Lesson 2: Библийн дагуух гэр бүл

Энэ хичээлийн төгсгөлд суралцагч дараах чадварт суралцсан байна:

(1) Гэрлэлт Гурвалын харилцааг хэрхэн тусгах ёстойг ойлгох.

(2) Хүүхэдтэй байх талаарх Бурханы үзэл бодлыг хүлээн авах.

(3) Уналт гэрлэлт болон гэр бүлийн харилцаанд хэрхэн нөлөөлснийг ойлгох.

(4) Хүний алдаа дутагдал байсаар байхад ч Бурханы авралын зорилго хэрхэн биелэлээ олдгийг ойлгож талархах.

(5) Бурханы төлөвлөгөөнд дуулгавартай байх нь ямар ч гэр бүлд Түүний нигүүлсэл ба эдгэрлийг мэдрэхэд тусалдаг гэдгийг ухаарах.

Энэхүү курсээр бид голчлон нэг орон байранд хамт амьдардаг гэр бүлийн талаар суралцах болно. Олон янзын хүмүүсийн нэгдэл гэр гэртээ хамт амьдарч, гэр бүл гэж нэрлэгддэг бүлгийг бүрдүүлдэг. Нэг эцэг эхтэй гэр бүл, салан тусгаарласан гэр бүл, дахин гэрлэснээр нэгдсэн гэр бүл, хүүхэд үрчилсэн гэр бүл, олон үеийнхнийг багтаасан гэр бүл, түр хугацаагаар нэмэлт хүүхэд эсвэл насанд хүрэгчдийг асрамжиндаа авсан гэр бүл гэх зэрэг.

Бидний хүн нэг бүрд гэр бүл гэж юу болох тухай өөрийн гэсэн ойлголт бий. Гэр бүлийн тухай яриа бидний хувийн туршлагаас хамааран янз бүрийн сэтгэл хөдлөлийг бидэнд төрүүлдэг.

Бага нас бидэнд хэрхэн нөлөөлдөг вэ?

Магадгүй та бага насны гайхалтай дурсамжуудтай эсвэл бага насандаа туулсан зүйлсийн улмаас уур уцаартай байдаг ч байж болно. Магадгүй танай гэр бүлийн гишүүд бие биенээ байнга дэмжиж, урамшуулдаг эсвэл бие биенээсээ зайлсхийж, хамтдаа байхдаа зөрчилддөг байж болох юм. Та гэр бүлээ амьдралынхаа гайхалтай суурь, туслах хүч гэж мэдэрдэг байж болох ч, магадгүй таны гэр орон зугтахыг хүссэн шорон мэт, өвдөлттэй орчин байсан ч байх боломжтой. Магадгүй та өөрийнхөөс илүү сайн гэр бүлтэй хүмүүсийг харахдаа танай гэр бүл таныг хангалттай дэмжээгүй гэж боддог байх.

Гэр бүлийнхээ талаарх бидний ойлголт чухал, учир нь энэ нь амьдралын тухай болон Бурхан хэн болох тухай бидний ойлголтод нөлөөлдөг. Библид Бурханыг өөрийн ард түмний Эцэг гэж хэлдэг. Эцэг эхтэйгээ, ялангуяа эцэгтэйгээ харилцах харилцаа бидний тэнгэрлэг Эцэгийн тухай ойлголтыг хэлбэржүүлдэг. Хэрэв төрсөн эцэг маань байхгүй, эсвэр тэрээр хүчирхийлэгч, хайхрамжгүй, хэтэрхий шаардлагатай, хуурч мэхэлдэг, идэвхгүй, ямар нэгэн байдлаар таныг гомдоосон бол Эцэг Бурханы тухай бидний ойлголт гэмтэх магадлалтай. Бурханы Үгээр, Есүсийн амьдралаар болон Түүнтэй хувийн харилцаагаар дамжуулан Түүнтэй танилцах хүртлээ бид Түүнийг сайн Эцэг гэж харахад хэцүү байж болох юм. Тэр үнэхээр хүүхдүүдээ идэвхтэй хамгаалж, хангадаг сайн Эцэг мөн. Тэр хүүхдүүдээ сонсож, тэдэнтэй ярилцаж, тэднийг чиглүүлж, сайн сайхан амьдралд нь баярладаг. Бид Түүнийг таньж мэдсэнээр Түүний талаарх ойлголтоо өөрчлөхөд Бурхан тусалж чадна.[1]

Сүнслэг ялгаа бидэнд хэрхэн нөлөөлдөг вэ

Бидний зарим нь Христийг дагасны улмаас гэр бүлээсээ хөөгддөг. Есүс биднийг Түүнд үнэнч байсныхаа төлөө итгэгч биш гэр бүлийн гишүүдээсээ хавчлага ч амсах боломжтой гэдгийг хэлсэн. Олон газар оронд итгэгч хүмүүсийг Христийг үгүйсгэдэг гэр бүлийн гишүүд нь хуурч, гутааж, хайхрамжгүй хандаж, хүчирхийлж эсвэл хөнөөдөг.

► Нэг суралцагч Матай 10:21-22, 28, 32-39 эшлэлийг бүлэгт уншина. Эдгээр эшлэлийг уншсаны дараа дараах асуултуудыг хэлэлцээрэй:

• Энэ эшлэлд итгэгчид юу хүлээх ёстой гэж байна вэ?

• Энд ямар амлалтууд өгөгдсөн бэ?

• Итгэгчид хавчлагын талаар ямар бодолтой байх ёстой вэ?

Зарим нь гэр бүлээсээ хавчлага амсахгүй байж болох ч итгэлийнхээ улмаас харилцааны бэрхшээлтэй тулгарч болно. Магадгүй итгэгч бидний амьдрал гэр бүлийн гишүүдийн маань амьдралаас эрс ялгаатай учраас гэр бүлийн харилцаа маань хурцадмал, хөндий эсвэл хязгаарлагдмал байх боломжтой. Биднийг буруу ойлгож эсвэл хүндэтгэхгүй байж болно. Хамаатнууд маань бидний үйлчлэлийг саатуулахыг оролдож болно. Есүс хүртэл эдгээр бэрхшээлийг туулсан (Марк 3:21, Иохан 7:3, 5) тул бид ч бас тулгарвал гайхах хэрэггүй.

Хэдэн минутад багтаан та ангийнхандаа өөрийгөө танилцуулна уу. Ингэхдээ зөвхөн нэрээ хэлээд зогсохгүй гэр бүлийнхээ хүрээнд та хэн болох тухайгаа хуваалцаж болно.

Эхлээд гэр бүлийнхээ хүрээнд таныг дууддаг янз бүрийн нэрийг бодоорой. Тухайлбал хүү эсвэл охин, нөхөр эсвэл эхнэр, аав эсвэл ээж, авга ах эсвэл авга эгч, өвөө эсвэл эмээ гэх мэт. Танд өөр нэр бодогдож байна уу? Та магадгүй хэд хэдэн нэрээр дуудуулдаг ч байж болно.

Та гэр бүлдээ өөр ямар үүрэг эсвэл байр суурьтай вэ? Та айлын том эсвэл хамгийн бага нь уу? Гэр бүлээ тэжээгч үү? Гэр орноо халамжилдаг хүн үү? Ахмад настан эсвэл хөгжлийн бэрхшээлтэй хүнийг асарч буй хүн үү? Гэр бүлийнхээ хүрээнд гүйцэтгэдэг бусад үүрэг, хариуцлагын талаар бодоорой.

► Ангийнхандаа өөрийгөө танилцуулж, гэр бүлийнхээ хүрээнд дуудуулдаг хэд хэдэн нэр, үүргээ жагсаагаарай.

► Одоо хэсэг зуур бодоод, таны нэр, үүрэг (1) өөрийгөө хэрхэн хардаг, (2) гэр бүлийнхээ бусад гишүүдийг хэрхэн харах байдалд нөлөөлдөг талаар бодно уу.

Та ойрын болон холын хүрээний гэр бүлийн гишүүдийнхээ талаар ямар мэдрэмжтэй байхаас үл хамаарч тэд таны л хүмүүс байх болно. Магадгүй танай гэр бүл эвдэрсэн, өвдөлттэй, зовлон туулсан шарх сорвитой ч байж болно. Эсвэл таны гэр бүлд хүмүүс атаархдаг байж магадгүй. Учир нь таны гэрлэлт амжилттай, хүүхдүүд нь ухаантай, эрүүл чийрэг, орон гэр нь хайр, амар тайван, инээд хөөр дүүрэн төгс харагддаг байх.

Танай гэр бүл сул эсвэл хүчтэй мэт санагдаж байсан ч Бурхан танай гэр бүлийг сонирхож, оролцоотой байдаг. Түүнд танай гэр бүлд зориулсан төлөвлөгөө бий.

► Гэр бүлийнхээ гишүүдийн нэрийг (дор хаяж 3-4 үеийн) бичээрэй. Жишээлбэл, эмээ өвөөгийнхөө нэрийг (1-р үе), эцэг эхийнхээ нэрийг (2-р үе), өөрийнхөө болон ах эгч дүү нарынхаа нэрийг (3-р үе), хүүхдүүд эсвэл ач зээ нарынхаа нэрийг (4-р үе) г.м.

Дотно, сайн харилцаатай хүмүүсийнхээ нэрийн дэргэд од зураарай. Хязгаарлагдмал харилцаатай хүмүүсийнхээ нэрийн дэргэд гурвалжин зураарай. Ямар нэгэн шалтгаанаар холбоогүй болсон хүмүүсийнхээ нэрийг дөрвөлжин дотор хийгээрэй.

Таны гэр бүлийн гишүүн биш ч гэсэн гэр бүлийн нэгэн адил бүх цугларалт, баяр ёслолд оролцдог хүмүүс бий юу? Тэдний нэрийг бичиж дугуйлаарай.

► Бид Адам, Ева, Абрахам, Сара нарын амьдралыг судлахын тулд Библиэ Эхлэл ном дээр нээлттэй байлгацгаая.

Анхны хурим

Адам, Ева хоёр бол хүн төрөлхтний анхны гэр бүл байсан. Нэг нөхөр, нэг эхнэр, гэрлэлтээр холбогдсон нэг эрэгтэй, нэг эмэгтэй. Анхны хурим дээр Адам: “Энэ чинь л яснаас минь авсан яс махнаас минь авсан мах юм. Эр хүнээс авагдсан тул эм хүн гэж нэрлэгдэг гэжээ” (Эхлэл 2:23).

Дараагийн эшлэлд гэрлэлтийн талаарх Библийн тодорхойлолтыг өгүүлдэг: “Ийм учраас эр хүн эцэг эхээ орхиод, эхнэртэйгээ нийлж, хоёул нэг махбод болдог” (Эхлэл 2:24). Энэ хэллэг Шинэ гэрээнд Матай 19:5 болон Ефес 5:31-д давтагддаг. Эрэгтэй, эмэгтэй хоёрын нэг махбод болох нэгдэл нь насан туршид үргэлжлэх Бурхан болон хүний өмнө өгсөн болзолгүй үүрэг, амлалт юм.

Гэрлэлт бол гурван талт гайхамшиг юм. Энэ нь хоёр хүнийг нэг махбод болгодог биологийн гайхамшиг; хоёр гэр бүлийг хооронд нь холбодог нийгмийн гайхамшиг; гэрлэлтийн харилцаа нь Христ болон Түүний сүйт бүсгүй болох чуулганы нэгдлийг дүрсэлдэг сүнслэг гайхамшиг юм.[1]

Гэрлэлт нь Гурвалын харилцааг тусган харуулдаг

[2]Гэрлэлт нь Бурханы зан чанар болон Түүний харилцааг тусгахаар бүтээгдсэн. Эцэг Бурхан, Хүү Бурхан, Ариун Сүнс Бурхан гурав үргэлж хоорондоо харилцаатай байсан бөгөөд цаашид ч тийм байх болно. Тэдний үүрэг тус бүрдээ өвөрмөц боловч Гурвалын бүх бодгаль нь мөнхөд Нэг бөгөөд Нэг мөн чанартай. Гурвалын бодгаль хоорондын харилцаанаас бид эв нэгдэл, дотно байдал, үнэнч байдал, тогтвортой хайрыг олж хардаг. Библийн дагуух гэрлэлт энэхүү гайхалтай харилцааны загвараар бүтээгдсэн. Бурханы төлөвлөгөө бол нөхөр эхнэр бүр хайрандаа цэвэр ариун байж, насан туршдаа бие биедээ үнэнч байх явдал юм.

Хүний гэрлэлтийн харилцаа нь Гурвалын доторх харилцааг дараах байдлаар тусгах ёстой:

1. Гэрлэлт нь нөгөө хүндээ өгсөн болзолгүй, онцгой үүрэг зориулалт байх ёстой.

2. Гэрлэлт нь өөрийгөө зориулсан хайрын харилцаа байх ёстой.

3. Гэрлэлт нь үр жимстэй харилцаа байх ёстой.

Анхны тушаал

Бурхан өөрөө анхны хуримыг адислахдаа,

Бурхан тэднийг ерөөж —Үржиж, олширцгоог! Газар дэлхийг дүүргэж, түүнийг эзэмшицгээг! Далайн загас, огторгуйн шувууд хийгээд газар дээр хөлхөгч амьтан бүхнийг захирцгааг! гэв (Эхлэл 1:28).

Үржиж, олшрох нь Библид Бурханы өгсөн анхны тушаал юм. Гэрлэлт нь өөрийгөө зориулсан хайрын үр жимстэй харилцаа байхаар бүтээгдсэн. Гэрлэлт доторх үржил нь Бүтээгчийг алдаршуулдаг. Учир нь нөхөр эхнэр хоёр хамтдаа Бурханы бүтээлч ажлыг үргэлжлүүлж, гэр бүлийн харилцаанд илүү олон хүнийг авчирдаг. Ямар их аз завшаан бөгөөд хариуцлага вэ!

► Нэг суралцагч Дуулал 127:3-5 эшлэлийг бүлэгт уншина. Энэ эшлэлд хүүхдүүдийг дүрслэхийн тулд үгээр зураглажээ. Ямар үгсээр зурагласан бэ? Эдгээрийг үндэслэн бид хүүхдүүдийнхээ талаар хэрхэн бодох ёстой вэ?

Библи бидэнд хүүхдүүд бол бэлэг, үнэт эрдэнэ гэдгийг харуулдаг. Тэднийг зөвхөн бэлгийн харилцааны үр дүн гэж бодох ёсгүй. Хүүхэд бүрэлдэх нөхцөл байдал хүсүүштэй эсвэл зөв эсэхээс үл хамааран Амийг Өгөгч та биднийг оролцуулан хүүхэд бүрийг бүрэлдүүлж, санаа зорилготойгоор төрүүлдэг. Хүний төрөлтийн нөхцөл байдал ямар байсан ч хамаагүй Бурхан хүн бүрд зориулсан зорилго бий.

Тийм ээ, хүүхдүүд бол Бурханы өгсөн бэлэг, гэхдээ тэд бас эцэг эхийн Бурханд өгсөн бэлэг юм.

Гэвч өчүүхэн ч гэсэн Сүнстэй хэн нь ч тэгэхгүй. Бурханлаг үр удмыг Бурхан эрэлхийлж байхад тэр хүн юу хийж байгаа нь тэр вэ? Тиймээс сэтгэлээ анхаар. Хэн ч залуу насныхаа эхнэрээс бүү урваг (Малахи 2:15).

Хүүхдүүд бол ариун итгэл найдвар юм. Эцэг эхчүүд хүүхдүүдээ Түүний зорилгыг биелүүлэхээр өсгөхийг Бурхан хүсэн хүлээдэг. Бурхан хүүхдүүдийг маань өөрийн хаанчлалыг түгээхэд ашиглахыг хүсдэг (Эхлэл 18:19). Бурхан бидэнд хүүхдүүдээ Түүнд үйлчлэх амьдралд бэлтгэх итгэлийг өгсөн (Дэд хууль 6:2). Бид тэднийг бидэнд үйлчлэх эсвэл бидний мөрөөдлийг биелүүлэхийн тулд өсгөдөггүй. Бид тэднийг Бурханы тэдэнд зориулсан байг онох сум гэж харах ёстой юм.

Хүн төрөлхтний гэр бүлийн уналт ба эвдрэл

Эхлэл 3-р бүлэгт хэзээ нэгэн цагт оршин байсан цорын ганц төгс гэр бүл эвдэрч, Аврагч туйлын хэрэгтэй болсон тухай өгүүлдэг. Адам, Ева хоёр нүгэл үйлдсэн бөгөөд үхлийн хараал бүх хүн төрөлхтний дээр буусан. Адам, Ева хоёрын хоорондын харилцаа эргэлт буцалтгүйгээр эвдэрч, тэд Бурханаас тусгаарлагдсан.

Эр, эм хоёул нэмэлт хараалаас болж зовох болсон:

• Хүүхэд төрүүлэх нь өвдөлттэй байх болно.

• Нөхрүүд эрх мэдлээ буруугаар ашиглах болно.

• Эхнэрүүд дуулгаваргүй, хүндэтгэлгүй байх болно.

• Ажил нь цөхөрмөөр хэцүү хүнд байх болно.[3]

Сатан худал хэлсэнд хүмүүс итгэсэн учраас гэр бүлд зориулсан Бурханы төгс төлөвлөгөөнд гажуудал бий болсон.

Эхлэл 4-р бүлэгт унасан хүн төрөлхтний гэр бүл хэрхэн эвдэрч сүйдэж буйг үргэлжлүүлэн харуулдаг.

Эхлэл 4:1-д анхны жирэмслэлт, төрөлт тэмдэглэгдсэнийг анзаараарай. Энэ эшлэл хүүхэд бүрэлдсэнээс төрөх хүртэлх есөн сарын хугацааг хамруулдаг. Ева Адамтай айдас болон баяр хөөрөө хуваалцахыг хичээж байсан тэрхүү есөн сарын тээлт ямар байсныг төсөөлөөд үзээрэй. Түүнд зөвлөгөө өгөх хэн ч, асуултад нь хариулах хэн ч байгаагүй. Түүний томрох гэдэс, хүүхдийн хөдөлгөөн, агшилт, өвдөлттэй төрөх үйл явц нь хүн төрөлхтний эх болох түүнд анх удаа тохиолдсон зүйл байв. Ева Каиныг төрүүлэхдөө "ЭЗЭНий ерөөлөөр би хүүтэй боллоо" (Эхлэл 4:1) гэж хэлсэн нь гайхах зүйл биш юм.

Цаг хугацаа өнгөрч, хоёр дахь жирэмслэлт, төрөлт болсон талаар дараагийн эшлэлээс бид хардаг. Одоо Адам, Евагийн гэр бүл ам бүл дөрвүүл болжээ. Мөн эшлэлийн хоёр дахь хэсэгт тэдний хөвгүүдийн ажил мэргэжлийн талаар хураангуйлсан байна. 3-р эшлэлд хөвгүүд өсөж том болсон тухай, дараагийн эшлэлүүдээс анхны аллагын эмгэнэлт түүхийг бид уншдаг. Адам, Ева хоёрын ууган хүү уур уцаар, атаархлын улмаас дүүгээ хөнөөжээ. Цочрол, харуусал, асуултууд, гомдол, өвдөлтийг та төсөөлж байна уу?

Эдгээр асуултад та "Тийм ээ! Би төсөөлж чадна. Үнэндээ би үүнтэй төстэй зүйлийг туулсан!" гэж хариулж магадгүй юм. Би таныг урамшуулахыг хүсэж байна. Та ганцаараа биш. Танай гэр бүл аврагдах боломжтой! Гэр бүл болгонд зориулсан сайн мэдээ бий.

Гордон Венхэм бичихдээ,

… Эхлэл номын утга санаа бол хүний нүгэл хэдий их байсан ч нигүүлсэл ялж, нүглийн улмаас эвдэрсэн гэр бүлд ч нигүүлсэл ялсан түүх юм. Ном дэлхийг бүтээснээр эхэлж, Бурханы дүр төрхөөр хүн төрөлхтнийг бүтээснээр оргилдоо хүрч, Бурхан өөрийн бүтээсэн бүхнийг маш сайн гэж тунхагладаг... Зөвхөн 3-р бүлэгт дуулгаваргүй байдал [зөрчил], үхэл дуулгавартай байдал, энх тунх амьдралыг орлосноор бүх зүйл буруу тийшээ эргэж эхэлсэн. 4-р бүлэгт байдал улам дордож... 6-р бүлэгт [хамгийн доод цэгтээ] хүрч, дэлхий хүчирхийллээр дүүрсэн гэж хэлдэг (Эхлэл 6:11, 13).[4]

Эхлэл номоос бид Еврей үндэстний эцэг Абрахамын тухай уншдаг (Эхлэл 11:27-25:11).[1] Бурхан Абрахамын гэр бүлээр дамжуулан, Аврагчийг хүн төрөлхтний гэр бүлд авчрахаар төлөвлөжээ.

Үргүйдэл[2]

Эхлэл 11-р бүлэгт Ноагийн хүү Шемээс гаралтай Абрамын угсаа гарлыг жагсаасан байна. Эхлэл 11:30-д Абрамын эхнэр Сараи хүүхэд төрүүлж чадахгүй байсан тухай өгүүлдэг. Энэ нь уншиж буй олон хүний хувьд нулимс, зовлон, сэтгэлийн шарх, цөхрөл, хоосрол, уур, гашуудлын эшлэл юм. Хэрэв та Сараигийн оронд өөрийнхөө нэрийг тавиад энэ эшлэлийг уншвал та ганцаараа биш гэдгээ мэдэх болно.

Хүүхэдтэй болохыг хүсдэг ч үргүйдэлтэй тулгарч буй хүмүүсийн хувьд Эхлэл 1:28, Дуулал 127:3-5 зэрэг эшлэлүүдийг унших нь асар их өвдөлт, гуниг төрүүлдэг. Хүүхэдгүй байх нь шийтгэл эсвэл хараал мэт санагдах нь жам ёсны зүйл юм.

Үнэн хэрэгтээ та хүүхэдгүй учраас Бурханы хувьд доогуур, чухал биш гэсэн үг биш. Та мартагдаагүй. Таны үргүйдлээс болж танай гэр бүл хэвийн бус гажигтай гэр бүл болохгүй. Бусад хүмүүс ч бас энэхүү гүн харууслыг амсаж туулсан байдаг.

Хосууд үргүйдлийг хамтдаа болон хувь хүнийхээ хувьд хэрхэн даван туулах нь маш чухал юм. Ухаалаг бус сонголтууд цаашдын асуудалд хүргэж болдгийг Абрахам, Сараи нарын амьдралаас харах боломжтой.

Амлалтыг хүлээх нь

Эцэг нь нас барсны дараа Абрам гэр бүлийнхээ хүндэт эцэг болжээ. Бурхан Абрамыг агуу үндэстэн болгоно (Эхлэл 12:2) хэмээн амлаж, Абрамын үр удамд Канаан нутгийг өгөхөөр амласан (Эхлэл 12:7). Тэр үед Абрам 75 настай (Эхлэл 12:4), Сараи 10 насаар дүү (Эхлэл 17:17) байв. Сараи 65 настай, ер бусын үзэсгэлэнтэй эмэгтэй (Эхлэл 12:11) байсан бөгөөд хүүхэдгүй, жирэмслэх нас нь аль хэдийн өнгөрсөн байв.

[3]Он жилүүд улиран өнгөрсөөр, Бурханы амлалт Эхлэл 13:14-17-д тодорхой шинэчлэгдсэн хэдий ч хүүхэд төрөөгүй л байв. Эхлэл 15:2-3-д Абрам Бурханд хандан зарц нь өв залгамжлагч гэж хэлснээс харвал тэрээр хүүхэдтэй болох нь нэгэнт боломжгүй гэж бодсоных болов уу. Харин Эзэн хариуд нь “Тэр хүн чиний өв залгамжлагч болохгүй, харин өөрийн чинь биеэс төрөх хүн л өв залгамжлагч болно гээд” (Эхлэл 15:4) гэж айлджээ. Дараа нь Бурхан Абрамд тоолж баршгүй олон үр удмын талаарх хоёр дахь амлалтаа зураглан өгсөн бөгөөд Абрам Эзэнд итгэжээ (Эхлэл 15:6).

Сараи эдгээр хүлээлтийн жилүүдийг хэрхэн туулсныг бодож үзээрэй:

Бусдын шүүлт Сараиг хэчнээн өвтгөж байсан ч өөрийнх нь [хурц] цөхрөл хамгийн их өвдөлт авчирсан байх. Тэр зөвхөн эх хүн болохын утга учрыг биелүүлэхийг хүсээгүй, бас эмэгтэйчүүдийг төдийлөн их тоодоггүй нийгэмд эхчүүдэд олгодог хүндэтгэл, эрхэмлэлийг хүсэж байсан болов уу. Эрэгтэй хүний үргүйдэл жирэмслэхгүй байх шалтгаан болдог гэдгийг бид мэднэ. Гэхдээ Сараигийн цаг үед ийм биологийн мэдлэг байгаагүй юм. Сараи эмэгтэй хүний хувьд, зүй ёсоор үнэлэгдэхийн тулд хүүхэд төрүүлж, хөхүүлж байж л өөрийн хэн болохыг тодорхойлох байв. Тэр зөв шударга, итгэмжтэй байснаараа бус, харин нөхөртөө эрэгтэй өв залгамжлагч төрүүлж өгснөөрөө эрчүүдийн нүдэнд үнэ цэнтэй болох ёстой байв. Хоосон хэвлий гэдэг нь хоосон амьдрал гэсэн утгатай байжээ.[4]

Хүмүүний шийдэл ба эмгэнэлт үр дагавар

[5]Абрамыг 85 настай байхад Сараи хүүхэдтэй болох арга замын талаар нэгэн санааг олжээ. Сараигийн шивэгчин түүний хүүхдийн эх байж болох юм! (Эхлэл 16:1-4). Гэвч Абрам, Сараи хоёрын төгс шийдэл гэж найдсан зүйл Хагар жирэмсэн болох үед гэрийнх нь амар амгаланг сүйтгэж орхив. Зөв мэт санагдсан зүйл нь үнэндээ буруу байлаа. Бурханы амлалтыг биелүүлэхэд Түүнд туслах гэсэн оролдлого нь зөвхөн хэрүүл маргаан, зөрчилдөөнд хүргэсэн юм. Хүмүүс Бурханы төлөвлөгөө, цаг хугацаанд итгэхгүй байх үед харилцаа эвдэрч, өвдөлтийг мэдрэх зэрэг жам ёсны үр дагаврууд бий болдог.

Дараагийн жилүүдэд Абрам, Сараигийн гэр бүлд төдийгүй тэдний үеэл Лотын гэр бүлд ч бас хурцадмал байдал, гомдол, үл ойлголцол, харилцааны асуудал, уур уцаар, орхигдол, цөхрөл улам бүр нэмэгдсэн (Эхлэл 16-21).

Сэвтсэн гэр бүлүүд

Абрамыг Бурхан агуу үндэстний эцэг, Есүсийн төрөх угсаа болгон сонгосон! Абрам болон түүний гэр бүлийн бусад гишүүд Бурханы төлөвлөгөөг сүйтгэж байгаа мэт санагдаж болох юм! Тэд маш их алдаа дутагдалтай гэр бүлийн жишээ юм.

Эхлэл 49:33 хэсэгт ирэхэд Абрахам, Сара, Исаак, Ребека, Иаков болон түүний эхнэрүүд бүгд нас барсан байв. Иаковын хүүхдүүд бүгдээрээ сүйрэл бүтэлгүйтэл, алдаа дутагдлаар дүүрэн гэр бүл байлаа. Хэрүүл тэмцэл, маргаан, ялгаварлан гадуурхалт, хууран мэхлэлт, орхигдолт, ах дүүгийн өрсөлдөөн, хүчингийн хэрэг, цус холилдолт бүгд тэдний гэр бүлийн түүхийн нэг хэсэг юм. Эдгээр үгсээр хөгжин дэвжих, амар амгалан гэр бүлийг дүрслэх боломжгүй!

Харамсалтай нь энэ түүхийг Библийн туршид болон үүнээс хойших олон зууны туршид дэлхий даяар давтах болжээ. Мэдээж хэрэг, эдгээр гэр бүлүүдэд ч баяр хөөртэй цаг үе, сэтгэл булаам хайрын түүхүүд, мөн цөөн тооны зөвт хүмүүс байсан юм.

Энэ бүхнийг үл харгалзан, Бурхан хүн төрөлхтнийг аврах төлөвлөгөөгөө хэзээ ч орхигдуулаагүй. Тэрээр гэр бүлд зориулсан зорилгоо ч өөрчлөөгүй. Хэрэв та Хуучин гэрээг үргэлжлүүлэн уншвал Еврей гэр бүлийн түүхээр дамжих авралын гайхамшигтай сэдвийг олж мэдэх болно. Олон үйл явдал Есүсийг урьдаас заан өгүүлсэн байдаг. Абрахам Исаакийг өргөл болгон өргөсөн; Египет дэх боолчлолоос Израилын ард түмнийг чөлөөлсөн Алгасал баяр; Рахабыг шүүлтээс аварч, Бурханы ард түмний нэг хэсэг болгосон болон бусад олон үйл явдал Аврагч ирж, хүн төрөлхтнийг золин аварна гэсэн амлалтыг гайхалтайгаар дүрсэлдэг .

Ефес 5–р бүлэгт Бурхан гэрлэлтийг Христ болон Түүний сүйт бүсгүй Чуулгантай харилцах харилцааны дүр зураг байхаар төлөвлөсөн гэдгийг өгүүлсэн. Тэргүүн болох Христ өөрийгөө Чуулганы төлөө өгдөг шиг нөхөр бүр эхнэрийнхээ тэргүүн болохын хувьд өөрийгөө түүний төлөө өгөх ёстой аж. Үүний нэгэн адил эхнэр бүр Чуулганы жишээг дагах ёстой юм. Чуулган Христэд захирагддаг шиг эхнэр бүр нөхөртөө захирагдах ёстой.

Хүн төрөлхтний уналт гэр бүлд зориулсан Бурханы анхны загвар төлөвлөгөөг гажуудуулж, гэрлэлтийн харилцаанд гамшигт үр дагаврыг авчирчээ. Хүн төрөлхтөн нүгэлд унасны үр дагаврыг гэр бүл болгон амсдаг. Гэсэн хэдий ч,

Есүс бүх зүйлийг, түүний дотор гэрлэлтийг золин аврахаар ирсэн юм. Тэрээр нүглээс болж эвдэрч, гутаагдсан бүхнийг аварч, сэргээхээр ирсэн. Гэрлэлтэд зориулсан Бурханы төлөвлөгөөг бид хэрэгжүүлэх чадахгүй байхад Есүс Бурханы хэм хэмжээг төгс биелүүлсэн билээ. Есүс чуулганыг хайрлаж, түүний төлөө амиа өгсөн. Тэр Эцэг Бурханы төлөвлөгөөнд төгс захирагдсан юм. Бурханы төлөвлөгөө болон бидний гэрлэлт гүйцэлдүүлж чадахгүй зүйл буюу хайрлах ба захирагдахын төгс, бүрэн дүүрэн биелэл нь Есүс байв.[1]

► Гэрлэсэн хүнд байх ёстой хандлагын жишээг Есүсээс хэрхэн харж болох вэ?

Есүс өөрийн бүрэн захирагдах байдал, төгс хайраараа Бурханы хүслийг биелүүлээд зогсохгүй, унасан хүн төрөлхтний нэг хэсэг болсон сүйтгэгч хандлагыг давж туулахад нөхөр эхнэрүүдэд тусалдаг. Түүний нигүүлслээр нөхөр эхнэрүүд Ариун Сүнсний хүчээр амьдрахдаа гэрлэлтэд зориулсан Бурханы төлөвлөгөөг биелүүлж чадна (Ефес 5:18).

Төгс гэр бүл гэж байхгүй ч Бурхан гэр бүл болгоныг золин аврахыг хүсдэг. Бурханы нигүүлсэл гэр бүлийн дотор ажиллаж, хүн нэг бүрийг Бурхан анхнаасаа хэн байгаасай гэж хүссэн тийм хүн болоход нь тусалдаг. Гэр бүлийн доторх хүн нэг бүр Бурханы зааврыг дагахаар сонгосноор тэдний дуулгавартай байдал гэр бүл болгонд байдаг төрөлхийн гажуудал, дутагдлыг даван туулахад нь тус дэм болдог. Бид Бурханы хүсэлд захирагдах үед хүн хоорондын харилцаанд нөлөөлдөг уналтын үр дагавар багасаж байдаг.

Жишээлбэл, бурханлаг нөхөр Ефес 5-р бүлэгт Бурханы өөрт нь өгсөн зааврыг дагах үедээ хувиа хичээсэн, эрх мэдлээ эхнэртээ буруугаар ашиглах төрөлхийн хандлагаа даван туулдаг. Бурханд захирагдах түүний дуулгавартай байдал нь уналтын хор хөнөөлтэй үр дагаврыг багасгаж, эдгэрлийг авчирдаг. Энэхүү дуулгавартай байдал нь эхнэр нь түүнд захирагдахад ч бас түлхэц болдог.

Эхнэр хүн Бурханы зааврыг дагаж, нөхөртөө захирагдах үедээ (Ефес 5:24) нөхрийнхөө эрх мэдлийг эсэргүүцэх төрөлхийн нүгэлт хандлагаа даван туулж байдаг. Бурханд захирагдах түүний дуулгавартай байдал нь Бурхан гэрлэлтийг нь ямар байлгахыг хүссэн тийм харилцаанд илүү ойртоход нь тусалж, эдгэрлийг авчирдаг (1 Коринт 11:3, 1 Петр 3:1-7).

Бурханы хувьд гэр бүлийн харилцаа маш чухал болохыг итгэлийн гэр бүлүүд харуулахын тулд Тэрээр гэр бүлийг эдгээх, аврах заавруудыг өгсөн.

Эцэг эх ба өвөө эмээгийн үүрэг хариуцлага

Эцэг эх, өвөө эмээ нар хүүхэд, ач зээ нартаа Бурханы замыг заах хэрэгтэйг Библийн олон эшлэлд дурдсан байдаг. Бид гурвыг товчхон авч үзэх болно.

► Нэг суралцагч Ефес 6:4 эшлэлийг бүлэгт уншина. Энэ эшлэл юу гэсэн утгатай вэ?

Эцэг эхчүүд хүүхдүүдээ Бурханыг мэдэж, Түүнд дуулгавартай байхад сургах нь Бурханы төлөвлөгөө юм. Эцэг эхчүүд хүүхдүүдээ удирдаж, зааварчилж, залруулж, сургадаг арга барил нь Бурхан өөрийн хүүхдүүдэд эдгээр зүйлийг хийдэг арга барилын тусгал байх ёстой.

► Нэг суралцагч Дуулал 78:1-8 эшлэлийг бүлэгт уншина. Дараах асуултуудад хариулаарай:

• Энэ хэсэгт гэр бүлийн хэдэн үеийг дурдсан байна вэ?

• Үе бүрийн хариуцлага юу вэ?

• Ахмад үе залуу үедээ юу заах ёстой вэ?

Дуулал 78 нь Бурханы гайхалтай нигүүлсэл, өршөөлийг харуулдаг. Энэ нь Египетээс гарсан цагаас Давидын хаанчлал хүртэл Израилын гэр бүлд Түүний хийсэн ажлын тухай өгүүлдэг. Энэ Дуулал уншигчдад тэдний гэр бүлийн нөхцөл байдалд найдварыг өгдөг.

► Нэг суралцагч Дэд хууль 6:1-9 эшлэлийг бүлэгт уншина. Энэ хэсгийг харвал, Бурханы ард түмэн болох биднээс Тэр юу шаарддаг вэ?

Энэ эшлэлд Бурханы амласан нутагт израилчууд орохын өмнөхөн Мосегийн тэдэнд хэлсэн үгсийн нэг хэсгийг өгүүлжээ. Тэд Бурханы ард түмэн хэрхэн байх тухай, Бурханд харьяалагдах гэж юу гэсэн үг болохыг суралцжээ. Эдгээр эшлэлд өгүүлсэн үнэнүүд нь Бурханы ард түмэн байж амьдрахын үндэс суурь болдог.

Бурхан биднийг өөрийнх нь Үгийг дуулгавартай сонсож, Түүний биднээс шаарддаг зүйлийг хийхийг тушаасан! (3-4-р эшлэл).

Биднээс шаарддаг зүйлс:

1. Бүх зүрх, сэтгэл, хүч чадлаараа Эзэнийг хайрлах (5-р эшлэл).

2. Бурханы Үгийг зүрх сэтгэлдээ хадгалах (6-р эшлэл).

3. Хүүхдүүддээ Бурханы Үгийг хэрхэн дагахыг хичээнгүйлэн заах (7-р эшлэл).

4. Бурханы Үгийг оюун бодолдоо хадгалж, байнга өмнөө байлгах (8-9-р эшлэл).

Эдгээр тушаал нь бүх үеийнхэнд зориулагдсан болохыг анзаараарай (2-р эшлэл). Бурхан эцэг эх, өвөө эмээ нарыг хүүхэд, ач зээ нараа Түүний төлөө амьдрахад сургах хариуцлагатай гэж үздэг. Хэр удаан хугацаанд вэ? Амьдралынх нь бүх өдрүүдэд (2-р эшлэл). Бурхан эцэг эхчүүд бидэнд хүүхдүүддээ Түүний замыг өдөр бүр, хаа сайгүй, явсан газар, хийсэн бүх зүйлдээ заах ёстой гэж хэлдэг (7-9-р эшлэл).

Хүүхдүүдийн сүнслэг боловсрол нь эцэг эхийн хариуцлага байсан. Сургалт нь эцэг эхийн үлгэр жишээгээр болон Хуулийг давтах замаар өдөр бүр явагддаг байжээ. Эцэг эхчүүд хүүхдүүддээ заахын тулд ямар их хүчин чармайлт гаргадаг байснаас энэ тушаал ямар чухал болохыг харж болно. Энэ нь зөвхөн Хуулийн баримтуудыг заахаас илүү, өдөр тутмын амьдралыг хивс нэхэхийн адил амьдралын хэв маяг болгон харуулах ёстой байжээ. Өрх гэрийн энгийн ажлуудыг хийж байхдаа Бурханы заавар журмуудыг заахад бүтээлч байдал шаардагддаг.[1]

Эцэг эхчүүд хүүхдүүдийнхээ оюун ухааныг төдийгүй зүрх сэтгэлийг нь бас сургах ёстой. Тэд хүүхдүүддээ зөвхөн Бурханы тухай баримтуудыг төдийгүй Бурхантай харилцаатай амьдрах болон Түүнд дуулгавартай байх практик хэрэглээг бас заах ёстой. Эцэг эхчүүд хүүхдүүдээ үгээр зааварчлах болон амьдралын жишээгээр сургадаг. Энэ хоёул чухал.

Энэ эшлэл энгийн мэт санагдаж болох ч маш чухал юм. Эдгээр үнэнүүд болон тушаалууд нь хувь хүмүүс болон гэр бүлд зорилго, чиглэлийг өгдөг. Эцэг эхчүүд Бурханыг улам ихээр мэдэхийг байнга эрэлхийлж, бүх зүйлд Түүнд бүрэн дуулгавартай байхын хэрээр тэд хүүхдүүддээ үүнийг хийхийг зааж байдаг. Эцэг эхчүүд насан туршдаа суралцах, дуулгавартай байх хандлагатай байх ёстой. Энэ нь тэдний хүүхдүүдэд үлгэр жишээ болж, тэдэнд Бурханыг эрэлхийлэх хүслийг төрүүлдэг.

► Эцэг эхчүүд хүүхдүүдээ өдөр бүр дагалдуулах ямар практик аргууд байдаг вэ?

Гэр бүл - бусдыг хайрлах сургалтын талбар

► Нэг суралцагч 1 Иохан 4:7-13, 19 эшлэлийг бүлэгт уншина.

Энэ хэсгийн гол сэдэв бол хайр юм. Бурхан хэн болохыг бялхам дүүрнээр мэдэхийн тулд бид бие биенээ хайрлах ёстой. "Бие биенээ" гэдэгт гэр бүл маань багтана. Бурхан бидэнд гэр бүлийг өгсөн нэг шалтгаан нь бид бусдыг хэрхэн хайрлахыг сурахын тулд юм. Бид гэр бүлийнхээ гишүүдэд хайраа харуулж сурахын хэрээр (хэцүү байсан ч) Бурхантай улам бүр адил болдог. Учир нь Бурхан бол хайр юм! (8-р эшлэл).

Сүнслэг эсвэл биеийн гэр бүлийн гишүүд бие биенээ хайрласнаар тэд Бурханаас төрсөн гэдгээ баталдаг (7-р эшлэл). Тэд бие биенээ хайрлах тусам Бурханы хайр тэдний дотор төгс болдог (12-р эшлэл).

Бурхан биднээс зөвхөн бусдыг хайрлахыг шаардаагүй, харин эхлээд биднийг Тэр хайрласан (9-11, 19-р эшлэл). Тэр бидний нүглийн төлөө Есүсийг илгээж, биднийг хайрласан (10-р эшлэл). Биднийг хайрласан Бурханы хайр нь бусдыг хайрлах бидний сэдэл юм (11-р эшлэл).

Гэр бүлээ хайрлах нь зарим хүмүүст амархан, бусдынх нь хувьд маш хэцүү ч байж болох юм. Харин Түүний тушаалыг дагахад бидэнд бүгдэд маань хэрэгтэй зүйл нь Ариун Сүнсээр дамжуулан бидний дотор оршдог Бурхан билээ (12-13-р эшлэл).

Бурхан биднийг эцэг эх, хань ижил, үр хүүхдүүдээ оролцуулаад бие биенээ хайрлахад уриалдаг. Гэр бүлээ хайрлах нь буруу эсвэл муу зүйлийг зөвшөөрнө гэсэн үг биш. Энэ нь биднээс хариуцлага шаардахгүй ч гэсэн үг биш. Харин энэ нь бид гэр бүлийнхээ гишүүдэд хамгийн сайн сайхныг хүсэж, тэдний сайн сайхны төлөө өөрийгөө зориулахад бэлэн байна гэсэн үг юм.

► Гэрлэлт Гурвалын харилцааг хэрхэн тусгадаг талаар өөрийн үгээр тайлбарлаарай.

► Нүглийн улмаас эвдэрсэн гэрлэлтийг Бурхан хэрхэн эдгээн авардаг тухай ярина уу.

► Гэрлэлт дэх Бурханы зааврыг дагах нь яагаад гэр бүлийг шинэчлэн эдгээдэг болохыг тайлбарлана уу.

Хэсэг зуур залбирч, гэр бүлийнхээ төлөө Бурханд талархал илэрхийлээрэй. Гэр бүлийнхээ төлөө залбираарай. Өвдөлт, бүтэлгүйтэл, баяр ёслол, баяр хөөртэй нөхцөл байдлынхаа талаар залбираарай. Дэд хууль 6:4-9 эшлэлийн үгсийг өөртөө тусгаж, тэдгээрийг дуулгавартай байдал, хүсэлт болгон залбираарай.

(1) Дэд хууль 6:4-9 эшлэлийг цээжил. Дараагийн хичээлийн эхэнд цээжилснээ бичгээр эсвэл аман хэлбэрээр уншаарай.

(2) Дэд хууль 6:1-9-д Бурхан биднээс дөрвөн зүйлийг шаардсан. Эдгээр дөрвөн чиглэлийн дагуу залбирч, өөрийгөө шударгаар үнэлээрэй.

Биднээс шаарддаг зүйлс:

• Бүх зүрх, сэтгэл, хүч чадлаараа Эзэнийг хайрлах (5-р эшлэл).

• Бурханы Үгийг зүрх сэтгэлдээ хадгалах (6-р эшлэл).

• Хүүхдүүддээ Бурханы Үгийг дагахыг хичээнгүйлэн заах (7-р эшлэл).

• Бурханы Үгийг оюун бодолдоо хадгалж, байнга өмнөө байлгах (8-9-р эшлэл).

Эдгээрийн талаар тус бүр нэг догол мөрөнд залбирал болгон бичээрэй (Та энэ бичсэн зүйлээ ангийн удирдагчтайгаа хуваалцах шаардлагагүй бөгөөд даалгавраа хийсэн гэдгээ л мэдэгдэхэд болно).

(3) Абрахам, Сара нарын амьдралаас бид урт удаан хүлээлтийн талаар сурдаг. Дараах асуултуудын дагуу бодож үзнэ үү:

• Та хэзээ Бурханы цаг хугацааг хүлээх шаардлагатай болсон бэ? Эдгээр хүлээлтийн цаг үеэс та юу сурсан бэ?

• Та Бурханы Үгийн амлалтад хэр их итгэдэг вэ? Та одоо ямар нэгэн амлалттай холбоотой бэрхшээлийг туулж байна уу? Энэ бэрхшээл танай гэр бүлд хэрхэн нөлөөлж байна вэ?

• Та Бурханд итгэж найдахгүйгээр өөртөө эсвэл гэр бүлдээ зориулж ямар нэгэн зүйлийг шийдвэрлэхийг оролдож байсан уу? Үр дүн нь юу байсан бэ?

• Тэвчээргүй байдал, итгэлгүй байдал гэр бүлд хэрхэн сөргөөр нөлөөлдөг вэ?

Энэ сэдвээр нийт гурван догол мөрөнд багтаан хариулт бичээрэй (Та энэ бичсэн зүйлээ ангийн удирдагчтайгаа хуваалцах шаардлагагүй бөгөөд даалгавраа хийсэн гэдгээ л мэдэгдэхэд болно).