, бие махбод төгс ажиллаж байв. Гэтэл Адам Бурханы тушаалыг зөрчих сонголт гаргасан. Ийнхүү үйлдсэний дараа хүний мөн чанар гажуудсан (Ром 8:20-23). Хүний бие, оюун ухаан нүгэлд өртсөн. Хамгийн эрүүл, хамгийн ухаантай хүн ч нүглийн үр дагаврыг амсах болсон. Нүгэл нь анхны төгс бүтээлийг үүрд мөнхөд гэмтээсэн. Христ эргэж ирэх хүртэл Бүтээл бүрэн эдгэрэхгүй (1 Коринт 15).

Хүний мөн чанар, бие махбодод учирсан энэхүү хохирлоос үүдэж, бидний махбодын төрөлх хүсэл үргэлж зөв, тэнцвэртэй байх боломжгүй болсон. Үнэндээ бидний хүслийн олонх нь тэнцвэрээ алдсан байдаг. Хүмүүс төрөлхийн буруу зүйлийг хүсдэг. Есүс хүний зүрх сэтгэлээс гардаг олон төрлийн нүглүүдийг тоочихдоо хүмүүний төрөлхийн нүгэлт байдлыг ажиглажээ (Марк 7:21-22).

Энэ хичээлээр бид бэлгийн харилцааны асуудлуудын талаар ярилцаж байна. Хүний бүх хүслийн дотор бэлгийн дур хүсэл хамгийн хүчтэй нь юм.

Бэлгийн буруу хүсэл нь түүнийг мэдэрч буй хүний хувьд өөрийнх нь төрөлх чанар шиг санагддаг. Энэхүү төрөлх хүслээ биелүүлснийхээ төлөө буруутгагдах ёсгүй гэж тэрээр бодож магадгүй. Гэсэн хэдий ч ямар ч хүн гаж хүслээ зөв болгохын тулд эсэргүүцэх ёстой. Хүнд худал хэлэх, хулгайлах, хүчирхийлэх, залхуурах, тэвчээргүй байх төрөлхийн мөн чанар бий. Хүмүүс өөрийнхөө төрөлх байдалдаа хариуцлага хүлээхгүй ч төрөлх хүслээ дагаж нүгэл үйлдвэл гэм буруутай болдог.

Заримдаа хүүхэд насандаа амссан хүчирхийлэл эсвэл бусад нөхцлөөс шалтгаалан ижил хүйстэнээ сонирхох эсвэл бусад бэлгийн буруу хүсэлд уруу татагддаг. Гэсэн хэдий ч бэлгийн буруу хүсэл нь бусад нүглээс ялгаатай гэж хандах нь буруу юм. Ямар ч шалтгаантай байсан хүнд Бурханы аврал, ариусгал хэрэгтэй.

Буруу хүсэл зарим хүмүүсийн хувьд хэвийн мэт санагддагт гайхах зүйлгүй юм. Нүгэл нь нүгэлт хүслийг мэдэрч буй хүнд хэвийн, төрөлхийн зүйл мэт санагддаг.

Бид төрөлхийн уур хилэнгийн хүүхдүүд юм (Ефес 2:3). Бид төрөлхийн нүгэл үйлдэхээр гажуудсан бөгөөд төрөлх мэт санагддаг нүгэл үйлдсэнээрээ өөрсдийгөө шийтгэлд авчирдаг. Хүн тодорхой нүгэлт хүсэлтэй төрдөг ч гэсэн энэ нь нүгэл үйлдэх ёстой гэсэн үг биш юм.

► Яагаад бид бүх төрөлх хүслээ дагах ёсгүй вэ?

Библид биднийг Христтэй адилхан болох ёстой гэж хэлдэг (Ром 8:29). Бид Эзэн Есүс Христийг өмсөх ёстой. Бидний махан биеийн хүсэл амьдралын үндэс болох ёсгүй. Харин бид буруу өдөөгч хүслээ Бурханы эрх мэдэлд захируулах ёстой (Ром 13:14).

► Буруу өдөөгч хүслээ Бурханы эрх мэдэлд захируулах гэдэг нь юу гэсэн үг вэ?

Та бэлгийн дур хүслээ таны туйлын зорилгод (Бурханы дүр төрхийг харуулж Бурханыг алдаршуулах) захируулах ёстой. Христийг дагах амьдрал бол танд байгаа Бурханы дүр төрхтэй нийцэх амьдрал юм.

Хүн өөрийнхөө талаар зөв ойлголттой байх нь

Олон хүн хүний төрөлх чанар нь тэднийг зөв замд хөтөлнө гэж буруугаар итгэдэг. Өөрийнх нь төрөлх чанараас гарч буй хүсэл нь тэднийг сэтгэл хангалуун байдал руу хөтөлнө гэж үзэх нь боломжтой мэт. Тэд хүний мөн чанар нь нүглийн улмаас гэмтсэн тул бүрэн найдах боломжгүй гэдгийг ухаардаггүй. Хүний төрөлх хүсэл гажсан байдаг тул сэтгэл хангалуун байдалд хүргэхгүй. Бурхангүйгээр хүний төрөлхийн хүсэл түүнийг ёс суртахууны хувьд зөв зүйл рүү ч хөтлөх боломжгүй.

Хүмүүс амьдралынхаа зорилгыг өөрсдөө бий болгодог учраас өөрийн хүсэл, мэдрэмжийг дагах ёстой гэж үздэг. Тэд ямар нэгэн эрх мэдэл эсвэл ёс суртахууны шаардлагад хязгаарлагдахгүйгээр өөрийгөө тодорхойлсон байх нь чухал хэмээн итгэдэг. Юу зөв, үнэ цэнтэй болохыг хувь хүн өөрөө шийдэх ёстой гэж боддог. Тэд өөрсдийн мөн чанарыг зөв зам руу хөтөлнө хэмээн итгэдэг. Тэдний үйлдлийг нь хязгаарладаг байгууллага, дүрэм журамд тэд таагүй ханддаг. Хүний гажуудсан мөн чанар нь Бурханы Үгийн оронд ёс зүйн хэм хэмжээ болдог.

Бэлгийн харилцаа нь хүний төрөлх чанарын хүчирхэг хэсэг учраас олон хүмүүс бэлгийн хүсэл нь өөрсдийг нь хэн болохыг тодорхойлдог гэж үздэг. Өөрсдийгөө хэн гэдгээ танин мэдэхийн тулд бэлгийн хүслээ дагах ёстой гэж боддог. Хүмүүс бэлгийн харилцааг зөвхөн хүсдэг эсвэл хийдэг зүйл биш, харин тэд хэн байгааг тодорхойлох зүйл гэж үздэг. Тэд үүгээр өөрийгөө тодорхойлдог.

Дэлхийн үзэл бодлоос ялгаатай нь Библи биднийг Бурханы дүр төрхөөр бүтээгдсэн, Бурхантай харилцах зорилготойгоор бүтээгдсэн гэж хэлдэг. Энэ бол хүн болохын хувьд бид хэн бэ гэдгийн жинхэнэ тодорхойлолт юм.

Дэлхий дээрх ямар ч зүйл бидний жинхэнэ хэн болохыг тодорхойлж чадахгүй. Дэлхий дээрх бидний шинж чанарууд бол одоо байгаа нөхцөл байдал маань л юм. Эдгээр нь бидний хэн болохыг тодорхойлдоггүй. Бидний угсаа гарвал, нийгмийн байр суурь, эдийн засгийн байдлын аль нь ч бидний хэн болохыг тодорхойлдоггүй, энэ бол зөвхөн бидний нөхцөл байдал юм. Эмч, шоу бизнесийн од эсвэл үндэсний хэмжээний удирдагч хэн ч байсан тэр хүн бол Бурханы өмнө Түүний дүр төрхөөр бүтээгдсэн бүтээл бөгөөд энэ тодорхойлолт л хамгийн чухал нь юм.

Бэлгийн харилцаа бол бидний нөхцөл байдлын хүчирхэг тал юм. Бидэнд бэлгийн гажуудал, дур хүсэл, сэтгэл дундуур байдал бий. Гэхдээ эдгээр нь бидний хэн болохыг тодорхойлдоггүй; харин нөхцөл байдлын нэг тал юм.

Адамын нүгэл хүн төрөлхтнийг Бурханаас салгасан учраас бид нүгэлт мөн чанартай төрдөг (Ром 5:18). Гэвч бидний нүгэлт байдал ч бидний хэн болохыг тодорхойлдоггүй; энэ нь бидний нөхцөл байдал бөгөөд Бурханы нигүүлсэл ба хүчээр өөрчлөгдөх боломжтой юм (Ром 5:19).

► Хүний өөрийн тодорхойлолт болон нөхцөл байдлын ялгаа юу вэ?

Хүний өөрийн тодорхойлолт ба хувийн ёс зүй

Ёс зүй нь үүн дээр суурилдаг учраас хүний өөрийн тодорхойлолт, тухайн хүн өөрийгөө хэн гэж тодорхойлох нь чухал юм. Ёс зүй гэдэг нь зөв эсвэл буруу зан байдлыг тодорхойлдог зарчмууд юм. Хэрэв хүн бэлгийн харилцаа нь түүний хэн болохыг тодорхойлдог гэж итгэвэл бэлгийн чиг хандлагаа дагах нь зөв гэж үзэх болно.

Заримдаа хүн "Би ингэж төрсөн; ийм зүйл хийх нь миний хувьд төрөлхийн; тиймээс миний буруу биш" гэж хэлдэг. Гэвч биднийг нүгэлт мөн чанартай төрсөн гэж Библи заадаг (Ром 5:12, Ефес 2:3). Бид төрөлхийн ингэж төрсөн хэмээн нүгэлт чанараа дагах нь зөв биш юм.

Бидний нүгэлт байдал нь бидний өөрийн тодорхойлолт биш юм. Бидний нүгэлт чанар бол нөхцөл байдал. Бид бэлгийн харилцаагаар тодорхойлогдохгүй. Харин Бурханы дүр төрхөөр бүтээгдсэн нь бидний хэн болохыг тодорхойлдог. Хэрэв бид энэхүү бодит байдлыг ойлгож чадвал, юу нь зөв ба буруу болохыг Бурхан шийддэг гэдгийг бид ухаарна. Бидний өөрийн тодорхойлолт нь ариун зан байдлын зөв хэм хэмжээг ойлгоход тусалдаг.

► Хүн хэн болохоо ойлгож мэдэх нь түүний ёс зүйд хэрхэн нөлөөлдөг вэ?

Хүйсийн талаарх зөв ойлголт

Хүн болон олон амьтад эрэгтэй, эмэгтэй хүйсээр ялгаатай болохыг бид мэднэ. Бид Бурханыг эрэгтэй эсвэл эмэгтэй байх боломжтой гэж хэлж болох ч энэ нь буруу юм. Бурхан бол хүйс бий болохоос өмнө оршиж байсан, агуу мөн чанартай оршихуй юм. Хүн хоёр хүйстэйгээр Бурханы дүр төрхөөр бүтээгдсэн (Эхлэл 1:27). Эр, эм хүйсийн аль аль нь Бурханы дүр төрхийг илэрхийлдэг.

Бурханы дүр төрх бол зөвхөн хүний мөн чанарын нэг хэсэг биш юм. Бурханы дүр төрх бол бидэнд өгөгдсөн хайрлах чадвар, гоо үзэсгэлэнг үнэлэх чадвар, зөв бурууг ойлгох чадвар зэрэг тодорхой шинж чанарууд төдий зүйл биш юм. Хүний бүхий л мөн чанар Бурханы дүр төрхийг харуулдаг. Бурханы дүр төрхөөс өөр юу ч бидний оршихуйн мөн чанар биш юм. Бид Бурханы дүр төрхөөр бүтээгдсэн анхны бүтээлүүд юм. Хүний нөхцөл байдлын ямар ч нарийн ширийн зүйлс бидний хэн болохыг тодорхойлох ёсгүй бөгөөд бидний ёс зүйн үндэс суурь байж чадахгүй.

Бурхан хүйсийг сонгосон явдал нь хүн бүр Бурханы дүр төрхөөр бүтээгдсэн гэдгийг харуулахын тулд юм. Зарим хүмүүс Бурханы оноосон хүйсийг хүлээн зөвшөөрдөггүй. Тэд эсрэг хүйсийн хүний амьдралаар амьдрахыг оролддог. Зарим хүмүүс мэс заслын аргаар бие махбодоо өөрчлөхийг ч хүсдэг. Хүн бие махбодоо өөрчилснөөр хүйсээ өөрчилж чадахгүй тул энэ нь Бурханы бүтээлийг эмгэнэлтэйгээр гэмтээж буй хэрэг юм. Хүн зөвхөн бие махбодоор бус, харин хүн бүр бодгаль чанараараа эрэгтэй, эмэгтэй хүн байдаг. Бурхан бидэнд оноосон хүйсээр дамжуулан Түүнийг алдаршуулж, дүр төрхийг нь тусган харуулахыг Тэр биднээс хүсдэг.

► Нэг суралцагч Еврей 13:4 эшлэлийг бүлэгт уншина.

Энэ эшлэл гэрлэлтийг бид маш их хүндэтгэх ёстой гэдгийг сануулдаг. Бэлгийн нүгэл бол гэрлэлтийг үл хүндэтгэж буй хэрэг юм. Бурхан бэлгийн ёс бус байдлыг шүүх болно.

► Нэг суралцагч 1 Коринт 6:18 эшлэлийг бүлэгт уншина.

Бэлгийн нүгэлд тачаангуй хүсэл, садар самуун байдал, завхайрал, цус ойртолт, хүчиндэлт, хүүхэд хүчирхийлэх, ижил хүйстний бэлгийн харилцаа, порнографийн хэрэглээ зэрэг багтана.

• Тачаангуй хүсэл: Ханьтайгаа биш хэн нэгэнтэй бэлгийн харилцаанд орохыг санаатайгаар төсөөлөх.

• Садар самуун байдал: Гэрлээгүй хүмүүсийн хоорондох бэлгийн харилцаа.

• Завхайрал: Гэрлэсэн хүнтэй бэлгийн харилцаанд орох.

• Цус ойртолт: Ойрын төрөл, хамаатан садантайгаа бэлгийн харилцаанд орох.

• Хүчиндэлт: Бэлгийн хүчирхийлэл, хэн нэгнийг хүсээгүй байхад нь бэлгийн харилцаанд оруулах.

• Хүүхэд хүчирхийлэх: Шийдвэр гаргах чадамжгүй, бэлгийн хүслээ удирдах хэмжээнд төлөвшөөгүй хүнтэй бэлгийн харилцаанд орох.

• Ижил хүйстний бэлгийн харилцаа: Ижил хүйстэй хүмүүсийн хоорондох бэлгийн харилцаа.

• Порнограф: Бэлгийн харилцаа үүсгэх зорилготой нүцгэн эсвэл сексийн үйлдлүүд харуулсан бичвэр, зураг, видео зэрэг.

Эдгээр нь бүгд гэрлэлтийн харилцааг зөрчиж буй хэрэг юм.

Санах—махан биед биднийг уруу татаж буй хүслүүд нь Бурхантай уулзсанаар бүрэн хангагдаж болох хэрэгцээнүүд юм. Бурханлаг бэлгийн харилцаа зөвшөөрөгдөх цорын ганц нөхцөл нь гэрлэлт дэх бэлгийн харилцаа юм. Ёс бус бэлгийн харилцаа нь... түрхэн зуурын таашаал өгч болох ч бид үүнийг амсахыг улам их хүсэх бөгөөд эцэстээ бидний сүнслэг хүслийг хордуулж үгүй хийнэ. Ёс бус бэлгийн харилцаа нь бидний ариун байдал, зөв шударга байдал, Бурханы оршихуйд мэдрэг байдлыг хоослохоос өөр юу ч өгөхгүй.[1]

Сургаалт үгс номын олон эшлэлд бэлгийн ёс бус байдал нь хүний амьдралыг сүйтгэж, үхэлд хүргэдэг гэдгийг анхааруулдаг (жишээлбэл, Сургаалт үгс 2:16-19 ба Сургаалт үгс 6:24-29, 32-33).

Робертсон МакКуилкин бичихдээ,

[Бэлгийн харилцааны талаарх Бурханы зорилго] нь тухайн үйлдлээс оюун санааны хувьд ч ижил хэмжээгээр хохирдог. Бурхан зүгээр л эрэгтэй, эмэгтэй хүнийг бүтээгээгүй; өөрийн мөн чанартай адил дотно, байнгын хувиршгүй гэрлэлт, нэгдмэл байдлыг тэдэнд зориулан бүтээсэн. Энэхүү тэргүүн зорилгыг биелүүлэхийн тулд дотно байдал нь маш онцгой, тууштай зориулалт эсвэл нэгдмэл байхыг шаарддаг. Оюун бодолдоо үнэнч итгэмжит байх нь хамгийн чухал юм. Онцгой дотно байдал, тууштай зориулалт, харилцан итгэлцэл нь хамгийн түрүүнд оюун бодолд зөрчигддөг.[2]

► Суралцагчид 1 Коринт 6:9-11, 15-20 ба Матай 5:27-30 эшлэлийг бүлэгт уншина.

Эрэгтэй, эмэгтэй хүмүүсийн хоорондох харилцааны талаар ахуй соёлын ялгаатай ойлголтууд бий. Эдгээр соёл нь Библийн ёс суртахууны хэм хэмжээнээс доогуур жишигт байдаг. Олон соёлд зөвхөн дэг журамтай нийгмийг хадгалахад зориулагдсан дүрэм бий. Тэд бэлгийн нүглээс үүдсэн муу үр дагавар эсвэл түүнтэй холбоотой дуулиан шуугианаас зайлсхийж болгоомжтой ханддаг. Библийн ёс суртахууны хэм хэмжээ нь бусдаас ялгаатай.

Харамсалтай нь зарим чуулган Библийн ёс суртахууны оронд өөрийн чуулганд тогтсон соёлыг дагадаг. Тэд нүгэл нь олны өмнө ил болсон, үүндээ хайхрамжгүй хандсан хүмүүсийг шийтгэдэг боловч, тэдэнтэй адил нүгэл үйлдсэн ч илүү болгоомжтой, нүгэл болон үүнээс үүдэн гарах үр дагаврыг нуун дарагдуулдаг хүмүүст хүлцэнгүй ханддаг.

Дээрх эшлэл нь эдгээр нүглийг үйлдэж буй хүмүүс бол итгэгч биш бөгөөд тэнгэрийн улсад очихгүй хэмээн бидэнд хэлдэг. Коринтын зарим итгэгчид эдгээр нүглийг өнгөрсөнд үйлдэж байсан боловч тэдгээрээс чөлөөлөгджээ.

Өөрийгөө итгэгч хүн гэж зарлаад эдгээр нүглүүдийг зөвтгөх ямар ч онол сургаал заасан бай тэр бол хуурамч сургаал юм. Хэрэв хүн Христийн дагалдагч гэж өөрийгөө хэлдэг хэдий ч бэлгийн нүгэл үйлддэг бол түүнийг чуулганаас зайлуулж, итгэгч гэж үзэхгүй байхыг Библи шаарддаг (1 Коринт 5:11-13).

Чуулганы удирдагчид сайн үлгэр дуурайл үзүүлэх ёстой. Чуулганы магтаалын удирдагчаа зохисгүй хувцаслахыг зөвшөөрөх эсвэл зүй бус бүжгийн хэлбэрийг зөвшөөрөх үед тэр нь ёс бус бэлгийн хүслийг хэвийн хэмээн үзэж буйг илэрхийлдэг. Тэд бэлгийн нүглийг ноцтой биш хэмээн үзэж буй хэрэг юм.

Нийгэм нь бэлгийн дур хүсэл өдөөхүйц задгай хувцаслаагүй нэгнийг гоё сайхан хувцасласан гэж үзэхгүй байж болно. Ялангуяа баяр наадмын зарим үйл ажиллагаанд оролцох үедээ чуулганы гишүүд энэ занганд ордог. Тэд нийгмийн чиг хандлагыг дагахгүй бол гоё хувцасласангүй гэж боддог. Чуулган үүнийг буруу гэж заах ёстой. Итгэгч хүн бусдад буруу хүсэл төрүүлэхүйц хувцас өмсөх ёсгүй. 1 Тимот 2:9-10-д хэн ч харсан итгэгч хүн болгоомжтой, цэвэр амьдралаар амьдарч, нүгэл үйлдэх эсвэл бусдыг нүгэл үйлдэхэд уруу татахыг хүсдэггүй нэгэн хэмээн мэдэгдэхээр хувцаслаж, үйлдэх ёстой гэж хэлдэг.

Порнограф гэдэг нь бэлгийн харилцаа үүсгэх зорилготой нүцгэн эсвэл сексийн үйлдлүүд харуулсан бичвэр, зураг, видео зэрэг юм.

Интернет нь порнографийг дэлхий нийтээр хялбархан хүртээмжтэй зүйл болгож байна. Интернет байгаагүй учраас ахмад пастор, удирдагчдын хувьд ийм уруу таталтад өртөөгүй байж магадгүй юм. Тэд залуу үеийнхэн ямар бэрхшээлтэй тулгарч байгааг бараг ойлгохгүй байж магадгүй. Гэхдээ хүмүүст чөлөөт цагаа өнгөрөөх сонголтод Библийн зарчмууд хэрхэн хэрэгждэгийг зааж сургах ёстой.

Порнограф бол буруу юм. Учир нь энэ нь хүнийг садар самуун, завхайрал, бэлгийн гаж буруу үйлдлүүдийг төсөөлөхөд хүргэх зорилгоор бүтээгдсэн юм. Энэ нь хүний нүгэлт хүслийг өдөөх зорилготой. Порнограф нь Бурханы жигшдэг ёс бус үйлдлүүдэд оролцох боломжийг хүнд олгодог. Есүс хэлэхдээ эдгээр зүйлийг төсөөлөхөөр сонгож буй нь ч нүгэл гэжээ (Матай 5:28).

Порнограф нь хүмүүс болон тэдний харилцааг үнэ цэнгүй болгодог тул буруу юм. Энэ нь бэлгийн харилцааг хувиа хичээсэн үйлдэл болгон хувиргадаг. Энэ нь хүмүүсийг эрүүл харилцаанд зориулагдан Бурханы дүр төрхөөр бүтээгдсэн үнэ цэнтэй гэж үзэхийн оронд таашаал авахын тулд ашиглах хэрэгсэл гэж хандахад хүргэдэг.

Порнограф бол донтуулагч юм. Порнограф нь ерөнхийдөө нүглээр боолчлогч (Иохан 8:24, 2 Петр 2:19). Порнограф хэрэглэдэг хүн үүнээс хүчтэй хэрэгцээг мэдэрч байдаг. Тэрээр үүнгүйгээр амьдрахыг төсөөлж ч чаддаггүй. Порнографаас авдаг төсөөллүүдгүйгээр амьдрал нь хоосон, сонирхолгүй мэт санагддаг. Бусад бүх донтолтын нэгэн адил түүний хүсэл нь бүх зүйл болдог бөгөөд хэрэглэгч нь үүний төлөө амьдралынхаа сайн сайхан зүйлсийг золиосолж эхэлдэг.

Порнограф бол үйл явц юм. Хэрэглэгч нарт улам бүр ил тод, гаж буруу материал хэрэгтэй болдог. Тэд өмнө нь жигшиж, айж байсан зүйлсээсээ сайхан зүйлсийг мэдэрч эхэлнэ.

[1]Порнограф бол хортой. Хэрэглэгч хэвийн харилцаанд орох чадваргүй болдог. Түүний хүсэл гаж болж хэзээ ч ханаж чадахгүй. Тэр бусдыг хүчирхийлж байгаагаа ч мэдэхээ больж, өөрийн таашаалын төлөө бусдыг зовооход бэлэн болдог.

Порнографийн зарим үр дагавар

Порнографид дүрслэгдсэн үйлдлүүдийг төсөөлөх нь үзэгчдийн оюун ухаан, биед өөрсдөө эдгээр үйлдлийг биечлэн хийж байгаа мэт нөлөөлдөг.

Порнограф нь тархинд ямар ч бэлгийн харилцаанд орохоос илүү хүчтэй таашаал өгч, бодит бус нөхцөл байдлыг мэдрүүлдэг.[2] Тархи нь таашаалын энэ хэт өндөр түвшинд дасан зохицдог. Үүнээс болж тархи нь порнографийн хэмжээг байнга нэмэгдүүлэхийг шаарддаг бөгөөд таашаалын мэдрэмжээ үргэлжлүүлэхийн тулд улам бүр гаж буруу порнограф шаарддаг. Тархины химийн өөрчлөлт нь эцэстээ хүнийг бодит амьдрал дээрх бэлгийн харилцаанд орох эсвэл таашаал авах чадваргүй болгодог. Таашаалын бодис хэт ихэссэний улмаас шийдвэр гаргах чадвартай тархины хэсэг бас гэмтдэг.

Бурхан бэлгийн харилцааг хосуудын харилцааг бэхжүүлэх зорилготойгоор бүтээсэн. Бэлгийн харилцааны үед тархинд ялгардаг гормон нь хосуудыг бие биетэйгээ сэтгэл санааны хувьд холбож, харилцааг нь бэхжүүлэх үүрэгтэй. Энэ бол гэрлэлт доторх гайхалтай бэлэг юм. Гэсэн хэдий ч порнограф үзэх нь үзэгчийг порнографтайгаа сэтгэл санааны хувьд холбогдоход хүргэдэг.

Порнограф хэрэглэсний дараах гэмшил, ичгүүр нь хүмүүсийн харилцааг тусгаарлаж, эрүүлээр бусадтай харилцах чадамжгүй болгодог. Энэ нь гэрлэлт доторх итгэлцлийг бас устгадаг.

Тархинд ялгарах бодисын тэнцвэргүй байдал үүсгэдэг учраас порнограф хэрэглэх нь сэтгэл гутралд оруулж болно.

Порнографид дүрслэгдсэн дүр зураг заримдаа бодит амьдрал дахь бэлгийн харилцаанд хүчирхийлэл, зүй бус үйлдэл хийхэд хүргэдэг.

Пасторууд, эцэг эхчүүд залуу үеийнхэнд порнографийн аюулыг анхааруулах ёстой. Эцэг, эхчүүд уруу таталтыг эсэргүүцэх хангалттай төлөвшөөгүй хүүхдүүддээ интернетийг хязгааргүй ашиглах эрх өгөх ёсгүй. Порнографийн уруу таталттай тэмцэж буй хүн ялалт, бүтэлгүйтлээ итгэж болох, бурханлаг нэгэнд тогтмол мэдээлэх ёстой. Төлөвшсөн итгэгчтэй тогтмол уулзах нь ариун байдалд үнэнч байж, тогтмол ялалт байгуулахад нь донтолттой тэмцэж буй нэгэнд тусална.

► Порнографийн донтолтоос хамгаалахын тулд хүмүүст ямар дадлуудыг зөвлөх вэ? Чуулган хэрхэн тусалж чадах вэ?

Хүүхэд хүчирхийлэх гэдэг нь хүүхэдтэй бэлгийн харилцаанд орох явдал юм. Үүнийг бэлгийн харилцааны гаж хэлбэр гэж үзнэ. Энэхүү үйлдэл бузар зүйл бөгөөд олон шалтгаантай. Үүнд:

• Гэрлэлтийн гэрээн дэх бэлгийн харилцааны талаарх Бурханы сайн сайхан төлөвлөгөөг үгүйсгэдэг (Еврей 13:4).

• Хүүхдийн цэвэр ариун байдлыг хулгайлдаг – ингэснээр хүүхэд мэдэж болохгүй зүйлсийн талаар ойлголттой болдог.

• Хүүхдийг онгон байдлаас нь салгадаг (1 Тесалоник 4:3-7).

• Хүүхдэд гэм буруугийн мэдрэмж төрүүлдэг; хүүхэд буруу үйл ажиллагаанд оролцож байгаа боловч жинхэнэ сонголт хийх чадваргүй эсвэл зөвшөөрөгдөөгүй байдаг.

• Хүүхдийг төлөвшөөгүй бэлгийн харицааны талаар буруу цагт нь шийдвэр гаргахад хүргэдэг.

• Хүүхдийг ирээдүйд ёс зүйгүй үйлдэл хийх магадлалыг нэмэгдүүлдэг, учир нь тэд өөрсдийгөө буруутай эсвэл үнэ цэнгүй гэж мэдэрдэг (Матай 18:6).

• Хүүхдийг ирээдүйд гаж буруу эсвэл хүчирхийллийн үйл ажиллагаанд оролцох уруу таталт болдог.

• Өөрийгөө хамгаалж чадахгүй, сул дорой хүмүүсийг хүчирхийлдэг.

• Хязгааргүй үнэ цэнтэй Бурханы дүр төрхөөр бүтээгдсэн нэгнийг гэмтээдэг (Эхлэл 1:27).

Хүүхэд хүчирхийлэх явдал гэр бүл болон найз нөхдийн дунд тохиолддог. Гэр бүлийн гишүүд болон найз нөхөд нь итгэж болох хүмүүс гэж үзэгддэг учраас хүүхэд болсон явдлын талаар хүнд хэлэхээс айдаг тул тэднийг сэжиглэдэггүй.

Хүчиндэх гэдэг нь хүнийг (хүүхэд эсвэл насанд хүрсэн хүн) өөрийнх нь зөвшөөрөлгүйгээр бэлгийн харилцаанд албадан оруулах явдал юм. Хүүхэд хүчирхийлэхтэй ижил олон шалтгааны улмаас үүсдэг бузар үйл бол хүчиндэх юм (Дэд хууль 22:25-27).

Бэлгийн хүчирхийллийн өөр нэг хэлбэр бол бэлгийн мөлжлөг/хүн худалдаалах юм. Дэлхий даяар хүүхэд, залуучуудыг танихгүй хүмүүс хулгайлж, эсвэл гэр бүлийн гишүүд нь худалдаж, садар самуун порнографид ашигладаг. Ядуу амьдралтай гэр бүлүүд мөнгөний шалтгаанаар хүүхдүүдээ энэ бузар бизнесд татан оролцуулдаг. Үүнээс хэн нэгэн ашиг олдог боловч хүүхдүүд зөвхөн бие махбодын хувьд хохироод зогсохгүй сэтгэцийн болон сэтгэл санааны хувьд аймшигтайгаар гэмтдэг. Энэ бол ядуу, сул дорой хүмүүсийг гэм нүглээр дарлаж буй хэрэг бөгөөд Бурхан үүнийг шүүх болно (Сургаалт үгс 14:31).

Хүүхдийн эсрэг эдгээр нүгэл Бурханы зүрхийг шархлуулдаг (Матай 18:10-14, Дуулал 146:7-9). Эдгээр нүглийг үйлдсэн хүмүүс шийтгэлгүй өнгөрөхгүй (1 Тесалоник 4:6, Езекиел 7:8-9). Итгэгчид Бурханы зүрхнээс гарах хайр, энэрэлийг хуваалцаж, боолчлогдсон хүмүүсийг хамгаалах, аврах, эдгээхийн төлөө ажиллах ёстой (Сургаалт үгс 24:11-12, Иов 29:12-16, Дуулал 72:12-14).

Гар хангалга гэдэг нь бэлгийн таашаал авах эсвэл бэлгийн дур хүслээ тайлахын тулд өөрийн бэлэг эрхтнээ өдөөх үйлдэл юм.

Библид гар хангалгыг ёс бус гэж тодорхойлсон зүйл байхгүй. Гэсэн хэдий ч гар хангалга нь тачаангуй бодол, порнографийн хэрэглээ, садар самуун нүгэл рүү уруу татах боломжтой (Матай 5:27-28, Матай 15:19-20).

Гар хангалга нь хүнийг донтуулдаг бөгөөд үүнийг хийх нь ухаалаг хэрэг биш. Та үүнийг хийх тусам улам их хүсдэг.

Хүчээр гар хангалга хийж буй нь заримдаа тухайн хүнд сэтгэл санаа, харилцааны асуудал, эсвэл өнгөрсөнд үйлдэгдсэн бэлгийн хүчирхийлэл зэрэг гүн гүнзгий асуудал байсныг илтгэдэг.

► Суралцагчид 1 Коринт 6:12-13, 18-20 ба 1 Тесалоник 4:1-8 эшлэлийг бүлэгт уншина.

Бурхан эхнэр, нөхөр хоёрыг сэтгэл санаа, сүнслэг байдалд нэгдмэл байлгахын тулд гэрлэлт доторх бие махбодын нэгдлийг бүтээсэн (1 Коринт 6:16-20, Малахи 2:15).

Олон хүмүүс... гэрлэх хүртлээ ганц бие байхдаа гар хангалга хийх нь тэдэнд тустай гэж үздэг. Гэсэн хэдий ч энэ нь дадал зуршил болж хувирвал ирээдүйд гэрлэлт дэх бэлгийн харилцааны сайхан, дотно байдалд хор хөнөөлтэй гэдгийг тэд ухаардаггүй.

Гар хангалга нь бэлгийн харилцааны үндсэн зорилго болох хосыг бие махбод, сэтгэл санааны хувьд нэг болгох гэдгийг үгүйсгэдэг.... Гар хангалгыг гэрлэлт дэх эрүүл, хэвийн бэлгийн харилцаанд орлуулагч болгон ашиглаж болохгүй.[1]

Хэрэв гар хангалга нь асуудалтай бол гэрлээгүй хүн юу хийх ёстой вэ? Хэрэв хэн нэгэн зөвхөн бэлгийн дур хүслээ хангах зорилгоор гар хангалга хийж байсан ч, өдөр тутам уруу таталтыг эсэргүүцэж татгалзах нь л сайн хэрэг бөгөөд гар хангалга нь хэзээ ч бэлгийн харилцааны талаарх Бурханы зорилгыг биелүүлэхгүй.

Хэрэв хэн нэгэний амьдралд ямар нэгэн ёс бус зүйл байгаа бол нүглээ гэмшиж, орхих ёстой. Тэд өөрсдийнх нь төлөө залбирч, зөвлөгөө өгөх бурханлаг халамжлагч нарт ялалт, бүтэлгүйтлийнхээ талаар байнга тайлагнах ёстой.

Хэрэв гар хангалга нь сэтгэл зүйн, харилцааны асуудал, эсвэл өнгөрсөн бэлгийн хүчирхийллээс улбаатай бол мэргэжлийн христитгэгч зөвлөгч нараас тусламж авах хэрэгтэй.

Бурхан гэрлэлтийг эрэгтэй, эмэгтэй хүмүүсийн хоорондох насан туршийн, үнэнч харилцаа байхаар бүтээсэн. Бурхан Адамд туслагч хэрэгтэйг харсан (Эхлэл 2:18). Туслагч гэдэг үг нь бусадтай таарч тохирох, олон аргаар бусдад туслахыг хэлнэ. Бурхан Адамын туслагчаар эрэгтэй хүнийг биш, харин эмэгтэй хүн бүтээсэн (Эхлэл 2:22). Бүтээлийн эцсийн зорилго нь хүн төрөлхтний төлөөх гэрлэлтийн зарчмууд бөгөөд гэрлэлтээр дамжуулан эрэгтэй, эмэгтэй хоёр нэгдмэл болдог (Эхлэл 2:24).

Есүс гэрлэлтийг Бурхан ямар загвараар бүтээснийг хэлсэн (Матай 19:4-6). Тэрээр Эхлэл номоос эш татаж, эрэгтэй, эмэгтэй хоёр хүн нэгдэж онцгой, хувиршгүй харилцааг бий болгодог талаар өгүүлдэг.

Элч Паул гэрлэлтийн талаар олонтоо тайлбарласан байдаг. Тэр гэрлэлт бол Христ болон чуулганы харилцааг бидэнд зааж буй дүрслэл гэж хэлсэн (Ефес 5:22-33). Ефес номд эрчүүдэд хандан эхнэртэйгээ хэрхэн харилцахыг зааварласан. Тэрээр Эхлэл болон Матай номоос эр хүн, эхнэртэйгээ харилцах онцгой харилцааны талаар эш татсан байдаг (Ефес 5:31). Эндээс гэрлэлт бол эрэгтэй, эмэгтэй хоёр хүний хоорондох харилцаа гэдэг нь тодорхой харагдаж байна.

Леви номд Израилд зориулсан Бурханы хуулийг хэрхэн хэрэглэх талаар өгүүлдэг. Энд эрэгтэй хүн нь эмэгтэй хүнтэй адил өөр эрэгтэйтэй хэвтэх нь жигшил зэвүүцэлтэй хэрэг гэж тэмдэглэсэн байдаг (Леви 18:22). Ижил хүйстний бэлгийн харилцаа нь үүнийг үйлдэгчдийн хувьд үхлийн шийтгэлтэй бөгөөд учир нь хоёул жигшил зэвүүцэлтэй хэрэг үйлдсэний тул юм (Леви 20:13).

Зарим хүмүүс Леви номыг орчин үеийн хүмүүст хамааралгүй гэж хэлдэг. Леви номын зарим тушаалууд нь ёслолд зориулагдсан байсан нь үнэн. Гэсэн хэдий ч Леви 18-20-р бүлгийн тушаалууд нь ойрын төрөл нэгэнтэйгээ болон амьтантай бэлгийн харилцаа үйлдэх, охиноо садар самуунд уруу татах зэрэг бэлгийн гаж буруу үйлдлийг хориглосон байдаг. Эдгээр бүлэгт мөн хүүхдээр тахил өргөх, хулгайлах, шүтээн шүтэх, дүлий эсвэл сохор хүмүүстэй зүй бусаар харьцах, ядуусыг дарлах, харийн хүмүүстэй зүй бусаар харьцах, хуурамч жин хэрэглэхийг хориглосон тушаалууд бий. Эдгээр тушаалууд нь Бурханы ёс суртахууны болон шударга ёсны хэм хэмжээг зааж, бүх цаг үе, бүх газар орны хүмүүст хамаатай болох нь тодорхой байна.

► Нэг суралцагч Ром 1:18-32 эшлэлийг бүлэгт уншина.

Энэ эшлэлд Бурханыг санаатайгаар эсэргүүцдэг хүмүүсийн дээр Бурханы шүүлт ирнэ гэдгийг хэлдэг. Энд хэлэхдээ цорын ганц үнэн Бурхан, Бүтээгчийн тухай мэдлэгийг үгүйсгэснийхээ дараа хүн төрөлхтөн хуурамч шүтээн шүтэгч нар болж, бүтээгдсэн зүйлд мөргөж эхэлсэн гэж өгүүлдэг. Тэд үнэнийг үгүйсгэж, энэ нь бэлгийн ёс бус байдалд хүргэсэн бөгөөд улмаар ижил хүйстний бэлгийн харилцаа руу тэднийг аваачсан. Энд ижил хүйстний бэлгийн харилцаа нь төрөлх мөн чанарын эсрэг зүйл хэмээжээ. Зарим хүмүүс энэ хэсэгт ижил хүйстний хүчирхийллийн талаар өгүүлсэн гэж тайлбарладаг боловч үнэндээ хүмүүс хамтдаа буруу зүйл хийхийг сайн дураараа үйлдэж, үүнийхээ төлөө шүүгдсэн тухай бичжээ. Олон төрлийн нүглийг энд жагсааж, Бурханыг эсэргүүцэх хандлагын талаар дүрсэлсэн.

Элч Паул Бурханы буруушаадаг бусад нүглийн хамт ижил хүйстний бэлгийн харилцааг бичсэн байдаг (1 Коринт 6:9-10, 1 Тимот 1:9-10).

Зарим чуулган бэлгийн нүгэл үйлдсэн хүмүүст хэрхэн хайр энэрэл үзүүлэх талаар бэрхшээлтэй тулгардаг. Зарим чуулган бэлгийн нүглийн янз бүрийн хэлбэрийг хэвийн, төрөлхийн, зайлшгүй хэмээн зөвтгөдөг.

► Бэлгийн ёс суртахууны асуудлын талаар чуулганы үүрэг хариуцлага юу вэ?

Зөв шударга байдлыг зааж, хайрлах нь

Заримдаа чуулган хор хөнөөл болон гаж буруу талыг нь бага гэж үздэгээс үүдэн бэлгийн ёс бус хэлбэрүүдэд төдийлөн анхаарал хандуулдаггүй. Жишээлбэл, залуу, гэрлээгүй хүмүүст уруу таталтыг ялж амьдрах талаар заадаггүй учраас тэд бэлгийн харилцаанд орж байна гэж таамагладаг. Итгэгчид ариун амьдралын тухай Бурханы хэм хэмжээг дагаснаар, бэлгийн харилцааг зөвхөн гэрлэлтдээ зориулах ёстой.

Чуулганы зарчмууд нь Библид заасан шиг тодорхой байх ёстой. Гэрлэлтээс гадуур бэлгийн харилцаанд орсон хүмүүсийг Бурхан шүүх болно (Еврей 13:4). Итгэгчид ёс бус бэлгийн харилцаатай хүнийг шүтэн бишрэх ёсгүй. Христэд итгэгч нар бэлгийн ёс бус байдлын талаар хошигнох ёсгүй. Жирэмслэлт, өвчнөөс зайлсхийхийн тулд бэлгийн харилцаанд болгоомжтой хандахыг дэлхий дахин зааж буй ч, чуулганы байр суурь үүнээс ч илүү чухал юм. Чуулган бэлгийн нүгэл нь гуниг харуусал, эвдэрсэн гэр бүл, уруу таталт, сэтгэл ханамжгүй байдал, өөрийгөө буруутгах мэдрэмжид хүргэдэг гэдгийг заах ёстой.

Сайнмэдээг хуваалцах нь

Чуулган бүх нүгэлтнийг хайрлаж, Христийн нигүүлсэл, уучлалыг тэдэнд үзүүлэх ёстой.

Уруу таталтыг мэдрэх нь нүгэл биш юм. Христ хүртэл уруу татагдаж байсан боловч нүгэл үйлдээгүй (Еврей 4:15). Чуулган уруу таталтад орсон хэн нэгэнд, тэр ч байтугай ёс бус бэлгийн үйлдэлд уруу татагдсан ч байсан түүнд ялтай, итгэл найдвараа алдсан мэт хандах ёсгүй. Хүн бүрд байх буруу хүсэл нь өөр өөр боловч үүний шалтгаан нь хүн бүр төрөлхийн нүгэлт мөн чанартай, сүнслэг гажуудалд унасан учраас юм.

Пастор нь гаж буруу хүсэлтэй хүнд заахад тусгайлан бэлтгэгдээгүй хэдий ч тэрээр нүгэл үйлдсэн хүмүүсийн адил тэдэнд зөвлөгөө өгч, тусалж чадна (Энэ хичээлийн дараагийн хоёр хэсэгт бэлгийн ёс бус байдалд уруу татагдахдаа хэрхэн даван туулах талаар илүү нарийвчилсан зөвлөгөө бий).

► Чуулганы гишүүн бэлгийн ёс бус зүйл хийсэн үед чуулган хэрхэн хариу үйлдэл үзүүлэх вэ?

Нүгэлтнийг шинэчлэх нь

Галат 6:1-д нүгэл үйлдсэн итгэгчийг чуулган шинэчлэн өөрчлөх ёстой гэж хэлсэн байдаг. Энэ нь нүгэл үйлдсэнийхээ дараа итгэгч хүн үйлчлэлээ хадгалж үлдэх эсвэл хурдан хугацаанд үйлчлэлдээ эргэн орох гэсэн үг биш юм. Дахин шинэчлэх гэдэг нь чуулганы нөхөрлөл, халамжинд эргэн хүлээн зөвшөөрөгдөх гэсэн утгатай. Хэрэв итгэгч хүн үнэн сэтгэлээсээ гэмшвэл Бурхан болон чуулган түүнийг уучилна. Чуулган түүнийг нүглээ даван дийлсэн ялалтаа хадгалахад нь тусалж, сүнслэг дэмжлэг үзүүлэх ёстой. Шинэчлэгдсэн итгэгч нь хариуцлагатай амьдарснаар сүнслэг гэр бүлийнхээ итгэлийг аажмаар олж авах боломжтой.

Хэрэв гэрлээгүй эмэгтэй жирэмсэлсэн бол чуулган түүнийг сүнслэг шинэчлэл хийлгүйгээр чуулганы нөхөрлөл, халамжаас хасах ёсгүй. Хэрэв гэмшиж, сүнслэг хариуцлагад захирагдвал түүнийг уучилна. Түүний үйлдсэн нүгэл нь түүнтэй холбогдсон эрэгтэй хүнийхээс илүү биш. Заримдаа эмэгтэйн үйлдсэн гэм буруугийн үр дагавар ил байдаг учраас түүнд хатуу хандах тохиолдол бий.

Зарим чуулган гэрлэлтээс гадуур төрсөн хүүхдэд өөрөөр ханддаг нь буруу бөгөөд учир нь үүнд хүүхдийн буруу байхгүй. Чуулган хүүхдийг хайрлаж, хүлээн зөвшөөрснөөрөө нүглийг хүлээн зөвшөөрсөн гэсэн үг биш.

Сул дорой хүмүүсийг хамгаалах нь

Зарим нийгмийн бүлэгт гэрлээгүй охиныхоо жирэмслэлтээс ичсэн эцэг эхчүүд гэр бүлийнхээ нэр хүндийг аврахын тулд төрөөгүй хүүхдийг хөнөөх үйлдэл гаргадаг. Гэвч аллага хийх сайн шалтгаан гэж байдаггүй (Гэтлэл 20:13). Төрөөгүй хүүхэд бүр Бурханы дүр төрхөөр бүтээгдсэн (Эхлэл 9:6, Дуулал 139:13-14). Тэр охины нялх хүүхэд хайрлагдаж, асран хамгаалагдах ёстой.

Ядуурлын эсрэг боломжоор хангах нь

Чуулган бол итгэлийн гэр бүл юм. Чуулган зөвхөн нүглийг буруушаах нь хангалттай биш. Чуулган өөрийн гишүүдээ халамжлах ёстой. Жишээлбэл, нүглийн шалтгаанаар санхүүгийн дэмжлэг авч буй хэн нэгэнд өөр арга замаар орлого олох боломжийг харахад нь туслах хэн нэгэн хэрэгтэй.

Жишээлбэл, хэсэг охид нэлээн том хэмжээний чуулганд хамрагддаг бөгөөд найрал дуунд үйлчилдэг байв. Тэд ядуу гэр бүлээс гаралтай байжээ. Охид гэр бүлдээ туслахын тулд эрчүүдтэй ёс бус харилцаанд ордог байв. Ийм тохиолдолд чуулган юу хийх ёстой вэ?

► Танай чуулган хүмүүсийг нүгэлт амьдралаас нь салахад хэрхэн туслах вэ?

Бид энэ хичээлээр олон хүнд сэдвүүдийг хэлэлцлээ. Энэ хичээлийг уншиж буй олон хүн эдгээр асуудлуудтай тэмцэж байсан байх. Зарим уншигчдын хувьд уруу таталтад орж буй итгэгчдэд хэрхэн зөвлөхийг суралцах шаардлагатай чуулганы ахлагч, удирдагчид ч байж болох юм.

Ямар ч төрлийн уруу таталт байсан, даван туулахад нь туслах тодорхой үйлдэл, оюун бодолд хандсан загвар арга бий.

Христэд итгэгч нар дараах зүйлсээр тусламж авах шаардлагатай:

1. Христтэй харилцах харилцаандаа үнэнч байх (Матай 16:24-27). Бэлгийн ёс бус байдалд уруу татагдах нь, бусад уруу таталтын нэгэн адил таны сүнс сэтгэл рүү дайрч буй Сатаны довтолгоо юм (1 Петр 2:11). Тэр зөвхөн хулгайлах, алж, сүйтгэхээр (Иохан 10:10) байгаа. Та амийнхаа төлөө зугтах ёстой (2 Тимот 2:22).

2. Есүс санаа тавьдаг гэдэгт итгэх (Дуулал 139:1-3, 1 Петр 5:6-10). Тэр таны итгэл, бие махбодын хэрэгцээ, ариун байдалд санаа тавьдаг. Тэр хүний амьдралыг туулахдаа бие махбодын болон оюун санааны уруу таталтыг ялан дийлсэн бөгөөд бидэнд ялалт байгуулахад хэрэгтэй нигүүлслийг өгдөг (Еврей 4:14-16).

3. Чөтгөрийн худал үгэнд үл итгэх (Иохан 8:44). Чөтгөр танд "Есүс чамд санаа тавьдаггүй болохоороо чамайг маш ихээр шаналгаж буй бэлгийн ёс бус хүслийг чинь арилгахгүй байна" гэж хэлж болно. 1 Петр 5:7-8-д Есүс чамд үнэхээр санаа тавьдаг, харин чөтгөр биднийг устгахыг хүсдэг гэж хэлсэн байдаг. Чөтгөр таныг бэлгийн ёс бус хүслээсээ болж нүгэлтэн хэмээн худал хуурмагаар буруутгаж болно (Илчлэл 12:10).

4. Есүст төвлөрч, Түүний хэн болохыг магтан алдаршуулаарай (Дуулал 105:3-4). Чөтгөр энэхүү сорилтыг ашиглан таны итгэл болон Бурхантай харилцах харилцааг устгахыг маш их хүснэ (Иохан 10:10). Харин Есүсийн энэхүү сорилтын зорилго нь таны итгэлийг бэхжүүлж, түүнийг илүү ихээр алдаршуулах явдал юм (1 Петр 1:5-9). Та Есүсийг мөргөн хүндлэхэд төвлөрвөл Тэр танд тусалж, хамт байх болно (Дуулал 46:1).

5. Бурханы Үгийг тунгаан бодох (Дуулал 119:9). Бурханы Үгийг унших, сонсох, тунгаан бодох нь сорилттой үед ялалт байгуулахад тань тусална. Есүс уруу татагдах үедээ Библийн Үгийг ашиглан ялалт байгуулсан (Матай 4-р бүлэг). Бид ч мөн адил үйлдэх ёстой.

6. Бэлгийн хүслийнхээ төлөө Есүст талархах, уруу таталтыг даван туулах хүчийг гуйн залбирах (2 Коринт 12:7-9). Та өөрийн төрөлх хүсэлдээ талархаж болно. Учир нь тэдгээр нь Бурхан хүнийг бүтээсэн төлөвлөгөөнийх нь нэг хэсэг бөгөөд Есүст хамаатай байх, Түүнээс тусламж авахад тусалдаг. Түүнтэй хамт алхах үедээ та сул талаа Түүний тусламжтайгаар хүчирхэгжүүлэх боломжтой болдог.

7. Төлөвшсөн, бурханлаг нэг хүнийн өмнө хариуцлагатай байх (Галат 6:2). Итгэлийн замд илүү хол явсан хэн нэгэнтэй (адил хүйсийн) нээлттэй, шударга байх нь тустай. Тэр таны төлөө залбирч, зөвлөгөө өгөх болно. Түүнтэй өөрт тулгарч буй бэрхшээлийн талаар ярилцах нь ариун байдлаа хадгалахад болон итгэлээрээ урам зоригтой байхад тань тусална.

8. Бусдад үйлчилж, тэдний хэрэгцээнд анхаарлаа хандуулах (Филиппой 2:3-5). Өөрийн хэрэгцээ, хүсэлд хэт их санаа зоволгүйгээр харин бусдад үйлчлэх хүсэлтэй байгаарай.

9. Бурханы цаг хугацаанд зөв хүнтэй гэрлэх (Сургаалт үгс 5:15, 18-19). (Дараагийн хичээлүүдээр гэрлэлтийн ухаалаг сонголтын талаар хэлэлцэх болно)

► Эдгээр санаануудын аль нь танд шинэлэг байсан бэ? Таны амьдралд аль нь тустай вэ?

► Өөр ямар үйлдэл эсвэл оюун бодлын загвар танд тустай вэ?

Залуу хүмүүс гэрлэхээсээ өмнө хүчтэй сорилтод ордог. Тэдний амьдралын хань нь үнэнч нэгэн байх хэрэгтэй гэдгийг санах нь чухал.[1] Тэд гэрлээгүй мөртлөө богино хугацааны таашаал хүсдэг хүнтэй харилцаа үүсгэх талаар бодох ч ёсгүй. Мөн итгэгч бус хүнтэй харилцаатай байх талаар бодох ч ёсгүй (1 Коринт 7:39). Харин итгэлийн гэр бүлийн хань, сайн эцэг эх байж чадах хүнийг олох ёстой.

Сайн гэр бүлтэй болохыг хүсдэг хүн нь өөрөө Христийн үнэнч, тууштай дагалдагч байх ёстой бөгөөд ингэснээр мөн ийм зөв хүн түүнд татагдах болно (Сургаалт үгс 3:4-8). Хүн зохистой зан ааль, даруу хувцаслалтаар сайн зан чанараа харуулдаг (1 Тимот 2:9-10). Эсрэг хүйсийн хүмүүстэй хайхрамжгүй харьцдаг хүмүүс буруу хүсэлд суурилсан харилцаатай байхад бэлэн гэдгээ илэрхийлдэг (1 Тесалоник 4:1-7). Буруу хүслийг өдөөхүйц байдлаар хувцасладаг хүн ч бас үнэнч бус, зөвхөн таашаал хүсдэг хүнийг татдаг (Сургаалт үгс 7-р бүлэг).

Бурхан эцэг эх, пастор болон ахлагч нарт зан ааш, хувцаслалт, харилцаандаа сонголт хийх боломжийг өгсөн. Залуучууд нь Бурханд дуулгавартай байж, эдгээр хүмүүсээс зөвлөгөө авах үедээ Бурханы ерөөлийг авч, хор хөнөөл, уруу таталтаас хамгаалагдах болно.

► Суралцагчид 1 Петр 5:5 ба Еврей 13:17 эшлэлийг бүлэгт уншина.

Хүүхэд залуучууд эцэг эх болон сүнслэг удирдагчдынхаа мэргэн ухаан, удирдамжийг дуулгавартай дагах нь тэдний үүрэг хариуцлага юм. Эдгээр удирдагчид нь залуучуудыг сорилтоо даван гарахад туслах үүрэгтэй.

► Суралцагчид Ром 13:14 ба 1 Коринт 10:13 эшлэлийг бүлэгт уншина.

Бурхан итгэгч нарыг хэрэв тэд хүсвэл зугтаж чадах болон дааж давшгүй сорилтод оруулахгүй. Залуучууд уруу таталтаас зугтах ёстой (2 Тимот 2:22). Эцэг эхчүүд үр хүүхдээ шаардлагагүй уруу таталтад өртөхөөс урьдчилан сэргийлэх хэрэгтэй. Үүнийг эцэг эхчүүд дараах гурван аргаар хийж болно:

1. Тодорхой зааварчилгаа өгөх: Хүүхдүүд юу хийх ёстой, юу хийх ёсгүй, хэнтэй хамт байх ёстой, хаашаа явах ёстой талаар заах (Ефес 6:1-4). Эцэг эхчүүд төлөвшсөн байдал нь уруу таталтад нөлөөлж чадахгүй нөхцөл байдалд хүүхдүүдээ оруулах ёсгүй. Жишээлбэл, хэрэв залуу эрэгтэй, эмэгтэй хоёр нэг газар хамтдаа байвал тэд буруу үйлдэлд уруу татагдах магадлалтай.

2. Залуусыг сорилттой тулгарах үед нь хамт байж, хариуцлагатай байх: Эцэг эх хүүхдүүдтэйгээ хамт залбирч, өдөр тутмын амьдралынх нь талаар асуулт асуух хэрэгтэй. Хариуцлагатай байхын үр дүн нь эцэг эх болон хүүхдийн хоорондох харилцаанаас ихээхэн хамаарна. Хэрэв хүүхэд нь эцэг эхээ өөрийг нь хайрладаг, хүлээн зөвшөөрдөг, дэмждэг гэж итгэхгүй бол тэдний өмнө алдаагаа хүлээн зөвшөөрөхийг хүсэхгүй.

3. Залуу хүмүүст Библийн дагуу зөвлөгөө өгөх: Эцэг эхчүүд хүүхдүүдээ Библийн зарчмуудыг тунгаан бодож нөхцөл байдалд хэрхэн хандахыг зааж сургах хэрэгтэй (Сургаалт үгс 4:1-9, Сургаалт үгс 7:1, 4-5). Тэд хүүхдүүдтэйгээ аюултай гэж үзэж байгаа өөрсдийн бодлыг ярилцах хэрэгтэй. Хүүхдүүддээ шаардлагатай янз бүрийн сонголтуудыг гаргахад нь туслах хэрэгтэй. Тэд хүүхдүүддээ уруу таталтыг урьдчилан харж, хэрхэн зайлсхийх, уруу таталтад өртөх үедээ юу хийх талаар нь ярилцаж туслах ёстой.

Чуулган нь Библийн ёс суртахууныг хамгаалах хэрэгцээ шаардлагатай тулгарч байгаа бол зарим ахуй соёлоос тусгаарлах ёстой. Олон соёлын хувьд бэлгийн нүгэл ноцтой зүйлд тооцогддоггүй. Тэд гэрлээгүй залуусыг гэрлэхээсээ өмнө бэлгийн харилцаанд орохыг хэвийн зүйл гэж үздэг. Чуулган нүгэлд буулт хийх ёсгүй. Чуулган нь залуучуудын дундах бэлгийн ёс бус байдлыг хэвийн гэж үзэх ёсгүй. Бурхан ёс суртахуунгүй нэгэн нь Христийн хаанчлалыг өвлөхгүй гэж айлдсан (Ефес 5:5).

► Чуулган нь дэлхийн уруу таталттай тэмцэж буй залууст хэрхэн тусалж чадах вэ?

► Суралцагчид Ефес 5:3-7 ба Еврей 13:4 эшлэлийг бүлэгт уншина.

Бэлгийн харилцаа нь гэрлэлтээс өмнөх харилцаанд эхлэх ёсгүй. Харин энэ нь эрэгтэй, эмэгтэй хоёр нь сүнслэг болон Библийн дагуу гэдгээ баталгаажуулж нэгдсэний дараа эхлэх ёстой харилцаа юм. Энэ бол тэд бие биедээ үүрдийн амлалт өгөх хангалттай итгэлцлийг бий болгосны дараа буюу бие биенийхээ тухай бүрэн ойлголттой болох үе юм. Хэрэв тэд энэ итгэлцэлд хүрч чадахгүй бол харилцаагаа дуусгаж, гэрлэх ёсгүй.

Зарим нийгэмд хүмүүс гэрлэлтийг төвөгтэй, үнэтэй ёслол гэж үздэг учраас гэрлэлтээ хойшлуулдаг. Ингэж гэрлэлтээ олонтоо хойшлуулж байх үедээ хосууд хамт амьдарч, хүүхэдтэй болдог. Зарим хосуудын хувьд хуримын зардал нь тэднийг удаан хугацаанд санхүүгийн хувьд хохироодог бөгөөд тэд хуримын арга хэмжээндээ бүх зүйлээ зарцуулж, мөнгө ч зээлдэг. Чуулган нь гэрлэлтийн өөр хувилбарыг санал болгодог итгэлийн бүлэг байх ёстой. Христэд итгэгчдийн гэрлэлт нь бие биедээ болон Бурханд үнэнч эрэгтэй, эмэгтэй хүмүүст зориулагдах бөгөөд энэ нь хуримыг хойшлуулах эсвэл хосуудын ирээдүйг хохироох хэмжээний зардал шаардах учиргүй.

► Итгэгч хүмүүсийн гэрлэлт нийгэмд тогтсон гэрлэлтээс ямар ялгаатай байх ёстой вэ?

Бэлгийн харилцааны талаарх мэдээлэл хүүхдүүдийн чихэнд сонсогдож, нүдэнд өртөж байдаг. Тэд буруу, зөвийн талаар янз бүрийн хүмүүсийн бодлыг сонсож байдаг. Хүүхдүүд эрт орой хэзээ нэгэн цагт бэлгийн мэдрэмж, хүсэл, уруу таталттай тулгардаг тул итгэгч эцэг эхчүүд тэдэнд Бурхан бэлгийн харилцааны талаар юу хэлснийг тайлбарлаж өгөх нь чухал. Хүүхдүүд бэлгийн харилцааны талаарх нарийн зүйлсийг мэдэх шаардлагагүй, учир нь тэд гэрлэх насанд хүрээгүй бөгөөд тэднийг сорилтонд оруулах боломжтой.

Хүүхдүүд Бурханы төлөвлөгөөг болон дуулгавартай байх үүргээ мэдэх хэрэгтэй. Тэд уруу таталттай тулгарах болно гэдгийг мэдэх хэрэгтэй. Тэд Бурханд дуулгавартай байж, гэрлэх хүртлээ бэлгийн хүслээ хянах хэрэгтэй.

Дараах материал нь хүүхдүүдэд бэлгийн харилцааг нарийвчлан ярихгүйгээр христэч үзэл баримтлалыг заахад хэрэгтэй. Энэ нь хүүхдүүдтэй ярилцаж буй мэт энгийн байдлаар бичигдсэн.

Хүүхэдтэй ярилцах нь

► Эхлэл 2:7, 18-24 эшлэлийг хүүхэдтэйгээ хамт уншаарай.

Энэ хэсэгт Бурхан анхны эрэгтэй, эмэгтэй хүнийг хэрхэн бүтээж, онцгой харилцаатай болгосон тухай өгүүлдэг.

Бурхан гэрлэлтийг эрэгтэй, эмэгтэй хүний хоорондох онцгой харилцаа болгон бүтээсэн. Гэрлэсэн хосууд бие биедээ онцгой хайртай байдаг. Тэдний харилцааны нэг хэсэг нь зөвхөн хоёулханаа бие биеэ нэгтгэх буюу бэлгийн харилцаанд орох онцгой таашаал амсах юм. Бурхан бэлгийн харилцааг нөхөр, эхнэрт таашаал өгөх, заримдаа эхнэрийг жирэмсэн болгох зорилгоор бүтээсэн.

Бэлгийн харилцаа нь ийм онцгой таашаал өгдөг учраас эрэгтэй, эмэгтэй хүмүүс бие биенийхээ биеийг харах, хүрэх, бие биедээ анхаарал тавих гэсэн төрөлхийн хүсэлтэй байдаг.

Библид Бурхан, бэлгийн харилцаа нь нөхөр, эхнэрийн хувьд зөв бөгөөд сайн зүйл гэж хэлсэн. Бурхан мөн гэрлээгүй хүмүүс хоорондоо бэлгийн харилцаатай байх нь маш буруу гэж хэлсэн. Бурхан бидэнд дараах дөрвөн шалтгааны улмаас бэлгийн харилцааны талаар дүрмийг өгчээ:

(1) Бэлгийн таашаал нь гэрлэлтэд зориулагдсан.

Бурхан бэлгийн харилцааг гэрлэлтийн онцгой хэсэг болгон бүтээсэн. Хэдийгээр ямар ч эрэгтэй, эмэгтэй хүн иймэрхүү байдлаар таашаал авах боломжтой боловч, энэ таашаал нь гэрлэлт дунд маш онцгой байдаг, учир нь нэг нь нөгөө хүндээ бүрэн зориулагдсан байдаг. Гэрлээгүй хүмүүсийн хувьд бэлгийн харилцаа нь Бурханы төлөвлөсөн харилцаа биш учраас утга байхгүй. Иймд гэрлэх нас болоогүй хүн бэлгийн харилцаанд орох ёсгүй. Хүмүүс гэрлэх амлалт өгч, олон нийтийн өмнө гэрлэх ёслол хийх хүртлээ бэлгийн харилцаанд орох ёсгүй. Хүн зөвхөн өөрийнхөө хостойгоо л бэлгийн харилцаанд орох учиртай.

(2) Бэлгийн дур хүслүүд маш хүчтэй байдаг.

Бэлгийн дур хүсэлтэй байх нь буруу биш, учир нь Бурхан тэдгээрийг бүтээсэн. Гэхдээ Бурханы хүсдэггүй зүйлд дур хүслээ зориудаар өдөөх нь буруу. Үүнээс болж:

• Гэрлэлтээс бусад тохиолдолд хүн бэлгийн дур хүслийг хүчтэй болгох зүйлсийг хийх ёсгүй, тухайлбал бусдын биеийг зориудаар харах эсвэл бодох гэх мэт.

• Гэрлэлтээс бусад тохиолдолд хүн бэлгийн дур хүслээ нэмэгдүүлэхийн тулд бусдад хүрэх ёсгүй.

• Хүн буруу зүйл хийхийг төсөөлөх ёсгүй.

• Хүн буруу зүйл хийж буй хүмүүсийг харах, таашаал авахын тулд зураг эсвэл видео үзэх ёсгүй.

• Хүн бусдыг буруу зүйл хийхийг хүсэх эсвэл буруу зүйл хийхээр төсөөлөх боломжтой байдлаар хувцаслах ёсгүй.

• Хүн буруу зүйл хийхийг хүссэн зан авир гаргах эсвэл тийм үгээр ярих ёсгүй.

(3) Бидний хүслүүд биднийг удирдаж чадахгүй.

Амьтад өөрсдийн мэдрэмж, хүслээрээ удирдуулдаг. Бид амьтан биш; бид Бурханы дүр төрхөөр бүтээгдсэн хүмүүс. Иймээс бид юу хийх ёстойгоо бодож, дараа нь зөв сонголт хийх ёстой. Бид өөрсдийн мэдрэмж, хүслээр удирдуулж болохгүй. Заримдаа бид хүссэн зүйлээ хийх нь зөв байдаг ч, заримдаа үгүй. Бидний хүсэл нь бэлгийн харилцаа зөв гэж хэлж чадахгүй. Бид өөрсдийн мэдрэмжээ дагахын оронд Бурханы Сүнсний тусламжтайгаар Библиэс Бурханы зааврыг харж, дагах ёстой.

(4) Бэлгийн харилцаа нь заримдаа хүүхэдтэй болгодог.

Хүүхдүүд хайрын харилцаанаас ирдэг байхаар Бурхан бүтээжээ. Тэрээр хүүхдүүдийг өөрсдийг нь хайрлаж, халамжилдаг гэр бүлд өсөж торнихоор бүтээсэн. Эцэг, эх нь гэрлээгүй хүмүүсийн хүүхэд нь насанд хүртлээ эцэг эхтэйгээ хоёулантай нь байж чаддаггүй.

Дээр дурдсан дөрвөн баримтыг ойлгосноор Бурханыг дагах хүсэлтэй, хамгийн сайхан амьдралыг хүсдэг хүмүүс Бурханы зааврыг дагах болно. Ингэснээр тэд уруу татлагыг эсэргүүцэх чадвартай дадлуудыг Бурханд дуулгавартай байхын тулд өөрсөддөө бий болгоно.

Хүүхдийн залбирал

Хайртай Бурхан минь,

Намайг (хүү эсвэл охин байлгаж) бүтээсэнд баярлалаа. Гэрлэлтийн төлөөх таны онцгой, сайн төлөвлөгөөнд баярлалаа. Намайг насан туршдаа танд хайртай, дуулгавартай байхад туслаач. Та миний хийж буй бүхнийг хардаг, миний бодож буй бүхнийг мэддэг. Амьдралын талаарх таны зааврыг үргэлж дагаж мөрдөхөд надад туслаач. Би бодол болон үйлдлээрээ таныг баярлуулахыг хүсэж байна. Найзууддаа сайн үлгэр дуурайл болж, танд дуулгавартай байхад надад туслаач. Зөв цагтаа, намайг том болоход, таны хүссэн (нөхөр эсвэл эхнэр) хүн байхад надад туслаач. Би танд хайртай, Бурхан минь!

Амен

Тэнгэрлэг Эцэг минь,

Биднийг өөрийнхөө дүр төрхөөр бүтээж, амьдралд утга учир, зорилго өгсөнд талархья. Таны дүр төрхийг харуулахын тулд хүйсийг бүтээсэнд баярлалаа.

Гэрлэлт дэх бэлгийн харилцааны талаарх таны сайн загвар болон зорилгод талархья.

Бид таны Үгийг үл дагасныхаа төлөө гэмшиж байна. Есүсийн нэрээр биднийг угааж, уучилж, ариусгаач (1 Коринт 6:11). Биднийг нүглийн боолчлолоос чөлөөлөөч (Ром 6:6-7). Бид одоо биеэ танд өргөж, таны нүдэнд зөв зүйлийг хийхээ амлаж байна (Ром 6:13-14).

Зөв бодож, зөвийг үйлдэх дадлыг хэвшүүлэхэд бидэнд туслаач (1 Тимот 4:7, Дуулал 23:3). Бидний бодол, үйлдэл үргэлж таны нүдэнд тааламжтай байг (Дуулал 19:14). Сорилт ирэх бүрд бидэнд ялалтыг өгөхөө амласан танд талархья (1 Коринт 10:13).

Амен

(1) Дараах асуултуудад хариулахын тулд Галат 5:16-6:9 эшлэлийг энэ хичээлээр хэлэлцсэн сэдвүүдийг харгалзан уншина уу. Дараах асуултуудад бичгээр хариул:

• Махбодын хүсэл (5:16) болон махбодын үйлдэл (5:19) хоёрын ялгаа юу вэ?

• Махбодын үйлдлийг үйлдсэн хүмүүст ямар хоёр зүйлийг амласан бэ? (5:19-21, 6:7-8)

• Итгэгч хүн махбодын хүсэл тачаалд үл захирагдах хүчийг хэрхэн олж авах вэ? (5:16, 22-23, 25)

• Сорилтын үед итгэгчид ямар үнэнүүдийг санах ёстой вэ, энэ нь хэрхэн даван туулахад тусалдаг вэ? (Энэ хэсгээс хамгийн багадаа дөрвийг нэрлэнэ үү)

• Энэ хэсэгт итгэгчдэд юу хийхийг зааварчилсан бэ? (Энэ хэсгээс хамгийн багадаа дөрвийг нэрлэнэ үү)

• Итгэгчид бие биеийнхээ өмнө ямар үүрэг хариуцлага хүлээдэг вэ? (Галат 6:1-2, 6)

(2) Ром 6:1-23-ыг уншина уу. Дараах асуултуудад хариул:

• Энэ хэсэгт итгэгч бүрийн тухай ямар үнэнүүд бичигдсэн бэ? (6-8 зүйлийг жагсаана уу)

• Итгэгчид өөрсдийн талаарх үнэнээс болж ямар сонголтуудыг хийх ёстой вэ? (6-8 зүйлийг жагсаана уу)

• Итгэгч хүн нүгэл үйлдэх сорилтын үед яагаад ялалт байгуулна гэж найдаж болох вэ? (Нэг догол мөрөөр бичнэ үү)

(3) Ром 8:1-14-г уншина уу. Энэ хэсэгт буй үнэнүүд дээр үндэслэн залбирлаа бичээрэй.

(4) Ром 6:11-14 ба Колоссай 3:5-7 эшлэлийг цээжилнэ үү. Дараагийн хичээлийн эхэнд эдгээр эшлэлийг цээжээр бичих болон уншина уу.