Lesson 7: Бат бэх гэр бүлийг цогцлоох нь

Энэ хичээлийн төгсгөлд суралцагч дараах чадварт суралцсан байна:

(1) Бурхан эрэгтэй, эмэгтэй хүнийг онцлогтойгоор бүтээсэн тухай болон гэрлэлтийн харилцаанд өгсөн Түүний заавруудыг ойлгох.

(2) Эхнэр, нөхөр хоёр Библийн зарчмуудад дуулгавартай байснаар бие биенийхээ хэрэгцээг хангадаг талаар суралцах.

Эрэгтэй, эмэгтэй хүмүүс олон талаараа ялгаатай байдаг нь нууц биш. Олон эрчүүд сэтгэл хөдлөлөө илэрхийлэхэд бэрхшээлтэй байдаг бол олон эмэгтэйчүүд сэтгэл хөдлөлөө илэрхийлэхийг жинхэнэ харилцааны нэг хэсэг гэж үздэг. Эрчүүд илүү их эрсдэл хүлээх хандлагатай байдаг бол эмэгтэйчүүд ихэвчлэн аюулгүй байдалд санаа тавьдаг. Эрчүүд төрөлхийн бие махбодын гоо үзэсгэлэнд илүү татагддаг бол ихэнх эмэгтэйчүүд төрөлхийн сэтгэл хөдлөлийн дотно харилцаанд илүү татагддаг. Өөр олон ялгааг дурдаж болно.

Хүйсийн ердийн ялгаанаас гадна эхнэр, нөхөр хоёр хувь хүнийхээ хувьд ялгаатай. Магадгүй нэг нь хүмүүстэй хамт байх дуртай байхад, нөгөө нь ганцаараа байх дуртай байж болно. Мөн гэр орны гэрэлтүүлэг ямар байх ёстой эсвэл өрөөний хэм хэр зэрэг байх ёстой зэрэг дээр жижиг ялгааг ч анзаарах болно. Гэрлэсэн олон хүмүүс мөнгөө зарцуулах тал дээр санал зөрөлдсөнөөс болж хүндрэл үүсдэг. Эдгээр ялгаа нь заавал зан чанартай холбоотой байх албагүй. Харин зүгээр л хувь хүний онцлог, үзэл бодлын ялгаа байх боломжтой.

Зарим хүмүүс гэрлэлт нь эрэгтэй, эмэгтэй хүнийг нэгтгэдэг учраас ялгаатай байдал нь арилах ёстой гэж боддог. Аль нэг нь хань ижлийнхээ ялгаатай байдлыг өөрчлөх ёстой дутагдал ч гэж бодож болох юм. Хоёр тал бие биенийхээ үзэл бодол, дадал хэвшил, сонголтыг өөрчлөхийг тууштай оролдож ч магадагүй.

Харилцааны улмаас хүн бүр хөгжиж, сайжрах ёстой нь үнэн. Гэсэн хэдий ч заримдаа хүнийг өөрчлөх гэсэн бидний оролдлого тухайн хүний хувийн онцлогт халдаж байдаг. Эрүүл гэрлэлтэд эхнэр нөхөр хоёр бие биенийгээ хайрлах, хүндлэх, үнэлэх, үйлчлэх сахилга батыг хөгжүүлдэг.

► Эрэгтэй, эмэгтэй хүмүүсийн бусад ялгаатай талууд юу вэ? Бие биеэ хүлээн зөвшөөрөх ёстой бусад хувийн онцлог шинжүүд юу вэ?

Гари Томасын, Sacred Marriage (Ариун нандин гэрлэлт), номд дурдсанчлан,

Сайн гэрлэлт бол олж авдаг зүйл биш, харин түүний төлөө ажиллах ёстой зүйл юм. Энэ нь хичээл зүтгэлийг шаарддаг. Та өөрийн аминч чанараа цовдлох ёстой. Та заримдаа нүүр тулж, заримдаа нүглээ улайх шаардлагатай болно. Уучлахыг дадал болгох нь чухал. Энэ бол гарцаагүй хүнд хөдөлмөр боловч эцэстээ үр өгөөжөө өгдөг. Эцэстээ энэ нь гоо үзэсгэлэн, итгэлцэл, харилцан дэмжлэг бүхий харилцааг бий болгодог.[1]

Томас Отто Пайперын үгийг эш татахдаа:

Хэрэв гэрлэлт... олон хүний хувьд бүтэлгүйтлийн туршлага болсон бол үүний шалтгаан нь тэдний итгэлийн [идэвхгүй байдалд] оршино. Бурханы ерөөлийг тууштай эрэлхийлж байж л олж, эдлэх боломжтой гэдгийг хүмүүс таашаадаггүй (Матай 7:7; Лук 11:9). Иймээс гэрлэлт бол бэлэг болоод биелүүлэх ёстой үүрэг юм.[2]

Эхнэр нөхөр хоёр бие биенийхээ хэрэгцээг хангахыг хичээхийн оронд өөрсдийнхөө хэрэгцээг боддог учраас гэрлэлтүүд ихэвчлэн цэцэглэн хөгжиж чаддаггүй.

Бид бие биенийхээ гүн гүнзгий хэрэгцээг хангаж чадахгүй. Зөвхөн бидний тэнгэрлэг Эцэг л бидний хүсэл тэмүүллийг бүрэн дүүрэн хангаж чадна. Тийм ч учраас Есүс ирсэн юм. Түүний зорилго бол биднийг аврах, өөрийн Сүнсээр буюу Ариун Сүнсээр дүүргэх, мөн "Ааба аа! Аав минь!" гэж хэлэх (Ром 8:14-15; Галат 4:6) гүн гүнзгий, сэтгэл хангалуун байх харилцаанд авчрах юм.

Гэсэн хэдий ч Бурханы гэрлэлт дэх зорилгуудын нэг нь үйлчлэгч байхад суралцах талбар юм. Үүнийг бид Есүсийн дотроос олж хардаг (Иохан 13:14). Бурхан эхнэр нөхөр хоёрын хэн хэнд нь бие биедээ санаа тавьдаг, даруу үйлчлэгчийн зүрх сэтгэлийг төлөвшүүлэхийг хүсдэг (Филиппой 2:3-8).

Хамгийн үзэсгэлэнтэй, аз жаргалтай зарим гэрлэлтүүд нь эхнэр нөхрийн хэн нэг нь өвчин, бүтэлгүйтэл, хагацал эсвэл уй гашуу зэрэг хэвийн биш хүнд нөхцөл байдал дунд өөрийгөө умартаж, нөгөөдөө үйлчилсэн учраас л оршин тогтнодог. Зарим нөхрүүд өөрсдийг нь хайрлахын аргагүй байх үед нь эхнэрүүд нь тэдний төлөө залбирч, уучилж, санаа тавьж, болзолгүй хайрласан учраас л амьдрал нь сүйрэлгүй найдвар бий болсон гэж гэрчлэн ярьдаг. Түүнчлэн зарим эхнэрүүд хүчирхийлэгч эцэг эсвэл бусад гэмтлээс үүдсэн сэтгэл санааны хохирлыг даван туулахад нөхрийнх нь тэвчээр, ойлголт тусалсан гэж гэрчилдэг. Бид унасан, нүгэлт ертөнцөд амьдарч байгаа бөгөөд бүх бүтээл ёолж байдаг учраас (Ром 8:22), гэрлэсэн хүн бүр шарх, сорвийг тээж явдаг. Гэхдээ Бурханы нигүүлсэл биднийг бие биедээ санаа тавьж, бие биенийхээ шархыг бооход туслах болно!

Бидний хүн нэг бүр төрөлхийн хувиа хичээсэн байдаг. Бид төрөлхийн бусдын хэрэгцээнээс илүүтэй өөрсдийн хэрэгцээнд санаа тавьдаг. Бурханы аврах ба ариусгагч нигүүлсэл нь бидний дотор орших Ариун Сүнсээр дамжуулан өөрсдийн хэрэгцээнээс илүү бусдын хэрэгцээг өмнөө тавьдаг хүмүүс болгон өөрчилж чадна. Эхнэр нөхөр хоёр бие биенийхээ хэрэгцээ, хүсэлд анхааралтай хандах үед гэрлэлт цэцэглэн хөгждөг.

► Үйлчлэхийг сонгоно гэдэг нь юу гэсэн үг вэ?

Бурхан эрэгтэй, эмэгтэй хүмүүсийг өөр өөр хэрэгцээ, хүсэл сонирхолтойгоор бүтээсэн. Энэ нь эрэгтэй хүний хувьд өөрийг нь баярлуулдаг зүйлс эхнэрийг нь ч баярлуулна гэж бодох ёсгүй гэсэн үг. Эхнэр ч гэсэн нөхрөө өөртэйгөө адилхан хандаасай гэж бодох ёсгүй. Мэдээж хэрэг, зарим талаар өгөөмөр хандах, эелдэг харилцаа хоёуланд нь адил байх ёстой ч эрэгтэй, эмэгтэй хүмүүс тус бүрдээ өөрийн гэсэн онцгой хэрэгцээтэй байдаг.

Хэрэв бид эрэгтэй, эмэгтэй хүмүүсийн онцгой хэрэгцээг ойлгох юм бол хань ижлээ хэрхэн хангахыг ойлгох боломжтой. Эхнэр нөхөр хоёрын хоорондох олон маргаан, яриа нь асуудлын шийдэл болдоггүй нь харамсалтай. Учир нь хэн хэн нь нөгөөгийнхөө хэрэгцээг ойлгож чаддаггүй. Хэн хэн нь нөгөөгөө ойлгохгүй байгаа учраас уурлаж, гоморхдог.

Бүх хүн хайрлагдах, хүндлэгдэх хэрэгцээтэй байдаг. Гэхдээ эрэгтэй, эмэгтэй хүмүүсийн хооронд ялгаа бий. Эмэгтэй хүний үндсэн хэрэгцээ бол хайр, харин эрэгтэй хүний үндсэн хэрэгцээ бол хүндлэл юм.[1]

► Та эрэгтэй, эмэгтэй хүмүүсийн хэрэгцээний энэ ялгааг хэрхэн ажигласан бэ?

Ефес 5:25, 28-д хэлэхдээ, “Нөхрүүд ээ, Христ чуулганыг хайрлаад түүний төлөө Өөрийгөө өгсний адил эхнэрүүдээ хайрла… Тиймээс нөхрүүд ч эхнэрүүдээ өөрийн бие шиг хайрлах ёстой…”

Нөхөр нь эхнэрээ хайрлаж буйгаа байнга хэлж байх ёстой бөгөөд тэр үүнийг мэдэж байгаа гэж бодох ёсгүй юм. Мөн үг ярианаас илүүтэйгээр хайраа илэрхийлэх ёстой. Эхнэрийнх нь хувьд чухал байдлаар тэр хайраа харуулах ёстой. Нөхөр нь өөрийнхөө хувьд чухал байдлаар хайраа илэрхийлсэн учраас эхнэр нь хайрлагдсанаа мэдрэх байх гэж бодох ёсгүй. Учир нь эхнэрийнх нь хэрэгцээ түүнийхээс өөр юм.

(1) Нөхөр нь аюулгүй байдлыг хангах замаар эхнэрээ хайрладаг.[1]

Эхнэр хүн нөхөр нь түүнийг бие махбодын болон сэтгэл санааны хувьд хамгаалдаг гэдгийг мэдэхийг хүсдэг. Нөхөр нь хөршүүдтэйгээ үүссэн аливаа зөрчилдөөнийг шийдвэрлэх ёстой. Нөхөр хүн гэр нь аюулгүй газар гэдгийг баталгаажуулах ёстой. Эхнэрийг нь хүмүүс (тэр байтугай хамаатан садан нь) шүүмжлэх үед тэр түүнийг өмгөөлөн ярих ёстой. Эхнэрээ өөртөө захируулахын тулд нөхөр хүн цохих эсвэл ямар нэгэн байдлаар бие махбодын хохирол учруулах ёсгүй. Тэрээр гэр бүлийнхээ материаллаг хэрэгцээг хангахын тулд чадах бүхнээ хийх ёстой. Хэрэв нөхөр нь мөнгө санхүүгийн асуудалд хайнга ханддаг бол эхнэр нь түүнийг гэр бүлийнхээ хэрэгцээг анхаардаггүй гэж мэдэрдэг.

Нөхрүүдэд зориулсан санхүүгийн зөвлөгөө:

Мөнгөний асуудал бол гэрлэлтийн хамгийн том зөрчилдөөний нэг шалтгаан юм. Нөхрүүд ээ,

• Ашиг олохын тулд ямар нэгэн хууль бус, ёс суртахуунгүй зүйл хийхээс татгалз. Та Бурханы эрх мэдэл дор байгаа гэдгээ санаарай.

• Аравны нэгээ чуулганд өгөөрэй. Бурхан таныг хангана гэдэгт та итгэж байгаа учраас тэр юм.

• Ажил эрхлэх хамгийн сайн сонголтыг хайгаарай. Гэхдээ одоохондоо тааламжгүй ажил хийхэд ч бэлэн байх хэрэгтэй.

• Ажил эрхэлж байгаа эсэхээс үл хамааран, өдөр бүр өөртөө болон бусдад туслах ажил олж хийгээрэй.

• Өнөөдөр мөнгө зээлж, маргаашийн мөнгөө бүү зарцуул.

• Таашаал авахын тулд мөнгө зарцуулахдаа эхнэр, хүүхдүүдээ хамруулж байгаарай.

• Байрны түрээс гэх мэт ердийн зардлуудад зориулж тогтмол хуримтлал үүсгээрэй.

• Тав тухтай байдалд мөнгө зарцуулахын оронд нөхцөл байдлаа сайжруулахын тулд хөрөнгө оруулалт хий.

(2) Нөхөр нь өөрийгөө эхнэртээ үнэнчээр зориулж хайрладаг.

Нөхөр хүн өөрийгөө ёс суртахууны хувьд цэвэр байлгаж, эхнэртээ хангалуун байх ёстой. “Энхрийхэн марал, гоолигхон согоон адил эхнэрийн чинь хөх чамайг ямагт хангалуун байлгаж, эгнэгт түүний хайранд чи хөлчүүрэх болтугай!” (Сургаалт үгс 5:19). Хэрэв нөхөр нь өөр эмэгтэйчүүдтэй зохисгүй, ёс бус харилцаатай байвал эсвэл бусармаг зугаа цэнгэлд оролцдог бол эхнэр нь хайрлагдахгүй байгаагаа мэдэрдэг.

(3) Нөхөр нь эхнэрээ ойлгохыг хичээх замаар хайрладаг.

Нөхөр нь эхнэрээ үргэлж ойлгож чадахгүй байж болох ч тэрээр түүнийг сонсож, танихад цаг гаргах ёстой. Бичвэр нөхрүүдэд хандан, “Нөхрүүд ээ... мөн адил эхнэртэйгээ ойлголцож амьдар… Амийн нигүүлслийг хамтран өвлөгчийнх нь хувьд…” (1 Петр 3:7) гэж хэлдэг. Хэрэв нөхөр нь эхнэрийнхээ мэдрэмж, үзэл бодлыг дорд үзвэл тэрээр хайрлагдахгүй байгаагаар мэдэрдэг. Нөхрийнх нь хэлсэн үгс логикгүй санагдаж байсан ч хамаагүй, тэрээр санааг нь зовоосон асуудлыг ойлгохоор хичээхийг нөхрөөсөө хүсдэг.

Учир нь Бурхан эр нөхрийг өрх гэрийн тэргүүн байхаар бүтээсэн (Ефес 5:23) бөгөөд орон гэрээ удирдах хариуцлага нь түүнийх юм (1 Тимот 3:4-5). Гэсэн хэдий ч нөхөр, эхнэр хоёр ихэнх шийдвэр дээр санал нийлэх хүртлээ ярилцаж хэлэлцэх цаг гаргах ёстой. Нөхөр нь эхнэрийнхээ мэдрэмж, үзэл бодлыг харгалзан үзэхгүйгээр ямар нэгэн зүйлийг хурдан шийдэх учиргүй. Хэрэв тэд ямар нэг асуудал дээр санал нийлж чадахгүй бол нөхөр нь шийдвэр гаргах шаардлагатай болж болох ч нэгдмэл байж чадаагүйд нөхөр нь харамсах ёстой. Ихэвчлэн нэгдмэл биш байдал нь нөхөрт өгөх сэрэмжлүүлэг болдог. Ихэвчлэн эмэгтэйчүүд илүү ялгах чадвар, мэргэн ухаантай байдаг бөгөөд эрчүүдийг сайн шийдвэр гаргахад энэ нь хэрэгтэй юм.

► Нэг суралцагч Ефес 4:2-3, 15-16 эшлэлийг бүлэгт уншина. Эдгээр эшлэл нөхөр, эхнэрийн харилцаанд хэрхэн хэрэгжих боломжтой вэ?

(4) Нөхөр нь эхнэрээ үнэлж хайрладаг.[2]

Олон эхнэрүүд нөхрүүд нь тэдний хийж буй ажлыг үнэлдэггүй гэж мэдэрдэг. Нөхөр нь эхнэртээ талархлаа илэрхийлэх ёстой. Гэр бүлийнхээ төлөө гаргаж буй түүний хүчин чармайлтыг нөхөр хүлээн зөвшөөрөх ёстой. Тэр бусад хүмүүсийн дэргэд эхнэрээ хэзээ ч шүүмжлэх ёсгүй.[3] Нөхөр эхнэрийнхээ зан чанар, сэтгэл татам байдал, чадварыг магтах ёстой. Тэрээр эхнэрээ гоё хувцаслахад нь чадах чинээгээрээ туслах ёстой. Нөхөр нь түүний гадаад төрхөд санаа тавихгүй байх үед эхнэр нь хайрлагдахгүй байгаагаар мэдэрдэг.

Нөхөр нь эхнэрээ шүүмжлэх үедээ түүнийг хувь хүн талаасаа хангалтгүй гэж бодоход хүргэж, урмыг нь хугалдаг. Паул итгэгчдэд “хэнийг ч муулахгүй, хэрүүлч биш, дөлгөөн байж, бүх талаар даруу байдлыг бүх хүнд харуулахыг” (Тит 3:2) хэлсэн байдаг. Хэрэв шүүмжлэх шаардлагатай бол эхнэрээ үнэлэх үнэлэмж нь шүүмжлэлээс нь илүү их гэдгийг нөхөр маш болгоомжтойгоор батлах ёстой. Нөхөр эхнэрээсээ илүү сайн эмэгтэйчүүдийн жишээг дурдахаас зайлсхийх ёстой.

(5) Гэр бүлийн харилцаандаа цаг гаргаснаар нөхөр нь эхнэрээ хайрладаг.

Хамтдаа амьдралыг хуваалцах нь ярилцах цагийг шаарддаг. Харилцаа нь үгээр гүнзгийрдэг (Сургаалт үгс 16:24, Сургаалт үгс 20:5). Эхнэр нөхөр хоёр өдөр тутмын амьдралаа дүүргэдэг зүйлсийн талаар ярилцах ёстой. Тэд нөхөрлөл, мэдрэмж, хүсэл, санаа зовоосон асуудлуудынхаа талаар ярилцах учиртай. Нөхөр нь ярилцаж, сонсоход цаг гаргах үед эхнэр хайрлагдаж байгаагаа мэдэрдэг. Нөхөр ажлаасаа ядарч ирэхдээ ярилцах эсвэл гэрийн асуудлын талаар сонсох хүсэлгүй байж болох ч энэ хэрэгцээг үл тоомсорлож болохгүй. Хэрэв нөхөр нь бие махбодын дотно харилцааг хүсдэг ч, сэтгэл санааны дотно харилцаанд бэлэн биш бол эхнэр өөрийгөө ашиглагдсан, хайрлагдахгүй байгаагаар мэдэрдэг.

(6) Нөхөр нь эхнэрийнхээ сул талуудад тэвчээртэй хандсанаар хайрладаг.

1 Петр 3:7-д “Нөхрүүд ээ, эхнэр чинь эмэгтэй хүн тул түүнийг хэврэгхэн сав мэт үзэн, та нар ч мөн адил эхнэртэйгээ ойлголцож амьдар…” Ихэнх эмэгтэйчүүд ихэнх эрчүүд шиг бие махбодын хувьд хүчтэй биш байдаг. Мөн ихэнх эмэгтэйчүүд ихэнх эрчүүдээс илүү сэтгэл санааны зовиур, дарамтад өртөмтгий байдаг. Эр нөхөр эхнэрээ тайтгаруулж, урамшуулдаг байх учиртай. Тэрээр эхнэрийнхээ стрессийг хэрхэн тайлахад суралцах хэрэгтэй. Эхнэр нь ядарсан, стресстэй эсвэл санаа зовсон үед түүнд шаардлага тавихаас зайлсхийх ёстой.

(7) Нөхөр нь эхнэрийнхээ практик хэрэгцээг хангаснаар хайрладаг.

Яг л эрэгтэй хүн ажилдаа зориулсан хамгийн сайн хэрэгсэл, ажил хийх сайн газартай байхыг хүсдэг шиг, эхнэртээ сайн орчинг бүрдүүлж өгөх хэрэгтэй. Гэр оронд нь засаж янзлах зүйл, эхнэрийнх нь хэрэглэдэг зүйлс хангагдсан байгаа эсэхийг нөхөр шалгах ёстой.

Нөхрүүд эхнэрүүдээ хайрлах үед гарах үр дүн

Ихэнх нөхрүүд эхнэрээ хайрлах үед эхнэрүүд нь баяр хөөр, хамтын ажиллах хариу үйлдэл үзүүлдгийг олж мэддэг. Эмэгтэйчүүд нөхөр нь өөрт нь үнэнч байж, дээр дурдсан арга замуудаар хайраа илэрхийлэх үед аз жаргалтай болдог. Нөхрүүд эхнэрээ хайрлах үедээ гэрлэлтээсээ хамгийн их зүйлийг хүлээн авдаг (Ефес 5:28). Гэсэн хэдий ч эрчүүдэд үр дүн баталгаа болохгүй. Үүнд хамаарахгүй тохиолдлууд бий. Эрэгтэй хүн хүссэн зүйлээ авахын тулд хайраа харуулах ёсгүй. Тэрээр өөрийнхөө хэрэгцээнд санаа тавихын оронд Бурханыг баярлуулах, эхнэрийнхээ хэрэгцээг хангахын тулд хайраа илэрхийлэх учиртай.

Зарим эхнэрүүд өнгөрсөн туршлагаасаа болж сэтгэл санааны хохирол амссан байж болох бөгөөд нөхрийнхөө хайранд хурдан хариу үйлдэл үзүүлэхгүй байж болно. Хайрыг илэрхийлэх эдгээр дадал нь хэдхэн өдөрт турших техник биш юм. Нөхөр нь Бурханд болон эхнэртээ өөрийн зүрх сэтгэлд буй хайрын улмаас эдгээр арга замуудаар хайраа тууштай илэрхийлсээр байх ёстой. Христ чуулганыг өөрийгөө зориулсан шийдвэр ба итгэмжит байдлаараа хайрласан юм.

Ефес 5:33-д “Гэхдээ хэн чинь ч өөрийгөө хайрладгийн адил эхнэрээ хайрла. Эхнэр нь нөхрөөсөө эмээж бай” хэмээн тушаасан.

Эр хүн хүндлэгдэх хэрэгцээтэй байдаг. Ихэнх эрчүүд бусдад таалагдахаас илүүтэй тэднээр хүндлүүлэхийг хүсдэг. Бурхан эрчүүдийг гэр бүлээ хамгаалах, хангах, удирдах чадвартайгаар бүтээсэн. Эцэг, нөхрийн байр суурь нь тэрхүү хүндлэлийг олохоос ч өмнө байх ёстой хүндэтгэл байдаг. Эхнэр нь нөхрийнхөө үйлдэл буруу байсан ч түүнд хүндэтгэлтэй хандах ёстой. Түүнийг Бурханы дүр төрхөөр бүтээгдсэн, эрх мэдлээ төгс ашиглаагүй байхдаа ч эрхэм чухал хүн гэж эхнэр тооцох ёстой (Ефес 5:23). Энэ нь түүний үйлдэл эсвэл шийдвэртэй санал нийлэхгүй гэдгээ хэлж болохгүй гэсэн үг биш, харин эхнэр нь түүнд үл хүндэтгэсэн байдлаар хандах ёсгүй гэсэн үг юм.

Эхнэр нь нөхрийнхөө эрх мэдэлд сайн дураараа захирагдаж хүндлэх үедээ Есүст хайртайгаа илэрхийлж байдаг (Ефес 5:22, 31-33).

Зарим эхнэрүүд нөхрийнхөө талаар найзууддаа шүүмжлэн ярьж, нууцаар үйлдэх, гомдоох үг хэрэглэх зэргээр нөхөртөө үл хүндэтгэсэн байдлаар ханддаг хэрнээ тэд нөхрөө хайрладаг гэж боддог. Тэдний санаа тавилт нь үл хүндэтгэлийг нь нөхөж чадахгүй гэдгийг ойлгох ёстой.

Ихэнх эмэгтэйчүүдэд бяцхан хүүхдийг анхаарч халамжлах эх хүний хүчтэй чанар байдаг. Нялх хүүхдийн хэрэгцээг хангах төрөлхийн чадвар, хүсэл эмэгтэй хүнд бий. Хэрэв хэн нэгэн "Та нялх хүүхдийг асрах чадваргүй" гэж хэлвэл эмэгтэй хүн хэрхэн мэдрэхийг төсөөлөөд үз. Үүнтэй адилаар эрчүүд хамгаалах, хангах, удирдах хүчирхэг чанартай. Эхнэр нь түүнд эдгээр зүйлсийг хийх чадваргүй гэж хэлвэл нөхөр нь эр хүн байж чадахгүй бүтэлгүйтжээ гэж мэдэрдэг.

Нөхрөөс нь илүү хүчтэй зан чанартай, илүү их мөнгө олдог, эсвэл илүү өндөр албан тушаалтай бусад эрчүүд байсаар байх болно гэдгийг эхнэр хүн ойлгох ёстой. Тэрээр нөхрөө бусадтай харьцуулж, бүтэлгүй мэтээр мэдрүүлэх ёсгүй. Ефес 5:21-33 эшлэлээс бид сурсанчлан, эхнэр нь нөхөртэйгөө нэг юм. Эхнэр нь нөхрөө шүүмжлэх эсвэл бусадтай харьцуулах үедээ өөрсдийгөө хамтад нь болон харилцаагаа хохироож байдаг.

► Нэг суралцагч Сургаалт үгс 31:11-12, 26 эшлэлийг бүлэгт уншина. Эдгээр эшлэл бурханлаг эхнэр хүн нөхөртөө зан байдал, үг яриагаараа хэрхэн ханддаг тухай бидэнд юуг сургаж байна вэ?

(1) Эхнэр нь урмын үгсээр нөхрөө хүндэлдэг.

Эхнэр нь нөхрийнхөө боломжит чадварыг үнэлж батлах ёстой. Эхнэрийн хүндлэл нөхөртөө хэлэх урмын үгсээс нь илэрхий харагддаг. Ихэнх эрчүүдэд үгс хүчтэй нөлөө үзүүлдэг. Тэдгээр нь босгон байгуулж эсвэл нураадаг (Сургаалт үгс 14:1). Тэдгээр нь урамшуулж эсвэл сул дорой болгодог. Үгс нь түүнийг өөртөө итгэлтэй болгож эсвэл сэтгэлийг нь мохоодог (Сургаалт үгс 18:21). Эр хүн бүх оролдлогодоо амжилт олохгүй, эсвэл зарим албан тушаалд байж чадахгүй байж болох ч, гэр бүлийнхээ аюулгүй байдал, орон гэрээ хангах түүний хүчин чармайлтыг эхнэр нь баталгаажуулах ёстой. Нөхөр нь шинэ санаа гаргах, шинэ зүйлсийг оролдох үед эхнэр урмыг нь хугалж болохгүй.

► Суралцагчид Сургаалт үгс 15:4 ба Сургаалт үгс 16:24 эшлэлийг бүлэгт уншина.

(2) Эхнэр нь захирагдах байдлаар нөхрөө хүндэлдэг (1 Петр 3:5).

Нөхөртөө захирагдах нь эхнэр нь нөхрөөсөө доогуур гэсэн үг биш. Харин тэдний үүрэг роль нь өөр гэсэн үг юм. Ариун Гурвалд ч Хүү нь Эцэгээсээ мөн чанар, хүч чадал эсвэл алив шинж байдлаараа доогуур биш хэдий ч Эцэгтээ захирагддагийг бид хардаг.

Энэ зарчим зарим эхнэрүүдийн хувьд амар биш байдаг. Ялангуяа нөхөр нь Бурханы Үгээр амьдардаггүй эсвэл тэдэнд эелдэг бус ханддаг бол. Зарим эхнэрүүд өөрсдөө эсвэл гэр бүлдээ нөхрөөсөө илүү сайн шийдвэр гаргаж чадна гэж боддог. Заримдаа эхнэрийн зөв, нөхрийн буруу байдаг. Гэсэн хэдий ч хэрэв эхнэр нь нөхөртэйгөө санал нийлэх үедээ л захирагддаг бол тэр эрх мэдлийг авч байгаа бөгөөд үнэхээр захирагдаж байгаа хэрэг биш юм. Захирагдах гэдэг нь нөгөө хүндээ шийдвэр гаргахыг зөвшөөрөх гэсэн утгатай.

Петр эхнэрүүдэд хандан,

та нар нөхөртөө захирагд. Тэгвэл зарим нөхрүүд үгийг дагадаггүй боловч, үг яриагаар бус журамт явдлаар чинь Эзэн рүү ирнэ…. Гоёл чинь үс сүлжилт, алтан эдлэл зүүх, эсвэл хувцаслалт гэх мэт гадна талынх бүү байг. Харин нуугдмал дотоод хүнээ дөлгөөн ба даруу сэтгэл бүхий мөхөшгүй чанараар гоё. Энэ нь Бурханы өмнө асар үнэтэй болой (1 Петр 3:1, 3-4).

Олон хүнд хэцүү нөхцөл байдлууд тохиолддог. Олон эхнэрүүд "Хэрэв тэр намайг _______ хий гэвэл би заавал хийх ёстой юу?" гэж асуудаг. Энэхүү хичээлээр амьдралд тохиолддог бүх төрлийн нөхцөл байдлыг авч үзэх боломжгүй. Гэсэн хэдий ч захирагдах асуудал ихэвчлэн нөхөр эхнэрээс хийх ёсгүй зүйлийг шаарддаг учраас үүсдэггүй. Эхнэр нь түүнд захирагдвал нөхрийнх нь хувьд үндэслэлгүй болох учраас тэрээр захирагдахыг хүсэхгүй ч байж болох юм. Магадгүй нөхөр нь хайргүй, эелдэг бус байж болно. Эхнэр нь шийдвэр гаргах эрх чөлөөгөө алдахыг хүсэхгүй ч байж болно. Эхнэр нь эсэргүүцсэн хандлагатай байж болно. Эхнэр нь нөхрийнхөө эелдэг бус үйлдэл эсвэл алдааны жишээг ерөнхийдөө түүний эрх мэдлийг үгүйсгэх шалтаг болгон ашигладаг ч байх боломжтой. Гэхдээ эдгээр нь Бурханы тушаасан Үгэнд дуулгаваргүй байгаа хэрэг юм.

Библи бидэнд бурханлаг, захирагддаг эхнэр нөхрөө Эзэн дээр авчирч чадна гэж хэлдэг. Нөхөр нь сайн эхнэрийн улмаас итгэгч болно гэсэн баталгаа байхгүй ч, хэрэв түүний Христэд итгэгч эхнэр нь түүнд үл захирагддаг бол итгэгч болох магадлал хамаагүй бага байх болно. Эхнэр нь хүндэтгэлтэй хандсанаар нөхрөөсөө ихээхэн таашаал хүртэж болох ч, энэ нь түүнийг хийх үндсэн шалтгаан биш юм. Харин эхнэр нь нөхөртөө хүндэтгэл үзүүлэх ёстой бөгөөд Бурханыг ийнхүү баярлуулахыг хүсдэг учраас тэр үүнийг хийдэг.

Сургаалт үгс 12:4-д “Зохистой сайн эхнэр эр нөхрийн титэм. Гутамшигт эхнэр ясанд нь буглах идээ бээр.” гэж хэлсэн. Хэрэв эхнэр нь нөхрөө найзуудынх нь дэргэд үл хүндэтгэсэн байдлаар хандвал дахин буцаах боломжгүйгээр нэр төрийг нь сэвтүүлж орхидог. Эрчүүд үнэнч эхнэртэй бусад эрчүүдийг биширдэг. Эрчүүд үл хүндэтгэсэн эхнэртэй бусад эрчүүдийг өрөвддөг.

(3) Эхнэр нь нөхрийнхөө хэрэгцээнд анхаарал хандуулснаар хүндэлдэг (Сургаалт үгс 31:15, 21, 25, 27).

Эхнэр нь унд хоол бэлтгэх болон гэр орноо нөхөртөө таалагдахуйц байдлаар арчлах талаар тусгай нарийн ширийн зүйлийг сурах үед нөхөр нь хүндлэгдэж байгаагаа мэдэрдэг. Хэрэв эхнэр нь нөхрийнхөө төлөө зуршлаа өөрчлөхөөс татгалзвал, нөхөр нь эхнэрийнхээ хувьд чухал биш болжээ гэж мэдэрдэг.

Хэрэв эхнэр нь ажил, найз нөхөд, чуулган эсвэл зугаацдаг зүйлдээ завгүй болоод нөхрөө ярих үед сонсохгүй, түүний хэрэгцээг анзаарахад цаг гаргахгүй бол нөхөр нь эхнэрийнхээ хувьд чухал биш гэж мэдэрдэг.

Эхлэл 2:18-д “ЭЗЭН Бурхан—Хүн ганцаараа байх нь сайн биш. Би түүнд тохирох туслагчийг буй болгоё гэжээ” хэмээн заасан байдаг.

(4) Эхнэр нь нөхрөө бие махбодын дотно байдлаар хүндэлдэг.

Бэлгийн ханамж ихэнх эрчүүдэд зарим эмэгтэйчүүдийнхээс илүү чухал мэт санагддаг. Эмэгтэй хүн тухайн нөхцөл, сэтгэл санааны байдлаас болоод бэлгийн харилцаанд орох дур хүсэл төрөхгүй байж болно. Энэ нь эрэгтэй хүний хүсдэгээс бага байдаг. Хэрэв эхнэр нь нөхрийнхөө хэрэгцээг ойлгохгүй бол тэр ихэвчлэн сэтгэл дундуур байх боломжтой. Эхнэр нь өмнө нь харсан болон амсаж туулсан хүчирхийллээс болж нөхрийнхөө бэлгийн хүслийг үл тоомсорлож ч болох юм. Энэ тохиолдолд нөхөр нь эхнэртээ тэвчээртэй, ойлгож хандахыг хичээх ёстой. Харин эхнэр нь өөрөө тийм хэрэгцээг мэдрэхгүй байсан ч нөхрийнхөө бэлгийн хэрэгцээг хангах нь өөрт нь сайн гэдгийг ойлгох хэрэгтэй. Хэрэв нөхөр нь эхнэртээ үнэнч, итгэмжтэй ханддаг, өөр эмэгтэйчүүдтэй буруу харилцаанд байдаггүй бол эхнэр нь түүний хэрэгцээг анхаарахгүй байх үед гомддог. Нөхрийн хувьд гэрлэлтийн амлалтдаа үнэнч байх нь түүний бие махбодын ханамжаас хэзээ ч хамаарах ёсгүй юм. Харин эхнэр нь түүний бэлгийн хэрэгцээнд анхаарал хандуулснаар нөхрийнхөө уруу татагдах нөхцлийг багасгаж чадна.

Соломоны дуун номд “Хайрт минь минийх харин би түүнийх… Хүрээд ир хайрт минь хөдөө тийш одоцгооё өнөө шөнийг тосгонд үдэцгээе... Амраглал юугаа тэнд чамдаа өгье” (Соломоны дуун 2:16; Соломоны дуун 7:11-12 нэмж тодруулсан, мөн 1 Коринт 7:3-5 эшлэлийг үз) гэж тэмдэглэжээ.

Дараах догол мөрөнд байгаа тодорхойлолт нь гэрлэлт дэх бүх зөрчилдөөнд хамаарахгүй ч түгээмэл тохиолддог. Эдгээр тодорхойлолт нь эхнэр нөхөр хоёр мэдэрч байгаа зүйлдээ сүнслэг биш байдлаар хариу үйлдэх үед тохиолддог төрөлхийн шалтгаан-үр дагавартай холбоотой зан байдлыг харуулдаг. Энэ нь (1) өөрсдөө юу мэдэрч байгаагаа танихгүй байх үед, (2) Бурханы үнэнийг болон Тэр тэднээс хүсэж буй зүйлийг санахгүй байх үед, (3) Библийн арга замаар хариу үйлдэхэд тусалдаг Сүнсэнд найдаж түшихгүй байх үед тохиолддог.

Хэрэв эхнэр нь Сүнсээр алхаж, Бурханы хайрыг өөрөөрөө дамжуулахгүй бол гэрлэлтэд хор хөнөөл учруулдаг төрөлх арга барилаар хариу үйлдэл үзүүлж болох юм. Хэрэв эхнэр нь хайрлуулж байгаагаа мэдрэхгүй бол тэрээр аюулгүй байдлыг ч мэдэрч чаддаггүй. Улмаар тэр өөрийгөө хамгаалж, нөхрийнхөө эрх мэдлийг эсэргүүцэж эхэлдэг. Учир нь нөхөр нь өөрт нь санаа тавина гэдэгт тэр итгэдэггүй. Эхнэр нь ийм байх үед нөхөр үл хүндлэгдэх байдлыг мэдэрдэг. Энэ үедээ хэрэв нөхөр нь эрх мэдлээ хамгаалж, хүндлэхийг шаардаж эхлэвэл эхнэр нь түүнийг өөрт нь хайргүй гэж улам ихээр мэдэрдэг.

Хэрэв нөхөр нь Сүнсээр алхаж, Бурханы хайрыг өөрөөрөө дамжуулахгүй бол гэрлэлтээ бат бэх болгох хандлагаа гээх болно. Нөхөр нь үл хүндлэлийг мэдрэх үедээ өвдөлт, уур уцаарыг мэдэрдэг. Тэр энэ үедээ эхнэрээ өвтгөх үгийг хэлэх боломжтой. Тэрээр сэтгэл хөдлөлөө хянахыг хичээснээр чимээгүй болж болох юм. Тэрбээр эхнэрийнхээ дэргэд байхыг хүсэхгүй эсвэл сэтгэлээ түүнд нээхийг хүсэхгүй болдог. Учир нь нөхөр нь эхнэртэйгээ хамт биш, холбоогүй гэж мэдэрдэг. Энэ үед эхнэр нь яагаад ийм байгааг тэр ойлгодоггүй. Магадгүй эхнэр нь аз жаргалгүй байгаагаа болон нөхөр нь өөрчлөгдөх ёстойг ойлгуулахын тулд түүнийг үл хүндэтгэсэн ч байж болно. Нөхөр нь уурлаж эсвэл хөндийрөх үед тэр өөрийнх нь мэдрэмжинд санаа тавихгүй байгаагаа баталлаа гэж эхнэр нь боддог. Тэгээд тэр бүр ч илүү үл хүндэтгэх байдлыг гаргадаг.

Гэрлэлтийн харилцаа гэмтсэн үед хүн уруу таталтад илүү өртөмтгий болдог. Эхнэр нь нөхрийнхөө удирдлагыг эсэргүүцэх байдалд илүү уруу татагддаг. Бусдад нөхрийнхөө талаар үл хүндэтгэсэн байдлаар ярих зэргээр уруу татагддаг. Тэр өөрийг нь үнэлдэг мэт санагдах өөр нэг эрэгтэйн анхаарлыг таашааж уруу татагдаж болно. Эхнэрийнх нь зан байдал түүнийг гомдоож байгаа учраас нөхөр нь түүнээс хол байхаар уруу татагддаг. Улмаар тэр эхнэрээ хайрлах үйлдэл хийх хүсэлгүй болдог. Тэрээр мөн өөрийг нь биширдэг өөр нэг эмэгтэйн анхаарлыг таашааж уруу татагдаж болно.

Хүн бүр сонголтынхоо төлөө Бурханы өмнө хариуцлагатай. Бурхан хүний нүглийг ханийнх нь хийсэн зүйлээр өршөөхгүй. Биднийг хэрхэн амьдрахад туслах хүчийг Бурхан амладаг. Энд өгүүлж буй санаа нь хүн ханиасаа хэрэгтэй зүйлээ шаардах эсвэл өөрийн нүглийг ханьдаа тохохын аль аль нь биш юм. Зорилго нь хүн Бурханыг баярлуулах, ханийнхаа хэрэгцээг хангах хариуцлагаа ухамсарлах явдал юм.

Заримдаа хүн амьдралаа амар хялбар байлгах арга замыг хайдаг. Нөхөр нь эхнэрээ өөрчлөх замаар амьдралаа амар хялбар болгохыг хүсдэг. Үүнтэй адилаар эхнэр нь нөхрөө өөрчилбөл амьдрал нь илүү дээр байна гэж бодож магадгүй. Зөвлөгч, пастор эсвэл найзуудаасаа нөгөө хүнээ хэрхэн өөрчлөх талаар асуудаг. Хань ижлээ өөрчлөх нь зөв зорилго биш. Харилцааны техникийг ашиглан амьдралаа амар хялбар болгохыг хичээх нь Бурханыг болон нөгөө хүнээ хайрлах сэдлийн улмаас биш юм.

Заримдаа хүн нөгөө хүнийхээ алдааг засах гэж олон жил хичээдэг. Тэд нэг ижил алдааг шүүмжлэхээ хэзээ ч зогсоодоггүй. Хэдийгээр хүн бүр жинхэнээсээ алдаа дутагдалтай ч эхнэр нөхөр хоёр бие биенээ алдаатай нь хамт хүлээн зөвшөөрөх ёстой. Алдаа нь хувийн шинж байдал, зан чанар эсвэл сүнслэг (тэр ч байтугай нүгэл) алдаа дутагдал байж болно. Харилцаа нь нөгөө хүний өөрчлөгдөх хүсэл эрмэлзлээс хамаарах ёсгүй. Тэр өөрчлөгдөх боломжгүй гэж мэдэрч болно. Өөрчлөгдөхгүй байгаа шалтгаан нь юу ч байсан, эхнэр нөхөр хоёр хайр, хүндэтгэлийг үзүүлж, бие биенээ алдаатай нь хамт үнэлдэг байх учиртай.

Бурхан эрэгтэй, эмэгтэй хүмүүсийг онцлогтойгоор бүтээсэн бөгөөд хүний хэрэгцээг хангахын тулд гэрлэлтийг бий болгожээ. Гэсэн хэдий ч гэрлэлт, гэр бүл нүгэлд гүн гүнзгийгээр өртөж гэмтсэн ертөнцөд бид амьдарч байна. Бидний хүн нэг бүр өөрийн болон бидэнд нөлөөлсөн бусдын нүглээс болж гэмтсэн. Биднийг өөрчилж, бусдад нигүүлсэл үзүүлэхэд тусалдаг нигүүлсэлгүйгээр Бурханы зорьж буй гэрлэлтийг бид амсаж туулах боломжгүй. Сэдэл маань цэвэр ариун, хайр маань хүчтэй, үйлчлэл маань даруу байхын тулд бидэнд Бурханы Сүнсний цэвэрлэгээ хэрэгтэй.

► Энэ хичээлээр үзсэн ямар ойлголтууд таны хувьд шинэлэг байсан бэ? Та өөрийн хандлага, зан байдалдаа хэрхэн өөрчлөлт оруулахаар төлөвлөж байна вэ?

► Гэрлэлтүүдийг бат бэх болгохын тулд чуулган юу хийж чадах вэ?

Тэнгэрлэг Эцэг минь,

Олон онцгой хэрэгцээг хангахын тулд гэрлэлтийн харилцааг бүтээсэн танд талархъя. Бидэнд гэрлэлтийн талаарх зааврыг өгсөнд баярлалаа.

Бидэнд зохих ёсоор халамжлах хайр, ойлголтыг өгөөч. Таны хайрыг ертөнцөд харуулдаг гэр бүлтэй байхад бидэнд туслаач.

Таны адил хайрлахад тусалдаг нигүүлсэлд тань баярлалаа.

Амен

(1) 1 Коринт 13:4-8 эшлэлийг цээжил. Дараагийн хичээлийн эхэнд уг эшлэлийг цээжээр унших эсвэл бичнэ үү.

(2) Нөхөр эсвэл эхнэрийн хэрэгцээг тодорхойлсон хоёр хуудас эргэцүүлэл бич. Эдгээр хэрэгцээг хангахад туслах гэр бүлийн хүний зан байдлын жишээг өгнө үү. Таны хэлэлцсэн хэрэгцээ бүрд тохирох Бичвэрийн эшлэлийг ашиглаарай.